Мученики Тимофей, чтец и Мавра, Фиваидские

Жития

Мученики Тимофей и Мавра

Святые Тимофей и Мавра пострадали за веру во время гонения императора Диоклитиана (284–305). Святой Тимофей происходил из села Перапеи (Фиваида Египетская), был сыном священника по имени Пиколпосс и состоял чтецом в церковном клире, а также хранителем и переписчиком богослужебных книг. На святого Тимофея было донесено, что он хранит христианские книги, которые по повелению императора отбирали и сжигали. Святого Тимофея привели к правителю Ариану, который потребовал выдачи священных книг. За отказ выполнить приказание святого подвергли страшным мучениям. Ему вонзили в уши две раскаленные железные палки, отчего у страдальца вытекли глаза, и он ослеп. Святой Тимофей мужественно терпел боль и благодарил Бога, что сподобился страдать за Него. Мучители повесили святого вниз головой, вложив ему в рот кусок дерева, и привязали к его шее тяжелый камень. Страдания святого Тимофея были настолько тяжки, что сами исполнители казни стали просить правителя ослабить истязания. В это время Ариану сообщили, что у Тимофея есть молодая супруга по имени Мавра, на которой он женился всего 20 дней назад. Ариан приказал привести Мавру, надеясь, что в ее присутствии непреклонность мученика поколеблется. По просьбе Мавры изо рта мученика вынули кусок дерева, чтобы он мог говорить. Святой Тимофей убедил жену не бояться мучений и идти вместе с ним на подвиг. Святая Мавра ответила: "Я готова умереть с тобой" – и смело исповедала себя христианкой. Ариан приказал вырвать ей волосы на голове и отрубить пальцы на руках. Святая Мавра с радостью перенесла пытки и даже благодарила правителя за муки, претерпеваемые во искупление грехов. Тогда Ариан приказал бросить святую Мавру в кипящий котел, но она не ощущала боли и осталась невредимой. Заподозрив, что слуги из сострадания к мученице наполнили котел холодной водой, Ариан подошел и велел святой брызнуть ему на руку воды из котла. Когда мученица выполнила это, Ариан вскрикнул от боли и отдернул обожженную руку. Тогда, мгновенно повинуясь силе чуда, Ариан исповедал Бога, в Которого верует Мавра, истинным Богом и приказал отпустить святую, но сильна еще была власть диавола над правителем, и вскоре он вновь стал убеждать святую Мавру принести жертву богам. Ничего не добившись, Ариан еще более распалился сатанинской яростью и стал измышлять новые мучения. Тогда народ стал возмущаться и требовать прекращения издевательства над ни в чем неповинной женщиной. Но святая Мавра, обратившись к народу, сказала: "Пусть никто не защищает меня, один у меня Защитник – Бог, на Которого я уповаю".

Наконец, после долгих истязаний Ариан приказал распять мучеников. В течение девяти дней висели они на крестах лицом друг к другу.

На десятый день мученического подвига святые предали Господу свои души. Это произошло в 286 году. Впоследствии в Константинополе стала торжественно праздноваться память святых мучеников Тимофея и Мавры и был построен храм в их честь.

Мощи святого Тимофея находятся в монастыре Диоскориу в районе Рефимно на острове Крит.

Тропарь, глас 4

Му́ченицы Твои́, Го́споди,
во страда́ниих свои́х венцы́ прия́ша нетле́нныя от Тебе́, Бо́га на́шего,
иму́ще бо кре́пость Твою́,
мучи́телей низложи́ша,
сокруши́ша и де́монов немощны́я де́рзости.
Тех моли́твами

спаси́ ду́ши на́ша.

Ин тропарь, глас 4 Тимофе́я дне́сь, ве́рнии, с сострада́лицею супру́гою почти́м,/ Ма́врою, неве́стою Христо́вою,/ сих велича́юще благодерзнове́нное терпе́ние./ Си́и бо распе́ншеся, стопа́м Закла́ннаго после́доваша любо́вию,// и всех грехи́ ко Кресту́ Пригвозди́вшаго.

Кондак, глас 4

Многообра́зныя я́звы претерпе́вше
и венцы́ от Бо́га прие́мше,
о нас моли́теся ко Го́споду,
па́мять всесвяще́нную ва́шу соверша́ющих,
превели́кий Тимофе́е и пресла́вная Ма́вро,
е́же умири́ти град и лю́ди,

Той бо есть ве́рных утвержде́ние.

Канон святым мученикам Тимофею и Мавре Фиваидским

Минея, 3 Мая.

Глас 6

Песнь 1

Ирмос: Я́ко по су́ху, пешеше́ствовав Изра́иль
по бе́здне стопа́ми,
гони́теля фарао́на
ви́дя потопля́ема,
Бо́гу побе́дную песнь
пои́м, вопия́ше.

Припев: Святи́и му́ченицы, моли́те Бо́га о на́с.

Свяще́нных страда́лец свяще́нное и честно́е торжество́,
лю́дие свяще́ннии, свяще́нно почти́м,
я́ко да тех мольба́ми от бед изба́вимся.

Припев: Святи́и му́ченицы, моли́те Бо́га о на́с.

Священнопобе́дныя венцы́ от Христа́ прия́ти
тща́щеся умре́ти па́че, не́же жи́ти, до́блии му́ченицы, я́ве изво́ливше,
тем сла́ву получи́ша.

Сла́ва Отцу́ и Сы́ну и Свято́му Ду́ху.

Не убоя́вшеся боле́зней плотски́х, ни мук устраши́вшеся,
ни огня́ гони́телей, страстоте́рпцы му́ченицы
Христа́ на суди́щи му́жески пропове́даете.

И ны́не и при́сно и во ве́ки веко́в. Ами́нь.

Богородичен: Пресу́щное Сло́во, существо́ прие́м от чи́стых крове́й Твои́х,
богосоде́ла нас и тле́ния изба́ви, Чи́стая,
сего́ ра́ди, ве́рнии, Тя всегда́ сла́вим.

Песнь 3

Ирмос: Несть свят,
я́коже Ты, Го́споди Бо́же мой,
вознесы́й рог ве́рных Твои́х, Бла́же,
и утверди́вый нас на ка́мени
испове́дания Твоего́.

Припев: Святи́и му́ченицы, моли́те Бо́га о на́с.

Бо́жия кни́ги лю́дем свяще́нно отверза́я
и просвеща́я сердца́, во́ине Христо́в Тимофе́е,
в честно́е муче́ние, ра́дуяся, вшел еси́.

Припев: Святи́и му́ченицы, моли́те Бо́га о на́с.

Боже́ственным жела́нием ду́шу распали́в, му́чениче,
ко огню́ мук приступи́л еси́ терпели́вно,
те́мже тя Христо́ва Боже́ственная роса́, блаже́нне, прохлади́.

Сла́ва Отцу́ и Сы́ну и Свято́му Ду́ху.

Ум твой, воззре́нием к Бо́гу просвеща́емь, му́чениче,
не чу́яше отню́д желе́з лю́тых прикоснове́ния, разжже́нных быва́ющих,
сла́вне Тимофе́е.

И ны́не и при́сно и во ве́ки веко́в. Ами́нь.

Богородичен: Сый естество́м безстра́стен
Сын Твой, Де́во, прия́т плоть от крове́й Твои́х чи́стых
и стра́стию кре́стною от страсте́й мя, Чи́стая, изба́ви.

Седален, глас 1

Поче́тше Бо́га, омрачи́ша пре́лесть Тимофе́й му́дрый и сла́вная Ма́вра
и, вся́ко претерпе́вше, прехва́льнии, му́чение,
просвети́шася па́че луч со́лнечных
и бы́ша сослужи́тели А́нгелом,
и́хже ве́рою сла́вим.

Песнь 4

Ирмос: Христо́с моя́ си́ла,
Бог и Госпо́дь,
Честна́я Це́рковь
боголе́пно пое́т, взыва́ющи,
от смы́сла чи́ста о Го́споде пра́зднующи.

Припев: Святи́и му́ченицы, моли́те Бо́га о на́с.

Вели́каго благосла́вия возжеле́вше, сподо́бистеся сего́,
ча́да Све́та Боже́ственнаго бы́вше,
великому́ченицы Христо́вы, А́нгелом равностоя́тели.

Припев: Святи́и му́ченицы, моли́те Бо́га о на́с.

Святы́х чино́м сочета́вся и благопослушли́ве у́ши к Боже́ственным зако́ном име́я, сла́вне,
проверте́ния кре́пко претерпе́л еси́, Тимофе́е.

Припев: Святи́и му́ченицы, моли́те Бо́га о на́с.

Воздви́гше тя на дре́во, суему́дреннии
отягчава́ют ка́мением главу́, сла́вне Тимофе́е,
но укрепля́ше тя Христо́с, Боже́ственною стра́стию украша́ема.

Сла́ва Отцу́ и Сы́ну и Свято́му Ду́ху.

Теку́щих непостоя́ннаго, блаже́ннии, возгнуша́стеся вои́стинну тече́ния
и са́ми себе́ боле́знем отда́сте,
сего́ ра́ди я́же от ве́ка блага́я восприя́сте.

И ны́не и при́сно и во ве́ки веко́в. Ами́нь.

Богородичен: Чистоты́ селе́ние, жили́ще Влады́ки всех
и проро́ков всех сбытие́, Богора́дованная Чи́стая,
пою́щия Тя уще́дри.

Песнь 5

Ирмос: Бо́жиим све́том Твои́м, Бла́же,
у́тренюющих Ти ду́ши любо́вию озари́, молю́ся,
Тя ве́дети, Сло́ве Бо́жий,
и́стиннаго Бо́га,
от мра́ка грехо́внаго взыва́юща.

Припев: Святи́и му́ченицы, моли́те Бо́га о на́с.

Супру́жника своего́, Ма́вро, светови́дных слове́с послу́ша любе́зно
и, омраче́ние зло́е отве́ргши, свет была́ еси́ муче́нием, Богоблаже́нная.

Припев: Святи́и му́ченицы, моли́те Бо́га о на́с.

Боже́ственным Ду́хом себе́, Ма́вро, вооружи́вши, честна́я,
к боре́нию льсти́ваго, ра́дуяся, изошла́ еси́
и, сего́ побе́ждши, побе́дныя венцы́, му́ченице, прия́ла еси́.

Сла́ва Отцу́ и Сы́ну и Свято́му Ду́ху.

Еди́наго Тя, Го́спода Иису́са, испове́давши честна́я,
руко́ю челове́ка созда́вшаго,
посека́ется перст ручны́х,
непра́ведное томле́ние му́жески терпя́щи.

И ны́не и при́сно и во ве́ки веко́в. Ами́нь.

Богородичен: Бу́рю помышле́ний, воста́ния страсте́й,
напа́стей волне́ние утиши́, Де́во Богора́дованная,
и спаси́ мя, пою́ща вели́чия Твоя́.

Песнь 6

Ирмос: Жите́йское мо́ре,
воздвиза́емое зря напа́стей бу́рею,
к ти́хому приста́нищу Твоему́ прите́к, вопию́ Ти:
возведи́ от тли живо́т мой,
Многоми́лостиве.

Припев: Святи́и му́ченицы, моли́те Бо́га о на́с.

Святи́и му́ченицы, я́дрилом Креста́ духо́вно окриля́еми,
напа́стей пучи́ну без вре́да ве́рою претеко́сте
и в Боже́ственных приста́нищах почи́ша.

Припев: Святи́и му́ченицы, моли́те Бо́га о на́с.

Разже́гше коно́б, в той тя, Христа́ испове́дающу, вверго́ша злочести́вии,
но пребыла́ еси́ неврежде́на,
росо́ю Ду́ха обре́тше тя, Ма́вро, прохлажде́ну.

Сла́ва Отцу́ и Сы́ну и Свято́му Ду́ху.

Связа́еми му́ченицы вся вяза́ния вра́жия му́жески разреши́сте
и любо́вию до конца́ Христу́ ду́ши привяза́сте
пло́ти отложе́нием всеприснопа́мятнии.

И ны́не и при́сно и во ве́ки веко́в. Ами́нь.

Богородичен: Всеблага́я Влады́чице, Я́же Преблага́го Бо́га пло́тию ро́ждши,
озло́бленное страстьми́ мое́ се́рдце ублажи́,
да ве́рою и любо́вию велича́ю Тя.

Кондак, глас 4

Многообра́зныя я́звы претерпе́вше
и венцы́ от Бо́га прие́мше,
о нас моли́теся ко Го́споду,
па́мять всесвяще́нную ва́шу соверша́ющих,
превели́кий Тимофе́е и пресла́вная Ма́вро,
е́же умири́ти град и лю́ди,
Той бо есть ве́рных утвержде́ние.

Песнь 7

Ирмос: Росода́тельну у́бо пещь
соде́ла А́нгел
преподо́бным отроко́м,
халде́и же опаля́ющее веле́ние Бо́жие
мучи́теля увеща́ вопи́ти:
благослове́н еси́, Бо́же оте́ц на́ших.

Припев: Святи́и му́ченицы, моли́те Бо́га о на́с.

Не чу́яше, свеща́ми, пресла́вная, опаля́ема всю́ду,
огнь в се́рдцы любве́ нося́щи Христо́в
и Сему́ вопию́щи приле́жно:
благослове́н еси́, Бо́же оте́ц на́ших.

Припев: Святи́и му́ченицы, моли́те Бо́га о на́с.

Дрема́ние от о́чию отри́нул зло́бное, о Тимофе́е,
претерпе́л еси́ о́чию ослепле́ние, Христа́ серде́чныма очи́ма зря и поя́:
благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

До́льняя презре́вше, Боже́ственнии му́ченицы, Вы́шнее же жили́ще насле́доваша,
свяще́нными да почту́тся пе́сньми, пою́ще непреста́нно с ни́ми:
благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Препе́тая Де́во, препе́таго Бо́га поро́ждшая,
пою́щия Тя прича́стники покажи́ све́та
и изба́ви гее́нны, и огня́,
и вся́каго вре́да вра́жия моли́твами Твои́ми.

Песнь 8

Ирмос: Из пла́мене преподо́бным ро́су источи́л еси́
и пра́веднаго же́ртву водо́ю попали́л еси́:
вся бо твори́ши, Христе́, то́кмо е́же хоте́ти.
Тя превозно́сим во вся ве́ки.

Припев: Святи́и му́ченицы, моли́те Бо́га о на́с.

Соблюда́юще зако́ны Вседержи́теля, беззако́ннующих держа́ве не приклони́стеся,
че́сти лука́вым де́моном не принесо́сте, му́ченицы до́блии,
Госпо́дни насле́дницы.

Припев: Святи́и му́ченицы, моли́те Бо́га о на́с.

Сопряже́нием изря́дным я́ве совокупля́еми,
и́го Госпо́дне ле́гкое взя́сте ку́пно на вы́ю му́ченицы
и му́ченическим сопричто́стеся стадо́м.

Припев: Святи́и му́ченицы, моли́те Бо́га о на́с.

На дре́ве пострада́вше кре́стнем, прехва́льнии на мно́ги дни,
изобрази́сте страсть честну́ю нас ра́ди пострада́вшаго во́лею,
Его́же превозно́сим во вся ве́ки.

Сла́ва Отцу́ и Сы́ну и Свято́му Ду́ху.

Ну́жднейшую вои́стинну смерть, святи́и, просте́ртием боле́зни претерпе́сте,
те́мже к неболе́зненней жи́зни преста́вистеся,
воспева́юще Христа́ во вся ве́ки.

И ны́не и при́сно и во ве́ки веко́в. Ами́нь.

Богородичен: Украси́лася еси́, Де́во, поро́ждши прекра́снаго добро́тою Христа́ Го́спода,
Боже́ственными ве́рныя заря́ми просвеща́ющаго,
Его́же превозно́сим во вся ве́ки.

Песнь 9

Ирмос: Бо́га челове́ком невозмо́жно ви́дети,
на Него́же не сме́ют чи́ни А́нгельстии взира́ти,
Тобо́ю же, Всечи́стая, яви́ся челове́ком
Сло́во воплоще́нно,
Его́же велича́юще,
с Небе́сными во́и
Тя ублажа́ем.

Припев: Святи́и му́ченицы, моли́те Бо́га о на́с.

Ви́дети сла́ву сподо́бистеся Себе́ излия́вшаго за милосе́рдие, прехва́льнии,
Того́ бо зако́ны сохрани́сте и о́бщницы Сего́ страсте́й бы́сте.
Те́мже, соше́дшеся, благоче́стно вас почита́ем.

Припев: Святи́и му́ченицы, моли́те Бо́га о на́с.

Часо́м равночи́сленну ме́ру сотвори́сте, му́дрии,
но́щи и дни пригвожде́ни е́же за милосе́рдие ко Кресту́ прибли́жшагося,
Его́же испове́дающе, все́ми влады́чествующаго, в ру́це Сего́ ва́ша ду́хи преда́сте.

Припев: Святи́и му́ченицы, моли́те Бо́га о на́с.

Во́инство А́нгел, лик блаже́нный проро́к,
апо́стол, му́ченик и преподо́бных во исхо́д ваш собра́шася,
всех же Влады́ка венцы́ увязе́, му́ченицы, вас побе́дными, я́ко Преблаги́й.

Сла́ва Отцу́ и Сы́ну и Свято́му Ду́ху.

Нам, любо́вию вас почита́ющим и честно́е ва́ше соверша́ющим торжество́,
страда́льцы Христо́вы до́блии,
разреше́ние грехо́в, жития́ исправле́ние
и всех лю́тых премене́ние, му́дрии, испроси́те.

И ны́не и при́сно и во ве́ки веко́в. Ами́нь.

Богородичен: Све́том Твои́м мя, Богора́дованная, в жена́х Де́во, просвети́, молю́ся,
и огня́ ве́чнаго мя изба́ви,
я́ко да велича́ю Тя, я́ко да сла́влю Тя,
я́ко да по до́лгу воспою́ вели́чия Твоя́.