Перенесение мощей святителя и чудотворца Николая из Мир Ликийских в Бар (1087)

Даты

22 мая

Тропарь, глас 4

Приспе́ день све́тлаго торжества́,
град Ба́рский ра́дуется,
и с ним вселе́нная вся ликовству́ет
пе́сньми и пе́ньми духо́вными:
днесь бо свяще́нное торжество́
в пренесе́ние честны́х и многоцеле́бных моще́й
святи́теля и чудотво́рца Никола́я,
я́коже со́лнце незаходи́мое, возсия́, светоза́рными луча́ми,
разгоня́я тьму искуше́ний же и бед
от вопию́щих ве́рно:

спаса́й нас я́ко предста́тель наш вели́кий, Нико́лае.

Ин тропарь, глас 4 Оте́чество свое́, Ми́ры Лики́йския, не оста́вль ду́хом,/ во преми́рный град Ба́рский пресла́вно те́лом пренесе́ся, архиере́ю Нико́лае./ И отту́ду мно́жество челове́ческое свои́м прише́ствием возвесели́л еси́/ и боля́щия исцели́л еси́./ Те́мже тя мо́лим, святи́телю Нико́лае,/ моли́ Христа́ Бо́га,// да спасе́т ду́ши на́ша.

Кондак, глас 3

Взы́де я́ко звезда́ от вост́ока до за́пада
твоя́ мо́щи, святи́телю Нико́лае,
мо́ре же освяти́ся ше́ствием твои́м,
и град Ба́рский прие́млет тобо́ю благода́ть:
нас ра́ди яви́лся еси́ чудотво́рец изя́щный,

преди́вный и ми́лостивый.

Молитва

О, всехва́льный и всечестны́й архиере́ю, вели́кий чудотво́рче, святи́телю Христо́в, о́тче Нико́лае, челове́че Бо́жий, и ве́рный ра́бе, му́жу жела́ний, сосу́де избра́нный, кре́пкий сто́лпе церко́вный, свети́льниче пресве́тлый, звездо́ осиява́ющая и освеща́ющая всю вселе́нную, ты еси́ пра́ведник, я́ко фи́никс процве́тший, насажде́нный во дво́рех Го́спода своего́: живы́й в Ми́рех, ми́ром благоуха́л еси́, и ми́ро приснотеку́щее благода́ти Бо́жия источа́еши. Твои́м ше́ствием, пресвяты́й о́тче, мо́ре освяти́ся, егда́ многочуде́сныя твоя́ мо́щи ше́ствоваху во град Ба́рский, от восто́ка до за́пада хвали́ти и́мя Госпо́дне. О преизя́щный и преди́вный чудотво́рче, ско́рый помо́щниче, те́плый засту́пниче, па́стырю предо́брый, спаса́ющий слове́сное ста́до от вся́ких бед, тебе́ прославля́ем и тебе́ велича́ем, я́ко наде́жду всех христиа́н, исто́чника чуде́с, защи́тителя ве́рных, прему́драго учи́теля, а́лчущих корми́теля, пла́чущих весе́лие, наги́х одея́ние, боля́щих врача́, по мо́рю пла́вающих упра́вителя, пле́нников свободи́теля, вдов и сиро́т пита́теля и засту́пника, целому́дрия храни́теля, младе́нцев кро́ткаго наказа́теля, ста́рых укрепле́ние, по́стников наста́вника, тружда́ющихся упокое́ние, ни́щих и убо́гих изоби́льное бога́тство. Услы́ши нас, моля́щихся тебе́ и прибега́ющих под кров твой, яви́ предста́тельство твое́ о нас к Вы́шнему и исходата́йствуй твои́ми Богоприя́тными моли́твами вся поле́зная ко спасе́нию душ и теле́с на́ших: сохрани́ святу́ю оби́тель сию́ (или: храм сей), вся́кий град и весь, и вся́кую страну́ христиа́нскую, и лю́ди живу́щыя, от вся́кого озлобле́ния по́мощию твое́ю: ве́мы бо, ве́мы, я́ко мно́го мо́жет моли́тва пра́веднаго, поспешеству́ющая во благо́е: тебе́ же пра́веднаго по преблагослове́нней Де́ве Мари́и, предста́теля ко Всеми́лостивому Бо́гу и́мамы, и к твоему́, преблаги́й о́тче, те́плому хода́тайству и заступле́нию смире́нно притека́ем: ты нас соблюди́ я́ко бо́дрый и до́брый па́стырь, от вся́ких враго́в, губи́тельства, тру́са, гра́да, гла́да, пото́па, огня́, меча́, наше́ствия иноплеме́нников, и во вся́ких беда́х и ско́рбех на́ших подава́й нам ру́ку по́мощи и отве́рзи две́ри милосе́рдия Бо́жия; поне́же недосто́йны есмы́ зре́ти высоту́ Небе́сную, от мно́жества непра́вд на́ших: свя́зани есмы́ у́зами грехо́вными, и николи́же во́ли Созда́теля на́шего сотвори́хом, ни сохрани́хом повеле́ний Его́. Тем же преклоня́ем коле́на сокруше́нна и смире́нна се́рдца на́шего к Зижди́телю своему́, и твоего́ оте́ческаго заступле́ния к Нему́ про́сим: помози́ нам, уго́дниче Бо́жий, да не поги́бнем со беззако́нии на́шими, изба́ви нас от вся́кого зла, и от вся́кия ве́щи сопроти́вныя, упра́ви ум наш, и укрепи́ се́рдце на́ше в пра́вой ве́ре, в нейже твои́м предста́тельством и хода́тайством, ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде поживе́м житие́, и да сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, еди́наго в Тро́ице сла́вимаго и поклоня́емаго Бо́га, ны́не и при́сно, и во ве́ки веко́в. Ами́нь.

2-я Молитва

О, до́брый наш па́стырю и богому́дрый наста́вниче, святи́телю Христо́в Нико́лае! Услы́ши нас гре́шных, моля́щихся тебе́ и призыва́ющих в по́мощь ско́рое предста́тельство твое́; виждь нас не́мощных, отвсю́ду уловля́емых, вся́каго бла́га лише́нных и умо́м от малоду́шия помраче́нных; потщи́ся, уго́дниче Бо́жий, не оста́вити нас в грехо́внем плену́ бы́ти, да не бу́дем в ра́дость враго́м на́шим и не у́мрем в лука́вых дея́ниих на́ших. Моли́ о нас недосто́йных Соде́теля на́шего и Влады́ку, Ему́же ты со безпло́тными ли́ки предстои́ши: ми́лостива к нам сотвори́ Бо́га на́шего в ны́нешнем житии́ и в бу́дущем ве́це, да не возда́ст нам по дело́м на́шим и по нечистоте́ серде́ц на́ших, но по свое́й бла́гости возда́ст нам. На твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем, и ко пресвято́му о́бразу твоему́ припа́дающе, по́мощи про́сим: изба́ви нас, уго́дниче Христо́в, от зол находя́щих на нас, и укроти́ во́лны страсте́й и бед возстаю́щих на нас, да ра́ди святы́х твои́х моли́тв не обы́мет нас напасть и не погря́знем в пучи́не грехо́вней и в ти́не страсте́й на́ших. Моли́, святи́телю Христо́в Нико́лае, Христа́ Бо́га на́шего, да пода́ст нам ми́рное житие́ и оставле́ние грехо́в, душа́м же на́шим спасе́ние и ве́лию ми́лость, ны́не и при́сно и во ве́ки веко́в. Ами́нь.

3-я Молитва

О вели́кий засту́пниче, архиере́ю Бо́жий, Нико́лае преблаже́нне, и́же подсо́лнечную осия́вый чудесы́, призыва́ющим же тя ско́рый услы́шатель явля́яйся, и́хже при́сно предваря́еши и спаса́еши, и избавля́еши, и от бед вся́ческих изъима́еши, от Бо́га да́нною ти чуде́с и даро́в благода́тию! Услы́ши мя недосто́йнаго, с ве́рою тя призыва́юща и моле́бное тебе́ принося́ща пе́ние; тебе́ бо хода́тая на умоле́ние ко Христу́ предлага́ю. О преслову́щий в чудесе́х, святи́телем высото́! я́ко име́яй дерзнове́ние, ско́ро Влады́це предста́ни, и преподо́бнии свои́ ру́це моле́бне к Нему́ простри́ о мне гре́шнем, и от Него́ щедро́ты бла́гости пода́ждь ми, и приими́ мя в свое́ заступле́ние, и от всех бед и зол мя изба́ви, от наше́ствия враго́в ви́димых и неви́димых свобожда́я, и тех всех наве́ты и злохи́трства погубля́я, и борю́щих мя во всей жи́зни мое́й отража́я; прегреше́нием же мои́м проще́ние испроси́, и спасе́на мя Христу́ предста́ви и Ца́рствия Небе́снаго сподо́би улучи́ти за мно́жество Того́ человеколю́бия, Ему́же подоба́ет вся́ка сла́ва, честь и поклоне́ние, со безнача́льным его Отце́м, и с Пресвяты́м и Благи́м и Животворя́щим Ду́хом, ны́не и при́сно и во ве́ки веко́в. Ами́нь.

4-я Молитва

О, всесвяты́й Нико́лае, уго́дниче преизря́дный Госпо́день, те́плый наш засту́пниче, и везде́ в ско́рбех ско́рый помо́щниче! Помози́ ми, гре́шному и уны́лому, в настоя́щем сем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́ и Сы́на и Свята́го Ду́ха и твое́ ми́лостивное предста́тельство, ны́не и при́сно и во ве́ки веко́в. Ами́нь.

5-я Молитва

О, всеблаги́й о́тче Нико́лае, па́стырю и учи́телю всех ве́рою притека́ющих к твоему́ заступле́нию и те́плою моли́твою тебе́ призыва́ющих! Ско́ро потщи́ся и изба́ви Христо́во ста́до от волко́в, гу́бящих е́; и вся́кую страну́ христиа́нскую огради́ и сохрани́ святы́ми твои́ми моли́твами, от мирска́го мяте́жа, тру́са, наше́ствия иноплеме́нников и междоусо́бныя бра́ни, от гла́да, пото́па, огня́ и напра́сныя сме́рти; и я́коже поми́ловал еси́ трие́х муже́й в темни́це сидя́щих и изба́вил еси́ их царе́ва гне́ва и посече́ния ме́чнаго, та́ко поми́луй и мене́, умо́м, сло́вом и де́лом во тьме грехо́в су́ща, изба́ви мя гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию Христо́с Бог ти́хое и безгре́шное житие́ даст ми пожи́ти в ве́це сем и изба́вит мя шу́ияго стоя́ния, сподо́бит же десна́го со все́ми святы́ми. Ами́нь.

Канон святителю Николаю, архиепископу Мир Ликийских, Чудотворцу

Минея, 9 Мая.

Глас 4

Песнь 1

Ирмос: Отве́рзу уста́ моя́,
и напо́лнятся Ду́ха,
и сло́во отры́гну Цари́це Ма́тери,
и явлю́ся, све́тло торжеству́я,
и воспою́, ра́дуяся, Тоя́ чудеса́.

Припев: Святи́телю о́тче Нико́лае, моли́ Бо́га о на́с.

Просвети́ ду́шу и се́рдце, молю́ Ти ся, Светода́вче, тва́ри Соде́телю,
дар пода́ждь ми воспева́нием пе́ти Твоего́ уго́дника пречестна́го,
и́мже мир от ско́рби изба́ви.

Сла́ва Отцу́ и Сы́ну и Свято́му Ду́ху.

Небе́сную ты обре́т прему́дрость,
я́ко тала́нта вруче́ннаго, благоупотреби́л еси́:
то́ю бо, разори́в противобо́жную лесть,
умудри́л еси́ лю́ди Боже́ственным уче́нием.

И ны́не и при́сно и во ве́ки веко́в. Ами́нь.

Богородичен: Зачина́ется Преве́чный, и соверше́нный обновля́ется,
из Отрокови́цы Де́тищ ражда́ется,
Его́же пропове́дал еси́ во двою́ существу́,
во еди́ной же Ипоста́си, Богоблаже́нне.

Песнь 3

Ирмос: Твоя́ песносло́вцы, Богоро́дице,
живы́й и незави́стный Исто́чниче,
лик себе́ совоку́пльшия, духо́вно утверди́,
в Боже́ственней Твое́й сла́ве
венце́в сла́вы сподо́би.

Припев: Святи́телю о́тче Нико́лае, моли́ Бо́га о на́с.

Печа́льнии тя обрето́хом кре́пкое утеше́ние,
помраче́ннии – свет, и злых измене́ние и́же скорбьми́ одержи́мии,
свяще́ннейший о́тче.

Сла́ва Отцу́ и Сы́ну и Свято́му Ду́ху.

Святи́телю Нико́лае, Бо́жия уста́ быв,
из уст во́лка неприя́зненна лю́ди изба́вил еси́, сла́вне,
и приве́л еси́ Творцу́ дар, дая́й исцеле́ние всем.

И ны́не и при́сно и во ве́ки веко́в. Ами́нь.

Богородичен: Еди́н роди́тися изво́ли пло́тию из Тебе́,
вы́ше сло́ва сый Сло́во, Богома́ти Пречи́стая,
избра́вый слугу́ Себе́ и учи́теля наро́дом иера́рха Никола́я.

Седален, глас 1

Пренесе́ние твои́х честны́х моще́й положе́ние нам бысть пра́зднества све́тла,
святи́телю Госпо́день прехва́льный,
е́же хва́лим благоче́стно, и ра́достно чту́ще тя све́та незаходи́маго Со́лнца,
ве́рным добро́то, Нико́лае.

Песнь 4

Ирмос: Неизсле́дный Бо́жий сове́т,
е́же от Де́вы воплоще́ния Тебе́, Вы́шняго,
проро́к Авваку́м усмотря́я, зовя́ше:
сла́ва си́ле Твое́й, Го́споди.

Припев: Святи́телю о́тче Нико́лае, моли́ Бо́га о на́с.

Нача́льна, Богогла́се, Све́та Бо́жия прича́стием вторы́й яви́лся еси́,
сия́нием просвеща́ющ мра́чныя,
я́ко рачи́тель добродете́ли, преизя́щен сла́вою.

Сла́ва Отцу́ и Сы́ну и Свято́му Ду́ху.

Изба́ви ста́до твое́ от грехо́вныя бу́ри, бед же и волн проти́вных,
вводя́ ны при́сно к приста́нищем безво́лненным,
спаси́тельными твои́ми моли́твами.

И ны́не и при́сно и во ве́ки веко́в. Ами́нь.

Богородичен: Естество́м несказа́нно Вы́шнего Све́та,
милосе́рдием пребога́таго ро́ждшая неизрече́нно,
обнища́вшия ны, Пречи́стая, Бо́жиими да́ры обогати́.

Песнь 5

Ирмос: Ужасо́шася вся́ческая
о Боже́ственней сла́ве Твое́й;
Ты бо, Неискусобра́чная Де́во,
име́ла еси́ во утро́бе над все́ми Бо́га
и родила́ еси́ Безле́тнаго Сы́на,
всем воспева́ющим Тя
мир подава́ющая.

Припев: Святи́телю о́тче Нико́лае, моли́ Бо́га о на́с.

Мно́гим чудотворе́нием кра́сне но́зе стяжа́в,
всем блага́я благовести́л еси́,
от вражды́ ве́тхия свобо́дны творя́ Боже́ственным уче́нием,
спаси́ ны, священнонача́льниче.

Сла́ва Отцу́ и Сы́ну и Свято́му Ду́ху.

Бо́га благоволе́нием на хребе́т морски́й всед
и со благогове́йными му́жи мно́гу пучи́ну преше́д,
ко гра́ду Ба́рску прише́л еси́, блаже́нне Нико́лае.

И ны́не и при́сно и во ве́ки веко́в. Ами́нь.

Богородичен: Щит ве́рным, Бо́жия Ма́ти Де́во, Тя вои́стинну сла́вим, а́нгельски зову́ще Ти:
ра́дуйся, Благослове́нная и Благода́тная, слы́шание и глаго́лание стра́шно
и ди́вно поко́ище Влады́це тва́ри вся́кия.

Песнь 6

Ирмос: Боже́ственное сие́ и всечестно́е
соверша́юще пра́зднество,
Богому́дрии, Богома́тере,
прииди́те, рука́ми воспле́щим,
от Нея́ ро́ждшагося Бо́га сла́вим.

Припев: Святи́телю о́тче Нико́лае, моли́ Бо́га о на́с.

Лю́ди Бо́жия ко спасе́нию устро́ивый во пло́ти Я́вльшагося мно́гия ра́ди бла́гости,
пропове́дниче Нико́лае и язы́к учи́телю,
спаси́ ны наставле́нием твои́м.

Сла́ва Отцу́ и Сы́ну и Свято́му Ду́ху.

Име́вый путь мо́ре и стези́ во́ды,
умоли́ у Го́спода, е́же нам мо́ре жите́йское преплы́ти без вре́да
и стезе́ю вод сле́зных дости́гнути Ца́рствие Небе́сное.

И ны́не и при́сно и во ве́ки веко́в. Ами́нь.

Богородичен: Ты дверь Царя́ Небе́с и храм сла́вы Его́, Де́во Всепе́тая,
отве́рзи нам две́ри милосе́рдия
и введи́ ны моли́твами Твои́ми в жили́ща Небе́сныя сла́вы.

Кондак, глас 3

Взыдо́ша, я́ко звезда́, от восто́ка до за́пада
твоя́ мо́щи, святи́телю Нико́лае,
мо́ре же освяти́ся ше́ствием твои́м,
и град Ба́рский прие́млет тобо́ю благода́ть:
нас бо де́ля яви́лся еси́ чудотво́рец изя́щный,
преди́вный и ми́лостивый.

Икос

Воспои́м ны́не святи́теля пе́сньми, Ми́рским лю́дем па́стыря и учи́теля,
да моли́твами его́ просвети́мся:
сей бо яви́ся чист весь, нетле́нен ду́хом,
Христу́ принося́ же́ртву непоро́чну, чи́сту, Бо́гу благоприя́тну,
я́ко святи́тель, очище́н и душе́ю и те́лом.
Те́мже сый и́стинно Це́ркви предста́тель и побо́рник сея́
и чудотво́рец изя́щен, преди́вен и ми́лостив.

Песнь 7

Ирмос: Не послужи́ша тва́ри Богому́дрии,
па́че Созда́вшаго,
но, о́гненное преще́ние му́жески попра́вше,
ра́довахуся, пою́ще:
препе́тый отце́в Госпо́дь и Бог, благослове́н еси́.

Припев: Святи́телю о́тче Нико́лае, моли́ Бо́га о на́с.

Веще́й су́етством всему́ уму́ челове́ческому обуя́вшу,
я́ко со́лию, даждь цельбу́ сло́вом твои́м и пе́ти Го́сподеви научи́:
препе́тый отце́в Госпо́дь и Бог, благослове́н еси́.

Сла́ва Отцу́ и Сы́ну и Свято́му Ду́ху.

О, пресла́вная твоя́ чудеса́, я́же сотвори́л еси!
Неду́ги бо исцеля́еши и бед избавля́еши, всем вопи́ти повелева́я Го́сподеви:
препе́тый оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: На́шему смире́нию Засту́пница и стена́, Богороди́тельнице Чи́стая, Ты еси́.
И́же раби́ Твои́ су́ще, всегда́ вопие́м Го́сподеви:
препе́тый оте́ц на́ших Бо́же, благослове́н еси́.

Песнь 8

Ирмос: О́троки благочести́выя в пещи́
Рождество́ Богоро́дичо спасло́ есть,
тогда́ у́бо образу́емое,
ны́не же де́йствуемое,
вселе́нную всю воздвиза́ет пе́ти Тебе́:
Го́спода по́йте, дела́,
и превозноси́те Его́ во вся ве́ки.

Припев: Святи́телю о́тче Нико́лае, моли́ Бо́га о на́с.

Возра́сл еси́, я́ко цвет благоуха́нен, ми́рския земли́, сла́вне,
всем принося́ благоуха́нныя вони́, целе́бныя да́ры хва́лящим тя и пою́щим:
Го́спода воспева́йте дела́, и превозноси́те Его́ во вся ве́ки.

Сла́ва Отцу́ и Сы́ну и Свято́му Ду́ху.

Иска́павый Бо́жия благода́ти сла́дость, я́ко гора́ ма́сличная еле́й,
мо́ре име́л еси́ путь, безбе́дствен благода́тию Го́спода, Ему́же сла́дце зове́м:
Го́спода воспева́йте дела́, и превозноси́те Его́ во вся ве́ки.

И ны́не и при́сно и во ве́ки веко́в. Ами́нь.

Богородичен: Лико́в преми́рных со удивле́нием ражда́еши и пребыва́еши при́сно Де́ва:
Сло́во бо родила́ еси́, Челове́ка бы́вша непрело́жна Божество́м,
Ему́же вси пое́м:
Го́спода воспева́йте дела́, и превозноси́те Его́ во вся ве́ки.

Песнь 9

Ирмос: Всяк земноро́дный
да взыгра́ется, ду́хом просвеща́емь,
да торжеству́ет же Безпло́тных умо́в естество,
почита́ющее свяще́нное торжество́ Богома́тере,
и да вопие́т:
ра́дуйся, Всеблаже́нная Богоро́дице,
Чи́стая Присноде́во.

Припев: Святи́телю о́тче Нико́лае, моли́ Бо́га о на́с.

Па́мять твоя днесь прино́сит пра́зднество,
апо́стольский лик и му́ченический собо́р ра́дуется и пра́веднии ду́си,
ве́рнии же тя пе́сньми сла́вим, вопию́ще:
от всех скорбе́й, святи́телю Христо́в, изба́ви ны.

Сла́ва Отцу́ и Сы́ну и Свято́му Ду́ху.

Пресла́вная па́мять твоя́ нам возсия́,
све́тло просвеща́ющи ве́рныя, святи́телю Христо́в Нико́лае му́дре.
Те́мже мо́лим тя: помяни́ всех нас
и от проти́вныя напа́сти вся́кия моли́твами твои́ми изба́ви.

И ны́не и при́сно и во ве́ки веко́в. Ами́нь.

Богородичен: Умертви́ на́ша плотски́я стра́сти и по́хоти, Богороди́тельнице Чи́стая,
уста́ви и страсте́й на́ших бу́рю, утоли́ волне́ние помысло́в,
укрепи́, Благослове́нная Пречи́стая, сердца́ ве́рно чту́щих Тя, Засту́пницу.

Светилен

Вели́ка чудеса́ твоя́, пресвяты́й Нико́лае,
я́ко яви́лся еси́ во сне богому́дрому Константи́ну
и три во́ины спасл еси́, без вины́ на смерть осужде́нныя.
Та́ко и нас спаси́ от напра́сныя и ве́чныя сме́рти,
пресвяты́й Нико́лае, святи́телю Госпо́день.

Справка:

В традиции Православной Церкви с древних времен в разные дни недели (седмицы) за богослужением воспоминаются те или иные события или святые – это называется «седмичным богослужебным кругом».
Со временем богослужебная традиция Церкви распространилась на домашние (келейные) молитвы.

• Богослужение понедельника содержит молитвословия Небесным Силам, вторника – Иоанну Предтече.
• В среду, пятницу и воскресенье Святая Церковь вспоминает Евангельские события предательства Спасителя, Его Крестной смерти и Воскресения, соответственно и богослужебные тексты посвящены Господу и Пресвятой Богородице.
• Суббота по традиции день поминовения усопших и особого моления всем святым от века Богу благоугодившим.
• В четверг совершается память святых апостолов и святителя Николая Чудотворца.

См. «Богослужебные круги»