Блаженный Иси́дор Твердислов, Ростовский, Христа ради юродивый

Краткое житие блаженного Исидора Твердислова

Родился в Германии в богатой католической семье. Оставив родительский дом и раздав бедным имущество, св. Исидор, странствуя, обошел многие земли и города. В России святой избрал местом своего жительства город Ростов и, приняв православие, поселился здесь в хижине из хвороста.

Взяв на себя подвиг юродства о Христе и проводя дни в терпении находящих скорбей, а ночи в молитве, он еще при жизни удостоился дара чудотворения и прозорливости. Так, святой спас от неминуемой гибели одного ростовского купца, брошенного в бушующее море по жребию, чудным образом побывал в Киеве, откуда принес просфору, полученную им от митрополита, предсказал святительское служение князю Савве Оболенскому в самый разгар брачного торжества. Св. Исидора называли Твердисловом, так как слово его всегда сбывалось.

Преставился блаженный в 1474 г. Жители Ростова узнали об этом по дивному благоуханию, разлившемуся по всему городу.

Полное житие блаженного Исидора Твердислова

Св. блаженный Исидор был родом из Пруссии. Он в юности принял православие и отрекся от мира, стал юродствовать и покинул богатый дом родителей с посохом в руках.

Придя в Россию, он остановился в Ростове Великом и, полюбив его за красоту, остался в нем жить. Он построил себе хижину из веток в городе, на возвышенном сухом месте посреди огромной лужи, и прожил в ней до самой своей кончины. Впрочем, он удалялся в нее только для молитвы. Дни же он проводил на улицах города, терпя всякие поношения.

Раз один ростовский купец плыл по морю. Началась буря, и корабль погибал. Бросили жребий, чтобы узнать, за чьи грехи все погибают и кого надо бросить в воду. Жребий пал на самого хозяина. Его посадили на доску и спустили в море. Долго носило его по волнам, и наконец он стал тонуть. Тогда явился ему блаженный Исидор. «Узнаешь ли ты меня?» – спросил он. «Раб Божий Исидор, помоги мне!» – с трудом проговорил несчастный. Блаженный посадил его опять на доску, направил ее вслед за кораблем и, догнав его, посадил на него купца. Спутники его, увидев его в своей среде, были объяты страхом и радостью, потому что поняли, что произошло чудо. Купец же молчал, потому что блаженный запретил ему рассказывать о случившемся с ним. Вернувшись в Ростов, купец каждый раз, когда встречал блаженного Исидора, еще издали почтительно ему кланялся, но если юродивый сам проходил мимо него, то каждый раз подтверждал свое запрещение. И купец всегда говорил, что был спасен от смерти Божественной силой.

Женился в Ростове молодой князь Савва Оболенский. Во время свадебного пира блаженный Исидор вошел в палату и, надев на новобрачного шапку, сплетенную из травы и полевых цветов, сказал: «Вот тебе и архиерейская шапка!» Все смутились, а блаженный уже убежал и шумел с детьми на улице. Но после рождения своего сына-первенца молодая княгиня Дарья Васильевна Оболенская скончалась, а неутешный вдовец постригся в Ферапонтовом Белозерском монастыре с именем Иоасаф и был с 1481 по 1489 г. архиепископом Ростовским. Он был духовным сыном прп. Мартиниана и скончался на покое в Ферапонтовом монастыре (см. житие прп. Мартиниана Белозерского и прп. Галактиона Белозерского – 12 янв.).

За несколько дней до кончины блаженный Исидор затворился в своей хижине, молясь со слезами. В минуту его тихой и одинокой кончины чудное благоухание разлилось по всему городу; заглянув в хижину, один прохожий увидел его лежащим на земле на спине, со сложенными на груди руками.

Погребли его в самой хижине, и почитатели его соорудили на могиле его церковь во имя Вознесения Господня. В XVI в. она была заменена каменной, а в XIX в. была устроена рака. Бесчисленны были чудеса, совершавшиеся на могиле его. Один священник, желавший раскопать могилу блаженного, был отброшен невидимой силой и лишился чувств. Придя в себя, он покаялся и получил исцеление.

Тропарь, глас 4

Просвети́вся Боже́ственною благода́тию, Богому́дре,
целому́дрием мно́гим и терпе́нием
во вре́менней жи́зни тече́ние до́бре сконча́л еси́.
Тем и по сме́рти яви́ тя све́тлость жития́ твоего́:
источа́еши бо исцеле́ний благода́ть
и́же с ве́рою притека́ющим ко свято́му твоему́ гро́бу,
Иси́доре блаже́нне,
моли́ Христа́ Бо́га,

да спасе́т ду́ши на́ша.

Ин тропарь, глас 4 От земли́ Воззва́вый тя на ве́чныя оби́тели,/ соблюда́ет и по сме́рти те́ло твое́ невреди́мо,/ свя́те Иси́доре,/ ты бо в целому́дрии и чистоте́ жития́ пожи́л еси́, блаже́нне,/ не оскверни́в своего́ телесе́,/ те́мже со дерзнове́нием Христа́ Бо́га моли́// спасти́ся душа́м на́шим. Ин тропарь, глас 1 Боже́ственною свы́ше просвети́вся благода́тию, Богому́дре,/ мно́гим терпе́нием во вре́менней жи́зни тече́ние соверши́л еси́,/ те́мже и по успе́нии источа́еши чудеса́/ и́же с ве́рою приходя́щим к ра́це моще́й твои́х, Иси́доре всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудесе́х,// сла́ва Де́йствующему тобо́ю всем исцеле́ния.

Кондак, глас 8

Взбра́нному и ди́вному в пра́ведницех,
и́же у́бо от Христа́ дар чуде́с прии́мшему,
похва́льныя ны́не принесе́м глаго́лы,
но я́ко име́я дерзнове́ние ко Святе́й Тро́ице,
Ю́же моли́ изба́витися от бед рабо́м твои́м, да зове́м ти:

ра́дуйся, Богому́дре Иси́доре.

Ин кондак, глас 4 Ве́рою па́мять твою́, блаже́нне, соверша́ющия,/ соблюда́й от вся́кия зло́бы и собла́зна змии́на,/ и́маши бо дерзнове́ние ко всех Влады́це, Христу́ Бо́гу,/ Его́же моли́ изба́витися от бед и напа́стей рабо́м твои́м,// Богому́дре Иси́доре.

Молитва

О, вели́кий уго́дниче Бо́жий, святы́й пра́ведный Иси́доре! Помози́ мне гре́шному, всегда́ стра́стию грехо́вной побежда́емому: ты бо еси́ предста́тель и засту́пник, и ско́рый помо́щник в ско́рбех мои́х, и усе́рдный хода́тай спасе́ния моего́. Ты ве́рою пра́вою и трудо́м твои́м ве́чныя сла́вы и Ца́рствия Небе́снаго сподо́бился еси́, и ны́не у Престо́ла Влады́ки всех, Царя́ Христа́, Бо́га на́шего предстои́ши. Те́мже и молю́ тя, страстоте́рпче пра́ведный: помяни́ мя окая́ннаго, в ти́не грехо́вной валя́ющагося: уже́ бо не могу́ возвести́ о́чи мои́ к го́рнему Сио́ну, зане́ свя́зан есмь сетьми́ диа́вольскими и попече́ньми жите́йскими. Изба́ви мя моли́твами твои́ми от всех злых наве́тов вра́жиих и от вся́каго греха́, да прииму́ исцеле́ние от язв грехо́вных, от вселюте́йшаго зми́я наложе́нных мне. Все житие́ мое́ окая́нный аз во сласте́х ми́ра сего́ изнури́х, и не и́мам помо́щника, и не вем к кому́ прибе́гнути, да пода́ст ми ру́ку по́мощи. Сего́ ра́ди к тебе́ прибега́ю и си́це молю́ся: о святы́й пра́ведный Иси́доре, пода́ждь ми по́мощь в день Стра́шнаго Суда́: егда́ прии́дет Сын Челове́ческий суди́ти всех, тогда́ умоли́ Того́ стра́шнаго и нелицеме́рнаго Судию́, да не осу́дит мя по беззако́нием мои́м, но да поста́вит одесну́ю Себе́ по вели́цей ми́лости Свое́й. Помоли́ся Влады́це Христу́ Бо́гу, да и в ны́нешнем ве́це ми́лостив бу́дет нам гре́шным и недосто́йным рабо́м Свои́м, и да утверди́т мысль на́шу, е́же отврати́тися нам от вся́каго зла и соблюда́ти спаси́тельная Его́ за́поведи, и про́чее вре́мя жития́ на́шего преити́ в покая́нии и соблюде́нии Бо́жиих за́поведей, да дости́гше Небе́сных оби́телей, непреста́нно сла́вим Еди́наго Триипоста́снаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Канон блаженному Исидору Твердислову, Христа ради юродивому, Ростовскому чудотворцу

Минея, 14 Мая.

Глас 8

Песнь 1

Ирмос: Колесницегони́теля фарао́ня погрузи́
чудотворя́й иногда́
Моисе́йский жезл, крестообра́зно порази́в
и раздели́в мо́ре,
Изра́иля же беглеца́, пешехо́дца спасе́,
песнь Бо́гови воспева́юща.

Припев: Святы́й блажéнный Иси́доре, моли́ Бо́га о на́с.

Выспрь житие́ стяжа́в благодея́нием Боже́ственным
и весь светообра́зен быв, просвеще́ние ми ниспосли́,
я́ко да, ра́дуяся, восхвалю́ пресве́тлое житие́ твое́,
е́же до́бре соверши́в, восприя́л еси́, я́же угото́ва Бог лю́бящим Его́,
Богому́дре Иси́доре.

Припев: Святы́й блажéнный Иси́доре, моли́ Бо́га о на́с.

Боже́ственным разже́гся жела́нием, вся оте́ческия отве́ргл еси́ нра́вы,
Христа́ же обрести́ потща́лся еси́.
И сего́ ра́ди, бе́гая, удали́вся нечести́вых сожи́тельства,
благоче́стия све́том озаре́н был еси́
и Боже́ственными доброде́тельми укра́шен, досточу́дне Иси́доре.

Сла́ва Отцу́ и Сы́ну и Свято́му Ду́ху.

Дрема́ния ве́ждома не дал еси́, блаже́нне Иси́доре,
ниже́ поко́я твоему́ те́лу, до́ндеже сном пра́ведным почи́в,
и непоколеби́м был еси́, я́ко столп, враг неви́димых ополче́нием,
Бо́гу при́сно предстоя́ во всено́щном стоя́нии и славосло́вии,
те́мже от Него́ ны́не просла́вился еси́.

И ны́не и при́сно и во ве́ки веко́в. Ами́нь.

Богородичен: Я́ко ло́жницу Боже́ственную и ле́ствицу,
к Небе́сней возводя́щую высоте́ челове́ческое естество́,
кади́льницу же Невеще́ственнаго и Светоно́снаго У́гля,
в ложесне́х поне́сшу Богоизбра́нную Отрокови́цу Мари́ю, вси ублажа́ем, зову́ще:
ра́дуйся, Чи́стая, ро́ждшая Нача́льника жи́зни на́шея.

Песнь 3

Ирмос: Утвержде́й в нача́ле небеса́ ра́зумом
и зе́млю на вода́х основа́вый,
на ка́мени мя, Христе́, за́поведей Твои́х утверди́,
я́ко несть свят, па́че Тебе́, еди́не Человеколю́бче.

Припев: Святы́й блажéнный Иси́доре, моли́ Бо́га о на́с.

Глаго́лом Боже́ственным после́дуя и сим вы́ну поуча́яся,
испо́лнился еси́ вод благода́тных, и источи́л еси́ пото́ки чуде́с,
и, чуждь быв вся́каго плотска́го жела́ния,
воспева́я, глаго́лал еси́ Бо́гу, Иси́доре:
несть свят, па́че Тебе́, Человеколю́бче.

Припев: Святы́й блажéнный Иси́доре, моли́ Бо́га о на́с.

Благоутро́бие стяжа́л еси́, ми́лостивому Бо́гу подо́бствовав,
расточи́л еси́ бога́тство убо́гим;
те́мже на Небесе́х присносу́щее блаже́нство тебе́ угото́вася,
его́же получи́в, Иси́доре, вопие́ши:
несть свят, па́че Тебе́, Человеколю́бче.

Сла́ва Отцу́ и Сы́ну и Свято́му Ду́ху.

Благоугоди́в Зижди́телю де́лы Боже́ственными, насле́довал еси́ благи́х восприя́тие;
дре́ва у́бо живо́тнаго при́сно наслажда́яся, блаже́нне Иси́доре, воспева́еши непреста́нно:
несть свят, па́че Тебе́, Человеколю́бче.

И ны́не и при́сно и во ве́ки веко́в. Ами́нь.

Богородичен: Святы́х А́нгел су́щи святе́йши, Я́же сих Соде́теля во Твое́й утро́бе поне́сшая
и ро́ждшая, Богоотрокови́це Чи́стая, Изба́вителя челове́ком.
Те́мже Ти согла́сно вопие́м:
несть свя́ты и пречи́сты, ра́зве Тебе́, Влады́чице.

Седален, глас 4

От земли́ Воззва́вый тя на ве́чныя оби́тели
соблюда́ет и по сме́рти неврежде́но те́ло твое́, свя́те:
ты бо в целому́дрии и чистоте́ житие́ по́жил еси́,
не порабо́тився плотски́м страсте́м, Иси́доре Богому́дре.
Те́мже тя любо́вию почита́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Стена́ непобеди́мая нам, христиа́ном, еси́, Богоро́дице Де́во:
к Тебе́ бо прибега́юще, невреди́ми пребыва́ем
и, па́ки согреша́юще, и́мамы Тя Моли́твенницу.
Тем, благодаря́ще, вопие́м Ти:
ра́дуйся, Благода́тная, Госпо́дь с Тобо́ю.

Песнь 4

Ирмос: Ты моя́ кре́пость, Го́споди,
Ты моя́ и си́ла,
Ты мой Бог, Ты мое́ ра́дование,
не оста́вль не́дра О́тча
и на́шу нищету́ посети́в.
Тем с проро́ком Авваку́мом зову́ Ти:
си́ле Твое́й сла́ва, Человеколю́бче.

Припев: Святы́й блажéнный Иси́доре, моли́ Бо́га о на́с.

За́поведей Боже́ственным соверши́тель яви́вся,
неукло́нным ра́зумом, всеблаже́нне, оте́ческаго небре́гл еси́ неве́рствия,
от ю́ности бо житие́ име́л еси́ нескве́рно
и ми́лостивен ра́зум, досточу́дне, зовы́й непреста́нно:
си́ле Твое́й сла́ва, Человеколю́бче.

Припев: Святы́й блажéнный Иси́доре, моли́ Бо́га о на́с.

Ни ми́ра возмуще́ние, ни вла́сти удержа́ние, ни сла́ва вре́менная,
ниже́ тле́емое бога́тство твоея́ к Бо́гу любве́ возмого́ша уклони́ти, Иси́доре.
Но благоволи́л еси́ вои́стинну житие́ изря́дно,
Боже́ственным раче́нием укрепля́емь, взыва́я при́сно:
си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху.

Возвыша́яся Боже́ственными повеле́нии вы́ну,
враг неви́димых смири́л еси́ возвыше́ния умиле́ния слеза́ми,
я́коже кедр, при́сно сый напоя́емь, прия́л еси́ исцеле́ний де́тель, Иси́доре,
судо́м пра́ведным вся́ческая оправда́ющаго, Ему́же предстоя́, вопие́ши:
си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Преукра́шена Боже́ственною сла́вою,
вся́ческая от не су́щих сло́вом соста́вльшаго Бо́га Сло́ва родила́ еси́,
Челове́ка вои́стинну бы́вша,
Его́же о нас, рабе́х Твои́х, моля́щи не преста́й,
Богоро́дице Ма́ти Присноде́во, ве́рою Тебе́ зову́щих:
си́ле Твое́й сла́ва, Влады́чице.

Песнь 5

Ирмос: Вску́ю мя отри́нул еси́
от лица́ Твоего́, Све́те незаходи́мый,
и покры́ла мя есть чужда́я тьма, окая́ннаго?
Но обрати́ мя и к све́ту за́поведей Твои́х
пути́ моя напра́ви, молю́ся.

Припев: Святы́й блажéнный Иси́доре, моли́ Бо́га о на́с.

Све́том невеще́ственным трисия́ннаго Божества́ озаре́н, досточу́дне Иси́доре,
нощь жития́ настоя́щаго непоткнове́нно преше́л еси́
и ны́не, в ве́чных оби́телех с ли́ки преподо́бных водворя́яся,
помина́й нас, всечестну́ю твою́ па́мять на земли́ торжеству́ющих.

Припев: Святы́й блажéнный Иси́доре, моли́ Бо́га о на́с.

Ны́не е́же о тебе́ чу́до ве́лие зри́мо есть
и у́жаса испо́лнено, Богоблаже́нне Иси́доре:
ка́ко на мно́га ле́та земле́ю покрове́нно нетле́нно твое́ те́ло,
во гро́бе лежа́що, соблюда́ется,
судьба́ми, и́миже весть Бог, прославля́я тя.

Сла́ва Отцу́ и Сы́ну и Свято́му Ду́ху.

Богоприя́тному твоему́ начина́нию и чу́дному соверше́нию по Христе́ жития́ твоего́
А́нгельстии чи́ни удиви́шася, Богому́дре Иси́доре,
и́бо во пло́ти сый, тех житию́ подража́тель яви́лся еси́.
Те́мже и дар прозре́ния от Бо́га прия́л еси́,
е́же пресла́вная твори́ти чудеса́.

И ны́не и при́сно и во ве́ки веко́в. Ами́нь.

Богородичен: Моли́ из Тебе́ ро́ждшагося Го́спода, Де́во Отрокови́це Чи́стая,
сохрани́ти рабы́ Твоя́ от сопроти́вных обстоя́ний и бесо́вскаго искуше́ния,
Тя, вои́стинну Бо́жию Ма́терь, испове́дающих,
и страсте́й душетле́нных свободи́ти, и ве́чнаго осужде́ния.

Песнь 6

Ирмос: Очи́сти мя, Спа́се,
мно́га бо беззако́ния моя́,
и из глубины́ зол возведи́, молю́ся,
к Тебе́ бо возопи́х, и услы́ши мя,
Бо́же спасе́ния моего́.

Припев: Святы́й блажéнный Иси́доре, моли́ Бо́га о на́с.

Струи́ благода́ти, я́ко ми́ро благово́нно, от свята́го твоего́ гро́ба истека́ют, всебога́те,
веселя́ще сердца́ ве́рных, от любве́ к тебе́ приходя́щих,
и прогоня́юще кова́рства духо́в лука́вых
си́лою Ду́ха Пресвята́го, Иси́доре.

Припев: Святы́й блажéнный Иси́доре, моли́ Бо́га о на́с.

Во дво́рех Го́спода Савао́фа насажде́н, я́коже фи́никс, процве́л еси́, Богому́дре,
и страсте́й вои́стинну тлетво́рных победи́тель
яви́лся еси́, Иси́доре, поспеше́нием Боже́ственным.
Те́мже и ра́дости пра́ведных сподо́бился еси́, досточу́дне.

Сла́ва Отцу́ и Сы́ну и Свято́му Ду́ху.

Ца́рствия Бо́жия возжела́в, тече́ние до́бре сконча́л еси́
и ве́ру соблю́л еси́ нескве́рнену,
виногра́д быв благопло́ден, Богозва́нне Иси́доре,
принося́ всекра́сныя гро́зды доброде́тели Соде́телю всех, Бо́гу,
венце́м нетле́ния тебе́ украси́вшему.

И ны́не и при́сно и во ве́ки веко́в. Ами́нь.

Богородичен: Избра́ Тебе́ Госпо́дь во всех ро́дех,
благослове́нная в жена́х, непоро́чная Де́во Богоро́дице,
я́ко прекра́сное селе́ние простра́нное, Боже́ственную ло́жницу,
и киво́т святы́ни, и све́щник, и трапе́зу, Чи́стая.

Кондак, глас 8

Взбра́нному и ди́вному в пра́ведницех,
и́же у́бо от Христа́ дар чуде́с прии́мшему,
похва́льныя ны́не принесе́м глаго́лы,
но я́ко име́я дерзнове́ние ко Святе́й Тро́ице,
Ю́же моли́ изба́витися от бед рабо́м твои́м, да зове́м ти:
ра́дуйся, Богому́дре Иси́доре.

Икос

Ка́ко возмогу́, гре́шный и скве́рный, аз вку́пе душе́ю и те́лом исписа́ти,
е́же во пло́ти сый, равноа́нгельное житие́ твое́ и пресла́вная чудеса́?
А́ще у́бо мно́зи прему́дрии не дости́гнут испове́дати
мно́гаго твоего́ терпе́ния, и смире́ния, и те́плыя ко Христу́ любве́,
но, оба́че наде́яся на твое́ беззло́бие, о блаже́нне, си́це вопию́ ти:
ра́дуйся, пресве́тлая звездо́, от за́пада возсия́вшая и к восто́ку прише́дшая.
Ра́дуйся, возненави́девый оте́ческую и богоме́рзкую ве́ру,
Христа́ же еди́наго, над все́ми су́щаго Бо́га, всем се́рдцем возлюби́вый
и Тому́ невозвра́тным жела́нием после́довавый.
Ра́дуйся, бу́йственное и юро́дственное е́же по апо́столу, жи́тельство избра́вый.
Ра́дуйся, премени́вый тле́нная и настоя́щая наде́ждею бу́дущих благ.
Ра́дуйся, дре́внему И́ову уподо́бивыйся терпе́нием.
Ра́дуйся, страстоте́рпче Христо́в непобеди́мый,
но при́сно победи́вый диа́вола твои́м смире́нием.
Ра́дуйся, я́ко дре́вний он Ла́зарь ни́щий, почива́я ны́не в ло́нех Авраа́млих.
Ра́дуйся, и́же по отше́ствии ми́ра сего́
су́щим в беда́х и искуше́ниих гото́в обрета́яся предста́тель и засту́пник.
Ра́дуйся, везде́ призыва́ющих тя бы́стро предваря́яй.
Ра́дуйся, Богому́дре Иси́доре.

Песнь 7

Ирмос: Бо́жия снизхожде́ния
огнь устыде́ся в Вавило́не иногда́,
сего́ ра́ди о́троцы в пещи́, ра́дованною ного́ю,
я́ко во цве́тнице, лику́юще, поя́ху:
благослове́н еси́, Бо́же оте́ц на́ших.

Припев: Святы́й блажéнный Иси́доре, моли́ Бо́га о на́с.

Си́лою укрепля́емь всемогу́щаго Бо́га, плоть умертви́л еси́
и я́же до́лу влеку́щая мудрова́ния, всебога́те, чистото́ю и бде́нием непреста́нным
и ра́зум горе́ стяжа́л еси́, вопия́ непреста́нно, Иси́доре:
благослове́н еси́, Бо́же оте́ц на́ших.

Припев: Святы́й блажéнный Иси́доре, моли́ Бо́га о на́с.

Све́тлости ра́ди жития́ твоего́ удиви́ тя Госпо́дь в чудесе́х, Богому́дре Иси́доре:
купцу́ у́бо, в мо́ри утопа́ющу, скоре́йшим явле́нием предста́л еси́, досточу́дне,
и от глубины́ сего́ изба́вил еси́, вопию́ща:
благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

Го́рнее Ца́рствие, весе́лие присносу́щное и сла́ву неувяда́ющую,
бога́тство неистощи́мое и е́же преподо́бных наслажде́ние,
по́честь трудо́в твои́х восприя́л еси́ от Бо́га, Благоде́теля всех,
Ему́же ны́не предстоя́, вопие́ши:
благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Его́же родила́ еси́, Го́спода, Влады́чице Чи́стая, не преста́й моля́щи,
изъя́ти мя при́сно от враг, оскорбля́ющих мя,
и тя́жкое бре́мя грехо́в мои́х расточи́ти, Богоневе́стная,
я́ко да, ра́дуяся, вопию́:
благослове́н, Пречи́стая, Плод Твоего́ чре́ва.

Песнь 8

Ирмос: Седмери́цею пещь
халде́йский мучи́тель,
Богочести́вым неи́стовно разжже́,
си́лою же лу́чшею спасе́ны, сия́ ви́дев,
Творцу́ и Изба́вителю вопия́ше:
о́троцы, благослови́те,
свяще́нницы, воспо́йте,
лю́дие, превозноси́те во вся ве́ки.

Припев: Святы́й блажéнный Иси́доре, моли́ Бо́га о на́с.

Не то́кмо в жити́и сый,
но и по отше́ствии ми́ра мно́жайшая чудеса́ от честна́го твоего́ гро́ба содева́ются
приходя́щим с ве́рою, всеблаже́нне Иси́доре,
и́бо неду́ги прого́ниши си́лою духо́вною и от бед изыма́еши.
Те́мже, не престаю́ще, вопие́м:
свяще́нницы, воспо́йте, лю́дие, превозноси́те во вся ве́ки.

Припев: Святы́й блажéнный Иси́доре, моли́ Бо́га о на́с.

Дерзну́вша у́бо иере́я извеще́ние прия́ти о святе́м телеси́ твое́м,
Боже́ственная а́бие си́ла напра́сно порази́,
но твои́ми моли́твами исцеле́ние получи́, всехва́льне Иси́доре.
Те́мже и мы, веселя́щеся, вопие́м:
свяще́нницы, воспо́йте, лю́дие, превозноси́те во вся ве́ки.

Сла́ва Отцу́ и Сы́ну и Свято́му Ду́ху.

Доброде́тельным нра́вом и се́рдцем смире́нным
ми́лостив ты яви́лся еси́, досточу́дне Иси́доре, тре́бующим от Тебе́ по́мощи,
при́сно помога́я и чуде́с дея́нием удивля́я ве́рою Го́сподеви вопию́щия:
свяще́нницы, по́йте, лю́дие, превозноси́те во вся ве́ки.

И ны́не и при́сно и во ве́ки веко́в. Ами́нь.

Богородичен: Ада́ма Соде́тель в ложесна́х Твои́х, Чи́стая, зи́ждется
и млеко́м пита́ется, пита́яй вся́ко дыха́ние, Де́во Богоро́дице.
Те́мже я́ко Ма́терь Бо́жию, ве́рнии, Тя прославля́ем
и превозно́сим Чи́стую во ве́ки.

Песнь 9

Ирмос: Ужасе́ся о сем Не́бо,
и земли́ удиви́шася концы́,
я́ко Бог яви́ся челове́ком пло́тски
и чре́во Твое́ бысть простра́ннейшее небе́с.
Тем Тя, Богоро́дицу,
А́нгелов и челове́к чинонача́лия велича́ют.

Припев: Святы́й блажéнный Иси́доре, моли́ Бо́га о на́с.

Зре́ти при́сно возжела́в сла́ву Бо́га на́шего, Иси́доре,
мно́гих доброде́телей разли́чными о́бразы себе́ удобри́л еси́
и, свещу́ нося́, укра́шену еле́ем терпе́ния твоего́,
возше́л еси́ в светоно́сный черто́г,
со А́нгелы сый ясне́е наслажда́ешися Боговиде́ния.

Припев: Святы́й блажéнный Иси́доре, моли́ Бо́га о на́с.

Я́ко у́треннее со́лнце, возсия́ па́мять твоя́ в ми́ре су́щим,
сердца́ озаря́ющи Боже́ственною све́тлостию:
ты бо све́та и дне я́ко вои́стинну сын яви́лся еси́, Богому́дре Иси́доре,
те́мже тя непреста́нно ублажа́ем.

Сла́ва Отцу́ и Сы́ну и Свято́му Ду́ху.

Прему́дростию украша́яся и ра́зумом просвеща́яся, смире́нием се́рдца ра́дуяся,
высото́ю же жития́ сия́я, досточу́дне,
в Небе́сная селе́ния преше́л еси́ и та́мо, в ли́це пра́ведных предстоя́,
нас помина́й, чту́щих тя, блаже́нне Иси́доре.

И ны́не и при́сно и во ве́ки веко́в. Ами́нь.

Богородичен: Све́та Боже́ственнаго прия́телище, луча́ми Божества́ мир озари́вшаго,
ви́дена была́ еси́, Богоблагода́тная,
мост же и ле́ствица, на высоту́ земны́я возводя́щи, Де́во.
Те́мже, ве́рнии, ублажа́ющи, Тя велича́ем.

Светилен

Удали́вся, бе́гая мирски́х сожи́тельства,
Христу́, над все́ми Бо́гу на́шему,
непоро́чным житие́м благоугоди́л еси́, всеблаже́нне Иси́доре,
Его́же ны́не моли́ о нас, рабе́х твои́х,
ве́рою пра́зднующих всечестну́ю па́мять твою́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Му́дрость Ипоста́сную, и Сло́во пресу́щное,
и врача́ всех, Христа́ ро́ждшая, Де́во,
стру́пы и я́звы души́ моея́ исцели́, лю́тыя и многовре́менныя,
и се́рдца моего́ стра́стная утоли́ помышле́ния.