Преподобная Елена Дивеевская (Мантурова)

Одна из первых сестер Дивеевской обители, духовная дочь прп. Серафима Саровского. Отказалась от дворянской жизни, приняла подвиг юродства и служила Богу в смирении и молитве. Скончалась в молодом возрасте (1832), но её святость была явлена чудесами. Прославлена в лике преподобных жен Дивеевских в 2000 году.

* * *

Преподобная Елена Дивеевская, в миру Елена Васильевна Мантурова, происходила из старинного дворянского рода и жила со своим братом Михаилом Васильевичем в родовом селе Нуча Нижегородской губернии.

В 17 лет девушка, стремившаяся к светской жизни, чудным образом была обращена к духовной жизни. Ей привиделся страшный змей, собиравшийся поглотить ее. Девушка взмолилась: «Царица Небесная, спаси! Даю Тебе клятву – никогда не выходить замуж и уйти в монастырь!» Змей тут же исчез. После этого случая Елена Васильевна изменилась, стала читать духовные книги, много молиться. Она жаждала выполнить своё обещание.

Вскоре Елена Васильевна поехала в Саров к отцу Серафиму просить его благословения на поступление в монастырь. Но только через три года преподобный Серафим Саровский благословил Елену поступить в Дивеевскую Казанскую общину. «Не монастырь путь твой, – говорил батюшка, – ты замуж выйдешь, и жених у тебя будет преблагочестивейший...» Только потом Елена Васильевна поняла, о каком женихе говорил батюшка Серафим: он имел в виду Небесного Жениха – Самого Господа Иисуса Христа.

Хотя Елена Васильевна до конца своих дней жила в Казанской общине, мельничным сестрам батюшка говорил о ней: «Госпожа ваша! Начальница!» Но это так смущало юную подвижницу, что она повторяла: «Всегда и во всем слушалась я вас, но в этом не могу! Лучше прикажите мне умереть у ног ваших…»

Елена Васильевна наравне с другими сестрами трудилась на послушаниях и, кроме того, как «словесная», по выражению батюшки, исполняла многие трудные поручения. Необыкновенно добрая от природы, она много помогала сестрам втайне. По заповеди, данной ей батюшкой, она больше молчала и постоянно молилась. Со времени освящения храмов, пристроенных к Казанской церкви (Рождества Христова и Рождества Богородицы), батюшка Серафим назначил Елену Васильевну церковницей и ризничей. Для этого она была пострижена в рясофор.

Однажды ее брат Михаил, также верный ученик преподобного, тяжело заболел, и старец сказал монахине Елене: «Умереть надо ему, матушка, а он мне еще нужен для обители-то нашей. Так вот и послушание тебе: умри ты за Михаила-то Васильевича!» – «Благословите, батюшка», – смиренно ответила она. После этого батюшка Серафим долго беседовал с ней. «Батюшка, я боюсь смерти», – призналась Елена Васильевна. «Что нам с тобой бояться смерти, радость моя! Для нас с тобой будет лишь вечная радость». Как только она шагнула за порог батюшкиной келлии, тут же и упала... Батюшка привел ее в чувство, но, вернувшись домой, она слегла в постель со словами: «Теперь я уже более не встану!»

Елена Васильевна прожила в обители до 27 лет. Перед кончиной она сподобилась многих чудесных видений. Царица Небесная показала ей обители Небесного Дивеева. Через несколько дней болезни 28 мая 1832 года накануне дня Святой Троицы она тихо скончалась.Провидя это духом, святой старец посылал всех в Дивеево: «Скорее, скорее грядите в обитель, там великая госпожа наша отошла ко Господу!» Елена Васильевна была похоронена рядом с первоначальницей матушкой Александрой. Не раз на этом месте хотели хоронить мирских людей, но могила всегда заливалась водой. Когда же хоронили монахиню Елену, это место оставалось сухим.В сороковой день по её кончине отец Серафим предсказал, что «со временем её мощи будут почивать открыто в обители».

На могиле Елены Васильевны не раз творились чудеса и исцеления. В обители до ее закрытия в 1927 году хранились церковные книги, где эти случаи были подробно описаны, но до нас они не дошли.

26 сентября 2000 года были обретены нетленные мощи преподобной Елены Дивеевской, которые вместе с мощами схимонахини Александры (Мельгуновой) и схимонахини Марфы (Мелюковой), согласно пророчеству отца Серафима, были торжественно помещены в храм Рождества Богородицы. 22 декабря 2000 года состоялось её прославление как местночтимой святой Нижегородской епархии.

Православные верующие вспоминают новоявленную святую Земли Русской 28 мая (10 июня) и 8 (21) июля – в день празднования Собора святых жён Дивеевских.

По молитвам преподобной Елены Дивеевской совершаются чудеса исцеления от болезней ног, суставов, зубной и головной боли, душевных расстройств и других заболеваний.

Тропарь, глас 4

Яви́лися есте́ земли́ Росси́йския украше́ние, нача́льницы оби́тели Диве́евския преподо́бныя ма́тери на́ша Алекса́ндро, Ма́рфо и Еле́но, благослове́ние Цари́цы Небе́сныя исполнившия и дерзнове́ние ко Го́споду стяжавшия, моли́те у престо́ла Пресвяты́я Тро́ицы о спасе́нии ду́ш на́ших.

Тропарь, глас 5 Ди́вно бы́сть ко Го́споду призва́ние твое́, сла́вно бы́сть и равноа́нгельное житие́, кро́тко бы́сть твое́ крестоноше́ние, чу́дно бы́сть смиренному́дрие твое́. Послу́шлива была́ еси́ да́же до ча́ши сме́ртныя и из Диве́евской оби́тели в Небе́сную взошла́ еси́. Ра́дуйся, Еле́но преподо́бная, и не оста́ви ны предста́тельством твои́м.

Кондак, глас 8

Диве́евския свети́льницы всесве́тлыя, преподо́бныя ма́тери на́ша Алекса́ндро, Ма́рфо и Еле́но, в поще́нии, бде́нии, моли́тве и труде́х до́бре подвиза́лися есте́ и по сме́рти на́с освещаете чуде́с источеньми и исцеля́ете неду́гующих души́; моли́те Христа́ Бо́га грехо́в оставле́ние дарова́ти любо́вию чту́щим святу́ю па́мять ва́шу.

Кондак, глас 4 Ми́ра суету́ оста́вивши, блаже́нная Еле́но, в Диве́евскую оби́тель всели́лася еси́, и от избра́нника Влады́чицы Пречи́стыя услы́шала еси́: вску́ю сме́рти убоя́лася еси́? По́двигом до́брым подвиза́лася еси́, тече́ние сконча́ла, ве́ру соблюла́ еси́. Про́чее у́бо соблюда́ется вене́ц пра́вды ти, его́же возда́ст ти Госпо́дь в день он, я́ко всем возлюби́вшим явле́ние Его́. Потщи́ся же ско́ро приити́ к Пра́ведному Судии́.

Величание

Ублажа́ем ва́с, преподо́бныя ма́тери на́ша Алекса́ндро, Ма́рфо и Еле́но, и чти́м святу́ю па́мять ва́шу, вы́ бо моли́те о на́с Христа́ Бо́га на́шего.

Молитва

О, преподо́бная и богоно́сная ма́ти Еле́но, Диве́евская сла́во и похвало́, от огнеды́шащего зми́я, тя поглоти́ти тща́вшагося, моли́твами ко Го́споду и де́вственнаго жития́ обетова́нием чуде́сно изба́вленная, святы́м преподо́бным Серафи́мом ко и́ночеству предугото́ванная и Самому́ Го́споду уневе́щенная, нача́льницею общи́ны деви́ческия избра́нная, оба́че слуго́ю всем смиренному́дренно я́вльшаяся, послу́шлива да́же до сме́рти ста́рцу твоему́ бы́вшая, по словеси́ его́ за бра́та твоего́ многострада́льнаго младо́ю уме́ршая, еще́ на земли́ Цари́цу Небе́сную и Христа́ Го́спода ви́девшая и во оби́тели Небе́сныя восхище́нная, моли́ся за ны, малоду́шныя и непослу́шливыя, да и мы сподо́бимся благода́тнаго вразумле́ния, скоре́йшаго исправле́ния и ве́чнаго спасе́ния. Ами́нь.

Акафист преподобной Елене Дивеевской

Кондак 1

Избра́нная неве́сто Христо́ва и помо́щнице на́ша ско́рая, ди́вным житие́м Бо́гу угоди́вшая и бли́жним послужи́вшая, преподо́бная ма́ти на́ша Еле́но, похва́льное прино́сим тебе́ пе́ние; ты же я́ко дерзнове́ние ко Го́споду иму́щая, от вся́ких нас бед свободи́, с любо́вию зову́щих: Ра́дуйся, препо́добная ма́ти Еле́но, обру́чнице Жениха́ Небе́снаго.

Икос 1

А́нгельскую чистоту́ возлюби́вши, ева́нгельски после́довала еси́ Влады́це Христу́, по́двига и́ночества о́браз и пра́вило яви́лася еси́ и Бо́жией Ма́тери угоди́ла еси́. Мы же с благогове́нием и ра́достию глаго́лем ти сицева́я:

Ра́дуйся, Небе́сныя Игу́мении послу́шнице ве́рная;
ра́дуйся, благоче́стия красото́ пресве́тлая.

Ра́дуйся, пресла́вное ве́рных велича́ние;
ра́дуйся, прелюби́мое и́нокинь ра́дование.

Ра́дуйся, доброде́телей цве́те неувяда́емый;
ра́дуйся, любве́ сокро́вище неисчерпа́емое.

Ра́дуйся, се́стер диве́евских заступле́ние;
ра́дуйся, земли́ Ру́сския украше́ние.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 2

Ви́дящи, преподо́бная ма́ти Еле́но, зми́я о́гненнаго, хотя́ща тя поглоти́ти, к Богоро́дице из глубины́ души́ воззва́ла еси́, всем житие́м свои́м послужи́ти Засту́пнице ми́ра и Сы́ну Ея́ и Бо́гу на́шему обеща́ющи, Ему́ же вси со умиле́нием зове́м: Аллилу́иа.

Икос 2

Ра́зум небе́сный стяжа́ла еси́, преподо́бная ма́ти, егда́ от ю́ности твоея́ чу́дно измени́вшися, к ре́вности непоро́чнаго жития́ и́ноческаго себе́ воздви́гла еси́. Сего́ ра́ди приими́ от нас похвалы́ сия́:

Ра́дуйся, Цари́цею Небе́сною на путь спасе́ния поста́вленная;
ра́дуйся, Бо́жия прему́дрости испо́лненная.

Ра́дуйся, све́том покая́ния се́рдце озари́вшая;
ра́дуйся, Жениха́ Кра́снаго возлюби́вшая.

Ра́дуйся, смире́ния высото́ всесве́тлая;
ра́дуйся, ми́лости глубино́ неоскудева́емая.

Ра́дуйся, подви́жнице ве́лия и пресла́вная;
ра́дуйся, преди́внаго благоуха́ния ли́лие непоро́чная.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 3

Си́ла Вы́шняго от ю́ности сохрани́ тя, преподо́бная, егда́, любо́вию Христо́вою утвержда́ема, во оби́тель Саро́вскую прише́дши, ста́рца Серафи́ма проси́ла еси́ неотсту́пно на путь мона́шеский благослове́ния, да непреста́нно возмо́жеши пе́ти Бо́гу: Аллилу́иа.

Икос 3

Име́я тща́ние о спасе́нии души́ твоея́, преподо́бный Серафи́м, весь путь прови́дя твой боголюби́вый, испыта́в тя три ле́та и че́стно предугото́вив, благослови́ во общи́ну Диве́евскую. Мы же, дивя́щеся таково́му о тебе́ Бо́жию промышле́нию, вопие́м:

Ра́дуйся, от ю́ности Христу́ Бо́гу послужи́вшая;
ра́дуйся, Небе́снаго Оте́чества возжеле́вшая.

Ра́дуйся, а́нгельски на земли́ пожи́вшая;
ра́дуйся, плод доброде́телей Всецарю́ прине́сшая.

Ра́дуйся, оби́тели Диве́евския пресла́вная похвало́;
ра́дуйся, и́ноческаго жития́ пра́вило.

Ра́дуйся, дар благода́тных слез стяжа́вшая;
ра́дуйся, чистото́ю непоро́чною просия́вшая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 4

Бу́рю волн жите́йских избежа́вши, ти́хаго приста́нища оби́тели Диве́евския дости́гла еси́ и, та́мо благоче́стно пожи́вши, Небе́сному Жениху́ Христу́ обручи́лася еси́, вы́ну взыва́ющи Ему́: Аллилу́иа.

Икос 4

Слы́шащи запове́данное ста́рцем Серафи́мом и того́ уче́ние слага́ющи в се́рдце свое́м, преподо́бная ма́ти Еле́но, Ме́льничныя общи́ны нача́льницею им нарече́нная, в по́двизех неосла́бно пребыва́ющи, вся поруче́ния его исполня́ла еси́. И мы вси с ве́рою и любо́вию восхваля́ем тя си́це:

Ра́дуйся, Ме́льничныя общи́ны та́инственная нача́льнице;
ра́дуйся, Пресвяты́я Богоро́дицы ди́вная избра́ннице.

Ра́дуйся, испо́лнившая во́лю Всенепоро́чныя Влады́чицы;
ра́дуйся, послужи́вшая устрое́нию святы́я оби́тели.

Ра́дуйся, заве́ты ста́рца Серафи́ма свя́то храни́вшая;
ра́дуйся, наставле́нием его́ ве́рно после́довавшая.

Ра́дуйся, же́ртвенней любви́ науча́ющая;
ра́дуйся, мрак печа́лей прогоня́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 5

Боже́ственная по́мощь вы́ну дарова́лася есть тебе́ во оби́тели [сей] чу́дней, иде́же Сама́ Пренепоро́чная Влады́чица стопа́ма пречи́стыма земли́ каса́лася есть, и ты, блаже́нная ма́ти Еле́но, усе́рдно подвиза́лася еси́ во устрое́нии кинови́и и огражде́нии ея́ кана́вкою и ва́лом, благода́рно пою́щи Го́сподеви: Аллилу́иа.

Икос 5

Ви́дя враг ро́да челове́ча по́двиги и труды́ твоя́, препо́добная Еле́но, восхоте́ устраши́ти тя. Ты же вся претерпе́ла еси́, Взбра́нной Воево́де и Го́споду Вседержи́телю неуста́нно моля́щися, в хра́ме Бо́жием день и нощь пребыва́ющи и Псалти́рь неусы́пно пою́щи. Мы же, сему́ дивя́щеся, вопие́м ти:

Ра́дуйся, на святе́й кана́вке ре́вностно труди́вшаяся;
ра́дуйся, послуша́ние церко́вное усе́рдно исполня́вшая.

Ра́дуйся, дев диве́евских красото́ и благоле́пие;
ра́дуйся, ве́рным в труде́х преди́вное поможе́ние.

Ра́дуйся, чи́стым се́рдцем Спаси́теля ми́ра воспе́вшая;
ра́дуйся, мироде́ржца тьмы си́лою Христа́ победи́вшая.

Ра́дуйся, венцено́сице златоза́рная и Богопросла́вленная;
ра́дуйся, неве́сто Христо́ва непоро́чная.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 6

Пропове́дует оби́тель Диве́евская те́плую любо́вь твою́ ко и́ноческому житию́: ты бо высоты́ дости́гла еси́ доброде́телей и я́ко мироно́сицы у́тру глубоку́, арома́ты взе́мша, гро́ба Христо́ва достиго́ша, та́ко и ты благоуха́ние моли́твы чисте́йшия вме́сто ми́ра Го́споду принесла́ еси́. Све́том богоразу́мия озари́ и на́ша сердца́, да вси зове́м Всеще́дрому Бо́гу: Аллилу́иа.

Икос 6

Возсия́ любы́ Боже́ственная в се́рдце твое́м, Еле́но Богому́драя, я́ко кротча́йшая нра́вом и кро́ткаго Христа́ подо́бница, ми́лостива душе́ю, подая́ния бе́дным раздава́ла еси́ та́йно, милосе́рдием бли́жним послужи́вши и Бо́гу угоди́вши. Те́мже мы с любо́вию воспева́ем ти си́це:

Ра́дуйся, простото́ю и смире́нием све́тло украше́нная;
ра́дуйся, соверше́нства чу́днаго дости́гшая.

Ра́дуйся, си́рыя и ни́щия напита́вшая;
ра́дуйся, тя́готы се́стер любвеоби́льно поне́сшая.

Ра́дуйся, любве́ и милосе́рдия глубино́ неисчерпа́емая;
ра́дуйся, преди́вное в го́рестех на́ших услы́шание.

Ра́дуйся, ко Христу́ путеводи́тельнице ве́рная;
ра́дуйся, спасе́ния наста́внице богому́драя.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 7

Хотя́щи испо́лнити повеле́ния духоно́снаго ста́рца Серафи́ма, в разли́чныя ве́си после́довала еси́, преподо́бная ма́ти, ревну́юще об устрое́нии оби́тели вели́кия, и́же четве́ртым уде́лом Бо́жия Ма́тери нарица́ется, да вси просла́вят Всеблагослове́нную Влады́чицу Богоро́дицу и Еди́наго Человеколю́бца Христа́, воспева́я песнь побе́дную: Аллилу́иа.

Икос 7

Но́вую избра́нницу Цари́цы Небе́сныя тя ви́дяще, к те́плому предста́тельству твоему́ усе́рдно прибега́ем, в ско́рбех и боле́знех тя на по́мощь призыва́ем, заступле́ния твоего́ ми́лостиваго прося́ще и с любо́вию велича́ем тя, зову́ще:

Ра́дуйся, подви́жнице преди́вная и ма́ти милосе́рдная;
ра́дуйся, моли́твеннице о нас усе́рдная.

Ра́дуйся, ти́хою ра́достию сердца́ исполня́ющая;
ра́дуйся, любо́вию свое́ю согрева́ющая.

Ра́дуйся, возлю́бленная Цари́цею Небе́сною;
ра́дуйся, по́мощь показу́ющая чуде́сную.

Ра́дуйся, преподо́бнаго Серафи́ма сотаи́ннице;
ра́дуйся, ми́лостивая в беда́х изба́вительнице.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 8

Стра́нное чу́до ви́дим на тебе́, преподо́бная, я́ко открове́ний ди́вных от преподо́бнаго Серафи́ма сподо́билася еси́ и, им на путь спасе́ния наставля́ема, ра́дости духо́вныя испо́лнилася еси́, вопию́щи Всеблаго́му Бо́гу: Аллилу́иа.

Икос 8

Все́ю душе́ю свое́ю Бо́га возлюби́вши, ма́ти Еле́но, к по́двигом неосла́бным потекла́ еси́, зову́щи: «Се́рдце мое́ да возвы́сится к Тебе́, Сло́ве» и о Го́рнем помышля́ла еси́, ве́дущи Еди́наго Христа́ и Сего́ ра́спята. Мы же, восхваля́ющи любо́вь твою́ ко Го́споду, си́це вопие́м ти:

Ра́дуйся, лю́бящим тя ве́чных благ хода́таице;
ра́дуйся, в моли́твах неусыпа́ющая предста́тельнице.

Ра́дуйся, в труде́х и по́двизех неутоми́мая;
ра́дуйся, Свята́го Ду́ха мирополо́жнице благода́тная.

Ра́дуйся, подража́тельнице а́нгельския чистоты́;
ра́дуйся, све́тлосте Ева́нгельскаго сия́ния.

Ра́дуйся, Це́ркве чу́дное похвале́ние;
ра́дуйся, во обстоя́ниих непрело́жное упова́ние.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 9

Вся А́нгельския си́лы удиви́шася, чу́дное житие́ твое́ зря́ще, ма́ти Еле́но, и ве́рная твоя́ служи́тельница Иусти́на в ди́внем виде́нии сад прекра́сный ви́дела есть, угото́ванный тебе́ от Влады́ки Христа́, да вме́сте с не́ю ве́чно прославля́ете Всесвяту́ю Тро́ицу, воспева́ющи ра́достно песнь: Аллилу́иа.

Икос 9

Вети́и многовеща́ннии не возмо́гут изрещи́ кре́пость любве́ твоея́, всесла́вная, всем бо се́страм, по́мощь подаю́щи, от чи́стаго се́рдца со смире́нием послужи́ла еси́. Та́ко и нас научи́ ми́лости твори́ти, страсте́й мра́чную бу́рю отжени́, стена́ния серде́чныя на ра́дость преложи́, да со умиле́нием вопие́м ти:

Ра́дуйся, помо́щнице всеблага́я и предо́брая;
ра́дуйся, ма́ти чадолюби́вая и кро́ткая.

Ра́дуйся, неду́гов и слез го́рьких утоле́ние;
ра́дуйся, скорбя́щим душа́м сла́дкое утеше́ние.

Ра́дуйся, звездо́, благода́тию Свята́го Ду́ха сия́ющая;
ра́дуйся, взаи́мную любо́вь и единомы́слие утвержда́ющая.

Ра́дуйся, на по́мощь к нам поспеша́ющая;
ра́дуйся, Созда́теля о нас умоля́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 10

Спасе́ния ве́чнаго жела́ющи, житие́ Богоуго́дное яви́ла еси́, преподо́бная ма́ти Еле́но, вои́стину и кончи́на твоя́ бысть чуде́сна, ю́же за повеле́ние старца́ Серафи́ма прия́ла еси́, в соверше́ннем послуша́нии да́же до сме́рти пребы́вши и все упова́ние на милосе́рдие Бо́жие возложи́вши, со умиле́нием воспе́ла еси́ Ему́: Аллилу́иа.

Икос 10

Стена́ всем де́вам и ино́кинь отра́да, Пресвята́я Де́ва яви́ся ти, Небе́снаго Диве́ева сла́ву показу́ющи. Ты же я́ко Огнь Неизрече́нный узре́ла еси́ Го́спода, и с Ним Цари́цу и святы́х А́нгелов. Те́мже приими́ от нас похвалы́ сия́:

Ра́дуйся, ди́вных открове́ний и виде́ний сла́вная прича́стнице;
ра́дуйся, о сестра́х диве́евских усе́рдная моли́твеннице.

Ра́дуйся, явле́нием Бо́жия Ма́тери обра́дованная;
ра́дуйся, Ца́рствие Бо́жие унасле́довавшая.

Ра́дуйся, подаю́щая ми́лость и оби́лие щедро́т;
ра́дуйся, го́рлице ти́хая и кро́ткая.

Ра́дуйся, ла́стовице, весну́ спасе́ния возвеща́ющая;
ра́дуйся, в Диве́еве Небе́снем нас ожида́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 11

Пе́ние всеумиле́нное а́ще и прино́сим ти, преподо́бная Еле́но, ничто́же соверша́ем досто́йно чудесе́м и милосе́рдию твоему́, всем бо, с ве́рою и любо́вию ко святы́м твои́м моще́м припа́дающим, исцеле́ния благода́тныя источа́еши. Мы же Созда́теля и Творца́ вся́ческих благодаря́ще, воспева́ем Ему́: Аллилу́иа.

Икос 11

Светоприе́мную свещу́ свою́ угото́вала еси́, богоблаже́нная ма́ти, и с му́дрыми де́вами в небе́сных черто́зех ны́не лику́еши. К ра́зуму Боже́ственному и нас наста́ви, наважде́ний вра́жиих избавля́ющи, да охраня́еми тобо́ю, вопие́м ти:

Ра́дуйся, ева́нгельския за́поведи испо́лнившая;
ра́дуйся, свеще́, любо́вию Христо́вою горя́щая.

Ра́дуйся, Ма́терь Све́та велича́ющая;
ра́дуйся, красото́ю любве́ сердца́ на́ша украша́ющая.

Ра́дуйся, изнемога́ющим отра́до и благода́тное укрепле́ние;
ра́дуйся, пла́чущим ра́досте и те́плое заступле́ние.

Ра́дуйся, бла́гости, ти́хости и любве́ испо́лненная;
ра́дуйся, венце́в нетле́нных удосто́енная.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 12

Благода́ть и ве́лию ми́лость всем подае́ши, преподо́бная ма́ти Еле́но, я́ко дерзнове́ние мно́гое ко Го́споду стяжа́вшая, и к покая́нию и́стинному нас призыва́еши, от бед и напа́стей оби́тель свою́ огражда́еши и науча́еши нас благода́рне пе́ти Всеми́лостивому Спа́су: Аллилу́иа.

Икос 12

Пою́ще твое́ прославле́ние, лику́ет и ра́дуется о тебе́ деви́ческий лик, и оби́тель Бо́жия Ма́тери духо́вно торжеству́ет, ю́же ми́лостивно посеща́еши и всех любо́вию свое́ю покрыва́еши, возглаша́ющих ти си́це:

Ра́дуйся, заре́, ко све́ту Христо́вы ве́ры наставля́ющая;
ра́дуйся, о́браз Богому́драго попече́ния явля́ющая.

Ра́дуйся, в гро́зных испыта́ниях преди́вное поможе́ние;
ра́дуйся, оби́тели побо́рнице и неруши́мая стено́.

Ра́дуйся, Де́вы Чи́стыя служи́тельнице ве́рная;
ра́дуйся, го́рния чистоты́ жемчу́жино многосве́тлая.

Ра́дуйся, Престо́лу Пресвяты́я Тро́ицы во сла́ве предстоя́щая;
ра́дуйся, ду́хом любве́ с на́ми пребыва́ющая.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 13

О преди́вная уго́днице и чадолюби́вая ма́ти на́ша Еле́но, приими́ ма́лое сие́ моле́ние на́ше, с любо́вию тебе́ возноси́мое, и предстоя́щи ны́не Престо́лу Пресвяты́я Тро́ицы, моли́ся о всех нас, да сподо́бимся дости́гнути Ца́рствия Небе́снаго, в ра́дости пою́ще Триеди́ному Бо́гу: Аллилу́иа.

[Се́й конда́к глаго́лется три́жды.]

Икос 1

А́нгельскую чистоту́ возлюби́вши, ева́нгельски после́довала еси́ Влады́це Христу́, по́двига и́ночества о́браз и пра́вило яви́лася еси́ и Бо́жией Ма́тери угоди́ла еси́. Мы же с благогове́нием и ра́достию глаго́лем ти сицева́я:

Ра́дуйся, Небе́сныя Игу́мении послу́шнице ве́рная;
ра́дуйся, благоче́стия красото́ пресве́тлая.

Ра́дуйся, пресла́вное ве́рных велича́ние;
ра́дуйся, прелюби́мое и́нокинь ра́дование.

Ра́дуйся, доброде́телей цве́те неувяда́емый;
ра́дуйся, любве́ сокро́вище неисчерпа́емое.

Ра́дуйся, се́стер диве́евских заступле́ние;
ра́дуйся, земли́ Ру́сския украше́ние.

Ра́дуйся, препо́добная ма́ти Еле́но, обру́чнице Жениха́ Небе́снаго.

Кондак 1

Избра́нная неве́сто Христо́ва и помо́щнице на́ша ско́рая, ди́вным житие́м Бо́гу угоди́вшая и бли́жним послужи́вшая, преподо́бная ма́ти на́ша Еле́но, похва́льное прино́сим тебе́ пе́ние; ты же я́ко дерзнове́ние ко Го́споду иму́щая, от вся́ких нас бед свободи́, с любо́вию зову́щих: Ра́дуйся, препо́добная ма́ти Еле́но, обру́чнице Жениха́ Небе́снаго.

Моли́тва

О пресла́вная ма́ти, ско́рая на́ша помо́щнице и засту́пнице и неусы́пная о нас моли́твеннице! Предстоя́ще честно́му о́бразу твоему́ и на сей [или́: ра́це моще́й твои́х и на сия́] со умиле́нием, я́ко живе́й ти су́щей, взира́юще, мо́лимся усе́рдно: приими́ проше́ния на́ша и принеси́ я́ ко Престо́лу Милосе́рдаго Отца́ Небе́снаго, я́ко дерзнове́ние мно́гое к Нему́ иму́щая; испроси́ притека́ющим к тебе́ и всем правосла́вным христиа́ном ве́чное спасе́ние и земно́е благоде́нствие, на вся же блага́я де́ла и начина́ния ще́дрое благослове́ние, и от вся́ких бед и ско́рбей ско́рое избавле́ние.

Ей, чадолюби́вая ма́ти на́ша! Тебе́, предстоя́щей Престо́лу Бо́жию, ве́домы суть ну́жды на́ша духо́вныя и жите́йския; при́зри на нас ма́терним о́ком и твои́ми моли́твами вся зла́я от нас отврати́, па́че же злых и богопроти́вных обы́чаев изба́ви; утверди́ же во всех ве́ры согла́сное ве́дение, взаи́мную любо́вь и единомы́слие, да во всем житии́ на́шем, словесы́ же и писа́нии и де́лы, сла́вится Всесвято́е И́мя Отца́ и Сы́на и Свята́го Ду́ха во ве́ки веко́в. Ами́нь.