Преподобный Виссарио́н Египетский, пустынник

Прп. Виссарион Египетский (IV-V вв.) – великий подвижник, ученик прп. Исидора Пелусиота. Приняв крещение, путешествовал по святым местам, изучая монашескую жизнь. Дав обет безмолвия, соблюдал крайний аскетизм: вкушал пищу раз в неделю, 40 дней стоял в молитве без сна и пищи. Обладал даром чудотворений (услаждал воду, вызывал дождь, изгонял бесов), но скрывал это из смирения. Спал только стоя или сидя. Скончался в глубокой старости.

Житие преподобного Виссариона, пустынника Египетского

Преподобный Виссарион, чудотворец Египетский, по происхождению египтянин, еще в молодости крестился и вел строгую жизнь, стараясь сохранить данную ему при Крещении благодать. Желая узнать ближе монашескую жизнь, он предпринял путешествие по святым местам, был в Иерусалиме, посетил преподобного Герасима (память 4 марта) в Иорданской пустыне, видел и других пустынников, поучаясь у всех правилам иноческой жизни. По возвращении он принял постриг и стал учеником преподобного Исидора Пелусиота (память 4 февраля). Святой Виссарион принял на себя обет безмолвия, вкушал пищу один раз в неделю, а иногда оставался без пищи и питья по 40 дней. Был случай, когда преподобный, погрузившись в молитву, стоял неподвижно 40 дней и 40 ночей без пищи и сна.

От Бога преподобный Виссарион получил дар чудотворений: когда его ученику в пути сильно захотелось пить, он усладил горькую воду; по его молитве Господь посылал на землю дождь, он мог, как по суше, переходить реки; одним словом изгонял бесов, но делал это прикровенно, чтобы избежать славы. Смирение его было так велико, что, когда однажды священник велел одному из насельников скита, впавшему в грех, выйти из храма, вместе с ним вышел и преподобный со словами: "и я грешен". Спал преподобный Виссарион только стоя или сидя. Большую часть жизни святой провел под открытым небом в молитвенном уединении. Мирно отошел ко Господу, достигнув глубокой старости.

Тропарь, глас 4

Боже отец наших,
творя́й при́сно с на́ми по Твое́й кро́тости,
не отста́ви ми́лость Твою́ от нас,
но моли́твами их

в ми́ре упра́ви живо́т наш.

Кондак, глас 2

Вы́шних сил подража́в, преподо́бне,
о́бразом птиц житие́ пожи́л еси́,
вре́менная в забы́тии положи́в,
непреста́нным жела́нием влеко́м к Небе́сным добро́там Христа́ Царя́,
до́ндеже Того́ дости́гл еси́, Виссарио́не,

моли́ непреста́нно о всех нас.

Канон преподобному Виссариону Египетскому

Минея, 6 Июня.

Глас 2

Песнь 1

Ирмос: Гряди́те, лю́дие,
пои́м песнь Христу́ Бо́гу,
разде́льшему мо́ре и наста́вльшему лю́ди,
я́же изведе́ из рабо́ты еги́петския,
я́ко просла́вися.

Припев: Преподо́бне о́тче Висарио́не, моли́ Бо́га о нас.

Пое́т Бо́гу Це́рковь, лику́ющи в па́мяти твое́й днесь,
Богодохнове́нне Висарио́не,
и ве́рою сла́вит вели́кия, о́тче, по́двиги твоя́.

Припев: Преподо́бне о́тче Висарио́не, моли́ Бо́га о нас.

Раб Бо́гу я́влься, порабо́тил еси́ душе́вными си́лами стра́сти теле́сныя
и свобо́дь вся́кия зло́бы яви́лся еси́, о́тче всечу́дне.

Сла́ва Отцу́ и Сы́ну и Свято́му Ду́ху.

Украси́вся добро́тами по́двиг твои́х,
сосу́д яви́лся еси́ благопотре́бен Боже́ственнаго Ду́ха,
Того́ де́йствия вмеща́ющ, Висарио́не блаже́нне.

И ны́не и при́сно и во ве́ки веко́в. Ами́нь.

Богородичен: Душ льстец мя привлече́ в поги́бельный ров,
но мне простри́ держа́вную Твою́ ру́ку
и ско́ро, Богоро́дице, к све́ту возведи́.

Песнь 3

Ирмос: На ка́мени мя ве́ры утверди́в,
разшири́л еси́ уста́ моя́ на враги́ моя́,
возвесели́ бо ся дух мой, внегда́ пе́ти:
несть свят, я́коже Бог наш,
и несть пра́веден, па́че Тебе́, Го́споди.

Припев: Преподо́бне о́тче Висарио́не, моли́ Бо́га о нас.

Возше́л еси́ на высоту безстра́стия, вшел еси́ во мрак Боговиде́ния,
прия́л еси́ в се́рдцы твое́м Боже́ственный зако́н,
и́мже укре́плься, свети́льник пресве́тел мона́шествующих, преподо́бне, был еси́.

Припев: Преподо́бне о́тче Висарио́не, моли́ Бо́га о нас.

Плодови́тая ма́слина, в дому́ Боже́ственнем я́ве насажде́н, яви́лся еси́, о́тче,
еле́ем подвиго́в твои́х умасти́ на́ша ли́ца,
восхваля́ющих твоя́, Висарио́не преподо́бне, чудеса́.

Сла́ва Отцу́ и Сы́ну и Свято́му Ду́ху.

Нестяжа́тельно пожи́в, блаже́нне, житие́, пти́цам подо́бно, о́тче,
кри́лы же облича́емь безстра́стия, Вы́шния дости́гл еси́ оби́тели, ра́дуяся,
сего́ ра́ди ве́рою тя ублажа́ем.

И ны́не и при́сно и во ве́ки веко́в. Ами́нь.

Богородичен: Ле́ностно живо́т мой изжи́в и страстьми́ се́рдце оскверни́в,
приступа́ю к Тебе́, Влады́чице, умиле́нием души́
и молю́ся уще́дрити и спасти́ мя, покая́ния о́бразы мя утве́рждши.

Седален, глас 1

Воздержа́ния огне́м попали́в стра́сти,
свеща́ светла́ безстра́стия яви́лся еси́,
тьму душ на́ших отгоня́щи благода́тию.
Темже днесь светоно́сную твою́ па́мять пра́зднуем весе́лием се́рдца,
Висарио́не, о́тче наш.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Де́во Всенепоро́чная, Я́же Пресу́щнаго Бо́га ро́ждшая,
со Безпло́тными Того́ непреста́нно моли́
оставле́ние прегреше́ний и исправле́ние жития́ да́ти нам пре́жде конца́,
ве́рою и любо́вию пою́щим Тя по до́лгу, еди́на Всепе́тая.

Песнь 4

Ирмос: Пою́ Тя, слу́хом бо, Го́споди, услы́шах и ужасо́хся:
до мене́ бо и́деши, мене́ ища́, заблу́ждшаго.
Тем мно́гое Твое́ снизхожде́ние, е́же на мя,
прославля́ю, Многоми́лостиве.

Припев: Преподо́бне о́тче Висарио́не, моли́ Бо́га о нас.

Ка́пли исцеле́ний прия́л еси́ от пучи́ны благода́тей,
отсю́ду преложи́л еси́ воду морску́ю моли́твою твое́ю, му́дре, на сла́дость,
исцеля́я ученику́ твоему́ жа́жду, досточу́дне.

Припев: Преподо́бне о́тче Висарио́не, моли́ Бо́га о нас.

Ника́коже да́же до ста́рости оскуде́л еси́, в житии́, Богому́дре о́тче,
в пусты́нях и гора́х заблужда́я хоте́нием, ища́й Бо́га,
светлостьми́ па́че у́мных чуде́с тя просве́щша.

Сла́ва Отцу́ и Сы́ну и Свято́му Ду́ху.

Был еси́ смире́н и охужде́н, возноси́мь безстра́стием.
Те́мже разрази́л еси́ возноше́ния де́монов,
свети́льник мона́шествующих, о́тче, быв,
благоче́стно ве́рою восхваля́ющих тя.

И ны́не и при́сно и во ве́ки веко́в. Ами́нь.

Богородичен: Стра́сти души́ моея́ исцели́,
возраста́ющия ми преокая́нно, по́мысл просвети́,
дале́че отгоня́щи тьму, Чи́стая, де́монов, оскорбля́ющих мя
и всегда́ се́ти де́лающих ми.

Песнь 5

Ирмос: Просвеще́ние во тьме лежа́щих,
спасе́ние отчая́нных, Христе́ Спа́се мой,
к Тебе́ у́тренюю, Царю́ ми́ра,
просвети́ мя сия́нием Твои́м:
ино́го бо, ра́зве Тебе́, бо́га не зна́ю.

Припев: Преподо́бне о́тче Висарио́не, моли́ Бо́га о нас.

Просвеще́ние, все́льшееся, преблаже́нне, Уте́шителя внутрь души́ твоея́,
веду́щую к Ца́рству показа́ стезю́,
в не́йже ше́ствуя, де́монов ловле́ния и помраче́ния душе́внаго уклони́лся еси́.

Припев: Преподо́бне о́тче Висарио́не, моли́ Бо́га о нас.

Нов я́влься Иису́с, Богоно́се,
со́лнца тече́ние уста́вил еси́ мольбо́ю светосия́нною,
Боже́ственными словесы́ украша́емь, блаже́нне, и чуде́с заре́ю просвеща́емь,
и Бо́жиими чудесы́ мно́гими удобря́емь.

Сла́ва Отцу́ и Сы́ну и Свято́му Ду́ху.

В кни́зе живо́тней написа́лся еси́ досто́йно,
напи́санная вся сконча́в в Боже́ственных кни́гах.
Те́мже вопию́ ти:
рукописа́ние, о́тче, зол мои́х твои́ми расто́ргни ко Всеви́дцу Бо́гу мольба́ми.

И ны́не и при́сно и во ве́ки веко́в. Ами́нь.

Богородичен: Стопа́м после́дуя, собо́р преподо́бных, из чре́ва Твоего́ Возсия́вшему
неизрече́нным рождество́м, Де́во Ма́ти,
с Небе́сными ли́ки сочта́ся,
с ни́миже моли́ся и испроси́ нам очище́ние, чту́щим Тя.

Песнь 6

Ирмос: Ко Го́споду от ки́та Ио́на возопи́:
Ты мя возведи́ из глубины́ а́да, молю́ся,
да я́ко Изба́вителю во гла́се хвале́ния
и́стины же ду́хом пожру́ Тебе́.

Припев: Преподо́бне о́тче Висарио́не, моли́ Бо́га о нас.

Не оскуде́л еси́, мно́гим приближа́яся подвиго́м:
ноще́й бо, преподо́бне, и дней четы́редесять пребы́л еси́ стоя́,
непреклоне́н ну́ждными ну́ждами естества́.

Припев: Преподо́бне о́тче Висарио́не, моли́ Бо́га о нас.

Умертви́в твоя́ у́ды, я́же на земли́, чу́дне,
живы́м де́йством исцеле́ния обогати́лся еси́ и живе́ши на Небесе́х,
умерщвля́ющих всегда́ душ на́ших стра́сти исцеля́я.

Сла́ва Отцу́ и Сы́ну и Свято́му Ду́ху.

Житие́ твое́, рыда́я, при́сно сконча́л еси́:
жела́ние бо Боже́ственное тя, о́тче, внутрь распали́.
И ны́не на Небесе́х обре́л еси́ утеше́ние,
с преподо́бными ли́ки совокупля́яся.

И ны́не и при́сно и во ве́ки веко́в. Ами́нь.

Богородичен: Госпо́дь из Тебе́ пло́тию ражда́ется,
всех Госпожу́ Тя тва́рей соде́лав,
Его́же моли́, Чи́стая, облада́ющаго изба́вити врага́ ду́ши на́ша.

Кондак, глас 2

Вы́шних сил подража́в, преподо́бне,
о́бразом птиц житие́ пожи́л еси́,
вре́менная в забы́тии положи́в,
непреста́нным жела́нием влеко́м к Небе́сным добро́там Христа́ Царя́,
до́ндеже Того́ дости́гл еси́, Висарио́не,
моли́ непреста́нно о всех нас.

Песнь 7

Ирмос: Те́лу злато́му прему́дрыя де́ти не послужи́ша,
и в пла́мень са́ми поидо́ша,
и бо́ги их обруга́ша,
среди́ пла́мене возопи́ша, и ороси́ я А́нгел:
услы́шася уже́ уст ва́ших моли́тва.

Припев: Преподо́бне о́тче Висарио́не, моли́ Бо́га о нас.

Обнови́в ду́шу воздержа́ния благочести́вым, о́тче, ра́лом,
клас многопло́ден возде́лал еси́, в жи́тницах соблюда́емь Небе́сных,
и пита́еши ве́рно воспева́ющия:
благослове́н еси́, Го́споди, Бо́же оте́ц на́ших.

Припев: Преподо́бне о́тче Висарио́не, моли́ Бо́га о нас.

Све́ту сраствори́вся невеще́ственному, чист свет был еси́
и быстрину́ речну́ю преше́л еси́, омочи́в ника́коже стопы́ твоя́:
по стезя́м же пра́вым, Богому́дре Висарио́не, ходи́л еси́,
греха́ му́тныя изсуши́в во́ды.

Сла́ва Отцу́ и Сы́ну и Свято́му Ду́ху.

О, чу́до стра́шно!
Ка́ко непива́емыя иногда́ во́ды пие́мы сотвори́л еси́ Боже́ственным назна́менанием
и речну́ю быстрину́ преше́л еси́,
тече́ние же удержа́л еси́ со́лнечное, Висарио́не Богому́дре,
богозна́мении свяще́нными велича́емь.

И ны́не и при́сно и во ве́ки веко́в. Ами́нь.

Богородичен: Му́дрость Бо́жия Ипоста́сная из Тебе́, Чи́стая, роди́ся,
и злове́рныя мудрецы́ потреби́,
и умудри́ мно́жество мона́шествующих и преподо́бных воспева́ти благода́тию:
Благослове́нная, Я́же Бо́га пло́тию ро́ждшая.

Песнь 8

Ирмос: В пещь о́гненную ко отроко́м евре́йским снизше́дшаго
и пла́мень в ро́су прело́жшаго Бо́га
по́йте, дела́, я́ко Го́спода,
и превозноси́те во вся ве́ки.

Припев: Преподо́бне о́тче Висарио́не, моли́ Бо́га о нас.

Свет тебе́ возсия́ я́ве, я́коже пра́веднику, и ра́дость, и весе́лие,
я́ко пла́кавшу, о́тче, на земли́ приле́жно
и стра́нну сея́ бы́вшу нестяжа́нием и вся́цем злострада́нием.

Припев: Преподо́бне о́тче Висарио́не, моли́ Бо́га о нас.

Весь отню́д сраствори́вся коне́чными жела́нии, преподо́бне о́тче,
гра́ды же и пусты́ни во умиле́нии мно́зе прохожда́л еси́,
до́ндеже митропо́лию дости́гл еси́ вы́шнюю, све́тло украша́емь.

Сла́ва Отцу́ и Сы́ну и Свято́му Ду́ху.

У́тро возсия́л еси́ нам све́тлыми доброде́тели просвеще́нии,
на́ша мы́сли просвеща́я при́сно.
Те́мже твою́ светоно́сную днесь, о́тче Висарио́не, соверша́ем па́мять.

И ны́не и при́сно и во ве́ки веко́в. Ами́нь.

Богородичен: Но́ва родила́ еси́ Сы́на, Собезнача́льна, Чи́стая, Отцу́ Безнача́льному,
и обнови́ла еси́ еди́на обетша́вшее на́ше естество́ лю́тыми преступле́нии,
те́мже Тя согла́сно пое́м, Богоро́дице.

Песнь 9

Ирмос: От Бо́га Бо́га Сло́ва,
неизрече́нною му́дростию прише́дшаго обнови́ти Ада́ма,
я́дию в тле́ние па́дшаго лю́те,
от Святы́я Де́вы неизрече́нно воплоти́вшагося нас ра́ди,
ве́рнии, единому́дренно пе́сньми велича́ем.

Припев: Преподо́бне о́тче Висарио́не, моли́ Бо́га о нас.

Кре́пости низложи́л еси́ льсти́ваго, кре́постию препоя́сан духо́вною,
и яви́лся еси́ си́лен на стра́сти, преблаже́нне,
сего́ ра́ди чуде́с благода́ти прие́м от Бо́га,
ве́рным исцелева́еши неисце́льныя неду́ги.

Припев: Преподо́бне о́тче Висарио́не, моли́ Бо́га о нас.

Яви́ся твоя́ ве́лия сла́ва, я́же по Бо́зе, всей тва́ри,
просвеща́я ве́рныя свяще́нными уподобле́нии непоро́чнаго твоего́ жития́, Богому́дре Висарио́не,
вои́стинну мона́хов украше́ние и отце́в верхо́вниче.

Припев: Преподо́бне о́тче Висарио́не, моли́ Бо́га о нас.

Стеня́, пла́ча и се́туя, умиле́нием сле́зным кропя́ зе́млю при́сно,
о́тче Богому́дре, соверша́л еси́,
до́ндеже обре́л еси́ Боже́ственное утеше́ние,
во гра́де Бо́жии со все́ми святы́ми, преподо́бне, всели́вся.

Сла́ва Отцу́ и Сы́ну и Свято́му Ду́ху.

Процве́л еси́, о́тче, я́ко крин,
доброде́тельными благово́нии на́ша облагово́нствуя ду́ши.
Те́мже сотворя́ем па́мять твою́,
злосмра́дия согреше́ний про́сим изба́витися тебе́ ра́ди, Висарио́не,
и вся́каго де́монскаго озлобле́ния.

И ны́не и при́сно и во ве́ки веко́в. Ами́нь.

Богородичен: Умовре́дно согреша́я, неиспра́влен пребыва́ю, мно́гим нечу́вством объюро́дев.
Те́мже зову́ Ти, Влады́чице:
в такове́й ну́жди су́ща посети́ мя ны́не
и уврачу́й стра́сти смире́ннаго се́рдца моего́.