Собор Белорусских святых

Жития

Установлен 3 апреля 1984 года по инициативе митрополита Минского и Белорусского Филарета (Вахромеева). За двадцать с лишним лет Собор Белорусских святых возрос от 14 до 79 угодников Божиих.

В 1999 году было канонизировано 23 новомученика Минской епархии, пострадавших в период 1930–1950-х годов, а в 2000 году на Юбилейном Архиерейском Соборе к лику новомучеников и исповедников Российских были причислены священномученики Иоанн, архиепископ Рижский, Митрофан, архиепископ Астраханский, Иоасаф, епископ Могилевский, Павлин, архиепископ Могилевский, Иоанн, епископ Рыльский, а также святитель Гавриил, архиепископ Рязанский. Деятельность этих подвижников была также связана с Белорусской землёй, поэтому и они включаются в Собор.

Наконец, постановлением Святого Синода Белорусской Православной Церкви в 2002 году к лику местночтимых святых был причислен священномученик архидиакон Никифор (Кантакузен), а в Собор Белорусских святых этим же постановлением были включены ранее уже прославленные священномученик Макарий, митрополит Киевский, благоверные князь Борис Туровский и княгиня Евфросиния Полоцкая, преподобные Феодор, князь Острожский, Харитина, княжна Литовская и Геннадий Могилевский.

15 декабря 2009 года на заседании Священного Синода БПЦ было принято решение присоединить к Собору Белорусских святых 14 святых, канонизированных другими епархиями Русской Православной Церкви, но которые родились, жили, несли служение на территории Беларуси.

Список святых ниже дан в соответствии с документом «Поименные списки местных соборов святых, почитаемых в Самоуправляемых Церквах, Экзархатах, Митрополичьих округах, митрополиях и епархиях», утвержденным на заседании Священного Синода 16 мая 2023 года (журнал № 31).

Тропарь, глас 5

Почти́ Госпо́дь Белору́сский край
святы́ми, Ему́ благоугоди́вшими:
святи́тели, му́ченики, преподо́бными и пра́ведными,
ве́рно Го́сподеви послужи́вшими
и мзду трудо́в прия́вшими.
К тем же ны́не и мы вопие́м:
о нас моли́теся ко Го́споду,

да в ве́ре и де́лех плод добр принесе́м.

Кондак, глас 3

Бо́жии уго́дницы Белору́сския земли́
ны́не со дерзнове́нием предстоя́т Престо́лу Святы́я Тро́ицы
и неви́димо за ны мо́лятся Бо́гу,
о кра́е на́шем,

прося́ нам мир и ве́лию ми́лость.

Канон преподобной Евфросинии Полоцкой, игумении

Минея, 23 Мая.

Глас 6

Песнь 1

Ирмос: Я́ко по су́ху, пешеше́ствовав Изра́иль
по бе́здне стопа́ми,
гони́теля фарао́на
ви́дя потопля́ема,
Бо́гу побе́дную пе́снь пои́м, вопия́ше.

Припев: Преподо́бная ма́ти Евфроси́ние, моли́ Бо́га о на́с.

От ю́ности поуча́ющися свяще́нным за́поведем Госпо́дним
и жела́ющи Ему́ Еди́ному послужи́ти,
презре́ла еси́ сла́ву и бога́тство ми́ра сего́.

Припев: Преподо́бная ма́ти Евфроси́ние, моли́ Бо́га о на́с.

Христа́ возлюби́вши,
роди́телей и сро́дников твои́х и обру́чника земна́го оста́вила еси́, преподо́бная,
и мона́шеское житие́ восприя́ла еси́.

Припев: Преподо́бная ма́ти Евфроси́ние, моли́ Бо́га о на́с.

Ско́рби испо́лнися се́рдце отца́ и ма́тере твоея́,
егда́ во и́ночестем о́бразе узре́ша тя, возлю́бленную дще́рь свою́,
ты же словесы́ благи́ми, вразумля́ющу тя Свято́му Ду́ху, уте́шила еси́ их.

Припев: Преподо́бная ма́ти Евфроси́ние, моли́ Бо́га о на́с.

Я́же в ма́сле доброде́телей свещу́ ума́сленну на сре́тение, ма́ти, Жениха́ твоего́ возжже́,
просвети́ о́чи се́рдца моего́,
но́щию жите́йскою омраче́нная,
да досто́йно тя похвалю́.

Сла́ва Отцу́ и Сы́ну и Свято́му Ду́ху.

Ум ста́рый в мла́де лет, ма́ти, добы́вши,
дерза́емо те́ло душе́ покори́ла еси́, от ю́ности впря́гши под и́го Христо́во
и благода́тное бре́мя ле́гкое прие́мши.

И ны́не и при́сно и во ве́ки веко́в. Ами́нь.

Богородичен: Ско́рбных наведе́ния обурева́ют смире́нную мою́ ду́шу,
и напа́стей о́блацы мое́ покрыва́ют се́рдце, Богоневе́стная,
но, Свет ро́ждшая Боже́ственный и Преве́чный,
возсия́й ми свет ра́достный.

Песнь 3

Ирмос: Не́сть свят,
я́коже Ты, Го́споди Бо́же мой,
вознесы́й рог ве́рных Твои́х, Бла́же,
и утверди́вый нас на ка́мени
испове́дания Твоего́.

Припев: Преподо́бная ма́ти Евфроси́ние, моли́ Бо́га о на́с.

В безмо́лвии со еди́ным Го́сподем моли́твою жела́ющи соедини́тися,
при святе́й це́ркви Святы́я Софи́и в те́сней ке́ллии водвори́лася еси́, преподо́бная.

Припев: Преподо́бная ма́ти Евфроси́ние, моли́ Бо́га о на́с.

От труда́ рук твои́х, преподо́бная, послужи́ла еси́ Христу́, Спаси́телю на́шему,
богоуго́дно упражня́ющися в преписа́нии книг святы́х,
и цено́ю, взе́млемою за них, утеша́ла еси́ ни́щую бра́тию Христо́ву.

Припев: Преподо́бная ма́ти Евфроси́ние, моли́ Бо́га о на́с.

В кро́тости и смире́нии, в посте́х и моли́твах,
в труде́х, и нощны́х бде́ниих, и моли́твенных коленопреклоне́ниих,
усе́рдно послужи́ла еси́ Го́споду твоему́, всечестна́я.

Припев: Преподо́бная ма́ти Евфроси́ние, моли́ Бо́га о на́с.

Сна не дала́ еси́ очи́ма, ни ве́ждома дрема́ния, Евфроси́ние,
до́ндеже обрела́ еси́ во твое́м се́рдце ме́сто досто́йнаго оби́тельства.

Сла́ва Отцу́ и Сы́ну и Свято́му Ду́ху.

Пустынелю́бица го́рлица бы́вши, Евфроси́ние,
и уединя́ющася пти́ца на зда́нии,
гнездо́ духо́вное птенце́м твои́м создала́ еси́
и пожила́ еси́ от ю́ности житие́м а́нгельским, в телесе́ бу́дучи.

И ны́не и при́сно и во ве́ки веко́в. Ами́нь.

Богородичен: Удиви́ла еси́ вои́стинну ны́не на мне, Влады́чице,
благодея́ния Твоя́, Богоотрокови́це, и ми́лости Твоя́,
те́мже сла́влю Тя, и воспева́ю,
и почита́ю мно́гое и безме́рное е́же о нас смотре́ние Твое́.

Седален, глас 4

А́нгельскаго виде́ния сподо́билася еси́, преподо́бная ма́ти Евфроси́ние,
трикра́тно бо посети́ тя А́нгел, возвеща́я ти во́лю Госпо́дню,
да и́деши на ме́сто, нарица́емое Сельце́,
и устро́иши та́мо оби́тель дев, Бо́гу освяще́нных.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Еди́на и́стинная христиа́н Покрови́тельнице,
вся́ких лю́тых обстоя́ний, бед и скорбе́й нас изба́ви
и моли́твами Твои́ми спаси́ ду́ши на́ша.

Песнь 4

Ирмос: Христо́с моя́ си́ла,
Бог и Госпо́дь,
честна́я Це́рковь
боголе́пно пое́т, взыва́ющи,
от смы́сла чи́ста о Го́споде пра́зднующи.

Припев: Преподо́бная ма́ти Евфроси́ние, моли́ Бо́га о на́с.

А́нгел возвести́ бы́вшему во дни твоя́ святи́телю Илии́ о тебе́, преподо́бная,
да́ти ме́сто, во е́же оби́тель устро́ити.

Припев: Преподо́бная ма́ти Евфроси́ние, моли́ Бо́га о на́с.

Я́коже возлежи́т на главе́ ца́рстей вене́ц,
та́ко почива́ет Дух Святы́й на тебе́, преподо́бная,–
си́це возвести́ А́нгел святи́телю.

Припев: Преподо́бная ма́ти Евфроси́ние, моли́ Бо́га о на́с.

И я́ко ми́ро восхо́дит к Бо́гу, та́ко восхо́дит моли́тва преподо́бныя,
и я́ко со́лнце сия́ет на тве́рди небе́сней, та́ко просия́ житие́ Евфроси́нии пред А́нгелы Бо́жиими,–
глаго́ла А́нгел в виде́нии святи́телю.

Припев: Преподо́бная ма́ти Евфроси́ние, моли́ Бо́га о на́с.

Оде́жда наги́м и бога́тство ни́щим,
корми́тельница а́лчущим была́ еси́ и си́рым ма́ти,
лю́тых избавля́ющи к тебе́ прибега́ющия,
те́мже твоя́ во ве́ки па́мять пребыва́ет,
Евфроси́ние, По́лотскому гра́ду похвало́.

Сла́ва Отцу́ и Сы́ну и Свято́му Ду́ху.

Неве́ста Христо́ва, ма́ти, яви́ся,
ма́сло многоблагоуха́нно совокупи́вши в де́встве
и обою́ду возвели́чивши его́.
И ны́не ра́дуешися ве́чно, в оби́тель Небе́сную водворя́ющися
и Боже́ственную све́тлость приима́ющи.

И ны́не и при́сно и во ве́ки веко́в. Ами́нь.

Богородичен: И где про́чее ино́е обря́щу заступле́ние?
ка́мо прибе́гну? где же и спасу́ся?
ку́ю те́плую возъи́мам Помо́щницу,
скорбьми́ жите́йскими и бу́рями, увы́ мне! коле́блему?
На Тя Еди́ну упова́ю, и дерза́ю, и хвалю́ся,
и притека́ю к Покро́ву Твоему́: спаси́ мя.

Песнь 5

Ирмос: Бо́жиим све́том Твои́м, Бла́же,
у́тренюющих Ти ду́ши любо́вию озари́, молю́ся,
Тя ве́дети, Сло́ве Бо́жий,
и́стиннаго Бо́га,
от мра́ка грехо́внаго взыва́юща.

Припев: Преподо́бная ма́ти Евфроси́ние, моли́ Бо́га о на́с.

Ра́дости и удивле́ния о виде́нии а́нгельском испо́лнися архиере́й Госпо́день
и призва́ше тя, преподо́бная, возвести́ти ти чу́дное явле́ние.

Припев: Преподо́бная ма́ти Евфроси́ние, моли́ Бо́га о на́с.

Во́лю Го́спода твоего́ со усе́рдием испо́лнила еси́, преподо́бная,
и пришла́ еси́ на ме́сто, пока́занное ти А́нгелом,
и та́мо водвори́лася еси́.

Припев: Преподо́бная ма́ти Евфроси́ние, моли́ Бо́га о на́с.

На еди́наго Го́спода возложи́вши тве́рдое упова́ние,
ничто́же стяжа́ла еси́ от име́ний,
но в нищете́ ева́нгельстей пребыва́ла еси́.

Припев: Преподо́бная ма́ти Евфроси́ние, моли́ Бо́га о на́с.

На разу́мнем ка́мени хра́мину неподви́жиму создала́ еси́, сла́вная,
и треволне́ния страсте́й отбе́гла еси́,
благоуте́шным Ду́хом Паракли́товым подъе́млема в Вы́шнюю и Боже́ственную оби́тель.

Сла́ва Отцу́ и Сы́ну и Свято́му Ду́ху.

Небре́гши о́тчия сла́вы и горде́ния,
но одино́кое житие́ и неиме́ние, Евфроси́ние, возлюби́ла еси́
и, крест Христо́в на ра́мо взе́мши, после́довала еси́ Ему́, зову́щему тя.

И ны́не и при́сно и во ве́ки веко́в. Ами́нь.

Богородичен: Кий Тебе́ дар принесу́ благодаре́ния
за, и́хже наслади́хся, Твои́х дарова́ний и Твоея́ безме́рныя благосты́ни?
Те́мже сла́влю, песносло́влю и велича́ю Твою́ неизрече́нную ко мне ми́лость.

Песнь 6

Ирмос: Жите́йское мо́ре,
воздвиза́емое зря напа́стей бу́рею,
к ти́хому приста́нищу Твоему́ прите́к, вопию́ Ти:
возведи́ от тли живо́т мой, Многоми́лостиве.

Припев: Преподо́бная ма́ти Евфроси́ние, моли́ Бо́га о на́с.

Ви́девше ангелоподо́бное твое́ житие́,
мно́гия де́вы восхоте́ша обручи́тися Христу́
и в чи́стом де́встве Ему́ Еди́ному послужи́ти.

Припев: Преподо́бная ма́ти Евфроси́ние, моли́ Бо́га о на́с.

Сестра́ твоя́, княжна́ Звенисла́ва, подража́ющи тебе́,
отве́ржеся сла́вы и наслажде́ний ми́ра сего́
и к тебе́ притече́, и́го Христо́во благо́е на себе́ восприя́ти.

Припев: Преподо́бная ма́ти Евфроси́ние, моли́ Бо́га о на́с.

Ви́дя умножа́ющияся сестры́ твоя́ духо́вныя, Евфроси́ние всечестна́я,
возжела́ла еси́ сооруди́те храм Го́споду Вседержи́телю,
честна́го и сла́внаго Его́ Преображе́ния.

Припев: Преподо́бная ма́ти Евфроси́ние, моли́ Бо́га о на́с.

В ча́ши свое́й вино́ все́ю душе́ю черпа́вши
и столп дово́лен поста́вивши, воспе́ла еси́:
хлеб мой я́ждьте и вино́ вси пи́йте, жа́ждающии.

Сла́ва Отцу́ и Сы́ну и Свято́му Ду́ху.

У́треневавши к Бо́гу, голуби́це,
была́ еси́ посре́брена све́тло крило́ма, сла́вная,
зла́том же блеща́щи междура́мия разли́чным дея́нием.

И ны́не и при́сно и во ве́ки веко́в. Ами́нь.

Богородичен: Утеше́ние в ско́рбех вем, и неду́гов исцеле́ние Тя зна́ю, Богома́ти,
и всесоверше́нное сокруше́ние сме́рти,
и реку́ живота́ неисчерпа́емую,
и всех, су́щих в напа́стех, ско́рое и бы́строе заступле́ние.

Кондак, глас 8

Избра́нней Бо́гом от самаго́ рожде́ния
и призва́нней на служе́ние Ему́,
в чи́не а́нгельстем Го́сподеви послужи́вшей свя́то,
и преподо́бно пожи́вшей,
и ны́не с Небе́сными си́лами Го́спода восхваля́ющей,
о нас же, гре́шных, пред Го́сподем хода́тайствующей,
с ра́достию и любо́вию воззове́м:
ра́дуйся, Евфроси́ние, неве́сто Христо́ва всечестна́я.

Икос

А́нгельски на земли́ житие́ соверши́ла еси́,
чистото́ю и смире́нием, кро́тостию и терпе́нием,
милосе́рдием и воздержа́нием Го́сподеви угоди́ла еси́,
и ны́не во све́тлостех святы́х почива́ющи последи́ трудо́в свои́х,
приими́ от нас пе́ние сие́:
ра́дуйся, де́вственнице душе́ю и те́лом;
ра́дуйся, наста́внице преди́вная иноки́нем;
ра́дуйся, еще́ на земли́ сподо́бльшаяся а́нгельскаго виде́ния;
ра́дуйся, от Го́спода чрез А́нгела устро́ити оби́тель повеле́ние прие́мшая;
ра́дуйся, со усе́рдием во́лю Госпо́дню испо́лньшая;
ра́дуйся, вся земна́я наслажде́ния ми́ра сего́ Христа́ ра́ди отве́ргшая;
ра́дуйся, Небе́сному Жениху́, Иису́су Сладча́йшему, себе́ обручи́вшая;
ра́дуйся, в чистоте́, посте́х и моли́твах Тому́ послужи́вшая;
ра́дуйся, безце́нное сокро́вище – пречестны́й Крест оби́тели свое́й во освяще́ние и утвержде́ние стяжа́вшая;
ра́дуйся, в труде́х дневны́х и нощны́х житие́ свое́ соверши́вшая;
ра́дуйся, в невече́рнем дни Ца́рствия Бо́жия ны́не пребыва́ющая;
ра́дуйся, Евфроси́ние, неве́сто Христо́ва всечестна́я.

Песнь 7

Ирмос: Росода́тельну у́бо пе́щь
соде́ла А́нгел
преподо́бным отроко́м,
халде́и же опаля́ющее
веле́ние Бо́жие мучи́теля увеща́ вопи́ти:
благослове́н еси́, Бо́же оте́ц на́ших.

Припев: Преподо́бная ма́ти Евфроси́ние, моли́ Бо́га о на́с.

Не о свое́м то́чию спасе́нии прилежа́ше ти попече́ние, преподо́бная ма́ти,
но о всех, и́хже ти вве́рил е́сть Госпо́дь,
и́хже поуча́ла еси́ в зако́не Госпо́дни, твори́ти во́лю Его́.

Припев: Преподо́бная ма́ти Евфроси́ние, моли́ Бо́га о на́с.

О́браз была́ еси́ слове́сному твоему́ ста́ду, всечестна́я Евфроси́ние,
де́лы благи́ми, смире́нием возвыша́яся, и кро́тостию привлека́я,
и терпе́нием утвержда́я пребыва́ти непрекло́нными в любви́ ко Го́споду.

Припев: Преподо́бная ма́ти Евфроси́ние, моли́ Бо́га о на́с.

Егда́ соверша́шеся созида́ние хра́ма Госпо́дня,
А́нгел возбужда́ше строи́теля, глаго́ля:
Иоа́нне, иди́ на строе́ние хра́ма Вседержи́телева.

Припев: Преподо́бная ма́ти Евфроси́ние, моли́ Бо́га о на́с.

Я́ко пра́ва учени́ца смире́ннаго и ми́рнаго Христа́,
князе́м сро́дником, друг на дру́га дерза́ющим подъя́ти меч, возбрани́ла еси́,
я́ко ору́жием обоюдоо́стрым, пресека́ющим, сло́вом Бо́жиим устраша́ющим.

Сла́ва Отцу́ и Сы́ну и Свято́му Ду́ху.

Издале́ча собира́ющи Боже́ственное бога́тство,
я́ко дале́че ходя́й кора́бль,
борзопи́счими персты́ до́бре писа́ла еси́, Богодухнове́нная,
пое́млющи ота́й и даю́щи ни́щим.

И ны́не и при́сно и во ве́ки веко́в. Ами́нь.

Богородичен: Все́ю душе́ю, и мы́слию, и се́рдцем, и устна́ми Тя сла́влю,
наслади́вся Твои́х вели́ких дарова́ний, и Твоея́ благосты́ни,
и безме́рных Твои́х чуде́с.

Песнь 8

Ирмос: Из пла́мене преподо́бным ро́су источи́л еси́
и пра́веднаго же́ртву водо́ю попали́л еси́:
вся бо твори́ши, Христе́, то́кмо е́же хоте́ти,
Тя превозно́сим во вся ве́ки.

Припев: Преподо́бная ма́ти Евфроси́ние, моли́ Бо́га о на́с.

С ве́рою и тве́рдым упова́нием помоли́лася еси́, преподо́бная, ко Го́споду,
и услы́ша Госпо́дь моле́ние ве́рныя рабы́ Своея́,
и чу́дне соверши́ся созда́ние хра́ма Его́.

Припев: Преподо́бная ма́ти Евфроси́ние, моли́ Бо́га о на́с.

Ра́дости и весе́лия исполни́лася еси́, преподо́бная Евфроси́ние,
егда́ соверши́ся освяще́ние хра́ма,
в не́мже о е́же проше́нием на́шим услы́шанным бы́ти от Го́спода
со слеза́ми моли́лася еси́.

Припев: Преподо́бная ма́ти Евфроси́ние, моли́ Бо́га о на́с.

Мо́щна бе пред Го́сподем моли́тва твоя́,
зане́ храм, воздви́гнутый тобо́ю, чрез мно́гая ле́та цел и невреди́м сохрани́ся.

Припев: Преподо́бная ма́ти Евфроси́ние, моли́ Бо́га о на́с.

Избавле́ние обре́тши, Го́споди, го́рькаго осужде́ния,
е́же вкуше́ния ра́ди дре́ва разу́мнаго Твои́м распя́тием,
Евфроси́ния постя́щися бы́сть во вся среды́ и пятки́,
те́ло умерщвля́ющи, а ду́шу оживля́ющи
потща́нием, божеству́ющим в безвеще́ственнем те́ле.

Сла́ва Отцу́ и Сы́ну и Свято́му Ду́ху.

Плодоле́тными ве́рбами теле́сное дея́ние, я́ко на Вавило́нстей реце́, пове́сивши,
в бу́ри жите́йстей возопи́ла еси́:
а́ще забу́ду тя, Иерусали́ме, не предложи́вши в нача́ле весе́лия,
забве́на бу́ди десни́ца моя́
и язы́к мой прильпни́ горта́ни моему́ по пра́вде.

И ны́не и при́сно и во ве́ки веко́в. Ами́нь.

Богородичен: Обстоя́ния, и ско́рби, и ну́жды обрето́ша мя, Чи́стая,
и напа́сти жите́йския, и искуше́ния отвсю́ду мя обыдо́ша,
но предста́ни ми и покры́й мя святы́м Твои́м Покро́вом.

Песнь 9

Ирмос: Бо́га
челове́ком невозмо́жно ви́дети,
на Него́же не сме́ют чи́ни А́нгельстии взира́ти;
Тобо́ю бо, Всечи́стая, яви́ся челове́ком
Сло́во воплоще́нно,
Его́же велича́юще,
с Небе́сными во́и Тя ублажа́ем.

Припев: Преподо́бная ма́ти Евфроси́ние, моли́ Бо́га о на́с.

Возжела́ла еси́ име́ти во оби́тели твое́й ико́ну Пречи́стыя Богома́тере,
ю́же и получи́ла еси́,
и, ра́достно ту́ю прие́мши,
мно́гая благодаре́ния Го́споду и Пречи́стей Ма́тери Его́ воздала́ еси́.

Припев: Преподо́бная ма́ти Евфроси́ние, моли́ Бо́га о на́с.

Крест честны́й устро́ила еси́ усе́рдием твои́м, преподо́бная,
и ка́плю Боже́ственныя Кро́ве Христа́ Спаси́теля
и ча́сть Животворя́щаго Дре́ва в нем положи́ла еси́
на освяще́ние и спасе́ние всем, покланя́ющимся ему́
и целу́ющим его́ с любо́вию и стра́хом.

Припев: Преподо́бная ма́ти Евфроси́ние, моли́ Бо́га о на́с.

Мно́гая ле́та в те́сной ке́ллии, при хра́ме Госпо́днем,
в моли́твах и коленопреклоне́ниих препроводи́ла еси́, преподо́бная Евфроси́ние,
я́ко безпло́тна, на земли́ пребыва́ющи.

Припев: Преподо́бная ма́ти Евфроси́ние, моли́ Бо́га о на́с.

Текла́ еси́, я́коже цари́ца не Ю́жская,
но с тре́петом ви́девше рукотво́рную це́рковь и гроб,
в не́йже тридне́вный Всетворе́ц, Бо́жия Му́дрость всели́ся,
и та́мо благослови́ Бог прия́ти тя, до́брая де́во.

Сла́ва Отцу́ и Сы́ну и Свято́му Ду́ху.

Лива́н, и сми́рну, и зла́то волсви́ Творцу́ Тебе́ принесо́ша,
Евфроси́ния же – ду́шу, и те́ло, и житие́ непоро́чно,
сраспе́ншися Тебе́, Христе́, и совоскре́сши Тебе́ и в безконе́чнем Ца́рствии с Тобо́ю ца́рствующи.

И ны́не и при́сно и во ве́ки веко́в. Ами́нь.

Богородичен: Ра́дость от А́нгела Прие́мшей и мы, по прорече́нию Твоему́, Пресвята́я Де́во,
ублажа́юще Тя со все́ми ро́ды, ева́нгельски вопие́м:
ра́дуйся, Благода́тная, Госпо́дь с Тобо́ю.

Светилен

Преподо́бная Евфроси́ние, сла́вна па́мять твоя́,
вои́стинну бо на тебе́ испо́лнися сло́во Ду́ха Свята́го:
в па́мять ве́чную бу́дет пра́ведник.
Те́мже и нас, соверша́ющих па́мять твою́ с любо́вию,
спаса́й от вся́кия беды́ и напа́сти.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

И́же дре́вле пропове́даша, ра́дуется ве́чно Евфроси́ния о Го́споде,
у́зы плотски́я отреши́вши, и Тебе́, Зижди́теля, лице́м к лицу́ ви́дящи, ви́дима Тобо́ю,
и моля́щи изба́витися от вся́кия лю́тости в пе́снех при́сно ю похваля́ющим.

Акафист святому преподобному Афанасию, игумену Брестскому

Кондак 1

Избранного Богом от юности поборника православныя святыя веры и приявшаго мученический венец за исповедание ея, святаго преподобномученика Афанасия похвальными песньми почтим, ты же, яко предстоя пред престолом Царя Славы, от всяких нас бед свободи, да зовем ти:

Радуйся, преподобномучениче Афанасие, похвало и украшение наше.

Икос 1

Ангельский чин восприявши, ангельское житие явил еси, душу твою чистотою добродетелей украсил, непорочно Богу служил еси, словом и житием верные своя наставляя, сего ради приими от нас, преподобномучениче, сия усердныя похвалы;

Радуйся, измлада Бога возлюбивый.

Радуйся, заповеди Его верно сохранивый.

Радуйся, соблюдший душу твою страстьми непорабощенну;

Радуйся, благодатию Божию просвещенный.

Радуйся, веры Христовыя истинный поборниче.

Радуйся, отеческих преданий неложный защитниче.

Радуйся, мученическими добротами украшенный;

Радуйся, в светлый чертог Господень приятый.

Радуйся, преподобномучениче Афанасие, похвало и украшение наше.

Кондак 2

Видев суету жития мирскаго, еще от юности, в мире пребывая, удалялся еси сладостей жития сего, молитве же и службе Божией усердно прилежа и ум свой богомыслием возвышая, присно воспевал еси Господеви ангельскую песнь: Аллилуиа.

Икос 2

Разум твой божественными ученьми просвещая, красная мира сего, преподобне, отринул еси, сего ради водворяяся во обитель Святаго Духа града Вильны и тамо молитвою и пощением во служение Христу себе уготовляя, душеполезное сокровище стяжал еси. Мы же твое высокое любомудрие ублажая, приносим ти похвалы сия:

Радуйся, прельщения юнаго возраста победивый;

Радуйся, от юности жития богобоязненнаго сладость вкусивый.

Радуйся, велений Христовых из млада исполнителю;

Радуйся, чистоты душевныя и телесныя усердный хранителю.

Радуйся, подвижниче, угождение Богу паче всего возлюбивый;

Радуйся, образ отвержения себе нам показавый.

Радуйся, яко путем прискорбным ко Христу последовал еси;

Радуйся, яко в райския обители возвещал еси.

Радуйся, преподобномучениче Афанасие, похвало и украшение наше.

Кондак 3

Сила Всевышняго охраняющи тя непрестанно в житии твоем, яве показа тя, яко сосуд избранный во еже служити Богови и наставляти люди ко спасению, тем же и мы таковое Божественное смотрение о тебе зряше, воспеваем купно с тобою хвалебную песнь в Троице славимому Богу: Аллилуиа.

Икос 3

Имущи присно пред очима своима жертву Христову, за грехи людския принесенную, жертвенно предал еси житие твое в руце Божии и, взем крест долготерпения и злострадания, Христу последовал еси: тем же и мы, ублажающе христоподражательное житие твое, воспеваем ти сице:

Радуйся, в сердце твоем образ Христа непрерывно носивый;

Радуйся, Христу работати и искренно Ему служити люди научивый.

Радуйся, яко очесами мысленными к свету невечернему устремлялся еси;

Радуйся, яко к небеси путем прискорбным возшел еси;

Радуйся, заповедей Христовых и заветов апостольских усерднейший хранителю.

Радуйся, спасению душ паствы твоея изрядный рачителю;

Радуйся, житием твоим праведным Богу угодивый;

Радуйся, наследие Царствия Небеснаго богоугождением себе улучивый.

Радуйся, преподобномучениче Афанасие, похвало и украшение наше.

Кондак 4

Бурю гонений воздвигоша врази противо обители Дубойския, юже устроял, соделал еси, преподобномучениче, оплотом веры православныя, ты же ведением небесным озаренный, вверив судьбы братии твоея Божию Промышлению усердно моляся с нею Богови, взывал ему: Аллилуиа.

Икос 4

Слышавше насельницы града Береста о богоугодном житии иноков Купятницкия обители, просиша игумена сия обители, да изберет единаго из братии поставити во игумена обители Берестейския. Егда же братия недоумеваша, кому же дати жезл игуменства, Промысл Божий жребием каза на тя, яко достойный сосуд божественныя благодати. Тем же и мы, дивяся чудному промышлению Божию о тебе, достохвально взываем ти:

Радуйся, пастырю, от самого Бога предуказанный;

Радуйся, начальниче обители, свыше избранный.

Радуйся, во православии братию обители твоея укрепивый;

Радуйся, молитве и терпению житием твоим вся научивый.

Радуйся, обители твоея честныя от вражеских козней охранителю;

Радуйся, и насельников земли Берестейския в охранении веры святыя твердый руководителю.

Радуйся, в поте лица твоего Бога ради потрудивыйся;

Радуйся, верный рабе, добрым делателем винограда Христова явивыйся.

Радуйся, преподобномучениче Афанасие, похвало и украшение наше.

Кондак 5

Боготечней звезде подобен был еси, преподобномучениче Афанасие, в житии твоем деяньми и ученьми добре паству твою назидая и путь истинный к горнему Иерусалиму ей указуя, тем же и ныне на небесех сияеши славою вечною и купно со лики праведных воспеваеши хвалебную песнь Богови: Аллилуиа.

Икос 5

Видев, яко защищение верных чад твоих не довлеет надеятися на силы человеческия, все упование твое возложил еси на помощь Заступницы рода христианского, моляся пред образом Ея святым, именуемым Матери Божия Купятицкия и в час теплыя молитвы твоея услышал еси глас Ея, повелевающий ти бодрственно за Веру святую стояти и паству твою пред сильными мира сего защищати. Сего ради вернии научишася воспевати тебе таковая:

Радуйся, в житии земнем слышати глас Пречистыя Владычицы сподобивыйся;

Радуйся, гласом Ея служити Богу призванный.

Радуйся, в защищении обидимых крепкое забрало;

Радуйся, сильным мира сего небоязненный суда Божия провозвестителю.

Радуйся, вожделений иноверия разрушителю;

Радуйся, правды Божия в сердцах возстающих на Святую Веру утвердителю.

Радуйся, пастырю добрый, душу свою положити за овцы своя изволивый;

Радуйся, за правду гонения и скорби претерпевый.

Радуйся, преподобномучениче Афанасие, похвало и украшение наше.

Кондак 6

Проповедник учения Христова воистину явился еси, преподобномучениче Афанасие, словом твоим в вере наставляя, житием во благочестии верных утверждая и всех поучая с любовию пети Богу: Аллилуиа.

Икос 6

Возсиял еси, преподобномучениче, яко светильник, светяй на свещнице истиныя веры Христовы, высотою ума твоего озаряя души верных и разгоняя тьму нечестия и неверия, сего ради избраша тя людие, яко поборника веры сия, предстати пред лицем сильных мира сего и оградити ю от злокозненных наветов. возстающих на ню. Тем же и мы достойно ублажаем тя похвалами сими:

Радуйся, сущим в напастех скорый помощниче;

Радуйся, обидимым крепкий заступниче.

Радуйся, паствы твоея во благоустроении жития церковнаго мудрый руководителю;

Радуйся, малодушием колеблемых верный укрепителю.

Радуйся, враждебных наветов достохвальный отразителю;

Радуйся, безпомощных присный защитителю.

Радуйся, оградою крепкою обидимых явивыйся;

Радуйся, пред лицем сильных мира сего изрещи правду не убоявыйся.

Радуйся, преподобномучениче Афанасие, похвало и украшение наше.

Кондак 7

Хотяй непрестанно житием своим Богу благоугождати, подвигоположник был еси, преподобномучениче Афанасие, неослабный образ братии твоей подая в трудах, бдениих и пощениих, с любовию поучал еси их, призывая служити Богу и пети Тому: Аллилуиа.

Икос 7

Новаго подвига иноческаго жития вожделев, не отринул еси прошения иноков обители Дубойския возложити на тя бремя во благоугождении ея и, шед во обитель сию, узрел на пути мужа убога, еле жива суща, и самарянину милосердному подобищася, подъял еси его на рамена твоя и несл еси, внимая неизреченным его глаголам: сей же муж, внезапну скрывыйся от тебе, назвался сладчайшим именем Иисус. Сего ради и мы, тайне твоего боговидения дивящеся, со умилением тебе вопием:

Радуйся, ко милосердию душу твою предуготовавый;

Радуйся, образ сострадания людям собою явивый.

Радуйся, глаголы Господни слышати сподобивыйся;

Радуйся, откровение дивных тайн от Бога восприявый.

Радуйся, боговидче Христов.

Радуйся, боговидцу Моисеови уподобивыйся.

Радуйся, таиниче Божий, еще на земли небесных благ вкусивый;

Радуйся, яко Сам Пастыреначальник Иисус призвати тя на подвиг благоволивый.

Радуйся, преподобномучениче Афанасие, похвало и украшение наше.

Кондак 8

Странен и безумен показался еси людем, преподобномучениче, егда Христа ради юродство восприяв, на стогнах царствующего града истину святыя православныя веры защищая и гневом Божиим отшедших от сея истины устрашая, восклицал еси: горе отступником и неверным, вера бо православная яко солнце возсияет. Мы же словеса сия, яко пророчествие приемлюще, молитвенно к тебе взываем: обьюродевший ум наш на стезю истины направи, да с тобою взываем Богу: Аллилуиа.

Икос 8

Весь еси желание мое и радость моя, сладчайший Иисусе, взывал еси ко Господу, преподобномучениче, егда веден был на место мучения твоего, душу бо твою предав в руце Божии, тело твое сладце предал еси в руце мучителей твоих. Таковая любовь твоя ко Господу и кротость твоя мучителей смути, и сего ради один от воин, от его же руки повинен был еси прияти смерть, дивяся мужеству твоему, благословения отеческаго и прощения за сие безумное дело у тебя испроси. Мы же, благоговейно воспоминающе сие, похвалами ублажаем тя сими:

Радуйся, любовию ко Христу, аки многоценным бисером, душу твою украсивый.

Радуйся, действенным проповеданием сия любве верный путь во святыя нам указавый.

Радуйся, мужественным смирением врагов твоих удививый.

Радуйся, кротостию твоею ослепленным враждою к тебе мучителем умное прозрение даровавый.

Радуйся, мужественно смерть претерпевый.

Радуйся, небесную Иисусову сладость вкусивый.

Радуйся, немолчныя исповедников слава.

Радуйся, предивная мучеников похвало.

Радуйся, преподобномучениче Афанасие, похвало и украшение наше.

Кондак 9

Вси видящи тя в темничнем заточении, преподобномучениче, зело дивляхуся твоему непоколебимому стоянию за веру истинную святую, заветы бо отеческия соблюдая, не токмо не устрашился еси уз, оплеваний и поруганий, но мужественно вся сия терпя за Христа, слезнаго исполнивыйся умиления, благодарственно воспевал еси Богу: Аллилуиа.

Икос 9

Витии многовещании не возмогут изрещи радости тоя великия, ею же исполнены быша сердца достигших верно чтити святую память твою: сии, веселием одержимы, помыслиша воздвигнути храм на месте мученическия кончины твоея, место же сие и по триех ста летех по кончине твоей сохрано было в памяти верных. Терн бо, прорастший на крови твоей, яко свидетель неложный соблюдаше место сие от людскаго забвения, и свеща во гробе твоем, юже имел еси в руцех твоих в час кончины твоея, истиствова место твоего упокоения. О сем убо радующеся, вернии восклицаху ти:

Радуйся, путем тернистым жития твоего греховная тернии души твоея умертвивый.

Радуйся, яко тернием прорастшим на гробе твоем, место упокоения твоего показавый и тем радость велию верным твоим явивый.

Радуйся, хранителю обычаев церковных, со свещею возженною смерть восприявый.

Радуйся, в знамении свещи зажженныя образно тайну сияния славы твоея предобразивый.

Радуйся, яко храмом, созданным в память твою на гробе твоем, славно имя твое от людей прославися.

Радуйся, яко на гробе твоем, яко же и древле на гробах мученических, жертва Христова за грехи людския приносится.

Радуйся, неизсякаемый источниче блаженныя памяти о тебе на земли.

Радуйся, цветом нетления украшенный на небеси.

Радуйся, преподобномучениче Афанасие, похвало и украшение наше.

Кондак 10

Спасти хотяй душу твою, о житии сем привременнем нерадел еси, преподобномучениче, егда бо на тя осуждение смерти изыде, с радостию великою предал еси душу в руце Богови, воспевая Ему, в мученическом подвизе тебе укрепляющему, хвалебную песнь: Аллилуиа.

Икос 10

Стеною ограждения церкви православней обещался еси быти, пророчески на сие указуя в предсмертном завете учеником твоим: тамо, идеже тело мое изъязвленное и острупленное за имя Божие положено будет, вера Православная процветет, яко крин посреде терния и яко искра в пепле сокрытая явится, возсияет и повсюду осветит. Сего ради и мы, славяще Бога, дивнаго во святых Своих, и тя ублажаем:

Радуйся, яко за истину скорби многия и язвы претерпел еси.

Радуйся, яко за исповедание и защищение веры православныя нетление мощей твоих во блаженном упокоении приял еси.

Радуйся, духовно слепотствующих и в законе Господнем заблуждающих пречудный руководителю.

Радуйся, всех напастей и бед, обуревающих верное стадо Христово, отразителю.

Радуйся, прославлением мощей твоих превеликия радости нас исполнивый.

Радуйся, и неверныя нетлением телесе твоего к познанию истины православия приведый.

Радуйся, твоим проречением в надежди торжества веры истинныя нас укрепивый.

Радуйся, и по успении твоем превеликим сия веры защитником себе явивый.

Радуйся, преподобномучениче Афанасие, похвало и украшение наше.

Кондак 11

Пение всеумиленное принесоша Богови ученицы твои, преподобномучениче, егда обретоша сокрыто от людей, чтущих память твою, место твоего упокоения и мощи твои, нетленно пребывающия, обаче и мы, взирающи на таковую милость Божию, нам явленную, благодарственно вопием прославившему тя Богу: Аллилуиа.

Икос 11

Светильник жития благочестнаго верному стаду твоему был еси, преподобномучениче Афанасие, души твоей божественная богатства Духа Святаго собрав, за Христа мученичество исповедания приял еси, тем же и мы, молитвами твоими просвещшеся, вопием ти:

Радуйся, светильниче благодатный жития благочестнаго.

Радуйся, веру, надежду и любовь до конца сохранивый.

Радуйся, со Христом, Его же от юности возлюбил еси, на веки соединивыйся.

Радуйся, мзду великую за житие твое славное от Него восприявый.

Радуйся, звездо лучезарная, над землею нашею возсиявшая.

Радуйся, Царствия Небесного и славы вечныя наследниче.

Радуйся, нетлением мощей твоих образ воскресения нашего явивый.

Радуйся, яко имя твое по всей стране нашей от конца в конец прославляется.

Радуйся, страны нашея крепкое ограждение.

Радуйся, присное пред Богом наше защищение.

Радуйся, преподобномучениче Афанасие, похвало и украшение наше.

Кондак 12

Благодать цельбоносна дана от Бога нетленному твоему телеси, егда бо отрок, на смертном одре лежащ, прикоснулся раце твоей, абие исцеле: благодати сия, преподобномучениче Афанасие, и нам немощным испроси, да и мы здравы суще телом и духом, в сей и будущей жизни о тебе поем Богу: Аллилуиа.

Икос 12

Поюще твое славное и непреоборимое стояние за веру истинную, ублажаем, преподобномучениче, и святую твою кончину, ею же на земли и на небеси прославился еси и приносим ти похвалы сия:

Радуйся, непоколебимый столпе веры Христовой и отеческих преданий.

Радуйся, яко тобою церковь верных просвещается.

Радуйся, верный рабе Христов, любовь ко Христу своею кровию запечатленный.

Радуйся, за веру и страдание в радость Господа приятый.

Радуйся, верным чадом твоим истинный путь во обители показавый.

Радуйся, во обителех Христовых на скорби наши призирающий.

Радуйся, от враг видимых и невидимых крепкий наш заступниче.

Радуйся, дарованной от Господа милости неоскудный источниче.

Радуйся, душевных и телесных недугов наш целебниче.

Радуйся, всеусердный ко спасению наш наставниче.

Радуйся, преподобномучениче Афанасие, похвало и украшение наше.

Кондак 13

О всехвальный угодниче Христов, преподобномучениче Афанасие, прими сие малое моление наше, в похвалу тебе приносимое. Буди неослабный молитвенник наш пред престолом Всевышняго и теплым предстательством твоим избави нас от зол земных и грядущего мучения, да с тобою воспеваем Богу: Аллилуиа.

[Се́й конда́к глаго́лется три́жды.]

Икос 1

Ангельский чин восприявши, ангельское житие явил еси, душу твою чистотою добродетелей украсил, непорочно Богу служил еси, словом и житием верные своя наставляя, сего ради приими от нас, преподобномучениче, сия усердныя похвалы;

Радуйся, измлада Бога возлюбивый.

Радуйся, заповеди Его верно сохранивый.

Радуйся, соблюдший душу твою страстьми непорабощенну;

Радуйся, благодатию Божию просвещенный.

Радуйся, веры Христовыя истинный поборниче.

Радуйся, отеческих преданий неложный защитниче.

Радуйся, мученическими добротами украшенный;

Радуйся, в светлый чертог Господень приятый.

Радуйся, преподобномучениче Афанасие, похвало и украшение наше.

Кондак 1

Избранного Богом от юности поборника православныя святыя веры и приявшаго мученический венец за исповедание ея, святаго преподобномученика Афанасия похвальными песньми почтим, ты же, яко предстоя пред престолом Царя Славы, от всяких нас бед свободи, да зовем ти:

Радуйся, преподобномучениче Афанасие, похвало и украшение наше.