Собор Псковских святых

Жития

В Неделю 3-ю по Пятидесятнице Святая Церковь празднует Собор Псковских святых (переходящее празднование).

Поименный список Собора утвержден Священным Синодом Русской Православной Церкви 16 мая 2023 года (журнал № 31).

Тропарь, глас 1

Ны́не наста́ день сла́внаго торжества́,
и земля́ Пско́вская све́тло ра́дуется,
прославля́юще па́мять всех святы́х ней просия́вших,
сего́ ра́ди и мы, гре́шнии, дерза́ем приноси́ти вам хвале́бное пе́ние;
о всеблаже́ннии земли́ на́шея засту́пницы,
моли́теся ко Святе́й Тро́ице,
да ва́шим предста́тельством пода́ст благода́ть и мир стране́ Росси́йстей

и душа́м на́шим спасе́ние.

Кондак, глас 1

Днесь лик святы́х земли́ Пско́встей просия́вших предстои́т в Це́ркви,
и неви́димо за ны мо́лится ко Святе́й Тро́ице,
да досто́йни бу́дем оте́ц и бра́тий
в земли́ на́шей И́мя Твое́ просла́вльших

и сподо́бимся воспева́ти Его́ во вся ве́ки.

Молитва

О всеблаже́ннии и всехва́льнии уго́дницы Бо́жии, в земли́ Пско́встей просия́вшии и сию́ мно́гими звезда́ми равноа́нгельнаго жития́ укра́сившии, бу́дите моли́твенницы о оте́честве ва́шем, мы же про́сим предста́тельства ва́шего, е́же сохрани́те Дом Святы́я Тро́ицы – град Псков и вся гра́ды и ве́си Росси́йская земли́ от вся́каго зла и напа́сти, губи́тельства, гла́да, тру́са, пото́па, огня́, меча́, на́шествия иноплеме́нников и междоусо́бныя бра́ни. Моли́теся Живонача́льней Тро́ице о святе́й Правосла́вней Це́ркви и держа́ве Росси́йстей, да пребу́дут в ми́ре и благостоя́нии и сохраня́тся во благоче́стии христиа́нстем непоколеби́ми. О всечестны́й собо́ре а́нгелов на́ших, соблюди́те свяще́нныя оби́тели и хра́мы и всех подвиза́ющихся в них от вся́каго искуше́ния и напа́сти, всем же нам да́руйте покая́ние и сокруше́ние се́рдца, целому́дрие и воздержа́ние, да предста́тельством ва́шим со все́ми от ве́ка угоди́вшими святы́ми, водвори́мся и воздади́м сла́ву, честь и поклоне́ние Отцу́, и Сы́ну, и Свято́му Ду́ху во ве́ки веко́в. Ами́нь.

Канон святой равноапостольной княгине Ольге

Минея, 11 Июля.

Глас 5

Песнь 1

Ирмос: Велича́ваго фарао́на в мо́ри потопи́вша
со ору́жием и вса́дники,
Изра́иля же пресла́вно спа́сша и по су́ху прове́дша,
пое́м Христа́, я́ко просла́вися.

Припев: Свята́я равноапо́стольная княги́не О́льго, моли́ Бо́га о на́с.

Вели́чие на́ше и похвала́ ты еси́, О́льго Богому́драя:
тобо́ю бо от и́дольския ле́сти свободи́хомся.
Ны́не моли́ся за род и ро́ды, и́хже Бо́гу привела́ еси́,
пою́щи Христа́, я́ко просла́вися.

Припев: Свята́я равноапо́стольная княги́не О́льго, моли́ Бо́га о на́с.

Велича́ваго диа́вола из Росси́и прогна́ла еси́,
нечести́выя куми́ры отню́д сокруши́вши,
вся лю́ди от беззако́ния свободи́ла еси́,
му́дростию науча́ющи пе́ти Христа́, я́ко просла́вися.

Сла́ва Отцу́ и Сы́ну и Свято́му Ду́ху.

Че́рность грехо́вную ба́нею Креще́ния отню́д отмы́ла еси́,
Христа́ возлюби́ла еси́,
Ему́же предстоя́щи, моли́ся за рабы́ твоя́,
ве́рно сла́вящия тя.

И ны́не и при́сно и во ве́ки веко́в. Ами́нь.

Богородичен: Иса́ия Тя жезл нарица́ет, Пречи́стая,
Дави́д же Тя – престо́л Госпо́день,
Авваку́м – приосене́нную го́ру, купину́ же Тя – Моисе́й,
мы же Тя Ма́терь Бо́жию нарица́ем.

Песнь 3

Ирмос: Держа́вною руко́ю и сильным сло́вом
Не́бо и зе́млю сотвори́л еси́,
ю́же Твое́ю Кро́вию искупи́л еси́, Це́рковь Твою́,
я́же о Тебе́ утвержда́ется, зову́щи:
я́ко несть свят, ра́зве Тебе́, Го́споди.

Припев: Свята́я равноапо́стольная княги́не О́льго, моли́ Бо́га о на́с.

Держа́вною руко́ю, и му́дрыми словесы́, и си́льным сло́вом
учи́ла еси́ твоего́ сы́на зако́ну Христо́ву
и лю́дем возбрани́ла еси́ жре́ти и́долом, О́льго пресла́вная,
в па́мять твою́ ны́не соше́дшеся, тебе́ прославля́ем.

Припев: Свята́я равноапо́стольная княги́не О́льго, моли́ Бо́га о на́с.

Ты, я́ко пчела́, добру́ ра́зуму дале́че цвету́щия Христо́вы ве́ры взыска́ла еси́
и, я́ко поро́дный мед, Креще́ние в Ца́рствующем гра́де обре́тши,
твоему́ гра́ду и лю́дем дарова́ла еси́,
его́же вси насыще́ни го́рести греха́ отбега́ют.

Сла́ва Отцу́ и Сы́ну и Свято́му Ду́ху.

Весь похва́льный глас и мольбу́ ти, Ольго, прино́сим,
тобо́ю бо Бо́га позна́хом, Ему́же ны́не предстои́ши,
проси́ ми́ра оте́честву, и на пога́ныя побе́ды, и душа́м на́шим оставле́ния грехо́в,
пою́щим тя, присноблаже́нная.

И ны́не и при́сно и во ве́ки веко́в. Ами́нь.

Богородичен: Прия́телище яви́лася еси́, Де́во, Непристу́пнаго Бо́га,
тем Тя пою́т непреста́нно а́нгельстии чи́ни, повину́ющеся Влады́це,
Ты бо родила́ еси́ Сло́во Отчее, Собезнача́льное, без отца́:
о, чу́до! Святы́й бо Дух осени́ Тя.

Седален, глас 3

По́двиг твой чтим, блаже́нная,
ди́вна бо кре́пость ду́ха твоего́, в не́мощи телесе́ я́вльшаяся;
язы́ческую лесть презре́вши,
дерзнове́нно ве́ру пропове́дала еси́ Христо́ву,
о́браз нам подаю́щи ре́вности о Го́споде.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: И́же неизрече́нно от чи́стых крове́й Твои́х Воплоти́выйся
престо́л угото́ва во чре́ве Твое́м, Пречи́стая Отрокови́це,
Юже вси ро́ди, я́ко Богоро́дицу, досто́йно сла́вят.

Песнь 4

Ирмос: Ду́хом Бо́жиим очи́щся проро́к,
дыха́ющим в нем, Авваку́м Боже́ственный, боя́ся, глаго́лаше:
внегда́ прибли́жатся ле́та, позна́н бу́деши, Бо́же,
на спасе́ние челове́ков.

Припев: Свята́я равноапо́стольная княги́не О́льго, моли́ Бо́га о на́с.

Дух Бо́жий почи́ на тебе́, я́ко на Девво́ре проро́чице дре́вле,
И́мже просвети́вшися, укрепля́ющи Влади́мира разу́мнаго,
Сиса́ру диа́вола низложи́ла еси́ в се́ти его́ Креще́нием,
я́ко и Вара́ком в пото́це Ки́ссове пре́жде.

Припев: Свята́я равноапо́стольная княги́не О́льго, моли́ Бо́га о на́с.

Быстрине́ подо́бящися, О́льго Богому́драя,
сокруше́нным се́рдцем ста, моля́щися к Бо́гу,
изба́вила еси́ род твои́х люде́й от оскорбле́ния куми́рскаго
и от плене́ния вра́жия свободи́ла еси́,
Христа́ призыва́ющи на по́мощь на́шу.

Сла́ва Отцу́ и Сы́ну и Свято́му Ду́ху.

В наро́читый день свята́го твоего́ преставле́ния ра́достно пра́зднуем,
песнь моле́бную Христу́ возсыла́юще,
нетле́нным венце́м венча́вшему тя, О́льго Богому́драя:
проси́ нам оставле́ние грехо́в, сла́вящим тя ве́рно.

И ны́не и при́сно и во ве́ки веко́в. Ами́нь.

Богородичен: Тя, от ко́рене Иессе́ева процве́тшую,
Иса́ия я́коже прорече́, Христа́ – Цвет прозя́бшую,
и Первонача́льнаго пло́тию носи́вшую, и Жезл Бо́жия Духа,
хва́лим Тя, я́ко Бо́жию Ма́терь и Чи́стую Де́ву.

Песнь 5

Ирмос: Сло́во Бо́жие Всеси́льное,
мир всему́ ми́ру посли́
и све́том и́стинным освеща́я и просвеща́я вся,
из но́щи Тя сла́вящия.

Припев: Свята́я равноапо́стольная княги́не О́льго, моли́ Бо́га о на́с.

Я́ко голуби́ца целому́дренная, на фи́никс доброде́телей возшла́ еси́,
криле́ свяще́нне посре́бренне иму́щи,
и́миже возлете́вши, в ра́йстей пи́щи возгнезди́лася еси́, сла́вная О́льго.

Припев: Свята́я равноапо́стольная княги́не О́льго, моли́ Бо́га о на́с.

О тебе́ поя́ше Соломо́н пре́жде:
вне виногра́да ца́рская ма́слина процвете́;
ты бо святы́й грезн Креще́нием в Росси́и насади́ла еси́,
творя́щи плод покая́ния, о не́мже Сам Христо́с весели́тся.

Сла́ва Отцу́ и Сы́ну и Свято́му Ду́ху.

Умилосе́рдися, Влады́ко, на новопросвеще́нныя лю́ди Твоя́,
не преда́ждь нас в ру́ки пога́ных за мно́жество беззако́ний на́ших,
но моли́твами наста́вницы на́шея О́льги изба́ви ны от вся́кия напа́сти.

И ны́не и при́сно и во ве́ки веко́в. Ами́нь.

Богородичен: Кропи́те вси, я́коже пи́шется, о́блацы весе́лия, земны́м:
Бо́жий бо Де́тищ Христо́с, очища́яй мир от грехо́в,
воплоти́ся от Де́вы и дан бысть нам.

Песнь 6

Ирмос: В Це́рковь Небе́сную Святу́ю Твою́
да прии́дет моли́тва моя́,
вопию́ Ти, я́ко Ио́на,
из глубины́ се́рдца морска́го:
от грех мои́х возведи́ мя,
молю́ся Тебе́, Го́споди.

Припев: Свята́я равноапо́стольная княги́не О́льго, моли́ Бо́га о на́с.

Ре́вность Свята́го Ду́ха в се́рдцы прие́мши,
оте́ческое злове́рие возненави́дела еси́,
и, Христа́ и́стиннаго Бо́га взыска́вши, ча́до све́та яви́лася еси́,
и с пе́рвенцы святы́х на Небесе́х лику́еши.

Припев: Свята́я равноапо́стольная княги́не О́льго, моли́ Бо́га о на́с.

Но́вая учени́ца Христо́ва в Росси́и яви́лася еси́, обходя́щи гра́ды и се́ла,
куми́ры сокруша́ющи и лю́ди уча́щи еди́ному Бо́гу покланя́тися,
Его́же моли́ за пою́щия тя.

Сла́ва Отцу́ и Сы́ну и Свято́му Ду́ху.

О Богоблаже́нная О́льго, помоли́ся за твоя́ ча́да к Бо́гу:
мир неподви́жимый оте́честву на́шему испроси́
и нам отпуще́ние грехо́в, при́сно тя прославля́ющим.

И ны́не и при́сно и во ве́ки веко́в. Ами́нь.

Богородичен: Позна́вше Тобо́ю неопи́санное Сло́во Бо́жие,
Сы́на Единоро́днаго Вседержи́телева, вопие́м Ти, земни́и:
ра́дуйся, благослове́нная Богоро́дице, упова́ние душ на́ших.

Кондак, глас 4

Воспое́м днесь Благоде́теля всех Бо́га,
просла́вльшаго в Росси́и О́льгу Богому́друю,
да моли́твами ея́
пода́ст душа́м на́шим
грехо́в оставле́ние.

Икос

Христиа́н житие́ ви́дящи и непотре́бство язы́ческое уразумева́ющи,
си́це в себе́ рекла́ еси́, О́льго Богому́драя:
о, бе́здна прему́дрости и бла́гости всех Творца́!
Ка́ко утаи́лся еси́ от мене́ досе́ле?
Ка́ко возмогу́ и́долы отны́не чти́ти?
Никто́же бо, сла́дкаго вкуси́в, восхо́щет го́рькаго,
сего́ ра́ди, а́ще и в ста́рости, призови́ мя, Свята́я Тро́ице,
и пода́ждь ми грехо́в оставле́ние.

Песнь 7

Ирмос: Пла́мень пе́щный порабо́тиша благочести́вии о́троцы,
тем свы́ше ороси́ я, гото́вы пали́мы по естеству́,
но па́че естества́ му́жески поя́ху:
благослове́н еси́, Го́споди, на Престо́ле Сла́вы Ца́рствия Твоего́.

Припев: Свята́я равноапо́стольная княги́не О́льго, моли́ Бо́га о на́с.

Подо́бно Иуди́фи сотвори́ла еси́, посреде́ куми́рских тели́щ вше́дши,
тех нача́льника сокруши́ла еси́ и демоноче́тцы посрами́ла еси́,
вся же лю́ди научи́ла еси́ в чистоте́ вопи́ти Христу́:
благослове́н еси́, Го́споди, на Престо́ле Сла́вы Ца́рствия Твоего́.

Припев: Свята́я равноапо́стольная княги́не О́льго, моли́ Бо́га о на́с.

Похва́льными цве́ты, а́ки ца́рский вене́ц, богому́дрей твое́й главе́
в па́мять твою́ прино́сим, ю́же Христо́с нетле́нием венча́, О́льго досточу́дная,
моли́ся за твое́ ста́до, изба́витися от вся́каго зла вопию́щим:
благослове́н еси́, Го́споди, на Престо́ле Сла́вы Ца́рствия Твоего́.

Сла́ва Отцу́ и Сы́ну и Свято́му Ду́ху.

Лива́нскую ли го́ру нарече́м тя?
На тя бо роса́ Небе́сная сни́де.
Или́ Фисо́н реку́, добре́йший сапфи́р, ка́мень честны́й, Влади́мира иму́щую,
и́мже просвети́ся Росси́йская земля́?
Но моли́теся за ны, взыва́юще:
благослове́н еси́, Го́споди, на Престо́ле Сла́вы Ца́рствия Твоего́.

И ны́не и при́сно и во ве́ки веко́в. Ами́нь.

Богородичен: Киво́т позлаще́н Тя Ду́хом имену́ем,
спа́сшую мир от пото́па разу́мнаго, Де́во,
спаси́ нас, на Тя бо наде́емся и к Тебе́ прибега́ем,
отча́янныя в пучи́не от грех и напа́стей изба́ви, вопию́щия:
благослове́н еси́, Го́споди, на Престо́ле Сла́вы Ца́рствия Твоего́.

Песнь 8

Ирмос: Кре́пцыи о́троцы трие́ су́ще,
си́лою обо́лкшеся Святы́я Тро́ицы,
улови́ша и победи́ша халде́и,
и ди́вно измени́ся естество́:
ка́ко огнь в ро́су прелага́шеся?
Без туги́ я сохрани́, я́ко пелена́ми,
о пролия́вый му́дрость на всех де́лех Твои́х Бо́же,
Тя превозно́сим во ве́ки.

Припев: Свята́я равноапо́стольная княги́не О́льго, моли́ Бо́га о на́с.

Крепка́, я́ко льви́ца, си́лою Свята́го Ду́ха оболче́на,
еди́на устреми́ся всю́ду истерза́ти куми́ры, и ди́вно на Небеси́ и на земли́:
ка́ко жена́ пре́жде Бо́га познава́ет,
е́юже испе́рва всему́ ро́ду паде́ние бысть?
То́ю же ны́не спасе́ни, пое́м:
о пролия́вый му́дрость на всех де́лех Твои́х Бо́же,
Тя превозно́сим во ве́ки.

Припев: Свята́я равноапо́стольная княги́не О́льго, моли́ Бо́га о на́с.

Прему́дрость Бо́жия пре́жде о тебе́ написа́ла есть:
се еси́ до́брая моя́ и прекра́сная, и поро́ка несть в тебе́.
Блеск лица́ твоего́, я́ко ми́ра обоня́ние, назна́меноваше твое́, О́льго, креще́ние,
е́же посреде́ куми́рския ле́сти на тебе́ обоня́ Христо́с
и всех нас от смра́да де́монскаго к покая́нию ми́лостию Свое́ю, приве́л есть.

Сла́ва Отцу́ и Сы́ну и Свято́му Ду́ху.

Помяни́ мене́, госпоже́ О́льго, убо́гаго твоего́ раба́,
окра́деннаго от врага́ и согреши́вшаго па́че челове́к,
и помоли́ся Христу́ пода́ти ми проще́ние о всех согреше́ниих,
я́же нечу́вственно соде́ях, окая́нный, да покая́нием вопию́:
о пролия́вый му́дрость на всех де́лех Твои́х Бо́же,
Тя превозно́сим во ве́ки.

И ны́не и при́сно и во ве́ки веко́в. Ами́нь.

Богородичен: Не пре́зри, Де́во, Твои́х раб мольбы́,
о Тебе́ бо хва́лимся, Твое́ ма́лое ста́до мы есмы́,
потщи́ся в заступле́ние на́ше и изми́ ны от враг на́ших,
уще́дри зна́ющия Тя Ма́терь Бо́жию и Сы́ну Твоему́ вопию́щия:
о пролия́вый му́дрость на всех де́лех Твои́х Бо́же,
Тя превозно́сим во ве́ки.

Песнь 9

Ирмос: Из Еде́ма изы́де род наш
пра́бабы ра́ди Евы,
при́зван же Тобо́ю, ро́ждшею нам но́ваго Ада́ма – Христа́,
во двою́ естеству́, Де́во Чи́стая.
Взыгра́ся Ада́м пра́дед, я́ко избы́в пе́рвыя кля́твы,
мы же Тобо́ю хва́лящеся,
я́ко Тебе́ ра́ди Бо́га позна́хом,
и Тебе́ велича́ем.

Припев: Свята́я равноапо́стольная княги́не О́льго, моли́ Бо́га о на́с.

Весели́ся, Е́во прароди́тельнице, и́же бо, тя прельсти́в, из Еде́ма изведе́,
ны́не же попра́н есть твои́м исча́дием.
Се бо О́льга живо́тное дре́во, Крест Христо́в, в Росси́и водрузи́,
и́мже всем ве́рным рай отве́рзеся,
мы же хва́лящеся, я́ко тоя́ ра́ди Бо́га позна́хом,
со Влади́миром сию́ велича́ем.

Припев: Свята́я равноапо́стольная княги́не О́льго, моли́ Бо́га о на́с.

Жену́ по естеству́ нарица́ем тя, но па́че си́лы же́нския подви́глася еси́.
Тьмы твоего́ зла́та истощи́ла еси́,
да Христо́в зако́н и учи́теля приобря́щеши,
и́мже просвети́ла еси́ зе́млю Росси́йскую,
мы же тобо́ю хва́лящеся, я́ко тебе́ ра́ди Бо́га позна́хом,
с му́ченики тя велича́ем.

Сла́ва Отцу́ и Сы́ну и Свято́му Ду́ху.

Зако́на наста́внице чи́стая и учи́тельнице ве́ры Христо́вы,
приими́ похвалу́ от раб недосто́йных и моли́тву о нас сотвори́ к Бо́гу,
че́стно творя́щих твою́ па́мять,
да от напа́стей, и бед, и печа́лей, и лю́тых грехо́в свободи́мся,
еще́ же и мук, жду́щих нас, изба́ви, мо́лимся ти,
тебе́ непреста́нно велича́ющии.

И ны́не и при́сно и во ве́ки веко́в. Ами́нь.

Богородичен: Се Це́рковь, се дверь, се Бо́жия гора́ свята́я,
се жезл и сосу́д злат, се исто́чник печа́тан,
се рай святы́й но́ваго Ада́ма, се престо́л стра́шный,
се Ма́ти Бо́жия Пречи́стая,
Засту́пница всех нас, пою́щих Ю.

Светилен

Све́том благода́ти Бо́жией просвеще́нная,
свети́льник ве́ры и́стинныя во оте́чествии свое́м возжгла́ еси́, О́льго Богому́драя,
и о́браз подала́ еси́ отцу́ на́шему Влади́миру,
и́мже и мы от тьмы неве́дения к Све́ту Христо́ву приведо́хомся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Во тьме беззако́ний су́щии и нечистото́ю грехо́вною оскверне́ннии,
Тя Путеводи́тельницу к Све́ту невече́рнему и́мамы;
тем и мою́ окая́нную ду́шу к Небе́сней чистоте́ возведи́
всеси́льным предста́тельством Твои́м, Де́во Пречи́стая.

Акафист преподобному Савве, Крыпецкому чудотворцу

Кондак 1

Возбра́нный чудотво́рче и уго́дниче Христо́в, преподо́бне о́тче наш Са́вво, похва́льная прино́сим ти, моли́твенницы твои́, творя́ще всечестну́ю па́мять твою́; ты же, я́ко ве́лие име́яй дерзнове́ние ко Го́споду, от вся́ких нас бед и скорбе́й свободи́, зову́щих: Ра́дуйся, преподо́бне Са́вво, о́тче преблаже́ннейший.

Икос 1

А́нгелов Госпо́дь, прови́дев твое́, преподо́бне, равноа́нгельное житие́, приведе́ тя от чужды́я страны́, и просвети́ тобо́ю преде́лы на́ша. Сего́ ра́ди и мы срета́ем тя глаго́люще:

Ра́дуйся, челове́че, от Бо́га к нам по́сланный;

ра́дуйся, страну́ полу́нощную твои́м прише́ствием озари́вый.

Ра́дуйся, звездо́, от восто́ка нам возсия́вшая;

ра́дуйся, заре́, в темноте́ пребыва́ющих освети́вшая.

Ра́дуйся, дом оте́ческий и сро́дники оста́вивый;

ра́дуйся, всю красоту́ мирску́ю Христа́ ра́ди презре́вый.

Ра́дуйся, о́тче, от Святы́я Горы́ Афо́на во Псков прише́дый;

ра́дуйся, о́бразе и пра́вило жития́ и́ноческаго.

Ра́дуйся, преподо́бне Са́вво, о́тче преблаже́ннейший.

Кондак 2

Ви́дя в себе́ призва́ние от Бо́га уедине́нное житие́ проводи́ти, потща́лся еси́ при́сно уго́дная Ему́ твори́ти, в пусты́ни Бо́гу взыва́я: Аллилу́иа.

Икос 2

Ра́зум Боже́ственный наста́ви тя, Са́вво, о́тче наш, оста́вити оте́чество твое́; ты же во град Псков прише́л еси и во оби́тели Рождества́ Пресвяты́я Богоро́дицы водвори́лся еси́, во е́же та́мо и́ноческия по́двиги подъя́ти. Сего́ ра́ди восхваля́ем тя си́це:

Ра́дуйся, свеще́ пла́мене Боже́ственнаго;

ра́дуйся, сия́ние чистоты́ небе́сныя.

Ра́дуйся, ум Христо́в от ю́ности име́вый;

ра́дуйся, за́поведи Бо́жия свя́то соблюда́вый.

Ра́дуйся, и́ноческаго пра́вила исполни́телю;

ра́дуйся, по́двигом до́брым подвиза́выйся.

Ра́дуйся, моли́твами твои́ми я́ко крило́ма возлете́вый к Бо́гу;

ра́дуйся, угото́вивый себе́ в жили́ще чи́стое Ду́ху Свято́му.

Ра́дуйся, преподо́бне Са́вво, о́тче преблаже́ннейший.

Кондак 3

Си́ла смире́ния твоего́ сокры́ тя, преподо́бне, от тще́тных похва́л челове́ческих во оби́тели преподо́бнаго Евфроси́на, с ни́мже возжела́л еси́ пе́ти: Аллилу́иа.

Икос 3

Име́я послуша́ние кре́пкое, во оби́тели преподо́бнаго Евфроси́на вся повеле́нная тебе́ исполня́л еси́ благопоко́рно. Сего́ ра́ди вопие́м ти такова́я:

Ра́дуйся, и́ноче, к по́двигом ре́вностный;

ра́дуйся, труды́ ко трудо́м приложи́вый.

Ра́дуйся, к наста́внику твоему́ храни́вый повинове́ние;

ра́дуйся, в послуша́нии твое́м возрасти́вый смире́ние.

Ра́дуйся, ше́ствовати путе́м вели́каго Евфроси́на возревнова́вый;

ра́дуйся, на мно́гия труды́ себе́ неукло́нно покори́вый.

Ра́дуйся, ревни́телю послуша́ния во мла́дости;

ра́дуйся, украше́нный доброде́тельми в ста́рости.

Ра́дуйся, преподо́бне Са́вво, о́тче преблаже́ннейший.

Кондак 4

Бу́рею жития́ мирска́го отягча́емии, удивля́емся, егда́ дерза́ем уразуме́ти, ка́ко непроходи́мую пусты́ню соде́лал еси́ я́ко крин цвету́щую, и в ней сла́достно пел еси́: Аллилу́иа.

Икос 4

Слы́шав от ученико́в преподо́бнаго Евфроси́на и от окре́стных жи́телей, я́ко ме́сто есть безлю́дное, Кры́пец имену́емое, на пятьна́десять по́прищ отстоя́щее, восхоте́л еси́ в ме́сте том уедини́тися и осо́бь порабо́тати Бо́гу. Сего́ ра́ди приими́ от нас похвалы́ таковы́я:

Ра́дуйся, Христо́в учениче́ пусты́нный;

ра́дуйся, вои́стинну избра́нниче Бо́жий.

Ра́дуйся, в по́двизе твое́м от Го́спода по́мощь прие́мый;

ра́дуйся, благода́ти Бо́жия вмести́лище до́брое.

Ра́дуйся, пусты́ннаго жития́ насажде́ние;

ра́дуйся, возлюби́вый сла́дость уедине́ния.

Ра́дуйся, вме́сто жите́йския молвы́ моли́тву избра́вый;

ра́дуйся, моли́твою пусты́ню в храм Бо́жий претвори́вый.

Ра́дуйся, преподо́бне Са́вво, о́тче преблаже́ннейший.

Кондак 5

Благосве́тлый свети́льник яви́лся еси́ во тьме, сия́я в пусты́ни Кры́пецкой, егда́ сокры́лся еси́ та́мо Бо́га ра́ди, да Тому́ еди́ному послу́жиши а́нгельски, Тому́ всеце́ло порабо́таеши с пе́снию: Аллилу́иа.

Икос 5

Ви́дя учи́тель твой, преподо́бный Евфроси́н, я́ко соверше́ннаго послуша́ния испо́лнился еси́, о́тче Са́вво, и слы́шав тя жа́ждуща уедине́ния в пусты́ни, уразуме́ в жела́нии твое́м внуше́ние Свята́го Ду́ха, и на по́двиг но́вый благослови́ тя, рек: иди́ с ми́ром. Те́мже мы вопие́м тебе́ си́це:

Ра́дуйся, Еди́наго в Тро́ице Бо́га служи́телю;

ра́дуйся, бесо́в из пусты́ни твоея́ прогони́телю.

Ра́дуйся, храни́телю нелицеме́рнаго послуша́ния;

ра́дуйся, блюсти́телю наста́внича благослове́ния.

Ра́дуйся, гро́ме на диа́вола возгреме́вый;

ра́дуйся, искуше́ния бесо́вская отрази́вый.

Ра́дуйся, по́стническими по́двиги себе́ зело́ укрепи́вый;

ра́дуйся, уедине́нным моле́нием оби́льную благода́ть стяжа́вый.

Ра́дуйся, преподо́бне Са́вво, о́тче преблаже́ннейший.

Кондак 6

Пропове́дник Бо́жия сло́ва был еси́, егда́ прихожда́ху к тебе́ окре́стнии жи́телие, послу́шати душеполе́знаго уче́ния твоего́, и́хже поуча́л еси́ отчужда́тися всех мирски́х сла́достей, и в чистоте́ и целому́дрии проводи́ти вре́мя жития́, взыва́юще к Бо́гу: Аллилу́иа.

Икос 6

Возсия́вый в пусты́ни свет ве́ры твоея́ мно́гия боголю́бцы привлече́ ко и́ноческому жи́тельству: ты же с любо́вию всех срета́я, храм воздви́гл еси́ во сла́ву Христа́ Бо́га, и возлю́бленнаго ученика́ Его́ Иоа́нна Богосло́ва, и наставле́ние и́ноком препо́дал еси́. Тебе́ у́бо, я́ко богому́дрому наста́внику, возглаша́ем си́це:

Ра́дуйся, всех притека́ющих во оби́тель твою́ с любо́вию приима́вый;

ра́дуйся, оста́вивших мир Христа́ ра́ди я́ко птенцы́ под криле́ собира́вый.

Ра́дуйся, ничто́же свое́, но вся о́бща име́ти повеле́вый;

ра́дуйся, любо́вь нелицеме́рну между́ собо́ю всем запове́давый.

Ра́дуйся, в житии́ сем смире́ние ве́лие храни́ти наказу́яй;

ра́дуйся, от нечистоты́ грехо́вныя удержава́тися науча́яй.

Ра́дуйся, кро́тости и смире́ния Христо́ва и́стинный подража́телю;

ра́дуйся, путе́м Христо́вым житие́ твое́ проше́дый.

Ра́дуйся, преподо́бне Са́вво, о́тче преблаже́ннейший.

Кондак 7

Хотя́ приложи́ти до́брое тща́ние ко устрое́нию бра́тства и́ноческаго, созда́л еси́ храм во и́мя возлю́бленнаго ученика́ Христо́ва, и сам яви́лся еси́ оте́ц и наста́вник всем собра́вшимся к тебе́ христолю́бцем, с ни́ми вку́пе воспева́я: Аллилу́иа.

Икос 7

Но́выя твоя́ по́двиги зря́ще, нача́ша к тебе́, блаже́нному отцу́, приходи́ти христолюби́вии пско́встии лю́дие, на сооруже́ние оби́тели ми́лостыню мно́гу подава́юще; ты же, поста́вив Кассиа́на и́нока во игу́мена оби́тели и свободи́вся от дел правле́ния монасты́рскаго, поуча́л еси́ приходя́щих к тебе́ сло́ву Бо́жию. Сего́ ра́ди ублажа́ем тя си́це:

Ра́дуйся, всесве́тлый свети́льниче;

ра́дуйся, мона́хов наста́вниче.

Ра́дуйся, чистоты́ селе́ние;

ра́дуйся, Христо́во благоуха́ние.

Ра́дуйся, я́ко ча́дом оте́ц, собра́нным и́ноком завеща́ние да́вый;

ра́дуйся, я́ко па́стырь до́брый, заблужде́ние от ове́ц свои́х отгна́вый.

Ра́дуйся, от труда́ рук твои́х а́лчущия пита́вый и жа́ждущия пои́вый;

ра́дуйся, во святе́й оби́тели твое́й дом призре́ния бе́дных учини́вый.

Ра́дуйся, преподо́бне Са́вво, о́тче преблаже́ннейший.

Кондак 8

Стра́нное чу́до ви́дим на тебе́, преподо́бне, ка́ко просла́ви тя Бог еще́ на земли́ небе́сною сла́вою: зане́ рабо́тал еси́ Ему́ со стра́хом, радуя́ся с тре́петом. Те́мже благода́рственно вопие́м Ему́: Аллилу́иа.

Икос 8

Весь был еси́ в вы́шних, преподо́бне Са́вво, и содержа́л еси́ тве́рдо уста́вы оби́тели твоея́: сего́ ра́ди возбрани́л еси́ боля́щей княги́не пско́вской в монасты́рь твой вни́ти, му́жа ея́ прие́м, само́й же препода́в благослове́ние, оба́че исцели́л еси́ ю́ вне врат монасты́рских. Те́мже прославля́юще Го́спода, дарова́вшаго тебе́ дар таковы́х чуде́с, прино́сим ти похвалы́ сицевы́я:

Ра́дуйся, си́лою Бо́жиею исцеле́ния подава́яй;

ра́дуйся, дар чудотворе́ния от Христа́ прие́мый.

Ра́дуйся, неду́гов душе́вных и теле́сных цели́телю;

ра́дуйся, осла́бу нам да́руяй в боле́знех на́ших.

Ра́дуйся, муже́й, приходя́щих в оби́тель, с любо́вию срета́вый;

ра́дуйся, и́ноки от зре́ния жен стро́го огражда́вый.

Ра́дуйся, уста́ва монасты́рскаго попечи́телю стро́гий и неукло́нный;

ра́дуйся, не наде́яся на кня́зи, на лице́ си́льных земли́ не воззре́вый.

Ра́дуйся, преподо́бне Са́вво, о́тче преблаже́ннейший.

Кондак 9

Вся́кая ве́рных душа́ удиви́ся бога́тству благода́ти, да́нныя тебе́ от Бо́га Вседержи́теля, и си́лу чуде́с твои́х благогове́йно просла́ви: ты бо во пло́ти сый, возыме́л еси́ власть над ду́хи нечи́стыми. Сего́ ра́ди чудоде́ющему во всех Бо́гу вопие́м: Аллилу́иа.

Икос 9

Вети́йство челове́ческое не мо́жет изрещи́ промышле́ния Бо́жия о тебе́, ка́ко просла́ви тя, све́тла носи́теля све́та Христо́ва в земли́ на́шей. Мы же, свя́тость твою ве́рою почита́юще, свя́тче Бо́жий, вопие́м тебе́ си́це:

Ра́дуйся, луче́ Со́лнца Пра́вды, преде́лы гра́да Пско́ва озари́вшая;

ра́дуйся, мно́гих гре́шников ко спасе́нию наста́вивый.

Ра́дуйся, исто́чниче, вся́кое нече́стие омыва́яй;

ра́дуйся, благоче́стием сердца́ правосла́вных напая́яй.

Ра́дуйся, жесто́кою стезе́ю ми́ра сего́ к Небе́сным врато́м проше́дый;

ра́дуйся, за по́двиги земны́я твоя́ получи́вый на Небесе́х воздая́ние.

Ра́дуйся, хра́брый во́ине Царя́ Небе́снаго, враги́ неви́димыя побора́яй;

ра́дуйся, благоуха́нный кри́не, в Небе́сных вертогра́дех процвета́яй.

Ра́дуйся, преподо́бне Са́вво, о́тче преблаже́ннейший.

Кондак 10

Спасти́ хотя́ ду́ши челове́ческия, учи́л еси́ покая́нию лю́ди мирски́я, та́кожде и по преставле́нии твое́м не оставля́еши всех вразумля́ти, я́коже слы́шати нам и от гро́ба твоего́ глас учи́тельный, да в чистоте́ се́рдца на́шего пое́м Христу́: Аллилу́иа.

Икос 10

Стена́ еси́ оби́тели твое́й, Са́вво, о́тче наш, те́мже разбо́йников, дерзну́вших монасты́рь твой разори́ти, устраши́л еси́ явле́нием жезла́ твоего́, и на покая́ние наста́вил еси́ тех, да воспева́ют си́це:

Ра́дуйся, о лю́дех гре́шных вы́ну пеки́йся;

ра́дуйся, оби́тель свою́ до́бре храня́й до ны́не.

Ра́дуйся, разбо́йников ка́ющихся не презре́вый;

ра́дуйся, от греха́ к покая́нию обраща́яй.

Ра́дуйся, при́сный предста́телю у Престо́ла Вседержи́теля;

ра́дуйся, подража́телю милосе́рдия Отца́ Небе́снаго.

Ра́дуйся, сокро́вище любве́ и ми́лости боже́ственныя;

ра́дуйся, и́стинный па́стырю душ челове́ческих.

Ра́дуйся, преподо́бне Са́вво, о́тче преблаже́ннейший.

Кондак 11

Пе́ние благода́рственное воспева́ем, сла́вяще и́стинное твое́ о душа́х людски́х попече́ние, я́ко поми́ловал еси́ лю́ди, забы́вшия Бо́га, и приве́л еси́ их вку́пе с собо́ю, Са́вво о́тче, пе́ти песнь: Аллилу́иа.

Икос 11

Светопода́тельна свети́льника, под спу́дом лет шестьдеся́т скрыва́емаго, яви́ Бог ученико́м твои́м, и́же при строе́нии хра́ма обрето́ша мо́щи твоя́. Мы же, моще́м честны́м покланя́ющеся, со благодаре́нием и ра́достию взыва́ем ти си́це:

Ра́дуйся, по преставле́нии твое́м нас гре́шных не оста́вивый;

ра́дуйся, класы многопло́дныя хле́ба жи́зни возрасти́вый.

Радуйся, мо́щи твоя́ нам, я́ко драгоце́нную святы́ню, дарова́вый;

ра́дуйся, от моще́й твои́х всем то́ки исцеле́ний испуща́яй.

Ра́дуйся, челове́ка, я́звою умре́ти хотя́ща, моли́твою возста́вивый;

ра́дуйся, боле́зни зу́бныя, тряса́вицы и беснова́ния врачу́яй.

Ра́дуйся, прикоснове́нием ко гро́бу твоему́ прогна́вый я́зву смертоно́сную;

ра́дуйся, к лю́дем немощны́м, тебе́ зову́щим, приника́яй сострада́тельно.

Ра́дуйся, преподо́бне Са́вво, о́тче преблаже́ннейший.

Кондак 12

Благода́ть изоби́льную и ве́лие дерзнове́ние ко Христу́ стяжа́л еси́, Са́вво о́тче, сего́ ра́ди не оста́ви нас, творя́щих всечестну́ю па́мять твою́, и не забу́ди нас гре́шных в жи́зни сей и в бу́дущем ве́це, пою́щих Бо́гу: Аллилу́иа.

Икос 12

Пою́ще святу́ю и подви́жническую па́мять твою́, преподо́бне о́тче, про́сим тя мы, досто́йнии вся́каго осужде́ния и му́ки: да не возда́ст нам Судия́ Пра́ведный по дело́м на́шим, но да яви́т нам человеколю́бие Свое́. Сего́ ра́ди вопие́м к тебе́ такова́я:

Ра́дуйся, о́тче, во Христе́ ве́чно пребыва́яй;

ра́дуйся, чистоты́ небе́сныя преди́вное сия́ние.

Ра́дуйся, сла́во земли́ Пско́вския;

ра́дуйся, ка́меню ве́ры несокруши́мый.

Ра́дуйся, сто́лпе терпе́ния в беда́х незы́блемый;

ра́дуйся, пусты́ни твоея́ вели́кое украше́ние.

Ра́дуйся, звездо́ во мра́це жития́ мирска́го;

ра́дуйся, моли́твами твои́ми нас избавля́яй от лука́ваго.

Ра́дуйся, преподо́бне Са́вво, о́тче преблаже́ннейший.

Кондак 13

О преподо́бне о́тче наш Са́вво, приими́ сие́ моле́ние смире́нное, и вознеси́ е́ на же́ртвенник Бо́жий, да прости́т Госпо́дь вся на́ша согреше́ния, и да сподо́бит нас спасе́ния ве́чнаго, вопию́щих Ему́: Аллилу́иа.

[Се́й конда́к глаго́лется три́жды.]

Икос 1

А́нгелов Госпо́дь, прови́дев твое́, преподо́бне, равноа́нгельное житие́, приведе́ тя от чужды́я страны́, и просвети́ тобо́ю преде́лы на́ша. Сего́ ра́ди и мы срета́ем тя глаго́люще:

Ра́дуйся, челове́че, от Бо́га к нам по́сланный;

ра́дуйся, страну́ полу́нощную твои́м прише́ствием озари́вый.

Ра́дуйся, звездо́, от восто́ка нам возсия́вшая;

ра́дуйся, заре́, в темноте́ пребыва́ющих освети́вшая.

Ра́дуйся, дом оте́ческий и сро́дники оста́вивый;

ра́дуйся, всю красоту́ мирску́ю Христа́ ра́ди презре́вый.

Ра́дуйся, о́тче, от Святы́я Горы́ Афо́на во Псков прише́дый;

ра́дуйся, о́бразе и пра́вило жития́ и́ноческаго.

Ра́дуйся, преподо́бне Са́вво, о́тче преблаже́ннейший.

Кондак 1

Возбра́нный чудотво́рче и уго́дниче Христо́в, преподо́бне о́тче наш Са́вво, похва́льная прино́сим ти, моли́твенницы твои́, творя́ще всечестну́ю па́мять твою́; ты же, я́ко ве́лие име́яй дерзнове́ние ко Го́споду, от вся́ких нас бед и скорбе́й свободи́, зову́щих: Ра́дуйся, преподо́бне Са́вво, о́тче преблаже́ннейший.

Молитва

О преподо́бне о́тче Са́вво, пусты́нный подви́жниче, в телеси́ А́нгеле, во́ине Христо́в до́блественне, ве́ры пра́вило, Це́ркви утвержде́ние, благоче́стия о́бразе, доброде́телей свети́ло, трудо́в поста́, воздержа́ния, чистоты́ и целому́дрия предводи́телю, помо́щниче всем нужда́ющимся, стра́нствующим вождю́, пла́вающим ко́рмчию, обурева́емым приста́нище, ослабева́ющим по́моще, оби́димым заступле́ние, печа́льным утеше́ние, вдови́цам и си́рым покро́ве, а́лчущим пита́ние, наги́м одея́ние, пла́чущим утеше́ние, боля́щим исцеле́ние, ненаде́ющимся наде́яние, христиа́н всех хода́тайство, предста́тельство и защище́ние! При́зри ми́лостивно на ны, припа́дающия ко свято́му о́бразу твоему [или́ к святы́м моще́м твои́м], внемли́ моли́твам на́шим и пода́ждь коему́ждо от нас благопотре́бная, проси́мая от тебе́. Ве́мы, свя́тче Бо́жий, я́ко и́маши дерзнове́ние ко Влады́це Христу́ Бо́гу, и, ели́ка а́ще воспро́сиши у Него́, да́стся нам. А́ще же и недосто́йни есмы́ благода́ти Его́, оба́че твоя́ моли́тва да сотвори́т ны ея́ досто́йны, мно́го бо мо́жет приле́жная моли́тва пра́веднаго, я́коже рече́ апо́стол. Сам у́бо ты воздви́гни нас из глубины́ грехо́вныя, неве́рныя просвети́, еретики́ обрати́, заблу́ждшия в нас от Правосла́вия к позна́нию и́стинныя ве́ры наста́ви, всей же Це́ркви исхода́тайствуй мир и святы́ню, единомы́слие в ве́ре, умо́в благопостоя́ние, преспе́яние в благоче́стии, единоду́шие в братолю́бии, ве́рность ко оте́честву, нача́льствующим пра́вду и су́д, роди́телем благопопече́ние о ча́дех, ча́дом же страх и послуша́ние, де́вствующим чистоту́ и целому́дрие, бра́чным же ве́рность и непоро́чность ло́жа; всем же нам зре́ние грехо́в свои́х и покая́ние, ка́ющимся проще́ние, в злоключе́ниих же терпе́ние и упова́ние, в наде́жде же спасе́ние да́руй. Изба́ви же всех нас от гла́да, губи́тельства, тру́са, пото́па, огня́ и меча́, от нахожде́ния иноплеме́нных, междоусо́бныя бра́ни и нападе́ния вра́жия, от тлетво́рных ветр и смертоно́сныя я́звы, от напра́сныя сме́рти и вся́каго зла, да, та́ко вси тобо́ю просвеща́еми, наставля́еми, утеша́еми, утвержда́еми и сохраня́еми, сла́вим просла́вившаго тя Бо́га, Отца́, и Сы́на, и Свята́го Ду́ха, и твое́ предста́тельство, всегда́, ны́не, и при́сно, и во ве́ки веко́в. Ами́нь.