Собор Рязанских святых

Жития

Установлен 12 января 1987 года по инициативе архиепископа Рязанского и Касимовского Симона (Новикова) и по благословению патриарха Московского и всея Руси Пимена. День празднования был приурочен ко дню обретения мощей святителя Василия Рязанского.

Тропарь, глас 8

Святи́и вси в земли́ Ряза́нстей и Му́ромстей просия́вшии,
при́снии на́ши моли́твенницы и засту́пницы,
моли́те Влады́ку Христа́ Бо́га на́шего

мир вселе́нней дарова́ти и душа́м на́шим ве́лию ми́лость.

Кондак, глас 8

Я́ко многосве́тлыя зве́зды,
от гра́да Ряза́ни возсия́вшии, уго́дницы Христо́вы,
Правосла́вия охрани́тели
и благоче́стия учи́тели,
при́сные на́ши засту́пницы,
мо́лим вас, за ны Христу́ Бо́гу и Пречи́стей Его́ Ма́тери моли́теся,
да благода́рною душе́ю зове́м:

ра́дуйтеся, святи́и вси, в земли́ Ряза́нстей просия́вшии.

Канон страстотерпцам великим князьям Борису и Глебу

Минея, 24 Июля.

Глас 4

Песнь 1

Ирмос: Мо́ря чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма
Амали́кову си́лу в пусты́ни победи́л есть.

Припев: Святи́и благовéрнии Бори́се и Глéбе, моли́те Бо́га о на́с.

Богому́драя дво́ице, вели́цыи страда́льцы, со святы́ми Тро́ице предстоя́ще,
моли́теся очище́ние мне дарова́ти, вас похваля́ющему.

Припев: Святи́и благовéрнии Бори́се и Глéбе, моли́те Бо́га о на́с.

Боже́ственное бога́тство исцеле́ний и ми́ро благово́нное храм ваш, святи́и,
в не́мже пое́м Христа́ Бо́га, вас просла́вльшаго.

Сла́ва Отцу́ и Сы́ну и Свято́му Ду́ху.

Незаходи́маго Со́лнца в себе́ стяжа́вше,
Христа́ Бо́га на́шего, пресла́вне Рома́не с Дави́дом,
освяти́те нас, честну́ю па́мять ва́шу почита́ющих.

И ны́не и при́сно и во ве́ки веко́в. Ами́нь.

Богородичен: Кра́сную, и избра́нную, и всечестну́ю разуме́в Тебе́,
Бо́жий, Пренепоро́чная, Сын Твой Сын бысть:
сы́ны сотвори́ благода́тию, Богоро́дицу Тя чту́щия.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи:
Ты моя́ кре́пость, Го́споди,
и прибе́жище, и утвержде́ние.

Припев: Святи́и благовéрнии Бори́се и Глéбе, моли́те Бо́га о на́с.

Весе́лием весели́тся Христо́ва Це́рковь
в па́мяти ва́шей, святи́и, и Творцу́ вопие́т:
Ты моя́, Го́споди, кре́пость, и прибе́жище, и утвержде́ние.

Припев: Святи́и благовéрнии Бори́се и Глéбе, моли́те Бо́га о на́с.

До́блия вене́чники и страда́льцы Христо́вы вси восхва́лим све́тло,
научи́вшия нас Христу́ вопи́ти:
Свят еси́, Го́споди.

Сла́ва Отцу́ и Сы́ну и Свято́му Ду́ху.

Ни ца́рства жела́ния, ни пи́щи наслажде́ния, ни сребра́ и зла́та возжеле́ша,
но Христу́ еди́ному вопия́ху:
Свят еси́, Го́споди.

И ны́не и при́сно и во ве́ки веко́в. Ами́нь.

Богородичен: Избавля́ющаго челове́ки преслуша́ния и лю́таго паде́ния,
всему́ Вино́внаго, Чи́стая и Всенепоро́чная, родила́ еси́.

Седален, глас 1

Измла́да Христа́ возлюби́вше ку́пно, бра́тия честна́я,
жизнь безстра́стную стяжа́вше, сла́внии, целому́дрие изво́листе
и поще́ние от страсте́й душе́вных и теле́сных,
поспеше́ние Бо́жиею благода́тию прие́мше, исцеля́ете вас пою́щия.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Безневе́стная, Чи́стая Богоро́дице Де́во,
еди́на ве́рных Предста́тельнице и покро́ве,
бед, и скорбе́й, и лю́тых обстоя́ний всех изба́ви,
на Тя упова́ние, Отрокови́це, иму́щих,
и ду́ши на́ша спаси́ Боже́ственными моли́твами Твои́ми.

Песнь 4

Ирмос: Вознесе́на Тя ви́девши Це́рковь на Кресте́,
Со́лнце Пра́ведное,
ста в чи́не свое́м,
досто́йно взыва́ющи:
сла́ва си́ле Твое́й, Го́споди.

Припев: Святи́и благовéрнии Бори́се и Глéбе, моли́те Бо́га о на́с.

Я́ко два свети́ла возсия́вшая, просвеща́ете лю́ди ва́ша, Богоно́сцы,
но и ны́не изба́вите нас враго́в обстоя́ния,
да почита́ем вас, с Бо́гом заступле́ние на́ше.

Припев: Святи́и благовéрнии Бори́се и Глéбе, моли́те Бо́га о на́с.

Врачевство́ неистощи́мое ра́ка ва́ша показа́ся, блаже́ннии, и приста́нище небу́рное:
вси бо, ве́рою притека́ющии, обрета́ем от злых напа́стей избавле́ние.

Сла́ва Отцу́ и Сы́ну и Свято́му Ду́ху.

Любо́вию ко Христу́ привяза́еми,
тем и даро́в сподо́бльшеся стра́сти разли́чныя исцеля́ти,
сего́ ра́ди ва́ше соверша́ем пра́зднество, Богому́дрии.

И ны́не и при́сно и во ве́ки веко́в. Ами́нь.

Богородичен: Седя́й на престо́ле Херуви́мсте и превознесе́не,
я́ко престо́л имы́й, на руку́ Твое́ю почи́в, Мари́е Богоневе́сто,
препросла́вленный Бог.

Песнь 5

Ирмос: Ты, Го́споди, мой Свет,
в мир прише́л еси́,
Свет Святы́й, обраща́яй из мра́чна неве́дения
ве́рою воспева́ющия Тя.

Припев: Святи́и благовéрнии Бори́се и Глéбе, моли́те Бо́га о на́с.

Наста́ всечестны́й пра́здник и свяще́нное торжество́ сла́внаго Рома́на с Дави́дом,
нося́ нам ра́дость ве́чную, в не́йже сла́вим Го́спода, просла́вльшаго их.

Припев: Святи́и благовéрнии Бори́се и Глéбе, моли́те Бо́га о на́с.

Доброде́тели укра́шени благоле́пием, све́тлый Рома́не с Гле́бом, страда́нием венча́вшеся,
врага́ же и бра́та посра́мльше, за Христа́ прия́сте заколе́ние.

Сла́ва Отцу́ и Сы́ну и Свято́му Ду́ху.

Слы́шано бысть во всем ми́ре честно́е и свяще́нное страда́ние ва́ше,
и всяк язы́к возставля́ет сла́вити Христа́, вас просла́вльшаго.

И ны́не и при́сно и во ве́ки веко́в. Ами́нь.

Богородичен: Преста́ у́бо тле́ние челове́ка:
Де́ва бо роди́ нетле́нно Бо́га Сло́ва, па́че естества́ и сло́ва,
и Де́ва па́ки пребы́сть.

Песнь 6

Ирмос: Пожру́ Ти со гла́сом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ребр Твои́х
исте́кшею Кро́вию.

Припев: Святи́и благовéрнии Бори́се и Глéбе, моли́те Бо́га о на́с.

О и́же све́тлый ваш пра́здник соверша́ющих, блаже́ннии, моли́теся,
и оте́чество ва́ше храни́ти от враг ненаве́тно,
и ми́рно строе́ние дарова́ти моли́твами ва́шими.

Припев: Святи́и благовéрнии Бори́се и Глéбе, моли́те Бо́га о на́с.

Небе́снаго Ца́рствия рачи́телие бы́вше, блаже́ннии,
Влады́це Христу́ чи́стою со́вестию послужи́вше,
и Тому́ предстоя́ще, моли́теся, спасти́ вас восхваля́ющих.

Сла́ва Отцу́ и Сы́ну и Свято́му Ду́ху.

Прилепи́вшеся Христу́ и на Него́ все упова́ние возложи́вше, блаже́ннии,
сего́ ра́ди убие́ни бы́вше, ве́чно с Ним ца́рствуете.

И ны́не и при́сно и во ве́ки веко́в. Ами́нь.

Богородичен: Усты́, по́мыслом и се́рдцем, Пречи́стая, Тя, Богоро́дицу, пропове́даем:
Тобо́ю бо Бо́гу примири́хомся,
отринове́нии преступле́нием пе́рвее пра́отца.

Кондак, глас 3

Возсия́ днесь пресла́вная па́мять ва́ша,
благоро́днии страстоте́рпцы Христо́вы, Рома́не и Дави́де,
созыва́ющи нас к похвале́нию Христа́ Бо́га на́шего.
Тем, притека́юще к ра́це моще́й ва́ших,
исцеле́ния дар прие́млем моли́твами ва́шими, святи́и:
вы бо боже́ственнии вра́чеве есте́.

Икос

Разу́мное житие́ соверша́я, преблаже́нне,
ца́рским венце́м от ю́ности укра́шен, всебога́тый Рома́не,
власть ве́лия был еси́ твоему́ оте́честву, во всей земли́ Росси́йстей.
Тем, ви́дя твой успе́х, Христо́с Бог судо́м Свои́м на муче́ние тя призва́,
кре́пость тебе́ пода́в с Небесе́, да победи́ши врага́ му́жески
с Дави́дом, бра́том твои́м, пострада́вшим с тобо́ю:
вы бо Боже́ственнии вра́чеве есте́.

Песнь 7

Ирмос: В пещи́ авраа́мстии о́троцы перси́дстей,
любо́вию благоче́стия па́че,
не́жели пла́менем, опаля́еми, взыва́ху:
благослове́н еси́ в хра́ме сла́вы Твоея́, Го́споди.

Припев: Святи́и благовéрнии Бори́се и Глéбе, моли́те Бо́га о на́с.

Боже́ственная и пресве́тлая па́мять ва́ша, я́ко Не́бо светоза́рное, показа́ся,
и я́ко со́лнце светоно́сно, просвеща́я без сумне́ния Христу́ вопию́щия:
благослове́н еси́ в хра́ме сла́вы Твоея́, Го́споди.

Припев: Святи́и благовéрнии Бори́се и Глéбе, моли́те Бо́га о на́с.

Кто не удиви́тся и кто не воспое́т и просла́вит ве́рно
пресла́вных му́ченик Христо́вых, Бори́са с Гле́бом,
Христо́ва ра́ди смире́ния возненави́девших диади́му и ца́рство?

Сла́ва Отцу́ и Сы́ну и Свято́му Ду́ху.

Мглу безбо́жия отгна́вше,
све́тло научи́ша лю́ди своя́ чести́ в Тро́ице Еди́наго Бо́га и усе́рдно пе́ти:
благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся,
Тобо́ю бо даде́ся ра́дость, Богоро́дице, вопию́щим:
благослове́на Ты в жена́х еси́, Всенепоро́чная Влады́чице.

Песнь 8

Ирмос: Ру́це распросте́р, Дании́л
львов зия́ния в ро́ве затче́;
о́гненную же си́лу угаси́ша,
доброде́телию препоя́савшеся,
благоче́стия рачи́тели, о́троцы, взыва́юще:
благослови́те, вся дела́ Госпо́дня, Го́спода.

Припев: Святи́и благовéрнии Бори́се и Глéбе, моли́те Бо́га о на́с.

Просия́вши днесь пресве́тлая па́мять ва́ша, блаже́ннии,
ве́рныя созыва́ет на торжество́, просла́вити терпе́ния ва́ша, Христу́ же вопи́ти:
благослови́те, вся дела́ Госпо́дня, Го́спода.

Припев: Святи́и благовéрнии Бори́се и Глéбе, моли́те Бо́га о на́с.

Богоявле́ннии и но́вии страда́льцы Тебе́, Христе́, еди́наго возлюби́ша
и лю́ди наста́виша пе́ти Тя, Творца́ всех:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Пра́вды свети́льницы возсия́вшии, укра́шени добро́тою муче́ния,
просвеща́юще сердца́ ве́рных, неду́ги отго́нят от вопию́щих ве́рно:
благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Избавля́я нас, возсия́ из Тебе́ Госпо́дь, Де́во Чи́стая,
Его́же моли́, Влады́чице, просвети́ти пою́щия Тя и обстоя́ния изба́вити вопию́щия:
благослови́те, вся дела́ Госпо́дня, Го́спода.

Песнь 9

Ирмос: Ка́мень нерукосе́чный
от несеко́мыя горы́, Тебе́, Де́во,
краеуго́льный отсече́ся,
Христо́с, совокупи́вый разстоя́щаяся естества́.
Тем, веселя́щеся, Тя, Богоро́дице, велича́ем.

Припев: Святи́и благовéрнии Бори́се и Глéбе, моли́те Бо́га о на́с.

Испещре́ни бы́вши Боже́ственными добро́тами, страда́нии ва́шими к Бо́гу востеко́сте,
венцы́ побе́ды от Него́ прие́млюще,
тем ва́ша певцы́ помина́йте, да вас непреста́нно велича́ем.

Припев: Святи́и благовéрнии Бори́се и Глéбе, моли́те Бо́га о на́с.

О Боже́ственная дво́ице, самобра́тная и светоза́рная!
Моли́теся дарова́ти очище́ние согреше́ний и пре́жде конца́ жития́ исправле́ние,
да вас непреста́нно велича́ем.

Сла́ва Отцу́ и Сы́ну и Свято́му Ду́ху.

От мла́да во́зраста освяти́ вас Вседе́тель Бог
и окорми́тели изря́дны пла́вающим в мо́ри жития́ показа́,
тем согла́сно почита́ем па́мять ва́шу.

И ны́не и при́сно и во ве́ки веко́в. Ами́нь.

Богородичен: Спаси́ мя, всех ро́ждшая Изба́вителя,
разори́ души́ моея́ о́блаки, Све́та о́блаче, Всесвята́я Влады́чице,
и си́льна соде́лай на стра́сти, борю́щия мя.

Светилен

Я́ко вои́стинну пресве́тлии свети́льницы,
всю вселе́нную просвети́сте ве́рою, Богоприя́тне Рома́не с Дави́дом.
Тем пе́сньми воспое́м возвели́чившаго вас Христа́ Бо́га на́шего.

Сла́ва Отцу́ и Сы́ну и Свято́му Ду́ху.

Сия́ет днесь страстоте́рпец па́мять, я́ко заря́,
лик А́нгельский торжеству́ет,
род челове́ческий пра́зднует.
Те́мже моли́те Христа́ поми́ловати ду́ши на́ша.

И ны́не и при́сно и во ве́ки веко́в. Ами́нь.

Богородичен: Богоро́дицу пе́сньми немо́лчными благоче́стно пое́м, вопию́ще:
ра́дуйся, горо́ свята́я, ра́дуйся, престо́ле огнено́сный всех Царя́,
ра́дуйся, А́нгелов ра́досте и му́чеников сла́во.

Акафист святым благоверным страстотерпцам Борису и Глебу

Конда́к 1

Избра́ннии чудотво́рцы и до́блественнии во́ини Христо́вы,
блага́го ко́рене благи́я о́трасли, пресве́тлая дво́ице,
в неду́зех безме́зднии вра́чеве
и ко Спа́су о всем ми́ре те́плии моли́твенницы,
восхваля́ем вас любо́вию,
святи́и и благове́рнии кня́зие Бори́се и Гле́бе.
Вы же, я́ко иму́щии дерзнове́ние ко Пресвяте́й Тро́ице,
от вся́ких нас бед изба́вите, да зове́м к вам:

Ра́дуйтеся, Бори́се и Гле́бе, вели́цыи и сла́внии страстоте́рпцы.

И́кос 1

А́нгелов Госпо́дних согра́ждане яви́стеся, святи́и благове́рнии Бори́се и Гле́бе, не оста́вльше согра́ждан земна́го ми́ра: по страда́нии бо ва́шем честна́я телеса́ ва́ша, му́ченическою кро́вию обагре́нная и благода́тию Бо́жиею просла́вленная, всем с ве́рою к ним притека́ющим источа́ют многоразли́чная чуде́сная исцеле́ния; ду́ши же ва́ша предстоя́т с ли́ки А́нгельскими и со все́ми святы́ми Пресвяте́й Тро́ице. Те́мже мы, удивля́ющеся ва́шему го́рнему и до́льнему гражда́нству, благогове́йно преклоня́юще пред ва́ми коле́на и сердца́ на́ша, уми́льно вопие́м си́це:

Ра́дуйтеся, оде́жды креще́ния непоро́чнии храни́телие;

ра́дуйтеся, христиа́нскаго благоче́стия при́снии ревни́телие.

Ра́дуйтеся, Боже́ственных писа́ний ученицы́ до́брии;

ра́дуйтеся, отца́ благове́рнаго ча́да возлю́бленная.

Ра́дуйтеся, Ева́нгелия Христо́ва после́дователие и́стиннии;

ра́дуйтеся, Бо́гови сло́вом и житие́м благоугоди́вшии.

Ра́дуйтеся, чу́дным све́том богопозна́ния просвеще́ннии;

ра́дуйтеся, ви́ссом чистоты́ и непоро́чности облече́ннии.

Ра́дуйтеся, неустраши́мо муче́ния прие́мшии;

ра́дуйтеся, Го́споду Иису́су Христу́ в страсте́х подража́вшии.

Ра́дуйтеся, все́льшиися во оби́тели Отца́ Небе́снаго;

ра́дуйтеся, восприе́мшии от Го́спода мзду трудо́в и терпе́ния.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 2

Ви́деша сы́нове Росси́йстии, ка́ко испо́лнися святы́й храм благоуха́ния пречу́днаго, егда́ отверзо́ша ра́ку ва́шу, и просла́виша вси Го́спода. Те́мже и мы, гре́шнии и недосто́йнии, благогове́юще пред пречу́дною святы́нею, прославля́ем Ди́внаго во святы́х Свои́х Бо́га, непреста́нно вопию́ще: Аллилу́ия.

И́кос 2

Ра́зум здра́вый стяжа́ли есте́ святы́м и богоуго́дным житие́м ва́шим, страстоте́рпцы Христо́вы Бори́се и Гле́бе. Егда́ услы́шасте о умышле́нии ка́инском лю́таго и властолюби́ваго бра́та ва́шего Святопо́лка, нима́ло не помы́слисте проти́ву его́ ра́тию ити́; возжела́сте па́че жи́зни своея́ лиши́тися, не́жели с бра́том име́ти брань. Сего́ ра́ди мы, предстоя́ще моли́твенно пред ва́ми, возво́дим очеса́ на́ша серде́чная горе́ к вам, на Небеси́ живу́щим, почита́юще честна́я ва́ша страда́ния си́ми похва́льными пе́сньми:

Ра́дуйтеся, су́етных помышле́ний презри́телие;

ра́дуйтеся, за́поведей Христо́вых исполни́телие.

Ра́дуйтеся, тьмы грехо́вныя попра́телие;

ра́дуйтеся, венцено́сцы наро́читии.

Ра́дуйтеся, ника́коже к земны́м се́рдце свое́ прилепи́вшии;

ра́дуйтеся, Жива́го Бо́га па́че всего́ ми́ра возлюби́вшии.

Ра́дуйтеся, оправда́ний Госпо́дних пресве́тлыя свещи́;

ра́дуйтеся, Небе́сных благ прича́стницы.

Ра́дуйтеся, пресла́дцыи слы́шателие Боже́ственных слове́с;

ра́дуйтеся, те́плии ко Спа́су о нас моли́твенницы.

Ра́дуйтеся, кро́вию свое́ю убеле́ннии;

ра́дуйтеся, заре́ю Трисо́лнечнаго Све́та озаре́ннии.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 3

Си́лою Боже́ственною подвиза́еми покрови́телие есте́ нам, защи́тницы и помо́щницы; страну́ бо на́шу от нападе́ний вра́жиих избавля́ете, стра́ждущих от вся́ких неду́гов и боле́зней исцеля́ете и во вся́ком бла́зе преспе́яние да́руете всем, вопию́щим Бо́гу: Аллилу́ия.

И́кос 3

Иму́ще вои́стину, во́ини Христо́вы Бори́се и Гле́бе, пла́менное се́рдце ко благохвале́нию ди́внаго в чудесе́х Бо́га, мо́литеся непреста́нно о спасе́нии душ к вам усе́рдно прибега́ющих. Сего́ ра́ди мы от глубины́ серде́ц на́ших умиле́нно прино́сим вам такова́я пе́ния:

Ра́дуйтеся, Го́споду сла́вы вы́ну предстоя́щии;

ра́дуйтеся, а́нгельскую трисвяту́ю песнь слы́шащии.

Ра́дуйтеся, го́рняго Иерусали́ма имени́тии гра́ждане;

ра́дуйтеся, Ца́рства Христо́ва до́брии насле́дницы.

Ра́дуйтеся, невече́рняго дне зри́телие;

ра́дуйтеся, нерукотво́рнаго хра́ма обита́телие.

Ра́дуйтеся, ра́йских селе́ний созерца́телие;

ра́дуйтеся, слепы́м прозре́ния пода́телие.

Ра́дуйтеся, домо́в благочести́вых посети́телие;

ра́дуйтеся, нерадя́щих о благоче́стии наказа́телие.

Ра́дуйтеся, вели́ких пра́здников почита́ния наста́вницы;

ра́дуйтеся, в доброде́телех преспева́ющих споспе́шницы.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 4

Бу́рею неве́рия одержи́мых и ходя́щих во тьме злоче́стия огне́м наказа́ния опаля́ете, да уцелому́дрившеся и́стинно позна́ют и́стиннаго Бо́га, благоче́стно Его́ чту́ще и со стра́хом Ему́ вопию́ще: Аллилу́ия.

И́кос 4

Слы́шаще ва́ша, страстоте́рпцы святи́и Бори́се и Гле́бе, чудеса́, росси́йстии сы́нове не то́кмо из бли́жних, но и из да́льних стран стека́хуся к ва́шим чудоде́йственным моще́м и, исцеля́ющеся от неду́гов и боле́зней, вопия́ху к вам такова́я:

Ра́дуйтеся, боже́ственныя лозы́ пресла́дкое ро́ждие;

ра́дуйтеся, новопросвеще́нныя земли́ кра́снии цве́ти.

Ра́дуйтеся, пе́рвии просла́вленнии на Руси́ уго́дницы;

ра́дуйтеся, в беда́х и ну́ждах благочести́вым посо́бницы.

Ра́дуйтеся, вели́цыи в напа́стех уте́шителие;

ра́дуйтеся, ве́ры Христо́вы ревни́телие.

Ра́дуйтеся, Боже́ственныя слу́жбы пла́меннии люби́телие;

ра́дуйтеся, благоче́стия до́брии строи́телие.

Ра́дуйтеся, хромы́м хожде́ния пода́телие;

ра́дуйтеся, о спасе́нии ро́да христиа́нскаго хода́таи.

Ра́дуйтеся, виногра́да Христо́ва целе́бныя ве́тви;

ра́дуйтеся, и́стиннии и безме́зднии вра́чеве.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 5

Боготе́чныя зве́зды яви́стеся нам путево́дствующия: внегда́ обурева́тися нам волна́ми жите́йских попече́ний и опа́сно ше́ствовати к ти́хому приста́нищу, све́том моли́тв ва́ших избавля́еми есмы́ от блужде́ния и потопле́ния. Сего́ ра́ди, сла́вяще Го́спода, вопие́м: Аллилу́ия.

И́кос 5

Ви́деша сы́нове росси́йстии, я́ко притека́ющии с ве́рою прие́млют хода́тайством ва́шим в ну́ждах ско́рое утеше́ние и от зол избавле́ние, те́мже восхваля́ют вас си́це:

Ра́дуйтеся, и́дольскаго нече́стия обличи́телие;

ра́дуйтеся, му́дрых ко благоче́стию упра́вителие.

Ра́дуйтеся, горды́ни и буесло́вия посрами́телие;

ра́дуйтеся, зло́бы и мще́ния угаси́телие.

Ра́дуйтеся, вражду́ющих на оте́чество укроти́телие;

ра́дуйтеся, по́лчищ вра́жеских расточи́телие.

Ра́дуйтеся, ми́ра и тишины́ возстанови́телие;

ра́дуйтеся, Христо́вы до́брии вои́телие.

Ра́дуйтеся, благоро́дство земно́е носи́вшии;

ра́дуйтеся, кро́вию порфи́ру освяти́вшии.

Ра́дуйтеся, просла́вившии Спа́са страстоте́рпцы;

ра́дуйтеся, просла́вленнии от Бога чудотво́рцы.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 6

Пропове́дующи пропове́дует вся́ Ру́сская земля́ ва́ше Небе́сное предста́тельство у Всевы́шняго: вы бо я́ко кре́пцыи щити́ и я́ко тве́рдыя сте́ны, огражда́ете Оте́чество ва́ше непобеди́мым ору́жием, благода́тию Боже́ственною, дарова́нною вам свы́ше, сего́ ра́ди, хва́ляще Бо́га, пое́м: Аллилу́ия.

И́кос 6

Возсия́ли есте́, я́ко пресве́тлыя зве́зды, просвеще́нием Свята́го Креще́ния среди́ тьмы идолослуже́ния; ве́ру бо правосла́вную прие́мше, се́мена благоче́стия христиа́нскаго в сердца́х по́дданных свои́х посе́ясте и на славосло́вие и́мене Бо́жия хра́мы боголе́пно сооруди́сте. Сего́ ра́ди, святи́и Бори́се и Гле́бе, вас почита́ем си́ми похва́льными пе́сньми:

Ра́дуйтеся, и́дольския ле́сти обличи́телие;

ра́дуйтеся, дре́вняго зми́я попра́телие.

Ра́дуйтеся, жития́ непоро́чнаго рачи́телие;

ра́дуйтеся, ева́нгельских пропове́даний блюсти́телие.

Ра́дуйтеся, те́рния поро́ков ре́вностнии искорени́телие;

ра́дуйтеся, подвигополо́жнику Христу́ после́дователие.

Ра́дуйтеся, и́стиннии о́брази кро́тости и незло́бия;

ра́дуйтеся, благода́ти си́лу подаю́щии мно́гим.

Ра́дуйтеся, нерастле́ннии хра́ми Бо́га Жива́го;

ра́дуйтеся, доброде́телей чи́стая зерца́ла.

Ра́дуйтеся, в чу́дный свет богопозна́ния пресе́льницы;

ра́дуйтеся, вели́цыи Христо́вы уго́дницы.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 7

А́ще и мно́гажды злоумы́шленнии язы́цы покуша́хуся вни́ти внутрь Оте́чествия на́шего и одоле́ти его́, оба́че неви́димым ва́шим предста́тельством пред Бо́гом постыжде́ни и прогна́ни бы́ша. Те́мже удивля́ющеся неизрече́нному к нам Бо́жию милосе́рдию, пое́м: Аллилу́ия.

И́кос 7

Но́выя благода́ти бы́вшии прича́стницы и даро́в Свята́го Ду́ха испо́лненнии, не то́чию в земли́ на́шей яви́лися есте́ до́брии споспе́шницы ве́ры и нра́вов благи́х; но среди́ чужди́х наро́дов сла́ву и́мене Госпо́дня и си́лу мы́шцы Его́ яви́сте. Сего́ ра́ди похва́льными пе́сньми вас ублажа́ем:

Ра́дуйтеся, неувяда́емии цве́ти земли́ Ру́сския;

ра́дуйтеся, вертогра́да Небе́снаго благоле́пная гро́здия.

Ра́дуйтеся, непоро́чнии а́гнцы ста́да Христо́ва;

ра́дуйтеся, я́ко го́лубие, укра́шеннии чистото́ю.

Ра́дуйтеся, на криле́х ве́ры возне́сшиися;

ра́дуйтеся, в Небе́сный Иерусали́м пресе́льшиися.

Ра́дуйтеся, го́рняго Сио́на насле́дницы;

ра́дуйтеся, лико́в Небе́сных собесе́дницы.

Ра́дуйтеся, я́ко зла́то в горни́ле, искуше́ннии;

ра́дуйтеся, к ли́ку му́ченик причте́ннии.

Ра́дуйтеся, Христо́вы Це́ркве вели́кое удобре́ние;

ра́дуйтеся, христиа́ном пода́телие ра́дости неизрече́нныя.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 8

Стра́нная и ужа́сная соде́яшася, егда́ злочести́вый варя́г дерзну́ попра́ти ме́сто свя́то, иде́же почива́ху блаже́нная телеса́ ва́ша: огнь бо изы́де из земли́, опали́ окая́ннаго и ве́дати научи́ си́лу ва́шу, уго́дницы Бо́жии. Ве́рнии же, прославля́юще чудоде́йства ва́ша, воспе́ша Ди́вному во святы́х Свои́х Бо́гу: Аллилу́ия.

И́кос 8

Весь ум впери́вше в слу́жбу Боже́ственную и духо́вная псалмопе́ния, яви́лися есте́ непобеди́мии Христо́вы адама́нти, егда́ нечести́вии челове́цы приидо́ша от лю́таго Святопо́лка ру́ки на вас возложи́ти и непови́нную кровь ва́шу проли́ти. Мы же ве́рнии, честву́юще ве́ру и страда́ния ва́ша, взыва́ем си́це:

Ра́дуйтеся, слу́жбу Бо́жию в пути́ не оставля́вшии;

ра́дуйтеся, богодухнове́нное пе́ние сла́достно внуша́вшии.

Ра́дуйтеся, Боже́ственная словеса́ во усте́х свои́х держа́вшии;

ра́дуйтеся, в се́рдце сокро́вище моли́твы стяжа́вшии.

Ра́дуйтеся, А́гнца Бо́жия и́стиннии испове́дницы;

ра́дуйтеся, апо́стольских пропове́даний ревни́тельнии прее́мницы.

Ра́дуйтеся, святы́х отце́в преда́ний ве́рнии блюсти́телие;

ра́дуйтеся, братолю́бия и послуша́ния храни́телие.

Ра́дуйтеся, я́ко живо́т ве́чный па́че вре́меннаго возлюби́сте;

ра́дуйтеся, я́ко Ца́рство Небе́сное земно́му предпочто́сте.

Ра́дуйтеся, я́ко се́рдце смире́нное в же́ртву Бо́гу принесо́сте;

ра́дуйтеся, я́ко в ве́ре Христо́ве мно́гих утверди́сте.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 9

Вси ве́рнии чтут благогове́йно па́мять ва́шу: во святы́я хра́мы стека́ющеся, сла́вят страда́ния ва́ша и возвеща́ют чудеса́, я́же соде́ясте си́лою Бо́га и Спа́са на́шего, Ему́же вопие́м: Аллилу́ия.

И́кос 9

Вети́и неве́рнии всу́е тружда́ются му́дрствовати о святы́ни ва́шей, Бори́се и Гле́бе достохва́льнии: недоуме́ют бо изрещи́, ка́ко бре́нныя мо́щи чудотворя́т и челове́цы со А́нгелы спрославля́ются. Мы же, просвеща́еми ве́рою, благоле́пно вопие́м:

Ра́дуйтеся, Царя́ сла́вы прославле́ние;

ра́дуйтеся, кня́зя тьмы посрамле́ние.

Ра́дуйтеся, глаго́лов Бо́жиих исполне́ние;

ра́дуйтеся, Боже́ственныя прему́дрости оправда́ние.

Ра́дуйтеся, чуде́с Христо́вых пропове́дницы;

ра́дуйтеся, ве́чныя ра́дости насле́дницы.

Ра́дуйтеся, во́ини Христо́вы непобеди́мии;

ра́дуйтеся, броня́ во́инства на́шего необори́мая.

Ра́дуйтеся, я́ко жизнь гряду́щую возлюби́ли есте́;

ра́дуйтеся, я́ко бла́га вре́менная презре́ли есте́.

Ра́дуйтеся, я́ко по́мыслы ве́ка сего́ отри́нули есте́;

ра́дуйтеся, я́ко красото́ю доброде́телей укра́шени есте́.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 10

Спасти́ хотя́ще ду́ши своя́, святи́и страстоте́рпцы, небрего́сте о телесе́х ва́ших и преда́сте их на убие́ние, вопию́ще Бо́гу: Аллилу́ия.

И́кос 10

Сте́ны есте́, огражда́ющия Русь, святи́и Бори́се и Гле́бе, и неутоми́мии стра́жи проти́ву враг на́ших пребыва́ете, непреста́нно моля́щеся Го́споду Бо́гу о спасе́нии душ на́ших и исцеля́юще не́мощи на́ша. Сего́ ра́ди уми́льно вопие́м ко святы́ни ва́шей:

Ра́дуйтеся, я́ко сы́нове росси́йстии хода́тайством ва́шим спаса́ются;

ра́дуйтеся, я́ко вси ве́рнии моли́твами ва́шими от бед и скорбе́й избавля́ются.

Ра́дуйтеся, я́ко врази́ на́ши вас устраша́ются и в бе́гство обраща́ются;

ра́дуйтеся, я́ко Оте́чество на́ше заступле́нием ва́шим утвержда́ется.

Ра́дуйтеся, я́ко похва́льными венцы́ Це́рковь вас венча́ет;

ра́дуйтеся, я́ко по́двиги ва́ша правове́рнии немо́лчно воспева́ют.

Ра́дуйтеся, я́ко ста́рцы и ю́ноши к покро́ву ва́шему прибега́ют;

ра́дуйтеся, я́ко ца́рие и во́ини, бога́тии и убо́зии вас прославля́ют.

Ра́дуйтеся, му́ченическую смерть прие́мшии;

ра́дуйтеся, терпе́нием жизнь ве́чную стяжа́вшии.

Ра́дуйтеся, ско́рии помо́щницы;

ра́дуйтеся, благомо́щнии засту́пницы.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 11

Пе́ние всеумиле́нное не умолче́ во усте́х ва́ших, егда́ лю́тии губи́телие устреми́шася на вас, я́ко на а́гнцев, гото́вых на заколе́ние. Сие́ воспомина́юще и сла́вяще Го́спода, да́вшаго вам си́лу такову́ю, взыва́ем к Нему́: Аллилу́ия.

И́кос 11

Светоза́рныя свещи́ зрим вас, святи́и благове́рнии кня́зие Бори́се и Гле́бе, освеща́ющия Ру́сскую Це́рковь и всех ве́рных чад ея́, да прославля́ют святу́ю па́мять ва́шу, вопию́ще:

Ра́дуйтеся, во еди́нем ду́се благоче́стия ходи́вшии;

ра́дуйтеся, в бра́тстем едине́нии и любви́ пожи́вшии.

Ра́дуйтеся, подража́вшии иску́пльшему нас Влады́це;

ра́дуйтеся, сла́внии и всехва́льнии му́ченицы.

Ра́дуйтеся, подвиза́вшиися по́двигом до́брым;

ра́дуйтеся, венча́ннии венце́м сла́вы невече́рния.

Ра́дуйтеся, тече́ние жития́ му́ченически сконча́вшии;

ра́дуйтеся, во оби́тели Отца́ Небе́снаго водвори́вшиися.

Ра́дуйтеся, Ру́сския Це́ркве похвало́;

ра́дуйтеся, градо́в на́ших ле́пото.

Ра́дуйтеся, сы́нове и засту́пницы земли́ Ру́сския;

ра́дуйтеся, я́ко па́мять ва́ша присносла́вна.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 12

Благода́ть, да́нную вам от Бо́га на бла́го сыно́в Руси́, о чудотво́рцы Бори́се и Гле́бе, не вотще́ оста́вили есте́: яви́сте бо ся цели́телие боля́щих, уте́шителие су́щих в ско́рбех и заключе́ниих, наста́вницы заблу́ждших и ско́рии помо́щницы всем, с ве́рою призыва́ющим вас и вопию́щим ко Го́споду: Аллилу́ия.

И́кос 12

Пою́ще и восхваля́юще чудеса́ ва́ша, честву́ет святу́ю па́мять ва́шу пресла́вная Це́рковь Ру́сская, и мы, ча́да ея́, о́чи се́рдца возводя́ще ко Го́споду, си́це вопие́м:

Ра́дуйтеся, ко́рене честна́го благи́я о́трасли;

ра́дуйтеся, соприча́стницы А́нгельскаго со́нма.

Ра́дуйтеся, сопроти́вных победи́телие;

ра́дуйтеся, неду́гующих вра́чеве.

Ра́дуйтеся, градо́в и ве́сей на́ших пресве́тлое сия́ние;

ра́дуйтеся, во́инства ру́сскаго тве́рдое огражде́ние.

Ра́дуйтеся, я́ко страда́ньми ва́шими сниска́сте ра́дость ве́чную;

ра́дуйтеся, я́ко му́ченьми прешли́ есте́ к блаже́нному безсме́ртию.

Ра́дуйтеся, в горни́ле лю́тых обстоя́ний искуше́ннии;

ра́дуйтеся, добро́тою благоче́стия чисте́е зла́та блиста́ющии.

Ра́дуйтеся, Бо́гови всепло́дие себе́ прине́сшии;

ра́дуйтеся, живота́ ве́чнаго и Ца́рствия Бо́жия насле́дницы.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 13

О святи́и и всесла́внии чудотво́рцы Бори́се и Гле́бе, вели́цыи росси́йстии помо́щницы в беда́х и напа́стех! Не пре́зрите нас гре́шных, но приими́те моле́ние на́ше, я́коже прия́ли есте́ моли́твы благове́рных росси́йских князе́й Алекса́ндра и Дими́трия, и принеси́те Всеми́лостивому Спа́су на́ше моле́бное приноше́ние, да изба́вит нас от вся́ких бед и напа́стей, да охрани́т Оте́чество на́ше от враг ви́димых и неви́димых, е́же нам в ми́ре глубо́це пе́ти с ва́ми Бо́гу: Аллилу́ия.

[Се́й конда́к глаго́лется три́жды.]

И́кос 1

А́нгелов Госпо́дних согра́ждане яви́стеся, святи́и благове́рнии Бори́се и Гле́бе, не оста́вльше согра́ждан земна́го ми́ра: по страда́нии бо ва́шем честна́я телеса́ ва́ша, му́ченическою кро́вию обагре́нная и благода́тию Бо́жиею просла́вленная, всем с ве́рою к ним притека́ющим источа́ют многоразли́чная чуде́сная исцеле́ния; ду́ши же ва́ша предстоя́т с ли́ки А́нгельскими и со все́ми святы́ми Пресвяте́й Тро́ице. Те́мже мы, удивля́ющеся ва́шему го́рнему и до́льнему гражда́нству, благогове́йно преклоня́юще пред ва́ми коле́на и сердца́ на́ша, уми́льно вопие́м си́це:

Ра́дуйтеся, оде́жды креще́ния непоро́чнии храни́телие;

ра́дуйтеся, христиа́нскаго благоче́стия при́снии ревни́телие.

Ра́дуйтеся, Боже́ственных писа́ний ученицы́ до́брии;

ра́дуйтеся, отца́ благове́рнаго ча́да возлю́бленная.

Ра́дуйтеся, Ева́нгелия Христо́ва после́дователие и́стиннии;

ра́дуйтеся, Бо́гови сло́вом и житие́м благоугоди́вшии.

Ра́дуйтеся, чу́дным све́том богопозна́ния просвеще́ннии;

ра́дуйтеся, ви́ссом чистоты́ и непоро́чности облече́ннии.

Ра́дуйтеся, неустраши́мо муче́ния прие́мшии;

ра́дуйтеся, Го́споду Иису́су Христу́ в страсте́х подража́вшии.

Ра́дуйтеся, все́льшиися во оби́тели Отца́ Небе́снаго;

ра́дуйтеся, восприе́мшии от Го́спода мзду трудо́в и терпе́ния.

Ра́дуйтеся, Бори́се и Гле́бе, вели́цыи и сла́внии страстоте́рпцы.

Конда́к 1

Избра́ннии чудотво́рцы и до́блественнии во́ини Христо́вы,
блага́го ко́рене благи́я о́трасли, пресве́тлая дво́ице,
в неду́зех безме́зднии вра́чеве
и ко Спа́су о всем ми́ре те́плии моли́твенницы,
восхваля́ем вас любо́вию,
святи́и и благове́рнии кня́зие Бори́се и Гле́бе.
Вы же, я́ко иму́щии дерзнове́ние ко Пресвяте́й Тро́ице,
от вся́ких нас бед изба́вите, да зове́м к вам:

Ра́дуйтеся, Бори́се и Гле́бе, вели́цыи и сла́внии страстоте́рпцы.

Моли́тва

О святи́и страстоте́рпцы, боголюби́вая дво́ице, благове́рнии кня́зие Бори́се и Гле́бе, измла́да все́ю душе́ю Христа́ возлюби́вшии, целому́дрие, кро́тость, смире́ние и про́чия доброде́тели стяжа́вшии и, я́ко а́гнцы незло́бивии, от бра́та своего́ непра́ведное убие́ние претерпе́вшии, чи́стыя своя́ ду́ши в благоприя́тную же́ртву Бо́гу прине́сшии и от Него́ венцы́ нетле́нныя прие́мшии! Припа́дающе к честно́му о́бразу ва́шему, мо́лим вас в ду́се сокруше́нне и смире́нне: вознеси́те своя́ усе́рдныя моли́твы ко Всеми́лостивому Спа́су, да пода́ст нам, чту́щим святу́ю па́мять ва́шу, вели́кия Своя́ и бога́тыя ми́лости. Це́рковь Свою́ Святу́ю да соблюде́т от ересе́й и раско́лов, в ча́дех ея́ да оживи́т дух пра́выя ве́ры и любве́, дух ве́дения и благоче́стия, да да́рует всем нам вся к жи́зни вре́менней и ве́чней потре́бная. Ей, святи́и страстоте́рпцы, ускори́те на по́мощь нам, я́коже сро́днику ва́шему благове́рному кня́зю Алекса́ндру Не́вскому, и изба́вите страну́ на́шу от враг ви́димых и неви́димых, от гла́да, огня́, смертоно́сныя я́звы, от вся́ких бед и напа́стей; разжени́те облежа́щий ны мрак неве́рия и развраще́ния, да ми́рно и благоче́стно поживе́м в ве́це сем, и сподо́бимся христиа́нския кончи́ны и до́браго отве́та на Стра́шнем Суде́ Христа́ Бо́га на́шего, Ему́же подоба́ет честь и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.