Пророк Елисе́й

Св. пророк Елисей жил в IX веке до Р. X., был призван к пророческому служению пророком Илией и служил более 65 лет при шести израильских царях. Он творил множество чудес: разделил Иордан, исцелил воду Иерихонского источника, чудесно напоил войска в пустыне, умножил масло вдовы, воскресил ребенка самаритянки и предсказал царю Иоасу победу. Умер в Самарии в глубокой старости. Даже после смерти его мощи оставались чудотворными: мертвец, брошенный в его гробницу, воскрес. Деяния св. Елисея описаны в 4-й Книге Царств.

Житие пророка Елисея

Святой пророк Елисей жил в IX веке до Р. X. По повелению Господню был призван к пророческому служению святым пророком Божиим Илией и нес его более 65 лет при шести израильских царях. Пророк творил многочисленные чудеса: разделил воды Иордана, сделал пригодной для питья воду Иерихонского источника, чудесным образом в пустыне снабдил водою войска израильского и иудейского царей, выступивших против моавитян, избавил бедную вдову от голодной смерти чудесным умножением масла в сосуде, воскресил ребенка самаритянки. Елисей предсказал израильскому царю Иоасу победу над врагами. Скончался св. пророк Елисей в глубокой старости в Самарии. «И при жизни своей совершал он чудеса, и по смерти дивны были дела его» (Сир.48:15). Через год после его смерти мертвец, брошенный в пещеру, где лежали мощи пророка, воскрес от прикосновения к ним. Пророк Елисей так же, как и его учитель, св. пророк Илия, не оставил после себя книг, их проповедь была устной. Дела св. Елисея описаны в 4-й Книге Царств.

Тропарь, глас 4

Во пло́ти А́нгел,
проро́ков основа́ние,
вторы́й Предте́ча прише́ствия Христо́ва, Илия́ сла́вный,
свы́ше посла́вый Елиссе́еви благода́ть
неду́ги отгоня́ти
и прокаже́нныя очища́ти,

те́мже и почита́ющим его́ то́чит исцеле́ния.

Ин тропарь, глас 4 И́же во пло́ти А́нгел,/ и проро́ков нача́льнику свиде́тельствова, сла́вный Елиссе́е,/ ди́вны чудеса́ соде́лал еси́, проро́че,/ поспе́шеством Свята́го Ду́ха;/ си́лою Илиино́ю исцели́в во́дное естество́,/ зве́ри же погуби́, пожира́ющия,/ и Неема́на очи́сти,/ и вдови́ча сы́на воскреси́л еси́,// и всем чту́щим тя да́руй благода́ть и исцеле́ние.

Кондак, глас 2

Проро́к Бо́жий яви́лся еси́,
сугу́бую благода́ть прие́мь,
вои́стинну досто́йную тебе́, Елиссе́е блаже́нне:
Илии́ бо был еси́ совсе́льник,

с ни́мже Христу́ Бо́гу моли́ся непреста́нно о всех нас.

Канон святому пророку Елисею

Минея, 14 Июня.

Глас 5

Песнь 1

Ирмос: Спаси́телю Бо́гу,
в мо́ри лю́ди немо́крыми нога́ми наста́вльшему
и фарао́на со всево́инством пото́пльшему,
Тому́ еди́ному пои́м, я́ко просла́вися.

Припев: Святы́й проро́че Елисéе, моли́ Бо́га о на́с.

Изнача́ла о Бо́зе пое́мыми пе́сньми, и́миже пое́тся пое́мый,
проро́ческими облиста́я хвала́ми, пою́ просла́вльшаго:
я́ко просла́вися.

Припев: Святы́й проро́че Елисéе, моли́ Бо́га о на́с.

Взем ко́жу из руки́ проро́чи, совосприя́т сан,
от ра́ла проро́к претворя́емь заре́ю духо́вною:
я́ко просла́вися.

Сла́ва Отцу́ и Сы́ну и Свято́му Ду́ху.

Я́ко предразуме́, Христе́, е́же к лу́чшему зва́нию, Елиссе́ево предложе́ние,
проро́чества благода́тию просвети́л еси́, Спа́се Всеси́льне,
я́ко просла́вися.

И ны́не и при́сно и во ве́ки веко́в. Ами́нь.

Богородичен: Пречи́стая Ма́ти Бо́жия,
воплоще́ннаго из Тебе́ и от недр Роди́теля не отлу́чшася Бо́га непреста́нно моли́
от вся́кия беды́ спасти́, и́хже созда́.

Песнь 3

Ирмос: Си́лою Креста́ Твоего́, Христе́,
утверди́ мое́ помышле́ние,
во е́же пе́ти и сла́вити
спаси́тельное Твое́ вознесе́ние.

Припев: Святы́й проро́че Елисéе, моли́ Бо́га о на́с.

Земна́го пристра́стия отсту́пль, огнедохнове́нному послужи́л еси́,
служи́телем угожде́ния Влады́ки бесе́дуя.

Припев: Святы́й проро́че Елисéе, моли́ Бо́га о на́с.

В ду́се прия́л еси́ сугу́ба учи́теля дарова́ния,
не погреши́в ле́ностию о́наго восхожде́ния.

Сла́ва Отцу́ и Сы́ну и Свято́му Ду́ху.

С рыда́нием Илии́ предста́в и растерза́в ри́зу,
ми́лотию разделя́еши струи́ Иорда́нския.

И ны́не и при́сно и во ве́ки веко́в. Ами́нь.

Богородичен: Моли́ непреста́нно, Чи́стая, Проше́дшаго из чресл Твои́х
изба́вити от ле́сти диа́воли пою́щия Тя, Богоневе́сто.

Седален, глас 1

Прозре́нием Боже́ственным Илия́ тя вели́кий, му́дре Елиссе́е, учени́ка взима́ет,
проро́ка предпоказу́ет, сия́юща Ду́хом.
Те́мже, днесь всесвяту́ю твою́ па́мять пра́зднующе,
благочестному́дренно почита́ем тя с ним, сла́вне.

Песнь 4

Ирмос: Услы́шах, Го́споди,
из гро́ба Твое́ воста́ние
и просла́вих
Твою́ непобеди́мую си́лу.

Припев: Святы́й проро́че Елисéе, моли́ Бо́га о на́с.

Я́коже дре́вле во́ды, и ны́не непло́дный ум мой исцеля́еши, Благода́телю,
Елиссе́евыми моли́твами.

Припев: Святы́й проро́че Елисéе, моли́ Бо́га о на́с.

Боже́ственне обогати́лся еси́ Вы́шних сказа́нием
и зве́рем дете́й отъе́млеши злообра́зие.

Припев: Святы́й проро́че Елисéе, моли́ Бо́га о на́с.

Ви́ден был еси́, сла́вне, де́вством укра́шен,
су́щим во тьме пре́лести, я́ко свети́льник, издале́ча сия́я.

Сла́ва Отцу́ и Сы́ну и Свято́му Ду́ху.

Молча́ти не мо́жет Ду́хом дви́жим язы́к,
твоя́ ди́вная в житии́, Елиссе́е, исправле́ния.

И ны́не и при́сно и во ве́ки веко́в. Ами́нь.

Богородичен: Вои́стинну сла́вим Тя, Богоро́дице Безневе́стная,
и в Твое́ приста́нище, ве́рнии, прибега́ем.

Песнь 5

Ирмос: У́тренююще, вопие́м Ти:
Го́споди, спаси́ ны,
Ты бо еси́ Бог наш,
ра́зве бо Тебе,́ ино́го не зна́ем.

Припев: Святы́й проро́че Елисéе, моли́ Бо́га о на́с.

Молчали́вое и кро́ткое, Богодохнове́нне, души́ твоея́
проро́ка тя показа́, Елиссе́е, ве́ры ра́ди.

Припев: Святы́й проро́че Елисéе, моли́ Бо́га о на́с.

Боже́ственное твои́х слове́с де́йство просвеща́ет мя глаго́лы духо́вными,
Елиссе́е всеблаже́нне.

Сла́ва Отцу́ и Сы́ну и Свято́му Ду́ху.

Мертв грех, я́ко жи́ву предстоя́щу Го́сподеви, проро́че,
тебе́, Елиссе́е, вменя́шеся.

И ны́не и при́сно и во ве́ки веко́в. Ами́нь.

Богородичен: Не преста́й моля́щи, Его́же родила́ еси́, Богоро́дице,
спасти́ ду́ши на́ша, воспева́ющих Тя, Пречи́стая.

Песнь 6

Ирмос: Обы́де мя бе́здна,
гроб мне кит бысть,
аз же возопи́х к Тебе́, Человеколю́бцу,
и спасе́ мя десни́ца Твоя́, Го́споди.

Припев: Святы́й проро́че Елисéе, моли́ Бо́га о на́с.

Напо́лни пото́ки иногда́ ни дождь, ни дух возду́шный,
возду́х же благода́ти, проро́че,
и сло́во твое́ де́йством Ду́ха напо́лни.

Припев: Святы́й проро́че Елисéе, моли́ Бо́га о на́с.

От ма́ла сосу́да иногда́, проро́че, я́коже напо́лнил еси́ незави́стно еле́й жене́,
и мне Боже́ственную ми́лость источи́ти, Елиссе́е, помоли́ся.

Сла́ва Отцу́ и Сы́ну и Свято́му Ду́ху.

Честна́я жена́, проро́че, ве́рою вжиля́ема,
в ста́рости непло́дствия разреше́ние прие́млет моли́твою,
благоча́дие плодя́щи.

И ны́не и при́сно и во ве́ки веко́в. Ами́нь.

Богородичен: Купину́ Тя неопали́му, и го́ру, и ле́ствицу одушевле́нну,
и дверь Небе́сную досто́йно сла́вим, Мари́е сла́вная,
правове́рных похвало́.

Кондак, глас 2

Проро́к Бо́жий яви́лся еси́,
сугу́бую благода́ть прие́мь,
вои́стинну досто́йную тебе́, Елиссе́е блаже́нне:
Илии́ бо был еси́ совсе́льник,
с ни́мже Христу́ Бо́гу моли́ся непреста́нно о всех нас.

Икос

В зако́не Госпо́дни возсия́вшаго, вси Елиссе́я му́драго пе́нии пе́сненными воспое́м:
весь бо испо́лнен есть чуде́с сугу́быми о́бразы, нам источа́я исцеле́ний струи́,
кропи́т бо ду́ши ве́рных и спаса́ет от бед,
я́коже дре́вле лю́ди безча́дствующия,
услажда́ет со́лию во́ды, креще́ния благода́ть возвеща́я я́ве,
моля́ непреста́нно о всех нас.

Песнь 7

Ирмос: В пещи́ о́гненней
песносло́вцы спасы́й о́троки,
благослове́н Бог оте́ц на́ших.

Припев: Святы́й проро́че Елисéе, моли́ Бо́га о на́с.

Прему́дрости лу́чшия ты, Елиссе́е, испо́лнився, вопия́л еси́:
благослове́н Бог оте́ц на́ших.

Припев: Святы́й проро́че Елисéе, моли́ Бо́га о на́с.

Ты, я́ко Жи́зни служи́тель, ма́тери а́бие жи́ва ме́ртва сы́на,
проро́че, показа́л еси́.

Сла́ва Отцу́ и Сы́ну и Свято́му Ду́ху.

Ненача́емыя иногда́ проро́ческия пита́я де́ти,
всегуби́тельныя сне́ди сотвори́л еси́ неврежде́нны.

И ны́не и при́сно и во ве́ки веко́в. Ами́нь.

Богородичен: И́же от Де́вы рожде́йся, Ю́же Богоро́дицу соде́ла,
благослове́н Бог оте́ц на́ших.

Песнь 8

Ирмос: Ороси́вшаго пещь
и о́троки сохра́ньшаго посреде́ горя́щаго пла́мене,
о́троцы, славосло́вите, свяще́нницы, благослови́те,
лю́дие, превозноси́те во вся ве́ки.

Припев: Святы́й проро́че Елисéе, моли́ Бо́га о на́с.

Сотво́ршаго очище́ние проро́ка повеле́нием о́троцы воспева́ют,
святи́тели благосло́вят, лю́дие превозно́сят Его́ во ве́ки.

Припев: Святы́й проро́че Елисéе, моли́ Бо́га о на́с.

От ве́щи очи́щ ум,
невеще́ственнаго жела́нием одержи́м, невеще́ственно ви́дел еси́.
Те́мже, игра́я, вопия́л еси́:
Христа́ превозноси́те во вся ве́ки.

Припев: Святы́й проро́че Елисéе, моли́ Бо́га о на́с.

Благода́тию прови́дя бу́дущая, на дре́ве пречи́стый Крест зри́ши воображе́н.
Те́мже вопия́л еси́, ра́дуяся, Богонауче́нный проро́че:
Христа́ превозноси́те во вся ве́ки.

Сла́ва Отцу́ и Сы́ну и Свято́му Ду́ху.

Колесни́ц мно́жество, окру́жших тя, низложи́, чу́дне,
мра́ком незави́стно уста́вил еси́, безу́мие облича́я, всеблаже́нне, вопия́:
Христа́ превозноси́те во вся ве́ки.

И ны́не и при́сно и во ве́ки веко́в. Ами́нь.

Богородичен: А́нгели сла́вят Рождество́ Твое́, Чи́стая Богоневе́сто,
с ни́миже вси пое́м:
о́троцы, благослови́те, свяще́нницы, песносло́вите,
лю́дие, превозноси́те во вся ве́ки.

Песнь 9

Ирмос: Тя, па́че ума́ и словесе́, Ма́терь Бо́жию,
в ле́то Безле́тнаго
неизрече́нно ро́ждшую,
ве́рнии, единому́дренно велича́ем.

Припев: Святы́й проро́че Елисéе, моли́ Бо́га о на́с.

Жезло́м сечи́тельным возвлача́ желе́зо проро́к,
ве́щное челове́к существо́, Кресто́м вознесе́но, науча́ше.

Припев: Святы́й проро́че Елисéе, моли́ Бо́га о на́с.

Да теле́с пока́жет воста́ние Живонача́льник,
возставля́ет мертвеца́,
отню́д не иму́ща дыха́ния пло́тию,
проро́ка показу́я пречестно́е.

Сла́ва Отцу́ и Сы́ну и Свято́му Ду́ху.

Ны́не в Боже́ственнем поко́и Бо́га мо́лиши, чу́дне,
блаже́нство улучи́ти при́сно тя блажа́щим.

И ны́не и при́сно и во ве́ки веко́в. Ами́нь.

Богородичен: Ра́дуйся, Богоро́дице, Ма́ти Христа́ Бо́га,
Его́же родила́ еси́, моли́ согреше́ний оставле́ние дарова́ти
ве́рою воспева́ющим Тя.

Светилен

Илиину́ благода́ть сугу́бу прия́л еси́ от Бо́га, Елиссе́е Богоблаже́нне,
и прося́щим у тебе́ ве́рно сугу́бо исцеле́ния дае́ши,
душа́м же и те́лом.