Собор Дивеевских святых

День памяти

27 июня

Тропарь, глас 4

От ю́ности Христа́ возлюби́л еси́, блаже́нне,
и Тому́ Еди́ному рабо́тати пла́менне вожделе́в,
непреста́нною моли́твою и трудо́м в пусты́ни подвиза́лся еси́,
умиле́нным же се́рдцем любо́вь Христо́ву стяжа́в,
избра́нник возлю́блен Бо́жия Ма́тере яви́лся еси́.
Сего́ ра́ди вопие́м ти:

спаса́й нас моли́твами твои́ми, Серафи́ме, преподо́бне о́тче наш.

Тропарь, глас 4 От ю́ности Христа́ возлюби́л еси́, преподо́бне,/ и Тому́ Еди́ному порабо́тати пла́менне вожделе́л еси́,/ в пу́стыннем житии́ твое́м непреста́нною моли́твою и трудо́м подвиза́лся еси́,/ умиле́нным се́рдцем любо́вь Христо́ву стяжа́в,/ Небе́сным Серафи́мом в песносло́вии спобо́рниче,/ в любви́ притека́ющим к тебе́ Христу́ подража́телю,/ те́мже избра́нник возлю́блен Бо́жия Ма́тере яви́лся еси́,/ сего́ ра́ди вопие́м ти:/ спаса́й нас моли́твами твои́ми, ра́досте на́ша,/ те́плый пред Бо́гом засту́пниче,// Серафи́ме блаже́нне. Тропарь, глас 5 Во́инство Царя́ Небе́снаго/ па́че земна́го возлюби́в,/ служи́тель пла́менный Святы́я Тро́ицы яви́лся еси́./ Наставле́ния Кроншта́дтскаго па́стыря/ в се́рдце свое́м слага́я,/ да́нная ти от Бо́га многообра́зная дарова́ния/ к по́льзе наро́да Бо́жия преумно́жил еси́./ Учи́тель благоче́стия/ и побо́рник еди́нства Церко́внаго быв,/ пострада́ти да́же до кро́ве сподо́бился еси́./ Священному́чениче Серафи́ме,/ моли́ Христа́ Бо́га// спасти́ся душа́м на́шим. Тропарь, глас 4 Яви́лися есте́ земли́ Росси́йския украше́ние, нача́льницы оби́тели Диве́евския преподо́бныя ма́тери на́ша Алекса́ндро, Ма́рфо и Еле́но, благослове́ние Цари́цы Небе́сныя исполнившия и дерзнове́ние ко Го́споду стяжавшия, моли́те у престо́ла Пресвяты́я Тро́ицы о спасе́нии ду́ш на́ших. Тропарь, глас 1 Гла́с апо́стола Па́вла услы́шавша глаго́лющ: мы́ юро́ди Христа́ ра́ди, рабы́ Твои́, Христе́ Бо́же, Пелаги́я, Параске́ва и Мари́я, юро́ди бы́ша на земли́ Тебе́ ра́ди; те́мже, па́мять и́х почита́юще, Тебе́ мо́лим: Го́споди, спаси́ ду́ши на́ша. Тропарь, глас 3 Ско́рби, гоне́ния, боле́зни мно́гия в годи́ну лю́тых испыта́ний претерпе́вшая и ве́рою тве́рдою пе́рвым му́чеником христиа́нским уподобившися, преподобноисповеднице Матро́но, моли́ся ко Го́споду о спасе́нии ду́ш на́ших. Тропарь, глас 4 Дре́вним подви́жником уподо́билася еси́ и долготерпе́ние многострада́льное стяжа́ла еси́, пло́ть твою́ боле́зньми, посто́м, нището́ю и хо́лодом изнури́вши, блаже́нная ма́ти на́ша, му́ченице Евдоки́е, страда́ния и сме́рть за Христа́ претерпе́ла еси́ и ны́не в го́рнем Иерусали́ме у Престо́ла Бо́жия предстои́ши, помози́ и на́м до конца́ ве́рными Го́споду бы́ти и твои́ми моли́твами спасти́ся. Тропарь, глас 4 Ца́рствия ра́ди Небе́снаго ми́р и вся́ я́же в ми́ре оста́вили есте́, тесноту́ соверше́ннаго послуша́ния возлюби́вши, ди́вныя подви́жницы и Христа́ ра́ди му́ченицы в годи́ну лю́тых испыта́ний в земли́ Нижегоро́дстей процве́тшия, блаже́нныя ма́тери на́ша Евдоки́е, Да́рие, Да́рие и Мари́е, помяни́те на́с у Престо́ла Пресвяты́я Тро́ицы. Тропарь, глас 3 Раба́ Христо́ва и избра́ннице Пречи́стыя Его́ Ма́тери, Ки́евского уде́ла Ея́ жи́тельнице и моли́твеннице, земли́ Ея́ обетова́нныя иска́тельнице, Диве́евския оби́тели первонача́льнице и зижди́тельнице, моли́ся за ны, Алекса́ндро преподо́бная, да спасе́т нас Пресвята́я Богоро́дица и поми́лует Свята́я Тро́ица, да изба́вимся мы му́ки а́дския и насле́дуем блаже́нство ра́йское. Тропарь, глас 5 Ди́вно бы́сть ко Го́споду призва́ние твое́, сла́вно бы́сть и равноа́нгельное житие́, кро́тко бы́сть твое́ крестоноше́ние, чу́дно бы́сть смиренному́дрие твое́. Послу́шлива была́ еси́ да́же до ча́ши сме́ртныя и из Диве́евской оби́тели в Небе́сную взошла́ еси́. Ра́дуйся, Еле́но преподо́бная, и не оста́ви ны предста́тельством твои́м. Тропарь, глас 5 Днесь церко́вная расширя́ются не́дра,/ прие́млюще бога́тство Бо́жия благода́ти,/ и ра́дуется Пресвяты́я Богоро́дицы избра́нная оби́тель,/ па́мять соверша́ющи многоимени́таго ли́ка святы́х Диве́евских,/ в Небе́снем Ца́рствии торжеству́ющих// и моля́щихся о душа́х на́ших. Ин тропарь, глас 2 Равноа́нгельное житие́ стяжа́вшая, ди́вная отрокови́це и собесе́днице Преподо́бнаго Серафи́ма, Госпоже́ и ма́ти на́ша Ма́рфо, ны́не в нетле́нных моще́х почива́еши и у Престо́ла Бо́жия предстои́ши, моли́ о на́с Ми́лостиваго Бо́га Небе́снаго, Диве́ева нача́льнице.

Кондак, глас 2

Ми́ра красоту́ и я́же в не́м тле́нная оста́вив, преподо́бне,
в Саро́вскую оби́тель всели́лся еси́,
и та́мо а́нгельски пожи́в,
мно́гим путь был еси́ ко спасе́нию,
сего́ ра́ди и Христо́с тебе́, о́тче Серафи́ме, просла́ви
и да́ром исцеле́ний и чуде́с обогати́.
Те́мже вопие́м ти:

ра́дуйся, Серафи́ме, преподо́бне о́тче наш.

Кондак, глас 6 Саро́вскому чудотво́рцу тезоимени́т быв,/ те́плую любо́вь к нему́ име́л еси́,/ писа́ньми свои́ми по́двиги и чудеса́ того́ ми́ру возвести́в,/ ве́рныя к его́ прославле́нию подви́гл еси́/ и благода́рственнаго посеще́ния/ сама́го Преподо́бнаго сподо́бился еси́./ С ни́мже ны́не, священному́чениче Серафи́ме,/ в Небе́сных черто́зех водворя́яся,/ моли́ Христа́ Бо́га// серафи́мския ра́дости на́м прича́стником бы́ти. Кондак, глас 8 Диве́евския свети́льницы всесве́тлыя, преподо́бныя ма́тери на́ша Алекса́ндро, Ма́рфо и Еле́но, в поще́нии, бде́нии, моли́тве и труде́х до́бре подвиза́лися есте́ и по сме́рти на́с освещаете чуде́с источеньми и исцеля́ете неду́гующих души́; моли́те Христа́ Бо́га грехо́в оставле́ние дарова́ти любо́вию чту́щим святу́ю па́мять ва́шу. Кондак, глас 8 Вы́шния красоты́ возжеле́вша, ни́жния сла́сти теле́сныя то́щно оста́вили есте́, нестяжа́нием су́етнаго ми́ра, а́нгельское житие́ проходя́ща, сконча́вшася, Пелаги́е, Параске́во и Мари́е блаже́нныя: Христа́ Бо́га моли́те непреста́нно о все́х на́с. Кондак, глас 6 Дне́сь проро́чество преподо́бнаго Серафи́ма испо́лнися:/ мно́жество новому́ченик Престо́лу Бо́жию со А́нгелы предстои́т,/ с ни́миже и преподобноисповедница Матро́на в Дивееве Небе́снем мо́лится непреста́нно о земно́м Оте́честве свое́м. Кондак, глас 8 И́стинныя ве́ры пропове́днице безбоя́зненная, му́ченице ма́ти на́ша Евдоки́е, непреста́нною моли́твою, бде́нием и смире́нием благода́ть Свята́го Ду́ха стяжа́ла еси́ и ду́ши мно́гия ко Христу́ привела́ еси́, до́блестно страда́ния лю́тая прия́ла еси́, моли́ Ми́лостиваго Бо́га спасти́ся душа́м на́шим. Кондак, глас 8 Житие́м пра́ведным к досто́йному прия́тию му́ченичества себе́ угото́вившия без боя́зни тридне́вная избие́ния и сме́рть претерпе́ли есте́ Неве́сты Христо́вы преди́вныя блаже́нныя Евдоки́е, Да́рие, Да́рие и Мари́е, ны́не мно́гими чудесы́ и исцеле́нии просия́вшия, не оста́вите зе́млю Ру́сскую без покая́ния поги́бнути. Кондак, глас 3 Преподо́бная ма́ти Алекса́ндро, любо́вь двуеди́ную к Бо́гу и бли́жним твои́м стяжа́ла еси́ и избра́нницею Бо́жией Ма́тери яви́лася. Ея́же после́дний уде́л в земли́ Росси́стей обрела́ еси́, и Диве́евскою первонача́льницею ста́ти сподо́бившися, вели́кому Серафи́му печа́ловатися о нем завеща́ла еси́. Зде́ же и поко́ишися с ним. Ны́не моле́ния на́ша приими́ и ко Го́споду вознеси́, да поми́лует ны. Кондак, глас 4 Ми́ра суету́ оста́вивши, блаже́нная Еле́но, в Диве́евскую оби́тель всели́лася еси́, и от избра́нника Влады́чицы Пречи́стыя услы́шала еси́: вску́ю сме́рти убоя́лася еси́? По́двигом до́брым подвиза́лася еси́, тече́ние сконча́ла, ве́ру соблюла́ еси́. Про́чее у́бо соблюда́ется вене́ц пра́вды ти, его́же возда́ст ти Госпо́дь в день он, я́ко всем возлюби́вшим явле́ние Его́. Потщи́ся же ско́ро приити́ к Пра́ведному Судии́. Кондак, глас 8 Сосу́ди Ду́ха Свята́го яви́стеся честны́м ва́шим житие́м,/ усе́рднии служи́телие Пресвяты́я Богоро́дицы,/ в земли́ Диве́евской просия́вшии,// помяни́те нас у Престо́ла Бо́жия во Ца́рствии Небе́снем. Ин кондак, глас 8 Небе́сною кро́тостию, молча́нием и неземно́ю ра́достию испо́лнилася еси́, юная и невиданная досе́ле в Дивееве отрокови́це, преподо́бная ма́ти на́ша Ма́рфо, в вели́кую схи́му от преподо́бнаго Серафи́ма облече́нная; те́мже водвори́лася еси́ с му́дрыми де́вами в Небе́сном черто́зе и со А́нгелы Всецарю́ непреста́нно предстои́ши.

Величание

Ублажа́ем ва́с, преподо́бныя ма́тери на́ша Алекса́ндро, Ма́рфо и Еле́но, и чти́м святу́ю па́мять ва́шу, вы́ бо моли́те о на́с Христа́ Бо́га на́шего.

Величание

Ублажа́ем ва́с, святы́я блаже́нныя ма́тери на́ша Пелаги́е, Параске́во и Мари́е, и чти́м святу́ю па́мять ва́шу, вы́ бо моли́те о на́с Христа́ Бо́га на́шего.

Величание

Велича́ем тя,
священному́чениче Серафи́ме,
и чтим святу́ю па́мять твою́,
ты бо мо́лиши за нас

Христа́ Бо́га на́шего.

Молитва

О пречу́дный о́тче Серафи́ме, вели́кий Саро́вский чудотво́рче, всем прибега́ющим к тебе́ скоропослу́шный помо́щниче! Во дни земна́го жития́ твоего́ никто́же от тебе́ тощ и неуте́шен отъи́де, но всем в сла́дость бысть ви́дение ли́ка твоего́ и благоуве́тливый глас слове́с твои́х. К сим же и дар исцеле́ний, дар прозре́ния, дар немощны́х душ врачева́ния оби́лен в тебе́ яви́ся. Егда́ же призва́ тя Бог от земны́х трудо́в к Небе́сному упокое́нию, николи́же любо́вь твоя́ преста́ от нас, и невозмо́жно есть исчи́слити чудеса́ твоя́, умно́жившаяся, я́ко зве́зды небе́сныя: се бо по всем конце́м земли́ на́шея лю́дем Бо́жиим явля́ешися и да́руеши им исцеле́ния. Те́мже и мы вопие́м ти: о прети́хий и кро́ткий уго́дниче Бо́жий, дерзнове́нный к Нему́ моли́твенниче, николи́же призыва́ющия тя отрева́яй, вознеси́ о нас благомо́щную твою́ моли́тву ко Го́споду Сил, да да́рует нам вся благопотре́бная в жи́зни сей и вся к душе́вному спасе́нию поле́зная, да огради́т нас от паде́ний грехо́вных и и́стинному покая́нию да научи́т нас, во е́же безпреткнове́нно вни́ти нам в ве́чное Небе́сное Ца́рство, иде́же ты ны́не в незаходи́мей сия́еши сла́ве, и та́мо воспева́ти со все́ми святы́ми Живонача́льную Тро́ицу до сконча́ния ве́ка. Ами́нь.

Молитва

О, вели́кий и пречу́дный уго́дниче Христо́в, священному́чениче Серафи́ме! Приими́ ны́не на́шу смире́нную песнь благодаре́ния и умоли́ Вседержи́теля Бо́га в Неразде́льней Тро́ице прославля́емаго низпосла́ти нам мир и благоде́нствие, да сохрани́тся от разоре́ния держа́ва на́ша. Любо́вию и му́дростию твое́ю лю́ди росси́йстии к едине́нию собо́рному приведи́ и от ересе́й и раско́лов огради́. Си́лою хода́тайства твоего́ терпе́ние в ско́рбех и боле́знех нам низпосли́. О, всехва́льный святи́телю Христо́в! Испроси́ у Всеми́лостиваго Бо́га пода́ти нам пре́жде конца́ покая́ние, да сподо́бимся с тобо́ю зре́ти лица́ Его́ добро́ту неизрече́нную, воспева́юще Отца́ и Сы́на и Свята́го Ду́ха во ве́ки. Ами́нь.

Молитва

О, ди́вныя подви́жницы и засту́пницы на́ша му́ченице Евдоки́е, Да́рие, Да́рие и Мари́е – дре́вних оте́ц подража́тельницы и́стинны, в тесноте́ послуша́ния без разсужде́ния, бде́ния и поста́ изнури́тельнаго пожи́вшия – ны́не к ва́м прибега́ем и, к моще́м ва́шим припа́дающе, мо́лим ва́с: о, страстоте́рпицы святы́я, незло́бивыя а́гницы, свое́ю кро́вию Христа́ ра́ди обагре́нныя и жесто́кими предателями тридне́вно му́чимыя и закланныя; о, прозорливицы, мно́гия ду́ши от ги́бели ве́чныя исхи́тившия и о страда́ниях пре́жде кончи́ны от Го́спода извеще́нныя, о, исцелительницы и чудотво́рицы не то́кмо в земли́ Нижегоро́дстей, но и во все́й стране́ Росси́йстей просия́вшия, – не оста́вите на́с во греха́х и беззако́ниих поги́бнути, но помози́те в покая́нии и́стиннем житие́ на́ше сконча́ти, сла́вяще Святу́ю Тро́ицу Отца́ и Сы́на и Свята́го Ду́ха во ве́ки веко́в. Ами́нь.

Молитва

О, преподо́бная и богоно́сная ма́ти Алекса́ндро, Диве́евская первона́чальнице и похвало́, ве́ру несумне́нную дела́ми богоуго́дными яви́вшая, во исполне́ние обетова́ния Богоро́дицы в труде́х и по́двизех непреста́нных неле́стно потруди́вшаяся, и в благоустрое́нии земли́ святы́я Ея́ все име́ние и житие́ твое́ ижди́вшая, проро́чество Цари́цы Небе́сныя в насле́дие избра́ннику Ея́ саро́вскому пред кончи́ною твое́ю пра́ведною вве́рившая, и ду́шу твою́, сами́м Го́сподом предочи́щенную, в ру́це Бо́жии преда́вшая, моли́ся за ны, малове́рныя и неради́выя, да и мы присту́пим к до́брому де́ланию с пра́вою ве́рою, в терпе́нии содева́я свое́ спасе́ние, за Златоу́стом взыва́юще в печа́ли и ра́дости, ско́рби и утеше́нии: сла́ва Бо́гу за вся́. Ами́нь.

Молитва

О, преподо́бная и богоно́сная ма́ти Еле́но, Диве́евская сла́во и похвало́, от огнеды́шащего зми́я, тя поглоти́ти тща́вшагося, моли́твами ко Го́споду и де́вственнаго жития́ обетова́нием чуде́сно изба́вленная, святы́м преподо́бным Серафи́мом ко и́ночеству предугото́ванная и Самому́ Го́споду уневе́щенная, нача́льницею общи́ны деви́ческия избра́нная, оба́че слуго́ю всем смиренному́дренно я́вльшаяся, послу́шлива да́же до сме́рти ста́рцу твоему́ бы́вшая, по словеси́ его́ за бра́та твоего́ многострада́льнаго младо́ю уме́ршая, еще́ на земли́ Цари́цу Небе́сную и Христа́ Го́спода ви́девшая и во оби́тели Небе́сныя восхище́нная, моли́ся за ны, малоду́шныя и непослу́шливыя, да и мы сподо́бимся благода́тнаго вразумле́ния, скоре́йшаго исправле́ния и ве́чнаго спасе́ния. Ами́нь.

Молитва

О, преподо́бная и богоно́сная ма́ти Ма́рфо, Диве́евская ра́досте и похвало́, о́трасль ди́вная семе́йства пра́веднаго и плод святы́й ро́да благочести́ваго, измла́да со сро́дники твои́ми к преподо́бному Серафи́му Саро́вскому притека́вшая, за послуша́ние ему́ по благода́ти Боже́ственней всесоверше́нно уцелому́дрившаяся, сотаи́нницею его́ ста́вшая и вели́кий а́нгельский о́браз от руки́ его́ прия́вшая, в ле́тех ма́лых испо́лнила еси́ вся благопотре́бная и в Ца́рствие Небе́сное душе́ю твое́ю де́вственною взошла́ еси́, ста́рцу свято́му твоему́ уневе́щенная. Моли́ся за ны, недосто́йныя и злонра́вныя, чту́щыя с любо́вию па́мять твою́, да очи́стит Госпо́дь ны от вся́кия скве́рны душе́вныя и теле́сныя, заступи́т, спасе́т, поми́лует и сохрани́т ны Свое́ю благода́тию. Ами́нь.

Молитва

О, всечестни́и святи́и Диве́евские, избра́нницы Цари́цы Небе́сныя, при́снии Ея́ послу́шницы, по́двиги свои́ми в Ца́рствие Небе́сное возше́дшии! Се ны́не в день о́бщаго ва́шего торжества́ прино́сим вам сие́ хвале́бное пе́ние, ублажа́ем свято́е житие́, прославля́ем вели́кая чудеса́, восхваля́ем любо́вь и велича́ем по́двиги ва́ша. Вы бо, пре́лести ми́ра сего́ отве́ргшеся и взе́мше крест свой, усе́рдно после́довали есте́ Христу́, та́же и, плоть свою́ распина́юще со страстьми́ и похотьми́, терпе́нием и му́жеством до конца́ врага́ низложи́ли есте́ и, прему́дрость ве́ка сего́ посрами́вше, ра́зум Христо́в стяжа́ли есте́. Сего́ ра́ди мо́лим вас: о, святи́и сро́дницы на́ши! Не оста́вите нас, чад ва́ших духо́вных, споспешеству́йте нам ве́ру Правосла́вную тве́рдо содержа́ти, да спаси́тельное се́мя не изсуше́но бу́дет зно́ем неве́рия, но плод оби́льный принесе́т, я́ко да и мы в бу́дущем ве́це вку́пе с ва́ми услы́шим бла́женный глас Го́спода и Бо́га на́шего: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

2-я Молитва

О, вели́кий уго́дниче Бо́жий, преподо́бне и Богоно́сне о́тче наш Серафи́ме! При́зри от Го́рния сла́вы на нас, смире́нных и немощны́х, обремене́нных грехми́ мно́гими, твоея́ по́мощи и утеше́ния прося́щих. Прини́кни к нам благосе́рдием твои́м и помози́ нам за́поведи Госпо́дни непоро́чно сохраня́ти, ве́ру правосла́вную кре́пко содержа́ти, покая́ние во гресе́х на́ших усе́рдно Бо́гу приноси́ти, во благоче́стии христиа́нстем благода́тно преуспева́ти и досто́йны бы́ти твоего́ о нас моли́твеннаго к Бо́гу предста́тельства. Ей, свя́тче Бо́жий, услы́ши нас, моля́щихся тебе́ с ве́рою и любо́вию, и не пре́зри нас, тре́бующих твоего́ заступле́ния: ны́не и в час кончи́ны на́шея помози́ нам и заступи́ нас моли́твами твои́ми от зло́бных наве́тов диа́вольских, да не облада́ет на́ми тех си́ла, но да сподо́бимся по́мощию твое́ю насле́довати блаже́нство оби́тели ра́йския. На тя бо упова́ние на́ше ны́не возлага́ем, о́тче благосе́рдый: бу́ди нам вои́стинну ко спасе́нию путево́ждь и приведи́ нас к невече́рнему све́ту Жи́зни Ве́чныя богоприя́тным предста́тельством твои́м у Престо́ла Пресвяты́я Тро́ицы, да сла́вим и пое́м со все́ми святы́ми достопокланя́емое и́мя Отца́, и Сы́на, и Свята́го Ду́ха, во ве́ки веко́в. Ами́нь.

Канон преподобному Серафиму Саровскому

Минея, 2 Января.

Глас 6

Песнь 1

Ирмос: Яко по су́ху, пешеше́ствовав Изра́иль
по бе́здне стопа́ми,
гони́теля фарао́на
ви́дя потопля́ема,
Бо́гу побе́дную песнь пои́м, вопия́ше.

Припев: Преподо́бне о́тче Серафи́ме, моли́ Бо́га о на́с.

Го́споди, отве́рзи мои́ недосто́йнеи устне́ и даждь ми сло́во ра́зума
воспе́ти досто́йно па́мять блаже́нного Серафи́ма,
ны́не со А́нгелы моля́щагося Тебе́
изба́вити нас от вся́каго лю́таго обстоя́ния.

Припев: Преподо́бне о́тче Серафи́ме, моли́ Бо́га о на́с.

К Богоро́дице вели́кий моли́твенник был еси́, преподо́бне,
Ю́же ви́дети со апо́столы сподо́бился еси́,
и ны́не не преста́й моли́твами твои́ми посеща́ти чад твои́х.

Сла́ва Отцу́ и Сы́ну и Свято́му Ду́ху.

От ю́ности твоея́, преподо́бне, преда́лся еси́ умо́м Бо́гови и, стра́сти теле́сныя кре́пким воздержа́нием укроти́в,
вся́кими доброде́тельми украси́лся еси́, прему́дре.

И ны́не и при́сно и во ве́ки веко́в. Ами́нь.

Богородичен: Всеблага́я Влады́чице,
Я́же Преблага́го Бо́га пло́тию ро́ждши,
озло́бленное страстьми́ мое́ се́рдце очи́сти,
да ве́рою и любо́вию величаю Тя.

Песнь 3

Ирмос: Несть свят,
я́коже Ты, Го́споди Бо́же мой,
вознесы́й рог ве́рных твои́х, Бла́же,
и утверди́вый нас на ка́мени
испове́дания Твоего́.

Припев: Преподо́бне о́тче Серафи́ме, моли́ Бо́га о на́с.

Моли́твами твои́ми, преподо́бне, предстоя́ Бо́гу со А́нгелы,
за весь мир моли́ся,
бра́ни вра́жия, потреби́ти и побе́ду на супоста́ты дарова́ти.

Припев: Преподо́бне о́тче Серафи́ме, моли́ Бо́га о на́с.

От ю́ности ве́рою и лю́бовию прилепи́лся еси́ Влады́це Вы́шних сил, преподо́бне Серафи́ме,
и, возсия́в в пусты́ни Саро́встей, я́ко со́лнце,
в ско́рбех приходя́щим к тебе́ уте́шитель был еси́;
моли́ спасти́ся нам.

Сла́ва Отцу́ и Сы́ну и Свято́му Ду́ху.

Яви́лся еси́, преподо́бне, моля́щимся тебе́ столп непоколеби́м
и прибе́жище всем притека́ющим во оби́тель Саро́вскую
и прие́млющим исцеле́ния благода́ть неоску́дную.

И ны́не и при́сно и во ве́ки веко́в. Ами́нь.

Богородичен: Услы́ша Е́ва прама́терь:
в печа́лех роди́ши ча́да.
Ты же, Чи́стая Де́во, услы́шавши:
Госпо́дь с Тобо́ю, ра́дуйся, –
ра́дованным гла́сом печа́ль прама́тере потреби́ла еси́.

Седален, глас 4

Жите́йское мо́ре страсте́й воздержа́нием препобеди́в
и в приста́нище безстра́стия прите́к,
сосу́д воздержа́ния яви́лся еси́, преподо́бне Серафи́ме,
моли́ Христа́ Бо́га дарова́ти нам ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Егда́ предста́ну пред лице́м Созда́теля моего́ в День пра́веднаго Суда́ Его́,
тогда́, Влады́чице, предста́ни ми и му́ки изба́ви мя ве́чныя,
да не сни́ду во ад, но да спасу́ся Твои́м, Пречи́стая Богоро́дицде, заступле́нием.

Песнь 4

Ирмос: Христо́с моя́ си́ла,
Бог и Госпо́дь,
честна́я Це́рковь
боголе́пно пое́т, взыва́ющи,
от смы́сла чи́ста о Го́споде пра́зднующи.

Припев: Преподо́бне о́тче Серафи́ме, моли́ Бо́га о на́с.

Днесь све́тло пра́зднует Саро́вская оби́тель па́мять твою́, преподо́бне, и моли́т тя:
испроси́ у Го́спода вселе́нней мир
и душа́м нашим ве́лию ми́лость.

Припев: Преподо́бне о́тче Серафи́ме, моли́ Бо́га о на́с.

Вели́кими по́двиги твои́ми, преподо́бне,
я́ко фи́никс, процве́л еси́,
словесы́ благопло́дными и непоро́чным житие́м сердца́ притека́ющих к тебе́ услажда́я,
и ны́не у́бо моли́ся, да обря́щем ми́лость от Христа́, Спа́са на́шего.

Сла́ва Отцу́ и Сы́ну и Свято́му Ду́ху.

Твои́ми моли́твами о нас умоли́ Бо́га, преподо́бне Серафи́ме,
и грехо́вный мрак печа́ли на́шея разори́,
безстра́стием, ве́рою и любо́вию украси́ всех,
пресла́вную па́мять твою́ чту́щих.

И ны́не и при́сно и во ве́ки веко́в. Ами́нь.

Богородичен: Ра́дуйся, Влады́чице Де́во,
Це́рквам красото́, благочести́вым лю́дем держа́во и похвало́,
непреста́нно моли́ся Христу́ Бо́гу,
да сохрани́т нас от бед моли́твами Твои́ми.

Песнь 5

Ирмос: Бо́жиим све́том Твои́м, Бла́же,
у́тренюющих Ти ду́ши любо́вию озари́, молю́ся,
Тя ве́дети, Сло́ве Бо́жий,
и́стинного Бо́га,
от мра́ка грехо́внаго взыва́юща.

Припев: Преподо́бне о́тче Серафи́ме, моли́ Бо́га о на́с.

Всем приходя́щим к тебе́ был еси́ учи́тель и́стинный
и к Богоро́дице вели́кий моли́твенник,
и ны́не, преподо́бне, не преста́й моля́ся о ча́дех твои́х,
я́ко и́маши дерзнове́ние ве́лие.

Припев: Преподо́бне о́тче Серафи́ме, моли́ Бо́га о на́с.

Да вни́дут ны́не христоимени́тии лю́дие во храм оби́тели Саро́вския,
к честны́м моще́м твои́м, преподо́бне Серафи́ме, припа́дающе,
и да про́сят от Тебе́ исцеле́ния, здра́вия и спасе́ния, Христа́ велича́юще.

Сла́ва Отцу́ и Сы́ну и Свято́му Ду́ху.

В нощи́ моля́щу ти ся Бо́гу, преподо́бне,
враг неви́димый хотя́ше устраши́ти тя,
но, моли́твою твое́ю посра́млен, исчезе́ вселука́вый.

И ны́не и при́сно и во ве́ки веко́в. Ами́нь.

Богородичен: Бо́га, Его́же родила́ еси́, Пречи́стая Мари́е, моли́ рабо́м Твои́м пода́ти прегреше́ний оставле́ние.

Песнь 6

Ирмос: Жите́йское мо́ре
воздвиза́емое зря напа́стей бу́рею,
к ти́хому приста́нищу Твоему́ прите́к, вопию́ Ти:
возведи́ от тли живо́т мой,
Многоми́лостиве.

Припев: Преподо́бне о́тче Серафи́ме, моли́ Бо́га о на́с.

Свята́я душа́ твоя́ оби́тель бысть Бо́гу,
в не́йже Оте́ц, Сын и Святы́й Дух всели́ся,
те́мже мо́лим тя, преподо́бне,
наважде́ния вра́жия от чту́щих тя отжени́
и ве́рным лю́дем мир и здра́вие да́руй.

Припев: Преподо́бне о́тче Серафи́ме, моли́ Бо́га о на́с.

Вели́кия твоя́ пусты́нныя по́двиги и труды́
и сла́дость уче́ния твоего́ почита́ем, преподо́бне Серафи́ме,
и́миже мно́гия приходя́щия к тебе́ просвети́л еси́ и научи́л еси́ воспева́ти Единосу́щную Тро́ицу.

Сла́ва Отцу́ и Сы́ну и Свято́му Ду́ху.

Житие́м чи́стым после́довав Владыце Христу́,
тече́ние до́брое сконча́л еси́, преподо́бне,
к ве́чным же оби́телем возше́д, блаже́нне,
зри́ши та́мо, я́же А́нгели ви́дят,
Те́мже, чту́ще па́мять твою́, Христа́ велича́ем.

И ны́не и при́сно и во ве́ки веко́в. Ами́нь.

Богородичен: Ны́не к Тебе́ прибега́ю, Пречи́стая,
спаси́ мя моли́твами Твои́ми и соблюди́:
ели́ка бо хо́щеши, мо́жеши, я́ко Ма́ти Всемогу́щаго.

Кондак, глас 2

Ми́ра красоту́ и я́же в нем тле́нная оста́вив, преподо́бне,
в Саро́вскую оби́тель всели́лся еси́
и, та́мо а́нгельски пожи́в,
мно́гим путь был еси́ ко спасе́нию,
сего́ ра́ди и Христо́с тебе́, о́тче Серафи́ме, просла́ви
и да́ром исцеле́ний и чуде́с обогати́.
Те́мже вопие́м ти:
ра́дуйся, Серафи́ме, преподо́бне о́тче наш.

Икос

Оста́вив род и дру́ги,
бога́тство, я́ко прах, вмени́в,
в пусты́ни Саро́встей водвори́лся еси́
и, на стра́сти, я́ко безпло́тен, подвиза́вся, А́нгелов ликостоя́ния сподо́бился еси́.
Те́мже духо́вная разуме́ния прии́м,
пода́ждь и нам, преподо́бне, разу́мно пе́сньми воспе́ти тя, си́це глаго́лющим:
ра́дуйся, Серафи́ме блаже́нне, Небе́сный челове́че и земны́й А́нгеле;
ра́дуйся, в любви́ Христу́ подража́телю;
ра́дуйся, Свята́го Ду́ха оби́тель;
ра́дуйся, уныва́ющим ве́лие ра́дование;
ра́дуйся, исто́чниче исцеле́ний;
ра́дуйся, скорбя́щим душа́м сла́дкое утеше́ние;
ра́дуйся, и́ноком ти́хое приста́нище и учи́телю прему́дрый;
ра́дуйся, похвало́ земли́ Росси́йския;
ра́дуйся, Серафи́ме, преподо́бне о́тче наш.

Песнь 7

Ирмос: Росода́тельну у́бо пещь
соде́ла А́нгел
преподо́бным отроко́м,
халдеи́ же опаля́ющее
веле́ние Бо́жие мучи́теля увеща́ вопи́ти:
благослове́н еси́, Бо́же оте́ц на́ших.

Припев: Преподо́бне о́тче Серафи́ме, моли́ Бо́га о на́с.

Чу́дно житие́ твое́ яви́ся, преподо́бне,
благода́тию Боже́ственнаго Ду́ха испо́лнено,
блаже́нну вои́стинну кончи́ну преподо́бных прия́л еси́, о Христе́ ра́дуяся.
Мы же к просла́вльшему тя взыва́ем:
оте́ц на́ших Бо́же, благослове́н еси́.

Припев: Преподо́бне о́тче Серафи́ме, моли́ Бо́га о на́с.

Мно́жество люде́й, во святу́ю оби́тель соше́дшеся днесь, преподо́бне Серафи́ме,
честны́м моще́м твои́м покланя́ется,
от ни́хже исцеле́ния вси почерпа́ем, непреста́нно зову́ще;
оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Во всю зе́млю изы́де веща́ние сие́,
я́ко в Саро́ве чудотво́рец пресла́вен яви́ся,
исцеле́ний мно́жество источа́я всем, с ве́рою приходя́щим и вопию́щим:
оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Богоро́дице Де́во,
ро́ждшая Сло́во па́че сло́ва, Зижди́теля Твоего́,
Того́ моли́ с преподо́бным Серафи́мом поми́ловати ду́ши на́ша.

Песнь 8

Ирмос: Из пла́мене преподо́бным ро́су источи́л еси́
и пра́ведного же́ртву водо́ю попали́л еси́:
вся бо твори́ши, Христе́, то́кмо е́же хоте́ти.
Тя превозно́сим во вся ве́ки.

Припев: Преподо́бне о́тче Серафи́ме, моли́ Бо́га о на́с.

Плотски́я стра́сти укроти́в и ми́рови умертви́вся,
глаго́лы жи́зни ве́чныя се́рдцем твои́м, блаже́нне, прия́л еси́,
науча́я всех, к тебе́ притека́вших, взыва́ти:
Го́спода по́йте, дела́, и превозноси́те Его́ во ве́ки.

Припев: Преподо́бне о́тче Серафи́ме, моли́ Бо́га о на́с.

В прославле́нии честны́х моще́й твои́х, преподо́бне,
оби́тель Саро́вская ра́дости испо́лнися.
Лю́дие же вси ди́вному во святы́х Свои́х Бо́гу взыва́ху:
Го́спода по́йте, дела́, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху.

Благода́тию Боже́ственнаго Ду́ха испо́лнен сый, преподо́бне Серафи́ме,
ве́рным лю́дем, творя́щим святу́ю па́мять твою́,
моли́твами твои́ми испроси́ грехо́в проще́ние, вопию́щим:
де́ти, благослови́те, свяще́нницы, воспо́йте,
лю́дие, превозноси́те Го́спода во ве́ки.

И ны́не и при́сно и во ве́ки веко́в. Ами́нь.

Богородичен: Спасе́ния Хода́таица нам яви́лася еси́, Богоро́дице,
ро́ждшая Спа́са и Влады́ку всех,
те́мже мо́лим Тя:
спасе́ния сподо́би всех, песносло́вящих Тя ве́рно во вся ве́ки.

Песнь 9

Ирмос: Бо́га челове́ком невозмо́жно ви́дети,
на Него́же не сме́ют чи́ни А́нгельстии взира́ти,
Тобо́ю же, Всечи́стая, яви́ся челове́ком
Сло́во воплоще́нно, Его́же велича́юще,
с Небе́сными во́и Тя ублажа́ем.

Припев: Преподо́бне о́тче Серафи́ме, моли́ Бо́га о на́с.

Недосто́йными усты́ воспева́емое тебе́ ма́лое хвале́ние на́ше,
преподо́бне, не пре́зри, но приими́
и всех, прославля́ющих тя, освяти́,
бед, и напа́стей, и ве́чнаго муче́ния изба́ви,
да тя при́сно воспева́ем.

Припев: Преподо́бне о́тче Серафи́ме, моли́ Бо́га о на́с.

Мраз нощны́й и вар дневны́й во уедине́нии пусты́ннем до́блественне претерпе́в,
дом Прему́дрости Бо́жия был еси́
и к сия́нию невече́рнему восте́кл еси́.
Моли́ спасти́ся нам.

Сла́ва Отцу́ и Сы́ну и Свято́му Ду́ху.

Сла́вится днесь оби́тель,
в не́йже яре́м Христо́в прия́ти изво́лил еси́:
та́мо бо, в пусты́ни, дни твоя́ пребы́л еси́
и, твои́ми уче́ньми мно́ги приходя́щия к тебе́ вразуми́в,
научи́л еси́ бы́ти ча́да Це́ркве Христо́вы.

И ны́не и при́сно и во ве́ки веко́в. Ами́нь.

Богородичен: Ты еси́ кре́пость на́ша,
Ты еси́ похвала́ и ра́дование,
Храни́тельница на́ша, заступле́ние,
прибе́жище и Предста́тельница непобеди́мая,
Пречи́стая Богоро́дице, спаси́ рабы́ Твоя́.

Светилен

Прииди́те, вси ве́рнии,
свяще́нными пе́сньми восхва́лим ди́внаго в чудесе́х преподо́бного Серафи́ма,
но́ваго свети́льника Росси́йския земли́,
А́нгелом собесе́дника и те́плаго моли́твенника к Бо́гу
о чту́щих святу́ю па́мять его́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: По Бо́зе упова́ние иму́ще на Тя, Пречи́стая Богоро́дице,
мо́лим Ти ся:
Ро́ждшагося из Тебе́ умоли́ дарова́ти мир вселе́нней и ве́лию ми́лость.

Акафист преподобному Серафиму, Саровскому чудотворцу

Аудио:

44:48

Кондак 1

Избра́нный чудотво́рче и преди́вный уго́дниче Христо́в, ско́рый помо́щниче и моли́твенниче наш, преподо́бне о́тче Серафи́ме! Велича́юще просла́вльшаго тя Го́спода, воспева́ем ти похва́льная. Ты же, име́яй ве́лие дерзнове́ние ко Го́споду, от вся́ких нас бед свободи́, зову́щих:

Ра́дуйся, преподо́бне Серафи́ме, Саро́вский чудотво́рче.

Икос 1

А́нгелов Творе́ц избра́ тя изнача́ла, да просла́виши житие́м твои́м пречу́дное и́мя Святы́я Тро́ицы: яви́лся бо еси́ вои́стинну а́нгел на земли́ и во пло́ти серафи́м; я́ко луч пресве́тлый Ве́чнаго Со́лнца Пра́вды, просвети́ся житие́ твое́. Мы же, зря́ще прехва́льныя труды́ твоя́, с благогове́нием и ра́достию глаго́лем ти сицева́я:

Ра́дуйся, пра́вило ве́ры и благоче́стия;
ра́дуйся, о́бразе кро́тости и смире́ния.

Ра́дуйся, пресла́вное ве́рных велича́ние;
ра́дуйся, прети́хое ско́рбным утеше́ние.

Ра́дуйся, прелюби́мое и́ноков похвале́ние;
ра́дуйся, живу́щим в ми́ре преди́вное поможе́ние.

Ра́дуйся, Росси́йския держа́вы сла́во и огражде́ние;
ра́дуйся, тамбо́вския страны́ свяще́нное украше́ние.

Ра́дуйся, преподо́бне Серафи́ме, Саро́вский чудотво́рче.

Кондак 2

Ви́дящи ма́ти твоя́, преподо́бне о́тче Серафи́ме, те́плую любо́вь твою́ ко и́ноческому житию, позна́ святу́ю во́лю Госпо́дню о тебе́, и Бо́гу, я́ко дар соверше́н принося́щи, благослови́ тя на те́сный путь и́ноческий святы́м кресто́м свои́м, его́же до конца́ жития́ твоего́ на пе́рсех носи́л еси́, зна́менуя ве́лию любо́вь твою́ к распе́ншемуся за ны Христу́ Бо́гу на́шему, Ему́же вси со умиле́нием зове́м: Аллилу́иа.

Икос 2

Ра́зум небе́сный тебе́ дарова́ся, свя́тче Бо́жий: от ю́ности твоея́ не престая́ помышля́ти о Небе́снем, оста́вил еси́ дом о́тчий Ца́рствия Бо́жия ра́ди и пра́вды Его́. Сего́ ра́ди приими́ от нас похвалы́ сия́:

Ра́дуйся, гра́да Ку́рска ча́до богоизбра́нное;
ра́дуйся, роди́телей благочести́вых о́трасль пречестна́я.

Ра́дуйся, доброде́тели ма́тере своея́ унасле́дивый;
ра́дуйся, благоче́стию и моли́тве е́ю науче́нный.

Ра́дуйся, на по́двиги от ма́тере кресто́м благослове́нный;
ра́дуйся, благослове́ние сие́ я́ко святы́ню до сме́рти соблюды́й.

Ра́дуйся, любве́ ра́ди Го́спода дом оте́ческий оста́вивый;
ра́дуйся, вся красна́я ми́ра сего́ ни во что же вмени́вый.

Ра́дуйся, преподо́бне Серафи́ме, Саро́вский чудотво́рче.

Кондак 3

Си́ла Вы́шняго от ю́ности твоея́ вои́стинну храня́ше тя, преподо́бне: с высоты́ бо хра́ма спа́дша сохрани́ тя Госпо́дь неврежде́нна, и стра́ждущу ти лю́те Сама́ Влады́чица ми́ра яви́ся, с Небе́с исцеле́ние прине́сши, зане́ измла́да ве́рно служи́л еси́ Бо́гу, вы́ну взыва́я Ему́: Аллилу́иа.

Икос 3

Име́я тща́ние о по́двизе и́ноческаго равноа́нгельнаго жития́, во град святы́й Ки́ев поклоне́ния ра́ди преподо́бным Пече́рским прите́кл еси́, и от уст преподо́бнаго Досифе́а повеле́ние прии́м в пусты́ню Саро́вскую путь свой упра́вити, ве́рою издале́ча облобыза́л еси́ ме́сто свято́е сие́, и та́мо всели́вся житие́ твое́ богоугодное сконча́л еси́. Мы же, дивя́щеся таково́му о тебе́ Бо́жию промышле́нию, со умиле́нием вопие́м ти:

Ра́дуйся, мирски́я суеты́ отреши́выйся;
ра́дуйся, Небе́снаго Оте́чества пла́менно возжеле́вый.

Ра́дуйся, Христа́ всем се́рдцем возлюби́вый;
ра́дуйся, благо́е и́го Христо́во на себе́ восприе́мый.

Ра́дуйся, соверше́ннаго послуша́ния испо́лненный;
ра́дуйся, святы́х за́поведей Госпо́дних блюсти́телю ве́рный.

Ра́дуйся, ум твой и се́рдце в Бо́зе моли́твенно утверди́вый;
ра́дуйся, сто́лпе благоче́стия непоколеби́мый.

Ра́дуйся, преподо́бне Серафи́ме, Саро́вский чудотво́рче.

Кондак 4

Бу́рю злых напа́стей утиша́я, проше́л еси́ весь путь те́сный и ско́рбный по́двига и́ноческаго, несы́й яре́м пусты́ннаго жития́, затво́ра и молча́ния, многоно́щнаго бде́ния, и та́ко, благода́тию Бо́жиею восходя́ от си́лы в си́лу, от дея́ния к богови́дению, пресели́лся еси́ во Оби́тели Го́рния, иде́же со А́нгелы пое́ши Бо́гу: Аллилу́иа.

Икос 4

Слы́шаще и ви́дяще свято́е житие́ твое́, преподо́бне о́тче Серафи́ме, вся бра́тия твоя́ удивля́хуся тебе́ и, приходя́ще к тебе́, поуча́хуся о словесе́х твои́х и по́двизех, сла́вяще Го́спода, ди́внаго во святы́х Свои́х. И мы вси с ве́рою и любо́вию восхваля́ем тя, преподо́бне о́тче, и вопие́м ти си́це:

Ра́дуйся, всего́ себе́ в же́ртву Го́сподеви принесы́й;
ра́дуйся, на высоту́ безстра́стия возше́дый.

Ра́дуйся, во́ине Христо́в добропобе́дный;
ра́дуйся, Небе́снаго Домовлады́ки ра́бе благи́й и ве́рный.

Ра́дуйся, предста́телю о нас пред Го́сподем непосты́дный;
ра́дуйся, к Богоро́дице моли́твенниче наш неусы́пный.

Ра́дуйся, пречу́днаго благоуха́ния кри́не пусты́нный;
ра́дуйся, благода́ти Бо́жия сосу́де непоро́чный.

Ра́дуйся, преподо́бне Серафи́ме, Саро́вский чудотво́рче.

Кондак 5

Боже́ственный свет осия́ жили́ще твое́, преподо́бне, егда́ боля́щу ти и на одре́ сме́ртнем лежа́щу, Сама́ Пречи́стая Де́ва, прише́дши к тебе́ со святы́ми апо́столы Петро́м и Иоа́нном, рече́: «Сей есть от ро́да на́шего», — и главе́ твое́й косну́ся. А́бие же исцеле́в, воспе́л еси́ благода́рне Го́сподеви: Аллилу́иа.

Икос 5

Ви́дя враг ро́да челове́ча чи́стое и свято́е житие́ твое́, преподо́бне Серафи́ме, восхоте́ погуби́ти тя: наведе́ бо на тя лю́ди злы, и́же беззако́нно истяза́ху тя и е́ле жи́ва су́ща оста́виша; ты же, о́тче святы́й, я́ко а́гнец кро́ток, вся претерпе́л еси́, за оби́дящих тя Го́сподеви моля́ся. Те́мже мы вси, таково́му твоему́ незло́бию дивя́щеся, вопие́м ти:

Ра́дуйся, в кро́тости и смире́нии твое́м Христу́ Бо́гу подража́вый;
ра́дуйся, незло́бием твои́м ду́ха зло́бы победи́вый.

Ра́дуйся, чистоты́ душе́вныя и теле́сныя храни́телю усе́рдный;
ра́дуйся, пусты́нниче, дара́ми благода́тными преиспо́лненный.

Ра́дуйся, подви́жниче богопросла́вленный и прозорли́вый;
ра́дуйся, наста́вниче мона́хов преди́вный и богому́дрый.

Ра́дуйся, Святы́я Це́ркве похвало́ и ра́дование;
ра́дуйся, оби́тели Саро́вския сла́во и удобре́ние.

Ра́дуйся, преподо́бне Серафи́ме, Саро́вский чудотво́рче.

Кондак 6

Пропове́дует пусты́ня Саро́вская по́двиги и труды́ твоя́, богоно́сне уго́дниче Христо́в: де́бри бо и леса́ ея́ моли́твою облагоуха́л еси́, проро́ку Бо́жию Илии́ и Крести́телю Госпо́дню Иоа́нну подража́я, и яви́лся еси́ пусты́ни прозябе́ние многопло́дное дара́ми Ду́ха Свята́го, Его́же де́йствием мно́гая и пресла́вная соверши́л еси́, подвизая ве́рных воспева́ти благи́х Пода́телю Бо́гу: Аллилу́иа.

Икос 6

Возсия́ в тебе́ но́вый богови́дец, Моисе́ю подо́бный, Серафи́ме блаже́нне: непоро́чно бо служе́ние олтарю́ Госпо́дню соверша́я, сподо́бился еси́ зре́ти Христа́, во хра́ме со Безпло́тными Си́лами гряду́ща. Сему́ Бо́жию о тебе́ благоволе́нию дивя́щеся, воспева́ем ти си́це:

Ра́дуйся, богови́дче пресла́вный;
ра́дуйся, Све́том Трисия́нным озаре́нный.

Ра́дуйся, Пресвяты́я Тро́ицы служи́телю ве́рный;
ра́дуйся, Ду́ха Свята́го жили́ще украше́нное.

Ра́дуйся, Христа́ со А́нгелы теле́сныма очи́ма лицезре́вый;
ра́дуйся, в бре́ннем телеси́ ра́йскую сла́дость предвкуси́вый.

Ра́дуйся, Хле́бом Жи́зни насыще́нный;
ра́дуйся, питие́м безсме́ртия напое́нный.

Ра́дуйся, преподо́бне Серафи́ме, Саро́вский чудотво́рче.

Кондак 7

Хотя́ Человеколю́бец Госпо́дь яви́ти в тебе́, преподо́бне, Свое́ неизрече́нное к лю́дем милосе́рдие, показа́ тя я́ко вои́стинну свети́ло богосве́тлое: де́лы бо и словесы́ твои́ми всех приводи́л еси́ ко благоче́стию и любви́ Божией. Те́мже сия́нием по́двигов твои́х просвеще́ни и хле́бом уче́ния твоего́ насыще́ни, тебе́ усе́рдно велича́ем и просла́вльшему тя Христу́ вопие́м: Аллилу́иа.

Икос 7

Но́ваго ви́дяще тя избра́нника Бо́жия, издале́ча притека́ху к тебе́ ве́рнии в ско́рбех и боле́знех; и сих, беда́ми отягче́нных, не отри́нул еси́, источа́я целе́ния, да́руя утеше́ние, предста́тельствуя в моли́твах. Те́мже исхожда́ше во всю зе́млю Росси́йскую веща́ние чуде́с твои́х, и си́це тя сла́вляху духо́вная ча́да твоя́:

Ра́дуйся, па́стырю наш до́брый;
ра́дуйся, о́тче ми́лостивый и кро́ткий.

Ра́дуйся, врачу́ наш ско́рый и благода́тный;
ра́дуйся, не́мощей на́ших цели́телю милосе́рдый.

Ра́дуйся, в беда́х и обстоя́ниих помо́щниче ско́рый;
ра́дуйся, душ смяте́нных умири́телю пресла́достный.

Ра́дуйся, гряду́щая я́ко настоя́щая прови́девый;
ра́дуйся, прегреше́ний сокрове́нных обличи́телю прозорли́вый.

Ра́дуйся, преподо́бне Серафи́ме, Саро́вский чудотво́рче.

Кондак 8

Стра́нное чу́до ви́дим на тебе́, преподо́бне: я́ко ста́рец сый немощны́й и притру́дный, ты́сящу дний и ты́сящу но́щий на ка́мени в моли́тве пребыва́л еси́. Кто дово́лен изрещи́ боле́зни и боре́ния твоя́, блаже́нне о́тче, я́же претерпе́л еси́, возде́я преподо́бнии ру́це твои́ к Бо́гу, Амали́ка мы́сленнаго побежда́я и Го́сподеви поя́: Аллилу́иа.

Икос 8

Весь еси́ жела́ние, весь сла́дость, Сладча́йший Иису́се! — та́ко в моли́твах взыва́л еси́, о́тче, в пусты́ннем безмо́лвии твое́м. Мы же, суето́ю помраче́ннии и во гресе́х все житие́ ижди́вшии, восхваля́юще любо́вь твою́ ко Го́споду, си́це вопие́м ти:

Ра́дуйся, лю́бящим и чту́щим тя хода́таю спасе́ния;
ра́дуйся, приводя́й гре́шников ко исправле́нию.

Ра́дуйся, молча́льниче и затво́рниче преди́вный;
ра́дуйся, моли́твенниче о нас усе́рдный.

Ра́дуйся, пла́менную любо́вь ко Го́споду показа́вый;
ра́дуйся, огне́м моли́твы стре́лы вра́жия попали́вый.

Ра́дуйся, свеще́ неугаси́мая, моли́твою в пусты́ни пламене́ющая;
ра́дуйся, свети́льниче, горя́й и светя́й дарова́нии духо́вными.

Ра́дуйся, преподо́бне Серафи́ме, Саро́вский чудотво́рче.

Кондак 9

Все естество́ а́нгельское удиви́ся стра́нному зре́нию: ста́рцу бо, су́щу в затво́ре, Небесе́ и земли́ Цари́ца яви́ся, повелева́ющи, да откры́ет затво́р свой и да не возбрани́т лю́дем правосла́вным вни́ти к себе́, но да всех пе́ти научи́т Христу́ Бо́гу: Аллилу́иа.

Икос 9

Вети́и многовеща́ннии не возмо́гут изрещи́ кре́пость любве́ твоея́, блаже́нне: пре́дал бо еси́ себе́ на служе́ние всем приходя́щим к тебе́, повеле́ние Богома́тере исполня́я, и был еси́ недоумева́ющим сове́тник благи́й, уныва́ющим уте́шитель, заблужда́ющихся кро́ткое вразумле́ние, боля́щих врач и цели́тель. Сего́ ра́ди вопие́м ти:

Ра́дуйся, от ми́ра в пусты́ню всели́выйся, да доброде́тели приобря́щеши;
ра́дуйся, из пусты́ни во оби́тель возврати́выйся, во е́же доброде́тели се́мена се́яти.

Ра́дуйся, Ду́ха Свята́го благода́тию осия́нный;
ра́дуйся, кро́тости и смире́ния испо́лненный.

Ра́дуйся, притека́вшим к тебе́ оте́ц чадолюби́вый;
ра́дуйся, в словесе́х любве́ ободре́ние и утеше́ние им подава́вый.

Ра́дуйся, приходя́щия к тебе́ ра́достию и сокро́вищем именова́вый;
ра́дуйся, за любо́вь твою́ святу́ю ра́достей Небе́снаго Ца́рствия сподо́бивыйся.

Ра́дуйся, преподо́бне Серафи́ме, Саро́вский чудотво́рче.

Кондак 10

Спаси́тельнаго твоего́ по́двига, преподо́бне, дости́г сконча́ния, на моли́тве коленопреклоне́нно святу́ю ду́шу твою́ в ру́це Бо́жии пре́дал еси́, ю́же А́нгели святи́и вознесо́ша Горе́ ко Престо́лу Вседержи́теля, да со все́ми святы́ми предстоиши во сла́ве невече́рней, воспева́я песнь хвале́бную святы́х Святе́йшему Сло́ву: Аллилу́иа.

Икос 10

Стена́ всем святы́м и и́ноком отра́да, Пресвята́я Де́ва пред кончиною твое́ю яви́ся ти, провозвести́вши бли́зкое твое́ к Бо́гу отше́ствие. Мы же, дивя́щеся таково́му посеще́нию Богома́тере, вопие́м ти:

Ра́дуйся, Небеси́ и земли́ Цари́цу лицезре́вый;
ра́дуйся, явле́нием Бо́жия Ма́тере обра́дованный.

Ра́дуйся, весть от Нея́ ко преселе́нию Небе́сному прие́мый;
ра́дуйся, пра́ведною кончиною свя́тость жития́ твоего́ показа́вый.

Ра́дуйся, в моли́тве пред ико́ною Богома́тере умиле́нный дух твой Бо́гу преда́вый;
ра́дуйся, неболе́зненным исхо́дом прорече́ния твоя́ испо́лнивый.

Ра́дуйся, венце́м безсме́ртия от руки́ Вседержи́теля увенча́нный;
ра́дуйся, блаже́нство ра́йское со все́ми святы́ми, унасле́довавый.

Ра́дуйся, преподо́бне Серафи́ме, Саро́вский чудотво́рче.

Кондак 11

Пе́ние непреста́нное Пресвяте́й Тро́ице вознося́, преподо́бне, всем житие́м твои́м подви́жник вели́кий благоче́стия яви́лся еси́, заблу́ждшим на вразумле́ние, боля́щим душе́ю и те́лом на исцеле́ние. Мы же, благода́рни су́ще Го́сподеви за такову́ю ми́лость Его́ к нам, вы́ну зове́м Ему́: Аллилу́иа.

Икос 11

Светопода́тельный свети́льник быв в житии, богоблаже́нне о́тче, и по сме́рти твое́й возсия́л еси́ я́ко светоза́рное свети́ло Росси́йския земли́: источа́еши бо от честны́х моще́й твои́х то́ки чуде́с всем, с ве́рою и любо́вию к тебе́ притека́ющим. Те́мже мы, я́ко моли́твеннику о нас те́плому и чудотво́рцу, вопие́м ти:

Ра́дуйся, мно́жеством чуде́с от Го́спода просла́вленный;
ра́дуйся, любо́вию твое́ю всему́ ми́ру возсия́вый.

Ра́дуйся, любве́ Христо́вы ве́рный после́дователю;
ра́дуйся, утеше́ние всем тре́бующим твоея́ по́мощи.

Ра́дуйся, исто́чниче чуде́с неоскудева́емый;
ра́дуйся, боля́щих и неду́жных исцели́телю.

Ра́дуйся, воды́ многоцеле́бныя кла́дязю неисчерпа́емый;
ра́дуйся, я́ко вся концы́ земли́ на́шея любо́вию твое́ю объя́л еси́.

Ра́дуйся, преподо́бне Серафи́ме, Саро́вский чудотво́рче.

Кондак 12

Благода́ть и ве́лие твое́ дерзнове́ние пред Бо́гом ве́дуще, тебе́, преподо́бне о́тче, мо́лимся: моли́ся те́пле ко Го́споду, да храни́т Це́рковь Свою́ Святу́ю от неве́рия и раско́ла, от бед и напа́стей, да пое́м тобо́ю благоде́ющему нам Бо́гу: Аллилу́иа.

Икос 12

Пою́ще твое́ прославле́ние, ублажа́ем тя, преподо́бне, я́ко многомо́щна моли́твенника о нас пред Го́сподом, уте́шителя и засту́пника, и с любо́вию возглаша́ем ти си́це:

Ра́дуйся, Це́ркве Правосла́вныя похвало́;
ра́дуйся, Оте́честву на́шему щит и огражде́ние.

Ра́дуйся, путеводи́телю, всех к Небеси́ направля́яй;
ра́дуйся, защи́тниче наш и покрови́телю.

Ра́дуйся, си́лою Бо́жиею мно́гая чудеса́ соде́явый;
ра́дуйся, ри́зою твое́ю мно́гия неду́жныя исцели́вый.

Ра́дуйся, вся ко́зни диа́вольския победи́вый;
ра́дуйся, зве́ри ди́кия кро́тостию твое́ю покори́вый.

Ра́дуйся, преподо́бне Серафи́ме, Саро́вский чудотво́рче.

Кондак 13

О преди́вный уго́дниче и вели́кий чудотво́рче, преподо́бне о́тче Серафи́ме, приими́ ма́лое сие́ моле́ние на́ше, в похвалу́ тебе́ возноси́мое, и, предстоя́ ны́не Престо́лу Царя́ ца́рствующих, Го́спода на́шего Иису́са Христа́, моли́ся о всех нас, да обря́щем милосе́рдие Его́ в День Су́дный, в ра́дости пою́ще Ему́: Аллилу́иа.

[Се́й конда́к глаго́лется три́жды.]

Икос 1

А́нгелов Творе́ц избра́ тя изнача́ла, да просла́виши житие́м твои́м пречу́дное и́мя Святы́я Тро́ицы: яви́лся бо еси́ вои́стинну а́нгел на земли́ и во пло́ти серафи́м; я́ко луч пресве́тлый Ве́чнаго Со́лнца Пра́вды, просвети́ся житие́ твое́. Мы же, зря́ще прехва́льныя труды́ твоя́, с благогове́нием и ра́достию глаго́лем ти сицева́я:

Ра́дуйся, пра́вило ве́ры и благоче́стия;
ра́дуйся, о́бразе кро́тости и смире́ния.

Ра́дуйся, пресла́вное ве́рных велича́ние;
ра́дуйся, прети́хое ско́рбным утеше́ние.

Ра́дуйся, прелюби́мое и́ноков похвале́ние;
ра́дуйся, живу́щим в ми́ре преди́вное поможе́ние.

Ра́дуйся, Росси́йския держа́вы сла́во и огражде́ние;
ра́дуйся, тамбо́вския страны́ свяще́нное украше́ние.

Ра́дуйся, преподо́бне Серафи́ме, Саро́вский чудотво́рче.

Кондак 1

Избра́нный чудотво́рче и преди́вный уго́дниче Христо́в, ско́рый помо́щниче и моли́твенниче наш, преподо́бне о́тче Серафи́ме! Велича́юще просла́вльшаго тя Го́спода, воспева́ем ти похва́льная. Ты же, име́яй ве́лие дерзнове́ние ко Го́споду, от вся́ких нас бед свободи́, зову́щих:

Ра́дуйся, преподо́бне Серафи́ме, Саро́вский чудотво́рче.

Моли́тва преподо́бному Серафи́му Саро́вскому

О пречу́дный о́тче Серафи́ме, вели́кий Саро́вский чудотво́рче, всем прибега́ющим к тебе́ скоропослу́шный помо́щниче! Во дни земна́го жития́ твоего́ никто́же от тебе́ тощ и неуте́шен оты́де, но всем в сла́дость бысть ви́дение ли́ка твоего́ и благоуве́тливый глас слове́с твои́х. К сим же и дар исцеле́ний, дар прозре́ния, дар немощны́х душ врачева́ния оби́лен в тебе́ яви́ся. Егда́ же призва́ тя Бог от земны́х трудо́в к небе́сному упокое́нию, николи́же любы́ твоя́ преста́ от нас, и невозмо́жно есть исчи́слити чудеса́ твоя́, умно́жившаяся, я́ко зве́зды небе́сныя: се бо по всем конце́м земли́ на́шея лю́дем Бо́жиим явля́ешися и да́руеши им исцеле́ния. Тем же и мы вопие́м ти: о прети́хий и кро́ткий уго́дниче Бо́жий, дерзнове́нный к Нему́ моли́твенниче, николи́же призыва́ющия тя отрева́яй! Вознеси́ о нас благомо́щную твою́ моли́тву ко Го́споду сил, да да́рует нам вся благопотребная в жи́зни сей и вся к душе́вному спасе́нию поле́зная, да огради́т нас от паде́ний грехо́вных и и́стинному покаянию да научи́т нас, во е́же беспреткнове́нно вни́ти нам в ве́чное Небе́сное Ца́рство, иде́же ты ны́не в незаходи́мей сия́еши сла́ве, и та́мо воспева́ти со все́ми святы́ми Живонача́льную Тро́ицу во ве́ки веко́в. Ами́нь.