Преподобный Паи́сий Святогорец (Эзнепидис)

Прп. Паисий Святогорец (1924-1994) ‒ один из самых почитаемых греческих святых XX века. Родился в Каппадокии, грудным ребенком привезен в Грецию. В 1954 г. принял монашество на Афоне. Подвизался в монастырях Филофей и Кутлумуш, помогал бороться с протестантизмом. Обладал даром прозорливости и утешения, принимал тысячи страждущих. Скончался 12 июля 1994 г. в монастыре Иоанна Богослова в Суроти. Канонизирован в 2015 г.

Краткое житие преподобного Паисия Святогорца

Преподобный Паисий Святогорец (в миру Арсений Эзнепидис) родился 7 августа 1924 года в селении Фарасы, в Каппадокии (Малая Азия). Грудным ребенком он был привезен в Грецию, где его родители поселились в небольшом городке Коница. Когда в стране началась гражданская война (1944–1948), Арсений Эзнепидис был призван в действующую армию.

После войны он встал на путь монашеской жизни, к которой стремился с детства. 27 марта 1954 года после установленного испытания послушник Арсений был пострижен в рясофор с именем Аверкий, 3 марта 1957 года – в мантию с именем Паисий. Он подвизался на Святой Афонской Горе, затем – в монастыре Стомион в Конице и на Святой горе Синай. Множество людей приходило к старцу и находило духовное руководство и утешение.

12 июля 1994 года он почил о Господе в Иоанно-Богословском монастыре, расположенном близ селения Суроти в окрестностях Салоник.

Полное житие преподобного Паисия Святогорца

Геронда Паисий, в миру Арсений Езнепидис, родился в Фарасах Каппадокийских, в Малой Азии, 25 июля 1924 года. Его отца звали Продромос. Он был благочестивым человеком и патриотом, из-за чего его семья подвергалась опасности от турецких фанатиков-мусульман. Мать старца звали Евлампией. В их семье, кроме маленького Арсения, было еще девять детей. Через две недели после рождения Арсения фарасийские греки бежали из Турции, чтобы спастись от турецких гонений. Перед отъездом в Грецию святой Арсений Каппадокийский окрестил мальчика и дал ребенку свое имя, пророчески сказав: «Хочу оставить после себя монаха».

В сентябре 1924 года корабль с беженцами подошел к берегам Греции, и измученные люди, наконец, обрели новую родину и безопасность. Малыш Арсений рос, имея большую любовь ко Христу и Богородице, и очень хотел стать монахом. Он постоянно ходил в лес, где молился, держа деревянный крест, сделанный своими руками. Детство старца прошло в г. Конице. Здесь он успешно окончил школу и работал до армии плотником.

В 1945 году Арсения призвали в армию, где он отличился благонравием и мужеством.

После армии Арсений сразу ушел на Святую Гору Афон. В 1950 году он стал послушником благодатного духовника, отца Кирилла, впоследствии игумена монастыря Кутлумуш († 1968). Некоторое время спустя о. Кирилл направил послушника в монастырь Есфигмен, где Арсений и принял в 1954 году рясофор с именем Аверкий. Новый монах нес любые послушания, а, выполнив свои, помогал и другим братьям закончить их работу. Аверкий постоянно молился, стараясь, чтобы это не заметили окружающие, любил читать жития святых.

В 1954 году Аверкий по совету духовного отца перешел в обитель Филофей и стал там учеником отца Симеона, известного своей добродетелью. В 1956 году отец Симеон постриг отца Аверкия в малую схиму с именем Паисий, в честь митрополита Кесарийского Паисия II, который также был уроженцем Фарасы Каппадокийской. На новом месте о. Паисий вел прежнюю жизнь: подвизался по любочестию и помогал, сколько мог, братии.

В 1958 году из Стомио Коницкой его просили прийти помочь остановить распространение протестантов. Геронда, получив внутреннее «извещение» воли Божией, пошел и жил в обители Рождества Богородицы в Стомио. Там он с помощью благодати Божией помог тысячам душ и оттуда отправился в 1962 году по каким-то духовным причинам на Синай.

Геронда много работал, а на заработанные деньги покупал пищу и раздавал ее бедуинам, которые его очень любили. В 1964 году геронда вернулся на Афон и поселился в Иверском скиту. В 1966 году геронда заболел, и ему отняли большую часть легких.

С мая 1978 года о. Паисий поселился в келии Панагуда святой обители Кутлумуш. Сюда к старцу потянулись тысячи людей. Ежедневно от восхода до заката он советовал, утешал, решал людские проблемы, изгонял всякое стеснение и наполнял души верою, надеждою и любовью к Богу. Для всей Греции геронда стал духовным магнитом, вытягивающим скорбь болезнующих людей.

Принимая тяготы притекающих людей, геронда мало-помалу стал изнемогать телесно. К 1993 году состояние старца стало очень тяжелым. В октябре 1993 года геронда поехал с Горы Афон в монастырь св. Иоанна Богослова в Суроти. Здоровье его катастрофически ухудшилось. 12 июля 1994 года геронда предал свою преподобную душу Господу. Геронда почил и был погребен в монастыре св. Иоанна Богослова в Суроти Солунской, и место его погребения стало святыней для всего православного мира.

13 января 2015 года Священный Синод Константинопольской Православной Церкви причислил преподобного Паисия Святогорца к лику святых, о чем святейшего патриарха Московского и всея Руси Кирилла уведомил святейший патриарх Константинопольский Варфоломей своим письмом от 28 января 2015 года.

Решение о включении преподобного Паисия в русский месяцеслов было принято на заседании Священного Синода Русской Православной Церкви 5 мая 2015 года с определением празднования его памяти 29 июня/12 июля.

Тропарь, глас 1

Фара́сския земли́ порожде́ние
и Афо́на сла́вное украше́ние,
блаже́нне о́тче Паи́сие,
преподо́бных изря́дный подража́телю,
я́ко всесве́тлое со́лнце просия́л еси́
и благода́тию ве́рных мно́жества озари́л еси́:
сла́ва Да́вшему ти кре́пость,
сла́ва Венча́вшему тя,

сла́ва Дарова́вшему тобо́ю всем исцеле́ния.

Ин тропарь, глас 5

Боже́ственныя любве́ о́гнь прие́мый,
превосходя́щим по́двигом вда́лся еси́ весь Бо́гови,
и утеше́ние мно́гим лю́дем был еси́,
словесы́ боже́ственными наказу́яй,
моли́твами чудотворя́й,
Паи́сие Богоно́се,
и ны́не мо́лишися непреста́нно

о всем ми́ре, преподо́бне.

Кондак, глас 8

Святы́я Горы́ подви́жника пресла́внаго
и Це́ркве моли́твенника те́плаго
восхва́лим в пе́снех всеусе́рдно,
ве́рныя к жи́зни изря́дней наставля́юща
и вся́кая проше́ния сих исполня́юща,
и та́ко ему́ возопии́м:

ра́дуйся, о́тче Паи́сие.

Ин кондак, глас 8

А́нгельски на земли́ пожи́вый,
любо́вию просия́л еси́, преподо́бне Паи́сие,
мона́хов вели́кое утвержде́ние,
ве́рных к житию́ свято́му вождь,
вселе́нныя же утеше́ние сладча́йшее показа́лся еси,
сего́ ра́ди зове́м ти:

ра́дуйся, о́тче всеми́рный.

Молитва

О святы́й преподóбный и богоно́сный о́тче на́ш Паи́сие, возлю́бленный на́ш покрови́телю и богому́дрый наста́вниче, ле́ствицею доброде́телей от земли́ в Небе́сное Ца́рство восшéдый и благода́ть прия́вый во е́же хода́тайствовати о на́с пред Престо́лом Всеми́лостиваго Го́спода на́шего. Мо́лим тя́ отврати́ти ны́ от пути́ грехо́внаго и научи́ти ны́ Го́сподеви соверше́нны плоды́ покая́ния и обновлéния во Христе́ ду́ш на́ших приноси́ти. Ты́, святы́й о́тче, во дни́ жития́ земна́го мно́зи тя́жки боле́зни и неду́ги неисцéльныя уврачева́вый и ду́ши грехми́ и скорбми́ стра́ждущих исцели́вый, ны́не предстоя́ Бо́гу, Того́ милосе́рдие к на́м приклони́, да твоего́ предста́тельства ра́ди любо́вию чту́щих святу́ю па́мять твою́ исцели́т, да́рует кре́пость во искуше́ниих, му́жество в борьбе́ с ду́хом зло́бы, и́щущим вéчней поги́бели на́шей, да да́рует на́м проще́ние все́х на́ших грехо́в, и́хже от ю́ности на́шея да́же до настоя́щаго дне́ по́мыслом, сло́вом и де́лом соверши́хом, да научи́т ны́, я́же на́м подоба́ет твори́ти, я́ко да вы́ну Ему́ и бли́жним с любо́вию и смире́нием послу́жим. Е́й, о́тче святы́й, наста́ви на́с, во о́браз жития́ твоего́, и́же любве́ и милосе́рдия испо́лнено бы́сть, у́з грехо́внаго жи́тельства разреши́вшеся, к Небе́сным Чертогам взы́ти, идéже да восхва́лим Всемилосéрднаго Триипоста́снаго Го́спода на́шего во ве́ки веко́в. Ами́нь.

2-я Молитва

О, преподобне и богоносне отче Паисие, богомудрый наставниче, лествицею добродетелей от земли в Царствие Небесное восшедый и благодать, во еже ходатайствовати о нас пред Престолом Всемилостиваго Бога, приемый! Ты, во дни земнаго жития тяжкия болезни претерпевая и благодарственная пения за вся Богу воздавая, от Него благодать восприял еси телесныя недуги исцеляти и души, грехми омраченныя, врачевати. Ныне, предстоя Престолу Вседержителя, Того милосердие к нам приклони, да твоим молитвенным предстательством дарует нам Господь крепость во искушениих, мужество в борьбе с духами злобы поднебесныя, прощение всех наших грехов, яже от юности нашея даже до настоящаго дне сотворихом словом, делом и помышлением, и да научит нас благое творити, во еже богоугодне житие скончати и ближним с любовию и смирением послужити. Ей, отче святый, паки молим тя: помози нам пути греховнаго отвратитися, плоды же покаяния и обновления во Христе душ наших сотворити и во образ жития твоего, еже любве и милосердия исполнено бысть, уз греховнаго жительства разрешившеся, к Небесным Чертогом взыти, идеже вкупе с тобою сподобимся прославляти Бога в Троице славимаго Отца и Сына и Святаго Духа во веки веков. Аминь.

Акафист святому преподобному Паисию Святогорцу

Кондак 1

Избра́ннаго подви́жника и сосу́да арома́тов благоуха́нных, Каппадоки́йское прозябе́ние и Афо́нския Панагу́ды все́льника, неусы́пнаго о нас предста́теля, воспои́м согла́сно. А́нгельскому бо житию́ подража́я, Тро́ице Святе́й благоугоди́л еси́, те́мже зове́м ти́: ра́дуйся, преподо́бне Паи́сие, ди́вный народа Бо́жия уте́шителю.

Икос 1

А́нгелом подража́тель показа́лся еси́ во уде́ле Богоро́дицы избра́ннем, и нам хода́тай тепле́йший пред Бо́гом, Паи́сие о́тче, те́мже та́ко тя ублажа́ем:

Радуйся, свята́го Арсе́ния похвале́ние;
ра́дуйся, Афо́на великоиме́нное благоле́пие.

Радуйся, вы́шняго жи́тельства о́бразе;
ра́дуйся, Аси́и Ма́лыя о́трасле.

Радуйся, в фарасио́тех приснопева́емый;
ра́дуйся, и́нокующих пра́вило.

Радуйся, ве́ры Правосла́вныя ве́лий храни́телю;
ра́дуйся, церко́вных ове́ц просвети́телю.

Радуйся, Каппадоки́и боже́ственная розго́;
ра́дуйся, Елла́ды доброво́нное ми́ро.

Радуйся, земны́й а́нгеле, ве́стниче на земли́;
ра́дуйся, челове́че Небе́сный, пребыва́яй на Небеси́.

Радуйся, преподо́бне Паи́сие, ди́вный народа Бо́жия уте́шителю.

Кондак 2

Ви́дяще, я́ко от руки́ свяще́ннаго Арсе́ния в Фара́сах Каппадоки́йских, оте́чествии святы́х, Креще́ние прия́л еси́, и я́ко моли́тва сего́ свята́го многопло́дную тя ле́торасль Аси́и Ма́лыя и Елла́ды яви́, тя прославля́ем по достоя́нию, Бо́гови пою́ще: Аллилу́иа.

Икос 2

Разуме́я страда́ния из оте́чествия изгна́нных, стра́нствуя и печа́луяся о до́ма роди́тельскаго разоре́нии, в ве́ре укрепи́лся еси́ и богоразу́мия прия́л еси́ свет от благода́ти Бо́жия, Паи́сие святе. Сего ́ра́ди и мы, взира́юще ны́не на чудеса́ твоя́, восклица́ем ти такова́я:

Радуйся, Иису́совых благослове́ний стяжа́телю;
ра́дуйся, уде́ла Богома́терняго свети́ло.

Радуйся, кла́дезю многому́дрых благодея́ний;
ра́дуйся, киво́те Вы́шняго дарова́ний.

Радуйся, Бо́жия Ду́ха благооти́шное сия́ние;
ра́дуйся, доброде́телей несказа́нное благоуха́ние.

Радуйся, луче́ Со́лнца Пра́вды, отгоня́ющая напа́сти;
ра́дуйся, исто́чниче святы́й, врачу́яй вся́кия стра́сти.

Радуйся, Цари́цы Небе́сныя уго́дниче преусе́рдный;
ра́дуйся, Святы́я Горы́ во́ине добропобе́дный.

Радуйся, поста́ и моли́твы де́лателю неусы́пный;
ра́дуйся, стра́ждущих и печа́льных засту́пниче непосты́дный.

Радуйся, преподо́бне Паи́сие, ди́вный наро́да Бо́жия уте́шителю.

Кондак 3

Си́лу Вы́шняго, му́ченики укрепля́ющую, разуме́я и жития́м их внима́я, ты душе́ю блаже́нною к непреста́нному славосло́вию Всетворца́ восходи́л еси́. Мы же сие́ воспомина́юще, вопие́м Ему́: Аллилу́иа.

Икос 3

Услы́шав словеса́ Небе́снаго Жениха́, я́ко Той есть Воскресе́ние и Живо́т и я́ко во ве́ки не у́мрет веру́яй в Него́, неизрече́ннаго све́та испо́лнился еси́ и неве́рия пре́лесть низве́ргл еси́. Те́мже, твое́ю му́дростию научае́ми, благода́рственно воспева́ем ти та́ковая:

Радуйся, тене́та безбо́жия прелете́вый;
ра́дуйся, я́ве Христа́ узре́вый.

Радуйся, оби́тели Стомио́нския устрои́телю;
ра́дуйся, Ко́ницких еретико́в победи́телю.

Радуйся, ми́лостыни пото́че неисчерпа́емый;
ра́дуйся, го́рним сия́нием укрепля́емый.

Радуйся, горы́ Моисе́овы ороше́нный са́де;
ра́дуйся, пусты́ни Сина́йския благосе́нное дре́во.

Радуйся, оби́тели великому́ченицы Екатери́ны предста́телю;
ра́дуйся, в му́дрости де́ве сей подража́телю.

Радуйся, святы́м Галактио́ну и Еписти́мии совсе́льниче;
ра́дуйся, А́нгельским лико́м на земли́ собесе́дниче.

Радуйся, преподо́бне Паи́сие, ди́вный наро́да Бо́жия уте́шителю.

Кондак 4

Раче́ние пла́менное к Богома́тери, чисте́йший о́тче, поне́же име́я, Сию́ Спобо́рницу непрело́жную и Храни́тельницу стяжа́. Тем и мы, дарова́ний твои́х жела́юще приобщи́тися, о тебе́ пое́м: Аллилу́иа.

Икос 4

Слы́шаша и́мя твое́ земни́и концы́, Паи́сие свя́тче, ты бо, я́ко со́лнце блиста́яй во времена́ после́дняя и Правосла́вие утвержда́яй и́менем Го́спода Иису́са Христа́, яви́лся еси́. Мы же, единомы́сленне па́мятующе богогла́сная уче́ния твоя́, прино́сим ти рече́ния такова́я:

Ра́дуйся, изря́днейший Пресвяты́я люби́мче;
ра́дуйся, богатотво́рный Христо́в дароно́сче.

Радуйся, сомоли́твенниче Херуви́мом;
ра́дуйся, единонра́вниче Серафи́мом.

Радуйся, забра́ло кре́пкое боголю́бцев;
ра́дуйся, у́тваре преиспещре́нная Це́ркве.

Радуйся, чернори́зцев огра́до и оте́чествия хране́ние;
ра́дуйся, Ко́ницы о́трасле, Стомио́на же заступле́ние.

Радуйся, ло́зие Богома́тере, благовре́менный плод принося́щее;
ра́дуйся, вертогра́де и́стиннаго покая́ния благоуха́яй.

Радуйся, Бо́жиими словесы́ прорече́ние;
ра́дуйся, я́звам гре́шничим умаще́ние.

Радуйся, преподо́бне Паи́сие, ди́вный наро́да Бо́жия уте́шителю.

Кондак 5

Богоприя́тну любо́вь я́ко стяжа́вый, в же́ртву себе́ сама́го бра́тием ты возложи́, наро́ды же, о́крест живу́щия, благослове́нием Пречи́стыя от оби́тели Стомио́нския оделя́ше. Такова́го себе́ отверже́ния ра́ди ны́не со А́нгелы Христа́ прославля́еши, мы же, па́мять твою́ пра́здновати призыва́емии, вопие́м: Аллилу́иа.

Икос 5

Ви́дяще тя ду́шу за бли́жняго полага́юща, блаже́нне Паисие, к тебе́ прибега́ем: ми́лостив бу́ди нам и, предстоя́ Влады́це Христу, Того́ умоли́, да отжене́т грехо́вную тьму, умы́ помрача́ющую, от сла́вящих тя моле́бными пе́сньми сицевы́ми:

Радуйся, Богоро́дицы бо́дренный песносло́вче;
ра́дуйся, Панагу́ды до́блественный ратобо́рче.

Радуйся, путево́дная заблу́ждшим звездо́;
ра́дуйся, Афо́нская зову́щая к Бо́гу трубо́.

Радуйся, утеше́ние пла́чущих;
ра́дуйся, помо́щниче стра́ждущих.

Радуйся, печа́льных боже́ственное укрепле́ние;
ра́дуйся, о и́ноцех неоску́дное попече́ние.

Радуйся, к Ми́лостивей за ны предста́телю;
ра́дуйся, неду́жных безме́зднейший врачева́телю.

Радуйся, подвиза́ющихся направля́яй;
ра́дуйся, изря́дне Врата́рницу Богоро́дицу восхваля́яй.

Радуйся, преподо́бне Паи́сие, ди́вный наро́да Бо́жия уте́шителю.

Кондак 6

Пропове́дник богоно́сен еси́ и столп ве́ры, да́ры Ду́ха Свята́го нам испроша́яй, те́м и мы тебе́ ра́ди, ста́рче преди́вный, немо́лчно зове́м Бо́гу: Аллилу́иа.

Икос 6

Возсия́в я́ко лампа́да неугаси́мая светом Трисо́лнечнаго Божества́, покая́ния наста́вник яви́ся, Паи́сие свя́те. Мы же, твои́ми предста́тельствы свы́шнее утеше́ние и благода́ти позна́ние прие́млющии, сла́вим тя, вопию́ще:

Радуйся, воспису́яй хвале́бная Богома́тере, яко слави́й избра́нный;
ра́дуйся, приноша́яй сле́зы Христу́, я́ко ми́ро благоуха́нное.

Радуйся, помысло́в испове́данию прилежа́вый;
ра́дуйся, Та́йней Ве́чери чи́стою душе́ю приобща́выйся.

Радуйся, воздержа́ния и себе́ отверже́ния о́бразе;
ра́дуйся, кре́пкое о ве́си Фове́рской предста́тельство.

Радуйся, Со́лнца Христа́ малове́рным провозвести́вый;
ра́дуйся, ми́лостию Человеколю́бца всех удовли́вый.

Радуйся, кри́не Небе́сный, о ми́ре моли́твою благоуха́яй;
ра́дуйся, вино́ сла́дкое, ду́ши ра́достию исполня́яй.

Радуйся, Открове́ния громогла́сное возвеще́ние;
ра́дуйся, Уте́шителевы благода́ти на нас излия́ние.

Ра́дуйся, преподо́бне Паисие, ди́вный народа Бо́жия уте́шителю.

Кондак 7

Хотя́щу тебе́ Спа́су после́довати, му́ченическаго жития́ показа́лся еси́ ревни́тель, сохрани́в нескве́рны ду́шу и те́ло любо́вию боже́ственною ко Христу́. Сего́ ра́ди тя ублажа́ем, согла́сно пою́ще Бо́гови: Аллилу́иа.

Икос 7

Но́вое одоле́ние на неви́димыя и ви́димыя враги́ моли́твою и любо́вию обреты́й, всеблаже́нне о́тче, и всеору́жие смире́ния взем, истреби́л еси́ бесо́вския ко́вы и тща́ния, Бо́гови же благода́рственная возопи́. Тем и мы прино́сим ти сицева́я:

Радуйся, све́та многобога́тное храни́лище;
ра́дуйся, благоутро́бия Христо́ва вмести́лище.

Радуйся, Псалти́ри Дави́довы пе́ние;
ра́дуйся, свята́го Арсе́ния умоле́ние.

Радуйся, гре́шники исправля́яй и ободря́яй;
ра́дуйся, ми́лование у Богоро́дицы испроша́яй.

Радуйся, главо́ подви́жников венцено́сная;
ра́дуйся, се́не стра́ждущим росоно́сная.

Радуйся, же́зле тве́рдый претыка́ющимся;
ра́дуйся, еле́е ми́лости изъязвле́нным.

Радуйся, ка́ющимся сто́лпе и укрепле́ние;
ра́дуйся, утружде́нным ти́хостное упокое́ние.

Радуйся, преподобне Паисие, ди́вный народа Бо́жия уте́шителю.

Кондак 8

Стра́нен быв в ми́ре, Паи́сие, Го́спода возлюби́в и стра́сти твоя́ укроти́в Бо́жиею благода́тию, ны́не же я́ко зарни́ца облистава́еши о тебе́ вопию́щих немо́лчное: Аллилу́иа.

Икос 8

Всяк к тебе́ притека́яй, о́тче Паи́сие, ско́ро утеше́ние обрета́ше и прося́й благода́ти дарова́ние приима́ше. Сего́ ра́ди и мы сия́ восклица́ем ти:

Радуйся, лучено́сная омраче́нным звездо́;
ра́дуйся, ка́ющихся наста́вниче и главо́.

Радуйся, афо́нския бра́тии тяготы́ взе́мляй;
ра́дуйся, Всенепоро́чныя са́да благослове́ние прие́мляй.

Радуйся, о благосты́ни Христо́ве сладковеща́ние;
ра́дуйся, моли́твы у́мныя мироуха́ние.

Радуйся, вселе́нней Спаси́теля провозвеща́яй;
ра́дуйся, песнь Арха́нгелову ко Пресвяте́й воспева́яй.

Радуйся, наде́жды, ми́лости и любве́ пламеню;
ра́дуйся, сострада́тельное омове́ние во вра́жией бра́ни.

Радуйся, еле́ом да́ра проро́ческаго пома́занный;
ра́дуйся, благоутро́бием Отцу́ Небе́сному уподо́бивыйся.

Радуйся, преподо́бне Паи́сие, ди́вный наро́да Бо́жия уте́шителю.

Кондак 9

Вся́кому вне́млющему пропове́дал еси́ сло́во, апо́столом уподобля́яся, раче́нием же Боже́ственным и любо́вию к бли́жним просия́л еси́ на земли́ я́ко со́лнце, прославля́я Святу́ю Тро́ицу: Аллилу́иа.

Икос 9

Вити́йство су́етное ми́ра сего́ презре́л еси́, о́тче, слез пото́ки от души́ мироточа́, се́рдцем о челове́цех, стра́ждущих душе́ю и те́лом, боле́знуя. Сего́ ра́ди и мы ны́не от душ на́ших песнопе́ния ти возсыла́ем, в смире́нии вопию́ще приле́жно:

Радуйся, Ева́нгелия служи́телю неутоми́мый;
ра́дуйся, Трисо́лнечнаго Божества́ светоприе́мниче неугаси́мый.

Радуйся, по́стничества риста́лище соверши́вый;
ра́дуйся, смире́нием кра́йним ины́х предвари́вый.

Радуйся, во Афо́нской Горе́ ве́ры сия́ние;
ра́дуйся, Всесвяты́я сла́дкое воспева́ние.

Радуйся, учи́телю сла́вный дея́ния же и зре́ния;
ра́дуйся, постиги́й велему́дре боже́ственная виде́ния.

Радуйся, Пречи́стыя вертогра́да неосла́бный земледе́льче;
ра́дуйся, святы́м Лукиллиа́ну, Пантелеи́мону и Евфи́мии собесе́дниче.

Радуйся, глас Богоотрокови́цы слу́хом услы́шавый;
ра́дуйся, Ту, а́ки на Иерусали́мской ико́не, я́ве узре́вый.

Радуйся, преподо́бне Паи́сие, ди́вный наро́да Бо́жия уте́шителю.

Кондак 10

Спасе́ния сооте́чественником всем се́рдцем жела́я, Паи́сие свя́те, вели́чествие и те́плый засту́пник Каппадоки́и со Елла́дою яви́лся еси́, доброде́телей бо ле́ствицу богоуго́дно соверши́, ко Тро́ице Святе́й непреста́нно поя́: Аллилу́иа.

Икос 10

Стена еси́ верным, о́тче Паи́сие, а́нгельское бо житие́ возлюби́в, по́двиги свои́ми неотсту́пнаго предстоя́ния Святе́й Тро́ице дости́же. Сего́ ра́ди пе́ния благода́рственная возсыла́юще из глубины́ серде́ц и душ на́ших, смире́нно ти возглаша́ем:

Радуйся, свещено́сче Афо́нский, богоявле́нно миру сия́яй;
ра́дуйся, краснопе́снивый гла́се, Бо́жие Сло́во провозвеща́яй.

Радуйся, многоча́дне, челове́ческая боле́ния исцеляяй;
ра́дуйся, добропло́дне, заблу́ждших стези́ исправля́яй.

Радуйся, яко змие́в главы́ моли́твою сокруша́еши;
ра́дуйся, я́ко и зра́ком твои́м ны утеша́еши.

Радуйся, Неневе́стней Неве́сте ра́дование приноша́яй;
ра́дуйся, к Ца́рствию Небе́сному путь углажда́яй.

Радуйся, фимиа́м Ду́ха Бо́жия нарече́нный;
ра́дуйся, ско́ро приводя́й к серде́чному умиле́нию.

Радуйся, моли́твы Иису́совы и среди́ ми́ра де́лателю неуста́нный;
ра́дуйся, Бо́жия Ма́тере уго́дниче благода́рный.

Радуйся, преподо́бне Паи́сие, ди́вный наро́да Бо́жия уте́шителю.

Кондак 11

Пе́ние Зижди́телю и Присноде́ве с по́двиги мно́гими я́же в нощи́ и во дни́ соплета́ше смире́нно, свя́те, Бо́жия Духа сосу́д себе показу́я. Мы же, Тро́ице Святе́й припа́дающе, тебе ра́ди пое́м и вопие́м: Аллилу́иа.

Икос 11

Свет и мироуха́ние благоче́стия, любве́, самоотверже́ния неисче́тнаго и исцеле́ний явля́ет свята́я па́мять твоя, богонра́вне. Сего́ ра́ди потща́хомся вси моле́бными гла́сы тебе возопи́ти:

Радуйся, указу́яй всем ве́рным путь на Небеса́;
ра́дуйся, я́ко ра́дости исполня́ют медото́чная твоя словеса́.

Радуйся, изоби́льная от Афона реко́, чудесы́ искипа́ющая;
ра́дуйся, светоно́сная от Елла́ды звездо́, ве́рным путь озаря́ющая.

Радуйся, при́сное за ны к Богоотрокови́це хода́тайство;
ра́дуйся, а́нгельскому житию́ прилежа́щим предста́тельство.

Радуйся, доброде́телей плодоно́снейшая лозо́;
ра́дуйся, о ми́ре к Престолу достига́ющая слезо́.

Радуйся, новый апо́столе, к вере Христо́ве вся призыва́яй;
ра́дуйся, Правосла́вия гла́се, мно́зи возсозида́яй.

Радуйся, дре́во всепло́дное, Ма́терию Небе́сною напоя́емое;
ра́дуйся, ве́рных зна́мя, в подсо́лнечней распростира́емое.

Радуйся, преподо́бне Паи́сие, ди́вный наро́да Бо́жия уте́шителю.

Кондак 12

Благода́ти Божия исто́чник тя позна́хом, отче, по успе́нии твое́м, в не́мже ли́цы А́нгельстии весе́лия исполня́хуся. Те́мже и мы, печа́льника о спасе́нии на́шем улучи́ти сподо́бльшиися, ра́дуемся, взыва́юще: Аллилу́иа.

Икос 12

Пою́ще бе́здну чуде́с твои́х и терпели́вныя твоя́ по́двиги, свя́те, от серде́ц ти сплета́ем а́нгельская песнопе́ния, па́мять твою́ почита́ем благогове́йно и вопие́м такова́я:

Ра́дуйся, наде́жды оте́чествию забве́нному пропове́дниче;
ра́дуйся, го́рняго со святы́ми купножи́тельства ве́стниче.

Ра́дуйся, изгна́нным от стран свои́х сла́вный уде́л прознаменова́вый;
ра́дуйся, к черто́гом Небе́сным восхожде́ние мно́гим указа́вый.

Ра́дуйся, плене́нных о́тчин прореки́й обновле́ние;
ра́дуйся, до́льняя то́кмо му́дрствующим вразумле́ние.

Ра́дуйся, разуме́ния зна́мений време́н имы́й благослове́ние;
ра́дуйся, ми́ру блиста́ние, ве́ры немо́лчное возглаше́ние.

Ра́дуйся, а́ввы Ти́хона Ру́сскаго до́брый учениче́ и послу́шниче;
ра́дуйся, трапе́зы А́гнчи присноживо́тныя прича́стниче.

Ра́дуйся, апо́стольски явле́й обетова́ния;
ра́дуйся, Христо́ва све́та златоза́рное сия́ние.

Ра́дуйся, преподо́бне Паи́сие, ди́вный наро́да Бо́жия уте́шителю.

Кондак 13

О преподо́бне о́тче Паи́сие, но́вый цве́те благоуха́нный, во времена́ после́дняя израсты́й, умоли́ Христа́ Бо́га спасти́ся душа́м о тебе́ воспева́ющих: Аллилу́иа.

[Се́й конда́к глаго́лется три́жды.]

Икос 1

А́нгелом подража́тель показа́лся еси́ во уде́ле Богоро́дицы избра́ннем, и нам хода́тай тепле́йший пред Бо́гом, Паи́сие о́тче, те́мже та́ко тя ублажа́ем:

Радуйся, свята́го Арсе́ния похвале́ние;
ра́дуйся, Афо́на великоиме́нное благоле́пие.

Радуйся, вы́шняго жи́тельства о́бразе;
ра́дуйся, Аси́и Ма́лыя о́трасле.

Радуйся, в фарасио́тех приснопева́емый;
ра́дуйся, и́нокующих пра́вило.

Радуйся, ве́ры Правосла́вныя ве́лий храни́телю;
ра́дуйся, церко́вных ове́ц просвети́телю.

Радуйся, Каппадоки́и боже́ственная розго́;
ра́дуйся, Елла́ды доброво́нное ми́ро.

Радуйся, земны́й а́нгеле, ве́стниче на земли́;
ра́дуйся, челове́че Небе́сный, пребыва́яй на Небеси́.

Радуйся, преподо́бне Паи́сие, ди́вный народа Бо́жия уте́шителю.

Кондак 1

Избра́ннаго подви́жника и сосу́да арома́тов благоуха́нных, Каппадоки́йское прозябе́ние и Афо́нския Панагу́ды все́льника, неусы́пнаго о нас предста́теля, воспои́м согла́сно. А́нгельскому бо житию́ подража́я, Тро́ице Святе́й благоугоди́л еси́, те́мже зове́м ти́: ра́дуйся, преподо́бне Паи́сие, ди́вный народа Бо́жия уте́шителю.

Моли́тва

О пречу́дное и благоуха́нное Святы́я Горы Афо́нския процвете́ние и люде́й правосла́вных утеше́ние, преподо́бне о́тче Паи́сие!

Ты, прия́в свято́е Креще́ние от руку́ преподо́бнаго Арсе́ния, и́стинным подража́телем того́ любве́ и подвиго́в яви́лся еси́. Во младе́нстве от Фара́с до страны́ Елла́дския путеше́ствовавый, до кончи́ны твоея́ по́двиг духо́внаго стра́нничества сохрани́л еси́, ни к чесому́ су́етному не прилепля́яся. От ю́ности пост, моли́тву, духо́вное чте́ние и бде́ние возлюби́вый, кра́йния по́двиги духо́вныя в житии́ и́ночестем яви́л еси́. В чи́не во́инстем досто́йне Оте́чествию своему́ послужи́вый и сме́рти на по́ли бра́ни не убоя́выйся, во́инству Царя Небе́снаго вчини́лся еси, тве́рдо и небоя́зненно путе́м спасе́ния и духо́внаго возраста́ния сле́дуя.

Еще́ о́трок сый, моли́твою кре́пкою бе́са неве́рия и сомне́ния посрами́вый и преди́внаго виде́ния Спаси́теля сподо́бивыйся, по́слежде дар заблу́ждшия души́ врачева́ти стяжа́л еси́.

Мно́гия ско́рби и тя́жкия боле́зни во вся́цем терпе́нии понесы́й, всем притека́вшим к тебе́ му́дрое назида́ние и ди́вное врачева́ние преподава́л еси́. Сло́во бо твое́ бысть жи́во и де́йственно ко вразумле́нию и утеше́нию.

Сего́ ра́ди мо́лим тя, всеблаже́нне о́тче Паи́сие! Пода́ждь и ны́не твои́ми благоприя́тными к Бо́гу моли́твами душа́м на́шим стра́ждущим утеше́ние и ко и́стинному покая́нию наставле́ние, в моли́тве и труде́х терпе́ние, мир и любо́вь нелицеме́рную, и во всем бо́дренное, ра́достное во Христе́ жи́тельство. Тя́жкия ра́ны стра́ждущих ди́вным пома́занием благода́ти Боже́ственныя исцели́, да ми́лостию Бо́жиею возста́нут и потру́дятся во сла́ву и́мене Пресвяты́я Тро́ицы. Стране́ на́шей ми́р, благоде́нствие и умноже́ние ве́ры испроси́, да вы́ну сла́вят лю́дие правосла́внии Бо́га и Пречи́стую Богоро́дицу, твои́ми и всех святы́х моли́твами! Ами́нь.