Православный Мир
Житие
Даты
15 июля
Песнопения
Тропарь, глас 8
Богоро́дице Присноде́во, челове́ков покро́ве,
ри́зу и по́яс пречи́стаго Твоего́ телесе́,
держа́вное гра́ду Твоему́ обложе́ние дарова́ла еси́,
безсе́менным рождество́м Твои́м нетле́нна пребыва́ющи:
о Тебе́ бо и естество́ обновля́ется и вре́мя.
Те́мже мо́лим Тя мир гра́ду Твоему́ дарова́ти,
и душа́м на́шим ве́лию ми́лость.
Кондак, глас 4
Одея́ние всем ве́рным нетле́ния, Богоблагода́тная Чи́стая, дарова́ла еси́,
свяще́нную ри́зу Твою́,
е́юже свяще́нное те́ло Твое́ покрыва́ла еси́,
покро́ве всех челове́ков,
ея́же положе́ние пра́зднуем любо́вию,
и вопие́м со стра́хом Ти́, Чи́стая:
ра́дуйся, Де́во, христиа́н похвало́.
Величание
Велича́ем Тя,
Пресвята́я Де́во,
Богоизбра́нная Отрокови́це,
и чтим святы́я ри́зы Твоея́
честно́е положе́ние.
Канон
Канон на положение Честной ризы Пресвятой Богородицы во Влахерне
Минея, 2 Июля.
Глас 4
Песнь 1
Ирмос: Триста́ты кре́пкия,
Рожде́йся от Де́вы,
безстра́стия во глубине́
души́ трича́стное потопи́, молю́ся,
да Тебе́, я́ко в тимпа́не,
во умерщвле́нии телесе́
побе́дное воспою́ пе́ние.
Припев: Пресвята́я Богоро́дице, спаси́ на́с.
Ри́зу Твою́ честну́ю, Богоро́дице Де́во,
чту́щим Тя лю́дем дарова́ла еси́ при́сно, свяще́нное огражде́ние,
вся́кое сопроти́вных обстоя́ние всегда́ побежда́ющи си́лою духо́вною.
Припев: Пресвята́я Богоро́дице, спаси́ на́с.
Пло́тию нас ра́ди от чи́стых Твои́х крове́й я́вльшагося на земли́
ри́зу свяще́нную осяза́нием освяти́ла еси́ и телесе́ Твоего́ прикоснове́нием,
ея́же ра́ди вся рабы́ Твоя́ освяща́еши, Де́во, пою́щия Тя.
Сла́ва Отцу́ и Сы́ну и Свято́му Ду́ху.
Сокро́вище честно́е ве́рно Тя чту́щим дарова́ла еси́, Блага́я Де́во,
вои́стинну честну́ю ри́зу Твою́,
вся обогаща́ющи да́ры Боже́ственнаго Ду́ха и чуде́с мно́гими дея́нии.
И ны́не и при́сно и во ве́ки веко́в. Ами́нь.
Нескве́рная А́гнице, А́гнца ро́ждшая Бо́жия па́че естества́,
дарова́ла еси́ нам честну́ю ри́зу Твою́,
скве́рны и́стинно и вра́ски очища́ющую всегда́ покланя́ющихся ей, Всенепоро́чная.
Песнь 3
Ирмос: Я́ко непло́ды роди́ от язы́к Це́рковь,
и мно́гое в ча́дех изнемо́же со́нмище,
чу́дному Бо́гу на́шему возопии́м:
Свят еси́, Го́споди.
Припев: Пресвята́я Богоро́дице, спаси́ на́с.
Кра́сное освяще́ние, Небе́сную дверь, Бо́жию Ма́терь воспое́м
и Тоя́ ри́зу, Боже́ственная точа́щу дарова́ния, ю́же любо́вию целу́ем.
Припев: Пресвята́я Богоро́дице, спаси́ на́с.
Нетле́ния оде́ждею тле́нием обна́жшияся,
Твои́м нетле́нным рождество́м всех оде́яла еси́, Чи́стая,
и́мже честну́ю ри́зу Твою́ дарова́ла еси́, бога́тство неотъе́млемо.
Сла́ва Отцу́ и Сы́ну и Свято́му Ду́ху.
И́же о́блаки, Чи́стая, одева́ющаго все не́бо
ри́зою Твое́ю обвила́ еси́, Пречи́стая,
е́йже покланя́ющеся, ве́рно Тя сла́вим, покро́ве душ на́ших.
И ны́не и при́сно и во ве́ки веко́в. Ами́нь.
Врачева́ние безме́здно боля́щим есть Боже́ственный сей храм:
ри́зу бо Твою́, Чи́стая, исто́чник, непреста́нно точа́щий исцеле́ния, стяжа́, Пренепоро́чная.
Седален, глас 4
Чуде́с ре́ки, Богоро́дице, от всечестны́я Твоея́ ра́ки происходя́щия,
я́ко из Еде́ма, напая́ют лице́ земли́,
благода́ти пролива́ющия ве́рно Тя чту́щим,
те́мже Тя воспева́ем, и ве́рно восхваля́ем, и благода́рно всегда́ взыва́ем:
ра́дуйся, еди́на Наде́жде пою́щих Тя.
Песнь 4
Ирмос: Любве́ ра́ди, Ще́дре, Твоего́ о́браза
на Кресте́ Твое́м стал еси́,
и раста́яшася язы́цы:
Ты бо еси́, Человеколю́бче,
кре́пость моя́ и хвале́ние.
Припев: Пресвята́я Богоро́дице, спаси́ на́с.
Возвели́чим еди́ну Благослове́нную
и Тоя́ ри́зе прико́снемся ве́рою,
я́ко да почерпе́м благода́ть духо́вную.
Припев: Пресвята́я Богоро́дице, спаси́ на́с.
Я́ко многоце́нное сокро́вище, стяжа́в Тебе́ чту́щий град
ри́зу Твою́, Отрокови́це,
ве́рою облобыза́ет и благода́ть прие́млет.
Сла́ва Отцу́ и Сы́ну и Свято́му Ду́ху.
Ри́зу Твою́, я́ко точа́щую нетле́ние,
оде́жду же сла́вы бы́вшую, всем песносло́вящим Тя,
почита́ем, Всенепоро́чная.
И ны́не и при́сно и во ве́ки веко́в. Ами́нь.
Всенепоро́чная и еди́на благослове́нная,
Херуви́м святе́йши я́вльшися,
ду́ши нас спаси́ от вся́каго обстоя́ния, ве́рою чту́щих Тя.
Песнь 5
Ирмос: Ты, Го́споди, мой Свет,
в мир прише́л еси́,
Свет Святы́й, обраща́яй из мра́чна неве́дения
ве́рою воспева́ющия Тя.
Припев: Пресвята́я Богоро́дице, спаси́ на́с.
Ты, Влады́чице Чи́стая,
нам, Твои́м рабо́м, дарова́ла еси́ утвержде́ние ри́зу,
и честны́й Твой по́яс, и Боже́ственное огражде́ние.
Припев: Пресвята́я Богоро́дице, спаси́ на́с.
Рай красе́н, благово́ние Ду́ха, Пречи́стая, испуща́яй,
храм, держа́щий Твою́ ри́зу, показа́ся.
Сла́ва Отцу́ и Сы́ну и Свято́му Ду́ху.
Освяти́ на́ша ду́ши и телеса́,
ве́рою святу́ю Твою́, Пресвята́я, ри́зу почита́ющих, я́ко прече́стну.
И ны́не и при́сно и во ве́ки веко́в. Ами́нь.
Хра́мы ны Бо́жия в Тя Все́льшагося покажи́, Богоро́дице,
в Боже́ственнем хра́ме Твое́м ве́рно Тя блажа́щия.
Песнь 6
Ирмос: Возопи́, прообразу́я погребе́ние тридне́вное,
проро́к Ио́на, в ки́те моля́ся:
от тли изба́ви мя, Иису́се, Царю́ сил.
Припев: Пресвята́я Богоро́дице, спаси́ на́с.
Показа́ла еси́ все́ми Ца́рствующему гра́ду, ро́ждшая Царя́ всех и Го́спода,
я́ко неруши́мую сте́ну, честну́ю и святу́ю ри́зу Твою́.
Припев: Пресвята́я Богоро́дице, спаси́ на́с.
Ра́дующеся, Де́вы благода́ть просла́вим, и Сея́ пресвяту́ю ри́зу почти́м:
из нея́же вся́ко здра́вие немощны́м непреста́нно происхо́дит.
Сла́ва Отцу́ и Сы́ну и Свято́му Ду́ху.
Вод Тя животеку́щий исто́чник ве́мы, Богоро́дице,
и почита́ем Боже́ственную ри́зу Твою́,
от нея́же исцеле́ние всегда́, ве́рнии, почерпа́ем.
И ны́не и при́сно и во ве́ки веко́в. Ами́нь.
Госпо́дь, с Тобо́ю, Богоро́дице, бы́вый,
челове́ческое Себе́ присво́ил существо́
и всяк вред чужда́го от него́ изгна́л есть.
Кондак, глас 4
Одея́ние всем ве́рным нетле́ния, Богоблагода́тная Чи́стая, дарова́ла еси́,
свяще́нную ри́зу Твою́,
е́юже свяще́нное те́ло Твое́ покрыва́ла еси́,
покро́ве всех челове́ков,
ея́же положе́ние пра́зднуем любо́вию
и вопие́м со стра́хом Ти, Чи́стая:
ра́дуйся, Де́во, христиа́н похвало́.
Икос
Чи́стое одея́ние и ски́нию Бо́жия Сло́ва,
одушевле́нный о́блак и ста́мну ма́нны, Богоро́дицу Мари́ю
вси, спа́сшиися Рождество́м Ея́, ве́рою ублажи́м
и честне́й ри́зе прико́снемся,
е́юже Влады́ку объе́мши, я́ко Отроча́ носи́ла есть, в плоть обо́лкшагося,
Его́же ра́ди челове́ческое естество́ взя́тся к превысоча́йшей жи́зни и Ца́рствию.
Те́мже с ра́достию вопие́м велегла́сно:
ра́дуйся, Де́во, христиа́н похвало́.
Песнь 7
Ирмос: Авраа́мстии иногда́ в Вавило́не о́троцы
пе́щный пла́мень попра́ша,
пе́сньми взыва́юще:
оте́ц на́ших Бо́же, благослове́н еси́.
Припев: Пресвята́я Богоро́дице, спаси́ на́с.
Высо́ким ра́зумом и смире́нным се́рдцем Царе́в превысо́кий престо́л просла́вим,
Всесвяту́ю Отрокови́цу обра́дованную.
Припев: Пресвята́я Богоро́дице, спаси́ на́с.
Черто́г Бо́жий избра́нный,
в честне́м Твое́м сем черто́зе лежа́щую ри́зу Твою́ ве́рою почита́ем,
я́ко киво́т свят и благочести́вых покро́в.
Сла́ва Отцу́ и Сы́ну и Свято́му Ду́ху.
Обновля́ется всяк, приступа́яй ве́рою и святы́й облобыза́яй ковче́г,
держа́щий Твою́, Чи́стая Де́во, светови́дную ри́зу.
И ны́не и при́сно и во ве́ки веко́в. Ами́нь.
Богороди́тельнице Чи́стая,
чту́щий Тя град от гла́да, тру́са же и озлобле́ния вся́каго спаса́й,
и язы́ческаго нахожде́ния, и сопроти́внаго вре́да.
Песнь 8
Ирмос: Изба́вителю всех, Всеси́льне,
посреде́ пла́мене благоче́ствовавшия,
снизше́д, ороси́л еси́
и научи́л еси́ пе́ти:
вся дела́, благослови́те, по́йте Го́спода.
Припев: Пресвята́я Богоро́дице, спаси́ на́с.
Благода́рными гла́сы воспева́ем Тя, всех до́брых нам Хода́таицу,
и честну́ю ри́зу Твою́ облобыза́юще, Отрокови́це, взыва́ем:
благослови́те, вся дела́ Госпо́дня, Го́спода.
Припев: Пресвята́я Богоро́дице, спаси́ на́с.
Я́ко мы́сленную свещу́ иму́ще, на све́щнице трапе́зы предлежа́щую,
свяще́нную оде́жду Пречи́стыя Де́вы, серде́чныя просвеща́ем зе́ницы всегда́.
Сла́ва Отцу́ и Сы́ну и Свято́му Ду́ху.
Ника́коже безча́стны оста́вила еси́
свяще́ннаго Твоего́, Де́во, прикоснове́ния недосто́йныя рабы́ Твоя́:
вме́сто бо те́ла Твоего́ живоно́снаго ри́зу Твою́ всем дарова́ла еси́.
И ны́не и при́сно и во ве́ки веко́в. Ами́нь.
Пе́сньми Боже́ственными почти́м Бо́жие селе́ние простра́нное,
в ма́терех Пречи́стую, Небе́сную дверь,
е́юже заключи́ся к сме́рти дверь веду́щая.
Песнь 9
Ирмос: Е́ва у́бо неду́гом преслуша́ния
кля́тву всели́ла есть;
Ты же, Де́во Богоро́дице,
прозябе́нием чревоноше́ния ми́рови Благослове́ние процвела́ еси́.
Тем Тя вси велича́ем.
Припев: Пресвята́я Богоро́дице, спаси́ на́с.
Се Тя, одр Соломо́нов, почита́ем ра́достными пе́сньми,
и честну́ю Твою́ ри́зу, я́ко други́й киво́т свяще́ния, окружи́вше,
исцеле́ния прие́млем спаси́тельная, Присноде́во.
Припев: Пресвята́я Богоро́дице, спаси́ на́с.
Яви́ся ны́не Боже́ственная Твоя́ ра́ка, содержа́щая ри́зу Твою́ честну́ю,
я́коже исто́чник све́та, Де́во,
лучи́ исцеле́ний испуща́ющи и тьму неду́гов отгоня́щи,
ю́же с любо́вию целу́ем.
Припев: Пресвята́я Богоро́дице, спаси́ на́с.
Днесь сра́дуются нам, Всенепоро́чная, покланя́нием ри́зы Твоея́ вся Небе́сныя си́лы,
апо́столи, проро́цы и му́ченицы, преподо́бнии и пра́веднии вси,
Влады́чице еди́на Присноде́во.
Сла́ва Отцу́ и Сы́ну и Свято́му Ду́ху.
Освяти́ся вся земля́, всесвято́е Влады́чне поко́ище, положе́нием ри́зы Твоея́,
и Дави́д ра́дуется дре́вле положе́нием киво́та, прообразу́ющаго Тя, Присноде́во.
И ны́не и при́сно и во ве́ки веко́в. Ами́нь.
Све́тло одея́ние Твою́ ри́зу дарова́ла еси́ и огражде́ние
Тя чту́щему Ца́рствующему гра́ду всех градо́в,
я́ко Цари́ца всех тва́рей су́щи, Богороди́тельнице Ма́ти Де́во.
Светилен
Окрили́вшую Христа́
ри́зу Богоотрокови́цы и Богоро́дицы Мари́и,
днесь прииди́те, земноро́днии, почти́м пе́сньми,
я́ко да благода́тию Сея́ при́сно ублажа́емся.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Еди́на и естество́ и вре́мя обнови́ла еси́, Богома́ти:
нетле́нно бо Твое́ рождество́, нетле́нная и ри́за,
е́юже град Твой покрыва́еши
и е́юже ски́петры благоче́стия содержи́ши.
Акафист
Акафист Положению честной Ризы Пресвятой Богородицы
Кондак 1
Взбра́нной Воево́де, Цари́це небесе́ и земли́, дарова́вшей нам благода́ть и си́лу честны́я Ри́зы Ея́ положе́ния па́мять твори́ти, благода́рственное прино́сим пе́ние, я́ко от бед и напа́стей нас покрыва́ющей: не отве́ржи нас от Лица́ Твоего́, Милосе́рдная Ма́ти, но приими́ нас, с любо́вию вопию́щих Тебе́: Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Икос 1
А́нгельский глас прии́де во слух святы́я Анны, известву́ющ: ты зачне́ши и роди́ши дщерь Преблагослове́нную Мари́ю, от Нея́же благословя́тся вся племена́ земна́я, и прии́дет спасе́ние ми́ру всему́. Сие́ ве́дуще, возопии́м Богоро́дице благода́рственне:
Ра́дуйся, Бога Отца́ Безнача́льнаго предве́чное благоволе́ние;
ра́дуйся, Бо́га Сы́на Безле́тнаго пречи́стое вмести́лище.
Ра́дуйся, Бога Ду́ха Всесвята́го избра́нное жили́ще;
ра́дуйся, ко Пресвяте́й Тро́ице немо́лчная моли́твеннице.
Ра́дуйся, го́рних чино́в А́нгельских непрестаю́щее удивле́ние;
ра́дуйся, те́мных сил а́дских всегро́зное устраше́ние.
Ра́дуйся, Ю́же на возду́се срета́ют многоочи́тии Херуви́ми;
ра́дуйся, Е́йже похва́льная воспису́ют шестокрила́тии Серафи́ми.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 2
Ви́девше святы́я Твоя́ роди́тели Иоаки́м и А́нна, я́ко ты, Пречи́стая, плод благослове́нный бу́деши, возблагодари́ша Бо́га и пред две́рьми хра́ма да́ша обе́т посвяти́ти Тя Го́сподеви, да навы́кнеши пе́ти Ему́: Аллилу́иа.
Икос 2
Ра́зум соверше́нный стяжа́ла еси́, Богоро́дице, воспита́вшися во Свята́я Святы́х. Сего́ ра́ди не престае́ши умудря́ти и просвеща́ти све́том богоразу́мия и вся христиа́ны, вопию́щия Ти такова́я:
Ра́дуйся, премилосе́рдая Уте́шительнице всех скорбя́щих и обремене́нных;
ра́дуйся, неусыпа́ющая Наста́внице всех заблу́ждших и ослепле́нных.
Ра́дуйся, пра́ведно дви́жимый на ны гнев Божий Твоим моле́нием ско́ро утоля́ющая;
ра́дуйся, злы́я стра́сти на́ша всемо́щным манове́нием укроща́ющая.
Ра́дуйся, кре́пкое пробужде́ние спя́щих со́вестей;
ра́дуйся, нетру́дное преодоле́ние беззако́нных на́выков.
Ра́дуйся, Ея́же ра́ди ад стене́т и ду́хи зло́бы трепе́щут;
ра́дуйся, Ея́же ра́ди врата́ рая́ нам отверза́ются.
Ра́дуйся, Богоро́дице, Ри́зою Твое́ю от злых наве́тов нас покрыва́ющая.
Кондак 3
Си́ла Вы́шняго осени́ Тя, Благода́тная, егда́ Арха́нгел Гаврии́л благовествова́ше о безсе́меннем зача́тии в Тебе́ Сы́на Бо́жия, Спаси́теля ми́ру. Прия́вши сию́ благу́ю весть со смире́нием, я́ко раба́ Госпо́дня, возопи́ла еси́ Бо́гу: Аллилу́иа.
Икос 3
Иму́щи во утро́бе Христа́ Жизнода́вца, востекла́ еси́, Благослове́нная, ко ю́жице Твое́й. Егда́ же целова́ше Тя Елисаве́т, взыгра́ся младе́нец Иоа́нн во чре́ве ея́, и испо́лнися пра́ведная Ду́ха Свя́та, и просла́ви Тя, да и мы вопие́м Тебе́ такова́я:
Ра́дуйся, почита́ющих Тя верне́йшее огражде́ние;
ра́дуйся, христиа́н благосе́рдых неусы́пное поспеше́ние.
Ра́дуйся, святы́х алтаре́й изря́дное украше́ние;
ра́дуйся, святы́х оби́телей покро́в и снабде́ние.
Ра́дуйся, непобеди́мая Воево́до к Тебе́ прибега́ющих;
ра́дуйся, зерца́ло пра́вды судия́м немздоприи́мным.
Ра́дуйся, наста́вником и детоводи́телем соверше́нное вразумле́ние;
ра́дуйся, домо́м благочести́вым свы́шнее благослове́ние.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 4
Бу́ря недоуме́ния смуща́ет наш ум, ка́ко возмо́жем недосто́йными усты́ восхваля́ти Тя, Пресвята́я Де́во, за Твое́ вели́кое нам вспоможе́ние. Тем же, велича́юще неисче́тныя Твоя́ ми́лости, смиренному́дренно пое́м Вседержи́телю Бо́гу: Аллилу́иа.
Икос 4
Слы́шаша Вифлее́мстии па́стырие А́нгелы, пою́щия Христо́во Рождество́, теко́ша в верте́п и обрето́ша та́мо Богороди́тельницу, на рука́х держа́щую Преве́чнаго Младе́нца. С ни́ми в весе́лии духо́внем и мы Тебе́, я́ко о́бщей Ма́тери на́шей, глаго́лем та́ко:
Ра́дуйся, от Со́лнца мы́сленнаго озаре́нная;
ра́дуйся, и нас све́том незаходи́мым осиява́ющая.
Ра́дуйся, сия́нием пречи́стыя души́ Твоея́ всю зе́млю просвеща́ющая;
ра́дуйся, чистото́ю телесе́ Твоего небеса́ веселя́щая.
Ра́дуйся, ве́рных па́стырей Це́ркве бо́дрость и вразумле́ние;
ра́дуйся, богобоя́зненных и́ноков и и́нокинь му́дрость и наста́вление.
Ра́дуйся, ти́хость невозмуща́емая благогове́йных ста́рцев;
ра́дуйся, ра́дость та́инственная чи́стых дев и вдови́ц.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 5
Боготе́чная звезда́ явля́ешися, Цари́це Небе́сная, всем на Тя взира́ющим и непреста́нно во умиле́нии серде́чнем вопию́щим Бо́гу: Аллилу́иа.
Икос 5
Ви́дя Тя, во храм прише́дшую со Младе́нцем Иису́сом поста́вити Его́ пред Го́сподем, пра́ведный Симео́н рече́: «Тебе́ Само́й ду́шу про́йдет ору́жие», проразумева́я Ма́терняя Твоя́ страда́ния о Сы́не Твое́м Боже́ственнем. Мы же, на ты́я мы́сленно взира́юще, зове́м Ти:
Ра́дуйся, огнь Боже́ственный, Христа́, неопа́льно на руку́ Свое́ю держа́щая;
ра́дуйся, и нас, хла́дных, тем воспламеня́ющая.
Ра́дуйся, вои́нствующих на плоть целому́дрием изря́дное венча́ние;
ра́дуйся, подвиза́ющихся в посте́ и безмо́лвии при́сное собесе́дование.
Ра́дуйся, изнемога́ющих в уны́нии и печа́ли ско́рая Уте́шительнице;
ра́дуйся, благода́тнаго смире́ния и терпе́ния Подательнице.
Ра́дуйся, по вели́цей любви́ и милосе́рдию возде́ющая о нас ру́це к Бо́гу;
ра́дуйся, пред Не́юже врази́ на́ша, ви́димии и неви́димии, ста́ти не могут.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 6
Пропове́дницы Твоея́ Благода́тныя по́мощи суть вси Тобо́ю спасе́ннии, от грехо́в изба́вленнии, от неду́гов исцеле́ннии и благода́рственно о Тебе́ вопию́щии: Аллилу́иа.
Икос 6
Возсия́ Боже́ственный Свет во Еги́пте, и падо́ша та́мо и́доли, егда́ бежа́ла еси, Пречи́стая, с Богомладе́нцем Иису́сом, спаса́ющися от руки́ Иродовы. Ныне же озаря́еши светом богове́дения умы всех, пре́лестей ми́ра су́етнаго удаля́ющихся. Те́мже прино́сим Ти словеса́ сия́:
Ра́дуйся, Христа́, Бо́жию Си́лу и Бо́жию Прему́дрость ро́ждшая;
ра́дуйся, ослепле́нных му́дростию ве́ка сего́ на путь пра́вый наста́вльшая.
Ра́дуйся, во святы́х догма́тех правосла́вныя ве́ры Наста́внице;
ра́дуйся, нечести́вых ересе́й и раско́лов Искорени́тельнице.
Ра́дуйся, та́йная и неудо́бь предви́димая до́бре ве́дущая;
ра́дуйся, гада́ния лжи́вых прови́дцев посрамля́ющая.
Ра́дуйся, в час недоуме́ния благу́ю мысль на се́рдце полага́ющая;
ра́дуйся, па́губным начина́нием и безслове́сным пожела́нием воспяща́ющая.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 7
Хотя́щи николи́же отлуча́тися от Рожде́ннаго Тобо́ю Спаси́теля ми́ра, Ты, Богоблаже́нная, пребыва́ла еси́ с Ним неотлу́чно во гра́де Назаре́те, пита́ющи Его́ я́ко Челове́ка и пою́щи в се́рдцы Свое́м я́ко Бо́гу: Аллилу́иа.
Икос 7
Ско́рбию Ма́тернею объята была еси, Пречи́стая Де́во, егда́ три дни иска́ла еси́ двоюнадесятоле́тняго Сы́на Твоего́ Иису́са. Егда́ же обрела́ еси́ Его́ во хра́ме, в дому́ Отца́ Его́, возра́довася зело́. Таково́е Твое́ серде́чное боле́знование воспомина́юще и ра́достию Твое́ю ра́дующеся, со умиле́нием вопие́м Ти:
Ра́дуйся, Сы́на Твоего́, Преве́чнаго Архиере́я, в дому́ Отца́ Его́ обре́тшая;
ра́дуйся, омофо́р моли́тв Твои́х над всем ми́ром распростира́ющая.
Ра́дуйся, ми́лость и благода́ть сим в Це́ркви Правосла́вней явля́ющая;
Ра́дуйся, и нас, обнаже́нных дел благи́х, Своего́ Покро́ва не лиша́ющая.
Ра́дуйся, Сто́лпе о́блачный, от искуше́ний и собла́знов ми́ра сего́ нас отводя́й;
ра́дуйся, Сто́лпе о́гненный, посреде́ тьмы греха нам путь спасения показу́яй.
Ра́дуйся, явле́нных благочестия подвижников явное укрепление;
ра́дуйся, тайных среди мира рабов Божиих таинственное поуче́ние.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 8
Стра́нное и преди́вное есть Твое́, Богома́ти, попече́ние о христиа́нех на всех путе́х их жи́тельства, многомяте́жнаго и многотру́днаго. Иму́ще же Тя милосе́рдную и незави́стную Помо́щницу, вси Тобо́ю облагоде́тельствованнии велегла́сно пою́т Бо́гу: Аллилу́иа.
Икос 8
Все́ю душе́ю после́довала еси́ Христу́ при служе́нии Его́ ро́ду челове́ческому, я́коже и Боже́ственный евангели́ст Лука́ извествует о Тебе. Ве́руем, я́ко Ты, Всеблага́я Ма́ти, неотсту́пно пребыва́еши и со все́ми тружда́ющимися во сла́ву Бо́жию и Тя восхваля́ющими та́ко:
Ра́дуйся, Ковче́же Заве́та, в не́мже сокрове́но всего́ ро́да челове́ча освя́щение;
ра́дуйся, Ста́мно Пресвята́я, в не́йже а́лчущим пра́вды блюде́тся Хлеб жи́зни ве́чныя.
Ра́дуйся, Сосу́де Всезлаты́й, в не́мже угото́вася нас ра́ди Плоть и Кровь Боже́ственнаго А́гнца;
ра́дуйся, оста́вленных врачми́ на Свои́ всемо́щнеи ру́це прие́млющая.
Ра́дуйся, разсла́бленных от одра́ боле́зни воздвиза́ющая;
ра́дуйся, неду́гующим умо́м но́вый и лу́чший смысл подаю́щая.
Ра́дуйся, на стро́потнем пути́ греха́ нас прему́дре запина́ющая;
Ра́дуйся, же́стость нераска́янных серде́ц на́ших умягча́ющая.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 9
Всяк во́зраст ве́рных хва́лится Твои́м попече́нием, Всеми́лостивая Ма́ти, я́ко всегда́ потре́бное в житии́ да́руеши и усе́рдно за ны, немощны́я и гре́шныя, у Престо́ла Го́спода сла́вы хода́тайствуеши. Ему́же пое́м: Аллилу́иа.
Икос 9
Вети́и многовеща́ннии не мо́гут возглаго́лати Твоея́ Ма́терния печа́ли при Кресте́ Сына Твоего́. Те́мже, я́ко вся́кое искуше́ние претерпе́вшая, спострада́ти в са́мых тя́жцех ско́рбех и лише́ниих нам мо́жеши. Сего́ ра́ди взыва́ем Ти:
Ра́дуйся, от я́звы и всегуби́тельства сме́ртнаго нас соблюда́ющая;
ра́дуйся, от внеза́пнаго колеба́ния земли́ гра́ды и ве́си сохраня́ющая.
Ра́дуйся, от разлия́ния водна́го и потопле́ния руко́ю кре́пкою возводя́щая;
ра́дуйся, запале́ния о́гненнаго росо́ю моли́тв Твои́х избавля́ющая.
Ра́дуйся, Хле́бом жи́зни ду́ши на́ша насыща́ющая;
ра́дуйся, мо́лнии и гро́мы от глав на́ших отводя́щая.
Ра́дуйся, от наше́ствия иноплеме́нник и от вся́кия напа́сти спаса́ющая;
ра́дуйся, от вражды́ единокро́вных к ми́ру и любви́ возвраща́ющая.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 10
Спасти́ хотя́ мир, И́же всех Госпо́дь, на Кресте́ ви́ся, дарова́ Тя ми́ру всему́ Пресвяту́ю и Прему́друю Ма́терь, егда́ рече́ Тебе́ о святе́м Иоа́нне: «Се сын Твой», и возлю́бленному ученику́: «Се Ма́ти твоя́». Благода́ряще за сие́ Всеблага́го Бо́га, глаго́лем Ему́: Аллилу́иа.
Икос 10
Стена́ кре́пкая яви́лася еси́, Преблагослове́нная, правосла́вным христиа́ном, да́рующи всем благоде́нствие, мир и ра́дость, я́ко и Сама́ сия́ пе́рвее прия́т от Воскре́сшаго Христа́ Спаси́теля, слы́шавши от Него́ приве́тственный глас: «Ра́дуйся». Сего́ ра́ди и мы ублажа́ем Тя та́ко:
Ра́дуйся, чи́стых се́рдцем де́лателей благослове́нными плода́ми награжда́ющая;
ра́дуйся, пра́ведное воздая́ние всем пра́во ку́плю де́ющим.
Ра́дуйся, клятвопреступле́ний и непра́ведных стяжа́ний всенаро́дное обличе́ние;
ра́дуйся, бе́дствующим в пути́, на су́ше и на вода́х неча́емое вспоможе́ние.
Ра́дуйся, безча́дным роди́телем благоча́дие ве́рою да́рующая;
ра́дуйся, безма́терния сироты́ незри́мо воспиту́ющая.
Ра́дуйся, су́щих в плене́нии и изгна́нии кре́пкая Засту́пнице;
ра́дуйся, во у́зах и темни́цех седя́щих неусыпа́ющая Попечи́тельнице.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 11
Пе́ние на́ше смире́нное, от полноты́ любве́ и усе́рдия Тебе́ приноси́мое, не пре́зри, Богоневе́сто, и не отврати́ся от нас, гре́шных и недосто́йных, но помози́ нам от вся́кия скве́рны пло́ти и ду́ха очи́ститися, да возмо́жем досто́йно пе́ти Бо́гу: Аллилу́иа.
Икос 11
Све́т путеводя́щий была́ еси́ апо́столом, Богороди́тельнице, по Вознесе́нии Сы́на Твоего́ на Не́бо, и до сего́ дне свет благода́ти излива́еши от честны́я Ри́зы Твоея́ всем притека́ющим к ней и ча́ющим спасти́ся и в ра́зум и́стины приити́. Не лиши́ и нас, о Всеблага́я, Твоего́ свята́го води́тельства, в мо́ри жите́йстем обурева́емых, оба́че от се́рдца принося́щих Тебе́ благохвале́ния такова́я:
Ра́дуйся, даро́в духо́вных и теле́сных незави́стная Пода́тельнице;
ра́дуйся, полага́ющим нача́ло покая́ния ве́рная Предста́тельнице.
Ра́дуйся, борю́щимся со страстьми́ и прило́ги вра́жиими всегда́шняя Спобо́рнице;
ра́дуйся, жесто́ких и зверонра́вных незри́мое укроще́ние.
Ра́дуйся, благи́х супру́жеств честно́е соверше́ние;
ра́дуйся, ма́терей детородя́щих ско́рое и безболе́зненное разреше́ние.
Ра́дуйся, в час кончи́ны Еди́ная всем нам Помо́щнице;
ра́дуйся, Ея́же преблаго́му Покро́ву мы, земноро́днии, благода́рне поклоня́емся.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 12
Благода́ть Боже́ственную испроси́ нам у Сы́на Твоего́ и Бо́га, Всепе́тая Богоро́дице, простри́ ру́ку по́мощи, да не поги́бнем во гресе́х и лю́тых обстоя́ниих, находя́щих на ны от враг ви́димых и неви́димых, уми́ри на́ша сердца́, зло́бою и враждо́ю испо́лненная, да уте́шеннии Тобо́ю ра́достно воззове́м Бо́гу: Аллилу́иа.
Икос 12
Пою́ще благода́тное Твое́ Успе́ние, прославля́ем и ми́лость Твою́, Влады́чице, ю́же яви́ла еси́ Ри́зою Твое́ю честно́ю, завеща́вши ю по Успе́нии не́коей вдови́це, Тебе́ при жи́зни служи́вшей. И до ны́не покро́в Твой святы́й и благода́тная исцеле́ния явля́еши се́ю Ри́зою всем лю́дем, притека́ющим к Тебе́ и Тя прославля́ющим си́це:
Ра́дуйся, четвероча́стнаго го́да време́н благослове́ние;
ра́дуйся, четвери́цы стихи́й вещества́ освяще́ние.
Ра́дуйся, всей вселе́нней кре́пкое заступле́ние;
ра́дуйся, всех искуше́ний от ми́ра, пло́ти и диа́вола попра́ние.
Ра́дуйся, неча́емое примире́ние ожесточе́нно вражду́ющих;
ра́дуйся, недове́домое исправле́ние нераска́янных гре́шников.
Ра́дуйся, не отверга́ющая все́ми презре́нных и отверже́нных;
ра́дуйся, отча́янных от ро́ва поги́бели изхища́ющая.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 13
О, Всепе́тая Влады́чице ми́ра, приими́ сие́ ма́лое благодаре́ние, от всего́ се́рдца Тебе́ приноси́мое, и не попусти́ николи́же охладева́ти в благода́рнем сем чу́вствовании, но вразуми́ нас всегда́ по́мнити Твоя́ неисче́тныя ми́лости и со слеза́ми умиле́ния вопи́ти о Тебе́ Бо́гу: Аллилу́иа.
[Се́й конда́к глаго́лется три́жды.]
Икос 1
А́нгельский глас прии́де во слух святы́я Анны, известву́ющ: ты зачне́ши и роди́ши дщерь Преблагослове́нную Мари́ю, от Нея́же благословя́тся вся племена́ земна́я, и прии́дет спасе́ние ми́ру всему́. Сие́ ве́дуще, возопии́м Богоро́дице благода́рственне:
Ра́дуйся, Бога Отца́ Безнача́льнаго предве́чное благоволе́ние;
ра́дуйся, Бо́га Сы́на Безле́тнаго пречи́стое вмести́лище.
Ра́дуйся, Бога Ду́ха Всесвята́го избра́нное жили́ще;
ра́дуйся, ко Пресвяте́й Тро́ице немо́лчная моли́твеннице.
Ра́дуйся, го́рних чино́в А́нгельских непрестаю́щее удивле́ние;
ра́дуйся, те́мных сил а́дских всегро́зное устраше́ние.
Ра́дуйся, Ю́же на возду́се срета́ют многоочи́тии Херуви́ми;
ра́дуйся, Е́йже похва́льная воспису́ют шестокрила́тии Серафи́ми.
Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Кондак 1
Взбра́нной Воево́де, Цари́це небесе́ и земли́, дарова́вшей нам благода́ть и си́лу честны́я Ри́зы Ея́ положе́ния па́мять твори́ти, благода́рственное прино́сим пе́ние, я́ко от бед и напа́стей нас покрыва́ющей: не отве́ржи нас от Лица́ Твоего́, Милосе́рдная Ма́ти, но приими́ нас, с любо́вию вопию́щих Тебе́: Ра́дуйся, Богоро́дице Влады́чице, Ри́зою Твое́ю от злых наве́тов нас покрыва́ющая.
Молитва
О, Преблагослове́нная Де́во, Влады́чице Богоро́дице, зрим ны́не зало́г Твои́х ми́лостей к ро́ду христиа́нскому и све́тло пра́зднуем днесь честны́я Твоея́ Ри́зы положе́ние, я́ко благоволи́ла еси́ в сей Ри́зе яви́ти нам та́йну благода́тныя по́мощи и заступле́ния всем благогове́йно к Тебе́ прибега́ющим и сердца́ свои́ пред ико́ною Твое́ю в моли́тве излива́ющим.
Приими́, Всеблагомо́щная Влады́чице Богороди́тельнице, сия́ да́ры, Тебе́ Еди́ной прикла́дныя, от нас, недосто́йных раб Твои́х, от всех родо́в избра́нная, всех тва́рей небе́сных и земны́х вы́сшая я́вльшаяся. И ны́не, Всепе́тая Пресвята́я Богоро́дице, не преста́й моля́щися о нас, е́же изба́витися нам от вся́каго обстоя́ния и наве́та злых челове́к Ри́зою Твое́ю, и сохрани́тися нам неврежде́нным от вся́каго ядови́таго прило́га вра́жия си́лою моли́тв Твои́х, я́ко да Твои́м засту́плением и благода́тною по́мощию спаса́еми, сла́ву, хвалу́, благодаре́ние и поклоне́ние за вся в Тро́ице Еди́ному Бо́гу и всех Созда́телю возсыла́ем ны́не и при́сно и во ве́ки веко́в. Ами́нь.
