Преподобный Стефа́н Ма́хрищский

Прп. Стефан Махрищский, уроженец Киева, принял монашество в Киево-Печерском монастыре. Спасаясь от католических гонений, святой удалился в местечко Махрище (в 35 верстах от Троице-Сергиевой Лавры) и основал обитель в честь Св. Троицы. Из-за конфликтов с местными землевладельцами временно переселился под Вологду, где создал новую Троицкую обитель, но затем вернулся в Махрищу, ввел общежительный устав и подвизался до кончины в 1406 году. В 1550 году обретены его нетленные мощи, прославившиеся чудесами.

Краткое житие преподобного Стефана Махрищского

Друг и собеседник преподобного Сергия Радонежского. Родом из Киева. Принял монашество в Киево-Печерском монастыре. Вследствие усиления гонений на православных со стороны католиков, ища безмолвия, святой удалился в местечко Махрище (в 35 верстах от Троице-Сергиевой Лавры) и здесь не позднее 1358 г. по благословению святителя Алексия, митрополита Московского, основал обитель в честь Св. Троицы.

Ненависть соседних владельцев земли заставила преподобного Стефана удалиться на реку Авнежу, где в 60 верстах от Вологды святой основал другую обитель Св. Троицы.

Вернувшись в Махрищскую обитель, св. Стефан учредил в ней общежитие и подвизался до своей кончины, последовавшей в 1406 г.

В 1550 г. были обретены нетленные мощи преподобного, прославившиеся многими чудесами. Одно из них произошло, вероятно, в 1557 г., когда по молитве к преподобному произошло чудесное умножение хлеба на 2000 богомольцев, и остатков собрали столько, что братия питалась еще три месяца.

Полное житие преподобного Стефана Махрищского

Преподобный Стефан был современником и ближайшим собеседником преподобного Сергия Радонежского. Родился и воспитался он в Киеве, принял иночество в Печерской обители, где проводил жизнь в строгом воздержании, непрестанной молитве и полном послушании у старцев. Несколько лет святой Стефан прожил в Киево-Печерском монастыре, все более совершенствуясь в иноческих подвигах. Но мирное течение монашеской жизни в Киеве было нарушено подчинением южной части России князьям литовским, а затем – польскому королю. Католики усилили свое влияние и стали притеснять православных: отбирали у них храмы и устраивали в них костелы, не допускали православных до значительных должностей, бранили и даже избивали священников и монахов. Гонение на православие особенно усилилось в середине XIV века. В то время многие иноки в Киеве и его окрестностях покинули свои монастыри и уединились в безвестных дебрях и пустынях для подвигов поста и молитвы. Преподобный Стефан также ушел из Киево-Печерской Лавры и отправился на север, в православную Москву.

Святой Стефан прибыл в столицу Русского государства в княжение великого князя Иоанна II (1353–1359), сына Калиты и отца св. блгв. кн. Димитрия Донского (память 19 мая/1 июня), который предложил подвижнику избрать для жительства любой монастырь в Москве. Но святой Стефан решил поселиться в пустыне и отправился на северо-восток, где избрал себе место в лесном урочище Махрище, в 35-ти верстах от обители преподобного Сергия. Водрузив деревянный крест, подвижник срубил себе келлию, выкорчевал вокруг лес для возделывания земли и стал жить там, подвизаясь в посте, молитве и трудах. Когда о святом отшельнике стало известно в окрестностях, к нему начали приходить ревнители благочестия. Сначала преподобный Стефан, стремясь к безмолвию, не разрешал им поселиться около него, но затем уступил их просьбам. Не позднее 1358 года по благословению святителя Алексия, митрополита Московского († 1378; память 12/25 февраля), преподобный Стефан основал монастырь. Братия построили храм во имя Живоначальной Троицы, трапезную и келлии, которые обнесли оградой. Святитель Алексий рукоположил преподобного Стефана во иеромонаха и поставил игуменом новой обители.

Устроенная преподобным Стефаном обитель чрезвычайно распространилась, руководимая им по уставу общежития. Неленостно кроткими и тихими наставлениями поучал братию преподобный о путях спасения, о благочинии церковном и обязанностях инока, напоминая им слова Господни: «На кого воззрю, если не на кроткого и молчаливого и трепещущего Моих словес» (Ис.66,2). Еще более, чем словом, поучал игумен примером, ничем не отличаясь от братии в одежде и пище, облеченный в рубище, как бы один из последних, первенствуя только на молитве, ибо всех предупреждал в храме Божием и никому не уступал в трудах. Не только иноки, но и миряне стекались к нему из окрестностей для духовного совета, посещал для назидательной беседы и преподобный Сергий Радонежский, Лавра которого уже возникала по соседству, в сорока верстах от Махрищи. Но однажды пришел к преподобному Стефану великий сподвижник Сергий, утаив от него вину своего прихода – огорчение от братии, вынудившее его удалиться на время от своей обители. Узнав о пришествии преподобного Сергия, преподобный Стефан велел ударить в било церковное и встретил его со своей братией, ибо единодушны были оба труженика; единую волю творили они Господа своего и дружно возделывали духовную бразду, посевая в ней семя словесное. Встретившись, поклонились они взаимно до земли, прося друг у друга молитв и благословения, вместе вошли они в церковь для краткой молитвы. Несколько дней пробыл преподобный Сергий в Махрищской обители, обходя с ним пустыню и веселясь духовно о ее процветании. Наконец, открыл преподобный Сергий ему желание своего сердца: «Желал бы я, отче, с помощью Божией обрести себе место уединенное, где бы безмолвствовать. Прошу твою любовь даровать мне одного из учеников твоих, знающих пустынные места». Преподобный Стефан с любовью исполнил просьбу аввы Сергия и, отпустив с ним добродетельного ученика своего Симона, проводил его до источника, за три версты от обители. Позднее на месте расставания святых старцев, над источником, была поставлена часовня. Симон, обошедши с преподобным Сергием многие места пустынные, указал ему высокое прекрасное место на реке Киржачи. Оно полюбилось отшельнику Радонежскому, и там основал преподобный новую обитель во имя Благовещения Богоматери, где временно водворился, доколе братия первоначальной Лавры его не почувствовали горького лишения и разлуки с таким пастырем и не умолили его возвратиться, уже чрез посредство святителя Московского Алексия.

Вскоре и самого Стефана постигло такое же искушение от братии, и он последовал смиренному примеру собеседника своего, преподобного Сергия. Некто Григорий, живший недалеко от Троицкой обители, передал монастырю свою землю и другое имущество, принял монашество и стал усердным учеником игумена. Преподобный вскоре послал его к святителю Алексию, который рукоположил Григория во пресвитера и возвратил в обитель. Между тем присоединение к обители преподобного Стефана некоторых земель вызвало раздражение живших неподалеку четырех братьев Юрковских, опасавшихся, что их имение может отойти к монастырю. С целью заставить преподобного уйти из этих мест они грозили убить его. Никакие вразумления святого не помогали. Тогда преподобный Стефан, оставив вместо себя священноинока Илию, тайно оставил монастырь вместе с любимым учеником своим Григорием. В 60-ти верстах от Вологды, в древнем Авнежском княжестве, он основал Троицкую Авнежскую пустынь. Первым пострижеником обители стал местный землевладелец Константин Дмитриевич, который, желая подражать подвигам преподобного Стефана, одну часть своего имения раздал бедным, а другую пожертвовал новому монастырю и принял монашеский постриг с именем Кассиан (впоследствии пострадал вместе с преподобным Григорием в 1392 году; память их 15/28 июня). Со временем слава об Авнежских иноках дошла до Москвы. Благоверный великий князь Димитрий Иоаннович Донской, узнав о месте пребывания преподобного Стефана, вызвал его к себе, а в монастырь сделал богатый вклад богослужебными книгами и другими пожертвованиями. Преподобный Стефан, поручив паству свою преподобному Григорию, а келарную службу – преподобному Кассиану, пошел в царствующий град.

По дороге в Москву преподобный Стефан посетил Махрищскую обитель, где с радостью был встречен братией, умолявшей его не оставлять их более и возвратиться к ним из столицы.

Милостиво принял его там святитель Алексий, глубоко уважавший его добродетель, и любитель благолепия церковного великий князь, который снабдил Махрищскую обитель многими землями и льготами и велел преподобному Стефану опять в ней водвориться.

Будучи в Москве, преподобный обрел там будущего светильника Российской Церкви. Юноша-сирота Косма, сродник великокняжеского боярина и окольничего Тимофея Васильевича Вельяминова, славившегося богатством, мечтал быть иноком. Но его влиятельный родственник не соглашался отпустить его в монастырь. Узнав о святом Стефане, Косма пошел к нему и со слезами стал просить о помощи. Преподобный Стефан, провидя в юноше великого подвижника, постриг его в рясофор и преднарек ему имя Кирилл. Затем преподобный отвел Косму в Симонов монастырь, где преподобный Феодор (впоследствии архиепископ Ростовский, † 1394; память 28 ноября/11 декабря) постриг его в мантию. Это был преподобный Кирилл Белоезерский († 1427; память 9/22 июня).

Вернувшись в Махрищскую обитель, преподобный Стефан ввел в ней общежительный устав и в течение многих лет мирно и мудро управлял братией. По временам он приходил для беседы к великому чудотворцу Сергию.

Достигнув глубокой старости, преподобный Стефан передал игуменство старцу Илии и принял великую схиму. В скором времени, чувствуя приближение своей кончины, он созвал духовное стадо и в последний раз поучил братию подвигам духовным, страху Божию и непрестанной памяти смертной, любви нелицемерной, воздержанию и конечному отречению от мира. И причастившись Святых Христовых Таин, предал преподобный Стефан чистую свою душу Богу июля в 14-й день 1406 года. Благоухание святой его жизни повеяло от святых его мощей, свидетельствуя о благоприятном предстательстве его пред лицем Божиим. Со слезами братия погребли его в созданной им обители Живоначальной Троицы.

Много лет после преставления блаженного Стефана жил в его обители некто благоговейный старец инок Герман, уже столетний, днем и ночью предстоявший в молитвах Богу. Однажды ночью вышел он из своей келлии и увидел над гробом преподобного огонь. Ужаснулся старец и поспешил возвестить о том игумену Ионе, который увидел из окна своего тот же огонь, как бы луч света, сиявший от гробницы. Пришел в то время из Лавры преподобного Сергия игумен Арсений и, услышав о чудном явлении, духовно уразумел знамение благодати Божией. Он велел поставить над могилой гробницу, осенить ее покровом и пред нею возжечь неугасимую лампаду. С того времени возобновилось почитание святого, уже почти забытого, и было установлено ежегодное ему празднование.

В 1550 году при постройке нового каменного храма во имя Живоначальной Троицы мощи преподобного Стефана были обретены нетленными, но оставлены в новом храме под спудом. От кожаного параманда, найденного на персях мощей и вложенного в серебряный крест, последовали исцеления для прикасавшихся к нему с верою.

По молитвам преподобного происходили и другие чудеса. Однажды в праздник Пятидесятницы в обитель собралось до двух тысяч богомольцев. В тот год (по некоторым источникам, 1557 г.) был голод и в обители было мало хлеба. Игумен Варлаам (1557–1570), желая исполнить завет преподобного, учившего питать всех приходящих в монастырь, не знал, как быть. С верою он обратился в молитве к святому Стефану, прося у него помощи. Затем игумен повелел монаху Симеону, служившему за трапезой, весь имевшийся хлеб разделить и разложить на столы. Симеон мысленно осудил игумена, полагая, что такой поступок не только не накормит множество народа, но и лишит братию завтрашнего пропитания, однако он исполнил повеление, и по молитве святого Стефана произошло чудо: не только все паломники насытились, но еще осталось столько хлеба, что братия питались им три месяца.

Игумен Варлаам стал первым собирателем сведений о жизни преподобного Стефана. Он разыскал записки о святом у своего прадеда Серапиона, лично знавшего преподобного Стефана, и записал известные ему чудеса, происходившие у святых мощей. На основе этих записей игумен Данилова монастыря Иоасаф (впоследствии епископ Вологодский) по благословению митрополита Московского Макария († 1563; память 30 декабря/12 января) составил житие и службу преподобному Стефану. Служба святому была составлена также Симеоном Полоцким.

Тропарь, глас 8

Правосла́вия ревни́телю,
благоче́стия наста́вниче и чистоты́,
и́щущим спасе́ния путеводи́тельный свети́льниче,
мона́шествующих Богодухнове́нное удобре́ние,
преподо́бнаго Се́ргия духо́вный собесе́дниче,
Стефа́не прему́дре,
уче́ньми и добродея́ньми твои́ми ду́ши просвети́л еси́
и пусты́ни насели́л еси́,

моли́ Христа́ Бо́га спасти́ся душа́м на́шим.

Кондак, глас 8

Чистото́ю душе́вною боже́ственно вооружи́вся,
блаже́нную жизнь соверши́л еси́,
в пусты́ню, я́ко во град, всели́вся,
благода́ть прия́л еси́ от Бо́га
исцеля́ти неду́ги приходя́щим к честне́й твое́й ра́це
и всех возвыша́ти к Боже́ственней высоте́,
те́мже, име́я дерзнове́ние ко Святе́й Тро́ице,
помина́й нас, чту́щих па́мять твою́, да зове́м ти:

ра́дуйся, преподо́бне Стефа́не, по́стником удобре́ние.

Молитва

Всеблаже́нне и преподо́бне о́тче Стефа́не, просла́вленный уго́дниче Пресвяты́я Тро́ицы, Престо́лу Ея́ предстоя́ с ли́ки святы́х А́нгел и всех святы́х, помяни́ нас, в беда́х и ско́рбех припа́дающих к цельбоно́сному твоему́ гро́бу и моля́щихся тебе́, услы́ши моли́твы на́ша и принеси́ к Престо́лу Триипоста́снаго Бо́га, прося́ у Него́ нам бога́тыя ми́лости, здра́вия душа́м и телесе́м на́шим, наипа́че же отпуще́ния грехо́в, благода́ти и спасе́ния. Ты бо, име́я дерзнове́ние к Нему́, мо́жеши умоли́ти Его́, да пода́ст нам в житии́ на́шем блага́я и вся, я́же на по́льзу на́шу и во уготовле́ние к ве́чному животу́. О благи́й и ве́рный ра́бе Бо́жий, и́стинный учениче́ Христа́, избра́нный сосу́де Свята́го Ду́ха, чудотво́рче Стефа́не! Мо́лим тя усе́рдно: сотвори́ нас гре́шных прича́стники бы́ти благода́тных дарова́ний, и́миже Бог тя обогати́, и бу́ди нам по Бо́зе наста́вник к богоуго́дному житию́, утиши́тель бу́ри страсте́й, помо́щник в ско́рбех и беда́х и засту́пник от враг ви́димых и неви́димых, да и мы, предста́тельством и богоприя́тными твои́ми моли́твами бу́дем насле́дницы Ца́рствия Бо́жия и сподо́бимся вку́пе с тобо́ю предстоя́ти Престо́лу Царя́ сла́вы, Ему́же подоба́ет вся́кая сла́ва, честь и держа́ва во ве́ки веко́в. Ами́нь.

Канон преподобному Стефану Махрищскому

Минея, 14 Июля.

Глас 4

Песнь 1

Ирмос: Отве́рзу уста́ моя́,
и напо́лнятся Ду́ха,
и сло́во отры́гну Цари́це Ма́тери,
и явлю́ся, све́тло торжеству́я,
и воспою́, ра́дуяся, Тоя́ чудеса́.

Припев: Преподо́бне о́тче Стефа́не, моли́ Бо́га о на́с.

Сло́во ми пода́ждь, Сло́ве Бо́жий, во отверзе́ние недосто́йных уст мои́х,
и очи́сти се́рдце мое́,
я́ко да возмогу́ по достоя́нию воспе́ти преподо́бнаго Твоего́.

Припев: Преподо́бне о́тче Стефа́не, моли́ Бо́га о на́с.

Его́же Сам просла́вил еси́, Христе́ Спа́се мой,
просла́вити да́руй ми честно́е торжество́ Стефа́на преподо́бнаго, Твоего́ уго́дника,
нача́льника мона́хов и оби́тели утвержде́ние.

Сла́ва Отцу́ и Сы́ну и Свято́му Ду́ху.

Триипоста́сным Све́том Божества́ просвети́л еси́ се́рдце, преподо́бне,
от ю́ности мирска́го пристра́стия возгнуша́вся,
и Небе́сная восприя́л еси́ наслажде́ния.

И ны́не и при́сно и во ве́ки веко́в. Ами́нь.

Богородичен: Без се́мене О́тчею во́лею от Боже́ственнаго Ду́ха Бо́жия Ты зача́т Сы́на,
пло́тию родила́ еси́ на́шего ра́ди спасе́ния.

Песнь 3

Ирмос: Твоя́ песносло́вцы, Богоро́дице,
Живы́й и Незави́стный Исто́чниче,
лик себе́ совоку́пльшия, духо́вно утверди́,
в Боже́ственней Твое́й сла́ве
венце́в сла́вы сподо́би.

Припев: Преподо́бне о́тче Стефа́не, моли́ Бо́га о на́с.

Возмуще́ния мо́ря жите́йскаго избе́г, преподо́бне Стефа́не,
в пусты́ню безмо́лвия по́стническаго пребыва́ния
всели́лся еси́, ра́дуяся, блаже́нне.

Припев: Преподо́бне о́тче Стефа́не, моли́ Бо́га о на́с.

Воздержа́нием плоть свою́ и бде́нии ча́стыми удручи́л еси́, преподо́бне,
и, пусты́нная претерпе́в озлобле́ния,
стремле́ния лю́тых страсте́й уста́вил еси́, Стефа́не.

Сла́ва Отцу́ и Сы́ну и Свято́му Ду́ху.

На па́житех живо́тных слове́сное ста́до ученико́в твои́х му́дре упа́сл еси́
и на зла́це воздержа́ния, Стефа́не,
от волко́в мы́сленных невреди́мо сохрани́л еси́.

И ны́не и при́сно и во ве́ки веко́в. Ами́нь.

Богородичен: Ве́дуще, благоче́стно пропове́дуем Тя
и́стинную Ма́терь Бо́жию, Пренепоро́чная:
Тобо́ю бо к нам Зижди́тель прибли́жися.

Седален, глас 8

Оте́чество свое́ оста́вил еси́, преподо́бне,
я́коже Авраа́м други́й, пресе́льник быв,
и в пусты́ню всели́лся еси́, крест свой взем,
Христу́ после́довав, плоть свою́ воздержа́нием, и труды́, и пусты́нными озлобле́нии умертви́л еси́,
и ста́до мона́хов собра́л еси́,
и по сме́рти от Бо́га благода́ть прия́л еси́ неду́ги исцеля́ти
с ве́рою приходя́щим к честне́й твое́й ра́це, Стефа́не преподо́бне,
моли́ Христа́ Бо́га согреше́нием оставле́ние дарова́ти
чту́щим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Во искуше́ния многоплете́нная впад от враг ви́димых и неви́димых,
бу́рею одержу́ся безчи́сленных мои́х прегреше́ний
и я́ко к те́плому заступле́нию и покро́ву моему́, Чи́стая, притека́ю.
Тем, Пресвята́я, из Тебе́ Вопло́щшагося без се́мене моли́
о всех рабе́х Твои́х, непреста́нно пою́щих Тя,
согреше́ний оставле́ние им дарова́ти.

Песнь 4

Ирмос: Седя́й в Сла́ве на Престо́ле Божества́
во о́блаце ле́гце,
прии́де Иису́с Пребоже́ственный
Нетле́нною Дла́нию и спасе́ зову́щия:
сла́ва, Христе́, си́ле Твое́й.

Припев: Преподо́бне о́тче Стефа́не, моли́ Бо́га о на́с.

Оте́чество свое́, я́коже иногда́ Авраа́м, оста́вил еси́, преподо́бне Стефа́не,
и, на землю обетова́нную пресели́вся,
Го́рняго Иерусали́ма насле́дник изря́ден показа́лся еси́, Богому́дре.

Припев: Преподо́бне о́тче Стефа́не, моли́ Бо́га о на́с.

Страннолю́бие, я́коже Авраа́м пра́отец дре́вле, стяжа́л еси́,
и, я́коже он, служи́тель и друг Бо́гу нарече́ся,
и Сего́ ты в се́рдце твое́м чистоты́ ра́ди жития́ твоего́ всели́л еси́, Стефа́не.

Сла́ва Отцу́ и Сы́ну и Свято́му Ду́ху.

Заря́ми чуде́с облиста́лся еси́, Стефа́не Богоприя́тне,
грехми́ отемне́нное се́рдце мое́ све́том твои́х моли́тв просвети́,
я́ко да и аз благода́рственно воспою́ па́мять твою́.

И ны́не и при́сно и во ве́ки веко́в. Ами́нь.

Богородичен: Сни́де, я́ко дождь на руно́, во утро́бу Твою́ Госпо́дь,
я́коже рече́ дре́вле проро́к, Всенепоро́чная, Ему́же взыва́ем:
сла́ва си́ле Твое́й, Го́споди.

Песнь 5

Ирмос: Нечести́вии не у́зрят Сла́вы Твоея́, Христе́,
но мы Тя, Единоро́дне,
Оте́ческия Сла́вы Сия́ние Божества́,
от но́щи у́тренююще,
воспева́ем Тя, Человеколю́бче.

Припев: Преподо́бне о́тче Стефа́не, моли́ Бо́га о на́с.

Влады́це своему́ Христу́ подо́бяся, во́льную страсть претерпе́вшему,
распя́лся еси́ ми́рови и страсте́м, Стефа́не Богоприя́тне,
и ны́не све́тло прославля́ешися, лику́я во Ца́рствии Его́.

Припев: Преподо́бне о́тче Стефа́не, моли́ Бо́га о на́с.

Исто́чник исцеле́ний показа́ся ра́ка моще́й твои́х, Стефа́не,
к не́йже вси с ве́рою притека́ющии разли́чных неду́г и страсте́й избавля́ются
богоприя́тными твои́ми моли́твами.

Сла́ва Отцу́ и Сы́ну и Свято́му Ду́ху.

Во пло́ти ме́ртвенней безпло́тным подо́бяся,
жития́ чистото́ю, Богому́дре,
безпло́тных враг мы́сленная ополче́ния, Стефа́не, до конца́ низложи́л еси́.

И ны́не и при́сно и во ве́ки веко́в. Ами́нь.

Богородичен: Тя ору́жие непобеди́мое на враги́ предлага́ем,
Тя держа́ву и наде́жду на́шему спасе́нию, Богома́ти, стяжа́хом.

Песнь 6

Ирмос: Приидо́х во глубины́ морски́я,
и потопи́ла мя есть бу́ря мно́гих грехо́в,
но, я́ко Бог, из глубины́ возведи́ живо́т мой, Многоми́лостиве.

Припев: Преподо́бне о́тче Стефа́не, моли́ Бо́га о на́с.

В пусты́нях всели́лся еси́, бе́гая сла́вы су́етныя, я́коже дре́вле вели́кий Анто́ний,
те́мже обре́те Боже́ственную кончи́ну
и по сме́рти сия́еши чудесы́, преподо́бне.

Припев: Преподо́бне о́тче Стефа́не, моли́ Бо́га о на́с.

Кто изрещи́ возмо́жет труды́ твоя и бде́ния, Богому́дре Стефа́не,
и́хже ра́ди возме́здие от Бо́га по достоя́нию восприя́л еси́,
по свое́й сме́рти разли́чныя неду́ги исцеля́ти.

Сла́ва Отцу́ и Сы́ну и Свято́му Ду́ху.

Те́ло свое́ моли́твами и посто́м удручи́л еси́,
ду́шу же свою́ благодея́нии просвети́л еси́
и се́рдце свое́ от скверн плотски́х очи́стил еси́,
те́мже прия́телище Ду́ху Пресвято́му, Стефа́не, показа́ся.

И ны́не и при́сно и во ве́ки веко́в. Ами́нь.

Богородичен: О чу́до, всех чуде́с превы́шшее:
я́ко Де́ва, во чре́ве вся́ческая Содержа́щаго сло́вом неискусому́жно прии́мши,
без истле́ния родила́ еси́.

Кондак, глас 8

Чистото́ю душе́вною боже́ственно вооружи́вся,
блаже́нную жизнь соверши́л еси́,
в пусты́ню, я́ко во град, всели́вся,
благода́ть прия́л еси́ от Бо́га
исцеля́ти неду́ги приходя́щим к честне́й твое́й ра́це
и всех возвыша́ти к Боже́ственней высоте́,
те́мже, име́я дерзнове́ние ко Святе́й Тро́ице,
помина́й нас, чту́щих па́мять твою́, да зове́м ти:
ра́дуйся, преподо́бне Стефа́не, по́стником удобре́ние.

Икос

Разу́мнаго свети́льника, вся озаря́юща чудесы́ исцеле́ний,
во смире́нии и кро́тости Влады́ки всех Христа́ подража́теля и столпа́ утвержде́ния,
и́ноком наста́вника, равноа́нгельно на земли́ пожи́вша,
неви́димыя враги́ си́лою кре́стною до́бльственне низложи́вша
и плотска́я мудрова́ния ду́хови повину́вша,
в страннолю́бии же и в ми́лостыни неоску́днаго и в благодея́ниих прекра́снаго,
преподо́бнаго Се́ргия спо́стника же и собесе́дника,
Боже́ственнаго кри́на, в пусты́нных удо́лиих процве́тшаго, восхва́лим, зову́ще:
ра́дуйся, преподо́бне Стефа́не, по́стником основа́ние.

Песнь 7

Ирмос: Ю́ноши три в Вавило́не,
веле́ние мучи́телево на бу́йство прело́жше,
посреде́ пла́мене вопия́ху:
благослове́н еси́, Го́споди,
Бо́же оте́ц на́ших.

Припев: Преподо́бне о́тче Стефа́не, моли́ Бо́га о на́с.

Я́коже Лот Содо́ма дре́вле, латы́нскаго злове́рия избежа́в,
а́ки в Сиго́р, в Моско́вскую зе́млю, кре́пко соблюда́ющую и́стинное правове́рие, прише́л еси́, Стефа́не, вопия́:
благослове́н еси́, Го́споди, Бо́же оте́ц на́ших.

Припев: Преподо́бне о́тче Стефа́не, моли́ Бо́га о на́с.

Си́лою Христо́вою вооружи́вся, преподо́бне, стра́шен яви́лся еси́ бесо́м
и над страстьми́ воцари́лся еси́, взем крест свой, после́дуя Христо́ви и вопия́:
благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху.

Собра́нное тобо́ю слове́сное ста́до весели́тся днесь в па́мять твою́, Стефа́не Богому́дре,
посреде́ иму́ще честны́я твоя́ мо́щи, источа́ющия струи́ исцеле́ний, преподо́бне, зову́щим:
благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Благослове́н Плод благослове́ннаго чре́ва Твоего́,
Его́же благословя́т Небе́сныя си́лы и преподо́бных собо́ри,
нас изба́вльшаго кля́твы дре́вния, Благослове́нная.

Песнь 8

Ирмос: Изба́вителю всех, Всеси́льне,
посреде́ пла́мене благоче́ствовавшия,
снизше́д, ороси́л еси́
и научи́л еси́ пе́ти:
вся дела́, благослови́те, по́йте Го́спода.

Припев: Преподо́бне о́тче Стефа́не, моли́ Бо́га о на́с.

Оби́лием благода́ти и одожде́нием слове́с твои́х
серде́чныя бразды́ учени́к твои́х напои́л еси́, Стефа́не,
и в сих мног плод Влады́це Христу́ возрасти́л еси́, Богому́дре.

Припев: Преподо́бне о́тче Стефа́не, моли́ Бо́га о на́с.

Ме́ртвость твоя́ живоно́сною яви́ся, преподо́бне Стефа́не, Христа́ ра́ди,
Его́же Престо́лу со дерзнове́нием предстоя́,
моли́ся о чту́щих честну́ю па́мять твою́.

Сла́ва Отцу́ и Сы́ну и Свято́му Ду́ху.

Я́ко незави́стну благода́ть имы́й от Бо́га, преподо́бне,
пресла́вная чудеса́ источа́еши
с ве́рою притека́ющим к ра́це честны́х моще́й твои́х.

И ны́не и при́сно и во ве́ки веко́в. Ами́нь.

Богородичен: Вода́ еси́ неисчерпа́емая, Де́во,
от нея́же вси, пию́ще, благода́ти исполня́емся,
душе́ю и те́лом освяща́еми.

Песнь 9

Ирмос: Е́ва у́бо неду́гом преслуша́ния
кля́тву всели́ла есть;
Ты же, Де́во Богоро́дице,
прозябе́нием чревоноше́ния ми́рови Благослове́ние процвела́ еси́.
Тем Тя вси велича́ем.

Припев: Преподо́бне о́тче Стефа́не, моли́ Бо́га о на́с.

Побе́дное одоле́ние оте́честву на́шему
на проти́вныя да́руй моли́твами твои́ми, Стефа́не преподо́бне,
и Це́рквам единомы́слие устро́й,
да непреста́нно в пе́снех па́мять твою́ почита́ем.

Припев: Преподо́бне о́тче Стефа́не, моли́ Бо́га о на́с.

О чту́щих честну́ю па́мять твою́ любо́вию моли́ся, Стефа́не преподо́бне,
изба́витися враг мы́сленных и ви́димых,
да ктому́ мно́жае тя в пе́снех непреста́нно велича́ем.

Сла́ва Отцу́ и Сы́ну и Свято́му Ду́ху.

От недосто́йных мои́х усте́н
приноси́мое ти ма́лое от усе́рдия хвале́ние приими́, Богоблаже́нне,
и огня́ ве́чнаго изба́витися моли́ся,
да непреста́нно честну́ю твою́ па́мять почита́ю.

И ны́не и при́сно и во ве́ки веко́в. Ами́нь.

Богородичен: Ра́дуйся и весели́ся, Неве́сто Царя́ Вели́каго,
созерца́ющая све́тло Твоего́ Жениха́ красоты́, па́че зла́та сия́юща,
Его́же пою́ще, велича́ем.

Светилен

Ты яви́лся еси́, Богому́дре о́тче, столп доброде́телей
и преподо́бным сла́ва и украше́ние,
те́мже помина́й чту́щих честну́ю твою́ па́мять.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Тя Предста́тельницу вси иму́ще, гре́шнии, о Пресвята́я Де́во!
Моли́ся благопремени́тельна сотвори́ти нам Сы́на Твоего́
ма́терними Твои́ми моли́твами.

Акафист святителю Стефану, игумену Махрищскому, чудотворцу

Конда́к 1

Избра́нный дру́же и собесе́дниче дру́га Бо́жия чудотво́рца Се́ргия и ди́вный подража́телю жития́ его́ свята́го, преподо́бне о́тче на́ш Стефа́не! Пе́сньми ра́достными восхваля́ем тя́ с любо́вию, небе́снаго предста́теля и засту́пника на́шего: ты́ же, богоно́се, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д свободи́ зову́щих ти́:

Ра́дуйся, Стефа́не, вели́кий чудотво́рче.

И́кос 1

А́нгелом любе́зную чистоту́ от ю́ности твоея́ возлюби́в, о́тче Стефа́не, ми́р и вся́ красоты́ его́ тле́нныя презре́л еси́, служи́ти же Го́сподеви в преподо́бии и чистоте́ взыска́л еси́, и сего́ ра́ди во оби́тель Ки́ево-Пече́рскую прише́д, постриже́ние во и́ноческий о́браз та́мо восприя́л еси́, подража́я во все́х доброде́телех преподо́бным отце́м Анто́нию и Феодо́сию и про́чим преподо́бным Пече́рским. Те́мже сла́вим тя́ по достоя́нию и глаго́лем:

Ра́дуйся, гра́да Ки́ева до́брое прозябе́ние; ра́дуйся, роди́телей благочести́вых ча́до боголюбе́зное.

Ра́дуйся, Ева́нгелия Христо́ва ве́рный после́дователю; ра́дуйся, за́поведей Иису́совых ре́вностный исполни́телю.

Ра́дуйся, до́м роди́тельский любве́ ра́ди Бо́жия оста́вивый; ра́дуйся, во оби́тель Ки́ево-Пече́рскую на по́двиги духо́вныя прише́дый.

Ра́дуйся, богому́дрия душеспаси́тельнаго преиспо́лненный; ра́дуйся, смире́ние свято́е себе́ усво́ивый.

Ра́дуйся, посто́м душепа́губныя стра́сти в себе́ умертви́вый; ра́дуйся, моли́твами непреста́нными вся́ искуше́ния диа́вольския отрази́вый.

Ра́дуйся, слеза́ми покая́нными убели́вый ри́зу душе́вную; ра́дуйся, из глубины́ воздыха́ньми приобреты́й чистоту́ серде́чную.

Ра́дуйся, Стефа́не, вели́кий чудотво́рче.

Конда́к 2

Ви́дев по́двиги о Бо́зе преподо́бных оте́ц Пече́рских, Стефа́не богому́дре, ревнова́л еси́ и́м подража́ти во все́х доброде́телех и́ноческих, и я́ко земля́ до́брая, уче́ния духо́внаго словеса́ восприе́мля в се́рдце твое́, плодоприноси́л еси́ Го́сподеви житие́ преподо́бное, я́ко бы́ти тебе́ во пло́ти а́нгелу и небе́сному челове́ку и невозбра́нно пе́ти а́нгельскую пе́снь Пресвяте́й Тро́ице: Аллилу́иа.

И́кос 2

Ра́зум небе́сный стяжа́в, о́тче преподо́бне, ри́мским лжеуче́нием, умно́жившимся во гра́де Ки́еве, смути́лся еси́ и предпоче́л еси́ удали́тися в страны́ се́верныя, ко гра́ду Москве́, иде́же сия́ше свято́е Правосла́вие, и мно́гия хра́мы Бо́жии и оби́тели и́ноческия бы́ша. Мы́ же разу́мное бе́гство твое́ ублажа́я, воспева́ем ти́ хвале́бныя пе́сни сицевы́я:

Ра́дуйся, правосла́вия побо́рниче; ра́дуйся, ри́мскаго лжеуче́ния обличи́телю.

Ра́дуйся, гра́д оте́чествия твоего́ оста́вивый, да гра́д Небе́сный Иерусали́м го́рний унасле́диши; ра́дуйся, стра́нник и пришле́ц бы́вый, да в сыновство́ Отцу́ Небе́сному сопричте́шися.

Ра́дуйся, безмо́лвия люби́телю, бу́ри ерети́ческия му́дро избежа́вый; ра́дуйся, моли́твы умиле́нныя Го́сподеви возноси́вый.

Ра́дуйся, звездо́, сия́ющая благода́ти Бо́жия заре́ю; ра́дуйся, от ю́га к се́веру прише́дый свети́ти лю́дем житие́м твои́м преподо́бным.

Ра́дуйся, трудолю́бче нелицеме́рный, пра́здность возненави́девый; ра́дуйся, по нестяжа́тельности и смире́нию твоему́ ве́тхия и многошве́нныя оде́жды носи́вый.

Ра́дуйся, с по́сохом стра́нника гра́ды и ве́си обше́дый и лю́ди благоче́стию поучи́вый; ра́дуйся, самоде́ржцев земли́ Росси́йския при́сный дру́г и сове́тник бы́вый.

Ра́дуйся, Стефа́не, вели́кий чудотво́рче.

Конда́к 3

Си́ла Бо́жия укрепля́ше тя́, преподо́бне о́тче на́ш Стефа́не, егда́ стужи́в молво́ю челове́ческою во гра́де Москве́, отше́л еси́ в пусты́ню безлю́дную на реку́ Ма́хру, и та́мо ку́щу пусты́нную себе́ сооруди́в, в не́й подвиза́лся еси́ в безмо́лвии соверше́ннем, еди́н Еди́ному Христу́ рабо́тая в посте́ и моли́тве и денноно́щно воспева́я Ему́: Аллилу́иа.

И́кос 3

Име́л еси́ еди́но попече́ние, преподо́бне, да спасе́ши ду́шу твою́ и предста́виши ю́ Христу́ без поро́ка, чи́сту от вся́кия скве́рны грехо́вныя; благи́й же Человеколю́бец Госпо́дь, ви́дев таково́е твое́ благо́е произволе́ние, поставля́ет тя́ па́стыря и́ноком пустыннолюби́вым и си́х собира́ет под твое́ руково́дство, да упасе́ши и́х во спасе́ние. О се́м тя́ прославля́ем и зове́м:

Ра́дуйся, учи́телю благоче́стия; ра́дуйся, наста́вниче богому́дрия.

Ра́дуйся, сотвори́вый и научи́вый; ра́дуйся, ве́лий нарече́нный во Ца́рствии Небе́снем.

Ра́дуйся, пустыннолюби́вая го́рлице; ра́дуйся, сладкопе́сненная ла́стовице.

Ра́дуйся, благоумиле́нный увеща́телю; ра́дуйся, многосле́зный моли́твенниче.

Ра́дуйся, пусты́ню во гра́д оби́тельный претвори́вый; ра́дуйся, де́брь непло́дную духо́вно уплодоноси́вый.

Ра́дуйся, спасе́ния мно́гих ду́ш челове́ческих вино́вниче; ра́дуйся, ангелонра́вный челове́че.

Ра́дуйся, Стефа́не, вели́кий чудотво́рче.

Конда́к 4

Бу́ри грехо́вныя избежа́в, о́тче Стефа́не, в благооти́шии пусты́ннем водвори́лся еси́ и при по́мощи самоде́ржца земли́ Росси́йския, вели́каго кня́зя Иоа́нна, хра́м Бо́жий во и́мя Живонача́льныя Тро́ицы и оби́тель и́ноческую в пусты́ни твое́й возгради́л еси́, да немо́лчно сла́вится в не́й гла́сы преподо́бными Триеди́ный Бо́г, и пое́тся Ему́ пе́снь хвалы́ и благодаре́ния: Аллилу́иа.

И́кос 4

Слы́шавше бли́жнии и да́льнии о равноа́нгельнем житии́ твое́м, о́тче преподо́бне, прихожда́ху в пусты́нную оби́тель твою́, о́ви послу́шати поуче́ний твои́х душеполе́зных, о́ви же подвиза́тися вку́пе с тобо́ю под твои́м руково́дством; ты́ же все́х с оте́ческою любо́вию приима́л еси́ и неле́ностно служи́л еси́ спасе́нию ду́ш челове́ческих, те́мже и слы́шиши таковы́я тебе́ похвалы́:

Ра́дуйся, пра́вило ве́ры и́стинныя; ра́дуйся, о́бразе кро́тости духо́вныя.

Ра́дуйся, па́стырю до́брый па́ствы и́ноческия; ра́дуйся, устрои́телю богому́дрый кинови́и пусты́нныя.

Ра́дуйся, общежи́тельныя уста́вы зело́ возлюби́вый; ра́дуйся, вся́ о́бща име́ти бра́тии в оби́тели твое́й законоположи́вый.

Ра́дуйся, ратобо́рче до́блий, полки́ неви́димых враго́в кре́пко победи́вый; ра́дуйся, вождю́ благоиску́сный во́инов духо́вных.

Ра́дуйся, вели́ких пустынножи́телей ве́рный подража́телю; ра́дуйся, дре́вних богоно́сных отце́в ре́вностный после́дователю.

Ра́дуйся, преподо́бнаго чудотво́рца Се́ргия многолюби́мый дру́же и собесе́дниче; ра́дуйся, преподо́бнаго чудотво́рца Кири́лла духо́вный руководи́телю и наста́вниче.

Ра́дуйся, Стефа́не, вели́кий чудотво́рче.

Конда́к 5

Боготе́чная вои́стинну звезда́ яви́лся еси́, преподо́бне о́тче на́ш Стефа́не, и из глубины́ пусты́ни твоея́ духо́вно свети́л еси́ ца́рствующему гра́ду Москве́ и всему́ ца́рству правосла́вно-росси́йскому, дру́г и сове́тник самоде́ржцем его́ бы́в, вся́ до́брая ко благоче́стию при́сно сове́туя и́м богому́дренно и богоуго́дно воспева́я все́х Творцу́ пе́снь: Аллилу́иа.

И́кос 5

Ви́дев неразу́мныя челове́ки, напра́сно гне́вавшияся на тя́, преподо́бне о́тче, ме́сто гне́ву и́х уступи́л еси́ и предпоче́л еси́ удали́тися из оби́тели твоея́ в преде́лы волого́дския на реку́ Авне́гу, иде́же но́вую оби́тель и́ноческую возгради́л еси́ во спасе́ние ду́ш челове́ческих, и в не́й при́сныя ученики́ твоя́ преподо́бных Григо́рия и Кассиа́на, я́ко кри́ны ра́йския, духо́вно возрасти́л еси́, с ни́миже тя́ ублажа́ем и зове́м:

Ра́дуйся, неусы́пный де́лателю виногра́да небе́снаго; ра́дуйся, плоды́ сла́дкия от де́лания твоего́ Христу́ принесы́й.

Ра́дуйся, и́мя Бо́жие спаси́тельное во усте́х твои́х вы́ну име́вый; ра́дуйся, па́мять пресла́дкаго Иису́са в се́рдце твое́ вне́дривый.

Ра́дуйся, и́го Христо́во благо́е и ле́гкое носи́вый; ра́дуйся, ско́рби мно́гия благоду́шно претерпе́вый.

Ра́дуйся, гне́вавшимся напра́сно на тя́ не пререка́вый; ра́дуйся, кро́тостию твое́ю зло́бу неразу́мных челове́ков побежда́вый.

Ра́дуйся, миротво́рец благослове́нный бы́вый; ра́дуйся, ми́ра ра́ди оби́тель твою́ оста́вивый.

Ра́дуйся, но́ву оби́тель на реце́ Авне́ге сооруди́вый; ра́дуйся, богоуго́дно в не́й со ученики́ твои́ми пожи́вый.

Ра́дуйся, Стефа́не, вели́кий чудотво́рче.

Конда́к 6

Пропове́дник ве́ры Христо́вой яви́лся еси́, преподо́бне о́тче, в преде́лех авне́жских, и лю́ди, язы́ческим суеве́рием потемне́нныя, све́том Христо́вым соверше́нно просвети́л еси́, поуча́я их неле́ностно оста́вити нечести́выя обы́чаи язы́ческия и прилежа́ти благоче́стию христиа́нскому, да возмо́гут благоприя́тно пе́ти Еди́ному И́стинному Бо́гу славосло́вия пе́снь: Аллилу́иа.

И́кос 6

Возсия́в све́том богоразу́мия твоего́ в страна́х полу́нощных, Стефа́не богому́дре, повеле́нием вели́каго кня́зя Дими́трия, па́ки во оби́тель твою́, на реце́ Ма́хре тобо́ю устро́енную, возвраща́ешися, в оби́тели же твое́й на реце́ Авне́ге преподо́бныя ученики́ твоя́ Григо́рия и Кассиа́на оста́вил еси́, да продолжа́ют они́ та́мо по уче́нию и приме́ру твоему́ по́двиги духо́вныя, в ни́хже и венцы́ му́ченическими от Христо́вой десни́цы они́ увенча́шася и чудесы́ мно́гими свя́тость свою́ ознаменова́ша. Тебе́ у́бо, о́тче, таковы́я святы́я ученики́ стяжа́вшему, вопие́м хвале́бно:

Ра́дуйся, Ева́нгелия Христо́ва немо́лчный пропове́дниче; ра́дуйся, апо́стольских преда́ний ре́вностный блюсти́телю.

Ра́дуйся, язы́ческаго нече́стия искорени́телю; ра́дуйся, ве́ры правосла́вныя распространи́телю.

Ра́дуйся, во сле́д себе́ ко Христу́ ученики́ твоя́ приведы́й; ра́дуйся, свята́я ча́да о Христе́ стяжа́вый.

Ра́дуйся, с ни́ми возше́дый прия́ти мзду́ небе́сную от Го́спода; ра́дуйся, не сокры́вый тала́нт, вруче́нный тебе́ от Всевы́шняго Домовлады́ки.

Ра́дуйся, ку́плю мно́гу и́м сотвори́вый, спасе́ние ду́ш челове́ческих; ра́дуйся, заблу́ждшия на пу́ть пра́вый напра́вивый твои́ми уче́ньми.

Ра́дуйся, бли́жния твоя́ и́скренно возлюби́вый; ра́дуйся, спасе́нию и́х душе́вному усе́рдно послужи́вый.

Ра́дуйся, Стефа́не, вели́кий чудотво́рче.

Конда́к 7

Хотя́ Госпо́дь яви́ти на́м о́браз смире́ния свята́го, приво́дит к тебе́, о́тче Стефа́не, преподо́бнаго Се́ргия, его́же во врате́х оби́тели твоея́ сре́тив, проси́л еси́ его́ благослови́ти тя́ со ученики́ твои́ми: то́й же благослове́ния от тебе́ смиренному́дренно прося́ше, до́ндеже умоле́нный тобо́ю благослови́ тя, и уте́шився духо́вною бесе́дою с тобо́ю, воспева́ше Бо́гу: Аллилу́иа.

И́кос 7

Но́ваго тя́ ревни́теля по благоче́стию позна́в благове́рный вели́кий кня́зь Дими́трий, отца́ духо́внаго себе́ тя́ нарече́ и во все́м с любо́вию послу́шаше твои́х сове́тов богому́дрых, преподо́бне о́тче на́ш Стефа́не, ве́дая бли́зость твою́ к Царю́ царе́й Христу́ Бо́гу, Его́же умоля́ти не преста́й и о на́с гре́шных, вопию́щих ти́ хвале́бно:

Ра́дуйся, кри́не пусты́ннаго прозябе́ния; ра́дуйся, ми́ро Христо́ва благоуха́ния.

Ра́дуйся, смире́ния соверше́ннаго зерца́ло; ра́дуйся, от стре́л вра́жиих кре́пкое на́м забра́ло.

Ра́дуйся, смире́нием высо́кая стяжа́вый; ра́дуйся, бога́тство нетле́нное унасле́дивый.

Ра́дуйся, пусты́ню духо́вно просвети́вый; ра́дуйся, сле́зными пото́ки бразду́ душе́вную напои́вый.

Ра́дуйся, посеще́ния преподо́бнаго Се́ргия удосто́енный; ра́дуйся, благослове́нием и моли́твою его́ освяще́нный.

Ра́дуйся, преподо́бием све́тло украше́нный; ра́дуйся, дара́ми Бо́жия благода́ти преиспо́лненный.

Ра́дуйся, Стефа́не, вели́кий чудотво́рче.

Конда́к 8

Стра́нствовав во гра́д Москву́, о́тче Стефа́не, смотре́нием Бо́жиим преподо́бнаго Кири́лла на пу́ть подви́жничества духо́внаго приве́л еси́ богому́дрыми твои́ми словесы́, и обруче́ние а́нгельскаго о́браза на него́ возложи́в, Христу́ его́ приусво́ил еси́, не убоя́вся гне́ва сро́дника его́, имени́таго боля́рина великокня́жескаго, его́же гне́в неразу́мный ди́вно утоли́л еси́, зовы́й Бо́гу, та́ко изво́лившему: Аллилу́иа.

И́кос 8

Ве́сь в Бо́зе бы́в, преподо́бне о́тче, о Бо́зе и угожде́нии Ему́ всегда́ бесе́довал еси́ со ученики́ твои́ми и от любве́ серде́чныя ко Го́споду сле́зы мно́гия излива́л еси́ от оче́с твои́х при бесе́дах си́х, умоля́я ча́да твоя́ духо́вная ничто́же предпочита́ти па́че любве́ Христо́вы. Мо́лим тя́, уго́дниче Бо́жий, сподо́би и на́с хла́дных воспламени́тися любо́вию ко Го́споду, да возмо́жем неосужде́нно вопи́ти тебе́:

Ра́дуйся, гре́шники на покая́ние наста́вивый; ра́дуйся, ка́ющияся с Бо́гом примири́вый.

Ра́дуйся, оте́ц чадолюби́вый ученико́м твои́м бы́вый; ра́дуйся, не́мощи немощны́х любвеоби́льно носи́вый.

Ра́дуйся, уневе́стивый Христу́ мно́гия ду́ши челове́ческия; ра́дуйся, о́браз соверше́нства духо́внаго в себе́ яви́вый.

Ра́дуйся, с пла́кавшими пла́кавый; ра́дуйся, боля́щия посеща́вый и ни́щия пита́вый.

Ра́дуйся, вдо́в и сиро́т защи́тниче; ра́дуйся, оби́димых и гони́мых засту́пниче.

Ра́дуйся, си́льным ми́ра суда́ Бо́жия провозве́стниче; ра́дуйся, вся́кия непра́вды нелицеприя́тный обличи́телю.

Ра́дуйся, Стефа́не, вели́кий чудотво́рче.

Конда́к 9

Все́м приходи́вшим в оби́тель твою́ святу́ю, ди́вно бы́сть ви́дети тя́, о́тче преподо́бне, в ве́тхой и многошве́нной ри́зе ходи́вшаго и наравне́ с бра́тиею твое́ю в рабо́тах монасты́рских тружда́вшагося; никогда́же бо пра́зден бы́л еси́, но рука́ма твои́ма де́лая, во усте́х моли́тву к Бо́гу при́сно име́л еси́, зовы́й Ему́ от умиле́нныя души́: Аллилу́иа.

И́кос 9

Вети́я богому́дрый бы́л еси́, преподо́бне о́тче Стефа́не, и язы́ком твои́м, я́ко тро́стию кни́жника скоропи́сца, зако́н Бо́га твоего́ начертава́л еси́ на сердца́х челове́ческих, все́м ве́рно показу́я пу́ть ко спасе́нию, по нему́же са́м неукло́нно ше́ствовал еси́ до блаже́нныя твоея́ кончи́ны. Те́мже приими́ от на́с похвалы́ таковы́я:

Ра́дуйся, главо́ свята́я, благода́тию Бо́жиею осене́нная; ра́дуйся, пропове́дниче сладкоглаго́ливый, веща́вый словеса́ жи́зни ве́чныя.

Ра́дуйся, пусты́нный граждани́не, его́же уче́ньми спасо́шася мно́зи; ра́дуйся, приведы́й ко Христу́ соверше́нныя подви́жники.

Ра́дуйся, воево́до добропобе́дный ра́тующих со враги́ неви́димыми; ра́дуйся, руководи́телю предо́брый пустынножи́телей.

Ра́дуйся, псалмопе́нии немо́лчными Бо́га сла́вивый; ра́дуйся, моли́твы умиле́нныя вы́ну Го́сподеви приноси́вый.

Ра́дуйся, коленопреклоне́ния мно́гая соверша́вый; ра́дуйся, посто́м и сухояде́нием пло́ть твою́ изнури́вый.

Ра́дуйся, ве́тхаго в себе́ челове́ка всеце́ло ду́ху покори́вый; ра́дуйся, вся́ стра́сти грехо́вныя в себе́ обузда́вый.

Ра́дуйся, Стефа́не, вели́кий чудотво́рче.

Конда́к 10

Спасе́ние ве́чное унасле́довал еси́, преподо́бне о́тче Стефа́не, и кончи́ною благо́ю сконча́лся еси́, я́ко и́стинный уго́дник Христа́ Бо́га, чесого́ зна́мение бы́сть благоуха́ние ве́лие, испо́лнившее всю́ ке́ллию, иде́же преда́л еси́ святу́ю ду́шу твою́ в ру́це Бо́жии. Та́ко бо просла́ви тя́ при исхо́де твое́м Госпо́дь, ди́вный во святы́х Свои́х, Ему́же пое́ши со а́нгелы: Аллилу́иа.

И́кос 10

Царя́ Небе́снаго Христа́, Ему́же в житии́ земно́м благоугоди́л еси́, преподо́бне о́тче, по сме́рти твое́й прославля́еши чудотворе́нии твои́ми, прие́м от Него́ благода́ть исцеле́ний вся́ких неду́гов: те́мже вси́, насыща́ющиися чрез тебе́ даро́в Его́ боже́ственных, велича́ют Его́ щедро́ты, тебе́ же, чудотво́рца пресла́внаго, ублажа́ют си́це:

Ра́дуйся, свя́то и преподо́бно жи́знь земну́ю сконча́вый; ра́дуйся, во исхо́де твое́м благоуха́ние сла́достное испусти́вый.

Ра́дуйся, сме́рть вкуси́вый, тле́ния же не позна́вый; ра́дуйся, с све́тлым лице́м во гро́бе возлежа́вый.

Ра́дуйся, дерзнове́ние ве́лие ко Го́споду стяжа́вый; ра́дуйся, чудотворе́ния да́р свы́ше получи́вый.

Ра́дуйся, пресели́выйся от земли́ к оби́телем небе́сным; ра́дуйся, та́мо со святы́ми наслажда́яйся блаже́нства ве́чнаго.

Ра́дуйся, врачу́ благода́тный и безме́здный; ра́дуйся, целе́бниче, не мзды́, еди́ныя то́кмо ве́ры тре́буяй.

Ра́дуйся, боля́щия здра́вы сотворя́яй; ра́дуйся, исцеле́ния неду́жным неоску́дно подава́яй.

Ра́дуйся, Стефа́не, вели́кий чудотво́рче.

Конда́к 11

Пе́ние моле́бное от ле́т дре́вних соверша́ется у гро́ба твоего́, преподо́бне о́тче, чудеса́ же мно́гая от него́ истека́ют оби́льною струе́ю: те́мже сла́вим тя́, чудотво́рца ми́лостиваго, и с любо́вию покланя́емся честне́й и многоцеле́бней твое́й ра́це, прося́ себе́ твоего́ моли́твеннаго предста́тельства ко Го́споду, Ему́же благода́рственно взыва́ем: Аллилу́иа.

И́кос 11

Све́т небе́сный возсия́ на гро́бе твое́м, Стефа́не чудотво́рче, и о́гненная луча́ в нощи́ озари́ ме́сто посме́ртнаго твоего́ поко́я, в зна́мение вели́кия твоея́ свя́тости. Мо́лим тя́, преподо́бне, луче́ю Бо́жией благода́ти, в тебе́ живу́щей, озари́ и на́ша мра́чныя ду́ши и приведи́ ны́ ко све́ту спасе́ния твои́ми моли́твами, да возмо́жем досто́йно благохвали́ти тя́ пе́сньми сицевы́ми:

Ра́дуйся, от го́рних высо́т к земноро́дным ми́лостиво приника́яй; ра́дуйся, от ра́ки твоея́ святы́я исцеле́ния боля́щим подава́яй.

Ра́дуйся, в со́ниих и виде́ниих ве́рныя посеща́яй; ра́дуйся, оби́тель твою́ и по сме́рти моли́твенно назира́яй.

Ра́дуйся, скорбя́щих благи́й уте́шителю; ра́дуйся, уныва́ющих благода́тный ободри́телю.

Ра́дуйся, реко́ приснотеку́щая чуде́с; ра́дуйся, ми́лования исто́чниче неоску́дный.

Ра́дуйся, благоутро́бия щедро́ты оби́льно все́м да́руяй; ра́дуйся, бли́жних и да́льних ми́лостьми твои́ми ущедря́яй.

Ра́дуйся, и неве́дущим тя́ благодея́ния целе́бная источа́яй; ра́дуйся, еди́ным призыва́нием и́мене твоего́ неду́ги неисце́льныя врачу́яй.

Ра́дуйся, Стефа́не, вели́кий чудотво́рче.

Конда́к 12

Благода́ть Бо́жия по ле́тех мно́зех соблюде́ те́ло твое́ свято́е нетле́нно в земли́, преподо́бне о́тче Стефа́не, и я́ко сокро́вище многоце́нное яви́ е́ лю́дем це́ло и неруши́мо во все́х соста́вех, я́ко ниже́ оде́ждам твои́м косну́тися тле́нию, и по́яс у́смен от моще́й твои́х целе́бную благода́ть прояви́, его́же возложе́нием вся́кия неду́ги исцеля́хуся, и ду́си нечи́стии от челове́к исхожда́ху, во е́же все́м зря́щим сия́ прославля́ти Творца́ чуде́с Бо́га, и пе́ти Ему́: Аллилу́иа.

И́кос 12

Пою́ще свято́е и равноа́нгельное житие́ твое́ прославля́ем мно́гая и пресла́вная чудотворе́ния твоя́, преподо́бне чудотво́рче, о́тче на́ш Стефа́не; ты́ же, я́ко бла́г и ми́лостив, не возгнуша́йся пе́ний на́ших моле́бных, но оте́ческою любо́вию твое́ю приими́ я́ в воню́ благоуха́ния духо́внаго и ниспосли́ на́м гре́шным вся́ благопотре́бныя ко спасе́нию да́ры бла́гости Бо́жией, да благода́рственно тебе́ вопие́м:

Ра́дуйся, Пресвяты́я Тро́ицы благоволе́нием осене́нный; ра́дуйся, Пресвяты́я Богоро́дицы ми́лостьми уще́дренный.

Ра́дуйся, а́нгелов сожи́телю; ра́дуйся, святы́х все́х сонасле́дниче.

Ра́дуйся, гре́шных ми́лостивый засту́пниче; ра́дуйся, бе́дствующих ско́рый помо́щниче.

Ра́дуйся, сла́во и похвало́ святы́я твоея́ оби́тели; ра́дуйся, благода́тное удобре́ние земли́ Росси́йския.

Ра́дуйся, все́м приходя́щим к тебе́ на поклоне́ние да́ры целе́бныя ще́дро подава́яй; ра́дуйся, боле́зни неисце́льныя еди́ным прикоснове́нием к ра́це твое́й исцеля́яй.

Ра́дуйся, по Бо́зе и Богоро́дице кре́пкое на́ше упова́ние; ра́дуйся, ду́ш и теле́с на́ших богодарова́нное врачева́ние.

Ра́дуйся, Стефа́не, вели́кий чудотво́рче.

Конда́к 13

О чудотво́рче пресла́вный и засту́пниче все́м на́м ско́рый и ми́лостивый, преподо́бне и богоно́сне о́тче на́ш Стефа́не! Припа́дая к тебе́ с ве́рою и любо́вию, мо́лим тя́: моли́ся за на́с гре́шных к Триипоста́сному Бо́гу и моли́твами твои́ми святы́ми от а́дских му́к и поги́бели ве́чныя изба́ви на́с, сподо́би же Ца́рствие Небе́сное получи́ти и в ра́дости святы́х ве́чно пе́ти Бо́гу Спаси́телю на́шему: Аллилу́иа.

​Этот конда́к читается трижды, затем и́кос 1-й и конда́к 1-й.

И́кос 1

А́нгелом любе́зную чистоту́ от ю́ности твоея́ возлюби́в, о́тче Стефа́не, ми́р и вся́ красоты́ его́ тле́нныя презре́л еси́, служи́ти же Го́сподеви в преподо́бии и чистоте́ взыска́л еси́, и сего́ ра́ди во оби́тель Ки́ево-Пече́рскую прише́д, постриже́ние во и́ноческий о́браз та́мо восприя́л еси́, подража́я во все́х доброде́телех преподо́бным отце́м Анто́нию и Феодо́сию и про́чим преподо́бным Пече́рским. Те́мже сла́вим тя́ по достоя́нию и глаго́лем:

Ра́дуйся, гра́да Ки́ева до́брое прозябе́ние; ра́дуйся, роди́телей благочести́вых ча́до боголюбе́зное.

Ра́дуйся, Ева́нгелия Христо́ва ве́рный после́дователю; ра́дуйся, за́поведей Иису́совых ре́вностный исполни́телю.

Ра́дуйся, до́м роди́тельский любве́ ра́ди Бо́жия оста́вивый; ра́дуйся, во оби́тель Ки́ево-Пече́рскую на по́двиги духо́вныя прише́дый.

Ра́дуйся, богому́дрия душеспаси́тельнаго преиспо́лненный; ра́дуйся, смире́ние свято́е себе́ усво́ивый.

Ра́дуйся, посто́м душепа́губныя стра́сти в себе́ умертви́вый; ра́дуйся, моли́твами непреста́нными вся́ искуше́ния диа́вольския отрази́вый.

Ра́дуйся, слеза́ми покая́нными убели́вый ри́зу душе́вную; ра́дуйся, из глубины́ воздыха́ньми приобреты́й чистоту́ серде́чную.

Ра́дуйся, Стефа́не, вели́кий чудотво́рче.

Конда́к 1

Избра́нный дру́же и собесе́дниче дру́га Бо́жия чудотво́рца Се́ргия и ди́вный подража́телю жития́ его́ свята́го, преподо́бне о́тче на́ш Стефа́не! Пе́сньми ра́достными восхваля́ем тя́ с любо́вию, небе́снаго предста́теля и засту́пника на́шего: ты́ же, богоно́се, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д свободи́ зову́щих ти́:

Ра́дуйся, Стефа́не, вели́кий чудотво́рче.

Моли́тва

О всеблаже́нне и преподо́бне о́тче Стефа́не, просла́вленный уго́дниче Пресвяты́я Тро́ицы, Престо́лу Ея́ предстоя́ с ли́ки святы́х а́нгел и все́х святы́х, помяни́ на́с, в беда́х и ско́рбех припа́дающих к цельбоно́сному твоему́ гро́бу и моля́щихся тебе́: услы́ши моли́твы на́ша и принеси́ к Престо́лу Триипоста́снаго Бо́га, прося́ у Него́ на́м бога́тыя ми́лости, здра́вия душа́м и телесе́м на́шим, наипа́че же отпуще́ния грехо́в, благода́ти и спасе́ния. Ты́ бо, име́я дерзнове́ние к Нему́, мо́жеши умоли́ти Его́, да пода́ст на́м в житии́ на́шем блага́я и вся́ я́же на по́льзу на́шу и во уготовле́ние к ве́чному животу́. О благи́й и ве́рный ра́бе Бо́жий, и́стинный учениче́ Христа́, избра́нный сосу́де Свята́го Ду́ха, чудотво́рче Стефа́не, мо́лим тя́ усе́рдно: сотвори́ на́с гре́шных прича́стники бы́ти благода́тных дарова́ний, и́миже Бо́г тя́ обогати́, и бу́ди на́м по Бо́зе наста́вник к богоуго́дному житию́, ути́шитель бу́ри страсте́й, помо́щник в ско́рбех и беда́х, и засту́пник от вра́г ви́димых и неви́димых, да и мы́, богоуго́дно преше́дше по́прище сея́ жи́зни, твои́м предста́тельством и богоприя́тными твои́ми моли́твами, бу́дем насле́дницы Ца́рствия Бо́жия, и сподо́бимся вку́пе с тобо́ю предстоя́ти Престо́лу Царя́ Сла́вы, Ему́же подоба́ет вся́кая сла́ва, че́сть и держа́ва во ве́ки веко́в. Ами́нь.