Собор Самарских святых

Жития

Список святых дан в соответствии с документом «Поименные списки местных соборов святых, почитаемых в Самоуправляемых Церквах, Экзархатах, Митрополичьих округах, митрополиях и епархиях», утвержденным на заседании Священного Синода 16 мая 2023 года (журнал № 31).

Тропарь, глас 8

Я́ко апо́столом сопресто́льна,
и врача́ предо́бра, и служи́теля благоприя́тна,
к ра́це твое́й честне́й притека́юще, святи́телю Алекси́е Богому́дре, чудотво́рче,
соше́дшеся, любо́вию в па́мять твою́ све́тло пра́зднуем,
в пе́снех и пе́ниих ра́дующеся и Христа́ сла́вяще,
такову́ю благода́ть тебе́ дарова́вшаго исцеле́ний

и гра́ду твоему́ вели́кое утвержде́ние.

Тропарь, глас 1 Свети́льник всесве́тлый во гра́де свята́го Петра́ яви́лся еси́,/ па́стырю до́брый, священному́чениче о́тче Вениами́не./ Любо́вь и милосе́рдие в сердца́х ве́рных насажда́я,/ благотвори́ти призыва́л еси́ терпя́щим глад и нищету́./ Сего́ ра́ди и мы к тебе прибега́ем и с ве́рою вопие́м ти:/ моли́ ми́лостиваго Бо́га,/ оте́чество на́ше в Правосла́вии и благоче́стии утверди́ти,/ мир Це́ркви дарова́ти// и душа́м на́шим ве́лию ми́лость. Тропарь, глас 2 Ве́ры Правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священному́чениче Влади́мире,/ Христа́ всем се́рдцем возлюби́в,/ па́ству твою́ до́бре упа́сл еси́,/ незло́биво му́ченическую смерть прия́л еси́./ Сего́ ра́ди в ве́чной сла́ве пребыва́я,// моли́ спасти́ся душа́м на́шим. Тропарь, глас 4 Первопресто́льницы Росси́йстии,/ и́стиннии храни́телие апо́стольских преда́ний,/ столпи́ непоколеби́мии, правосла́вия наста́вницы,/ Пе́тре, Алекси́е, Ио́но, Фили́ппе и Ермоге́не,/ Влады́ку всех моли́те/ мир вселе́нней дарова́ти,// и душа́м на́шим ве́лию ми́лость. Тропарь, глас 3 Ве́ры кре́посте, наде́жды утвержде́ние,/ любве́ прича́стниче, за Христа́ пострада́вый/ и зе́млю Росси́йскую кро́вию обагри́вый,/ священному́чениче Константи́не,// моли́ Христа́ Бо́га спасти́ся душа́м на́шим. Тропарь, глас 5 Во святи́телях благоче́стно пожи́л еси́, и муче́ния путь сконча́в, богобо́рцев я́рость посрами́л еси́, побо́рник Христо́ву ста́ду был еси́, богому́дре. Те́мже тя почита́ем ны́не, вопию́ще: священному́чениче Анато́лие, моли́ Христа́ Бо́га спасти́ся душа́м на́шим. Тропарь, глас 5 Прииди́те возра́дуйтеся ве́рнии, небе́сныя си́лы ликовству́йте, собо́ри святы́х све́тло торжеству́йте, я́ко дне́сь наста́ па́мять святы́х земли́ Сама́рския, по́двигом ве́ры пу́ть ко спасе́нию на́м указующих и заступниками земли́ на́шея пред Го́сподом явля́ющихся. Тропарь, глас 3 Да возрадуется земля Самарская, обретши тя предстателя и заступника у Престола Владычня, пастырю наш добрый и чудотворче предивный, святый праведный отче Александре, моли Христа Бога в вере Православней и исполнении евангельских заповедей непоколебимым пребыти, и спастися душам нашим. Тропарь, глас 4 Во́ине до́блественный и изря́дный,/ све́том открове́ния, я́ко Па́вел, озаре́нный,/ вся во уме́ты Христа́ ра́ди вмени́л еси́,/ и́ноческим по́двигом подвиза́лся еси́,/ тече́ние сконча́в и ве́ру соблю́д,/ те́мже зове́м ти:/ спаса́й нас моли́твами твои́ми,// преподо́бне Варсоно́фие, о́тче наш. Ин тропарь, глас 8 Я́ко светоно́сная возсия́ днесь па́мять твоя́, сла́вне,/ ве́рных озаря́ющи ду́ши и телеса́,/ и исцеле́ния струи́ Богоприя́тными ти моли́твами источа́еши,/ о́тче святи́телю Алекси́е,/ те́мже тя мо́лим, я́ко архиере́ом сопресто́льна и чудоде́йственника изря́дна,/ и́же Христо́ву Престо́лу предстоя́й,// о нас не оскудева́й моля́ся спасти́ся душа́м на́шим. Ин тропарь, глас 2 Я́ко сокро́вище пребога́тое, многоле́тно в земли́ сокрове́нное,/ честны́я мо́щи твоя́ обрето́шася чудоточа́щия,/ всеблаже́нне о́тче святи́телю Алекси́е:/ от ни́хже врачевство́ прие́млюще, обогаща́емся/ и Христа́ славосло́вим, глаго́люще:// сла́ва прославля́ющему святы́я Своя́. Ин тропарь, глас 4 Апо́стольских прее́мников архиере́ев сопресто́льниче,/ Росси́и всея́ па́стырю и учи́телю,/ всеблаже́нне о́тче Алекси́е,/ Влады́це всех моли́ся/ мир па́стве твое́й дарова́ти,/ и спасе́ние душа́м,// и ве́лию ми́лость. Ин тропарь, глас 3 Свы́ше от Бо́га глас глаго́лющ услы́шав,/ от ю́ности подвиза́вся, му́дре,/ в моли́твах, и во умиле́нии, и слеза́х,/ во бде́ниих же и поще́ниих о́браз быв доброде́тели,/ отоню́дуже и дом Ду́ху Пречи́стому яви́ся./ Сего́ ра́ди Ру́сския митропо́лии архиере́йским са́ном почте́н быв,/ Христо́во ста́до упа́сл еси́ до́бре,/ ерети́ческая нападе́ния, не усумне́ся, отрази́/ и це́ркви воздви́же Христо́ви, святи́телю Алекси́е,/ и́ночествующих ли́ки собра́/ и сих Христо́ви приве́л еси́./ У́мре же, яви́ся, я́ко спящ,/ цел соблюде́н бысть пред мно́гими ле́ты,/ подава́я цельбы́ боля́щим./ Тем мо́лим тя:/ моли́ Христа́ Бо́га спасти́ град твой Москву́ неврежде́н// и страну́ и правосла́вныя лю́ди по вели́цей Его́ ми́лости. Ин тропарь, глас 2 Ве́ру Правосла́вную непоро́чно соблю́д,/ по́двигом до́брым во святи́тельстве подвиза́лся еси́,/ священному́чениче о́тче Влади́мире,/ и убива́ющим тя рекл еси́:/ Госпо́дь да прости́т вас./ Сего́ ра́ди угото́вася ти вене́ц пра́вды от Христа́, Бо́га на́шего,/ Его́же, я́ко име́яй дерзнове́ние, моли́,/ оправда́ние дарова́ти нам в День Су́дный. Ин тропарь, глас 8 В тебе́, о́тче, изве́стно спасе́ся е́же по о́бразу прии́м бо крест после́довал еси́ Христу́, и де́я учи́л еси́ презира́ти у́бо пло́ть, прехо́дит бо: прилежа́ти же о души́, ве́щи безсме́ртней: тем же и со А́нгелы сра́дуется, преподо́бне Варсоно́фие, дух твой. Ин тропарь, глас 4 Апо́стольских догма́т опа́сна храни́теля,/ Це́ркве росси́йския па́стыря и учи́теля,/ преблаже́ннаго Алекси́я святи́теля па́мять пра́зднующе,/ славосло́вим Христа́ Бо́га на́шего пе́сньми достодо́лжными,/ дарова́вшаго нам уго́дника Своего́,/ я́ко оби́льный исто́чник, точа́щ врачева́ния,// гра́ду же Москве́ похвалу́ и утвержде́ние.

Кондак, глас 8

Боже́ственнаго и пречестна́го святи́теля Христо́ва,
но́ваго чудотво́рца Алекси́я,
ве́рно вси пою́ще, лю́дие, любо́вию да ублажи́м, я́ко па́стыря вели́каго,
служи́теля же и учи́теля прему́дра земли́ Росси́йстей.
Днесь, в па́мять его прите́кше,
ра́достно возопие́м песнь Богоно́сному:
я́ко име́я дерзнове́ние к Бо́гу,
многообра́зных нас изба́ви обстоя́ний, да зове́м ти:

ра́дуйся, утвержде́ние гра́ду на́шему.

Кондак, глас 6 От ю́ности и́го Христо́во на ра́мо взем,/ и́стинный страж Правосла́вныя Це́ркве яви́лся еси́,/ священному́чениче Вениами́не./ Клевету́, у́зы, страда́ния и суд непра́ведный/ от беззако́нных му́жественно претерпева́я,/ святы́ню церко́вную на поруга́ние не пре́дал еси́./ Те́мже и Христо́с да́ром терпе́ния и любве́ тя испо́лни,/ во е́же пред му́ченическою кончи́ною/ со благодаре́нием взыва́ти:// за вся, Го́споди, сла́ва Тебе́. Кондак, глас 2 О́браз Христо́ва милосе́рдия явля́я,/ покро́в и защище́ние па́стве твое́й был еси́,/ святи́телю о́тче Влади́мире,/ в кро́тости страда́ния прие́мля, безбо́жных мучи́телей,/ благословля́я, прости́л еси́.// Те́мже и нам испроси́ у Христа́ Бо́га дух ми́рен и ве́лию ми́лость. Кондак, глас 3 Во святи́телех благоче́стно пожи́сте,/ и лю́ди к Богоразу́мию наста́висте, и до́бре Бо́гу угоди́сте,/ сего́ ра́ди от Него́ нетле́нием и чудесы́ просла́вистеся,// я́ко ученицы́ Бо́жия благода́ти. Кондак, глас 3 Земли́ Сама́рския украше́ние,/ ста́до Христо́во в ве́ре наставля́л еси́,/ от земна́го престо́ла к Престо́лу небе́сному возше́д,/ и та́мо за ове́ц слове́сных мо́лиши// Того́, И́же ми́р созда́вый. Кондак, глас 5 Апо́столов сопресто́льниче и святи́телей украше́ние, правосла́вным щи́т и утвержде́ние бы́л еси́, просвеща́я безбо́жия но́щь глубо́кую. Сего́ ра́ди яви́лся еси́ священнострада́лец за Христа́. От бе́д изба́ви на́с твои́ми моли́твами, священному́чениче Анато́лие. Кондак, глас 4 Дне́сь проро́ческое о тебе́, гра́де сла́вный, совершишися, е́же рече́ святи́тель Алекси́й, я́ко гра́д ве́лий, и мы́ я́ко ста́рец прикло́ньше мо́лимся за благода́ть, я́же излия́л на зе́млю на́шу Госпо́дь, яви́в сла́ву Свою́ в лю́дех Свои́х, и́х же па́мять ны́не соверша́ем. Кондак, глас 4 Явился еси Православныя Церкви столп, Христовых заповедей усердный делатель, приходящим к тебе с верою скорый помощник, в скорбех и нуждах утешитель и мудрый наставник: темже и нам любовию почитающим тя, грехов оставление испроси, обитель и град сей невредимы сохрани, праведне Александре отче наш, молитвенниче о нас пред Богом теплейший. Кондак, глас 4 Боже́ственный ратобо́рец показа́лся еси́,/ о́тче наш Варсоно́фие,/ кресто́м низлага́я си́лу вра́жию,/ и си́лою Богода́нною чудеса́ сотворя́я,/ те́мже О́птина пу́стынь венча́ся сла́вою твои́х духо́вных побе́д,/ полково́дче мона́шествующих пресла́вный:/ и ны́не моли́ся Царю́ Христу́,/ побе́ды над страстьми́ дарова́ти,// ве́рою и любо́вию соверша́ющим па́мять твою́. Ин кондак, глас 8 Я́ко со́лнце незаходи́мое, от гро́ба возсия́ нам/ от мног лет сокрове́ны честны́я твоя́ мо́щи нетле́нны,/ святи́телю Алекси́е,/ тобо́ю благода́ть прие́млем:/ всю бо страну́ сию́ и вся ны чудесы́ и добро́тою обогаща́еши,/ де́йством благода́ти, да пое́м ти:// ра́дуйся, о́тче, свети́ло Росси́и. Ин кондак, глас 3 Я́ко светоно́сная па́мять святи́теля/ всем разруши́ уны́ние/ и свет облиста́ Небе́сных даро́в,/ всех созыва́ющи на весе́лие:/ от Бо́га бо, святи́телю Алекси́е, благода́ть обре́те прогоня́ти неду́ги/ и вся челове́ки исцеля́ти,// и мни́хом же степе́нь показа́ся.

Величание

Велича́ем вас,
святи́телие Христо́вы
Пе́тре, Алекси́е, Ио́но, Фили́ппе и Ермоге́не,
и чтим святу́ю па́мять ва́шу:
вы бо мо́лите за нас

Христа́ Бо́га на́шего.

Величание

Велича́ем ва́с, святи́и земли́ Сама́рския, и чти́м святу́ю па́мять ва́шу, вы́ бо моли́те за на́с Христа́ Бо́га на́шего.

Молитва

О, пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Алекси́е! Предстоя́ у Престо́ла всех Царя́, и наслажда́яся Све́та Единосу́щныя Тро́ицы, и херуви́мски со А́нгелы возглаша́я песнь Трисвяту́ю, ве́лие и неизсле́дованное дерзнове́ние име́я ко Всеми́лостивому Влады́це, моли́ся спасти́ лю́ди па́ствы твоея́, единоро́дный ти язы́к; благостоя́ние святы́х церкве́й утверди́, архиере́и благоле́пием святи́тельства украси́; мона́шествующия к по́двигом до́браго тече́ния укрепи́; град сей (или: весь сию́; аще во обители: святу́ю оби́тель сию́) и вся гра́ды и страны́ до́бре сохрани́ и ве́ру святу́ю непоро́чну тем соблюсти́ Го́спода умоли́; мир весь умири́, от гла́да и па́губы изба́ви ны и от нападе́ния иноплеме́нных сохрани́ нас; ста́рыя уте́ши, ю́ныя накажи́ (научи́), безу́мныя умудри́, вдови́цы поми́луй, си́роты заступи́, младе́нцы возрасти́, плене́нныя возврати́, немощству́ющия исцели́ и ве́зде те́пле призыва́ющих тя и с ве́рою притека́ющих к ра́це честны́х и многоцеле́бных моще́й твои́х, усе́рдно припа́дающих и моля́щих ти ся от вся́ких напа́стей и бед хода́тайством твои́м свободи́, да зове́м ти: о Богоизбра́нный па́стырю, звездо́ всесве́тлая мы́сленныя тве́рди, та́йнаго Сио́на необори́мый сто́лпе, миродохнове́нный цве́те ра́йский, всезлата́я уста́ Сло́ва, моско́вская похвало́, всея́ Росси́и украше́ние! Моли́ о нас Всеще́драго и Человеколюби́ваго Христа́ Бо́га на́шего, да в день стра́шнаго прише́ствия Его́ шу́ияго стоя́ния изба́вит нас и ра́дости святы́х прича́стники сотвори́т со все́ми святы́ми во ве́ки. Ами́нь.

Молитва

О, священному́чениче святи́телю о́тче Анато́лие! К тебе́, моли́твеннику те́плому и пред Бо́гом предста́телю усе́рдно притека́ем. В лю́тую годи́ну гоне́ний и испыта́ний земли́ на́шея, внегда́ безбо́жныя врази́ преда́ша сме́рти ве́рныя рабы́ Бо́жия и хра́мы святы́я сокруши́ша, яви́л тя́ Госпо́дь Це́ркве своея́ а́ки сто́лп непоколеби́м и лю́дем Бо́жиим па́стыря до́бра, ду́шу свою́ за о́вцы полага́юща и во́лки душепа́губныя дале́че отгоня́юща. Ны́не у́бо при́зри на на́с, со умиле́нною душе́ю и сокруше́нным се́рдцем тебе́ призыва́ющих. Кре́пость бо на́ша в на́с оскуде́ и вра́жия ловле́ния и се́ти окружи́ша на́с. Моли́ся за на́с, да не поги́бнем до конца́ со беззако́ньми на́шими, но да обрати́т на́с Госпо́дь на стезю́ покая́ния и спасе́ния, да прости́т на́м вся́ согреше́ния на́ша и ниспо́слет ми́р на гра́ды и ве́си на́ша, изба́вит на́с от наше́ствия иноплеме́нников, междоусо́бныя бра́ни и вся́ких раздо́ров и нестрое́ний. Утверди́, священному́чениче, ве́ру и благоче́стие во все́х ча́дех Правосла́вныя Це́ркве, испроси́ на́м от Го́спода му́жества да́р, да яви́мся насле́дницы Ца́рствия Небе́снаго, сохраня́я ве́рность до конца́ жи́зни на́шея Го́споду Бо́гу и Спа́су на́шему Иису́су Христу́. Ему́ же подоба́ет вся́кая сла́ва, че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в. Ами́нь.

Молитва

О, священному́чениче и испове́дниче Христо́в Влади́мире! Услы́ши сле́зныя моли́твы чад твои́х и воздыха́ния, се́рдцем сокруше́нным и смире́нным тебе приноси́мыя. Се бо беззако́нии омрачи́хомся и того́ ра́ди беда́ми, я́ко ту́чами, обложи́хомся. Но ты, свя́те Влади́мире, понеси́ я́ко си́льный не́мощи на́ша, не отлуча́йся от нас ду́хом, да не разлучи́мся вконе́ц от любве́ Бо́жия. При́зри ми́лостивно на нас, предстоя́щих и моля́щихся пред свято́ю ико́ною твое́ю и вся проше́ния наша во благо́е испо́лни. Ве́руем бо, я́ко твои́х страда́ний ра́ди ве́лие дерзнове́ние ко Го́споду и́маши. Его́же умоли́, да укрепи́т ны в Правосла́вии и единомы́слии и непоколеби́мем да́же до сме́рти испове́дании ве́ры Христо́вы, страну́ на́шу да спасе́т от междоусо́бныя бра́ни, па́стырем на́шым да пода́ст духо́вное трезве́ние и ре́вность о спасе́нии пасо́мых, прави́телем же суд и пра́вду, оби́димым заступле́ние, неду́гующим душ и теле́с исцеле́ние. Мы же, гре́шнии, твои́м предста́тельством укрепля́еми, восхва́лим Го́спода Иису́са Христа́, Ему́же подоба́ет сла́ва, че́сть и поклоне́ние, со Безнача́льным Его́ Отце́м и Пресвяты́м Ду́хом, ны́не и при́сно, и во ве́ки веко́в. Ами́нь.

Молитва

О, преди́вный святи́телю, богому́дрый и всесвяты́й о́тче на́ш священному́чениче Вениами́не! К тебе́ ны́не прибега́ем ве́рою и любо́вию чту́щии тя́, похвалы́ сия́ принося́ще от всего́ се́рдца и помышле́ния. Мо́лим тя́ приле́жно, страстоте́рпче святы́й, не забу́ди ны́ к тебе́ усе́рдно притека́ющих: утверди́ на́с в ве́ре святе́й правосла́вней, научи́ на́с всегда́ твори́ти за́поведи Бо́жия, исцели́ боле́зни душе́вныя и теле́сныя, бу́ди на́м покрови́телем и прибе́жищем в ско́рбех и напа́стех, заступи́ ны́ от вра́г ви́димых и неви́димых, да и мы́ богоуго́дне преше́дше по́прище сея́ жи́зни, твои́м предста́тельством и богоприя́тными моли́твами бу́дем насле́дницы Ца́рствия Бо́жия и сподо́бимся с тобо́ю предстоя́ти Престо́лу Царя́ Сла́вы, поклоня́яся Ему́ и воспева́я во ве́ки веко́в. Ами́нь.

Молитва

О великий и пречудный угодниче Христов, отче наш праведне Александре, земли Поволжския благое прозябение и ходатаю о всех зде живущих и повсюду труждающихся православных христианех: воззри ныне на нас недостойных милостивым твоим оком и виждь яко зело умножишася скорби и злострадания в мире сем, во грехах и беззакониях иждиваем дни своя, данное же нам время на покаяние в суетных и многомятежных страстех провождающе, умильно просим и молим тя, заступниче наш: помози нам чадом твоим и испроси предстательством твоим ко Всевышнему Владыце вся яже к житию и благочестию полезная и благопотребная: болящия исцели, немощныя подкрепи, печальныя и унылыя ободри, скорбящия утеши и поверженныя возстави. Вознеси, угодниче Божий, всемощную молитву твою да утвердится в державе нашей мир и благоденствие, благочестие и единомыслие, да пребудет во благих человецех правда и милость, в злых же страх и раскаяние, во еже престати им от зла и творити добрая, да тобою наставляеми и вразумляеми, прославим дивнаго во святых Своих Бога: Емуже Единому подобает всякая слава, честь и поклонение, Отцу и Сыну и Святому Духу, ныне и присно, и во веки веков. Аминь.

Молитва

О, свяще́нне во́ине и богому́дрый о́тче на́ш Варсоно́фие, О́птинскаго ста́рчества венцено́сный побо́рниче. Ты́ сла́ву ми́ра сего́ не возлюби́в, ниже́ по́чести и житие́ разсла́бленно, но во́инскую че́сть соблю́д до конца́ и земно́е три́знище оста́вив, вво́инился еси́ Царю́ Христу́ и со безпло́тными А́нгелы на де́моны ра́товал, и побе́ды по́чести прия́л еси́. Те́мже под твое́ предста́тельство, я́ко под кре́пкий щи́т, прибега́ем, и на лу́к моли́тв твои́х наде́ющеся, мо́лим тя́, о́тче преподо́бне, уте́ши ны́ я́ко оте́ц чадолюби́вый, и я́ко сыно́в на́с утверди́, облегча́я ско́рбь належа́щую, избавля́я от ну́жд ду́ши на́ша. Да́ждь на́м твоему́ житию́ после́довати и неукло́нно соблюсти́ преда́ния святы́х оте́ц, и́хже ты́ запове́дал еси́ блюсти́ да́же до сме́рти. Е́й, о́тче, бу́ди на́м побо́рник в мы́сленных бране́х на́ших, и́хже ведем со страстьми́ и духа́ми лука́выми, я́ко не́мощни есмы́ и неиску́сни. Ты́ же, я́ко иску́с послуша́ния проше́д и благода́ть ста́рчества унасле́довав, мо́жеши и на́м искуша́емым помощи́. Да под кро́вом моли́тв твои́х храни́ми, воспое́м и просла́вим Подвигополо́жника на́шего Го́спода Иису́са Христа́ со Отце́м и Животворя́щим Его́ Ду́хом всегда́, ны́не и при́сно, и во ве́ки веко́в. Ами́нь.

2-я Молитва

О, свяще́ннейший о́тче, святи́телю Христо́в Алекси́е, па́стырю и учи́телю наш, не отри́ни нас (имена), с ве́рою притека́ющих к твоему́ заступле́нию, но ско́ро потщи́ся помоли́тися Царю́ ца́рствующих и Го́споду госпо́дствующих, да изба́вит ста́до Свое́ от волко́в, гу́бящих е́, и вся́ку страну́ христиа́нскую огради́ и сохрани́ святы́ми твои́ми моли́твами от мирска́го мяте́жа и тру́са, наше́ствия иноплеме́нник и междоусо́бныя бра́ни, от гла́да же и губи́тельства, пото́па, и меча́, и огня́, и напра́сныя сме́рти, и я́коже исцеле́нием от слепоты́ цари́цы ага́рянския спасл еси́ оте́чество твое́, та́ко поми́луй и нас, умо́м, сло́вом и де́лом во тьме грехо́вней су́щих, и изба́ви нас гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию, Христо́с Бог ти́хое и безгре́шное житие́ даст нам пожи́ти в ве́це сем и на Стра́шнем суди́ще Свое́м сподо́бит десна́го стоя́ния со все́ми святы́ми. Ами́нь.

5-я Молитва

О, пречестна́я и свяще́нная главо́, Небе́снаго Иерусали́ма граждани́не, изря́дный уго́дниче Христо́в и вели́кий Оптинский чудотво́рче, преподо́бне о́тче Варсоно́фие! При́зри от Го́рних высо́т на на́с, смире́нных и гре́шных, во умиле́нии серде́ц к тебе́ прибега́ющих. Тебе́ бо моли́твенника благоприя́тнаго ве́мы ко Всеми́лостивому Бо́гу и ко Пресвяте́й и Пречи́стей Ма́тери Его́, Влады́чице на́шей Богоро́дице и Присноде́ве Мари́и. Вознеси́ о на́с твоя́ святы́я моли́твы ко Престо́лу Человеколю́бца Го́спода, дабы́ не поги́бнути на́м со беззако́нии на́шими, но обрати́тися к покая́нию и исправле́нию, да про́чее вре́мя жития́ на́шего земна́го не в рабо́те греху́ и страсте́м, но в де́лании за́поведей Его́ святы́х и в благоче́стии провожда́ем, и со благо́ю наде́ждою дости́гнем кончи́ны на́шея. В ча́с же сме́ртный наипа́че яви́ся на́м, о́тче, засту́пник благи́й, ускори́ на моли́тву о на́с, безпомо́щных, и помози́ на́м со Прича́стием Та́инств Боже́ственных ми́рную и благу́ю кончи́ну улучи́ти, гро́зная мыта́рства возду́шная безбе́дно прейти́ и унасле́довати Го́рнее Ца́рство. Е́й, о́тче приснопа́мятный, не пре́зри на́с и не посрами́ упова́ния на́шего, но бу́ди о на́с предста́тель немо́лчный к Бо́гу. Па́стырю на́ш до́брый, упаси́ на́с бо́дренными твои́ми моли́твами и сохрани́ ненаве́тны от вся́каго зла́, да сла́вим неизрече́нное человеколю́бие Бо́га на́шего, Отца́ и Сы́на и Свята́го Ду́ха, и твое́ оте́ческое заступле́ние, во ве́ки веко́в. Ами́нь.

Канон на преставление святителя Алексия, митрополита Московского и всей России, чудотворца

Минея, 12 Февраля.

Глас 8

Песнь 1

Ирмос: Колесницегони́теля фарао́ня погрузи́
чудотворя́й иногда́
Моисе́йский жезл, крестообра́зно порази́в
и раздели́в мо́ре,
Изра́иля же беглеца́, пешехо́дца спасе́,
песнь Бо́гови воспева́юща.

Припев: Святи́телю о́тче Алекси́е, моли́ Бо́га о на́с.

Колесни́цею благода́ти Твоея́, Го́споди, возвы́си на́ша по́мыслы от до́льних на Го́рняя
и сподо́би восхвали́ти уго́дника Твоего́, святи́теля Алекси́я,
песнь Тебе́, Бо́гу, воспева́юща.

Припев: Святи́телю о́тче Алекси́е, моли́ Бо́га о на́с.

Колесни́цею хода́тайств твои́х
ум наш, отягче́нный жите́йскими печа́льми, возвы́си от земны́х к Небе́сным
и наста́ви восхвали́ти тя досто́йно, о́тче Алекси́е,
песнь побе́дную Бо́гу воспева́юща.

Припев: Святи́телю о́тче Алекси́е, моли́ Бо́га о на́с.

Колесни́цу го́рдости ми́ра сего́ превозше́л еси́ смире́нием,
и, взем крест твой, после́довал еси́ Христу́ добро́тами,
и, во приста́нище го́рняго селе́ния дости́г,
песнь Бо́гу побе́дную воспева́еши.

Сла́ва Отцу́ и Сы́ну и Свято́му Ду́ху.

Колесни́цею доброде́телей, я́ко Илия́ о́гненною, возше́л еси́ на Не́бо,
отону́дуже моли́ Бо́га низпосла́ти я́ко ми́лоть благода́ть Ду́ха,
уча́щую ны песнь побе́дную Бо́гу воспева́ти.

И ны́не и при́сно и во ве́ки веко́в. Ами́нь.

Богородичен: Колесни́ца огнеобра́зная, носи́вшая Бо́га Сло́ва,
во чре́ве Твое́м воплоще́ннаго,
моли́ Его́ приле́жно спасти́ся рабо́м Твои́м,
к Тебе́ притека́ющим и побе́дную песнь Бо́гу воспева́ющим.

Песнь 3

Ирмос: Небе́снаго кру́га Верхотво́рче Го́споди,
и Це́ркве Зижди́телю,
Ты мене́ утверди́ в любви́ Твое́й,
жела́ний кра́ю, ве́рных утвержде́ние,
Еди́не Человеколю́бче.

Припев: Святи́телю о́тче Алекси́е, моли́ Бо́га о на́с.

Небе́снаго кру́га и всея́ тва́ри Госпо́дь,
предве́дый тя, о́тче Алекси́е, бу́дуща па́стыря добра́,
вве́ри тебе́ па́ству слове́сную, я́ко Еди́н Человеколю́бец.

Припев: Святи́телю о́тче Алекси́е, моли́ Бо́га о на́с.

Небе́снаго кру́га возлюби́в Творца́,
посто́м облегче́н, страсте́й мо́ре преше́л еси́ и, на безстра́стия верх доброде́тельми возше́д,
Бо́га узре́л еси́, Еди́наго Человеколю́бца.

Сла́ва Отцу́ и Сы́ну и Свято́му Ду́ху.

Небе́снаго кру́га на высоту́ возше́д Богоразу́мием,
уви́дел еси́ у́мно та́мо неизрече́нная
и прия́л еси́ дар чудотворе́ния от Бо́га Человеколю́бца.

И ны́не и при́сно и во ве́ки веко́в. Ами́нь.

Богородичен: Небе́снаго кру́га Верхотво́рца, хотя́ща роди́тися из Тебе́, Пречи́стая, возвести́ Тебе́ Гаврии́л:
ра́дуйся, Де́во, Госпо́дь с Тобо́ю, Еди́н Человеколю́бец.

Седален, глас 4

Благово́нною сло́ва Бо́жияго па́житию
слове́сную па́ству Христо́ву Богоуго́дно воспита́нную,
па́стырским Богодухо́вным исправле́ния жезло́м
на пра́вую спасе́ния стезю́ путево́дствив я́ко до́брый па́стырь,
удосто́ился еси́ нетле́нну ве́чныя жи́зни мзду восприя́ти
в Го́рнем Сио́не от Пастыренача́льника Христа́ Бо́га.
Его́же моли́, досточу́дне Алекси́е,
нам, твои́м о́вцам слове́сным, сохрани́тися от неви́димых волко́в хи́щных.

Песнь 4

Ирмос: Ты моя́ кре́пость, Го́споди,
Ты моя́ и си́ла,
Ты мой Бог, Ты мое́ ра́дование,
не оста́вль не́дра О́тча
и на́шу нищету́ посети́в.
Тем с проро́ком Авваку́мом зову́ Ти:
си́ле Твое́й сла́ва, Человеколю́бче.

Припев: Святи́телю о́тче Алекси́е, моли́ Бо́га о на́с.

Ты моя́ кре́пость, Го́споди, Ты моя́ и си́ла,– вопия́, о́тче Алекси́е, прия́л еси́ дар
теле́сныя неду́ги цели́ти и лука́выя ду́хи отгоня́ти от зову́щих Христу́:
си́ле Твое́й сла́ва, Человеколю́бче.

Припев: Святи́телю о́тче Алекси́е, моли́ Бо́га о на́с.

Ты еси́ свети́ло Росси́йския земли́ и гра́ду Москве́ стена́ неруши́ма,
на враги́ же победи́тель,
и христоимени́тым лю́дем во бране́х посо́бник,
зову́щим Христу́
си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху.

Ты Богосло́вил еси́ Едини́цу несозда́нную,
в Трие́х Ли́цех су́щую, неслива́ему же и неразде́льну,
воумля́я па́ству твою́, о́тче Алекси́е, непреста́нно зва́ти:
си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Ты моя́ кре́пость еси́ вои́стинну и спасе́ние, Богоро́дице,
и на Тя наде́жду мою́ возложи́х,
спаси́ мя, Де́во Чи́стая, и укрепи́ ро́ждшемуся из Тебе́ зва́ти:
си́ле Твое́й сла́ва, Человеколю́бче.

Песнь 5

Ирмос: Вску́ю мя отри́нул еси́
от лица́ Твоего́, Све́те Незаходи́мый,
и покры́ла мя есть чужда́я тьма, окая́ннаго?
но обрати́ мя и к све́ту за́поведей Твои́х
пути́ моя́ напра́ви, молю́ся.

Припев: Святи́телю о́тче Алекси́е, моли́ Бо́га о на́с.

Вску́ю проти́внии ополча́ются на ны, иму́щия тя кре́пка побо́рника?
Ты, о́тче Алекси́е, де́рзость их низложи́ и во́инство на́ше моли́твою твое́ю стра́шно им покажи́.

Припев: Святи́телю о́тче Алекси́е, моли́ Бо́га о на́с.

Вску́ю уныва́ем, согнета́емии мно́жеством печа́лей,
иму́ще ско́рбных уте́шителя – святи́теля Алекси́я,
избавля́юща ны от бед и скорбе́й на́ших
и от враг ви́димых же и неви́димых?

Сла́ва Отцу́ и Сы́ну и Свято́му Ду́ху.

Вску́ю, о́тче Алекси́е, теле́сныя не́мощи нахо́дят на ны, и беды́ окружа́ют ны,
врача́ тя иму́щия в боле́знех и уте́шителя в ско́рбех?
изми́ у́бо ны от сих моли́твами твои́ми.

И ны́не и при́сно и во ве́ки веко́в. Ами́нь.

Богородичен: Вску́ю обурева́ют мя во́лны страсте́й,
ко́рмчия Христа́ ро́ждшая, Де́во Всенепоро́чная?
Ты Его́ моли́ сих исхи́тити мя
и к стези́ за́поведей Его́ пути́ моя́ упра́вити, молю́ся.

Песнь 6

Ирмос: Очи́сти мя, Спа́се,
мно́га бо беззако́ния моя́
и из глубины́ зол возведи́, молю́ся ,
к Тебе́ бо возопи́х, и услы́ши мя,
Бо́же спасе́ния моего́.

Припев: Святи́телю о́тче Алекси́е, моли́ Бо́га о на́с.

Очи́сти ны, Спа́се, от мно́гих грехо́в на́ших
и боле́зни отжени́ моли́твами святи́теля Твоего́ Алекси́я,
и мир Церква́м Твои́м подаждь и соедине́ние.

Припев: Святи́телю о́тче Алекси́е, моли́ Бо́га о на́с.

Очи́сти сердца́ на́ша и мы́сли хода́тайствы твои́ми, о́тче,
и, прии́м от нас приноси́мыя тебе́ моли́твы,
испроси́ у Христа́ обрести́ нам велию ми́лость.

Сла́ва Отцу́ и Сы́ну и Свято́му Ду́ху.

Очи́стив се́рдце твое́, о́тче Алекси́е,
и трость язы́ка твоего́ изостри́в Ду́хом,
написа́л еси́ в сердца́х ве́рных сло́во Богоразу́мия уче́ньми твои́ми.

И ны́не и при́сно и во ве́ки веко́в. Ами́нь.

Богородичен: Очище́нну Тя Ду́хом, Всенепоро́чная, Арха́нгел Гаврии́л позна́в,
зовя́ще Тебе́:
ра́дуйся, Де́во Мари́е, па́дших воззва́ние и кля́твы разреше́ние.

Кондак, глас 8

Боже́ственнаго и пречестна́го святи́теля Христо́ва,
но́ваго чудотво́рца Алекси́я,
ве́рно вси пою́ще, лю́дие, любо́вию да ублажи́м, я́ко па́стыря вели́каго,
служи́теля же и учи́теля прему́дра земли́ Росси́йстей.
Днесь, в па́мять его́ прите́кше,
ра́достно возопие́м песнь Богоно́сному:
я́ко име́я дерзнове́ние к Бо́гу,
многообра́зных нас изба́ви обстоя́ний, да зове́м ти:
ра́дуйся, утвержде́ние гра́ду на́шему.

Икос

Ди́внаго и пречестна́го чудотво́рца ви́дяще чудеса́,
исцеле́ния подава́юща всем, от души́ с ве́рою притека́ющим,
и Христо́вы лю́ди неви́димо посеща́юща,
и зе́млю Росси́йскую просвеща́юща,
ра́достно от души́ вси, вку́пе соше́дшеся к ра́це моще́й его́,
слы́шаще же и ви́дяще чуде́с мно́жество и исто́чник исцеле́ний неисчерпа́емь,
чи́стыми сердцы́ и просвеще́нными ра́зумы, я́ко благоуха́нно кади́ло,
плоды́ доброде́тельны от души́ принося́ще
и ра́дующеся, воззове́м ему́, глаго́люще:
ра́дуйся, о́тче, честны́й наш учи́телю,
я́ко прия́л еси́ трудо́в твои́х воздая́ние
и в Вы́шних водворя́ешися, о нас моля́ Человеколю́бца Бо́га.
Чуде́с дар прия́л еси́,
земли́ Росси́йстей оте́ц и учи́тель,
и святи́телем изря́дная похвала́,
и во́инству на́шему во бране́х посо́бник кре́пок.
Ра́дуйся, святи́телю Алекси́е, гра́ду на́шему утвержде́ние.

Песнь 7

Ирмос: От Иуде́и доше́дше, о́троцы
в Вавило́не иногда́,
ве́рою Тро́йческою пла́мень пе́щный попра́ша, пою́ще:
отце́в Бо́же, благослове́н еси́.

Припев: Святи́телю о́тче Алекси́е, моли́ Бо́га о на́с.

От Иуде́и отроко́м поревнова́в, огнепа́льныя стра́сти угаси́л еси́,
Христу́ при́сно поя́, блаже́нне Алекси́е:
отце́в Бо́же, благослове́н еси́.

Припев: Святи́телю о́тче Алекси́е, моли́ Бо́га о на́с.

От Иуде́и о́троки подража́л еси́,
живу́щею бо в тебе́ Ду́ха благода́тию просве́щься,
воспе́л еси́ Христу́:
отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху.

От Иуде́и отроко́м ревну́ем,
ви́дяще мо́щи твоя́ чудоточа́щия, любо́вию распаля́еми, Христу́ зове́м:
отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: От Иуде́и о́троцы Твое́ прообрази́ша Рождество́, Де́во Всечи́стая,
огнь бо в пещи́ не опали́ их, пою́щих:
отце́в Бо́же, благослове́н еси́.

Песнь 8

Ирмос: Царя́ Небе́снаго,
Его́же пою́т во́и А́нгельстии,
хвали́те и превозноси́те во вся ве́ки.

Припев: Святи́телю о́тче Алекси́е, моли́ Бо́га о на́с.

Царя́ Небе́снаго хвали́ти учи́л еси́ па́ству твою́, зовы́й:
по́йте и превозноси́те Христа́ во ве́ки.

Припев: Святи́телю о́тче Алекси́е, моли́ Бо́га о на́с.

Царя́ Небе́снаго умоли́ о нас, ча́дех твои́х,
ра́достно пою́щих и превознося́щих Его́ во ве́ки.

Сла́ва Отцу́ и Сы́ну и Свято́му Ду́ху.

Царю́ Небе́сному предстоя́, па́ству твою́ назира́й,
пою́щую и превознося́щую Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Царя́ Небе́снаго родила́ еси́, Дево,
Его́же А́нгели пою́т и превозно́сят во вся ве́ки.

Песнь 9

Ирмос: Вои́стинну Богоро́дицу,
Тя испове́дуем,
спасе́ннии Тобо́ю, Де́во Чи́стая,
с Безпло́тными ли́ки Тя велича́юще.

Припев: Святи́телю о́тче Алекси́е, моли́ Бо́га о на́с.

Вои́стинну свет ми́ру яви́лся еси́, светя́щ добро́детельми,
и па́стырь изря́ден твоего́ ста́да был еси́,
Христа́ велича́юща.

Припев: Святи́телю о́тче Алекси́е, моли́ Бо́га о на́с.

Вои́стинну ве́мы тя, о́тче, чудотво́рца вели́ка,
точа́ща мно́га чудеса́ ве́рно к тебе́ приходя́щим
и Христа́ велича́ющим.

Сла́ва Отцу́ и Сы́ну и Свято́му Ду́ху.

Вои́стинну све́тло па́мять пра́зднуют святи́теля Алекси́я
архиере́и, и свяще́нницы, мона́си и вси лю́дие,
Христа́ Бо́га велича́юще.

И ны́не и при́сно и во ве́ки веко́в. Ами́нь.

Богородичен: Вои́стинну Ты еси́ христиа́ном спасе́ние:
Христа́ бо родила́ еси́, спаса́ющаго ны,
Де́ву Чи́сту Тя велича́ющия.

Светилен

Благода́ть Свята́го Ду́ха, все́льшаяся в тя, святи́теля тя показа́,
Христо́с же ти вручи́ па́ству Свою́ па́ствити на па́житех духо́вных,
Его́же ра́ди потща́лся еси́ наставля́ти лю́ди,
и ны́не на Небесе́х, ра́дуяся, живе́ши.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: По Бо́зе упова́ние иму́ще на Тя, Пречи́стая Богоро́дице,
мо́лим Ти ся,
ко и́же из Тебе́ Ро́ждшемуся мольба́ми
невреди́мы нас до конца́ сохрани́.

Акафист святителю Алексию, митрополиту Московскому и всея России, чудотворцу

Кондак 1

Избранный архиерею и слуго Великаго Архиерея Иисуса, преблаженне Алексие! Яко сподобльшеся многих твоих благодеяний, не имеюще же что воздати, похвальная восписуем ти и от души взываем, проповедающе чудеса твоя: испроси нам от Царя Небеснаго безбедно преити прочее жития сего и достигнути Горняго Иерусалима, да тамо узревше тя в блаженней радости, воззовем к тебе:

Радуйся, Алексие, великий чудотворче и скорый помощниче.

Икос 1

Ангеле, от земли прозябый! Великаго Совета Ангел, провидев доброту души твоея, прежде век избра тебе, еже благовестити плененным отпущение и слепым прозрение. Отнюдуже мы, грешнии, светом дел твоих получивше прозрение и грехов отпущение, взываем:

Радуйся, корене благаго отрасль блажайшая; радуйся, честных родителей добрейший сыне.

Радуйся, благоуханнаго сада прозябение; радуйся, духовным возрождением Богу Отцу усыновленный.

Радуйся, миропомазанием Святаго Духа запечатленный; радуйся, имя, яко миро излиянное, свыше восприявый.

Радуйся, от пелен Богу посвященный; радуйся, мужественно иго Христово на себе возложивый.

Радуйся, земная и мимотекущая, яко уметы, вменивый; радуйся, егоже Человек домовит — Иисус утро наят делателя в виноград Свой.

Радуйся, образ Божий и подобие свято соблюдший; радуйся, красото, душевныя и телесныя всех очи увеселяющая.

Радуйся, Алексие, великий чудотворче и скорый помощниче.

Кондак 2

Видя откровением Духа Святаго, яко не устоят нечестивии на суде праведнем, но суть яко прах, егоже возметает ветр, от младых ногтей, преблаженне Алексие, на совет их не шел еси, ниже на пути грешных человеков стал еси, но, Закону Божию усердно поучался, и прочим внушал еси пети: Аллилуиа.

Икос 2

Разум свыше прием, мал детищ сущь, еже не труждатися всуе в ловлении птиц, потщался еси вся яже на земли красная оставити. Темже мы приглашаем тебе:

Радуйся, на ловитву человеков призванный; радуйся, к Горним, яко на крилах возлетавый.

Радуйся, море житейское любомудрием испытавый; радуйся, волнение его безопасно прошедый.

Радуйся, земле благая, семя слова Божия восприявшая; радуйся, земле, плод сторичный произрастившая.

Радуйся, пшенице, хлеб Небесный устроившая; радуйся, в житнице Небесной соблюденная.

Радуйся, обретый многоценный бисер и его всем, елика имел еси, купивый; радуйся, зельным пощением, яко благовкусною пищею, от юности питавыйся.

Радуйся, всенощным стоянием и непрестанными молитвами себе в подвизе укрепивый; радуйся, в море слез твоих множества демонов потопивый.

Радуйся, Алексие, великий чудотворче и скорый помощниче.

Кондак 3

Силою свыше, егда облече тя Дух Всесвятый, пастыря Церкви российстей поставляя, тогда всем людем твоим вдыхал еси хвалу: Аллилуиа.

Икос 3

Подобаше, отче Алексие, с Небесе песни тебе воспеваемей быти, а не от земли: кто бо от человек возможет по достоинству твоея святыни величия поведати? Но мы, любовию твоею побеждаеми, вопием ти сице:

Радуйся, дольняя и красная мира презревый; радуйся, вышних красот желанием воспаленный.

Радуйся, Единаго Христа от сердца возлюбивый; радуйся, Тому Единому всею душею прилепивыйся.

Радуйся, правило веры благочестивыя; радуйся, благий делателю винограда Христова.

Радуйся, дарованный талант приумноживый; радуйся, в радость Господа твоего вшедый.

Радуйся, сладостьми духовными нас насыщающий; радуйся, благоприятное Богу кадило.

Радуйся, благоухание молитвы к Престолу Вышняго возносящий; радуйся, любовный к Богу о нас предстателю.

Радуйся, Алексие, великий чудотворче и скорый помощниче.

Кондак 4

Бурю безместных помыслов, от диавола непрестанно воздвизаемую, до конца укротил еси и, радуяся о такове победе, торжественне Богу воспевал еси: Аллилуиа.

Икос 4

Слыша и видя премногую твою добродетель, пастыря тя Церкве Христовы избирает сословие православное, мы же, о сем веселящеся, глаголем ти:

Радуйся, достойно возседый на седалище апостольстем; радуйся, кормило корабля Христова.

Радуйся, мудрый наставниче; радуйся, звезде непрелестная, в руце Христовой содержимая.

Радуйся, в подвизе учительства неутомимый; радуйся, безвестных и тайных Премудрости Божия проповедниче.

Радуйся, нелицеприемный Истины поборниче; радуйся, безбожных и нечестивых устен обличителю и заградителю.

Радуйся, благовременне и безвременне в учении апостолу поревновавый; радуйся, властию, данною ти свыше, мудре и душеполезне человеки вязавый и решивый.

Радуйся, кающихся утешителю; радуйся, паствы твоея добрый хранителю.

Радуйся, Алексие, великий чудотворче и скорый помощниче.

Кондак 5

Боготочною Кровию искупившаго род человеческий от законныя клятвы верою зря Владыку и усердне к Нему любовию распалаемь, непрестанно возглашал еси: Аллилуиа.

Икос 5

Видев великий князь твое велие духа мужество и любовь к Отечеству твоему, умоли тя поити к безбожному царю Вердевиру: ты же абие шед благими и кроткими словесы зельный гнев его на род христианский утолил еси. Сия благодеяния твоя, отче наш Алексие, мы, сынове российстии, исповедующе, благодарне вопием ти:

Радуйся, мужественный Духа воине; радуйся, столпе крепости нашея от лица вражия.

Радуйся, оружие, без рати супостаты побеждающее; радуйся, щите, от напастей ограждающий.

Радуйся, яко кокош, птенцы своя охраняющий; радуйся, жезле, падающих подкрепляющий.

Радуйся, пастырю, волков от стада отгоняющий; радуйся, душу свою за овцы положити не отрекийся.

Радуйся, любве Христовы истый хранителю; радуйся, не яже своя, но яже ближняго взыскавый.

Радуйся, скорбящих скорое услышание; радуйся, печальми обуреваемым тихое пристанище.

Радуйся, Алексие, великий чудотворче и скорый помощниче.

Кондак 6

Проповедницы твоея святыни нам суть нетленныя твоя честныя мощи, чрез многа лета пред очами нашими лежащия, иже, аще и запечатанным сущим устом твоим молчанием, обаче вопиют непрестанно: Аллилуиа.

Икос 6

Возсия слава многих чудес твоих не токмо в преславнем граде сем, но и в неверных агарянех, отнюдуже нечестивый царь их Джанибек желаше, да помолишися о ослепшей царице его: ты убо, всю надежду возложив на Врача душ и телес, силою молитв твоих зрение той испросил еси. Мы же, удивльшеся таковому преславному чудеси, взываем ти:

Радуйся, угодное чудес Божиих орудие; радуйся, в скудельном сосуде сокровище силы Божия явивый.

Радуйся, предсказания евангельскаго исполнителю; радуйся, деснице чудотворения Иисусова.

Радуйся, язык Христов, словом исцеляяй; радуйся, апостольския силы сохранителю.

Радуйся, слепых просветителю; радуйся, немощных целебниче.

Радуйся, тайных провидче; радуйся, бесов от человек прогонителю.

Радуйся, силою чудес и невернаго царя Церковь почтити и возвеличити преклонивый; радуйся, не телесное токмо, но и душевное зрение подаваяй.

Радуйся, Алексие, великий чудотворче и скорый помощниче.

Кондак 7

Хотящу тебе благоугодити Творцу твоему, не седмый токмо день освящал еси, но всю седмицу жития твоего во святости провождал еси, воспевая Богу: Аллилуиа.

Икос 7

Новую тя показа тварь Зиждитель, всеблаженне Алексие, земна ангела и небесна человека. Темже чудящеся воспеваем ти:

Радуйся, отче наш, обитаяй духом в Небеси, а телом на земли опочиваяй; радуйся, дивная величия Божия всем поведаяй земнородным.

Радуйся, плоть духу покоривый; радуйся, пленивый разум свой в послушание веры.

Радуйся, рыкающаго адскаго льва уста заградивый; радуйся, огнь похоти плотския погасивый.

Радуйся, сребролюбия идол сокрушивый; радуйся, над всеми кознями вражиими восторжествовавый.

Радуйся, отвергийся себе и волю свою воле Божией покоривый; радуйся, питавыйся сокровенным хлебом Небесным.

Радуйся, алкавый и жаждавый единыя правды; радуйся, Царствие Божие внутрь себе вселивый.

Радуйся, Алексие, великий чудотворче и скорый помощниче.

Кондак 8

Странное чудо житие твое, святителю, является притекающим ко всечестным мощем твоим, при нихже и малое моление приносящим, велия всегда благодать от Бога подается, юже приемлюще, друг со другом радостно Богу возглашаем: Аллилуиа.

Икос 8

Весь ум свой имея в вышних вперен, и нижних, паству твою, не оставил еси, молитвы о ней возсылая ко Всевышнему Владыце, преподобне Алексие. Не забуди и ныне нас, приглашающих тебе усердне:

Радуйся, горо, добродетельми выше Небес вознесенная; радуйся, реко, скверны наша омывающая.

Радуйся, источниче, жажду греховную утоляяй; радуйся, каменю драгий, всю Российскую землю украшаяй.

Радуйся, злато, во вся концы блещание от себе испущающее; радуйся, сребро, седмерицею от скверн греховных очищенное.

Радуйся, кимвале, всех на славословие Божие созываяй; радуйся, светильниче, седящих во тьме озаряяй.

Радуйся, древо, от жара греховнаго осеняющее; радуйся, благотучная ветве лозы Христовы.

Радуйся, таинственнаго Тела здравый члене; радуйся, чадо славы Воскресения.

Радуйся, Алексие, великий чудотворче и скорый помощниче.

Кондак 9

Всякое безместных страстей востание благодатию Господнею до конца потребил еси в мертвенней плоти твоей, святителю Алексие! Темже и был еси яко древо, насажденное при исходищих вод, плод дая во время свое и поя Богу: Аллилуиа.

Икос 9

Вития многовещанныя превозшел еси духовною силою слова твоего, поведая людем дивная величия Божия и питая гладныя души хлебом с Небесе. Мы же, таковая сердцем объемлюще, благодарне тебе зовем:

Радуйся, кедре, в Церкви Христове, яко в Ливане, умноженный; радуйся, яко финикс, в дому Божием процветый.

Радуйся, кипарисе, верных сердца благовонием исполняяй; радуйся, винограде, сладкое благочестия вино нам источаяй.

Радуйся, крине, горняя поля украшаяй; радуйся, смоковнице благоплодная.

Радуйся, пшенице, чистым хлебом гладныя питающая; радуйся, маслино, елей милости изливающая.

Радуйся, цвете, от корене Христова процветый; радуйся, сладкое вино, в точиле Иисусовом изгнетенное.

Радуйся, безсмертным питием днесь напаеваемый; радуйся, и нам трапезу Небесную уготовляяй.

Радуйся, Алексие, великий чудотворче и скорый помощниче.

Кондак 10

Спасти хотя вверенныя ти люди, закон и Евангелие по вся дни проповедал еси: да, познавше многая своя прегрешения, прибегают с молением непрестанно ко Христу, Спасителю мира, от Негоже приемлющих прощение, научал еси их пети: Аллилуиа.

Икос 10

Стена еси, всеблаженне Алексие, Горняго Иерусалима, от десяти заповедей, яко от десяти велиих камений, Духом Святым устроенная! Имел бо еси закон Господень посреде чрева твоего, темже и глаголем ти:

Радуйся, Единаго Бога и Егоже послал есть Иисуса Христа познавый; радуйся, яко не поклонился еси кумиру временнаго благополучия.

Радуйся, яко николиже приял еси имене Господа Бога твоего всуе; радуйся, от юности всяк час жития твоего Богови посвятивый.

Радуйся, яко всех, иже отцы и матери наричутся, почтил еси; радуйся, до конца гнев на ближняго в сердце твоем истребивый.

Радуйся, похоти плотския постом и трудами от себе прогнавый; радуйся, руце свои от лихоимания и хищения всегда удержавый.

Радуйся, уста твоя от осуждения и клеветы обуздавый; радуйся, сердце твое от зависти и ненависти очистивый.

Радуйся, удаливыйся от надмения фарисейскаго; радуйся, истый образе мытарева смирения.

Радуйся, Алексие, великий чудотворче и скорый помощниче.

Кондак 11

Пение ангельское совершашеся, егда святая твоя душа от земных преставляшеся к Небесным, ихже един лик по Едином взываше: Аллилуиа.

Икос 11

Многосветлыми лучами блистает житие твое, отче Алексие! Отнюдуже многим ликом праведных духов сопричастна тя видяще, вопием ти:

Радуйся, пророче, волю Господню нам открывый; радуйся, апостоле, Евангелие Царствия Божия кающимся благовестивый.

Радуйся, пастырю, о славе Божией ревновавый; радуйся, мучениче, изволением душу свою за паству положивый.

Радуйся, постниче, вземший крест свой на рамо и тесным путем вслед за Христом шедый; радуйся, священниче, Безкровную Жертву о людех приносивый.

Радуйся, Херувиме, на немже опочи Господь Славы; радуйся, шестокрилатый Серафиме, вопияй непрестанно Трисвятую песнь Господу Саваофу.

Радуйся, девственниче ангелоподобный; радуйся, многи обители на славословие Божие устроивый.

Радуйся, друга Божия Преподобнаго Сергия присный друже; радуйся, яко егоже желал еси зде зрети преемником своим, того зриши днесь тамо вкупе с тобою Престолу Божию предстояща.

Радуйся, Алексие, великий чудотворче и скорый помощниче.

Кондак 12

Благодать, яже бысть Иисус Христос, твоими пречистыми усты граду сему всегда бысть проповедана. Отнюдуже вси, Христу поклоняющеся, пояху: Аллилуиа.

Икос 12

Поюще велия твоя, Алексие досточудне, исправления и подвиги, недоумеем воистину, како наречем тя; от всех бо благих дел, яко град красен, себе Творцу устроил еси. Темже взываем ти:

Радуйся, Адамово падение благодатию Христовою в себе исправивый; радуйся, по изгнании из земнаго рая Небесный рай улучивый.

Радуйся, Авелю, Кровию Христовою окропленный; радуйся, новый Енох, угодивый Господеви.

Радуйся, Илие, огненною добродетелей колесницею вознесенный; радуйся, Елисее, сугубую благодать восприявый.

Радуйся, Ное, от потопа беззаконий благодатию Христовою, яко ковчегом древ негниющих, спасшийся; радуйся, Аврааме, не сына, но себе самаго в жертву Богу принесший.

Радуйся, Исаие, на Престоле высоце и превознесенне лицем к лицу Господа зрящий; радуйся, Израилю, молитвою укрепивыйся с Богом и благословение вечное от Него приемый.

Радуйся, Самуиле, царем благословение подаваяй; радуйся, наследниче Божий и сонаследниче Христов.

Радуйся, Алексие, великий чудотворче и скорый помощниче.

Кондак 13

О, пастырю наш предобрый и светильниче многосветлый, всечестне Алексие! Приими сие малое тебе хваление наше и испроси нам у Христа Бога утверждение в вере, еже ходити во всех заповедех и оправданиих Господних безпорочно, Отечеству же нашему мир и благоденствие, да сподобимся вечно в радости блаженней воспевати Богу: Аллилуиа.

[Се́й конда́к глаго́лется три́жды.]

Икос 1

Ангеле, от земли прозябый! Великаго Совета Ангел, провидев доброту души твоея, прежде век избра тебе, еже благовестити плененным отпущение и слепым прозрение. Отнюдуже мы, грешнии, светом дел твоих получивше прозрение и грехов отпущение, взываем:

Радуйся, корене благаго отрасль блажайшая; радуйся, честных родителей добрейший сыне.

Радуйся, благоуханнаго сада прозябение; радуйся, духовным возрождением Богу Отцу усыновленный.

Радуйся, миропомазанием Святаго Духа запечатленный; радуйся, имя, яко миро излиянное, свыше восприявый.

Радуйся, от пелен Богу посвященный; радуйся, мужественно иго Христово на себе возложивый.

Радуйся, земная и мимотекущая, яко уметы, вменивый; радуйся, егоже Человек домовит — Иисус утро наят делателя в виноград Свой.

Радуйся, образ Божий и подобие свято соблюдший; радуйся, красото, душевныя и телесныя всех очи увеселяющая.

Радуйся, Алексие, великий чудотворче и скорый помощниче.

Кондак 1

Избранный архиерею и слуго Великаго Архиерея Иисуса, преблаженне Алексие! Яко сподобльшеся многих твоих благодеяний, не имеюще же что воздати, похвальная восписуем ти и от души взываем, проповедающе чудеса твоя: испроси нам от Царя Небеснаго безбедно преити прочее жития сего и достигнути Горняго Иерусалима, да тамо узревше тя в блаженней радости, воззовем к тебе:

Радуйся, Алексие, великий чудотворче и скорый помощниче.

Молитва

О, пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Алексие! Предстоя у Престола всех Царя и наслаждаяся Света Единосущныя Троицы и херувимски со Ангелы возглашая песнь Трисвятую, великое и неизследованное дерзновение имея ко Всемилостивому Владыце, молися паствы твоея спасти люди, единородный ти язык, благостояние святых церквей утверди, архиереи благолепием святительства украси, монашествующих к подвигом добраго течения укрепи: град сей (или: весь сию: аще во обители: святую обитель сию) и вся грады и страны добре сохрани и веру святую непорочну соблюсти умоли: мир весь умири, от глада и пагубы избави ны и от нападения иноплеменных сохрани нас: старыя утеши, юныя накажи, безумныя умудри, вдовицы помилуй, сироты заступи, младенцы возрасти, немощствующия исцели и везде тепле призывающих тя и с верою притекающих к раце честных и многоцелебных мощей твоих, усердно припадающих и молящих ти ся, от всяких напастей и бед ходатайством твоим свободи, да зовем ти: о, Богоизбранный пастырю, звездо всесветлая мысленныя тверди, тайнаго Сиона необоримый столпе, миродохновенный цвете райский, всезлатая уста Слова, Московская похвало, всея России украшение! Моли о нас Всещедраго и Человеколюбиваго Христа Бога нашего, да в день страшнаго Пришествия Его шуияго стояния избавит нас и радости святых причастники сотворит, со всеми святыми во веки. Аминь.