Преподобный Павел Коме́льский (Обно́рский)

Житие преподобного Павла Комельского (Обнорского)

Преподобный Павел Комельский, славный ученик преподобного Сергия Радонежского, родился в Москве в 1317 году. С юных лет он отличался благочестием и милосердием к бедным и страждущим. Богатые родители готовили его к мирской жизни, но сын в двадцать два года тайно покинул родительский дом и принял постриг в Рождественском монастыре на Волге (в Ярославской епархии). Оттуда Павел перешел в Свято-Троицкий монастырь к преподобному Сергию Радонежскому и несколько лет провел у него в келейном послушании, всецело повинуясь мудрому руководству святого старца. С благословения преподобного Сергия он поселился вдали от обители в отшельнической келлии, где пробыл пятнадцать лет в затворе. Испросив у преподобного Сергия благословение уйти в пустыню для безмолвной и уединенной жизни, он долго странствовал, отыскивая себе место для уединения. Он обошел много пустыней, был у преподобного Авраамия Чухломского (память 20 июля) и, наконец, остановился в Комельском лесу. Над речкой Грязовицей, в дупле старой липы преподобный устроил себе маленькую келлию и прожил там три года в полном безмолвии, "не дая покоя телу, за еже получити будущий покой". Затем он перешел на реку Нурму, где построил себе хижину и выкопал колодец. Дни его проходили в бдении и молитве. Пять дней в неделю он пребывал без пищи и только в субботу и воскресенье вкушал немного хлеба и воды. Широко распространилась молва об отшельнике, и к нему стали приходить желавшие его духовного руководства. Несмотря на любовь к уединенной жизни, преподобный никогда и никому не отказывал в духовном утешении и наставлении. Здесь его посетил преподобный Сергий Нуромский, который, также ища уединения, по благословению своего наставника, преподобного Сергия, проводил свою подвижническую жизнь в тех местах.

По благословению преподобного Сергия и с согласия митрополита Фотия в 1414 году преподобный Павел построил Свято-Троицкий храм, вокруг которого вырос монастырь, получивший название Павло-Обнорского. Написав для братии строгий устав монастырской жизни, преподобный поручил управление новой обителью своему ученику Алексию, а сам по-прежнему продолжал жить в уединенной келлии на горе, оставаясь при этом чутким и добрым наставником для всех, кто нуждался в его целительной помощи. Преставился преподобный Павел 112 лет от роду. Последние слова его были: "Братья, имейте любовь между собою и храните правила монашеского общежития".

Житие святого написано около 1546 года, а прославление совершилось в 1547 году.

Тропарь, глас 1

Боже́ственною любо́вию от ю́ности распала́ем, Па́вле преподо́бне,
вся, я́же в ми́ре кра́сная, возненави́дев,
Христа́ еди́наго возлюби́л еси́
и сего́ ра́ди во вну́треннюю пусты́ню всели́лся еси́,
со зверьми́ жи́ти весь Христу́.
Отону́дуже и Всеви́дящее О́ко, твоя́ труды́ ви́дев,
да́ром чуде́с и по преставле́нии обогати́ тя.
Те́мже вопие́м ти:
моли́ непреста́нно о всех нас,

честну́ю па́мять твою́ при́сно в пе́снех почита́ющих.

Кондак, глас 8

Все твое́ у́мное жела́ние к Бо́гу впери́в,
и Тому́ невозвра́тно от души́ после́довал еси́, в пусты́ню всели́вся,
и, та́мо а́нгельски пожи́в, мно́гим путь был еси́ ко спасе́нию.
Сего́ ра́ди и Христо́с тя просла́ви и да́ром чуде́с обогати́.
Те́мже вси вопие́м ти:

ра́дуйся, Па́вле преподо́бне, пусты́нный жи́телю.

Молитва

О, до́брый наш па́стырю и Богому́дрый наста́вниче, преподо́бне о́тче Па́вле! Услы́ши нас гре́шных, моля́щихся тебе́ и призыва́ющих в по́мощь ско́рое предста́тельство твое́: виждь нас гре́шных, в толи́цех обстоя́ниих су́щих, виждь нас немощны́х, отвсю́ду уловля́емых, вся́каго бла́га лише́нных и умо́м от малоду́шия помраче́нных: потщи́ся, уго́дниче Бо́жий, не оста́вити нас в грехо́вном плену́ бы́ти, да не бу́дем в ра́дость враго́м на́шим и не у́мрем в лука́вых дея́ниях на́ших. Моли́ о нас недосто́йных Соде́теля на́шего и Влады́ку, Ему́же ты со Безпло́тными ли́ки предстои́ши. Ми́лостива к нам сотвори́ Бо́га на́шего в ны́нешнем ве́це и в бу́дущем, да не возда́ст нам по дела́м на́шим и по нечистоте́ серде́ц на́ших, но по свое́й бла́гости возда́ст нам: на твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем и, к цельбоно́сному гро́бу твоему́ припа́дающе, исцеле́ния про́сим: изба́ви нас, уго́дниче Христо́в, от злых, находя́щих на нас, и укроти́ во́лны страсте́й и бед, востаю́щих на нас, да ра́ди святы́х твои́х моли́тв не обы́мет нас напа́сть, и не погря́знем в пучи́не грехо́вней и в ти́не страсте́й на́ших. Моли́, преподо́бне о́тче Па́вле, Христа́ Бо́га на́шего, да пода́ст нам ми́рное жи́тельство, оставле́ние грехо́в, душа́м на́шим спасе́ние и ве́лию ми́лость. Ами́нь.

Канон преподобному Павлу Комельскому, Обнорскому

Минея, 10 Января.

Глас 4

Песнь 1

Ирмос: Мо́ря чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма
Амали́кову си́лу в пусты́ни победи́л есть.

Припев: Преподо́бне о́тче Па́вле, моли́ Бо́га о на́с.

Возлюби́в Бо́га, преподо́бне, от всея́ души́ твоея́,
Тому́ от ю́ности послужи́л еси́ в простоте́ се́рдца твоего́.
Те́мже и просла́ви тя:
весть бо Госпо́дь сла́вящия Его́ прославля́ти.

Припев: Преподо́бне о́тче Па́вле, моли́ Бо́га о на́с.

От ю́ности, преподо́бне, Бо́гу прилепи́лся еси́
и невозвра́тно после́довал еси́ живоно́сным Его́ стопа́м:
удали́вся бо ми́ра, водвори́лся еси́ в пусты́ню.
Те́мже почита́ем па́мять твою́.

Сла́ва Отцу́ и Сы́ну и Свято́му Ду́ху.

Ны́не, преподо́бне о́тче Па́вле, с ли́ки проро́к и апо́стол, му́ченик же и преподо́бных
во све́те Святы́я Тро́ицы соводворя́яся,
помина́й ча́да твоя́, ве́рою творя́щия па́мять твою́ светоно́сную.

И ны́не и при́сно и во ве́ки веко́в. Ами́нь.

Богородичен: Без се́мене О́тчею во́лею
от Боже́ственнаго Духа Бо́жия зачала́ еси́ Сы́на и пло́тию родила́ еси́,
Су́щаго из Отца́ без ма́тере, нас ра́ди из Тебе́ без отца́.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи:
Ты моя́ кре́пость, Го́споди,
и прибе́жище и утвержде́ние.

Припев: Преподо́бне о́тче Па́вле, моли́ Бо́га о на́с.

От мла́да во́зраста, преподо́бне, возлюби́л еси́ пребыва́ти в дому́ Госпо́дни и зре́ти красоты́ Его́.
Те́мже избра́ тя Госпо́дь от ми́ра,
во е́же служи́ти тебе́ пред лице́м Его́ в преподо́бии и пра́вде.

Припев: Преподо́бне о́тче Па́вле, моли́ Бо́га о на́с.

Удали́вся ми́ра, тру́дное житие́ возлюби́л еси́, преподо́бне,
е́же ко всем послушли́ву бы́ти, и служи́ти всем от кра́йняго смире́ния,
и себе́ после́днейша вменя́ти от всех.
Те́мже и Госпо́дь просла́ви тя.

Сла́ва Отцу́ и Сы́ну и Свято́му Ду́ху.

В безмо́лвии возлюби́л еси́ жи́ти, о́тче преподо́бне:
те́мже удали́вся от челове́к водвори́лся еси́ в пусты́ни, со зверьми́ живы́й.
Того́ ра́ди ны́не во све́те святы́х пребыва́я,
помина́й творя́щия па́мять твою́.

И ны́не и при́сно и во ве́ки веко́в. Ами́нь.

Богородичен: Неора́нная Ни́ва яви́лася еси́, Кла́с жи́зненный ро́ждши,
всем причаща́ющимся безсме́ртия Хода́тая,
во святы́х Свята́го, свя́то почива́ющаго.

Седален, глас 8

Пожи́в, преподо́бне, во а́лчбе и жа́жде и в про́чиих злострада́ниих,
не дая́ поко́я те́лу твоему́, за е́же получи́ти бу́дущий поко́й,
отону́дуже и жела́ния не погреши́л еси́,
но получи́л еси́ о́ноя ра́дости,
щади́мыя лю́бящим Бо́га,
те́мже помина́й ча́да твоя́ и не забу́ди, я́коже обеща́лся еси́,
да вси вопию́т ти:
о́тче наш Па́вле преподо́бне, моли́ Христа Бо́га грехо́в оставле́ние дарова́ти
чту́щим любо́вию святу́ю па́мять твою́.

Песнь 4

Ирмос: Вознесе́на Тя ви́девши Це́рковь на Кресте́,
Со́лнце пра́ведное,
ста в чи́не свое́м,
досто́йно взыва́ющи:
сла́ва си́ле Твое́й, Го́споди.

Припев: Преподо́бне о́тче Па́вле, моли́ Бо́га о на́с.

Стра́хом Бо́жиим огра́ждся от ю́ности, преподо́бне,
и безмо́лвно Бо́гу послужи́л еси́, во уедине́нии пребыва́я,
посто́м и жа́ждею смиря́я те́ло,
моли́твою же чи́стою душу просвеща́я.

Припев: Преподо́бне о́тче Па́вле, моли́ Бо́га о на́с.

Ху́дость ри́зную па́че всех име́л еси́, преподо́бне,
не возлюби́в мягких и сла́бящих те́ло:
весть бо от сего́ и душа́ смиря́тися
и сообразова́тися вну́тренняя вне́шнему устрое́нию.

Сла́ва Отцу́ и Сы́ну и Свято́му Ду́ху.

Безмо́лвие лобыза́в от ю́ности и мно́га ле́та в то́м потруди́вся,
вся́ким злострада́нием друча́ те́ло твое́ и не дая́ себе́ почива́ти теле́сне,
да получи́ши бу́дущий поко́й.

И ны́не и при́сно и во ве́ки веко́в. Ами́нь.

Богородичен: Неискусобра́чно родила́ еси́, Де́во,
и по рождестве́ яви́лася еси́ де́вствующи па́ки.
Те́мже немо́лчными гласы,
е́же ра́дуйся, Тебе́, Влады́чице, ве́рою несомне́нною взыва́ем.

Песнь 5

Ирмос: Ты, Го́споди, мой Свет,
в мир прише́л еси́,
Свет Свя́тый, обраща́яй из мра́чна неве́дения
ве́рою воспева́ющия Тя.

Припев: Преподо́бне о́тче Па́вле, моли́ Бо́га о на́с.

Ты процве́л еси́, преподо́бне, в пусты́ни, дави́дски,
я́коже фи́никс, сия́я доброде́тельми,
отону́дуже и позна́н бы́л еси́,
я́ко мно́гим приходя́щим ревнова́ти твоему́ е́же по Бо́гу житию́.

Припев: Преподо́бне о́тче Па́вле, моли́ Бо́га о на́с.

Ты, преподо́бне, явле́н бы́л еси́ от доброде́тельнаго жи́тельства,
от него́же всем ви́дящим созидова́тися душа́ми и к ре́вности воздвиза́тися,
е́же отрещи́ся ми́ра и твоему́ житию́ подо́битися.

Сла́ва Отцу́ и Сы́ну и Свято́му Ду́ху.

Ты, преподо́бне, смири́вся па́че всех,
и от сего́ приобре́т умиле́ние души́ и сле́з исто́чник непрестаю́щ,
и сия́ вмени́в хлеб день и нощь, по проро́ческому рече́нию.

И ны́не и при́сно и во ве́ки веко́в. Ами́нь.

Богородичен: Тя ору́жие непобеди́мое на враги́ предлага́ем,
Тя, утвержде́ние и наде́жду на́шего спасе́ния, Богоневе́сто, стяжа́хом.

Песнь 6

Ирмос: Пожру́ Ти со гласом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ре́бр Твоих
исте́кшею кро́вию.

Припев: Преподо́бне о́тче Па́вле, моли́ Бо́га о на́с.

Позна́в Бо́га, преподо́бне, по вме́стному челове́ком,
те́мже и позна́н был еси́ от Бо́га по и́мени про́чих оте́ц
и душ па́стырь устро́ен бы́л еси́,
сия́ наставля́я к доброде́телем и приводя́ Бо́гу спаса́емы.

Припев: Преподо́бне о́тче Па́вле, моли́ Бо́га о на́с.

Возлюби́в, блаже́нне, всено́щное бде́ние,
сим очища́я ум тво́й,
ду́шу же просвеща́я, и те́ло твое́ смиря́я,
и ко дневны́м трудо́м благопоко́рно устроя́я.

Сла́ва Отцу́ и Сы́ну и Свято́му Ду́ху.

Любо́вь к Бо́гу и к бли́жнему стяжа́в, зако́на и проро́к исполня́я глави́зну,
и́бо не любя́й бли́жняго, ниже́ Бо́га возлюби́ти мо́жет,
ты же, преподо́бне о́тче наш Па́вле, обоя́ испо́лнил еси́.

И ны́не и при́сно и во ве́ки веко́в. Ами́нь.

Богородичен: О, чу́до, всех чуде́с нове́йшее!
Я́ко Де́ва во утро́бе вся́ческая Содержа́щаго
неискусому́жно заче́нши, не тесновмести́.

Кондак, глас 8

Все твое́ у́мное жела́ние к Бо́гу впери́в,
и Тому́ невозвра́тно от души́ после́довал еси́, в пусты́ню всели́вся,
и та́мо а́нгельски пожи́в, мно́гим пу́ть бы́л еси́ ко спасе́нию.
Сего́ ра́ди и Христо́с тя просла́ви, и да́ром чуде́с обо́гати́.
Те́мже вси́ вопие́м ти́:
ра́дуйся, Па́вле преподо́бне, пусты́нный жи́телю.

Икос

Удали́вся, преподо́бне, от челове́ков, и безмо́лвно житие́ возлюби́в,
и пусты́ню дости́г споспе́шну к сему́ лю́бящим Бо́га,
и в то́й мно́га ле́та пожи́л еси́,
оскорбля́емь от де́монов, и от ненака́занных челове́к,
и вся сия́ претерпе́л еси́, Бо́гу тя укрепля́ющу,
и о́ных не́мощь обличи́л еси́ терпе́нием твои́м,
и отсю́ду устро́ен бы́л еси́ па́стырь душ,
сих у́бо словесы́ уча́, де́лы же показу́я изве́стне и разу́мне.
Те́мже и ча́да твоя́ пра́зднующе па́мять твою́, вопию́т ти:
ра́дуйся, Па́вле преподо́бне, пусты́нный жи́телю.

Песнь 7

Ирмос: В пещи́ Авраа́мстии о́троцы перси́дстей,
любо́вию благоче́стия па́че, не́жели пла́менем, опаля́еми, взыва́ху:
благослове́н еси́ в хра́ме сла́вы Твоея́, Го́споди.

Припев: Преподо́бне о́тче Па́вле, моли́ Бо́га о на́с.

Поще́нием огради́вся от ю́ности,
сим те́ло твое́ смиря́я и благопоко́рно души́ сотворя́я,
к сему́ же и стра́сти успива́я,
без стуже́ния от сих пребы́л еси́, поя́ Христу́:
благослове́н Бог оте́ц на́ших.

Припев: Преподо́бне о́тче Па́вле, моли́ Бо́га о на́с.

Язы́ка воздержа́ние испра́вил еси́, о́тче преподо́бне,
от многоглаго́лания сему́ возбраня́я, на моли́тву же сего́ простира́я,
и е́же то́чию ну́ждная глаго́лати к по́льзе слы́шащих и пе́ти Христу́:
благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху.

Нищету́ самово́льную Христа ра́ди стяжа́в,
и от всех жите́йских безыме́нен пребы́л еси́,
доброде́тельми же обогати́лся еси́
и мно́гих к ре́вности воздви́гл еси́, науча́я пе́ти Христу́:
благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся!
Тобо́ю бо даде́ся ра́дость, Богоро́дице, зову́щим:
благослове́нна Ты в жена́х еси́, Всенепоро́чная Влады́чице.

Песнь 8

Ирмос: Ру́це распросте́р, Дании́л
льво́в зия́ния в ро́ве затче́;
о́гненную же си́лу угаси́ша,
доброде́телию препоя́савшеся,
благоче́стия рачи́тели о́троцы, взыва́юще:
благослови́те, вся дела́ Госпо́дня, Го́спода.

Припев: Преподо́бне о́тче Па́вле, моли́ Бо́га о на́с.

Целому́дрие стяжа́в попремно́гу и чистоту́ теле́сную, я́коже подоба́ет святы́м,
и́стинное же смире́ние и сокруше́ние се́рдца вельми́ удержа́л еси́
и ско́рбных нанесе́ние, ра́дуяся приима́л еси́, поя́ Бо́гу:
благослови́те, вся дела́ Госпо́дня, Го́спода.

Припев: Преподо́бне о́тче Па́вле, моли́ Бо́га о на́с.

Стра́х Бо́жий стяжа́в в себе́ и сим наказа́в чу́вства твоя́,
е́же не преходи́ти свои́х преде́лов, ни поврежда́тися от сих уму́,
и отсю́ду Бо́гу угоди́л еси́, во смире́нии поя́:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Зве́рие ди́вии, преподо́бне, кровоя́дцы су́ще, приходя́ще к тебе́, кро́тцы быва́ху,
от бла́года́ти Бо́жия, живу́щия в тебе́, ничто́же ти́ ско́рбно показу́юще,
но и повеле́нию твоему́ повинова́хуся, пою́щаго:
благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Ты еди́на во всех ро́дех, Дево Пречи́стая, Ма́ти яви́лася еси́ Бо́жия,
Ты Божества́ была́ еси́ жили́ще, Всенепоро́чная,
не опали́вшися огне́м Непристу́пнаго Све́та.
Те́мже Тя вси благослови́м, Мари́е Богоневе́сто.

Песнь 9

Ирмос: Ка́мень нерукосе́чный
от несеко́мыя горы́, Тебе́, Де́во,
краеуго́льный отсече́ся,
Христо́с, совокупи́вый разстоя́щаяся естества́.
Тем веселя́щеся, Тя, Богоро́дице, велича́ем.

Припев: Преподо́бне о́тче Па́вле, моли́ Бо́га о на́с.

Пребы́вшу ти́, о́тче, мно́га ле́та в пусты́ни
в безмо́лвии и поще́нии, и всех ско́рбных в терпе́нии
и попремно́гу Бо́гу угоди́вшу,
отону́дуже и Он тя прославля́ет я́ко Своего́ уго́дника.

Припев: Преподо́бне о́тче Па́вле, моли́ Бо́га о на́с.

Поще́нием насажде́н быв, я́ко дре́во при вода́х, блаже́нне, воздержа́ния,
процве́л еси́ доброде́тельми, и в ме́ру дости́г во́зраста исполне́ния Христо́ва,
и духо́внаго соверше́ния получи́л еси́, я́коже мо́щно челове́ку.

Сла́ва Отцу́ и Сы́ну и Свято́му Ду́ху.

Ты у́бо, преподо́бне, хоте́л еси́ утаи́тися от челове́к, и еди́н безмо́лвствовати,
но Бог не оста́ви тебе́ неве́дома бы́ти,
но всем показа́ житие́ твое́ доброде́тельное,
на по́льзу хотя́щим стопа́м твои́м после́довати.

И ны́не и при́сно и во ве́ки веко́в. Ами́нь.

Богородичен: Я́же всеми влады́чествующи тварьми́,
лю́дем Твоим да́руй побе́дное одоле́ние,
врага́ полага́ющи примири́тельна Це́ркви,
да Тя я́ко Богоро́дицу велича́ем.

Светилен

Поревнова́в, блаже́нне, преподо́бному Се́ргию,
от него́же и наста́влен быв на духо́вныя по́двиги,
многоле́тне потруди́лся еси́ в безмо́лвии, и посте́, и про́чиих страда́ниих
и ны́не во свете Святы́я Тро́ицы соводворя́яся, нас помина́й.

Акафист преподобному Павлу Обнорскому и Комельскому, Вологодскому чудотворцу

Кондак 1

Избранный и дивный во святых, отче наш Павле, от Христа Бога дар чудес обильно приемый! Похвальная приносим ти ныне любовию чтущии тя: ты же яко имея дерзновение многое ко Святей Троице, моли избавитися от всяких бед верно хвалящим тя:

Радуйся, Павле преподобне, пустынный жителю!

Икос 1

Ангела земного и небесного человека яви тебе всех Создатель, и благоплодную душу твою измлада провидев, преподобне Павле, научи всех вопити тебе сице:

Радуйся, чистое Святаго Духа приятелище.

Радуйся, ангельским ликом собеседниче.

Радуйся, любве ради Христовы преименитый град отечества твоего оставивый, и в пустынях со зверьми жити изволивый.

Радуйся, древо благосеннолитвенное, при исходящих вод насажденное.

Радуйся, яко плод присноцветущь послушания принесл еси.

Радуйся, яко терпением твоим вся страсти плотския умертвил еси.

Радуйся, яко крестным знамением лукавых духов далече от тебе отгнал еси.

Радуйся, столпе житейскими бурями непоколебимый.

Радуйся, яко до ныне обильную реку исцелений источаеши.

Радуйся, яко о благоденствии земли Российския умоляеши.

Радуйся, яко обитель твою и нас рабов твоих в молитвах не оставляеши.

Радуйся, яко скорбящим в недугах исцеление подаваеши.

Радуйся, Павле преподобне, пустынный жителю!

Кондак 2

Видяще свет добродетелей твоих, отче наш Павле, душами и телесы просвещаемся, и дивнаго тя во святых чудотворца почитающе, чудесем твоим, по благодати Божией от тебе бывающим, удивляемся, и во умилении сердца Богу вопием: Аллилуиа.

Икос 2

Разум недоразуменный от юности уразумевая божественными учении, еже бы улучити восход от земных в небесная, сего ради презрев все плотское мудрование, и возжелав весь жити Христу, в непроходимую пустыню вселився, в трудех и бдениих подвизался еси: сего ради глаголем тебе, отче наш Павле, таковая:

Радуйся, яко Христово смирение вельми возлюбил еси.

Радуйся, яко нищету духовную во всем соблюл еси.

Радуйся, яко Крест Христов на раменах твоих без роптания носил еси.

Радуйся, яко жестокое житие на земли показал еси.

Радуйся, яко и учителя твоего великаго Сергия тем утешил еси.

Радуйся, яко братии твоей образ великих добродетелей был еси.

Радуйся, яко правым путем выну шествуя вход в Царство Небесное улучил еси.

Радуйся, яко тамо со ангелы водворяяся предстоиши Святей Троице во мнозем дерзновении.

Радуйся, воздержания и чистоты истинный хранителю.

Радуйся, смиренномудрия и кротости присный блюстителю.

Радуйся, светоносный светильниче Божия благодати.

Радуйся, Храме Бога живаго одушевленный.

Радуйся, Павле преподобне, пустынный жителю!

Кондак 3

Силою свыше ти дарованною, всякую слезу от очес зле страждущих отъяти готов сый, богоносне отче Павле, был еси болезнующим исцеления податель, и по смерти твоей великий помощник всем показался еси, вопиющим Богу: Аллилуиа.

Икос 3

Имея поспешенствующую тебе Божию силу, отче наш Павле, добродетельми украсился еси и ангельски пожил еси: темже и мы смиреннии, любовию к тебе понуждаеми, глаголем сице:

Радуйся, ангелов собеседниче.

Радуйся, преподобных и праведных сопричастниче.

Радуйся, чистое и честное жилище святыни.

Радуйся, великих добродетелей вместилище.

Радуйся, яко ярем Господень на себе восприяти усердно восхотевый.

Радуйся, яко от млада возраста в дому Божием пребывати возжелавый.

Радуйся, яко и Господь желания твоего не отринул есть.

Радуйся, яко и на небесех мзду трудов твоих обрел еси.

Радуйся, яко ныне во свете святых пребываеши.

Радуйся, яко выну Господа сил созерцаеши.

Радуйся, яко со ангельскими чинми трисвятую песнь воспеваеши.

Радуйся, невещественным светом трисиянного Божества озаренный.

Радуйся, Павле преподобне, пустынный жителю!

Кондак 4

Буря помышлений страстных обдержит ны: но воздержанием и трудами уморивый страсти и волнений множество укротивый, отче наш Павле, моли избавитися от напастей и нам, чтущим тя, да припадая во умилении душ и сердец наших к дивному Богу, прославляемому во святых своих, выну воспеваем: Аллилуиа.

Икос 4

Слышаша ближнии и дальнии величие чудес твоих, авво наш Павле, яко скорый еси в бедах и обстояниих помощник, и яко на крилех повсюду являешися призывающим тя по имени в молитвах своих, и вопиющим к тебе:

Радуйся, твердое в печалех утешение.

Радуйся, скорбящих недремленное попечение.

Радуйся, всяких недугов и болезней безмездный целителю.

Радуйся, в напастех и бедах скорый подателю помощи.

Радуйся, велия пучина сокровищ богатства душевнаго.

Радуйся, скорбных и бедне живущих небесное утешение.

Радуйся, неоскудеваемая пища алчущим правды.

Радуйся, источниче неисчерпаемый жаждущим жития духовнаго.

Радуйся, ненадеждных крепкое надеяние.

Радуйся, верный кормчию в мори плавающих.

Радуйся, яко молитвами твоими от страстей избавляемся.

Радуйся, яко от цельбоносных твоих мощей сладости духовныя исполняемся.

Радуйся, Павле преподобне, пустынный жителю!

Кондак 5

Боготечная звезда во странах сих явился еси, преподобне отче Павле, и непроходимую пустыню светом богоугодного жития твоего озарил еси и вся верныя, назидатися к тебе приходящия, всегда поучал еси в Троице Святей славимому Богу пети сице: Аллилуиа.

Икос 5

Видеша корыстолюбивии человецы, татие и хищницы, яко не токмо ко обители твоей святей на расхищение приступити несть возможно, но и стад твоих, вне ограды пасущихся, жезлом твоим, блаженне отче наш Павле, ограждаеши, дерзнувших же на сие, слепотою и разслаблением поражая, в раскаяние и ужас приводиши, и тем всех богобоязненных возставляеши глаголати тебе таковая:

Радуйся, неусыпный обители твоей хранителю.

Радуйся, бодрый пастырю, выну пекущийся о чадех твоих.

Радуйся, пустыножителю бодрственный, вся видимая и невидимая злая побеждающий.

Радуйся, монашествующих спасения ходатай усерднейший.

Радуйся, братии твоей в бедах и обстоянии варварском сущей утешителю скорый.

Радуйся, нещастных защитниче предивный.

Радуйся, смирения и кротости насадителю.

Радуйся, мирских нравов из братии твоей искоренителю.

Радуйся, плотския и духовныя нищеты любителю.

Радуйся, гордости и великолепия мирского потребителю.

Радуйся, целомудрием и кротостию, яко многоценною багряницею, оделся еси.

Радуйся, правдою и чистотою, яко светлым венцем венчался еси.

Радуйся, Павле преподобне, пустынный жителю!

Кондак 6

Проповедает вся великая Россия о тебе, авво Павле, яко ты еси скорый податель исцеления недугующим, и разслабленныя и ума лишенныя и беснующияся молитвами твоими к Богу, здравы сотворяеши. Буди же и о нас смиренных рабех твоих всегдашний молитвенник ко Иисусу, к немуже воспеваем песнь выну славословимую: Аллилуиа.

Икос 6

Возсиял еси во стране вологодстей, яко солнце пресветлое, преподобне отче наш Павле, уясняя сердца верных добродетельми твоими и яко луча огнесиянная теплотою молитв твоих всех скорбных и больных оживляеши: сего ради мы сошедшеся при гробе твоем, благодарственно вопием ти таковая:

Радуйся, светильниче всесветлый, повсюду чудесы твоими осиявающий.

Радуйся, свете, освещающий потемненныя лютыми страстьми.

Радуйся, цвете сельный, благовонием Духа Святаго напоенней.

Радуйся, божественных заповедей усерднейший ревнителю.

Радуйся, апостольских и отеческих преданий твердый хранителю.

Радуйся, церкви российския великое украшение.

Радуйся, яко финик в пустыни сей процвел еси.

Радуйся, яко кедр долголетний на горах сих прославился еси.

Радуйся, яко присный отец о братии твоей промышлял еси.

Радуйся, яко выну в законе Господнем поучатися наставлял еси.

Радуйся, яко и во успении твоем нас не оставляеши.

Радуйся, яко о оставлении грехов наших Господа Бога умоляеши.

Радуйся, Павле преподобне, пустынный жителю!

Кондак 7

Хотящу игумену с братиею открыти гроб твой, и видети святые мощи твоя, преподобне отче Павле, в сонном видении представ, со гневом рекл еси им: оставите таковое тщетное дело, да не огнь снидет с небеси и пожжет вы: мы же слышаще таковая, яко непотребнии со страхом и трепетом припадающе к раце цельбоносных мощей твоих, молим тя о милости твоей вопиюще Богу: Аллилуиа.

Икос 7

Новаго тя Илию Фесвитянина, новаго тя Иоанна Крестителя, новаго тя Моисея Боговидца познаваем, Священнейший отче наш Павле, всю бо жизнь твою в непрестаннем посте и смиренномудрии, в деннонощных молитвах и коленопреклонениих, в нищите и наготе, в трудах и бдении провел еси: сего ради и Господь управи тя в пустыню сию, яко в обетованную землю, юже множеством последующих тебе в преславный град обратил еси, тем и вопием тебе ныне таковая:

Радуйся, пустынный предобрый гражданине.

Радуйся, духовный купец, обретший многоценен бисер Христа Иисуса Сладчайшего.

Радуйся, мудрый путеводителю, управляющий стадо твое от земли на горняя.

Радуйся, известный охранителю бедствующих в пустыни сей греховней.

Радуйся, истинный проповедниче покаяния.

Радуйся, искусный кормчий плавающих в пучине житейских страстей и попечений.

Радуйся, яко крестным знамением, аки мечем обоюду острым, безстудныя помыслы от диавола тебе находящия посекл еси.

Радуйся, яко и от человек жезлом твоим бесы во адскую бездну низвергаеши.

Радуйся, светило страну сию прежде непроходимую, собою просвещающее.

Радуйся, звездо, греховную тьму, таящуюся в нас, светом учения твоего разгоняющая.

Радуйся, угодниче Христов, дивный в чудесех и по отшествии твоем от мира сего лукаваго.

Радуйся, яко и мы тобою мир с Богом имамы.

Радуйся, Павле преподобне, пустынный жителю!

Кондак 8

Странное и велие чудо является притекающим к раце мощей твоих, блаженне отче Павле, пред ними бо и малое моление тебе приносяще, всяких болезней исцеление приемлем и в благоверии утверждающеся, упование на тя возлагаем, выну вопиюще Богу: Аллилуиа.

Икос 8

Всем вся был еси, и ныне являешися, да всяко некия спасеши, по слову тезоименнаго ти апостола, богоносне отче Павле, и никакоже отступил еси от созданныя тобою обители, но поучением и наставлением наказуеши собранныя чада твоя, глаголющия и ныне тебе таковая:

Радуйся, спасение и заступление наше у Бога.

Радуйся, всем притекающим к раце мощей твоих вернаго исцеления подателю.

Радуйся, яко любовь нелицемерную к Богу и ближнему стяжавый.

Радуйся, яко тем апостол и пророк законную главизну исполнивый.

Радуйся, яко учению тезоименнаго апостола Павла во всем последовал еси.

Радуйся, яко от млада возраста Бога познал еси.

Радуйся, яко от него словесных овец, извествованный учителем твоим Сергием, пастырь устроен был еси.

Радуйся, яко в нищите и бедности от Господа прославленный.

Радуйся, яко мраз и хлад терпеливо понесл еси.

Радуйся, яко вся воздушныя перемены непоколеблемо претерпел еси.

Радуйся, яко все внешнее злостарадание без роптания восприял еси.

Радуйся, яко дупленым древом, аки лествицею, на небо возшел еси.

Радуйся, Павле преподобне, пустынный жителю!

Кондак 9

Весь предался еси Вседержителю, отче наш Павле, егда тя распали божественное желание, и егда в горняя весь ум твой впери: сего ради оставив родителей твоих и все стяжание мирское в ничтоже вменив, последовал еси учению Христову, выну поя священную песнь: Аллилуиа.

Икос 9

Ветии суемудренных богопротивному учению не последовав, преблаженне отче Павле, истинный ученик апостолов был еси, житием твоим в православней вере паче и паче утверждая и чудесы твоими удивляя всех, глаголющих тебе таковая:

Радуйся, насадителю благочестия.

Радуйся, искоренителю нечестивых и дел их посрамителю.

Радуйся, подражателю ликом ангельским в песнопении духовном.

Радуйся, богоносных и великих отец подвигом и трудом последователю усерднейший.

Радуйся, яко и духовнаго отца твоего бдением и молитвою удивил еси.

Радуйся, яко от него в святости жития свидетельствованный.

Радуйся, непроходимыя пустыни светильниче пресветлый.

Радуйся, пустынножителей лепотное украшение.

Радуйся, яко дикии звери пред тобою аки агнцы кротцы бываху.

Радуйся, яко хищнии птицы от руки твоея пищу небоязненно приимаху.

Радуйся, яко всем вся нужная от тебе требующим подавал еси.

Радуйся, яко и ныне притекающии к тебе с молением нетщы отходят.

Радуйся, Павле преподобне, пустынный жителю!

Кондак 10

Спасти хотя братию обители твоея, отче наш Павле, от нахождения варвар, представ им в сонном видении укреплял вся страдания сносити терпеливно, обещавая за сие воздаяние небесное: сего ради и мы, твои ученицы, якоже и они, да не постраждем от невидимых враг подобное, молим тебе не оставити нас, и молящеся умильно глаголем Богу: Аллилуиа.

Икос 10

Стена еси тверда и оплот нерушим восхваляющим, блаженне Павле, болезни и труды твоя и всем требующим в бедах и напастех твоего заступления: темже и нас, немоществующих грехи многими и всякаго блага лишенных, заступи молитвами твоими, со усердием тебе вопиющих таковая:

Радуйся, указателю пути праваго.

Радуйся, вождю и законоположителю пустынножителей.

Радуйся, дерзостно правил твоих несоблюдающих наказателю.

Радуйся, присный молитвенниче о поминающих честную память твою.

Радуйся, в нуждах и бедах преславный заступниче.

Радуйся, в напастех и скорбех скорый защитниче.

Радуйся, маслино в дому Божием насажденная.

Радуйся, красныя плоды добродетелей произращающая.

Радуйся, благопрозябший грозде винограда Христова.

Радуйся, сладосте духовная, искапающая вино, сердца верных веселящее.

Радуйся, от Безначальнаго Отца, Единородна Слова несозданна и Святаго Духа сиянием просвещенный.

Радуйся, яко в дуплене древе на камени божественныя веры сердцем и душею твердо укрепленный.

Радуйся, Павле преподобне, пустынный жителю!

Кондак 11

Пение всеумильное принося Пресвятей Троице, богоизбранный отче Павле, храм преславен в честь Ея воздвигл еси, в нем же и ныне приносится безкровная жертва, о возвышении и разширении всероссийскаго царства и церкви, о низложении супостатов, и о спасении всех православных христиан, вопиющих Богу: Аллилуиа.

Икос 11

Светозарною звездою в непроходимей сей пустыни сияяй, богоносне Павле, яко многорастительный финик в дому Святыя Троицы процвел, и яко сад живоносен всем притекающим к раце мощей твоих был еси: сего ради и глаголем ти таковая:

Радуйся, поборниче православия.

Радуйся, храме Триипостаснаго Божества одушевленный.

Радуйся, луче, озаряющая сущия во мраце жития плотскаго.

Радуйся, светоподательный светильниче сущим во тьме неразумия.

Радуйся, деннице пресветлая, возвещающая всем грешным покаяние.

Радуйся, цевнице духовная услаждающая чувства сладкопением небесным.

Радуйся, источниче приснотекущий жаждущим вечныя жизни.

Радуйся, кладезю воды живыя, всем исцеление подавающий.

Радуйся, каменю пустынный, источаяй мед и млеко от неверия обращенным.

Радуйся, свеще, пламенем божественныя любве возжженная.

Радуйся, яко в горах, в пустынях и островех каменных всякое неприязненное искушение доблественно победил еси.

Радуйся, яко за сия благорасленными Божественнаго рая цветы украсился еси.

Радуйся, Павле преподобне, пустынный жителю!

Кондак 12

Благодатию Божественною осеняем, просиял еси, в животе твоем, богоносне отче Павле, якоже всесветлое солнце в мире, и во успении твоем с верою и любовию к раце мощей твоих притекающия не оставляеши, и глаголющия Богу: Аллилуиа.

Икос 12

Поюще твоя чудеса, преподобне отче Павле, воспеваем прославльшего тя Бога, в Троице Святей покланяемаго, и молим его научити нас, славити и глаголати тебе таковая:

Радуйся, истинный и верный поклонниче Бога Вышняго.

Радуйся, неложный заповедей Его хранителю.

Радуйся, церковный строителю неоскудный.

Радуйся, церковное украшение и истины поборниче.

Радуйся, неусыпный исполнителю отеческих преданий.

Радуйся, верный всего священнаго почитателю и ревнителю неуклонный.

Радуйся, яко вся мирския волны страстей теплым желанием безстрастия укротил еси.

Радуйся, яко вся губительная демонская коварства всеоружием крестным попрал еси.

Радуйся, яко сугубу мзду ради трудов твоих от Бога приял еси.

Радуйся, яко пресветел венец ради трудов твоих от руки Господней восприял еси.

Радуйся, покланяющихся раце мощей твоих заступление.

Радуйся, святей обители твоей утверждение, и нам почитающим тя спасение.

Радуйся, Павле преподобне, пустынный жителю!

Кондак 13

О добрый наш пастырю и Учителю! О Великий чудотворче, преподобне отче Павле! Приими сие наше малое хваление, и моли Царя царствующих и Господа господствующих: страждущую страну российскую от лютых безбожник и власти их Господь да свободит, и да возставит престол православных царей: верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш, нам же почитающим тя и всем православным христианом спасение и в болезнех исцеление даруй, и молитвами твоими изми нас будущия муки да выну воспеваем Богу победную песнь: Аллилуиа, Аллилуиа, Аллилуиа.

[Се́й конда́к глаго́лется три́жды.]

Икос 1

Ангела земного и небесного человека яви тебе всех Создатель, и благоплодную душу твою измлада провидев, преподобне Павле, научи всех вопити тебе сице:

Радуйся, чистое Святаго Духа приятелище.

Радуйся, ангельским ликом собеседниче.

Радуйся, любве ради Христовы преименитый град отечества твоего оставивый, и в пустынях со зверьми жити изволивый.

Радуйся, древо благосеннолитвенное, при исходящих вод насажденное.

Радуйся, яко плод присноцветущь послушания принесл еси.

Радуйся, яко терпением твоим вся страсти плотския умертвил еси.

Радуйся, яко крестным знамением лукавых духов далече от тебе отгнал еси.

Радуйся, столпе житейскими бурями непоколебимый.

Радуйся, яко до ныне обильную реку исцелений источаеши.

Радуйся, яко о благоденствии земли Российския умоляеши.

Радуйся, яко обитель твою и нас рабов твоих в молитвах не оставляеши.

Радуйся, яко скорбящим в недугах исцеление подаваеши.

Радуйся, Павле преподобне, пустынный жителю!

Кондак 1

Избранный и дивный во святых, отче наш Павле, от Христа Бога дар чудес обильно приемый! Похвальная приносим ти ныне любовию чтущии тя: ты же яко имея дерзновение многое ко Святей Троице, моли избавитися от всяких бед верно хвалящим тя:

Радуйся, Павле преподобне, пустынный жителю!

Молитва

О добрый наш пастырю и богомудрый наставниче, преподобне отче Павле! Услыши нас грешных, молящихся тебе и призывающих в помощь скорое предстательство твое: виждь нас грешных, в толицех обстояниих сущих, виждь нас немощных, отвсюду уловляемых, всякаго блага лишенных и умом от малодушия помраченных: потщися, угодниче Божий, не оставити нас в греховном плену быти, да не будем в радость врагом нашим и не умрем в лукавых деяниях наших. Моли о нас недостойных Содетеля нашего и Владыку, Емуже ты со безплотными лики предстоиши. Милостива к нам сотвори Бога нашего в нынешнем веце и в будущем, да не воздаст нам по делам нашим и по нечистоте сердец наших, но по своей благости воздаст нам: на твое бо ходатайство уповающе, твоим предстательством хвалимся, твое заступление на помощь призываем и, к цельбоносному гробу твоему припадающе, исцеления просим: избави нас, угодниче Христов, от злых, находящих на нас, и укроти волны страстей и бед, востающих на нас, да ради святых твоих молитв не обымет нас напасть, и не погрязнем в пучине греховней и в тине страстей наших. Моли, преподобне отче Павле, Христа Бога нашего, да подаст нам мирное жительство, оставление грехов, душам нашим спасение и велию милость. Аминь.