Икона Богородицы Толгская

Празднование

Тропарь, глас 4

Днесь све́тло сия́ет на То́лге
о́браз Твой, Пречи́стая Де́во Богоро́дице,
и, я́ко со́лнце незаходи́мое,
всегда́ ве́рным подаде́ся,
его́же ви́дев на возду́се,
неви́димо А́нгелы, я́ко ники́м, держи́ма,
преосвяще́нный епи́скоп гра́да Росто́ва Три́фон
тече́ ко явле́нному светя́щемуся столпу́ о́гненну,
и по вода́м, я́ко по су́ху, пре́йде,
и моля́шеся Ти ве́рно о па́стве и о лю́дех.
И мы, к Тебе́ притека́юще, зове́м:
Пресвята́я Де́во Богоро́дице,
ве́рно Тя сла́вящих спаса́й,
страну́ на́шу, архиере́ев
и вся Росси́йския наро́ды от всех бед избавля́й

по вели́цей Твоей ми́лости.

Кондак, глас 8

Чу́дное и богоприя́тное светоно́снаго зра́ка Твоего́ явле́ние, Пречи́стая Де́во,
с ве́рою взира́ющим быва́ет изве́стное ча́яние спасе́ния,
столпо́м бо о́гненным явля́ющи предста́тельство,
неусы́пное и те́плое за ны к Бо́гу возсыла́еши моле́ние,
и́мже страну́ Росси́йскую от вся́ких бед изба́ви, мо́лимся,
да ра́достными усты́ вопие́м Ти вси́:

ра́дуйся, Предводи́тельнице ве́чнаго блаже́нства.

Ин кондак, глас 8 Стра́нное и богоприя́тное светоно́снаго зра́ка Твоего́ явле́ние,/ Пречи́стая Де́во,/ с ве́рою взира́ющим быва́ет изве́стное ча́яние спасе́ния,/ столпо́м бо о́гненным явля́ющи предста́тельство,/ неусы́пное и те́плое за ны к Бо́гу возсыла́еши моле́ние,/ и́мже от вся́ких бед изба́ви, мо́лимся,/ да ра́достными усты́ вопие́м Ти вси́:// ра́дуйся, Хода́таице ве́чнаго блаже́нства.

Молитва

О, Пресвята́я Госпоже́, Де́во Богоро́дице, вы́шшая Херуви́мов и Серафи́мов и святе́йшая всех святы́х! Ты, Всеблага́я, на То́лге ико́ну Твою́ многоцеле́бную блаже́нному святи́телю Три́фону огневи́дно яви́ти благоволи́ла еси́, и е́ю мно́гая и неизрече́нная чудеса́ соде́лала еси́, и ны́не содева́еши, по Твоему́ неизрече́нному к нам милосе́рдию. Тебе́ пред пречи́стым о́бразом Твои́м припа́даем и мо́лимся, Преблагослове́нная ро́да на́шего Засту́пнице: в стра́нствии сем земне́м, многоско́рбнем и многомяте́жнем, не лиши́ нас Твоего́ заступле́ния и покро́ва держа́внаго. Спаси́ и защити́ нас, Влады́чице, от разжже́нных стрел лука́ваго врага́ спасе́ния на́шего. Укрепи́ немощну́ю во́лю на́шу к де́ланию за́поведей Христо́вых, умягчи́ окамене́лая сердца́ на́ша любо́вию к Бо́гу и бли́жним на́шим, да́руй нам сокруше́ние серде́чное и покая́ние и́стинное, да, очи́стившеся от скве́рны грехо́вныя, возмо́жем принести́ Творцу́ благоуго́дныя Ему́ плоды́ до́брых дел и сподо́битися ми́рныя христиа́нския кончи́ны и отве́та пра́ваго на стра́шнем и нелицеприя́тнем Суде́ Его́. Ей, Госпоже́ Всеми́лостивая! В час гро́зный сме́ртный наипа́че яви́ нам Твое́ многомо́щное заступле́ние, ускори́ тогда́ на по́мощь к нам, безпо́мощным, и держа́вною руко́ю Твое́ю исхити́ нас из вла́сти лю́таго мироде́ржца, и́бо вои́стину мно́го мо́жет моли́тва Твоя́ пред лице́м Го́спода, и ничто́же невозмо́жно хода́тайству Твоему́, а́ще то́кмо восхо́щеши. Те́мже, на святы́й о́браз Твой умиле́нно взира́юще и пред ним, я́ко живе́й Ти су́щей с на́ми, покланя́ющеся, с упова́нием благи́м са́ми себе́, и друг дру́га, и весь живо́т наш Тебе́ по Бо́зе моли́твенно предае́м и Тя велича́ем с ро́ждшимся от Тебе́ Спаси́телем на́шим, Го́сподом Иису́сом Христо́м, Ему́же, со Безнача́льным Его́ Отце́м и Пресвяты́м Ду́хом, подоба́ет вся́кая сла́ва, честь и поклоне́ние, ны́не и при́сно и во ве́ки веко́в. Ами́нь.

Канон Пресвятой Богородице пред иконой «Толгская»

глас 8

Пе́снь 1

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Пресвята́я Богоро́дице, спаси́ на́с.

У́м мо́й, мно́гими напа́стьми помраче́нный, просвети́, Де́во, Све́т ро́ждшая Боже́ственный, во́лю, в доброде́тели уныва́ющую, воспламени́ свяще́нною любо́вию, па́мять, в славосло́вии изнемога́ющую, укрепи́, да пресве́тлое Твое́ на То́лге явле́ние воспою́ досто́йно, Чи́стая.

Хра́ме Трисо́лнечнаго Све́та прекра́сный, украси́ моя́ чу́вства, молю́ся, да, все́ми чу́вствы целому́дрен сы́й, честно́е Твое́ на То́лге явле́ние целому́дренно воспою́, Чи́стая.

К Твое́й пресве́тлаго зра́ка ико́не припа́даю, окая́нный: ду́шу мою́ просвети́, яви́ и те́ло нескве́рно и, от лю́тых мя́ неду́гов свободи́вши, покажи́ прича́стника насле́дия Небе́снаго, Богоневе́стная.

Я́коже столпо́м о́гненным зарю́ Твоего́ зра́ка яви́ла еси́ Богоно́сному святи́телю, та́ко и ны́не све́том благода́ти явля́еши ве́рным Твое́ ско́рое предста́тельство и заступле́ние. При́зри у́бо на рабы́, призыва́ющия Тя́ и тре́бующия Твоея́ по́мощи, Благода́тная, да́руй стране́ Росси́йстей на враги́ держа́вное одоле́ние, вино́вна бо еси́ все́х благи́х, ве́чную бла́гость на́м воплоти́вшая, Небеси́ хвало́ и ми́ру Помо́щнице.

Пе́снь 3

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Низложи́ во мне́ нало́ги бесо́вския, го́рдость в доброде́телех, лицеме́рие в свя́тости, тщесла́вие во бде́нии, высокоу́мие в благогове́нии и неблагода́рность в благодея́ниих Сы́на Твоего́, Еди́на Всепе́тая Де́во.

Стра́нна мя́ любоче́стия сотвори́, молю́ Тя́, Де́во, и чу́жда любопы́тства о челове́ческих согреше́ниих, де́рзость и изли́шнее на ми́лость Сы́на Твоего́ упова́ние отдали́ от мене́, да досто́йны Сы́ну Твоему́ плоды́ принесу́, еди́на Пречи́стая.

Нача́ло и ху́дость моего́ естества́ познава́я, молю́ Тя́, Де́во, да́ждь ми́ презре́ние самолю́бия, бе́гство челове́ческия хвалы́, позна́ние со́бственнаго греха́ и со́бственныя не́мощи, Еди́на Богоблаже́нная.

Кра́ткий все́х веще́й и всего́ ми́ра сме́ртнаго коне́ц и муче́ние бу́дущее за суету́ дея́ний тщесла́вных помышля́ти сподо́би мя́, Де́во, да, благода́тию Сы́на Твоего́ к пути́ и́стиннаго покая́ния наста́влен, ве́чнаго избе́гну прокля́тия, Пренепоро́чная.

Седа́лен, гла́с 4:

Сто́лп Тво́й о́гненный еди́ну печа́ть благода́ти Твоея́ сильне́йшую мни́м, Всенепоро́чная, се́ю бо в соблюде́ние за́поведей Сы́на Твоего́ и Бо́га печа́таеши ве́рных сердца́ прекре́пко, да не вра́г, ху́лящий и́мя Твое́, преодоле́в ле́стию, порабо́тит ны́, рабы́ Твоя́, в поги́бель кроме́шнюю. Но поспе́шеством бла́гости Твоея́, с Твои́м зна́мением, пока́жемся имени́ты насле́дницы Ца́рствия Нетле́ннаго, Пречи́стая Де́во.

Возбра́нное на́м и ди́вное избавле́ние дарова́ся, о́браз Тво́й честны́й, Преблагослове́нная Госпоже́ Де́во Богоро́дице, к нему́же мы́ взира́юще, си́це к Тебе́ зове́м: ра́дуйся, святи́телем благоле́пие; ра́дуйся, прибе́жище на́ше, и упова́ние, и спасе́ние; ра́дуйся, красото́ и сла́во оби́тели То́лгския и всея́ Росси́и прибе́жище и защище́ние; ра́дуйся, Неве́сто Неневе́стная.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Жестокосе́рдием отягче́ннаго мя́ облегчи́, немилосе́рдием к тре́бующим окамене́нную утро́бу мою́ умягчи́, бу́рею сребролю́бия объя́таго мя́ утиши́, Богоневе́стная Влады́чице.

Во упова́нии тле́нных и вре́менных веще́й не оста́ви мя́ и пла́мень хище́ния непра́веднаго, бе́здною милосе́рдия Твоего́ покры́вши, угаси́ во мне́, Еди́на Присноде́во.

Идолослуже́ние в лихоима́нии и безбо́жность в заблужде́нии и́стиннаго благоче́стия и Правосла́вныя ве́ры потреби́ от правосла́вных, Влады́чице, и вконе́ц разори́ от единове́рных, да единоду́шно восхва́лим Тя́, Еди́на Присноде́во.

У́м мо́й, молю́ Тя́, благоустро́й к позна́нию Еди́наго Су́щаго Бо́га, к разсмотре́нию ве́чных бла́г, и щедролю́бие да́руй ми́, я́коже Тави́фе, и благода́тию Христо́вою украси́ мя́, я́коже Корни́лия со́тника, Еди́на Присноде́во.

Пе́снь 5

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

О́гнь нечистоты́ и вся́кия скве́рны во мне́ разжиза́тельный мо́рем бла́гости Твоея́ потопи́, и мглу́ грехо́вную разжени́, и се́рдце мое́ ра́дости испо́лни, Всенепоро́чная.

Срамосло́вию безобра́зному не да́ждь во мне́ ме́ста, Влады́чице, селе́ние собла́знов разори́, хра́м мя́ чистоты́ и вся́каго благоче́стия соде́лай, да чи́стыми усты́ велича́ю Тя́ вы́ну, Всенепоро́чная.

Сме́рть, су́д, гее́нну, Ца́рствие Небе́сное в па́мяти мое́й углуби́, Влады́чице, да, поне́ после́дняя сия́ в па́мяти содержа́, нало́ги лю́тых беззако́ний оста́влю и по сме́рти мое́й получу́ Тобо́ю Ца́рство Небе́сное, ны́не же велича́ю Тя́ при́сно, Еди́но души́ моея́ упова́ние.

Любо́вь сея́ жи́зни преизли́шнюю, и вре́меннаго плотска́го поко́я раче́ние отложи́ от мене́, молю́ Тя́, Чи́стая, да, су́етнаго помышле́ния избе́г, Тобо́ю получу́ нетле́нное на Небеси́ бога́тство, Еди́но души́ моея́ упова́ние.

Пе́снь 6

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Ра́дости, к преогорче́нию бли́жняго низвлеку́щия, чу́жда мя́ соде́лай, Пречу́дная Цари́це, о нестрое́ниих и́скренняго без печа́ли бы́ти не допуща́й мене́, Человеколюби́вая Влады́чице, и враго́в злоде́йствия изба́ви мя́, приле́жно молю́ Тя́, Всенепоро́чная.

За́висти в по́мысле мое́м не да́ждь вкореня́тися, ро́ждшаяся от ко́рене свя́та, Де́во, и братоненавиде́ния изба́ви мя́, Чи́стая, да не за́вистию диа́волею, прине́сшею сме́рть в ми́р, помраче́н бы́в, лишу́ся Бо́жия благода́ти и жи́зни ве́чныя, Всенепоро́чная.

Равноду́шие в беда́х положи́ во мне́, Всечи́стая, с ра́дующимися в благополу́чии духо́вную ра́дость, к се́тующим в злоключе́нии сожале́ние да́руй ми́, Пресвята́я, и братолю́бие по тому́жде естеству́ и по приобще́нию тоя́жде благода́ти Христо́вы низпосли́ ми́ свы́ше, любве́ пучи́ну ро́ждшая Де́во.

Жела́ние кра́йнее согре́й во мне́ вся́кому по естеству́ и по и́мени Христо́ву от души́ благотвори́ти, Блага́я, да не ка́ко зло́б лю́тых душа́ моя́ испо́лнится, и живо́т мо́й а́ду прибли́жится, и пре́дан бу́ду без ми́лости, я́ко не сотвори́вый ми́лости, во тьму́ кроме́шнюю, Всенепоро́чная.

Конда́к, гла́с 8:

Стра́нное и богоприя́тное светоно́снаго зра́ка Твоего́ явле́ние, Пречи́стая Де́во, с ве́рою взира́ющим быва́ет изве́стное ча́яние спасе́ния, столпо́м бо о́гненным явля́ющи предста́тельство, неусы́пное и те́плое за ны́ к Бо́гу возсыла́еши моле́ние, и́мже от вся́ких бе́д изба́ви, мо́лимся, да ра́достными усты́ вопие́м Ти́ вси́: ра́дуйся, Хода́таице ве́чнаго блаже́нства.

И́кос:

Лучеза́рная Твоего́ явле́ния на То́лге све́тлость ди́вно блиста́нием свои́м все́х осиява́ет, Бо́жиею бо в Тебе́ су́щею благода́тию ближа́йшая Бо́гу бы́вши, все́м позна́вшим Тя́ и́стинную Богоро́дицу земноро́дным подае́ши незави́стную исцеле́ния ра́дость, е́юже вся́ земля́ Росси́йская преизоби́льно обогати́вшися ны́не, весели́тся непреста́нно и вопие́т Тебе́ с единове́рными: ра́дуйся, Предводи́тельнице ве́чнаго блаже́нства.

Пе́снь 7

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Весе́лие мирско́е пресецы́ и душетле́нное пристра́стие умертви́ во мне́, Де́во, презре́ние вре́менных, жела́ние ве́чных бла́г и нетле́нную ра́дость пода́ждь ми́ с пою́щими: отце́в Бо́же, благослове́н еси́.

Безчи́нное утеше́ние и изли́шество, у́м вредя́щее, душе́ скве́рну ражда́ющее, отлучи́ от мене́, Де́во, и сподо́би, те́лу здра́вие ну́ждное подава́ющи, житию́ же утеше́ние дово́льное, предвкуше́нием ве́чных бла́г наслажда́тися ку́пно с пою́щими: отце́в Бо́же, благослове́н еси́.

Грехо́м, сме́рть лю́тую ражда́ющим, оскверни́х и окаля́х ду́шу мою́, но Ты́, Пречи́стая Влады́чице, очи́сти мя́ от сего́, и наста́ви на богоуго́дное житие́, украси́ же воздержа́нием и благогове́нием, и да́ждь ми́ чи́стым се́рдцем пе́ти: отце́в Бо́же, благослове́н еси́.

Обнови́ мя́, омраче́ннаго самолю́бием, просвети́ све́том зра́ка Твоего́ Влады́чице, и, по́хоти плотски́я укроти́вши во мне́, сподо́би мя́ Ро́ждшемуся от Тебе́ непреста́нно чи́стыми усты́ пе́ти: отце́в Бо́же, благослове́н еси́.

Пе́снь 8

Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.

Возмуще́ние души́ моея́ утоли́, Всенепоро́чная, от клеветы́ наве́тующих изба́ви мя́, вражду́ грехо́вную во мне́ укроти́ и не́нависть с памятозло́бием отврати́ от мене́, Де́во, да прославля́ю Тя́, Чи́стая, во ве́ки.

О́гнь я́рости, во мне́ зело́ разжже́нный, росо́ю благода́ти Твоея́ угаси́, хулу́, умножа́ющую души́ моея́ озлобле́ние, и вся́кий ви́д зло́бы, гнездя́щийся в се́рдце мое́м, искорени́, Де́во, да прославля́ю Тя́, Чи́стая, во ве́ки.

О́браз благода́ти Бо́жия напиши́, Всечи́стая, в души́ мое́й и печа́тию ми́лости Твоея́ укрепи́ и утверди́ мя́, да, все́х зло́б изба́влен, ми́рными усты́ прославля́ю Тя́, Чи́стая, во ве́ки.

Кро́тости и незло́бия Твоего́ не отыми́ от мене́, Пренепоро́чная Де́во, терпе́ние ми́ да́руй тве́рдое во искуше́нии, да, ра́дуяся, прославля́ю Тя́, Чи́стая, во ве́ки.

Пе́снь 9

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Ско́рби се́рдца моего́ отложи́, уны́ние, презира́ющее благода́ть, отыми́ от мене́ и ле́ность ко взыска́нию доброде́тели потреби́ огне́м благода́ти Твоея́, Чи́стая.

Малоду́шием уныва́ющаго мя́ оживи́, отча́янием па́дшаго возста́ви, лише́нием и нераде́нием до́брых ме́ртваго воскреси́, Де́во, Жи́знь безсме́ртную ро́ждшая.

Усе́рдие во мне́ к Бо́жией во́ли сози́жди благода́тию Сы́на Твоего́, ре́вность ко сла́ве Бо́жией воспламени́ в се́рдце мое́м, благогове́ние ко святы́ни Бо́жией устро́й и постоя́нство в благодея́нии да́руй ми́, Де́во, Предводи́тельнице моего́ спасе́ния.

Любо́вь Небе́сныя сла́дости в не́дра души́ моея́ всади́, попече́ние ве́чных бла́г свы́ше посли́ ми́, умиле́ние к покая́нию и сокруше́ние к исправле́нию да́ждь ми́, Де́во, лучеза́рным сия́нием чуде́сне я́вльшаяся.

Свети́лен, гла́с 6:

Досто́йное дне́сь Ма́тери, Творца́ все́х ро́ждшей, почте́ние воздади́м, ве́рнии, Сия́ бо явле́нием Свои́м две́рь ра́йскую отверза́ет, и на́с от скве́рны очища́ет, и на враги́ стране́ на́шей подае́т одоле́ние.

Акафист Пресвятой Богородице перед иконой «Толгская»

Кондак 1

Взбранной Воеводе, Владычице нашей Богородице, осенившей страну Российскую огнезрачным Своея иконы на Толге явлением, похвальное возглашаем пение: Ты же, о Богомати, яко имущая державу непобедимую, от всяких бед избави нас, зовущих:

Радуйся, Радосте наша, иконою Твоею нас присно утешающая.

Икос 1

Ангел земный и человек небесный, святитель Христов Трифон, свыше предъизбран бысть послужити святей иконе Твоей на Толге явлению, Владычице Преблагая: той бо, путь творя от Белоезера по реце Волге, в нощи столп огненный узре на брезе ея пустыннем и, достигнув места, Тобою избраннаго, виде святую икону Твою на воздусе стоящую и светом Небесным сияющую, к нейже молебно припадая, со слезами теплыми сице к Тебе возглашаше:

Радуйся, свеще Богоприемная, темноту душ наших озаряющая;

Радуйся, заре невечерняя, мглу грехов наших разгоняющая.

Радуйся, чудно приявшая Христа Бога, яко угль горящий с Небеснаго Жертвенника;

Радуйся, Купино Неопалимая, законоположником Моисеем предзримая.

Радуйся, столпе огненный, Новаго Израиля путеводящий;

Радуйся, облаче росоносный, зной страстей наших утоляющий.

Радуйся, Предстательнице Всемогущая, тучи гнева Божия от глав наших отводящая;

Радуйся, Заступнице Усердная, от погибели вечныя нас избавляющая.

Радуйся, образ Твой честный в залог спасения нам даровавшая;

Радуйся, огнезрачным явлением его на Толге страну Российскую благословившая.

Радуйся, Радосте наша, иконою Твоею нас присно утешающая.

Кондак 2

Видяще токи чудес и исцелений от святыя иконы Твоея, Пренепорочная Дево, недоумеем песнославити Тя по достоянию: кий бо язык человеческий возможет изрещи величия Твоя, о дивная Палато Владычня? Обаче, любовию Твоею побеждаеми, дерзаем проповедати чудеса Твоя, на Толге явленная, и хвалебно пети всех Творцу: Аллилуиа.

Икос 2

Разумев посещение Божие, чудный святитель со страхом слезно моляшеся пред огнезрачною Твоею иконою, Богомати Пречистая, и смотрением Божиим остави жезл свой святительский на оном брезе, идеже моляшеся: на утрие же спутницы святителя, ищуще жезла его, обретоша вместе с ним тамо Твою небоявленную икону, на земли среди древес стоящую: и тако всем явлен бысть залог Божия благодати, стране Российстей свыше дарованный благоволением Вседержителя, внушающаго нам хвалебно вопити к Тебе:

Радуйся, девства цвете неувядаемый и благовонный;

Радуйся, белоснежный крине, росою Святаго Духа напоенный.

Радуйся, Мати Бога Вышняго, милосердием Твоим и нижних не оставляющая;

Радуйся, Царице Небесе и земли, Ейже вся стихии покоряются.

Радуйся, мосте Божественный, имже вернии благонадежно преходят моря житейскаго лютую пучину;

Радуйся, Путеводительнице Благая, на стези спасительныя нас наставляющая.

Радуйся, граде Царя Великаго, в нем же странники земныя убежище благотишное обретают;

Радуйся, Пристанище тихое обуреваемых.

Радуйся, стено ограждения роду христианскому;

Радуйся, Покрове миру, ширший облака.

Радуйся, Радосте наша, иконою Твоею нас присно утешающая.

Кондак 3

Сила благодатная, иконе Твоей дарованная, Пресвятая Госпоже Богородице, созывает верных соборы песньми духовными славити Тя, Честнейшую Херувим и Славнейшую Серафим: ибо, рождши нетленно Единаго от Троицы, предстоиши ныне пред Престолом Триипостаснаго Божества, идеже Воинства Горния с трепетом вопиют: Аллилуиа.

Икос 3

Имея попечение о создании храма Божия и обители иноческия на месте явления чудныя иконы Твоея на Толге, Владычице Всемилостивая, святитель Трифон вкупе с насельники града Ярославля, со усердием многим обыденно храм Божий воздвигают и тако созидают новую обитель святую, в нейже немолчно воспеваются Тебе благохваления сицевая:

Радуйся, страну Российскую в жребий достояния Себе избравшая;

Радуйся, иконы Твоя чудотворныя, яко звезды в ней умножившая.

Радуйся, сиянием чудес Твоих весну спасения нам возвещающая;

Радуйся, теплотою милосердия Твоего оледенелая сердца наша согревающая.

Радуйся, щедротами Твоими всяк возраст верных снабдевающая;

Радуйся, младенцы милостивно окормляющая.

Радуйся, старцы любвеобильно упокоивающая;

Радуйся, вдовицы и сироты благосострадательно призревающая.

Радуйся, кающихся грешников Споручнице Державная;

Радуйся, истинных рабов Божиих Помощнице Всеизрядная.

Радуйся, Радосте наша, иконою Твоею нас присно утешающая.

Кондак 4

Буря скорбей Тобою утоляется и свирепыя страстей волны в тишину прелагаются, Преблагословенная Дево, ибо Тебе дадеся велия благодать всемирнаго заступления. Темже на святую икону Твою умиленно взирающе, в скорбех отраду, в недузех врачевство обильно от нея почерпаем и зовем гласы хвалебными на ней Изображенному вкупе с Тобою Сыну Твоему и Богу: Аллилуиа.

Икос 4

Слышавше ближнии и дальнии, яко чудес источник явися на Толге, святая и пречистая икона Твоя, Царице и Владычице всея твари, со усердием многим притекаху к целебному Твоему образу, приемля от него дары неисчетных Твоих щедрот. Темже и мы, недостойнии, стезею отцев наших шествующе, с верою и любовию припадаем к Твоей чудотворней иконе и Тебе от глубины сердечныя вопием:

Радуйся, яко икона Твоя, Ангелами невидимо окружаемая, воздух освяти;

Радуйся, яко икона Твоя, огнезрачне на Толге явившаяся, всю страну просвети.

Радуйся, яко иконою Твоею человецы в недузех и скорбех помощь скорую обретают;

Радуйся, яко светом иконы Твоея демоны прогоняются.

Радуйся, яко икона Твоя граду Ярославлю и пределом его свыше в наследие спасительное даровася;

Радуйся, яко иконою Твоею обитель Твоя на Толге светло красуется.

Радуйся, яко пред Твоею иконою святители и людие благоговейно поклоняются;

Радуйся, яко икону Твою все множество православно верующих боголепно чествует.

Радуйся, богомудрых иноков Благая Помощнице во спасение;

Радуйся, богопросвещенныя России крепкое заступление.

Радуйся, Радосте наша, иконою Твоею нас присно утешающая.

Кондак 5

Боготечная звезда, икона Твоя честная, Госпоже Богомати, страну нашу полунощную сиянием преславных чудес просвети, юже, яко дар Божественный, Россия восприемши, прославляет и воспевает Твоя щедроты: Ты же, Всещедрая и Всеблагая рода нашего Заступнице, озари и наша сердца светом благодатным, да возможем богоприятно пети Господу нашему серафимскую песнь: Аллилуиа.

Икос 5

Видевше чудо преславное, како внезапу от иконы Твоея святыя, Пречистая Дево, от десныя Твоея руки и от левыя ноги Тобою держимаго Богомладенца две струи мира благоухающаго и целебнаго истекоста, благоговейный игумен Герман с братиею ужаса и радости исполнишася и, помазуяся миром тем благодатным, Тебе сия радостныя приношаху глаголы:

Радуйся, алавастре драгоценный, Христова благоухания исполненный;

Радуйся, мирохранилище исцелений, никогдаже оскудевающее.

Радуйся, величием чудес Твоих превосходящая разум человеческий;

Радуйся, от доски сухия миро целебное пачеестественно изливающая.

Радуйся, тем миром недуги многия врачующая;

Радуйся, мира излиянием от иконы Твоея святыя милосердие Твое к нам показующая.

Радуйся, души наша орошающая к плодоношению духовному;

Радуйся, сердца наша увеселяющая Твоим Божественным о нас благопромышлением.

Радуйся, стамно всезлатая, манну небесную хранящая;

Радуйся, Скиние Живаго Бога.

Радуйся, Радосте наша, иконою Твоею нас присно утешающая.

Кондак 6

Проповедницы Богопросвещеннии, Апостоли Христовы, егда узреша в Лидде, на стене храма Твоего, нерукотворенно изобразившуюся икону Твою, со благоговением ей поклонишася, Богомати Пречистая, имже подражающе, и мы, смиреннии, колена наша пред дивным и многоцелебным образом Твоим, егоже на Толге огневидно явити благоволила еси, усердно преклоняем и с любовию воспеваем рождшемуся от Тебе Спасителю мира хвалебную песнь: Аллилуиа.

Икос 6

Возсия нам на Толге немерцающая заря великих чудес, икона Твоя Божественная, Богородице Дево, в нейже залог несомненный Божия благоволения и Твоего Небеснаго заступления стране Российстей ниспослася от щедродательныя руки Вседержителя Бога. Темже радующеся славословим Твое милосердие и песненно Тебе вопием:

Радуйся, Хранительнице наша и Утверждение;

Радуйся, Помощнице наша и Похвало.

Радуйся, нищих и убогих изобильное богатство;

Радуйся, не гнушающаяся самих презренных и отверженных.

Радуйся, от рова погибельнаго исхищающая к Тебе взывающих грешников;

Радуйся, от врат смертных возращающая опасно болящих.

Радуйся, Богом дарованная отрада страждущих;

Радуйся, скорое услышание верно Тебе молящихся.

Радуйся, благодатное утешение всех скорбящих;

Радуйся, несокрушимое защищение на Тя уповающих.

Радуйся, Радосте наша, иконою Твоею нас присно утешающая.

Кондак 7

Хотя Человеколюбец Христос явити велию любовь Свою к людем, искупленным Честною Его Кровию, Тебе, Матерь Свою Пренепорочную, в покров и защиту роду христианскому дарова; Ты бо воистинну сердобольная Мати являешися всем с верою и упованием прибегающим к Твоему теплому заступлению, егоже не лиши и нас, славящих пречестное имя Твое и поклоняющихся чудотворному образу Твоему, Сыну же Твоему зовущих: Аллилуиа.

Икос 7

Новое и предивное чудо яви всех чудес Творец и всея твари Владыка, егда во время пожара обители Твоея на Толге попущением Божиим сгоревшу внезапну и храму Твоему, икона Твоя святая неопалима и невредима в нем сохранися, ангельскима руками невидимо пронесенная из заключеннаго и огнем пылающаго храма, вне монастыря, в лесную дубраву, идеже на древе стоящая и светом сияющая обретена бысть Твоим благопромышлением, Пречистая и Преблагословенная Дево, слышащая от нас сия достодолжныя похвалы:

Радуйся, сияющая благодатию и славою предивных чудес;

Радуйся, облеченная в светлую одежду милостей и щедрот.

Радуйся, силою Твоею Божественною силу естества огненнаго победившая;

Радуйся, икону Твою честную несгораему в огни соделавшая.

Радуйся, залогу Твоего к нам благоволения безвременно погибнути непопустившая;

Радуйся, ангельскима рукама его из пламене исхитившая.

Радуйся, свет тихий и радостный от многочудеснаго образа Твоего возсиявшая;

Радуйся, скорбная сердца иноков обители Твоея обретением его возвеселившая.

Радуйся, сетование их на ликование преложившая;

Радуйся, лишение их щедродательно восполнившая.

Радуйся, Радосте наша, иконою Твоею нас присно утешающая.

Кондак 8

Странники мы и пришельцы в мире сем скоротечнем, путь творяще к Вечному Небесному Отечествию нашему, Тебе, благую Одигитрию, молим и просим, руководствуй нас стезею спасительною заповедей Христовых к светлому граду Иерусалиму Горнему и не попусти уклонитися в дебри греховныя, ведущия к темнице адской, да спасаеми помощию Твоею державною, сподобимся на земли живых пети Создателю нашему вечно хвалебную песнь: Аллилуиа.

Икос 8

Всем вся благая и спасительная даруеши от святыя чудотворныя иконы Твоея, Богомати Пречистая, юже яко сокровище многоценное зряще, со гласом радования и благодарения взываем Ти:

Радуйся, скорбей и печалей благодатная Утолительнице;

Радуйся, недугов душевных и телесных добрая Целебнице.

Радуйся, утопающих скоропредстательная Избавительнице;

Радуйся, путешествующих благонадежная Хранительнице.

Радуйся, слепых Просвещение;

Радуйся, хромых правохождение.

Радуйся, немых ясноглаголание;

Радуйся, прокаженных очищение.

Радуйся, глухих благослышание;

Радуйся, мертвецев оживление.

Радуйся, Радосте наша, иконою Твоею нас присно утешающая.

Кондак 9

Вся страна наша православная милостями Твоими, Богомати, облагодетельствованная, немолчно славит имя Твое и благоговейно почитает пречистаго лика Твоего изображение, имже дивная и преславная обыкла еси являти нам чудеса. Темже сынове российстии икону Твою в щит и ограждение от врагов видимых и невидимых присно имеют и помощию Твоею святою побеждающе супостаты, вопиют Царю Небесе и земли: Аллилуиа.

Икос 9

Ветийство наше песненное не довлеет ко изглаголанию всех чудес, Тобою, Владычице, явленных и присноявляемых нам от многоцелебныя иконы Твоея на Толге: но Ты, яко Благая и Милосердая Мати, не возгнушайся наших недовлеющих и недостойных похвал и милостиво преклонися к Тебе вопиющим:

Радуйся, Обрадованная и Преблагословенная Дево;

Радуйся, яко Господь с Тобою и Тобою с нами.

Радуйся, едина избранная и добрая в женах;

Радуйся, роду человеческому отверзшая вход в Царствие Горнее.

Радуйся, возрастившая нам Плод спасения;

Радуйся, Спаса рождшая душ наших.

Радуйся, во объятиях Твоих державшая Вседержителя;

Радуйся, на руку Твоею носившая всех Творца.

Радуйся, млеком Твоим питавшая Питателя вселенныя;

Радуйся, одушевленный храме Бога Слова.

Радуйся, Радосте наша, иконою Твоею нас присно утешающая.

Кондак 10

Спасительное и тихое пристанище от треволнений моря житейскаго видим святую обитель Твою на Толге, в нейже икона Твоя, Владычице, лучами чудес верныя просвещающи, всех руководствует на путь благочестия и спасения. Сего ради прославляем Твою благостыню, яко неотступно с нами иконою Твоею пребывавши, души и телеса наша ею благодатно врачуеши и выну ходатайствуеши за нас у Престола Пресвятыя Троицы, идеже лицы святых радостно возглашают: Аллилуиа.

Икос 10

Стена и покров граду Ярославлю дадеся святая икона Твоя от щедрот Человеколюбца Бога, Емуже в человеколюбии подражающи, Царице и Владычице наша Всемилостивая, множицею град сей от разорения ратнаго сохраняла еси и во время пагубнаго бездождия дождь изобилен ему даровала еси пришествием честнаго Твоего образа, имже и ныне нас милостивно посещаеши и благоутробно приемлеши пред ним возносимыя Тебе от сердца наши молитвы, с пением таковым:

Радуйся, слезы горестныя отирающая от очес страждущих и печальных;

Радуйся, скорбная сердца услаждающая Твоим благодатным участием.

Радуйся, мертваго отрока воскресившая, к радости плакавших пред иконою Твоею родителей его;

Радуйся, чете неплодных супругов чадородие даровавшая.

Радуйся, девицу, злым духом одержимую, от мучения демонскаго свободившая;

Радуйся, мужа, изсохшия нозе имевшаго, скоро исцелившая.

Радуйся, в разбойники впадшаго и Тя на помощь призвавшаго от смерти горькия избавившая;

Радуйся, иерея, глухотою болезновавшаго, ясно слышати устроившая.

Радуйся, оскудение брашен в святей обители Твоей чудесно восполнившая;

Радуйся, святотатца, достояние обители Твоея похитившаго, грозно наказавшая.

Радуйся, Радосте наша, иконою Твоею нас присно утешающая.

Кондак 11

Пение и моления наша смиренныя, пред святою и чудотворною Твоею иконою от любве теплыя Тебе возносимыя, не презри, Госпоже Всемилостивая, но благопослушлива буди к нам, поклоняющимся со благоговением и верою Твоему Божественному образу и просящим со слезами милостивнаго Твоего заступления, егоже сила воистинну превосходит всякое разумение и созывает Ангелов и человеков соборы вкупе хвалити Творца богокрасною песнию: Аллилуиа.

Икос 11

Светоподательную лампаду, елеем милости исполненную и преизливающуюся, созерцаем Тя очами веры, Богоизбранная Богоотроковице, и, кротким сиянием Твоим озаряеми, любовию же Твоею присно согреваеми, Тебе, Благой Заступнице нашей, иконою Твоею дивныя щедроты Твоя нам ниспосылающей, благодарственно и умиленно глаголем:

Радуйся, во всяких нуждах и делах скорое вспоможение нам дарующая;

Радуйся, в скорбех и печалех Небесную отраду в сердца наша проливающая.

Радуйся, клирика обители Твоея от потопления воднаго избавившая;

Радуйся, жену умершую к жизни возвратившая.

Радуйся, бесных многажды исцелившая;

Радуйся, изступленных умом смыслом здравым одарившая.

Радуйся, очами болезновавших врачевавшая;

Радуйся, слепца прозрети пред иконою Твоею сотворившая.

Радуйся, хромаго и ничащаго прямо ходити устроившая;

Радуйся, главою болезновавшему явлением Твоим во сне исцеление подавшая.

Радуйся, Радосте наша, иконою Твоею нас присно утешающая.

Кондак 12

Благодати Божия святое и непорочное жилище, Мати Господа Вышних Сил, облагодати наш помысл, благочестно воспевати Твоя чудеса, на Толге от честныя иконы Твоея явленная, и Твоим невечерним сиянием озари наша темныя души, приводящи их к свету Трисияннаго Божества, идеже радость и блаженство вечное уготовано праведным, поющим немолчную песнь Вседержителю: Аллилуиа.

Икос 12

Поем песнь хвалы и благодарения Тебе, Богорадованная Дево, проповедуем велегласно величие чудес Твоих и богатство милости Твоея, на нас и отечествии нашем явленных, и от глубины сердечныя приносим Ти со смирением и верою сия похвальныя дары:

Радуйся, благая Мати всех любовию чтущих Тя и поклоняющихся честному образу Твоему;

Радуйся, добрая Младопитательнице дев и безматерних сирот.

Радуйся, мира христианскаго крепосте несокрушимая;

Радуйся, державы Российския защищение необоримое.

Радуйся, Святыя Православныя Церкве многопетая славо;

Радуйся, святителей и священников благодатное удобрение.

Радуйся, иноком благоподвизающимся Ходатаице вечного радования;

Радуйся, и в мире благочестно живущих не лишающая Твоего заступления.

Радуйся, телеса наша врачующая от недугов многоразличных;

Радуйся, души наша избавляющая от врагов невидимых.

Радуйся, Радосте наша, иконою Твоею нас присно утешающая.

Кондак 13

О, Всепетая Мати, рождшая Радость Вечную — Господа нашего Иисуса Христа, земным и Небесным Спасителя! Приими благоутробно молебное пение наше, пред чудотворною иконою Твоею с верою и благоговением Тебе возносимое, и всесильными молитвами Твоими избави нас от временных бед и вечныя муки, сподоби же в благочестии и правоверии пожити зде, в земном житии, таможе, в будущем веце в радости райстей, со всеми святыми, вечно воспевати Создателю нашему: Аллилуиа.

[Се́й конда́к глаго́лется три́жды.]

Икос 1

Ангел земный и человек небесный, святитель Христов Трифон, свыше предъизбран бысть послужити святей иконе Твоей на Толге явлению, Владычице Преблагая: той бо, путь творя от Белоезера по реце Волге, в нощи столп огненный узре на брезе ея пустыннем и, достигнув места, Тобою избраннаго, виде святую икону Твою на воздусе стоящую и светом Небесным сияющую, к нейже молебно припадая, со слезами теплыми сице к Тебе возглашаше:

Радуйся, свеще Богоприемная, темноту душ наших озаряющая;

Радуйся, заре невечерняя, мглу грехов наших разгоняющая.

Радуйся, чудно приявшая Христа Бога, яко угль горящий с Небеснаго Жертвенника;

Радуйся, Купино Неопалимая, законоположником Моисеем предзримая.

Радуйся, столпе огненный, Новаго Израиля путеводящий;

Радуйся, облаче росоносный, зной страстей наших утоляющий.

Радуйся, Предстательнице Всемогущая, тучи гнева Божия от глав наших отводящая;

Радуйся, Заступнице Усердная, от погибели вечныя нас избавляющая.

Радуйся, образ Твой честный в залог спасения нам даровавшая;

Радуйся, огнезрачным явлением его на Толге страну Российскую благословившая.

Радуйся, Радосте наша, иконою Твоею нас присно утешающая.

Кондак 1

Взбранной Воеводе, Владычице нашей Богородице, осенившей страну Российскую огнезрачным Своея иконы на Толге явлением, похвальное возглашаем пение: Ты же, о Богомати, яко имущая державу непобедимую, от всяких бед избави нас, зовущих:

Радуйся, Радосте наша, иконою Твоею нас присно утешающая.

Молитва 1-я

О, Пресвятая Госпоже, Дево Богородице, высшая Херувимов и Серафимов и Святейшая всех святых! Ты, Всеблагая, на Толге икону Твою многоцелебную блаженному святителю Трифону огневидно явити благоволила еси, и ею многая и неизреченная чудеса соделала еси и ныне содеваеши, по Твоему неизреченному к нам милосердию. Тебе пред пречистым образом Твоим, припадаем и молимся, Преблагословенная рода нашего Заступнице: в странствии сем земном, многоскорбном и многомятежном, не лиши нас Твоего заступления и покрова державнаго. Спаси и защити нас, Владычице, от разжженных стрел лукаваго врага спасения нашего. Укрепи немощную волю нашу к деланию заповедей Христовых, умягчи окаменелая сердца наша любовию к Богу и ближним нашим, даруй нам сокрушение сердечное и покаяние истинное, да очистившеся от скверны греховныя, возможем принести Творцу благоугодныя Ему плоды добрых дел, и сподобитися мирныя христианския кончины и ответа праваго на Страшнем и нелицеприятнем Суде Его. Ей, Госпоже Всемилостивая! В час грозный, смертный наипаче яви нам Твое многомощное заступление, ускори тогда на помощь к нам, безпомощным, и державною рукою Твоею исхити нас из руки лютаго миродержца, ибо воистинну много может молитва Твоя пред лицем Господа и ничтоже невозможно ходатайству Твоему, аще токмо восхощеши. Темже на святый образ Твой умиленно взирающе и пред ним, яко живей Ти сущей с нами, поклоняющеся с упованием благим, сами себе, и друг друга, и весь живот наш Тебе по Бозе молитвенно предаем и Тя величаем с рождшимся от Тебе Спасителем нашим, Господем Иисусом Христом, Емуже, со Безначальным Его Отцем и Пресвятым Духом подобает всякая слава, честь и поклонение, ныне и присно, и во веки веков. Аминь.

Молитва 2-я

Приими, о, Всеблагословенная и Всемощная, Пречистая Госпоже Владычице, Богородице Дево, сия молитвы, со слезами Тебе ныне приносимыя от нас, недостойных рабов Твоих, к цельбоносному образу Твоему со умилением притекающих, яко Тебе Самей ту сущей, и слышащей моления наша, и подающей с верою просящим по коемуждо прошению исполнение. Скорбящим бо скорби облегчаеши, немощным здравие даруеши, разслабленных и недужных исцеляеши, от бесных бесы прогоняеши, обидимыя от обид избавляеши и гибнущия спасаеши, грешных кающихся прощаеши, прокаженных очищаеши, малых детей милуеши, от уз и темниц свобождаеши, и всякия многоразличныя страсти врачуеши Ты, Госпоже Владычице Богородице: вся бо суть возможна ходатайством Твоим к Сыну Твоему, Христу Богу нашему. О, Всепетая Мати, Пресвятая Богородице Дево Марие! Не престай молитися о нас, недостойных рабех Твоих, славящих Тя и почитающих, и поклоняющихся пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно, и во веки веков. Аминь.