Мученик Андре́й Стратилат, Таврийский

Мч. Андрей Стратилат, римский военачальник при императоре Максимиане, уверовал во Христа. Возглавив небольшой отряд, он одержал победу над персами, убедив воинов отвергнуть языческих богов. По доносу завистников был обвинен в распространении христианства и подвергнут пыткам. Вместе с 2593 воинами, принявшими крещение в Тарсе, был казнен в Таврском ущелье около 302 года. Перед смертью Андрей молился о даровании целебного источника на месте их гибели, что и свершилось.

Жития мученика Андрея Стратилата и дружины его

Мученик Андрей Стратилат был римским военачальником при императоре Максимиане. Во время войны с Сирией святому Андрею дали титул «стратилат», то есть главнокомандующий. Выбрав небольшой отряд, св. Андрей выступил против противника. Его воины были язычниками, и сам он еще не принял Крещение, но уверовал во Христа. Перед сражением святой Андрей убеждал воинов, что языческие боги – бесы, и проповедовал им истинного Бога. С верою в помощь Божию небольшой отряд воинов обратил в бегство многочисленное войско персов.

Когда св. Андрей вернулся из похода с победой, то многие стали завидовать его славе и донесли правителю Антиоху, что святой – христианин, обративший ко Христу подчиненных воинов. Святой, вызванный на суд, исповедовал Христа, за что был подвергнут пыткам. Воинов, бывших с ним, распяли на деревьях, но ни один из них не отрекся от Христа.

Тогда император, боясь возмущения войска, отпустил св. Андрея и его дружину, но тайно приказал под каким-либо предлогом казнить порознь каждого. Освободившись, святой вместе со своими воинами пришел в г. Тарс, там они приняли Крещение, а затем были умерщвлены в ущелье Тавра. Перед смертью святой Андрей молился за всех, кто будет чтить их память, и просил Господа послать людям целебный источник на месте, где прольется их кровь. Во время этой молитвы мученики были усечены мечом. И в тот же миг из земли истек источник.

Епископы Петр и Нон, которые крестили воинов, вместе с клириком погребли тела мучеников. Один из клириков, с давнего времени страдавший от злого духа, напился из источника и сразу получил исцеление. Молва об этом разнеслась среди окрестных жителей, и они стали приходить к источнику и по молитвам св. Андрея и 2593-х мучеников получали благодатную помощь от Бога.

Мученическая кончина святых последовала около 302 г.

Тропарь, глас 5

Земна́го са́на сла́ву оста́вив,
Небе́сное Ца́рство насле́довал еси́,
кро́вными ка́плями, я́ко пречу́дным ка́мением,
нетле́нныя венцы́ украси́л еси́
и ко Христу́ приве́л еси́ собо́р страстоте́рпец.
С ли́ки а́нгельскими в невече́рнем све́те
незаходи́маго Со́лнца Христа́ обре́л еси́,
свя́те Андре́е Стратила́те,
Его́же моли́ с пострада́вшими с тобо́ю при́сно,

да спасе́т ду́ши на́ша.

Кондак, глас 4

В моли́твах Го́сподеви предстоя́,
я́коже звезда́ со́лнцу предтеки́й,
и жела́емое сокро́вище Ца́рствия узре́л еси́,
ра́дости неизрече́нныя исполня́яся.
Безсме́ртному Царю́ в бесконе́чныя ве́ки,
от А́нгел безпреста́ни хвали́мому, пое́ши, Андре́е Стратила́те.

С ни́миже моли́ся непреста́нно о всех нас.

Молитва

Святы́й му́чениче Андре́е Стратила́те, при́зри с Небе́снаго черто́га на тре́бующих твоея́ по́мощи и не отве́ргни проше́ний на́ших, но, я́ко при́сный благоде́тель и хода́тай на́ш, моли́ Христа́ Бо́га, да, человеколюби́в и многоми́лостив Сы́й, сохрани́т на́с от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит на́с, гре́шных, по беззако́ниям на́шим, и да не во зло́ обрати́м блага́я, дару́емая на́м от Всеще́драго Бо́га, но во сла́ву свята́го и́мене Его́ и в прославле́ние кре́пкаго твоего́ заступле́ния. Да моли́твами твои́ми да́ст на́м Госпо́дь ми́р по́мыслов, воздержа́ние от па́губных страсте́й и от вся́кия скве́рны, и да укрепи́т во все́м ми́ре Свою́ Еди́ную Святу́ю Собо́рную и Апо́стольскую Це́рковь, ю́же стяжа́л е́сть Честно́ю Свое́ю Кро́вию. Моли́ся приле́жно, святы́й му́чениче, да благослови́т Христо́с Бо́г держа́ву на́шу, да утверди́т во Святе́й Свое́й Правосла́вней Це́ркви живы́й ду́х пра́выя ве́ры и благоче́стия, да вси́ чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей, да мы́ вси́ в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́ благода́тию Го́спода на́шего Иису́са Христа́, Ему́же подоба́ет вся́кая сла́ва, че́сть и держа́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.

Канон святому мученику Андрею Стратилату, Таврийскому, и дружине его

Минея, 19 Августа.

Глас 4

Песнь 1

Ирмос: Мо́ря чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма
Амали́кову си́лу в пусты́ни победи́л есть.

Припев: Святы́й му́чениче Андре́е, моли́ Бо́га о на́с.

Пе́ти свяще́нное твое́ торжество́ усе́рдствующаго,
све́тлыми Ду́ха заря́ми ду́шу мою́ озари́
и мглу отжени́ неве́дения, му́чениче сла́вне.

Припев: Святы́й му́чениче Андре́е, моли́ Бо́га о на́с.

Му́ченик бога́тно светлостьми́, блаже́нне, обога́тился еси́,
мужему́дренно си́лою Боже́ственною попра́л еси́ льсти́ваго
и победи́тель быв, му́чениче великоимени́те Андре́е.

Сла́ва Отцу́ и Сы́ну и Свято́му Ду́ху.

Умертви́в я́же на земли́ мудрова́ния, му́чениче многострада́льне,
умертви́вшемуся Сло́ву тебе́ ра́ди му́жески после́довал еси́
и к жи́зни неги́бнущей сме́ртию премину́л еси́.

И ны́не и при́сно и во ве́ки веко́в. Ами́нь.

Богородичен: И́же в плоть за премно́гую бла́гость из Тебе́, Всенепоро́чная,
на спасе́ние всем челове́ком вои́стинну обле́кся, Бог вку́пе и Челове́к,
сугу́б естество́м познава́ется.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи:
Ты моя́ кре́пость, Го́споди,
и прибе́жище, и утвержде́ние.

Припев: Святы́й му́чениче Андре́е, моли́ Бо́га о на́с.

Ве́трилом Креста́ напа́сти препла́вая пучи́ну,
враги́, сла́вне, струя́ми твои́х крове́й погрузи́л еси́.

Припев: Святы́й му́чениче Андре́е, моли́ Бо́га о на́с.

Собла́зн лука́ваго и того́ хи́тростей превы́ше,
я́ко победи́тель изря́ден, му́чениче, быв,
просла́вился еси́.

Сла́ва Отцу́ и Сы́ну и Свято́му Ду́ху.

Украша́емь благоле́пия венце́м, му́чениче Христо́в,
всегда́ со избра́нными му́ченики в ра́дости предстои́ши.

И ны́не и при́сно и во ве́ки веко́в. Ами́нь.

Богородичен: Избавля́ющаго челове́ки от мучи́тельства вра́жия,
родила́ еси́ всех Го́спода,
Влады́чице, Де́во Всенепоро́чная.

Седален, глас 1

Му́жеством ду́шу укрепля́я, му́чениче,
потреби́л еси́ вра́жие кре́пкое суровство́,
и, ра́дуяся, пострада́л еси́, и Бо́гу угоди́л еси́.
Те́мже вси пресвяту́ю твою́ па́мять пра́зднуем весе́лием се́рдца,
Андре́е пребога́те.

Песнь 4

Ирмос: Вознесе́на Тя ви́девши Це́рковь на Кресте́,
Со́лнце Пра́ведное,
ста в чи́не свое́м,
досто́йно взыва́ющи:
сла́ва си́ле Твое́й, Го́споди.

Припев: Святы́й му́чениче Андре́е, моли́ Бо́га о на́с.

Я́ко сте́ну кре́пку, тя Це́рковь стяжа́вши, прему́дре,
вра́жиими сопроти́вными прило́ги непреклони́ма явля́ется, зову́щи:
сла́ва си́ле Твое́й, Го́споди.

Припев: Святы́й му́чениче Андре́е, моли́ Бо́га о на́с.

Боже́ственными уче́нии укрепи́в му́ченический полк, я́коже воево́да,
те́лу я́ко растли́тися, сла́вне, хотя́щу
пощади́тися ника́коже повину́л еси́.

Припев: Святы́й му́чениче Андре́е, моли́ Бо́га о на́с.

Я́ко ору́жием, вооружи́вся му́жеством,
и, я́коже мече́м обоюдуо́стрым, Андре́е преблаже́нне,
Кресто́м Честны́м враги́ потреби́л еси́,
я́коже воево́да до́блественнейший.

Сла́ва Отцу́ и Сы́ну и Свято́му Ду́ху.

Тя, побо́рника ве́ры, восхваля́ем,
я́ко страда́льца непобеди́ма, и небе́сныя све́тлости прича́стника,
и исто́чника, источа́юща во́ды чуде́с тре́бующим.

И ны́не и при́сно и во ве́ки веко́в. Ами́нь.

Богородичен: Восхваля́ем Тя,
похвало́ му́чеников и ве́рных спасе́ние, вси челове́честии ро́ди, Пренепоро́чная:
Бо́га бо родила́ еси́, пребы́вши Де́ва нетле́нна.

Песнь 5

Ирмос: Ты, Го́споди, мой Свет,
в мир прише́л еси́,
Свет Святы́й, обраща́яй из мра́чна неве́дения
ве́рою воспева́ющия Тя.

Припев: Святы́й му́чениче Андре́е, моли́ Бо́га о на́с.

Му́жества и́стиннаго быв тезоимени́т,
отгна́л еси́ враги́ твоя́
и до конца́, Андре́е всеблаже́нне, потреби́л еси́.

Припев: Святы́й му́чениче Андре́е, моли́ Бо́га о на́с.

Во́ды ве́рным исцеле́ний всегда́, прехва́льне, источа́еши,
спаси́тельною благода́тию обогати́вся духо́вною.

Сла́ва Отцу́ и Сы́ну и Свято́му Ду́ху.

Протече́ во всю зе́млю вои́стинну, Богодухнове́нне,
хвала́ твои́х чуде́с и честна́го муче́ния,
сия́ние Боже́ственныя благода́ти.

И ны́не и при́сно и во ве́ки веко́в. Ами́нь.

Богородичен: Ору́жия врага́ ны́не до конца́ оскуде́ша,
ро́ждши Тебе́, Богоро́дице, копие́м Уя́звеннаго и мир Обно́вльша.

Песнь 6

Ирмос: Пожру́ Ти со гла́сом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ребр Твои́х
исте́кшею Кро́вию.

Припев: Святы́й му́чениче Андре́е, моли́ Бо́га о на́с.

Притупи́л еси́ лука́ваго жа́ла боле́зньми твои́ми
и к неболе́зненней сла́ве преста́вился еси́, ра́дуяся, му́чениче Андре́е,
Стратила́те му́ченических честны́х полко́в.

Припев: Святы́й му́чениче Андре́е, моли́ Бо́га о на́с.

Кровьми́ ма́лыми измени́л еси́ све́тлость ве́чнующия сла́вы,
и ра́дость, никогда́же престаю́щую,
и венцы́ Небе́сныя, и сия́ние невече́рнее.

Сла́ва Отцу́ и Сы́ну и Свято́му Ду́ху.

Во́инство многочи́сленное, му́чениче, собра́в,
и лико́м а́нгельским приче́л еси́, блаже́нне, с тобо́ю страда́вшее,
ра́достно Влады́це всех предстоите́.

И ны́не и при́сно и во ве́ки веко́в. Ами́нь.

Богородичен: Родила́ еси́ неизглаго́ланно Отцу́ Собезнача́льнаго,
уподо́бльшася челове́ком, па́че ума́ и сло́ва, Богороди́тельнице:
Его́же моли́ изба́витися от бед рабо́м Твои́м.

Кондак, глас 2

В моли́твах Го́сподеви предстоя́,
я́коже звезда́ со́лнцу предтеки́й,
и жела́емое сокро́вище Ца́рствия узре́л еси́,
ра́дости неизрече́нныя исполня́яся.
Безсме́ртному Царю́ в безконе́чныя ве́ки,
от А́нгел безпреста́ни хвали́мому, пое́ши, Андре́е Стратила́те.
С ни́миже моли́ся непреста́нно о всех нас.

Песнь 7

Ирмос: В пещи́ авраа́мстии о́троцы перси́дстей,
любо́вию благоче́стия па́че,
не́жели пла́менем, опаля́еми, взыва́ху:
благослове́н еси́ в хра́ме сла́вы Твоея́, Го́споди.

Припев: Святы́й му́чениче Андре́е, моли́ Бо́га о на́с.

Струя́ми кро́вными исто́чник истещи́ сотвори́л еси́,
вся́ческих неду́г, му́чениче, я́ко вои́стинну боле́знь исцеля́ющ,
приступа́ющим к тебе́ несумне́нною ве́рою, богодохнове́нне.

Припев: Святы́й му́чениче Андре́е, моли́ Бо́га о на́с.

Святы́х собо́р Пресвято́му Сло́ву, му́дре му́чениче, приве́л еси́ кро́вию,
жи́знь нестаре́емую насле́довал еси́,
с ни́миже моли́ о нас Христа́ Человеколю́бца.

Сла́ва Отцу́ и Сы́ну и Свято́му Ду́ху.

Боже́ственною ре́вностию твои́ми кровьми́ багряни́цу себе́, му́чениче, обагри́в
и в сию́ оде́явся, все́ми Ца́рствующему сца́рствуеши ны́не,
побе́дным венце́м украша́емь.

И ны́не и при́сно и во ве́ки веко́в. Ами́нь.

Богородичен: Я́же челове́ки па́че естества́ Боже́ственным Рождество́м Твои́м, Де́во, проявле́нно обожи́вши,
я́ко Бо́га неизрече́нно вопло́щши,
благослове́на Ты в жена́х еси́, Пренепоро́чная Влады́чице.

Песнь 8

Ирмос: Ру́це распросте́р, Дании́л
льво́в зия́ния в ро́ве затче́;
о́гненную же си́лу угаси́ша,
доброде́телию препоя́савшеся,
благоче́стия рачи́тели о́троцы, взыва́юще:
благослови́те, вся дела́ Госпо́дня, Го́спода.

Припев: Святы́й му́чениче Андре́е, моли́ Бо́га о на́с.

Льво́в ди́виих стремле́ния удержа́л еси́, сла́вне, тве́рдыми по́двиги твои́ми,
мучи́телей безбо́жных шата́ния Боже́ственною си́лою смири́л еси́
и победи́тель к Небесе́м, вопия́, восте́кл еси́:
благослови́те, вся дела́ Госпо́дня, Го́спода.

Припев: Святы́й му́чениче Андре́е, моли́ Бо́га о на́с.

Святы́х све́тлости ви́дети и жи́ти в ра́дости, му́чениче, сподо́бился еси́,
подви́гся, до́блественне, и сконча́в по́двиг твой ме́чным усекнове́нием.
И ны́не вопие́ши с весе́лием:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

К Боже́ственному притека́юще хра́му, Боже́ственнаго му́ченика свет прии́мем
и, ра́це прикаса́ющеся всегда́ моще́й сего́, ра́дующеся,
свяще́ние пода́тельно благода́ти прии́мше, вопие́м:
вся дела́, благослови́те, Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Свята́я Де́во, Я́же Бо́га Пресвята́го свя́то поро́ждши,
Его́же вси святи́и му́ченицы на суди́щи испове́даша,
освяще́ние и просвеще́ние нам низпосли́, вопию́щим:
вся дела́, благослови́те, Госпо́дня, Го́спода.

Песнь 9

Ирмос: Ка́мень нерукосе́чный
от несеко́мыя горы́, Тебе́, Де́во,
краеуго́льный отсече́ся,
Христо́с, совокупи́вый разстоя́щаяся естества́.
Тем, веселя́щеся, Тя, Богоро́дице, велича́ем.

Припев: Святы́й му́чениче Андре́е, моли́ Бо́га о на́с.

Се светоза́рна страстоте́рпца па́мять просия́ светоно́сно,
тьму́ де́монскую отгоня́щи, ве́рныя же вся просвеща́ющи,
сию́ све́тло соверша́ем, сего́ досто́йно велича́юще.

Припев: Святы́й му́чениче Андре́е, моли́ Бо́га о на́с.

Яви́лся еси́, я́ко со́лнце ве́лие, посреди́, Андре́е, стра́ждущих с тобо́ю,
сих к невече́рнему сия́нию Небе́сныя све́тлости наставля́я словесы́ твои́ми,
с ни́миже тя ве́рою ублажа́ем.

Припев: Святы́й му́чениче Андре́е, моли́ Бо́га о на́с.

Тя, све́тлостию чуде́с всю просвеща́ющаго тва́рь,
тя, неукло́нным муче́нием Це́ркви столпа́ бы́вша
и ве́рным утвержде́ние, му́чениче Андре́е, велича́ем.

Сла́ва Отцу́ и Сы́ну и Свято́му Ду́ху.

Процве́л еси́ посреди́ рая́ страда́лец, я́коже ши́пок,
нося́ та́йно благово́ние, и обвеселя́ ве́рных исполне́ние,
и смрад, всему́дре, пре́лести отгоня́ Боже́ственною благода́тию.

И ны́не и при́сно и во ве́ки веко́в. Ами́нь.

Богородичен: Нося́щи Христа́ на руку́, ма́нием нося́щаго вся,
сего́ моли́ руки́ мя чужда́го изба́вити, Влады́чице,
правосла́вною ве́рою Тя непреста́нно велича́юща.