Мученица Татиа́на Римская, дева, диакониса

Святая Татиана была дочерью богатого римлянина и была воспитана им в христианской вере. Когда Татиана достигла совершеннолетия, она стала равнодушна к богатству и иным благам и возлюбила всем сердцем духовный образ жизни. Она навсегда отказалась от супружеской жизни и за добродетельную жизнь была назначена диакониссой Римской церкви. В этой должности она с усердием ухаживала за больными, посещала темницы, помогала неимущим, стараясь постоянно угодить Богу молитвами и добрыми делами.

При императоре Александре Севере (222–235 гг.) святая Татиана за исповедание Иисуса Христа приняла мученическое страдание от римского градоправителя Ульпиана (около 225 г.) Согласно древнему рассказу, святую Татиану после разных истязаний бросили на арену цирка (Колизея), чтобы свирепый лев растерзал ее для забавы зрителей. Но вместо этого лев стал кротко ласкаться к ней. Тогда святую Татиану усекли мечом. Восемь слуг градоправителя, мучивших святую, уверовали в Иисуса Христа, видя над ней силу Божию, – и они тоже были после мук усечены мечом.

Тропарь, глас 4

А́гнцу Пречи́стому и Па́стырю после́дуя,
а́гнице слове́сная Татиа́но
мы́сленных звере́й не убоя́лася еси́,
но зна́мением кре́стным вооружи́вшися,
до конца́ тех низложи́ла еси́,
и вошла́ еси́ в Небе́сную огра́ду,

иде́же помяни́ и нас, му́ченице Христо́ва многому́драя.

Кондак, глас 4

Све́тло во страда́нии твое́м возсия́ла еси́, страстоте́рпице,
от крове́й твои́х преиспещре́на,
и, я́ко кра́сная голуби́ца, к Небеси́ возлете́ла еси́, Татиа́но:

те́мже моли́ при́сно за чту́щия тя.

Канон святой мученице Татиане Римской

Минея, 12 Января.

Глас 2

Песнь 1

Ирмос: Гряди́те, лю́дие,
пои́м песнь Христу́ Бо́гу,
разде́льшему мо́ре и наста́вльшему лю́ди, я́же изведе́ из рабо́ты еги́петския,
я́ко просла́вися.

Припев: Свята́я му́ченице Татиа́но, моли́ Бо́га о на́с.

Му́ченическими озаре́на светлостьми́,
чи́стому предстои́ши, му́ченице, Жениху́ твоему́,
душетле́нных прегреше́ний прося́щи изба́витися хва́лящим тя.

Припев: Свята́я му́ченице Татиа́но, моли́ Бо́га о на́с.

Бога́тство тле́нное, му́ченице, соверше́нно пренебрегла́ еси́,
на Небесе́х нетле́нное и пребыва́ющее и́щущи усе́рдно,
и, ра́дующися, прошла́ еси́ му́ченическое страда́ние.

Сла́ва Отцу́ и Сы́ну и Свято́му Ду́ху.

К ра́нам, к боле́знем и бие́нием многови́дным
безбоя́зненно, му́ченице, отлучи́лася еси́:
споспешеству́ющую бо име́ла еси́ благода́ть Спасову и укрепля́ющую тя.

И ны́не и при́сно и во ве́ки веко́в. Ами́нь.

Богородичен: Исто́чник безстра́стия ро́ждшая,
уя́звеннаго страстьми́, Отрокови́це, исцели́
и огня́ ве́чнаго исхи́ти мя,
Еди́на Богоблагода́тная.

Песнь 3

Ирмос: На ка́мени мя ве́ры утверди́в,
разшири́л еси́ уста́ моя́ на враги́ моя́,
возвесели́ бо ся дух мой, внегда́ пе́ти:
несть свят, я́коже Бог наш,
и несть пра́веден па́че Тебе́, Го́споди.

Припев: Свята́я му́ченице Татиа́но, моли́ Бо́га о на́с.

Не поколеба́ столпа́ твоего́ се́рдца сте́кшее мук треволне́ние,
утверди́ся бо на ка́мени любве́ Христо́вы, всехва́льная,
К Нему́же взыва́ла еси́:
я́ко несть свят па́че Тебе́, Го́споди.

Припев: Свята́я му́ченице Татиа́но, моли́ Бо́га о на́с.

Челове́ческую не́мощь Понесы́й,
впери́ си́лою не́мощь твою́ на некре́пкаго зми́я.
Тем, му́ченице, на зе́млю низве́ргла еси́, ве́рно зову́щи:
я́ко несть свят, па́че Тебе́, Го́споди.

Сла́ва Отцу́ и Сы́ну и Свято́му Ду́ху.

Пото́ки изсуши́ла еси́ беззако́ния струя́ми крове́й твои́х, блаже́нная,
сла́дости же пото́ка ны́не наслажда́ешися
и во Све́те Невече́рнем обита́еши, зову́щи:
я́ко несть свят, па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен: Зача́тие и рождество́ Твое́ па́че сло́ва,
ве́ки бо Созда́вшаго сло́вом родила́ еси́,
Изба́вльшаго безслове́сия ми́ра концы́, Отрокови́це Неискусому́жная,
Его́же моли́ всегда́, е́же спасти́ нас.

Седален, глас 4

Сугу́б соверши́вши, му́ченице, по́двиг на земли́,
сугу́б и вене́ц сподо́билася еси́ прия́ти от руки́ Жениха́ твоего́:
пости́лася бо еси́, стра́сти плотски́я обузда́ющи,
пострада́вши же зако́нно, врага́ низложи́ла еси́.
Те́мже мольба́ми твои́ми спаси́ ны от напа́стей.

Песнь 4

Ирмос: Пою́ Тя, слу́хом бо, Го́споди, услы́шах и ужасо́хся:
до мене́ бо и́деши, мене́ ища́ заблу́ждшаго.
Тем мно́гое Твое́ снизхожде́ние, е́же на мя, прославля́ю,
Многоми́лостиве.

Припев: Свята́я му́ченице Татиа́но, моли́ Бо́га о на́с.

Красно́ душе́вное устрое́ние, благоле́пием благоче́стия Татиа́на нося́щи,
еще́ же муче́ния све́том пресла́вно сия́ющи,
к чи́стому Жениху́ вселя́ется.

Припев: Свята́я му́ченице Татиа́но, моли́ Бо́га о на́с.

Желе́зом твое́ лице́ стру́жущия пребеззако́нныя
невиде́нием Небе́снии А́нгели му́чаху,
по́сланнии к твое́й от Бо́га, му́ченице, по́мощи,
и́же твоему́ терпе́нию удиви́шася.

Сла́ва Отцу́ и Сы́ну и Свято́му Ду́ху.

Зако́нно Христа пропове́дающи, победи́ла еси́ пребеззако́ннующия,
же́ртва же непоро́чна, благоприя́тна, соверше́ннейшая Тому́ принесла́ся еси́, взыва́ющи:
Тебе́ лю́бящи, Спа́се, закала́юся.

И ны́не и при́сно и во ве́ки веко́в. Ами́нь.

Богородичен: Ко пристанищу ти́хому мя напра́ви, Богоневе́сто Всесвята́я:
бу́ря бо мя волну́ет, и смуще́ние греха́ лю́те,
ве́тры коле́блемь лука́вых духо́в оскорбля́ющих мя.

Песнь 5

Ирмос: Просвеще́ние во тьме лежа́щих,
спасе́ние отча́янных, Христе́ Спа́се мой,
к Тебе́ у́тренюю, Царю́ мира,
просвети́ мя сия́нием Твои́м:
ино́го бо, ра́зве Тебе́, Бо́га не зна́ю.

Припев: Свята́я му́ченице Татиа́но, моли́ Бо́га о на́с.

Твою́ честну́ю и блаже́нную стра́сть подража́ющи,
безстра́стием Тебе́ сочта́вшаяся стра́ждет преусе́рдно,
на у́ды ссека́емая, Жизнода́вче Христе́, зову́щи:
ино́го, ра́зве Тебе́, бо́га не зна́ю.

Припев: Свята́я му́ченице Татиа́но, моли́ Бо́га о на́с.

Страх Бо́жий во утро́бе мы́слию прие́мши,
дух спаси́тельнаго испове́дания и муче́ния
родила́ еси́ пресла́вно, доблему́драя, тве́рдым страда́нием
и сопроти́вная нача́ла посрами́ла еси́.

Сла́ва Отцу́ и Сы́ну и Свято́му Ду́ху.

Све́тлыми сия́еши заря́ми, уясня́ема Ду́ха Свята́го светоли́тием,
и озаря́еши ве́рных сердца́, грехо́вный мрак разоря́ющи, му́ченице,
страстоте́рпице Христо́ва досточу́дная.

И ны́не и при́сно и во ве́ки веко́в. Ами́нь.

Богородичен: Све́тлый Со́лнца О́блаче, осия́й ми зарю́,
реша́щу мрак мои́х прегреше́ний,
даждь ми ру́ку впа́дшему в ти́ну грехо́вную,
воздви́гни мя, лежа́щаго, Еди́на па́дшаго Ада́ма исправле́ние.

Песнь 6

Ирмос: В бездне грехо́вней валя́яся,
неизсле́дную милосе́рдия Твоего́ призыва́ю бе́здну:
от тли́, Бо́же, мя возведи́.

Припев: Свята́я му́ченице Татиа́но, моли́ Бо́га о на́с.

На дре́ве я́ко позна́ просте́рта Тя му́ченица честна́я,
терпи́т пове́шение и строга́ния теле́сная
за любо́вь Твою́, Всемо́щне.

Припев: Свята́я му́ченице Татиа́но, моли́ Бо́га о на́с.

Свире́пейшии зве́рие устыде́шася посреди́ три́знища му́жески стра́ждушия тя,
я́коже Фе́клы пе́рвее первому́ченицы,
ея́же ре́вность стяжа́ла еси́, приснопа́мятная.

Сла́ва Отцу́ и Сы́ну и Свято́му Ду́ху.

Предста́вше Небе́снии А́нгели посреди́ темни́цы, тя све́том осия́ша,
от боле́зней изыма́юще, и я́ко Бо́жию а́гницу прославля́юще.

И ны́не и при́сно и во ве́ки веко́в. Ами́нь.

Богородичен: От всех родо́в избра́ Тя, добро́ту Иа́ковлю,
Ю́же возлюби́ Творе́ц, Всенепоро́чная,
и из Тебе́ возсия́в яви́ся.

Кондак, глас 4

Све́тло во страда́нии твое́м возсия́ла еси́, страстоте́рпице,
от крове́й твои́х преиспещре́на,
и, я́ко кра́сная голуби́ца, к Небеси́ возлете́ла еси́, Татиа́но,
те́мже моли́ при́сно за чту́щия тя.

Песнь 7

Ирмос: Богопроти́вное веле́ние беззако́ннующаго мучи́теля
высо́к пла́мень вознесло́ есть.
Христо́с же простре́ Богочести́вым отроко́м ро́су духо́вную,
Сый благослове́н и препросла́влен.

Припев: Свята́я му́ченице Татиа́но, моли́ Бо́га о на́с.

Благомо́щно непобеди́мая, се́чема,
сосце́в отъя́тие претерпе́ла еси́ терпели́вейше,
огне́м же Небе́сным, му́ченице, попали́ла еси́ чти́ти не хотя́щия Бо́га,
Его́же вся тварь пое́т сла́вящи.

Припев: Свята́я му́ченице Татиа́но, моли́ Бо́га о на́с.

В се́рдцы нося́щи огнь Боже́ственныя любве́, непоро́чная, пла́мень попра́,
огня́ подобора́бнаго не ужасе́ся,
отроко́в образу́ющи дре́вних и му́жество и кре́пость.

Сла́ва Отцу́ и Сы́ну и Свято́му Ду́ху.

Звере́й свире́пство тебе́ повине́ся, львов зия́ния невре́дно премину́ла еси́,
Бо́гу тя просла́вльшу, Того́ просла́вившую,
Его́же страда́ния твое́ю исполня́ющи пло́тию, всехва́льная.

И ны́не и при́сно и во ве́ки веко́в. Ами́нь.

Богородичен: Жи́знь Ипоста́сную нам ро́ждши, сме́ртию сме́рть я́ве потре́бльшую,
стра́сти умертви́ пло́ти на́шея ве́рою чту́щих Тя, Чи́стая,
я́ко Богоро́дицу и Всесла́вную.

Песнь 8

Ирмос: В пещь о́гненную ко отроко́м евре́йским снизше́дшаго
и пла́мень в ро́су прело́жшаго Бо́га,
по́йте, дела́, я́ко Го́спода,
и превозноси́те во вся ве́ки.

Припев: Свята́я му́ченице Татиа́но, моли́ Бо́га о на́с.

Удобри́вшися доброде́тельми, украси́лася еси́ добро́тами муче́ния
и Жениху́ обручи́лася еси́, па́че всех челове́ков красне́йшему,
добро́тою сия́ющему безсме́ртия, Татиа́но Богому́драя.

Припев: Свята́я му́ченице Татиа́но, моли́ Бо́га о на́с.

С безпло́тными слуга́ми в темни́це Творца́ славосло́вила еси́,
сия́ющи сла́вою Боже́ственнаго блиста́ния,
и всем непристу́пна пребыва́ющи, держи́мым тьмо́ю пре́лести.

Сла́ва Отцу́ и Сы́ну и Свято́му Ду́ху.

Сокруше́ние твоих уде́с истни́ враго́в кова́рства,
крове́й тече́ние нече́стия лю́тыя пото́ки, честна́я, изсуши́,
пучи́на чуде́с нам я́вльшися.

И ны́не и при́сно и во ве́ки веко́в. Ами́нь.

Богородичен: Спаси́, уще́дри ны,
ще́драго Бо́га нам Спа́са ро́ждшая па́че сло́ва,
огнепа́льных помышле́ний и страсте́й изыма́ющи зно́я, Твои́ми моли́твами,
Чи́стая, Препросла́вленная.

Песнь 9

Ирмос: От Бо́га Бо́га Сло́ва,
неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те,
от Святы́я Де́вы неизрече́нно воплоти́вшагося нас ра́ди,
ве́рнии, единому́дренно пе́сньми велича́ем.

Припев: Свята́я му́ченице Татиа́но, моли́ Бо́га о на́с.

По мно́гих му́ках ме́чным тя судо́м лю́тый осужда́ет судия́,
ея́же восхожде́нию восплеска́ша Небе́снии чи́ни.
Христо́с же всеси́льною десни́цею венча́ тя, му́ченице, зако́нно пострада́вшую.

Припев: Свята́я му́ченице Татиа́но, моли́ Бо́га о на́с.

Сочта́ся с му́ченическими светле́йшими ста́ды,
ясне́йши прибли́жившися Бо́гу, ви́диши я́же ви́дят А́нгели,
я́ко де́ва в черто́зе водворя́ешися, Жениха́ твоего́, честна́я,
моля́щи, спасти́ся любо́вию тя почита́ющим.

Сла́ва Отцу́ и Сы́ну и Свято́му Ду́ху.

Запеча́танный исто́чник тя, заключе́н же огра́д,
возложе́ние че́стно и свяще́нно, неве́сту Христо́ву нетле́нную,
заколе́ние и же́ртву, а́гницу и до́брую голуби́цу Влады́ки вся́ческих,
Татиа́но, пропове́дуем.

И ны́не и при́сно и во ве́ки веко́в. Ами́нь.

Богородичен: Гла́сы прекланя́ема те́пле Тя моля́щих,
Еди́на ве́рных Прибе́жище, спаси́, уще́дри, Влады́чице,
соблюди́ от вре́да, и вся́каго язы́ков наше́ствия
ве́рою и любо́вию при́сно тя велича́ющия.

Акафист святой мученице Татиане

Конда́к 1

Избра́нней неве́сте Христа́, Вседержи́теля тва́ри, похва́льная пе́ния воспису́ем, чистоту́ жития́ твоего́ де́вственнаго восхваля́юще и лобыза́юще честна́я страда́ния Твоя́; ты́ бо ны́не лику́еши в черто́ге небе́снем твоего́ Жениха́ Христа́. Помина́й прославля́ющих тя́ пе́нии си́ми, да зове́м ти́:

Ра́дуйся, благоуха́нный цве́те де́вства, сла́вная му́ченице Татиа́но.

И́кос 1

А́нгелов Творе́ц избра́ тя́ из дре́вняго Ри́ма, да песнопое́ши житие́м твои́м свято́е и́мя Бо́жие, от ле́т де́тства твоего́ воспита́на бы́сть в стра́се Бо́жии и доброде́телех, сего́ ра́ди зове́м ти́:

Ра́дуйся, ю́нице сладкоблагоуха́нная; ра́дуйся, Боже́ственное Писа́ние возлюби́вшая.

Ра́дуйся, благоче́стие в себе́ воспита́вшая; ра́дуйся, богобоя́зненному роди́телю внима́вшая.

Ра́дуйся, от него́ се́мена ве́ры прия́вшая; ра́дуйся, в стра́се Бо́жии воспита́нная.

Ра́дуйся, па́че все́х бла́г ве́чная бла́га возлюби́вшая.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 2

Ви́дящи богобоя́зненный роди́тель тво́й житие́ твое́, всечестна́я, наслади́ся дарова́ний Боже́ственных в тебе́, па́че бо зна́тности своея́ и вла́сти ко́нсульския любля́ше Христа́, вся́к де́нь хвалу́ Ему́ поя́: Аллилу́иа.

И́кос 2

Ра́зум небе́сный тебе́ дарова́ся, егда́ дости́гла еси́ ю́ности твоея́ и восхоте́ тогда́ житие́ твое́ проводи́ти в де́встве и целому́дрии. Христо́с же Бо́г, укрепля́я тя́ в си́х доброде́телех, прия́т тя́ в небе́сная селе́ния. Сего́ ра́ди приими́ от на́с пе́ния сия́:

Ра́дуйся, пти́це, паря́щая в Небеса́; ра́дуйся, де́вство и целому́дрие бы́сть твои́ криле́.

Ра́дуйся, Бо́га предпоче́тшая ми́ру; ра́дуйся, ю́ность свою́ Христу́ посвяти́вшая.

Ра́дуйся, ла́стовице Боже́ственнаго са́да; ра́дуйся, то́кмо ко Христу́ любо́вию пламене́ющая.

Ра́дуйся, служи́вшая Ему́ де́нь и но́щь.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 3

Си́ла Боже́ственныя любве́ в тебе́ соде́ла тя́ служи́тельницей Христу́, бы́сть бо избра́на и поста́влена на сла́вное служе́ние диакони́ссы, и отто́ле, служа́щи Це́ркви в ра́дости ве́лией, возглаша́ше непреста́нно: Аллилу́иа.

И́кос 3

Име́ющи ре́вность о Це́ркви Бо́жией, в но́вом зва́нии подвиза́лася еси́, труды́ и по́двиги усугубля́я и подо́бно безтеле́сным А́нгелом служа́ бли́жним во Христе́. Мы́ же, отягче́ннии грехми́, си́це глаго́лем ти́:

Ра́дуйся, моли́твою услажда́вшая житие́ твое́; ра́дуйся, в зва́нии диакони́ссы послужи́вшая.

Ра́дуйся, в темни́цах у́зников посеща́вшая; ра́дуйся, и́м у́зы врачева́вшая и украша́вшая.

Ра́дуйся, добропобе́дное по́стничества пра́вило; ра́дуйся, ко креще́нию же́н приуготовля́вшая.

Ра́дуйся, благода́ти креще́ния споспе́шнице; ра́дуйся, бе́дных и вдови́ц окормля́вшая.

Ра́дуйся, в беде́ и несча́стии отра́ду нося́щая

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 4

Бу́рю злы́х напа́стей претерпе́ нечести́вый ца́рь Антони́н Илиогаба́л, егда́ те́ло его́, влеко́мо по гра́ду, с поруга́нием вве́ржено бы́сть в реку́ Ти́бр, во́ином же возве́дшим на ца́рство Ри́мское Алекса́ндра Севи́ра. Ты́ же, всесла́вная му́ченице, пострада́ла за Христа́ во дни́ его́ ца́рствия, песнопоя́ Бо́гу: Аллилу́иа.

И́кос 4

Слы́шаще и ви́дяще я́ко мла́д е́сть ца́рь Алекса́ндр Севи́р, нечести́вии ко́нсулы притесня́ху христиа́н, злочести́вый и зверонра́вный епа́рх Ульпиа́н уби́йство галиле́ян помы́сля, повеле́ кла́нятися ри́мским бога́м. Бы́сть бо стра́х ве́лий тогда́ и потече́ я́ко вода́ кро́вь му́чеников. Ты́ же, всеблага́я Татиа́но, не убоя́лася еси́ стра́ха челове́ческаго; сего́ ра́ди мы́ с любо́вию восклица́ем ти́:

Ра́дуйся, заблужде́нию царя́ Алекса́ндра Севи́ра посмея́вшаяся; ра́дуйся, Христа́ и и́долов не сочета́вшая в поклоне́нии.

Ра́дуйся, то́кмо еди́ному Христу́ послужи́вшая; ра́дуйся, и́долы я́ко сатану́ вмени́вшая.

Ра́дуйся, Ульпиа́нова стра́ха не убоя́вшаяся; ра́дуйся, сочета́нию со Христо́м себе́ приуготовля́вшая.

Ра́дуйся, правове́рия цевни́це; ра́дуйся, стра́ха сме́ртнаго низложи́тельнице.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 5

Боже́ственный све́т осия́ житие́ твое́, свята́я му́ченице, егда́ приспе́ вре́мя страда́ний твои́х. Ты́ бо, облече́нная све́том, взошла́ еси́ в горни́ло страда́ний и бы́сть ра́достны ра́ны твоя́ сме́ртныя. А́нгели бо служа́ху тебе́ и восклица́ху непреста́нно Бо́гу: Аллилу́иа.

И́кос 5

Ви́дя чи́стое житие́ твое́, вожди́ язы́честии я́ша тя́ я́ко христиа́нку и ведо́ша в язы́ческий хра́м на поклоне́ние. Ты́ же вознесе́ моли́тву Христу́ Бо́гу, и паде́ Аполло́н, бо́г язы́ческий, обвали́ся ка́пище и́дольское, и мно́зи идолопокло́нницы сме́рть прия́ша. Мы́ же, чту́ще си́лу моли́твы твоея́, глаго́лем:

Ра́дуйся, Аполло́ну не поклон́ившаяся; ра́дуйся, си́лу моли́твы стяжа́вшая.

Ра́дуйся, моли́твою и́долы сокруши́вшая; ра́дуйся, тобо́ю бо ка́пище просе́деся.

Ра́дуйся, тобо́ю бо идолопокло́нницы посрами́шася; ра́дуйся, тобо́ю бо научи́шася поклоня́тися Еди́ному Бо́гу.

Ра́дуйся, стра́х поколеба́вшая; ра́дуйся из Аполло́на бе́са изгна́вшая.

Ра́дуйся, те́нь бе́са и рыда́ние диа́вольское показа́вшая.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 6

Пропове́дует житие́ твое́ ве́лию любо́вь ко Христу́ и по́двиги. Ты́ бо по́двигами и моли́твою низложи́ла еси́ и́дольское зломы́слие. Ты́ бо моли́твою посрами́ла мучи́тели, когтьми́ желе́зными терза́ющих те́ло твое́, изнемого́ша бо мучи́тели и возопи́ша: Терпи́м бо са́ми жесто́кая муче́ния за пра́ведницу сию́. Ты́ же лику́юще поя́ше: Аллилу́иа.

И́кос 6

Возсия́ све́т Христо́в в во́инех, му́чивших тя́, егда́ уве́роваша в и́стиннаго Бо́га возопи́ша ти́: Прости́ ны́, служи́тельнице и́стиннаго Бо́га, прости́, и́бо не́сть на́шея во́ли на страда́ние твое́. И от того́ часа́ бы́сть ча́да Бо́жия. Мы́ же, восхваля́юще чудеса́ ми́лости Бо́жия, зове́м:

Ра́дуйся, страда́нием ко Христу́ возводя́щая; ра́дуйся, А́нгелами охраня́емая.

Ра́дуйся, за свои́х мучи́телей моли́вшаяся; ра́дуйся, све́том Христо́вым озари́вшая во́ины.

Ра́дуйся, приве́дшая и́х в во́инство небе́сное; ра́дуйся, о́смь во́инов страда́нием за Христа́ венча́вшая

Ра́дуйся, моли́твою твое́ю и́м о́чи отве́рзшая, ра́дуйся, муче́ния своя́ на мучи́телей перене́сшая.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 7

Хотя́ воврещи́ на поклоне́ние и́долом, тя́ ведо́ша в суди́лище и муче́нием преда́ша беззако́ннии язы́чницы. Ты́ же яви́лася здра́ва и це́ла, лице́ же твое́ бы́сть све́тло и ра́достно, и стра́хом объя́т бы́сть судия́ нечести́вый, повеле́ па́ки и па́ки преда́ти тя́ го́рьким муче́ниям. Тя́ же охраня́ше А́нгели, служи́тели Бо́га, пою́ще: Аллилу́иа.

И́кос 7

Но́ваго чу́да бы́сть свиде́тели, я́ко сосца́ твоя́ уре́занная источи́ста вме́сто кро́ве млеко́ и те́ло твое́ обнаже́нное муче́ний ра́ди и ноже́м секо́мое, источи́ благоуха́ние. Разъяри́вся нечести́вый мучи́тель и повеле́ крестообра́зно на земли́ распростре́ти тя́ и би́ти жезлы́ желе́зными. Мы́ же, чудя́щеся страда́нием твои́м, рце́м ти́ похвалы́ таковы́я:

Ра́дуйся, Христу́ сораспя́тая до́блественне; ра́дуйся, мучи́телей устраши́вшая и удиви́вшая.

Ра́дуйся, к изнеможе́нию и́х приве́дшая; ра́дуйся, цевни́це му́жества ве́ры.

Ра́дуйся, я́ко те́ло твое́ источи́ благоуха́ние не́ба; ра́дуйся, уре́занными сосцы́ воскорми́вшая со́нмы му́чеников за Христа́.

Ра́дуйся, я́ко и ны́не благоуха́еши моли́твою к Бо́гу; ра́дуйся, не оставля́ющая на́с свое́ю по́мощию.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 8

Стра́нное чу́до ви́дим на тебе́, всеблаже́нная, ка́ко в темни́це но́щию моля́щеся и воспева́юще Христу́ хвалы́, небе́снаго све́та сподо́бися озаре́ния и А́нгелов Бо́жиих ку́пно славосло́вие приима́ше. Та́ко и ны́не в ра́йских селе́ниих со А́нгелы песнопое́ши: Аллилу́иа.

И́кос 8

Ве́сь рачи́тель зло́бы бы́сть епа́рх, егда́ па́ки узре́ тя́ здра́ву и све́тлу, изведе́ну из темни́цы на суди́лище, хоте́ша ла́скою соблазни́ти тя́ на поклоне́ние и́долом. Ты́ же, ве́дая си́лу моли́твы твоея́, в хра́м Диа́ны напра́ви но́зе твоя́, устреми́ся же бе́с из боги́ни злочести́выя и возопи́ша: Горе́ мне́, горе́! ка́мо бежу́; о́гнь бо снеда́ет мя́. Сего́ ра́ди, победи́тельнице бесо́в, вопие́м ти́ ра́достно:

Ра́дуйся, ле́сти епа́рха не вня́вшая; ра́дуйся, в хра́м Диа́ны воше́дшая.

Ра́дуйся, моли́твою низве́дшая с не́ба о́гнь и ка́пище Диа́ны разруши́вшая; ра́дуйся, моли́твы вели́кий пла́меню.

Ра́дуйся, я́ко бе́сы прису́тствия твоего́ трепета́ху и бежа́ху; ра́дуйся, кре́стным зна́мением безстра́шно себе́ осеня́вшая.

Ра́дуйся, в моли́тве о́чи к не́бу возводи́вшая; ра́дуйся, лучи́ благода́ти от не́ба испроси́вшая.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 9

Все́ естество́ а́нгельское удиви́ся си́ле моли́твы твоея́, егда́ мно́жество не ве́дящих Бо́га падо́ша и сме́ртный стра́х прия́ша, опале́ннии огне́м, и восхвали́ша Бо́га, ди́внаго во святы́х свои́х, пе́снею: Аллилу́иа.

И́кос 9

Вити́и многоглаго́ливии не мо́гут восхвали́ти тя́ по достоя́нию, сла́вная му́ченице Христо́ва. Кто́ бо возмо́жет вели́чие страда́ний твои́х изрещи́? Кто́ по́двиги твоя́ воспое́т досто́йно? То́кмо наде́яся на неизрече́нную ми́лость твою́, дерза́ем принести́ ти́ сия́ похвалы́:

Ра́дуйся, сла́дость христиа́нских серде́ц; ра́дуйся, на́м принося́щая ми́лость от Бо́га.

Ра́дуйся, моли́тве науча́ющая на́с усе́рдно; ра́дуйся, проше́нием на́шим вне́млющая.

Ра́дуйся, я́ко ско́ро проше́ния прино́сиши Бо́гу; ра́дуйся, я́ко го́рьких муче́ний избавля́еши.

Ра́дуйся, благоуха́нная ве́тве ра́йская; ра́дуйся, черто́гов О́тчих жи́тельнице.

Ра́дуйся, Ца́рствия Небе́снаго насле́днице.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 10

Спаси́тельнаго твоего́ по́двига зря́ще тече́ние, восхваля́ем страда́ния твоя́, ты́ бо претерпе́ бичева́ния, крестообра́зное к полу́ пригвожде́ние, те́ла изсече́ние, сосце́в вырыва́ние, бие́ние и осмея́ние, в темни́це заключе́ние и ины́я злострада́ния. Ны́не же, венце́м Ца́рствия Небе́снаго венча́вшися, со все́ми святы́ми взыва́еши: Аллилу́иа.

И́кос 10

Стена́ и адама́нт тве́рд была́ еси́, егда́ на растерза́ние звере́м веде́на явля́ешися, ле́в бо у но́г твои́х ласка́шеся и не растерза́ша тя́, но егда́ хотя́ху отъя́ти льва́, се́й а́бие разсвирепе́ и разтерза́ сано́вника Евме́ниа, указу́я си́лу христиа́нскую. Сего́ ра́ди глаго́лем в стра́се:

Ра́дуйся, звере́й в а́гнцев претворя́ющая; ра́дуйся, моли́твою и́х умягча́ющая.

Ра́дуйся, за сме́рть Евме́ниеву мучи́мая; ра́дуйся, на дре́ве пове́шенная.

Ра́дуйся, желе́зными когтьми́ стружа́емая; ра́дуйся, в волхвова́нии оклевета́нная.

Ра́дуйся, на́с клеветы́ избавля́ющая; ра́дуйся, от зла́го волхвова́ния на́с сохраня́ющая.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 11

Пе́ние непреста́нное вознося́ ко Го́споду, была́ еси́ вмести́лищем си́лы и сла́вы Бо́жия. Сего́ ра́ди мо́лим тя́: умоли́ Го́спода за на́с гре́шных, свята́я му́ченице Татиа́но, да ниспо́слет и на́м чудеса́ ми́лости Своея́, песнопою́щим ны́не: Аллилу́иа.

И́кос 11

Светопода́тельная свеща́ бы́сть во страда́нии твое́м, свята́я му́ченице, озаря́я све́том сердца́ язы́ческия, да обря́щут тобо́ю и́стиннаго Бо́га, да водворя́тся и́х ду́ши в селе́ниих ра́йских. Сего́ ра́ди уми́льно восклица́ем ти́:

Ра́дуйся, носи́тельнице све́та благода́тнаго; ра́дуйся, со́лнце лежа́щих во зле́.

Ра́дуйся, ты́ бо на́с све́том озаря́еши; ра́дуйся, ты́ бо на́с к блаже́нству веде́ши.

Ра́дуйся, в ка́пище Зе́вса заключе́нная; ра́дуйся, его́ низложи́вшая и разсы́павшая.

Ра́дуйся, власо́в лиши́вшаяся; ра́дуйся, я́ко язы́чницы мы́сляху, я́ко во власе́х твои́х ча́ры обрета́ются.

Ра́дуйся, и по остриже́нии власо́в чудотворя́щая си́лою Христо́вою.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 12

Благода́ть от Бо́га получи́вши, к сме́ртному часу́ пришла́ еси́, егда́ бы́сть в ка́пище Зе́вса заключе́на, и поу́тру, егда́ приидо́ша язы́честии жрецы́, ви́девше Зе́вса пове́ржена, а тя́ лику́ющу, па́ки ведо́ша тя́ на суди́лище, и бы́сть сме́рть твоя́ от усече́ния ме́чнаго. Ты́ же, сла́вная му́ченице, гото́вящися к селе́нием небе́сным, взыва́ла еси́: Аллилу́иа.

И́кос 12

Пою́ще твое́ усече́ние ме́чное, восхваля́ем отше́ствие твое́ в вожделе́нное оте́чество, иде́же ны́не ты́ лику́еши со А́нгелы и со все́ми святы́ми во сла́ве невече́рней. Сего́ ра́ди приими́ от на́с словеса́ сия́:

Ра́дуйся, мече́м усече́нная за Христа́; ра́дуйся, с роди́телем твои́м пострада́вшая.

Ра́дуйся, венце́в му́ченических сподо́бившаяся; ра́дуйся, со Христо́м сочета́вшаяся.

Ра́дуйся, со Апо́столы лику́ющая; ра́дуйся, со святы́ми му́ченики хвалу́ Бо́гу вознося́щая.

Ра́дуйся, не лиши́вшая на́с ра́дости твоея́; ра́дуйся, на́ши сердца́ зажига́ющая Боже́ственным огне́м.

Ра́дуйся, и́долов на́ших попира́ющая; ра́дуйся, начерта́вшая на́м сла́ву Христа́.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 13

О, всесла́вная и великоимени́тая му́ченице Христо́ва Татиа́но, де́вства и чистоты́ сосу́д златы́й! Ны́не ми́лостивно при́зри на моля́щияся ти́ и приле́жно прося́щия твоего́ моли́твеннаго у Бо́га предста́тельства. Да́руй на́м чистоту́ те́ла и души́, изба́ви на́с муче́ний грехо́вных, да вы́ну Го́споду зове́м: Аллилу́иа.

[Се́й конда́к глаго́лется три́жды.]

И́кос 1

А́нгелов Творе́ц избра́ тя́ из дре́вняго Ри́ма, да песнопое́ши житие́м твои́м свято́е и́мя Бо́жие, от ле́т де́тства твоего́ воспита́на бы́сть в стра́се Бо́жии и доброде́телех, сего́ ра́ди зове́м ти́:

Ра́дуйся, ю́нице сладкоблагоуха́нная; ра́дуйся, Боже́ственное Писа́ние возлюби́вшая.

Ра́дуйся, благоче́стие в себе́ воспита́вшая; ра́дуйся, богобоя́зненному роди́телю внима́вшая.

Ра́дуйся, от него́ се́мена ве́ры прия́вшая; ра́дуйся, в стра́се Бо́жии воспита́нная.

Ра́дуйся, па́че все́х бла́г ве́чная бла́га возлюби́вшая.

Ра́дуйся, благоуха́нный цве́те де́вства, сла́вная му́ченице Татиа́но.

Конда́к 1

Избра́нней неве́сте Христа́, Вседержи́теля тва́ри, похва́льная пе́ния воспису́ем, чистоту́ жития́ твоего́ де́вственнаго восхваля́юще и лобыза́юще честна́я страда́ния Твоя́; ты́ бо ны́не лику́еши в черто́ге небе́снем твоего́ Жениха́ Христа́. Помина́й прославля́ющих тя́ пе́нии си́ми, да зове́м ти́:

Ра́дуйся, благоуха́нный цве́те де́вства, сла́вная му́ченице Татиа́но.

Моли́тва

О, свята́я му́ченице Татиа́но, неве́сто Сладча́йшаго Жениха́ твоего́ Христа́, а́гнице А́гнца Боже́ственнаго, голуби́це целому́дрия, страда́ньми, я́ко оде́ждами ца́рскими оде́янная, к лико́м небе́сным сопричте́нная, лику́ющая ны́не во сла́ве ве́чней, от дне́й млады́х Бо́гу обеща́вшаяся свята́я служи́тельнице Це́ркве, целому́дрие соблю́дшая и па́че все́х бла́г Го́спода возлюби́вшая! Тебе́ мы́ мо́лимся и тебе́ мы́ про́сим: внемли́ проше́нием на́шим серде́чным и не отверга́й моле́ний на́ших. Да́руй чистоту́ те́ла и души́, вдохни́ любо́вь к Боже́ственным и́стинам, на пу́ть доброде́тельный введи́ на́с, а́нгельское охране́ние испроси́ у Бо́га на́м, на́ши ра́ны и я́звы теле́сныя исцели́, в злострада́нии терпе́ние да́руй, грехо́вныя я́звы уврачу́й, ю́ность на́шу огради́, ста́рость безболе́зненну и безбе́дну да́руй, в сме́ртнем часе́ помози́. Помина́й на́ши ско́рби и отра́ду да́руй. Посети́ на́с, су́щих в темни́це греха́, на покая́ние наста́ви ско́ро, возжзи́ пла́мень моли́твы, не оста́ви на́с, си́рых, да сла́вяще страда́ния твоя́, возсыла́ем хвалу́ Го́споду си́л, всегда́, ны́не и при́сно, и во ве́ки веко́в. Ами́нь.