Собор Саратовских святых

Житие

Жития

Празднование совершается в ближайший воскресный день к 13 сентября.

Празднование установлено в 2011 году по благословению патриарха Московского и всея Руси Кирилла.

Песнопения

Тропарь, глас 5

Дне́сь да пра́зднует земля́ Саратовская
и да красу́ется пе́сненными добро́тами,
я́ко ны́не прии́де де́нь всекраснаго торжества́,
па́мять о́бщая святы́х, произшедших от нея́:
святи́телей честны́х и ди́вных пра́ведников,
му́чеников добропобедных и преподо́бных отце́в,
и́мже ны́не с ве́рою вси́ возопии́м:
о, по́лче пресве́тлый и богоизбра́нный,
не оста́вите ва́шими святы́ми моли́твами

и́же на земли́ па́мять ва́шу соверша́ющих.

Тропарь, глас 5 Космо́ пресла́вне, священному́чениче Христо́в,/ в годи́ну гоне́ния креста́ па́стырскаго не уклони́выйся/ ниже́ свяще́ннаго служе́ния своего́ отве́ргшийся,/ в узи́лище и на суди́щи безбо́жничестем/ тве́рдым во испове́дании Христо́ве пребы́л еси́,/ ны́не же на Небесе́х венце́м му́ченичества укра́шенный,/ моли́ Христа́ Пастыренача́льника// поми́ловатися душа́м на́шим. Тропарь, глас 7 Во святи́телех ди́вен показа́лся еси́,/ ре́вностию по Бо́зе окрыля́ем, священному́чениче Гермогене./ И па́стве Сиби́рстей путево́ждь во страда́ниях явля́яся,/ с Державнствующим у́зы и заключе́ния разделя́я/ и страда́льчески пу́ть сконча́вши,/ на небесе́х мзду́ трудо́в твои́х восприя́л еси́,// моли́ся за наро́д на́ш ко Го́споду. Тропарь, глас 2 Смире́нием и кро́тостию украси́вся,/ па́стырь до́брый яви́лся еси́,/ священному́чениче Се́ргие,/ и, му́жественне во благоче́стии подвиза́вся,/ от безбо́жных пострада́л еси́ да́же до кро́ве./ Сего́ ра́ди, му́ченический вене́ц стяжа́в,/ ве́лие дерзнове́ние и́маши ко Го́споду,// Того́ моли́ спасти́ся душа́м на́шим. Тропарь, глас 4 Иере́ем сла́ву и му́чеником похвалу́,/ почти́м Христо́ва испове́дника Иоа́нна всехва́льнаго,/ и́же о едине́нии церко́внем подвиза́ся с любо́вию/ и безбо́жныя мучи́тели обличи́ со дерзнове́нием,/ и ны́не мо́лится Го́сподеви// спасти́ и просвети́ти ду́ши на́ша. Тропарь, глас 4 Наста́ де́нь све́тлаго торжества́,/ созыва́я вся́ христолю́бцы/ восхвали́ти по́двиги и страда́ния иере́я и му́ченика Бо́жия,/ и просвеща́я Пово́лжския страны́ благода́тными заря́ми/ и луча́ми исцеле́ний же и чуде́с:/ сия́ет бо све́том ра́зума, и му́жеством сердца́ укрепля́ет,/ и ду́ши весели́т вопию́щих с ве́рою:// ра́дуйся, Иоа́нне, о́тче на́ш.

Кондак, глас 8

Избра́нным от земли́ на́шея,
я́ко вели́ким уго́дником Христо́вым,
ва́м, о, вси́ святи́и Сара́товстии,
похва́льное пе́ние прино́сим дне́сь.
Вы́ же, у престо́ла Госпо́дня предстоя́щии,
от вся́ких на́с бе́д изба́вите моли́твами ва́шими, да зове́м ва́м:

ра́дуйтеся, святи́и вси́ Сара́товстии, земли́ на́шея небе́снии предста́телие.

Кондак, глас 6 Воспои́м ны́не свята́го пресви́тера Косму́,/ и́же в земли́ Сара́товстей явле́ннаго но́ваго Небе́снаго свети́льника,/ ве́рных ду́ши неле́ностно упа́сшаго/ егда́ во́лцы хи́щнии тща́хуся расхи́тити я́./ Те́мже и Христо́с его́ в оби́тели ра́йския всели́/ я́ко пресла́вна священному́ченика,// и хода́тая о душа́х на́ших. Кондак, глас 4 По́двиг святи́тельский до́бре свершившаго/ и тече́ние му́ченическое му́жественно сконча́вшаго/ прославля́ем тя́, священному́чениче Гермогене,/ я́ко предста́теля пред Го́сподем// за страну́ Росси́йскую. Кондак, глас 3 Я́ко смире́нный Христо́в служи́тель,/ гоне́ния лю́тая от богобо́рцев претерпе́л еси́,/ ны́не же с ли́ки новому́ченик Це́ркве Ру́сския/ в ри́зах бе́лых А́гнцу Бо́жию предстои́ши,/ о́тче наш Се́ргие./ Моли́ Его́же всем се́рдцем возлюби́л еси́,/ в правосла́вней ве́ре нам утверди́тися// и спасти́ся душа́м на́шим. Кондак, глас 2 Свяще́нный пропове́дниче Ева́нгелия Христо́ва,/ Иоа́нне всехва́льне,/ и́же па́стырства по́двиг запечатле́в страда́нием,/ и о ста́де ду́шу положи́в,// моли́ о на́с еди́наго Человеколю́бца.

Величание

Велича́ем тя́
священному́чениче Гермогене
и чти́м честна́я страда́ния твоя́

я́же за Христа́ претерпе́л еси́.

Молитва

О, ди́вный во страда́льцех священному́чениче Космо́, Це́ркви Росси́йския пречу́дное украше́ние и земли́ Сара́товския ве́лие удобре́ние! Ве́лии по́двизи и труды́ твои́, я́же за правове́рие и за Це́рковь Бо́жию положи́л еси́. Ты́, возжела́в вы́шних, оста́вил еси́ земну́ю сла́ву, и му́чеником дре́вним ревну́я, до́блественно противуста́л еси́ я́рости власте́й нечести́вых и преще́нию зломышле́нных клевре́т ея́. Ты́, прие́м непра́ведное осужде́ние и ка́знь лю́тую, восприя́л еси́ вене́ц му́ченичества, кро́вными ка́плями я́ко многоце́нным ка́мением испещре́нный, и ны́не во Ца́рствии Небе́снем Престо́лу все́х Влады́ки с ли́ком новому́чеников и испове́дников Росси́йских предстои́ши. Сего́ ра́ди мы́ гре́шнии тебе́ припа́даем и тебе́ мо́лимся: о, дру́же Христо́в, изба́ви на́с моли́твами твои́ми от вся́каго бесо́вскаго обстоя́ния, спаси́ на́с немощны́х от у́ст па́губнаго зми́я, и́щущаго пожре́ти на́с и свести́ ко а́ду живо́т на́ш. Исто́ргни на́с от лю́тых страсте́й и вся́кия напа́сти, гре́х ра́ди на́ших находя́щия. Пода́ждь душа́м на́шим утеше́ние, всади́ в сердца́ на́ша стра́х Суда́ Бо́жия, наипа́че же укрепи́ в на́с ве́ру Правосла́вную, в не́йже до конца́ земна́го жития́ на́шего тве́рдо пребыва́ти без поро́ка сподо́би и твоея́ Христу́ ве́рности подража́тели на́с бы́ти научи́. А́ще же терпели́во кре́ст искуше́ний и злострада́ний понести́ не возмо́жем, оба́че и тогда́ не лиши́ на́с ми́лостивыя твоея́ по́мощи, страстоте́рпче вели́кий, но свобо́ду и осла́бу на́м у Го́спода испроси́. Огради́ всеси́льным твои́м предста́тельством к Бо́гу, уго́дниче Христо́в и страстоте́рпче вели́кий, о́тче Космо́, страну́ на́шу Росси́йскую, гра́д се́й и вся́ гра́ды и ве́си от гла́да, огня́, меча́, наше́ствия иноплеме́нных и междоусо́бныя бра́ни и от вся́каго зла́, и все́м с ве́рою и любо́вию притека́ющим к тебе́ испроси́ у Го́спода Бо́га грехо́в проще́ние, телеси́ здра́вие, неду́гов исцеле́ние, от ско́рбных обстоя́ний свобожде́ние, да нече́стия и мирски́х по́хотей отбе́гше, Бо́гови же благоугоди́вше, спасе́ние улучи́ти сподо́бимся и с тобо́ю ку́пно в невече́рнем све́те воспое́м Неразде́льную и Единосу́щную Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Акафист

Акафист священномученику Гермогену, епископу Тобольскому

Кондак 1

Взбранный воине Царя Небесного и Христова стада наставниче, добрый и изрядный пастырю священномучениче Гермогене, возсиявый на земли Сибирстей, яко звезда Богосветлая, тем же, яко имея дерзновение ко Господу, просвещение нам даруй, да зовем ти:

Радуйся, священномучениче Гермогене, Сибирския земли светильниче.

Икос 1

Ангелов Творец, в Троице славимый, предуведевый чистого сердца твоего изволение, показа тя мирови быти истинного ревнителя благочестия и любви Христовой воплощение. Ведуще тя инока славна и пастыря предобра, дарова тебе подвигом добрым подвизатися и течение жизни временныя мужественно скончати, нас же научая тебе воспевать таковая:

Радуйся, Богом избранный наш пастырю;

Радуйся, увенчанный архиерейской благодатию;

Радуйся, чистым разумом Бога возлюбивый;

Радуйся, Господу усердно послуживый;

Радуйся, сердце твое в незлобии хранивый;

Радуйся, иго Христово от юности восприявый;

Радуйся, земли Сибирстей благодатное дарование;

Радуйся, со всеми святыми неба Церковного украшение;

Радуйся, священномучениче Гермогене, Сибирския земли светильниче.

Кондак 2

Видя благопромыслитель Господь души твоея доброту, направил твой помысл ко исканию единаго на потребу; ты же спасение души возжелав, навыкл еси взывати Богу: Аллилуиа.

Икос 2

Разум божественный имея, всю суету привременныя жизни презрел еси, тем же оставив мир и вся яже в мире, приял еси чин ангельский, возрадовав и родителя своего в иерейском чине Богу служившего, сие изволение твое восхваляюще глаголем ти тако:

Радуйся, путем правым шествовал еси;

Радуйся, Царствие Божие обрел еси;

Радуйся, дом родительский оставивый;

Радуйся, за Христом последовавый;

Радуйся, образе кротости и смирения;

Радуйся, восприемниче Христова терпения;

Радуйся, яко Исаак в руки Божии себе отдавый;

Радуйся, любовию к небеси воспаривый;

Радуйся, священномучениче Гермогене, Сибирския земли светильниче.

Кондак 3

Силою Божиею укрепляем, в иноческом подвизе потщался еси Христу Богу непорочным житием благоугодити, в Троице певаемому Богу, яко орган златострунный, взывал еси: Аллилуиа.

Икос 3

Имея благодать священства, добре носиму в благоухающем сосуде души твоея, во граде Тифлисе нраву чистому и благочестию церковному, отроков юных научал еси, тем же видя тя, ревностью учительства пламенеющего, вопием ти сицевая:

Радуйся, помощи Божией непрестанное призывание;

Радуйся, отроков учащихся доброе воспитание;

Радуйся, юности присное вразумление;

Радуйся, буйства ея премудрое исправление;

Радуйся, страху Божию научаяй,

Радуйся, юные сердца благодатию исполняяй;

Радуйся, к жизни вечной руководствуяй;

Радуйся, от смерти греховныя спасаяй;

Радуйся, священномучениче Гермогене, Сибирския земли светильниче.

Кондак 4

Борения сердечныя и печаль душевную претерпел еси, священномучениче Гермогене, в подвизе учительстем неленостно пребывая, юноши к церковному служению уготовляя и преуспевати в житии благонравием, отечески наставляя, они же в грядущее жития своего время, с благодарностью пели Богу: Аллилуиа.

Икос 4

Видя премногия труды твоя, Предвечный Архиерей наш, Господь Иисус Христос, жезл архипастырский и паству Саратовскую смотрению твоему вручи. Мы же о сем веселящеся, глаголем ти таковая:

Радуйся, вся степени иночества прошедый;

Радуйся, на престоле святительском возседый;

Радуйся, страже Церкви неустрашимый;

Радуйся, делателю винограда Христова неутомимый;

Радуйся, словам жизни научающий;

Радуйся, овцы заблудшие ко Христу призывающий;

Радуйся, во тьме седящия просветивый;

Радуйся, от погибели их сохранивый;

Радуйся, священномучениче Гермогене, Сибирския земли светильниче.

Кондак 5

Боготечную звезду показа тя на небесех в сонме священномучеников, Господь Вседержитель, зане и на земли был еси звезда светлая, осиявающая царство православное и путеводствуя ко угождению Единому Богу, во еже воспевати Ему: Аллилуиа.

Икос 5

Видевше тя Россия, яко дерзновеннаго служителя в годину тяжкую для Церкви и народа православного, возвышающаго голос свой за веру и Отечество и сохранение в чистоте заветов апостольских, дивишася подвигу твоему, сего ради и мы до сего дне озаряеми светом твоим, взываем ти:

Радуйся, молитвами сердце свое освятивый;

Радуйся, умныя очеса твоя к небесем возводивый;

Радуйся, вечное спасение возвестивый;

Радуйся, добрый воине Христов явивыйся;

Радуйся, славу небесную паче всего возлюбивый;

Радуйся, в Едином Бозе спасение улучивый;

Радуйся, устами твоими премудрость глаголавый;

Радуйся, светильниче, во тьме века сего возсиявый;

Радуйся, священномучениче Гермогене, Сибирския земли светильниче.

Кондак 6

Проповедник Евангелия и ревнитель благочестия, словом и житием твоим был еси святителю Гермогене. Не устрашился еси поношения человеческого и нападений вражиих. С кротостию и долготерпением принимал еси их яко из руки Божии, Ему же и взывал еси: Аллилуиа.

Икос 6

Возсиял еси на тверди церковней яко светильниче Божий, отче Гермогене, в пастве твоей явился еси наставниче веры, высоты духа и крепосте благочестия. Во граде Саратове и Царицыне во всенародном пении, ходы Крестные и Богослужения непрестанныя, совершал еси, предъуведа времена смутныя. Тем же достойно славим тя:

Радуйся, пастырю не себе угождаяй;

Радуйся, стадо Христово добре сохраняяй;

Радуйся, жезлом правды нечестие сокрушивый,

Радуйся, врагов церкви ревностно обличивый;

Радуйся, ограда крепкая неправедно обидимым;

(или:

Радуйся, Иоанном Кронштадтским благословенный;)

Радуйся, защищение, правды ради ненавидимым;

(или:

Радуйся, защищение страждущим усердный;)

Радуйся, меча духовнаго в ножны не вложивый;

Радуйся, венец мученичества от Господа получивый;

Радуйся, священномучениче Гермогене, Сибирския земли светильниче.

Кондак 7

Хотя Человеколюбец Господь испытати тя яко злато в горниле, разлучив тя от паствы Саратовския и в обитель Жировицкую всели, идеже всецело предавшись подвигу и молитве, братиею возлюблен был еси, за вся благодаря Бога и радостно вопия Ему: Аллилуиа.

Икос 7

Новая и необоримая стена и ограждение нерушимое обители Жировицкия дарова тя Господь, яко подвижника благочестия, преподобне Гермогене. В молитве и плаче о неведущих и заблудших, непоколебимо подвизался еси, и в подобие Христово облеклся еси. Сего ради молитвами твоими свободи нас от работы вражия и научи нас Единому Богу служити, восхваляющих тя сице:

Радуйся, ангелов житием удививый;

Радуйся, от страстей себя свободивый;

Радуйся, горняя мудрствовати научивый;

Радуйся, человечество во Христе прославивый;

Радуйся, Христовых заповедей исполнителю;

Радуйся, благочестия ревнителю;

Радуйся, непреклонный Православия исповедниче;

Радуйся, иноческих уставов защитниче;

Радуйся, священномучениче Гермогене, Сибирския земли светильниче.

Кондак 8

Смутное время бед и скорбей попусти Господь народу Русскому, хотя отделити пшеницу от плевел и прославити рабов своих, мы же терпению их непоколебимому за веру Православную научаемся, славяще Христа Бога, дивного во святых Своих, поюще Ему: Аллилуиа.

Икос 8

Вся премудро устрояя, Господь, дарова тя архипастыря земли Сибирския, быти уставам церковным хранителю и в дни смуты для всех покровителю, радующееся о твоем к нам пришествии, воспеваем ти таковая:

Радуйся, веры утверждение

Радуйся, надежды вселение;

Радуйся, любовь Христову являяй;

Радуйся, Богомудрыя умы услаждаяй;

Радуйся, Боголюбивых душ увеселение;

Радуйся, телес наших исцеление;

Радуйся, об отечестве нашем печальниче;

Радуйся, Тобольския кафедры священноначальниче;

Радуйся, священномучениче Гермогене, Сибирския земли светильниче.

Кондак 9

Вси люди паствы Тобольския видевши тя, святителю, немолчного проповедника и щедрого благотворителя, любовию Христовою, яко отца о чадех своих исполненного, и пред престолом Божиим о нас предстателя, единогласно воспеша Богу: Аллилуиа.

Икос 9

Витийство песненное наше не возможет по достоянию изрещи труды твоя, святителю Гермогене, подвигом бо добрым подвизался, службы Божественныя совершая, благочестие проповедал и любовию ко Господу Иисусу горя, сего ради прими от нас похвалы сия:

Радуйся, святыя молитвы совершаяй;

Радуйся, в трудах неленостных пребываяй;

Радуйся, яко во бдениих усердствовал еси;

Радуйся, яко бесстрастие Христово стяжал еси;

Радуйся, смирения и незлобия учителю;

Радуйся, терпения и миролюбия хранителю;

Радуйся, враги своя любити научаяй;

Радуйся, любовию вражду побеждаяй;

Радуйся, священномучениче Гермогене, Сибирския земли светильниче.

Кондак 10

Спасение вечное всем устрояя, определи тебе Господь краткое время святительства твоего на земли Сибирстей, идеже волны нестроений и междуусобныя брани воздвизаемые врагом спасения быша. Ты же, яко адамант веры непоколебимо пребыл еси, поя Богу: Аллилуиа.

Икос 10

Стена тверда и град необорим пребывая прещения мучителей не убоялся еси, святителю, крестным ходом град Тобольск освящая и царственных узников с высоты Кремля благословляя. Мы же дивящеся крепости духа твоего поем тебе таковая:

Радуйся, Царя Небеснаго добрый воителю;

Радуйся, царя земнаго верный служителю;

Радуйся, мирскаго мятежа укрощение;

Радуйся, христианскаго подвига возвышение;

Радуйся, мучителем посмеявшийся;

Радуйся, за подвиг исповедничества крепко взявшийся;

Радуйся, сие до конца претерпевший;

Радуйся, верным чадам образ добрый явивший;

Радуйся, священномучениче Гермогене, Сибирския земли светильниче.

Кондак 11

Подвиг мученический, оковы тяжкие, изгнание дальнее и заключение темничное претерпел еси, святителю, егда на мученичество взят был еси людьми злонравными и неверными и во единем граде, во едино время с царственными страстотерпцами пребывал еси, дондеже достигл еси восхода на Голгофу страданий твоих, поя укрепляющему тебя Богу: Аллилуиа.

Икос 11

Слышавши верныя чада твоя о узах твоих во Екатеринограде, потщашася о освобождении твоем, но не возмогоша преодолети коварство мучителей и от них пострадавши победными почестьми от Господа венчалися есте, положивше души своя вкупе с пастырем своим. Мы же подвиг ваш восхваляюще вопием вам сице:

Радуйтеся, священномученицы: Ефреме, Петре, Михаиле, подвиг свой совершившии;

Радуйтеся, мучителевым обманам пренебрегши.

Радуйся, мучениче Константине, на подвиг себе отдавый;

Радуйся, священномучениче Гермогене, за Господа пострадавый.

Радуйся, за Камень веры, Христа, в воду вверженный.

Радуйся, с каменем на персех твоих обретенный;

Радуйся, яко тело твое нетленно явися;

Радуйтеся, яко Царствие Божие вам верно дадеся;

Радуйся, священномучениче Гермогене, Сибирския земли светильниче.

Кондак 12

Благодарение возсылая Богу и путь земного жития мученически скончавая, кротко молился еси с пострадавшими с тобою в реце Туре и по мале времени, нетленно обретается на брезе речнем тело твое и честне во град Тобольск приносится и во гробе святителя Иоанна погребается, и ныне прославляется от христианских родов, вопиющих Богу: Аллилуиа.

Икос 12

Пение у гроба твоего, угодниче Божий святителю Гермогене, прими от нас, совершающих память твою, аще и на многая лета сокрыта бысть память твоя, но невозможно есть укрытися светильнику под спудом. Богу же вся мудро устрояющему и светильник веры твоей на свешнице поставляющий и скорого помощника нам являющаго, да вопием тебе таковая:

Радуйся, добрый подвиг совершивший;

Радуйся, тело нетленное благодатию явивший;

Радуйся, яко сие честне в церкви погребеся; ,

Радуйся, яко оное на исцеление верным дадеся;

Радуйся, яко силу воскресения Христова являеши;

Радуйся, яко зарю всеобщего воскресения показуеши;

Радуйся, истины Православия несомненное уверение;

Радуйся, веры благодатной неложное извещение;

Радуйся, священномучениче Гермогене, Сибирския земли светильниче.

Кондак 13

О священная главо, святый священномучениче Гермогене, ты бо Господа Иисуса Христа всею душею возлюбил еси и за веру Православную и Церковь святую пострадати изволил еси и на небесех мзду трудов твоих восприял еси, но и нас на земли тебе чтущих не оставил еси, услыши нас прославляющих и молящих Тя: да умножится в нас благодать Божия очищающая и освящающая души наша, да улучивши спасение вечное, благодарственная вопием Богу: Аллилуиа.

[Се́й конда́к глаго́лется три́жды.]