Пророк Моисе́й Боговидец

Св. Моисей Боговидец, великий пророк и законодатель, родился в Египте ок. 1570 г. до Р.Х. Воспитан дочерью фараона, стал орудием Божиим в освобождении еврейского народа из рабства. На горе Синай получил от Бога Десять заповедей. Творил чудеса силой Божией, водил народ по пустыне 40 лет. Автор Пятикнижия. Скончался в 120 лет в Моаве, место погребения неизвестно. Его жизнь описана в книгах Исход, Числа и Второзаконие.

* * *

Великий пророк и законодатель израильтян происходил из колена Левиина. Родился в Египте приблизительно в 1570 году до Р. X. и воспитан дочерью фараона. Во всех своих начинаниях и поступках Моисей являлся орудием в руках Всевышнего. Моисей был человеком, которому Бог открыл тайны бытия: сотворение мира и человека. На горе Синайской он принял от Бога 10 заповедей Его. Силой Божией творил великие знамения и чудеса. Преставился 120-ти лет в стране Моавитской. Погребен в долине близ Веффегора, но «никто не знает места погребения его даже до сего дня» (Втор.34:6).

О жизни Моисея повествуют книги Библии – Исход, Числа и Второзаконие.

Тропарь, глас 2

Проро́ка Твоего́ Моисе́я па́мять, Го́споди, пра́зднующе,
тем Тя мо́лим:

спаси́ ду́ши на́ша.

Ин тропарь, глас 2 На высоту́ доброде́телей возше́л еси́, проро́че Моисе́е;/ и сего́ ра́ди сподо́бился еси́ ви́дети сла́ву Бо́жию./ Скрижа́ли благода́тныя Зако́на прия́т,/ и начерта́ний благода́ть в себе́ нося́,/ и проро́ков был еси́ честна́я похвала́,// и благоче́стия вели́кое та́инство.

Кондак, глас 2

Лик проро́ческий с Моисее́м и Ааро́ном весе́лием днесь весели́тся,
я́ко коне́ц проро́чествия их на нас испо́лнися;
днесь сия́ет Крест, и́мже нас спасл еси́.

Тех моли́твами Христе́ Бо́же поми́луй нас.

Канон святому пророку Моисею Боговидцу

Минея, 4 Сентября.

Глас 4

Песнь 1

Ирмос: Мо́ря чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма

Амали́кову си́лу в пусты́ни победи́л есть.

Припев: Святы́й проро́че Моисе́е, моли́ Бо́га о на́с.

Моисе́й проро́ков да восхва́лится пе́рвый,
я́ко пред Бо́гом бесе́довав пе́рвый я́ве лице́м к Лицу́,
не в гада́ниих рече́ний, но я́ко в ви́де пло́ти ви́дев Того́.

Припев: Святы́й проро́че Моисе́е, моли́ Бо́га о на́с.

Я́ко боже́ственна народоводи́теля и изба́вителя тя
ро́ду твоему́ Изра́илю, Моисе́е богови́дче, даде́ Бог,
Отцу́ я́коже помоли́ся,
обетова́ния пома́занием провозвеща́я твое́ рожде́ние.

Сла́ва Отцу́ и Сы́ну и Свято́му Ду́ху.

Му́дрости тя сокро́вище обрето́ша родны́я доброде́тели, сокрове́но зна́нием Бо́жиим,
я́коже в ковче́зе, богови́дче Моисе́е;
тем тя воспита́ше цари́ца и Боже́ственный Про́мысл.

И ны́не и при́сно и во ве́ки веко́в. Ами́нь.

Богородичен: Устраши́ся Моисе́й, ви́дев пресла́вное в пе́рвых виде́ние,
купине́ и пла́меню стра́нное смеше́ние, Бо́га из Де́вы Ма́тере прообразу́ющее Нетле́ннаго,
Его́же, мину́в времена́, ви́де пло́тию.

Песнь 3

Ирмос: Лук си́льных изнемо́же,
и немощству́ющии препоя́сашася си́лою,

сего́ ра́ди утверди́ся в Го́споде се́рдце мое́.

Припев: Святы́й проро́че Моисе́е, моли́ Бо́га о на́с.

Весьма́ неизрече́ннаго зна́ния испо́лнился еси́, богови́дче,
Дух Святы́й чрез А́нгела
дре́вних научи́ тя зна́нию я́сно.

Припев: Святы́й проро́че Моисе́е, моли́ Бо́га о на́с.

Нося́й све́тло Боже́ственныя зари́,
богозна́меньми удиви́л еси́ Еги́пет,
претворя́я стихи́й пресла́вне естество́, прему́дре.

Сла́ва Отцу́ и Сы́ну и Свято́му Ду́ху.

Озаря́ет кра́сное добро́ты твоея́
от Боже́ственныя зари́ све́тлое, блаже́нне, жи́тельство
и к Боже́ственней несы́тно вся привлече́ красоте́.

И ны́не и при́сно и во ве́ки веко́в. Ами́нь.

Богородичен: Взя́лся еси́ стра́шным виде́нием ко ужа́сному зре́нию, прему́дре,
но возбрани́ глас Го́спода,
ро́ждшагося из Де́вы пло́тию.

Седален, глас 4

Проро́ков всех тя пе́рваго я́ко су́ща, благоче́стно ве́дуще, восхваля́ем ве́рнии:
пе́рвый бо Бо́га ви́дел еси́,
я́коже мо́щно бя́ше челове́ку ви́дети.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Пречи́стыя ру́ки Твоя́, Де́вомати, просте́рши,
покры́й упова́ющия на Тя и Сы́ну Твоему́ зову́щия:
всем пода́ждь, Христе́, ми́лости Твоя́.

Песнь 4

Ирмос: Вознесе́на Тя ви́девши Це́рковь на Кресте́,
Со́лнце пра́ведное,
ста в чи́не свое́м,
досто́йно взыва́ющи:

сла́ва си́ле Твое́й, Го́споди.

Припев: Святы́й проро́че Моисе́е, моли́ Бо́га о на́с.

Гугна́нию язы́ка и гла́са твоего́ уясни́вшуся Боже́ственным Про́мыслом, богови́дче,
вити́я та́ин Бо́жиих яви́лся еси́ глаго́лы
и ра́нами я́звил еси́ Еги́пет.

Припев: Святы́й проро́че Моисе́е, моли́ Бо́га о на́с.

Коль пресла́вно зва́ние твое́, о богови́дче!
Коль стра́шна дела́ твои́х чуде́с!
Яви́ся бо Сый тебе́ Бог
и, сла́вою возвы́сив тя, Изра́илю спаси́теля посла́.

Сла́ва Отцу́ и Сы́ну и Свято́му Ду́ху.

Вся́каго перворо́дна порази́л еси́ еги́петскаго,
я́ко Христо́с де́монов умертви́ держа́ву:
о́браз бо бу́дущаго тобо́ю де́йствуемая и́стинно бы́ша, сла́вне.

И ны́не и при́сно и во ве́ки веко́в. Ами́нь.

Богородичен: Не приближа́йся се́мо, Моисе́й слы́шав,
Бо́жию гла́су вопию́щу из пла́мене купины́:
свя́то бо ме́сто в ле́поту преднаписа́
пло́тию роди́тися Христу́ из Чи́стыя.

Песнь 5

Ирмос: Ты, Го́споди, мои́ Свет,
в мир прише́л еси́,
Свет Святы́й, обраща́яй из мра́чна неве́дения

ве́рою воспева́ющия Тя.

Припев: Святы́й проро́че Моисе́е, моли́ Бо́га о на́с.

Ударя́еши Чермно́е и твори́ши разделе́ния мно́гая
жезло́м твои́м, о богови́дче,
да пока́жеши в сем Креста́ Боже́ственную си́лу.

Припев: Святы́й проро́че Моисе́е, моли́ Бо́га о на́с.

О, дерзнове́ния прелюбе́знаго!
О, простоты́ души́ чи́стыя!
А́ще позна́л еси́ мя па́че всех, к Бо́гу богови́дец рече́,
разу́мно мне яви́ся.

Сла́ва Отцу́ и Сы́ну и Свято́му Ду́ху.

Ка́менем покры́вся, не ви́дел еси́ Бо́жия Лица́,
я́ко утае́на, о богови́дче,
воплоще́ние же позна́л еси́ Сло́ва, я́ко за́дняя.

И ны́не и при́сно и во ве́ки веко́в. Ами́нь.

Богородичен: Вшел еси́ чу́вственне во мрак
и навы́кл еси́ неизрече́нная, о богови́дче,
я́ко хо́щет из Де́вы Бог пло́тию роди́тися, Спас.

Песнь 6

Ирмос: Пожру́ Ти со гла́сом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ребр Твои́х

исте́кшею Кро́вию.

Припев: Святы́й проро́че Моисе́е, моли́ Бо́га о на́с.

Во́инство стяжа́в Бо́жие Изра́иль си́льное,
седмь у́бо зло́бы ханане́йския язы́ки погуби́л еси́,
лю́дем ты в насле́дие дав зе́млю их.

Припев: Святы́й проро́че Моисе́е, моли́ Бо́га о на́с.

Неизглаго́ланно вшед во мрак Боже́ственный, Моисе́е,
иде́же Бог бя́ше, зовы́й тя,
пи́санныя скрижа́ли пе́рстом Его́ зако́нныя прия́л еси́,
я́ко вели́к уго́дник Его́.

Сла́ва Отцу́ и Сы́ну и Свято́му Ду́ху.

Поста́ви послу́шати Бог гла́са Своего́ богови́дца Моисе́я,
Себе́ Сама́го ему́ яви́в,
да пока́жет стра́шное со сла́вою та́инство Свое́.

И ны́не и при́сно и во ве́ки веко́в. Ами́нь.

Богородичен: Ма́нием Боже́ственным Тя преднапису́ет Моисе́й сла́вный
ковче́г, Богоро́дице, заря́ми Ду́ха всю́ду, я́ко зла́том, покрове́н
в сла́ву Бо́жию.

Кондак, глас 2

Лик проро́ческий с Моисе́ем и Ааро́ном
весе́лием днесь весели́тся,
я́ко коне́ц проро́чествия их на нас испо́лнися:
днесь сия́ет Крест, и́мже нас спасл еси́;

тех моли́твами, Христе́ Бо́же, поми́луй нас.

Песнь 7

Ирмос: В пещи́ авраа́мстии о́троцы перси́дстей,
любо́вию благоче́стия па́че,
не́жели пла́менем, опаля́еми, взыва́ху:

благослове́н еси́ в хра́ме сла́вы Твоея́, Го́споди.

Припев: Святы́й проро́че Моисе́е, моли́ Бо́га о на́с.

В боговиде́ниих неизглаго́ланных Боже́ственный писа́тель быв,
весь му́дрый вид ски́нии ты сло́вом ухи́трив,
началозда́телю Веселеи́лу предложи́л еси́ дея́ние, богови́дче Моисе́е.

Припев: Святы́й проро́че Моисе́е, моли́ Бо́га о на́с.

Свяще́нствовати дерзну́в Корре́й с тобо́ю, яви́ся низше́д во ад жив,
всежре́бийно Бо́гу тебе́ честно́е, Моисе́е, храня́щу,
ца́рствия и свяще́нства вку́пе.

Сла́ва Отцу́ и Сы́ну и Свято́му Ду́ху.

Воево́дствующу тебе́ иуде́йскому язы́ку дре́вле, Моисе́е,
яви́ся Михаи́л, нача́льник Небе́сных и те́ла твоего́ Боже́ственный храни́тель:
злонача́льника бо противоглаго́люща той посрами́.

И ны́не и при́сно и во ве́ки веко́в. Ами́нь.

Богородичен: Ааро́нов Тя Боже́ственный жезл прозя́бнути показа́ всем, Богоро́дице,
реше́ние грехо́в, очище́ние бо земны́м была́ еси́,
я́коже ропта́вшим на Бо́га о́но стра́шное преще́ние.

Песнь 8

Ирмос: Ру́це распросте́р, Дании́л
львов зия́ния в ро́ве затче́;
о́гненную же си́лу угаси́ша,
доброде́телию препоя́савшеся,
благоче́стия рачи́тели, о́троцы, взыва́юще:

благослови́те, вся дела́ Госпо́дня, Го́спода.

Припев: Святы́й проро́че Моисе́е, моли́ Бо́га о на́с.

Уго́дник и́стинно Бо́жий, я́ко кро́ток, слы́шал еси́ и де́лы был еси́,
тем позна́н бысть тебе́ Госпо́дь па́че всех проро́ков, Моисе́е,
и, всели́вся в тя, ве́рно пе́ти научи́:
благослови́те, вся дела́ Госпо́дня, Го́спода.

Припев: Святы́й проро́че Моисе́е, моли́ Бо́га о на́с.

Я́ко таи́нник Бо́жий и служи́тель и царь Изра́илев, Моисе́е богови́дче, я́влься,
Христа́ пропове́дал еси́ приити́ в пло́ти,
прописа́в Его́ в себе́ стра́шное и Боже́ственное Прише́ствие,
Его́же и о́браз одушевле́н яви́лся еси́ я́ве, и проро́к ве́рен.

Сла́ва Отцу́ и Сы́ну и Свято́му Ду́ху.

Сло́ва проро́чествием лю́ди и Зако́на повеле́ньми наста́вил еси́ ве́рно,
зна́меньми и чудесы́ напра́вив и чуде́с показа́нии:
от Бо́га бо показа́вся нача́льник, богови́дче Моисе́е;
тем приложи́лся еси́ ко отце́м твои́м со сла́вою мно́гою.

И ны́не и при́сно и во ве́ки веко́в. Ами́нь.

Богородичен: Никто́же предуслы́ша пре́жде тебе́, богови́дче сла́вне Моисе́е, уго́дниче Христо́в,
зане́ вся изре́кл еси́ Де́вы смотре́ния,
пропису́ющия Тоя́ Боже́ственное рождество́,
в пла́мени бо купины́ ви́дел еси́ зрак неви́димый.

Песнь 9

Ирмос: Ка́мень нерукосе́чный
от несеко́мыя горы́, Тебе́, Де́во,
краеуго́льный отсече́ся,
Христо́с, совокупи́вый разстоя́щаяся естества́.

Тем, веселя́щеся, Тя, Богоро́дице, велича́ем.

Припев: Святы́й проро́че Моисе́е, моли́ Бо́га о на́с.

Был еси́, богови́дче, самови́дец Госпо́день и по сме́рти,
не во мра́чных гада́ниих, я́ко в ка́мени пе́рвее,
но в челове́честей пло́ти Христа́ ви́дев, облиста́юща Божество́м.

Припев: Святы́й проро́че Моисе́е, моли́ Бо́га о на́с.

Гора́ Фаво́р просла́вися па́че Сина́йския бога́тно,
иде́же Моисе́й из ме́ртвых и Фесви́тянин от стран живу́щих
Христа́ со апо́столы зря́ху преобразу́ющася, я́ко Су́що Бо́га.

Сла́ва Отцу́ и Сы́ну и Свято́му Ду́ху.

Спаси́ мя ми́лостивною твое́ю моли́твою и моли́тв дерзнове́нием,
я́ко Изра́иля от бед, Моисе́е богови́дче, и лю́тых, и ну́ждных,
христиа́н исполне́ние от вся́каго вре́да, пою́щих Тя.

И ны́не и при́сно и во ве́ки веко́в. Ами́нь.

Богородичен: Ста́мну Тя злату́ю, и скрижа́ль, и Боже́ственную трапе́зу, Де́во,
пе́рвее Моисе́й написа́в, я́ве пока́зоваше Бо́га роди́тися из Тебе́,
Его́же ви́девше пло́тию, ве́рно песнь скончава́ем Твою́.

Акафист святому пророку Моисею Боговидцу

Кондак 1

Избра́нный Бо́гом на служе́ние проро́ческое, по́двиги твои́ми Творца́ и Го́спода просла́вивый, Про́мысл благи́й о спасе́нии ро́да челове́ческаго явле́й, пла́менною ре́вностию по Бо́зе Вседержи́теле, свя́тостию жития́ и чудесы́ просия́вый, похва́льная воспису́ем ти, проро́че Бо́жий Моисе́е. Ты же, я́ко име́я дерзнове́ние ве́лие у Святы́я Тро́ицы, предста́тельством твои́м небе́сным помога́й нам, да зове́м ти: Ра́дуйся, честны́й и сла́вный проро́че, Богови́дче Моисе́е.

Икос 1

Арха́нгелов и А́нгелов Ца́рь и всея́ тва́ри Зижди́тель, времена́ и ле́та в десни́це Свое́й положи́вый, и судьбы́ племе́н и ца́рств устроя́яй, егда́ восхоте́ изба́вити лю́ди Своя́ от рабо́ты Еги́петския, от ко́реня пра́веднаго произрасти́ тя, Моисе́е богоно́сне, благода́тию Свое́ю просвети́ и посла́ к сыново́м Изра́илевым соверши́ти исхо́д их ве́лий из страны́ Еги́петския в зе́млю Обетова́нную, и проо́браз спасе́ния челове́ков сим яви́ти. Те́мже благодаря́ще Творца́ на́шего, славосло́вим и тя, вели́каго проро́ка Бо́жия, пою́ще ти:

Ра́дуйся, избра́нниче Бо́жий, де́лу спасе́ния ми́ра послужи́вый;

ра́дуйся, гряду́щее воплоще́ние Сы́на Бо́жия пропове́давый.

Ра́дуйся, зако́на богодарова́ннаго провозве́стниче;

ра́дуйся, о сыне́х изра́илевых пред Бо́гом печа́льниче.

Ра́дуйся, Христа́ Спаси́теля житие́м и де́лы твои́ми прообразова́вый;

ра́дуйся, Того́ благода́тию вене́ц побе́дный стяжа́вый.

Ра́дуйся, Творца́ в неизрече́нней сла́ве ны́не созерца́яй;

ра́дуйся, со А́нгелы и святы́ми хвалу́ Ему́ воспева́яй.

Ра́дуйся, честны́й и сла́вный проро́че, Богови́дче Моисе́е.

Кондак 2

Ви́девша благочести́вая роди́теля твоя́, святы́й проро́че, слуг фарао́новых, младе́нцев изра́ильских му́жеска по́лу избива́ющих, потща́стася сохрани́ти тя до вре́мене, и Го́сподем вдохновля́ема, положи́ста тя в ковче́жец и в во́ды реки́ Ни́ла вверго́ста, и сим живо́т твой в ру́це Вседержи́теля предава́юща, глаго́ласта Ему́: Аллилу́иа.

Икос 2

Ра́зумом свы́ше просвеще́на бысть дщи фарао́на Еги́петскаго, егда́ узре́ тя по реце́ Ни́лу в ковче́жце плову́ща, сего́ ра́ди взят тя в черто́ги своя́ и, а́ки сы́на, воспита́. Ты же, всесла́вный Моисе́е, ве́ру и обы́чаи люде́й Бо́жиих сохраня́я, возраста́л еси́ в трезве́нии и богомы́слии, любо́вь к соплеме́нником твои́м явля́я. Мы же вся сия́ воспомина́юще, Го́спода хва́лим и пое́м ти си́це:

Ра́дуйся, во младе́нстве Про́мыслом Бо́жиим от лю́тыя сме́рти исхище́нный;

ра́дуйся, из воды́ извлече́нный и сего́ ра́ди Моисе́ем нарече́нный.

Ра́дуйся, ма́терию твое́ю воспита́нный и возраще́нный;

ра́дуйся, ве́ре Авраа́ма, Исаа́ка и Иа́кова то́ю науче́нный.

Ра́дуйся, измла́да Бога отце́в твои́х все́ю душе́ю возлюби́вый;

ра́дуйся, от му́дрыя дще́ре фарао́ни ми́лости прие́мый.

Ра́дуйся, И́стиною Бо́жиею от ю́ности просвеще́нный;

ра́дуйся, от у́тра жи́зни твоея́ на служе́ние проро́ческое Го́сподем приугото́ванный.

Ра́дуйся, честны́й и сла́вный проро́че, Богови́дче Моисе́е.

Кондак 3

Си́лою и благода́тию Ду́ха Свята́го возраста́л еси́ в ве́ре, богому́дре Моисе́е, и вели́к быв, отве́ржеся нарица́тися сын дще́ре фарао́новы, па́че изво́ли страда́ти с людьми́ Бо́жиими, не́жели име́ти вре́менную греха́ сла́дость, бо́льшее бога́тство сокро́вищ еги́петских вмени́в ве́рность Вседержи́телеви, взира́ше бо на мздовоздая́ние. Сего́ ра́ди Госпо́дь пону́ди тя, избра́нника Своего́, оста́вити зе́млю еги́петскую и в преде́лы Мадиа́мския до вре́мене всели́тися. Ты же, на милосе́рдное промышле́ние Всеблага́го Творца́ вы́ну упова́я, неуста́нно взыва́л еси́ Ему́: Аллилу́иа.

Икос 3

Име́я ве́лие благоволе́ние к тебе́, о пресла́вный Моисее, виде́ния пречу́днаго сподо́би тя Госпо́дь, егда́ узре́л еси́ в пусты́ни купину́, неопа́льно горя́щую, и услы́шал еси́ глас Бо́жий «Аз есмь Сый», открыва́яй ти Ся и во Еги́пет идти́ повелева́яй, да изведе́ши сы́ны Изра́илевы в зе́млю обетова́нную. Сего́ ра́ди дарова́ ти Господь силу чудеса́ и зна́мения твори́ти, и от дне того́ почи́ на тебе́ ве́лия благода́ть Бо́жия. Мы же, ве́ру твою́ ко Го́споду и наде́жду на мно́гую ми́лость Его́ воспева́юще, глаго́лем ти си́це:

Ра́дуйся, Предве́чному и Присносу́щному Бо́гу послужи́вый;

ра́дуйся, мир Божий в Дусе Свя́те получи́вый.

Ра́дуйся, яко Госпо́дь лице́м к лицу́ бесе́дова ти;

ра́дуйся, яко Бог Изра́илев уста́ ко усто́м глаго́ла ти.

Ра́дуйся, све́том Боже́ственным умы́ и сердца́ озаря́яй;

ра́дуйся, к подвиго́м благоче́стия ны́не нас призыва́яй.

Ра́дуйся, от заблужде́ний благода́тно избавля́яй;

ра́дуйся, от путе́й поги́бельных пресла́вно удаля́яй.

Ра́дуйся, честны́й и сла́вный Проро́че, Богови́дче Моисе́е.

Кондак 4

Бу́рю помышле́ний сумни́тельных отве́рг и повеле́ние Бо́жие испо́лнити возжеле́в, досточу́дне Моисе́е, поте́кл еси́ в зе́млю Еги́петскую. На пути́ сем сре́тил еси́ бра́та твоего́ Ааро́на, и́же от дни того́ бысть ти помо́щник и сора́тник, помога́яй ти в вели́цем служе́нии твое́м. Мы же, сия́ воспомина́юще, про́сим тя, всехва́льне проро́че: утверди́ нас в ве́ре и ве́рности Бо́гу, да упова́я на всемогу́щество и ми́лость укрепля́ющего ны Го́спода, непреста́нно вопие́м Ему́: Аллилу́иа.

Икос 4

Слы́шав царь Еги́петский повеле́ние Бо́жие отпусти́ти сы́ны Изра́илевы, да послу́жат Бо́гови в пусты́ни, разъяри́ся зело́ и повеле́ озло́бити Изра́иля рабо́той горча́йшей. Ты же, о святы́й Моисе́е, ве́руя, я́ко не оста́вит Госпо́дь люде́й Свои́х, моля́ше Созда́теля изба́вити Изра́иля от озлобле́ния еги́петскаго. Сего́ ра́ди, благогове́йно па́мять твою́ чту́ще, таковы́я похвалы́ тебе́ прино́сим:

Ра́дуйся, Царя́ Небе́снаго вели́кий посла́нниче;

ра́дуйся, повеле́ний Его́ провозве́стниче.

Ра́дуйся, скорбя́щим сыно́м Изра́илевым ми́лость Бо́жию принесы́й;

ра́дуйся, во́лны сомне́ний о ка́мень ве́ры сокруши́вый.

Ра́дуйся, го́рняя, а не земна́я, му́дрствовати нас науча́яй;

ра́дуйся, пла́мя моли́твы в ду́шах чту́щих тя возжига́яй.

Ра́дуйся, утеше́ние и вспоможе́ние ве́рным явля́яй;

ра́дуйся, от рабо́ты греху́ и диа́волу свободи́тися помога́яй.

Ра́дуйся, честны́й и сла́вный проро́че, Богови́дче Моисе́е.

Кондак 5

Боготе́чней звезде́ уподо́бился еси́, о святы́й проро́че, егда́ сконча́шася ка́зни еги́петския и прии́де вре́мя изы́ти Изра́илю от страны́ порабоще́ния. Тогда́ повеле́л еси́ сыно́м Изра́илевым закла́ти а́гнцев и кро́вию а́гнчею пома́зати пра́ги и две́ри домо́в свои́х, во избавле́ние от сме́рти и в зна́мение гряду́щих искупи́тельных страда́ний Сы́на Бо́жия. Повеле́ Госпо́дь дню сему́ во всех ро́дех бы́ти в па́мять исхо́да вели́каго, избавле́ние от ра́бства диа́волу прообразу́ющаго. Мы же, зря́ще ны́не прообразова́ний сбытие́ пресла́вное, в ра́дости духо́вней Го́сподеви пое́м: Аллилу́иа.

Икос 5

Ви́дя во́инство фарао́ново, люде́й Божиих настига́ющее, возведе́, богому́дре Моисе́е, ру́це твои́ горé и усе́рдно моля́ше Вседержи́теля изба́вити Изра́иля. Егда́ же простре́ жезл твой на мо́ре, разступи́шася во́ды сю́ду и сю́ду, и проидо́ша сы́нове Изра́илевы посреде́ мо́ря по су́ху, и вода́ им стена́ бысть одесну́ю и стена́ ошу́юю, еги́птяне же потону́ша. Мы же, о сих преди́вных де́лех Бо́жиих слы́шаще, зове́м ти, уго́днику Его́, та́ко:

Ра́дуйся, чу́до пресла́вное благода́тию Бо́жиею сверши́вый;

ра́дуйся, мо́ре и ветр послу́шными Бо́гу показа́вый.

Ра́дуйся, зна́меньми и чудесы́ Боже́ственную И́стину утверди́вый;

ра́дуйся, ве́лию кре́пость ве́ры Бо́гу отце́в лю́дем твои́м яви́вый.

Ра́дуйся, прехожде́нием мо́ря Чермна́го о́браз свята́го Креще́ния показа́вый;

ра́дуйся, ве́лие славосло́вие Всемогу́щему Го́споду о де́лех Его́ возда́вый.

Ра́дуйся, из глубины́ грехо́вней к высоте́ ду́ха ве́рныя возводя́й;

ра́дуйся, пра́ведный гнев Бо́жий моли́твами Твои́ми утиша́яй.

Ра́дуйся, честны́й и сла́вный проро́че, Богови́дче Моисе́е.

Кондак 6

Пропове́дник Бо́га И́стиннаго и дел благи́х яви́лся еси́, богоблаже́нне проро́че, ты бо о чистоте́ ве́ры ревну́я, потща́лся еси́ труды́ мно́гими лука́выя нра́вы и обы́чаи жестоковы́йных сыно́в изра́илевых испра́вити, богове́дению и благоче́стию науча́л еси́ па́ству твою́ при́сно, наставля́я ни на де́сно, ни на ле́во уклоня́тися от пути́ ца́рскаго доброде́телей богоуго́дных, па́че же о́бразом жития́ твоего́ путь спасения указал еси́, да вы́ну вопию́т Вседержи́телю Бо́гу: Аллилу́иа.

Икос 6

Возсия́ на тебе сла́ва и благода́ть Госпо́дня, о прехва́льне Моисе́е, егда́, стоя́щу ти́ на горе́ и к Не́бу ру́це твои́ в моли́тве крестообра́зно воздвиза́ющу, дарова́ Госпо́дь побе́ду сыно́м Изра́илевым и амали́кову си́лу победи́. Мы же, воспева́юще чудеса́ Бо́жия, тобо́ю явле́нная, и на твое́ предста́тельство упова́юще, глаго́лем ти си́це:

Ра́дуйся, я́ко тобо́ю благода́тная си́ла Креста́ Госпо́дня пре́жде страда́ний Сы́на Бо́жия яви́ся;

ра́дуйся, я́ко Госпо́дь послу́ша моли́тв твои́х и проше́ния твоя́ испо́лни.

Ра́дуйся, я́ко жезла́ ударе́нием во́ду от ка́мене жа́ждущим лю́дем источи́л еси;

ра́дуйся, я́ко сим проо́браз Христа́, живо́т ве́чный источа́ющаго, показа́л еси́.

Ра́дуйся, исто́чниче Бо́жий, жа́жду духо́вную мно́гих утоля́яй;

ра́дуйся, неве́рующих Про́мыслу Бо́жию в ве́ре утверждаяй.

Ра́дуйся, немощны́х ду́хом благода́ти Бо́жией взыска́ти науча́яй;

ра́дуйся, во уны́нии и ско́рбех изнемога́ющих всеору́жием наде́жды облека́яй.

Ра́дуйся, честны́й и сла́вный проро́че, Богови́дче Моисе́е.

Кондак 7

Хотя́й всем челове́ком спасти́ся и в ра́зум и́стины приити́, Всеблаги́й и Многоми́лостивый Созда́тель наш дарова́ чрез тебе́, святы́й Моисе́е, скрижа́ли Заве́та Своего́ лю́дем Свои́м, и на вся времена́ до сконча́ния ве́ка за́поведьми Свои́ми просвети́л есть всех, Творца́ и́стинно чту́щих. Сего́ ра́ди ти́и нелицеме́рно вопию́т Зако́на Пода́телю: Аллилу́иа.

Икос 7

Но́вая и пресла́вная повеле́ния Бо́жия со тща́нием и любо́вию исполня́л еси́, о преблаже́нне проро́че, гла́су Бо́жию вне́мля, ски́нию, в не́йже же́ртвенник и Киво́т Заве́та, созда́ти повеле́л еси́, и служе́ние первосвяще́ническое, свяще́нническое и леви́тское устро́ил еси́, сла́вы ра́ди Бо́жия. Прозрева́юще же бу́дущая, я́ко настоя́щая, о прише́ствии в мир Спаси́теля возвести́л еси́. Мы же, вся сия́ воспомина́юще, вопие́м ти си́це:

Ра́дуйся, Ковче́г Завета о́бразы Херуви́мов украси́вый;

ра́дуйся, сим тве́рдое основа́ние иконопочита́нию положи́вый.

Ра́дуйся, о сла́ве Бо́жией непреста́нно ревнова́вый;

ра́дуйся, о безсе́менном рождестве́ Сы́на Бо́жия от Неискусобра́чныя возвести́вый.

Ра́дуйся, за́поведи Бо́жии я́ко тве́рдое основа́ние жи́тельства на ве́ки челове́ком положи́вый;

ра́дуйся, за́поведи сия́ неле́ностно исполня́ти нас наставля́яй.

Ра́дуйся, Го́сподеви, а не челове́ком угожда́ти нас науча́яй;

ра́дуйся, от искуше́ний и собла́знов моли́твами твои́ми нас избавля́яй.

Ра́дуйся, честны́й и сла́вный проро́че, Богови́дче Моисе́е.

Кондак 8

Стра́нно и ужа́сно, всесла́вный проро́че, бе ти, соше́дшу с горы́ Сина́йстей, ви́дети бра́та твоего́ Ааро́на и люде́й, вокру́г тельца́ злата́го пе́ния и пля́ски богоме́рзкия соверша́ющих; оба́че ми́лости ра́ди к согреши́вшим соплеме́нником твои́м, умоля́л еси́ Всемогу́щаго Бо́га, И́же возвеща́ ти во́лю Свою́, прости́ти и поми́ловати их. Мы же, сия помина́юще, мо́лим тя: от пристра́стия к земны́м бога́тством ны исцели́ и сокро́вища нетле́нная иска́ти научи́, да пои́м просвеща́ющему нас и тобо́ю благоде́ющему нам Го́споду: Аллилу́иа.

Икос 8

Весь све́том небе́сным серафи́мския любве́ пламене́л еси́ ко Го́споду, пресла́вный проро́че, сего́ ра́ди Творе́ц и Госпо́дь ди́вная и чу́дная зна́мения тобо́ю яви́, наипа́че же ве́лие чу́до, егда́ на горе́ Сина́йстей узре́л еси́ Предве́чнаго Го́спода и а́ки раб ве́рный, поте́кл еси́ во след Влады́ки твоего́. Мы же, ве́лие дерзнове́ние и любо́вь твою́ ко Го́споду, и ве́лию ми́лость Его́ к тебе́ воспева́юще, в смире́нии серде́ц на́ших глаго́лем ти такова́я:

Ра́дуйся, от све́та к Све́ту восходи́вый;

ра́дуйся, благоволе́ние пред лице́м Вседержи́теля стяжа́вый.

Ра́дуйся, неизрече́ннаго Госпо́дняго явле́ния самови́дче;

ра́дуйся, лучеза́рнаго Боже́ственнаго виде́ния созерца́телю.

Ра́дуйся, огнезра́чнаго Трисо́лнечнаго сия́ния прича́стниче;

ра́дуйся, в сме́ртнем телеси́, безсме́ртия заре́ю просвеще́нный.

Ра́дуйся, люби́ти Бо́га и во́лю Его́ твори́ти нас науча́яй;

ра́дуйся, ми́ром и кро́тостию ду́ши на́ши наполня́яй.

Ра́дуйся, честны́й и сла́вный проро́че, Богови́дче Моисе́е.

Кондак 9

Вся́кия похвалы́ досто́йни суть житие́ и труды́ твоя́, богоно́сне Моисе́е, я́ко стра́нствие четыредесятоле́тнее со Изра́илем в пусты́ни Сина́йстей проше́л еси́, терпя́ скорбь ве́лию от неблагода́рных и злонра́вных соплеме́нник твои́х, не престава́я моли́ти Творца́ и Го́спода поми́ловати па́ству твою́ и спасе́ние ве́чное ей дарова́ти. Мы же, на сия́ вся взира́юще, пое́м Го́сподеви: Аллилу́иа.

Икос 9

Вети́и многовеща́ннии не возмо́гут по достоя́нию воспе́ти по́двиги твоя́, возлю́бленный Бо́гом и челове́ки, благослове́нный в па́мяти наро́дов (Сир. 45: 1), святы́й и всехва́льный проро́че Моисе́е, я́же ты подъя́л еси́ сла́вы Бо́жия ра́ди: Боже́ственною И́стиною сы́ны Изра́илевы просвети́л еси́ и изба́вил от рабо́ты еги́петския, Зако́н от Го́спода пре́дал нам еси́, им же и мы ны́не просвеща́еми, благодари́м тя за ве́лия труды́ твоя́ и прино́сим ти похвалы́ сия́:

Ра́дуйся, самови́дче вели́чия Бо́жия, па́че царе́й и сла́вных земли́ от Го́спода на ве́ки препросла́вленный;

ра́дуйся, сокро́вище прему́дрости ча́дом Бо́жиим яви́вый.

Ра́дуйся, тем род христиа́нский умудри́вый;

ра́дуйся, богомы́слию поуча́тися наста́вивый.

Ра́дуйся, я́ко тобо́ю мрак неве́дения пресла́вно прогоня́ется;

ра́дуйся, я́ко тобо́ю И́стина Христо́ва при́сно утвержда́ется.

Ра́дуйся, от восто́ка и за́пада хва́лимый и превозноси́мый;

ра́дуйся, от всех конце́в земли́ велича́емый и прославля́емый.

Ра́дуйся, честны́й и сла́вный проро́че, Богови́дче Моисе́е.

Кондак 10

Спасительного подвига твоего зряще течение, радуемся и веселимся о тебе, пророче святый, яко в старости добрей свято и праведно жизнь земную о Господе скончал еси. Ты бо на Землю Обетованную с горы Нево́ взира́я, пре́дал еси дух твой в ру́це Божии. Сего ра́ди, блаже́нное успе́ние твое сла́вяще, мо́лим тя, да егда́ и мы к сме́ртному ча́су прибли́зимся, умоли́ Го́спода кро́тко ду́шу от те́ла отдели́ти и бесо́вския вла́сти ю́ изба́вити, спасе́ния ве́чнаго нас сподо́бити, да зове́м Го́сподеви: Аллилу́иа.

Икос 10

Стено́ю моли́тв твои́х, святы́й проро́че Бо́жий, огради́ нас от враг, ви́димых и неви́димых, помози́ нам в ско́рбех и нуждах на́ших и изба́ви от лю́тых бед и напа́стей бесо́вских, утверди́ сердца́ на́ша о Бо́зе горе́ти и нелице́мерно бли́жних люби́ти. Воспева́юще твое́ благо́мощное предста́тельство, глаго́лем ти си́це:

Ра́дуйся, ве́рный служи́телю и и́скренний дру́же Госпо́день;

ра́дуйся, пути́ покая́ния и спасе́ния му́дрый провозве́стниче.

Ра́дуйся, кро́тких и благи́х нра́вов благоиску́сный насади́телю;

ра́дуйся, нечести́вых и душетле́нных обы́чаев неукло́нный искорени́телю.

Ра́дуйся, от похоте́й плотски́х и всех страсте́й нас отвраща́яй;

ра́дуйся, дух милосе́рдия в сердца́х на́ших воскреша́яй.

Ра́дуйся, и́мя твое́ призыва́ющим отра́ду ве́лию подава́яй;

ра́дуйся, за вся Творца́ благодари́ти нас наставля́яй.

Ра́дуйся, честны́й и сла́вный проро́че, Богови́дче Моисе́е.

Кондак 11

Пе́ние непреста́нное Творцу́ и Бо́гу па́че ины́х проро́к дре́вних прине́сл еси́, всесла́вный Моисе́е, и ве́лие дерзнове́ние обре́л еси́ пред Престо́лом Всесвяты́я Тро́ицы. Те́мже ны́не мо́лим тя: о, вели́кий уго́дниче Бо́жий! Изведи́ нас от рабо́ты грехо́вныя в свобо́ду чад Бо́жиих, просвети́ се́рдце на́ше и ум наш очи́сти, да сподо́бимся ку́пно с тобо́ю воспева́ти Бо́гу: Аллилу́иа.

Икос 11

Свет нетва́рный и сия́ние Боже́ственное сподо́бился еси́ ви́дети, богоблаже́нне проро́че, егда́ предста́ ку́пно со Илие́ю преобрази́вшемуся на горе́ Фаво́ре Го́споду на́шему Иису́су Христу́, поклони́ся Ему́, а́ки слуга́ благогове́йный, и глаго́ла исхо́д Его́, его́же хотя́ше сконча́ти во Иерусали́ме, о Боже́ственнем Естестве́ Спаси́теля свиде́тельствовал еси́ и ученико́в Го́спода в сем уве́рил еси. Те́мже ны́не про́сим тя, свя́тче Бо́жий, моли́ и душа́м на́шим све́том фаво́рским озари́тися, и приими́ от нас велича́ния сия́:

Ра́дуйся, о искупи́тельных страда́ниих Сы́на Бо́жия провеща́вый;

ра́дуйся, сла́ву Воскре́сшаго Спаси́теля предуказа́вый.

Ра́дуйся, о безсме́ртии и о́бщем воскресе́нии из ме́ртвых пропове́давый;

ра́дуйся, сим и́стину уче́ний проро́ческих о Месси́и свиде́тельствуяй.

Ра́дуйся, во и́стинней любви́ ко Христу́ нас утвержда́яй;

ра́дуйся, от ле́ности и нераде́ния о де́ле Бо́жием нас отвращаяй.

Ра́дуйся, Пра́вды Бо́жией в ми́ре утвержде́ние;

ра́дуйся, И́стины взыску́ющих мы́сленное просвеще́ние.

Ра́дуйся, честны́й и сла́вный проро́че, Богови́дче Моисе́е.

Кондак 12

Благода́ть, да́нную ти от Бога ве́дуще, проро́че святы́й Моисе́е, всечестну́ю па́мять твою́ вси ра́достно пра́зднуем и со умиле́нием серде́чным притека́юще ко свято́му о́бразу твоему́, смире́нно про́сим: сохрани́ предста́тельством твои́м пред Престо́лом Госпо́дним Це́рковь Святу́ю Правосла́вную от вся́каго озлобле́ния, от враг ви́димых и неви́димых, огради́ заступле́нием твои́м страну́ на́шу, да ти́хое и безмо́лвное житие́ провожда́юще, вопие́м Бо́гу: Аллилу́иа.

Икос 12

Пою́ще усты́ недосто́йными пе́ние похва́льное, упова́ем на ми́лость Бо́жию и твое́, проро́че Бо́жий Моисе́е, заступле́ние о нас, гре́шных; и мо́лим тя: не преста́ни моли́тися о всех нас, ку́пно со сро́дники твои́ми: супру́жницею твое́ю Сепфо́рою, бра́том Ааро́ном и сестро́ю Мариа́м, да поми́лует нас Госпо́дь, ва́шего хода́тайства ра́ди. Сего́ ра́ди пе́ние похва́льное тебе́, уго́дниче Бо́жий, прино́сим:

Ра́дуйся, фимиа́м моли́тв о нас ко Святе́й Тро́ице принося́й;

ра́дуйся, милосе́рдие Бо́га Отца́ к нам приклоня́яй.

Ра́дуйся, о спасе́нии на́шем Спаси́теля умоля́яй;

ра́дуйся, плоды́ Ду́ха Свята́го стяжа́ти нам помога́яй.

Ра́дуйся, свя́то и пра́ведно Богоро́дицу почита́ти науча́яй;

ра́дуйся, многоразли́чныя боле́зни пречу́дно исцеля́яй.

Ра́дуйся, в час сме́ртный благонаде́жно нас укрепля́яй;

ра́дуйся, чту́щия па́мять твою от вся́ких зол сохраня́яй.

Ра́дуйся, честны́й и сла́вный проро́че, Богови́дче Моисе́е.

Кондак 13

О преди́вный и пресла́вный проро́че Бо́жий Моисе́е, приими́ ма́лое сие́ моле́ние на́ше, от любве́ тебе́ приноси́мое, и умоли́ Го́спода Иису́са Христа́, «человеколюби́ваго и милосе́рднаго, долготерпели́ваго и многоми́лостиваго», изба́витися нам всех зол и напа́стей, да благоче́стне в ве́це сем поживе́м и блаже́нство ве́чное моли́твами твои́ми обря́щем, с тобо́ю ку́пно благода́рственно воспева́юще Го́сподеви: Аллилу́иа.

[Се́й конда́к глаго́лется три́жды.]

Икос 1

Арха́нгелов и А́нгелов Ца́рь и всея́ тва́ри Зижди́тель, времена́ и ле́та в десни́це Свое́й положи́вый, и судьбы́ племе́н и ца́рств устроя́яй, егда́ восхоте́ изба́вити лю́ди Своя́ от рабо́ты Еги́петския, от ко́реня пра́веднаго произрасти́ тя, Моисе́е богоно́сне, благода́тию Свое́ю просвети́ и посла́ к сыново́м Изра́илевым соверши́ти исхо́д их ве́лий из страны́ Еги́петския в зе́млю Обетова́нную, и проо́браз спасе́ния челове́ков сим яви́ти. Те́мже благодаря́ще Творца́ на́шего, славосло́вим и тя, вели́каго проро́ка Бо́жия, пою́ще ти:

Ра́дуйся, избра́нниче Бо́жий, де́лу спасе́ния ми́ра послужи́вый;

ра́дуйся, гряду́щее воплоще́ние Сы́на Бо́жия пропове́давый.

Ра́дуйся, зако́на богодарова́ннаго провозве́стниче;

ра́дуйся, о сыне́х изра́илевых пред Бо́гом печа́льниче.

Ра́дуйся, Христа́ Спаси́теля житие́м и де́лы твои́ми прообразова́вый;

ра́дуйся, Того́ благода́тию вене́ц побе́дный стяжа́вый.

Ра́дуйся, Творца́ в неизрече́нней сла́ве ны́не созерца́яй;

ра́дуйся, со А́нгелы и святы́ми хвалу́ Ему́ воспева́яй.

Ра́дуйся, честны́й и сла́вный проро́че, Богови́дче Моисе́е.

Кондак 1

Избра́нный Бо́гом на служе́ние проро́ческое, по́двиги твои́ми Творца́ и Го́спода просла́вивый, Про́мысл благи́й о спасе́нии ро́да челове́ческаго явле́й, пла́менною ре́вностию по Бо́зе Вседержи́теле, свя́тостию жития́ и чудесы́ просия́вый, похва́льная воспису́ем ти, проро́че Бо́жий Моисе́е. Ты же, я́ко име́я дерзнове́ние ве́лие у Святы́я Тро́ицы, предста́тельством твои́м небе́сным помога́й нам, да зове́м ти: Ра́дуйся, честны́й и сла́вный проро́че, Богови́дче Моисе́е.