Собор святых Воронежской митрополии

Жития

На епархиальном собрании Воронежской епархии, состоявшемся в Воронеже 28 февраля 2002 года по инициативе митрополита Воронежского Мефодия, было единодушно установлено празднование дня соборной памяти всех святых Воронежской епархии. Днем нового церковного праздника стало 4 (17) сентября, память второго обретения мощей святителя Митрофана Воронежского, произошедшее в 1989 году. Как сказал митрополит Мефодий: "Это событие – начало нового этапа в жизни нашей епархии, оно стало подлинным знамением возрождения церковной жизни". Праздник был установлен по благословению патриарха Московского и всея Руси Алексия II и впервые был отмечен в 2002 году.

Празднование Собора святых Воронежской митрополии в день Собора Воронежских святых внесено в месяцеслов по благословению Святейшего Патриарха Кирилла от 18 сентября 2020 года. Поименный список Собора утвержден Священным Синодом Русской Православной Церкви 16 мая 2023 года (журнал № 31).

Тропарь, глас 6

Под покро́вом Пресвяты́я Богоро́дицы,
низпосланнии на́м духо́внии стра́жи:
вси́ воро́нежстии святи́и,
при́снии на́ши со святы́ми Митрофа́ном, Ти́хоном и Анто́нием засту́пницы:
новому́ченицы и испове́дницы Христо́вы,
преподо́бнии боголю́бцы и блаже́ннии подви́жницы,
в по́двизех за Христа́, чудесе́х и страда́ниих
зе́млю Ру́сскую от ца́рствующих гра́д до Азова осия́вшии,
Христа́ Бо́га моли́те о стране́ на́шей Правосла́вней

и о все́х собо́рно ва́с почита́ющих.

Кондак, глас 4

Во све́те богому́дрых иера́рхов,
столпо́в ве́ры Митрофа́на, Ти́хона и Анто́ния,
дне́сь красу́ется пресла́вный гра́д Воро́неж,
я́ко освяще́нный собо́р святы́х предстои́т Влады́це Вседержи́телю:
те́мже Си́лы Небе́сныя ликовству́ют и Святу́ю Тро́ицу воспева́ют;
с ни́миже вси́ благода́рственно вопие́м Бо́гу
о е́же дарова́ти на́м оставле́ние грехо́в

и ве́лию ми́лость.

Молитва

Всесла́внии богопропове́дницы и уго́дницы Христо́ви, святи́телие и испове́дницы, преподо́бнии и му́ченицы, и́же в земли́ воро́нежстей просия́вшии, и Це́рковь Христо́ву просла́вльшии, десни́цею Всевы́шняго насажде́нии, и в преди́вных селе́ниих Отца́ Небе́снаго ны́не почива́ющии: пред ико́ною всечестно́ю ва́шею моля́щеся, собо́рную па́мять все́х святы́х кра́я воро́нежскаго и земе́ль ему́ богопричтенных пра́зднующе, со умиле́нием припа́даем пред лико́м ва́шим всесиятельным, и мо́лим вы́: ми́лостию, ю́же стяжа́ли есте́ пред Го́сподем, испроси́те на́м у престо́ла Живонача́льныя Тро́ицы оставле́ния грехо́в и бога́тыя ми́лости. Да просветя́тся вси́ лю́дие, ве́рно почита́ющии всесвяту́ю па́мять ва́шу, све́том доброде́тельнаго и всесмиреннаго жития́, и сия́нием по́двигов и чуде́с ва́ших: да низпо́слет Госпо́дь на́м ми́р и благоде́нствие лю́дем земли́ сея́ и всему́ Оте́честву на́шему Христиа́нскому, да утвержда́ется и процвета́ет в не́м правосла́вие. На заступле́ние Ва́ше упова́юще мы́ святооте́ческаго покро́ва про́сим, я́ко, малове́рных на́с су́щих, ве́рою сквозе́ мра́к ве́ка неве́рия осияваете, и я́ко страстьми́ на́с обурева́емых безстра́стию Христо́ву науча́ете. Те́мже навыко́хом к ва́м прибега́ти, ско́рым целителем и окормителем, и небе́сным стра́жем, засту́пником и защи́тником в мо́ри жите́йстем пребыва́ющым: в ва́с бо, вси́ свя́тии на́ши благоде́телие, богоразу́мию сподобля́емся и в за́поведех Христо́вых соблюда́емся. О вели́ции уго́дницы и святи́телие Бо́жии: сто́лпе ве́ры и богоспасаемаго гра́да Воро́нежа Митрофа́не, чудотво́рче Задо́нский и златословесниче Ти́хоне, тре́тие свети́ло благода́ти земли́ на́шея, святи́телю Анто́ние, духо́вный собрате преди́вному саро́вскому ста́рцу Серафи́му! Возмолитеся со все́ми святы́ми собо́ра уго́дников Христо́вых ко Го́споду на́шему Всеми́лостивому, да да́рует все́м ве́рным ча́дом Его́ ду́х братолю́бия и кро́тости, миролю́бия и смире́ния, во е́же не преткну́тися на́м гре́шным о собла́зны диа́воли, ниже́ преступи́ти слове́с Ева́нгельских, и те́мже да сподо́бит на́с покая́ния всесмиреннаго, ни да отсту́пит от на́с недосто́йных ми́лостию Свое́ю, во е́же и на́м воста́ти во вре́мя подо́бно одесну́ю престо́ла Вседержи́телева, иде́же и вы́, всеблазии засту́пницы на́ши, предстоите́, и вку́пе со а́нгельскими си́лами воспева́ете Животворя́щую Тро́ицу, в Не́йже Отца́, и Сы́на, и Свята́го Ду́ха ны́не, и при́сно, и во ве́ки веко́в: Ами́нь.

Канон святителю Тихону, епископу Воронежскому, Задонскому чудотворцу

Минея, 13 Августа.

Глас 8

Песнь 1

Ирмос: Во́ду проше́д, я́ко су́шу,
и еги́петскаго зла избежа́в,
изра́ильтянин вопия́ше:
Изба́вителю и Бо́гу на́шему пои́м.

Припев: Святи́телю о́тче Ти́хоне, моли́ Бо́га о на́с.

Святи́телю Христо́в Ти́хоне!
Сам да́руй ми ум и язы́к,
да воспою́ по достоя́нию сла́ву,
е́юже сла́вно просла́ви тя Христо́с Госпо́дь.

Припев: Святи́телю о́тче Ти́хоне, моли́ Бо́га о на́с.

Луча́ боже́ственнаго све́та возсия́ нам,
прииди́те, ча́да све́та, да озари́мся е́ю,
да возгори́мся ду́хом, пе́сньми святи́теля велича́юще.

Сла́ва Отцу́ и Сы́ну и Свято́му Ду́ху.

Апо́столов прее́мника, святи́телей сопресто́льника, преподо́бных сожи́теля,
просла́вим блаже́ннаго Ти́хона,
его́же предста́тельством спасе́ние улуча́ем.

И ны́не и при́сно и во ве́ки веко́в. Ами́нь.

Богородичен: Воплоти́вся неизрече́нно Влады́ка всех из Тебе́, Богороди́тельнице Мари́е,
соверше́н бы́сть Челове́к
и, роди́вся, я́коже пре́жде рождества́, сохрани́ Тя чи́сту,
Его́же моли́ спасти́ от бед ду́ши на́ша.

Песнь 3

Ирмос: Небе́снаго кру́га Верхотво́рче, Го́споди,
и Це́ркве Зижди́телю,
Ты мене́ утверди́ в любви́ Твое́й,
жела́ний кра́ю, ве́рных утвержде́ние,
Еди́не Человеколю́бче.

Припев: Святи́телю о́тче Ти́хоне, моли́ Бо́га о на́с.

Любо́вию Христо́вою уязви́вся, блаже́нне,
Тому́ от ю́ности невозвра́тным жела́нием после́довал еси́,
вся́кое плотско́е наслажде́ние возненави́дев.

Припев: Святи́телю о́тче Ти́хоне, моли́ Бо́га о на́с.

Ю́ношеския стра́сти, плоть томя́щия, любому́дрия мече́м посе́кл еси́,
же́ртву себе́ Влады́це Христу́ принося́.

Сла́ва Отцу́ и Сы́ну и Свято́му Ду́ху.

Стра́хом Госпо́дним утвержда́емь, нача́ло бо прему́дрости сей есть,
любо́вию лу́чшею прилепи́лся еси́ прему́дрости, о Ти́хоне.

И ны́не и при́сно и во ве́ки веко́в. Ами́нь.

Богородичен: Воспои́м боже́ственный храм Бо́жий,
ублажи́м Святу́ю Де́ву, обоже́ни бы́вше Е́ю и от бед избавля́еми.

Седален, глас 8

Храм Свята́го Ду́ха от ю́ности был еси́:
Уте́шителева бо благода́ть, по ве́ре твое́й очи́стивши ду́шу твою́ от страсте́й,
я́ве в ней вселя́ется,
сего́ ра́ди и по преставле́нии соблюде́ся те́ло твое́ нетле́нно.
Моли́ Христа́ Бо́га от тлетво́рных страсте́й изба́витися
чту́щим любо́вию па́мять твою́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ма́ти сла́дкаго ми Иису́са, Чи́стая Богоотрокови́це, прия́телище Ду́ха Свята́го,
очи́сти мою́ ду́шу, беззако́нии оскверне́нную,
и све́тлое жили́ще доброде́телей соде́лай,
Светоно́сная Нетле́нная, отжени́ о́блак страсте́й,
да и мене́ Твои́ми моли́твами осени́т Уте́шителева благода́ть.

Песнь 4

Ирмос: Ты моя́ кре́пость, Го́споди,
Ты моя́ и си́ла,
Ты мой Бог, Ты мое́ ра́дование,
не оста́вль не́дра О́тча
и на́шу нищету́ посети́в.
Тем с проро́ком Авваку́мом зову́ Ти:
си́ле Твое́й сла́ва, Человеколю́бче.

Припев: Святи́телю о́тче Ти́хоне, моли́ Бо́га о на́с.

Я́ко овча́, от Христа́ упа́слся еси́,
я́коже па́стырь, упа́сл еси́ ста́до,
изводя́ на па́жити живоно́сных твои́х уче́ний.

Припев: Святи́телю о́тче Ти́хоне, моли́ Бо́га о на́с.

Таи́нник быв Христо́ва уче́ния,
Сего́ ве́дением просвети́л еси́ лю́ди,
де́лы и словесы́ явля́я и́стину Его́.

Сла́ва Отцу́ и Сы́ну и Свято́му Ду́ху.

И́стинен и ве́рен страж до́му Бо́жия был еси́,
стреги́й его́ де́лом, я́ко о́браз явля́я житие́м,
сло́вом, я́ко уча́ усе́рдно,
помышле́нием, я́ко пеки́йся о бла́зе Его́.

И ны́не и при́сно и во ве́ки веко́в. Ами́нь.

Богородичен: Тя приста́нище, и сте́ну, и прибе́жище, и наде́жду, и покро́в,
и Предста́тельницу те́плую обре́тше, ве́рнии,
к Тебе́ прибега́ем и вопие́м приле́жно,
я́коже научи́ нас взыва́ти к Тебе́ блаже́нный Ти́хон:
Пресвята́я Богоро́дице, спаси́ нас.

Песнь 5

Ирмос: Вску́ю мя отри́нул еси́
от лица́ Твоего́, Све́те Незаходи́мый,
и покры́ла мя есть чужда́я тьма́, окая́ннаго?
Но обрати́ мя и к све́ту за́поведей Твои́х
пути́ моя́ напра́ви, молю́ся.

Припев: Святи́телю о́тче Ти́хоне, моли́ Бо́га о на́с.

Его́же возлюби́л еси́, Его́же возжеле́л еси́,
Его́же ра́ди подвиза́лся еси́, святи́телю,
моли́ ны́не Христа́ о рабе́х,
да, ми́лостив быв, всем нам ми́рное состоя́ние да́рует,
почита́ющим па́мять твою́.

Припев: Святи́телю о́тче Ти́хоне, моли́ Бо́га о на́с.

Любо́вию и ве́рою Христо́вою испо́лнен сый,
яви́лся еси́ я́ко река́, оби́льно всю зе́млю Росси́йскую напоя́я
сло́вом уче́ния, блаже́нне Ти́хоне.

Сла́ва Отцу́ и Сы́ну и Свято́му Ду́ху.

Я́ко пчела́ сла́дкий мед от цвето́в, ско́ро увяда́ющих,
собра́л еси́, о́тче, от тле́ннаго ми́ра духо́вное сокро́вище,
и́мже всех нас услажда́еши.

И ны́не и при́сно и во ве́ки веко́в. Ами́нь.

Богородичен: Испо́лни весе́лия се́рдце на́ше, Пречи́стая Богоотрокови́це,
весе́лия ро́ждшая Вино́внаго,
грехо́вную печа́ль вся́кую потребля́ющи.

Песнь 6

Ирмос: Очи́сти мя, Спа́се,
мно́га бо беззако́ния моя́,
и из глубины́ зол возведи́, молю́ся,
к Тебе́ бо возопи́х, и услы́ши мя,
Бо́же спасе́ния моего́.

Припев: Святи́телю о́тче Ти́хоне, моли́ Бо́га о на́с.

Чист быв се́рдцем,
чи́стому Христу́ прилепи́лся еси́, святы́й Свято́му,
люби́тель Люби́тельному, кро́ткий Кро́ткому, взыва́я непреста́нно:
мне прилепля́тися Бо́гови бла́го есть.

Припев: Святи́телю о́тче Ти́хоне, моли́ Бо́га о на́с.

Уте́ху, ро́скошь, че́сть, бога́тство, сла́ву
и все сокро́вище ми́ра презре́л еси́,
воспаря́я к Го́рнему Иерусали́му, к до́му Отца́ Небе́снаго,
иде́же оби́тели мно́ги су́ть.

Сла́ва Отцу́ и Сы́ну и Свято́му Ду́ху.

Доса́ды, ско́рби, оби́ды ра́достно терпе́л еси́, помышля́я,
я́ко вене́ц без побе́ды, побе́да без по́двига,
по́двиг без бра́ни, бра́нь без враго́в не быва́ет.

И ны́не и при́сно и во ве́ки веко́в. Ами́нь.

Богородичен: О Де́во Госпоже́, Ма́ти Зижди́телева!
Небе́сных еси́ чино́в ра́дование
и челове́ческому ро́ду благослове́нная Помо́щнице,
моли́ спасти́ся душа́м на́шим.

Кондак, глас 8

Апо́столов прее́мниче,
святи́телей украше́ние,
Правосла́вныя Це́ркве учи́телю,
Влады́це всех моли́ся
мир вселе́нней дарова́ти
и душа́м на́шим ве́лию ми́лость.

Икос

Ду́шу твою́ украси́в доброде́телию,
ум просвети́в любому́дрием,
па́стырь до́брый яви́лся еси́ ста́ду Христо́ву,
сло́вом и писа́нием уча́, наказу́я и вразумля́я,
житие́м свои́м о́браз слове́с явля́я,
те́мже на Небеси́ венце́м сла́вы украси́лся еси́ от Пастыренача́льника Христа́,
на земли́ сия́я нетле́нием моще́й
и источа́я оби́льныя то́ки чуде́с ве́рою призыва́ющим тя,
досточу́дне и Богому́дре Ти́хоне.
Моли́ся ко Го́споду дарова́ти душа́м на́шим ве́лию ми́лость.

Песнь 7

Ирмос: Бо́жия снизхожде́ния
о́гнь устыде́ся в Вавило́не иногда́,
сего́ ра́ди о́троцы в пещи́, ра́дованною ного́ю,
я́ко во цве́тнице, лику́юще, поя́ху:
благослове́н еси́, Бо́же оте́ц на́ших.

Припев: Святи́телю о́тче Ти́хоне, моли́ Бо́га о на́с.

Терпе́нием стяжа́л еси́ ду́шу твою́, блаже́нне,
путе́м те́сным, еди́ным веду́щим в жи́знь ве́чную, шел еси́,
вы́ну взира́я на кре́стный пу́ть Подвигополо́жника Христа́
и Сего́ о́браз житию́ твоему́ полага́я.

Припев: Святи́телю о́тче Ти́хоне, моли́ Бо́га о на́с.

Всего́ себе́ любви́ Бо́жией пре́дал еси́,
ду́шу и те́ло, се́рдце и ра́зум,
па́мять и во́лю, наме́рение, начина́ние,
сло́во, де́ло и помышле́ние Бо́гу в любо́вь посвяти́л еси́.

Сла́ва Отцу́ и Сы́ну и Свято́му Ду́ху.

Оте́ц сиро́т, и вдов защи́тник, и бога́тство ни́щих,
боля́щих утеше́ние, и су́щих в бога́тстве наста́вник,
ста́рости жезл, и наказа́ние ю́ности,
и мона́шествующим доброде́телей пра́вило яви́лся еси́, блаже́нне Ти́хоне.

И ны́не и при́сно и во ве́ки веко́в. Ами́нь.

Богородичен: Ра́дуйся, Мари́е, ра́дуйся, Спаси́теля ми́ру ро́ждшая,
приста́нище бу́ди нам, жите́йскою бу́рею волну́емым,
и оти́шие в пучи́не скорбе́й,
и води́тельство к Небе́сным селе́нием.

Песнь 8

Ирмос: Седмери́цею пе́щь
халде́йский мучи́тель
богочести́вым неи́стовно разжже́,
си́лою же лу́чшею спасе́ны, сия́ ви́дев,
Творцу́ и Изба́вителю вопия́ше:
о́троцы, благослови́те,
свяще́нницы, воспо́йте,
лю́дие, превозноси́те во вся ве́ки.

Припев: Святи́телю о́тче Ти́хоне, моли́ Бо́га о на́с.

Ца́рствия Небе́снаго еще́ на земли́ сын быв,
вы́ну воздыха́л еси́ к Сы́ну Бо́жию, вопия́ Ему́:
бу́ди ми пи́ща и питие́, бу́ди свет души́ моея́,
бу́ди отра́да в ско́рби, бу́ди жи́знь ве́чная по воскресе́нии,
да превозношу́ Тя во ве́ки.

Припев: Святи́телю о́тче Ти́хоне, моли́ Бо́га о на́с.

Ада́ма паде́ние, Христо́выми страстьми́ искупле́ние,
час сме́ртный, Стра́шный Суд, муче́ния гре́шных,
блаже́нство пра́ведных всегда́ помышля́я, рыда́л еси́,
нам умиле́ния о́браз показу́я,
себе́ же предочища́я к бу́дущей сла́ве.

Сла́ва Отцу́ и Сы́ну и Свято́му Ду́ху.

Труды́ по ве́ре и благоче́стию подъе́м в жи́зни сей,
сла́дце по труде́х почи́л и упоко́ился еси́:
соше́л бо еси́ во гроб,
я́ко пшени́ца, для жи́тницы Бо́жия созре́лая, во вре́мя пожа́тая.

И ны́не и при́сно и во ве́ки веко́в. Ами́нь.

Богородичен: Иссо́пом Животворя́щия Кро́ве за спасе́ние ми́ра закла́ннаго А́гнца,
из Твои́х пречи́стых крове́й плоть прие́мшаго,
окропи́ мя, оскверне́ннаго, Влады́чице, и очи́сти мя,
да Твои́м ма́терним заступле́нием па́че сне́га убелю́ся.

Песнь 9

Ирмос: Ужасе́ся о сем Не́бо,
и земли́ удиви́шася концы́,
я́ко Бог яви́ся челове́ком пло́тски
и чре́во Твое́ бы́сть простра́ннейшее Небе́с.
Тем Тя, Богоро́дицу,
А́нгелов и челове́к чинонача́лия велича́ют.

Припев: Святи́телю о́тче Ти́хоне, моли́ Бо́га о на́с.

Хода́тай яви́лся еси́ и моли́твенник те́плый о нас к Бо́гу, святи́телю,
ми́лостива у́бо моли́твами твои́ми соде́лай Влады́ку,
испроси́, о́тче, прегреше́ний оставле́ние ве́рою свяще́нную па́мять твою́ пра́зднующим
и серде́чною любо́вию тя велича́ющим.

Припев: Святи́телю о́тче Ти́хоне, моли́ Бо́га о на́с.

От Бо́га Све́та Небе́сным све́том осия́нный,
просвети́ нас, помраче́нных страстьми́ жите́йскими,
реши́ти же и вяза́ти вла́сть от Него́ прие́мый,
разреши́ прегреше́ния на́ша и Ца́рствия Небе́снаго сподо́би
па́мять твою́ пра́зднующих и досто́йно тя велича́ющих.

Сла́ва Отцу́ и Сы́ну и Свято́му Ду́ху.

На́ше хвале́ние сие́, от недосто́йныя и окая́нныя души́,
от усе́рдия же бога́таго приноси́мое тебе́, приими́ ми́лостивно, святи́телю,
благода́ть проти́ву воздая́ нам щедрооби́льную.

И ны́не и при́сно и во ве́ки веко́в. Ами́нь.

Богородичен: Ада́ма па́дшаго возста́вила еси́, Богома́ти, ро́ждши Но́ваго Ада́ма,
возста́ви и нас, па́дших по подо́бию дре́вняго,
но благода́ти Но́ваго зри́ши ве́рующих.

Светилен

Пло́тию а́ще и почи́л еси́, святи́телю Ти́хоне,
но ду́хом жив сый, в Ца́рствии Невече́рнем со Христо́м ца́рствуеши
и мо́лишися Ему́ о призыва́ющих тя ве́рою и любо́вию.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

В черто́зе Жениха́ Христа́ помышля́я тя, святи́телю, неизрече́нным све́том сия́юща,
Ца́рствия Небе́снаго приобщи́тися жела́ю,
но от сна грехо́внаго объюроде́ мой ум, угасе́ свети́льник, я́ко безъеле́ен,
и души́ моея́ оскверне́на есть оде́жда,
и ви́жду две́ри Ца́рствия мне заключе́нныя,
но, твои́ми моли́твами возбуди́в мя от сна грехо́внаго,
еле́й покая́ния ми да́руй и, ри́зою заслу́г Христо́вых прикры́в мою́ наготу́,
досто́йна мя сотвори́ Невече́рняго Ца́рствия.

Акафист святителю Антонию (Смирницкому)

Конда́к 1

Избра́ннаго ста́да ове́ц Христо́вых па́стырю великосла́вный, святи́телей Митрофа́на и Ти́хона сопресто́льниче, пе́ние похва́льное в па́мять твою́ святу́ю днесь прино́сим; ты же, святи́телю о́тче Анто́ние, предстоя́ Престо́лу Бо́жию, помина́й нас, тебе́ почита́ющих и си́це вопию́щих: Ра́дуйся, святи́телю Анто́ние, благода́тный помо́щниче и пресла́вный чудотво́рче.

И́кос 1

А́нгельскою чистото́ю души́ просия́л еси́ в земне́м житии́ твое́м, о́тче Анто́ние; ничто́же на земли́ от ю́ности возлюби́в, к Го́рнему Оте́честву стопы́ твоя́ напра́вил еси́, путе́м у́зким и многоско́рбным ше́ствуя. Ны́не же на Небесе́х досто́йно утеша́ешися, ве́чною сла́вою облистава́емь; но и нас, земны́х, не оставля́еши, по́мощь ско́рую явля́я благода́рне тебе́ вопию́щим:

Ра́дуйся, я́ко в тебе́ яви́ся Отца́ Небе́снаго благоволе́ние;

ра́дуйся, лозы́ Иису́совы сла́вное в ми́ре сем прозябе́ние.

Ра́дуйся, благода́ти Ду́ха Свята́го прича́стниче;

ра́дуйся, до́брых па́стырей Це́ркве Христо́вы прее́мниче.

Ра́дуйся, ве́ры правосла́вныя свети́льниче присносия́яй.

ра́дуйся, кро́тости и смире́ния о́браз нам явля́яй.

Ра́дуйся, мона́шествующих сла́во и похвало́;

ра́дуйся, оби́тели Ки́ево-Пече́рския при́сное ра́дование.

Ра́дуйся, со́нма архиере́йскаго све́тлое украше́ние;

ра́дуйся, неве́рием неду́гующих к Правосла́вней ве́ре возвраще́ние.

Ра́дуйся, я́ко трудо́в святи́телей Воро́нежских продолжа́тель изря́днейший яви́лся еси́;

ра́дуйся, я́ко, Христу́ усе́рдно послужи́в, во оби́тели Небе́сныя со сла́вою пресели́лся еси́.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 2

Ви́дяще благочести́вое житие́ роди́телей твои́х, о́тче Анто́ние, со усе́рдием поревнова́л еси́ подража́ти и́ма в любви́ ко хра́му Бо́жию, иде́же ку́пно с ни́ма от се́рдца чи́стаго возноша́ше хвалу́ Творцу́ всех, поя́ Ему́: Аллилу́иа.

И́кос 2

Ра́зум име́я свы́ше просвеще́н, архипа́стырь Ки́евский Самуи́л бра́чный сою́з не благослови́ тебе́, и́ноческий путь жития́ указу́я; ты же, блаже́нне о́тче, узре́в себе́ ко прия́тию а́нгельскаго о́браза упра́влена, зело́ ду́хом возра́довался еси́. Мы же, я́ко ревни́теля воздержа́ния тя похваля́юще, вопие́м:

Ра́дуйся, двема́ господи́нома, Бо́гу и ми́ру, рабо́тати не восхоте́вый;

ра́дуйся, Еди́ному Го́споду на всяк день и час ре́вностне послужи́ти изво́ливый.

Ра́дуйся, целому́дрие всем се́рдцем от ю́ности возлюби́вый;

ра́дуйся, измла́да чистоте́ Ева́нгельской себе́ обручи́вый.

Ра́дуйся, и́ноческаго жития́ пла́менне возжеле́вый;

ра́дуйся, у́мную моли́тву Иису́сову никогда́же оста́вивый.

Ра́дуйся, богомы́слием я́ко пи́щею нетле́нною напита́нный;

ра́дуйся, слу́жбою церко́вною а́ки некта́ром безсме́ртия напое́нный.

Ра́дуйся, и́ноков новонача́льных до́брый наказа́телю;

ра́дуйся, ста́рцев подвиза́ющихся прему́дрый учи́телю.

Ра́дуйся, виде́нием преподо́бнаго Анто́ния Пече́рскаго обра́дованный;

ра́дуйся, благода́тными словесы́ его́ зело́ ободре́нный и уте́шенный.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 3

Си́ла ве́лия любве́ ко и́ноческому житию́ яви́ся в тебе́, о́тче, я́ко не́кий огнь Боже́ственный в душе́ твое́й распаля́емь. Сего́ ра́ди, оста́вив мир и вся я́же в нем, прите́кл еси́ в Ла́вру Ки́ево-Пече́рскую, иде́же до́бре подвиза́вся, на нача́льственный степе́нь возведе́н был еси́, благода́рне на вся́кое вре́мя Иису́су Сладча́йшему воспева́я: Аллилу́иа.

И́кос 3

Иму́ще ве́лию ре́вность о благоустрое́нии оби́тели Пече́рския, тебе́ вве́ренныя, труды́ многообра́зныя подъя́л еси́, о́тче святы́й Анто́ние. Цари́ца же Небесе́ и земли́, зря́щи мно́гую ре́вность твою́ о де́ле Бо́жием, восхоте́ тя на высоту́ архиере́йскаго са́на поста́вити и тебе́ о сем в чу́днем виде́нии возвести́ла есть. Мы же, о сем промышле́нии дивя́щеся, прино́сим ти похвалы́ сицевы́я:

Ра́дуйся, в Ла́вре Ки́евской благоче́стием и пра́ведностию просия́вый;

ра́дуйся, по́двиги и труды́ мно́гими преподо́бным отце́м подража́вый.

Ра́дуйся, я́ко нра́вом благи́м и ти́хим Христу́ уподо́бился еси́;

ра́дуйся, я́ко плоть свою́ со страстьми́ и похотьми́ распя́л еси́.

Ра́дуйся, к Цари́це Небе́сней моли́твенниче усе́рдный;

ра́дуйся, оби́тели Ея́ служи́телю неуста́нный.

Ра́дуйся, вели́чия Пресвяты́я Богоро́дицы воспева́телю изря́дный;

ра́дуйся, чуде́снаго виде́ния Пречи́стыя созерца́телю благогове́йный.

Ра́дуйся, предрече́ние ди́вное от Нея́ слы́шати сподо́бивыйся.

ра́дуйся, обетова́ния са́на архиере́йскаго удосто́ивыйся.

Ра́дуйся, я́ко Ма́терию Бо́жиею па́ства воро́нежская вручена́ ти бысть;

ра́дуйся, я́ко повеле́ние Ея́ обнови́ти обветша́вшее до́бре испо́лнил еси́.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 4

Бу́ря го́рдости и самомне́ния николи́же поколеба́ хра́мину души́ твоея́, о́тче Анто́ние; украси́лся бо еси́ смире́нием, и́мже многообра́зных ко́зней лука́ваго избе́гл еси́, со благодаре́нием непреста́нно поя́ Спаси́телю твоему́: Аллилу́иа.

И́кос 4

Слы́ша весть о избра́нии твое́м во епи́скопа гра́да Воро́нежа, умо́м не превозне́слся еси́, уго́дниче Христо́в, но о́браз смиренному́дрия, воздержа́ния и ины́х доброде́телей ве́рным показа́л еси́. Сего́ ра́ди ублажа́ем тя, зову́ще:

Ра́дуйся, сви́тче богопи́санный, насыща́яй а́лчущих глаго́лов жи́зни ве́чныя;

ра́дуйся, исто́чниче богода́нный, напая́яй жа́ждущих пра́вды.

Ра́дуйся, изоби́лием и дарми́ си́льных ми́ра сего́ не прельще́нный;

ра́дуйся, убо́гости си́рых и нужда́ющихся не возгнуша́выйся.

Ра́дуйся, кро́тостию и незло́бием украси́выйся;

ра́дуйся, в преподо́бие и пра́вду облеки́йся.

Ра́дуйся, безстра́стия ти́хое сия́ние;

ра́дуйся, честны́й ве́нче воздержа́ния.

Ра́дуйся, се́рдце свое́ в моли́тве утверди́вый;

ра́дуйся, богомы́слием непреста́нным ум свой в Го́рняя возвы́сивый.

Ра́дуйся, я́ко благи́ми де́лы и словесы́ тьму нече́стия отгна́л еси́;

ра́дуйся, я́ко свеща́ неугаси́мая пред Го́сподем в земли́ Воро́нежской просия́л еси́.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 5

Боготе́чныя зве́зды явле́нию подо́бно бысть святи́тельство твое́ на ка́федре Воро́нежской, о́тче Анто́ние: лю́дие бо, словесе́м пропове́дания твоего́ вне́млюще и святы́я дела́ твоя́ ви́дяще, позна́ша тебе́ и́стиннаго па́стыря ове́ц Христо́вых ми́лостива и кро́тка, и благода́рне воспе́ша Бо́гу: Аллилу́иа.

И́кос 5

Ви́дяще духо́вная ча́да твоя́, блаже́нне Анто́ние, тя сия́нием до́брых дел и ре́вностию о спасе́нии бли́жних испо́лнена, с весе́лием и ра́достию принесо́ша ти похвалы́ сицевы́я:

Ра́дуйся, о́тче чадолюби́вый, от бед и зол нас огражда́яй;

ра́дуйся, пре́жде проше́ния вся блага́я безме́здно подая́й;

Ра́дуйся, трапе́зо изоби́льная, гла́дных и ни́щих пита́ющая;

ра́дуйся, десни́це щедрода́тельная, нужда́ющимся вы́ну благоде́ющая.

Ра́дуйся, странноприи́мству пра́отца Авраа́ма подража́вый;

ра́дуйся, в ско́рбех и печа́лех су́щим утеше́ние подава́вый.

Ра́дуйся, в беда́х и напа́стех обрета́ющимся ско́рый помо́щниче;

ра́дуйся, в недоуме́ниих пребыва́ющим прему́дрый наста́вниче.

Ра́дуйся, богоуго́дному житию́ нас науча́яй;

ра́дуйся, оте́ческою любо́вию всех приходя́щих к тебе́ объе́мляй.

Ра́дуйся, медото́чная уста́, го́ресть жития́ на́шего услажда́ющая;

ра́дуйся, живи́тельная росо́, в сердца́х изсо́хших ве́ру оживля́ющая.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 6

Пропове́дник свя́тости уго́дника Бо́жия Митрофа́на яви́лся еси́, преблаже́нне о́тче; любо́вь ве́лию к сему́ святи́телю Христо́ву име́я, потща́ся ко прославле́нию его́ на земли́ зело́ потруди́тися. Ве́рнии же лю́дие, узре́вше на све́щнице церко́внем сей ве́лий свети́льник поста́влен, восхвали́ша о нем Бо́га пе́снию: Аллилу́иа.

И́кос 6

Возсия́ благода́ть ве́лия во гра́де Воро́неже от моще́й святи́теля Митрофа́на, и́хже обре́тения ра́ди труды́ мно́гия со усе́рдием подъя́л еси́, Анто́ние боголюби́ве, житие́м свои́м тому́ подража́я и слуго́ю его́ себе́ имену́я. Те́мже благода́рственно воспева́ем ти:

Ра́дуйся, святи́теля Митрофа́на почита́телю изря́дный;

ра́дуйся, моли́твенниче к нему́ усе́рдный.

Ра́дуйся, я́ко прославле́ния ра́ди первопресто́льника Воро́нежскаго потруди́лся еси́;

ра́дуйся, я́ко обре́тением моще́й его́ наро́ду Бо́жию ра́дость ве́лию яви́л еси́.

Ра́дуйся, оби́тели Митрофа́новы основа́телю;

ра́дуйся, и́ноческаго жития́ в ней устро́ителю.

Ра́дуйся, о написа́нии жития́ новопросла́вленнаго святи́теля поревнова́вый;

ра́дуйся, и́нока Аники́ту благовести́ти о прославле́нии Воро́нежскаго архипа́стыря благослови́вый.

Ра́дуйся, я́ко той во Святе́й Горе́ Афо́нской ра́дость сию́ возвести́л есть;

ра́дуйся, я́ко тща́нием твои́м Митрофано́вский храм во ски́ту Илии́нском созда́н бысть.

Ра́дуйся, ку́пно с чудотво́рцем Воро́нежским нам ско́ро помога́ющий;

ра́дуйся, в Го́рних селе́ниих с ним ны́не ликовству́ющий.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 7

Хотя́, святи́телю Анто́ние, почита́ние не то́кмо вели́каго уго́дника Бо́жия Митрофа́на, но и святи́теля Ти́хона в земли́ Воро́нежской и по всей вселе́нней утверди́ти, духо́вное насле́дие его́ со усе́рдием пропове́дал еси́. Мы же благодаре́ния о сицево́м по́двизе твое́м испо́лнени, Го́сподеви пое́м: Аллилу́ия.

И́кос 7

Но́вый благоче́стия о́браз яви́л еси́ па́стве твое́й, о́тче Анто́ние; непреста́нную моли́тву в се́рдцы свое́м стяжа́в, посто́м, бде́нием и целому́дрием ду́шу предочи́стив, ра́зум богопросвеще́н обре́л еси́ и сугу́быя да́ры благода́ти Бо́жия прия́ти сподо́бился еси́. Сего́ ра́ди Саро́вский подви́жник и чудотво́рец Серафи́м ста́ршим бра́том нарече́ тя, с ни́мже и мы любо́вию почита́ем тя зва́нии си́ми:

Ра́дуйся, преди́внаго вертогра́да духо́внаго насади́телю;

ра́дуйся, и́ноков прему́дрый и боголюбе́знейший учи́телю.

Ра́дуйся, преподо́бным Серафи́мом сугу́бо почита́емый;

ра́дуйся, Саро́вским ста́рцем вели́ким архиере́ем Бо́жиим имену́емый.

Ра́дуйся, о прославле́нии святи́теля Ти́хона поревнова́вый;

ра́дуйся, о́браз почита́ния свети́льников благоче́стия нам яви́вый.

Ра́дуйся, сказа́ние о житии́ и чудесе́х Задо́нскаго подви́жника соста́вивый;

ра́дуйся, чрез откры́тие честны́х моще́й его́ в лю́дех ве́ру утверди́вый.

Ра́дуйся, уго́дников Бо́жиих почита́телю любочести́вый;

ра́дуйся, Креста́ Христо́ва пропове́дниче велегла́сный.

Ра́дуйся, па́мять сме́ртную в се́рдцы свое́м непреста́нно име́вый;

ра́дуйся, разреши́тися и со Христо́м бы́ти всеи́скренне возжеле́вый.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 8

Стра́нен быв на земли́, к Го́рнему Оте́честву ше́ствовал еси́, Христо́в уго́дниче Анто́ние, святи́телем Воро́нежским Митрофа́ну и Ти́хону подража́я, Го́спода всем се́рдцем и все́ю душе́ю возлюби́л еси́, о́вцы Его́ слове́снаго ста́да до́бре упа́сл еси́, вопия́ Царю́ Сла́вы песнь: Аллилу́иа.

И́кос 8

Весь испо́лнь любве́ и благогове́ния к святи́телю Ти́хону, предше́ственнику твоему́, ве́лия благода́ти исто́чник, мо́щи его́ честны́я, в Задо́нской оби́тели откры́л еси́, к ни́мже припа́дая и с ве́рою лобыза́я, зело́ возра́довался еси́; те́мже бра́тия оби́тели, тя благодаря́ще, воспе́ша такова́я:

Ра́дуйся, Задо́нскаго чудотво́рца Ти́хона почита́телю;

ра́дуйся, душеспаси́тельных его́ наставле́ний после́дователю.

Ра́дуйся, я́ко в кро́тости и смире́нии святи́телю сему́ подража́тель усе́рдный яви́лся еси́;

ра́дуйся, я́ко того́ моли́твами в жи́зни богоуго́дней незы́блемо утверди́лся еси́.

Ра́дуйся, Правосла́вия в земли́ на́шей сто́лпе и утвержде́ние;

ра́дуйся, оби́тели Задо́нския кре́пкое от бед огражде́ние.

Ра́дуйся, главо́ богому́драя и богопросвеще́нная;

ра́дуйся, уста́ сладкогла́сная, воро́нежских чудотво́рцев прославля́ющая;

Ра́дуйся, коле́блющихся в ве́ре утверди́вый;

ра́дуйся, согреша́ющих на путь пра́вый наста́вивый.

Ра́дуйся, за́поведей Госпо́дних ве́рный храни́телю;

ра́дуйся, благоче́стия ре́вностный защи́тниче и блюсти́телю.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 9

Вся́кому челове́ку удо́бнейший путь спасе́ния указу́я, всем был еси́ вся, святи́телю Анто́ние: оте́ц, учи́тель и наста́вник до́брый лю́дем яви́лся еси́. В Воро́нежской земли́ архипа́стырский по́двиг соверша́я, мно́гия труды́ о просвеще́нии ю́ных подъя́л еси́, духо́вныя шко́лы утвержда́я и ученики́ в них приумножа́я. Та́кожде и нас, суето́ю омраче́нных, све́том богопозна́ния озари́, да ку́пно с тобо́ю вопие́м: Аллилу́иа.

И́кос 9

Вети́и многоглаго́ливии не мо́гут изрещи́ по́двиги и труды́ твоя́, прему́дре Анто́ние, на по́прище учи́тельства понесе́нныя; словеса́ бо Ева́нгельская повсю́ду насажда́я, па́ству твою́ путе́м Госпо́дним ше́ствовати до́бре наста́вил еси́. Мы же, о сем ра́дующеся, вопие́м ти:

Ра́дуйся, любве́ ра́ди, я́же о Бо́зе, всем вся потре́бная подава́вый;

ра́дуйся, сло́во Бо́жие вдохнове́нне пропове́давый.

Ра́дуйся, нра́вов до́брых и благи́х насади́телю;

ра́дуйся, ю́ных и немощны́х душ научи́телю.

Ра́дуйся, богоуго́дным житие́м свои́м коле́блющихся в ве́ре утверди́вый;

ра́дуйся, духо́вную жизнь в земли́ Воро́нежской обнови́вый.

Ра́дуйся, богому́дрия и чистоты́ храни́телю;

ра́дуйся, виногра́да Христо́ва неутоми́мый де́лателю.

Ра́дуйся, свети́льниче ве́ры и любве́, све́том и́стины нас озаря́яй;

ра́дуйся, па́стырю до́брый, слове́сныя о́вцы ко огра́де Небе́сней наставля́яй.

Ра́дуйся, спасе́ния душ челове́ческих усе́рдный рачи́телю;

ра́дуйся, о па́стве свое́й неуста́нный попечи́телю.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 10

Спасти́ хотя́ жи́телей земли́ Воро́нежския от мо́ра губи́тельнаго, и гнев Бо́жий, за беззако́ния люде́й пости́гший, на ми́лость преложи́ти, к подвиго́м покая́ния, поста́ и моли́твы вся призва́л еси́. Того́ ра́ди по́мощь и избавле́ние от Го́спода с весе́лием прие́мше, спасе́ннии лю́дие согла́сно воспе́ша Ему́: Аллилу́иа.

И́кос 10

Стена́ кре́пкая и заступле́ние преди́вное ниспосла́ся земли́ Воро́нежской от Влады́чицы Богоро́дицы: егда́ па́ки прии́де па́губа и порази́ мно́гия лю́ди, ты, святи́телю Анто́ние, благослови́л еси́ о́браз Ея́ Сицили́йский из оби́тели Дивного́рския взя́ти и во окре́стныя селе́ния приноси́ти для спасе́ния наро́да Бо́жия. Лю́дие же, прие́мше ми́лость и ско́рое вспоможе́ние от Пречи́стыя моли́твами твои́ми, благода́рне воспе́ша ти:

Ра́дуйся, к Богоро́дице неусы́пный моли́твенниче;

ра́дуйся, ми́лости Ея́ провозве́стниче.

Ра́дуйся, в ско́рбех мно́гих па́ству твою́ попече́нием не оста́вивый;

ра́дуйся, о́браз дре́вний Пречи́стыя во оби́тели Дивного́рской просла́вивый.

Ра́дуйся, покая́ния пропове́дниче и учи́телю;

ра́дуйся, милосе́рдия Бо́жия к лю́дем согреши́вшим приклони́телю.

Ра́дуйся, ко Христу́, Врачу́ и́стинному, прибега́ти боля́щия призыва́вый;

ра́дуйся, исцеле́ние телесе́ получи́вших о исправле́нии жития́ ревнова́ти умоля́вый.

Ра́дуйся, зе́млю Воро́нежскую хра́мами и оби́тельми святы́ми украси́вый;

ра́дуйся, слу́жбами боже́ственными а́ки све́том невече́рним се́рдца ве́рных просвети́вый.

Ра́дуйся, все упова́ние на Го́спода и Цари́цу Небе́сную возлага́ти нас побужда́яй;

ра́дуйся, и ны́не у Престо́ла Бо́жия о нас моли́твы усе́рдныя вознося́й.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 11

Пе́нию и́ноческому ко Го́споду в се́рдце свое́м прилежа́л еси́, егда́ не́мощь теле́сная на́йде на тя и страхова́ния вра́жеская смути́ша тя. От удале́ния же в Ла́вру Пече́рскую святи́телем Митрофа́ном чуде́сне удержа́н бысть, и ми́лостивое вразумле́ние его́ в се́рдцы свое́м сложи́в, уде́л свой церко́вный до́бре упра́вил еси́, благода́рне Бо́гови воспева́я: Аллилу́иа.

И́кос 11

Све́том благода́тных слове́с мно́гия ко Христу́ приве́л еси́, о́тче Анто́ние, се́рдце испо́лненное любви́ и сострада́ния к бли́жним име́я, вся́кому притека́вшему к тебе́ по́мощь по потре́бе подава́л еси́: скорбя́щия и стра́ждущия утеша́я, бе́дныя и стра́нныя упокоева́я, в беда́х и обстоя́ниих су́щия руково́дствуя, мно́гая до́брая дела́ вта́йне творя́, и́хже то́кмо Госпо́дь весть. Ны́не же на Небесе́х досто́йно увенча́нный, приими́ и на́ша возноси́мыя ти похвалы́:

Ра́дуйся, пла́те, милосе́рдием и любо́вию сле́зы стра́ждущих отира́яй;

ра́дуйся, словесы́ утеше́ния се́рдца их отра́дою исполня́яй.

Ра́дуйся, боля́щим и стра́ждущим при́сное вспоможе́ние;

ра́дуйся, си́рых и убо́гих благода́тное посеще́ние.

Ра́дуйся, осужде́ния я́ко огня́ избега́ти нас призыва́яй;

ра́дуйся, ра́спри и раздо́ры ско́ро умиря́яй.

Ра́дуйся, в ве́ре, наде́жде и любви́ ве́рныя укрепля́яй;

ра́дуйся, крест скорбе́й и боле́зней безро́потно нести́ науча́яй.

Ра́дуйся, в беда́х и озлобле́ниих су́щим при́сное утеше́ние;

ра́дуйся, во у́зах томя́щихся отра́дное посеще́ние.

Ра́дуйся, не́мощи немощны́х нося́й;

ра́дуйся, по́мощь безпомо́щным подава́яй.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 12

Благода́ть предуве́дения часа́ сме́ртнаго своего́ обре́л еси́, святи́телю Анто́ние, жела́ние име́я разреши́тися и со Христо́м бы́ти, моли́твы сугу́быя Бо́жией Ма́тери возноси́л еси́, я́же и па́стве твое́й благослови́в, научи́л еси́ всех прославля́ти Цари́цу Небесе́ и земли́, и Го́сподеви хвале́бную песнь воспева́ти: Аллилу́иа.

И́кос 12

Пою́ще на земли́ твое́ прославле́ние, свя́те Анто́ние, ра́дуемся, я́ко Оте́чество на́ше в тебе́ но́ваго засту́пника и моли́твенника обрело́ есть, земли́ же Воро́нежския ты тре́тие свети́ло благода́ти яви́лся еси́, моли́твою свое́ю от враг и напа́стей нас огражда́я. Сего́ ра́ди мы, почита́юще тя, прославля́ем благохвале́нии сицевы́ми:

Ра́дуйся, свети́льниче, пра́выя стези́ ко спасе́нию нам яви́вый;

ра́дуйся, непреста́нныя па́мяти сме́ртныя о́браз нам показа́вый.

Ра́дуйся, я́ко терпе́нием скорбе́й вре́менных весе́лия ве́чнаго дости́гл еси́;

ра́дуйся, я́ко себе́ отве́ргся, Крест Христо́в без ропта́ния поне́сл еси́.

Ра́дуйся, по отше́ствии твое́м от земли́ моли́твами свои́ми нас не оставля́яй;

ра́дуйся, в Го́рних селе́ниих неизрече́нною сла́вою Госпо́днею сия́яй;

Ра́дуйся, щи́те благода́тне, от бед па́ству твою́ при́сно сохраня́яй;

ра́дуйся, враго́в ви́димых и неви́димых от нас отгоня́яй.

Ра́дуйся, на Христа́ Иису́са, Спаси́теля на́шего, упова́ние возлага́ти нам запове́давый;

ра́дуйся, в ру́це Отца́ Небе́снаго умиле́нный дух свой ми́рно преда́вый.

Ра́дуйся, я́ко призыва́ющим тя ско́ро и пречу́дно помога́еши;

ра́дуйся, я́ко мно́жество исцеле́ний стра́ждущим моли́твами свои́ми подае́ши.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 13

О вели́кий и пресла́вный святи́телю Христо́в, о́тче Анто́ние, уте́шителю наш и всемо́щный покрови́телю, от бед и скорбе́й защи́тниче! Приими́ ны́нешнее на́ше сие́ приноше́ние и богоприя́тным твои́м хода́тайством сподо́би нас ста́ти с тобо́ю одесну́ю Престо́ла Бо́жия, иде́же непреста́нно пра́ведных ли́цы славосло́вят Творца́ вся́ческих боголе́пною пе́снию: Аллилу́иа.

[Се́й конда́к глаго́лется три́жды.]

И́кос 1

А́нгельскою чистото́ю души́ просия́л еси́ в земне́м житии́ твое́м, о́тче Анто́ние; ничто́же на земли́ от ю́ности возлюби́в, к Го́рнему Оте́честву стопы́ твоя́ напра́вил еси́, путе́м у́зким и многоско́рбным ше́ствуя. Ны́не же на Небесе́х досто́йно утеша́ешися, ве́чною сла́вою облистава́емь; но и нас, земны́х, не оставля́еши, по́мощь ско́рую явля́я благода́рне тебе́ вопию́щим:

Ра́дуйся, я́ко в тебе́ яви́ся Отца́ Небе́снаго благоволе́ние;

ра́дуйся, лозы́ Иису́совы сла́вное в ми́ре сем прозябе́ние.

Ра́дуйся, благода́ти Ду́ха Свята́го прича́стниче;

ра́дуйся, до́брых па́стырей Це́ркве Христо́вы прее́мниче.

Ра́дуйся, ве́ры правосла́вныя свети́льниче присносия́яй.

ра́дуйся, кро́тости и смире́ния о́браз нам явля́яй.

Ра́дуйся, мона́шествующих сла́во и похвало́;

ра́дуйся, оби́тели Ки́ево-Пече́рския при́сное ра́дование.

Ра́дуйся, со́нма архиере́йскаго све́тлое украше́ние;

ра́дуйся, неве́рием неду́гующих к Правосла́вней ве́ре возвраще́ние.

Ра́дуйся, я́ко трудо́в святи́телей Воро́нежских продолжа́тель изря́днейший яви́лся еси́;

ра́дуйся, я́ко, Христу́ усе́рдно послужи́в, во оби́тели Небе́сныя со сла́вою пресели́лся еси́.

Ра́дуйся, святи́телю Анто́ние, благода́тный помо́щниче и пресла́вный чудотво́рче.

Конда́к 1

Избра́ннаго ста́да ове́ц Христо́вых па́стырю великосла́вный, святи́телей Митрофа́на и Ти́хона сопресто́льниче, пе́ние похва́льное в па́мять твою́ святу́ю днесь прино́сим; ты же, святи́телю о́тче Анто́ние, предстоя́ Престо́лу Бо́жию, помина́й нас, тебе́ почита́ющих и си́це вопию́щих: Ра́дуйся, святи́телю Анто́ние, благода́тный помо́щниче и пресла́вный чудотво́рче.

Моли́тва

О святи́телю о́тче наш Анто́ние, па́стырю до́брый, чудотво́рче изря́дный и моли́твенниче преди́вный! Ты во дни земна́го жития́ твоего́ нището́ю духо́вною, кро́тостию и чистото́ю се́рдца себе́ украси́в, жа́ждою пра́вды, ми́лостынею и пла́чем покая́нным за́поведи Ева́нгельския испо́лнил еси́. Дух ми́рен стяжа́в и да́же до конца́ дней твои́х бли́жним послужи́в, Бо́гу угоди́л еси́ и Ца́рствия Небе́снаго дости́гл еси́. Ны́не же со святи́тели Воро́нежскими Митрофа́ном и Ти́хоном Престо́лу Бо́жию предстоя́, моли́ Пресвяту́ю Тро́ицу па́ству твою́ до́бре упра́вити и всем вся, я́же ко спасе́нию поле́зная, пода́ти. Испроси́ у Отца́ Небе́снаго, Врача́ душ и теле́с, боля́щим исцеле́ние, скорбя́щим и озло́бленным утеше́ние, гре́шным покая́ние, неве́дущим вразумле́ние. Моли́ Сы́на Бо́жия, Го́спода на́шего Иису́са Христа́, о́троки в стра́се Бо́жии наста́вити и в целому́дрии возрасти́ти, ю́ныя во благоче́стии утверди́ти, ста́рыя без попече́ния не оста́вити. Умоли́ и Ду́ха Свята́го, Уте́шителя Животворя́щаго, Це́ркви Правосла́вней в еди́нстве сохраня́тися, па́стырем ре́вность о спасе́нии пасо́мых дарова́ти, да лю́дие в ве́ре, наде́жди и любви́ Бо́жией утвердя́тся, и сла́вится от всех пречестно́е и великоле́пое и́мя Пресвяты́я Тро́ицы, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.