Прор. Захария и прав. Елисавета, родители Иоанна Предтечи

Жития

Жития пророка Захарии и праведной Елисаветы

Святой пророк Захария и святая праведная Елисавета были родителями святого Пророка, Предтечи и Крестителя Господня Иоанна. Они происходили из рода Ааронова: святой Захария, сын Варахии, был священником в Иерусалимском храме, а святая Елисавета была сестрой святой Анны, матери Пресвятой Богородицы. Праведные супруги, "поступая по всем заповедям Господним беспорочно" (Лк.1,5-25), страдали неплодием, что считалось в ветхозаветные времена великим наказанием Божиим. Однажды во время служения в храме святой Захария получил весть от Ангела, что его престарелая жена родит ему сына, который "будет велик пред Господом" (Лк.1,15) и "предъидет пред Ним в духе и силе Илии" (Лк.1,17). Захария усомнился в возможности исполнения этого предсказания и был за маловерие наказан немотой. Когда у праведной Елисаветы родился сын, она по внушению Святого Духа объявила, что назовет младенца Иоанном, хотя раньше в их роду такое имя никому не давали. Спросили праведного Захарию, и он также написал на дощечке имя Иоанн. Тотчас к нему возвратился дар речи, и он, исполнившись Святого Духа, стал пророчествовать о своем сыне как Предтече Господа.

Когда нечестивый царь Ирод услышал от волхвов о родившемся Мессии, он решил избить в Вифлееме и его окрестностях всех младенцев в возрасте до 2-х лет, надеясь, что в их числе будет и родившийся Мессия. Ирод хорошо знал о необычном рождении пророка Иоанна и хотел убить его, опасаясь, что он и есть Царь Иудейский. Но праведная Елисавета укрылась вместе с младенцем в горах. Убийцы повсюду искали Иоанна. Праведная Елисавета, увидев преследователей, со слезами стала молить Бога о спасении, и тотчас расступившаяся гора укрыла ее вместе с младенцем от погони. В эти бедственные дни святой Захария исполнял свою чреду служения в Иерусалимском храме. Воины, посланные Иродом, тщетно пытались узнать у него, где находится его сын. Тогда по повелению Ирода они убили святого пророка, заколов его между жертвенником и алтарем (Мф.23,35). Праведная Елисавета скончалась через 40 дней после своего супруга, а святой Иоанн, хранимый Господом, пребывал в пустыне до дня своего явления израильскому народу.

Тропарь, глас 2

Пра́ведных твои́х Заха́рии и Елисаве́ты,
Го́споди, па́мять пра́зднующе,
те́ми мо́лим Тя:

спаси́ ду́ши на́ша.

Тропарь, глас 4 Свяще́нства оде́ждею обложе́н, прему́дре,/ по зако́ну Бо́жию всесожже́ния прия́тна священноле́пно приноси́л еси́, Заха́рие,/ и бы́л еси́ свети́льник и зри́тель та́йных,/ зна́мения в тебе́ благода́ти нося́ я́вственно, всему́дре,/ и, мече́м убие́н бы́в в хра́ме Бо́жии,/ Христо́в проро́че, с Предте́чею моли́// спасти́ся душа́м на́шим.

Кондак, глас 3

Проро́к дне́сь и свяще́нник Вы́шняго,
Заха́рия предложи́, Предте́чев роди́тель,
трапе́зу своея́ па́мяти,
ве́рныя пита́я, питие́ бо пра́вды все́м раствори́в,
сего́ ра́ди скончава́ется,

я́ко боже́ственный таи́нник Бо́жия благода́ти.

Кондак, глас 4 Яко луна́ полна́,/ свет пра́вды от мы́сленнаго Со́лнца, Месси́и, прия́ла еси́/ и во всех за́поведех Госпо́дних с Заха́рией ходи́ла еси́,/ боговозлю́бленная Елисове́то./ Досто́йными у́бо тя пе́сньми ублажа́юще,/ всеще́драго Све́та, просвеща́ющаго всех,// Го́спода велича́ем.

Молитва

Бо́же святы́й и во святы́х почива́яй, трисвяты́м гла́сом на небеси́ от а́нгел воспева́емый, на земли́ от челове́к во святы́х Свои́х хвали́мый, да́вый Святы́м Твои́м Ду́хом коему́ждо благода́ть по ме́ре дарова́ния Христо́ва, и то́ю поста́вивый Це́ркви Твое́й Святе́й о́вы апо́столы, о́вы проро́ки, о́вы же благове́стники, о́вы па́стыри и учи́тели, и́хже сло́вом про́поведи, Тебе́ Самому́ де́йствующему вся́ во все́х, мно́зи соверши́шася святи́и в ко́емждо ро́де и ро́де, разли́чными благоде́тельми благоугоди́вшии Тебе́, и к Тебе́, на́м о́браз до́брых по́двигов свои́х оста́вивше, в ра́дости преше́дший, гото́ви, в не́мже са́ми искуше́ни бы́ша, и на́м напа́ствуемым помога́ти. Си́х святы́х все́х и свята́го проро́ка Заха́рию и пра́ведную Елисаве́ту воспомина́я и и́х богоуго́дное похваля́я житие́, Тебе́ Сама́го, в ни́х де́йствовавшаго, восхваля́ю, и о́нех благотворе́ния Твоя́ дарова́ния бы́ти ве́руя, приле́жно молю́ Тя́, Свя́те святы́х, да́ждь ми́ гре́шному после́довати и́х уче́нию, житию́, любви́, ве́ре, долготерпе́нию, и и́х моли́твенною по́мощию, па́че же Твое́ю вседе́йствующею благода́тию, небе́сныя с ни́ми сподо́битися сла́вы, хва́ляще Пресвято́е и́мя Твое́, Отца́ и Сы́на и Свята́го Ду́ха во ве́ки. Ами́нь.

2-я Молитва

О, преблаже́ннии уго́дницы Бо́жии, вси́ святи́и, предстоя́щии Престо́лу Пресвяты́я Тро́ицы и наслажда́ющиися неизрече́ннаго блаже́нства! Се́ ны́не, в де́нь о́бщаго ва́шего торжества́, ми́лостивно при́зрите на на́с, ме́ньших бра́тий ва́ших, принося́щих ва́м сие́ хвале́бное пе́ние, и хода́тайством ва́шим прося́щих ми́лости и отпуще́ния грехо́в у Преблага́го Го́спода; ве́мы бо, вои́стину ве́мы, я́ко вся́, ели́ка восхо́щете, испроси́ти у Него́ мо́жете. Те́мже у́бо смире́нно мо́лимся ва́м, и свято́му проро́ку Заха́рии и пра́ведней Елисаве́те, моли́те Ми́лостиваго Влады́ку, да пода́ст на́м ду́х ва́шея ре́вности к хране́нию святы́х Его́ за́поведей, я́ко, да те́кше по стопа́м ва́шим, возмо́жем земно́е по́прище в доброде́тельном житии́ без поро́ка прейти́, и в покая́нии дости́гнути пресла́вных селе́ний ра́йских, и та́мо ку́пно с ва́ми прославля́ти Отца́ и Сы́на и Свята́го Ду́ха, во ве́ки веко́в. Ами́нь!

3-я Молитва

К ва́м, о святи́и вси́ и святы́й проро́че Заха́рие и пра́ведная Елисаве́то, я́ко путево́дным светильникам, дея́ньми свои́ми осветившим пу́ть небе́снаго восхо́да, а́з многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне́ Человеколю́бца Бо́га, да не попу́стит ми́ еще́ блужда́ти по распу́тиям греха́, но да просвети́т мо́й у́м и се́рдце све́том благода́ти Своея́, я́ко да то́ю озаряем и подкрепляем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, че́сть и поклоне́ние во ве́ки веко́в. Ами́нь.

4-я Молитва

О, святи́и уго́дницы Бо́жии, проро́че Заха́рие и пра́ведная Елисаве́то! По́двигом до́брым подвиза́вшася на земли́, восприя́ли еста́ на Небесе́х вене́ц пра́вды, его́ же угото́вал есть Госпо́дь всем лю́бящим Его́. Те́мже взира́юще на святы́й ваш о́браз, ра́дуемся о пресла́внем сконча́нии жи́тельства ва́шего и чтим святу́ю па́мять ва́шу. Вы же, предстоя́ Престо́лу Бо́жию, прими́те моле́ния на́ша и ко Всеми́лостивому Бо́гу принеси́те, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством ва́шим, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Канон святому пророку Захарии, отцу честного Иоанна Предтечи

Минея, 5 Сентября.

Глас 8

Песнь 1

Ирмос: Во́ду проше́д, я́ко су́шу,
и еги́петскаго зла избежа́в,
изра́ильтянин вопия́ше:

Изба́вителю и Бо́гу на́шему пои́м.

Припев: Святы́й проро́че Заха́рие, моли́ Бо́га о на́с.

Па́мять, проро́че, твою́ восхвали́ти
Ду́ха благода́ть молю́ помощи́ мне твои́м хода́тайством, взыва́я:
Изба́вителю Бо́гу на́шему воспои́м.

Припев: Святы́й проро́че Заха́рие, моли́ Бо́га о на́с.

Житие́ твое́ непоро́чно обре́теся,
свяще́нства украси́ся оде́ждею и проро́чества светоно́сными сия́нии,
богоглаго́ливе, блаже́нне.

Сла́ва Отцу́ и Сы́ну и Свято́му Ду́ху.

Зако́нным венце́м главу́ украси́в, Заха́рие,
яви́лся еси́ священноявле́нен, вопия́:
Изба́вителю Бо́гу на́шему пои́м.

И ны́не и при́сно и во ве́ки веко́в. Ами́нь.

Богородичен: Поди́ра оде́ждею, я́ко Ааро́н, оде́ян,
ю́же от ко́рене Иессе́ева прозя́бшую Отрокови́цу прия́л еси́,
Изба́вителя во чре́ве носи́вшую.

Песнь 3

Ирмос: Ты еси́ Утвержде́ние
притека́ющих к Тебе́, Го́споди,
Ты еси́ Свет омраче́нных,

и пое́т Тя дух мой.

Припев: Святы́й проро́че Заха́рие, моли́ Бо́га о на́с.

Егда́ кади́ло сложе́ния приноси́л еси́, архиере́е,
тогда́ Предте́чи прия́л еси́ провозвеще́ние.

Припев: Святы́й проро́че Заха́рие, моли́ Бо́га о на́с.

Ми́ром свяще́ния свяще́нствовати тя пома́за, я́ко Ааро́на,
тем виде́ния Ангелова сподо́бился еси́.

Сла́ва Отцу́ и Сы́ну и Свято́му Ду́ху.

У́тро, провозвеща́ющее вселе́нней Тя, Со́лнца Разу́мнаго, Спа́се,
Заха́рия Иоа́нна роди́л есть.

И ны́не и при́сно и во ве́ки веко́в. Ами́нь.

Богородичен: Упра́ви житие́ мое́, Богороди́тельнице Всечи́стая и жизнь,
я́же Заха́риин дом уясни́вшая.

Седален, глас 8

Свяще́нствовав Бо́гу по зако́ну
и проро́чествовав Христа́ из Де́вы, Заха́рие, воплоще́нна от Ду́ха Свя́та,
яви́лся еси́ вселе́нней столп све́тел,
с высоты́ Пра́вды Восто́ка, весь мир осия́юща и в путь ми́рен направля́юща но́ги на́ша,
ре́кл еси́, спаса́юща род наш.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Я́же Непреме́ннаго Бо́га поро́ждшая,
пременя́емое при́сно се́рдце мое́ грехо́м и ле́ностию, прило́гми льсти́ваго,
утверди́, Блага́я, моли́твами Ма́терними Твои́ми,
я́ко да и аз благода́рно сла́влю Тя, Богороди́тельнице Мари́е,
поми́луй ста́до Твое́, е́же стяжа́ла еси́, Всенепоро́чная.

Песнь 4

Ирмос: Услы́шах, Го́споди,
смотре́ния Твоего́ та́инство,
разуме́х дела́ Твоя́

и просла́вих Твое́ Божество́.

Припев: Святы́й проро́че Заха́рие, моли́ Бо́га о на́с.

Проро́к Твой, Влады́ко, о́бразы зако́нными ве́рно служа́ше Тебе́
и благода́ти сподо́бися усмотри́ти Твою́ и́стину.

Припев: Святы́й проро́че Заха́рие, моли́ Бо́га о на́с.

Све́том Свет прия́л еси́, мра́чнейшим ты ясне́йший, преблаже́нне:
зако́ном бо и благода́ть ны́не тебе́ приложи́ся.

Сла́ва Отцу́ и Сы́ну и Свято́му Ду́ху.

Бо́гу предстоя́й, боже́ственный Гаврии́л,
благовеству́я, яви́ тебе́, блаже́нне, глас Сло́ва и Предте́чу.

И ны́не и при́сно и во ве́ки веко́в. Ами́нь.

Богородичен: Чи́стое жили́ще Соде́тель, Де́во, тва́ри обре́т Тя, всели́ся,
Елисаве́тино разреши́вый непло́дство.

Песнь 5

Ирмос: У́тренююще, вопия́м Ти:
Го́споди, спаси́ ны,
Ты бо еси́ Бог наш,

ра́зве Тебе́ ино́го не ве́мы.

Припев: Святы́й проро́че Заха́рие, моли́ Бо́га о на́с.

Кида́рь положи́ся на главе́ твое́й, о проро́че,
в начерта́нии имущ и́стинное Боже́ственное свяще́ние.

Припев: Святы́й проро́че Заха́рие, моли́ Бо́га о на́с.

Ра́дуется тварь рождество́м твои́м, архиере́е,
ты бо прозя́бл еси́ покая́ния пропове́дника.

Сла́ва Отцу́ и Сы́ну и Свято́му Ду́ху.

Укра́шено твое́ житие́ препроводи́в,
за́поведи бо вся Госпо́дня с Елисаве́тою соверши́л еси́.

И ны́не и при́сно и во ве́ки веко́в. Ами́нь.

Богородичен: Направля́ется к пе́нию язы́к твой, богоглаго́ливе,
Неискусобра́чную бо во чре́ве нося́щу ви́дел еси́.

Песнь 6

Ирмос: Ри́зу мне пода́ждь све́тлу,
одея́йся све́том, я́ко ри́зою,

Многоми́лостиве Христе́ Бо́же наш.

Припев: Святы́й проро́че Заха́рие, моли́ Бо́га о на́с.

Зако́на служа́й се́ни,
яви́ся и благода́ти пропове́дник,
Спа́се наш, сподо́бися бо ви́дети Твое́ воплоще́ние.

Припев: Святы́й проро́че Заха́рие, моли́ Бо́га о на́с.

Су́дными словесы́ укра́шься,
Сло́во присносу́щное, Плоть нося́що,
Заха́рие свяще́нне, прия́л еси́.

Сла́ва Отцу́ и Сы́ну и Свято́му Ду́ху.

Яви́лся еси́ внутрь хра́ма, служа́ Бо́гу,
таи́нниче богодухнове́нне,
иере́й быв досточу́ден.

И ны́не и при́сно и во ве́ки веко́в. Ами́нь.

Богородичен: Спа́са, Богома́ти, во утро́бе, Де́во, нося́щи, Сло́ва Безнача́льнаго,
Елисаве́ти позна́лася еси́ проро́чице.

Кондак, глас 3

Проро́к днесь и свяще́нник Вы́шняго,
Заха́рия предложи́, Предте́чев роди́тель,
трапе́зу своей па́мяти,
ве́рныя пита́я, питие́ бо пра́вды всем раствори́в,
сего́ ра́ди скончава́ется,

я́ко боже́ственный таи́нник Бо́жия благода́ти.

Икос

Зако́на молча́нием иера́рх связа́ся Ангела гла́сом,
А́нгела прие́м Христо́ва прише́ствия, проро́ка и таи́нника,
с Елисаве́тию непло́дною и целому́дренною,
и Того́ Рождество́м обнови́ся благода́ть и избавле́ние
и примире́ние на́ше всеми́рное.
Сего́ пропове́да А́гнца, и Соде́теля,
и естеству́ Обнови́теля, от неплодныя утро́бы плод подаю́ща,
Сы́на же, я́вльшася из Де́вы,
я́ко боже́ственный таи́нник Бо́жия благода́ти.

Песнь 7

Ирмос: О́троцы евре́йстии в пещи́
попра́ша пла́мень дерзнове́нно
и на ро́су огнь преложи́ша, вопию́ще:

благослове́н еси́, Го́споди Бо́же, во ве́ки.

Припев: Святы́й проро́че Заха́рие, моли́ Бо́га о на́с.

Егда́ глас вопию́щаго прии́де от непло́дныя,
па́че естества́ твоего́ язы́ка у́зы разреши́, зва́ти:
благослове́н еси́, Го́споди Бо́же, во ве́ки.

Припев: Святы́й проро́че Заха́рие, моли́ Бо́га о на́с.

Люби́мичь роди́ся Женихо́в от непло́дове,
Рождество́ Де́вы провозвеща́я я́ве Предте́ча ве́рою зову́щим:
благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху.

Весь был еси́, Заха́рие, боже́ственный орга́н Ду́ха, треблаже́нне,
и проро́ка твое́ провозвеща́ше отроча́,
благослове́н еси́, зову́ща, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Зако́на исполне́ние Тя, Отрокови́це,
глави́зну всего́ проро́чествия Заха́рия зря, позна́ше, вопия́:
благослове́н, Пречи́стая, Плод Твоего́ чре́ва.

Песнь 8

Ирмос: На горе́ святе́й просла́вльшася
и в купине́ огне́м При́сноде́вы
Моисе́ови та́йну я́вльшаго
Го́спода по́йте

и превозноси́те во вся ве́ки.

Припев: Святы́й проро́че Заха́рие, моли́ Бо́га о на́с.

И́стины показа́ся проро́к,
Христо́вы бо стези́ Иоа́нн предгряды́й угото́ва Предте́ча,
блаже́нне иера́рше,
Его́же превозно́сим во вся ве́ки.

Припев: Святы́й проро́че Заха́рие, моли́ Бо́га о на́с.

Вити́йствуя, благослови́л еси́ Влады́ку, спасе́ние нам пода́вшаго,
от Дави́да возсия́вшаго нам пло́тию Го́спода сла́вы,
Его́же превозно́сим во вся ве́ки.

Сла́ва Отцу́ и Сы́ну и Свято́му Ду́ху.

Дарова́ний вели́ких сподо́бися, богоявле́нне,
Предте́чу роди́в, проро́ков всех вы́шшаго,
Го́спода пою́ща и превознося́ща во вся ве́ки.

И ны́не и при́сно и во ве́ки веко́в. Ами́нь.

Богородичен: Иера́рх ку́пно и богопропове́дник, Заха́рия
Де́ве и Ма́тери, Го́спода нося́щей тва́ри, ра́дуяся, поклони́ся,
Ю́же превозно́сим во вся ве́ки.

Песнь 9

Ирмос: Вои́стину Богоро́дицу
Тя испове́дуем,
спасе́ннии Тобо́ю, Де́во Чи́стая,

с безпло́тными ли́ки Тя велича́юще.

Припев: Святы́й проро́че Заха́рие, моли́ Бо́га о на́с.

Испо́лнился еси́ вдохнове́ния Уте́шителева
и благослови́ти нача́т Го́спода,
священнотаи́нниче богому́дре и богоблаже́нне.

Припев: Святы́й проро́че Заха́рие, моли́ Бо́га о на́с.

Глаго́лов исхожде́ния Арха́нгеловых узре́в,
богоглаго́ливе прехва́льне,
к благослове́нию язы́к а́бие подви́гнул еси́.

Сла́ва Отцу́ и Сы́ну и Свято́му Ду́ху.

Страда́ния венцы́ и свяще́нства
и просвеще́нием проро́чества украси́лся еси́,
о Заха́рие преблаже́нне и богоглаго́ливе!

И ны́не и при́сно и во ве́ки веко́в. Ами́нь.

Богородичен: Све́та су́щи прия́телище,
просвети́, Де́во, помраче́нную ду́шу мою́ страстьми́
и кроме́шния мя тьмы изба́ви моли́твами Твои́ми.

Светилен

Пе́рвее гла́сом Ангела умолча́л еси́ в невхо́дных
за хотя́щее бы́ти прозябе́ние из тебе́ гла́са вопию́щаго
и ны́не молчи́ши о́наго ра́ди,
пред невхо́дными заколе́н быв, Заха́рие.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Свет из Све́та возсия́в, Сло́ве, пре́жде денни́цы безле́тно,
Свет из Ма́тере под ле́том непреме́нно проше́л еси́,
сия́нии светолу́чными концы́ ми́ра просвеща́я, я́ко Свет ми́ра.

Акафист святым и праведным пророку Захарии и Елисавете

Кондак 1

Избраннии от рода Ааронова, рождшии Иоанна богохвальнаго, Предтечею и Крестителем Господним предуготованным быти, святии и праведнии Захарие и Елисавето! Яко имущии дерзновение ко Господу, предстательством вашим от всяких нас бед свободите, взывающих вам:

Радуйтеся, святии и праведнии Захарие и Елисавето, добрый плод для людей возрастившии.

Икос 1

Ангели земнии и человецы небеснии воистину явистеся, святии Захарие и Елисавето, от юности вашея всеми добродетельми украшении и непорочно житие свое вкупе пожившии, ему же чудящеся, зовем вам гласы хвалебными сице:

Радуйтеся, рода Ааронова славное прозябение.

Радуйтеся, благочестивых родителей светлое украшение.

Радуйтеся, душевныя и телесныя чистоты рачителие.

Радуйтеся, заповедей Божиих ревностнии хранителие.

Радуйтеся, супрузи праведнии, Богом предъизбраннии.

Радуйтеся, на трапезу небесную Господом призваннии.

Радуйтеся, святии и праведнии Захарие и Елисавето, добрый плод для людей возрастившии.

Кондак 2

Видев Отец Небесный с высоты славы Своея, яко житие ваше, святии и праведнии Захарие и Елисавето, благочестиво и свято бысть, благослови от отрасли вашея святыя произрасти честному и славному плоду – Иоанну, во еже быти ему пророком, Предтечею и Крестителем Сыну Своему возлюбленному Иисусу Христу, Ему же хвалу воздаем: Аллилуиа.

Икос 2

Разумом Божественным свыше направленный Архангел Гавриил предсташе тебе, иерее Захарие, вшедшему покадити во святилище и служащему по чину чреды своея. Зрящи же вестника небеснаго, одесную алтаря кадильнаго стоящаго, страх велий объяше тя, обаче посланник Божий рече ти: «Не бойся, Захарие». Мы же, милостию Божиею к семейству твоему умиленные, вопием:

Радуйтеся, целомудреннаго жития крепкое охранение.

Радуйтеся, грехов и страстей непреложное одоление.

Радуйтеся, благодатию Божиею щедро осененнии.

Радуйтеся, зрящие на небе тайны сокровенныя.

Радуйтеся, яко ангели бесплотнии, на земли пожившии.

Радуйтеся, чистоту телесную в житии своем сохранившии.

Радуйтеся, святии и праведнии Захарие и Елисавето, добрый плод для людей возрастившии.

Кондак 3

Сила неизреченная милосердия Божия на вас, святии, открыся, ибо видя праведность хождения вашего пред лицем Божиим, посла вам Господь велие утешение в старости, да поете Ему верно: Аллилуиа.

Икос 3

Имеяй повеление от Господа утешити тя, святе Захарие, возвести ти ангел Божий, яко молитва твоя благоприятна есть Богу и внимая ей, милость ти дарует Бог: благословляше бо супружницу твою Елисавету, узы неплодства ея разрешая, да родит сына, соименнаго благодати Иоанна. Тем же приимите от нас песнь сию:

Радуйтеся, житием своим Богу угодившии.

Радуйтеся, свято пред Ним неизменно ходившии.

Радуйтеся, яко в молитвах своих ко Творцу возвышалися есте.

Радуйтеся, яко словом Господним всегда утешалися есте.

Радуйтеся, вся надежды своя на Творца возлагавшии.

Радуйтеся, в своих добрых делах утомления не знавшии.

Радуйтеся, святии и праведнии Захарие и Елисавето, добрый плод для людей возрастившии.

Кондак 4

Бурею мирскаго жития не одоленный, сын ваш, святии Захарие и Елисавето, велик пред Господем будет, не токмо телом, но и духом, рече Ангел Господень, ибо своим рождеством той принесет в мир велию радость, яко мнози возрадуются рождению его, восхваляя Творца: Аллилуиа.

Икос 4

Слышаще дивныя глаголы о сыне своем, яко той велиим пророком и постником наречется, и еще от чрева матери своея исполнится Духа Свята и мнози от сыновей Израильских его ради обратятся ко истинному Богу, ибо надлежит ему быти Предтечею Христовым в духе и силе пророка Илии и приуготовити народы ко принятию Спасителя, зело поражен и удивлен бысть Захария, не решаяся реченному Ангелом веровати. Мы же, словесам ангельским внимая, вопием вам сице:

Радуйтеся, стяжавшии милость Творца превеликую.

Радуйтеся, языкам принесшии радость великую.

Радуйтеся, седины свои славою покрывшии.

Радуйтеся, наград на небе себя не лишившии.

Радуйтеся, милосердному Господу во всем уподоблявшиеся.

Радуйтеся, Триединому Богу всегда поклонявшиеся.

Радуйтеся, святии и праведнии Захарие и Елисавето, добрый плод для людей возрастившии.

Кондак 5

Бога точию бояйся, рече ангел Господень Захарии: Аз есмь Гавриил, предстояй пред Богом и посланный благовестити тебе все сие, обаче за то, что ты не уверовал еси словесам моим, будеши немым и не промолвиши ни единаго слова дондеже всему реченному мною надлежит исполнитися по воле великаго Бога, Коему славу пою: Аллилуиа.

Икос 5

Видевше людие бывшии в церкви Господней, умедлившу Захарии во алтари, зело дивляхуся сему, изшедшу же ему к ним и не могущу глаголати, но токмо помавающу, разумеша вси, яко бысть ему видение во алтари. Мы же, прославляя дивнаго в чудесех Своих Господа, глаголем вам сице:

Радуйтеся, яко сила Божия на вас совершися.

Радуйтеся, яко воля Божия непреложно на вас сотворися.

Радуйтеся, яко милость Творца с преизбытком на вас излияся.

Радуйтеся, яко радость велия вам щедро Творцем даровася.

Радуйтеся, яко вы возвеличены быша дланию святою.

Радуйтеся, яко вы всем пример подаете собою.

Радуйтеся, святии и праведнии Захарие и Елисавето, добрый плод для людей возрастившии.

Кондак 6

Словес Господних, ангелом возвещенных, сбытие видяще, возрадовася зело Елисавета, ибо зачне сына своего и таяшеся месяц пять, глаголющи: яко тако сотвори мне Господь во дни, в няже призре отъяти поношение мое в человецех, да пою Ему хвалу: Аллилуиа.

Икос 6

Возсия обильно благодать Божия в Елисавете святей, егда исполнися Духа Свята и возопи гласом велиим Деве Марии: «Благословенна Ты в женах и благословен плод чрева Твоего! И откуду мне сие, яко прииде Мати Господа моего ко мне!». Чадо же ее взыграся во чреве радощами пришествию Матери Божией. Да и на нас сниде благодать Святаго Духа, вопиющих радощами сице:

Радуйтеся, Духом Святым позлащеннии.

Радуйтеся, благодатию щедро Творцем осененнии.

Радуйтеся, чадо великое свято зачавшии.

Радуйтеся, радость отцовства и материнства от Бога познавшии.

Радуйтеся, Матери Божией сродницы всечестнии.

Радуйтеся, воплотившагося Сына Божия раби преблагии.

Радуйтеся, святии и праведнии Захарие и Елисавето, добрый плод для людей возрастившии.

Кондак 7

Хотящу людем возвестити от ангела пронареченное имя сына своего Иоанна, святе Захарие, по рождестве его написа е и абие отверзошася язык и уста твоя, и глаголаше паки, благословя Бога и поя Ему: Аллилуиа.

Икос 7

Новую подаяй благодать тебе Господь, праведне Захарие, Духом Святым насыти тя, воеже пророчествовати ти, глаголя: «Благословен Господь Бог Израилев, яко посети и сотвори избавление людем Своим и воздвиже рог спасения нам, в дому Давида отрока Своего, якоже глагола усты святых сущих от века пророк Его и ты, отроча, пророк Вышняго наречешися, предъидеши бо пред лицем Господним, уготовати пути Его». Мы же, пророчеству твоему внимая, чрез вас, праведницы Божии, восхваляем Господа, воспевая вам похвалы сии:

Радуйтеся, отроча святое в мир родившии.

Радуйтеся, рождеством сим радость миру возвестившии.

Радуйтеся, восхвалившии Бога безмерно.

Радуйтеся, служившии Господу верно.

Радуйтеся, вся Законы Его исполнявшии.

Радуйтеся, себя в чистоте сохранявшии.

Радуйтеся, святии и праведнии Захарие и Елисавето, добрый плод для людей возрастившии.

Кондак 8

Странное чудо бысть окрест живущим людем, егда слышаху о преславнем и чуднем рождестве чада вашего, святии и праведнии Захарие и Елисавето, и со удивлением глаголаху в себе: «Что убо отроча сие будет?». Мы же, преславному рождеству Предтечи и Крестителя Господня радующеся, Господу взываем: Аллилуиа.

Икос 8

Весь был еси смущением велиим исполнен, пророче Божий Захарие, зря Пресвятую Деву Марию с Богомладенцем ко храму пришедшую и на месте нечистых жен пред дверьми храма ставшую, очищения законнаго просити хотящую. Ведуще бо Ю во Святая Святых тобою, по внушению Божию, введенную и тамо воспитанную и духом уразумев, яко сия Матерь есть Дева Чистая и по рождестве, постави Ю сего ради на месте девиц, идеже женам имущим мужа стояти не подобаше. Мы же, восхваляя с тобою Деву Чистую, с любовию и умилением вопием:

Радуйтеся, Матери Божией славу воздавшии.

Радуйтеся, купно со всеми Ея восхвалявшии.

Радуйтеся, Бога пришествие в мир ожидавшии.

Радуйтеся, чистою молитвою Творца ублажавшии.

Радуйтеся, Ликом Младенца Христа услажденнии.

Радуйтеся, в Царствие Божие Им возведеннии.

Радуйтеся, святии и праведнии Захарие и Елисавето, добрый плод для людей возрастившии.

Кондак 9

Вси Ангели и святых лики радовахуся радостию велиею, егда ты, святе Захарие, на руце свои праведнии, умилися сердцем и со страхом Божиим, приял еси Богомладенца, и яко Творцу и Богу, возвал еси Ему: Аллилуиа.

Икос 9

Витийство человеческое не довлеет к достойному прославлению дивнаго жития вашего, святии и праведнии Захарие и Елисавето, несть бо возможно исповести и исчести вся моления и пощения ваша, вся слезы и воздыхания ваша яже к Богу. Приимите от нас, любовию к вам подвизаемых, малыя похвалы сия:

Радуйтеся, Духа Святаго сосуди от века избраннии.

Радуйтеся, руце своя простираху к Творцу в уповании.

Радуйтеся, Пресвятыя Троицы угодницы вернии.

Радуйтеся, к Богу дорогу нашедшии в тернии.

Радуйтеся, трудами своими спасение стяжавшии.

Радуйтеся, на Господа токмо во всем уповавшии.

Радуйтеся, святии и праведнии Захарие и Елисавето, добрый плод для людей возрастившии.

Кондак 10

Спасения чаду своему хотяще, поят мати чадо свое и бежаху с ним в горы от злочестиваго детоубийцы Ирода, той бо посла в Вифлеем воинов, да избиют вся младенцы, приказа умертвити и чадо ваше, блаженнии Захарие и Елисавето. Мы же, Господу, хранящему избранныя Своя от руки нечестиваго, с любовию глаголем: Аллилуиа.

Икос 10

Стеною заступления от настигавших убийц бысть тебе Господь, праведная Елисавето, егда по молению твоему: «Гора Божия, приими мать с сыном!», повеле горе каменней тотчас расступитися и заключити тебе с чадом в себе. Спасению вашему со слезами радуяся, вопием вам сице:

Радуйтеся, Господом на всех путях хранимии.

Радуйтеся, рукою Божиею по жизни сей водимии.

Радуйтеся, любовь к Творцу в себе носившии.

Радуйтеся, нетленный плод в раю вкусившии.

Радуйтеся, за правду Божию пострадавшии.

Радуйтеся, быти с Богом возжелавшии.

Радуйтеся, святии и праведнии Захарие и Елисавето, добрый плод для людей возрастившии.

Кондак 11

Пение молебное Господу Богу приносил еси, святый и праведный Захарие, егда воини зверонравнаго Ирода приидоша к тебе с повелением отдати им сына твоего. Ты же отвечал еси им: «Аз служу ныне Господу Богу Израилеву и не вем идеже есть сын мой!», укрепляющему тебя Богу вопияй: Аллилуиа.

Икос 11

Света небеснаго исполнися храм Господень, праведне Захарие, егда вопрошающим тя воином рекл еси: «Тело мое убиете, душу же мою восприимет Господь!» Бывшу же тебе убиту между церковию и алтарем, якоже повеле Ирод, пролиявшаяся кровь твоя святая сгустися на мраморе и отверде во свидетельство и вечное осуждение Иродово. Мы же, мученическую кончину твою прославляя, воспеваем гласами хвалебными:

Радуйтеся, души Творцу посвятившии.

Радуйтеся, в святости их сохранившии.

Радуйтеся, славою небесною от Бога венчаннии.

Радуйтеся, в радость Господа своего войти призваннии.

Радуйтеся, яко пищу нетленную ныне вкушаете.

Радуйтеся, яко Бога за нас присно вы умоляете.

Радуйтеся, святии и праведнии Захарие и Елисавето, добрый плод для людей возрастившии.

Кондак 12

Божественная благодать явися на тебе, праведная Елисавето, и неизреченное чудо дивно открыся, егда бо в горе, укрывшей тя со чадом, Божиим повелением устроися пещера, открыся источник водный и над пещерою финикс произрасте, подавая плоды своя во изобилии. Таковому благоволению Божиему радуяся, ты пела еси Ему с чадом своим: Аллилуиа.

Икос 12

Поюще радостную песнь хвалы и благодарения Господу, по истечении сорока дний по убиении праведнаго Захарии, душу свою предаде Творцу своему святая Елисавета и с супругом своим на небеси соединися. Прославляя праведное житие ваше, святии Захарие и Елисавето, усердно молим вас услышати хвалебное пение наше:

Радуйтеся, яко в вере святей вы есте утверждение.

Радуйтеся, яко наше от бед вы есте ограждение.

Радуйтеся, яко нас от скорбей присно вы защищаете.

Радуйтеся, яко страсти телесныя в нас укрощаете.

Радуйтеся, благочестивым супругом вы есте покровителие мудрии.

Радуйтеся, чадом нашим вы есте воспитателие добрии.

Радуйтеся, святии и праведнии Захарие и Елисавето, добрый плод для людей возрастившии.

Кондак 13

О, святии и праведнии Захарие и Елисавето! Молим вас со усердием и любовию: испросите нам у Господа нашего в жизни сей в вере и добродетелех утверждение, от скорбей и напастей избавление, прегрешений наших прощение, да сподобимся и мы Царствие Небесное наследовати и вечно воспевати Богу: Аллилуиа. Аллилуиа. Аллилуиа.

[Се́й конда́к глаго́лется три́жды.]

Икос 1

Ангели земнии и человецы небеснии воистину явистеся, святии Захарие и Елисавето, от юности вашея всеми добродетельми украшении и непорочно житие свое вкупе пожившии, ему же чудящеся, зовем вам гласы хвалебными сице:

Радуйтеся, рода Ааронова славное прозябение.

Радуйтеся, благочестивых родителей светлое украшение.

Радуйтеся, душевныя и телесныя чистоты рачителие.

Радуйтеся, заповедей Божиих ревностнии хранителие.

Радуйтеся, супрузи праведнии, Богом предъизбраннии.

Радуйтеся, на трапезу небесную Господом призваннии.

Радуйтеся, святии и праведнии Захарие и Елисавето, добрый плод для людей возрастившии.

Кондак 1

Избраннии от рода Ааронова, рождшии Иоанна богохвальнаго, Предтечею и Крестителем Господним предуготованным быти, святии и праведнии Захарие и Елисавето! Яко имущии дерзновение ко Господу, предстательством вашим от всяких нас бед свободите, взывающих вам:

Радуйтеся, святии и праведнии Захарие и Елисавето, добрый плод для людей возрастившии.

Молитва

О, велиции Христовы праведницы, святии Захарие и Елисавето! К вам прибегаем и вам молимся с великим упованием: принесите за нас грешных святыя молитвы ваша ко Господу да пошлет вся благопотребная душам и телесем нашим, веру праву, любовь нелицемерну, в добрых делех преуспеяние, душам и телесем здравие и вечное спасение. Не презрите молитв наших, со умилением вам возносимых, но будите нам предстателие ко Господу да сподобимся помощию вашею спасение вечное получити, Царствие Небесное унаследовати и вкупе с вами и всеми святыми славословити неизреченное человеколюбие Отца и Сына и Святаго Духа, в Троице покланяемаго Бога, во веки веков. Аминь.