Православный Мир
Житие
Прп. Симеон Новый Богослов (946–1021) родился в Пафлагонии, получил основательное образование и служил при императорском дворе. В 25 лет оставил мир и поступил в Студийский монастырь. Основным его подвигом была непрестанная Иисусова молитва. Около 980 года стал игуменом монастыря св. Маманта, где насаждал строгую дисциплину, что вызвало недовольство братии. Позже был изгнан из Константинополя и удалился на берег Босфора, основав там обитель св. Марины. Автор учения о новом человеке, об "обожении плоти", которым он хотел заменить учение об "умерщвлении плоти" (за что он и получил в Церкви прозвище Нового Богослова.).
* * *
Преподобный Симеон Новый Богослов[1] родился в 946 году в городе Галате (Пафлагония) и получил в Константинополе основательное светское образование. Отец готовил его к придворной карьере, и некоторое время юноша занимал высокое положение при императорском дворе. Но достигнув 25 лет, он почувствовал влечение к иноческой жизни, бежал из дома и удалился в Студийский монастырь, где проходил послушание под руководством знаменитого в то время старца Симеона Благоговейного. Основным подвигом преподобного стала непрестанная Иисусова молитва в ее кратком виде: "Господи, помилуй!" Для большей молитвенной сосредоточенности он постоянно искал уединения, даже на литургии стоял отдельно от братии, часто оставался один на ночь в церкви; чтобы навыкнуть в памятовании о смерти, проводил ночи на кладбище. Плодом его усердия были особые состояния восхищения: в эти часы Дух Святой в виде светящегося облака нисходил на него и закрывал от его глаз все окружающее. Со временем он достиг постоянной высокой духовной просветленности, что особенно обнаруживалось, когда он служил Литургию.
Примерно в 980 году преподобный Симеон был поставлен игуменом монастыря святого Маманта и пробыл в этом сане 25 лет. Он привел в порядок запущенное хозяйство обители и благоустроил в ней храм.
Доброта сочеталась у преподобного Симеона со строгостью и неуклонным соблюдением Евангельских заповедей. Так, например, когда его любимый ученик Арсений перебил ворон, которые поклевали размоченный хлеб, игумен заставил его нанизать мертвых птиц на веревку, надеть это "ожерелье" на шею и стоять на дворе. В монастыре святого Маманта замаливал грех некий епископ из Рима, нечаянно убивший юного племянника, и преподобный Симеон неизменно выказывал к нему доброту и внимание.
Строгая монашеская дисциплина, которую все время насаждал преподобный, привела к сильному недовольству среди монастырской братии. Однажды после литургии особенно раздраженные из братьев набросились на него и едва не убили. Когда же Константинопольский патриарх изгнал их из монастыря и хотел предать городским властям, Преподобный вымолил для них прощение и помогал им в жизни в миру.
Около 1005 года преподобный Симеон передал игуменство Арсению, а сам поселился при монастыре на покое. Там он создал свои богословские труды, отрывки из которых вошли в 5-й том "Добротолюбия". Главная тема его творения – сокровенное делание во Христе. Преподобный Симеон учит внутренней брани, способам духовного совершенствования, борьбе против страстей и греховных помыслов. Он написал поучения для монахов, "Деятельные Богословские главы", "Слово о трех образах молитвы", "Слово о вере". Кроме того, преподобный Симеон был выдающимся церковным поэтом. Ему принадлежат "Гимны Божественной любви" – около 70 поэм, полных глубоких молитвенных размышлений.
Учение преподобного Симеона о новом человеке, об "обожении плоти", которым он хотел заменить учение об "умерщвлении плоти" (за что его и назвали Новым Богословом), принималось современниками с трудом. Многие его поучения звучали для них непонятно и чуждо. Это привело к конфликту с высшим константинопольским духовенством, и преподобный Симеон подвергся изгнанию. Он удалился на берег Босфора и основал там обитель святой Марины.
Святой мирно преставился к Богу в 1021 году. Еще при жизни получил он дар чудотворения. Многочисленные чудеса были явлены и после его смерти; одно из них – чудесное обретение его образа. Житие его написано келейником и учеником, преподобным Никитой Стифатом.
[1] 12 октября память празднуем иже во святых отца нашего Симеона, Нового Богослова, пренесенную с 12 марта (Минея-Март. Ч. 1. С. 308)
Песнопения
Тропарь, глас 3
Боже́ственное озаре́ние, Симео́не о́тче,
восприя́в в души́ твое́й,
свети́ло в ми́ре показа́лся еси́ светле́йшее,
разгоня́я того́ мракобе́сие
и всех уверя́я иска́ти, ю́же погуби́ша, благода́ть Ду́ха,
Его́же приле́жно моли́
дарова́ти нам ве́лию ми́лость.
Ин тропарь, глас 1 Вне́шния му́дрости пребыва́я неприча́стен,/ Боже́ственныя же преиспо́лнен был еси́ последи́/ и Но́вый Богосло́в вои́стинну все́ми позна́ся, Симео́не./ Сего́ ра́ди твою́ па́мять, о́тче му́дре, почита́юще, тебе́ вопие́м:/ сла́ва тя просла́вльшему Христу́,/ сла́ва тя ди́вна Показа́вшему,// сла́ва Де́йствующему тобо́ю всем исцеле́ния. Ин тропарь, глас 4 Я́ко Све́та Трисо́лнечнаго зри́тель/ и таи́нственнаго Богосло́вия сказа́тель,/ освяще́нне Симео́не, о́тче наш,/ испроси́ душа́м на́шим просвеще́ния свы́ше/ и страсте́й отгони́ от нас мглу,/ я́ко бо, служи́тель ве́лий Христо́в,// всем подае́ши поле́зная, преподо́бне.
Кондак, глас 3
Све́том просвеще́н Трисо́лнечным, Богому́дре,
Богосло́в яви́лся еси́ Пребоже́ственныя Тро́ицы.
Свы́ше прему́дростию слове́с обогати́вся,
источи́л еси́ Богому́дрия Боже́ственныя струи́,
от ни́хже пию́ще, вопие́м:
ра́дуйся, треблаже́нне Симео́не Богонауче́нне.
Ин кондак, глас 2 Я́ко Богосло́в Бо́жий Боже́ственнейший/ и моли́твенник наш ве́лий ко Го́споду,/ при́сно, Симео́не, моли́ дарова́ти нам грехо́в проще́ние// и живота́ исправле́ние, преподо́бне.
Молитва
Молитва
Творе́ние преподо́бнаго Никоди́ма Святого́рца
О богоно́сный и христоно́сный и духоно́сный о́тче Симео́не, Но́вый Богосло́ве, преподо́бных похвало́, иерее́в сла́во, богосло́вов услажде́ние, моли́твы у́мныя учи́телю, Бо́га просла́вльший и от Бо́га просла́вленный в житии́ твое́м, па́че же по сме́рти, земны́й а́нгеле и небе́сный челове́че, ра́досте духо́вная и душе́вное весе́лие нам, смире́нным твои́м рабо́м и недосто́йным твои́м сыно́м, со благогове́нием и любо́вию пра́зднующим свяще́нную и светоно́сную па́мять твою! Приими́ песнь сию́, ю́же прино́сим ти я́ко да́р ничто́жный и мале́йший, за вели́кия благода́тныя да́ры, и́хже вси́ наслади́хомся, прие́мше я́ от тебе́, из кни́ги свяще́нных слове́с твои́х, и не отве́ржи сию́, я́ко твоего́ великоле́пия недосто́йну: отню́д бо не́мощни есмы́, е́же досто́йно восхвали́ти тя, толи́каго богосло́ва ве́лия. И в житии́ сем сохраня́й нас моли́твами твои́ми от вся́каго вре́да душе́внаго и теле́снаго, ви́димых же и неви́димых враг, моля́ непреста́нно И́же в Тро́ице Бо́га, да сподо́бит и нас, смире́нных, та́инственно ощути́ти посреде́ се́рдца на́шего у́мная де́йства боже́ственныя благода́ти Свята́го Ду́ха, ю́же погуби́хом, увы! нераде́нием на́шим и страстьми́; в бу́дущем же ве́це изба́ви ны твои́ми си́льными хода́тайствы от стра́шнаго осужде́ния и му́ки ве́чныя, и сподо́би на́с ве́чнаго блаже́нства во Христе́ Иису́се, Го́споде на́шем, Ему́же подоба́ет вся́кая сла́ва, че́сть и поклоне́ние, со безнача́льным Его́ Отце́м и Пресвяты́м и Животворя́щим Его́ Ду́хом, ны́не и при́сно и во ве́ки веко́в. Аминь.
Канон
Канон преподобному Симеону Новому Богослову
Минея, 12 Октября.
Глас 4
Песнь 1
Ирмос: Отве́рзу уста́ моя́,
и напо́лнятся Ду́ха,
и сло́во отры́гну Цари́це Ма́тери,
и явлю́ся, све́тло торжеству́я,
и воспою́, ра́дуяся, Тоя́ чудеса́.
Припев: Преподо́бне о́тче Симеóне, моли́ Бо́га о на́с.
Ду́ха орга́н показа́вся, свяще́ннейше Симео́не,
и благода́ти гу́сли доброгласныя,
и мене́ соде́лай благода́ти гу́сли,
я́ко да твоя́ благода́ти воспою́ в благода́ти.
Припев: Преподо́бне о́тче Симеóне, моли́ Бо́га о на́с.
Ум всесве́тлый Богосло́вия яви́ся,
гром Небе́сный дне́сь огласи́ громогла́сная поуче́ния прему́дрости.
Просвети́теся, вси, и внемли́те.
Сла́ва Отцу́ и Сы́ну и Свято́му Ду́ху.
Разуме́ти кто мо́жет твоего́ Боже́ственнаго ве́дения, прему́дре,
высоту́ неудобовосходи́мую, глубину́ неизсле́диму,
неудобозри́мую широту́ и долготу́ вку́пе,
его́же сподо́бился еси́, Богови́днейше?
И ны́не и при́сно и во ве́ки веко́в. Ами́нь.
Богородичен: Оде́ждо нарече́нная ца́рская вопло́щшагося Бо́га Сло́ва, Пречи́стая,
Богоукраше́нную, ю́же погуби́х, оде́жду благода́ти Боже́ственныя
па́ки ми оде́й хода́тайством Твои́м.
Песнь 3
Ирмос: Твоя́ песносло́вцы, Богоро́дице,
живы́й и незави́стный исто́чниче,
лик себе́ совоку́пльшия, духо́вно утверди́,
в Боже́ственней Твое́й сла́ве
венце́в сла́вы сподо́би.
Припев: Преподо́бне о́тче Симеóне, моли́ Бо́га о на́с.
Был еси́ храм освяще́н Бо́жий,
я́коже же́ртву чи́сту, ум Твой име́я, свя́те,
моли́тву – я́ко жертвоприноше́ние же
и я́ко же́ртвенник – пра́вейшее се́рдце твое́.
Припев: Преподо́бне о́тче Симеóне, моли́ Бо́га о на́с.
Моисе́я, спребыва́юща Бо́гу, я́коже дре́вле просла́вися лице́,
та́ко, о́тче, и твое́ лице́, в неприступных пребыва́ющу ти,
Боже́ственным Све́том просла́вися, всесве́тлое, я́коже со́лнце.
Сла́ва Отцу́ и Сы́ну и Свято́му Ду́ху.
Яви́ся во времена́ после́дняя кни́га твоя́, о́тче Симео́не,
ле́ствица, нас возводя́щая от земли́ к Небе́сным,
и звон свяще́ннейший, спя́щих возставля́ющий.
И ны́не и при́сно и во ве́ки веко́в. Ами́нь.
Богородичен: Я́коже мир, в ми́ре яви́лася еси́ в ма́лом, Превелича́йшая Де́во,
от не су́щих бо вся́ческая в ми́ре Созда́вый,
ми́ру Невмести́м, Тебе́ ве́сь вмести́м бы́сть.
Седален, глас 4
Мона́шествующих пра́вило и украси́тель,
по́стников наста́вник и общежи́тельных детоводи́тель
и всех наслажде́ние показа́лся еси́, свяще́ннейше Симео́не Богосло́ве,
те́мже и ны́не моли́ся со дерзнове́нием Зижди́телю о нас,
ве́рою и любо́вию чту́щих па́мять твою́, преподо́бне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Не умолчи́м никогда́, Богоро́дице,
си́лы Твоя́ глаго́лати, недосто́йнии,
а́ще бо Ты не бы предстоя́ла моля́щи,
кто бы нас изба́вил от толи́ких бед,
кто же бы сохрани́л доны́не свобо́дны?
Не отсту́пим, Влады́чице, от Тебе́,
Твоя́ бо рабы́ спаса́еши при́сно от вся́ких лю́тых.
Песнь 4
Ирмос: Неизсле́дный Бо́жий сове́т,
е́же от Де́вы воплоще́ния
Тебе́, Вы́шняго, проро́к Авваку́м усмотря́я, зовя́ше:
сла́ва си́ле Твое́й, Го́споди.
Припев: Преподо́бне о́тче Симеóне, моли́ Бо́га о на́с.
Зако́ном Влады́ки повину́яся, му́дре, за́поведи вся испо́лнил еси́,
в ни́хже обре́л еси́ сокры́та Христа́, сия́ запове́давша,
и Его́ благода́тию обогати́лся еси́.
Припев: Преподо́бне о́тче Симеóне, моли́ Бо́га о на́с.
Язы́к, вити́йствующий ри́торскими хи́тростьми и смышле́ньми,
не мо́жет просла́вити дарова́ния твоя́,
я́же па́че естества́ прия́л еси́, о́тче Симео́не Богопросла́вленне.
Сла́ва Отцу́ и Сы́ну и Свято́му Ду́ху.
Обре́л еси́ неудо́бь обрета́емое дре́вле и ны́не бога́тство, Симео́не Богопросла́вленне,
е́же обожи́тися и восхи́титися уму́ твоему́ от земли́ к Небе́сным.
О, стра́ннаго слы́шания!
И ны́не и при́сно и во ве́ки веко́в. Ами́нь.
Богородичен: Словесе́м Твои́м после́дующе, Пречи́стая,
вси ро́ди, ублажа́ем Тя, я́ко ро́ждшую Блаже́ннаго Бо́га,
блаже́нны показа́вшего умы́ и челове́ки Боже́ственною благода́тию.
Песнь 5
Ирмос: Ужасо́шася вся́ческая
о Боже́ственней сла́ве Твое́й,
Ты бо, Неискусобра́чная Де́во,
име́ла еси́ во утро́бе над все́ми Бо́га
и родила́ еси́ безле́тнаго Сы́на,
всем воспева́ющим Тя
мир подава́ющая.
Припев: Преподо́бне о́тче Симеóне, моли́ Бо́га о на́с.
Любве́ горя́ огне́м в се́рдце твое́м,
ве́сь во изступле́нии был еси́
и Бо́гу еди́ному всему́, возлю́бленному от Тебе́, сраствори́лся еси́,
я́коже еди́н дух бы́ти с Ним, свяще́ннейше.
Припев: Преподо́бне о́тче Симеóне, моли́ Бо́га о на́с.
Се ны́не возсия́ Свет Боже́ственныя благода́ти!
Се безсме́ртие ма́нны живо́тныя всем предлага́ется Симео́н, Боже́ственный оте́ц!
Прииди́те и наслади́теся, живота́ жа́ждущии.
Сла́ва Отцу́ и Сы́ну и Свято́му Ду́ху.
Ри́торов красне́йший показа́вся ду́хом,
я́же о Бо́зе и Боже́ственнем словеса́ боголе́пнейше богосло́вствовал еси́ нам,
те́мже но́вый нарече́ся Богосло́в, тезоимени́те.
И ны́не и при́сно и во ве́ки веко́в. Ами́нь.
Богородичен: О Ма́ти всесве́тлая Све́та Пе́рваго,
просвети́ ду́шу несве́тлую све́том Твои́м,
я́ко да Свет ви́жду па́ки Перве́йший,
И́же из Тебе́ озари́ нас и Тя просвети́вший,
Сей бо от Све́та то́йжде.
Песнь 6
Ирмос: Боже́ственное сие́ и всечестно́е
соверша́юще пра́зднество,
Богому́дрии, Богома́тере,
прииди́те, рука́ми воспле́щим,
от Нея́ ро́ждшагося Бо́га сла́вим.
Припев: Преподо́бне о́тче Симеóне, моли́ Бо́га о на́с.
Реку́ приснотеку́щую Боже́ственныя благода́ти,
от мы́сленнаго Еде́ма истека́ющую,
прииди́те, в пе́снех почти́м и живота́ струя́ми ея́ наслади́мся.
Припев: Преподо́бне о́тче Симеóне, моли́ Бо́га о на́с.
Покая́ния учи́тель, пропове́дник просвеще́ния благода́ти,
свяще́ннейший ны́не Симео́н ублажа́ется,
пожи́вший в ми́ре сем житие́м равноа́нгельским.
Сла́ва Отцу́ и Сы́ну и Свято́му Ду́ху.
Победи́в кре́постию Ду́ха, и труды́ воздержа́ния, и слеза́ми,
Симео́не преподо́бне, стра́сти душе́вныя же и теле́сныя,
к безстра́стию кра́йнему дости́гл еси́.
И ны́не и при́сно и во ве́ки веко́в. Ами́нь.
Богородичен: Бо́га безсе́менно зачала́ еси́, Де́во,
и нетру́дно носи́ла еси́ во утро́бе Твое́й,
нетле́нно же Сего́ родила́ еси́.
О, трегу́баго чудесе́!
Кто не ужасне́тся!
Кондак, глас 3
Све́том просвеще́н Трисо́лнечным, Богому́дре,
Богосло́в яви́лся еси́ Пребоже́ственныя Тро́ицы.
Свы́ше прему́дростию слове́с обогати́вся,
источи́л еси́ Богому́дрия Боже́ственныя струи́,
от ни́хже пию́ще, вопие́м:
ра́дуйся, треблаже́нне Симео́не Богонауче́нне.
Икос
Пресвяты́й Дух, И́же пре́жде ры́бари некни́жныя умудри́
и ри́торы и Богосло́вы их показа́,
Той и в после́дняя времена́, в чи́стей твое́й душе́ всели́вся, Симео́не святе́йший,
ри́тора ри́торов и Богосло́ва тя прему́дра из некни́жнаго и нему́драго соде́ла,
добропи́шуща и ди́вно излага́юща догма́ты пресуще́ственнаго Богосло́вия
и та́инства Боже́ственнаго Све́та
и я́же в души́ та́йно быва́ющая разли́чная де́йства Боже́ственныя благода́ти Свята́го Ду́ха,
и́хже и мы чте́ния наслажда́ющеся, тя ублажа́ем, достоблаже́ннейше о́тче,
я́ко преесте́ственна и Небе́сна челове́ка,
и, святы́й пра́здник твой любо́вию соверша́юще, согла́сно вопие́м:
ра́дуйся, треблаже́нне Симео́не преподо́бне.
Песнь 7
Ирмос: Не послужи́ша тва́ри Богому́дрии
па́че Созда́вшаго,
но, о́гненное преще́ние му́жески попра́вше,
ра́довахуся, пою́ще:
препе́тый отце́в Госпо́дь и Бог, благослове́н еси́.
Припев: Преподо́бне о́тче Симеóне, моли́ Бо́га о на́с.
Излия́ся благода́ть во устне́ твои́ бога́тая свы́ше, о свяще́нне Симео́не,
и полнота́ се́рдца даде́ся ти, я́ко песо́к морски́й,
от тя Умудри́вшаго, я́коже иногда́ Соломо́ну.
Припев: Преподо́бне о́тче Симеóне, моли́ Бо́га о на́с.
Многосве́тлое и всезлато́е благода́ти и сия́нное со́лнце Це́ркве Христо́вы,
честну́ю проходя́щее всю тве́рдь и тре́звости сия́ющее блиста́ньми,
Симео́н да похва́лится!
Сла́ва Отцу́ и Сы́ну и Свято́му Ду́ху.
Слове́снейший слове́сных, Богонауче́нный и духоно́сный,
ты Богосло́в Христо́в показа́лся еси́ конце́м земли́, Симео́не преподо́бне,
напе́рсный вторы́й и Григо́рий, огнедухнове́нный Богосло́в.
И ны́не и при́сно и во ве́ки веко́в. Ами́нь.
Богородичен: Огнеобра́зный престо́ле и пла́меннейшее Христа́ Всецаря́ высо́кое не́бо,
от вся́кия стра́сти ни́зменныя мя свободи́
и бре́ннаго обстоя́ния, Присноде́во Мари́е!
Песнь 8
Ирмос: О́троки благочести́выя в пещи́
Рождество́ Богоро́дичо спасло́ есть,
тогда́ у́бо образу́емое,
ны́не же де́йствуемое,
вселе́нную всю воздвиза́ет пе́ти Тебе́:
Го́спода по́йте, дела́,
и превозноси́те Его́ во вся ве́ки.
Припев: Преподо́бне о́тче Симеóне, моли́ Бо́га о на́с.
Яви́лся еси́ мы́сленный, всеблаже́нне, рай, во Еде́ме Богонасажде́нный,
име́я посреде́ тебе́, я́ко дре́во жи́зни, цвету́щее сладкопло́дное, Христа́ прозя́бшаго, преподо́бне,
о́крест же, я́ко древеса́, крася́щаяся плода́ми же и листа́ми,–доброде́тели вся́ческия.
Припев: Преподо́бне о́тче Симеóне, моли́ Бо́га о на́с.
Уподо́бился еси́ купцу́, о не́мже рече́ Христо́с, Симео́не преподо́бне,
ты бо, я́же стяжа́л еси́, вся прода́л еси́
и би́сер прия́л еси́ многоце́нный, его́же сокры́л еси́ вну́трь се́рдца,
и возвесели́лся еси́ о сем неизрече́нно.
Сла́ва Отцу́ и Сы́ну и Свято́му Ду́ху.
Но́вое не́бо узре́ся, о́тче,
Го́спода, я́коже со́лнце превели́кое, све́тлое и златоза́рнейшее име́я в пе́рсех твои́х,
и, я́коже луну́ всесве́тлую, среброблиста́ющую, благода́ть Ду́ха стяжа́в,
и, я́коже све́тлыя зве́зды, честна́я списа́ния твоя́.
И ны́не и при́сно и во ве́ки веко́в. Ами́нь.
Богородичен: Свята́го Святы́х я́ко ро́ждши, во святы́х при́сно Почива́юща,
и я́ко еди́на воздви́гшая побе́ду на враги́ неви́димыя, Пречи́стая,
ум соблю́дшая па́че смы́сла неразу́мнаго,
нарица́ешися от всех пра́ведно Пресвята́я.
Песнь 9
Ирмос: Всяк земноро́дный
да взыгра́ется, Ду́хом просвеща́емь,
да торжеству́ет же Безпло́тных умо́в естество́,
почита́ющее свяще́нное торжество́ Богома́тере,
и да вопие́т:
ра́дуйся, Всеблаже́нная Богоро́дице,
Чи́стая Присноде́во.
Припев: Преподо́бне о́тче Симеóне, моли́ Бо́га о на́с.
Ра́дуйся ны́не ра́достию вои́стинну безконе́чною и неизрече́нною, Симео́не треблаже́нне,
иде́же селе́ние ра́дости благода́тное,
пла́кася бо зде вре́менне, на Небесе́х уте́шился еси́
и весели́шися ве́чно ра́достным и блаже́нным весе́лием.
Припев: Преподо́бне о́тче Симеóне, моли́ Бо́га о на́с.
Зри́ши сла́дкаго Иису́са лице́м к лицу́,
Его́же пре́жде зре́ти сподо́бился еси́, но зерца́лом в гада́нии.
Наслаждайся у́бо, свя́те, взыгра́й и лику́й, приобща́яся ны́не Возлю́бленнаго тобо́ю,
и нас, почита́ющих тя, помина́й.
Сла́ва Отцу́ и Сы́ну и Свято́му Ду́ху.
Приими́ песнь сию́, ю́же прино́сим, Симео́не преподо́бне,
я́ко ме́ньший дар мно́гаго до́лга, его́же к тебе́ и́мамы,
и награ́ду про́сим дарова́ти, Ду́ха благода́ть, и нам, моли́твами твои́ми,
ю́же зло́бою мно́гою отврати́хом от себе́.
И ны́не и при́сно и во ве́ки веко́в. Ами́нь.
Богородичен: Творе́ния и Созда́теля Посре́дница несре́дственне пребыла́ еси́, Чи́стая,
те́мже и полноту́ всех благода́тей прие́млеши, Всенепоро́чная,
и подае́ши всем челове́ком же и А́нгелом,
отону́дуже пода́ждь сию́ и нам, Влады́чице, непотре́бным рабо́м Твои́м.
Светилен
Богосло́ва вси Симео́на благопохва́лим,
мона́шествующих удобре́ние и свяще́нников сла́ву,
Богосло́вов похвалу́ и ве́рных украше́ние,
благода́ти трубу́ и Це́ркве Христо́вы живоно́сное свети́ло.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Чу́вственное у́бо со́лнце, зау́тро восходя́ще, просвеща́ет мир ве́сь,
дости́гше же за́пада, оба́че своя́ скрыва́ет лучи́.
Ты же, преподо́бне о́тче, со́лнце яви́лся еси́ незаходи́мое,
в нощи́ и во дни свяще́нными словесы́ твои́ми просвеща́я ве́сь мир,
те́мже со́лнца был еси́ чу́вственнаго вельми́ лу́чший.
Акафист
Акафист преподобному Симеону, Новому Богослову
глас 8
Творе́ние Гера́сима мона́ха Микрагианнани́та
Конда́к 1
Подо́бен: Взбра́нной Воево́де:
Яко та́инственнаго богосло́вия боже́ственный орга́н и Све́та Трисо́лнечнаго жили́ще, Богосло́ве Симео́не, тя восхваля́ем. Но я́ко испо́лнь Ду́ха осия́ньми, освети́ луча́ми благода́тей твои́х вопию́щия ти:
Ра́дуйся, преподо́бне Симео́не, све́та боже́ственнаго таи́нниче.
И́кос 1
Ангелоподо́бен яви́лся еси́ доброде́телей преуспея́ньми, богому́дре Симео́не Богосло́ве, и а́нгельским твои́м гла́сом богосло́виши я́же па́че ума́ та́инства. Те́мже твое́й све́тлости дивя́щеся вси вопие́м:
Ра́дуйся, и́мже Тро́ица воспева́ется;
ра́дуйся, и́мже тле́ние попира́ется.
Ра́дуйся, Трисо́лнечнаго Све́та обита́лище;
ра́дуйся, небе́сныя жи́зни созерца́ние.
Ра́дуйся, высото́ боже́ственнаго ра́зума, неудо́бь исправи́мая мно́гими;
ра́дуйся, глубино́ жития́ лу́чшаго, вся́ческия доброде́тели ра́ди.
Ра́дуйся, я́ко показа́лся еси́ Це́ркве сия́ние;
ра́дуйся, я́ко яви́лся еси́ богосло́вов весе́лие.
Ра́дуйся, луче́ невеще́ственных осия́ний;
ра́дуйся, мо́лние проти́ву веще́ственных воображе́ний.
Ра́дуйся, и́мже богосло́ви тайново́дствуются;
ра́дуйся, и́мже новосло́вцы зауща́ются.
Ра́дуйся, преподо́бне Симео́не, све́та боже́ственнаго таи́нниче.
Конда́к 2
О́ко души́ твоея́ житие́м изря́дным очи́стив ди́вно, узре́л еси́ невеще́ственнаго све́та явле́ния, подъе́м и́го Христо́во, преподо́бне, и, впери́вся Ду́хом, Симео́не Боговдохнове́нне, взыва́л еси́: Аллилу́ия.
И́кос 2
Ра́зум боже́ственный имы́й, разу́мне отре́клся еси́ досто́инств мирски́х вседу́шне и, роди́телей любо́вь презре́в, ко оби́тели Студи́йстей ра́дуяся прите́кл еси́: Христу́ бо после́довал еси́, слы́ша от всех сицева́я:
Ра́дуйся, Христо́вы любве́ сокро́вище;
ра́дуйся, све́та невеще́ственнаго прия́телище.
Ра́дуйся, а́нгельскому житию́ подража́яй;
ра́дуйся, бесо́вския де́рзости отвраща́яй.
Ра́дуйся, сосу́де многоце́нный дохнове́ния боже́ственнаго;
ра́дуйся, мечу́ богокова́нный на пристра́стие веще́ственное.
Ра́дуйся, я́ко прия́л еси́ в души́ огнь небе́сный;
ра́дуйся, я́ко всему́дре избра́л еси́ лу́чшее.
Ра́дуйся, страсте́й те́рние исторга́яй;
ра́дуйся, души́ ни́ву обновля́яй.
Ра́дуйся, плодо́в де́лателю безсме́ртных;
ра́дуйся, благ испо́лнивыйся нетле́нных.
Ра́дуйся, преподо́бне Симео́не, све́та боже́ственнаго таи́нниче.
Конда́к 3
Си́лу в по́двизе и во мно́зем разуме́нии прие́м, Симео́не, с небесе́ и в послуша́нии ста́рчестем соверши́вся, плотско́е подчини́л еси́ мудрова́ние, прему́дрости же лу́чшия испо́лнился еси́ и Тро́ице воспева́еши: Аллилу́ия.
И́кос 3
Излия́ся бога́тая благода́ть устна́ма твои́ма, и вла́га ти даде́ся прему́дрости; отню́дуже богосло́вия струи́ Це́ркви источи́л еси́, преподо́бне, и напоя́еши словесы́ твои́ми помышле́ния вопию́щих:
Ра́дуйся, исто́чниче богосло́вия;
ра́дуйся, пла́меню богому́дрия.
Ра́дуйся, реко́ во́д благода́тных;
ра́дуйся, сокро́вище наставле́ний духо́вных.
Ра́дуйся, таи́нниче богопросвеще́нный высо́ких виде́ний;
ра́дуйся, устне́ богодви́жимеи небе́сных помышле́ний.
Ра́дуйся, я́ко вещества́ преше́л еси́ преде́лы;
ра́дуйся, я́ко догма́тов раскры́л еси́ смы́слы.
Ра́дуйся, жи́зни святы́я учи́телю;
ра́дуйся, честны́м а́нгелом ра́вне.
Ра́дуйся, хра́ме Тро́ицы та́инственный;
ра́дуйся, заре́ свети́льника небе́снаго.
Ра́дуйся, преподо́бне Симео́не, све́та боже́ственнаго таи́нниче.
Конда́к 4
Живота́ боже́ственнаго ма́нна, и не́ктар безсме́ртный, и мед, из ка́мене источи́выйся, боготво́рных твои́х уче́ний кни́га быва́ет, ду́ши очища́ющая и к боже́ственному соверше́нию наставля́ющая вопию́щих: Аллилу́ия.
И́кос 4
Взя́лся еси́ к виде́нием высо́ким, по Па́влу, и Ду́хом неизрече́нная узре́л еси́, отню́дуже богосло́в прему́дрый, богосло́вствуя всем преми́рная язы́ком богоречи́вым, Симео́не, яви́лся еси́ вопию́щим:
Ра́дуйся, боже́ственный богосло́ве;
ра́дуйся, всему́дрый богоглаго́льниче.
Ра́дуйся, Иоа́нна вели́каго отпечатле́ние;
ра́дуйся, Григо́рия боже́ственнаго подо́бие.
Ра́дуйся, орга́не многозву́чный высо́ких виде́ний;
ра́дуйся, псалти́рю одушевле́нный светоза́рных наставле́ний.
Ра́дуйся, я́ко вше́л еси́ к незаходи́мому мра́ку;
ра́дуйся, я́ко узре́л еси́ ми́р небе́сный.
Ра́дуйся, ве́рныя изумля́яй словесы́ твои́ми;
ра́дуйся, ду́ши устроя́яй нра́вы твои́ми.
Ра́дуйся, живота́ небе́снаго изъяви́телю;
ра́дуйся, Бо́га нам чу́дный яви́телю.
Ра́дуйся, преподо́бне Симео́не, све́та боже́ственнаго таи́нниче.
Конда́к 5
Боже́ственным раче́нием, о́тче, сла́дце уя́звлен, подъя́л еси́ небому́дренным ра́зумом искуше́ния, ско́рби же и гоне́ния, и я́ко зла́то во огни́ искуси́лся еси́, я́ко а́нгел же, свя́те, всем яви́лся еси́, Христу́ воспева́я: Аллилу́ия.
И́кос 5
Испра́вил еси́ ума́ твоего́ движе́ния, богому́дре, к сла́ве Спа́сове и испо́лнь прему́дрости боже́ственныя показа́лся еси́, Симео́не, Ду́хом Святым, возбужда́я к покая́нию с любо́вию ти вопию́щих:
Ра́дуйся, сто́лпе воздержа́ния;
ра́дуйся, о́бразе терпе́ния.
Ра́дуйся, тайнописа́телю му́дрый обоже́ния;
ра́дуйся, разруши́телю жесточа́йшаго окамене́ния.
Ра́дуйся, уста́ медоточи́вая, ка́плющая боже́ственную сла́дость;
ра́дуйся, о́блаче богонапое́нный, ро́су жи́зни источа́яй.
Ра́дуйся, я́ко апо́стольскую благода́ть изъявля́еши;
ра́дуйся, я́ко спаси́тельное блиста́ние возсиява́еши.
Ра́дуйся, свети́ло благода́ти всесве́тлое;
ра́дуйся, звездо́ Лу́чшаго незаходи́мая.
Ра́дуйся, исто́чниче во́д живоно́сных;
ра́дуйся, све́точу глаго́лов богодохнове́нных.
Ра́дуйся, преподо́бне Симео́не, све́та боже́ственнаго таи́нниче.
Конда́к 6
Очи́стився се́рдцем, по́двига ра́ди духовнаго, испо́лнился еси́ осия́ний боже́ственных, и всесве́тел священноде́йствуя явля́лся еси́ ученико́м твои́м, блаже́нне. Обоже́н бо прича́стием, всехвальне Симео́не, вопия́л еси́: Аллилу́ия.
И́кос 6
Сия́я виде́нии, а́ки живы́й вне́ ми́ра и еди́ному Бо́гу соедини́выйся, огнеобра́зен и богови́ден, и ра́достен лице́м, и кро́ток явля́лся еси́ всем, благогове́йно ти вопию́щим:
Ра́дуйся, цевни́це Уте́шителева;
ра́дуйся, дре́во ра́йское.
Ра́дуйся, и́же в веществе́ и телеси́ безпло́тен;
ра́дуйся, и́же зра́ком и нра́вы равноа́нгелен.
Ра́дуйся, звездо́ многосве́тлая Восто́ка та́инственнаго;
ра́дуйся, колесни́це златоиспещре́нная де́йствия боже́ственнаго.
Ра́дуйся, трубо́, возглаша́ющая песнь спасе́ния;
ра́дуйся, язы́че, подава́яй кре́пость богодарова́нную.
Ра́дуйся, све́та боже́ственнаго сокро́вище;
ра́дуйся, стремле́ния о́гненнаго угаше́ние.
Ра́дуйся, честны́х та́инств зри́телю;
ра́дуйся, Бо́га трисо́лнечнаго служи́телю.
Ра́дуйся, преподо́бне Симео́не, све́та боже́ственнаго таи́нниче.
Конда́к 7
Ве́лий в виде́ниих и честны́х богозре́ниих показа́лся еси́, Симео́не Богосло́ве, моли́твою бо у́мною е́же в Бо́зе восхище́ния та́инство позна́л еси́, блаже́нне, я́ко ины́й Моисе́й, взыва́я: Аллилу́ия.
И́кос 7
Не́ктар живы́й нетле́ния кни́га слове́с твои́х подае́т ве́рным, Богосло́ве, Уте́шитель бо тобо́ю Це́ркви глаго́лет и провещава́ет, и пробужда́ет вся вопия́ти ти, Симео́не, сицева́я:
Ра́дуйся, сла́во Це́ркве;
ра́дуйся, вети́е Богонача́лия.
Ра́дуйся, очища́яй душе́вная оскверне́ния;
ра́дуйся, просвеща́яй на́ша помышле́ния.
Ра́дуйся, пла́меню, пояда́яй те́рния страсте́й;
ра́дуйся, у́ме, открыва́яй у́мная и зря́й.
Ра́дуйся, я́ко разреши́лся еси́ вещества́ плени́ц;
ра́дуйся, я́ко испо́лнился еси́ богото́чных во́д.
Ра́дуйся, зря́й Бо́жия сия́ния;
ра́дуйся, ненави́дяй вра́жия зло́бы.
Ра́дуйся, прему́дрых уче́ний наводне́ние;
ра́дуйся, честны́х дарова́ний гу́сли.
Ра́дуйся, преподо́бне Симео́не, све́та боже́ственнаго таи́нниче.
Конда́к 8
Стра́нное чу́до явля́шеся, о́тче Симео́не, в тебе́, изумля́юще и веселя́ще вся: боже́ственным бо богатя́ся просвеще́нием, прему́дрых и разу́мных яви́лся еси́ прему́дрейший, неве́жда пре́жде, и ны́не всему́дре Бо́гови поя́: Аллилу́ия.
И́кос 8
Весь измени́выйся и к Бо́гови весь отше́д изступле́нием боже́ственнейшим, богому́дре, и по прича́стию обоже́н, к вожделе́нному возбужда́еши обоже́нию, Симео́не богосла́вне, с любо́вию ти вопию́щия:
Ра́дуйся, у́глю огня́ невеще́ственнаго;
ра́дуйся, сия́ние све́та боже́ственнаго.
Ра́дуйся, краснопи́сче обоже́ния всему́дрый;
ра́дуйся, потреби́телю ле́ности держа́внейший.
Ра́дуйся, добро́ту обоже́ния явля́яй де́ятельне;
ра́дуйся, трезве́нию спаси́тельному науча́яй разу́мне.
Ра́дуйся, я́ко наставля́еши и́ночествующих ли́ки;
ра́дуйся, я́ко отвраща́еши враго́в полки́.
Ра́дуйся, на́ше просвеща́яй мудрова́ние;
ра́дуйся, страсте́й прекраща́яй стремле́ния.
Ра́дуйся, ве́рным боже́ственную благода́ть подава́яй;
ра́дуйся, Бо́га за все́х умоля́яй.
Ра́дуйся, преподо́бне Симео́не, све́та боже́ственнаго таи́нниче.
Конда́к 9
Стра́сти душе́вныя очища́я уче́нии твои́ми святы́ми, ко обре́тению на́с пробужда́еши, трезве́нием и моли́твою, о́тче, многоце́ннаго ка́мене живо́тнаго, его́же дре́вле погуби́хом; те́мже ны́не ко Христу́ возопии́м: Аллилу́ия.
И́кос 9
Вети́я богосло́вия та́инственнаго показа́лся еси́, стяжа́в свы́шняго ра́зума: всего́ бо тя Уте́шитель привлече́, о́тче, я́коже благоволи́, и стра́нная и пресла́вная провеща́л еси́ вопию́щим:
Ра́дуйся, гла́се Бо́жий святы́й;
ра́дуйся, молча́ние враго́в соверше́нное.
Ра́дуйся, испо́лнь небе́снаго тайнонауче́ния;
ра́дуйся, проро́че лу́чшаго раче́ния.
Ра́дуйся, вети́е богонауче́нный прему́дрости Бо́жия;
ра́дуйся, мечу́ обоюдуо́стрый проти́ву пре́лести вра́жия.
Ра́дуйся, я́ко учи́ши восхожде́нием боже́ственным;
ра́дуйся, я́ко направля́еши к пути́ спасе́ния.
Ра́дуйся, Христо́ву ме́ртвость нося́й;
ра́дуйся, боже́ственное осия́ние на́м подава́яй.
Ра́дуйся, да́ром сло́ва обогати́выйся;
ра́дуйся, всем боже́ственная глаго́лавый.
Ра́дуйся, преподо́бне Симео́не, све́та боже́ственнаго таи́нниче.
Конда́к 10
Уста́ боже́ственная показа́лся еси́ и Но́вый Богосло́в Христо́вой Це́ркви, богому́дре, в не́йже но́вая и ве́тхая от сокро́вища отры́гну се́рдца твоего́, я́ко кни́жник богоприя́тен, я́коже глаго́лет Спаси́тель, Ему́же пое́ши: Аллилу́ия.
И́кос 10
Све́та невеще́ственнаго боже́ственное зерца́ло яви́лся еси́, прише́д ко открове́нием боже́ственным, Богосло́ве о́тче Симео́не, и вся ве́рныя зове́ши ко причаще́нию благи́м, и́хже обре́л еси́. Те́мже ти жела́нием вопие́м:
Ра́дуйся, уста́ неизрече́нных;
ра́дуйся, о́ко небе́сных.
Ра́дуйся, светоза́рности боже́ственныя сокро́вище;
ра́дуйся, дарова́ний святы́х водворе́ние.
Ра́дуйся, розго́ многоплодоно́сная Лозы́ живо́тныя;
ра́дуйся, гро́зде всеспе́лый равноа́нгельнаго жи́тельства.
Ра́дуйся, я́ко к небе́сному жела́нию воспламеня́еши;
ра́дуйся, я́ко зако́н благода́тный явля́еши.
Ра́дуйся, Христа́ просла́вивый житие́м твои́м;
ра́дуйся, ве́рныя устроя́яй сло́вом твои́м.
Ра́дуйся, о́бразе свята́го стремле́ния;
ра́дуйся, раю́ ди́внаго безстра́стия.
Ра́дуйся, преподо́бне Симео́не, све́та боже́ственнаго таи́нниче.
Конда́к 11
Вше́д, Богосло́ве, в пресве́тлый мрак, прия́л еси́ во скрижа́лех серде́чных богосло́вия та́инственнаго богозапечатле́нныя скрижа́ли в Ду́се, и́миже тайново́дствуемся к боже́ственному раче́нию, вопию́ще: Аллилу́ия.
И́кос 11
Свет, Све́ту трисо́лнечному прибли́жився, яви́лся еси́ ми́ру, я́коже глаго́лет Влады́ка, и просвеща́еши ду́ши на́ша и светотвори́ши твои́ми уче́нии, свя́те, и́миже мра́ка избавля́емся страсте́й, любо́вию ти вопию́ще:
Ра́дуйся, я́ко свет в ми́ре возсия́вый;
ра́дуйся, кре́пость словеси́ прида́вый.
Ра́дуйся, де́йства боже́ственнаго учи́телю;
ра́дуйся, в по́двизе небе́сный челове́че.
Ра́дуйся, трисо́лнечныя благода́ти оби́теле явле́нная;
ра́дуйся, даро́в духо́вных орга́не боголе́пный.
Ра́дуйся, я́ко подъя́л еси́ искуше́ния му́жественне;
ра́дуйся, я́ко подае́ши просвеще́ние богода́нне.
Ра́дуйся, пра́вило преподо́бнаго жития́;
ра́дуйся, свети́льниче неизрече́ннаго обоже́ния.
Ра́дуйся, у́мная движе́ния облиста́яй;
ра́дуйся, на́ша сердца́ просвеща́яй.
Ра́дуйся, преподо́бне Симеоне, све́та боже́ственнаго таи́нниче.
Конда́к 12
Лие́т во́ду боже́ственную, теку́щую, о́тче, в жизнь ве́чную, непреста́нне и благоуха́ние источа́ет живо́тное и весели́т мы́сль на́шу кни́га уче́ний твои́х, в не́йже поуча́ющеся вопие́м: Аллилу́ия.
И́кос 12
Песнососта́вный вене́ц честно́му ве́рху твоему́ прино́сим, ча́да твоя́, о́тче, его́же прие́м оте́чески, лучу́ боже́ственнаго све́та нам да́руй: ве́рно бо к тебе́ притека́ем и не престае́м вопия́ти:
Ра́дуйся, отце́в добро́то;
ра́дуйся, преподо́бных украше́ние.
Ра́дуйся, иере́ев пра́вило свяще́ннейшее;
ра́дуйся, и́ночествующих о́тче боже́ственнейший.
Ра́дуйся, богосло́вов похвало́, Богосло́ве чу́дный;
ра́дуйся, благоче́ствующих утвержде́ние и тайноводи́телю сла́вный.
Ра́дуйся, Це́ркве богоза́рнейший сто́лпе;
ра́дуйся, правосла́вных небесносве́тлый свети́льниче.
Ра́дуйся, и́мже све́та исполня́емся;
ра́дуйся, и́мже страсте́й избавля́емся.
Ра́дуйся, му́дрый вождю́ твои́м ча́дом;
ра́дуйся, и на́м при́сно предста́тельствуяй.
Ра́дуйся, преподо́бне Симео́не, све́та боже́ственнаго таи́нниче.
Конда́к 13
О, боже́ственный о́тче, Симео́не Богосло́ве, свети́ло Христо́вы Це́ркве, прие́м на́ша гла́сы, све́том благода́ти, в тебе́ су́щия, облиста́й благоче́стне пою́щия тя и Тро́ице вопию́щия: Аллилу́ия.
[Се́й конда́к глаго́лется три́жды.]
И́кос 1
Ангелоподо́бен яви́лся еси́ доброде́телей преуспея́ньми, богому́дре Симео́не Богосло́ве, и а́нгельским твои́м гла́сом богосло́виши я́же па́че ума́ та́инства. Те́мже твое́й све́тлости дивя́щеся вси вопие́м:
Ра́дуйся, и́мже Тро́ица воспева́ется;
ра́дуйся, и́мже тле́ние попира́ется.
Ра́дуйся, Трисо́лнечнаго Све́та обита́лище;
ра́дуйся, небе́сныя жи́зни созерца́ние.
Ра́дуйся, высото́ боже́ственнаго ра́зума, неудо́бь исправи́мая мно́гими;
ра́дуйся, глубино́ жития́ лу́чшаго, вся́ческия доброде́тели ра́ди.
Ра́дуйся, я́ко показа́лся еси́ Це́ркве сия́ние;
ра́дуйся, я́ко яви́лся еси́ богосло́вов весе́лие.
Ра́дуйся, луче́ невеще́ственных осия́ний;
ра́дуйся, мо́лние проти́ву веще́ственных воображе́ний.
Ра́дуйся, и́мже богосло́ви тайново́дствуются;
ра́дуйся, и́мже новосло́вцы зауща́ются.
Ра́дуйся, преподо́бне Симео́не, све́та боже́ственнаго таи́нниче.
Конда́к 1
Подо́бен: Взбра́нной Воево́де:
Яко та́инственнаго богосло́вия боже́ственный орга́н и Све́та Трисо́лнечнаго жили́ще, Богосло́ве Симео́не, тя восхваля́ем. Но я́ко испо́лнь Ду́ха осия́ньми, освети́ луча́ми благода́тей твои́х вопию́щия ти:
Ра́дуйся, преподо́бне Симео́не, све́та боже́ственнаго таи́нниче.
Моли́тва преподо́бному Симео́ну Но́вому Богосло́ву
Творе́ние преподо́бнаго Никоди́ма Святого́рца
О, богоно́сный и христоно́сный и духоно́сный о́тче Симео́не, Но́вый Богосло́ве, преподо́бных похвало́, иерее́в сла́во, богосло́вов услажде́ние, моли́твы у́мныя учи́телю, Бо́га просла́вльший и от Бо́га просла́вленный в житии́ твое́м, па́че же по сме́рти, земны́й а́нгеле и небе́сный челове́че, ра́досте духо́вная и душе́вное весе́лие нам, смире́нным твои́м рабо́м и недосто́йным твои́м сыно́м, со благогове́нием и любо́вию пра́зднующим свяще́нную и светоно́сную па́мять твою! Приими́ песнь сию́, ю́же прино́сим ти я́ко да́р ничто́жный и мале́йший, за вели́кия благода́тныя да́ры, и́хже вси́ наслади́хомся, прие́мше я́ от тебе́, из кни́ги свяще́нных слове́с твои́х, и не отве́ржи сию́, я́ко твоего́ великоле́пия недосто́йну: отню́д бо не́мощни есмы́, е́же досто́йно восхвали́ти тя, толи́каго богосло́ва ве́лия. И в житии́ сем сохраня́й нас моли́твами твои́ми от вся́каго вре́да душе́внаго и теле́снаго, ви́димых же и неви́димых враг, моля́ непреста́нно И́же в Тро́ице Бо́га, да сподо́бит и нас, смире́нных, та́инственно ощути́ти посреде́ се́рдца на́шего у́мная де́йства боже́ственныя благода́ти Свята́го Ду́ха, ю́же погуби́хом, увы! нераде́нием на́шим и страстьми́; в бу́дущем же ве́це изба́ви ны твои́ми си́льными хода́тайствы от стра́шнаго осужде́ния и му́ки ве́чныя, и сподо́би на́с ве́чнаго блаже́нства во Христе́ Иису́се, Го́споде на́шем, Ему́же подоба́ет вся́кая сла́ва, че́сть и поклоне́ние, со безнача́льным Его́ Отце́м и Пресвяты́м и Животворя́щим Его́ Ду́хом, ны́не и при́сно и во ве́ки веко́в. Аминь.
