Икона Богородицы Избавительница

Празднование

Тропарь, глас 4

Я́ко пресве́тлая звезда́,
просия́ Боже́ственными чудесы́
святы́й о́браз Твой, Изба́вительнице,
луча́ми благода́ти и милосе́рдия Твоего́
озари́в в нощи́ скорбе́й су́щих.
Пода́ждь у́бо и нам, Всеблага́я Де́во,
избавле́ние от бед,
исцеле́ние неду́гов душе́вных и теле́сных,

спасе́ние и ве́лию ми́лость.

Ин тропарь, глас 4 Избавле́ние Принося́щая всем,/ от се́рдца Тебе́ призыва́ющим,/ принеси́ избавле́ние ско́рое/ и нам, в лю́тых беда́х погиба́ющим// и в Тебе́ Едино́й избавле́ние на́ше на Бо́зе полага́ющим.

Кондак, глас 8

Ко ико́не Твое́й, Пресвята́я Госпоже́,
бе́дствовавшии с ве́рою прите́кше,
заступле́нием Твои́м изба́вишася от злых,
но я́ко Ма́терь Христа́ Бо́га,
и нас свободи́ от лю́тых обстоя́ний,
вре́менных и ве́чных, да зове́м Ти:

ра́дуйся, Изба́вительнице на́ша от всех бед.

Молитва

О, Ма́ти Бо́жия, по́моще и защи́та на́ша, егда́ попро́сим, бу́ди изба́вительнице на́ша, на Тя бо упова́ем и всегда́ вседу́шно Тя призыва́ем: умилосе́рдися и помози́, пожале́й и изба́ви, приклони́ у́хо Твое́ и на́ши ско́рбныя и сле́зныя моли́твы приими́, и я́коже хо́щеши, успоко́й и обра́дуй нас, лю́бящих Твоего́ Безнача́льного Сы́на и Бо́га на́шего. Ами́нь.

Канон Пресвятой Богородице перед иконой «Избавительница»

Минея, 4 Апреля.

Глас 4

Песнь 1

Ирмос: Отве́рзу уста́ моя́,
и напо́лнятся Ду́ха,
и сло́во отры́гну Цари́це Ма́тери,
и явлю́ся, све́тло торжеству́я,
и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Христе́, Све́те и́стинный,
пода́ждь ми просвеще́ние восписа́ти похва́льная Пресвяте́й Ма́тери Твое́й,
и воспою́ Тоя́ вели́кое к рабо́м Твои́м благоутро́бие.

Припев: Пресвята́я Богоро́дице, спаси́ на́с.

Горе́, вы́ну сла́вимая,
благоволи́ла еси́, Госпоже́, и ни́зу среди́ бе́дных просла́вити и́мя Свое́
благода́тию чуде́с от святы́я ико́ны Твоея́, Изба́вительнице.

Припев: Пресвята́я Богоро́дице, спаси́ на́с.

Егда́ обита́телие ве́си, отча́явшеся от истребля́вшаго труды́ их пру́жия,
притеко́ша со слеза́ми ко о́бразу Твоему́, Де́во,
а́бие улучи́ша избавле́ние
и, ра́дующеся, просла́виша ми́лость Твою́.

Припев: Пресвята́я Богоро́дице, спаси́ на́с.

Десни́ца Твоя́, Влады́чице, просла́вися в кре́пости,
и мно́жеством ми́лости Твоея́ яви́лася еси́ Покрови́тельница и Изба́вительница
во спасе́ние бе́дствовавших.

Сла́ва Отцу́ и Сы́ну и Свято́му Ду́ху.

Упова́ние христиа́ном, Помо́щнице су́щим в ско́рбех,
моли́ Сы́на Твоего́ изба́витися вся́ких бед
пра́зднующим свято́му о́бразу Твоему́, Изба́вительнице.

И ны́не и при́сно и во ве́ки веко́в. Ами́нь.

Ра́дуйся, бога́тство неистощи́мое ни́щих и си́рых Засту́пнице,
ра́дуйся, спаса́ющая ве́рою и́мя Твое́, Де́во, призыва́ющих,
ра́дуйся, уны́ния отгна́ние и ра́дости Пода́тельнице.

Песнь 3

Ирмос: Твоя́ песносло́вцы, Богоро́дице,
живы́й и незави́стный Исто́чниче,
лик себе́ совоку́пльшия, духо́вно утверди́,
в Боже́ственней Твое́й сла́ве
венце́в сла́вы сподо́би.

Припев: Пресвята́я Богоро́дице, спаси́ на́с.

Госпо́дь мертви́т, его́же хо́щет, и живи́т Тобо́ю, Ма́ти Живота́,
исполня́я моли́твы моля́щихся Тебе́,
низведе́нных во ад возво́дит
и от гно́ища страсте́й воздвиза́ет Твои́м всемо́щным предста́тельством.

Припев: Пресвята́я Богоро́дице, спаси́ на́с.

Заме́длившу иере́ю напу́тствовати умира́юща о́трока,
егда́ о уме́ршем помоли́шася к Тебе́, Всеблага́я,
и осени́ша ико́ною Твое́ю, Изба́вительнице,
внеза́пу отроча́ оживе́ и воста́ здра́во
Твое́ю и Сы́на Твоего́ животво́рною си́лою.

Припев: Пресвята́я Богоро́дице, спаси́ на́с.

Живоно́сный Тя и всецеле́бный исто́чник, Богоневе́сто, позна́хом, раби́ Твои́:
о́бразом бо Твои́м, Изба́вительнице,
жи́знь и здра́вие подае́ши душе́вное и теле́сное
и от бед избавля́еши прося́щих Твоего́ заступле́ния.

Припев: Пресвята́я Богоро́дице, спаси́ на́с.

Нача́ло Христо́вых чуде́с Ты еси́, Пречу́дная Де́во,
те́мже чудеса́ о́браза Твоего́ сла́вяще дне́сь, Изба́вительнице, мо́лимся Тебе́:
посети́ рабы́ Твоя́ благода́тию Твое́ю,
неду́гов, зол и ве́чныя сме́рти изыма́ющи ны.

Сла́ва Отцу́ и Сы́ну и Свято́му Ду́ху.

Греха́ми умерщвля́емую ду́шу мою́ оживотвори́, Влады́чице,
я́ко по Бо́зе вся могу́щая,
и обдержа́щих мя страсте́й изба́ви,
да, плене́ния стра́стнаго свобожде́н,
благода́рственно Тя велича́ю.

И ны́не и при́сно и во ве́ки веко́в. Ами́нь.

Напра́ви, Чи́стая, к тишине́ безстра́стия во глубину́ зол влеко́ма раба́ Твоего́
и не попусти́ ми поги́бнути, прося́щему Твоея́, Изба́вительнице, ми́лости,
Тобо́ю бо ве́рнии, покрыва́еми, спаса́ются.

Седален, глас 3

Пресвяте́и ру́це Твои́,
и́миже носи́ла еси́ Нося́щаго вся,
простри́ к Нему́, Присноде́во Изба́вительнице,
и моли́твами Твои́ми изба́ви ны гне́ва Его́, грех ра́ди дви́жимаго,
отводя́щи лю́тая наведе́ния и тех ра́ди быва́ющую лю́дем тугу́ и уны́ние,
и спаси́ в ми́ре ду́ши на́ша.

Песнь 4

Ирмос: Седя́й в сла́ве на Престо́ле Божества́
на о́блаце ле́гце,
прии́де Иису́с Пребоже́ственный
Нетле́нною Дла́нию и спасе́ зову́щия:
сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Разуме́ша ве́рнии дела́ бла́гости Твоея́, Влады́чице,
и вни́де ра́достный тре́пет в сердца́ их,
внегда́ бо смути́тися душа́м их от бед и неду́гов,
ми́лость Свою́, Благослове́нная, помяну́вши,
ико́ною Твое́ю изшла́ еси́ на избавле́ние люде́й Твои́х.

Припев: Пресвята́я Богоро́дице, спаси́ на́с.

Уве́девшии о пресла́вном чудеси́ могу́щества Твоего́, Богоро́дице, во оживле́нии о́трока,
устреми́шася от разли́чных мест к о́бразу Твоему́, Изба́вительнице,
и, прие́млюще исцеле́ния, с весе́лием Тя велича́ху.

Припев: Пресвята́я Богоро́дице, спаси́ на́с.

Милосе́рда су́щи, Чи́стая,
я́ко Всеблаго́е Сло́во на спасе́ние на́ше воплоти́вшая,
по́мощи и избавле́ния Твоего́ не лиши́ нас,
с ве́рою притека́ющих к чудотво́рней ико́не Твое́й, Изба́вительнице.

Припев: Пресвята́я Богоро́дице, спаси́ на́с.

Ты похвала́ ве́рных, Ма́ти Всепе́тая,
Ты киво́т святы́ни, освяще́ние подаю́щая,
Ты целе́б исто́чник неисчерпа́емый
и от бед Изба́вительница моля́щихся Тебе́ пред святы́м о́бразом Твои́м.

Сла́ва Отцу́ и Сы́ну и Свято́му Ду́ху.

Неду́гами угнета́емых и искуше́ний бори́теля,
избавля́й нас от сих, Богороди́тельнице,
и в час исхо́да не преда́ждь душ на́ших на одоле́ние супоста́том,
да воспева́ем вели́чия Твоя́.

И ны́не и при́сно и во ве́ки веко́в. Ами́нь.

Непобеди́мая Воево́до вожде́й и во́инств христиа́нских,
христолюби́вое во́инство, щито́м ве́ры и Креста́ вооруже́нных, победоно́сны явля́й,
избавля́ющи от всех наве́тов вра́жиих.

Песнь 5

Ирмос: Ужасо́шася вся́ческая
о Боже́ственней сла́ве Твое́й:
Ты бо, Неискусобра́чная Де́во,
име́ла еси́ во утро́бе над все́ми Бо́га
и родила́ еси́ Безле́тнаго Сы́на,
всем воспева́ющим Тя
мир подава́ющая.

Припев: Пресвята́я Богоро́дице, спаси́ на́с.

В ско́рби ма́ле наказа́ние Сы́на Твоего́ бы́сть обита́телем ве́си,
и, поболе́вше, призва́ша Тя, Ма́терь щедро́т,
и Тобо́ю возста́ша от отча́яния и возвесели́шася,
роса́ бо благода́ти, я́же от ико́ны Твоея́, исцеле́ние им бы́сть.

Припев: Пресвята́я Богоро́дице, спаси́ на́с.

Благода́ть точа́щую ико́ну Твою́, Изба́вительнице,
ве́рному Твоему́ рабу́, с собо́ю всегда́ носи́вшу,
возбрани́ла еси́, Госпоже́, скрыва́ти ю от ве́рных,
да избавля́ются от бед и неду́гов прибега́ющии к Тебе́.

Припев: Пресвята́я Богоро́дице, спаси́ на́с.

Тобо́ю, Всеми́лостивая Влады́чице,
свобожде́ние от лю́тых ниспосла́ся,
прите́кшим с ве́рою ко свято́му о́бразу Твоему́,
наде́жда же, покро́в и неруши́мо весе́лие дарова́ся скорбя́щим, Богора́дованная.

Припев: Пресвята́я Богоро́дице, спаси́ на́с.

Ужасо́шася бе́дствовавшии о бога́тстве даро́в Твои́х, Де́во,
в чудесе́х от о́браза Твоего́,
к нему́же припа́дающе, ра́достно взыва́ху:
вои́стинну Ты еси́ Изба́вительница от всех бед.

Сла́ва Отцу́ и Сы́ну и Свято́му Ду́ху.

Ра́досте А́нгелов и челове́ков,
свобо́дна мя печа́лей жите́йских сотвори́
и бу́дущия тесноты́ изба́ви и ве́чнаго огня́
ма́терним дерзнове́нием Твои́м, Всеблага́я, от бед Изба́вительнице.

И ны́не и при́сно и во ве́ки веко́в. Ами́нь.

Богоизбра́нная Присноде́во, в руне́ ороше́нном предви́денная дре́вле,
окропи́ росо́ю благода́ти изсо́хшую зе́млю се́рдца моего́
и плодоно́сну соде́лай ду́шу мою́ благи́м дея́нием и зре́нием.

Песнь 6

Ирмос: Боже́ственное сие́ и всечестно́е
соверша́юще пра́зднество,
Богому́дрии, Богома́тери
прииди́те, рука́ми воспле́щим,
от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Кий ум пости́гнет, Госпоже́, держа́ву кре́пости Сы́на Твоего́,
изве́дша лю́ди Своя́ из земли́, ея́же вереи́ закле́пи ве́чнии,
и Тебе́, Ма́терь Свою́, соде́лавша враго́м стра́шну,
из чре́ва а́дова избавля́ющую призыва́ющия Тя.

Припев: Пресвята́я Богоро́дице, спаси́ на́с.

Кий язы́к изъясни́т всепобежда́ющую си́лу Твою́, Влады́чице!
Еди́но бо то́чию подо́бие лица́ Твоего́,
я́ко о́гнь, опаля́ет зло́бныя ду́хи,
лю́ди же Твоя́ врачу́ет и ра́дует,
его́же благогове́йно лобыза́ем, раби́ Твои́.

Припев: Пресвята́я Богоро́дице, спаси́ на́с.

Ко́е сло́во изобрази́т вели́чие чуде́с Твои́х,
Всеми́лостивая от бед Изба́вительнице!
То́чию бо принесе́ся свята́я ико́на Твоя́ к лю́те му́чимей бе́сом,
а́бие исчезе́ мучи́тель,
и исцеле́нная велегла́сно просла́ви си́лу Твою́.

Припев: Пресвята́я Богоро́дице, спаси́ на́с.

От оби́лия благода́ти, прису́щия о́бразу Твоему́, Богоневе́сто,
коли́ко бесну́емых и ины́х неду́жных Тобо́ю исцеле́ша,
коли́ко скорбя́щих на весе́лие приложи́ся,
с ве́рою прите́кших ко ико́не Твое́й.

Сла́ва Отцу́ и Сы́ну и Свято́му Ду́ху.

О, вели́каго милосе́рдия Твоего́, Богороди́тельнице,
благоволи́вшая чудотво́рным о́бразом Твои́м пребыва́ти у нас!
Что воздади́м Ти за благода́ть, ю́же яви́ла еси́ нам,
дарова́вши хра́му сему́ толи́ко свяще́нное бога́тство?

И ны́не и при́сно и во ве́ки веко́в. Ами́нь.

О Всепе́тая Ма́ти, держа́вный покро́ве ми́ра!
Храни́ от всех бед чту́щия Тя,
спобори́ им на враги́ христиа́нския необори́мою си́лою Твое́ю.

Кондак, глас 8

Ко ико́не Твое́й, Пресвята́я Госпоже́,
бе́дствовавшии с ве́рою прите́кше,
заступле́нием Твои́м изба́вишася от злых,
но я́ко Ма́терь Христа́ Бо́га,
и нас свободи́ от лю́тых обстоя́ний,
вре́менных и ве́чных, да зове́м Ти:
ра́дуйся, Изба́вительнице на́ша от всех бед.

Икос

Соше́дшиися во хра́ме сем,
просла́вим пресла́вный храм Божества́, Пресвяту́ю Де́ву,
пред о́бразом Ея́ со благогове́нием вопию́ще:
ра́дуйся, Боже́ственныя сла́вы селе́ние;
ра́дуйся, Влады́чице Небеси́ и земли́.
Ра́дуйся, неистощи́мый исто́чниче чуде́с;
ра́дуйся, всемо́щное врачева́ние неду́жных.
Ра́дуйся, Прогони́тельнице де́монов;
ра́дуйся, мертвеце́в оживле́ние.
Ра́дуйся, оби́телей Горы́ Твоея́ покро́ве;
ра́дуйся, и́ноков те́плое предста́тельство.
Ра́дуйся, ве́рных Засту́пнице;
ра́дуйся, спасе́ние ро́да христиа́нскаго.
Ра́дуйся, Е́юже возсиява́ет ра́дость;
ра́дуйся, Е́юже печа́ль престае́т.
Ра́дуйся, Изба́вительнице на́ша от всех бед.

Песнь 7

Ирмос: Не послужи́ша тва́ри Богому́дрии
па́че Созда́вшаго,
но, о́гненное преще́ние му́жески попра́вше,
ра́довахуся, пою́ще:
препе́тый отце́в Госпо́дь и Бог, благослове́н еси́.

Припев: Пресвята́я Богоро́дице, спаси́ на́с.

Сотвори́ с на́ми по мно́жеству ми́лости Твоея́, Богоро́дице,
и изми́ нас по чудесе́м Твои́м,
и да постыдя́тся от вся́кия си́лы, и кре́пость да сокруши́тся
явля́ющих зла́я рабо́м Твои́м, о Тебе́ пою́щим:
отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Тебе́, Де́во, халде́йская пе́щь проо́браз иму́щи,
о́троки росо́ю прохлажда́ше посреде́ пла́мене.
Те́мже и нас, о́браз Твой иму́щих, во огни́ искуше́ний прохлади́
и неопали́мы соблюди́ благода́тию Сы́на Твоего́, да пое́м Ему́:
отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Седмери́цею разжига́емыя стре́лы седми́ смертоно́сных страсте́й,
я́же испуска́ет возстаю́щий на ны седмигла́вый змий диа́вол,
угаси́ и сокруши́, Влады́чице,
да, я́коже о́троцы неврежде́ннии, пое́м:
отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Седмисве́щный свети́льник разуме́ем Тя, Богоблагода́тная Мари́е,
седмию́ дара́ми Ду́ха светя́щий ве́рным,
облагодати́ у́бо и уще́дри пою́щих о Тебе́, Пода́телю благи́х:
отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Тя, Госпоже́, иму́ще милосе́рдия неиждива́емое сокро́вище
и святу́ю ико́ну Твою́, Изба́вительнице,
в покро́в оби́тели и во избавле́ние от бед,
Сы́ну Твоему́ о Тебе́ пое́м:
отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Я́ко Царя́ ца́рствующих Ма́терь, мо́лим Тя, Влады́чице:
оте́честву на́шему и христолюби́вому во́инству бу́ди несокруши́мая кре́пость,
подаю́щи им блага́я, пою́щим:
отце́в Бо́же, благослове́н еси́.

Песнь 8

Ирмос: О́троки благочести́выя в пещи́
Рождество́ Богоро́дичо спасло́ е́сть;
тогда́ у́бо образу́емое,
ны́не же де́йствуемое,
вселе́нную всю воздвиза́ет пе́ти Тебе́:
Го́спода по́йте, дела́,
и превозноси́те Его́ во вся ве́ки.

Припев: Пресвята́я Богоро́дице, спаси́ на́с.

Я́коже трие́ о́троцы, храни́мии во огни́, поя́ху и благословля́ху Бо́га,
та́ко и ве́рнии, Тобо́ю, Благослове́нная, изба́вльшеся от огня́, бед и неду́гов,
вся дела́,– взыва́ху,– Го́спода по́йте
и превозноси́те Его́ во ве́ки.

Припев: Пресвята́я Богоро́дице, спаси́ на́с.

Я́коже от зловре́дных пру́гов изба́вила еси́
пре́жде к о́бразу Твоему́ прите́кших, Богоро́дице,
та́ко и ны́не не преста́й от тех и вся́каго вре́да избавля́ти
оби́тель сию́, Го́ру, Росси́ю и повсю́ду правосла́вныя,
да сла́вим Тя во ве́ки.

Припев: Пресвята́я Богоро́дице, спаси́ на́с.

Я́коже уме́рша, осене́нна ико́ною Твое́ю, Де́во, оживи́ла еси́,
оживотворя́й и нас, отводя́щи от смертоно́снаго пути́
и наставля́ющи на стезю́ ве́чнаго живота́,
да, спаса́еми Тобо́ю, превозно́сим Тя во ве́ки.

Припев: Пресвята́я Богоро́дице, спаси́ на́с.

Я́коже повеле́ла еси́ рабу́ Твоему́ не скрыва́ти от ве́рных благода́ти,
точа́щияся от свята́го о́браза Твоего́, Всеблага́я Изба́вительнице,
источа́й сию́ и нам, рабо́м Твои́м,
да прославля́ем Тя во ве́ки.

Сла́ва Отцу́ и Сы́ну и Свято́му Ду́ху.

Я́коже мно́гих исцели́ла еси́, Госпоже́,
от мучи́тельства де́монскаго и ины́х неду́гов,
и нас свобожда́й боле́зней душе́вных и теле́сных и от всех се́тей вра́жиих,
да воспева́ем Тя во ве́ки.

И ны́не и при́сно и во ве́ки веко́в. Ами́нь.

Я́коже А́нгел воодушеви́ Гедео́на на побежде́ние мадиа́млян,
воодушевля́й, Всецари́це, и сла́вящия Тя,
вся́кое шата́ние враго́в низлага́ющи,
да благословля́ем Тя во ве́ки.

Песнь 9

Ирмос: Всяк земноро́дный
да взыгра́ется, Ду́хом просвеща́емь,
да торжеству́ет же Безпло́тных умо́в естество́,
почита́ющее свяще́нное торжество́ Богома́тере,
и да вопие́т:
ра́дуйся, Всеблаже́нная Богоро́дице,
Чи́стая Присноде́во.

Припев: Пресвята́я Богоро́дице, спаси́ на́с.

И́ночествующии сея́ оби́тели,
к Ма́тери Го́спода Вы́шняго притеце́м дне́сь,
моля́щеся пред чудотво́рною ико́ною Ея́,
е́юже посети́ скорбя́щия и сотвори́ избавле́ние лю́дем Свои́м.

Припев: Пресвята́я Богоро́дице, спаси́ на́с.

Ще́драго ро́ждшая и Ми́лостиваго Влады́ку и Изба́вителя всех,
покажи́, Всеблага́я, щедро́ты Твоя́ на нас, пра́зднующих честно́му о́бразу Твоему́,
и сотвори́ избавле́ние от бед лю́дем Свои́м.

Припев: Пресвята́я Богоро́дице, спаси́ на́с.

В Тебе́, Богоро́дице, воздви́же Сын Твой рог спасе́ния нам,
укрепи́ у́бо рабы́ Твоя́ служи́ти Ему́
преподо́бием и пра́вдою пред Ним вся дни живота́ на́шего
и твори́ избавле́ние от бед лю́дем Свои́м.

Припев: Пресвята́я Богоро́дице, спаси́ на́с.

При́зри, Де́во Изба́вительнице, на моли́твенныя воздыха́ния на́ша,
не оста́ви ны безпо́мощны во искуше́ниих
и бу́ди Моли́твенница ко Го́споду,
да пода́ст грехо́м на́шим проще́ние и избавле́ние от бед лю́дем Свои́м.

Сла́ва Отцу́ и Сы́ну и Свято́му Ду́ху.

Госпоже́ Всеми́лостивая,
не преста́й Го́ру Твою́ и оби́тель сию́,
Росси́ю и вся правосла́вныя посеща́ти благода́тию
и твори́ти избавле́ние от бед лю́дем Свои́м.

И ны́не и при́сно и во ве́ки веко́в. Ами́нь.

Хода́таицу о нас, Сло́ве Бо́жий, предлага́ем Ма́терь Твою́,
от Нея́же воплоти́лся еси́ на спасе́ние на́ше,
моли́твами Ея́ прости́ и поми́луй нас, Незло́биве, согреша́ющих Тебе́,
и сотвори́ избавле́ние от бед лю́дем Твои́м.

Светилен

Ма́ти Све́та у́мнаго,
просвети́ песносло́вящия Тя пред лучеза́рною ико́ною Твое́ю,
мрак страсте́й на́ших прожени́
и осия́ния пра́ведных прича́стники ны сотвори́
Твои́м предста́тельством, Преблагослове́нная.

Акафист Пресвятой Богородице перед иконой «Избавительница»

Конда́к 1.

Возбрани́ враго́м на́шим озлобля́ти на́с и от Го́спода на́шего отлучи́ти коне́чне и научи́ на́с пе́ти Тебе́, Богоро́дице, ве́село:

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

И́кос 1.

А́нгелов мно́жество по Твоему́, Ма́ти на́ша, повеле́нию ополча́ются на избавле́ние на́ше гро́зно, Ты́ же приими́ моли́тву сию́:

Ра́дуйся, А́нгелов на спасе́ние на́ше посыла́ющая;
ра́дуйся, Цари́це го́рних чино́в, небе́сную и́х по́мощь на́м да́рующая.

Ра́дуйся, А́нгелом храни́ти на́с повелева́ющая;
ра́дуйся, во́инством А́нгельским враго́в на́ших поража́ющая.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 2.

Ви́дят бе́дствующии толи́кую и мно́гую по́мощь Твою́ серде́чно Тя́ призыва́ющим и наставля́ются те́м пе́ти Сы́ну Твоему́ непреста́нно: Аллилу́иа.

И́кос 2.

Разуме́ют мно́зи, я́ко ми́рови дарова́ Тя́ Сы́н Тво́й Изба́вительницу бе́дствующим, те́мже пое́м Ти́ си́це:

Ра́дуйся, бе́дствующих Ма́ти;
ра́дуйся, стра́ждущих утеше́ние.

Ра́дуйся, боля́щих исцеле́ние;
ра́дуйся, ненаде́жных наде́ждо.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 3.

Си́ла Вы́шняго дарова́ся Ти́ на по́мощь и спасе́ние ми́ру и на́с, в беда́х погиба́ющих. И кто́ же Тобо́ю не изба́влен бы́сть, и кто́ же не пое́т Сы́ну Твоему́: Аллилу́иа.

И́кос 3.

Иму́щи непостижи́мую любо́вь к ро́ду челове́чу, ка́я воздыха́ния не прия́ла еси́, ки́я сле́зы не оте́рла еси́, и кого́ не прину́дила еси́ призыва́ти Тя́, вопию́ще:

Ра́дуйся, бе́дствующих ско́рое услы́шание;
ра́дуйся, печа́льных и ско́рбных утеше́ние.

Ра́дуйся, погиба́ющих бы́строе спасе́ние;
ра́дуйся, плене́нных свобожде́ние.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 4.

Бу́ря несча́стий налете́ на ны́, спаси́ у́бо на́с погиба́ющих, Изба́вительнице на́ша, бу́рю поги́бельную на земли́ укроти́вшая и прие́млющая на́шу пе́снь: Аллилу́иа.

И́кос 4.

Слы́шаша челове́честии ро́ди всю́ Твою́ к христиа́ном ди́вную любо́вь и Твое́ мо́щное избавле́ние от вся́ких находя́щих на ни́х лю́тых, научи́шася пе́ти Тебе́:

Ра́дуйся, челове́ческаго ро́да от бе́д избавле́ние;
ра́дуйся, бу́рь жите́йских прекраще́ние.

Ра́дуйся, уны́ния прогони́тельнице;
ра́дуйся, ра́дости по ско́рби на́м пода́тельнице.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 5.

Боготе́чней звезде́ подо́бящася, мра́к и темноту́ в гре́шных сердца́х разгоня́еши, да во све́те Твоея́ любве́ у́зрят Го́спода и воспою́т Ему́: Аллилу́иа.

И́кос 5.

Ви́деша лю́дие росси́йстии Твое́ неча́янное от многоразли́чных бе́д избавле́ние, ра́достно пою́т Тебе́ си́це:

Ра́дуйся, в беда́х на́ша помо́щнице;
ра́дуйся, скорбе́й на́ших отъя́тие.

Ра́дуйся, печа́лей на́ших отгна́ние;
ра́дуйся, в ско́рбех на́ших утеше́ние.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 6.

Пропове́дуют по́мощь и любо́вь Твою́, Ма́ти, исцеле́ннии, уте́шеннии, обра́дованнии и спасе́ннии Тобо́ю от бе́д и пою́т Твоему́ высокодержа́вному Сы́ну: Аллилу́иа.

И́кос 6.

Возсия́ на́м Све́т спасе́ния во мгле́ поги́бели, окружи́вшей на́с, и наста́ви пе́ти Тебе́:

Ра́дуйся, мглу́ грехо́в разгоня́ющая;
ра́дуйся, тьму́ грехо́вную потребля́ющая.

Ра́дуйся, мра́к души́ моея́ просвеща́ющая;
ра́дуйся, све́том ра́дости ду́ши ободря́ющая.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 7.

Хотя́щим на́м коне́чному отча́янию преда́тися, отвсю́ду беда́м належа́щим, помы́слихом же о Тебе́, Изба́вительнице, и ободри́хомся, и уте́шихомся, пою́ще Сы́ну Твоему́: Аллилу́иа.

И́кос 7.

Но́вую и нежда́нную показа́ на́м ми́лость Свою́, под держа́вную руку́ Твою́ на́с восприя́вши, и отвсю́ду вопие́м Ти́, Богоро́дице:

Ра́дуйся, Цари́це держа́вная;
ра́дуйся, и на́с под Твою́ держа́ву восприя́вшая.

Ра́дуйся, защи́ту Твою́ на́м дарова́вшая;
ра́дуйся, враго́в на́ших порази́вшая.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 8.

Стра́нное чу́до: на поги́бель обрече́нных и в ну́ждах томя́щихся безчи́сленных, внеза́пу спасе́ние и избавле́ние получа́ют от Тебе́, Вселю́бящей, пою́ще Бо́гу: Аллилу́иа.

И́кос 8.

Вси́ су́щии во мра́це скорбе́й, вси́ обурева́емии несча́стий бу́рею, прииди́те к до́брому приста́нищу и на́шему поможе́нию, покро́ву Де́вы Изба́вительницы, вопию́ще Е́й:

Ра́дуйся, ра́достей исто́чниче;
ра́дуйся, печа́лей прогна́ние.

Ра́дуйся, бе́д избавле́ние;
ра́дуйся, вся́ческаго поко́я пода́тельнице.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 9.

Все́ существо́ челове́ческое хва́лит Тя́, вси́ воспева́ют Тя́, многоразли́чное избавле́ние несу́щую, вме́сто печа́лей ра́дость подаю́щую пою́щым Сы́ну Твоему́ и Бо́гу: Аллилу́иа.

И́кос 9.

Вети́и многоу́мнии обезу́меша, ви́дяще Твое́ ско́рое и чуде́сное от бе́д стра́ждущих избавле́ние, и умолко́ша, на́м пою́щим Ти́:

Ра́дуйся, чудесы́ ми́р удиви́вшая;
ра́дуйся, чудесы́ на́с укрепи́вшая.

Ра́дуйся, безбо́жие чудеса́ми истреби́вшая;
ра́дуйся, враго́в си́лою Бо́жиею посрами́вшая.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 10.

Спасти́ хотя́ вся́ку ду́шу челове́чу, все́ю любо́вию пече́шися о не́й, до́ндеже научи́ши ю́ пе́ти Сы́ну Твоему́: Аллилу́иа.

И́кос 10.

Стено́ю ми́р христиа́нский храня́щей и вся́ку ду́шу от враго́в огражда́ющей яви́ся ико́на Твоя́, Изба́вительнице, в ми́ре правосла́внем и чудесы́ просла́вися, Тебе́ лю́дем Бо́жиим воспева́ющим:

Ра́дуйся, наста́внице на́ша, святу́ю го́ру Афо́нскую в жре́бий Себе́ избра́вшая;
ра́дуйся, Изба́вительнице на́ша, Твои́м благослове́нием Но́вый Афо́н благослови́вшая.

Ра́дуйся, весе́лие на́ше, зна́мение сою́за неразры́внаго уде́лов Твои́х земны́х ико́ною Твое́ю яви́вшая;
ра́дуйся, ве́чная ра́досте на́ша, чуде́сным попече́нием к ю́ной Новоафо́нской оби́тели благоволи́вшая.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 11.

Пе́ние непреста́нное прино́сят Ти́, Влады́чице, Тобо́ю изба́вленнии и Тобо́ю па́ки ра́дость обре́тшии и Боже́ственному Сы́ну Твоему́ пою́т ра́достно: Аллилу́иа.

И́кос 11.

Светосия́ющим свети́лом лучеза́рным во мра́це греха́ яви́ся на́м ико́на Твоя́, Изба́вительнице, наставля́ющая на́с пе́ти Тебе́:

Ра́дуйся, от гла́да на́с избавля́ющая;
ра́дуйся, вредонося́щее естество́ от расте́ний отгоня́ющая.

Ра́дуйся, посе́вы и леса́ и вся́ расту́щая от поги́бели спаса́ющая;
ра́дуйся, земледе́льцев скорбя́щих утеше́ние и труда́ и́х благослове́ние.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 12.

Благода́ть от ико́ны Твоея́, Изба́вительнице, теку́щая, исцеле́ний струи́ оби́льно подаю́щая и сердца́ весе́лием оживля́ющая, побежда́ет все́х во́лею пе́ти Тебе́, Ма́ти, и Сы́ну Твоему́ и Бо́гу: Аллилу́иа.

И́кос 12.

Воспева́ем исцеле́ния, от святы́я ико́ны Твоея́ быва́емая, воспева́ем наипа́че воскреше́ние Анаста́сия о́трока и воспева́юще пое́м:

Ра́дуйся, ме́ртвых воскреша́ющая;
ра́дуйся, уме́ршая сердца́ оживля́ющая.

Ра́дуйся, от сме́рти и ве́чнаго огня́ изыма́ющая;
ра́дуйся, посме́ртное на́ше упова́ние и защи́то.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 13

О всепе́тая и вселюби́мая на́ша Ма́ти! Умилосе́рдися ны́не и поми́луй, в лю́тых и безысхо́дных су́щих на́с ско́рбех избавля́ющи, научи́ на́с серде́чно воспева́ти Бо́гу, проща́ющему на́с: Аллилу́иа.

[Се́й конда́к глаго́лется три́жды.]

И́кос 1.

А́нгелов мно́жество по Твоему́, Ма́ти на́ша, повеле́нию ополча́ются на избавле́ние на́ше гро́зно, Ты́ же приими́ моли́тву сию́:

Ра́дуйся, А́нгелов на спасе́ние на́ше посыла́ющая;
ра́дуйся, Цари́це го́рних чино́в, небе́сную и́х по́мощь на́м да́рующая.

Ра́дуйся, А́нгелом храни́ти на́с повелева́ющая;
ра́дуйся, во́инством А́нгельским враго́в на́ших поража́ющая.

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Конда́к 1.

Возбрани́ враго́м на́шим озлобля́ти на́с и от Го́спода на́шего отлучи́ти коне́чне и научи́ на́с пе́ти Тебе́, Богоро́дице, ве́село:

Ра́дуйся, Изба́вительнице, от го́ря, бе́д и ги́бели спаса́ющая на́с, бе́дствующих.

Моли́тва.

О Ма́ти Бо́жия, по́моще и защи́та на́ша, при́сно бу́ди на́м Изба́вительница, на Тя́ бо упова́ем и всегда́ вседу́шно Тя́ призыва́ем: умилосе́рдися и помози́, пожале́й и изба́ви, приклони́ у́хо Твое́ и на́ша ско́рбныя и сле́зныя моли́твы приими́, и я́коже хо́щеши успоко́й и обра́дуй на́с, лю́бящих Твоего́ Безнача́льнаго Сы́на и Бо́га на́шего. Ами́нь.