Собор святых Архангельской митрополии

Жития

Собор святых Архангельской митрополии, празднование Русской Православной Церкви в честь святых, в земле Архангельской просиявших. Празднуется 1 ноября.

Празднование утверждёно патриархом Московским и всея Руси Кириллом в феврале 2018 года. Поименный список Собора утвержден Священным Синодом Русской Православной Церкви 16 мая 2023 года (журнал № 31).

Тропарь, глас 2

Вы́шняго повеле́нием,
тучено́сным облако́м не́бо помрачи́вшим,
и мо́лниям блиста́ющим,
гро́му же возшуме́вшу с преще́нием,
испусти́л еси́ ду́шу твою́ в ру́це Го́сподеви,
прему́дре Арте́мие,
и ны́не предстои́ши Престо́лу Влады́ки всех,
и́же ве́рою и любо́вию приходя́щим к тебе́,
подая́ исцеле́ние все́м неотло́жно,
и моля́ся Христу́ Бо́гу,

спасти́ся душа́м на́шим.

Тропарь, глас 3 Отве́рг пло́ти тле́нная,/ нетле́нных потща́лся еси́ дости́гнути,/ и, ми́ра удали́вся,/ всели́лся еси́ в морски́й о́стров,/ и на нем усе́рдно мно́га ле́та Го́сподеви порабо́тал еси́,/ сего́ ра́ди и да́ры прозре́ния и чуде́с обогати́лся еси́,/ о́тче преподо́бне Елеаза́ре.// Христа́ Бо́га моли́ дарова́ти нам мир и ве́лию ми́лость. Тропарь, глас 1 Жела́нием духо́вным распали́вся/ и мяте́жи мирски́я отри́нув,/ ко Еди́ному Бо́гу любо́вию прилепи́лся еси́,/ и Того́ вседу́шне взыску́я,/ во вну́треннюю пусты́ню отше́л еси́, при вода́х всели́вся,/ иде́же во слеза́х и труде́х пребыва́я многоле́тное вре́мя,/ в терпе́нии мно́зем житие́ а́нгельское проходи́л еси́,/ в наставле́нии Боже́ственнаго Ра́зума,/ и мно́жество мона́хов собрал еси́, му́дре,/ и́хже посеща́я, не оста́ви, Анто́ние, преподо́бне о́тче наш,/ Пресвяте́й Тро́ице моля́ся,// от зол вся́ческих изба́вити и спасти́ ду́ши на́ша. Тропарь, глас 4 По́стническое и равноа́нгельское житие́ ва́ше,/ преподо́бнии отцы́ Зоси́мо и Савва́тие,/ вселе́нней позна́ны сотвори́ вас;/ чудодея́нии разли́чными, Богоно́снии, просвеща́ете// ве́рою призыва́ющия вы и чту́щия честну́ю па́мять ва́шу. Тропарь, глас 3 Удали́вся ми́ра и водвори́вся в пусты́ню,/ до́брым по́двигом подвиза́лся еси́,/ злострада́нием, и внима́нием, и моли́твами,/ отону́дуже и по сме́рти источа́еши исцеле́ния,/ Савва́тие о́тче наш,/ моли́ Христа́ Бо́га,// спасти́ся душа́м на́шим. Тропарь, глас 8 Жела́нием духо́вным от ю́ности распаля́емь, преподо́бне Ге́рмане,/ Христу́ те́сным жития́ путе́м после́довал еси́/ и, в морски́й пусты́нный о́стров, а́ки в ти́хое приста́нище, всели́вся,/ в нем мно́га ле́та по́стнически пожи́л еси́,/ иде́же блаже́нным отце́м Зоси́ме и Савва́тию сожи́тель был еси́,/ с ни́миже моли́ Христа́ Бо́га о нас,// любо́вию чту́щих святу́ю па́мять твою́. Тропарь, глас 4 Боже́ственным жела́нием/ от ю́наго во́зраста, Стефа́не прему́дре, разже́гся,/ яре́м Христо́в взял еси́/ и люде́й олядене́вшая дре́вле неве́рием сердца́,/ Боже́ственное се́мя в них се́яв,/ ева́нгельски духо́вне породи́л еси́./ Те́мже пресла́вную твою́ па́мять почита́юще, мо́лим тя:/ моли́, Его́же пропове́дал еси́,// да спасе́т ду́ши на́ша. Тропарь, глас 1 Правосла́вныя ве́ры побо́рниче,/ земли́ Росси́йския печа́льниче,/ па́стырем пра́вило и о́бразе ве́рным,/ покая́ния и жи́зни во Христе́ пропове́дниче,/ Боже́ственных Та́ин благогове́йный служи́телю/ и дерзнове́нный о лю́дех моли́твенниче,/ о́тче пра́ведный Иоа́нне,/ цели́телю и преди́вный чудотво́рче,/ гра́ду Кроншта́дту похвало́/ и Це́ркви на́шея украше́ние,/ моли́ всеблага́го Бо́га// умири́ти мир и спасти́ ду́ши на́ша. Тропарь, глас 4 Изволе́нием Боже́ственнаго ра́зума/ всели́лся еси́ в пусты́ню,/ и та́мо, впери́в ум твой в Небе́сныя оби́тели,/ ра́вно А́нгелом житие́ на земли́ пожи́в,/ в моли́твах, и труде́х, и поще́ниих/ о́браз был еси́ твои́м ученико́м./ Отону́дуже Бог, ви́дя твое́ благо́е изволе́ние,/ умно́жи тебе́ ча́да в пусты́ни, слез твои́х тече́ньми напая́емей./ Но, я́ко име́я дерзнове́ние к Бо́гу,/ помина́й ста́до, е́же собра́л еси́, му́дре,/ и не забу́ди я́коже обеща́лся еси́,/ посеща́я чад твои́х,// Зоси́мо преподо́бне, о́тче наш. Тропарь, глас 1 Боже́ственною благода́тию просвети́вся,/ и по сме́рти да́руеши исцеле́ния/ притека́ющим к тебе́, прему́дре Проко́пие,/ те́мже и мы ны́не чтим честны́х моще́й твои́х явле́ние,/ веселя́щее вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния. Тропарь, глас 4 Днесь возсия́ нам пресве́тлая па́мять твоя́, сла́вне,/ яко со́лнце светоза́рное,/ луча́ми благода́ти озаря́ющи весь мир/ и тьму но́щи злых духо́в и от нас отгоня́ющи./ Днесь Небе́сныя си́лы святы́х а́нгел, и мирски́й наро́д,/ и ду́ши пра́ведных мы́сленно торжеству́ют, ра́дующеся;/ днесь и мы, гре́шнии, припа́дающе мо́лимся:/ о́тче преподо́бне Кири́лле,/ Христа́ Бо́га моли́ непреста́нно/ спасти́ оби́тель твою́, град и лю́ди,// и́же любе́зно тебе́ почита́ющия. Тропарь, глас 4 Христа́, и́стиннаго Бо́га, все́ю душе́ю возлюби́л еси́/ и Тому́ невозвра́тным жела́нием после́довал еси́,/ вся же кра́сная и сла́дкая ми́ра сего́ возненави́дев,/ я́ко небопа́рный оре́л, на Небеса́ возлете́/ и та́мо со А́нгелы лику́еши и со все́ми святы́ми Святе́й Тро́ице предстои́ши,/ моли́ и нам спасти́ся, ча́дом твои́м,// я́коже обеща́ся, Алекса́ндре преподо́бне, о́тче наш. Тропарь, глас 8 Первопресто́льников прее́мниче,/ сто́лпе Правосла́вия, и́стины побо́рниче,/ но́вый испове́дниче, святи́телю Фили́ппе,/ положи́вый ду́шу за па́ству твою́,/ те́мже я́ко име́я дерзнове́ние ко Христу́,/ моли́ за град же и лю́ди,// чту́щия досто́йно святу́ю па́мять твою́. Тропарь, глас 8 От ца́рствующаго гра́да пресе́льник яви́ся/ и я́же в нем вели́кия оби́тели/ и, промышле́нием Боже́ственнаго ра́зума окормля́емь,/ к морски́м страна́м устреми́ся,/ всели́ся же в пусты́ню, уклоня́яся мирски́я молвы́,/ и си́лою Свята́го Ду́ха вооружи́лся еси́,/ кре́стным ору́жием враги́ своя́ прогоня́я,/ посто́м и непреста́нною моли́твою жизнь свою́ соверша́я,/ сревну́я вели́ким отце́м Анто́нию, и Ону́фрию, и Па́влу Фиве́йскому,/ с ни́миже Го́сподеви моли́ся, о́тче Никоди́ме,// спасти́ся душа́м на́шим. Тропарь, глас 8 Пути́, вводя́щаго в жизнь, наста́вник и учи́тель был еси́:/ пе́рвее бо, преподо́бне о́тче наш Три́фоне,/ прише́л еси́ в часть Норве́гския земли́/ и в после́дних конце́х се́верныя страны́ язы́ки просвети́л еси́,/ породи́в водо́ю и Ду́хом Святы́м,/ и свяще́нная твоя́ ча́да в безпло́дней пусты́ни,/ я́ко древа́ ма́сличная, насади́л еси́,/ ве́лию оби́тель Святы́я и Живонача́льныя, Единосу́щныя и Неразде́льныя Тро́ицы созда́л еси́/ и мона́хов мно́жество собра́в./ Тем, я́ко апо́столом и пустынножи́телем равноче́стна чту́ще тя,/ приле́жно припа́дающе, вопие́м:/ моли́ всех Бо́га за Ру́сскую зе́млю, за о́бласть твою́ и за вся лю́ди,// почита́ющия па́мять твою́. Тропарь, глас 4 Первопресто́льницы Росси́йстии,/ и́стиннии храни́телие апо́стольских преда́ний,/ столпи́ непоколеби́мии, правосла́вия наста́вницы,/ Пе́тре, Алекси́е, Ио́но, Фили́ппе и Ермоге́не,/ Влады́ку всех моли́те/ мир вселе́нней дарова́ти,// и душа́м на́шим ве́лию ми́лость. Тропарь, глас 1 Боже́ственною любо́вию и житие́м духо́вным/ от ю́ности распали́вся, преподо́бне,/ и вся, я́же в ми́ре кра́сная, возненави́дев,/ Христа́ еди́наго от души́ возлюби́л еси́, о́тче,/ ле́гкое и́го на ра́мо взем,/ Боже́ственным Про́мыслом и Пречи́стыя Богоро́дицы чу́дным явле́нием направля́емь/ дости́же пусты́ни/ и в ней многоле́тне подвиза́лся еси́/ в труде́х мно́гих и слеза́х,/ вся́ким злострада́нием плоть свою́ изнуря́я./ Отоню́дуже Бог, твоя́ труды́ ви́дев,/ умно́жи тебе́ ча́да в пусты́ни./ Но я́ко име́я дерзнове́ние к Бо́гу,/ моли́ о нас, рабе́х твои́х, о́тче преподо́бне Леони́де,/ да изба́вит нас от всех наве́т вра́жиих// и спасе́т ду́ши на́ша. Тропарь, глас 8 Пре́жде отверже́нием ми́ра,/ я́ко морска́го треволне́ния, избего́сте, отцы́ преподо́бнии,/ по́слежде же, изволе́нием Бо́жиим,/ в вода́х морски́х кончи́ну блаже́нную прия́сте/ и к неболе́зненному поко́ю преста́вистеся от земли́, ра́дующеся./ Тем и по кончи́не от Христа́ Бо́га просла́вистеся чудесы́ оби́льно,/ те́плии в беда́х ве́рным помо́щницы показа́стеся,/ и ны́не на Небесе́х предстоя́ще Престо́лу Христо́ву,/ Вассиа́не преблаже́нне и Ио́но пресла́вне,// моли́теся при́сно о душа́х на́ших. Тропарь, глас 1 Святы́х Та́ин Христо́вых ве́рный служи́телю,/ покая́ния пропове́дниче и кра́я Ко́льскаго печа́льниче,/ преподобному́чениче Моисе́е,// моли́ Ми́лостиваго Бо́га спасти́ся душа́м на́шим. Тропарь, глас 8 Я́ко зве́зды многосве́тлыя, от ю́ности возсия́вше,/ освети́ли есте́ сердца́ ве́рных пренесе́нием честны́х моще́й ва́ших,/ доброде́тельми чуде́с ва́ших, во пло́ти я́ко бо А́нгели на земли́, показа́стеся,/ поще́нием насажде́ни бы́сте, я́ко дре́во при вода́х воздержа́ния,/ напое́ни струя́ми слез ва́ших, и скве́рну омы́сте,/ сего́ ра́ди яви́стеся прия́телище Бо́жия Ду́ха, Иоа́нне и Ло́нгине,// моли́те Христа́ Бо́га спасти́ся душа́м на́шим. Тропарь, глас 4 От земли́ Возведы́й тя к ве́чным оби́телем/ соблюда́ет и по сме́рти невреди́мо те́ло твое́, свя́те Иоа́нне,/ ты бо в целому́дрии и чистоте́ жития́, блаже́нне, пожи́л еси́,/ не оскверни́в те́ло,// те́мже со дерзнове́нием моли́ Христа́ Бо́га спасти́ся душа́м на́шим. Тропарь, глас 1 Свы́ше Боже́ственною благода́тию просвети́вся, Богому́дре,/ мно́гим терпе́нием во вре́менней жи́зни тече́ние соверши́л еси́,/ те́мже и по успе́нии источа́еши чуде́с благода́ть,/ и́же с ве́рою приходя́щим к тебе́, Ло́нгине всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудесе́х,// сла́ва Де́йствующему тобо́ю всем исцеле́ние. Тропарь, глас 1 Боже́ственною свы́ше просвети́вся благода́тию, преподо́бне,/ мир оста́вил еси́,/ жите́йскую печа́ль и всяк мяте́ж ми́ра сего́/ любве́ ра́ди Христо́вы со дерзнове́нием отве́ргл еси́,/ ева́нгельски Христу́ после́довал еси́,/ и, Того́ яре́м взем, во всем во́ли Его́ повину́лся еси́,/ и весь ра́зум и се́рдце к Нему́ неукло́нно возложи́л еси́,/ Христа́ ра́ди те́ло свое́ изнуря́я посто́м и бде́нием, в моли́твах свои́х не усыпа́я,/ Бо́га ми́лостива творя́ и Пречи́стую Богоро́дицу Моле́бницу предлага́я,/ и сего́ ра́ди от Бо́га восприе́м власть и си́лу на сопроти́внаго врага́,/ не убоя́ся возду́шныя и морски́я тяготы́ и сту́дени, ниже́ уклони́ся,/ и морско́ю пучи́ною в ма́ле лади́ице по вода́м ше́ствие творя́,/ про́тив зе́льнаго обурева́ния пла́ваше,/ промышле́нием Боже́ственнаго ра́зума направля́ем,/ и о́коло Свята́го Но́са непроходи́мый путь морски́й/ от ядови́таго че́рвия/ благопрохо́ден челове́ком без вреда́ сотвори́л еси́ моли́твами свои́ми,/ и мно́гим терпе́нием во вре́менней жи́зни по́двиг соверши́л еси́,/ и, равноа́нгельное житие́ пожи́в,/ те́мже и по преставле́нии источа́еши чуде́с благода́ть/ и́же ве́рою приходя́щим к тебе́, Варлаа́ме, преблаже́нне о́тче наш,/ вопие́м ти: моли́ Христа́ Бо́га,// да спасе́т ду́ши на́ша. Тропарь, глас 1 Боже́ственною благода́тию просвети́вся,/ и по сме́рти да́руеши исцеле́ния притека́ющим к тебе́, прему́дре Афана́сие,/ те́мже и мы ны́не чтим честны́х моще́й твои́х явле́ние,/ веселя́щее вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния. Тропарь, глас 1 Любо́вию к Бо́гу распаля́емь жи́знь свою́ му́ченически за Христа́ и бли́жних положи́л еси́, сего́ ра́ди вене́ц пра́вды от Него́ прия́л еси́, моля́ всеблага́го Бо́га, священному́чениче Нико́лае, Це́рковь святу́ю сохрани́ти в ми́ре и спасти́ ду́ши на́ша. Тропарь, глас 4 Ве́рою пла́менною апо́столу Петру́ подо́бяся,/ та́же и трикра́тным слы́шанием воззва́ния Христо́ва,/ ду́шу твою́ за Того́ положи́л еси́, святи́телю о́тче Пе́тре,/ ка́меню тве́рдый Це́ркве Правосла́вныя:/ свети́льниче во мра́це беззако́ний доброде́тельми сия́яй,/ ра́достию страда́ния за Христа́ претерпе́ти изво́лил еси́,/ со испове́дники и страстоте́рпцы Росси́йскими./ Моли́ся с ни́ми о нас, архиере́ю Бо́жий,// священному́чениче Солове́цкий. Тропарь, глас 1 От мяте́жа мирска́го удали́вся,/ к немерца́ющему Све́ту прите́кл еси́,/ преподо́бне о́тче Ло́нгине,/ и ны́не чи́сте зри́ши Святу́ю Тро́ицу,/ Ю́же моли́ за ны недосто́йныя,// да спасе́т ду́ши на́ша. Тропарь, глас 1 Возвести́телю пути́ спаси́тельнаго,/ испове́дниче и архипа́стырю Кры́мския земли́,/ и́стинный храни́телю оте́ческих преда́ний,/ сто́лпе непоколеби́мый, Правосла́вия наста́вниче,/ врачу́ богому́дрый, святи́телю Луко́,/ Христа́ Спа́са непреста́нно моли́/ ве́ру непоколеби́му правосла́вным дарова́ти// и спасе́ние, и ве́лию ми́лость. Тропарь, глас 4 Пра́вды Бо́жия побо́рниче и раско́лов обличи́телю, испове́дниче Христо́в святи́телю Ви́кторе, я́ко пресве́тлое свети́ло доброде́тельми просия́вый и изгна́ние претерпе́вый, упа́сл еси́ па́ству твою́ в правосла́вии и благоче́стии. Ра́дуется дне́сь земля́ Вя́тская, в ню́же восхоте́л еси́ возврати́тися цельбоно́сными моща́ми твои́ми, пра́зднующи любо́вию святу́ю па́мять твою́. Моли́ о на́с Бо́га, с ве́рою к предста́тельству твоему́ прибега́ющих. Тропарь, глас 3 И́же к доброде́телем прилежа́нием взыгра́ния пло́ти обузда́л еси́,/ благи́ми нра́вы ду́шу свою́ укра́сив,/ от земны́х Христу́ превозведе́ ум свой,/ тем от Него́ исцеле́нием струя́ незави́стна яви́ся,/ притека́ющим ве́рою к тебе́ и любе́зно зову́щим:/ Варлаа́ме, о́тче наш,/ моли́ Христа́ Бо́га,// да спасе́т ду́ши на́ша. Тропарь, глас 4 По́стническое по Бо́зе житие́ возлюби́в,/ вся плотска́я мудрова́ния ду́ху покори́л еси́/ и воздержа́нием стра́сти умертви́л еси́,/ во труде́х, и бде́ниих, и моли́твах о́браз быв доброде́тели,/ тем мона́шескаго жития́ наста́вник показа́лся еси́,/ о́тче преподо́бне Ирина́рше.// Моли́ Христа́ Бо́га спасти́ся душа́м на́шим. Тропарь, глас 2 Жела́нием духа распали́вся,/ мяте́ж мирски́й отри́нув,/ ко Еди́ному Бо́гу любо́вию прилепи́ся/ и То́го́ вседушне взыску́я,/ во вну́треннюю пусты́ню оты́де,/ при во́дах всели́ся,/ иде́же в слеза́х и труде́х пребыва́я многоле́тное вре́мя,/ в терпе́нии мно́зе житие́ а́нгельское проходи́л еси́/ в наставле́нии Боже́ственнаго Ра́зума,/ ста́до и́нок собра́ мудре,/ и́хже посеща́я, не оста́ви, Диодо́ре преподо́бне,/ о́тче наш, Пресвяте́й Тро́ице моля́ся/ от зол вся́ческих изба́вити и спасти́ души на́ша. Тропарь, глас 4 Святи́телю Христо́в Иларио́не,/ сла́во и похвало́ Це́ркве Ру́сския,/ ра́зум боже́ственный стяжа́в,/ пред безбо́жники Христа́ дерзнове́нно испове́дал еси́,/ Его́же ра́ди страда́ния претерпева́я,/ лю́дем ве́рным возглаша́л еси́:// без Це́ркве несть спасе́ния. Тропарь, глас 1 Верный ученик Христа даже до смерти быв,/ преподобномучениче Леониде приснопамятне,/ подвиги бо поста и кровию мучений/ землю Русскую освятил еси./ Темже и мы, чада твоя, любовию вопием ти:/ слава Давшему ти крепость,/ слава Венчавшему тя,// слава Прославльшему тя с новомученики Российскими. Ин тропарь, глас 6 И́же вои́стинну на земли́ тя а́нгела/ и на Небеси́ челове́ка Бо́жия почти́м,/ сию́ жизнь су́етную оста́вль,/ я́ко вои́стинну преудо́брен во́ин Христа́ Бо́га,/ на стра́сти душепа́губныя подвиза́вся в жи́зни сей су́етней/ бде́нием и поще́нием,/ во всем быв о́браз свои́м ученико́м./ Те́мже бо в тя всели́ся Пресвяты́й Дух,/ Его́же де́йствием све́тло укра́шен,/ но я́ко име́я дерзнове́ние ко Святе́й Тро́ице,/ помина́й святу́ю оби́тель сию́/ и ста́до свое́, е́же собра́, му́дре,/ и не забу́ди, я́коже обеща́ся,/ посеща́й чад свои́х,// Анто́ние преподо́бне, о́тче наш. Ин тропарь, глас 4 От ю́ности твоея́, преподо́бне,/ весь себе́ Го́сподеви предложи́в/ и земна́я вся оста́вль,/ Христо́вым стопа́м те́пле после́довал еси́/ и безпло́тным сожи́тель яви́лся еси́/ и всем преподо́бным соо́бщник, преблаже́нне Савва́тие./ Тем мо́лим ти ся, о́тче:/ моли́ся о нас непреста́нно Христу́ Бо́гу,// я́ко да ми́лостив бу́дет нам в Де́нь Су́дный. Ин тропарь, глас 8 Украси́вся, прему́дре, по́стническим житие́м,/ спо́стник был еси́ и сожи́тель в морсте́м ото́це/ преподо́бным отце́м Зоси́ме и Савва́тию,/ сподвиза́вся в моли́твах, и труде́х, и в поще́ниих,/ преподо́бне о́тче Ге́рмане,/ но, я́ко име́я дерзнове́ние к Бо́гу,// моли́ изба́вити нас от враг и спасти́ ду́ши на́ша. Ин тропарь, глас 8 Я́ко свети́льницы яви́стеся всесве́тлии/ во ото́це окиа́на мо́ря,/ преподо́бнии отцы́ Зоси́мо и Савва́тие/ вы бо крест Христо́в на ра́мо взе́мше,/ усе́рдно Тому́ после́довасте/ и, чистото́ю Бо́гови прибли́жившеся,/ отону́ду си́лами чуде́с обогати́стеся./ Те́мже и мы любе́зно притека́ем к ра́кам честны́х моще́й ва́ших/ и уми́льно глаго́лем:// о преподо́бнии, моли́те Христа́ Бо́га спасти́ся душа́м на́шим. Ин тропарь, глас 8 Первопресто́льников прее́мниче,/ сто́лпе Правосла́вия, и́стины побо́рниче,/ но́вый испове́дниче, святи́телю Фили́ппе,/ положи́вый ду́шу за па́ству твою́,/ те́мже я́ко име́я дерзнове́ние ко Христу́,/ моли́ за Оте́чество на́ше, град же и лю́ди,// чту́щия досто́йно святу́ю па́мять твою́. Ин тропарь, глас 5 Ра́достный возсия́ день све́тлаго торжества́:/ днесь церко́вная расширя́ются не́дра,/ прие́млюще духо́вных даро́в неоскуде́емо боготво́рное сокро́вище,/ струю́ благода́тей неисчерпа́емую,/ исто́чника чудесе́м оби́льна,/ чудотвори́выя и свяще́нныя мо́щи твоя́,/ святи́телю Фили́ппе./ Те́мже моли́ просла́вившаго тя Дарода́теля Христа́ Бо́га/ о воспева́ющих тя// и кла́няющихся свяще́нным моще́м твои́м. Ин тропарь, глас 4 Я́ко безпло́тен, о́тче, пожи́л еси́ на земли́,/ смире́нием и в я́ме пребыва́нием с моли́твами превознося́щагося врага́ смири́л еси́,/ я́ко крин, вои́стинну процве́л еси́,/ избра́нный кинамо́н, и высо́кий кипари́с,/ и плодови́тая ма́слина, и фи́никс сла́дкий,/ и кедр благоуха́нный, и валса́м чи́стый,/ те́рние злостра́стия искорени́л еси́/ и жили́ще Всесвята́го Ду́ха был еси́,/ те́мже помина́й па́мять твою́ днесь пра́зднующих, Никоди́ме чудотво́рче,/ да вси ра́достными гла́сы воспева́ем Христа́ Бо́га на́шего,// И́же тебе́ дарова́вшаго исцеле́ний благода́ть. Ин тропарь, глас 4 Во́ине Христо́в Иларио́не, сла́во и похвало́ Це́ркве Ру́сския, пред ги́бнущим ми́ром Христа́ испове́дал еси́, кровьми́ твои́ми Це́рковь утверди́ся, ра́зум Боже́ственный стяжа́л еси́, лю́дем ве́рным возглаша́ше: без Це́ркви не́сть спасе́ния. Ин тропарь, глас 5 Показа́вый о́браз доброде́телей, ве́сь стра́ха Бо́жия и Ду́ха Свя́та испо́лнен бы́сть, Преподо́бне о́тче И́ове, безмо́лвия и́стинный рачи́тель яви́лся еси́, страсте́м Госпо́дним покланя́яся, и́мже и оби́тель воздви́гл еси́ во ото́це А́нзерстем. Пустынножи́телей наста́вниче, моли́ Христа́ Бо́га спасти́ся душа́м на́шим. Ин тропарь, глас 8 Бо́дростию ума́ жизнь твою́ управля́я,/ прилежа́нием Бо́га взыску́я,/ отону́дуже и ста́ду мона́хов предста́тель показа́лся еси́,/ и, благода́ть прие́м цели́ти ду́ши и телеса́/ приходя́щим с ве́рою к честно́му гро́бу твоему́,/ Ирина́рше, о́тче наш,// моли́ Христа́ Бо́га спасти́ся душа́м на́шим. Ин тропарь, глас 4 Росси́йския земли́ па́стырь до́брый показа́лся еси́,/ в служе́нии пресви́терстем жизнь во Христе́ стяжа́в, богому́дре о́тче Иоа́нне./ Благода́ть изоби́льную от Влады́ки Христа́ прия́л еси́:/ неду́ги отгоня́ти,/ малоду́шныя утеша́ти,/ в Та́йне Пречи́стаго Те́ла и Кро́ве ве́рныя со Христо́м соединя́ти./ Сего́ ра́ди восхваля́ем тя,// я́ко моли́твенника о душа́х на́ших.

Кондак, глас 8

Возсия́ днесь пресве́тлая па́мять прему́драго Арте́мия;
Богода́нная благода́ть я́ко ре́ки излива́ет от целе́бных моще́й его́ ди́вная исцеле́ния,
и́миже от многоразли́чных неду́г избавля́емся,
с ве́рою прие́млюще я́, и взыва́юще:

ра́дуйся, Арте́мие Богому́дре.

Кондак, глас 1 Я́ко лучу́ тя со́лнечную, Христо́с показа́, преподо́бне,/ сия́ющу во стране́ примо́рстей чуде́с благода́тию,/ уставля́еши бо пла́вающим тишину́ морску́ю, ве́рою моля́щимся тебе́ и вопию́щим:/ ра́дуйся, Елеаза́ре, о́тче наш,// страны́ Беломо́рския похвало́ и утвержде́ние. Кондак, глас 8 От ю́ности, преподо́бне, плоть твою́ в посте́х и моли́твах истощи́л еси́/ и крест твой взем, Христу́ после́довал еси́,/ те́мже и к вы́шним тече́ние ра́достно соверши́л еси́,/ иде́же со все́ми святы́ми Святе́й Тро́ице предстои́ши./ И ны́не ста́до твое́ посеща́я,/ помина́й чту́щих пресвяту́ю па́мять твою́,/ да вси благода́рне вопие́м ти:// ра́дуйся, Богому́дре Анто́ние, наста́вниче пусты́нный. Кондак, глас 2 Христо́вою любо́вию уязви́вшеся, преподо́бнии,/ и Того́ крест, на ра́мо взе́мше, понесли́ есте́,/ боже́ственне вооружи́вшеся на неви́димыя враги́/ и непреста́нныя моли́твы, я́ко копие́ в рука́х, иму́ще,/ кре́пко победи́ли есте́ бесо́вская ополче́ния;/ благода́ть Госпо́дню прие́мше цели́ти неду́ги душ и теле́с/ притека́ющих к ра́кам честны́х моще́й ва́ших,/ чуде́с лучи́ испуща́ете всю́ду./ Тем зове́м вам:/ ра́дуйтеся, преподо́бнии отцы́ Зоси́мо и Савва́тие,// мона́хов удобре́ние. Кондак, глас 2 Жите́йския молвы́ отбе́г,/ всели́лся еси́ в морски́й о́стров, му́дре,/ и крест твой взе́м, Христу́ после́довал еси́,/ в моли́твах, и во бде́ниих, и в поще́ниих/ злострада́ньми плоть твою́ изнуря́я./ Тем был еси́ преподо́бных удобре́ние./ Сего́ ра́ди любо́вию па́мять твою́ пра́зднуем,/ преподо́бне Савва́тие,// моли́ Христа́ Бо́га непреста́нно о всех нас. Кондак, глас 4 Вы́шних жела́я,/ вся до́лу влеку́щая возненави́дел еси́/ и, отече́ство свое́ оста́вль,/ в помо́рие пусты́нное отше́л еси́,/ та́же в морски́й о́стров удали́вся,/ в нем мно́га ле́та Го́сподеви порабо́тал еси́./ Те́мже, па́мять твою́ пра́зднующе,/ любо́вию вопие́м ти:// ра́дуйся, Ге́рмане Богому́дре, о́тче наш. Кондак, глас 8 Самозва́нен не и́щущим тебе́, святи́телю, обре́лся еси́,/ лю́ди, от и́дольския ле́сти свободи́в, ко Христо́ве ве́ре приве́л еси́/ и волхва́ пансо́тника посрами́л еси́,/ те́мже и пе́рвый епи́скоп и учи́тель Пе́рми был еси́./ Сего́ ра́ди духо́вная твоя́ ча́да,/ я́ко тобо́ю изба́вльшеся от и́дол, благода́рная тебе́ возопие́м:// ра́дуйся, Стефа́не, учи́телю прему́дрый. Кондак, глас 3 Днесь па́стырь Кроншта́дтский/ предстои́т Престо́лу Бо́жию/ и усе́рдно мо́лит о ве́рных/ Христа́ Пастыренача́льника,/ обетова́ние да́вшаго:/ сози́жду Це́рковь Мою́/ и врата́ а́дова// не одоле́ют ей. Кондак, глас 8 Христо́вою любо́вию уязви́вся, преподо́бне,/ и Того́ Крест сла́вный, на ра́мо взе́м,/ поне́сл еси́, боже́ственне вооружи́вся,/ и непреста́нныя моли́твы, я́ко копие́ в руце́, имы́й,/ кре́пко ссе́кл еси́ бесо́вская ополче́ния./ Тем зове́м ти́:// ра́дуйся, преподо́бне о́тче Зоси́мо, мона́хов удобре́ние. Кондак, глас 8 Ве́рою и любо́вию/ твое́ честно́е явле́ние пра́зднующих, блаже́нне,/ сохрани́ и соблюди́ от вся́кия зло́бы и собла́зна змии́на,/ и́маши бо дерзнове́ние ко Влады́це всех, Христу́ Бо́гу./ Его́же моли́ спасти́ правосла́вныя лю́ди,/ моля́щия тя, да вси вопие́м ти:/ ра́дуйся, о́тче Проко́пие,// всея́ Росси́йския земли́ удобре́ние. Кондак, глас 8 От ю́ности, преподо́бне, вся оста́вль жите́йская, кра́сная же и ле́потная/ и в пусты́ню всели́вся, усе́рдно после́довал еси́ Зва́вшему тебе́, преблаже́нне,/ в труде́х же и посте́х, о́тче, тело свое́ изнури́л еси́,/ отону́дуже тя па́стыря Свои́м овца́м до́бре устроя́ет всебога́тый Госпо́дь,/ Кири́лле чудоде́йственниче, моли́ Христа́ Бо́га/ о приходя́щих с ве́рою и прося́щих свои́х прегреше́ний оставле́ния дарова́ти,// чту́щих любо́вию святу́ю па́мять твою́. Кондак, глас 8 Роди́телей свои́х любо́вь отри́нул еси́/ и дом свой, я́ко чужд, оста́вил еси́,/ водвори́ бо ся в пусты́ню,/ и та́мо ви́де Бог труды́ твоя́ и по́двиги,/ па́стыря и наста́вника избра́нному Своему́ ста́ду сподобля́ет тя/ и по преставле́нии вели́кими чудесы́ прославля́ет тя,/ исцеля́ти разли́чныя неду́ги./ Моли́ о нас Христа́ Бо́га,/ пра́зднующих любо́вию святу́ю па́мять твою́,/ да вси единогла́сно вопие́м ти:// ра́дуйся, Алекса́ндре преподо́бне, о́тче наш. Кондак, глас 3 Правосла́вия наста́вника и и́стины провозве́стника,/ Златоу́стаго ревни́теля,/ Росси́йскаго свети́льника, Фили́ппа прему́драго восхва́лим,/ пи́щею слове́с свои́х разу́мно ча́да своя́ пита́юща,/ той бо язы́ком хвале́ния поя́ше,/ устна́ма же пе́ние веща́ше,// я́ко таи́нник Бо́жия благода́ти. Кондак, глас 2 Пусты́ню, я́ко ца́рский черто́г,/ усе́рдно возлюби́л еси́,/ в не́йже жесто́кое показа́ житие́, многоле́тным пребыва́нием,/ очи́стив свою́ ду́шу и ум от страсте́й,/ и сего́ ра́ди Свята́го Ду́ха преди́вно прия́телище бысть, Никоди́ме преподо́бне,/ Его́же де́йствием и чудесы́ обогати́лся еси́,/ те́мже и мы почита́ем по́двиги твоя́, всеблаже́нне,/ но, я́ко име́яй дерзнове́ние ко Пресвяте́й Тро́ице,// моли́ся непреста́нно о всех нас. Кондак, глас 8 Все твое́ у́мное жела́ние к Бо́гу впери́в,/ Того́ зва́нию невозвра́тно от души́ после́довал еси́,/ в пусты́ню коне́чную всели́вся,/ и, та́мо а́нгельски и равноапо́стольне пожи́в,/ мно́гим путь был еси́ ко спасе́нию./ Сего́ ра́ди и Христо́с тя просла́ви и да́ром чуде́с обогати́./ Те́мже вси вопие́м ти:/ ра́дуйся, испове́дниче Христа́ Бо́га на́шего;// ра́дуйся, гра́ду твоему́ неколеби́мое утвержде́ние, Три́фоне, о́тче наш. Кондак, глас 3 Во святи́телех благоче́стно пожи́сте,/ и лю́ди к Богоразу́мию наста́висте, и до́бре Бо́гу угоди́сте,/ сего́ ра́ди от Него́ нетле́нием и чудесы́ просла́вистеся,// я́ко ученицы́ Бо́жия благода́ти. Кондак, глас 8 Все свое́ умно́жив жела́ние и к Бо́гу впери́в/ и Тому́ невозвра́тно от души́ после́довав,/ в пусты́ню всели́ся и в ней мно́гия труды́ в Бо́зе показа́л еси́./ В непрохо́дных ме́стех исто́чники водны́я ископа́л еси́/ и умертви́л еси́ по́двиги твои́ми теле́сная мудрова́ния,/ мно́гим путь был еси́ ко спасе́нию./ Те́мже мо́лим тя:/ спаси́ нас и я́же собра́, му́дре, да зове́м ти:// ра́дуйся, Леони́де преподо́бне, пусты́нный жи́телю. Кондак, глас 2 Я́ко сокро́вище бога́тно,/ ве́рным Боже́ственная благода́ть/ из морски́х недр издаде́ мо́щи ва́ша, отцы́ преблаже́ннии,/ и в ме́сте пу́сте це́лы и невреди́мы обрето́шася пресла́вно,/ и та́ко вас ра́ди ны́не сла́вится Бог,/ Ему́же со дерзнове́нием предстоя́ще ны́не на Небесе́х,/ Вассиа́не и Ио́но досточу́днии,// моли́теся непреста́нно о всех нас. Кондак, глас 2 Уподо́бился еси́ проро́ку Моисе́ю,/ ду́шу свою́ за погибающую па́ству положи́л еси́,/ у́зы темни́чные и сме́рть за Христа́ претерпе́л еси́,/ спаса́й на́с моли́твами твои́ми, о́тче Моисе́е,// па́стырю на́ш преблаже́нный. Кондак, глас 8 Яви́стеся свети́льницы всесве́тлии, во пло́ти а́нгели,/ я́ко Живота́ дре́во ра́йское,/ поще́нием, и бде́нием, и ве́рою возраща́еми, процвели́ есте́./ Моли́твами свои́ми Небе́сную благода́ть прие́мше,/ вра́чеве же кре́пцыи я́вльшеся,/ исцеля́ете неду́жныя и ду́ши с ве́рою прибега́ющих к ра́це моще́й ва́ших,/ чудотво́рцы сла́внии, Иоа́нне и Ло́нгине,/ сего́ ра́ди вси ве́рою и любо́вию вопие́м:// ра́дуйтеся, помо́рстей стране́ похвало́ и утвержде́ние. Кондак, глас 3 Все у́мное свое́ жела́ние к Бо́гу впери́в,/ и Тому́ невозвра́тно от души́ после́довал еси́,/ и жите́йския молвы́ отри́нув,/ в моли́твах, и слеза́х, и злострада́ниих плоть свою́ изнуря́я,/ до́бре подвиза́вся проти́ву неви́димаго врага́ ко́знем,/ и, победи́в я́, веселя́ся, преше́л еси́ к Небе́сным черто́гом,/ и ны́не со А́нгелы Святе́й Тро́ице предстоя́,/ отню́ду же и Всеви́дящее о́ко, твоя́ труды́ ви́дев,/ да́ром чуде́с по преставле́нии обогати́ло тя есть,/ и́же тебе́ с ве́рою почита́ющим/ исцеле́ние подава́еши неви́димо/ и мо́лишися непреста́нно, сохраня́я оте́чество свое́ и лю́ди/ от враг ви́димых и неви́димых ненаве́тны,/ да вси тебе́ вопие́м:/ преподо́бне о́тче наш Варлаа́ме,// моли́ непреста́нно о всех нас. Кондак, глас 8 Во святи́тельстве твое́м до́бре подвиза́лся еси́, богому́дре,/ и му́ченичества венце́м све́тло украси́лся еси́,/ преще́ния враго́в Христо́вых не устраши́вся,/ кровьми́ твои́ми зе́млю во ото́це А́нзерстем освяти́л еси́:/ сего́ ра́ди си́лы небе́сныя удиви́шася терпе́нию твоему́,/ мы же с ве́рою и любо́вию притека́ем ко святы́м моще́м твои́м, досточу́дне./ Ны́не со все́ми новому́ченики Росси́йскими моли́ о нас Христа́ Бо́га, всеблаже́нне Пе́тре, да зове́м ти:// Ра́дуйся, о́тче приснопа́мятне. Кондак, глас 8 По словеси́ Учи́теля Христа́,/ крест на ра́мо твое́ прия́л еси́,/ вся жите́йская отри́нув,/ и о́браз Животворя́щаго Дре́ва в пусты́ню прине́сл еси́,/ иде́же доны́не исцеле́ния неоску́дно источа́ются// с ве́рою приходя́щим к тебе́. Кондак, глас 8 Побе́де тезоимени́тый, святи́телю пресла́вне Ви́кторе, победи́л еси́ гони́телей твои́х немощну́ю я́рость. Ра́зум име́я богопросвеще́нный, хитросплете́ния ло́жная облича́л еси́, ове́ц твои́х в огра́де церко́вной соблюда́я. Те́мже увенча́лся еси́ от Бо́га венце́м драгоце́нным. Не преста́й моля́ся спасти́ся душа́м на́шим. Кондак, глас 8 Я́ко звезда́ светоза́рная,/ от Вели́каго Новагра́да прише́д,/ в чужи́х, я́ко в за́падных стра́нах, за́йде,/ от восто́к чуде́с, я́ко со́лнце, возсия́,/ те́мже, и́же во тьме и се́ни сме́ртней, в неду́зех лежа́щии,/ свет исцеле́ния от тебе́ прие́млюще,/ с на́ми, ча́ды твои́ми, непреста́нно вопию́т ти:// ра́дуйся, Богому́дре Варлаа́ме, о́тче наш. Кондак, глас 8 Чистото́ю душе́вною Боже́ственныя благода́ти да́ры стяжа́в,/ блаже́нную жизнь соверши́л еси́,/ и путь ко спасе́нию всем указа́л еси́,/ и богому́дрый нача́льник мона́хов яви́лся еси́./ Те́мже име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:// ра́дуйся, преподо́бне Ирина́рше, мона́шествующих похвало́. Кондак, глас 2 От ю́ности, преподо́бне,/ плотску́ю во́лю в посте́х и моли́твах истощи́л еси́,/ кре́ст свой взем, Христо́ви после́довал еси́,/ те́мже и к Вы́шним тече́нием ра́достно устреми́в себе́,/ иде́же со все́ми святы́ми Святе́й Тро́ице предстои́ши,/ но и ны́не ста́до свое́ посеща́я,/ помина́й чту́щих пресвяту́ю па́мять твою́,/ да вси благода́рно вопие́м ти:/ ра́дуйся, Богому́дре Диодо́ре, наста́вниче наш пусты́нный. Кондак, глас 2 Сла́ву ми́ра сего́ оста́вив,/ Христу́ до́блественне после́довал еси́/ и, святи́тельское служе́ние восприи́м,/ венце́м му́ченичества украси́лся еси́,/ и ны́не, Престо́лу Бо́жию предстоя́,/ моли́ся, Иларио́не, иера́рше прему́дре,// спасти́ся душа́м на́шим. Кондак, глас 1 Я́ко звезда́ всесве́тлая,/ в нощи́ безбо́жия доброде́тельми просия́л еси́,/ и от гони́телей мно́го пострада́в,/ непоколеби́м ве́рою пребы́л еси́,/ враче́бною же му́дростию укра́шен,/ мно́гия лю́ди исцели́л еси́./ Сего́ ра́ди с любо́вию вопие́м ти:/ ра́дуйся, добропобе́дный испове́дниче,/ ра́дуйся, о́тче святи́телю Луко́,// ра́дуйся, земли́ Ру́сския похвало́ и утвержде́ние. Кондак, глас 3 Мирскаго мятежа удалився,/ добре Богу послужил еси,/ во дни же гонений на Церковь Русскую,/ кровь твою за Христа пролиял еси/ и страданьми твоими землю нашу обагрил еси./ Темже молися, преподобномучениче Леониде,/ сохранитися ей в Православии и благочестии// до скончания века. Ин кондак, глас 3 Христа́ еди́наго вожделе́в,/ и к Тому́ любо́вию уязви́вся,/ и Тому́ неотло́жным путе́м после́довал еси́./ Вся́кое жите́йское наслажде́ние возненави́дев,/ те́мже, я́ко второ́е со́лнце, чудесы́ сия́я,/ и сего́ ра́ди тя да́ром обогати́ Влады́ка,/ помина́й нас, чту́щих пресве́тлую па́мять твою́, да зове́м ти:// ра́дуйся, Анто́ние преподо́бне о́тче наш. Ин кондак, глас 3 Я́ко звезда́ всесве́тлая,/ доброде́тельми сия́ющи, чуде́с лучи́ испуща́ющи,/ обою́ду богатя́ приходя́щих,/ ду́ши исцеля́еши и телеса́,/ благода́ть име́я, Савва́тие,// прославля́ет бо Своя́ Си Вели́кий Дарода́тель. Ин кондак, глас 8 Во успе́нии твое́м обрето́ша на телеси́ твое́м сокро́вище некра́домое:/ два креста́ и тяжча́йшая желе́за, е́же есть вери́ги,/ посто́м и моли́твами Бо́гу угоди́л еси́, святи́телю Фили́ппе,// моли́ Христа́ Бо́га о всех нас. Ин кондак, глас 3 Я́ко со́лнце, днесь от земны́х недр возсия́ша/ честны́я твоя́ мо́щи, святи́телю./ Зе́млю же и возду́х ше́ствием твои́м освети́л еси́/ и всех ве́рных чуде́с богозна́меньми облиста́л еси́,/ чудотво́рец преди́вен и моли́твенник к Бо́гу о ми́ре изя́щен яви́ся./ Сего́ ра́ди вопие́м ти:/ спаса́й нас те́плым свои́м предста́тельством,// я́ко учени́к Бо́жия благода́ти. Ин кондак, глас 8 Укрепля́емь си́лою Креста́ и благода́тию,/ преоби́дев тле́нная и до́лу влеку́щая мудрова́ния, о́тче,/ бесо́в посрами́л еси́,/ к Вы́шнему тече́ние получи́л еси́,/ устреми́лся еси́ в Хозью́гу пусты́ню,/ Пресвяте́й Тро́ице жили́ще был еси́,/ Е́йже предстоя́, моли́ о нас, почита́ющих тя,/ да возопии́м ти:// ра́дуйся, преблаже́нне Никоди́ме, о́тче наш. Ин кондак, глас 6 Иларио́не, священному́чениче Христо́в, служи́телей гряду́щаго анти́христа не убоя́лся еси́, Христа́ му́жески испове́дал еси́, за Це́рковь Бо́жию живо́т тво́й положи́. Красо́ новому́ченик Росси́йских, Руси́ святы́я похвало́, ты́ Це́ркве на́шея сла́ва и утвержде́ние. Ин кондак, глас 1 Я́коже звезда́ всесве́тлая, доброде́тельми сия́ющи,/ бы́л еси́, святи́телю,/ ду́шу же равноа́нгельну сотвори́,/ сего́ ра́ди святи́тельства са́ном поче́тся,/ во изгна́нии же от безбо́жных мно́го пострада́,/ и непоколеби́м ве́рою пребы́в,/ враче́бною му́дростию мно́гия исцели́л еси́./ Те́мже ны́не честно́е те́ло твое́ от землены́х не́др обре́тенное ди́вно Госпо́дь просла́ви,/ да вси́ ве́рнии вопие́м ти́:/ ра́дуйся, о́тче святи́телю Луко́,// земли́ Кры́мския похвало́ и утвержде́ние. Ин кондак, глас 8 Любо́вь Христо́ву в се́рдце стяжа́, ея́же ра́ди мно́ги ско́рби претерпе́вый, приста́нище обре́л еси́ в морсте́м ото́це, Преподо́бнаго Елеаза́ра заве́тов ве́рный прее́мник яви́лся еси́, покро́вом Бо́жия Ма́тере осеня́емый: достоблаже́нне о́тче И́ове, помина́й на́с, чту́щих святу́ю па́мять твою́. Ин кондак, глас 6 Пропове́дником и́стины, богоно́сным отце́м подра́жая,/ всего́ себе́ на служе́ние Бо́гу и бли́жним вдал еси́,/ и сан свяще́нства нося́, поко́я не ве́дал еси́,/ слу́жбы Бо́жия в хра́ме при́сно соверша́я,/ и в доме́х ве́рных моле́бныя пе́ния воспева́я,/ нужда́ющимся ще́дро благотворя́,/ та́ко наименова́ние благотво́рца и безсре́бренника стяжа́л еси́, Иоа́нне./ Те́мже и по успе́нии твое́м росси́йския лю́дие прославля́ют и́мя твое́,/ и ве́чную па́мять тебе́ возглаша́юще,// пою́т Бо́гу: аллилу́ия.

Величание

Велича́ем вас,
святи́телие Христо́вы
Пе́тре, Алекси́е, Ио́но, Фили́ппе и Ермоге́не,
и чтим святу́ю па́мять ва́шу:
вы бо мо́лите за нас

Христа́ Бо́га на́шего.

Величание

Ублажа́ем тя, преподо́бне о́тче Ло́нгине, и чтим святу́ю па́мять твою́, наста́вниче мона́хов и собесе́дниче а́нгелов.

Величание

Ублажа́ем тя,
преподо́бне о́тче Диодо́ре,
и чтим святу́ю па́мять твою́,
наста́вниче мона́хов
и собесе́дниче а́нгелов.

Молитва

Святы́й уго́дниче Бо́жий, пра́ведный Арте́мие, при́сный храни́телю святы́я ве́ры Правосла́вныя и бли́зкий защи́тниче всего́ се́вернаго кра́я Росси́йския страны́! При́зри ми́лостивно на усе́рдную моли́тву нас гре́шных и твои́м благомо́щным предста́тельством испроси́ нам у Го́спода проще́ние согреше́ний на́ших, преспе́яние в ве́ре и благоче́стии и огражде́ние от ко́зней диа́вольских. Моли́ Го́спода, да храни́т во здра́вии и непременя́емем благополу́чии ве́рных люде́й Свои́х, да пода́ст стране́ на́шей мир и тишину́, а нам нелицеме́рное послуша́ние, да сподо́бит всех нас получи́ти, по христиа́нстей кончи́не, Небе́сное Ца́рствие, иде́же вси пра́веднии вме́сте с тобо́ю, ве́чно сла́вят Отца́ и Сы́на и Свята́го Ду́ха. Ами́нь.

Молитва

О, преподо́бне о́тче наш Елеаза́ре, Богоизбра́нный нача́льниче и основа́телю безмо́лвнаго и́ноческаго жития́ в пусты́ни А́нзерстей, дарова́нной ти ми́лостию царе́вою, су́щия ра́ди в тебе́ благода́ти проро́ческия. Мо́лим тя мы, смире́ннии и недосто́йнии, испроси́, уго́дниче Бо́жий, у Вседержи́теля Бо́га, в Тро́ице покланя́емаго, Ему́же в дерзнове́нии предстои́ши с ли́ки святы́х, да да́рует стране́ на́шей мир и утвержде́ние, на враги́ побе́ду и одоле́ние, церква́м благостоя́ние и всем лю́дем тишину́, и благоде́нствие, и изоби́лие плодо́в земны́х. Угаси́ моли́твами твои́ми разжже́нныя на ны стре́лы диа́вольския, да не прико́снется нам зло́ба грехо́вная, да, благоче́стно сконча́вше вре́менное житие́, сподо́бимся насле́довати Ца́рствие Небе́сное и ку́пно с тобо́ю сла́вити Отца́, и Сы́на, и Свята́го Ду́ха во ве́ки веко́в. Ами́нь.

Молитва

О, всеблаже́нне о́тче наш, преподо́бне Анто́ние, те́плый засту́пниче и помо́щниче с ве́рою призыва́ющим тя, изба́ви нас моли́твами си ко Го́споду от вся́каго обстоя́ния бесо́вскаго и изми́ нас, окая́нных и недосто́йных рабо́в твои́х, о чудотво́рче Анто́ние, от уст па́губнаго зми́я, зия́ющаго пожре́ти нас и свести́ во ад жи́вых, прости́ нас, о́тче, ели́ко согреши́хом ти, и исто́ргни нас от греха́ и вся́кия напа́сти, приходя́щия грехо́в ра́ди на́ших. Пода́ждь душа́м на́шим утеше́ния, всади́ в сердца́ на́ша страх Суда́ Бо́жия и изба́ви нас от враго́в на́ших, ви́димых и неви́димых, тебе́ бо и́мамы те́пла моли́твенника и засту́пника, и́же в беда́х су́щии и в грехи́ впа́дшия. Ты бо яви́ся столп благоче́стия, воздержа́ния пра́вило, смиренному́дрия о́браз, целому́дрия наста́вник, убо́гим и сирота́м засту́пник и храни́тель прибега́ющим к тебе́. Кто у́бо по досто́инству мо́жет похвали́ти равноа́нгельное твое́ житие́ и кто мо́жет изчести́ твои́х трудо́в по́двизи и сле́зы ко Го́споду, вои́стинну я́ко со́лнца светле́йши возсия́ша твоя́ исправле́ния. Ревни́тель бо бысть всех святы́х преподо́бных и пра́ведных и учи́тель духо́вный, побо́рник, и засту́пник, и моли́твенник, Пресвяте́й Тро́ице предстоя́. Ты я́ко мир оста́вил еси́ и я́же в ми́ре, и нас в покая́ние приведи́ ко Го́споду моли́твами си, о́тче всечестне́йший, да и мы сподо́бимся ве́чных благи́х, иде́же наслажда́ешися Небе́сныя сла́вы жела́емаго Иису́са Христа́, И́стиннаго Бо́га на́шего и Сладча́йшаго Влады́ки и Го́спода всех. Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

Молитва

О, преподо́бнии и Богоно́снии отцы́ на́ши Зоси́мо и Савва́тие, земни́и а́нгели и Небе́снии челове́цы, бли́жнии дру́зи Христо́вы и уго́дницы Бо́жии, оби́тели ва́шея сла́во и украше́ние, всея́ же се́верныя страны́, па́че и всего́ Правосла́внаго оте́чества на́шего необори́мая стено́ и вели́кое заступле́ние! Се мы, недосто́йнии и многогре́шнии, с благогове́йною любо́вию ко святы́м моще́м ва́шим припа́дающе, ду́хом сокруше́нным и смире́нным приле́жно мо́лим вас: моли́те непреста́нно благосе́рдаго Влады́ку и Го́спода на́шего Иису́са Христа́, я́ко дерзнове́ние ве́лие к Тому́ иму́щии, да не отсту́пит от нас Его́ вседе́йствующая благода́ть, покро́в же и заступле́ние Пресвяты́я Влады́чицы на́шея Богоро́дицы на ме́сте сем да пребу́дет, и да не оскуде́ют никогда́же и́стиннии ревни́тели а́нгельскаго жития́ во святе́й оби́тели сей, иде́же вы, богоно́снии отцы́ и нача́льницы, безме́рными труды́ и поще́ньми, то́ки же сле́зными и всено́щными бде́нии, непреста́нными моли́твами и моле́ньми нача́ло и́ноческому житию́ положи́сте. Ей, уго́дницы святи́и, моли́твенницы к Бо́гу благоприя́тнейшии, те́плыми ва́шими к Нему́ мольба́ми огради́те и сохрани́те ны и свято́е селе́ние сие́ ва́ше от тру́са, пото́па, огня́ и меча́, наше́ствия иноплеме́нных и смертоно́сныя я́звы, от вражды́ и вся́ких нестрое́ний, от вся́кия беды́ и ско́рби и от вся́каго зла: да непреста́нно на ме́сте сем, в ми́ре и безмо́лвии, благоче́стно сла́вится пресвято́е и́мя Го́спода и Бо́га, и обрета́ют ве́чное спасе́ние и́щущие Его́. О, преблаже́ннии отцы́ на́ши, Зоси́мо и Савва́тие! Услы́шите ны гре́шныя, во святе́й оби́тели ва́шей и под кро́вом ва́шего защище́ния недосто́йно жи́тельствующыя, и благомо́щными ва́шими к Бо́гу хода́тайствы испроси́те душа́м на́шым грехо́в оставле́ние, жития́ исправле́ние и ве́чных благ восприя́тие в Небе́снем Ца́рствии: всем же ве́рующим, и́же на вся́ком ме́сте и во вся́кой ну́жде призыва́ют вас в по́мощь и заступле́ние, и и́же с благогове́йною любо́вию во оби́тель ва́шу притека́ют, не преста́ните излива́ти вся́кую благода́ть и ми́лость, сохраня́юще их от вся́кия сопроти́вныя си́лы, от вся́кия напа́сти и от вся́каго зла́го обстоя́ния, и подаю́ще им вся потре́бная к душе́вней и теле́сней по́льзе. Наипа́че же моли́те премилосе́рдаго Бо́га, да утверди́т и укрепи́т Це́рковь Свою́ святу́ю и все на́ше Правосла́вное оте́чество в ми́ре и тишине́, в любви́ и единомы́слии, в правове́рии и благоче́стии да сохрани́т и соблюде́т во ве́ки веко́в. Ами́нь.

Молитва

О, преподо́бне о́тче, уго́дниче Христо́в Савва́тие, все́ю душе́ю Го́спода возлюби́вый и удали́выйся в пусты́ню сию́ и тече́ние по́двига спаси́тельнаго соверши́вый. О ве́рный ра́бе Царя́ Небе́снаго, учи́телю доброде́телей, о́браз смире́ния, граждани́не пусты́нный, А́нгелом собесе́дниче, Херуви́ме земны́й, челове́че Небе́сный. О све́те немра́чный ото́ка Солове́цкаго, па́че же ве́лие свети́ло всея́ Це́ркви правове́рных. Молю́ся ти, пречестны́й, аз, многогре́шный (имя рек): услы́ши убо́гое мое́ моле́ние, раба́ твоего́, вонми́ глаго́лам нечи́стых усте́н мои́х, твоея́ ны́не по́мощи тре́бующаго. Се бо враг прелука́вый на вся́ко вре́мя тщи́тся мя погуби́ти, иски́й го́рько поглоти́ти ду́шу мою́ и несть мне спасе́ния, иде́же по́мощь прия́ти, зане́ не́мощию пло́ти моея́ обложе́н есмь и страстьми́ весь до́лу преклони́хся, не и́мам к Бо́гу дерзнове́ния. Ны́не же то́чию к твоему́ поверга́ю себе́ заступле́нию: поми́луй мя, омраче́ннаго все́ми злы́ми де́лы, воздежи́ о мне всечестне́и твои́ ру́це ко Го́споду, о моли́твенниче те́плый, Савва́тие преподо́бне. Да за благоутро́бие щедро́т Свои́х пода́ст ми грехо́в оставле́ние и в день Су́дный изба́вит мя ве́чнаго муче́ния и Ца́рствию Своему́ сподо́бит благода́тию Свое́ю, Ему́же бу́ди всегда́ сла́ва, честь и поклоне́ние во ве́ки. Ами́нь.

Молитва

О, преподо́бне и Богоно́сне о́тче наш Ге́рмане, безмо́лвнаго и́ноческаго жития́ во о́строве Солове́цтем первонача́льниче! Мо́лим тя мы недосто́йнии, предстоя́ще пред честно́й ико́ной твое́й: бу́ди моли́твенник и хода́тай о нас гре́шных пред Престо́лом Вседержи́теля Бо́га, Ему́же в дерзнове́нии предстои́ши со А́нгелы и все́ми святы́ми, да да́рует нам, я́ко Благи́й и Человеколюби́вый, вся потре́бная к животу́ и благоче́стию, душа́м и телесе́м на́шим здра́вие, во всех благи́х преспе́яние и Свою́ всеси́льную по́мощь во вся́ких искуше́ниих, беда́х же и напа́стех, воздвиза́емых на ны от враг спасе́ния на́шего; оби́тели же твое́й моли́ изба́витися от вся́каго зла́го обстоя́ния, и приходя́щим в ню бли́жним и да́льним получи́ти вся проси́мая ко душе́вней и теле́сней по́льзе. Наипа́че же испроси́, уго́дниче Христо́в, всем нам грехо́в отпуще́ние, христиа́нскую кончи́ну жития́ и насле́дие Ца́рства Небе́снаго у Христа́ Бо́га на́шего, Ему́же честь и сла́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.

Молитва

О, Богоосвяще́нный и равноапо́стольный Стефа́не, но́вый Богове́дения пропове́дниче и просвети́телю Креще́нием святы́м великопе́рмских во идолопокло́нстве живу́щих люде́й, ко и́стинному Ева́нгельскому све́ту путеводи́телю, па́стырю до́брый и учи́телю прему́дрый, Ду́ха Свята́го сосу́де избра́нный, Христоподража́тельный в Небе́сный Сио́н наста́вниче и руководи́телю, о́браз благонра́вия всем благоче́стно жи́ти жела́ющим, благоиску́сный мы́сленнаго корабля́, чрез мо́ре ми́ра сего́ к Небе́сному приста́нищу пла́вающаго, прави́телю, ди́вный во иера́рсех, уве́нчанный Боже́ственною благода́тию, всеросси́йский свети́льниче, вели́кий чудотво́рче и моли́твенниче те́плый! К тебе́ во умиле́нии души́ и сокруше́нии се́рдца моего́, аз окая́нный и гре́шный благонаде́жно притека́ю и вопию́, прося́ смире́нно по́мощи твоея́ и те́плаго ко Преблаго́му Бо́гу хода́тайства, да твои́ми богоприя́тными моли́твами испро́сиши ми от Него́ человеколю́бную ми́лость, оставле́ние мно́гих мои́х согреше́ний, души́ и телеси́ здра́вие со спасе́нием; и, я́ко Благ и Человеколю́бец, да благоволи́т безбе́дно в ми́ре сем ходи́ти ми до сконча́ния живота́ моего́, во вре́мя же разлуче́ния моего́ от жи́зни сея́ дух мой в покая́нии и ми́ре А́нгелом Свои́м святы́м ми́лостивно прия́ти, и да даст ми ми́мо мра́чных и злокова́рных и лю́тых духо́в де́монских на возду́се проити́ невозбра́нно и к Нему́ непосты́дно предста́ти поклони́тися, и безсме́ртныя и блаже́нныя жи́зни сподо́битися со все́ми святы́ми во ве́ки. Ами́нь.

Молитва

О, блаже́нная и пречестна́я и благода́ти Свята́го Ду́ха испо́лненная главо́, сосу́де избра́нный Святы́я Тро́ицы, преподо́бне о́тче наш Кири́лле, услы́ши нас, гре́шных, предстоя́щих ны́не пред тобо́ю и уми́льно моля́щих тя: помоли́ся о нас, рабе́х твои́х, ко Всеми́лостивому Влады́це Иису́су Христу́ Бо́гу на́шему и Его́ ро́ждшей Ма́тери, Влады́чице на́шей Богоро́дице и Присноде́ве Мари́и, е́же отпусти́ти нам согреше́ния на́ша, я́же соде́яхом. Ве́мы бо, о́тче наш, а́ще пло́тию и в пе́рсти почива́еши, но ду́хом зде с на́ми неотсту́пно и неви́димо пребыва́еши, назира́я нас и назида́я по твоему́ нело́жному обеща́нию, сохраня́еши от вся́ких обстоя́ний. И я́коже мно́го дерзнове́ние стяжа́вый ко Го́споду по́стническими твои́ми по́двиги, умоли́ Его́ святы́ми твои́ми моли́твами пода́ти ми́ру мир, Це́ркви Его́ Святе́й – единомы́слие, стране́ – на враги́ побе́ду, служа́щим же ти – друг ко дру́гу любо́вь и согла́сие и всем лю́дем, притека́ющим к тебе́ с ве́рою, испроси́ у Го́спода к по́льзе душе́вней и теле́сней ми́лость, мир, благослове́ние, во е́же изба́витися нам всем в День Су́дный стра́шный, шу́ия ча́сти спасти́ся, ста́ти же одесну́ю со избра́нными Его́ к насле́дию Ца́рствия Небе́снаго, я́ко Тому́ подоба́ет вся́кая сла́ва, честь и поклоне́ние со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом ны́не, и при́сно, и во ве́ки веко́в. Ами́нь.

Молитва

О, пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Фили́ппе, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со а́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны́ до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.

Молитва

О, преподо́бне, треблаже́нне, досточу́дне, всече́стне и благоуго́дне о́тче Никоди́ме, ты возжеле́л еси́ усе́рдно ше́ствовати вслед Влады́ки Христа́, вся мирска́я мудрова́ния отри́нув, мона́шества путь предъизбра́л еси́, теле́сная чу́вства во вну́тренних пусты́нях сих затвори́в, при вода́х всели́лся еси́, во слеза́х и труде́х пребыва́я, многоле́тнее вре́мя в по́двизе, и терпе́нии, и озлобле́нии мно́зе а́нгельски житие́ препроводи́л еси́, сего́ ра́ди Свет невече́рний зре́ти сподо́бился еси́, Пресвяте́й Тро́ице со все́ми святы́ми предстои́ши, непреста́нно насыща́яся зре́нием Божества́ Трисве́тлаго. Помина́й чту́щих пресве́тлую па́мять твою́ и труды́ твоя́ и терпе́ние любоче́стне чту́щих, я́ко вседне́вно в пусты́ни сей за Христа́ подъя́л еси́. О всепреподо́бне о́тче наш, не промолчи́, Го́споду моля́ся о оби́тели, при не́йже подвиза́лся еси́ и честны́м и трудолю́бным твои́м моще́м положи́тися благоволи́л еси́, и не оста́ви, посеща́я нас, чад свои́х, но вразуми́, окорми́ и к пути́ спасе́ния наста́ви, к по́двигу укрепи́, уны́ние и ле́ность отжени́, Бо́жиим стра́хом серде́ц на́ших услуже́ние разжзи́, окамене́нное нечу́вствие и стра́стное души́ разслабле́ние уврачу́й, я́рость и двиза́ние теле́сное успи́, у́мную слепоту́ и омраче́ние просвети́ и к безро́потней стези́ покая́ния напра́ви, все житие́ на́ше одо́бри и к преуспе́янию доброде́телей утверди́, ю́ныя целому́дрию накажи́, ста́рыя безраска́янно соверши́ти по́двиг вооружи́, во ско́рбех су́щия уте́ши и исцели́, напа́ствуемыя заступи́ и де́монское искуше́ние отврати́ и всем поле́зная да́руй, я́ко да возмо́жем, твои́м предста́тельством и моли́твами сохраня́еми по́двига тече́ние непреткнове́нно соверши́ти, сла́вяще Святу́ю Тро́ицу, Отца́, и Сы́на, и Свята́го Ду́ха, в Трех Ипоста́сех поклоня́емаго Бо́га, ны́не и при́сно и во ве́ки веко́в. Ами́нь.

Молитва

О, свяще́нная главо́, преподо́бне о́тче наш Леони́де, земны́й а́нгеле и Небе́сный челове́че, свети́льниче пресве́тлый, край наш Прилу́зский озаря́яй! Тебе́, уго́дниче Бо́жий, неистощи́мое от Всеблага́го Влады́ки благода́ти и даро́в даде́ся сокро́вище: с ве́рою к тебе́ приходя́щих утеша́ти, теле́сные и душе́вные неду́ги отгоня́ти. К тебе́ у́бо прибега́ем, припа́дающе, мо́лимся: не пре́зри нас, моля́щихся и твоея́ прося́щих по́мощи; испроси́ нам у Христа́, да сотвори́т с на́ми зна́мение во бла́го и преобрази́т на́ше мра́чное житие́, се́рдце на́ше прокаже́нное очи́стит и оби́тель сотвори́т для Своего́ вселе́ния, я́ко без Него́ не мо́жем твори́ти ничесо́же, да вся́кое на́ше во бла́го жела́ние испо́лнит. Да та́ко, угожда́юще Ему́, победи́м борю́щаго нас диа́вола, вни́дем иде́же вси святи́и пребыва́ют и прославля́ют Отца́, и Сы́на, и Свята́го Ду́ха во ве́ки. Ами́нь.

Молитва

О, преподо́бнии и всечестни́и отцы́ Вассиа́не и Ио́но, уго́дницы Христо́вы блаже́ннии и чудотво́рцы пресла́внии! По́стничеством Бо́гу пе́рвее угоди́вше и де́лы благоче́стно на земли́ подвиза́вшеся, я́ко свети́ла све́тлая, по сме́рти в ми́ре возсия́вше, просвеща́юще ве́рных чуде́с све́тлостию, вы засту́пницы те́плии показа́стеся. Мно́гих, в ско́рбех и беда́х стра́ждущих и поги́бнути иму́щих, здра́вы сохраня́ете, непослу́шавших же завеща́ния ва́шего и малове́рующих отмсти́тельне наказа́сте, и пре́жде заблу́ждшей жене́ путевожди́ бы́сте, и осле́пшему па́ки прозре́ние дарова́сте. Де́рзостне же косну́вшагося целе́бных моще́й ва́ших напра́сно отри́нусте и, разслабле́нием наказа́вше, поми́ловасте. К сим же и ина́я пресла́вная соде́ласте, и бы́вшее оскуде́ние во оби́тели ва́шей сугу́бо испо́лнисте, соблюда́юще ю́. Мо́лимся у́бо ны́не вам, о преблаже́ннии отцы́, услы́шите моле́ние на́ше, не пре́зрите нас в бе́дах и ско́рбех, призыва́ющих вас ве́рою, бу́дите помо́щницы нам ско́рии и покрови́тели, сохрани́те же во благоде́нствии, ми́ре и тишине́ оте́чество на́ше. К сим же и духо́внаго о вас собра́ния не оста́вите до конца́, посеща́юще я́ всегда́, о преподо́бнии, изоби́лованием вся́цем, и моли́теся при́сно о нас ко Го́споду, да моли́твами ва́шими грехо́в проще́ние полу́чим, и Ца́рствия Небе́снаго сподо́бимся благода́тию Его́, я́ко Тому́ подоба́ет вся́кая сла́ва, честь и поклоне́ние, ны́не, и при́сно, и во ве́ки веко́в. Ами́нь.

Молитва

О, вели́кий уго́дниче Христо́в, святы́й пра́ведный о́тче Иоа́нне Кроншта́дтский, па́стырю ди́вный, ско́рый помо́щниче и ми́лостивый предста́телю! Вознося́ славосло́вие Триеди́ному Бо́гу, ты моли́твенно взыва́л: Имя Тебе́ — Любо́вь: не отве́ргни меня́, заблужда́ющагося. Имя Тебе́ — Си́ла: укрепи́ меня́, изнемога́ющего и па́дающаго. Имя Тебе́ — Свет: просвети́ ду́шу мою́, омраче́нную жите́йскими страстя́ми. Имя Тебе́ — Мир: умири́ мяту́щуюся ду́шу мою́. Ны́не благода́рная твоему́ предста́тельству всеросси́йская па́ства мо́лится тебе́: Христоимени́тый и пра́ведный уго́дниче Бо́жий! Любо́вию твое́ю озари́ нас, гре́шных и немощны́х, сподо́би нас принести́ досто́йные плоды́ покая́ния и неосужде́нно причаща́тися Христо́вых Та́ин. Си́лою твое́ю ве́ру в нас укрепи́, в моли́тве поддержи́, неду́ги и боле́зни исцели́, от напа́стей, враго́в, ви́димых и неви́димых, изба́ви. Све́том ли́ка твоего́ служи́телей и предстоя́телей Алтаря́ Христо́ва на святы́е по́двиги па́стырского де́лания подви́гни, младе́нцем воспита́ние да́руй, ю́ное наста́ви, ста́рость поддержи́, святы́ни хра́мов и святы́е оби́тели озари́! Умири́, чудотво́рче и прови́дче преизря́днейший, наро́ды страны́ на́шея, благода́тию и да́ром Свята́го Ду́ха изба́ви от междуусо́бныя бра́ни, расточе́нная собери́, прельще́нныя обрати́ и совокупи́ Святе́й Собо́рней и Апо́стольской Це́ркви. Ми́лостию твое́ю супру́жества в ми́ре и единомы́слии соблюди́, мона́шествующим в дела́х благи́х преуспея́ние и благослове́ние да́руй, малоду́шныя уте́ши, стра́ждущих от духо́в нечи́стых свободи́, в ну́ждах и обстоя́ниих су́щих поми́луй и нас на путь спасе́ния наста́ви. Во Христе́ живы́й, о́тче наш Иоа́нне, приведи́ нас к Невече́рнему Све́ту жи́зни ве́чныя, да сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.

Молитва

О, вели́кий уго́дниче, пресла́вный чудотво́рче и оби́тели на́шея Богодохнове́нный наста́вниче, Ло́нгине преблаже́нне, душе́ю на Небеси́ Престо́лу всех Царя́ предстоя́й, те́лом же во святе́й оби́тели сей почива́яй и разли́чная чудеса́ повсю́ду моли́твами твои́ми соверша́яй! При́зри ми́лостивно на лю́ди предстоя́щия и твоего́ ко Го́споду Бо́гу хода́тайства во обдержа́щих ну́ждах прося́щия, вси бо мы по мно́жеству грехо́в на́ших не сме́ем ниже́ возвести́ оче́с на́ших на не́бо. Ты же, я́ко стяжа́вый дерзнове́ние, принеси́ за всех, к тебе́ притека́ющих, те́плыя моли́твы ко Го́споду, е́же изба́витися нам от гла́да, пото́па, тру́са, огня́, меча́ и бра́ни, от люде́й и от диа́вола быва́ющия, и от вся́кия душе́вныя и теле́сныя боле́зни, да сих избежа́вше и Го́споду, Ему́ же предстои́ши, рабо́тающе, вни́дем в неконча́емый поко́й и просла́вим та́мо с тобо́ю всех благи́х Пода́теля Бо́га, всегда́, ны́не и при́сно и во ве́ки веко́в. Ами́нь.

Молитва

О, всеблаже́нный испове́дниче, святи́телю о́тче на́ш Луко́, вели́кий уго́дниче Христо́в. Со умиле́нием прикло́ньше коле́на серде́ц на́ших, и припа́дая к ра́це честны́х и многоцеле́бных моще́й твои́х, я́коже ча́да отца́ мо́лим тя́ всеусе́рдно: услы́ши на́с гре́шных и принеси́ моли́тву на́шу к Ми́лостивому и Человеколюби́вому Бо́гу, Ему́же ты́ ны́не в ра́дости святы́х и с ли́ки а́нгел предстои́ши. Ве́руем бо, я́ко ты́ лю́биши ны́ то́ю же любо́вию, е́юже вся́ бли́жния возлюби́л еси́, пребыва́я на земли́. Испроси́ у Христа́ Бо́га на́шего, да утверди́т ча́д Свои́х в ду́хе пра́выя ве́ры и благоче́стия: па́стырям да да́ст святу́ю ре́вность и попече́ние о спасе́нии вве́ренных и́м люде́й: пра́во ве́рующия соблюда́ти, сла́быя и немощны́я в ве́ре укрепля́ти, неве́дущия наставля́ти, проти́вныя облича́ти. Все́м на́м пода́й да́р коему́ждо благопотре́бен, и вся́ я́же к жи́зни вре́менней и к ве́чному спасе́нию поле́зная. Градо́в на́ших утвержде́ние, земли́ плодоно́сие, от гла́да и па́губы избавле́ние. Скорбя́щим утеше́ние, неду́гующим исцеле́ние, заблу́ждшим на пу́ть и́стины возвраще́ние, роди́телем благослове́ние, ча́дам в стра́хе Госпо́днем воспита́ние и науче́ние, си́рым и убо́гим по́мощь и заступле́ние. Пода́ждь на́м все́м твое́ архипа́стырское благослове́ние, да таково́е моли́твенное хода́тайство иму́щи, изба́вимся от ко́зней лука́ваго и избе́гнем вся́кия вражды́ и нестрое́ний, ересе́й и раско́лов. Наста́ви на́с на пу́ть, веду́щий в селе́ния пра́ведных, и моли́ о на́с всеси́льнаго Бо́га, да в ве́чней жи́зни сподо́бимся с тобо́ю непреста́нно сла́вити Единосу́щную и Неразде́льную Тро́ицу, Отца́ и Сы́на и Свята́го Ду́ха. Ами́нь.

Молитва

О, преподо́бне о́тче Ирина́рше, уго́дниче Бо́жий и моли́твенниче о душа́х на́ших! Услы́ши нас, ны́не моля́щихся тебе́, я́ко иму́щему дерзнове́ние ко Го́споду, да пода́ст нам вся, я́же на по́льзу в сем житии́ на́шем и во уготовле́ние к ве́чному животу́. Бу́ди нам наста́вник в духо́внем жи́тельстве, ути́шитель бу́ри страсте́й, помо́щник в ско́рбех и засту́пник от враг неви́димых, борю́щих ны, да и мы, богоуго́дно преше́дши по́прище сея́ жи́зни, бу́дем насле́дницы Ца́рствия Небе́снаго и сподо́бимся вку́пе с тобо́ю сла́вити Отца́, и Сы́на, и Свята́го Ду́ха во ве́ки веко́в. Ами́нь.

Молитва

О, преподо́бне о́тче наш Варлаа́ме, я́ко име́яй дерзнове́ние ко Творцу́, Изба́вителю всех, И́же в Тро́ице Святе́й покланя́емому и́стинному Христу́, Бо́гу на́шему, помяни́ нас в моли́твах свои́х и всех нас моле́ния, Бо́гу возсыла́емая, приими́ и принеси́ хода́тайственне. Мо́лим тя, изба́ви нас от напа́стей, и на мо́ри зе́льнаго обурева́ния, и потопле́ния морска́го невреди́мы сохрани́, и от всех ви́димых и неви́димых враг ненаве́тны соблюди́, я́ко да твои́ми моли́твами, свя́те, согреше́ний на́ших оставле́ние полу́чим и ве́чных благ сподо́бимся благода́тию и человеколю́бием Го́спода на́шего Иису́са Христа́, Ему́же сла́ва со Отце́м и Святы́м Ду́хом ны́не и при́сно и во ве́ки веко́в. Ами́нь.

Молитва

О, преподо́бне и достоблаже́нне Диодо́ре, о́тче наш, по́стниче терпеливоду́шный, безмо́лвия рачи́телю предо́блий, учи́телю духо́вный спасти́ся хотя́щим, разреши́телю тлетво́рных страсте́й незло́бивый, моли́твенниче о бию́щих тя безви́нно, Христоподо́бный, прозорли́вства проро́ческаго испо́лненный, предвозгла́сная о бу́дущих благи́х цевни́це, адама́нте ве́ры во Христа́ несеко́мый, сто́лпе терпе́ния незы́блемый, за́поведей Творца́ своего́ благопослу́шливый соверши́телю, плотоно́сный А́нгеле и Ду́ха Свята́го вмести́лище благоуха́нное, жи́телю пусты́нный несумни́тельный, смиренному́дрый Небе́сный челове́че и сожи́телю Го́рним чинонача́лиям! Ты кро́тостию ду́ха кро́тких зе́млю насле́довал еси́, друг же и уго́дник в Тро́ице сла́вимому Бо́гу на́шему яви́лся еси́, И́же и просла́вити тя благоизво́ли. Ве́мы бо, преподо́бне, ка́ко Бог изоби́льно от тебе́ чуде́сному дождю́ ве́рным кропи́ти повеле́. К тебе́ у́бо припа́дающе, любе́зно мо́лим тя, уго́дниче досточу́дный: не преста́й моля́ся Пресвяте́й и Живонача́льней Тро́ице, да низпосле́т стране́ на́шей тишину́ и мир, на враги́ побе́ду и одоле́ние, церква́м же согла́сие и всем лю́дем смиренному́дрие и изоби́лие благи́х. Угаси́, блаже́нне, моли́твами твои́ми паря́щия на ны разжже́нныя бесо́вския стре́лы, да не прико́снется нам зло́ба грехо́вная, и всем всегда́ ми́лостивное да́руй. При́зри и на мя, недосто́йнаго: свя́зан бо есмь лю́те плени́цами прегреше́ний мои́х и в пучи́ну стра́стнаго мо́ря влеко́м, увы́ мне! неодержа́нно. Сего́ ра́ди приле́жно молю́ святы́ню твою́, пребога́те, и припа́даю к тебе́ со слеза́ми, глаго́ля: предста́ни ми на пути́ напа́сти моея́, расто́ргни у́зы, отжени́ стра́сти, осла́би от грехо́вных вери́г, изба́ви мя от належа́щия ско́рби и от вся́каго зла, да не сведе́н бу́ду по дело́м мои́м в снедь лю́тому мироде́ржцу врагу́. Разреши́ мя от боле́зненных соу́з и спасе́ние да́руй ми, я́ко да спаса́ем моли́твами твои́ми, воспою́ и просла́влю от всея́ ви́димыя и неви́димая тва́ри в Тро́ице сла́вимаго Бо́га, Отца́, и Сы́на, и Свята́го Ду́ха, ны́не и в безконе́чныя ве́ки веко́в. Ами́нь.

Молитва

О, всесвяты́я Тро́ицы уго́дниче, о блаже́ннейший и равноапо́стольный па́стырю, преподо́бне о́тче наш Три́фоне! Не забу́ди твоея́ па́ствы, помина́й во святы́х твои́х и богоприя́тных моли́твах, приноси́мых в Тро́ице сла́вимому Бо́гу, ста́до твое́, е́же сам, по благове́стию от А́нгела, прише́ствием твои́м собра́л и упа́сл еси́. Поне́же в сро́дстве твоего́ мирска́го жили́ща, слы́шав во святе́й це́ркви на у́трени пою́щих: «пусты́нным живо́т сокрове́н есть, Боже́ственным раче́нием воскриля́ющимся», и от того́ воспери́вся Боже́ственною любо́вию, оста́вль дом и сродство́ и прише́д в край се́верныя страны́, просвети́л еси́ святы́м креще́нием неве́дующий Творца́, всех Бо́га, лопа́рский наро́д, за е́же, во утвержде́нии Христиа́нския ве́ры, мно́га изгна́ния и злоключе́ния подъя́л еси́; и близ реки́ Пече́неги в пу́стыню всели́вся, бра́тию из мно́гих градо́в и ве́сей собра́в, ве́лию оби́тель воздви́гл еси́, и при отше́ствии к Небе́сным селе́нием, о посеще́нии твоея́ оби́тели проро́чествия дар от Бо́га восприя́л еси́, и по сме́рти на мо́ри и на су́ше мно́га чудеса́ и цельбы́ с ве́рою прося́щим сотвори́л еси́ и ны́не твори́ши. Те́мже мо́лим тя, не забу́ди присеща́ти чад твои́х, моли́ за ны, преподо́бне о́тче, приходя́щая к тебе́ с ве́рою, и за вся христиа́ны, я́ко име́яй дерзнове́ние к безсме́ртному Царю́ Христу́ всех Бо́гу; не премолчи́ за ны ко Го́споду и не пре́зри нас, ве́рою и любо́вию чту́щих тя и помина́ющих святу́ю па́мять твою́. А́ще бо ты и преста́вился еси́ от нас те́лом, но и по сме́рти, живы́й ду́хом, всегда́ чудоде́йствуеши. Моли́твами твои́ми сохраня́й нас от стрел и ко́зней вра́жиих, и вся́кия пре́лести бесо́вския, и от враг ви́димых и неви́димых. Па́стырю наш до́брый! А́ще мо́щи твоя́ в ра́це незри́мы нам суть, оба́че, поне́же всегда́ в Тро́ице сла́вимому Бо́гу, при престо́ле Его́ непостижи́маго вели́чествия неотсту́пно в моли́твах предстои́ши, усе́рдно к тебе́ прибега́ем и про́сим: умоли́ и испроси́ нам вре́мя к покая́нию, да в час исхо́да души́ пре́йдем от земны́х к Небе́сным, мыта́рств же возду́шных и ве́чныя му́ки изба́вимся, и Небе́сному Ца́рствию насле́дницы бу́дем со все́ми от ве́ка угоди́вшими. О всеблаже́нне и преподо́бне о́тче наш Три́фоне! Не пре́зри и ны́не нас, притека́ющих к тебе́, я́ко да, моли́твами твои́ми и по́мощию спаса́емы, сла́ву и благодаре́ние, хвалу́ и поклоне́ние за вся в Тро́ице еди́ному Бо́гу, всех Созда́телю, возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

2-я Молитва

О, преподо́бне о́тче наш Никоди́ме, услы́ши мя, гре́шнаго раба́ твоего́ (имя рек), моля́щагося тебе́, и свято́му твоему́ о́бразу покланя́ющагося, к чудотво́рному твоему́ гро́бу притека́ющаго, и в моли́тве из глубины́ се́рдца своего́ призыва́ющаго в по́мощь и защище́ние себе́ свято́е твое́ и́мя, ми́лостив бу́ди и милосе́рд, скор моле́бник и хода́тай о мне, гре́шном рабе́ свое́м, ко Вседержи́телю Го́споду, в Трие́х Ипоста́сех поклоня́емому Бо́гу, к Нему́же дерзнове́ние име́я, моли́ за мя гре́шнаго и за весь мир правосла́вно-христиа́нскаго ро́да, е́же возника́ти горе́ ко взыска́нию Небе́снаго Оте́чества и свободи́тися в жи́зни сей от вся́ких одержа́щих скорбе́й и злоско́рбных бед и напа́стей, от злолю́таго оклеве́тания и наи́тия злых челове́к и злопомышле́ний и от враг ви́димых и неви́димых, да, сотво́рше во́лю Бо́жию, прии́мем сла́вы неувяда́емый вене́ц, зде же твою па́мять чту́ще, ра́достно просла́вим Просла́вльшаго тя Царя́ Небе́снаго, Отца́, и Сы́на, и Свята́го Ду́ха, Бо́га Трисвята́го. Ами́нь.

2-я Молитва

О, пресла́вный, Богоукраше́нный, пресве́тлый свети́льниче, Небе́сного Ца́рствия насле́дниче, безмо́лвия рачи́телю всеизря́дный, трудополо́жниче терпеливоду́шный! Ты дре́вле непло́дную, ны́не же тобо́ю новопросвеще́нную Юрьеву го́ру све́том Христо́вым озари́л еси́, на не́йже и святу́ю оби́тель воздви́гл еси́, и Богоуго́дными твои́ми труды́ и по́двиги, разли́чными добро́тами и благоле́пием сию́ украси́л еси́, и честны́м твои́м и чудотво́рным и цельбоно́сным моще́м просла́витися изво́лил еси́, и те́ми страну́ сию́ освяти́л еси́, и бесо́вския полки́ из нея́ изгна́л еси́. Помози́ мне, гре́шному, о всеблаже́нне, Ду́ха Свята́го благода́тию путь жития́ спаси́тельно ше́ствовати; просвети́ омраче́нную ду́шу мою́ заре́ю Богодарова́нныя ти благода́ти; да́руй ми бога́тно неболе́зненным жи́тельством пожи́ти; покажи́ вход невозбра́нен во огра́ду ве́чнаго пребыва́ния; сохрани́ блужда́ющаго в пусты́ни жите́йстей; отжени́ от се́рдца моего́ душетли́тельную по́хоть; очи́сти скве́рну грехо́вную моли́твами твои́ми, я́звы исцели́ и спасе́ние да́руй, да ве́село зову́ ти, спаса́ем: ра́дуйся, преподо́бне Диодо́ре, о́тче наш, свети́ло незаходи́маго све́та, све́тло сия́ющая звездо́ пресве́тлая, в сия́ после́дняя времена́ в се́верных стра́нах возсия́вшая; ра́дуйся, стране́ Росси́йской вели́кое на супоста́ты поможе́ние и заступле́ние, во бра́нех кре́пкое одоле́ние; ра́дуйся, непоколеби́мый благоче́стия сто́лпе, и́ноческих преда́ний тве́рдый храни́телю и и́ноком наста́вниче духо́вный; ра́дуйся, кре́пкий адама́нте и стра́шный бесо́м прогони́телю и повели́телю; ра́дуйся, гра́ду на́шему и Богозда́нней твое́й оби́тели све́тлая добро́то и оте́честву твоему́ похвало́ ве́чная и непреста́нная. Сподо́би у́бо и мене́ вся́кия ра́дости и Небе́снаго Ца́рствия бы́ти прича́стника ны́не и при́сно и во ве́ки веко́в. Ами́нь.

2-я Молитва

О, преди́вный чудотво́рче и вели́кий уго́дниче Бо́жий, преподо́бне о́тче Анто́ние, па́стырю наш до́брый, те́плый засту́пниче и ско́рый помо́щниче, предстоя́й Престо́лу Святы́я Тро́ицы, при́зри ми́лостивым о́ком на ны и на вся лю́ди, благогове́йне притека́ющия к честно́му гро́бу твоему́, в не́мже лежа́щия святы́я мо́щи твоя́, от дней дре́вних цвету́ще нетле́нием и благоуха́юще благода́тию животворя́щаго Пресвята́го Ду́ха, неоску́дно источа́ют исцеле́ния от вся́ких неду́гов душе́вных и теле́сных, услы́ши нас, моля́щихся и чту́щих святу́ю па́мять твою́. Моли́ ми́лостиваго Бо́га, отврати́ти от нас вся́кий гнев Его́, пра́ведно на ны дви́жимый, и сохрани́ти не то́чию оби́тель на́шу, но и вся гра́ды и ве́си, и вся стра́ны христиа́нския и лю́ди, живу́щия в них, от гра́да и гла́да, от тру́са и пото́па, от огня́ и меча́, от наше́ствия иноплеме́нных и междоусо́бныя бра́ни, от смертоно́сныя я́звы и вся́кия па́губы и вся́каго зла, дарова́ти же нам вся к жи́зни вре́менней благопотре́бная и к ве́чному спасе́нию поле́зная. Помози́ нам, свя́тче Бо́жий, избежа́ти па́губных сете́й диа́вольских, препобеди́ти собла́зны ми́ра и умертви́ти у́ды на́ша, су́щия на земли́; отврати́ о́чи на́ша от су́етных и преле́стных веще́й земны́х, напра́ви же умы́ и мы́сли на́ша к зре́нию красо́т боже́ственных, пренебе́сных и нетле́нных, сердца́ на́ша неду́гующая страстьми́ грехо́вными, исцели́, да не прильпну́т сласте́м привре́менным и безме́стным; согре́й же я боже́ственною любо́вию, да вожделе́ют и́стиннаго и непреходя́щаго блаже́нства, е́же в Бо́зе. Укрепи́ нас к исполне́нию за́поведей Госпо́дних, даждь нам покая́ние серде́чное и умиле́ние сле́зное, моли́тву непреста́нную и трудолю́бие неосла́бное, бо́дренное трезве́ние ума́ и хране́ние се́рдца, мир помысло́в, чистоту́ жела́ний, правоту́ дея́ний, да, изба́вльшеся тобо́ю от всех враг ви́димых и неви́димых, от вся́ких зол душе́вных и теле́сных, и соблю́дше ве́ру пра́вую, наде́жду неотло́жную и любо́вь нелицеме́рную, богоуго́дне сконча́ем житие́ на́ше на земли́, и преше́дше в жизнь ве́чную, сподо́бимся зре́ти трисве́тлую зарю́ трисия́ющаго ве́чнаго Со́лнца, и в невече́рнем дни Небе́снаго Ца́рствия, ку́пно с тобо́ю и со все́ми святы́ми, благода́рне воспева́ти и благословля́ти Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.

2-я Молитва

О вели́кий чудотво́рче и преди́вный уго́дниче Бо́жий, богоно́сне о́тче Иоа́нне! При́зри на нас и внемли́ благосе́рдно моле́нию на́шему, я́ко вели́ких дарова́ний сподо́би тя Госпо́дь, да хода́таем и при́сным моли́твенником за нас бу́деши. Се бо страстьми́ грехо́вными обурева́еми и зло́бою снеда́еми, за́поведи Бо́жия пренебрего́хом, покая́ния серде́чнаго и слез воздыха́ния не принесо́хом, сего́ ра́ди мно́гим ско́рбем и печа́лем досто́йни яви́хомся. Ты же, о́тче пра́ведный, ве́лие дерзнове́ние ко Го́споду и сострада́ние к бли́жним свои́м име́я, умоли́ Всеще́драго Влады́ку ми́ра, да проба́вит ми́лость Свою́ на нас и потерпи́т непра́вдам на́шим, не погуби́т нас грех ра́ди на́ших, но вре́мя на покая́ние ми́лостивно нам да́рует. О свя́тче Бо́жий, помози́ нам ве́ру правосла́вную непоро́чно соблюсти́ и за́поведи Бо́жии благоче́стно сохрани́ти, да не облада́ет на́ми вся́кое беззако́ние, ниже́ посра́мится Пра́вда Бо́жия в непра́вдах на́ших, но да сподо́бимся дости́гнути кончи́ны христиа́нския, безболе́зненныя, непосты́дныя, ми́рныя и Тайн Бо́жиих прича́стныя. Еще́ мо́лим тя, о́тче пра́ведне, о е́же Це́ркви на́шей Святе́й до сконча́ния ве́ка утвержде́нней бы́ти, Оте́честву же на́шему мир и пребыва́ние испроси́ и от всех зол сохрани́, да та́ко наро́ди на́ши, Бо́гом храни́ми, в единомы́слии ве́ры и во вся́ком благоче́стии и чистоте́, в ле́поте духо́внаго бра́тства, трезве́нии и согла́сии свиде́тельствуют: я́ко с на́ми Бог! В Нем же живе́м и дви́жемся, и есмы́, и пребу́дем во ве́ки. Ами́нь.

2-я Молитва

О, вели́кий уго́дниче Христо́в святи́телю о́тче наш Фили́ппе, ско́рый помо́щниче и ди́вный чудотво́рче! При́зри ми́лостивно на ны многогре́шныя, ве́мы бо се́рдцем и усты́ и со благоразу́мным разбо́йником испове́дуем, я́ко по дело́м на́шим бе́ды пости́гшия нас прие́млем, си́ми бо вре́менными скорбьми́ избежи́м по милосе́рдию Го́спода ве́чныя му́ки, гре́шником угото́ванныя: се́яхом бо се́мена своево́льнаго жития́, пожина́ем же те́рния скорбе́й. Оба́че не́мощни есмы́, и в покая́ние те́плое прише́дше, мо́лимся, да преложи́т Госпо́дь гнев Свой на ми́лость и тебе́, святи́телю Христо́в, усе́рдно про́сим: проле́й те́плую моли́тву твою́ ко Христу́ Го́споду на́шему, Ему́же при́сно предстои́ши и мо́лишися о почита́ющих тя с любо́вию и упова́ющих на твое́ предста́тельство. Умоли́ пра́веднаго Судию́, да защити́т святу́ю оби́тель сию́, ме́сто, в не́йже ты духо́вно породи́лся еси́, и путево́ждь и́ноком свята́го ме́ста сего́ был еси́. Упаси́ я́коже до́брый па́стырь жезло́м бла́гости твоея́ разсе́янныя о́вцы ста́да Христо́ва и во дво́ры Госпо́дни всели́ я́. Огради́ нас от собла́зна ересе́й и раско́лов в правосла́вной Це́ркви на́шей. Научи́ нас, во стра́нствии су́щих, го́рняя му́дрствовати, а не земна́я, просвети́ разсе́янный ум наш и на путь и́стины напра́ви, охладе́вшее се́рдце на́ше любо́вию ко Го́споду и к бли́жним на́шим согре́й. Вдохни́ в нас ре́вность ко исполне́нию веле́ний Бо́жиих. Осла́бленную греха́ми и нераде́нием во́лю на́шу оживотвори́ благода́тию Ду́ха Всесвята́го. Правосла́вие укрепи́, нападе́ния лука́внующих и беззако́нных челове́к на Це́рковь Бо́жию дале́че отжени́. Отпа́дшия ве́тви от лозы́ Христо́вы с то́ю па́ки соедини́, испроси́ у Христа́ Бо́га душа́м и телесе́м на́шим здра́вие и кре́пость, боля́щим исцеле́ние да́руй, стра́ждущих уте́ши, скорбя́щим мир и отра́ду покажи́, пла́чущия ра́доватися сотвори́, печа́льныя ликовствова́ти соде́лай, вражду́ющих умиротвори́, зави́стливыя ми́лостивны покажи́, вся́кия в нас непра́вды испра́ви. Изжени́ вся́кую крамо́лу и лука́выя сове́ты нечести́вых разруши́, оба́че тех в покая́ние приведи́. Архиере́ем и духо́вным па́стырем, поста́вленным пасти́ ста́до Христо́во Росси́йския Правосла́вныя Це́ркви, пода́ждь прему́дрость и пра́ведное житие́, я́коже и сам си́ми доброде́тельми украша́лся еси́, ста́рыя поддержи́, ю́ныя научи́ и уцелому́дри, и да́руй им моли́твами твои́ми трудолю́бие, послуша́ние и ми́рное жи́тельство. Нам же всем ра́дость при́сную о Го́споде пода́ждь, да терпе́нием тече́м на предлежа́щий нам по́двиг жития́ сего́ вре́меннаго, взира́юще на Нача́льника ве́ры и Подвигополо́жника Го́спода на́шего Иису́са Христа́, Ему́же бу́ди сла́ва, благодаре́ние и поклоне́ние, со безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

2-я Молитва

О, равноапо́стольный святи́телю Христо́в Стефа́не! К тебе́ мы, окая́ннии, благонаде́жно притека́ем и пред святы́м твои́м о́бразом вопие́м, прося́ще по́мощи твоея́ и к Бо́гу хода́тайства, да твои́ми моли́твами испро́сиши нам, раба́м Бо́жиим (имена), от Него́ ми́лость: оставле́ние мно́гих на́ших согреше́ний, душа́м и телесе́м здра́вие со спасе́нием; да благоволи́т же Госпо́дь твои́ми моли́твами безбе́дно в ми́ре сем ходи́ти нам до сконча́ния жития́ на́шего, во вре́мя же разлуче́ния на́шего от жи́зни сея́ дух наш А́нгелы Свои́ми в покая́нии и ми́ре ми́лостивно да прии́мет, я́ко да от мра́чных и злокова́рных и лю́тых духо́в де́монских на возду́се проше́дше невозбра́нно, к Нему́ непосты́дно предста́нем и поклони́мся, и безсме́ртныя и блаже́нныя жи́зни сподо́бимся, со все́ми святы́ми, во ве́ки веко́в. Ами́нь.

2-я Молитва

О, вели́кий уго́дниче Бо́жий, святы́й пра́ведный Арте́мие, покрови́телю святы́я оби́тели, твои́м и́менем красу́ющияся, си́льный хода́таю о нас ко Го́споду, вели́кий благоде́телю и живу́щих зде и́ноков твоея́ оби́тели и всех с ве́рою и любо́вию притека́ющих к ра́це чудотво́рных моще́й твои́х! При́зри ми́лостивно на убо́гую моли́тву нас, гре́шных и непотре́бных рабо́в, и твои́м всемо́щным предста́тельством испроси́ нам у Го́спода проще́ние грехо́в, преспе́яние в ве́ре и благоче́стии и огражде́ние от ко́зней супоста́та, и́щущаго нас погуби́ти. Да́руй бра́тству твоея́ оби́тели, от ста́рших до после́дних, смире́ние и кро́тость, любо́вь и послуша́ние вседу́шное, служе́ние и житие́ благогове́йное, свято́е и во всем ве́рное и благоду́шное исполне́ние и́ноческаго общежи́тия, да, рабо́тающе Го́сподеви непосты́дно и ду́хом горя́ще в непреста́нней моли́тве за благотвори́телей на́ших живы́х и усо́пших, яви́мся ве́рными раба́ми Го́спода, да Це́рковь Правосла́вная всея́ Росси́и, я́ко вертогра́д благонасажде́нный, цвете́т и плодотвори́т бога́то плода́ми ве́ры и благоче́стия! Моли́ Го́спода, да храни́т во здра́вии, душе́внем спасе́нии и благопоспеше́нии во всем правосла́вный наро́д наш. Моли́ Го́спода о ми́лости и благода́тных щедро́тах Святе́йшему Патриа́рху на́шему (имярек) и Святе́йшему Сино́ду на́шему. Моли́ Го́спода, да хода́тайством и заступле́нием преблагослове́нныя Влады́чицы на́шея Богоро́дицы все мы и зде ми́рное и богоуго́дное житие́ поживе́м и по ми́рней христиа́нстей кончи́не сподо́бимся в пресла́внем Ца́рствии ми́лости Царя́ Не́ба и земли́, Отца́ и Сы́на и Свята́го Ду́ха, сла́вяще Его́ ны́не и при́сно и во ве́ки веко́в. Ами́нь.

3-я Молитва

И́же благода́тию Святы́я Тро́ицы, преподо́бне и всеблаже́нне о́тче наш Никоди́ме, свята́го ра́ди жития́ твоего́ пусты́ннаго в ди́вных де́вственных по́двизех и пло́ти умерщвле́ниих, в себе́ вшед, непотре́бный аз и ло́жный твой учени́к, и раб лени́вый, и господи́н греха́, и сосу́д вся́ческия нечистоты́ (имя рек), со слеза́ми и стена́нием се́рдца тебе́ от скве́рных усте́н мои́х и от язы́ка ме́рзка испове́дание приношу́ и творю́ к Бо́гу че́рез тебе́ покая́ние, поне́же не и́мам се́рдца чи́ста, сего́ ра́ди студ лица́ моего́ покрыва́ет мя, не и́мам поста́ и целому́дрия, оскверни́в ум и ду́шу неле́пыми помышле́нии, плоть осмради́х стра́стными похотьми́, поне́же во тщесла́вии, а не смиренному́дрии, ели́ко бо благи́х твори́х, вся твори́в в неразу́мии, и́бо человекоуго́дия ра́ди, а не боголю́бия, не по́льзы ра́ди бли́жняго и спасе́ния души́ своея́ вся де́ях, су́етный, а не и́стинный мона́х, и в безу́мии все вре́мя жития́ моего́ изнури́в, страсте́м свои́м, а не тебе́ рабо́тая, мирсте́й суете́, а не Бо́гу боголе́пно служи́в, увы́, се́рдце во ожесточе́ние приведо́х мои́ми злы́ми обы́чаи, и до ны́не в нечу́вствии обрета́юся, окамене́нный, и во обеща́нии к Бо́гу и к тебе́ лжи́вец явля́юся. Но помози́ мне благода́тию, да́нною тебе́ от Царя́ Трисоста́внаго, се бо к со́лнцу достиго́х. О преподо́бный боже́ственный мой покрови́телю! Не пре́зри мя до конца́ поги́бнути, но ми́лостивно пода́й ми ру́ку по́мощи, уже́ бо ти приближа́ется, и посече́ние непло́дныя моея́ души́ гото́во есть, и ны́не молю́ тя, блаже́нне о́тче Никоди́ме, мил ся де́ю пред твои́м неви́димым прису́тствием, поверга́юся у свята́го гро́ба твоего́, умоли́ за мя, досто́йнаго ка́зни, и уми́лостиви Влады́ку Христа́ за раба́ недосто́йнаго, ми́лости прося́щаго, я́ко да не посече́т мя без вре́мене сме́ртною секи́рою, я́ко непло́дное дре́во, не иму́ще плода́ до́брых дея́ний, и споспеши́ ми про́чее вре́мя живота́ моего́ во и́стинном покая́нии сконча́ти, и во вре́мя исхо́да гре́шную мою́ ду́шу креста́ свята́го ору́жием и Присноде́вы Богоро́дицы Мари́и и́менем защити́, и сподо́би мя в коне́ц о́ный стра́шный безсме́ртных благ получи́ти и го́рькия и несказа́нныя тогда́шния ну́жды, и ско́рби, и боле́зни изба́витися ми́лостию и непобеди́мыми щедро́тами Тро́ицы Пресвяты́я, Отца́, и Сы́на, и Свята́го Ду́ха. Ами́нь.

3-я Молитва

О, богоблаже́нне и приснопа́мятне о́тче наш Анто́ние, не мним тя ме́ртва су́ща, а́ще те́лом и преста́вился еси́ от нас, но жив в собо́ре А́нгелов водворя́ешися. Моли́ за ны, избра́нниче Христо́в, и не пре́зри нас, ве́рою и любо́вию чту́щих тя, помина́й нас недосто́йных у Престо́ла Царя́ Небе́снаго, тебе́ бо даде́ся благода́ть моли́тися за ны. О, засту́пниче и моли́твенниче наш до́брый! Се бо святы́х моще́й твои́х ра́ка, пред очи́ма на́шима ви́дима есть, сохраня́й нас всегда́ от сете́й вра́жиих; моли́ся ко Го́споду о спасе́нии душ на́ших, и испроси́ нам покая́ния вре́мя и христиа́нскую кончи́ну безболе́зненну, непосты́дну, ми́рну, да невозбра́нно пре́йдем мыта́рства возду́шных князе́й и сподо́бимся Небе́снаго Ца́рствия со все́ми угоди́вшими Влады́це Не́ба и земли́, Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние всегда́, ны́не и при́сно и во ве́ки веко́в. Ами́нь.

3-я Молитва

О, великосла́вный уго́дниче Бо́жий, о, вели́кий чудотво́рче, святы́й и пра́ведный Арте́мие, херуви́ме земны́й, челове́че Небе́сный, А́нгелов собесе́дниче, Небе́сный жи́телю! При́зри с высоты́ Небе́сныя све́тлым о́ком твои́м, и ниспосли́ нам лучи́ Бо́жия благода́ти. Свети́льниче Боговозжже́нный, твои́ми святы́ми моли́твами разжени́ мрак грехо́в на́ших, упроси́ у Отца́ све́тов свет благода́ти душа́м на́шим, всех правове́рных ско́рый быв помо́щник и засту́пник. Всяк бо, с ве́рою под кров защище́ния твоего́ моли́твенно притека́яй и заступле́ния Твоего́ у Го́спода прося́й, а́бие посо́бствуем быва́ет, Бо́жию же ми́лость обрета́ет и жела́ния се́рдца своего́ не лиша́ется, но про́сит благода́ти и прие́млет дар на по́льзу проше́ния. Ты еси, пра́ведный Арте́мие, вертогра́д Бо́гом насажде́нный, в не́мже цвет здравотво́рный процвете́, е́же исцели́тися мно́гим от зе́льнаго трясави́чнаго неду́га. О, коль мно́зи твое́ю чуде́сною по́мощию слепи́и прозре́ша, глуси́и слух прия́ша, хроми́и возскочи́ша и ходя́ша, немощни́и де́йство рук прия́ша, безу́мнии воуми́шася, разсла́блении в жи́лах укрепи́шася, сля́ченнии испра́вишася и иму́щии вре́ды исцеле́ша! Еще́ же и скве́рнии де́мони моли́твою твое́ю отгна́шася, и ини́и неисце́льнии неду́зи разреши́шася. Та́ко, святы́й и пра́ведный Арте́мие, всем всегда ми́лостив явля́ешися. У́бо и о нас неисповеди́мую Бо́жию бла́гость умоли́, да оста́вит нам Госпо́дь до́лги на́ша, и да храни́т госуда́рство Росси́йское в ми́ре и благоде́нствии, в кре́пости и оби́лии, и ве́ру правосла́вную да укрепи́т, церко́вныя же раско́лы да утоли́т, и вся правосла́вныя христиа́ны да спасе́т. Мы же твою па́мять святу́ю от ро́да в род че́стно пра́здновати бу́дем, сла́вяще просла́вльшаго тя Христа́ Го́спода, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и со Пресвяты́м и Благи́м и Животворя́щим Ду́хом, ны́не и при́сно, и в безконе́чныя ве́ки веко́в. Ами́нь.

4-я Молитва

О, преподо́бне и богоно́сне о́тче наш Никоди́ме! Ве́лие име́я к Бо́гу дерзнове́ние, моли́ся вы́ну о всех нас, зане́ бу́ря мно́гих бед и скорбе́й обдержи́т ны: неду́зи теле́снии, боле́зни душе́вные, прираже́ния вра́жия обурева́ют ны. Хо́дит бо враг наш, иски́й кого́ поглоти́ти, и ежеча́сно от того́ уловля́емся; о спасе́нии же свое́м нерадя́ще, не́смы досто́йни воззре́ти на высоту́ Небе́сную. Но ты бу́ди нам помо́щник ско́рый и изба́витель: я́ко сам искуше́н быв от врага́, победи́в же сего́ до́блественне, вразуми́ ны, да разуме́ем того́ ко́вы и прираже́ния. Пода́ждь у́бо нам па́мять сме́ртную, сле́зы покая́ния и наде́жду спасе́ния, да не в отча́яние впаде́м, ниже́ де́рзостным на милосе́рдие Бо́жие упова́нием, во гресе́х же пребыва́нием в коне́ц себе́ погу́бим, но да бу́дет нам па́мять грехо́в на́ших во исто́чник те́плых слез и сокруше́ния серде́чнаго, милосе́рдие же Бо́жие и благода́ть Его́, моли́твами твои́ми, во спасе́ние на́ше, ны́не и при́сно и во ве́ки веко́в. Ами́нь.

Канон на перенесение мощей преподобных Зосимы и Савватия Соловецких

глас 2

Минея, 8 Августа.

Глас 2

Песнь 1

Ирмос: Гряди́те, лю́дие,
пои́м песнь Христу́ Бо́гу,
разде́льшему мо́ре и наста́вльшему лю́ди,
я́же изведе́ из рабо́ты еги́петския,
я́ко просла́вися.

Припев: Преподóбнии отцы́ Зоси́мо и Савва́тие, моли́те Бóга о на́с.

Просвеще́нием Трисо́лнечнаго Божества́ озари́вшеся, прему́дрии,
свети́ла яви́стеся, осиява́юща всю́ду;
тем и нас, те́мностию страсте́й омраче́нных,
просвеще́нием благода́ти озари́ти помоли́теся
и душа́м получи́ти спасе́ния.

Припев: Преподóбнии отцы́ Зоси́мо и Савва́тие, моли́те Бóга о на́с.

Све́том Боже́ственныя благода́ти просвеща́еми, Зоси́мо и Савва́тие преблаже́ннии,
ве́рно светоно́сную ва́шу па́мять торжеству́ющия просвети́те
и от тьмы грехо́вныя моли́твами свои́ми, преподо́бнии, изба́вите.

Сла́ва Отцу́ и Сы́ну и Свято́му Ду́ху.

Ду́ху Свято́му храм, прему́дрии, бы́сте,
и к Нему́ все духо́вное жела́ние обрати́сте,
и сего́ ра́ди кро́тких зе́млю насле́довасте;
душе́вную на́шу стра́стную бу́рю, преподо́бнии, укроти́те,
да, в тишине́ боже́ственней бы́вше, песносло́вим ва́ша по́двиги.

И ны́не и при́сно и во ве́ки веко́в. Ами́нь.

Богородичен: Лю́тыми страсте́й наве́ты обурева́емь е́смь, Отрокови́це,
и прило́ги грехо́вными погружа́емь;
ко Твоему́ еди́ному ти́хому и невла́емому приста́нищу любо́вию прибега́ю, Всепе́тая:
уще́дривши, спаси́ мя, Присноде́во.

Песнь 3

Ирмос: На ка́мени мя ве́ры утверди́в,
разшири́л еси́ уста́ моя́ на враги́ моя́,
возвесели́ бо ся дух мой, внегда́ пе́ти:
не́сть свят, я́коже Бог наш,
и не́сть пра́веден, па́че Тебе́, Го́споди.

Припев: Преподóбнии отцы́ Зоси́мо и Савва́тие, моли́те Бóга о на́с.

Высото́ю смире́ния украша́еми, Зоси́мо и Савва́тие преподо́бнии,
и все у́бо жела́ние ко Влады́це своему́ простро́сте,
я́ростная же движе́ния на враги́ вооружи́сте, со изря́дными де́лы свои́ми, посто́м и моли́твами.

Припев: Преподóбнии отцы́ Зоси́мо и Савва́тие, моли́те Бóга о на́с.

Пло́тей свои́х воста́ния кре́пким поще́нием, преподо́бнии, умертви́вше,
оби́телище бы́сте Влады́чне;
Его́же умоли́те изба́витися скорбе́й и мучи́тельства страсте́й
с ве́рою притека́ющим к вам, преблаже́ннии.

Сла́ва Отцу́ и Сы́ну и Свято́му Ду́ху.

Иму́ща споспешеству́ющу боже́ственную си́лу,
исцеле́ния безчи́сленная источа́ют мо́щи ва́ша, Зоси́мо и Савва́тие преподо́бнии:
отгоня́ют от челове́к боле́зни теле́сныя
и душе́вныя стра́сти врачу́ют по́двиги ва́шими, всечестни́и.

И ны́не и при́сно и во ве́ки веко́в. Ами́нь.

Богородичен: Тружда́ет мя бу́ря грехо́вная и возмуще́ние безме́стных помышле́ний:
умилосе́рдися, Всенепоро́чная, и ру́ку ми по́мощи, я́ко Ми́лостива, простри́,
я́ко да, спа́сся, велича́ю Тя.

Седален, глас 4

Жите́йское мо́ре воздержа́нием безбе́дно преплы́сте
и ко приста́нищу мы́сленному безстра́стия, ра́дующеся, доидо́сте,
преподо́бнии отцы́ Зоси́мо и Савва́тие, Богому́дрии и преблаже́ннии;
моли́те Христа́ Бо́га спасти́ся душа́м на́шим.

Песнь 4

Ирмос: Прише́л еси́ от Де́вы, не хода́тай, ни А́нгел,
но Сам, Го́споди, вопло́щся,
и спасл еси́ всего́ мя, челове́ка.
Тем зову́ Ти: сла́ва си́ле Твое́й, Го́споди.

Припев: Преподóбнии отцы́ Зоси́мо и Савва́тие, моли́те Бóга о на́с.

Умо́м и душе́ю предочи́стившеся, преподо́бнии,
пре́лесть душепа́губную всеконе́чне от себе́ отверго́сте
и, чу́вства своя́ к нему́тней тишине́ упра́вивше,
во ото́к морски́й, прему́дрии, всели́стеся, воспева́юще:
сла́ва си́ле Твое́й, Го́споди.

Припев: Преподóбнии отцы́ Зоси́мо и Савва́тие, моли́те Бóга о на́с.

Зако́ны но́выми и Ве́тхим Заве́том ра́зуму святы́х поуча́ющеся,
Зоси́мо и Савва́тие преподо́бнии,
вся́кия доброде́тели о́бразу навыко́сте, му́дрей пчеле́ подо́бящеся,
и прия́телище изря́дно Ду́ху Свято́му, прему́дрии, бы́сте, воспева́юще:
сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху.

Вся́ческими, преподо́бнии, светя́щеся чудоде́йствы и боже́ственною озаря́еми благода́тию,
всем позна́стеся сокро́вище исцеле́ний неистощи́мо,
страсте́й отгоня́ете омраче́ние и вра́жия низлага́ете ополче́ния, воспева́юще:
сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Из утро́бы Твоея́ чи́стыя, Отрокови́це, возсия́в, Боже́ственное Со́лнце
су́щия во тьме́ многобо́жия просвети́
и в се́ни сме́ртней седя́щия, Влады́чице, осия́,
Ему́же воспева́юще, зове́м:
сла́ва си́ле Твое́й, Го́споди.

Песнь 5

Ирмос: Просвеще́ние во тьме́ лежа́щих,
спасе́ние отча́янных, Христе́, Спа́се мой,
к Тебе́ у́тренюю, Царю́ ми́ра,
просвети́ мя сия́нием Твои́м,
ино́го бо, ра́зве Тебе́, бо́га не зна́ю.

Припев: Преподóбнии отцы́ Зоси́мо и Савва́тие, моли́те Бóга о на́с.

Те́сный предпоче́тше простра́нному пути́, преподо́бнии,
и ра́дующеся, во ото́це морсте́м вся́чески утесня́еми, претерпе́сте,
боже́ственными поуче́нии ду́ши своя́ очища́юще
и добро́ту Бо́жию неизглаго́ланную при́сно взира́юще, преблаже́ннии.

Припев: Преподóбнии отцы́ Зоси́мо и Савва́тие, моли́те Бóга о на́с.

Незло́биви, и кро́тцы, и ми́лостиви, преподо́бнии, бы́сте;
те́мже благода́ть и ми́лость от Бо́га свы́ше прие́мше, ми́лостивно нас просвеща́йте,
любо́вию святу́ю па́мять ва́шу почита́ющих.

Сла́ва Отцу́ и Сы́ну и Свято́му Ду́ху.

Я́ко вели́кое со́лнце, вели́чием по́двиг ва́ших
возсия́сте нам, Зоси́мо и Савва́тие преподо́бнии,
земны́я осиява́юще концы́ и вся просвеща́юще све́том богоразу́мия.
Те́мже мо́лим вы, просвети́те наш ра́зум, отцы́ преблаже́ннии.

И ны́не и при́сно и во ве́ки веко́в. Ами́нь.

Богородичен: От мно́жества востаю́щих на ны в боле́зни исчезе́ живо́т наш,
погрязо́хом в про́пасти безчи́сленных согреше́ний.
Спаси́ ны, Влады́чице, и возведи́, я́ко ми́лостива, Всенепоро́чная,
Тебе́ бо и́мамы Еди́ну Предста́тельницу непобеди́му, раби́ Твои́.

Песнь 6

Ирмос: В бе́здне грехо́вней валя́яся,
неизсле́дную милосе́рдия Твоего́ призыва́ю бе́здну:
от тли, Бо́же, мя возведи́.

Припев: Преподóбнии отцы́ Зоси́мо и Савва́тие, моли́те Бóга о на́с.

Ева́нгельски, преподо́бнии, Христа́ возлю́бльше, ми́ра отврати́стеся,
в непроходи́мыя же и в пусты́я ото́ки заше́дше, Еди́ному Влады́це своему́ прилепи́стеся;
от Него́же и трудо́м воздая́ние прие́мше,
животу́ ве́чному я́ве причасти́вшеся, за пою́щия вы моли́теся.

Припев: Преподóбнии отцы́ Зоси́мо и Савва́тие, моли́те Бóга о на́с.

Богому́дрыми по́мыслы преудобри́вшеся, преподо́бнии,
и вся, я́же на земли́ льстя́щая, я́ко уме́ты вмени́вше,
к нестаре́ющему преста́вистеся блаже́нству,
с ли́ки во све́те безпло́тных сил о Бо́зе при́сно сликовству́юще, преблаже́ннии.

Сла́ва Отцу́ и Сы́ну и Свято́му Ду́ху.

Стра́нна и пресла́вна, преподо́бнии, о Бо́зе содева́юще чудеса́,
всем в мо́ри пла́вающим и зле стра́ждущим, призыва́еми, ско́ро предстае́те, от бед избавля́юще;
и нас, бе́дствующих лю́те и напа́стьми одержи́мых,
ми́лостивно предста́вше, спаса́йте, преблаже́ннии.

И ны́не и при́сно и во ве́ки веко́в. Ами́нь.

Богородичен: Греха́ тя́жкое бре́мя, е́же отяготе́ на мне, Пречи́стая, облегчи́,
Ты бо еси́ Предста́тельница гре́шником Пресла́вная,
Изба́вителя и Спа́са ро́ждши земны́м.

Кондак, глас 2

Христо́вою любо́вию уязви́вшеся, преподо́бнии,
и Того́ крест, на ра́мо взе́мше, понесли́ есте́,
боже́ственне вооружи́вшеся на неви́димыя враги́
и непреста́нныя моли́твы, я́ко копие́ в рука́х, иму́ще,
кре́пко победи́ли есте́ бесо́вская ополче́ния;
благода́ть Госпо́дню прие́мше цели́ти неду́ги душ и теле́с
притека́ющих к ра́кам честны́х моще́й ва́ших,
чуде́с лучи́ испуща́ете всю́ду.
Тем зове́м вам:
ра́дуйтеся, преподо́бнии отцы́ Зоси́мо и Савва́тие,
мона́хов удобре́ние.

Икос

Кто дово́лен изрещи́ ва́ша чудодея́ния, преподо́бнии отцы́ Зоси́мо и Савва́тие?
Мы у́бо, ра́достию и Боже́ственною любо́вию почита́юще всехва́льную и всечестну́ю па́мять ва́шу, ма́лое сие́ пе́ние прино́сим:
ра́дуйтеся, испо́лненнии Христо́вы красоты́
и пресве́тла от Него́ и преизоби́льна восприи́мшии воздая́ния,
телесы́ у́бо вас морски́й о́стров прия́т, ду́ши же са́мое Не́бо,
иде́же по́чести трудо́в свои́х, прехва́льнии, восприя́сте от Христа́, всех Царя́ и Бо́га.
Те́мже мо́лим вы:
посеща́йте ми́лостивно и моли́те непреста́нно о всех нас,
преподо́бнии отцы́ Зоси́мо и Савва́тие, мона́хов удобре́ние.

Песнь 7

Ирмос: О́бразу злато́му на по́ле Деи́ре служи́му,
трие́ Твои́ о́троцы небрего́ша безбо́жнаго веле́ния,
посреде́ же огня́ вве́ржени, ороша́еми поя́ху:
благослове́н еси́, Бо́же оте́ц на́ших.

Припев: Преподóбнии отцы́ Зоси́мо и Савва́тие, моли́те Бóга о на́с.

В моли́твах бо́дренное, и в поще́ниих кре́пкое,
и терпе́ние во искуше́ниих неосла́бное ума́ чистото́ю, преподо́бнии, показа́сте
и, земны́х досто́йно отсту́пльше, Небе́сное наслажде́ние обрето́сте, воспева́юще:
благослове́н Бог оте́ц на́ших.

Припев: Преподóбнии отцы́ Зоси́мо и Савва́тие, моли́те Бóга о на́с.

Плод духо́вный и же́ртву непоро́чную, житие́ свое́, преподо́бнии, Влады́це принесо́сте,
в воздержа́нии бо вся́ком пожи́сте,
от Него́же и по́чести трудо́м, я́ко подвигополо́жницы, восприе́мше,
де́йствуете пресла́вная чудеса́,
воспева́юще:
благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху.

Страстьми́ коле́блющихся и бу́рею грехо́вною, преподо́бнии, погружа́емых,
я́ко вели́кое к Бо́гу дерзнове́ние иму́ще, руково́дствуйте
и всегда́, прему́дрии, сохраня́йте почита́ющих вас благоче́стно,
я́ко да воспева́ем:
благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Изба́ви нас от напа́стей, и скорбе́й, и печа́лей разли́чных,
и иноплеме́нных наше́ствия, и междоусо́бныя бра́ни, Влады́чице Всепе́тая,
я́ко да Тя сла́вим и Сы́ну Твоему́ взыва́ем:
благослове́н Бог оте́ц на́ших.

Песнь 8

Ирмос: Пе́щь иногда́ о́гненная в Вавило́не де́йства разделя́ше,
Бо́жиим веле́нием халде́и опаля́ющая,
ве́рныя же ороша́ющая, пою́щия:
благослови́те, вся дела́ Госпо́дня, Го́спода.

Припев: Преподóбнии отцы́ Зоси́мо и Савва́тие, моли́те Бóга о на́с.

В пребыва́лища присноживу́щая всели́стеся, преподо́бнии,
нетле́нных благ наслажда́ющеся и Трисо́лнечныя све́тлости исполня́ющеся.
Нас, призыва́ющих вы, те́плым предста́тельством ва́шим от всех лю́тых спаса́йте, пою́щих:
благослови́те, вся дела́ Госпо́дня, Го́спода.

Припев: Преподóбнии отцы́ Зоси́мо и Савва́тие, моли́те Бóга о на́с.

Нам, и́же любо́вию почита́ющим вас и честно́е ва́ше соверша́ющим торжество́,
Христо́вы уго́дницы Зоси́мо и Савва́тие, преподо́бнии отцы́,
согреше́нием испроси́те оставле́ние, и страсте́й премене́ние,
и Боже́ственнаго све́та осия́ние, пою́щим:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Троичен: О Пребезнача́льное естество́ и Трисоста́вное Еди́нство,
О́тче и Сы́не и Ду́ше Пресвяты́й,
приими́ о нас моли́твенники, Твоя́ преподо́бныя уго́дники,
и пода́ждь прегреше́нием разреше́ние, и житию́ исправле́ние, и злых отчужде́ние,
и сподо́би ны в ми́ре воспева́ти Твою́ держа́ву:
благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Я́ко Еди́на ро́ждшая безсе́менным рождество́м Христа́ Бо́га,
Ма́ти Безневе́стная Чи́стая,
Сего́ ми́лостива сотвори́, Влады́чице,
спасти́ рабы́ от наси́лия и мучи́тельства вра́жия, вопию́щия Христо́ви, Сы́ну Твоему́:
благослови́те, вся дела́ Госпо́дня, Го́спода.

Песнь 9

Ирмос: Безнача́льна Роди́теля Сын, Бог и Госпо́дь,
вопло́щся от Де́вы, нам яви́ся,
омраче́нная просвети́ти, собра́ти расточе́нная.
Тем Всепе́тую Богоро́дицу велича́ем.

Припев: Преподóбнии отцы́ Зоси́мо и Савва́тие, моли́те Бóга о на́с.

Выспрь к Бо́гу иму́ще мы́сль, Зоси́мо и Савва́тие преподо́бнии,
земна́я оста́вльше, Небе́сная восприя́сте, Бо́гу и Спа́су вас вельми́ просла́вльшу,
трудо́в ра́ди ва́ших и воздержа́ния неосла́бнаго;
сего́ ра́ди почита́ем вас, преблаже́ннии.

Припев: Преподóбнии отцы́ Зоси́мо и Савва́тие, моли́те Бóга о на́с.

И́хже благ, преподо́бнии, получи́сте, и Небе́сныя сла́вы,
ея́же от Бо́га сподо́бистеся, Ему́же вы́ну предстоите́,
моли́теся и нам неотлуче́нным бы́ти, мо́лим вы,
ра́достию и Боже́ственною любо́вию почита́ющим по́двиги ва́ша, всечестни́и.

Сла́ва Отцу́ и Сы́ну и Свято́му Ду́ху.

О боже́ственная, и богому́драя, и свяще́нная дво́ице, Зоси́мо и Савва́тие!
Ми́рови ми́ру от Бо́га низпосла́тися испроси́те,
Це́рквам соедине́ние и всем скорбя́щим утеше́ние и спасе́ние, преблаже́ннии.

И ны́не и при́сно и во ве́ки веко́в. Ами́нь.

Богородичен: Пощади́ мя, Христе́ Спа́се,
пощади́ моли́твами Ро́ждшия Тя и всех святы́х Твои́х;
егда́ ся́деши суди́ти де́лом мои́м,
беззако́ния моя́ и грехи́ моя́ пре́зри, я́ко Еди́н безгре́шен.

Светилен

Мирска́го пристра́стия, я́ко от скве́рны, уклони́вшеся
и а́лчбою плоть умертви́вше, блаже́ннии,
Небе́сною сла́вою со А́нгелы обогати́стеся;
те́мже непреста́нно о нас моли́те Христа́ Бо́га, преподо́бнии Зоси́мо и Савва́тие.

Акафист святым преподобным Зосиме, Савватию и Герману, Соловецким чудотворцам

Аудио:

43:21

Кондак 1

Избраннии угодницы Господни и велицыи чудотворцы, светильницы Христовы Церкве пресветлии, облиставшии благочестия светлостьми пустыни Севернаго Помория, и всей стране Российстей сияющии выну чудес множеством, преподобнии отцы наши Зосимо, Савватие и Германе, яко имущии дерзновение ко Господу, благоприятными своими к Тому мольбами от всяких нас бед и зол сохраняйте, да радующеся зовем вам:

Радуйтеся, преподобнии отцы наши Зосимо, Савватие и Германе.

Икос 1

Ангели воистину явистеся земнии и человецы небеснии житием вашим, преблаженнии отцы наши Зосимо, Савватие и Германе: во плоти бо, яко безплотнии, ангельское совершисте жительство на земли, вся красоты мира и наслаждения временная яко уметы вменяюще, чистотою же и пощением выну к Богу приближающеся. Емуже ныне достойно со безплотными предстояще, приимите от любве нашея приносимая вам хваления сицевая:

Радуйтеся, Единаго Бога от всея души своея возлюбившии;

Радуйтеся, от юности Тому преподобием и правдою послужившии.

Радуйтеся, возненавидевшии мира сего тленныя красоты;

Радуйтеся, избежавшии мудре житейских соблазнов и суеты.

Радуйтеся, к деланию заповедей Господних всею любовию прилепившиися;

Радуйтеся, мира сего и всякаго пристрастия ко оному удалившиися.

Радуйтеся, иноческое житие богоугождения ради себе предизбравшии;

Радуйтеся, тесный и прискорбный путь всею душею возлюбившии.

Радуйтеся, мудрии взыскателие Христа, бисера вожделеннаго и драгаго;

Радуйтеся, люботруднии носителие Христова бремене, легкаго и благаго.

Радуйтеся, ангелом безплотным во плоти бренней подражавшии;

Радуйтеся, на земли жительство небесное нам показавшии.

Радуйтеся, преподобнии отцы наши Зосимо, Савватие и Германе.

Кондак 2

Видя себе, святе Савватие, ради многих своих добродетельных исправлений, всюду в сопребываниих иноческих почитаема и ублажаема, и бегая суетныя мира сего славы, взыскуя же вечнаго воздаяния на небесех, устремился еси ко отоку Соловецкому, да тамо втайне и никимже видимый поработаеши невидимому и вся видящему Богу. Темже и улучив желаемое, блаженным Германом к сему наставляем, радостно возопил еси Богу: Аллилуиа.

Икос 2

Разум неуклонно вперив от утробы матерни к Богу, и горняя выну мудрствуя и взыскуя, дольних же всецело отвергаяся, богомудре Зосимо, поревновал еси житию преподобнаго Савватия, и во отоце пусте, идеже сей богоугодне соверши подвиги своя, вселился еси, да с ним наследуеши жительство горняго Иерусалима. Темже во обоих восхваляюще пустынножития рачительство, зовем вам:

Радуйтеся, любве ради Христовы, любовь в себе к миру поправшии;

Радуйтеся, всякую греховную сладость века сего презревшии.

Радуйтеся, подобницы Аврааму не точию верою и упованием, но и добровольным от рода своего и дома отеческаго преселением;

Радуйтеся, пустыни всекрасная и благозлачная насаждения.

Радуйтеся, безмолвия тщаливейшии рачителие;

Радуйтеся, трудных подвигов пустынных искреннии любителие.

Радуйтеся, в дебрех и горах паче, неже в селех мира, изволившии приметатися;

Радуйтеся, в пустынях непроходимых, едини во трудех и соблюдении заповедей Господних возлюбившии подвизатися.

Радуйтеся, яко злато, искусившиися в горниле пустыннаго озлобления;

Радуйтеся, доблественне претерпевшии от бесов же и от людей многая искушения.

Радуйтеся, пророку Божию Илии и крестителю Господню Иоанну нравом пустыннолюбия подражателие;

Радуйтеся, доблем Герману единомысленнии сподвижницы любобезмолвнии купножителие.

Радуйтеся, преподобнии отцы наши Зосимо, Савватие и Германе.

Кондак 3

Силы небесныя, в служение посылаемыя хотящым наследовати спасение, дивно послужиша вам, о двоице боголюбивая. Егда бо насельницы мирстии, стужающе безмолвию твоему, отче Савватие, жити хотяху во острове близ тебе с женами и чады, ангели грозным прещением и наказанием жены рыбаревы воспятиша сих от начинания богопротивнаго: тебе же, отче Зосимо, во озимении пребывавшему кроме брашна, ангельским служением преподашася потребная ко препитанию. Сего ради Богу, спасающему угодники Своя, поим: Аллилуиа.

Икос 3

Имуще оток морский во обителище себе, никимже населяемый, и в нем пребывающе, аки в раи богозданнем, вне мятежей и волнений житейских, и кроме суетных попечений, благочестно и богоугодно подвизастеся, о богоблаженнии, во дни и нощи поучающеся в законе Господни, и на всякий час умом несмущен­ым и сердцем чистым возносяще усердныя к Богу молитвы и моления. Сего ради радостию вопием вам:

Радуйтеся, в законе Господни непорочно ходити всегда восхотевшии;

Радуйтеся, Господа своего пред очима своима присно имевшии.

Радуйтеся, страхом Господним вся пути своя ограждавшии;

Радуйтеся, в трезвении умнем все житие свое провождавшии.

Радуйтеся, вся помыслы ума в послушание Христово всецело пленившии;

Радуйтеся, чистыя ваша сердца в жилище Святому Духу представившии.

Радуйтеся, не давшии сна очима во всенощных Господеви предстояниих;

Радуйтеся, выну претерпевавшии скорби в поучении смертнем и в сердечных ко Господу воздыханиих.

Радуйтеся, с искреннею любовию подвизавшиися на славословие Божие и псалмопения;

Радуйтеся, сердцем и усты непрестанныя возсылавшии к Богу моления.

Радуйтеся, внутрь сердца своего сокровенное Царствие Божие обретшии;

Радуйтеся, восхождении умными к небесным видением востекшии.

Радуйтеся, преподобнии отцы наши Зосимо, Савватие и Германе.

Кондак 4

Бурю жития сего многомятежнаго безбедно преминусте, отцы преподобнии, и свирепыя волны страстей же и искушений, от мира и плоти и от духов злобы воздвизаемыя, не погрузиша и не поколебаша корабля душ ваших, ветрилы молитвы непрестанныя окриляемаго, и нестяжанием облегчаваемаго, благодатию же Божиею управляемаго. Темже и достигосте к безмятежному пристанищу живота вечнаго, вопиюще Богу: Аллилуиа.

Икос 4

Слышаще и ведуще от писаний Божественных, яко вси подвизавшиися во благочестии, распинаху плоть свою со страстьми и похотьми, благочестномудренно, о преподобнии, сих подвигом последствующе, подвизастеся умертвити уды своя сущия на земли, в пощениих, бдениих и во всяких трудех иноческаго жития мужески претерпевающе скорби. Сего ради, яко доблия подвижники благочестия, венчаем вы хвалении сицевыми:

Радуйтеся, телеса своя труды и болезньми воздержания увядившии;

Радуйтеся, вся плотская мудрования, на дух воюющая, духу покорившии.

Радуйтеся, покаянными слезами пламень страстей угасившии;

Радуйтеся, в пещи воздержания души своя яко злато очистившии.

Радуйтеся, ветхаго человека со страстьми его совлекшиися;

Радуйтеся, одеждею безстрастия и славою нетления достойно облекшиися;

Радуйтеся, возненавидевшии временную греха сладость;

Радуйтеся, наследовавшии на небеси нескончаемую радость.

Радуйтеся, прежде смерти, миру и сластем его плоть свою распеншии;

Радуйтеся, прежде воскресения, славу будущия жизни в себе проявившии.

Радуйтеся, стезею поста к наследию рая, потеряннаго невоздержанием, путь нам указавшии;

Радуйтеся, в телеси мертвеннем и тленнем безсмертие и нетление будущаго века всем предъявившии.

Радуйтеся, преподобнии отцы наши Зосимо, Савватие и Германе.

Кондак 5

Боготечныя и многосветлыя звезды явилися есте, преподобнии отцы Зосимо, Савватие и Германе, светозарными исправлении заповедей Господних озаряющии душы и сердца верных, и преплавающым в нощи греховнаго омрачения пучину житейскаго моря указующии благонадежный путь ко блаженному пристанищу Небеснаго Царствия. Темже явившему вы, яко руководители и наставники ко спасению, благодетелю Богу поим: Аллилуиа.

Икос 5

Видевше злокозненнии ненавистницы спасения человеческаго, нечистии дуси тьмы, богоугодное житие ваше, отцы преблаженнии, многообразная воздвигаху на вы искушения и страхования, овогда в мысли и сердце всевающе боязнь и смущение, овогда же преобразующеся; в различная привидения дивиих зверей и гад, с яростию устремляхуся на вы, чающе отвратити от подвига богоугоднаго и изгнати от пребывания пустыннаго: вы же, твердою верою в Бога Промыслителя возмогающе и оружием молитвы и воздержания противу врагов ваших ополчающеся, до конца победисте и низложисте их державу. Сего ради, победительную песнь поюще, взываем к вам:

Радуйтеся, воини духовнии непобедимии;

Радуйтеся, оружницы Христовы добропобеднии.

Радуйтеся, подвижницы, противу козней лукаваго мужески ополчившиися;

Радуйтеся, столпи крепцыи, от нападений вражиих не поколебавшиися.

Радуйтеся, вся стрелы диаволи аки хврастие сокрушившии;

Радуйтеся, вся стужения того и страхования ни во чтоже вменившии.

Радуйтеся, яко во плоти суще, победисте враги безплотныя и невидимыя;

Радуйтеся, яко и во гробех лежаще, низлагаете вражия ополчения.

Радуйтеся, победоносцы славнии, венчаннии от Небеснаго Венцедателя;

Радуйтеся, споборницы доблии ратующым на миродержителя тьмы века сего.

Радуйтеся, яко подвигом вашим ангели удивишася;

Радуйтеся, яко о славе вашей собори верных возвеселишася.

Радуйтеся, преподобнии отцы наши Зосимо, Савватие и Германе.

Кондак 6

Проповеданное от ангел изволение Божие о населении иночествующими отока Соловецкаго исполнися вами, отцы преблаженнии Зосимо, Савватие и Германе: се бо пустыня неплодная и ненаселенная, поты же и слезами вашими обильно напоенная, показася яко вертоград благоцветущий и рай словесный, идеже лицы иночестии, вами благонаученнии, плоды богоугодныя приносяще, поют ангельскую Богу песнь: Аллилуиа.

Икос 6

Возсиясте, отцы богоноснии, светом благочестия, яко светила богосветлая, светоносными лучами ваших подвигов и добродетелей просвещающии всюду. Отонудуже мы, грешнии и тьмою страстей помраченнии, во свете ваших богоугодных деяний текуще ко дню света и спасения, восхваляем вы, поюще сице:

Радуйтеся, ученицы Христови благопослушнии;

Радуйтеся, Владыки своего раби блазии и вернии.

Радуйтеся, трудолюбнейшии винограда Христова делателие;

Радуйтеся, тщаливейшии заповедей Христовых исполнителие.

Радуйтеся, игу Христова смирения и кротости благопокорне рамо свое подклонившии;

Радуйтеся, во след Христа Господа, учившаго о нищете, усердно в нищете и нестяжании последовавшии.

Радуйтеся, по словеси Господа, прешедшии путь временнаго жития сего, стезями прискорбными и тесными;

Радуйтеся, аки дождем, измывшии душы своя токи слезными.

Радуйтеся, краснейшему душ Жениху красоту девства своего сохранившии;

Радуйтеся, во всякой святыни всеми добрыми делы Тому благоугодившии.

Радуйтеся, Господа своего прославившии в душах ваших и телесех;

Радуйтеся, от Господа по достоянию прославленнии на земли и на небесех.

Радуйтеся, преподобнии отцы наши Зосимо, Савватие и Германе.

Кондак 7

Хотяй спасти вами многия, Премилосердый Бог яви вас быти не точию наставники сонма иночествующих, но якоже боговещанныя проповедники, возвестившыя имя Божие в странах Лапландии. Людие бо, во онех местех обитающии, и не ведевшии дотоле Бога, но прилежавшии весьма идолопоклонению и нечестию, во светлости вашего, о преподобнии, жития, знамений же и чудес, узреша первую зарю спасительнаго боговедения и благочестия, и от вас научишася воспевати истинному Богу: Аллилуиа.

Икос 7

Дивно и преславно совершивше путь своего спасения, чудную же и боголепную основавше обитель во спасение иночествующим, блаженную восприясте живота своего кончину, приснопамятнии отцы наши, Зосимо, Савватие и Германе: обаче, и по смерти вашей, присно живи суще, нас, чад своих, никогдаже оставляете, не духом точию нам присно спребывающе, но и мощи своя цельбоносныя нам предавше, яко сокровище безценное. Сего ради с радостию ублажаем вы, зовуще:

Радуйтеся, добрым подвигом во всем житии своем подвизавшиися;

Радуйтеся, славою и честию от Владыки своего Христа увенчавшиися.

Радуйтеся, яко привременно потрудившеся, в вечный покой внидосте;

Радуйтеся, яко тесным шествовавше путем, к блаженству Царства Небеснаго достигосте.

Радуйтеся, аще и не единокупно, но в равных подвизех подвизавшиися на земли;

Радуйтеся, за равноподвижное житие радостию и веселием вкупе наслаждающиися на небеси.

Радуйтеся, во отоце пусте, яко град, обитель иноком основавшии;

Радуйтеся, сонмы иноков о Христе Бозе во оней собравшии.

Радуйтеся, стражи стаду своему приснободреннии, и по днех временныя жизни от дел благотворений не почивающии;

Радуйтеся, сынове Царствия, на Небесех живущии и земных не оставляющии.

Радуйтеся, духом вашим горе со ангелы святыми, и долу с нами грешными присно пребывающии;

Радуйтеся, от честных мощей ваших струи милости на всех источающии.

Радуйтеся, преподобнии отцы наши Зосимо, Савватие и Германе.

Кондак 8

Странную и пречудную, велию же и прекрасную узрев на воздусе явльшуюся церковь, все же место оно, на немже имяше возградитися обитель иноков, видя неизреченным светом осияваемо, ужасом исполнился еси, отче Зосимо, от предивнаго видения. Обаче, Божие во оном откровение поразумев, на созидание обители тебе поощряющее, купно же и грядущую славу места сего прозря, умиленным сердцем и усты воспел еси Богу: Аллилуиа.

Икос 8

Вси правовернии российстии людие, прославляюще ваше святое и равноангельное житие, во всяких нуждах и скорбех притекают к вашей помощи и заступлению, отцы досточуднии: дана бо есть вам от Бога благодать, еже молитися за ны, избавляти же и спасати от всяких бед и зол притекающыя к ракам честных мощей ваших, и на всяком месте призывающыя святое ваше имя. Темже, исповедающе чудная ваша благодеяния, благодарственная восписуем вам, зовуще:

Радуйтеся, источницы Божественных дарований неизчерпаемии;

Радуйтеся, милования и любве к людем сосуди неиждиваемии.

Радуйтеся, яко кадило благовонное, о мире молитвы к Богу возносящии;

Радуйтеся, немолчными вашими ходатайствы всякое благословение от десницы Божия на ны низводящии.

Радуйтеся, сущым в скорбех и нуждах известнии помощницы;

Радуйтеся, во обстояниих и напастех скории пособницы.

Радуйтеся, в недузех целители, и в бури страждущым благонадежнии кормчии и избавители;

Радуйтеся, во всяких бедах и искушениих теплии предстатели и утешители.

Радуйтеся, верным, благочестно чтущим вас, на сопротивныя споборницы;

Радуйтеся, всея земли Российския избраннии молебницы и заступницы.

Радуйтеся, на земли и на мори чудеса преславная содевающии;

Радуйтеся, во вся концы призывающым вы скорую помощь независтно простирающии.

Радуйтеся, преподобнии отцы наши Зосимо, Савватие и Германе.

Кондак 9

Всеми Богокрасными лепотами добродетелей украсив себе, прехвальне Зосимо, наипаче явился еси краснейший душею же и телом, достойно помазався священства Божественною мастию. Темже, егда во святем храме совершал еси пред престолом Господним первую Божественную службу, видеша вси лице твое, облистанное светом благодати, яко лице ангелово: весь же храм во известное свидетельство достоинства твоего исполнися велия благоухания. Сего ради вси, благодаряще Бога о своем пастыре, радостным сердцем взываху: Аллилуиа.

Икос 9

Ветийственными добровещаньми несть возможно по достоянию воспети и прославити многая и неисчетная, велия же и преславная, и всякое разумение земное превосходящая, совершамая вами, отцы преподобнии, на всякое время чудотворения. Обаче, да не явимся чрез немотствование подобни рабу, сокрывшему сокровище своего Владыки, от уст, аще и не обученных и слова премудрости отнюд не имущих, любовию же точию и благодарением движимых, дерзаем простирати песнь благодарения в память и прославление чудес ваших, зовуще сице:

Радуйтеся, чудотворцы великоименитии и благославнии;

Радуйтеся, душ и телес врачеве немздоприемнии.

Радуйтеся, очеса слепых благодатию Божиею просвещающии;

Радуйтеся, немотою связанныя уста ко благоглаголанию разрешающии.

Радуйтеся, разслабленных удесы исправляющии неможение;

Радуйтеся, хромым дарующии правохождение.

Радуйтеся, плененных предстательством своим от уз и пленения свобождающии;

Радуйтеся, мертвыя силою Божиею, вашим же умолением воскрешающии.

Радуйтеся, во всяких страстех и недузех совершающии благодатное исцеление.

Радуйтеся, томимым во обстояниих и напастех дарущии мир и духовное просветление;

Радуйтеся, идущим во след Господа путем тесным и прискорбным подающии божественное вспоможение.

Радуйтеся, преподобнии отцы наши Зосимо, Савватие и Германе.

Кондак 10

Спасения подвиг добре совершив, жития же сего временнаго отрешаяся и отходя к животу вечному и блаженному, Зосимо богоблаженне, утешал еси ученики твоя, глаголя, яко разлучаяся с ними телесне, не отступен будеши от них и обители твоея твоим духом. Отонудуже и самеми делы слово твое исполняяй являешися, не точию невидимо соприсутствуя нам и назирая вся, но и видимо многажды, вкупе со блаженным Савватием, являяся во время благопотребно призывающым вас в помощь и вопиющим Богу: Аллилуиа.

Икос 10

Стена необоримая и покров твердый, спасения забрало и оружие победы быша нам, отцы преподобнии, теплые ваша к Богу молитвы, в день брани оныя лютыя, егда, по грехом и беззаконием нашым, врази крепцыи и бранноискуснии со огнем и мечем нападоша на ны в достоянии вашем, во еже сокрушити святыни ваша и положити я в разорение и попрание, духовная же чада ваша победити и погубити смертию безгодною; обаче, никоеже зло возмогше сотворити, сами наипаче тии исполнишася студа и безчестия, уповающии же на помощь вашу препоясашася радостию и веселием о своем спасении. Благодаряще убо о сем Бога, исповедуем купно ваше ходатайство и заступление, и вопием вам тепле из глубины души:

Радуйтеся, пастырие добрии, от врагов губительных стадо свое защищающии;

Радуйтеся, яко орли под крилома своима птенцы своя покрывающии.

Радуйтеся, покровом молитв своих в день брани нас осенившии;

Радуйтеся, гнев Божий, праведно на ны движимый, ходатайством своим утолившии.

Радуйтеся, не давшии своего достояния в попрание и расхищение;

Радуйтеся, паче надежды сохранившии е от огненнаго запаления.

Радуйтеся, уповающыя на вы от губительства смертнаго свободившии;

Радуйтеся, от раны и язвы, от уз и пленения дивно тех сохранившии.

Радуйтеся, врагов гордыню и дерзновение обратившии в студ им и безчестие;

Радуйтеся, ны, жительствующия в обители вашей, неискусобранныя и безоружныя, одеявшии в радость и веселие.

Радуйтеся, веры и благочест­ия отеческаго неусыпнии охранители;

Радуйтеся, за Отечество явльшиися и по смерти мужественнии воители.

Радуйтеся, преподобнии отцы наши Зосимо, Савватие и Германе.

Кондак 11

Песни хвалебныя и моления всеумиленная приносяще, долготу же путную и опасности моря ни во чтоже вменяюще, притекают к цельбоносным мощем вашым царие и князи, святители и вельможи, богатии и убозии, ближнии и дальнии, всяк возраст и пол, и всякое верных совокупление, и яко от неистощимаго источника, по коегождо своей потребе, приемлюще обильная врачевания душевная же и телесная, прославляют и величают Бога, таковую благодать вам даровавшаго, поюще: Аллилуиа.

Икос 11

Светом Божественныя благодати, в недрех земли, в предивных знамениих и чудесех, от первых дней упокоения возблиставшия ваша мощи, достодолжно и праведно лицы иночестии, от многолетнаго покровения изнесше, поставиша со благоговением на свещнице церковнем, во храме, имени вашему созданнем, благочестием великаго и святаго подражателя ваших подвигов, исповедника и мученика, Святителя и первопрестольника Российскаго Филиппа. И мы ныне, благочестно о славе вашей веселящеся, обстояще честныя раки мощей ваших и любезно тыя облобызающе, велегласно зовем вам:

Радуйтеся, светильницы пресветлии, на свещнице церковем преславно поставленнии;

Радуйтеся, кивоти честнии, не камением и златом, но благодати дарованьми украшеннии.

Радуйтеся, яко три звезды, озаряющии тьму полунощную;

Радуйтеся, яко три столпа, в пределех Севернаго Помория утверждающии веру православную.

Радуйтеся, источницы райстии, моря чудес изливающии;

Радуйтеся, бисерие дражайшии, Церковь Христову украшающии.

Радуйтеся, благочестия и добродетели светлейшая зерцала;

Радуйтеся, Церкви и Отечества необоримая забрала.

Радуйтеся, райскаго исполнения крини благовоннейшии;

Радуйтеся, лозы Божественныя розги благоплоднейшия.

Радуйтеся, отцы всеблаженнии, прославляемии горе от Бога и ангел, и долу ублажаемии от человек;

Радуйтеся, яко радость ваша, святая и совершенная, пребывает во век.

Радуйтеся, преподобнии отцы наши Зосимо, Савватие и Германе.

Кондак 12

Благодать свою Божественную, в телесех ваших обитающую, яви иногда Преблагий Бог благоговейному иноку Иосифу во образе двух столпов огнезрачных, от земли до небес над гробы вашими возносящихся и сияющих светом неизреченным: воистинну бо вы есте, отцы преподобнии, духовнии светозарнии столпи, светлостию высоких добродетелей и светом богознания, знамений же и чудес, озарившии пресветло духовную тьму в странах полунощных. Сего ради Богу, прославляющему святыя Своя, поим: Аллилуиа.

Икос 12

Поюще в песнех подвиги и труды вашего богоугоднаго жития, преславная же содеяная и содеваемая во всяком роде благотворения и чудотворения восхваляюще и прославляюще, недоумеем, отцы досточуднии, како вас по долгу возименуем: многия бо суть ваша добродетели и дарования, сего ради многая приличествуют вам и именования. Обаче, во многих малыми удовляющеся, сия вам с любовию восписуем:

Радуйтеся, ангели земнии, яко ангельским жительством на земли пожисте;

Радуйтеся, человецы небеснии, яко земнородни суще, возненавидесте земная, небесная же возлюбисте.

Радуйтеся, постницы терпеливейшии, в приснем пощении все житие свое проводившии;

Радуйтеся, пустынницы достохвальнии, в пустынях незаходимых Господеви послужившии.

Радуйтеся, учителие и наставницы, руководящии своими делы на пути спасения;

Радуйтеся, вожди духовнии, многих душы возводящии в небесная селения.

Радуйтеся, мучеником единонравнии, яко мужески бравшиися со страстьми;

Радуйтеся, апостолом подражателие, просветившии тьму неверия боговедения светлостьми.

Радуйтеся, пророком подобницы, тайных и будущих проведением и проречением;

Радуйтеся, всем святым единочестнии, подвигов ради и богоугождения.

Радуйтеся, таинницы благодати и чудес совершителие предивнии;

Радуйтеся, граждане небеснии и друзи Богу и святым Его приснии.

Радуйтеся, преподобнии отцы наши Зосимо, Савватие и Германе.

Кондак 13

О преподобнии отцы наши, Зосимо, Савватие и Германе! Приимите благоутробно от нас смиренных и недостойных сия возносимая вам хваления, и благоприятными вашими к Богу мольбами оградите ны от всякия беды и напасти, от недуга и глада, от огня и меча, и нашествия иноплеменных. Наипаче же сохраните ны вашим заступлением крепким от врагов невидимых, ищущих ны погубити, да избывше их многокозненных сетей, праведно и богоугодно поживем в нынешнем веце, и сподобимся в Небеснем Царствии купно с вами воспевати Христу Богу: Аллилуиа, аллилуиа, аллилуиа.

[Се́й конда́к глаго́лется три́жды.]

Икос 1

Ангели воистину явистеся земнии и человецы небеснии житием вашим, преблаженнии отцы наши Зосимо, Савватие и Германе: во плоти бо, яко безплотнии, ангельское совершисте жительство на земли, вся красоты мира и наслаждения временная яко уметы вменяюще, чистотою же и пощением выну к Богу приближающеся. Емуже ныне достойно со безплотными предстояще, приимите от любве нашея приносимая вам хваления сицевая:

Радуйтеся, Единаго Бога от всея души своея возлюбившии;

Радуйтеся, от юности Тому преподобием и правдою послужившии.

Радуйтеся, возненавидевшии мира сего тленныя красоты;

Радуйтеся, избежавшии мудре житейских соблазнов и суеты.

Радуйтеся, к деланию заповедей Господних всею любовию прилепившиися;

Радуйтеся, мира сего и всякаго пристрастия ко оному удалившиися.

Радуйтеся, иноческое житие богоугождения ради себе предизбравшии;

Радуйтеся, тесный и прискорбный путь всею душею возлюбившии.

Радуйтеся, мудрии взыскателие Христа, бисера вожделеннаго и драгаго;

Радуйтеся, люботруднии носителие Христова бремене, легкаго и благаго.

Радуйтеся, ангелом безплотным во плоти бренней подражавшии;

Радуйтеся, на земли жительство небесное нам показавшии.

Радуйтеся, преподобнии отцы наши Зосимо, Савватие и Германе.

Кондак 1

Избраннии угодницы Господни и велицыи чудотворцы, светильницы Христовы Церкве пресветлии, облиставшии благочестия светлостьми пустыни Севернаго Помория, и всей стране Российстей сияющии выну чудес множеством, преподобнии отцы наши Зосимо, Савватие и Германе, яко имущии дерзновение ко Господу, благоприятными своими к Тому мольбами от всяких нас бед и зол сохраняйте, да радующеся зовем вам:

Радуйтеся, преподобнии отцы наши Зосимо, Савватие и Германе.