Православный Мир
Житие
Св. вмч. Артемий, военачальник при императорах св. Константине Великом и Констанции, был назначен наместником Египта. С приходом к власти Юлиана Отступника, яростного гонителя христиан, Артемий публично обличил императора в нечестии. За это он был подвергнут жестоким пыткам, во время которых ему явился Христос, укрепив его. После отказа принести жертву языческим богам св. Артемий был обезглавлен в 362 году. Его пророчество о гибели Юлиана сбылось: император погиб в бою с персами. Мощи великомученика были перенесены в Константинополь.
* * *
Святой великомученик Артемий был одним из выдающихся военачальников в правление равноапостольного царя Константина Великого (306–337, память 21 мая), а затем – его сына и преемника Констанция (337–361). Артемий, имел много наград за отличную службу и отвагу, был поставлен наместником Египта. В этой должности он много сделал для распространения и укрепления христианства в Египте. Императора Констанция на престоле сменил Юлиан (361–363). Император-отступник, желая возвратить язычество, вел непримиримую борьбу с христианством, отправляя на смерть сотни христиан. В Антиохии он приказал истязать двух епископов, не желавших отречься от Христовой веры. В это время в город пришел святой Артемий и всенародно обличил Юлиана в нечестии. Разгневанный Отступник подверг святого жестоким пыткам. После этого великомученика бросили в темницу. Во время молитвы, которую святой возносил ко Господу, ему явился Сам Христос в окружении Ангелов и сказал: "Мужайся, Артемий! Я с тобой и избавлю тебя от всякой боли, какую причинили тебе мучители, и уже готовлю тебе венец славы. Ибо как ты исповедал Меня пред людьми, на земле, так и Я исповедую тебя пред Отцем Моим Небесным. Итак, будь мужествен и радуйся – ты будешь со Мною в Моем Царстве". Услышав это от Самого Господа, великомученик обрадовался и стал горячо благодарить и славословить Его.
На следующий день Юлиан потребовал, чтобы великомученик Артемий признал языческих богов. Встретив решительный отказ, император прибег к пыткам. Подвижник переносил всё без единого стона. Святой предрек Юлиану, что скоро тот получит справедливое возмездие за зло, причиненное им христианам. Отступник разъярился и прибег к еще более лютым пыткам, но они не сломили волю великомученика, и тогда святой Артемий был обезглавлен († 362).
Его останки были погребены христианами.
После кончины святого великомученика Артемия сбылось его пророчество о скорой гибели Юлиана Отступника.
Юлиан со своим войском вышел из Антиохии для сражения с персами. Около персидского города Ктезифона ему встретился старый перс. Он обещал предать соотечественников и быть проводником войску Юлиана. Старик обманул Отступника и завел его войско в Карманитскую пустыню, в непроходимые места, где не было ни воды, ни пищи. Истомленное голодом и жаждой греко-римское войско Юлиана было вынуждено вступить в бой со свежими силами персов.
Божественное возмездие настигло здесь и самого Отступника. Во время битвы он был смертельно ранен невидимою рукою, незримым оружием. Юлиан тяжело застонал и, умирая, произнес: "Ты победил, Галилеянин!" После гибели императора-отступника мощи святого великомученика Артемия были с почестями перенесены из Антиохии в Константинополь.
Песнопения
Тропарь, глас 4
И́стинною бо Христо́вою ве́рою
утве́рждься, страстоте́рпче,
мучи́теля злочести́ва царя́
победи́л еси́ со и́дольским того́ возноше́нием.
Тем от Царя́ Вели́каго, ве́чно ца́рствующаго,
пресве́тлым венце́м побе́дным одаре́н бысть,
вся исцеля́яй боля́щия и призыва́ющия тя, Арте́мие вели́кий,
моли́ Христа́ Бо́га
спасти́ ду́ши на́ша.
Ин тропарь, глас 4 Му́ченик Твой, Го́споди, Арте́мий/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.
Кондак, глас 2
Благочести́ваго и венцено́снаго му́ченика,
на враги́ побе́ды взе́мшаго одоле́ние,
соше́дшеся, досто́йно пе́сньми восхва́лим Арте́мия,
превели́каго в му́ченицех,
чуде́с же да́теля пребога́таго,
мо́лится бо Го́споду о всех нас.
Молитва
Молитва
О, всехва́льный великому́чениче Арте́мие, Госпо́день во́инственниче и все́м на́м кре́пкий побо́рниче! Ско́р бу́ди предста́тельством твои́м у Человеколю́бца Христа́, да да́ст правове́рным лю́дем, почита́ющим тя́ и на поклоне́ние моще́м твои́м приходя́щим, ми́лость и благи́х проше́ний ско́рое исполне́ние. Предстоя́й Престо́лу Бо́жию в лице́ му́ченик, помина́й все́х на́с, беда́ми, напа́стьми и скорбьми́ обстоимых, и в житии́ се́м мно́го стра́ждущих: да твое́ю по́мощию и кре́пким побо́рством преста́нут приходя́щая на на́с зла́я. Мы́ же, твои́ми злостраданиями назидаеми, си́лою благода́ти Христо́вы чрез тебе́ исполня́еми, в терпе́нии крестоноше́ния жи́ти начне́м, во е́же Го́споду покая́нием благоугоди́ти и неизрече́нная блага́я насле́довати, я́же угото́вана лю́бящим Бо́га и прославля́ющим свято́е и́мя Его́, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.
Канон
Канон святому великомученику Артемию
2
Минея, 20 Октября.
Глас 2
Песнь 1
Ирмос: Во глубине́ постла́ иногда́
фараони́тское всевоинство Преоруже́нная Сила,
вопло́щшееся же Сло́во всезлобный грех потреби́ло есть,
Препрославленный Господь, славно бо прославися.
Припев: Святы́й великому́чениче Арте́мие, моли́ Бо́га о на́с.
По́двигом, мучениче, добрым я́ко подвиза́вся и све́тлыя венцы́ прии́м,
Све́ту предстои́ши, просвеща́емь по прича́стию Невеще́ственному,
тем молим тя: просвети́ нас моли́твами твои́ми.
Припев: Святы́й великому́чениче Арте́мие, моли́ Бо́га о на́с.
Светлый твой, мучениче, праздник
вся созва́ ра́достно на трапе́зу днесь,
предложи́в страдания твои́х боре́ния, му́жество и противле́ние,
и́миже насы́щшеся, верою тя и любо́вию ублажа́ем.
Сла́ва Отцу́ и Сы́ну и Свято́му Ду́ху.
Умерщвле́на на Кресте́, преблаже́нне,
Недомы́сленнаго плотию поразуме́л еси́ Го́спода, Жизни Вино́вника,
во́льную возлюбил еси́ ме́ртвость, юже от страда́ний:
тем безсме́ртную славу получил еси́.
И ны́не и при́сно и во ве́ки веко́в. Ами́нь.
Богородичен: Воплоти́вся из Тебе́ боголепно Слово Безплотное
премно́жеством человеколюбия, Пречи́стая,
к страсте́м прибли́жися и безстрастие челове́ком источи́
Препрославленный Господь,
славно бо прославися.
Песнь 3
Ирмос: Процвела́ есть пусты́ня, я́ко крин, Го́споди,
языческая неплодя́щая церковь,
пришествием Твоим,
в нейже утверди́ся мое сердце.
Припев: Святы́й великому́чениче Арте́мие, моли́ Бо́га о на́с.
Му́ченическими украси́тися венцы́, славне, жела́я,
я́звы понесл еси́ и растерза́ния горьких боле́зней,
Боже́ственною благода́тию.
Припев: Святы́й великому́чениче Арте́мие, моли́ Бо́га о на́с.
Не потрясе́ столпа́ твоего́ се́рдца, всемудре,
люте́йшее приложе́ние мук,
утверди́ся бо на Разу́мнем Ка́мени неподви́жнем.
Сла́ва Отцу́ и Сы́ну и Свято́му Ду́ху.
На дре́ве пове́шен и ча́стыми отвсю́ду терза́нии окружа́емь,
твои́ми очесы́ к Могу́щему спасти́ взира́л еси́, достославне.
И ны́не и при́сно и во ве́ки веко́в. Ами́нь.
Богородичен: Вопло́щся хотением от крове́й, Влады́чице, Твоих пречистых, Господь
спасает человечество и мно́жества мучеников собра́.
Седален, глас 8
Царю веко́в угожда́я,
царя беззаконнаго всякий совет отрази́л еси́, славне,
и истука́нным не поже́рл,
того ра́ди жертву тебе́ сама́го принесл еси́ пожре́нному Слову,
пострада́в крепко.
Тем и чудес источа́еши струи́,
стра́сти исцеля́я верно приходя́щих к тебе́,
страстотерпче Артемие,
моли́ Христа́ Бо́га грехо́в оставле́ние пода́ти
чту́щим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Солнца о́блаче умнаго,
Божественнаго Света свети́льниче златокова́нный,
Нескве́рная, Небла́зная, Всенепоро́чная Влады́чице,
омраче́нную ду́шу мою́ ослепле́нием страсте́й,
безстра́стия заре́ю просвети́, молюся,
и оскверне́нное мое се́рдце омы́й пото́ки умиле́ния,
покая́ния же слеза́ми, и от тиме́ния мя очи́сти дел моих,
да любо́вию зову́ Ти:
Богоро́дице Приснодево,
моли́ Христа́ Бо́га прегрешений оставле́ние пода́ти ми,
Тебе́ бо име́ю надежду, раб Твой.
Песнь 4
Ирмос: Прише́л еси́ от Девы не хода́тай, ни А́нгел,
но Сам, Го́споди, вопло́щся,
и спасл еси́ всего мя человека,
тем зову Ти: сла́ва си́ле Твое́й, Го́споди.
Припев: Святы́й великому́чениче Арте́мие, моли́ Бо́га о на́с.
Уподо́бився Распя́тому,
на древе во́лею возвы́сился еси́,
протяза́емь и суро́вейше стру́жемь,
совлача́яся ко́жных риз умерщвле́ния.
Припев: Святы́й великому́чениче Арте́мие, моли́ Бо́га о на́с.
Боле́зни твоя́ плотски́я и лю́тых просте́ртие
неболе́зненный поко́й, мучениче, я́ве тебе́ исхода́таиша,
егóже ны́не насыщайся, всяку болезнь облегча́еши от душ на́ших.
Припев: Святы́й великому́чениче Арте́мие, моли́ Бо́га о на́с.
Равноа́нгельну бы́вшу тебе́ страда́ний све́тлостьми,
руко́ю А́нгеловою посылает тебе́ пищу, Небесный Хлеб,
Жизнь на́ша, укрепля́ющую тя, мучениче достославне.
Сла́ва Отцу́ и Сы́ну и Свято́му Ду́ху.
Бога́тыми тя украси́ благода́ть Ду́ха дарова́нии, всемудре,
тем вся́ческия неду́ги, мучениче всече́стне, отго́ниши,
верою прибега́ющих ти.
И ны́не и при́сно и во ве́ки веко́в. Ами́нь.
Богородичен: Де́ву Тя по рождестве́, Нескве́рная, Нетле́нну Христос соблюде́,
благоволи́вый во утро́бе Твое́й всего мя человека восприя́ти
кра́йнею бла́гостию.
Песнь 5
Ирмос: Хода́тай Бо́гу и человеком был еси́, Христе́ Бо́же,
Тобо́ю бо, Владыко, к Светоначальнику, Отцу́ Твое́му,
от но́щи неве́дения
приведе́ние и́мамы.
Припев: Святы́й великому́чениче Арте́мие, моли́ Бо́га о на́с.
Свеща́ светоза́рная ви́ден был еси́ Духом, Артемие,
ве́рныя просвеща́ющи и лука́вствия разгоня́щи
мрачных и тьмы испо́лненных духо́в.
Припев: Святы́й великому́чениче Арте́мие, моли́ Бо́га о на́с.
На Ка́мени Живо́тнем душе́вныя стопы́ водрузи́в,
ка́мением сгнета́емь и боле́зньми окружа́емь,
и́стинный страстотерпец непрекло́нен пребы́л еси́.
Сла́ва Отцу́ и Сы́ну и Свято́му Ду́ху.
Ты честны́ми вооруже́н Ду́ха си́лами,
трезу́бцев остроты́, мучениче доблему́дренне, небре́гл еси́,
в ни́хже спопра́в жа́ла вра́жия.
И ны́не и при́сно и во ве́ки веко́в. Ами́нь.
Богородичен: Крест и погребе́ние, из Тебе́ волею нас ра́ди Рожде́йся претерпе́в, Влады́чице,
свиде́теля крепча́йша Артемия Своих страда́ний,
я́ко Крепкий, соде́лал есть.
Песнь 6
Ирмос: В бе́здне грехо́вней валя́яся,
неизсле́дную милосе́рдия Твоего́ призыва́ю бе́здну:
от тли, Бо́же, мя возведи́.
Припев: Святы́й великому́чениче Арте́мие, моли́ Бо́га о на́с.
Агнец и заколе́ние всеце́лое,
мучениче, прине́слся еси́, Артемие,
во́льное распя́тие в наше Прии́мшему воззва́ние.
Припев: Святы́й великому́чениче Арте́мие, моли́ Бо́га о на́с.
Неосла́бными я́звами сокруша́емо
тело твое́, Артемие, терпели́вейшее,
душе́вное благоро́дие соблю́л еси́,
ве́рою неврежде́нное.
Сла́ва Отцу́ и Сы́ну и Свято́му Ду́ху.
Неду́гов нас изба́ви, мучениче,
искушений страсте́й же, и скорбе́й,
к тебе́ притека́ющия,
подража́телю Спасов, Артемие.
И ны́не и при́сно и во ве́ки веко́в. Ами́нь.
Богородичен: Обурева́емаго в пучи́не скорбе́й
и потопля́ема наше́ствиями треволне́ний,
спаси́, Богоро́дице Де́во, раба Твоего́.
Кондак, глас 2
Благочести́ваго и венцено́снаго мученика,
на враги́ побе́ды взе́мшаго одоле́ние,
соше́дшеся, досто́йно песньми восхва́лим Артемия,
превели́каго в мученицех,
чуде́с же да́теля пребога́таго,
мо́лится бо Господу о всех нас.
Икос
Кто по́двиги твоя́ довле́ет изглаго́лати, страстотерпче,
или болезни твоя́, я́же му́жески претерпе́л еси́ за веру Господню,
и дарова́ния, и́хже сподо́бился еси́,
не довле́ют уста́ человеческая пове́дати,
му́дростию бо укра́шен и мужеством,
богатство возненави́дев и досто́инство привре́менное,
во́ин яви́лся еси́ и́скреннейший,
моля́ся у́бо Го́споду о всех нас.
Песнь 7
Ирмос: Богопротивное веле́ние беззако́ннующаго мучи́теля
высо́к пла́мень вознесло́ есть.
Христос же простре́ Богочести́вым отроко́м ро́су духо́вную:
Сый благословен и препрославлен.
Припев: Святы́й великому́чениче Арте́мие, моли́ Бо́га о на́с.
Непобеди́мь смысл неруши́мою души́ тве́рдостию, Артемие, стяжа́в,
вра́жия кова́рства, мучениче, упраздни́л еси́,
поя́ изря́днейше:
Сый благословен и препрославлен.
Припев: Святы́й великому́чениче Арте́мие, моли́ Бо́га о на́с.
Струя́ми крове́й твои́х
возвышенный мук огнь угаси́л еси́, блаже́нне,
и росо́ю Ду́ха облия́емь, радуяся взывал еси́:
Сый благословен и препрославлен.
Сла́ва Отцу́ и Сы́ну и Свято́му Ду́ху.
Исцеле́ний дарова́ния источа́я,
страсте́й разжже́ния угаша́еши Боже́ственною благода́тию,
отгоня́еши же ду́хи присеще́нием твои́м,
воспевая, присносло́вый:
Сый благословен и препрославлен.
И ны́не и при́сно и во ве́ки веко́в. Ами́нь.
Богородичен: Мертвым Источи́вшаго безсмертие,
Де́во Всенепоро́чная, Боголепно родила́ еси́.
Того у́бо моли́ умертви́ти на́ша стра́сти телесныя, Чи́стая,
и вечныя сподо́битися жизни.
Песнь 8
Ирмос: Пещь иногда́ о́гненная в Вавилоне де́йства разделя́ше
Божиим велением, халде́и опаля́ющая,
ве́рныя же ороша́ющая, пою́щия:
благословите вся дела Господня Го́спода.
Припев: Святы́й великому́чениче Арте́мие, моли́ Бо́га о на́с.
Язвами лю́тыми тело твое́, трезу́бцы же изнуря́емо, претерпе́л еси́,
взира́яй на воздая́ние будущее,
е́же подае́т тебе́ зову́щу, славне,
всяческих Бог, Владыка же и Господь.
Припев: Святы́й великому́чениче Арте́мие, моли́ Бо́га о на́с.
Кровьми́ твои́ми земля освяти́ся,
и врачевство́ яви́ся тело твое́ многострадальное,
всякий неду́г, вся́ко озлобле́ние и всякий де́монский всегда вред отгоня́
от верно прибегающих к тебе́.
Сла́ва Отцу́ и Сы́ну и Свято́му Ду́ху.
Украше́ние страдальцев яви́лся еси́,
яже в мире благочестному́дренно отри́нув
и па́че премирная худе́йшим искупу́я
честно́ю же, прехвальне, кровию, воспевая:
благословите вся дела Господня Го́спода.
И ны́не и при́сно и во ве́ки веко́в. Ами́нь.
Богородичен: Исте́кшия ны горьким дре́ва вкушением
и па́дшия поползнове́нием возста́вила еси́, Пречистая,
Содетеля ро́ждши Слово Ипоста́сное, Чи́стая.
Ему́же вопие́м:
благословите вся дела Господня Го́спода.
Песнь 9
Ирмос: Безначальна Родителя Сын, Бог и Господь,
вопло́щся от Девы, нам яви́ся,
омраче́нная просвети́ти, собра́ти расточе́нная;
тем Всепетую Богоро́дицу велича́ем.
Припев: Святы́й великому́чениче Арте́мие, моли́ Бо́га о на́с.
Ви́дети восхоте́в добро́ты Небе́сныя,
ви́димыя добро́ты мира прете́кл еси́,
и, добротворе́ньми страдальцев украси́вся, мучениче доблему́дренне,
добрых кра́йнейшее, веселя́ся, восприя́л еси́.
Припев: Святы́й великому́чениче Арте́мие, моли́ Бо́га о на́с.
Я́ко у́тро, я́ко солнце,
па́мять твоя́, просвеща́ющи верных сердца́, блаже́нне, возсия,
ты бо и Света и Дне светови́дный яви́лся еси́ насле́дник,
разоряяй, Артемие, мглу душ на́ших.
Припев: Святы́й великому́чениче Арте́мие, моли́ Бо́га о на́с.
Взыгра́им, челове́цы, духовно ликовству́юще,
Артемия память, Божественнаго мученика,
пое́м Бо́гу с похвало́ю,
Чу́дному су́щу во святых
и освяща́ющу верою Того честву́ющия.
Сла́ва Отцу́ и Сы́ну и Свято́му Ду́ху.
Ра́ка твоя́, точа́щи непрестанно исцеле́ния,
ве́рныя созыва́ет любо́вию почерпа́ти
на теле́сное здравие и душе́вное истинно спасе́ние,
всеблаженне Артемие,
молитвенниче о благохва́лящих тя.
И ны́не и при́сно и во ве́ки веко́в. Ами́нь.
Богородичен: Светом мя просвети́ лица Твоего́, Го́споди,
уны́ния тьмою покрове́ннаго,
име́я молящую Тя, Сло́ве,
Истинную Чистую Матерь Твою́,
и А́нгельския силы, и преславнаго Артемия.
Светилен
Свет в се́рдцы твое́м возсия́в, Артемие страстотерпче,
горча́йшия му́ки претерпе́вшу мужественно;
и исцелений благода́ть прия́л еси́ свыше,
немощныя исцеля́ти всегда.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Свет просия́вый безле́тно из Отца прежде веко́в,
в лето ны́не напосле́док из Тебе́, Де́во, прозябе́ на спасе́ние мира,
к Нему́же не оста́ви о мире молитися.
Акафист
Акафист святому великомученику Артемию
Аудио:
29:35
Кондак 1
Взбранному воеводе и августалию страны Египетския, царем земным честию превознесенному, последиже от Юлиана злочестиваго мучимому и во главу усеченному, яко зельне страдавшему и победительне вся претерпевшему, от Бога же приявшему нетление и благодать чудотворения, днесь вернии в похвальная возопиим:
Радуйся, святый Артемие, преславный Христов великомучениче.
Икос 1
Антиохийстии людие дивишася святей ревности твоей о имени Христове, славне Артемие, не терпя бо зрети мучения святых и хулы слышати на Господа, Юлианом изрыгаемыя; аще и честь ему воздати от Александрии пришел, обаче и обличити того не устрашился еси. Темже, и чина своего воинскаго изверженный за дерзновение свое, осуждение на раны и смерть приял еси. Мы же ныне, аки обстояще ти на позорищи мучимому, вопием ти сице:
Радуйся, безславие и мучение от Юлиана претерпевый.
Радуйся, в славу и осияние от Бога облеченный.
Радуйся, лютая страдания подъявый.
Радуйся, величие веры показавый.
Радуйся, блистаяйся славою терпения.
Радуйся, крепосте наша в скорбех и изнеможении.
Радуйся, святый Артемие, преславный Христов великомучениче.
Кондак 2
Буди верен царю, прещаше святый Артемий нечестиваму Юлиану: «Яко суетны твоя начинания и немощна есть гордость твоя истребити христианы: отнележе бо прииде Христос, и водрузися Крест, и воздвижеся на нем Господь – паде злочестивых гордыня и попрана бысть лукаваго крепость, Христова же непобедима и непреодоленна есть сила, еюже ограждающеся, возможем устояти противу козней вражиих, победне вопия Богу: Аллилуиа».
Икос 2
Воинствуя за великаго царя Константина, крепкою силою крестною побеждал еси враги, оружеборче Артемие; тою же силою и мучителя своего Юлиана одолел еси. Видением бо креста овогда на небеси в вере Христовей утвердился, лесть идольскую и почести воинскаго звания презрев, за христианы пред отступником мужественно ратовал еси, и воинов началовождя веры нашея, Господа Христа, себе нарек, живот свой за Того доблественно положил еси. Темже и притяжал еси себе от нас звания таковая:
Радуйся, знамена идольская кесаря-отступника отринувый.
Радуйся, знамению Креста последовавый.
Радуйся, и ныне силы борющихся под стягом веры укрепляяй.
Радуйся, упование изнемогающих утверждаяй.
Радуйся, добрый Христов оружниче.
Радуйся, святыя веры твердый защитниче.
Радуйся, святый Артемие, преславный Христов великомучениче.
Кондак 3
«Господи, далече есмь от терпения и незлобия Твоего», – вопиял еси, святе Артемие, первая мучения претерпев, – «Ты бо, Господи, за мене, грешнейшаго, по всему телеси содроблен был еси ранами, от ног до главы не бе в Тебе целости. Молю убо Тя, Владыко, яко Твоими страданьми венчал мя еси, да и совершиши течение мое во исповедании Тебе с песнию: Аллилуиа».
Икос 3
Даде злочестивый царь повеление оруженосцем своим восхитити тя, славнаго воинскаго вождя, Артемие, и сановный пояс твой отъемше, и ризы совлекше, нага истязати. Они же, связавше руце и нозе твои, растягоша тело твое на четверо и бияху воловьими жилами по хребту и чреву толико, яко оскудети силам их. Ты же аки нечувствен пребывал еси, яко всем, окрест стоящим, и самому Юлиану чудитеся зело. Приими убо и от нас похвальная удивления сицевая:
Радуйся, в вере непобедимый.
Радуйся, в уповании непреодолимый.
Радуйся, на камени терпения нозе свои поставивый.
Радуйся, мужественне стопы своя исправивый.
Радуйся, радовавыйся в страданиях.
Радуйся, прославленный в поруганиях.
Радуйся, святый Артемие, преславный Христов великомучениче.
Кондак 4
Егда святии исповедницы Евгений и Макарий мучими бяху, тогда и ты, блаженне Артемие, ревностию по Бозе движим, молитву творил еси, да не покажет Бог тебе не точию недостойна страдальческаго начинания, но да исправится пред Ним и твоя исходная песнь: Аллилуиа.
Икос 4
Жилами воловьими биемый и по земле протязаемый ничтоже малодушествовал еси, но радуяся и веселяся, страданьми Христовыми просвещаем, подвиг мученичества до конца совершил еси добре. Темже и достоин явился еси ублажения сицеваго:
Радуйся, скудельный сосуд плоти своея сокрушивый.
Радуйся, свет веры и силу мужества из него явивый.
Радуйся, в егоже немощи сила Господня совершися.
Радуйся, егоже терпению мучитель почудися.
Радуйся, яко Бог прият твою жертву мучения.
Радуйся, яко Благий даде тебе жребий спасения.
Радуйся, святый Артемие, преславный Христов великомучениче.
Кондак 5
«За Мене страждеши, Артемие, дерзай и радуйся», – глагола Христос, явився святому в темнице, – «Со Мною будеши во Царствии Моем». Сия слышав мученик, абие от ран исцеле, и душею исполнився Божественнаго утешения, пребываше в темнице, благословляя Бога и поя Ему: Аллилуиа.
Икос 5
И гладом, и жаждею мучиша тя в темнице, блаженне Артемие. Ты же, на щедроты Преблагаго Господа себе возверг, единаго просил еси, да и самую душу твою, яко жертву живую приимет Владыка Христос от тебе с еще оставшеюся кровию твоею. И не вотще бысть рачение твое: заповеда бо Господь Ангелом Своим в темнице питати и сохраняти тя, потом же и Сам явися, укрепляя тебе, нас же возглашати тебе научая:
Радуйся, от руки Ангел в темнице питавыйся.
Радуйся, хлебом животным с небесе укреплявыйся.
Радуйся, от ран Господним посещением во узах исцеливыйся.
Радуйся, явлением Христовым утешения исполнивыйся.
Радуйся, Господем в темнице обрадованный.
Радуйся, восшедый к Нему прияти венец славы тебе уготованный.
Радуйся, святый Артемие, преславный Христов великомучениче.
Кондак 6
«Коль многа суть Владыки моего страдания и что более Его претерпех аз, недостойный», – вопияше блаженный Артемий, – «Той ко Кресту пригвожден бысть греха ради моего, Сам не познав греха, ниже лесть во устех содела. Радуюся и веселюся просвещаемый Господа моего страданьми, яже облегчевают ми болезни моя». Тако святый в себе беседуя, чрез всю нощь купно со страдальцами Евгением и Макарием воспеваше Богу: Аллилуиа.
Икос 6
Лютейшим мукам предаде тя, страдальче Артемие, нечестивый царь, егда со стыдом от Аполлона Дафнийскаго возвратися и от тебе посмеяние и проречение погибели своея слышав, зельною яростию распалися. Темже и мы за оныя страдания множайшими ликостоянии ублажаем тя сице:
Радуйся, яко тобою Бог, дивный во святых Своих, языком явися.
Радуйся, яко тобою сладчайшее имя Христово прославися.
Радуйся, ярости мучителевы не устрашивыйся.
Радуйся, в Христовем уповании над идолы посмеявыйся.
Радуйся, в дусе пророчестем будущих предзрителю.
Радуйся, Духа Господня доблий носителю.
Радуйся, святый Артемие, преславный Христов великомучениче.
Кондак 7
Многа досаждения творяше нечестивый Юлиан христианом, лжуще на ня, яко сожгоша храм Аполлона Дафнийскаго. Егда же сей лжец пред Артемием множайшия прещения изрекаше на христианы, святый Артемий отвеща: «Богопустный гнев и огнь с небесе пояде идола твоего и капище его сожже; посмеваюся безумию вашему, яко служите бездушному богу, утешаюся о падении его и радуюся о всех сих, яже Христос чудодействова, Емуже достоит пети велегласно: Аллилуиа».
Икос 7
Не терпя слышати праведных слов твоих, святе Артемие, беззаконный Юлиан, разгневався зело, повеле каменосечцем разсещи великий камень, да посреде частей его согнетен будеши. И сему уготованному, падший камень все тело твое сотре, и внутренняя твоя распадошася, и сломишася вся члены твоя. И бе зрети чудо велие, яко в таковом согнетении посреде камней ты жив остася. Мы же Божией силе, укреплявшей тя, удивляяся, вопием:
Радуйся, грозде винограда Христова в точиле истоптанная.
Радуйся, жертво живая, Господу верху камене кровию возлиянная.
Радуйся, мучениче, егоже все тело аки дска согнетеся.
Радуйся, скрижале живая, на нейже исповедание веры кровию написася.
Радуйся, кровьми своими, аки брением камение смесивый.
Радуйся, себе самаго жива в созидание Церкве Христовы положивый.
Радуйся, святый Артемие, преславный Христов великомучениче.
Кондак 8
Очи твои от мук искочиша, святе, и лице бе сотрено, душа же еще бе держащися и язык добре вещающ, имже и в согнетении призвал еси Бога, Помощника своего, и во уповании на Него взывал еси: Аллилуиа.
Икос 8
Привидением почте тя царь, егда узре видом страшна и естество человеческое происходяща; обаче и увеща тебе еще поклонитися идолом, да помилуют тя и поне яже во аде мукам не предадят. Ты же, посмеявся царю, отвещал еси: «Яко идоли и сами огня не могут избежати, с нимиже и ты, царю, безконечному огню предан будеши». За еже, яко хульника, царь на смерть осуди тя. Мы же, сшествуя тебе на место усечения, увязаем главу твою похвальными венцы тако:
Радуйся, страдальче, посреде камений согнетенный.
Радуйся, исповедниче, в крепости веры не одоленный.
Радуйся, истину без страха пред цари вещавый.
Радуйся, за сие последи всех злостраданий усечение мечное приявый.
Радуйся, главу свою священную под меч самовольне подклонивый.
Радуйся, терпением своим главы невидимых врагов сокрушивый.
Радуйся, святый Артемие, преславный Христов великомучениче.
Кондак 9
Ранами содроблен был еси по всему телеси, яко людем на тя зрети бе страшно: согнетенный аки дска, кости сокрушенны и вся внутренняя испадоша. Таковое злострадание за малую болезнь почитал еси, надеяся у Господа, за Негоже страдал еси, имети покой вечный, научая в злострадании не малодушествовати, но паки возсылати Богу благодарне: Аллилуиа.
Икос 9
«Се язвы Христовы на теле твоем начертаны суть», – глагола к себе святый, – «осталося убо, да и самую душу за Христа отдам с оставшеюся во мне кровию». И на щедроты Господни себе возверг, небоязненно Христа исповедал пред человеки, за Негоже и усечение с радостию приял еси. Сего ради, за превосходящую любовь твою к Богу, похваляем тя сице:
Радуйся, Христова Евангелия скорый послушателю.
Радуйся, великия заповеди Его готовый исполнителю.
Радуйся, крепкую любовь ко Господу Христу показавый.
Радуйся, и душу свою с кровию радостно за Того предавый.
Радуйся, содроблением своим наше разслабление укрепляяй.
Радуйся, язвами своими наша болезни исцеляяй.
Радуйся, святый Артемие, преславный Христов великомучениче.
Кондак 10
Твердою верою вооружився, неистовство мучителево презрел еси, и осуждение на усечение мечное с радованием приял еси, и ведомый на смерть, шествовал еси веселыми ногами, вопия Христу Богу: Аллилуиа.
Икос 10
Усечением главы подвиг свой мученический запечатлевый, утверди молитвами твоими и нас, главы своя под иго Христово подклонивших, чрез все житие подвигом добрым подвизатися, любити Господа у тебе поучатися, вопия тебе сице:
Радуйся, сильне, на одоление мучителей меч веры при бедре препоясавый.
Радуйся, шлемом спасения от Господа защищенный.
Радуйся, поясом славы от Него добре украшенный.
Радуйся, щитом молитв своих всех прибегающих к тебе охраняяй.
Радуйся, за страдальцев Господних во всеоружии ополчаяйся.
Радуйся, шествующих узким путем в Царствие Небесное неуклонно провождаяй.
Радуйся, святый Артемие, преславный Христов великомучениче.
Кондак 11
Фиал злострадания уготовляяся до конца испити, на месте усечения преклонився до земли, молитвою к Богу дух свой укреплял еси. И слышав глас с неба глаголющ: «Вниди со святыми прияти воздаяние тебе уготованное», – преклонил еси главу под меч, с радостию вознося Богу: Аллилуиа.
Икос 11
Хвалим тя вси, страстотерпче святый, и почитаем честная страдания твоя, яже паче естества человеческаго претерпел еси, и Царствие Небесное притяжал еси. Темже воздвизаемся вопити тебе тако:
Радуйся, измождения и членовреждения приявый.
Радуйся, высоту духа в муках явивый.
Радуйся, щитом упования себе оградивый.
Радуйся, твердостию своею дерзость мучителей истощивый.
Радуйся, егоже мучению Ангели предстояху со удивлением.
Радуйся, егоже страдания людие почитают со умилением.
Радуйся, святый Артемие, преславный Христов великомучениче.
Кондак 12
Ценою крови твоея притяжал еси Царствие Небесное, великострадальче Христов Артемие. Управи и нас твоим предстательством во обители небесныя, да, наслаждаяся с тобою части праведных, выну славим с тобою Бога песнию: Аллилуиа.
Икос 12
Чертог небесный отверзе ти Страстоположник Христос и даде ти достойно венец славы: и ныне на небесех со Ангельскими чинми радуешися. Темже и мы, благодарнии людие и любомученицы, песньми вопием ти:
Радуйся, воеводо, никимиже в мужестве одоленный.
Радуйся, ратоборче за Христа, в силе неоскудеемый.
Радуйся, великострадальче, муками твоими естество человеческое удививый.
Радуйся, несокрушимость духа в телеснем содроблении явивый.
Радуйся, во уповании на Бога Жива не усумневыйся.
Радуйся, части праведных на небесех наслаждаяйся.
Радуйся, святый Артемие, преславный Христов великомучениче.
Кондак 13
О, преславне великомучениче Христов Артемие! Поем страдания твоя, чтим доблюю кончину твою, с усердным молением к тебе притекающе: укрепи и нас с терпением в подвизе крестоношения пребывати, испытания и злострадания чрез все житие до конца понести не унывающе, но бодренне пребывающе в пении Богу: Аллилуиа.
[Се́й конда́к глаго́лется три́жды.]
Икос 1
Антиохийстии людие дивишася святей ревности твоей о имени Христове, славне Артемие, не терпя бо зрети мучения святых и хулы слышати на Господа, Юлианом изрыгаемыя; аще и честь ему воздати от Александрии пришел, обаче и обличити того не устрашился еси. Темже, и чина своего воинскаго изверженный за дерзновение свое, осуждение на раны и смерть приял еси. Мы же ныне, аки обстояще ти на позорищи мучимому, вопием ти сице:
Радуйся, безславие и мучение от Юлиана претерпевый.
Радуйся, в славу и осияние от Бога облеченный.
Радуйся, лютая страдания подъявый.
Радуйся, величие веры показавый.
Радуйся, блистаяйся славою терпения.
Радуйся, крепосте наша в скорбех и изнеможении.
Радуйся, святый Артемие, преславный Христов великомучениче.
Кондак 1
Взбранному воеводе и августалию страны Египетския, царем земным честию превознесенному, последиже от Юлиана злочестиваго мучимому и во главу усеченному, яко зельне страдавшему и победительне вся претерпевшему, от Бога же приявшему нетление и благодать чудотворения, днесь вернии в похвальная возопиим:
Радуйся, святый Артемие, преславный Христов великомучениче.
Молитва
О, всехвальный великомучениче Артемие, Господень воинственниче и всем нам крепкий поборниче! Скор буди предстательством твоим у Человеколюбца Христа, да даст правоверным людем, почитающим тя и на поклонение мощем твоим приходящим, милость и благих прошений скорое исполнение. Предстояй Престолу Божию в лице мученик, поминай всех нас, бедами, напастьми и скорбьми обстоимых, и в житии сем много страждущих: да твоею помощию и крепким поборством престанут приходящая на нас злая. Мы же, твоими злостраданиями назидаеми, силою благодати Христовы чрез тебе исполняеми, в терпении крестоношения жити начнем, во еже Господу покаянием благоугодити и неизреченная благая наследовати, яже уготована любящим Бога и прославляющим святое имя Его, Отца и Сына и Святаго Духа, ныне и присно, и во веки веков. Аминь.
