Православный Мир
Житие
Прп. Гавриил (Ургебадзе) родился в 1929 году в Тбилиси. Принял монашество в 26 лет. В 1965 году публично сжёг портрет Ленина, за что был помещён в психиатрическую больницу. Много лет терпел гонения от властей и церковных иерархов. Последние годы жизни провёл в монастыре Самтавро, где его почитали за дар любви, прозорливости и чудотворения. Скончался в 1995 году. Его мощи были обретены нетленными.
* * *
Мирское имя отца Гавриила - Годердзи Ургебадзе. Родился он 26 августа 1929 года в Тбилиси, в семье убежденного коммуниста. Отец рано скончался, и родные называли мальчика отцовским именем - Васико.
Уверовал в Бога в детстве. Однажды соседки ругались, и одна из них сказала: "Ты меня распяла, как Христа". Мальчику стало интересно, что это значит - "распять" и кто такой Христос. Взрослые отправили ребенка в церковь, где сторож посоветовал ему прочитать Евангелие. Он накопил денег, купил Евангелие и через несколько лет знал текст практически наизусть.
Желание монашества возникло в нем еще в юные годы. Позже старец говорил: "Большего героизма, чем монашество, нет". Мать его долгое время была против стремления сына к монашеству, но под конец жизни примирилась с его выбором, а затем и сама приняла постриг и была похоронена в монастыре Самтавро.
Монашеский постриг он принял в 26 лет, получив имя преподобного Гавриила Афонского - старца, который прошел по воде и принес на афонский берег приплывшую по морю Иверскую икону Божией Матери. Отец Гавриил особо почитал чудотворный список Иверской, хранящийся в монастыре Самтавро.
Во дворе своего дома на тбилисской улице Тетрицкаройской отец Гавриил построил многоглавую церковь. Он возводил ее своими руками и закончил около 1962 года. Иконы для этой церкви отец Гавриил находил на городских свалках, куда в те годы свозили и выкидывали вместе с мусором многочисленные святыни. Иногда он целыми днями бродил по свалкам. У него была небольшая мастерская, где он очищал иконы, делал им оклады из разных материалов. Стены его церкви сплошь были увешаны образами. Даже фотографии и изображения икон из светских журналов он помещал в рамочки.
1 мая 1965 года во время демонстрации иеромонах Гавриил сжег 12-метровый портрет Ленина, вывешенный на здании Верховного Совета Грузинской ССР, и стал проповедовать собравшимся людям Христа. Его за это сильно избили и посадили в изолятор КГБ Грузии. На допросе отец Гавриил говорил: он это сделал потому, что "нельзя боготворить человека. Там, на месте портрета Ленина, должно висеть Распятие Христа. Слава не нужна человеку. Надо писать: «Слава Господу Иисусу Христу»". В августе того года был помещён в психиатрическую больницу на обследование. Там был признан сумасшедшим. Старцу поставили диагноз: "психопатическая личность, верит в Бога и ангелов". Ему выдали "белый билет".
Впоследствии церковные иерархи, в угоду светским властям, не разрешали ему заходить в церковь, не пускали на службы, прогоняли. У батюшки не было возможности причаститься, а он желал этого всей душой. Он мог по несколько дней обходиться без еды, подолгу не спать, но очень тяжело переносил отчуждение от церкви. Старец часто от бессилия плакал, открывая душу своим сестрам.
В 1980-е годы поселился в монастыре Самтавро. В последнее время он жил в круглой башне. Монахини некоторое время удивлялись чудачествам батюшки, пока не увидели в них особый подвиг. Поначалу им казалось странным, что он какое-то время жил в курятнике, где были большие щели, зимой ходил босиком. Потом сестры стали чувствовать, что от него исходит необыкновенная любовь: он любит всех. Часто старец кричал на сестер, требовал от них послушания, заставлял что-то делать или мог заставить их есть из грязной посуды. Но обижаться на него было невозможно - в его глазах светилась нежная любовь.
Игуменью Феодору, когда она была еще монахиней, он брал с собой в Тбилиси и заставлял попрошайничать. Они вдвоем просили милостыню, а потом старец раздавал всё нищим. Если они возвращались на такси, он мог накричать на таксиста и совсем не дать денег, а мог и заплатить во много раз больше.
В Страстную седмицу из его кельи доносился постоянный плач. Некоторые видели, как во время молитвы он поднимался над землей на 40–50 сантиметров и от него исходил свет. Верующие люди почитали отца Гавриила великим подвижником, они приходили к нему как к живому святому.
Отар Николаишвили был духовным чадом батюшки и часто проводил время в его келье. Однажды отец Гавриил неожиданно сказал ему, что надо сейчас же, срочно ехать в монастырь святого Антония Марткопского. Отар смутился: машина не на ходу, с ней проблемы. Батюшка настоял, и они кое-как поехали. Дорога стала подниматься в гору, автомобиль "закашлял и зачихал", но старец вдруг сказал: "Сынок, ты не беспокойся, с нами на заднем сиденье едет сам преподобный Антоний Марткопский, но ты не оборачивайся". И машина вдруг так рванула вперед, что водителю пришлось давить на тормоза. Когда они въехали в монастырские ворота, машина тут же заглохла. В это же время туда вошли несколько вооруженных людей, агрессивно настроенных. Старец тут же вышел вперед и сказал: "Стреляйте в меня". Это смутило и отрезвило бандитов, и они покинули обитель.
Отец Гавриил умер 2 ноября 1995 года от водянки. По завещанию старца его тело обернули в циновку и предали земле там, где подвизалась святая Нина.
24 декабря 2012 года решением Священного Синода Грузинской Православной Церкви старец Гавриил прославлен в лике святых как преподобный. Это произошло в невероятно короткий срок после его кончины — через 17 лет.
22 февраля 2014 года были обретены нетленные мощи святого.
25 декабря 2014 года Священный Синод Русской Православной Церкви постановил «включить в месяцеслов и Русской Православной Церкви имя преподобного Гавриила Самтаврийского с установлением празднования его памяти 2 ноября, как это установлено в Грузинской Православной Церкви».
Песнопения
Тропарь, глас 1
Влады́це Христу́, Бо́гу на́шему,
И́же сла́ву Свою́ ра́биим зра́ком скры,
в смире́нии и кро́тости подража́я,
юро́дства вре́тищем благода́ть, ти да́нную, покры́л еси́
и духо́вный наста́вник мно́гим яви́лся еси́,
о́тче преподо́бне Гаврии́ле.
Те́мже и нас во благоче́стии укрепи́
и моли́ спасти́ся душа́м на́шим.
Ин тропарь, глас 1
Я́коже Влады́ка Христо́с сла́ву Свою́ неизглаго́ланную
сокры́, пло́тию оде́явся,
та́коже и ты юро́дства вре́тищем покры́л еси́
свет Фаво́рский и́мже Тя Госпо́дь оси́я
я́ко испове́дника и страда́льца,
и па́стырь душ яви́лся еси́,
о́тче преподо́бне Гаврии́ле,
моли́ Христа́ Бо́га поми́ловати ду́ши на́ша.
Кондак, глас 4
Непости́жима есть ми́лость Бо́жия,
Его́же благода́тию созда́ние обоже́но лицезре́ем вси,
ты бо, преподо́бне о́тче,
о́браз Творца́ в себе́ утверди́л еси́,
возне́сши естество́ свое́ в подо́бие Бо́жие,
те́мже сла́вим тя, о́тче Гаврии́ле, досто́йне похвалы́,
я́ко был еси́ на земли́ гла́сом пра́вды и го́лубем чистоты́,
жи́тельствовавши же в чу́дном смире́нии,
звене́л еси́ ли́рою му́дрости и любви́ орга́ном,
ны́не же на небесе́х предста́тельствуеши о спасе́нии на́шем,
хода́таю Бо́жия благода́ти.
Молитва
Молитва
О́, блаже́нне Гаврии́ле, древним отцем подо́бниче и тве́рдый веры испове́дниче, от младенства Го́спода всем сердцем возлюбивый и ре́вностно Ему после́довавый! Мы же, яко раби́ недостойнии, благочестия и смире́ния не имущии, обаче себе́ на всяк день в души́ велича́ющии, ближних осуждающии, не и́мамы пред Бо́гом, чим оправдатися! Сего ради молим тя: моли́ за нас Господа, да пода́ст нам ум, сло́во Его разуме́ти, да бу́дем не то́кмо слы́шателие, но и ревностнии его творцы и да разуме́ем, я́ко ничесо́же мо́жем, кроме́ по́мощи Бо́жия. Ей, святче Божий! Помози нам Господа возлюбити и Тому прилепитися все́ю душе́ю свое́ю, всем се́рдцем и помышле́нием, да пода́ст нам ра́дость, мир, долготерпение и утеше́ние в ско́рбех по неизрече́нней Свое́й ми́лости, Ему́же подобает всякая сла́ва, честь и держа́ва во ве́ки веко́в. Ами́нь.
Канон
Канон преподобному Гавриилу Самтаврийскому
Автор: Наталия Бахарева
Песнь 1
Моря Чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма
амали́кову си́лу в пусты́ни победи́л есть.
Припев: Преподо́бне о́тче Гаврии́ле, моли́ Бо́га о нас.
Ми́ра стра́стную пучи́ну
невла́жныма стопа́ма проше́дый,
о́тче Гаврии́ле преподо́бне,
все житие́ твое́ же́ртву благоуго́дну
Христу́ Бо́гу прине́сл еси́.
Я́ко младе́нца во чре́ве ма́терне
сло́во Бо́жие слы́шати благослови́вый,
о́тче Гаврии́ле,
благослови́ и мене́ разуме́ти и воспе́ти
сла́вная дела́ Го́спода, тя просла́вльшаго.
Житие́ твое́, Гаврии́ле преподо́бне,
я́ко столп от земли́ к небеси́,
бли́жним и да́льним указу́юще
стезю́ удобопрохо́дную
во Оте́чество Небе́сное.
Се́ти во всю зе́млю раски́нул есть
враг многоко́зненный,
и́миже с головы́ до ногу́ опу́тан есмь.
Но моли́твою твое́ю смире́нною, о́тче Гаврии́ле,
вся ловле́ния да расто́ргнутся.
Богородичен: Изведи́, Богоневе́сто,
служи́теля твоего́ моли́твами
из глубины́ ума́ моего́ плене́ния,
и глубины́ за́поведей Госпо́дних зре́ти сподо́би мя,
Девома́ти Чи́стая.
Песнь 3
Весели́тся о Тебе́ Це́рковь Твоя́, Христе́, зову́щи,
Ты моя́ кре́пость, Го́споди,
и прибе́жище, и утвержде́ние.
Те́сную стезю́ ше́ствовал еси́, о́тче,
о Го́споде веселя́ся,
о гресе́х же людски́х и ско́рбех го́рько пла́кал еси́.
Де́тскима очи́ма узре́в стра́сти Христо́вы,
отоню́ду ми́ру распя́лся еси́,
упокое́ния теле́снаго николи́же ве́дая.
Из камне́й ма́лых изде́тска це́ркви созида́я,
последи́ же храм свой велеле́пый назда́в,
ду́шу свою́ храм Бо́жий устро́ил еси́.
О́бразы от поруга́ния спаса́яй, о́тче,
та́ко и о вся́цей душе́ раде́л еси́,
я́ко о о́бразе Бо́жии, а́ще и запя́тнан есть.
Мене́, я́ко дра́хма поги́бшая, обре́теннаго,
научи́, Гаврии́ле блаже́нне,
преда́ти Го́споду моему́ се́рдце мое́.
Богородичен: Ми́ра Влады́чице,
Ея́же душа́ вове́ки вели́чит Го́спода,
сподо́би и мене́ ра́доватися о Бо́зе Спа́се мое́м.
Седален, глас 3:
Крест о́гненный де́тскима очи́ма на небеси́ узре́вый, крест свой о Христе́ в нем уразуме́в, отоню́ду ничто́же в ми́ре сем ве́дал еси́, я́коже Па́вел апо́стол, кроме́ Креста́ Христо́ва, и́мже страсте́м и греху́ распя́лся еси́, юро́де Бо́жий, Гаврии́ле, за́поведь Госпо́дню исполня́я, да егда́ кто хо́щет разу́мен бы́ти в ми́ре сем, безу́мен да бу́дет. Сего́ ра́ди с му́дрыми де́вами в черто́г небе́сный вшел еси́, иде́же ны́не ли́ка Христо́ва неизрече́нную сла́ву созерца́еши, моля́ся о душа́х на́ших.
Слава: Зре́ния душ челове́ческих и прови́дения дар от Го́спода восприя́л еси, Гаврии́ле чу́дне, не того́ ра́ди, да гряду́щая возвеща́еши и я́ко проро́к от челове́к нарече́шися, но да челове́ка от беды́ спаса́еши, за него́же распя́ся Христо́с; те́мже и ны́не, со святы́ми во све́те присносу́щнем пребыва́яй, коего́ждо, призыва́ющаго тя ско́рый еси́ моли́твенник и хода́тай те́плый.
И ныне: Богоро́дице Влады́чице, моли́твами Гаврии́ла, избра́ннаго служи́теля Твоего́ от безу́мия мирска́го свободи́ мя и ля́дину душе́вную уплодоноси́ умиле́ния плода́ми и покая́ния.
Песнь 4
Вознесе́на Тя ви́девши Це́рковь на Кресте́,
со́лнце пра́ведное,
ста в чи́не свое́м,
досто́йно взыва́ющи:
Сла́ва си́ле Твое́й, Го́споди.
Крест Христо́в пред очи́ма зря,
смире́ние Христо́во восприя́л еси́, о́тче,
я́ко невозбра́нно в рай вводя́щее.
Сего́ ра́ди дар моли́твы от Бо́га прия́л еси́, поя́:
Сла́ва си́ле Твое́й, Го́споди.
Па́че челове́к ско́рби и страда́ния поне́сл еси́,
па́че челове́к и дарова́ния прия́л еси́,
неду́жных исцеля́я, па́дших к покая́нию обраща́я,
безбо́жных подвиза́я пе́ти:
Сла́ва си́ле Твое́й, Го́споди.
Юро́д во Христе́, блаже́нне, был еси́,
безче́стие себе́ за честь почита́я,
оби́дящих же тем па́че любя́ и благотворя́,
Единому же Го́споду призыва́я пе́ти:
Сла́ва си́ле Твое́й, Го́споди.
Угобзи́ся моя́ ни́ва,
и что сотворю́, не вем,
еда́ новы́я жи́тницы сози́жду?
Но твое́ю, о́тче Гаврии́ле, моли́твою
все упова́ние на Го́спода возложи́в, да воспою́:
Сла́ва си́ле Твое́й, Го́споди.
Богородичен: Сокруши́ тверды́ню вознося́щагося се́рдца моего́,
Ма́ти Пренепоро́чная,
да у́зрю чи́сто Крест Христо́в,
да воззрю́ ко Го́споду,
я́ко младе́нец на ма́терь свою́.
Песнь 5
Ты, Го́споди, мой свет,
в мир прише́л еси́
, свет святы́й, обраща́яй от мра́чна неве́дения
ве́рою воспева́ющыя Тя.
Зра́ка Бо́жия све́тлость неизрече́нную
душе́вныма очи́ма зря,
во вся́цем челове́це о́браз Бо́жий ви́дел еси́
и я́ко бли́жняго своего́ нарица́л еси́.
Моли́тва твоя́, о́тче,/ со смире́нием и стра́хом Бо́жиим возсыла́шеся./ Сего́ ра́ди не еди́ножды в моли́тве/ во све́те пребыва́л еси́.
Дар тебе́ даде́ся от Го́спода,
вся лука́вая бли́жнего помышле́ния
претворя́ти во блага́я,
вся стро́потная в пра́вая.
Ду́шу челове́ка я́сно лицезре́вый,
скорбь се́рдцу своему́ име́л еси́, о́тче,
грехи́ бли́жняго зре́ти
и о тех с любо́вию боле́зновати.
Бли́жнему своему́ я́ко зерца́ло сый,
о́тче Гаврии́ле,
просвети́ о́чи се́рдца моего́,
да узрю́ себе́ пред Бо́гом безотве́тна.
Богородичен: Ма́ти Све́та неизрече́ннаго,
посли́ свет непреле́стный души́ мое́й,
зане́ свет, и́же во мне,
тьма есть.
Песнь 6
Пожру́ Ти со гла́сом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ребр Твои́х
исте́кшею кро́вию.
Це́ркве Бо́жия,
ю́же стяжа́ Госпо́дь
честно́ю Свое́ю кро́вию,
от безбо́жных власте́й гони́мыя,
служи́тель и́стинный был еси́.
Це́ркви, в запусте́нии бы́вшыя, посеща́я,
иере́е благогове́йный,
всю Иве́рию обходи́л еси́,
в сне́зе и мра́зе слу́жбу соверша́я и моля́,
да поми́лует Госпо́дь наро́д, во тьме гряду́щий.
Иве́рии многострада́льней по мно́гих ско́рбех
возрожде́ние предрека́л еси́,
и ве́ры утвержде́ние,
я́коже Изра́илю по пле́не вавило́нстем,
та́ко се́ющи слеза́ми, ра́достию по́жнет.
Помоли́ся, ми́лостивый о́тче,
о души́ мое́й, в запусте́нии су́щей,
в не́йже несть покая́ния те́пла,
и моли́тва тоя́ до Бо́га недохо́дна,
но твое́ю моли́твою да оживотвори́тся.
Богородичен: Я́же иногда́ святу́ю Ни́ну во Иве́рию Посла́вшая,
и Гаврии́лу И́верскому на вода́х свой о́браз Вда́вшая
и Гаврии́лу Самтаври́йскому в виде́нии Я́вльшаяся,
не оста́виши и ны́не и́же па́мять соверша́ющих
вели́каго Христо́ва уго́дника.
Кондак, глас 5
Свети́льник горя́й и светя́й
во времена́ безбо́жия яви́лся еси́,
и зарю́ благоче́стия всем возсия́л еси́:
те́мже Госпо́дь тя просла́ви,
своя́ безве́стная и та́йная тебе́ яви́в:
о́тче Гаврии́ле,
моли́ ми́лостиваго Бо́га
поми́ловатися душа́м на́шым покая́нием.
Икос:
Свети́льниче, на све́щнице воздержа́ния возсия́вый, покая́ния де́лателю неусы́пный, па́стырю рачи́тельный, испове́дниче неколеби́мый, мре́жа боже́ственныя любве́, мно́гих ко спасе́нию улови́вшая, о́тче преподо́бне, се́ти вра́жия смире́нием разруша́яй, о́браз Христо́в свои́м житие́м явля́яй, тебе́ Госпо́дь, возлю́бленный тобо́ю, иссо́пом Ду́ха Свята́го Своего́ очи́сти, и я́ко Дави́ду, глубины́ суде́б Свои́х и та́йны Про́мысла Своего́ яви́л есть. Сего́ ра́ди и́маши дерзнове́ние моли́ти о нас, ча́дех твои́х, во е́же поми́ловатися душа́м на́шым покая́нием.
Песнь 7
О́бразу злато́му не поклони́вшеся
о́троцы авраа́мстии,
искуша́хуся, я́ко зла́то в горни́ле,
в пещи́ о́гненней, я́ко в черто́зе све́тлем, ликова́ху, пою́ще:
Благослове́н еси́ Бо́же оте́ц на́ших.
Мно́го скорбе́й испыта́л еси́, о́тче,
бие́ния, без кро́ва скита́ния,
со безу́мными вмене́н был еси́.
Оба́че всегда́ благодари́л еси́, поя́:
Благослове́н еси́ Бо́же оте́ц на́ших.
Сосу́де любве́ Бо́жия,
ско́рби приима́ти учи́л еси́, я́ко ве́ре и любви́ науче́ние,
во е́же пе́ти на вся́кое вре́мя:
Благослове́н еси́ Бо́же оте́ц на́ших.
А́ще лю́бите мя, — Госпо́дь рече́, — за́поведи моя́ соблюди́те.
Та́ко твори́л и учи́л еси́, свя́те,
дела́ми Го́споду пе́ти:
Благослове́н еси́ Бо́же оте́ц на́ших.
Гре́шен сый, не могу́ скорбе́й избе́гнути.
Но умоли́, о́тче, Пода́теля благ
в ско́рбех распространи́ти ду́шу мою́,
да позна́ю в них любо́вь Бо́жию,
да воспою́ Бо́га оте́ц на́ших.
Богородичен: Я́же неопа́льно вмести́вшая,
И́же о́троки в пещи́ неопа́льно Сохра́ньшаго,
ороси́ ми в ско́рбех ро́су духо́вную,
да со о́троки взыва́ю:
Благослове́н еси́ Бо́же оте́ц на́ших.
Песнь 8
Ру́це распросте́р Дании́л,
львов зия́ния в ро́ве затче́,
о́гненную си́лу угаси́ша,
доброде́телию препоя́савшеся,
благоче́стия рачи́тели, о́троцы взыва́юще:
Благослови́те, вся дела́ Госпо́дня, Го́спода.
Пропове́дниче пла́менный,
пред наро́дом ру́це свои́ простира́л еси́,
на сто́гнах гра́да и на распу́тиих уча́й,
в само́й темни́це ю́зником пропове́дал еси́,
во времена́ безбо́жия без стра́ха взыва́я:
Благослови́те, вся дела́ Госпо́дня, Го́спода.
И́дольскаго поклоне́ния не терпя́,
ве́рный па́стырю ста́ду своему́,
и́дольское изображе́ние поже́гл еси́,
на му́ки и смерть себе́ предава́я,
муче́ния безчи́сленная претерпева́я, пел еси́:
Благослови́те, вся дела́ Госпо́дня, Го́спода.
Диади́му смире́ния носи́л еси́, прови́дче
и душ челове́ческих зри́телю,
ничто́же себе́ вменя́я,
безче́стие себе́ за честь почита́я,
Еди́наго Бо́га вся призыва́я пе́ти:
Благослови́те, вся дела́ Госпо́дня, Го́спода.
Безу́мен и су́етен есмь аз,
сокро́вищствую, и не вем, кому́ соберу́.
Моли́ Бо́га о мне, о́тче,
всеце́ло Христу́ себе́ усокро́виществовавый,
да исцелю́ся и цел бу́ду,
да в Бо́га богате́ти на́чну и благослови́ти Го́спода.
Богородичен: Я́же всех творе́ний вы́шшая,
Божие Жилище,
е́же вели́чит душа́ Моя́ Го́спода, воспе́вшая,
сподо́би и мое́й души́ немотству́ющей
со вся́ким творе́нием Бо́жиим
хвали́ти, благослови́ти, поклоня́тися Го́сподеви, пою́щи и превознося́щи Его́ во вся ве́ки.
Песнь 9
Ка́мень нерукосе́чный
от несеко́мыя горы́, Тебе́ Де́во,
краеуго́льный отсече́ся,
Христо́с, совокупи́вый разстоя́щаяся естества́,
тем веселя́щеся Тя, Богоро́дице, велича́ем.
Доброде́телей сосу́д свяще́нный был еси́,
и стра́ха Бо́жия неле́стный препода́тель,
и ересе́й обличи́тель,
и грехо́в нелицеприя́тный яви́тель,
наипа́че любве́ Христо́вы
де́латель и наста́вник богоприя́тный.
Вся́кому челове́ку потре́бная подава́я,
ми́лостыню, и сове́т, и моли́тву,
проше́ние о ми́лостыни я́ко ми́лость вменя́ти учи́л еси́,
та́ко и сам твори́л еси́, о́тче,
бли́жняго по за́поведи Госпо́дней возлюби́вый.
На небеси́ сокро́вище свое́ положи́вый,
та́мо и се́рдцем свои́м пребыва́л еси́,
нико́юже сла́стию земно́ю уловле́н быва́я,
и та́ко в Ца́рство Небе́сное невозбра́нно вше́дый,
ны́не мо́лишися о нас Христу́, своему́ Влады́це.
Мене́, сосу́д без дна, благода́ть Бо́жия испо́лнити не возмо́жет,
зане́ себе́ мню не́что бы́ти.
и посра́млен бу́ду от Влады́ки.
а́ще то́кмо мне пода́ши, о́тче,
от своея́ нищеты́ духо́вныя.
Богородичен: Высоки́ за́поведи Госпо́дни,
и неудо́бь вмести́мы по́мыслу вы́сящемуся.
Но Твои́ми, Влады́чице, всеси́льными моли́твами
сокруши́ се́рдца моего́ высоты́ и́дольския,
да бу́дет сокруше́нно и смиренно, е́же Бог не уничижи́т.
Светилен:
Ева́нгелие изде́тска обре́т, сло́во Бо́жие свет стезя́м твои́м во вся дни своя́ име́л еси́, и за́поведь Госпо́дню, просвеща́ющую о́чи. Те́мже и мно́гим в нощи́ безбо́жия огнь, путеводя́й ко спасе́нию, был еси́, о́тче святы́й, любве́ сосу́де избра́нный, Со́лнца Христа́ чи́стое отоблиста́ние.
Слава и ныне: Приими́, Ми́лостивая Засту́пнице, моли́твы Гаврии́ла, ве́рнаго служи́теля Твоего́, Христу́ Сы́ну Твоему́ все житие́ свое́ усокро́виществовавшаго и в Нем воздая́ние свое́ обре́тшаго, да не в коне́ц лише́ни бу́дем ми́лости, ны́не и в ве́це бу́дущем.
Акафист
Акафист преподобному Гавриилу Самтаврийскому
Конда́к 1
Избра́нный сосу́де Бо́жия благода́ти, исто́чниче чуде́с благоуха́нный, Иве́рии похвало́, досточу́дне о́тче Гаврии́ле! Прино́сим ти ны́не хвале́бное пе́ние, ты же, име́яй ве́лие дерзнове́ние ко Го́споду, от вся́ких нас бед свободи́, да любо́вию зове́м ти: Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
И́кос 1
А́нгельскому житию́ подража́я, чистото́ю и смире́нием Бо́гу угоди́л еси́, преблаже́нне о́тче Гаврии́ле, и ве́лиих даро́в Свята́го Ду́ха удосто́ился еси́. Вели́чию по́двига твоего́ дивя́щеся, вопие́м ти си́це:
Ра́дуйся, кла́дезю прему́дрости Бо́жией;
ра́дуйся, живы́й исто́чниче ве́ры.
Ра́дуйся, дре́во, плод духо́вный произрасти́вшее;
ра́дуйся, скрижа́ле, зако́н Христо́в прия́вшая.
Ра́дуйся, от рожде́ния Бо́гом избра́нный;
ра́дуйся, на служе́ние Ему́ призва́нный.
Ра́дуйся, чудесы́ зе́млю И́верскую облиста́вый;
ра́дуйся, житие́м богоуго́дным просия́вый.
Ра́дуйся, Го́сподем на ка́мене ве́ры утвержде́нный;
ра́дуйся, с любо́вию И́мя Христо́во пропове́давый.
Ра́дуйся, мно́гия ско́рби в житии́ претерпе́вый;
ра́дуйся, с ве́лиею ра́достию в Ца́рствие Небе́сное вше́дый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 2
Ви́дяще от ра́ки твоея́ чуде́с преоби́льное излия́ние, преподо́бне о́тче Гаврии́ле, утвержда́емся в ве́ре и благоче́стии. Ди́внаго тя уго́дника Бо́жия почита́юще, благода́рными усты́ взыва́ем ко Го́споду, пода́телю благи́х: Аллилу́иа.
И́кос 2
Ра́зуму на́шему просвеще́ние у Го́спода испроси́, уго́дниче Бо́жий Гаврии́ле, да оттря́сше земно́е пристра́стие и су́етныя попече́ния, вознесе́мся се́рдцем и мы́слию в селе́ния ра́йская, иде́же ты пребыва́еши, и возгласи́м ти си́це:
Ра́дуйся, рая́ Христо́ва благоуха́ние;
ра́дуйся, благода́ти Бо́жия сия́ние.
Ра́дуйся, уде́ла Бо́жия Ма́тере похвало́ и украше́ние;
ра́дуйся, де́рзких святота́тцев устраше́ние.
Ра́дуйся, от ю́ности мона́шескаго уедине́ния иска́вый;
ра́дуйся, Го́спода на по́мощь призыва́вый.
Ра́дуйся, глаго́лу Бо́жию внима́вый;
ра́дуйся, за́поведем Его́ после́довавый.
Ра́дуйся, вери́ги мни́маго безу́мия носи́вый;
ра́дуйся, прельще́ния ми́ра сего́ посрами́вый.
Ра́дуйся, нищету́ и поруга́ние возлюби́вый;
ра́дуйся, И́мя Бо́жие просла́вивый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 3
Си́лою любве́ Христо́вы, дарова́нныя ти свы́ше, укрепля́емый, преподо́бне о́тче Гаврии́ле, поревнова́л еси́ подъя́ти по́двиги по о́бразу отце́в Це́ркве дре́вния. В смире́нии и кро́тости возраста́я, о по́мощи Небе́сней моли́лся еси́, взыва́я ко Го́споду: Аллилу́иа.
И́кос 3
Име́я ве́лию ве́ру и тве́рдое упова́ние на Го́спода, путь юро́дства избра́л еси́, досточу́дне о́тче Гаврии́ле. И мы, с любо́вию воспева́юще и прославля́юще Бога, ди́внаго во святы́х Свои́х, вопие́м ти си́це:
Ра́дуйся, луче́ Со́лнца пра́вды;
ра́дуйся, све́том Христо́вым осия́нный.
Ра́дуйся, адама́нте ве́ры Правосла́вныя;
ра́дуйся, по́стников сла́во и похвало́.
Ра́дуйся, све́том ве́ры сердца́ на́ша озаря́яй;
ра́дуйся, благогове́нию нас науча́яй.
Ра́дуйся, благоче́стия ревни́телю;
ра́дуйся, хра́ма Бо́жия усе́рдный строи́телю.
Ра́дуйся, святы́ни от поруга́ния спаса́вый;
ра́дуйся, преще́ния гони́телей не убоя́выйся.
Ра́дуйся, и́го Христо́во с любо́вию носи́вый;
ра́дуйся, усе́рдно Бо́гу послужи́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 4
Бу́ри жите́йскаго мо́ря избе́гнувый, уедине́ния и моли́твы иска́вый, во оби́тель Бетани́йскую прише́л еси́, преблаже́нне о́тче Гаврии́ле. Духоно́сными отцы́ наставля́емый, прославля́ше Го́спода Вседержи́теля, во умиле́нии се́рдца взыва́я Ему́: Аллилу́иа.
И́кос 4
Слы́шавше жи́тели Иве́рии о дерзнове́нии твое́м среди́ безбо́жных громогла́сно И́мя Христо́во сла́вити, дивля́хуся по́двигу твоему́. Ты же, посрами́в и́дольское поклоне́ние куми́ру, на крест страда́ний возше́л еси́. Прославля́юще по́двиг твой, преподо́бне о́тче Гаврии́ле, возглаша́ем ти си́це:
Ра́дуйся, ча́до духоно́сное отце́в Бетани́йских;
ра́дуйся, ревни́телю подвиго́в и́ноческих.
Ра́дуйся, Це́ркве Христо́вы све́тлое украше́ние;
ра́дуйся, земли́ И́верския озаре́ние.
Ра́дуйся, нището́ю и ра́зумом обогати́выйся;
ра́дуйся, го́рния сла́вы приобщи́выйся.
Ра́дуйся, по́двиги свои́ми диа́вола связа́вый;
ра́дуйся, изображе́ние безбо́жнаго вожда́ огню́ преда́вый.
Ра́дуйся, во у́зах ве́ру Христо́ву пропове́давый;
ра́дуйся, гре́шных к покая́нию подви́гнувый.
Ра́дуйся, с безу́мными в дом ско́рби заточе́нный;
ра́дуйся, чудесы́ Бо́жиими просла́вленный.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 5
Боготе́чная звезда́, возсия́вшая на небоскло́не Иве́рии, был еси́, досточу́дне о́тче Гаврии́ле. Страда́ния и поноше́ния за Христа́ претерпе́вый, к отве́рженным сопричте́нный, ны́не в ли́це святы́х Го́спода сла́виши, воспева́я Ему́: Аллилу́иа.
И́кос 5
Ви́дя враг спасе́ния на́шего ре́вность твою́ о Бо́зе, преподо́бне, я́рость свою́ излия́ на тя чрез вла́сти безбо́жныя. Сего́ ра́ди уде́л твой, о́тче святы́й, бы́ша ско́рби и гоне́ния. Мы же, воспева́юще по́двиги твоя́, А́нгелы удиви́вшия, с любо́вию глаго́лем ти:
Ра́дуйся, исто́чниче чуде́с Боже́ственных;
ра́дуйся, страда́льче, любо́вию испо́лненный.
Ра́дуйся, клевету́ благоду́шно претерпе́вый;
ра́дуйся, любо́вию враго́в победи́вый.
Ра́дуйся, ми́лостыню смире́нно проси́вый;
ра́дуйся, на Небеси́ мзду получи́вый.
Ра́дуйся, житие́м среди́ моги́л страх искорени́вый;
ра́дуйся, еди́наго греха́ отто́ле боя́тися научи́выйся.
Ра́дуйся, глад и мраз нивочто́же вменя́яй любве́ ра́ди Христо́вы;
ра́дуйся, реки́й, я́ко скорбьми́ науча́емся ве́ре и любви́.
Ра́дуйся, во оби́телях Небе́сных возсия́вый;
ра́дуйся, Мате́рию Бо́жиею уте́шенный.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 6
Пропове́дует страна́ И́верская тебе́, досточу́дне о́тче Гаврии́ле, ско́раго в беда́х засту́пника и те́плаго моли́твенника о спасе́нии душ на́ших. Крест юро́дства смире́нно носи́вый, в ско́рбех Го́спода благодари́вый, и ны́не нас учи́ши Христа́ сла́вити и моли́твенно пе́ти Ему́: Аллилу́иа.
И́кос 6
Возсия́л еси́ благода́тию, я́ко свети́льник пресве́тлый и заря́ сия́ющая, преподо́бне о́тче Гаврии́ле. Воспева́юще ве́лии по́двиги и труды́ твоя́, с любо́вию возглаша́ем ти си́це:
Ра́дуйся, Ду́ха Свята́го обита́лище;
ра́дуйся, дарова́ний ве́лиих вмести́лище.
Ра́дуйся, оби́тели Самтаври́йския украше́ние;
ра́дуйся, сла́вы святы́х ди́вное умноже́ние.
Ра́дуйся, плотско́е мудрова́ние ду́ху покори́вый;
ра́дуйся, лука́вство вра́жие посрами́вый.
Ра́дуйся, за мни́мым винопи́тием благода́тные да́ры Бо́жии сокры́вый;
ра́дуйся, стра́ждущих от неду́га пиа́нства исцели́вый.
Ра́дуйся, гре́шным сострада́вый;
ра́дуйся, спасе́ния всем жела́вый.
Ра́дуйся, устраше́ния вра́жия презре́вый;
ра́дуйся, Правосла́вие дерзнове́нно пропове́давый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 7
Хотя́ Го́споду послужи́ти, достохва́льне о́тче Гаврии́ле, отве́ргл еси́ вся скоропреходя́щая и су́етная ми́ра сего́. Путе́м страда́ний за Христо́м сле́дуя, в простоте́ се́рдца с любо́вию взыва́л еси́ Ему́: Аллилу́иа.
И́кос 7
Но́ваго тя преподо́бнаго воздви́же Госпо́дь, прехва́льне о́тче Гаврии́ле, во времена́ тя́жких гоне́ний на Це́рковь Христо́ву. Прославля́юще ве́лий по́двиг твой, досточу́дне, вопие́м ти си́це:
Ра́дуйся, сто́лпе Правосла́вия;
ра́дуйся, и́скренний дру́же Христо́в.
Ра́дуйся, благода́тию Бо́жиею в ско́рби согре́тый;
ра́дуйся, Ца́рствия Небе́снаго насле́дниче святы́й.
Ра́дуйся, испо́лненный любве́ Боже́ственныя;
ра́дуйся, равноа́нгельно пожи́вый.
Ра́дуйся, на земли́ гони́мый;
ра́дуйся, на Небеси́ со святы́ми Христа́ сла́вящий.
Ра́дуйся, милосе́рдие Бо́жие ко гре́шным призыва́яй;
ра́дуйся, заблу́ждших вразумля́яй.
Ра́дуйся, моли́твами твои́ми супру́г от непло́дства исцели́вый;
ра́дуйся, о рожде́нии дще́ри им предвозвести́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 8
Стра́нник и пришле́ц в ми́ре сем был еси́, достохва́льне о́тче Гаврии́ле. Взыску́я Гра́да Небе́снаго, избра́л еси терни́стый спаси́тельный путь, за вся благодаря́ милосе́рдаго Го́спода и поя́ Ему́: Аллилу́иа.
И́кос 8
Весь испо́лнь Боже́ственныя благода́ти, в многотру́днем по́двизе Го́сподем укрепля́емый, взыва́л еси́ Ему́: Засту́пник мой и прибе́жище мое́, Бог мой, и упова́ю на Него́! И всех нас учи́ши со Христо́м пребыва́ти, зову́щих ти:
Ра́дуйся, вождю́ и́щущих спасе́ния;
ра́дуйся, страны́ И́верския спаси́тельное насажде́ние.
Ра́дуйся, Правосла́вныя ве́ры побо́рниче;
ра́дуйся, святы́х ди́вный собесе́дниче.
Ра́дуйся, оби́димых защи́тителю;
ра́дуйся, скорбя́щих уте́шителю.
Ра́дуйся, по́мощь ско́рую нам явля́яй;
ра́дуйся, к покая́нию нас призыва́яй.
Ра́дуйся, мрак отча́яния отгоня́яй;
ра́дуйся, наде́ждею сердца́ на́ша окриля́яй.
Ра́дуйся, моли́твою от внеза́пныя сме́рти исхища́яй;
ра́дуйся, от бед и напа́стей избавля́яй.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 9
Вси святи́и и Си́лы Небе́сныя ра́достно тя прия́ша, достохва́льне о́тче Гаврии́ле, егда́ путь земна́го стра́нствия сконча́в, возне́слся еси́ к Го́рнему Иерусали́му. И мы дивя́щеся, какова́го чудотво́рца и моли́твенника дарова́ нам Госпо́дь, в благодаре́нии се́рдца взыва́ем Ему́: Аллилу́иа.
И́кос 9
Вети́и суему́дреннии не возмо́гут пости́гнути высоту́ по́двига твоего́, преподо́бне. Ве́лия дары́ Ду́ха Свята́го под ри́зою юро́дства скрыва́вый, чистото́ю жития́ просия́вый, к безу́мным причте́нный, му́дрость ми́ра сего́ посрами́л еси́, досточу́дне о́тче Гаврии́ле. Сего́ ра́ди похваля́ем тя си́це:
Ра́дуйся, цве́те рая́ благоуха́нный;
ра́дуйся, пра́вды ра́ди изгна́нный.
Ра́дуйся, житие́м непоро́чным, я́ко фи́никс, процветы́й;
ра́дуйся, уго́дниче Бо́жий преусе́рднейший.
Ра́дуйся, сия́нием свя́тости сердца́ согре́вый;
ра́дуйся, некра́домое бога́тство души́ име́вый.
Раду́йся, нището́ю духо́вною Ца́рствие Небе́сное стяжа́вый;
ра́дуйся, кро́тости ра́ди зе́млю обетова́ния насле́дивый.
Ра́дуйся, моли́твою к Бо́гу пламене́вый;
ра́дуйся, муче́ния ра́ди Христа́ претерпе́вый.
Ра́дуйся, благода́тию Бо́жией укрепля́емый;
ра́дуйся, Ду́хом Святы́м наставля́емый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 10
Спаси́тельным путе́м ше́ствуя к Небе́сному Иерусали́му, дух ми́рен стяжа́л еси́, преподо́бне о́тче Гаврии́ле. Кре́пкое упова́ние на Го́спода возложи́в, нас ны́не учи́ши стопа́м Христо́вым сле́довати и во́ли Его́ благо́й предава́тися, воспева́юще Ему́ с любо́вию: Аллилу́иа.
И́кос 10
Стена́ необори́мая моли́твы, щи́те, огражда́яй ве́рных, во́ине Христо́в, из про́пасти поги́бели гре́шных исхища́яй, ты еси, достохва́льне! Те́мже мо́лим тя: не оста́ви нас, страстьми́ обурева́емых, по́мощию твое́ю, да зове́м ти си́це:
Ра́дуйся, любве́ Бо́жия зерца́ло;
ра́дуйся, кро́тких похвало́.
Ра́дуйся, немощны́х в ве́ре укрепле́ние;
ра́дуйся, стра́ждущих заступле́ние.
Ра́дуйся, наста́вниче и́щущих спасе́ния;
ра́дуйся, го́рдых вразумле́ние.
Ра́дуйся, исто́чниче Боже́ственных исцеле́ний;
ра́дуйся, насле́дниче ра́йских селе́ний.
Ра́дуйся, свети́льниче, во мра́це безбо́жия просия́вый;
ра́дуйся, пропове́дниче, злове́рие облича́вый.
Ра́дуйся, посто́м и моли́твою си́лу вра́жию низложи́вый;
ра́дуйся, смире́нием ду́хи зло́бы победи́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 11
Пе́ние хвале́бное прино́сим ти, досточу́дне о́тче Гаврии́ле. Весели́тся Иве́рия, лику́ет оби́тель Самтаври́йская, прославля́юще милосе́рднаго Го́спода, дарова́вшаго уго́дника Своего́, с любо́вию возглаша́юще Пода́телю вся́ческих благ: Аллилу́иа.
И́кос 11
Свет пречу́дный, звезда́ путево́дная су́щим во мра́це грехо́внем был еси́, преподо́бне о́тче Гаврии́ле. Гро́знаго явле́ния Цари́цы Небе́сныя удосто́енный, умоля́ше ма́терей во утро́бе ча́да своя́ не губи́ти. Те́мже, я́ко па́стырю усе́рдному, взыва́ем ти си́це:
Ра́дуйся, пресла́вный избра́нниче Бо́жий;
ра́дуйся, от ю́ности Ему́ угоди́вый.
Ра́дуйся, И́менем Иису́совым враги́ побежда́вый;
ра́дуйся, Взбра́нную Воево́ду на по́мощь призыва́вый.
Ра́дуйся, Ца́рствия Небе́снаго иска́вый;
ра́дуйся, сокро́вища Ду́ха Свята́го стяжа́вый.
Ра́дуйся, громогла́сне сло́во Бо́жие возвеща́вый;
ра́дуйся, неве́рие дерзнове́нно посрами́вый.
Ра́дуйся, диади́му му́дрости в юро́дстве носи́вый;
ра́дуйся, вене́ц сла́вы на Небеси́ прия́вый.
Ра́дуйся, жизнь свою́ Бо́гови посвяти́вый;
ра́дуйся, драгоце́нный дар ве́ры от ю́ности сохрани́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 12
Благода́ть Бо́жию стяжа́вый, путе́м за́поведей Христо́вых Гра́да Небе́снаго дости́гнувый, преподо́бне о́тче Гаврии́ле, ны́не в Це́ркви торжеству́ющей с ли́ки святы́х и Небе́сных Сил велегла́сно Царя́ ца́рствующих сла́виши и возно́сиши Ему́ хвале́бную песнь: Аллилу́иа.
И́кос 12
Пою́ще пресла́вныя по́двиги и чудеса́ твоя́, удивля́емся равноа́нгельному житию́ твоему́, достохва́льне о́тче Гаврии́ле, и возно́сим ти хвале́бныя моли́твы на́ша, с любо́вию взыва́юще ти си́це:
Ра́дуйся, в ри́зу смире́ния облече́нный;
ра́дуйся, на высоту́ Небе́сную вознесе́нный.
Ра́дуйся, благода́ти Бо́жия еле́ю благоуха́нный;
ра́дуйся, испове́дниче Христо́в избра́нный.
Ра́дуйся, де́лателю моли́твы Иису́совы;
ра́дуйся, побежда́яй супоста́тов И́менем Христо́вым.
Ра́дуйся, власте́й предержа́щих обличи́телю;
ра́дуйся, мудрова́ния мирска́го посрами́телю.
Ра́дуйся, инове́рца от тя́жкаго неду́га исцели́вый;
ра́дуйся, све́том ве́ры Христо́вы душу его́ просвети́вый.
Ра́дуйся, ра́ковыя я́звы и ины́х боле́зней исцели́телю;
ра́дуйся, бе́сы одержи́мых свободи́телю.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 13
О прехва́льне и досточу́дне о́тче Гаврии́ле, ско́рый уте́шителю и предста́телю наш! Приими́ от нас сие́ похва́льное пе́ние, умоли́ Влады́ку Вседержи́теля, да изба́вимся ве́чнаго осужде́ния и му́ки и да сподо́бимся с тобо́ю воспева́ти Ему́: Аллилу́иа.
[Се́й конда́к глаго́лется три́жды.]
И́кос 1
А́нгельскому житию́ подража́я, чистото́ю и смире́нием Бо́гу угоди́л еси́, преблаже́нне о́тче Гаврии́ле, и ве́лиих даро́в Свята́го Ду́ха удосто́ился еси́. Вели́чию по́двига твоего́ дивя́щеся, вопие́м ти си́це:
Ра́дуйся, кла́дезю прему́дрости Бо́жией;
ра́дуйся, живы́й исто́чниче ве́ры.
Ра́дуйся, дре́во, плод духо́вный произрасти́вшее;
ра́дуйся, скрижа́ле, зако́н Христо́в прия́вшая.
Ра́дуйся, от рожде́ния Бо́гом избра́нный;
ра́дуйся, на служе́ние Ему́ призва́нный.
Ра́дуйся, чудесы́ зе́млю И́верскую облиста́вый;
ра́дуйся, житие́м богоуго́дным просия́вый.
Ра́дуйся, Го́сподем на ка́мене ве́ры утвержде́нный;
ра́дуйся, с любо́вию И́мя Христо́во пропове́давый.
Ра́дуйся, мно́гия ско́рби в житии́ претерпе́вый;
ра́дуйся, с ве́лиею ра́достию в Ца́рствие Небе́сное вше́дый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 1
Избра́нный сосу́де Бо́жия благода́ти, исто́чниче чуде́с благоуха́нный, Иве́рии похвало́, досточу́дне о́тче Гаврии́ле! Прино́сим ти ны́не хвале́бное пе́ние, ты же, име́яй ве́лие дерзнове́ние ко Го́споду, от вся́ких нас бед свободи́, да любо́вию зове́м ти: Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Моли́тва
О блаже́нне Гаврии́ле, дре́вним отце́м подо́бниче и тве́рдый ве́ры испове́дниче, от младе́нства Госпо́да всем се́рдцем возлюби́вый и ре́вностно Ему́ после́довавый! Се мы, раби́ недосто́йнии, благоче́стия и смире́ния не иму́щии, оба́че себе́ на всяк день в души́ велича́ющии, бли́жних осужда́ющии, не и́мамы пред Бо́гом, чим оправди́тися. Сего́ ра́ди мо́лим тя: моли́ за нас Го́спода, да пода́ст нам ум сло́во Его́ разуме́ти, да бу́дем не то́кмо слы́шателие, но и ре́вностнии его́ де́лателие, и да разуме́ем, я́ко ничесо́же мо́жем, кроме́ по́мощи Бо́жия.
Ей, свя́тче Бо́жий! Помози́ нам Го́спода возлюби́ти и Тому́ прилепи́тися все́ю душе́ю свое́ю, всем се́рдцем и помышле́нием, да пода́ст нам ра́дость, мир, долготерпе́ние и утеше́ние в ско́рбех по неизрече́нней Свое́й ми́лости, Ему́же подоба́ет вся́кая сла́ва, честь и держа́ва во ве́ки веко́в. Ами́нь.
Моли́тва и́на
О преподо́бне о́тче Гаврии́ле, чудотво́рче Самтаври́йский, по́двигом юро́дства Христа́ ра́ди просия́вый и И́мя Бо́жие во дни гоне́ний просла́вивый! Вознеси́ о нас моли́твы твои́ ко Го́споду, я́ко фимиа́м благоуха́нный, изба́ви нас, досточу́дне о́тче, предста́тельством твои́м от вся́кия беды́ и напа́сти, се́ти де́монския разруши́, вражду́ угаси́, неду́жныя исцели́. Не оскудева́ет река́ чуде́с Госпо́дних от ра́ки твоея́, преподо́бне, ниже́ изсяка́ет пото́к милосе́рдия Бо́жия к нам, гре́шным, моля́щимся тебе́. Да́ра ве́лия любви́ от Го́спода удосто́енный, бремена́ бли́жних носи́вый, о гре́шных и стра́ждущих сле́зы пролива́вый, принеси́ моли́твы на́ша и плач покая́нный ко Престо́лу Влады́чню, да сподо́бимся по́мощию твое́ю, достохва́льне о́тче, безпреткнове́нно пройти́ возду́шныя мыта́рства и дости́гнути Оте́чества Небе́снаго, иде́же непреста́нный глас пра́зднующих сла́вит Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
