Преподобный Максим Грек

Житие

Прп. Максим Грек (XV–XVI в.) ‒ выдающийся богослов и переводчик, уроженец Греции. Получив блестящее образование в Европе, принял монашество на Афоне. В 1518 г. по просьбе великого князя Василия III прибыл в Москву для перевода богослужебных книг. За критику церковных и политических злоупотреблений (включая развод князя) был осуждён, 20 лет провёл в заточении. Несмотря на гонения, продолжал литературную деятельность, создав около 365 сочинений. Канонизирован в 1988 г. Мощи обретены в 1996 г. в Троице-Сергиевой Лавре, где почивают ныне.

* * *

Преподобный Максим Грек (XV–XVI в.), бывший сыном богатого греческого сановника в городе Арте (Албания), получил блестящее образование. В юности он много путешествовал и изучал языки и науки в европейских странах; побывал в Париже, Флоренции, Венеции. По возвращении на родину прибыл на Афон и принял иночество в Ватопедской обители. Он с увлечением изучал древние рукописи, оставленные на Афоне иночествовавшими греческими императорами (Андроником Палеологом и Иоанном Кантакузеном). В это время великий князь Московский Василий Иоаннович (1505–1533) пожелал разобраться в греческих рукописях и книгах своей матери, Софии Палеолог, и обратился к Константинопольскому патриарху с просьбой прислать ему ученого грека. Инок Максим получил указание ехать в Москву. По прибытии ему было поручено перевести на славянский язык толкование на Псалтирь, затем толкование на книгу Деяний апостолов и несколько богослужебных книг.

Преподобный Максим усердно и тщательно старался исполнять все поручения. Но, ввиду того, что славянский язык не был родным для переводчика, естественно, возникали некоторые неточности в переводах.

Митрополит Московский Варлаам высоко ценил труды преподобного Максима. Когда же московский престол занял митрополит Даниил, положение изменилось.

Новый митрополит потребовал, чтобы преподобный Максим переводил на славянский язык церковную историю Феодорита. Максим Грек решительно отказался от этого поручения, указывая на то, что "в сию историю включены письма раскольника Ария, а сие может быть опасно для простоты". Этот отказ посеял рознь между преподобным и митрополитом. Несмотря на неурядицы, преподобный Максим продолжал усердно трудиться на ниве духовного просвещения Руси. Он писал письма против магометан, папизма, язычников. Перевел толкования святителя Иоанна Златоуста на Евангелия от Матфея и Иоанна, а также написал несколько собственных сочинений.

Когда великий князь намеревался расторгнуть свой брак с супругой Соломонией из-за ее неплодства, отважный исповедник Максим прислал князю "Главы поучительные к начальствующим правоверных", в которых он убедительно доказал, что положение обязывает князя не покоряться животным страстям. Преподобного Максима заключили в темницу. С того времени начался новый, многострадальный период жизни преподобного. Неточности, обнаруженные в переводах, были вменены преподобному Максиму в вину, как умышленная порча книг. Тяжело было преподобному в темнице, но среди страданий преподобный стяжал и великую милость Божию. К нему явился Ангел и сказал: "Терпи, старец! Этими муками избавишься вечных мук". В темнице преподобный старец написал углем на стене канон Святому Духу, который и ныне читается в Церкви: "Иже манною препитавый Израиля в пустыни древле, и душу мою, Владыко, Духа наполни Всесвятаго, яко да о Нем благоугодно служу Ти выну..."

Через шесть лет преподобного Максима освободили от тюремного заключения и послали под церковным запрещением в Тверь. Там он жил под надзором добродушного епископа Акакия, который милостиво обходился с невинно пострадавшим. Преподобный написал автобиографическое произведение "Мысли, какими инок скорбный, заключенный в темницу, утешал и укреплял себя в терпении". Вот несколько слов из этого яркого сочинения: "Не тужи, не скорби, ниже тоскуй, любезная душа, о том, что страждешь без правды, от коих подобало бы тебе приять все благое, ибо ты пользовала их духовно, предложив им трапезу, исполненную Святаго Духа..." Лишь через двадцать лет пребывания в Твери преподобному разрешили проживать свободно и сняли с него церковное запрещение. Последние годы своей жизни преподобный Максим Грек провел в Троице-Сергиевой Лавре. Ему было уже около 70 лет. Гонения и труды отразились на здоровье преподобного, но дух его был бодр; он продолжал трудиться. Вместе со своим келейником и учеником Нилом преподобный усердно переводил Псалтирь с греческого на славянский язык. Ни гонения, ни заключения не сломили преподобного Максима.

Преподобный преставился 21 января 1556 года. Он погребен у северо-западной стены Духовской церкви Троице-Сергиевой Лавры. Засвидетельствовано немало благодатных проявлений, свершившихся у гробницы преподобного, на которой написаны тропарь и кондак ему. Лик преподобного Максима часто изображается на иконе Собора Радонежских святых.

04 июля/21 июня – обре́тение мощей

Над местом погребения Максима Грека была воздвигнута пристроенная к Духовскому храму часовня – так называемая Максимова палатка. Она неоднократно перестраивалась и расширялась (например, при митр. Платоне (Левшине), затем в 1847 году). А в 1938–1940 годах была уничтожена. В 1988 году во время празднования 1000-летия Крещения Руси на Соборе, проходившем в Троице-Сергиевой Лавре, среди новопрославленных русских святых канонизирован и преподобный Максим Грек. Оставался открытым вопрос о местонахождении его святых мощей. К моменту общецерковного прославления над могилой не оставалось никаких видимых следов. Поэтому возникла необходимость в археологических раскопках. Работами руководил археолог С.А. Беляев. 24 июня 1996 года духовник Лавры архимандрит Кирилл (Павлов) совершил молебен преподобному Максиму в Духовской церкви Лавры. За богослужением молились братия, воспитанники Московских Духовных школ и участники раскопок. Во вторник 1 июля о результатах проведенных работ и об обнаружении честных останков преподобного Максима Грека был сделан подробный доклад Святейшему патриарху Алексию II. Его святейшество дал благословение на антропологическое освидетельствование, которое ведущие специалисты Российской Академии наук произвели 2 июля. При сопоставлении честной главы с древними изображениями преподобного Максима выявились черты сходства. На основании заключения антропологов 3 июля 1996 года святейший патриарх благословил поднять честные останки. До недавнего времени мощи преподобного Максима покоились в Успенском соборе Лавры. 9 апреля 2013 года по благословению святейшего патриарха Кирилла они были торжественно перенесены обратно в Духовской храм. Рака установлена на месте обретения мощей преподобного (у северной стены).

Песнопения

Тропарь, глас 8

Заре́ю Ду́ха облиста́емь,
вити́йствующих богому́дренно сподо́бился еси́ разуме́ния,
неве́дением омраче́нная сердца́ челове́ков све́том благоче́стия просвеща́я,
пресве́тел яви́лся еси́ правосла́вия свети́льник, Макси́ме преподо́бне,
отону́дуже ре́вности ра́ди Всеви́дящаго,
оте́чества чужд и стра́нен, Росси́йския страны́ был еси́ пресе́льник,
страда́ния темни́ц и заточе́ния от самодержа́внаго претерпе́в,
десни́цею Вы́шняго венча́ешися и чудоде́йствуеши пресла́вная.
И о нас хода́тай бу́ди непрело́жен,

чту́щих любо́вию святу́ю па́мять твою́.

Кондак, глас 8

Богодухнове́нным Писа́нием и богосло́вия пропове́данием
неве́рствующих суему́дрие обличи́л еси́, всебога́те,
па́че же в Правосла́вии исправля́я, на стезю́ и́стиннаго позна́ния наста́вил еси́,
я́коже свире́ль богогла́сная, услажда́я слы́шащих ра́зумы,
непреста́нно весели́ши, Макси́ме досточу́дне.
Сего́ ра́ди мо́лим тя: моли́ Христа́ Бо́га
грехо́в оставле́ние низпосла́ти

ве́рою пою́щим всесвято́е твое́ успе́ние, Макси́ме, о́тче наш.

Молитва

Преподо́бне о́тче Макси́ме! Воззри́ на на́с ми́лостивно и к земли́ приве́рженных возведи́ к высоте́ небе́сней. Ты́ горе́ на небеси́, мы́ на земли́ ни́зу, удалены́ от тебе́, не толи́ко ме́стом, ели́ко грехми́ свои́ми и беззако́нии, но к тебе́ прибега́ем и взыва́ем: наста́ви на́с ходи́ти путе́м твои́м, вразуми́ и руково́дствуй. Вся́ твоя́ свята́я жи́знь бы́сть зерца́лом вся́кия доброде́тели. Не преста́ни, уго́дниче Бо́жий, о на́с вопия́ ко Го́споду. Испроси́ предста́тельством свои́м у Всеми́лостиваго Бо́га на́шего ми́р Це́ркви Его́, под зна́мением креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, утвержде́ние во благи́х де́лех, больны́м исцеле́ние, печа́льным утеше́ние, оби́женным заступле́ние, бе́дствующим по́мощь. Не посрами́ на́с, к тебе́ с ве́рою притека́ющих. Вси́ правосла́внии христиа́не, твои́ми чудесы́ испо́лненнии и ми́лостьми облагоде́тельствованнии, испове́дуют тя́ бы́ти своего́ покрови́теля и засту́пника. Яви́ дре́вния ми́лости твоя́, и и́хже отце́м всепомоществова́л еси́, не отри́ни и на́с, ча́д и́х, стопа́ми и́х к тебе́ ше́ствующих. Предстоя́ще всечестне́й ико́не твое́й, я́ко тебе́ жи́ву су́щу, припа́даем и мо́лимся: приими́ моле́ния на́ша и вознеси́ и́х на же́ртвенник благоутро́бия Бо́жия, да прии́мем тобо́ю благода́ть и благовре́менную в ну́ждех на́ших по́мощь. Укрепи́ на́ше малоду́шие и утверди́ на́с в ве́ре, да несомне́нно упова́ем получи́ти вся́ блага́я от благосе́рдия Влады́ки моли́твами твои́ми. О превели́кий уго́дниче Бо́жий! Все́м на́м, с ве́рою притека́ющим к тебе́, помози́ предста́тельством твои́м ко Го́споду, и все́х на́с упра́ви в ми́ре и покая́нии сконча́ти живо́т на́ш и пресели́тися со упова́нием в блаже́нныя не́дра Авраа́мова, иде́же ты́ ра́достно по труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

2-я Молитва

О, свяще́нная главо́, преподо́бне о́тче, преблаже́нне а́вво Макси́ме, не забу́ди убо́гих свои́х до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до свое́, е́же сам упасл еси́, и не забу́ди посеща́ти чад свои́х. Моли́ за ны, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́, не премолчи́ за ны ко Го́споду и не пре́зри нас, ве́рою и любо́вию чту́щих тя. Помина́й нас, недосто́йных у престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо и те́лом преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих, и вся́кия пре́лести бесо́вския, и ко́зней диа́вольских, па́стырю наш до́брый; а́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́теля предстоя́щи, досто́йно весели́тся. Ве́дуще бо тя вои́стинну и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно прейде́м от земли́ на Не́бо, от мыта́рств же го́рьких, бесо́в, возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.

3-я Молитва

О, прему́дрости сокро́вищнице, вся́каго ве́дения и разуме́ния испо́лненная, Ду́ха Свята́го неумо́лчный орга́не, трубо́ Боже́ственная, возвеща́ющая нам веле́ния Зако́на Бо́жия, о́тче пресла́вне Макси́ме! Се ны́не мы припа́даем ти, о́тче блаже́нне, и вопие́м усе́рдно: просвети́ омраче́нныя умы́ на́ша, неве́дущия веле́ний Бо́жиих, и напра́ви ду́ши на́ша во е́же де́лати за́поведи Госпо́дни приле́жно и в словесе́х Бо́жиих поуча́тися день и нощь. Огради́ уста́ на́ша от глаго́лов су́етных, рече́ний лука́вых и многоглаго́лания суетного, и́мже мы прилепи́хомся па́че не́же словесе́м оправда́ний Бо́жиих и возлюби́хом их превы́ше звяца́ния псалти́ри и гу́слей Дави́довых. Укрепи́ язы́ки на́ша, во е́же источа́ти им глаго́лы спасе́ния, пе́сни моли́твенныя и словеса́ псало́мская, и́миже подоба́ет Го́спода воспева́ти и превозноси́ти Его́ до́ндеже есмы́. Ты, о́тче преподо́бне, и в те́мности узи́лища, му́чимь непра́ведно от приста́вник неми́лостивых, во све́те повеле́ний Госпо́дних пребыва́ше и светлостьми́ Его́ исполня́ше ум свой и помышле́ние свое́. Мы же, лени́вии и нетерпели́вии, свет со́лнечный на всяк день зря́ще и глаго́лы Свята́го Писа́ния во ушесе́х свои́х иму́ще, ни о внима́нии глаго́лам ева́нгельским, ниже́ о науче́нии в наставле́ниих оте́ческих попече́ния возыме́хом. При́зри на ны, а́лчущия пи́щи духо́вныя, оба́че не приступа́ющия к трапе́зе Прему́дрости Бо́жия; даждь нам растворе́нное в ча́ше Ея́ вино́ и хлеб, сходя́й от рук Бо́жиих с Небесе́, да и мы испо́лнимся ве́дения за́поведей Госпо́дних и разуме́ния, что́ есть пра́во сле́довати стопа́м Бо́жиим; испроси́ нам благослове́ние Госпо́дне, науча́ющее оправда́ниям Его́, и приведи́ ны с собо́ю пред Лице́ Бо́жие, Ему́же ты предстоя́л еси́ при́сно, я́коже и пре́жде просия́вшии святи́и му́жи и жены́, да тобо́ю вразумле́ннии и наста́вленнии, пути́ своя́ испра́вивше, удосто́имся вни́ти в безконе́чную све́тлость Небе́снаго Ца́рствия, иде́же ку́пно с ли́ки святы́х и со́нмы Безпло́тных сподо́бимся при́сно воспева́ти Отца́, Сы́на и Пресвята́го Уте́шителя Ду́ха, Тро́ицу Единосу́щную и Неразде́льную, во ве́ки веко́в. Ами́нь.

Канон

Канон преподобному и богоносному отцу нашему Максиму Греку

Минея, 21 Июня.

Глас 1

Песнь 1

Ирмос: Пои́м, вси лю́дие,
от го́рькия рабо́ты фарао́ни Изра́иля изме́ншему
и во глубине́ морсте́й нога́ми немо́крыми Наста́вльшему
песнь побе́дную,
я́ко просла́вися.

Припев: Преподо́бне о́тче Макси́ме, моли́ Бо́га о на́с.

Воспе́ти кий язы́к возмо́жет по достоя́нию
твоя́, преди́вный о́тче, ве́лия исправле́ния, высо́кое учи́тельство,
в темни́це и во у́зах му́ченическое страда́ние и долготерпе́ние?

Припев: Преподо́бне о́тче Макси́ме, моли́ Бо́га о на́с.

Ка́ко воспое́м и что тя нарече́м, предо́блий о́тче?
Проро́ка ли, я́ко провеща́ неудо́бь разумева́емая и ве́домая нам,
апо́стола ли, я́ко зы́блемую проти́вными нам ве́тры
утверди́ христиа́нскую ве́ру Боже́ственных писа́ний уче́нии,
учи́теля ли, но вои́стинну ничи́м же ху́ждши и ни́жши еси́ вели́ких о́нех вселе́нских учи́тель.

Сла́ва Отцу́ и Сы́ну и Свято́му Ду́ху.

Воспе́ти Свята́го и поклоня́емаго Паракли́та в те́мнице извеще́ние от А́нгела, прии́м,
сотвори́л еси́ кано́н Свято́му Ду́ху,
И́мже еще́ в во́ли просвеще́н, свяще́нныя и Богодухнове́нныя кни́ги соста́вил еси́.

И ны́не и при́сно и во ве́ки веко́в. Ами́нь.

Богородичен: Пои́м, вси лю́дие, святы́ню и сла́ву Пречи́стыя и Всепе́тыя Бо́жия Ма́тере,
вы́шшую Небе́с и всех у́мных Сил,
носи́вшую в пречи́стой Свое́й утро́бе Емману́ила,
я́ко свя́та и пресла́вна есть.

Песнь 3

Ирмос: Утверди́ мене́, Христе́, на недви́жимом ка́мени за́поведей Твои́х
и просвети́ мя све́том лица́ Твоего́:
несть бо свят, па́че Тебе́, Человеколю́бче.

Припев: Преподо́бне о́тче Макси́ме, моли́ Бо́га о на́с.

Утверди́л еси́, преподо́бне Макси́ме, в се́рдце свое́м Боже́ственный страх,
вся по́хоти плотска́я возненави́дев,
се́го ра́ди умудри́лся еси́, я́коже прост младе́нец,
и вслед Го́сподеви восте́кл еси́.

Припев: Преподо́бне о́тче Макси́ме, моли́ Бо́га о на́с.

Утвержде́нием име́я распе́ншагося Го́спода Иису́са Христа́,
стра́нен, незна́ем, бездо́мен, безоте́чествен,
безъиме́нен, безсмы́слен был еси́, преподо́бне Макси́ме,
пред свои́ми сро́дники, зна́емыми и дру́ги.

Сла́ва Отцу́ и Сы́ну и Свято́му Ду́ху.

Утвержда́яся на за́поведех Госпо́дних,
от го́рести темни́чныя был еси́ на мног час, я́ко мертв,
но де́ял еси́ о злонра́вных моли́тву, си́це глаго́ля:
Го́споди, Иису́се Христе́, Сы́не Бо́га Жива́го,
не поста́ви им греха́ сего́, клеве́щущих на мя непра́вду.

И ны́не и при́сно и во ве́ки веко́в. Ами́нь.

Богородичен: Утверди́ нас к хвале́нию Твоему́, Де́во,
и сохрани́ без вре́да от вся́кия ко́зни лука́ваго,
и сподо́би стоя́ния одесну́ю Единоро́днаго Сы́на Твоего́,
Ему́же подоба́ет вся́кая сла́ва, честь и поклоне́ние во ве́ки веко́в.

Седален, глас 4

Ум украси́в поуче́нии Богодохнове́нных Писа́ний,
тре́звенною моли́твою и бде́нии Богоуго́дными,
утверди́л еси́ се́рдце свое́ в Го́споде исполне́нием за́поведей спаси́тельных Его́,
сего́ ра́ди прославля́ют тя вы́ну росси́йстии лю́дие и Афо́н,
и оби́тель Ватопе́дская вку́пе с на́ми вопие́т:
Макси́ме прему́дре, не оста́ви нас, моля́щихся тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Молю́ Тя, Пречи́стая Ма́ти Бо́га Вы́шняго,
еди́но души́ моея́ утеше́ние, упова́ние, сла́досте,
Боже́ственный покро́ве, све́те, заступле́ние и спасе́ние!
Сподо́би мя Твои́ми моли́твами услы́шати глас,
благослове́нных призыва́ющий внутрь черто́га Влады́ки.

Песнь 4

Ирмос: Ве́лия та́йна
Твоего́, Христе́, смотре́ния:
сию́ бо свы́ше прови́дя богозри́тельно, Авваку́м,
изше́л еси́, вопия́ше Тебе́,
во спасе́ние люде́й Твои́х, Человеколю́бче.

Припев: Преподо́бне о́тче Макси́ме, моли́ Бо́га о на́с.

От та́йных ерети́ческих лжеуче́ний
ничто́же утаи́ся от Тебе́, преподо́бне Макси́ме,
но благода́тию Свята́го и поклоня́емаго Ду́ха вся тебе́ открове́на суть.

Припев: Преподо́бне о́тче Макси́ме, моли́ Бо́га о на́с.

Та́инственных догма́тов Правосла́вныя ве́ры
не то́чию побо́рника и́стинна и ве́рна себе́ показа́,
но и па́че прео́стра секи́ра
на вся, я́же под небесе́м, е́реси яви́лся еси́.

Сла́ва Отцу́ и Сы́ну и Свято́му Ду́ху.

Я́ко таи́н Свята́го Ду́ха строи́тель,
и Небе́снаго жи́тельства рачи́тель, и зако́на Госпо́дня учи́тель
вои́стинну показа́лся еси́, прему́дре Макси́ме.

И ны́не и при́сно и во ве́ки веко́в. Ами́нь.

Богородичен: Ве́лию та́инству Моисе́й Богови́дец науче́н, зря купину́ неопали́му:
купина́ – не́мощь челове́ческаго естества́,
огнь же – Божество́ Единоро́днаго Сы́на Вы́шняго,
и́бо Бог наш – огнь есть, пояда́яй грехи́ на́ша,
я́коже Боже́ственный апо́стол рече́.

Песнь 5

Ирмос: От но́щи у́тренююще, пое́м Тя, Христе́,
Отцу́ Собезнача́льна и Спа́са душ на́ших,
мир ми́рови пода́ждь, Человеколю́бче.

Припев: Преподо́бне о́тче Макси́ме, моли́ Бо́га о на́с.

Но́щию луна́, днем со́лнце просвеща́ют и веселя́т тварь всю ви́димую,
житие́ же и прему́дрость святы́х просвеща́ют и веселя́т ду́ши всех челове́ков,
хотя́щих спасти́ся и в ра́зум и́стины приити́.
Си́це и писа́ния преподо́бнаго Макси́ма Гре́ка, я́ко богодухнове́нныя труды́, велегла́сно вопию́т.

Припев: Преподо́бне о́тче Макси́ме, моли́ Бо́га о на́с.

В нощи́ моля́щуся тебе́ в темни́це,
Богонача́льныя и Преблаги́я Тро́ицы про́мыслом внем А́нгел Госпо́день и ре́че:
о ста́рче! Си́ми му́ками избу́деши ве́чных мук.

Сла́ва Отцу́ и Сы́ну и Свято́му Ду́ху.

В нощи́, я́ко сладкогла́сный и добропе́снивый сла́вий,
воспе́л еси́, прему́дре Макси́ме:
не тужи́, не скорби́, ниже́ тоску́й о ни́хже,-
любе́зна ми душе́,-
стра́ждеши без пра́вды,
твоя́ бо мзда ве́лия на Небесе́х.

И ны́не и при́сно и во ве́ки веко́в. Ами́нь.

Богородичен: От но́щи у́тренююще, пое́м Тя, Де́во,
Дщерь Царе́ву, ря́сны златы́ми оде́яну и преиспещре́ну,
ле́ствицу, ю́же Иа́ков ви́де,
го́ру, ю́же благоволи́ Бог жи́ти в ней, и́бо Госпо́дь всели́тся до конца́.

Песнь 6

Ирмос: Проро́ка спасл еси́ от ки́та, Человеколю́бче,
и мене́ из глубины́ прегреше́ний возведи́, молю́ся.

Припев: Преподо́бне о́тче Макси́ме, моли́ Бо́га о на́с.

Проро́чески, преподо́бне Макси́ме, лю́ди облича́л еси́, к покая́нию приводя́:
заблуди́хом, заблуди́хом от пра́ваго и незаблу́днаго жи́тельства преподо́бных и́нок
и без ума́ тече́м к по́чести вы́шняго зва́ния.

Припев: Преподо́бне о́тче Макси́ме, моли́ Бо́га о на́с.

Проро́к покая́ния яви́лся еси́, преподо́бне Макси́ме,
души́ трезве́ние снабдева́я Боже́ственными словесы́
и из ро́ва страсте́й возводя́ омраче́нных грехми́.

Сла́ва Отцу́ и Сы́ну и Свято́му Ду́ху.

Проро́ческия писа́ния, в та́йне глаго́ланныя,
я́вны соде́лал еси́, прему́дре Макси́ме,
сего́ ра́ди послу́шают тя оби́льно вси лю́дие.

И ны́не и при́сно и во ве́ки веко́в. Ами́нь.

Богородичен: Проро́ки Тя провозвести́ша, Де́во Чи́стая,
апо́столи пропове́даша, святи́и вси ублажи́ша,
мы же со Арха́нгелом вопие́м:
ра́дуйся, Благода́тная, Госпо́дь с Тобо́ю.

Кондак, глас 8

Богодухнове́нным Писа́нием и Богосло́вия пропове́данием
неве́рствующих суему́дрие обличи́л еси́, всебога́те,
па́че же, в Правосла́вии исправля́я, на стезю́ и́стиннаго позна́ния наста́вил еси́,
я́коже свире́ль Богогла́сная, услажда́я слы́шащих ра́зумы,
непреста́нно весели́ши, Макси́ме досточу́дне,
сего́ ра́ди мо́лим Тя:
моли́ Христа́ Бо́га грехо́в оставле́ние низпосла́ти
ве́рою пою́щим всесвято́е твое́ успе́ние, Макси́ме, о́тче наш.

Икос

Ка́ко воспое́м велича́йшему тезоимени́таго, Макси́ма предо́бляго?
преподо́бных кра́сна венца́, страда́льцев тве́рдаго пра́вила,
еретико́в нело́жнаго посрамле́ния, Це́ркви столпа́ непоколеби́маго,
де́вственник изве́стнаго наста́вника и супру́жества честна́го засту́пника,
филосо́фов прему́дршаго мудреца́, и́стины исто́чника приснотеку́щаго,
и́нок похвалу́ и всех люде́й вои́стинну украше́ние,
сего́ ра́ди мо́лим тя, досточу́дне Макси́ме:
моли́ Христа́ Бо́га грехо́в оставле́ние низпосла́ти
ве́рою пою́щим всесвято́е твое́ успе́ние, Макси́ме, о́тче наш.

Песнь 7

Ирмос: О́бразу служи́ти,
мусики́йскому согла́сию созыва́ющу лю́ди,
от пе́сней сио́нских по́юще оте́чески, о́троцы Дави́довы
мучи́телево разори́ша злочести́вое веле́ние
и пла́мень в ро́су преложи́ша,
песнь воспева́юще:
превозноси́мый отце́в и наш Бо́же, благослове́н еси́.

Припев: Преподо́бне о́тче Макси́ме, моли́ Бо́га о на́с.

О́бразу промышле́ния Пресвяты́я Тро́ицы песнь благода́рственну возда́в, преподо́бне Макси́ме,
вся ны призва́л еси́ благослови́ти небла́зненно Отца́, и Сы́на, и Свята́го Ду́ха,
Еди́наго Бо́га в Трие́х Ипоста́сех.

Припев: Преподо́бне о́тче Макси́ме, моли́ Бо́га о на́с.

О́браз злострада́ния, терпе́ния и моли́твы показа́лся еси́, свя́те Макси́ме, па́че же и упова́ния,
я́ко Бог Судия́ пра́веден, и кре́пок, и долготерпели́в есть,
и Той возда́ст коему́ждо по дело́м его́.

Сла́ва Отцу́ и Сы́ну и Свято́му Ду́ху.

О́браз превы́спренняго Богосло́вия стяжа́л еси́, прему́дре Макси́ме,
сии есть догма́ты Боже́ственных апо́стол и оте́ц,
от Свята́го Паракли́та излия́нныя, и́мже и нас науча́еши Богому́дрыми свои́ми писа́нии.

И ны́не и при́сно и во ве́ки веко́в. Ами́нь.

Богородичен: О́браз пречи́стаго Твоего́ рождества́, Де́во Ма́ти,
неизрече́нен и недове́дом есть,
Ты бо вселе́ние преве́чнаго Единоро́днаго Сы́на О́тча была́ еси́, не опали́вшися от Него́.

Песнь 8

Ирмос: В пла́мени о́гненне горя́щия пе́щи
сохра́ншаго де́ти
и во зра́це А́нгела снизше́дшаго к ним
по́йте Го́спода
и превозноси́те Его́ во ве́ки.

Припев: Преподо́бне о́тче Макси́ме, моли́ Бо́га о на́с.

Пла́мене Боже́ственнаго Паракли́това облиста́ния возжеле́в, преподо́бне Макси́ме,
сего́ ра́ди и сладча́йшим све́том уче́ния и чуде́с огне́м
отгна́л еси́ вся́кий мрак бесо́вский.

Припев: Преподо́бне о́тче Макси́ме, моли́ Бо́га о на́с.

Пла́мене гее́нскаго бе́гати лю́ди научи́л еси́, преподо́бне Макси́ме,
сих призыва́я де́лом соверша́ти за́поведи Христо́вы
и отступи́ти зло́бы, блуда́, лжи, го́рдости, льсти и хище́ния непра́веднаго чужи́х име́ний.

Сла́ва Отцу́ и Сы́ну и Свято́му Ду́ху.

Пла́менно нече́стие ерети́ческое попали́л еси́, прему́дре Макси́ме,
ве́ры же христиа́нския непоро́чныя Боже́ственное испове́дание изъясни́в.

И ны́не и при́сно и во ве́ки веко́в. Ами́нь.

Богородичен: В пла́мени о́гненне горя́щия купины́ ви́де Тя Моисе́й Богови́дец,
провозвести́в безсе́менное рождество́ Твое́, Де́во Пречи́стая,
сего́ ра́ди и нас плотски́х страсте́й свободи́.

Песнь 9

Ирмос: Тебе́, све́тлую свещу́ и Ма́терь Бо́жию,
пречу́дную сла́ву и вы́шшую всех тва́рей,
пе́сньми велича́ем.

Припев: Преподо́бне о́тче Макси́ме, моли́ Бо́га о на́с.

Тебе́, све́тлую свещу́, и ум кра́йнейший, и столп непоколеби́м ве́мы,
па́че же наста́вника мона́хов и ересе́й наказа́теля пропове́дуем.

Припев: Преподо́бне о́тче Макси́ме, моли́ Бо́га о на́с.

Све́тло от полу́денных стран возсия́л еси́, преподо́бне Макси́ме,
све́тло житие́ показа́в, мрак лука́вствия прогоня́я
и благоприя́тною моли́твою просия́в.

Сла́ва Отцу́ и Сы́ну и Свято́му Ду́ху.

Свеща́ Боже́ственнаго ра́зума быв, дости́гл еси́ в позна́ние Сы́на Бо́жия,
в му́жа соверше́нна, в ме́ру во́зраста Христо́ва,
сего́ ра́ди и мы вопие́м ти:
блаже́н ты еси́ вои́стинну по всему́,
и по́двиги, и сла́вою, и благода́тию, я́же еси́ свы́ше получи́л.

И ны́не и при́сно и во ве́ки веко́в. Ами́нь.

Богородичен: Тебе́, и све́тлую свещу́ в нощи́ страсте́й,
и покро́в благосты́ни, и сте́ну необори́му от наве́т вра́жиих,
пе́сньми велегла́сно велича́ем.

Светилен

Свет возсия́л есть преподо́бному Макси́му Боже́ственных слове́с и повеле́ний,
сего́ ра́ди я́ко свет вторы́й и ум крайне́йший нам яви́ся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ужасо́шася а́нгельския си́лы, зря́ще Де́ву,
Свет от Све́та в рука́х держа́щу,
чи́сте Ро́ждшей вопия́ше:
Свет возсия́л есть нам от деви́ческих ложе́сн.

Акафист

Акафист преподобному Максиму Греку

Кондак 1

Избранный служителю Предвечнаго Слова, всехвальне отче наш Максиме, в преславней земли Греческой прозябший и в державе российстей подвизи просиявший, поучениями и писании твоима в благочестии и богообщении нас утвердивый, величаем ныне многотрудное житие твое и на предстательство твое пред престолом Триипостаснаго Бога нашего упование свое возлагая, вопием ти сице:

Радуйся, преподобне и богоносне отче Максиме, на путь спасение вечнаго нас наставляющий!

Икос 1

Ангелов и человеков Творец и всея твари Зиждитель, содержаяй в деснице своей судьбы царств и народов и над каждым из чад своих отеческое промышления являяй, произрасти тя, богомудре отче наш Максиме, от корени именитаго и рода знатнаго, благоволи украсити тя в премудрости отец святых и аки просветителя всемудраго направи тя в великое княжество Московское, да укрепиши народ русстий в вере истинней и подлинными наследниками духовнаго богатства Византии ны сотвориши. Мы, сия ныне поминающе, просим тя, приклони к нам милосердие Всемудраго и Всемогущего Отца Небеснаго и приими милостивно похвалы сия:

Радуйся, богодухновенных отец достойных приемниче и сонаследниче.

Радуйся, философов и риторов премудрых пречудный наставниче.

Радуйся, всех истины взыскующих небесным благословением осеняющий.

Радуйся, от путей соблазнов и прельщений их удаляющий.

Радуйся, в богомыслии разум наш утверждающий.

Радуйся, в сердцех наших пламень любви к Богу и ближним возжигающий.

Радуйся, тихим светом надежды ны благодатно озаряяй.

Радуйся, в вере твердыми выну быти ны сподобляяй.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 2

Видевше благочестивыя и богомудрыя родителя твоя, святый Максиме, запущение отчизны их по падении преславнаго царствия греческаго, обаче уразумеша, яко выну милостив есть Господь к верным своим, и во уповании таковом и житии по заповедем евангельским тя утвердиша. Мы же, сия воспоминающе, Господеви поем: Аллилуйа!

Икос 2

Разум твой в послушание вере отдавше, преславными родители твоима и иныма добрыма наставники поучаемый, богоносне Максиме, в благословении пред Творцем всяческих начаток премудрости твоя и дел благих положил еси; послеже усердно поработал еси учения отец святых и философов премудрых постигая, восходя по лествице добродетелей в меру возраста духовнаго. Сего ради величаем тя сице:

Радуйся, дары благости и добраго совета нас преображающий.

Радуйся, кротостию голубиною и мудростию змеиною нас обогощающий.

Радуйся, ко усердному чтению святаго Писания ны побуждаяй.

Радуйся, к усиленной молитве и в псалмопении нас утверждающий.

Радуйся, в трезвлении духовнем и уповании на Бога всех нас утверждающий.

Радуйся, душетленных навыков и злых обычаев удалятися нас научающий.

Радуйся, в соблазнех и прельщении сущих помощь небесную посылающий.

Радуйся, в милосердии к себе и ближним нашим взрастати нам помогающий.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 3

Силою благодати Божия хранимый, блаженне Максиме, в земли италийстей сый, не врежден пребыл еси от тлетворнаго духа века того, и, пчеле трудолюбивей подобно, нектар благий мудрости отовсюду сбирал еси, в познании истины Христовей возрастая; Иерониму благочестивому внимая к иноческому житию устремил еси мудрое сердце твое, отче святый; Господеви же неустанно возносил еси пение ангельское: Аллилуйа!

Икос 3

Имуще в души твоя ревностное желание Спасителю Нашему, за ны Распятому, всеусердно послужити удалился еси, богославне Максиме, из чудней земли Италийстей на преславну гору Афонскую, идеже монашество и священство сподобился еси прияти: наставлением старец святогорских следуя, от добродетели к добродели восходил еси, угодниче Христов, внутреннего человека обновляюще и образ Божий в себе отверзая. Сему же деланию духовному и нас настави, да зовем ти:

Радуйся, от суеты мирския к священному безмолвию притекий.

Радуйся, упокоение от невзгод и треволнений в тихих обителех обретый.

Радуйся, свет нетварный еще на земли созерцавый.

Радуйся, неизреченную сладость богообщения познавый.

Радуйся, духовныя очи наша ко зрению Бога изощряющий.

Радуйся, ушеса наша к слышанию небесных глагол отверзающий.

Радуйся, даром различения духов нас обогащаяяй.

Радуйся, от заблуждений и падений духовных нас свобождаяй.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 4

Бурю страстей и сомнений греховных молитвою, постом и трезвением сердечным победил еси, всехвальне отче наш Максиме, ибо на твердом камени истиннаго и непреложнаго исповедания Христова положил еси основание душевной храмины твоя. Сего ради молим тя: утверди и нас в непреложном уповании на Милосердие Святей Троицы, да с тобою сподобимся во веки воспевати: Аллилуйа!

Икос 4

Слышавше благоверный великий князь Московский Василий Третий, яко во обителех афонских книжницы велемудрыя и философы богопросвещенныя обретаются, повеле призвати оныя в державу свою, дабы народ русский в вере Христовой и делании заповедей евангельских утвердити и укрепити. Ты же, преблагословенный Максиме, благодатию Божиею присноукрепляемый, отбыл еси в пределы московския, дабы волю Божию исполнити и правду Его явити в стране нашей. Сего ради просим тя: нас, слабых в вере и в уповании на Христа, Господа Нашего, укрепи, да зовем ти сице:

Радуйся, тягот дороги дальния и жития в пределех северных не убоявыйся.

Радуйся, чуждый кровию, обаче духом своим для русскаго народа ставший.

Радуйся, землю греческую и российскую паки и паки в вере соединяющий.

Радуйся, от суеты и преходящих пристрастий ны исцеляющий.

Радуйся, к вечней правде Божией взоры духа обращати ны научающий.

Радуйся, идолы духовные о камень истины Христовей разбивающий.

Радуйся, Христа – Спасителя паче всего земнаго чтити подвизающий.

Радуйся, милость Всенепорочней Богоматери к нам приклоняющий.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 5

Богоявленней и боготочней звезде, путь ко Христу озаряющей и освящающей воистину уподобился еси, преподобне отче наш Максиме, егда в пределех российстих сый, истину Божию безстрашно исповедал и проповедал еси, суеверия языческия и звездопоклонническую ересь, мздоимство и неправдолюбие, забвение заповедей и любви к ближнему всеусердно обличал еси. Сего ради просим тя, всеблагий наставниче наш, научи нас токмо Спасителю служити, не соблазняясь земными преходящима благами и сподоби во веки нужно с тобою выну воспевати Христу: Аллилуйа!

Икос 5

Видевше тя, благословенне отче наш Максиме, благочестивыя русстии люди, почаху прихождити к тебе в прехвальную Чуда Святаго архистратига Михаила обитель, иже во граде Москвы, совета, наставления, утешения и молитвы твоя ради. Ты же, никого от пришедших не отринув, ко пользе ближних твоих всеусердно послужил еси. Мы же, веруя, яко ты ныне во благодати Господней сый, сугубо внемлеши мольбам нашим с надеждою, отрадою и умилением воспеваем ти сице:

Радуйся, старче благий, в возрастании богопознания ближних твоих утверждавый.

Радуйся, от духовной дремоты и праздности духа приходивших к тебе исцелявый.

Радуйся, подлинному благочестию и любви к ближнему я научавый.

Радуйся, в уповании на Премудрость Милосерднаго Творца их укреплявый.

Радуйся, от закваски фарисейския и лицемерия преславно исцеляяй.

Радуйся, от теплохладия и омертвления сердечнаго благодатно избавляяй.

Радуйся, о просвещении духовных очес наших Бога умоляяй.

Радуйся, в тишине помыслов хвалити Христа всех нас подвизаяй.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 6

Проповедник и ревнитель жития благочестиваго воистину явился еси, всеблагохвальне отче наш Максиме Святогорче, яко твердо и неукоснительно обличал еси, незнание истин веры Христовой, несоблюдение заповедей Спасовых, исполнение токмо внешняго обряда, безо всякого подвига духовнаго в суетней надежде токмо на внешнее благочестие, наставлял бо еси всем сердцем и всем помышлением, всем естеством нашим возлюбити Иисуса Сладчайшаго и умиленно воспевати Ему благодарения: Аллилуйа!

Икос 6

Возсиял еси светом богодарованныя премудрости твоя, о всехвальне отче наш Максиме, в земле Русстей, яко мнозих во истине Христовой преславно утвердил, яко книзи Писания священнаго, святых отец творения и толкования перевел еси с наречия греческаго и латинскаго на язык словенский, яко богомудрыя сочинения в назидание и пользу нам оставил еси, преподобне. Сего ради, величая прехвальные труды твоя, глаголим ти сице:

Радуйся, от мрака невежества к свету Премудрости Божия возводяй.

Радуйся, заблуждающихся и сомневающихся ко истине Христовой кротце приводяй.

Радуйся, труд переводчиков и книжных справщиков с небес благословляющий.

Радуйся, филологом и языковедам помощь твою посылающий.

Радуйся, разум богословов и благовестников светом небесным осеняющий.

Радуйся, иноков и мирян в богоугодном житии и милосердии укрепление.

Радуйся, пресвитеров в благочестии и трезвлении утверждение.

Радуйся, архиереев во трудех их благодатное удобрение.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 7

Хотяще нам славити тя, о богоносне отче наш Максиме, ведаем убо, яко язык человеческий не возможет достойно воспети всю полноту богоугодных подвигов твоих, все терпение твое, яже подъял еси, егда иерарси нечестивыя Тайн Божественных тя лишиша. Како убо возможно воспети глубину смирения твоего и высоту упования на Всемогущество и Любовь Отца Нашего Небеснаго, иже, аки слугу своего возлюбленнаго и ученика Христова прия тя и на лоне Авраамовем на веки упокои тя? Сего ради на предстательство твое надеяние наше возлагая, поим о тебе Вседержителю: Аллилуйа!

Икос 7

Новый Максим – исповедник воистину явился еси, преподобне отче, яко же и святый твой покровитель исповедал еси пред властителями нечестивыми истину учения Спасителя Нашего, от коей ни одесную и ни ошуюю не отошел еси, отче святый и богомудрый. Сего же ради от властей предержащих лишения, изгнание и заточение темничное притерпел еси. Мы же, исповеднические подвизи твоя желая славословити, таковыя похвалы приносим ти:

Радуйся, во страданиях твоих десницею Всевышняго укрепленный.

Радуйся, яко злато в горниле испытаний тяжких преображенный.

Радуйся, купно с исповедническими лики во славе ныне торжествуяй.

Радуйся, купно с благовестники и просветители хвалу Богу воспеваяй.

Радуйся, подобно Златоусту, за вся благодарити Творца нас научаяй.

Радуйся, в радости и благоденствии помнити о милостех Господних подвизаяй.

Радуйся, в час скорби упование на высшее милосердие возлагати наставляяй.

Радуйся, горести и страдания наши в отраду и благополучие пречудно претворяяй.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 8

Странно бе людем благочестивым и благосердным зрети, яко ты, святый Максиме, в темнице заключенный и права писати лишенный, углием на стенах канон Всесвятому Духу-Параклиту написал еси; мы же, величая веру твою в животворящую благодать Всеблагаго Утешителя, смирение и незлобие твое воспеваем со умилением и просим тя, отче святый, сподоби и нас милости и даров Святаго Духа, да поем Ему всерадостно: Аллилуйа!

Икос 8

Всего себе подвигл еси на служение Господеви, богославне отче наш Максиме, ибо несомненне веровал еси, яко «во Отце существенне и Дух: от Него бо, аки от Единаго Начала, соприсносущна Оба сияют и пребывают о Себе в Живоначальных Ипостасех Своих». Мы же ныне величаем тя, святый отче, неизреченных тайн Божественных созерцателя всеблагоговейнаго, еще на земли нетварным сиянием осененнаго и просим тя: молитвы благоприятными твоима озари и нас светом Фаворстим и приими благосклонно лики сия:

Радуйся, Живоначальныя и Единосущныя Троицы Всесвятыя премудрый служителю.

Радуйся, величия Отца Предвечнаго и Безначальнаго всеблагий тайнозрителю.

Радуйся, Сына Божия, Искупителя, вернейший последователю.

Радуйся, милосердия Всесвятого Параклита к нам всеусердный приклонителю.

Радуйся, ангельских хоров и собора праведных вседостойный сонаследниче.

Радуйся, преподобных отец афонских сомолитвенниче и собеседниче.

Радуйся, земли российския и еллинския вседрагое украшение.

Радуйся, Вселенския Церкви Христовой преизрядное похвало и утверждение.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 9

Всяческия муки душевныя и телесныя с достоинством священноинока и кротостию претерпел еси, всеблаженне Максиме; сего же ради утешения преславного сподобился еси от Господа Нашего, иже посла к тебе единаго от ангел своих, иже возвести ти, яко терпением твоим венец нетленный на небесех обрести имаши. Ты же, отче преподобне, с благодарностию воспел еси Господеви: Аллилуйа!

Икос 9

Вития многовещанныя и поэты всеискусныя, аки рыбы безгласные, немеют пред величием подвигов твоих, богоблаженне отче наш Максиме, ибо кто возможет достойно и всеправедно воспети вся труды твоя, яже подъял еси вящей славы Божия ради и пользы и просвещения ближних твоих, в странех италийской, греческой и в пределех державы российстей, ибо кто по достоянию воспоет терпения и муки твоя, иже с надеждою велиею и кротостию ангельскаю приял еси, обаче на милость твою к нам уповая, смиренным сердцем возносим ти похвалы сия:

Радуйся, усыпленных совестей скорый возбудителю.

Радуйся, сомнений и треволнений душевных благостный умирителю.

Радуйся, всех чтущих память твою преславный хранителю.

Радуйся, носителей имени твоего благодатный попечителю.

Радуйся, благих дел и милосердия богомудрый наставниче.

Радуйся, изгнанных, униженных и обездоленных небесный заступниче.

Радуйся, правды ради подвизающихся всеблагий покровителю.

Радуйся, неправедно гонимых и обидимых предобрый утешителю.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 10

Спасительный подвиг твой, о всеславне Максиме, совершивше, в руце Божии дух твой предал еси, с надеждою и отрадою велиею; ангелы же Господни вознесоша душу твою во обители Отчии; идеже Вседержитель венча тя нетленным венцем; сего ради просим тя, святый отче наш Максиме, егда же и мы оным сном смертным усыпати начнем, умоли Господа кротко душу нашу от тела отделити и власти бесовские ны избавити, да с тобою купно Всесвятей Троице воспоим: Аллилуйа!

Икос 10

Стеною всеблагомощных молитв твоих храниши днесь весь род христианский, о преподобне отче наш Максиме, и во всяком скорбном обстоянии помощь твою даруеши всем, имя твое всечестное призывающим. Ты бо во дни брани со шведами явился еси святому благоверному царю Феодору Первому, иже опочи под стогнами града Юрьева и глаголал еси ему: «Изыди из шатра, да не убиен будеши», и тако живот его сохрани, послеже и иных чудес множество сотворил еси. Сего ради мы с любовью таковыя похвалы тебе приносим:

Радуйся, благочестивейшаго государя от погибели лютей на поле брани сохранивый.

Радуйся, благоволение и милость твою велиему множеству чтущих тя явивый.

Радуйся, от опасений и злых человек выну нас оберегаяй.

Радуйся, от прельщений и искушений бесовстих ны избавляяй.

Радуйся, благоговению пред святынею церковною нас обогащающий.

Радуйся, узким путем шествовати ко Господу научающий.

Радуйся, от широких дорог соблазнов ны удаляющий.

Радуйся, от уз неведения, заблуждений и недоумений скоро разрешающий.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 11

Пения акафистное радостно приносим ти, о богоблаженне отче наш Максиме, и молим убо тя: всеблагомощным предстательством твоим исцели недуги наши душевныя и болезни телесныя, отврати от суеты помышления наши, настави нас в благочестивом житии, бедным отраду и утешение ниспошли, богатых к милосердию и благотворению подвигни, и всех нас настави нелицемерно Господеви воспевати: Аллилуйа!

Икос 11

Свет нетварный купно с сонмом отец преподобных созерцаеши ныне, богоблаженне отче наш Максиме, яко предстояй пред престолом Всесвятыя и Единосущныя Троицы и молишися о спасении и благоденствии всех христиан. Мы же, Святую память твою почитающе, с надеждою взываем к тебе, угодниче Христов, сотвори твою молитву о нас, да отстранимся от греха и возможем еще на земли суще возрадоватися о Господе, молитвами угодников своих, милующего преизобильно и спасающего ны. Сего ради мы паки со умилением произносим ти похвалы сия:

Радуйся, благовестников в делах проповеди Евангелия укрепляющий.

Радуйся, делателей на пустующия нивы Господни посылающий.

Радуйся, ревновати о спасении ближних нас научающий.

Радуйся, словеса мудрыя во уста наши влагающий.

Радуйся, от сомнений и маловерия скоро исцеляющий.

Радуйся, в час недоумения разум наш мыслию благою озаряющий.

Радуйся, внутренний мрак душ наших светом Христовым озаряющий.

Радуйся, от теплохладия и немилосердия сердца наша освобождающий.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 12

Благодать и дары Всепреблагаго и Всепресвятаго Духа Утешителя, Хранителя жизни нашея испроси нам, всеблагословенне отче Максиме, ты бо ныне во славе купно со праведными сыны Божиими и сонмами херувимов и серафимов предстоиши огнезрачному престолу Триипостасного Бога Нашего и простираеши преподобническия руце твои ко Отцу Света и Творцу миров и взываеши Ему: Аллилуйа!

Икос 12

Стеною богоприятных молитв твоих, преподобне отче наш Максиме, огради ны ото всякаго зла, скорбей и болезней избави ны, не посрами убо упования нашего, вемы бо, яко много может молитва твоя, отче праведный, у Царя Небеснаго, яко ты в сомне преподобных отец предстоиши пред престолом Всевышнего и предстательствуеши о всех, вопиющих ти сице:

Радуйся, покаянием души наши обновляти научаяй.

Радуйся, от уныния и тоски всех нас исцеляяй.

Радуйся, от ропота и неверия благодатное свобождение.

Радуйся, милосердия Божия к нам приклонение.

Радуйся, не творение, а Творца Предвечнаго, чтити ны научающий.

Радуйся, от суемудрия и пустословия ны отвращающий.

Радуйся, в преподобии и правде ны преславно утверждающий.

Радуйся, в Бозе все житие наше благодатно устрояющий.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 13

О преблагословенне отче, предобрый наш заступниче и любимый покровителю, всехвальне Максиме Святогорче! Милостивно приими усердное возносимое тебе пение и хваление, настави ны, пользуясь благами земными, не грешити против Господа Нашего; сподоби веру нашу плодотворней быти дел благих ради, яко да сподобимся в мире скончати земное житие наше и возможем с тобою купно Иисусу Сладчайшему во веки воспевати: Аллилуйа!

[Се́й конда́к глаго́лется три́жды.]

Икос 1

Радуйся, богодухновенных отец достойных приемниче и сонаследниче.

Радуйся, философов и риторов премудрых пречудный наставниче.

Радуйся, всех истины взыскующих небесным благословением осеняющий.

Радуйся, от путей соблазнов и прельщений их удаляющий.

Радуйся, в богомыслии разум наш утверждающий.

Радуйся, в сердцех наших пламень любви к Богу и ближним возжигающий.

Радуйся, тихим светом надежды ны благодатно озаряяй.

Радуйся, в вере твердыми выну быти ны сподобляяй.

Радуйся, преподобне и богоносне отче наш Максиме, на путь спасения вечнаго нас наставляющий!

Кондак 1

Радуйся, преподобне и богоносне отче Максиме, на путь спасение вечнаго нас наставляющий!

Молитва 1-я преподобному Максиму Греку

Преподо́бне о́тче Макси́ме! Воззри́ на на́с ми́лостивно и к земли́ приве́рженных возведи́ к высоте́ небе́сней. Ты́ горе́ на небеси́, мы́ на земли́ ни́зу, удалены́ от тебе́, не толи́ко ме́стом, ели́ко грехми́ свои́ми и беззако́нии, но к тебе́ прибега́ем и взыва́ем: наста́ви на́с ходи́ти путе́м твои́м, вразуми́ и руково́дствуй. Вся́ твоя́ свята́я жи́знь бы́сть зерца́лом вся́кия доброде́тели. Не преста́ни, уго́дниче Бо́жий, о на́с вопия́ ко Го́споду. Испроси́ предста́тельством свои́м у Всеми́лостиваго Бо́га на́шего ми́р Це́ркви Его́, под зна́мением креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, утвержде́ние во благи́х де́лех, больны́м исцеле́ние, печа́льным утеше́ние, оби́женным заступле́ние, бе́дствующим по́мощь. Не посрами́ на́с, к тебе́ с ве́рою притека́ющих. Вси́ правосла́внии христиа́не, твои́ми чудесы́ испо́лненнии и ми́лостьми облагоде́тельствованнии, испове́дуют тя́ бы́ти своего́ покрови́теля и засту́пника. Яви́ дре́вния ми́лости твоя́, и и́хже отце́м всепомоществова́л еси́, не отри́ни и на́с, ча́д и́х, стопа́ми и́х к тебе́ ше́ствующих. Предстоя́ще всечестне́й ико́не твое́й, я́ко тебе́ жи́ву су́щу, припа́даем и мо́лимся: приими́ моле́ния на́ша и вознеси́ и́х на же́ртвенник благоутро́бия Бо́жия, да прии́мем тобо́ю благода́ть и благовре́менную в ну́ждех на́ших по́мощь. Укрепи́ на́ше малоду́шие и утверди́ на́с в ве́ре, да несомне́нно упова́ем получи́ти вся́ блага́я от благосе́рдия Влады́ки моли́твами твои́ми. О, превели́кий уго́дниче Бо́жий! Все́м на́м, с ве́рою притека́ющим к тебе́, помози́ предста́тельством твои́м ко Го́споду, и все́х на́с упра́ви в ми́ре и покая́нии сконча́ти живо́т на́ш и пресели́тися со упова́нием в блаже́нныя не́дра Авраа́мове, иде́же ты́ ра́достно во труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.