Икона Богородицы Отрада (Утешение) Ватопедская

Празднование

Тропарь, глас 4

Яко покро́в благода́тный и спаси́тельный
стяжа́хом честну́ю Твою́ ико́ну, Богоро́дице,
на сию́ у́бо со умиле́нием взира́юще, Тебе́ вопие́м:
Влады́чице, ниспосли́ нам отра́ду и утеше́ние,
на Тя бо упова́ние возлага́ем, гре́шнии и смире́ннии.
На Твое́ предста́тельство наде́емся, недосто́йнии.
Ускори́ нас изба́вити от бед и скорбе́й
и умоли́ Сы́на Твоего́, Христа́ Бо́га на́шего,

поми́ловати и спасти́ ду́ши на́ша.

Ин тропарь К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний./ Не отврати́ Твоя́ рабы́ тщи,// Тя бо и еди́ну наде́жду и́мамы.

Кондак, глас 8

Взбра́нной Воево́де победи́тельная,
я́ко изба́вльшеся от злы́х,
благода́рственная воспису́ем Ти, раби́ Твои́, Богоро́дице,
но, я́ко иму́щая держа́ву непобеди́мую,
от вся́ких нас бед свободи́, да зове́м Ти:

Ра́дуйся, Неве́сто Неневе́стная.

Молитва

Наде́жда всем конце́м земли́, Пречи́стая Де́во Богоро́дице, Утеше́ние и Отра́до на́ша! Не гнуша́йся нас гре́шных, на Твою́ бо ми́лость упова́ем. Угаси́ пла́мень грехо́вный и покая́нием ороси́ изсо́хшие сердца́ на́ша. Очи́сти ум наш от грехо́вных помышле́ний. Приими́ моле́ния от души́ и се́рдца с воздыха́нием Тебе́ приноси́мыя. Бу́ди Хода́таица о нас к Сы́ну Твоему́ и Бо́гу и отврати́ гнев Его́ от нас Ма́терними моли́твами. Укрепи́ в нас ве́ру правосла́вную, вложи́ в нас дух стра́ха Бо́жия, дух смире́ния, терпе́ния и любви́. Душе́вныя и теле́сныя я́звы исцели́, утиши́ бу́рю злых нападе́ний вра́жеских. Отыми́ бре́мя грехо́в на́ших и не оста́ви нас до конца́ поги́бнути. Пода́ждь нам ми́лость Твою́ и свято́е благослове́ние Свое́ всем зде предстоя́щим и моля́щимся и всегда́ пребыва́й с на́ми, подава́я приходя́щим к Тебе́ отра́ду и утеше́ние, по́мощь и заступле́ние, да сла́вим и велича́ем Тя вси до после́дняго на́шего воздыха́ния. Ами́нь.

Канон Пресвятой Богородице пред иконой «Отрадо» или «Утешение»

Минея, 21 Января.

Глас 8

Песнь 1

Ирмос: Во́ду проше́д, я́ко су́шу,
и еги́петскаго зла избежа́в,
изра́ильтянин вопи́яше:
Изба́вителю и Бо́гу на́шему пои́м.

Припев: Пресвята́я Богоро́дице, спаси́ на́с.

Бо́жиею благода́тию озари́ мя, Богоблагода́тная,
благогове́йно пе́ти пред свято́ю ико́ною Твое́ю
Тебе́, необори́му Засту́пницу и держа́ву неразруши́му ста́да Твоего́.

Припев: Пресвята́я Богоро́дице, спаси́ на́с.

Тя, Всенепоро́чная, и́мамы предста́тельство, Отра́ду же и Утеше́ние.
Сего́ ра́ди, сла́вяще бла́гость Твою́, моли́мтися: поми́луй нас.

Припев: Пресвята́я Богоро́дице, спаси́ на́с.

Храни́тельница су́щи Горы́,
наше́дшим разбо́йником на оби́тель Ватопе́дскую
не предала́ еси́, Госпоже́, рабо́в Твои́х в ру́ки вра́жия.

Припев: Пресвята́я Богоро́дице, спаси́ на́с.

Кто подо́бен Тебе́, Де́во, сла́вно творя́щая чудеса́?
Наста́вив бо и́ноки пра́вдою Сы́на Твоего́, е́же боя́тися Его́,
изба́вила и уте́шила еси́ их кре́постию Твое́ю.

Сла́ва Отцу́ и Сы́ну и Свято́му Ду́ху.

Враче́вско есть е́же ре́зати и же́щи, здра́вия вино́вное,
но Ты нас, Сы́не Бо́жий, мя́гкими лечба́ми щедро́т Твои́х уврачу́й,
Ма́тере Твоея́ мольба́ми.

И ны́не и при́сно и во ве́ки веко́в. Ами́нь.

Услы́ши, Блага́я, мольбы́ христоимени́тых люде́й,
при́зри на озлобле́ние утесня́емых,
виждь сле́зы су́щих в ско́рбех
и умилосе́рдитися потщи́ся на рабы́ Твоя́.

Песнь 3

Ирмос: Ты еси́ утвержде́ние
притека́ющих к Тебе́, Го́споди,
Ты еси́ Свет омраче́нных,
и пое́т Тя дух мой.

Припев: Пресвята́я Богоро́дице, спаси́ на́с.

Под кров Твой притека́ем, лю́дие Твои́,
Засту́пница бу́ди нам, Влады́чице,
подаю́щи отра́ду и утеше́ние пою́щим Тя.

Припев: Пресвята́я Богоро́дице, спаси́ на́с.

Возвесели́шася ватопе́дцы о спасе́нии Твое́м, Де́во,
немощству́ющих бо препоя́сала еси́ си́лою
на прогна́ние разбо́йников.

Припев: Пресвята́я Богоро́дице, спаси́ на́с.

Не преста́й, Всеми́лостивая Госпоже́, спаса́ти рабы́ Твоя́ от неча́емых напа́стей,
да благода́рственно сла́вим Тя.

Припев: Пресвята́я Богоро́дице, спаси́ на́с.

Моли́, Богороди́тельнице, е́же изба́витися нам вся́каго гне́ва и преще́ния Бо́жия,
Тебе́ почита́ющим.

Сла́ва Отцу́ и Сы́ну и Свято́му Ду́ху.

Хода́таица благоприя́тная и си́льная к Бо́гу,
прегреше́ний оставле́ние испроси́ нам у Него́, Богоневе́сто.

И ны́не и при́сно и во ве́ки веко́в. Ами́нь.

Смертоно́сных неду́гов душе́вных и теле́сных изми́ ны, Влады́чице,
ве́чнующую Жизнь ми́ру ро́ждшая.

Седален, глас

Ви́димыми и неви́димыми враги́ окружа́емии,
к Тебе́, Де́во, прибега́юще, зове́м:
не удали́ по́мощь Твою́ от нас, я́коже от и́ноков ватопе́дских не удали́ла еси́,
но держа́вною си́лою Твое́ю побори́ борю́щия ны,
ми́рное и Богоуго́дное житие́ нам устроя́ющи.

Песнь 4

Ирмос: Услы́шах, Го́споди,
смотре́ния Твоего́ та́инство,
разуме́х дела́ Твоя́
и просла́вих Твое́ Божество́.

Припев: Пресвята́я Богоро́дице, спаси́ на́с.

Убоя́ся се́рдце игу́мена в моли́тве усте́н его́
от гла́са Твоего́, Богома́ти, и преще́ния Сы́на Твоего́,
и смяте́ся кре́пость его́, возвеще́ну бы́вшу нападе́нию от разбо́йников.

Припев: Пресвята́я Богоро́дице, спаси́ на́с.

Внегда́ смути́тися Ватопе́ду во гне́ве Твое́м, Го́споди,
ми́лость Твою́ помяну́л еси́ предста́тельством Присноде́вы,
от Нея́же яви́лся еси́ на спасе́ние люде́й Твои́х.

Припев: Пресвята́я Богоро́дице, спаси́ на́с.

Не преда́ждь в ру́ки враго́в насле́дие Твое́, Чи́стая,
да некогда́ реку́т:
где есть Богороди́тельница, на Ню́же упова́ша?
но не вре́дно и ненаве́тно соблюди́ ста́до Твое́.

Сла́ва Отцу́ и Сы́ну и Свято́му Ду́ху.

Свято́му о́бразу Твоему́ припа́дающе, мо́лим Тя:
разори́ сове́ты хотя́щих нам зла́я и живо́т наш напра́ви твори́ти в ми́ре Боже́ственную во́лю Сы́на Твоего́.

И ны́не и при́сно и во ве́ки веко́в. Ами́нь.

Во искуше́ниих бу́ди нам, Влады́чице, спаси́тельное прибе́жище,
в боле́знех врачева́ние,
во обурева́нии ти́хое приста́нище
и в ско́рбех Отра́да и Утеше́ние.

Песнь 5

Ирмос: Вску́ю мя отри́нул еси́
от лица́ Твоего́, Све́те Незаходи́мый,
и покры́ла мя есть чужда́я тьма, окая́ннаго?
Но обрати́ мя и к све́ту за́поведей Твои́х
пути́ моя́ напра́ви молю́ся.

Припев: Пресвята́я Богоро́дице, спаси́ на́с.

Сте́ну тве́рду и столп непоколеби́м Тя и́мать Гора́ в наше́ствиих ва́рварских:
студа́ бо исполня́еши вра́жия ли́ца
и возвраща́тися твори́ши им вспять тще́тным и безде́льным, Влады́чице.

Припев: Пресвята́я Богоро́дице, спаси́ на́с.

Ма́тернее промышле́ние о су́щих в Горе́ иму́щей Ти,
стра́ха ра́ди Сы́на Твоего́, Де́во, поболе́ Ватопе́д, уве́дев о разбо́йницех,
и роди́ дух спасе́ния предста́тельством Твои́м, Преблагослове́нная.

Припев: Пресвята́я Богоро́дице, спаси́ на́с.

Я́ко же настоя́теля Ватопе́дскаго, по у́трени бде́вша и моли́вшася,
наста́вила еси́, Блага́я, ка́ко спасти́ся от напа́сти,
та́ко и нам пода́ждь тща́ние от но́щи у́треневати к Бо́гу
и ко спасе́нию наста́ви ны, избавля́ющи от всех бед.

Припев: Пресвята́я Богоро́дице, спаси́ на́с.

Я́ко же запрети́ла еси́, Госпоже́, отверза́ти врата́
гото́вой су́щей поги́бели от враго́в,
та́ко положи́ в нас благода́тную дверь огражде́ния,
да не обря́щется вхо́да всезло́бным губи́телем и их пле́велом.

Сла́ва Отцу́ и Сы́ну и Свято́му Ду́ху.

Я́ко же повеле́ла еси́, Влады́чице, возше́дше на сте́ны, разгна́ти разбо́йники,
та́ко укрепи́ бы́ти нам на четверосте́нии му́жества и пра́вды, му́дрости и целому́дрия,
да отража́ем борю́щия ны.

И ны́не и при́сно и во ве́ки веко́в. Ами́нь.

Я́ко же уми́лостивила еси́, Де́во, Сы́на Твоего́, прогне́вавшася на су́щия в Ватопе́де,
та́ко умилостивля́й Его́ о нас, во мно́гия грехи́ впада́ющих,
мно́го бо мо́жет моле́ние ма́тернее ко благосе́рдию Влады́ки.

Песнь 6

Ирмос: Моли́тву пролию́ ко Го́споду
и Тому́ возвещу́ печа́ли моя́,
я́ко зол душа́ моя́ испо́лнися
и живо́т мой а́ду прибли́жися,
и молю́ся, я́ко Ио́на:
от тли, Бо́же, возведи́ мя.

Припев: Пресвята́я Богоро́дице, спаси́ на́с.

Возвеща́юще Ти печа́ли на́ша, мо́лимтися, Ма́ти Бо́жия:
обвесели́ благода́тию Твое́ю скорбя́щих сердца́, всех Ра́досте,
и от тли возведи́ ны.

Припев: Пресвята́я Богоро́дице, спаси́ на́с.

Не стяжа́хом на земли́ ино́го утеше́ния и кре́пкаго заступле́ния,
ра́зве Тебе́, Всеблага́я,
покры́й у́бо от вся́каго зла любо́вию воспева́ющих Тя.

Припев: Пресвята́я Богоро́дице, спаси́ на́с.

Благосты́ню и ми́лость прие́млем от Сы́на Твоего́, Де́во, моли́твами Твои́ми:
от молвы́ бо храни́ши ны, смуще́ния, лови́твы
и вся́каго кова́рства вра́жия, Всепе́тая.

Сла́ва Отцу́ и Сы́ну и Свято́му Ду́ху.

Ми́ру Спаси́тельнице,
необори́мою си́лою Твое́ю не преста́й соблюда́ти ста́до Твое́, зову́щее:
Отра́да и Утеше́ние на́ше Ты еси́, Благослове́нная.

И ны́не и при́сно и во ве́ки веко́в. Ами́нь.

Всех благи́х вина́, сме́ртных оживле́ние,
поги́бших взыска́ние,
изба́ви, Госпоже́, ча́да Твоя́ от напра́сныя сме́рти
и от тли грехо́вныя возведи́ ны.

Кондак, глас 8

Взбра́нной Воево́де победи́тельная,
я́ко изба́вльшеся от злых,
благода́рственная воспису́ем Ти, раби́ Твои́, Богоро́дице,
но я́ко иму́щая держа́ву непобеди́мую,
от вся́ких нас бед свободи́, да зове́м Ти:
Ра́дуйся, Неве́сто Неневе́стная.

Икос

А́нгели Тя, Ма́терь Бо́га на́шего, пе́сньми славосло́вят,
и мы земни́и воспева́ем ра́достно, Тебе́ вопию́ще:
ра́дуйся, Светода́вца селе́ние,
Е́юже лучи́ спасе́ния ми́рови возсия́ша;
ра́дуйся, Обра́дованная, Е́юже исполня́емся Боже́ственнаго весе́лия.
Ра́дуйся, две́ре Восто́ка,
от врат смертоно́сных греха́ нас отводя́щая;
ра́дуйся, свети́льниче пресве́тлый,
просвеща́яй омраче́нных.
Ра́дуйся, бе́здно Бо́жия к нам человеколю́бия;
ра́дуйся, цены́ вся́кия превы́сший дар,
нам от Бо́га дарова́нный.
Ра́дуйся, я́ко и́маши ве́лие к Нему́ дерзнове́ние;
ра́дуйся, стра́же Афо́на и та́мо обита́ющих Храни́тельнице.
Ра́дуйся, всекре́пкая стено́, е́юже сохраня́емся необори́мы враги́ христиа́нскими;
ра́дуйся,я́зво неви́димых враго́в и от них уязвля́емых врачева́ние.
Ра́дуйся, безси́льных си́ло и по́моще безпо́мощных;
ра́дуйся, Отра́до и Утеше́ние скорбя́щих.
Ра́дуйся, Неве́сто Неневе́стная.

Песнь 7

Ирмос: От Иуде́и доше́дше, о́троцы
в Вавило́не иногда́
ве́рою Тро́йческою пла́мень пе́щный попра́ша, пою́ще:
отце́в Бо́же, благослове́н еси́.

Припев: Пресвята́я Богоро́дице, спаси́ на́с.

Вопло́щся от утро́бы Твоея́ Госпо́дь, госпо́дствуяй тва́рию,
и Тебе́, Де́во, Госпожу́ показа́ ви́димым же всем и неви́димым,
я́ко Ма́терь Свою́ прославля́я Тя.

Припев: Пресвята́я Богоро́дице, спаси́ на́с.

Согреши́хом, Го́споди, но не отступи́хом от Тебе́
и ино́го не ве́мы, ра́зве Тебе́,
не преда́ждь нас до конца́ Ма́тере Твоея́ мольба́ми, отце́в Бо́же благослове́нный.

Припев: Пресвята́я Богоро́дице, спаси́ на́с.

Гора́ Бо́жия осене́нная, Всечи́стая,
покры́й су́щия в Горе́ се́нию Твои́х моли́тв
и от се́ти ловя́щих изба́ви пою́щия:
оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Непобеди́мая еси́ кре́пость, Госпоже́,
и несокруши́мое огражде́ние с ве́рою призыва́ющих Тя:
разруша́еши бо сове́ты вооружа́ющихся на сла́вящия Тебе́.

И ны́не и при́сно и во ве́ки веко́в. Ами́нь.

Уныва́ющим Отра́до, печа́льным Утеше́ние, заблужда́ющим Наста́внице,
соблюди́ нас, Де́во, от вся́каго зла,
чту́щих святы́й о́браз Твой.

Песнь 8

Ирмос: Царя́ Небе́снаго,
Его́же пою́т во́и А́нгельстии,
хвали́те и превозноси́те во вся ве́ки.

Припев: Пресвята́я Богоро́дице, спаси́ на́с.

Преблагослове́нная Ма́ти Всеще́драго Бо́га,
уще́дри ны, недосто́йныя, дара́ми милосе́рдия Твоего́,
да превозно́сим Тя во ве́ки.

Припев: Пресвята́я Богоро́дице, спаси́ на́с.

Кре́пость и держа́ва бу́ди рабо́м Твои́м, Всецари́це,
си́ла, ору́жие и меч, враги́ спасе́ния секу́щий,
да сла́вим Тя во ве́ки.

Припев: Пресвята́я Богоро́дице, спаси́ на́с.

Сия́ющая па́че А́нгел святы́нею,
храни́ нас, Всенепоро́чная, от грехо́вных дея́ний, глаго́ланий и помышле́ний,
да благословля́ем Тя во ве́ки.

Припев: Пресвята́я Богоро́дице, спаси́ на́с.

Освяти́, Всесвята́я, благогове́йно лобыза́ющих святу́ю ико́ну Твою́
и Твои́м ма́терним дерзнове́нием ми́лостива нам твори́ Сы́на Твоего́,
да пое́м Его́ во ве́ки.

Сла́ва Отцу́ и Сы́ну и Свято́му Ду́ху.

Отра́до и Утеше́ние моля́щихся Тебе́,
вре́менных и ве́чных лю́тых изба́ви ны, да хва́лим Тя
и Сы́на Твоего́ превозно́сим во вся ве́ки.

И ны́не и при́сно и во ве́ки веко́в. Ами́нь.

Путь и Живо́т, Де́во, ро́ждшая,
стопы́ на́ша напра́ви по словеси́ Бо́жию,
да, живо́т ве́чный насле́довавше, пое́м Тя,
Сы́на Твоего́ превознося́ще во вся ве́ки.

Песнь 9

Ирмос: Проявле́нное на горе́ законополо́жнику во огни́ и купине́
Рождество́ Присноде́вы
в на́ше, ве́рных, спасе́ние
пе́сньми немо́лчными велича́ем.

Припев: Пресвята́я Богоро́дице, спаси́ на́с.

Весели́ся, Ватопе́де,
неусы́пная бо Афо́на Назира́тельница
я́же на Тя кова́рство вра́жие ма́нием Свои́м разруши́
и изгна́нны сотвори́ разруше́ние Тебе́ угото́вавшия.

Припев: Пресвята́я Богоро́дице, спаси́ на́с.

О, вели́каго дерзнове́ния Твоего́, Де́во, к Бо́гу и благоутро́бия к рабо́м Твои́м!
Возвеща́ющи бо о вразе́х,
уклони́ла еси́ лице́ Свое́ от руки́ Сы́на Твоего́,
я́коже до ны́не зри́шися на ико́не Твое́й.

Припев: Пресвята́я Богоро́дице, спаси́ на́с.

Пото́к све́тлости, отра́ды и утеше́ния неистощи́мый Ты еси́, Богора́дованная Ма́ти Све́та,
тьму у́бо страсте́й прожени́ от нас,
обстоя́щих све́тлое подо́бие лица́ Твоего́,
и несвети́маго огня́ изба́ви.

Припев: Пресвята́я Богоро́дице, спаси́ на́с.

Спасе́ние бу́ди при́сное, Госпоже́, от враг на́ших
и из руки́ всех, ненави́дящих нас,
и напра́ви но́ги на́ша на путь ми́рен
милосе́рдия ра́ди ми́лости Сы́на Твоего́ и Бо́га на́шего, Преблагослове́нная.

Сла́ва Отцу́ и Сы́ну и Свято́му Ду́ху.

Влады́чествующая все́ми я́ко Всецаря́ Ма́терь,
стране́ на́шей пода́ждь благоде́нствие, мир, спасе́ние
и на сопоста́ты побе́ды и одоле́ние.

И ны́не и при́сно и во ве́ки веко́в. Ами́нь.

Моле́бное пе́ние от души́ принесо́х со стра́хом Тебе́, Де́во, ро́ждшей Христа́ Бо́га,
Его́же моля́щи, благоприя́тна сотвори́ моле́ния на́ша,
да Тя пе́сньми немо́лчными велича́ем.

Светилен

Озаря́еми благода́тным све́том от ико́ны Твоея́, Влады́чице,
благогове́йно зове́м Ти:
ра́дуйся, светоза́рная луно́, в нощи́ греха́ су́щих путеводя́щая к све́ту покая́ния;
ра́дуйся, Ма́ти Изба́вителя, избавля́ющая нас от напа́стей неча́емых.
Ра́дуйся, Отра́до и Утеше́ние душ на́ших.

Акафист Пресвятой Богородице в честь иконы Ея «Отрада» («Утешение»)

Кондак 1

Возбра́нных сил небе́сных ра́дость и хвале́ние, всего́ же ро́да челове́ча исправле́ние, ублажа́ем Тя, Пречи́стая Де́во Ма́ти, Ты же, на́ше упова́ние еди́ное, низпосли́ душа́м отра́ду благода́тную, да пое́м Тебе́, о́браз ди́вный Твой чту́ще:

Ра́дуйся, Бо́жия Ма́ти, све́тлая на́ша Отра́до.

Икос 1

А́нгелов ли́цы дивя́тся, о́браз афо́нский Тво́й зря́ще, на не́мже, Пречи́стая Де́во и Ма́ти, от уст нетле́нных руко́ю десно́ю десни́цу Младе́нца отво́диши кро́тко. Что́ сие́ есть зна́мение о́браза? Мы же рече́м, пою́ще такова́я:

Ра́дуйся, Де́во, Всевы́шняго Ма́ти;

ра́дуйся, ди́вный раю́ благода́ти,

Ра́дуйся, на́ша Отра́до небе́сная;

ра́дуйся, лю́дем Наде́ждо изве́стная.

Ра́дуйся, о́браз бо Твой спасе́ние возвеща́ет всей земли́;

ра́дуйся, взор бо Твой уте́шение пребыва́ющим во тли.

Ра́дуйся, све́те небе́сный, мглу на́ших дний озаря́яй;

ра́дуйся, цве́те нетле́нный, тлен на́ших дел оживля́яй.

Ра́дуйся, Ты бо моли́твы к Сы́ну за мир твори́ши;

ра́дуйся, я́ко в те́плой моли́тве, а́ки свети́льник, гори́ши.

Ра́дуйся, ра́достно Ти восклица́ем;

ра́дуйся, пе́сненно Тя воспева́ем.

Ра́дуйся, Бо́жия Ма́ти, све́тлая на́ша Отра́до.

Кондак 2

Недоуме́ет ум до́льний та́йны Твоея́ разуме́ти, Пречи́стая Богоблаже́нная Де́во, Ты бо, в ло́но чи́стое де́йствием Ду́ха прии́мши безсе́менно О́тчее Сло́во, Бо́га челове́ком сочета́еши и песнь повелева́еши всем пе́ти: Аллилу́иа.

Икос 2

Го́ру Афо́нскую, Де́во, Сы́ном Ти да́нную в жре́бий, покро́вом Свои́м осеня́ющи свы́ше, храни́ши ди́вно от бед и напа́стей. Благода́тных ико́н Твои́х чудесы́ оби́тели афо́нския сла́вятся и гла́сы преподо́бными Тя хва́лят:

Ра́дуйся, Де́во, отра́до в печа́лех;

ра́дуйся, скоропослу́шнице в ско́рбех.

Ра́дуйся, су́щим в пути́ Одиги́трие;

ра́дуйся, хра́мов свяще́нных врата́рнице.

Ра́дуйся, до́брая предвозве́стнице уныва́ющим в беде́;

ра́дуйся, ве́рное утеше́ние притека́ющим к Тебе́.

Ра́дуйся, бе́дным бога́тство, елеоно́сная Же́но;

ра́дуйся, чту́щим ака́фист благоволя́щая та́йно.

Ра́дуйся, в ке́ллии ста́рцу ре́кшая «Ра́дуйся» чудно;

ра́дуйся, живоприе́мная Ма́ти.

Ра́дуйся, Тя бо досто́йно есть пе́ти;

ра́дуйся, Тя бо по до́лгу вси ублажа́ем.

Ра́дуйся, Бо́жия Ма́ти, све́тлая на́ша Отра́до.

Кондак 3

Е́вину го́рдую пре́лесть Де́вы смире́нное «Бу́ди» в оча́х Милосе́рднаго всю́ упраздня́ет: се Сын Бо́жий Сын Де́вы быва́ет и Бог непристу́пный живе́т с челове́ки, те́мже благода́рственное пе́ние немо́лчными усты́ возсыла́ем: Аллилу́иа.

Икос 3

Ликостоя́ще над мо́рем, све́том моли́твы сия́ют пред Бо́гом святы́ни А́фона и я́ве Бо́жия Ма́тере сла́ва Афо́на святы́я главы́ осеня́ет, к пе́нию на вся́кий час призыва́ющи пусты́нники, Ю́ воспева́ющия:

Ра́дуйся, сла́во пусты́нь вожделе́нных;

ра́дуйся, чу́до высо́т поднебе́сных.

Ра́дуйся, гор и холмо́в осене́ние;

ра́дуйся, скал и стремни́н освяще́ние.

Ра́дуйся, Е́юже открыва́ется путь в небе́сныя страны́;

ра́дуйся, Е́юже отверза́ется рай нетле́нныя весны́.

Ра́дуйся, кри́не в юдо́ли, благоуха́нная ра́досте;

ра́дуйся, цве́те кра́сный, приснотеку́щая сла́досте.

Ра́дуйся, све́та восто́че, до́лы земли́ озари́вый;

ра́дуйся, жи́зни пото́че, во́ду живу́ю яви́вый.

Ра́дуйся, гла́се немо́лчных моле́ний;

ра́дуйся, щи́те свяще́нных селе́ний.

Ра́дуйся, Бо́жия Ма́ти, све́тлая на́ша Отра́до.

Кондак 4

О челове́честем ро́де, е́же спасти́ ны, о Дево́, в моли́твах пред Сы́ном сладча́йшим стои́ши; о Ма́ти, лю́дем бла́гая Отра́до, Ты зри́ши бе́здну грехо́в на́ших лю́тых, мы же, в ро́ве истле́ния пове́рженнии, не сме́ем возвести́ очеса́ и воспе́ти: Аллилу́иа.

Икос 4

Ватопе́дская оби́тель сла́вится о́бразом чу́дным, ему́же есть дре́внее и́мя Отра́да. О нем преда́ние ста́рец блаже́нных храни́т благода́тную ди́вную по́весть, во сла́ву Богоро́дицы засту́пницы, да слы́шаще сию́, пое́м Пречи́стей:

Ра́дуйся, ми́ра блага́я Отра́до;

ра́дуйся, ве́рным стено́ и огра́до.

Ра́дуйся, чу́до чуде́с несказа́нное;

ра́дуйся, не́бо небе́с осия́нное.

Ра́дуйся, безмо́лвие лю́бящим кра́ю жела́ний;

ра́дуйся, безмяте́жия и́щущим раю́ жела́нный.

Ра́дуйся, я́ко Тобо́ю вся́ка душа́ ожива́ет;

ра́дуйся, я́ко Тобо́ю ме́ртвенный ум воскреса́ет.

Ра́дуйся, ве́ры горни́ло, и́мже неве́рие та́ет;

ра́дуйся, та́йная си́ло, я́же от тли возставля́ет.

Ра́дуйся, сла́во отше́льников тре́звенных;

ра́дуйся, кре́посте и́ноков бо́дренных.

Ра́дуйся, Бо́жия Ма́ти, све́тлая на́ша Отра́до.

Кондак 5

Ро́ждшая жи́знь всему́ ми́ру, я́вльшая ми́лости бе́здну, о Де́во Пречи́стая, о́ком ясне́йшим зри́ши на́ших печа́лей пучи́ну, слы́шиши гла́сы земны́х воздыха́ний, ско́ро на по́мощь к нам притека́еши, и учи́ши нас пе́ти Всебла́гому: Аллилу́иа.

Икос 5

А́лчуще зла́та и кро́ве, де́рзко разбо́йницы с мо́ря оби́тель святу́ю в нощи́ облага́ют, да зело́ зау́тра, врато́м отворе́нным, уби́вше мона́хов, расхи́тят святы́ни. Ты же, неусы́пная Засту́пнице, уде́л Свой защища́еши, да сла́вит Тя́:

Ра́дуйся, Ватопе́да отра́до;

ра́дуйся, вра́жиим ко́знем прегра́до.

Ра́дуйся, за́мыслов злы́х обличе́ние;

ра́дуйся, лю́тых враго́в отраже́ние.

Ра́дуйся, я́ко не усыпа́еши, Свой спаса́ющи удел;

ра́дуйся, я́ко отвраща́еши ту́чи смертоно́стных стрел.

Ра́дуйся, кре́посте чту́щих свя́тость ико́н Твои́х чу́дных;

ра́дуйся, сто́лпе пою́щих сла́ву чуде́с Твои́х мно́гих.

Ра́дуйся, кро́тких побе́до и пора́жение го́рдых;

ра́дуйся, пра́вых защи́то и посрамле́ние лжи́вых.

Ра́дуйся, Ты бо еси́ заблу́дших корми́ло;

ра́дуйся, Ты бо еси́ моли́твы кади́ло.

Ра́дуйся, Бо́жия Ма́ти, све́тлая на́ша Отра́до.

Кондак 6

Де́вственный взор Твой, бла́гая Ма́ти, пото́ки любве́ и щедро́т излива́ет: Ты нас храни́ши в исхо́дех и вхо́дех, спаса́еши ве́рных на су́ши и в мо́ри, а́ще то́кмо искра́ покая́ния возника́ет в се́рдце, е́же воспева́ти: Аллилу́иа.

Икос 6

О́бщия моли́твы в час у́тра и́ноцы соверши́вше, отъидо́ша в ке́ллии до Литурги́и, оба́че игу́мен оби́тели, в хра́ме един моля́ся, от ико́ны Твоея́ Отра́ды глас слы́ша: «Врат не отверза́йте днесь», тре́петом же объя́т сый, си́це ста́рец восклица́ше:

Ра́дуйся, Де́во, я́ко еси́ стра́жа святы́ни;

ра́дуйся, я́ко дом Твой спаса́еши ны́не.

Ра́дуйся, щи́те зау́тра и но́щию;

ра́дуйся, гро́зная си́лою мно́гою.

Ра́дуйся, я́ко милосе́рдием Твои́м щади́ши гре́шныя;

ра́дуйся, я́ко поража́еши востаю́щия на ны си́льныя.

Ра́дуйся, ве́нче наде́жды, знаменова́ние ми́ра;

ра́дуйся, же́зле побе́ды, обетова́ние сла́вы.

Ра́дуйся, чи́стый сапфи́ре, подо́бный виде́нию не́ба;

ра́дуйся, све́тлый престо́ле и колесни́це Царе́ва.

Ра́дуйся, я́ко глас Твой сла́док уши́ма;

ра́дуйся, я́ко о́браз Твой кра́сен очи́ма.

Ра́дуйся, Бо́жия Ма́ти, све́тлая на́ша Отра́до.

Кондак 7

Сын Челове́ческий бли́з есть, Су́д Его Стра́шный при две́рех — веща́ет нам глас богоно́сных Писа́ний, оба́че неради́м о кончи́не, лени́вии су́ще, и гро́зным глаго́лом не вне́млем, вси бо в суете́ пови́ннии во́лею, оба́че с ве́рою и любо́вию к Тебе́, Богома́ти, прибега́юще, вопие́м Бо́гу: Аллилу́иа.

Икос 7

Тре́петно ста́рец игу́мен к о́бразу взо́р свой возво́дит и ви́дит: се ли́цы пред ни́м ожива́ют, и Де́ве гро́зный Младе́нец руко́ю уста́ загражда́ет, глаго́ля: О Ма́ти, не провещава́й, да нака́жутся. Ста́рец же, ужаса́яся, пое́т Пречи́стей та́ко:

Ра́дуйся, Де́во, Влады́чице ми́ра;

ра́дуйся, не́ба Цари́це блага́я.

Ра́дуйся, я́ко Бо́жий гнев утоля́еши;

ра́дуйся, я́ко гро́зный суд отвраща́еши.

Ра́дуйся, Ма́ти всемилосе́рдная, избавле́ние от бед;

ра́дуйся, по́моще благода́тная, упова́ние душа́м.

Ра́дуйся, Ты бо печа́ли на́ша отго́ниши ско́ро;

ра́дуйся, Ты бо боле́зни гре́шных врачу́еши ди́вно.

Ра́дуйся, я́коже у́тро, све́т пролива́ющая ти́хий;

ра́дуйся, я́коже со́лнце, согрева́ющая хла́дныя ду́ши.

Ра́дуйся, чу́дная Отрокови́це;

ра́дуйся, ди́вная Богоневе́сто.

Ра́дуйся, Бо́жия Ма́ти, све́тлая на́ша Отра́до.

Кондак 8

Единомы́сленно, Де́во, взо́ры к Тебе́ обраща́ем, Ты бо в день воздая́ния нас не оставля́еши; простри́ у́бо нам ще́друю Свою́ ру́ку, грехми́ бо падо́хом до а́дския бе́здны, и кто́ нас изба́вит от гряду́щих мук, кто же нас утверди́т, во е́же пе́ти: Аллилу́иа.

Икос 8

Ма́ти отво́дит десни́цу сла́дкаго Сы́на и, ма́ло лице́ отклоня́ющи, ста́рцу глаго́лет: «На сте́ны бра́тия вся да выхо́дит и лю́тых разбо́йник да отража́ет!» Ста́рец же всю бра́тию глаша́ет и, ви́девше вси чу́до, воспева́ют:

Ра́дуйся, Ма́ти блага́я Христо́ва;

ра́дуйся, ти́хой пусты́ни Покро́ве.

Ра́дуйся, а́ще и не ве́мы, ки́ими Тя хвале́бными возвели́чим словесы́;

ра́дуйся, а́ще и не ве́мы, ки́я благода́тныя принесе́м Ти похвалы́.

Ра́дуйся, я́ко Свет преве́чный но́сиши неопали́мо;

ра́дуйся, я́ко Огнь ипоста́сный де́ржиши непости́жимо.

Ра́дуйся, Тя бо и́мамы необори́мую сте́ну;

ра́дуйся, Тя бо вси ве́мы ми́лости ве́лию бе́здну.

ра́дуйся, херуви́мов честне́йшая;

ра́дуйся, серафи́мов сла́внейшая.

Ра́дуйся, Бо́жия Ма́ти, све́тлая на́ша Отра́до.

Кондак 9

И́ов, страда́лец пред Бо́гом, му́дренно нас поуча́ет, глаго́ля: се, благоче́стие — му́дрость и бла́го всем уходя́щим от ми́ра и сла́достный по́двиг моли́твы подъе́мшим, и́мже помога́ет Богоро́дица и в моли́твах укрепля́ет, во е́же зва́ти: Аллилу́иа.

Икос 9

Ра́достно в хра́ме сем зря́ще спи́сок с ико́ны О́трады афо́нских оби́телей дар драгоце́нный, в моли́тве мы́сленно соедини́мся с хвале́бными ли́ки афо́нских отце́в, и́же от го́рных высо́т, превы́ше о́блак су́щих, Пречи́стую нас пе́ти призыва́ют:

Ра́дуйся, стра́н и наро́дов святы́не;

ра́дуйся, всех христиа́н благосты́не.

Ра́дуйся, О́гнь во утро́бу прии́мшая;

ра́дуйся, Сло́во по пло́ти яви́вшая.

Ра́дуйся, о́блаче све́та ле́гкий, в мир прине́сший Христа́;

ра́дуйся, ле́ствице, веду́щая от земли́ в небеса́.

Ра́дуйся, ста́мно ма́нны а́лчущим сла́дкия пи́щи;

ра́дуйся, ча́ше злата́я жа́ждущим но́ваго пи́ва.

Ра́дуйся, ти́хая А́нгелов сла́во;

ра́дуйся, лю́дем блага́я отра́до.

Ра́дуйся, вы́шнее не́бо, свет озаря́ющее ве́рным;

ра́дуйся, ту́чная ни́во, всем веселя́щая ду́ши.

Ра́дуйся, Бо́жия Ма́ти, све́тлая на́ша Отра́до.

Кондак 10

У́м к небеси́ устреми́вше, чу́вства возне́сше над тле́ном, о, коль вожделе́нно спасти́ся от ми́ра, иму́ще еди́но ду́ха стремле́ние к го́рним, еди́ну се́рдца наде́жду на Бо́га. Помога́й нам, Де́во Богоро́дице, и в путь веди́ нас пра́вый, е́же пе́ти: Аллилу́иа.

Икос 10

О́браз честны́й провожда́я в пу́ть от Афо́на на се́вер в покро́в благода́тный оби́тели но́выя, в зало́г небе́сныя по́мощи гра́ду, честны́й схимона́х святого́рец веща́ет: Се́ благослове́ние Влады́чицы! Моли́теся и ве́руйте, и по́йте:

Ра́дуйся, я́ко еси́ нам покро́в благода́тный;

ра́дуйся, я́ко еси́ нам зало́г упова́ний.

Ра́дуйся, су́щим в беда́х утеше́ние;

ра́дуйся, су́щим в греха́х умиле́ние.

Ра́дуйся, я́ко в час гне́ва Бо́жия укрепля́еши сердца́;

ра́дуйся, я́ко в день испыта́ния умудря́еши умы.

Ра́дуйся, я́ко злых наве́тов ту́чи от нас отвраща́еши;

ра́дуйся, я́ко в го́ды бе́дствий от поги́бели нас изыма́еши.

Ра́дуйся, я́ко во дни бурь безбо́жных Ты́ еси́ нам еди́ная при́стань;

ра́дуйся, я́ко мудрова́ний ло́жных на́с избавля́еши при́сно.

Ра́дуйся, в жи́зни нам ти́хая ра́досте;

ра́дуйся, в ве́чности ра́йская сла́во.

Ра́дуйся, Бо́жия Ма́ти, све́тлая на́ша Отра́до.

Кондак 11

Те́мныя си́лы в ми́ре си́лою и сла́вою владе́ют и све́та Христо́ва позна́ти не мо́гут, но ве́рным то́кмо моли́тва есть си́ла, им сле́зы — зало́г и побе́ды, и сла́вы. О Де́во Ма́ти, да́ждь нам ту́чу сле́зную и бо́дрственный нам ве́тр возве́й, пою́щим: Аллилу́иа.

Икос 11

Ра́дость на ли́цах сия́ет, гла́с вопие́т от Афо́на: Влады́чица ше́ствует к ва́м, исходи́те, срета́йте Де́ву небе́с со свеща́ми, срета́йте же па́че Сию́ со слеза́ми ра́дости, любве́ и умиле́ния и пра́зднуйте, и све́тлым гла́сом по́йте:

Ра́дуйся, киво́те освяще́нный;

ра́дуйся, престо́ле вознесе́нный,

Ра́дуйся, го́рних чино́в воспева́ние;

ра́дуйся, а́довых си́л трепета́ние.

Ра́дуйся, я́ко еси́ ве́селие челове́ческим сердца́м;

ра́дуйся, я́ко еси́ спасе́ние соврати́вшимся душа́м.

Ра́дуйся, я́ко глас Твой пресла́дкий ве́чную ра́дость веща́ет;

ра́дуйся, я́ко взор Твой прети́хий на́м тишину́ обеща́ет.

Ра́дуйся, я́ко Сы́на и Бо́га Ты умоля́еши о лю́дех;

ра́дуйся, я́ко ра́йских черто́гов Ты́ нам отверза́еши две́ри.

Ра́дуйся, хра́мино Ду́ха Свята́го;

ра́дуйся, ски́ние Бо́га жива́го.

Ра́дуйся, Бо́жия Ма́ти, све́тлая на́ша Отра́до.

Кондак 12

А́нгельски дне́сь воспева́ем пе́снь благода́тней Мари́и: Сия́ бо есть сла́дость, и ра́й, и блаже́нство, отра́да в час испыта́ний и гне́ва, наде́жда блаже́нств безконе́чных по сме́рти. Ра́дуйся у́бо, Засту́пнице усе́рдная, и ра́дость подава́й нам пе́ти Бо́гу: Аллилу́иа.

Икос 12

Да защити́т Богома́ти о́бразом ди́вным Отра́ды моли́твы опло́т — монасты́рь сей и хра́мы, да во ве́к не уга́снет лампа́да пред ли́ком спаси́тельным Де́вы, со́нми же мона́хов гла́сом ра́дости с миря́ны немо́лчно взыва́ют:

Ра́дуйся, хра́ме, светле́йший Сио́на;

ра́дуйся, све́те и сла́во Афо́на.

Ра́дуйся, и́ноков мы́сль непреста́нная;

ра́дуйся, де́вственных пе́снь неумо́лчная.

Ра́дуйся, я́ко ро́су утеше́ния посыла́еши во дни́;

ра́дуйся, я́ко сле́зы умиле́ния исторга́еши в нощи́.

Ра́дуйся, ди́вное и́мя, чудотворя́щее вта́йне;

ра́дуйся, Бо́жие ми́ро, в ми́р излия́нное ще́дро.

Ра́дуйся, я́ко Тобо́ю лие́тся нам свет безконе́чный;

ра́дуйся, я́ко с Тобо́ю ве́чно Младе́нец предве́чный.

Ра́дуйся, све́тлосте лю́дем, Тя чту́щим;

ра́дуйся, ра́досте на́м, Тя поющи́м.

Ра́дуйся, Бо́жия Ма́ти, све́тлая на́ша Отра́до.

Кондак 13

О, всепречи́стая Де́во, све́тлая на́ша Отра́до, сладча́йшаго Сы́на нетле́нная Ма́ти! От вся́ких бе́д и скорбе́й огражда́й нас и бу́дущия му́ки изми́ нас, Блага́я, ра́дости же ве́чныя сподо́би нас у го́рняго престо́ла воспева́ти: Аллилу́иа.

[Се́й конда́к глаго́лется три́жды.]

Икос 1

А́нгелов ли́цы дивя́тся, о́браз афо́нский Тво́й зря́ще, на не́мже, Пречи́стая Де́во и Ма́ти, от уст нетле́нных руко́ю десно́ю десни́цу Младе́нца отво́диши кро́тко. Что́ сие́ есть зна́мение о́браза? Мы же рече́м, пою́ще такова́я:

Ра́дуйся, Де́во, Всевы́шняго Ма́ти;

ра́дуйся, ди́вный раю́ благода́ти,

Ра́дуйся, на́ша Отра́до небе́сная;

ра́дуйся, лю́дем Наде́ждо изве́стная.

Ра́дуйся, о́браз бо Твой спасе́ние возвеща́ет всей земли́;

ра́дуйся, взор бо Твой уте́шение пребыва́ющим во тли.

Ра́дуйся, све́те небе́сный, мглу на́ших дний озаря́яй;

ра́дуйся, цве́те нетле́нный, тлен на́ших дел оживля́яй.

Ра́дуйся, Ты бо моли́твы к Сы́ну за мир твори́ши;

ра́дуйся, я́ко в те́плой моли́тве, а́ки свети́льник, гори́ши.

Ра́дуйся, ра́достно Ти восклица́ем;

ра́дуйся, пе́сненно Тя воспева́ем.

Ра́дуйся, Бо́жия Ма́ти, све́тлая на́ша Отра́до.

Кондак 1

Возбра́нных сил небе́сных ра́дость и хвале́ние, всего́ же ро́да челове́ча исправле́ние, ублажа́ем Тя, Пречи́стая Де́во Ма́ти, Ты же, на́ше упова́ние еди́ное, низпосли́ душа́м отра́ду благода́тную, да пое́м Тебе́, о́браз ди́вный Твой чту́ще:

Ра́дуйся, Бо́жия Ма́ти, све́тлая на́ша Отра́до.

Молитва

О, Пресвята́я Влады́чице Госпоже́ Де́во Богоро́дице, Неве́сто нетле́нная, Ма́ти благослове́нная, све́тлая на́ша Отра́до, вожделе́нное Утеше́ние!

Приими́ ны́не дерзнове́нное и неотсту́пное моле́ние сие́, от гре́шных усте́н и недосто́йных душ Тебе́ приноси́мое пред святы́м и светоза́рным Твои́м о́бразом.

Пощади́ ны, ми́лостивая и милосе́рдная и щедролюби́вая на́ша Засту́пнице, и не преда́ждь нас суду́ и гне́ву Сы́на Твоего́ и Спа́са на́шего, Го́спода Иису́са Христа́, Ему́же без числа́ согреши́хом и пови́нни есмы́ осужде́нию и пра́ведному Его́ изрече́нию, е́же наказа́тися по грехо́м на́шим, превозше́дшим вся́кую ме́ру Его́ долготерпе́ния.

Прини́кни с высо́т Твои́х го́рних, иде́же А́нгели тре́петно сла́вят Тя, и воззри́ на на́шу до́льнюю нищету́: ка́ко обнища́хом ве́рою, ка́ко бе́дствуем наде́ждею и оскуде́хом любо́вию, ка́ко умо́м омрачи́хомся, се́рдцем же и чу́вствы ожесточи́хомся. Уврачу́й нас моли́твою Твое́ю, Де́во целе́бнице. Возста́ви ны, па́дшия ду́хом, укрепи́ разсла́бленныя умо́м, возбуди́ уны́лыя и отча́янныя, исцели́ боля́щия душе́ю и те́лом.

При́зри на гра́д сей [или́: оби́тель сию́, или́: ве́сь сию́] и пощади́ его́, Бо́жий отводя́щи Твои́м предста́тельством гнев. Укроти́ го́рдостная стремле́ния люде́й и богоотсту́пная их шата́ния. Возве́й ти́хое дыха́ние благода́ти Твоея́ на смяте́нныя ду́ши и сокруше́нная сердца́.

Сохрани́ супру́жеству чистоту́, матери́нству че́сть, де́вству благослове́ние. Низпосли́ под кров жили́щ на́ших освяща́ющий луч боже́ственнаго све́та, да облича́тся дея́ния неподо́бная и устыдя́тся ре́чи ху́льныя, и укротя́тся мы́сли зло́бныя.

О миролю́бивая, бла́гостнейшая и тиша́йшая Де́во Ма́ти, о паде́ниих на́ших скорбя́щая, о спасе́нии на́шем воздыха́ющая! Утоли́ церко́вныя бу́ри, умири́ раско́лы, собери́ расточе́нныя, обрати́ отпа́дшия и всех приведи́ в едине́ние Святы́я Це́ркве, да единоду́шно и единому́дренно сла́вится на земли́, я́коже и на небеси́, еди́ное святе́йшее и спаси́тельное и́мя Единосу́щныя Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.