Блаженная Ксения Петербургская, Христа ради юродивая

Блж. Ксения Петербургская (ок. 1720–1803), молодая вдова, избрала подвиг юродства Христа ради, чтобы вымолить душу внезапно умершего мужа. Раздав имущество, ходила в его одежде, утверждая, что "умерла Ксения". Жила в нищете, молясь ночами в поле, отвергая милостыню (кроме копеек - "царя на коне"). Прославилась прозорливостью, чудесами (предсказания, исцеления) и тайной помощью в строительстве Смоленской церкви (носила кирпичи ночью). 45 лет несла подвиг. Погребена на Смоленском кладбище, где её часовня – место почитания и исцелений. Канонизирована в 1988 г.

* * *

Святая блаженная Ксения родилась между 1719 и 1731 годами. О родителях святой, ее детских и отроческих годах ничего не известно. Известно только, что отца блаженной звали Григорием.

По достижении совершеннолетия Ксения Григорьевна сочеталась браком с придворным певчим, полковником Андреем Феодоровичем Петровым, и жила с супругом в Санкт-Петербурге. Но недолго судил Господь молодой чете идти вместе по жизненному пути: Андрей Феодорович внезапно скончался, оставив супругу вдовою на двадцать шестом году ее жизни.

Это трагическое событие изменило жизнь молодой женщины. Она была глубоко потрясена тем, что ее муж скончался без должного христианского приготовления и не успел принести покаяние. Ксения решила, что подвигом жизни она вымолит у Бога прощение прегрешений раба Божиего Андрея.

В день похорон мужа Ксения Григорьевна надела его одежду и всем, обращавшимся к ней с соболезнованиями, говорила, что умер не Андрей Федорович, а умерла его супруга Ксения Григорьевна. С этого момента она действительно умерла для мира, приняв на себя тяжелейший подвиг – подвиг юродства Христа ради.

Она сразу как бы забыла все земное, человеческое, все радости и утехи, и вследствие этого многим казалась как бы сумасшедшей, лишившейся рассудка. Так на нее стали смотреть даже ее родные и знакомые, и особенно после того, как Ксения раздала решительно все свое имущество бедным, а дом подарила своей хорошей знакомой, Параскеве Антоновой. Родные Ксении, полагавшие, что молодая вдова лишилась рассудка из-за свалившегося на ее плечи горя, подали даже и прошение начальству умершего Андрея Феодоровича, прося не позволять Ксении в безумстве раздавать свое имущество. Начальство умершего Петрова вызвало Ксению к себе, но после разговора с ней вполне убедилось, что Ксения совершенно здорова, а потому имеет право распорядиться своим имуществом, как ей угодно.

Освободившись от всех земных попечений, святая Ксения шла тяжелым путем юродства Христа ради. Облачившись в костюм мужа, то есть надев на себя его белье, кафтан, камзол, она все так же уверяла людей, что Андрей Феодорович жив, а умерла его супруга Ксения. Она никогда не откликалась, если ее называли Ксенией Григорьевной, но всегда охотно отзывалась, если ее называли Андреем Феодоровичем.

Какого-либо определенного местожительства Ксения не имела. Большей частью она целый день бродила по Петербургской стороне и по преимуществу в районе прихода церкви святого апостола Матфия (ныне – улица Большая Пушкарская, дом 35), где в то время жили в маленьких деревянных домиках небогатые люди. Странный костюм бедной, едва обутой женщины, не имевшей места, где главу приклонить, ее иносказательные разговоры, ее полная кротость, незлобие давали нередко злым людям и особенно уличным мальчишкам повод и смелость глумиться над блаженной. Блаженная же все эти поношения сносила безропотно. Лишь однажды, когда Ксения уже стала почитаться за угодницу Божию, жители Петербургской стороны видели ее в сильном гневе. Издевательства мальчишек в тот раз превысили всякое человеческое терпение, они ругались, бросали в нее камнями и грязью. С тех пор местные жители положили предел ее уличному преследованию.

Мало-помалу к странностям блаженной привыкли. Когда костюм Андрея Федоровича истлел и распался, святая облачилась в лохмотья. Ей стали предлагать теплую одежду и деньги, но Ксения ни за что не соглашалась променять лохмотья и всю свою жизнь проходила в красной кофточке и зеленой юбке или наоборот – зеленой кофточке и красной юбке. Вероятно, в память о цветах форменной одежды мужа. Милостыню она также не принимала, а брала лишь от добрых людей «царя на коне» (копейки с изображением всадника^[1]) и тотчас же отдавала этого «царя на коне» таким же беднякам, как и сама она.

Бродя целыми днями по улицам Петербурга, Ксения изредка заходила к своим знакомым, обедала у них, беседовала, а затем снова отправлялась странствовать. Где она проводила ночи, долгое время оставалось неизвестным. Этим заинтересовались не только жители Петербургской стороны, но и местная полиция, для которой местопребывание блаженной по ночам казалось даже подозрительным. Решено было разузнать, где проводит ночи эта странная женщина и чем она занимается. Оказалось, что Ксения, несмотря ни на какое время года и погоду, уходила на ночь в поле и здесь в коленопреклоненной молитве простаивала до самого рассвета, попеременно делая земные поклоны на все четыре стороны.

В 1786-1790 годах под руководством священника Георгия Петрова и по проекту архитектора Алексея Иванова на Смоленском кладбище в Санкт-Петербурге была построена каменная Смоленская церковь. Рабочие, трудившиеся на строительстве храма, замечали странные вещи. За время их отсутствия, ночами, кто-то носил кирпичи на леса строящейся церкви. Наконец они решили разузнать, кто мог быть этот даровой неутомимый работник, каждую ночь таскающий для них кирпич. Оказалось, что это была раба Божия блаженная Ксения.

За великие ее подвиги и терпение Господь еще при жизни прославил свою избранницу. Раба Божия Ксения сподобилась дара прозрения сердец и будущего. Она предрекла кончину императрицы Елизаветы Петровны (1762) и молодого императора Иоанна Антоновича (1764), помогла одной девице избежать брака с беглым каторжником, выдававшим себя за убитого им полковника.

Уча людей правдивости, блаженная Ксения нередко открывала и тайны тех лиц, кого она навещала. Купчихе Крапивниной предсказала кончину прикровенно, говоря: «Зелена крапива, но скоро увянет», а одной бедной девице – замужество.

Однажды она сказала своей старой знакомой Параскеве Антоновой, той самой, которой подарила дом, чтобы та немедленно шла на Смоленское кладбище: «Вот ты тут сидишь да чулки штопаешь, а не знаешь, что тебе Бог сына послал!» Параскева в недоумении пошла в сторону кладбища и вдруг увидела толпу народа. Оказалось, что экипаж задавил насмерть беременную женщину, которая успела перед кончиной разрешиться от бремени мальчиком. Параскева взяла его себе, и так как не могла нигде отыскать отца младенца, усыновила его. Воспитанный ею приемный сын почитал ее как мать и в старости берег покой Параскевы, которая благодарила блаженную за великую радость.

Жители Петербургской стороны замечали, что если блаженная возьмет на руки больное дитя или благословит его, оно непременно выздоровеет. Если возьмет какую-нибудь мелочь из лавки купца – торговля будет успешной. Если она зайдет в дом, то в доме будут царить мир и согласие.

Блаженная Ксения несла подвиг добровольного безумия 45 лет и скончалась около 1803 года. Тело ее было погребено на Смоленском кладбище. И много знамений милости Божией начало совершаться у ее гроба. По совершении панихиды над ее могилкой страждущие получали исцеления, в семьях водворялся нарушенный мир, нуждающиеся получали им необходимое.

Люди, почитавшие блаженную Ксению, разбирали землю с ее могильного холма, так что холм насыпали несколько раз. Позже на месте холма была положена каменная плита, которую также разбирали по камушкам. В третьей четверти XIX века на этом месте была построена маленькая часовня, а в 1902 году по проекту архитектора Александра Всеславина была возведена большая каменная часовня. В советские годы часовню закрыли, но никакими усилиями безбожников невозможно было заглушить в народе память о блаженной и веру в ее молитвенное предстательство пред престолом Божиим.

Другое памятное место, связанное со святой Ксенией, находится на Петроградской стороне – это улица Лахтинская, где Ксения жила с супругом. Дом их находился либо в начале улицы, впоследствии названной по имени ее мужа – «Андрея Петрова» (с 1877 года – Лахтинская), то есть около Большого проспекта, либо между домами 15 и 19 по Лахтинской улице (в 2019 году здесь был возведен храм святой Ксении Петербургской).

После многолетнего народного почитания блаженная Ксения Петербургская, Христа ради юродивая, была причислена к лику святых 6 июня 1988 года на Поместном Соборе Русской Православной Церкви. А еще ранее – 24 сентября 1978 – Ксения Петербургская была канонизирована Русской Православной Церковью Заграницей. Храмы во имя святой Ксении находятся во многих странах мира, а изображение ее можно увидеть даже на новозеландских монетах.

Примечание

^[1] Многие думают, что всадник с копьем, изображенный на аверсе старинных русских монет, это Георгий Победоносец, поражающий змея. Но это не так. Традиция чеканить вооруженного всадника укрепилась на Руси еще в период правления Ивана III, который известен тем, что смог объединить разрозненные русские княжества в единое государство. В этот период серебряная монета становится общерусской, обретает легенду «Государь всея Руси», указывая на владычество московского князя над остальными. Именно образ князя и воплощает воин-властитель с монетки. Благодаря копью в руке воина в русском языке и появилось слово «копейка».

Тропарь, глас 7

Нищету́ Христо́ву возлюби́вши,
безсме́ртныя трапе́зы ны́не наслажда́ешися,
безу́мием мни́мым безу́мие ми́ра обличи́вши,
смире́нием кре́стным си́лу Бо́жию восприя́ла еси́.
Сего́ ра́ди дар чудоде́йственныя по́мощи стяжа́вшая,
Ксе́ние блаже́нная, моли́ Христа́ Бо́га

изба́витися нам от вся́каго зла покая́нием.

Ин тропарь, глас 8 Тебе́, о, стра́ннице, яви́ на́м Христо́с Госпо́дь моли́твенницу те́плую за ро́д на́ш, в житии́ бо твое́м страда́ния и ско́рби восприя́вши, Бо́гу же и челове́ком любо́вию послужи́вши, дерзнове́ние ве́лие стяжа́ла еси́. Те́мже к тебе́ в напа́стех и ско́рбех усе́рдно прибега́ем, из глубины́ серде́ц на́ших взыва́юще: упова́ния на́шего не посрами́, Ксе́ние блаже́нная. Ин тропарь, глас 4 Суеты́ земна́го ми́ра отве́ргшися, кре́ст жития́ бездо́мнаго во стра́нничестве прия́ла еси́, скорбе́й, лише́ний, людска́го осмея́ния не убоя́лася еси́, любо́вь же Христо́ву позна́ла еси́, е́юже ны́не на Небеси́ услажда́ешися, Ксе́ние блаже́нная Богому́драя, моли́ся о спасе́нии ду́ш на́ших.

Кондак, глас 3

Днесь све́тло лику́ет град свята́го Петра́,
я́ко мно́жество скорбя́щих обрета́ют утеше́ние,
на твоя́ моли́твы наде́ющеся,
Ксе́ние всеблаже́нная,

ты бо еси́ гра́ду сему́ похвало́ и утвержде́ние.

Ин кондак, глас 3 На земли́ я́ко стра́нна пребы́вши,/ о Небе́снем же оте́чествии воздыха́ющи,/ юро́да от бу́йих и неве́рных,/ прему́дра же и свя́та от ве́рных познава́ешися,/ и от Бо́га сла́вою и че́стию венча́ешися,/ Ксе́ние мужеу́мная и богоу́мная,/ сего́ ра́ди зове́м ти:// ра́дуйся, я́ко по стра́нствии земне́м в дому́ О́тчем водворя́ешися.

Величание

Велича́ем тя,
свята́я блаже́нная ма́ти Ксе́ние,
и чтим святу́ю па́мять твою́,
ты бо мо́лиши о нас

Христа́ Бо́га на́шего.

Молитва

О свята́я блаже́нная ма́ти Ксе́ние! Под кро́вом Всевы́шняго жи́вшая, ведо́мая и укрепля́емая Богома́терию, глад и жа́жду, хлад и зной, поноше́ния и гоне́ния претерпе́вшая, дар прозо́рливости и чудотворе́ния от Бо́га получи́вшая и под се́нью Всемогу́щего упоко́ившаяся, днесь же, от сла́внаго тысящеле́тия Креще́ния Руси́, Це́рковь Ру́сская, прославля́ет тя, я́ко благоуха́нный цвет. Предстоя́ще на ме́сте твоего́ погребе́ния, пред о́бразом твои́м святы́м, я́ко живе́й ти, су́щей с на́ми, мо́лимся ти: приими́ проше́ния на́ша и принеси́ я́ ко Престо́лу милосе́рднаго Отца́ Небе́снаго, я́ко дерзнове́ние к Нему́ иму́щая; испроси́ притека́ющим к тебе́ ве́чное спасе́ние, на блага́я дела́ и начина́ния на́ша ще́дрое благослове́ние, от вся́ких бед и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о нас, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го Креще́ния озари́ти и печа́тию да́ра Ду́ха Свята́го запечатле́ти, ю́ныя в ве́ре, че́стности, богобоя́зненности и целому́дрии воспита́ти и успе́хи в уче́нии им стяжа́ти. Боля́щия и неду́гующия исцели́, супру́гом любо́вь и согла́сие ниспосли́, мона́шествующим по́двигом до́брым подвиза́тися помози́ и от поноше́ния огради́, па́стыри в кре́пости ду́ха утверди́, Це́рковь и страну́ на́шу сохрани́, и всех боголюби́вых чад в предсме́ртный час причаще́ния Святы́х Христо́вых Та́ин сподо́би, ты бо еси́ на́ше ско́рое услы́шание и избавле́ние, тебе́ благодаре́ние воссыла́ем и с тобо́ю сла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

2-я Молитва

О, пресла́вная свята́я блаже́нная ма́ти на́ша Ксе́ние, те́плая о нас пред Бо́гом моли́твеннице! Я́коже пре́жде к надгро́бию твоему́ припа́давшии, си́це ны́не и мы по прославле́нии твое́м к моще́м твои́м прибега́юще, про́сим: помоли́ся Го́споду, да освяти́т на́ши ду́ши и телеса́, да просвети́т ум, очи́стит со́весть от вся́кия скве́рны, нечи́стых помысло́в, лука́вых и ху́льных умышле́ний и от вся́каго превозноше́ния, го́рдости же и киче́ния, высокоу́мия же и де́рзости, от вся́каго фарисе́йскаго лицеме́рия, и от вся́каго сту́днаго и лука́ваго обы́чая на́шего; да да́рует нам и́скреннее покая́ние, сокруше́ние серде́ц на́ших, смиренному́дрие, кро́тость же и ти́хость, благогове́ние, ра́зум же духо́вный со вся́ким благоразу́мием и благодаре́нием. Утаи́вшая себе́ от му́дрых ве́ка сего́, но Бо́гу зна́емая, испроси́ же стране́ на́шей Росси́йстей от бед лю́тых избавле́ние, всего́ на́шего жития́ обновле́ние и исправле́ние, соблюди́ нас во вся́ком благочести́вом правосла́вном испове́дании ве́ры христиа́нския, я́ко да ублажа́юще тя сподо́бимся во вся дни воспева́ти, благодари́ти и сла́вити Отца́ и Сы́на и Свята́го Ду́ха, Тро́ицу Единосу́щную, Животворя́щую и Неразде́льную во ве́ки веко́в. Ами́нь.

3-я Молитва

О, свята́я уго́дница Бо́жия блаже́нная Ксе́ния! При́зри ми́лостиво твои́м о́ком на нас, раб Бо́жиих (имена), честно́й твое́й ико́не уми́льно моля́щихся и прося́щих у тебе́ по́мощи и заступле́ния. Простри́ ко Го́споду Бо́гу на́шему те́плыя твоя́ моли́твы и испроси́ душа́м на́шим оставле́ние прегреше́ний. Се бо мы се́рдцем сокруше́нным, и ду́хом смире́нным тебе́ хода́таицу ми́лостивую ко Влады́це и моли́твенницу за ны, гре́шныя, призыва́ем, я́ко ты прия́ла еси́ от Него́ благода́ть моли́тися за ны и от бед избавля́ти. Тебе́ у́бо про́сим, не пре́зри нас недосто́йных, моля́щихся тебе́ и твое́й по́мощи тре́бующих, и исходата́йствуй всем вся ко спасе́нию поле́зная, я́ко да твои́ми ко Го́споду Бо́гу моли́твами получи́вши благода́ть и ми́лость просла́вим всех благи́х Исто́чника и Даропода́теля и Бо́га Еди́наго, в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Канон святой блаженной Ксении Петербургской

Минея, 24 Января.

Глас 8

Песнь 1

Ирмос: Во́ду проше́д, я́ко су́шу,
и еги́петскаго зла избежа́в,
изра́ильтянин вопия́ше:
Изба́вителю и Бо́гу на́шему пои́м.

Припев: Свята́я блаже́нная ма́ти Ксе́ние, моли́ Бо́га о на́с.

Водо́ю Креще́ния омы́вшися,
перворо́днаго греха́ изба́вилася еси́, ма́ти Ксе́ние,
и на́ша сердца́ слеза́ми покая́ния очи́сти,
просвеще́ние подаю́щи почита́ющим святу́ю па́мять твою́.

Припев: Свята́я блаже́нная ма́ти Ксе́ние, моли́ Бо́га о на́с.

В воде́ Креще́ния зми́я лука́ва потопи́вшая,
житие́м твои́м страда́льческим вра́жию си́лу умертви́ла еси́, блаже́нная,
от нея́же и нам изба́витися Спа́са умоли́.

Сла́ва Отцу́ и Сы́ну и Свято́му Ду́ху.

Во́ду живу́ю неистощи́мых даро́в
подаде́ тебе́ Христо́с, блаже́нная ма́ти,
Его́же нищету́ во́льно возлюби́ла еси́.

И ны́не и при́сно и во ве́ки веко́в. Ами́нь.

Богородичен: Во́ды покая́ния пода́ждь ми, Пречи́стая,
и, очи́стивши мя от нечистоты́ грехо́вныя,
чи́ста предста́ви, Богороди́тельнице, Сы́ну Твоему́ и Бо́гу.

Песнь 3

Ирмос: Небе́снаго кру́га
Верхотво́рче, Го́споди,
и Це́ркве Зижди́телю,
Ты мене́ утверди́ в любви́ Твое́й,
жела́ний кра́ю, ве́рных утвержде́ние,
Еди́не Человеколю́бче.

Припев: Свята́я блаже́нная ма́ти Ксе́ние, моли́ Бо́га о на́с.

Небе́снаго кру́га Зижди́телю все житие́ твое́ отда́вши,
возлюби́ла еси́ Того́ до конца́,
сподо́би и нас моли́твами твои́ми, блаже́нная,
люби́ти Го́спода до конца́ дний на́ших.

Припев: Свята́я блаже́нная ма́ти Ксе́ние, моли́ Бо́га о на́с.

Небе́сныя жи́зни жела́ющи,
в житии́ твое́м вся земна́я пренебрегла́ еси́,
сподо́би и нас, ма́ти Ксе́ние,
моли́твами твои́ми Небе́сныя жи́зни дости́гнути.

Сла́ва Отцу́ и Сы́ну и Свято́му Ду́ху.

Небе́снаго черто́га жела́ющи,
стра́нническое житие́ прешла́ еси́
и ны́не со все́ми святы́ми в Небе́сных черто́зех лику́еши.

И ны́не и при́сно и во ве́ки веко́в. Ами́нь.

Богородичен: Небе́снаго Творца́, Богоро́дице всепе́тая, ро́ждши,
Небе́с простра́ннейшая яви́лася еси́.
Нас от простра́ннаго пути́ поги́бельна укло́ньши,
на Небе́сный путь наста́ви, молю́ся.

Седален, глас 5

Я́ко стра́нница во гра́де свята́го Петра́ яви́лася еси́,
благоволе́нием Бо́жиим укрепля́ема, ма́ти прему́драя,
Боже́ственных даро́в и чуде́с удосто́ившаяся.
Те́мже, иму́щи дерзнове́ние ко Христу́ Бо́гу,
мир испроси́ душа́м на́шим и ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ма́ти Пречи́стая, гра́де Бо́жий,
изба́ви лю́ди Твоя́ от бед
и по́мощь пода́ждь проти́витися враго́м го́рдым, да вопие́м Ти:
ра́дуйся, Благослове́нная.

Песнь 4

Ирмос: Услы́шах, Го́споди,
смотре́ния Твоего́ та́инство,
разуме́х дела́ Твоя́
и просла́вих Твое́ Божество́.

Припев: Свята́я блаже́нная ма́ти Ксе́ние, моли́ Бо́га о на́с.

Услы́шавши, Ксе́ние, я́ко Небеса́ пове́дают сла́ву Бо́жию,
отве́ргла еси́ суету́ мирску́ю
и в по́двизе поста́ и лише́ния на земли́ Бо́га сла́вити возжеле́ла еси́,
Его́же сла́вити и нас сподо́би.

Припев: Свята́я блаже́нная ма́ти Ксе́ние, моли́ Бо́га о на́с.

Услы́шавши и уразуме́вши дела́ Госпо́дня,
просла́вила еси́ Его́ Божество́,
наде́ждею и любо́вию к Нему́ украси́вши ду́шу твою́,
по́двиги просвети́лася еси́, блаже́нная, Бо́жиею си́лою укрепля́ема.

Сла́ва Отцу́ и Сы́ну и Свято́му Ду́ху.

Услы́шавши преще́ния вра́жеская и вся́кия ко́зни от них терпя́щи,
непоколеби́ма пребыла́ еси́,
и нас непоколеби́мых в доброде́телех утверди́.

И ны́не и при́сно и во ве́ки веко́в. Ами́нь.

Богородичен: Услы́ши, Пречи́стая Влады́чице, моле́ния на́ша,
и изба́ви нас от наси́лия вра́жия,
и глас Христо́в, призыва́ющий благослове́нныя в Ца́рство, услы́шати сподо́би.

Песнь 5

Ирмос: Просвети́ нас повеле́нии Твои́ми, Го́споди,
и мы́шцею Твое́ю высо́кою
Твой мир пода́ждь нам,
Человеколю́бче.

Припев: Свята́я блаже́нная ма́ти Ксе́ние, моли́ Бо́га о на́с.

Просвеща́хуся ве́рнии лю́дие,
зря́ще незло́бие и кро́тость твою́, ма́ти Ксе́ние,
помози́ и нам, блаже́нная, подража́ти твоему́ незло́бию.

Припев: Свята́я блаже́нная ма́ти Ксе́ние, моли́ Бо́га о на́с.

Просвети́вши стезю́ жи́зни твоея́ све́том богоразу́мия,
Христа́ Го́спода вседу́шне возлюби́ла еси́,
сподо́би и ны, блаже́нная Ксе́ние, в сем бы́ти тебе́ подража́тели.

Сла́ва Отцу́ и Сы́ну и Свято́му Ду́ху.

Просвети́ нас, о ма́ти Ксе́ние, наде́ждею и любо́вию ко Го́споду,
ны́не бо зря́щи Христа́ лице́м к лицу́, све́та неизрече́ннаго наслажда́ешися,
Тому́ за ны моли́ся.

И ны́не и при́сно и во ве́ки веко́в. Ами́нь.

Богородичен: Просвети́ла еси́ омраче́нное естество́, Богоро́дице,
Свет и́стинный ро́ждши,
те́мже и нас све́том просвети́вши, от мра́чных враг свободи́.

Песнь 6

Ирмос: Моли́тву пролию́ ко Го́споду
и Тому́ возвещу́ печа́ли моя́,
я́ко зол душа́ моя́ испо́лнися,
и живо́т мой а́ду прибли́жися,
и молю́ся, я́ко Ио́на:
от тли, Бо́же, возведи́ мя.

Припев: Свята́я блаже́нная ма́ти Ксе́ние, моли́ Бо́га о на́с.

Моли́тву, я́ко исто́чник приснотеку́щий, ны́не излива́еши,
неду́жныя исцеля́ющи, кре́пость и си́лу стра́ждущим подаю́щи,
сподо́би и нас моли́твами твои́ми изба́витися от вся́ких лю́тых.

Припев: Свята́я блаже́нная ма́ти Ксе́ние, моли́ Бо́га о на́с.

Моли́твою Небе́сною и по кончи́не твое́й от неду́г свобожда́еши,
цели́тельнице безме́здная, досто́йно хва́лима еси́ на земли́,
моли́ся о душа́х на́ших.

Сла́ва Отцу́ и Сы́ну и Свято́му Ду́ху.

Моли́тву на́шу приими́, ма́ти Ксе́ние,
да в честны́й храм твой прии́дем со тща́нием
и неду́гов душе́вных и страсте́й теле́сных исцеле́ние ско́ро прии́мем.

И ны́не и при́сно и во ве́ки веко́в. Ами́нь.

Богородичен: Моли́твою Твое́ю всемо́щною, Пречи́стая,
изба́ви нас от враг ви́димых и неви́димых, от грехо́в и вся́кия му́ки,
я́ко ро́ждшая Человеколю́бца Бо́га.

Кондак, глас 3

Днесь све́тло лику́ет град свята́го Петра́,
я́ко мно́жество скорбя́щих обрета́ют утеше́ние,
на твоя́ моли́твы наде́ющеся,
Ксе́ние всеблаже́нная,
ты бо еси́ гра́ду сему́ похвала́ и утвержде́ние.

Икос

Ка́ко возмогу́, гре́шный аз, скве́рный душе́ю и те́лом,
пове́дати е́же во пло́ти равноа́нгельное житие́ твое́ и пресла́вная чудеса́,
а́ще у́бо мно́зи прему́дрии не дерза́ют испове́дати
мно́гаго твоего́ терпе́ния и смире́ния и те́плыя ко Христу́ любве́?
Но обаче́ наде́яся на твое́ заступле́ние, о блаже́нная, вопию́ ти:
ра́дуйся, я́ко везде́ призыва́ющих тя ско́ро предваря́еши,
ра́дуйся, я́ко мно́жество скорбя́щих обрета́ют тобо́ю утеше́ние,
ра́дуйся, свята́я блаже́нная ма́ти Ксе́ние,
гра́ду сему́ похвало́ и утвержде́ние.

Песнь 7

Ирмос: О́троцы евре́йстии в пещи́
попра́ша пла́мень дерзнове́нно
и на ро́су огнь преложи́ша, вопию́ще:
благослове́н еси́, Го́споди Бо́же, во ве́ки.

Припев: Свята́я блаже́нная ма́ти Ксе́ние, моли́ Бо́га о на́с.

О́троки евре́йския А́нгел от огня́ неопа́льны сохрани́
и тебе́, Ксе́ние, в стра́нничестем житии́ укрепи́, пою́щу:
благослове́н еси́, Го́споди Бо́же, во ве́ки.

Припев: Свята́я блаже́нная ма́ти Ксе́ние, моли́ Бо́га о на́с.

Де́тем ева́нгельски подража́ла еси́ в житии́ твое́м,
стезю́ те́сную проше́дши в незло́бии,
те́мже и нас на по́двиг доброде́тели сея́ укрепи́, пою́щих:
благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху.

Отроко́м в пещи́ халде́йстей подража́ющи, Ксе́ние,
воспева́ла еси́ Христа́, да́вшаго ти кре́пость,
те́мже и мы, чту́ще тя, блаже́нная, со дерзнове́нием зове́м:
благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Отрокови́це Де́во, простри́ на нас ми́лость Сы́на Твоего́,
да кроме́шныя тьмы изба́вимся мольба́ми Твои́ми, пою́ще:
благослове́н еси́, Го́споди Бо́же, во ве́ки.

Песнь 8

Ирмос: Победи́тели мучи́теля и пла́мене
благода́тию Твое́ю бы́вше,
за́поведем Твои́м зело́ прилежа́ще,
о́троцы вопия́ху:
благослови́те, вся дела́ Госпо́дня, Го́спода.

Припев: Свята́я блаже́нная ма́ти Ксе́ние, моли́ Бо́га о на́с.

Победи́тельница страсте́й яви́лася еси́, Ксе́ние,
лю́тая искуше́ния вра́жия побежда́ющи и непреста́нно пою́щи:
благослови́те, вся дела́ Госпо́дня, Го́спода.

Припев: Свята́я блаже́нная ма́ти Ксе́ние, моли́ Бо́га о на́с.

Побежда́ющи вся́кия стра́сти грехо́вныя,
ты, блаже́нная, я́ко све́тла звезда́ яви́лася еси́,
приво́диши бо жены́, па́дшия во грехи́, во е́же целому́дренно жи́ти и в покая́нии воспева́ти:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Победи́тельница греха́ яви́лася еси́, блаже́нная ма́ти, благода́ть Вы́шняго иму́щи.
Те́мже Небе́сная дости́гла еси́, иде́же ны́не со А́нгелы пое́ши:
благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Побе́де во бране́х духо́вных ве́рным посо́бствуеши, Пресвята́я Де́во,
те́мже и лю́дем гра́да на́шего по́мощь Твою́ низпосли́, да вы́ну пое́м:
благослови́те, вся дела́ Госпо́дня, Го́спода.

Песнь 9

Ирмос: Вои́стину Богоро́дицу
Тя испове́дуем,
спасе́ннии Тобо́ю, Де́во Чи́стая,
с безпло́тными ли́ки Тя велича́юще.

Припев: Свята́я блаже́нная ма́ти Ксе́ние, моли́ Бо́га о на́с.

Вои́стину ра́зум Христо́в име́ла еси́, Ксе́ние,
смире́ние, кро́тость, ве́ру несумне́нну, наде́жду и любо́вь, я́же к Бо́гу,
и нас сего́ сподо́би, да с тобо́ю Христа́ при́сно велича́ем.

Припев: Свята́я блаже́нная ма́ти Ксе́ние, моли́ Бо́га о на́с.

Вои́стину на тебе́, Ксе́ние блаже́нная, испо́лнися Христо́во прорече́ние:
претерпе́вый до конца́, той спасе́н бу́дет,
ны́не бо со все́ми спасе́нными Христа́ при́сно велича́еши.

Сла́ва Отцу́ и Сы́ну и Свято́му Ду́ху.

Вои́стину никто́же, притека́яй к тебе́, блаже́нная ма́ти,
тощь благода́ти Бо́жия отхо́дит,
ея́же и нас испо́лни, да тя велича́ем.

И ны́не и при́сно и во ве́ки веко́в. Ами́нь.

Богородичен: Вои́стину Богоро́дицу Тя, Де́во и Ма́ти Сло́ва,
Хода́таицу су́щую нам, Со́лнце пра́вды возсия́вшую,
ве́рнии, единому́дренно пе́сньми велича́ем.

Светилен

Я́коже со́лнце светоно́сно, возсия́ ны́не, блаже́нная ма́ти, па́мять твоя́,
вся ве́рныя веселя́щи, и́же моли́твенно взыва́ют ти:
моли́ся приле́жно спасти́ся нам.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Держа́вным Твои́м покро́вом, Пречи́стая,
нас, рабо́в Твои́х, от наве́тов вра́жиих сохраня́й всегда́ невреди́мых,
Тя бо еди́ну стяжа́хом наде́жду и утвержде́ние.

Акафист святой блаженной Ксении Петербургской

Аудио:

23:58

Кондак 1

Избра́нная уго́днице Христо́ва, свята́я блаже́нная Ксе́ние, хвале́бное пе́ние ти прино́сим, чту́ще терпе́ние твое́ и злострада́ние во́льное; ты же, иму́щи дерзнове́ние ко Го́споду, во вся́ких беда́х и напа́стех заступа́й нас, гре́шных, взыва́ющих к тебе́:

Ра́дуйся, Ксе́ние блаже́нная, моли́твеннице о душа́х на́ших.

Икос 1

Равноа́нгельски на земли́ пожила́ еси́, блаже́нная ма́ти, по успе́нии му́жа твоего́, без приуготовле́ния христиа́нскаго внеза́пу сконча́вшагося, отве́ргла еси́ жизнь мирску́ю, моля́щи Бо́га супру́га твоего́ ду́шу поми́ловати, по́двиг юро́дства на себе́ прия́вши, стяжа́ла еси́ соверше́нство духо́вное. Того́ ра́ди услы́ши от нас похвалы́ сия́, тебе́ возноси́мыя:

Ра́дуйся, Христо́ва уго́дница, в ми́ре надми́рно пожи́вшая;
ра́дуйся вся прило́ги ми́ра, пло́ти и диа́вола победи́вшая.

Ра́дуйся, нищету́ во́льную на всю жизнь избра́вшая;
ра́дуйся, сокро́вище на Небеси́ име́ти возжела́вшая.

Ра́дуйся, житие́м твои́м Андре́ю, Христа́ ра́ди юро́дивому, ра́вная;
ра́дуйся, от всех люде́й правосла́вных люби́мая и сла́вимая.

Ра́дуйся, о часе́ сме́ртнем по́мнити нас призыва́ющая;
ра́дуйся, бли́жняго ду́шу па́че ми́ра сего́ люби́ти нас науча́ющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 2

Ви́дяще стра́нное житие́ твое́, блаже́нная, я́ко во цве́те мла́дости твоея́ во оде́жду му́жа твоего́ усо́пшаго облекла́ся еси́, и́менем его́ нарекла́ся еси́, себе́ уме́ршую бы́ти глаго́лющи, дом же твой и вся блага́я земна́я оста́вивши, скита́лицу себе́ сотвори́ла еси́, сро́дницы твои́ безу́мную тя бы́ти мня́ху, лю́дие же боголюби́вии воспе́ша: Аллилу́иа.

Икос 2

Ра́зум, от Бо́га ти дарова́нный, в безу́мии мни́мом сокры́ла еси́, блаже́нная Ксе́ние; в суете́ же гра́да вели́каго, а́ки пусты́нница, пребыва́ла еси́, моли́твы своя́ к Бо́гу вознося́щи непреста́нно. Мы же, дивя́щеся житию твоему́, воспева́ем ти си́це:

Ра́дуйся, крест тя́жкий юро́дства, от Бо́га ти да́нный, на ра́мо свое́ прия́вшая;
ра́дуйся, мни́мым безу́мием сия́ние благода́ти сокры́вшая.

Ра́дуйся, и́менем му́жеским наре́кшися, не́мощи же́нския отреши́вшаяся;
ра́дуйся, печа́ли и ско́рби кро́тце терпе́вшая.

Ра́дуйся, все име́ние твое́ бе́дным лю́дем разда́вшая;
ра́дуйся, жили́ще Ду́ху Свято́му в се́рдце твое́м угото́вившая.

Ра́дуйся, всем прибега́ющим к тебе́ благо́е утеше́ние;
ра́дуйся, от сме́рти внеза́пныя избавле́ние.

Ра́дуйся, Ксе́ние блаже́нная, моли́твеннице о душа́х на́ших.

Кондак 3

Си́лою, свы́ше ти дарова́нною, благода́тию и му́жеством, зной и сту́жу лю́тую претерпева́ла еси́, всено́щно моля́щися и покло́ны творя́щи; те́мже и просла́влена бысть свя́тость твоя́, блаже́нная Ксе́ние, во Оте́честве на́шем многострада́льнем и во всем ми́ре правосла́внем, да зове́м с тобо́ю Бо́гу: Аллилу́иа.

Икос 3

Име́ла еси́, о, ма́ти блаже́нная, не́бо покро́в и зе́млю ло́же свое́, о те́ле, во оде́жду ве́тхую облече́ннем, небрегла́ еси́, моли́твы же к Бо́гу пла́менне возноси́ла еси́, сего́ ра́ди воспева́ем ти си́це:

Ра́дуйся, век твой земны́й без кро́ва прове́дшая;
ра́дуйся, Небе́снаго кро́ва взыска́вшая и того́ улучи́вшая.

Ра́дуйся, по вся дни но́щию в по́ли моли́вшаяся;
ра́дуйся, покло́ны земны́я на вся страны́ све́та та́мо твори́вшая.

Ра́дуйся, град Петро́в всено́щным бде́нием от бед огражда́вшая;
ра́дуйся, гнев Бо́жий от него́ мно́гажды отвраща́вшая.

Ра́дуйся, благода́тию Ду́ха Свята́го чуде́сно согрева́емая;
ра́дуйся, хлад лю́тый душ на́ших моли́твою твое́ю растаява́ющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 4

Бу́рю жите́йскую, во гра́де Петро́ве мяту́щуюся, кро́тостию и незло́бием препобежда́ла еси́, ма́ти блаже́нная, безстра́стие же посреде́ ми́ра су́етнаго стяжа́ла еси́ и та́ко, Ду́хом Святы́м просвеща́емая, взыва́ла еси́ Пода́телю тишины́ серде́чныя Бо́гу: Аллилу́иа.

Икос 4

Слы́шаша лю́дие дар прозре́ния чу́дный, тобо́ю явле́нный, свята́я ма́ти, и удиви́шася. Се, жене́ не́коей рекла́ еси́: возми́ пята́к, зде царь на коне́, поту́хнет. Та же не ве́дающи, я́ко ты запале́ние до́ма ея́ прозре́ла еси́, притече́ во своя́ си и узри́ дом свой во огни́ горя́щ, и а́бие по моли́тве твое́й пла́мень огня́ угасе́. Мно́зи же стра́ждущии к по́мощи твое́й прибега́ху, ю́же стяжа́вше, та́ко взыва́ша ти:

Ра́дуйся, дар прозре́ния смире́нием кра́йним стяжа́вшая;
ра́дуйся, дар сей на по́льзу и спасе́ние стра́ждущим явля́вшая.

Ра́дуйся, свеще́ негаси́мая, к Бо́гу в моли́твах горе́вшая;
ра́дуйся, ве́рою твое́ю пла́менною запале́ние домо́в угаша́вшая.

Ра́дуйся, гряду́щия ско́рби людски́я, а́ки настоя́щия, зре́вшая;
ра́дуйся, врач безме́здный и милосе́рдый лю́дем бы́вшая.

Ра́дуйся, я́ко и нас, немощны́х в ве́ре, укрепля́еши;
ра́дуйся, я́ко сия́нием свя́тости твоея́ лю́ди правосла́вныя озаря́еши.

Ра́дуйся, Ксе́ние блаже́нная, моли́твеннице о душа́х на́ших.

Кондак 5

Боготе́чная звезда́ яви́ся свя́тость твоя́ на тве́рди гра́да Петро́ва, уго́днице Бо́жия, заре́ю свое́ю сердца́ просвеща́ющая: уже́ бо лю́дем, в безу́мии греха́ погиба́ющим, путь спасе́ния указа́ла еси́, к покаянию их наставля́ющи, вое́же вопи́ти Бо́гу: Аллилу́иа.

Икос 5

Ви́дяще по́двиги твоя́ моли́твенныя, терпе́ние хла́да и зно́я вели́кое, лю́дие осла́бити жела́ху злострада́ния твоя́; ты же оде́жду и вся, и́ми приноси́мая, ни́щим раздава́ла еси́, нищету́ свою́, а́ки сокро́вище, храня́щи. Сего́ ра́ди слы́шиши от нас сицева́я:

Ра́дуйся, бога́тство твое́ то́кмо в любви́ к Бо́гу и бли́жним полага́вшая;
ра́дуйся, ничто́же земно́е име́вшая и всех духо́вно богати́вшая.

Ра́дуйся, ми́лостивым твои́м се́рдцем стра́ждущим сострада́вшая;
ра́дуйся, по́мощь им чрез до́брых люде́й посыла́вшая.

Ра́дуйся, чу́ждая ми́ру, в ми́ре живу́щим бла́го твори́вшая;
ра́дуйся, ве́ка сего́ суему́дрия отверга́тися научи́вшая.

Ра́дуйся, пла́кати с пла́чущими нас подвига́ющая;
ра́дуйся, от тя́жкаго сна грехо́внаго пробужда́ющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 6

Пропове́дана бысть свя́тость жития́ твоего́, блаже́нная, жи́телем гра́да твоего́, егда́ ты, о младе́нце, еще́ не ро́ждшемся, пеку́щися, жене́ до́брей, в до́ме, тобо́ю дарова́нном, жи́вшей, рекла́ еси́: Бог тебе́ сы́на посла́, теки́ на кла́дбище Смоле́нское. Та́я же, со тща́нием прите́кши, сироту́, рожде́нна ма́терию, внеза́пу на пути́ пострада́вшею и сконча́вшеюся, в дом свой прия́ла есть; вся же ле́та жития́ своего́, тебе́ благодаря́ще, сия́ семья́ благода́тная Бо́гу Человеколю́бцу взыва́ше: Аллилу́иа.

Икос 6

Возсия́ла есть сла́ва по́двигов твои́х, блаже́нная ма́ти Ксе́ние, егда́ но́щию на верх хра́ма Смоле́нскаго ка́мение, тая́щися, носи́ла еси́, до́му Пречи́стей возгради́тися посо́бствующи. Ны́не же вси моля́щиися во святе́м хра́ме сем и во всем ми́ре Бо́жием, взира́юще на о́браз твой, воспева́ют ти такова́я:

Ра́дуйся, та́йно твори́ти добро́ науча́ющая;
ра́дуйся, к по́двигом благоче́стия всех призыва́ющая.

Ра́дуйся, строи́телем хра́мов Бо́жиих помога́ющая;
ра́дуйся, святы́ню церко́вную возлюби́вшая.

Ра́дуйся, в де́лех благи́х усе́рдное поспеше́ние;
ра́дуйся, трудо́в на́ших на пути́ спасе́ния облегче́ние.

Ра́дуйся, под кро́вом Бо́жия Ма́тере по́двиги твори́вшая и та́ко почи́вшая;
ра́дуйся, с Не́ю ны́не на Небесе́х о нас Христа́ моля́щая.

Ра́дуйся, Ксе́ние блаже́нная, моли́твеннице о душа́х на́ших.

Кондак 7

Хотя́ще судьбы́ людски́я во блага́я устро́ити, повеле́ла еси́ де́ве кро́тцей на Охту́ тещи́, проре́кши, я́ко «муж твой та́мо жену́ погреба́ет». Та же, а́ще и недоумева́шеся, оба́че не ослу́шася глаго́ла твоего́, и та́мо вдовца́ мла́да, над гро́бом жены́ рыда́вшаго, сре́тила есть и утеше́ние в моли́тве ему́ подаде́. Ле́ту же мину́вшу, о́на венча́стася, и та́ко мно́гая ле́та в любви́ и согла́сии пожи́вше, чад свои́х наставля́ху тебе́, свята́я ма́ти, чти́ти, Бо́гу же воспева́ти песнь: Аллилу́иа.

Икос 7

Но́вое чу́до показа́ла еси́, блаже́нная, посреде́ скве́рны людски́я ду́шу твою́, юро́дством сокры́тую, в кро́тости а́нгельстей соблю́дши. Научи́ и нас, ма́ти Ксе́ние, и ма́лыя до́ли скорбе́й твои́х не терпя́щих и в ро́поте на Бо́га и бли́жняго дни на́ши иждива́ющих, вся свы́ше посыла́емая в терпе́нии сноси́ти, да взира́юще на по́двиги твоя́, чи́стым се́рдцем зове́м ти си́це:

Ра́дуйся, ми́ру злохла́дному благода́тную му́дрость яви́вшая;
ра́дуйся, нищеты́ духо́вныя блаже́нство вкуси́вшая.

Ра́дуйся, о́браз терпе́ния и благосе́рдия нам подаю́щая;
ра́дуйся, смире́нием и покая́нием от бед избавля́тися науча́ющая.

Ра́дуйся, с моли́твою и любо́вию дете́й благословля́вшая;
ра́дуйся, прикоснове́нием руку́ твое́ю чуде́сно их исцеля́вшая.

Ра́дуйся, уны́ние тя́жкое, ду́шу сокруша́ющее, от нас отводя́щая;
ра́дуйся, наде́ждою несумне́нною на ми́лость Бо́жию окриля́ющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 8

Стра́нница бездо́мная протекла́ еси́ путь ско́рбный жития́ твоего́ в сто́льнем гра́де Оте́чества на́шего, ма́ти блаже́нная, взыску́ющи гра́да вы́шняго, Иерусали́ма Небе́снаго; ны́не же в нем со А́нгелы и все́ми святы́ми пое́ши Бо́гу: Аллилу́иа.

Икос 8

Вся в моли́твах ко Творцу́ пребыва́ющи, ма́ти свята́я, до успе́ния твоего́, от страда́ний и по́двигов к жи́зни блаже́нней и ве́чней невозбра́нно прешла́ еси́. Сего́ ра́ди, преклоня́юще коле́на серде́ц на́ших, благогове́йное пе́ние ти прино́сим:

Ра́дуйся, во оби́телех го́рних с ли́ки святы́х лику́ющая;
ра́дуйся, и нас, тебе́ моля́щихся, та́мо не забыва́ющая.

Ра́дуйся, чудеса́ неисче́тная по успе́нии твое́м яви́вшая;
ра́дуйся, сме́ртно боля́щих, врачми́ оста́вленных, исцеля́вшая.

Ра́дуйся, в пия́нстве ги́бнущих устраше́ние и исправле́ние;
ра́дуйся, ме́ста служе́ния лиши́вшимся благо́е поспеше́ние.

Ра́дуйся, вдови́ц и жен, супру́гом оста́вленных, покрови́тельнице;
ра́дуйся, стра́нников и безприю́тных пита́тельнице.

Ра́дуйся, Ксе́ние блаже́нная, моли́твеннице о душа́х на́ших.

Кондак 9

Вся́кия утоли́ боле́зни, блаже́нная ма́ти Ксе́ние, на тя наде́ющихся и к по́мощи твое́й усе́рдно притека́ющих: я́коже помина́вших пре́жде ду́шу твою́ ра́ди души́ своея́ спасе́ния, по заве́ту твоему́, та́ко и ны́не помяни́ всех, прославля́ющих тя, Бо́гу же, в тебе́ ди́вно просла́вленному, вопию́щих непреста́нно: Аллилу́иа.

Икос 9

Вити́я суему́дренныя разуме́ти не мо́гут, ка́ко ты безу́мием свои́м безу́мие ми́ра сего́ обличи́ла еси́ и не́мощию свое́ю си́льныя и кре́пкия посрами́ла еси́: не ве́дают бо в тебе́ си́лы и прему́дрости Бо́жия. Мы же, тя почита́юще, с любо́вию зове́м ти си́це:

Ра́дуйся, Боже́ственнаго Ду́ха селе́ние;
ра́дуйся, ве́лие к Бо́гу дерзнове́ние.

Ра́дуйся, у усыпа́льницы твоея́ моля́щимся явля́ющаяся и им помога́ющая;
ра́дуйся, земле́ю и еле́ем от нея́ мно́гия освяти́вшая и от неду́г исцели́вшая.

Ра́дуйся, я́ко одержи́мых страстьми́ от ги́бели спаса́еши;
ра́дуйся, я́ко отверга́тися себе́ нас науча́еши.

Ра́дуйся, любве́ и смире́ния путь во спасе́ние нам указу́ющая;
ра́дуйся, во хра́ме Бо́жием с на́ми незри́мо пребыва́ющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 10

Спасти́ лю́ди хотя́щи, блаже́нная ма́ти Ксе́ние, при́сно да́руеши им заступле́ние твое́ чу́дное. Се де́ву благочести́вую с вдови́цею ма́терию ея́, в кану́н венча́ния у гробни́цы твоея́ усе́рдно моли́вшуюся, от бра́ка спасла́ еси́ со злоде́ем, и́же ра́тнаго челове́ка уби́, и́мя же и чин его́ себе́ присво́и. В день то́йже уби́йца о́ный внеза́пу обличе́н бысть и, у́жасом объя́т, испове́да пред все́ми, я́ко си́ла Бо́жия сироту́ от бра́ка с ним изба́ви, мы же, дивя́щеся си́ле моли́тв твои́х, нас спаса́ющих, воспева́ем Бо́гу: Аллилу́иа.

Икос 10

Стена́ еси́ неруши́мая, преблаже́нная ма́ти, и дом правосла́вных. Не оста́ви и ны́не супру́ги разлуче́нныя, помози́ роди́телем, за грехи́ своя́ о ча́дех сле́зы пролива́ющим, научи́ ю́ноши и де́вы в чистоте́ себе́ храни́ти и всех нас святы́ню уз семе́йных почита́ти, да еди́неми усты́ воспева́ем ти та́ко:

Ра́дуйся, дев благочести́вых от бра́ка неве́рнаго избавля́ющая;
ра́дуйся, спу́тника жи́зни до́браго им обрести́ помога́ющая.

Ра́дуйся, сро́дник вражду́ющих благо́е примире́ние;
ра́дуйся, слез де́тских осуше́ние.

Ра́дуйся, от убие́ния младе́нцев во чре́ве жена́м гро́зное преще́ние;
ра́дуйся, на ка́мени любве́ и ве́ры домо́в устрое́ние.

Ра́дуйся, супру́гов, сме́ртию разлуче́нных, утеше́ние;
ра́дуйся, в жи́зни безсме́ртней ве́чное их соедине́ние.

Ра́дуйся, Ксе́ние блаже́нная, моли́твеннице о душа́х на́ших.

Кондак 11

Пе́ние благода́рственное прино́сят ти, ма́ти блаже́нная, лю́дие правосла́внии, от бед и боле́зней моли́твами твои́ми изба́вленнии; и ны́не, а́ще попу́стит нам Всепра́ведный Госпо́дь ско́рби грех на́ших ра́ди, со слеза́ми к тебе́ припаде́м, упова́юще на ми́лостивое твое́ о нас к Бо́гу предста́тельство, да воспое́м Ему́: Аллилу́иа.

Икос 11

Светоза́рная луча́ во мра́це жития́ сего́, путь ко Све́ту Непристу́пному освеща́ющая, яви́лася еси́, богому́драя Ксе́ние, чуде́с мно́жеством просия́вши. В лю́тую же годи́ну гоне́ний безбо́жных ве́рнии от часо́вни твоея́ не отступи́ша, но, презре́вше и страх сме́ртный, с ве́рою и упова́нием к тебе́ притека́ху, се́рдцем воспева́юще си́це:

Ра́дуйся, безнаде́жных наде́яние;
ра́дуйся, в бе́здне отча́яния погиба́ющих спасе́ние.

Ра́дуйся, уни́женных и гони́мых покрови́тельнице;
ра́дуйся, от клеветы́ и суда́ непра́веднаго защи́тнице.

Ра́дуйся, оби́димых и обездо́ленных утеше́ние;
ра́дуйся, оби́дящих гро́зное вразумле́ние.

Ра́дуйся, гра́да свята́го Петра́ засту́пнице;
ра́дуйся, ча́дом земли́ Росси́йския ма́ти и пита́тельнице.

Ра́дуйся, Ксе́ние блаже́нная, моли́твеннице о душа́х на́ших.

Кондак 12

Благода́ть утеше́ний оби́льно излива́еши, блаже́нная Ксе́ние, всем чту́щим па́мять твою́ и к заступлению твоему́ притека́ющим. Те́мже и мы, гре́шнии, на тя по Бо́зе наде́жду на́шу возлага́ем и мо́лимся тебе́ усе́рдно: не оста́ви нас во обстоя́ниих ско́рбных, умоли́ Го́спода сил, да не отпаде́м от ве́ры правосла́вныя, в нейже тобо́ю утвержда́еми, зове́м Ему́ ве́рно: Аллилу́иа.

Икос 12

Пою́ще мно́гая твоя́ чудеса́, блаже́нная ма́ти Ксе́ние, восхваля́ем тя, я́ко те́плую на́шу засту́пницу и ско́рую предста́тельницу. Улуча́юще же от тебе́ по́мощь благода́тную, неуста́нно воспева́ем ти си́це:

Ра́дуйся, све́том кро́тости твоея́ вся концы́ земли́ озари́вшая;
ра́дуйся, житие́м твои́м по́стническим горды́ню диа́вольскую посрами́вшая.

Ра́дуйся, до́му ца́рскому поможе́ние и благослове́ние;
ра́дуйся, ми́ра Бо́жия в сердца́ ве́рных насажде́ние.

Ра́дуйся, о спасе́нии Оте́чества на́шего при́сно моля́щаяся;
ра́дуйся во Оте́чество Небе́сное нам путь указу́ющая.

Ра́дуйся, по Богоро́дице в ско́рбех и печа́лех на́ше утеше́ние;
ра́дуйся, по Бо́зе грехо́в на́ших проще́ние и ве́чное спасе́ние.

Ра́дуйся, Ксе́ние блаже́нная, моли́твеннице о душа́х на́ших.

Кондак 13

О свята́я блаже́нная ма́ти Ксе́ние, в житии твое́м крест тя́жкий поне́сшая. Приими́ от нас, гре́шных, моле́ние сие́, тебе́ приноси́мое, огради́ нас моли́твами твои́ми от наве́тов духо́в тьмы, от бед и напа́стей, умоли́ Всеще́драго Бо́га пода́ти нам си́лу и кре́пость, да взе́мше крест свой, восле́д Христу́ гряде́м, пою́ще Ему́ с тобо́ю вове́ки: Аллилу́иа.

[Се́й конда́к глаго́лется три́жды.]

Икос 1

Равноа́нгельски на земли́ пожила́ еси́, блаже́нная ма́ти, по успе́нии му́жа твоего́, без приуготовле́ния христиа́нскаго внеза́пу сконча́вшагося, отве́ргла еси́ жизнь мирску́ю, моля́щи Бо́га супру́га твоего́ ду́шу поми́ловати, по́двиг юро́дства на себе́ прия́вши, стяжа́ла еси́ соверше́нство духо́вное. Того́ ра́ди услы́ши от нас похвалы́ сия́, тебе́ возноси́мыя:

Ра́дуйся, Христо́ва уго́дница, в ми́ре надми́рно пожи́вшая;
ра́дуйся вся прило́ги ми́ра, пло́ти и диа́вола победи́вшая.

Ра́дуйся, нищету́ во́льную на всю жизнь избра́вшая;
ра́дуйся, сокро́вище на Небеси́ име́ти возжела́вшая.

Ра́дуйся, житие́м твои́м Андре́ю, Христа́ ра́ди юро́дивому, ра́вная;
ра́дуйся, от всех люде́й правосла́вных люби́мая и сла́вимая.

Ра́дуйся, о часе́ сме́ртнем по́мнити нас призыва́ющая;
ра́дуйся, бли́жняго ду́шу па́че ми́ра сего́ люби́ти нас науча́ющая.

Ра́дуйся, Ксе́ние блаже́нная, моли́твеннице о душа́х на́ших.

Кондак 1

Избра́нная уго́днице Христо́ва, свята́я блаже́нная Ксе́ние, хвале́бное пе́ние ти прино́сим, чту́ще терпе́ние твое́ и злострада́ние во́льное; ты же, иму́щи дерзнове́ние ко Го́споду, во вся́ких беда́х и напа́стех заступа́й нас, гре́шных, взыва́ющих к тебе́:

Ра́дуйся, Ксе́ние блаже́нная, моли́твеннице о душа́х на́ших.

Моли́тва

О свята́я всеблаже́нная ма́ти Ксе́ние! Под кро́вом Всевы́шняго жи́вшая, ведо́мая и укрепля́емая Богома́терию, глад и жа́жду, хлад и зной, поноше́ния и гоне́ния претерпе́вшая, дар прозорли́вости и чудотворе́ния от Бо́га прия́ла еси́ и под се́нию Всемогу́щаго поко́ишися. Ны́не Свята́я Це́рковь, я́ко благоуха́нный цвет, прославля́ет тя. Предстоя́ще на ме́сте погребе́ния твоего́, пред о́бразом твои́м святы́м, я́ко живе́й ти, су́щей с на́ми, мо́лимся тебе́: приими́ проше́ния на́ша и принеси́ их ко Престо́лу милосе́рдаго Отца́ Небе́снаго, я́ко дерзнове́ние к Нему́ иму́щая. Испроси́ притека́ющим к тебе́ ве́чное спасе́ние, на блага́я де́ла и начина́ния на́ша ще́дрое благослове́ние, от вся́ких бед и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о нас, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го креще́ния озари́ти и печа́тию да́ра Ду́ха Свята́го запечатле́ти, о́троки и отрокови́цы в ве́ре, че́стности, богобоя́зненности воспита́ти и успе́хи в уче́нии им дарова́ти; боля́щия и неду́гующия исцели́, семе́йным любо́вь и согла́сие низпосли́, мона́шествующих по́двигом до́брым подвиза́тися удосто́й и от поноше́ний огради́, па́стыри в кре́пости Ду́ха Свята́го утверди́, лю́ди и страну́ на́шу в ми́ре и безмяте́жии сохрани́, о лише́нных в предсме́ртный час причаще́ния Святы́х Христо́вых Та́ин умоли́. Ты на́ша наде́жда и упова́ние, ско́рое услы́шание и избавле́ние, тебе́ благодаре́ние возсыла́ем и с тобо́ю сла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.