Собор Крымских святых

Жития

Установлен 10 марта 1988 года по инициативе архиепископа Симферопольского и Крымского Леонтия (Гудимова) и по благословению патриарха Московского и всея Руси Пимена. День празднования был приурочен к дню памяти свт. Стефана, архиеп. Сурожского.

По преданию, христианство в Крым принес в I веке апостол Андрей Первозванный. Таврида досталась апостолу по жребию, который ученики Спасителя бросили после Пятидесятницы, расходясь во все концы Римской империи на проповедь. Андрей, родной брат Петра, направился сначала в Малую Азию, затем, обойдя с Евангелием побережье Черного моря, оказался в Крыму.

Позже здесь проповедовал святой Климент, папа Римский, ученик апостола Петра и спутник апостола Павла. С Крымом связаны труды равноапостольных братьев Кирилла и Мефодия, здесь когда-то принял Крещение князь Владимир.

Тропарь, глас 4

Бо́же оте́ц на́ших,
творя́й при́сно с на́ми по Твое́й кро́тости,
не отста́ви ми́лость Твою́ от нас, но моли́твами их

в ми́ре упра́ви живо́т наш.

Тропарь, глас 4 Я́ко апо́столов первозва́нный/ и верхо́внаго су́щий брат,/ Влады́це всех, Андре́е, моли́ся/ мир вселе́нней дарова́ти// и душа́м на́шим ве́лию ми́лость. Тропарь, глас 4 И́же от Бо́га чудоде́йствы/ пресла́вно удивля́я вселе́нныя концы́ ми́ра,/ свяще́нный страда́льче,/ па́че естества́ мо́рю, соста́вы вода́м содева́еши разделе́ние/ в честне́й па́мяти твое́й/ всегда́ притека́ющим усе́рдно в Богозда́нную ти́ це́рковь,/ чуде́сным твои́м моще́м,/ и по всенаро́дном хожде́нии/ мо́ре во еди́но тече́ние чудоде́тельне твори́ши,/ Кли́менте преди́вный,// моли́ Христа́ Бо́га, спасти́ся душа́м на́шим. Тропарь, глас 1 Возвести́телю пути́ спаси́тельнаго,/ испове́дниче и архипа́стырю Кры́мския земли́,/ и́стинный храни́телю оте́ческих преда́ний,/ сто́лпе непоколеби́мый, Правосла́вия наста́вниче,/ врачу́ богому́дрый, святи́телю Луко́,/ Христа́ Спа́са непреста́нно моли́/ ве́ру непоколеби́му правосла́вным дарова́ти// и спасе́ние, и ве́лию ми́лость. Тропарь, глас 4 И́стинных повеле́ний устне́ распространи́л еси́,/ уче́нии Боже́ственными вся просвети́л еси́,/ злове́рие низложи́л еси́, Богому́дре Марти́не,/ святи́телю всече́стне,/ помина́й нас, уго́дниче Христо́в,/ е́же к Нему́ хода́тайствы твои́ми,// да в ми́ре устро́иши живо́т наш. Тропарь, глас 4 Днесь све́тло красу́ется Це́рковь Кры́мская/ и ра́достно торжеству́ют правосла́вных мно́жества,/ соверша́я па́мять Таври́ческих всех святы́х,/ от апо́стол Христо́вых до ны́не просла́вленных,/ с ни́ми же новому́чеников и испове́дников ве́ка двадца́таго,/ и́хже предста́тельством и моли́твами/ да́руй, Го́споди, всем нам по́мощь Боже́ственную/ непоколеби́мы пребыва́ти в Правосла́вии,// Твою́ бога́тую ми́лость, благоде́нствие и спасе́ние душ на́ших.

Кондак, глас 2

Му́жества тезоимени́таго Богоглаго́льника
и Це́ркве возсле́дователя верхо́внаго,
Петро́ва сро́дника восхва́лим,
зане́ я́коже дре́вле сему́, и ны́не нам воззва́:

прииди́те, обрето́хом Жела́емаго.

Кондак, глас 2 Боже́ственнаго виногра́да священнооде́янна/ все́м лоза́ яви́ся,/ ка́плющи сла́дость прему́дрости,/ моли́твами твои́ми, всече́стне,/ да тебе́ истка́ну я́ко багряни́цу,/ песнь мы́сленную принесе́м,/ Кли́менте свя́те:// спаси́ рабы́ твоя́. Кондак, глас 4 Це́ркве недви́жимии и Боже́ственнии пи́ргове,/ благоче́стия Боже́ственнии столпи́ вои́стинну кре́пцыи,/ Кли́менте с Петро́м всехва́льнии,// ва́шими моли́твами соблюди́те вся. Кондак, глас 3 Я́ко же́ртву непоро́чну и благоуго́дну Христу́ принося́ще,/ Правосла́вная Це́рковь Кры́мская све́тло пра́зднует,/ соверша́юще собо́рную па́мять святы́х уго́дников Таври́ческих,/ от земли́ на́шея восте́кших/ и насе́льниками ра́йских селе́ний бы́вших./ И мы вси под кров их моле́ний притека́ющи,/ избавля́емся от належа́щих бед и зол,/ воспева́я ку́пно с ни́ми Святу́ю Тро́ицу,// да́рующую нам спасе́ние и ве́лию ми́лость. Кондак, глас 2 Светоно́сный де́нь наста́/ па́стырей, епи́скопствовавших све́тло в Херсо́не,/ и́хже воспева́ем пра́здник,/ пострада́вших за Христо́вы о́вцы./ Священному́ченицы, моли́те Пастыренача́льника Христа́/ и на́с причести́ десна́го ове́ц стоя́ния,/ да вопие́м ва́м:/ ра́дуйтеся, свяще́ннии отцы́,// за Христа́ кро́вь свою́ излия́вшии. Кондак, глас 1 Я́ко звезда́ всесве́тлая,/ в нощи́ безбо́жия доброде́тельми просия́л еси́,/ и от гони́телей мно́го пострада́в,/ непоколеби́м ве́рою пребы́л еси́,/ враче́бною же му́дростию укра́шен,/ мно́гия лю́ди исцели́л еси́./ Сего́ ра́ди с любо́вию вопие́м ти:/ ра́дуйся, добропобе́дный испове́дниче,/ ра́дуйся, о́тче святи́телю Луко́,// ра́дуйся, земли́ Ру́сския похвало́ и утвержде́ние. Ин кондак, глас 1 Я́коже звезда́ всесве́тлая, доброде́тельми сия́ющи,/ бы́л еси́, святи́телю,/ ду́шу же равноа́нгельну сотвори́,/ сего́ ра́ди святи́тельства са́ном поче́тся,/ во изгна́нии же от безбо́жных мно́го пострада́,/ и непоколеби́м ве́рою пребы́в,/ враче́бною му́дростию мно́гия исцели́л еси́./ Те́мже ны́не честно́е те́ло твое́ от землены́х не́др обре́тенное ди́вно Госпо́дь просла́ви,/ да вси́ ве́рнии вопие́м ти́:/ ра́дуйся, о́тче святи́телю Луко́,// земли́ Кры́мския похвало́ и утвержде́ние.

Величание

Велича́ем тя,
апо́столе Христо́в Андре́е,
и чтим боле́зни и труды́ твоя́,
и́миже труди́лся еси́

во благове́стии Христо́ве.

Молитва

Первозва́нне апо́столе Бо́га и Спа́са на́шего Иису́са Христа́, Це́ркве после́дователю верхо́вный, всехва́льне Андре́е, сла́вим и велича́ем апо́стольския труды́ твоя́, сла́дце помина́ем твое́ благослове́нное к нам прише́ствие, ублажа́ем честна́я страда́ния твоя́, я́же за Христа́ претерпе́л еси́, лобыза́ем свяще́нныя мо́щи твоя́, чтим святу́ю па́мять твою́ и ве́руем, я́ко жив Госпо́дь, жива́ же и душа́ твоя́ и с Ним во ве́ки пребыва́еши на Небеси́, иде́же и лю́биши ны то́южде любо́вию, е́юже возлюби́л еси́ нас, егда́ Ду́хом Святы́м прозре́л еси́ на́ше е́же ко Христу́ обраще́ние, и не то́чию лю́биши, но и мо́лиши о нас Бо́га, зря во Све́те Его́ вся ну́жды на́ша. Та́ко ве́руем и та́ко сию́ ве́ру на́шу испове́дуем во хра́ме, и́же во и́мя твое́, святы́й Андре́е, пресла́вно созда́ся, иде́же святы́я мо́щи твоя́ почива́ют; ве́рующе же, про́сим и мо́лим Го́спода и Бо́га и Спа́са на́шего Иису́са Христа́, да моли́твами твои́ми, я́же при́сно послу́шает и прие́млет, пода́ст нам вся потре́бная ко спасе́нию нас гре́шных; да я́коже ты а́бие по гла́су Го́спода, оста́вль мре́жи своя́, неукло́нно Ему́ после́довал еси́, си́це и ки́йждо от нас да и́щет не свои́х си, но е́же к созида́нию бли́жняго и о го́рнем зва́нии да помышля́ет. Иму́ще же тя предста́теля и моли́твенника о нас, упова́ем, я́ко моли́тва твоя́ мно́го мо́жет пред Го́сподем и Спаси́телем на́шим Иису́сом Христо́м, Ему́же подоба́ет вся́кая сла́ва, честь и поклоне́ние со Отце́м и Святы́м Ду́хом во ве́ки веко́в. Ами́нь.

Молитва

О, всечестны́й учениче́ верхо́внаго апо́стола Петра́, но́вый Пе́тре ве́ры Христо́вой, вторы́й Моисе́ю, священному́чениче Кли́менте, просвеще́нный уче́нием вели́каго апо́стола, венча́нный венце́м му́ченичества! Испроси́ на́м моли́твами твои́ми благода́ть Свята́го Ду́ха сохраня́ти ве́ру Христо́ву и церко́вныя спаси́тельныя обы́чаи, да расточи́тся безбо́жие. Умоли́, уго́дниче Бо́жий, Милосе́рдаго Творца́, да излие́тся на на́с благода́ть Свята́го Ду́ха, просвеща́ющая на́ши ду́ши, да попали́т Госпо́дь Бо́г страсте́й на́ших огнепа́льная стремле́ния, да сохрани́т на́с от вся́кия зло́бы, да спасе́т от напа́стей, бе́д и скорбе́й, и да пребу́дем ве́рными христиа́нами до конца́ жи́зни на́шея, сохраня́я в сердца́х на́ших па́мятование печа́лей, боле́зней и трудо́в твои́х, во сла́ву Бо́га Отца́ и Сы́на и Свята́го Ду́ха. Ами́нь.

Молитва

О, всеблаже́нный испове́дниче, святи́телю о́тче на́ш Луко́, вели́кий уго́дниче Христо́в. Со умиле́нием прикло́ньше коле́на серде́ц на́ших, и припа́дая к ра́це честны́х и многоцеле́бных моще́й твои́х, я́коже ча́да отца́ мо́лим тя́ всеусе́рдно: услы́ши на́с гре́шных и принеси́ моли́тву на́шу к Ми́лостивому и Человеколюби́вому Бо́гу, Ему́же ты́ ны́не в ра́дости святы́х и с ли́ки а́нгел предстои́ши. Ве́руем бо, я́ко ты́ лю́биши ны́ то́ю же любо́вию, е́юже вся́ бли́жния возлюби́л еси́, пребыва́я на земли́. Испроси́ у Христа́ Бо́га на́шего, да утверди́т ча́д Свои́х в ду́хе пра́выя ве́ры и благоче́стия: па́стырям да да́ст святу́ю ре́вность и попече́ние о спасе́нии вве́ренных и́м люде́й: пра́во ве́рующия соблюда́ти, сла́быя и немощны́я в ве́ре укрепля́ти, неве́дущия наставля́ти, проти́вныя облича́ти. Все́м на́м пода́й да́р коему́ждо благопотре́бен, и вся́ я́же к жи́зни вре́менней и к ве́чному спасе́нию поле́зная. Градо́в на́ших утвержде́ние, земли́ плодоно́сие, от гла́да и па́губы избавле́ние. Скорбя́щим утеше́ние, неду́гующим исцеле́ние, заблу́ждшим на пу́ть и́стины возвраще́ние, роди́телем благослове́ние, ча́дам в стра́хе Госпо́днем воспита́ние и науче́ние, си́рым и убо́гим по́мощь и заступле́ние. Пода́ждь на́м все́м твое́ архипа́стырское благослове́ние, да таково́е моли́твенное хода́тайство иму́щи, изба́вимся от ко́зней лука́ваго и избе́гнем вся́кия вражды́ и нестрое́ний, ересе́й и раско́лов. Наста́ви на́с на пу́ть, веду́щий в селе́ния пра́ведных, и моли́ о на́с всеси́льнаго Бо́га, да в ве́чней жи́зни сподо́бимся с тобо́ю непреста́нно сла́вити Единосу́щную и Неразде́льную Тро́ицу, Отца́ и Сы́на и Свята́го Ду́ха. Ами́нь.

Молитва

О, преблаже́ннии и пресла́внии му́ченицы и испове́дницы Таври́честии, Це́ркви Христо́вой досто́йное украше́ние, ско́рии засту́пницы и те́плии пред Го́сподем предста́телие и моли́твенницы, зе́млю на́шу житие́м, по́двигом и кро́вию освяти́вшии, священному́чениче Порфи́рие, архипа́стырю Кры́мский, и священнослужи́телие, во у́зах да́же до сме́рти и́мя Христо́во испове́давшии Дими́трие, Нико́лае, Варфоломе́е, Тимофе́е, Иоа́нне, Влади́мире, Анто́ние, Нико́лае, Андре́е, Елеаза́ре и му́ченицы Дими́трие и Стефа́не воззри́те ми́лостивно на ны́, чту́щих пресве́тлую па́мять ва́шу. Вы́ бо ревни́телие еди́нства Це́ркви бы́ли есте́ и ны́не на́шу зе́млю во святе́м правосла́вии утверди́те, от раско́лов и шата́ний огради́те, враго́в, ополча́ющихся на ны́, ви́димых и неви́димых, низложи́те. Испроси́те Человеколюби́ваго Бо́га дарова́ти на́м ти́хое и безмяте́жное житие́ да сподо́бимся моли́твами ва́шими получи́ти оставле́ние грехо́в и дости́гнути Ца́рства Небе́снаго, и́де же вы́ непреста́нно сла́вите Всесвяту́ю Тро́ицу Отца́ и Сы́на и Свята́го Ду́ха во ве́ки веко́в. Ами́нь.

2-я Молитва

О, вели́кий чудотво́рче, священному́чениче Кли́менте! Приклони́ся ны́не к на́шим воздыха́нием серде́чным и помози́ нам во вре́менном житии́ сем твори́ти вся в зако́не Бо́жии предло́женная, вся́каго же греха́ отмета́тися. Ты, вели́кий подви́жниче, от ю́ности твоея́ клеветы́ претерпе́вый, мно́гия же боле́зни душе́вныя и труды́ понесы́й, помоли́ся ко Го́споду Бо́гу о нас, гре́шных и недосто́йных раб Бо́жиих (имена), да твои́м предста́тельством и заступле́нием пода́ст Всеблаги́й и нам, гре́шным, си́лу и кре́пость во благоду́шии претерпева́ти клеветы́ челове́ческия и я́же на земли́ ско́рби и сохрани́ти за́поведи Его́, да просла́вим пречестно́е и великоле́пое и́мя Го́спода Бо́га и Его́ благода́ть, да́нную тебе́, во ве́ки веко́в. Ами́нь.

Канон святому апостолу Андрею Первозванному

Минея, 30 Ноября.

Глас 1

Песнь 1

Ирмос: Твоя́ победи́тельная десни́ца
Боголе́пно в кре́пости просла́вися:
та бо, Безсме́ртне, я́ко всемогу́щая, проти́вныя сотре́,
изра́ильтяном путь глубины́ новосоде́лавшая.

Припев: Святы́й апо́столе Андре́е, моли́ Бо́га о на́с.

Смути́вшуюся мою́ ду́шу помышле́нии же и словесы́
очи́сти все́льшеюся в тя, пропове́дниче Христо́в Андре́е, Боже́ственною благода́тию,
я́ко да чи́сте источу́ ти пе́ние досто́йное.

Припев: Святы́й апо́столе Андре́е, моли́ Бо́га о на́с.

Честно́е, Предте́ча Христо́в, свои́х ученико́в верхо́внейшее,
от непло́дове прозя́бший, из Де́вы ро́ждшемуся Христу́ препросла́вленному,
Андре́я, ра́дуяся, приведе́.

Сла́ва Отцу́ и Сы́ну и Свято́му Ду́ху.

Жела́нием и любо́вию неукло́нною доброде́тели степе́ней наче́н
и восхожде́нию при́сно поуча́яся,
от немощны́я си́лы к верхо́внейшей, Андре́е, си́ле дости́гл еси́.

И ны́не и при́сно и во ве́ки веко́в. Ами́нь.

Богородичен: Ра́дуйся, благода́ти исто́чниче;
ра́дуйся, ле́ствице и две́ре Небе́сная;
ра́дуйся, све́щниче, и ста́мно злата́я, и горо́ несеко́мая,
Я́же Жизнода́вца Христа́ ми́ру Ро́ждшая.

Песнь 3

Ирмос: Еди́не Ве́дый челове́ческаго существа́ не́мощь
и ми́лостивно в не вообра́жся,
препоя́ши мя с высоты́ си́лою,
е́же вопи́ти Тебе́, Святы́й:
одушевле́нный хра́ме неизрече́нныя сла́вы Твоея́, Человеколю́бче.

Припев: Святы́й апо́столе Андре́е, моли́ Бо́га о на́с.

Прите́кл еси́, жа́ждею не зван, Андре́е,
но самово́льне жи́зни ко исто́чнику, я́коже еле́нь,
и всем, сего́ обре́т, пропове́дал еси,
и, пив, напои́л еси́ нетле́ния вода́ми иста́явшия жа́ждею концы́.

Припев: Святы́й апо́столе Андре́е, моли́ Бо́га о на́с.

Уве́дев есте́ственныя зако́ны, Андре́е досточу́дне,
и о́бщника сро́дника прия́л еси́, вопия́:
обрето́хом желае́маго и путесотвори́вшаго пло́ти рожде́ние,
сказа́л еси́ ра́зум духо́вный.

Сла́ва Отцу́ и Сы́ну и Свято́му Ду́ху.

Мре́жею сло́ва из глубины́ пре́лести улови́л еси́ слове́сныя ры́бы, апо́столе,
и трапе́зе Христо́вей снедь чи́стую прине́сл еси́,
просвеще́нныя благода́тию Я́вльшагося в подо́бии пло́ти.

И ны́не и при́сно и во ве́ки веко́в. Ами́нь.

Богородичен: Бо́га заче́нши во утро́бе, Де́во, Ду́хом всесвяты́м,
пребыла́ еси́ неопа́льна,
поне́же Тя купина́, законополо́жнику Моисе́ю пали́му,
несожже́нна я́ве предвозвести́, огнь прии́мшую нестерпи́мый.

Седален, глас 8

Я́ко первозва́ннаго всех ученико́в, и самови́дца Сло́ва, и служи́теля,
Андре́е апо́столе, по до́лгу чтим тя,
А́гнцу бо, взе́млющему грехи́ ми́ра,
несомне́нною ве́рою те́пле после́довал еси́,
отону́дуже и стра́сти Его́ о́бщник показа́лся еси́,
пло́тию претерпе́вшаго нас ра́ди во́льно смерть.
Сего́ ра́ди вопие́м ти:
моли́ся Христу́ Бо́гу грехо́в оставле́ние пода́ти
пра́зднующим любо́вию святую па́мять твою́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Ра́дуйся, престо́ле огнезра́чный Бо́жий;
ра́дуйся, Отрокови́це, седа́лище ца́рское, о́дре упещренопостла́нный,
златопорфи́рный черто́же, хлами́до червленоша́рная,
украше́нный хра́ме, молнено́сная колесни́це, свети́льниче многосве́тлый;
ра́дуйся, Богоро́дице, двонадесятосте́нный гра́де, и дверь златокова́нная,
и черто́же светообра́зный, светлопозлаще́нная трапе́зо, Богоукраше́нная ски́ние;
ра́дуйся, сла́вная Неве́сто солнцека́плющая;
ра́дуйся, еди́на души́ моея́ благоле́пие.

Песнь 4

Ирмос: Го́ру Тя, благода́тию Бо́жиею приосене́нную,
прозорли́выма Авваку́м усмотри́в очи́ма,
из Тебе́ изы́ти Изра́илеву
провозглаша́ше свято́му
во спасе́ние на́ше и обновле́ние.

Припев: Святы́й апо́столе Андре́е, моли́ Бо́га о на́с.

Боже́ственная, истреби́тельная го́ршаго вседе́тельнаго и светоза́рнаго Ду́ха си́ла,
в тя, Андре́е, все́льшися Боголе́пне,
о́гненнаго язы́ка во о́бразе, неизрече́нных показа́ тя пропове́дника.

Припев: Святы́й апо́столе Андре́е, моли́ Бо́га о на́с.

Не ору́жия ко мще́нию взя́ше плотска́я
и к низверже́нию кре́пких тверды́нь вра́жиих, Андре́й всечестны́й,
но, Христо́м огради́вся, принесе́, плени́в, язы́ки в послуша́ние.

Припев: Святы́й апо́столе Андре́е, моли́ Бо́га о на́с.

Го́ру тя, ка́плющую разу́мное весе́лие,
преесте́ственный Бог, осуществи́выйся е́же о нас, Андре́е, яви́,
го́ры го́рькия де́монскаго возноше́ния потребля́ющую си́лою Ду́ха.

Сла́ва Отцу́ и Сы́ну и Свято́му Ду́ху.

Любо́вию соверша́ющия твою́ па́мять в пе́снех,
от оби́льна да́ра Учи́теля твоего́, Христа́, Андре́е пребога́те,
духо́внаго весе́лия вода́ми исполня́я не преста́й моли́твами твои́ми.

И ны́не и при́сно и во ве́ки веко́в. Ами́нь.

Богородичен: Пое́м ве́лие и стра́шное Твое́ таи́нство,
преми́рных бо утаи́вся чинонача́лий,
на Тя при́сно Сый сни́де, я́ко дождь на руно́, Всепе́тая,
на спасе́ние на́ше и обновле́ние.

Песнь 5

Ирмос: Просвети́вый сия́нием
прише́ствия Твоего́, Христе́,
и освети́вый Кресто́м Твои́м ми́ра концы́,
сердца́ просвети́ све́том Твоего́ Богоразу́мия
правосла́вно пою́щих Тя.

Припев: Святы́й апо́столе Андре́е, моли́ Бо́га о на́с.

Восприя́л еси́, Его́же вожделе́л еси́, Андре́е апо́столе,
в нетле́нных с Ним обита́в селе́ниих,
трудо́в твои́х снопы́ пожа́в досто́йно,
те́мже тя пе́сньми сла́вим.

Припев: Святы́й апо́столе Андре́е, моли́ Бо́га о на́с.

Возлюби́л еси́ Влады́ку
и Того́ во след бы́стро поте́кл еси́, стопа́ми Его́ к жи́зни наставля́емь
и страсте́й Того́ нелжи́во, прече́стне Андре́е, да́же до сме́рти подража́я.

Сла́ва Отцу́ и Сы́ну и Свято́му Ду́ху.

Напря́г тя, я́ко стрелу́ си́льну, блаже́нне, испусти́ в весь мир Госпо́дь,
ураня́я де́моны и злоче́стием уя́звленныя челове́ки врачу́я.

И ны́не и при́сно и во ве́ки веко́в. Ами́нь.

Богородичен: Веселя́тся Небе́сныя си́лы, зря́ще Тя,
ра́дуются с ни́ми и челове́ческая собра́ния,
Рождество́м бо Твои́м соедини́шася, Де́во Богоро́дице, Тя досто́йно сла́вяще.

Песнь 6

Ирмос: Обы́де нас после́дняя бе́здна,
несть избавля́я,
вмени́хомся, я́ко о́вцы заколе́ния,
спаси́ лю́ди Твоя́, Бо́же наш,
Ты бо кре́пость немощству́ющих и исправле́ние.

Припев: Святы́й апо́столе Андре́е, моли́ Бо́га о на́с.

Мо́ре жите́йское препла́вая в ладии́ теле́сней,
вся́ческая пра́вящаго, Христа́, обре́л еси́ ко́рмчия, всеблаже́нне,
и к Нему́, ра́дуяся, приста́л еси́, Андре́е всече́стне.

Припев: Святы́й апо́столе Андре́е, моли́ Бо́га о на́с.

Ду́хи сло́вом прогоня́ются,
неду́зи бе́гают, душе́вных же страсте́й мно́жество дале́че от неду́жных отгоня́ются
да́нною тебе́ от Бо́га, Андре́е, благода́тию.

Сла́ва Отцу́ и Сы́ну и Свято́му Ду́ху.

Я́ко волна́ ти́хая, кро́тким ду́хом дви́жимь, блаже́нне,
изсуши́л еси́ моря́ лука́вая многобо́жия Боже́ственными струя́ми
и ре́ки Богозна́ния всем источи́л еси́.

И ны́не и при́сно и во ве́ки веко́в. Ами́нь.

Богородичен: Веселя́тся о Тебе́, Де́во Пречи́стая, ро́да на́шего пра́отцы,
Еде́м восприе́мше Тобо́ю, его́же преступле́нием погуби́ша,
Ты бо Чи́стая и пре́жде Рождества́ и по Рождестве́ еси́.

Кондак, глас 2

Му́жества тезоимени́таго Богоглаго́льника
и Це́ркве возсле́дователя верхо́внаго,
Петро́ва сро́дника восхва́лим,
зане́ я́коже дре́вле сему́ и ны́не нам воззва́:
прииди́те, обрето́хом Жела́емаго.

Икос

Дре́вле у́бо Дави́д востяга́ет гре́шнаго, я́ко мене́,
пове́дати Бо́жия благосло́вне оправда́ния,
оба́че к ве́ре учи́т па́ки
и слеза́ми мно́жайшими изглаго́льствует:
днесь бо глас Его́ а́ще услы́шите,
серде́ц не ожесточи́те, я́ко не́когда Изра́иль преогорчи́.
Наво́дит же про́чее во псалме́:
Го́сподеви вся земля́ воспо́йте,
прииди́те, обрето́хом Жела́емаго.

Песнь 7

Ирмос: Тебе́, у́мную, Богоро́дице, пещь
разсмотря́ем, ве́рнии,
я́коже бо о́троки спасе́ три Превозноси́мый,
мир обнови́, во чре́ве Твое́м всеце́л,
хва́льный отце́в Бог и препросла́влен.

Припев: Святы́й апо́столе Андре́е, моли́ Бо́га о на́с.

Нелжи́во я́вственно испо́лнися обеща́ние Твое́, Христе́,
бу́ри бо учени́к Твой Боже́ственнейший,
сло́вом запреща́я, на кро́ткую тишину́ преложи́,
хва́льный отце́в Боже и препросла́вленный.

Припев: Святы́й апо́столе Андре́е, моли́ Бо́га о на́с.

На у́мную Сио́на, апо́столе, взы́ти го́ру повеле́н,
спасе́ния же прии́м ча́шу,
ра́дуяся, подае́ши, преходя́ сме́ртию к Боже́ственней жи́зни,
хва́льнаго отце́в Бо́га и препросла́вленнаго.

Припев: Святы́й апо́столе Андре́е, моли́ Бо́га о на́с.

Тя слове́сную реку́ показа́ Боже́ственная вода́ жи́зни,
преле́стныя ре́ки пото́ки изсуша́ющую, блаже́нне, пропове́дания
и вопию́щия напая́ющую:
хва́льный отце́в Бо́же и препросла́вленный.

Сла́ва Отцу́ и Сы́ну и Свято́му Ду́ху.

Ты земноро́ден сый, апо́столе, преесте́ственно чудоде́йствуеши,
любо́вию бо сраствори́вся, Тому́ после́довал еси́, возлюби́вшему тя Христу́,
хва́льный, воспе́вая, Бог и препросла́вленный.

И ны́не и при́сно и во ве́ки веко́в. Ами́нь.

Богородичен: Тя Иа́ков, Богоро́дице, ле́ствицу проро́чески разуме́,
Тобо́ю бо на земли́ Превыша́емый яви́ся челове́ком и поживе́, я́коже благоволи́:
хва́льный отце́в Бог и препросла́вленный.

Песнь 8

Ирмос: В пещи́ о́троцы Изра́илевы,
я́коже в горни́ле,
добро́тою благоче́стия чисте́е зла́та блеща́хуся, глаго́люще:
благослови́те, вся дела́ Госпо́дня, Го́спода,
по́йте и превозноси́те во вся ве́ки.

Припев: Святы́й апо́столе Андре́е, моли́ Бо́га о на́с.

Светоно́сная и веселотво́рная луча́ врачева́ний, Андре́е, Христо́в апо́столе,
осиява́ет нас Боже́ственная па́мять твоя́, вопию́щих:
вся дела́ Госпо́дня, Го́спода по́йте и превозноси́те во вся ве́ки.

Припев: Святы́й апо́столе Андре́е, моли́ Бо́га о на́с.

Челове́ческое естество́ получи́в, того́ превозше́л еси́ зако́ны,
и ко А́нгельстей преше́л еси́ ски́нии, Андре́е апо́столе, и зове́ши:
вся дела́ Госпо́дня, Го́спода по́йте и превозноси́те во вся ве́ки.

Припев: Святы́й апо́столе Андре́е, моли́ Бо́га о на́с.

Е́же с высоты́ Ду́ха Бо́жия дохнове́ние тя пре́жде о́гненно просвети́,
ри́тора, Богоглаго́ливе, показу́ет те́пла, вопию́ща, апо́столе, Христу́ твоему́:
вся дела́ Госпо́дня, Го́спода по́йте и превозноси́те во вся ве́ки.

Сла́ва Отцу́ и Сы́ну и Свято́му Ду́ху.

Светолу́чен, я́коже мо́лния, во свет язы́ков изше́л еси́,
тьму неве́дения отгоня́, и ве́рныя просвеща́я, зову́щия:
благослови́те, вся дела́ Госпо́дня, Го́спода, по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Ра́дуйся, престо́ле сла́вы Бо́жия, ра́дуйся, ве́рных стено́,
Е́юже Свет су́щим во тьме возсия́,– Христо́с, Тебе́ блажа́щим и вопию́щим:
вся дела́ Госпо́дня, Го́спода по́йте и превозноси́те Его́ во ве́ки.

Песнь 9

Ирмос: О́браз чи́стаго рождества́ Твоего́
огнепали́мая купина́ показа́ неопа́льная;
и ны́не на нас напа́стей свире́пеющую угаси́ти, мо́лимся, пещь,
да Тя, Богоро́дице,
непреста́нно велича́ем.

Припев: Святы́й апо́столе Андре́е, моли́ Бо́га о на́с.

Я́ко учени́к всеизя́щнейший,
на Кресте́ хоте́нием распе́ншемуся Влады́це твоему́ да́же до сме́рти после́дуя,
возше́л еси́, ра́дуяся, на высоту́ креста́,
идя́й ше́ствием на Небеса́, блаже́нне апо́столе.

Припев: Святы́й апо́столе Андре́е, моли́ Бо́га о на́с.

Дверь Еде́ма тебе́ отве́рзеся, и предложи́ся ле́ствица небе́сная,
и прия́ша тя небе́сныя оби́тели,
и предста́л еси́, ра́дуяся, апо́столе, Христу́ Жизнода́вцу
о ми́ре моли́твенник изя́щнейший.

Припев: Святы́й апо́столе Андре́е, моли́ Бо́га о на́с.

Ра́вными просла́вился еси́ страда́ньми Учи́теля твоего́, блаже́нне Андре́е всему́дре,
кресто́м бо Боже́ственный коне́ц прия́л еси́ и прича́стием Бог был еси́.
Те́мже тя мо́лим о нас при́сно моли́ся.

Сла́ва Отцу́ и Сы́ну и Свято́му Ду́ху.

Ра́дуяся, дво́ице всеизря́днейшая, на Небесе́х насле́довавши ны́не гражда́нство,
назира́ете же венце́в произволе́ние,
тех побежда́ющи си́лу, и Боже́ственных дарова́ний просвеща́ете светлостьми́.

И ны́не и при́сно и во ве́ки веко́в. Ами́нь.

Богородичен: Из ко́рене Дави́дова прозябла́ еси́ проро́ческаго, Де́ва, и Богооте́ческаго,
но и Дави́да я́ко и́стинно Ты просла́вила еси́,
я́ко ро́ждшая проро́чествуемаго Го́спода сла́вы,
Его́же пою́ще, досто́йне велича́ем.

Светилен

Сло́во Пребезнача́льное обре́т тя, всеблаже́нне,
первозва́нна показа́ всех апо́столов, Андре́е приснопа́мятне,
и, Сего́ стопа́м возсле́дуя, показа́лся еси́ путево́ждь заблу́ждших,
к Небе́сному сия́ возводя́ Боже́ственному ше́ствию.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Петро́ва скро́вника, ученико́в пе́рвейшаго,
самови́дца и слугу́ бы́вшаго Сло́ва, Андре́я апо́стола пресла́вно восхва́лим,
язы́ки бо просвети́ и, ра́спят быв,
кончи́ну подъе́млет, я́ко учени́к Влады́ки.

Акафист священномученику Клименту

Кондак 1

Избраннаго от иерархов западныя страны христианския, достославнаго священномученика Климента приидите, вернии, песньми восхвалим, прославляя предивную его веру и любовь ко Христу; потщимся подражати угоднику Божию и нелицемерно воззовем ему:

Радуйся, всеблаженне Клименте, священномучениче богоносне.

Икос 1

Уготовляя тя, яко сосуд избранный, Всевышний Господь положи, священномучениче Клименте, многи скорби от младых дний; честная матерь твоя Матфидия, сохраняя святость супружества и бегая нечистоты злаго человека, отыде в греческую страну со двема чады, оставльши тя, юнейшаго, на попечение отца твоего Фавста. Ублажая твоих родителей и вспоминая безматернее житие, глаголем ти:

Радуйся, лозо божественнаго винограда;

радуйся, яко финикс процвел еси благоплодный;

радуйся, маслина плодородна;

радуйся, храме Божественнаго Духа;

радуйся, на гору божественных добродетелей возшедый;

радуйся, чаше мудрости, источающая душам нашим спасение;

радуйся, божественными ученьми ко Христу многия приведый;

радуйся, благовестниче веры Христовой.

Радуйся, всеблаженне Клименте, священномучениче богоносне.

Кондак 2

Пловущей матери твоей дни некия по морю, воста буря зельна и волнение велие; и занесену бывшу кораблю волнами и ветром в неведомую страну, погибе корабль в полунощи и вся истопи, матерь же твоя Матфидия, от ветренныя волны приметаема, на камень возвержена бысть и обрете спасение у брега Асийския страны. Прославляя Всемилостиваго Бога, сохраньшаго ти матерь, святе, на утешение, взываем Ему: Аллилуиа.

Икос 2

Неведающь ничтоже о случившихся бедах Матфидии и чад, супруг ея уготовль корабль и взем мало имения, пойде сам на взыскание подружии своей и любезных чад; тя же, юнейшаго, остави в дому учащася книгам. Ублажая сиротство твое, священномучениче Христов, глаголем ти:

Радуйся, светодательное солнце запада;

радуйся, огнь воздержания, попаливый страстей стремление;

радуйся, яко смирна и ливан благоухаеши во дворех Господних;

радуйся, столпе благочестия;

радуйся, избранный сосуд благодати Христовой;

радуйся, храме Божественнаго Духа;

радуйся, заре, светло блистающая миру христианскому;

радуйся, чаше мудрости, источающая душам нашим спасение.

Радуйся, всеблаженне Клименте, священномучениче богоносне.

Кондак 3

Пришед в совершенный возраст и вся философская учения добре уведев, видя, яко несть отца ни матери, ты печален бяше, угодниче Божий, и утешиться не хотяше. Ключися же ти беседовати с некиим мужем благоразумным, иже рече, яко Божий Сын прииде на землю, проповедуя всем живот вечный и всем, послушающим Его, обещая неизреченная блага в будущем веце. То слышав, распалился еси ты желанием неизреченным известнее о Христе уведети, да разумно поеши Богу: Аллилуиа.

Икос 3

Остави убо дом свой, святителю Божий, умыслил еси идти в Иудею, в нейже благочестие Христово расширяшися. Бывшу же в море волнению и занесену бывшу ветром в Александрию, обрел еси тамо святаго апостола Варнаву, имже наставлен, притекл еси в Кесарию Стратонийскую и обрел еси тамо святаго апостола Петра; и крещен быв от него, последовал еси ему с прочими ученики, в нихже бяху и два брата твоя. Сего ради зовем ти:

Радуйся, отрясый языческое безбожие;

радуйся, на гору божественных добродетелей возшедый;

радуйся, верный учениче верховнаго апостола Петра;

радуйся, яко от него навыкл еси Божественному знанию;

радуйся, просвещенный ученьми великаго апостола;

радуйся, возсиявый на камени сем всехвальнем;

радуйся, явивый плоды учений Христовых;

радуйся, просветивый твоими богомудрыми устами многия.

Радуйся, всеблаженне Клименте, священномучениче богоносне.

Кондак 4

Преплавая море, апостол Петр вопрошаше тя, святе Клименте, о роде твоем, и послушая повести твоя, умиляшеся любви твоей к родителям. Бысть же, по Божию строению, приста корабль к некоему острову; изшедшу же святому апостолу на брег во град, обрете некую старицу, милостыню просящую, и, уразумев Духом, яко матерь есть учеником его, приведе ю к тебе; ты же, уведев родившую тя, прослезися, пад на ноги ея, лобызая и плача. Торжествуя сию твою радость велию, со умилением глаголем Богу: Аллилуиа.

Икос 4

Обрет матерь свою честную, добрый пастырь Христов и последователь Его, ты умолил еси святаго апостола Петра, да крестит ю; и, зело рано изшед к морю, в прикровенном месте крести апостол Матфидию во имя Отца и Сына и Святаго Духа; и отослав ю пред себе со чады в витальницу, сам иным путем идяше. Восхваляя любовь твою сыновнюю, зовем:

Радуйся, потщивыйся просветити матерь твою именем Христа;

радуйся, лозо божественнаго винограда;

радуйся, розго красная, износящая грозды догматов;

радуйся, явивый плоды учений Христовых;

радуйся, просветителю верных зарею догматов;

радуйся, каплющий вино спасительнаго божественнаго познания;

радуйся, отрясый языческое безбожие;

радуйся, приявый венец мучения за Триединаго Бога.

Радуйся, всеблаженне Клименте, священномучениче богоносне.

Кондак 5

Видев святое крещение матере твоея Матфидии, некий муж честен, приветствова любезно верховнаго апостола Петра, рече к нему: хочу убо мало побеседовати с тобою. Петр рече: глаголи, господине! И беседующу ему с тем человеком на долг час и прящуся о Бозе, позна же апостол, яко Фавст есть, и приводе ко Матфидии и чадам ея. Тогда бысть радость неизглаголанная всем и плач мног от радости. Сего ради благодаряще Бога, сохраняюща благочестивые родители и чада, зовем: Аллилуиа.

Икос 5

По нечаянном обретении подружии со чады, честный Фавст прослезися, благодаря Бога, и помале беседоваше с тобою, богоносне священномучениче, припаде ко апостолу, крещения прося, уверова бо несумненно во Единаго Бога. Мы же, радуяся, яко ты апостола рукама и отца своего привел еси ко Христу, умиленно глаголем:

Радуйся, во апостольстем учении упражнявыйся;

радуйся, преемниче апостольскаго престола;

радуйся, новый Петре, сияяй апостольскими даровании;

радуйся, священных учений описателю;

радуйся, вторый Моисею, законы божественныя всем изложивый;

радуйся, божественными ученьми ко Христу многия приведый;

радуйся, яко законоположника и учителя тя имамы;

радуйся, чаше мудрости, источающая душам нашим спасение.

Радуйся, всеблаженне Клименте, священномучениче богоносне.

Кондак 6

Уведев Христа распята и прияв святое крещение, родители твои, блаженне, возвратистася в Рим, и живяста зело благочестно, многи милостыни творяща. Ты же нераздельный был еси ученик Петров и всех его путей и благовестия Христова проповедник явился еси; и того ради постави тя епископа прежде своего распятия от Нерона. Сего ради Всемогущу Богу, устрояющу таковая, глаголем: Аллилуиа.

Икос 6

Скончавшуся святому апостолу Петру и по нем епископу Лину и Клиту, священномучениче, был еси кормчий Римския Церкве, правя добре кораблем Церкве Христовой посреде волнения и бури, яже бе тогда от мучителей возмущаема. Того ради восхваляем тя, угодниче Божий, сице:

Радуйся, великий постниче;

радуйся, огнь воздержания, попаливый страстей стремление;

радуйся, мученическим праведным венцем украшенный;

радуйся, потам трудов твоих угасивый пещь прелести;

радуйся, яко молитвами твоими бесы прогнаны быша;

радуйся, яко от твоея раки струи исцелений источаются;

радуйся, яко твоими молитвами Господь прозрение слепым дарует;

радуйся, мучеников похвале.

Радуйся, всеблаженне Клименте, священномучениче богоносне.

Кондак 7

Пасый Христово стадо со многими труды и терпением, окружаемь сый отвсюду, яко львы рыкающими и волки хищными, лютыми гонителями, ищущими поглотити тя и потребити веру Христову, ты, блаженне, пеклся еси непрестанно со многим тщанием о спасении душ человеческих и много неверных людей ко Христу обратил еси. Прославляя твоя труди и болезни, глаголем содействующу ти Богу: Аллилуиа.

Икос 7

Трудящуся ти на ниве Христове, ненавистнии врази наустиша некия от народа востати вражбою на тя, преемниче апостолов, и оклеветати тя, яко унижающа боги языческия. Ублажая ти, яко претерпевшаго беды и гонения за Церковь Христову, с любовию глаголем ти:

Радуйся, божественными ученьми ко Христу многия приведый;

радуйся, новый Петре, сияяй апостольскими даровании;

радуйся, созидателю храмов во славу Святыя Троицы;

радуйся, преемниче апостольскаго престола;

радуйся, учением, труды, чудесы добродетельным житием умноживый Церковь Христову;

радуйся, страдальче за имя Христово;

радуйся, явивый плоды учений Христовых;

радуйся, описателю деяний святых мучеников, избиваемых за Христа.

Радуйся, всеблаженне Клименте, священномучениче богоносне.

Кондак 8

Не терпя молвы и мятежа людскаго, повеле епарх градский привести тя к себе и нача глаголати: из корене благородна изошел еси, но прельстился еси, и неведомо коего Бога чтишь новаго, некоего, глаголемаго Христа, противнаго богом нашим. Ты же, достославне Клименте, отвеща ему: Единаго ; истиннаго Бога Отца ведаю и Ему с Единосущным Сыном и Святым Духом покланяюся и пою: Аллилуиа.

Икос 8

Множайшая о Бозе Вседержителе глаголюща, не обрете в тебе епарх вины и посла известие к царю Траяну, возвещающи о тебе, исповедниче Христов, яко воста на тя народ богов ради и не престает вопияти; обаче вернаго свидетельства не обретается. Радуяся посрамлению клеветников твоих, зовем ти:

Радуйся, благовестниче веры Христовой;

радуйся, умягчивый сердце грознаго епарха;

радуйся, обличителю идольскаго нечестия;

радуйся, посрамителю клеветников;

радуйся, не убоявыйся грознаго суда римскаго царя;

радуйся, повергнувый на осуждение противника Христова;

радуйся, приявый венец мучения за Триединаго Бога;

радуйся, созидателю храмов во славу Святыя Троицы.

Радуйся, всеблаженне Клименте, священномучениче богоносне.

Кондак 9

Слышав царь Траян о тебе, яко о благовестнике неведомаго ему Бога, отписа епарху: или да богом идольским жертву принесет, или на заточение на место пусто близ Херсониса послан будет. Таков ответ уведев, епарх моляше тя, да не избираеши самовольнаго того изгнания, но да пожреши богом и свободен будеши. Ты же, святе Клименте, извествоваше епарху, яко изгнания того не боишися и на всяком месте будеши благовестити о Христе и пети Ему: Аллилуиа.

Икос 9

Словеса твоя, богоносне Клименте, умилиша епарха и плакаше той, глаголя ти сице: Бог, Емуже ты всем сердцем служиши, поможет ти во изгнании, на неже осужден еси. Восхваляя тя, яко Петра, камень веры, с веселием глаголем:

Радуйся, непокоривыйся богопротивному велению цареву,

радуйся, за Христа изгнание приявый;

радуйся, предпочтивый заточение перетерпети, неже без Христова света на свободе жити;

радуйся, мученическим праведным венцем украшенный;

радуйся, изгнанниче за веру апостольскую;

радуйся, умиливый врага Христовы Церкве;

радуйся, страдальче за имя Христово;

радуйся, сопутствуемь на заточение многими от благоверных.

Радуйся, всеблаженне Клименте, священномучениче богоносне.

Кондак 10

Достигшу ти, святе, на то место, на неже в заточение осужден был еси, ныне нарицаемое Инкерман богохранимый, обрел еси тамо паче двух тысящ христиан, осужденныя на тесание камения в горах оных; и ты с ними к тому приставлен был еси. Тако неисповедимыми путьми Господь Бог посылает заточенным утешение благодатное, да и мы в печалех будем благонадежны, и да поем Ему чистым сердцем: Аллилуиа.

Икос 10

Видевше христиане инкерманстии новаго сожителя и ведяще тя иерарха, угодника Божия, вси единодушно со слезами и воздыхании приступиша к тебе, глаголюще: помолися о нас, святителю, да достойны явимся обетования Христова. Ты же рекл еси им: несмь достоин таковыя Владыки моего благодати, яко сподобился быти причастник венца вашего; и работая с ними, утешая и утверждая их полезными словесы. Сего ради глаголем ти, угодниче Божий

Радуйся, учителю христианскаго смирения;

радуйся, столпе благочестия;

радуйся, просветивый твоими Богомудрыми устами многая;

радуйся, утешителю в заточении сущих;

радуйся, чудесно на утоление жажды заключенным воду открывый;

радуйся, многих обращенных ко Христу в водах тех крестивый;

радуйся, живыя воды новый источник с собою принесый;

радуйся, яко тобою вся страна инкерманская приняла есть святую веру.

Радуйся, всеблаженне Клименте, священномучениче богоносне.

Кондак 11

Уведев Траян кесарь, яко и в Инкермане множество людей тобою во Христа вероваша, посла некоего игемона в ту страну, иже пришед многих христиан изби; тебе же, угодника Божия преславнаго, повеле посадити в ладью и везти на средину моря, и тамо, привязав котву к вые твоей, воврещи во глубину и утопити, да не обрящут христиане тела твоего. Приемля сей венец мученичества, ты по обычаю умиленною душею воспел еси Богу: Аллилуиа.

Икос 11

Бывшу утоплению твоему, священномучениче Клименте, стояху вернии на брезе, рыдающе плачем велиим; посем ученицы твои Корнелий и Фив глаголаста народу: помолимся единодушно, да явит нам Господь честное тело мученика Своего. Молящуся же народу, уступи море недра своя и показа тело твое; хотящим же верным честное мученическое тело оттуда взята, бысть откровение учеником, да оставят быти тамо тело твое, яко всякое лето имать тако море отступати, дающе путь хотящим приходити на поклонение. Того ради ублажаем тя сице:

Радуйся, благовестниче веры Христовой;

радуйся, идолы поправый;

радуйся, единый за многих пострадавый;

радуйся, приявый венец мучения за Триединаго Бога;

радуйся, оплаканный велиим рыданием благочестивых;

радуйся, прославленный Богом;

радуйся, яко тобою несказанная чудеса совершаются;

радуйся, заре, светло блистающая миру христианскому.

Радуйся, всеблаженне Клименте, священномучениче богоносне.

Кондак 12

Царствующу Никифору царю греческому, приспевшей памяти твоей, святителю отче Клименте, не отступи море, якоже во вся прешедшая лета; и бяше тако до пятидесяти лет и вящше. Егда же наста в Херсонисе епископ Георгий блаженный, той печален бысть вельми о сем, яко море не отступает от мощей толикаго угодника Божия, аки под спудом водами покровенны суть. Сего ради воззва святитель люди к молитве, да усердно поют Богу: Аллилуиа.

Икос 12

Во дни блаженнаго Георгия, иже в Херсонисе епископствовал бе, приидоста в той град два учителя словенская, святии Кирилл и Мефодий; с ними купно собра святитель вся благоверныя люди, и идоша со псалмы и песньми на край моря, хотяще получити тело твое, священномучениче; но не разступися море. Зашедшу же солнцу, вседоша в корабль, и в полунощи свет возсия от моря, и явися первая глава, потом же вси мощи твои, угодниче Божий. Радуяся обретению мощей твоих, восхваляем тя, чудотворче святый, тако:

Радуйся, яко тобою хромии шествуют;

радуйся, яко тобою всяким недугом болящие здрави бывают,

радуйся, яко молитвами твоими бесы прогнаны быша;

радуйся, избранный сосуд благодати Господа нашего Иисуса Христа;

Радуйся, всеблаженне Клименте, священномучениче богоносне.

Кондак 13

О всехвальне угодниче Божий, священномучениче Клименте, приими хвалы сии от нас, живущих в стране твоего заточения, ублажающих память твою и молящихся в обители имене твоего, и умоли Всевышняго Господа Бога умножити веру в нас, да всегда прославляем Его, дивнаго в мученицех Своих, псаломскими песньми: Аллилуиа.

[Се́й конда́к глаго́лется три́жды.]

Икос 1

Уготовляя тя, яко сосуд избранный, Всевышний Господь положи, священномучениче Клименте, многи скорби от младых дний; честная матерь твоя Матфидия, сохраняя святость супружества и бегая нечистоты злаго человека, отыде в греческую страну со двема чады, оставльши тя, юнейшаго, на попечение отца твоего Фавста. Ублажая твоих родителей и вспоминая безматернее житие, глаголем ти:

Радуйся, лозо божественнаго винограда;

радуйся, яко финикс процвел еси благоплодный;

радуйся, маслина плодородна;

радуйся, храме Божественнаго Духа;

радуйся, на гору божественных добродетелей возшедый;

радуйся, чаше мудрости, источающая душам нашим спасение;

радуйся, божественными ученьми ко Христу многия приведый;

радуйся, благовестниче веры Христовой.

Радуйся, всеблаженне Клименте, священномучениче богоносне.

Кондак 1

Избраннаго от иерархов западныя страны христианския, достославнаго священномученика Климента приидите, вернии, песньми восхвалим, прославляя предивную его веру и любовь ко Христу; потщимся подражати угоднику Божию и нелицемерно воззовем ему:

Радуйся, всеблаженне Клименте, священномучениче богоносне.