Православный Мир
Житие
Сия мученица почитается в нашем простом народе заступницею от вреда огненного. Она жила в Сицилии при безбожном гонителе христиан Декии и происходила от знатных родителей, воспитавших ее в истинном благочестии. Наступило гонение Декия. Св. Агафия стала готовиться к мученической кончине. Правитель области Квинтиан, увлеченный красотою юной христианки, решил отвлечь ее от христианской веры и с этой целью поместил ее в дом одной язычницы-вдовы, проводившей беспутную жизнь. Однако жизнь в языческом доме, среди веселья и роскоши, не расположила к себе св. Агафию. Не помогли также и увещевания языческой вдовы. Видя это, правитель задумал прибегнуть к более решительным мерам. Он стал допрашивать Агафию, почему она не кланяется идолам. Святая ответствовала:
– Ваши идолы не боги, а бесчувственные чурбаны, и сами вы рабы этих чурбанов.
Раздраженный Квинтиан подверг св. Агафию жестоким мучениям и затем заключил в темницу. Видя, однако, ее непреклонность, он велел рвать клещами ее грудь.
– Бесчувственный мучитель! – воскликнула Агафия. – Ты не стыдишься отрезывать у женщины сосцы, которыми ты сам питался у своей матери...
Когда потом Агафию бросили в темницу, то ей явился апостол Петр и исцелил ее раны. Необычайный свет при этом озарил темницу; воины, испуганные этим, разбежались. Святая Агафия, однако, этим не воспользовалась, покорно ожидая мученического венца.
На пятый день ее позвали опять к мучителю. Когда же она снова исповедала Христа, то мучитель велел насыпать на земле горячих углей и раскаленных черепиц и затем на их груду бросить нагую Агафию. Вдруг раздались удары землетрясения. Испуганный этим, а также возмущением граждан, правитель отправил Агафию опять в темницу, где святая и скончалась, пламенно помолившись Богу и возблагодарив Его за ту силу и терпение, с какою она переносила мучения.
На ее гробнице впоследствии была построена церковь стараниями ее почитателей-христиан.
Гнев Божий скоро поразил нечестивого мучителя Квинтиана. Когда он отправился на родину св. Агафии, в г. Палермо, чтобы взять себе ее имущество, то при одной переправе он упал в воду и утонул. Однажды на о. Сицилии началось извержение вулкана Этны. Жители острова взяли одежду с гробницы св. Агафии и держали ее против огня; извержение прекратилось. Это и послужило основанием для веры в помощь св. Агафии против бедствий от огня.
Жизнь этой мученицы научает нас терпеливо переносить все страдания и невзгоды жизни, не падать духом, не унывать, а надеяться на помощь Божию; она научает нас веровать, что страдания посылаются Богом для нашего же спасения.
Песнопения
Тропарь, глас 4
А́гница Твоя́, Иису́се, Ага́фия,
зове́т ве́лиим гла́сом:
Тебе́, Женише́ мой, люблю́,
и Тебе́ и́щущи страда́льчествую,
и сраспина́юся и спогреба́юся Креще́нию Твоему́,
и стражду́ Тебе́ ра́ди, я́ко да ца́рствую в Тебе́,
и умира́ю за Тя, да и живу́ с Тобо́ю,
но я́ко же́ртву непоро́чную приими́ мя, с любо́вию поже́ршуюся Тебе́.
Тоя́ моли́твами, я́ко Ми́лостив, спаси́ ду́ши на́ша.
Ин тропарь, глас 3 Ши́пок де́вства благоуха́нный,/ неве́ста непоро́чная Жизнода́вца показа́лася еси,/ Ага́фие всехва́льная./ Благи́х бо Исто́чник возлюби́вши,/ му́ченически в ми́ре просия́ла еси./ Му́ченице сла́вная,/ моли́твами твои́ми святы́ми// ублажи́ любо́вию велича́ющих по́двиги твоя́.
Кондак, глас 4
Да украси́тся днесь Це́рковь порфи́рою сла́вною, омоче́ною от чи́стых крове́й Ага́фии му́ченицы:
ра́дуйся, вопию́щи, Ката́нская похвало́.
Канон
Канон святой мученице Агафии Панормской (Палермской), Сицилийской
Минея, 5 Февраля.
Глас 2
Песнь 1
Ирмос: Гряди́те, лю́дие,
пои́м песнь Христу́ Бо́гу,
разде́льшему мо́ре и наста́вльшему лю́ди,
я́же изведе́ из рабо́ты еги́петския,
я́ко просла́вися.
Припев: Свята́я му́ченице Ага́фие, моли́ Бо́га о на́с.
Благи́х пе́рвую вину́ возжела́вши,
благоимени́таго зва́ния, му́ченице, сподо́билася еси́, несказа́ннаго промышле́ния,
нра́вов твои́х проразуме́вши благосты́ню.
Припев: Свята́я му́ченице Ага́фие, моли́ Бо́га о на́с.
Взя́лася еси́, чи́стая, к житию́ пресве́тлому, плотско́е мудрова́ние презре́вши
и к жела́ннейшему Жениху́ твоему́ кре́пко взира́ющи.
Сла́ва Отцу́ и Сы́ну и Свято́му Ду́ху.
Неве́ста Христо́ва, Боже́ственною бла́гостию украси́лася еси́, и де́вства добро́тами,
и Боже́ственными кровьми́ честна́го муче́ния,
сугу́быми венцы́ венча́ема, сла́вная.
И ны́не и при́сно и во ве́ки веко́в. Ами́нь.
Богородичен: Боголе́пное селе́ние, Чи́стая, Ты была́ еси́,
Небе́с простра́ннейшее и чисте́йшее, Богоро́дице Де́во,
и ны́не о Тебе́ ра́дуется де́вственный лик.
Песнь 3
Ирмос: Утверди́ нас в Тебе́, Го́споди,
Дре́вом умерщвле́й грех,
и страх Твой всади́
в сердца́ нас, пою́щих Тя.
Припев: Свята́я му́ченице Ага́фие, моли́ Бо́га о на́с.
Ага́фие, я́сный и красне́йший Боже́ственных му́ченик цвет и сла́ва,
души́ мое́я́ ты озлобле́ние исцели́вши, му́ченице, удобри́.
Припев: Свята́я му́ченице Ага́фие, моли́ Бо́га о на́с.
Ро́дными доброде́тельми себе́ уясни́ла еси́, Ага́фие,
и му́ченица пронарекла́ся еси́,
о привре́менных небре́гши и Бо́жие Ца́рство возлюби́вши.
Сла́ва Отцу́ и Сы́ну и Свято́му Ду́ху.
Всех кра́сных Христа́ предпочла́ еси́, Ага́фие,
привлечена́ Боже́ственным жела́нием,
и мучи́телей свире́пства благоде́рзостно и му́жески попра́ла еси́.
И ны́не и при́сно и во ве́ки веко́в. Ами́нь.
Богородичен: Богоневе́сто Чи́стая, Бо́га, Его́же родила́ еси́,
моли́ изба́вити Тя пою́щия
от искуше́ний, и обстоя́ний, и страсте́й, и бед,
Всеблаже́нная.
Седален, глас 3
Сла́вою ве́ры и благоче́стием,
преподо́бством, и де́вством, и усе́рдием укра́шена страда́ния,
нарекла́ся еси́ ум преподо́бен, самоизво́лен,
вои́стинну честь к Бо́гу, оте́честву избавле́ние,
Христу́ я́ко неве́ста моля́щися дарова́ти нам ве́лию ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Боже́ственнаго естества́ не отлу́чься,
плоть быв во чре́ве Твое́м,
но Бог вочелове́чься и пребы́сть,
и́же по Рождестве́ Ма́терь Тя Де́ву,
я́ко пре́жде Рождества́, сохрани́в Всенепоро́чну, Е́дин Госпо́дь,
Того́ приле́жно моли́ дарова́ти нам ве́лию ми́лость.
Песнь 4
Ирмос: Пою́ Тя, слу́хом бо, Го́споди, услы́шах и ужасо́хся,
до мене́ бо и́деши, мене́ ища́, заблу́ждшаго.
Тем мно́гое Твое́ снизхожде́ние, е́же на мя,
прославля́ю, Многоми́лостиве.
Припев: Свята́я му́ченице Ага́фие, моли́ Бо́га о на́с.
Посрами́ся льсти́ваго зми́я безу́мие и обличи́ся,
де́вы бо сего́ ны́не свире́пство попира́ют,
Христу́, от Де́вы возсия́вшу на земли́ и всех озари́вшу.
Припев: Свята́я му́ченице Ага́фие, моли́ Бо́га о на́с.
Зако́нно целому́дрие нескве́рно удержа́вши, страстоте́рпице,
ду́хи, ра́дующися, низложи́ла еси́ лука́вствия,
Христо́вою вооружи́вшися благода́тию
и Крест Сего́ на ра́мех взе́мши.
Сла́ва Отцу́ и Сы́ну и Свято́му Ду́ху.
Бу́ди ми предста́тельница всему́драя, лю́тых мя изыма́ющи и напа́стей,
бу́ри же, и ско́рби, и наси́лия изба́ви вра́жия,
я́ко да изба́влься, воспою́ тя,
я́ко благу́ю предста́тельницу, благоимени́тая.
И ны́не и при́сно и во ве́ки веко́в. Ами́нь.
Богородичен: Неизме́рно А́нгельския, Пречи́стая, све́тлости превозшла́ еси́,
мы́сленнаго Со́лнца ро́ждши несказа́нно, Христа́,
заря́ми Божества́ ве́рных мы́сли озаря́ющаго.
Песнь 5
Ирмос: Све́та Пода́телю и веко́в Тво́рче Го́споди
во све́те Твои́х повеле́ний наста́ви нас:
ра́зве бо Тебе́ ино́го бо́га не зна́ем.
Припев: Свята́я му́ченице Ага́фие, моли́ Бо́га о на́с.
Боже́ственными веле́нии пра́вима сла́вная,
обра́зно плотска́го пристра́стия разреши́ла еси́ юз Ага́фие,
ма́слина я́вльшися плодови́та.
Припев: Свята́я му́ченице Ага́фие, моли́ Бо́га о на́с.
Все́ю любо́вию Христо́вою светле́йшая, блиста́ния зря́щи,
я́же на земли́ до́лу влеку́щия презре́ла еси́ сла́сти,
О́наго и Еди́наго жела́ющи красоты́.
Сла́ва Отцу́ и Сы́ну и Свято́му Ду́ху.
Да неизрече́нную сподо́бишися жизнь, сла́вная,
избра́нных ви́дети,
му́ки претерпе́ла еси́ кре́пко, ра́дующися
Ага́фие всехва́льная.
И ны́не и при́сно и во ве́ки веко́в. Ами́нь.
Богородичен: Тебе́, ро́ждшей Христа́, всех Соде́теля, зове́м:
ра́дуйся, Чи́стая, ра́дуйся, Свет возсия́вшая нам;
ра́дуйся, вмести́вшая Бо́га Невмести́маго.
Песнь 6
Ирмос: В бе́здне грехо́вней валя́яся,
неизсле́дную милосе́рдия Твоего́ призыва́ю бе́здну:
от тли, Бо́же, мя возведи́.
Припев: Свята́я му́ченице Ага́фие, моли́ Бо́га о на́с.
Суему́дрен сый мучи́тель тя, до́брую де́ву, укра́сти наде́яшеся,
но безсту́ден обличи́ся, прирази́вся тве́рдому твоему́ ра́зуму.
Припев: Свята́я му́ченице Ага́фие, моли́ Бо́га о на́с.
Излия́ся благода́ть во устна́х твои́х, му́ченице благоимени́тая,
я́сно бо обличи́ла еси́ я́ве безсту́днаго,
Богонауче́нным сло́вом обогати́вшися.
Сла́ва Отцу́ и Сы́ну и Свято́му Ду́ху.
Ка́мень всече́стен яви́лася еси́, всехва́льная,
ум самоизво́лен преподо́бен иму́щи
и оте́честву избавле́ние тве́рдо бы́вши,
Ага́фие честна́я.
И ны́не и при́сно и во ве́ки веко́в. Ами́нь.
Богородичен: Псало́мски, восхваля́юще, вопие́м Ти:
ра́дуйся, ту́чнейшая горо́ Христа́ Бо́га,
в ню́же всели́тися благоволи́ за на́ше спасе́ние, Богоневе́сто.
Кондак, глас 4
Да украси́тся днесь Це́рковь порфи́рою сла́вною, омоче́ною от чи́стых крове́й Ага́фии му́ченицы:
ра́дуйся, вопию́щи, Ката́нская похвало́.
Песнь 7
Ирмос: О́бразу злато́му, на по́ле Деи́ре служи́му,
трие́ Твои́ о́троцы небрего́ша безбо́жнаго веле́ния,
посреде́ же огня́ вве́ржени, ороша́еми, поя́ху:
благослове́н еси́, Бо́же оте́ц на́ших.
Припев: Свята́я му́ченице Ага́фие, моли́ Бо́га о на́с.
Яко зело́ све́тло веша́ющи
и я́ве мучи́теля устраши́ла еси́ сло́вом прему́дрости и благода́ти, терпе́нием же мук у́глие о́гненное неболе́зненно терпя́щи, взыва́ла еси́:
благослове́н еси́, Бо́же оте́ц на́ших.
Припев: Свята́я му́ченице Ага́фие, моли́ Бо́га о на́с.
Неи́стовством лю́тым содержи́мь, злосе́рдый недоумева́ше лю́те,
твою́ ви́дя ю́ность и сосце́в твои́х прозябе́ние,
ра́дующи бо ся, му́ченице, вопия́ла еси́ твоему́ Жениху́, взыва́ющи:
благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Предста́ све́тло Христо́в учени́к тебе́, стрего́мей,
твоя́ исцеля́я лю́тыя ра́ны, я́же подъя́ла еси́,
непобеди́мая му́ченице, Спа́сова деви́це,
ра́дующися и глаго́лющи:
благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Умерщвля́ется Ада́м, преступи́в за́поведь Вседержи́теля,
Ты же, ро́ждши ве́чную Жизнь, Де́во Всенепоро́чная,
сего́ изба́вила еси́ от сме́рти, Сы́ну Твоему́ взыва́юща:
благослове́н еси́, Бо́же оте́ц на́ших.
Песнь 8
Ирмос: В пещь о́гненную ко отроко́м евре́йским снизше́дшаго
и пла́мень в ро́су прело́жшаго Бо́га,
по́йте дела́ я́ко Го́спода
и превозноси́те во вся ве́ки.
Припев: Свята́я му́ченице Ага́фие, моли́ Бо́га о на́с.
В весе́лии и ра́дости преве́чней жи́ти сподо́бившися,
неизрече́нною твое́ю сла́вою озари́тися чту́щим тя, Ага́фие, Го́сподеви помоли́ся
и нетле́нныя жи́зни наслади́тися.
Припев: Свята́я му́ченице Ага́фие, моли́ Бо́га о на́с.
Умо́м, и се́рдцем, и душе́ю возлю́бльши Христа́ па́че сло́ва,
Многорачи́тельнаго, Еди́наго, впери́лася еси́ Тому́, вопию́щи:
теку́ в след Тебе́ и вселю́ся с Тобо́ю во ве́ки.
Сла́ва Отцу́ и Сы́ну и Свято́му Ду́ху.
Преесте́ственными ря́снами и кра́сною оде́ждею укра́шена, я́ко царе́ва дщи,
в че́сти Христо́ве предстои́ши, Ага́фие, взыва́ющи:
Тя превозно́сим, Го́спода, во ве́ки.
И ны́не и при́сно и во ве́ки веко́в. Ами́нь.
Богородичен: Ми́ро излия́нное нам, Богоро́дице, Христа́ во чре́ве нося́щи,
облагоуха́ла еси́ мир Богодохнове́нными воня́ми.
Те́мже Тебе́, Де́во, взыва́ем:
ра́дуйся, мирополо́жнице мирово́ннаго ми́ра.
Песнь 9
Ирмос: От Бо́га Бо́га Сло́ва,
неизрече́нною му́дростию, прише́дшаго обнови́ти Ада́ма,
я́дию в тле́ние па́дшаго лю́те,
от Святы́я Де́вы неизрече́нно воплоти́вшагося нас ра́ди,
ве́рнии, единому́дренно пе́сньми велича́ем.
Припев: Свята́я му́ченице Ага́фие, моли́ Бо́га о на́с.
Победи́тельными венцы́ украси́вшися, Богому́драя Ага́фие, десни́цею живонача́льною
ны́не изба́витися помоли́ся я́коже оте́честву твоему́ от бу́ри,
я́ко пе́рвее огня́ уста́вила еси́ стремле́ние,
да вси тя пе́сньми непреста́нно велича́ем.
Припев: Свята́я му́ченице Ага́фие, моли́ Бо́га о на́с.
Боже́ственным про́мыслом снабдева́я вся́ческая, Христо́с,
ны́не воздая́ твое́й, му́ченице, до́блести,
вселя́ет тя в се́лех Небе́сных я́ко неве́сту всенепоро́чную Свою́
и ра́доватися со А́нгелы и с му́ченики сподо́бил есть.
Сла́ва Отцу́ и Сы́ну и Свято́му Ду́ху.
Ми́лостивна, о страстоте́рпице, Судию́ вся́ческих – Христа́ сотвори́ мне, честна́я,
мольба́ми твои́ми, пресла́вная,
и прегреше́ний мои́х мно́жество очи́стити
Благоутро́бнаго при́сно моля́щи не преста́й, му́чеников удобре́ние.
И ны́не и при́сно и во ве́ки веко́в. Ами́нь.
Богородичен: Вопло́щься неизрече́нно от чи́стых Твои́х крове́й,
я́ко со́лнце, яви́ся нам, Пречи́стая Ма́ти безневе́стная,
пре́жде всех век Отцу́ Собезнача́льный Сын
и, тьму отгна́в, просвети́ вся́ческая.
Светилен
Сосце́в твои́х отъя́тие претерпе́ла еси́, до́брая деви́це,
и вся́ки ины́я му́ки Христа́ ра́ди, страстоте́рпице,
тем и в черто́г тя кра́сный всели́ твой Жени́х, сла́вная,
лику́ющу со А́нгелы, де́во му́ченице Ага́фие.
