Икона Богородицы Взыскание погибших

Празднование

Тропарь, глас 7

Ра́дуйся, Благода́тная Богоро́дице Де́во,
во объя́тиях Свои́х Предве́чнаго Младе́нца и Бо́га носи́вшая.
Проси́ Его́ да́ти ми́ру умире́ние
и душа́м на́шим спасе́ние.
Сын бо Тебе́, Богома́ти, веща́ет,
я́ко вся проше́ния Твоя́ во благо́е испо́лнит.
Сего́ ра́ди и мы припа́дающе, мо́лимся
и наде́ющиися на Тя, да не поги́бнем,
и́мя Твое́ имену́ем:
Ты бо еси́ Влады́чице,

Взыска́ние поги́бших.

Ин тропарь, глас 4 Взыщи́ нас, погиба́ющих, Пресвята́я Де́во,/ не по грехо́м бо на́шим наказу́еши нас,/ но по человеколю́бию ми́луеши,/ изба́ви нас от а́да, боле́зни и ну́жды// и спаси́ нас.

Кондак, глас 6

Предста́тельство христиа́н непосты́дное,
хода́тайство ко Творцу́ непрело́жное,
не пре́зри гре́шных моле́ний гла́сы,
но предвари́, я́ко Блага́я, на по́мощь нас,
ве́рно зову́щих Ти:
ускори́ на моли́тву и потщи́ся на умоле́ние,

предста́тельствующи при́сно, Богоро́дице, чту́щих Тя.

Ин кондак, глас 6 Не и́мамы ины́я по́мощи,/ не и́мамы ины́я наде́жды,/ ра́зве Тебе́, Пречи́стая Де́во,/ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,// да не постыди́мся.

Молитва

О, Пресвята́я и Преблагослове́нная Де́во, Влады́чице Богоро́дице! При́зри ми́лостивным Твои́м о́ком на нас, предстоя́щих пред свято́ю ико́ною Твое́ю и со умиле́нием моля́щихся Тебе́; воздви́гни нас из глубины́ грехо́вныя, просвети́ ум наш, омраче́нный страстьми́, и уврачу́й я́звы душ и теле́с на́ших. Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице. Ты ве́си вся не́мощи и согреше́ния на́ша, к Тебе́ прибега́ем и вопие́м: не оста́ви нас Твое́ю Небе́сною по́мощию, но предста́ни нам при́сно и Твои́м неизрече́нным милосе́рдием и щедро́тами спаси́ и поми́луй нас, погиба́ющих. Да́руй нам исправле́ние грехо́вныя жи́зни на́шея и изба́ви нас от скорбе́й, бед и боле́зней, от внеза́пныя сме́рти, а́да и ве́чныя му́ки. Ты бо, Цари́це и Влады́чице, ско́рая Помо́щница и Засту́пница еси́ всем притека́ющим к Тебе́ и кре́пкое прибе́жище гре́шников ка́ющихся. Пода́ждь у́бо нам, Преблага́я и Всенепоро́чная Де́во, христиа́нский коне́ц жития́ на́шего ми́рен и непосты́ден и сподо́би нас Твои́м хода́тайством всели́тися в Оби́телях Небе́сных, иде́же непреста́нный глас пра́зднующих ра́достию сла́вит Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

2-я Молитва

Засту́пнице Усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к грешне́йший; вонми́ гла́су моле́ния моего́, вопль мой и стена́ние услы́ши. Я́ко беззако́ния моя́ превзыдо́ша главу́ мою́, и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдная Влады́чице, не пре́зри мене́, отча́яннаго и во гресе́х погиба́ющаго; поми́луй мя, ка́ющагося в злых де́лех мои́х, и обрати́ на путь пра́вый заблу́дшую окая́нную ду́шу мою́. На Тебе́, Влады́чице моя́, Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м, ны́не и при́сно и во ве́ки веко́в. Ами́нь.

3-я Молитва

О, Пресвята́я Влады́чице и Богоро́дице, Вы́сшая Херуви́м и Честне́йшая Серафи́м, Богоизбра́нная Отрокови́це, поги́бших Взыска́ние и всех скорбя́щих Ра́досте! Пода́ждь утеше́ние и нам, в поги́бели и ско́рби су́щим; ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея Хода́таица, и я́ко Ма́терь Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́, никто́же бо притека́яй к Тебе́ посра́млен отхо́дит. Услы́ши у́бо и нас ны́не в день поги́бели и печа́ли пред Твое́ю ико́ною припа́дающих и со слеза́ми Тебе́ моля́щихся: отжени́ от нас належа́щия на нас ско́рби и бе́ды в сей вре́менней жи́зни, не лише́ны же сотвори́ Твои́м всеси́льным хода́тайством и ве́чныя несконча́емыя ра́дости в Ца́рствии Сы́на и Бо́га на́шего. Ами́нь.

Канон Пресвятой Богородице пред иконой «Взыскание погибших»

Минея, 5 Февраля.

Глас 4

Песнь 1

Ирмос: Отве́рзу уста́ моя́
и напо́лнятся Ду́ха,
и сло́во отры́гну Цари́це Ма́тери,
и явлю́ся, све́тло торжеству́я,
и воспою́, ра́дуяся, Тоя́ чудеса́.

Припев: Пресвята́я Богоро́дице, спаси́ на́с.

Умилосе́рдися о нас, гре́шных, погиба́ющих, Пресвята́я Богоро́дице,
но вме́сто печа́ли да́руй нам ра́дость,
да воспева́ем Тя, Всесвята́я Вла́дычице.

Припев: Пресвята́я Богоро́дице, спаси́ на́с.

Утиши́ душ на́ших свире́пство,
поне́же мно́гая ско́рби и печа́ли нападо́ша на нас, гре́шных,
да не поги́бнем во зле, окая́ннии.

Сла́ва Отцу́ и Сы́ну и Свято́му Ду́ху.

Ты еси́ на́ша кре́пость и утвержде́ние и от враго́в защище́ние,
и сего́ ра́ди не бои́мся вра́жия наве́та,
но при́сно пое́м Тя и сла́вим, Всесла́вная.

И ны́не и при́сно и во ве́ки веко́в. Ами́нь.

Напа́сти, и бе́ды, и ско́рби мно́ги приидо́ша на нас и отяготи́ша нас,
и от всего́ се́рдца мо́лим Тя, вопию́ще:
изба́ви, Богороди́тельнице, от обдержа́щих нас зол и весе́лия испо́лни.

Песнь 3

Ирмос: Твоя́ песносло́вцы, Богоро́дице,
живы́й и незави́стный исто́чниче,
лик себе́ совоку́пльшия, духо́вно утверди́,
в Боже́ственней Твое́й сла́ве
венце́в сла́вы сподо́би.

Припев: Пресвята́я Богоро́дице, спаси́ на́с.

Ты еси́ те́плая Предста́тельница и тве́рдое заступле́ние,
избави нас, Всесвята́я, от наше́дших на нас напа́стей,
Ты бо еси́, Влады́чице, па́дших исправле́ние.

Припев: Пресвята́я Богоро́дице, спаси́ на́с.

Изба́ви нас, Пречи́стая, от напа́стей, и бед,
и омраче́ния душе́внаго, и уны́ния,
вся стра́сти отжени́ от нас, Чи́стая,
да при́сно Тя сла́вим.

Сла́ва Отцу́ и Сы́ну и Свято́му Ду́ху.

К Тебе́ притека́ем, Пречи́стая,
не пре́зри на́шея боле́зни и воздыха́ния,
но при́зри на нас, су́щих в ско́рби,
и сию́ на́шу печа́ль на ра́дость преложи́, Богоблаже́нная.

И ны́не и при́сно и во ве́ки веко́в. Ами́нь.

Виждь, Влады́чице, беду́ на́шу и ско́рби,
я́ко в тех лука́вый враг поглоти́ти нас тщи́тся,
но Ты, Пречи́стая, препни́ его́ злохи́трое кова́рство,
да, изба́вльшися, сла́вим Тя, тве́рдую Засту́пницу за ны, во гресе́х погиба́ющих.

Седален, глас 2

Моле́ние те́плое и стена́ необори́мая,
ми́лости исто́чниче, ми́рови прибе́жище,
приле́жно вопи́ем Ти:
Богоро́дице, Влады́чице, предвари́
и от бед изба́ви нас,
Еди́на, вско́ре предста́тельствующая.

Песнь 4

Ирмос: Седя́й в сла́ве на Престо́ле Божества́
во о́блаце ле́гце,
прии́де Иису́с Пребоже́ственный
Нетле́нною Дла́нию и спасе́ зову́щия:
сла́ва, Христе́, си́ле Твое́й.

Припев: Пресвята́я Богоро́дице, спаси́ на́с.

Ты еси́, Пречи́стая Де́во, наде́ждо и утвержде́ние на́ше неруши́мое,
и лю́тых бед освобожде́ние, и от печа́ли утеше́ние,
и душ на́ших просвеще́ние,
и во упова́нии на́шем непоколеби́мый сто́лпе.

Припев: Пресвята́я Богоро́дице, спаси́ на́с.

В сих печа́лех бу́ди сла́дкое утеше́ние,
и в беда́х ско́рая Помо́щница, и в моли́твах Предста́тельница,
Тя бо, Ма́ти Бо́жия, стяжа́вши,
от вся́ких бед избавля́емся и ко спасе́нию Тобо́ю наставля́емся.

Сла́ва Отцу́ и Сы́ну и Свято́му Ду́ху.

Ты еси́, Пречи́стая Де́во, су́щим в беда́х прибе́жище,
немощны́м помога́еши, гре́шных исправля́еши
и ко спасе́нию наставля́еши, я́ко Ма́ти Бо́жия су́щая.

И ны́не и при́сно и во ве́ки веко́в. Ами́нь.

Суди́ оби́дящих, и побори́ борю́щих нас,
и от напра́снаго оскорбле́ния изба́ви нас, осужде́нных,
я́ко Ты Судию́ Пра́веднаго родила́ еси́, Всенепоро́чная,
И́же хо́щет суди́ти кому́ждо по дело́м его́.

Песнь 5

Ирмос: Ужасо́шася вся́ческая
о Боже́ственней сла́ве Твое́й:
Ты бо, Неискусобра́чная Де́во,
име́ла еси́ во утро́бе над все́ми Бо́га
и родила́ еси́ Безле́тнаго Сы́на
всем воспева́ющим Тя
мир подава́ющая.

Припев: Пресвята́я Богоро́дице, спаси́ на́с.

Преклони́ся к мольба́м рабо́в Твои́х, Влады́чице,
и не закосни́ изба́вити нас от всех скорбе́й и бед, я́же обдержа́т нас,
ви́димых и неви́димых враго́в отжени́ от нас,
да не зле поги́бнем, окая́ннии.

Припев: Пресвята́я Богоро́дице, спаси́ на́с.

Ты в напа́стех и ско́рбех ми́лостиво защища́еши,
и́же под кров Твой прибега́ют;
приими́, Пречи́стая, и на́ше сие́ ма́лое от уны́лаго се́рдца моле́ние,
да не зле в отча́янии поги́бнем.

Сла́ва Отцу́ и Сы́ну и Свято́му Ду́ху.

Ми́лостивым и кро́тким о́ком, Богороди́тельнице,
и милосе́рдием Твои́м при́зри на нас, недосто́йных,
и от обстоя́щия напа́сти нас свободи́,
призыва́ющих Тя на по́мощь, Всепречи́стая.

И ны́не и при́сно и во ве́ки веко́в. Ами́нь.

Первозда́нный Ада́м и Е́ва Тобо́ю, Влады́чице, изба́вистася от слез,
с ни́ми же и нас, припа́дающих и моля́щихся Ти,
изба́ви слез, печа́лей и скорбе́й
и пода́ждь поле́зное нам утеше́ние о Бозе, Спа́се на́шем.

Песнь 6

Ирмос: Боже́ственное сие́ и всечестно́е
соверша́юще пра́зднество,
Богому́дрии, Богома́тере,
прииди́те, рука́ми воспле́щим,
от Нея́ ро́ждшагося Бо́га сла́вим.

Припев: Пресвята́я Богоро́дице, спаси́ на́с.

Услы́ши печа́льный вопль раб Твои́х, тре́бующих по́мощи Твоея́, Богома́ти,
Ты бо еси́ упование на́ше,
потщи́ся печа́ль на́шу на ра́дость преложи́ти.

Припев: Пресвята́я Богоро́дице, спаси́ на́с.

Изба́ви нас, Влады́чице, от язы́ка льсти́ва
и от челове́ка непра́ведна изми́ нас,
вся бо Ты мо́жеши, я́ко Ма́ти Зижди́теля на́шего су́щи.

Сла́ва Отцу́ и Сы́ну и Свято́му Ду́ху.

Ве́мы Тя, Богоблагода́тная, ско́рое поги́бших взыска́ние,
нас, немощны́х, кре́пость и утвержде́ние;
ду́хом, усты́ и се́рдцем зове́м Ти:
от напа́стей и печа́ли свободи́ нас, Влады́чице, к Тебе́ прибега́ющих.

И ны́не и при́сно и во ве́ки веко́в. Ами́нь.

Изба́ви нас от напа́стей и бед, Богоневе́сто,
Тя бо устро́и Бог на спасе́ние и заступле́ние на́ше Хода́таицу,
сего́ ра́ди и нам, недосто́йным, исхода́тайствуй от печа́ли избавле́ние.

Кондак, глас 6

Предста́тельство христиа́н непосты́дное,
хода́тайство ко Творцу́ непрело́жное,
не пре́зри гре́шных моле́ний гла́сы,
но предвари́, я́ко Блага́я, на по́мощь нас,
ве́рно зову́щих Ти:
ускори́ на моли́тву и потщи́ся на умоле́ние,
предста́тельствующи при́сно, Богоро́дице, чту́щих Тя.

Песнь 7

Ирмос: Не послужи́ша тва́ри Богому́дрии,
па́че Созда́вшаго,
но, о́гненное преще́ние му́жески попра́вше,
ра́довахуся, пою́ще:
препе́тый отце́в Госпо́дь и Бог, благослове́н еси́.

Припев: Пресвята́я Богоро́дице, спаси́ на́с.

Ты еси́, Пречи́стая Де́во, Покрови́тельница на́ша и непреста́нное ра́дование душ на́ших,
не пре́зри нас, одержи́мых лю́тою бедо́ю и неутеши́мою печа́лию,
но заступи́ и поми́луй рабы́ Твоя́.

Припев: Пресвята́я Богоро́дице, спаси́ на́с.

Ты еси́ кре́пость на́ша, Пречи́стая Влады́чице,
и в наше́дших неча́емых ско́рбех утеше́ние,
и сего́ ра́ди мы, недосто́йнии раби́ Твоя́, всенаде́жно вопие́м Ти:
поми́луй нас, па́дших.

Сла́ва Отцу́ и Сы́ну и Свято́му Ду́ху.

Исцели́ душе́вныя я́звы, Влады́чице, и заступи́ нас, рабо́в Твои́х,
изба́ви нас от па́губныя се́ти лука́ваго,
от вся́каго паде́ния и от развраще́ния изми́ нас, Преблагослове́нная.

И ны́не и при́сно и во ве́ки веко́в. Ами́нь.

Сокруши́ сове́ты непра́ведныя, и́же изощре́ны суть на ны,
мы бо ины́я по́мощи не и́мамы, ра́зве Тебе́, Чи́стая,
и к Тебе́ прибега́ем:
не попусти́ поги́бнути, я́ко вся Тебе́ возмо́жна суть.

Песнь 8

Ирмос: О́троки благочести́выя в пещи́
Рождество́ Богоро́дичо спасло́ есть;
тогда́ у́бо образу́емое,
ны́не же де́йствуемое,
вселе́нную всю воздвиза́ет пе́ти Тебе́:
Го́спода по́йте дела́
и превозноси́те Его́ во вся ве́ки.

Припев: Пресвята́я Богоро́дице, спаси́ на́с.

Ду́ши на́ша сохрани́ под кро́вом Твои́м, Преблагослове́нная Богоро́дице,
и от разли́чных належа́щих на нас бед и скорбе́й изба́ви нас,
да не пора́дуется враг наш о на́шей поги́бели,
но да сла́вим Тя, Бо́жию Ма́терь, во ве́ки.

Припев: Пресвята́я Богоро́дице, спаси́ на́с.

Убоя́хомся по́мощи челове́ческия иска́ти,
прибего́хом к Тебе́, Всенепоро́чная,
Ты еси́ Храни́тельница христиа́ном,
днесь к покро́ву притеко́хом, наде́яся на ми́лость благоутро́бия Твоего́;
матери́нски поми́луй нас, да сла́вим Тя во ве́ки.

Сла́ва Отцу́ и Сы́ну и Свято́му Ду́ху.

Ты еси́, Пречи́стая Де́во, просвеще́ние и избавление,
Ты еси́ Помо́щница на́ша всера́достная и стена́ неруши́мая,
сла́ва и хвала́ на́ша, Всенепоро́чная, да просла́вим Тя во ве́ки.

И ны́не и при́сно и во ве́ки веко́в. Ами́нь.

На Тя всю наде́жду спасе́ния на́шего возложи́хом, Неискусобра́чная Богороди́тельнице,
и на по́мощь призыва́ем Тя:
спаси́ нас от печа́ли сия́ и напа́сти и от всех скорбе́й изба́ви нас,
да сла́вим Тя во ве́ки.

Песнь 9

Ирмос: Всяк земноро́дный
да взыгра́ется, Ду́хом просвеща́емь,
да торжеству́ет же Безпло́тных умо́в естество́,
почита́ющее свяще́нное торжество́ Богома́тере,
и да вопие́т:
ра́дуйся, Всеблаже́нная Богоро́дице,
Чи́стая Присноде́во.

Припев: Пресвята́я Богоро́дице, спаси́ на́с.

И́зсше, я́ко скуде́ль, от печа́ли кре́пость на́ша, и ко а́ду прибли́жихомся;
от язы́к душепа́губных предвари́, Ма́ти Бо́жия, заступле́нием Твои́м
и от обдержа́щих нас скорбе́й руко́ю, Ма́ти, Твое́ю изба́ви нас,
да сла́вим Тя, Чи́стая Присноде́во.

Сла́ва Отцу́ и Сы́ну и Свято́му Ду́ху.

Всенепоро́чная Отрокови́це,
всем ве́рным кре́пкая Помо́щнице, и упова́ние христиа́ном,
бу́ди и о нас неотсту́пная Моле́бница к Сы́ну Твоему́ и Бо́гу
о освобожде́нии от наше́дшия сия́ напа́сти, да вопие́м Ти:
ра́дуйся, Чи́стая Присноде́во.

И ны́не и при́сно и во ве́ки веко́в. Ами́нь.

Ты еси́ кре́пость на́ша, прибе́жище и стена́ необори́мая,
Ты еси́ те́плая к Бо́гу Моли́твенница,
вся́ких напа́стей и бед свободи́, Еди́на Благослове́нная, да вопие́м Ти:
ра́дуйся, Преблаже́нная Богоро́дице, Присноде́во!

Акафист Пресвятой Богородице пред иконой «Взыскание погибших»

Кондак 1

Возбра́нной Воево́де, Цари́це небесе́ и земли́, дарова́вшей нам пречу́дную ико́ну Взыску́ющую, благода́рственное прино́сим пе́ние. Ты же, я́ко благосе́рдая Ма́ти, не отри́ни на́шего сего́ моле́ния, но благоволи́ прия́ти е, и сподо́би вопи́ти Тебе́ та́ко:

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Икос 1

А́нгельский услы́ша глас свята́я А́нна, веща́яй: зачне́ши и роди́ши Дщерь, преблагослове́нную Мари́ю, о Нейже благословя́тся вся коле́на земна́я и прии́дет спасе́ние всему́ ми́ру; мы же, сие́ ве́дуще, возопии́м Богоро́дице:

Ра́дуйся, Ма́ти Сы́на Бо́жия;
ра́дуйся, пренепоро́чная Де́во.

Ра́дуйся, Спа́са душ на́ших роди́вшая;
ра́дуйся, Невмести́маго вмести́лище.

Ра́дуйся, к сме́ртным благоволе́ние;
ра́дуйся, сме́ртных к Бо́гу дерзнове́ние.

Ра́дуйся, честне́йшая Херуви́м;
ра́дуйся, сла́внейшая без сравне́ния Серафи́м.

Ра́дуйся, а́да и сме́рти попра́ние;
ра́дуйся, ве́чныя жи́зни дарова́ние.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 2

Ви́девше святи́и Твои́ роди́телие Иоаки́м и А́нна, я́ко Ты еси́, Пречи́стая, плод благослове́нный, возблагодари́ша Бо́га, и пред две́рьми хра́ма положи́ша обе́т посвяти́ти Тя Го́споду, пою́ще Ему́: Аллилу́иа.

Икос 2

Ра́зум соверше́нный стяжа́ла еси́, Богоро́дице, воспита́вшися во свята́я святы́х, та́ко же не преста́ни умудря́ти и просвеща́ти све́том богоразу́мия и вся христиа́ны, вопию́щия Ти такова́я:

Ра́дуйся, к богопозна́нию приводя́щая;
ра́дуйся, к све́ту и́стины прельще́нных обраща́ющая.

Ра́дуйся, страх Бо́жий в сердца́ вселя́ющая;
ра́дуйся, благогове́ти пред святы́нею науча́ющая.

Ра́дуйся, ре́вностию ко спасе́нию воодушевля́ющая;
ра́дуйся, хра́мы Бо́жии почита́ти внуша́ющая.

Ра́дуйся, в них отра́ду находи́ти вдохновля́ющая;
ра́дуйся, жа́жду Свята́го Причаще́ния возбужда́ющая.

Ра́дуйся, ве́ру и любо́вь к Бо́гу воспламеня́ющая;
ра́дуйся, чистоты́ и целому́дрия побо́рнице.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 3

Си́ла Вы́шняго осени́ Тя, Благода́тная, егда́ арха́нгел Гаврии́л благовествова́ние о безсе́менном зача́тии из Тебе́ Сы́на Бо́жия Спаси́теля ми́ру принесе́; Ты же, прия́вши сию́ благу́ю весть со смире́нием, я́ко раба́ Госпо́дня, возопи́ла еси́ Бо́гу: Аллилу́иа.

Икос 3

Иму́щи во утро́бе Христа́ Жизнода́вца, востекла́ еси́, Благослове́нная, к ю́жице Свое́й, пра́ведней Елисаве́те, и целова́стеся о́бе матери, ра́дующеся о Бо́зе Спа́се на́шем. Сего́ ра́ди, я́ко исто́чнику святы́я ра́дости, вопие́м Ти си́це:

Ра́дуйся, тя́жкое житие́ на́ше облегча́ющая;
ра́дуйся, лю́тыя беды́ и напа́сти отгоня́ющая.

Ра́дуйся, от душе́вныя ту́ги и уны́ния спаса́ющая;
ра́дуйся, испыта́ния Бо́жия за бла́го приима́ти указу́ющая.

Ра́дуйся, в саме́х страда́ниих утеше́ние подаю́щая;
ра́дуйся, я́ко Тобо́ю до́брое жела́ние на́ше исполня́ется.

Ра́дуйся, я́ко Тобо́ю зла́я начина́ния на́ша пресека́ются;
ра́дуйся, огне́м Ма́терния Твоея́ любве́ ду́ши ве́рных согрева́ющая.

Ра́дуйся, благода́тию Свята́го Ду́ха нас озаря́ющая;
ра́дуйся, всех скорбя́щих и угнете́нных Ма́ти благосе́рдая.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 4

Бу́ря недоуме́ния смуща́ет мне ум, ка́ко возмогу́ недосто́йными устны́ восхвали́ти Тя, Пресвята́я Де́во, за Твое́ вели́кое нам воспоможе́ние; те́мже, велича́я неисче́тныя Твоя́ ми́лости, смиренному́дренно пою́ Вседержи́телю Бо́гу: Аллилу́иа.

Икос 4

Слы́шаша вифлее́мстии па́стырие а́нгелов, пою́щих Христо́во Рождество́, те́кше к пеще́ре, обрето́ша та́мо Богороди́тельницу, на рука́х держа́щую Предве́чнаго Младе́нца. С ни́ми в весе́лии духо́вном и мы Тебе́, я́ко о́бщей Матери, глаго́лем та́ко:

Ра́дуйся, младе́нцев воспита́ние;
ра́дуйся, о́троком смы́сла пода́тельнице.

Ра́дуйся, до́брых дел вели́чие;
ра́дуйся, возра́стных муже́й прему́дростию обогаща́ющая.

Ра́дуйся, жизнь смире́нием и кро́тостию наделя́ющая;
ра́дуйся, ста́рцев благогове́йных сла́дкое успокое́ние.

Ра́дуйся, ста́риц благолюби́вых ти́хое прибе́жище;
ра́дуйся, честны́х бра́ков устрое́ние.

Ра́дуйся, благочести́вых семе́йств благослове́ние;
ра́дуйся, де́вства похвало́ и возвыше́ние.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 5

Боготе́чною звездо́ю явля́ешися, Цари́це Небе́сная, всем под кров Твой всемо́щный прибега́ющим и непреста́нно во умиле́нии серде́чнем вопию́щих Бо́гу: Аллилу́иа.

Икос 5

Ви́дя пра́ведный Симео́н Тя прише́дшую с Младе́нцем Иису́сом во хра́ме предста́витися Го́сподеви, рече́: Тебе́ Само́й ду́шу ору́жие про́йдет, проразумева́я Ма́терняя Твоя́ страда́ния о Сы́не Твое́м Боже́ственнем. Сего́ ра́ди зове́м Ти:

Ра́дуйся, рабо́в Бо́жиих осмеива́емых ободре́ние;
ра́дуйся, стоя́щих за пра́вду защи́щение.

Ра́дуйся, терпели́вых страда́льцев предвкуше́нием блаже́нства на небеси́ услажда́ющая;
ра́дуйся, сердца́ злых люде́й, вражду́ющих проти́вная, умягча́ющая.

Ра́дуйся, сове́ты лука́выя и кова́рство их разоря́ющая;
ра́дуйся, от разбо́йников на пути́ нас охраня́ющая.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 6

Пропове́дницы Твоея́ благода́тныя по́мощи все мно́жество Тобо́ю спасе́нных есть: стра́ждущии, боля́щии, скорбя́щии и грехми́ обремене́ннии, благода́рственно о Тебе́ вопию́щии к Бо́гу: Аллилу́иа.

Икос 6

Возсия́ боже́ственный свет во Еги́пте и падо́ша та́мо и́доли, егда́ бежа́ла еси́, Пречи́стая, с Богомладе́нцем Иису́сом, спаса́ющися от уби́йства И́родова; Ты бо, озаря́ющи све́том богове́дения умы́ всех, удаля́ющихся пре́лестей су́етнаго ми́ра, исторга́еши из душ их куми́ры гнездя́щихся та́мо губи́тельных страсте́й, те́мже превозно́сим Тя словесы́ си́ми:

Ра́дуйся, сумня́щихся в ве́ре вразумле́ние;
ра́дуйся, го́рдых умо́м свои́м смире́ние.

Ра́дуйся, озло́бленных и гне́вом пали́мых укроще́ние;
ра́дуйся, ро́пщущих на про́мысл Бо́жий с тягота́ми жи́зни примире́ние.

Ра́дуйся, заблу́ждших на путь спасе́ния наставля́ющая;
ра́дуйся, суеве́рных и гада́телей посрамле́ние.

Ра́дуйся, развраще́нных и нечести́вых обличе́ние;
ра́дуйся, я́ко душевре́дныя уче́ния низлага́еши.

Ра́дуйся, я́ко и́стину познава́ти помога́еши;
ра́дуйся, я́ко мрак хулы́, срамосло́вия и вся́кия лжи разсева́еши.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 7

Хотя́ще николи́же отлуча́тися от рожде́ннаго Тобо́ю Спаси́теля ми́ра, Ты, Богоблаже́нная, пребыва́ла еси́ с Ним неотлу́чно во гра́де Назаре́те, детоводя́щи и пита́ющи Его́, я́ко Челове́ка, и пою́щи в се́рдце Свое́м, я́ко Бо́гу: Аллилу́иа.

Икос 7

Но́вую показу́ющи Ма́тернюю любо́вь к Сы́ну Твоему́, со ско́рбию иска́ла еси́ Его́, двоюнадесятоле́тняго О́трока, во гра́де Иерусали́ме в праз́дник Па́схи, мня́щи Его́ во дружи́не быти. Ве́дуще таково́е Твое́ сердобо́лие, со умиле́нием вопие́м Ти:

Ра́дуйся, оби́димых и огорче́нных возвыша́ющая;
ра́дуйся, ненави́димых и все́ми отве́рженных че́стию венча́ющая.

Ра́дуйся, убо́гих и наги́х одея́ние;
ра́дуйся, ни́щих и разоре́нных пита́ние.

Ра́дуйся, бездо́мных, стра́нных, вдов и сиро́т призре́ние;
ра́дуйся, путеше́ствующих благополу́чное к до́му возвраще́ние.

Ра́дуйся, заблу́ждших в пути́ к жили́щу приведе́ние;
ра́дуйся, де́тем неразу́мным ра́зум обновля́ющая.

Ра́дуйся, умо́м и нра́вом просты́х люде́й Свое́ю по́мощию не оставля́ющая;
ра́дуйся, упова́ющих на во́лю Бо́жию наслажде́ние.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 8

Стра́нное и преди́вное Твое́ попече́ние бысть о христиа́нех на всех путе́х их жи́зни многомяте́жныя и многотру́дныя; иму́ще у́бо в Тебе́ толи́ко милосе́рдную и незави́стную помо́щницу, вси облагоде́тельствованнии Тобо́ю велегла́сно пою́т Бо́гу: Аллилу́иа.

Икос 8

Вся была́ еси́ со Христо́м, егда́ служа́ше Той ро́ду челове́ческому, я́коже боже́ственный Лука́ повеству́ет. Приидо́ша бо не́ции к Сы́ну Твоему́, глаго́люще: Ма́ти Твоя́ и бра́тия Твои́ вне стоя́т, ви́дети Тя хотя́ще. Мним, я́ко Ты, всеблага́я Ма́ти, неотсту́пно пребыва́еши и со все́ми тружда́ющимися во сла́ву Бо́жию, и восхваля́ющими Тя та́ко:

Ра́дуйся, су́щих во вла́сти к торжеству́ до́бра наставля́ющая;
ра́дуйся, святи́телей пра́вило ве́ры и благоче́стия явля́ющая.

Ра́дуйся, па́стырей ре́вностию о спасе́нии душ чад духо́вных снабдева́ющая;
ра́дуйся, наста́вников соверше́нный ра́зуме.

Ра́дуйся, уча́щихся в нау́ках преспеяние;
ра́дуйся, и́ноком и и́нокиням в борьбе́ с прило́ги ми́ра и пло́ти пособля́ющая.

Ра́дуйся, суде́й свято́е зерца́ло пра́вды;
ра́дуйся, враче́й иску́сное врачева́ние больны́х.

Ра́дуйся, земледе́льцев сорабо́тнице и блага́я помо́щнице;
ра́дуйся, всех тружда́ющихся поко́ю и наде́жное приста́нище.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 9

Всяк во́зраст ве́рных благопо́льзуется Твои́м попече́нием, всеми́лостивая Ма́ти, я́ко всегда́ к Тебе́ прибега́ющим душеполе́зная да́руеши, потре́бная в житии доставля́еши и усе́рдно хода́тайствуеши за ны, немощны́я и гре́шныя, у престо́ла Го́спода сла́вы, Ему́же пое́м: Аллилу́иа.

Икос 9

Вити́я многовеща́ннии не мо́гут изглаго́лати Твоея́ Ма́терния печа́ли, при кресте́ Сы́на Твоего́ бы́вшия, егда́ ви́дела еси́ Его́ стра́ждуща за вся челове́ки му́ками неизглаго́ланными; те́мже, я́ко искуше́нная по вся́ческим, претерпе́ти в са́мых тя́жких ско́рбех и лише́ниих нам помози́. Сего́ ра́ди взыва́ем Ти:

Ра́дуйся, слепы́м прозре́ние;
ра́дуйся глухи́м слы́шание.

Ра́дуйся, хромы́м хожде́ние;
ра́дуйся, рассла́бленных те́лом исцеле́ние.

Ра́дуйся, неду́жных здра́вие;
ра́дуйся, стужа́емых от бесо́в избавле́ние.

Ра́дуйся, поврежде́нных умо́м просвеще́ние;
ра́дуйся, неисце́льных больны́х на Свои́ всемо́щнеи ру́це прие́млющая.

Ра́дуйся, отча́янных гре́шников моле́ние не отверга́ющая;
ра́дуйся, от па́губнаго безво́лия их похища́ющая.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 10

Спасти́ хотя́ мир и́же всех Госпо́дь, Сый на кресте́, дарова́ всему́ ми́ру пресвяту́ю премилосе́рдную Ма́терь, егда́ изрече́ Пренепоро́чней и возлю́бленному ученику́: Же́но, се сын Твой, и: Се Ма́ти твоя́. Благодаря́ще за сие́ всеблага́го Бо́га, глаго́лем Ему́: Аллилу́иа.

Икос 10

Стена́ кре́пкая яви́лася еси́ по заве́ту Го́спода, Преблагослове́нная, да́рующи всем благоде́нствие, мир, отра́ду, ра́дость, я́ко и Сама́ сия́ от воскре́сшаго Христа́ Спаси́теля прия́ла еси́, услы́шавши от Него́ приве́тственный глас:

Ра́дуйся, я́ко ублажа́ют Тя вси ро́ди;
ра́дуйся, вся́кую не́нависть, зло́бу, вражду́ укроща́ющая.

Ра́дуйся, мир о Ду́се Свя́те в сердца́ ве́рных вселя́ющая;
ра́дуйся, клевету́, ре́вность и злопа́мятство истребля́ющая.

Ра́дуйся, братолю́бием лю́ди ущедря́ющая;
ра́дуйся, от гла́да, хла́да, тру́са, пото́па, огня́, меча́ огражда́ющая.

Ра́дуйся, хле́бом насу́щным ве́рныя пита́ющая;
ра́дуйся, смертоно́сную я́зву прекраща́ющая.

Ра́дуйся, гнев Бо́жий пра́ведный утоля́ющая;
ра́дуйся, пра́ведных дел поспеше́ние.

Ра́дуйся, на всех путе́х жи́зни христиа́н промышле́ние;
ра́дуйся, роди́телей благонра́вием дете́й утеша́ющая.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 11

Пе́ние на́ше смире́нное, от полноты́ любве́ и усе́рдия Тебе́ приноси́мое, не пре́зри, Богоневе́сто, и не отврати́ся от нас, гре́шных и недосто́йных, но помози́ нам очи́ститися от вся́кия скве́рны пло́ти и ду́ха, да возмо́жем досто́йно и пра́ведно пе́ти Бо́гу: Аллилу́иа.

Икос 11

Све́том путеводя́щим яви́лася еси́ апо́столом, Богороди́тельнице, по вознесе́нии Сы́на Твоего́ на не́бо; сего́ у́бо све́та, о Всепе́тая, не лиши́ всех, да́же до сего́ дне оста́вльшихся и хотя́щих спасти́ся и в ра́зум и́стины приити́. Твои́м святы́м води́тельством и нас спаси́, в жите́йском мо́ре треволне́ньми обурева́емых, оба́че от сердца́ принося́щих Тебе́ благохвале́ния такова́я:

Ра́дуйся, нечи́стыя по́мыслы пожига́ющая;
ра́дуйся, искуше́ния и собла́зны от нас прогоня́ющая.

Ра́дуйся, к покаянию и исправле́нию жи́зни на́шея подвиза́ющая;
ра́дуйся, слеза́ми сокруше́ния бе́здну беззако́ний на́ших омыва́ющая.

Ра́дуйся, духо́вно бо́дрствовати нам помога́ющая;
ра́дуйся, к трезве́нию и моли́тве ве́рныя приводя́щая.

Ра́дуйся, блаже́нство ду́ха тем уготовля́ющая;
ра́дуйся, подви́жников благоче́стия я́вное укрепле́ние.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 12

Благода́ть боже́ственную испроси́ нам у Сы́на Твоего́ и Бо́га, простри́ ру́ку по́мощи, да не поги́бнем во гресе́х и лю́тых обстоя́ниих, находя́щих на ны от враг ви́димых и неви́димых; умиротвори́ на́ша сердца́, зло́бою и враждо́ю испо́лненная, да уте́шени Тобо́ю, ра́достно зове́м Бо́гу: Аллилу́иа.

Икос 12

Пою́ще честно́е Твое́ успе́ние, прославляем и покро́в Твой святы́й, распросте́ртый над всем ми́ром, наипа́че же родо́м христиа́нским, прославля́ющим Тя та́ко:

Ра́дуйся, покая́нием ко исхо́ду от сея́ жи́зни нас приуготовля́ющая;
ра́дуйся, боле́зньми от грехо́в очища́ющая.

Ра́дуйся, я́ко от напра́сныя сме́рти ве́рныя сохраня́еши;
ра́дуйся, я́ко после́дняго напу́тствия досто́йныя сподобля́еши.

Ра́дуйся, сме́ртный страх от тех удаля́ющая;
ра́дуйся, ско́рое разреше́ние ду́ши от те́ла в предсме́ртных му́ках находя́щимся посыла́ющая.

Ра́дуйся, ми́рную кончи́ну живота́ на́шего да́рующая;
ра́дуйся, го́рьких мыта́рств избавля́ющая.

Ра́дуйся, христиа́нскаго погребе́ния нас не лиша́ющая;
ра́дуйся, ко Го́споду, Сы́ну Своему́, о нас предста́тельствующая.

Ра́дуйся, и в жи́зни и по сме́рти с на́ми пребыва́ющая;
ра́дуйся, ра́досте на́ша, две́ри ра́йския нам отверза́ющая.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 13

О Влады́чице ми́ра! Приими́ сие́ ма́лое благодаре́ние на́ше, от всего́ се́рдца Тебе́ приноси́мое, и не попусти́ нам николи́же охладева́ти в сем благода́рном чу́встве, но вразуми́ нас всегда́ по́мнити Твоя́ неисче́тныя ми́лости и со слеза́ми умиле́ния вопи́ти о Тебе́ Бо́гу: Аллилу́иа.

[Се́й конда́к глаго́лется три́жды.]

Икос 1

А́нгельский услы́ша глас свята́я А́нна, веща́яй: зачне́ши и роди́ши Дщерь, преблагослове́нную Мари́ю, о Нейже благословя́тся вся коле́на земна́я и прии́дет спасе́ние всему́ ми́ру; мы же, сие́ ве́дуще, возопии́м Богоро́дице:

Ра́дуйся, Ма́ти Сы́на Бо́жия;
ра́дуйся, пренепоро́чная Де́во.

Ра́дуйся, Спа́са душ на́ших роди́вшая;
ра́дуйся, Невмести́маго вмести́лище.

Ра́дуйся, к сме́ртным благоволе́ние;
ра́дуйся, сме́ртных к Бо́гу дерзнове́ние.

Ра́дуйся, честне́йшая Херуви́м;
ра́дуйся, сла́внейшая без сравне́ния Серафи́м.

Ра́дуйся, а́да и сме́рти попра́ние;
ра́дуйся, ве́чныя жи́зни дарова́ние.

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Кондак 1

Возбра́нной Воево́де, Цари́це небесе́ и земли́, дарова́вшей нам пречу́дную ико́ну Взыску́ющую, благода́рственное прино́сим пе́ние. Ты же, я́ко благосе́рдая Ма́ти, не отри́ни на́шего сего́ моле́ния, но благоволи́ прия́ти е, и сподо́би вопи́ти Тебе́ та́ко:

Ра́дуйся, Благода́тная Богоро́дице Де́во, всеблага́я Ма́ти, взыску́ющая погиба́ющих.

Моли́тва 1-я

О, Пресвята́я и Преблагослове́нная Де́во, Влады́чице Богоро́дице! При́зри ми́лостивым Твои́м о́ком на нас, предстоя́щих пред святою ико́ною Твое́ю и со умиле́нием моля́щихся Тебе́, воздви́гни нас из глубины́ грехо́вныя, просвети́ ум наш, омраче́нный страстьми́, и уврачу́й я́звы душ и теле́с на́ших. Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты ве́си вся не́мощи и согреше́ния на́ша, к Тебе́ прибега́ем и вопие́м: не оста́ви нас Твое́ю Небе́сною по́мощию, но предста́ни нам при́сно и Твои́м неизрече́нным милосе́рдием и щедро́тами спаси́ и поми́луй нас, погиба́ющих. Да́руй нам исправле́ние грехо́вныя жи́зни на́шея и изба́ви нас от скорбе́й, бед и боле́зней, от напра́сныя сме́рти, а́да и ве́чныя му́ки. Ты бо, Цари́це и Влады́чице, ско́рая Помо́щница и Засту́пница всем, притека́ющим к Тебе́, и кре́пкое прибе́жище гре́шников ка́ющихся. Пода́ждь у́бо нам, Преблага́я и Всенепоро́чная Де́во, христиа́нский коне́ц живота́ на́шего, ми́рен и непосты́ден, и сподо́би нас Твои́м хода́тайством всели́тися в оби́телях Небе́сных, иде́же непреста́нный глас пра́зднующих ра́достию сла́вит Пресвяту́ю Тро́ицу, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.

Моли́тва 2-я

Засту́пнице усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к гре́шнейший, вонми́ гла́су моле́ния моего́, вопль мой и стена́ния услы́ши, я́ко беззако́ния моя́ превзыдо́ша главу́ мою́, и аз, я́коже кора́бль в пучи́не, погружа́юся в мо́ре грехо́в мои́х. Но Ты, всеблага́я и Милосе́рдая Влады́чице, не пре́зри мене́, отча́яннаго и во гресе́х погиба́ющаго; поми́луй мя, ка́ющагося в злых де́лех мои́х, и обрати́ на путь пра́вый заблу́ждшую окая́нную ду́шу мою́. На Тебе́, Влады́чице моя́ Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м, ны́не, и при́сно, и во ве́ки веко́в. Ами́нь.

Моли́тва 3-я

О Пресвята́я Де́во Богоро́дице, преми́лостивая Ма́ти всех христиа́н, наипа́че же скорбя́щих, гони́мых и многоразли́чными неду́ги одержи́мых! Аз, нищ сый и убо́г душе́ю и те́лом, предстою́ пред святы́м Твои́м о́бразом со слеза́ми и уми́льно прошу́ Твоего́ благода́тнаго призре́ния, ничто́же бо до́брое и благо́е во мне есть: весь обложе́н есмь немощьми́, нището́ю и убо́жеством; но́зе мои́ не обуве́ны, дабы́ поспеша́ти ми на де́ла свята́я и богоуго́дная; ру́це мои́ загрязне́ны от мно́жества соде́янных беззако́ний; о́чи мои́ потупле́ны от нечистоты́ со́вести, не возмо́гут взира́ти на благоле́пие красоты́ Твоея́; лице́ мое́ потемне́но и испещре́но печа́тию безчи́сленных мои́х поро́ков и грехопаде́ний. Несть во мне ни спаси́тельныя ве́ры, ни уте́шительныя наде́жды, ниже́ благосты́нныя любве́. Аз есмь я́ко гни́лостный сосу́д, преиспо́лненный вся́кия скве́рны, го́рдости, себялю́бия, высокоу́мия, тщесла́вия, гнева, раздражи́тельности, зло́бы, памятозло́бия, недоброжела́тельства, за́висти, ре́вности, осужде́ния, ро́пота, злосло́вия, праздносло́вия, лука́вства, ле́сти, обма́на, невоздержа́ния душе́вных и теле́сных чувств, пристра́стия, плотоуго́дия вся́каго, сладостра́стия и ины́х тьмочи́сленных страсте́й; и вся́кое убо́жество мое́ духо́вное, и теле́сныя боле́зни, и напа́сти обдержа́ша мя, и все житие́ мое́, я́ко трость, коле́блемо ве́тром, по́лно недосто́инства, стра́ха, и вся́кия опа́сности; по глаго́лу свята́го апо́стола, беды́ нападо́ша отовсю́ду на мя; беды́ от духо́в зло́бы поднебе́сных, беды́ от ненави́дящих и оби́дящих, вражду́ющих проти́ву мене́ челове́к; беды́ от звере́й, ското́в и гад земны́х, беды́ от стихи́й ми́ра: мо́лнии, огня́, воды́, тлетво́рнаго возду́ха, хла́да, гла́да; беды́ от мно́гих немоще́й и боле́зней моего́ те́ла; беды́ на пути́ и в дому́, беды́ во дни и нощи́. Кто же мя от враго́в изба́вит, кто к добро́те дел напра́вит, кто боле́зни моя́ исцели́т, кто утеши́т и успоко́ит, вразуми́т, наста́вит, спасе́т и помилует мя, а́ще не Ты, Пресвята́я Ма́ти, засту́пнице и покрови́тельнице всеблага́я! Ты разсе́янный мой ум собери́, по́мыслы от вся́кия скве́рны очи́сти; чу́вства, отра́вленная злом, освежи́; во́лю мою́ немощну́ю на все до́брое укрепи́ и от па́губнаго безво́лия мя изба́ви; се́рдце мое́ от страсте́й свободи́ и святою любо́вию к Бо́гу и бли́жним напо́лни; всю вну́треннюю хра́мину мою́ устро́й и удо́бным жили́щем Ду́ха Свята́го соде́лай. Не оста́ви мя, премилосе́рдная Влады́чице, в теле́сном мое́м многоско́рбном житии. Боле́зни потреби́, враги́ ви́димыя и неви́димыя разжени́, зла́я обстоя́ния разруши́, страх, приходя́щий от духо́в зло́бы и челове́ков, хотя́щих мя погуби́ти, отжени́. Вся потре́бная и нужная ми да́руй; бо́дрость ду́ха посли́; да обновле́нный, да очище́нный, да утеше́нный Тобо́ю, Цари́це моя́ пресвята́я, просла́влю Святу́ю Тро́ицу, Отца́ и Сы́на и Свята́го Ду́ха, и Твое́ ди́вное о мне попече́ние ны́не и при́сно и во ве́ки веко́в. Ами́нь.