Православный Мир
Житие
Вмч. Феодор Стратилат, военачальник из Евхаит, прославился доблестью и верой. Убил чудовищного змея с Божией помощью, обратил в христианство жителей Гераклеи. При императоре Ликинии, отказавшись поклониться идолам (разбив их и раздав золото нищим), претерпел жестокие пытки. Чудесно исцеленный после распятия, он убедил палачей принять крещение. Казнён 21 февраля 319 г. Мощи его, перенесённые в Евхаиты, прославились чудесами.
* * *
Святой великомученик Феодор Стратилат был предан мученической смерти в 319 году по Рождестве Христовом. В дословном переводе с греческого слово «стратилат» означает «высокий воин», в литературном переводе – «воевода», «военачальник».
Происходил святой Феодор из города Евхаиты, ныне Марсиан на севере Малоазиатского нагорья в Турции. Благая весть святого Евангелия в эти места принесена еще в апостольские времена.
Святой Феодор был наделен от Господа многими дарованиями. Его выделяли среди окружающих природная красота, великодушное сердце, глубокое познание христианских истин, мудрость и красноречие. Храбрость святого воина стала многим известна после того, как он с помощью Божией убил громадного змея, жившего в пропасти в окрестностях города Евхаиты. Змей пожирал множество людей и животных, держа в страхе всю округу. Святой Феодор, никому ничего не говоря, взяв с собой свое обычное оружие и имея на груди крест, двинулся в путь.
Доехав до поля вблизи пропасти, где жил змей, воин Христов слез с коня и лег отдохнуть. В этих местах проживала некая благочестивая жена по имени Евсевия. Она была преклонная летами. За несколько лет перед этим она испросила тело святого мученика Феодора Тирона, не сгоревшее на костре во время казни, погребла его около своего дома и каждый год праздновала его память в день преставления 17 февраля (2 марта). Благочестивая Евсевия, увидев спящего воина Христова Феодора Стратилата, разбудила его и пыталась убедить уйти из этих мест, чтобы не пострадать от змея. Мужественный воин Христов Феодор отвечал ей: «Отойди и стань подальше от места сего, и ты увидишь силу Христа моего». Женщина отошла и стала молиться к Спасителю о даровании победы смелому воину. Обратился с молитвой к Господу и святой Феодор: «Господи Иисусе Христе, воссиявший от Отчего Существа, помогавший мне в битвах и дававший победу на сопротивныя, Ты и ныне Тот же есть Господи Христе Боже, пошли мне победу с высоты Твоей святой». Святой Феодор победил чудовище, прославив среди людей имя Христово.
За отвагу святой Феодор был назначен военачальником в городе Гераклее близ Черного моря, недалеко от Евхаит. Здесь святой Феодор сочетал ответственное воинское служение с апостольской проповедью Евангелия среди подчиненных ему язычников. Его горячая вера, подкрепленная личным христианским примером, отвращала многих от пагубных привычек. В результате почти все жители Гераклеи приняли христианство.
В это время начались жестокие гонения на христиан. Император Ликиний (307–324), умертвивший сорок мучеников Севастийских, обрушил свои гонения не на простой народ, а на просвещенных поборников христианства, в которых видел серьезную угрозу для отмиравшего язычества. Прослышав о храбром военачальнике, император захотел его увидеть и послал за ним своих приближенных. Святой Феодор принял послов с честью, но не хотел оставлять своего города. Предвидя намерения императора, мученик Христов хотел пострадать в своем городе, поэтому он ответил императору, что не может сейчас покинуть Гераклию и просит его пожаловать к нему.
Накануне прибытия нечестивого правителя святой Феодор удостоился чудесного видения. Во время молитвы он вдруг увидел себя в храме, крыша которого разверзлась, над храмом воссиял небесный свет и раздался голос: «Дерзай, Феодор, Я с тобою!» Укрепленный видением, святой мученик обратился к Господу с горячей молитвой, прося Его укрепить свои силы для предстоящего подвига.
Император приехал, захватив с собой золотых и серебряных идолов. Он благосклонно отнесся к святому Феодору, хвалил его за хорошее управление городом и повелел ему принести перед народом жертвы идолам. Святой просил императора оставить идолов на ночь в своем доме. Император согласился. Завладев истуканами, святой Феодор разбил их на многие части и раздал кусочки золота и серебра нищим. Так он посрамил суетную веру в бездушных идолов и на обломках язычества утверждал законы христианского милосердия.
Мученик Христов по приказу императора был схвачен и подвергнут жестоким и изощренным пыткам. Мучители били его воловьими жилами и оловянными прутьями, терзали его тело гвоздями и палили огнем. Все это святой мученик переносил с великим терпением и только повторял: «Слава Тебе, Боже наш!» После мучений святого бросили в темницу и пять дней продержали там без пищи и воды, а затем истерзанного святого пригвоздили к кресту и оставили на ночь. Мучители надеялись, что он умрет ночью на кресте. Предчувствуя близкую смерть, святой Феодор уже обращал к Богу последние молитвы, говоря: «Господи, рекл ми еси первее, Аз есмь с тобою, ныне же почто оставил мя еси? Виждь, Господи, яко зверие дивии растерзаша мя Тебе ради, избодены суть зеницы очес моих, плоть моя ранами раздробляется, уязвляется лице, сокрушаются зубы, едины точию нагие кости на кресте висят: помяни мя, Господи, претерпевающего крест Тебе ради, железо, и огнь, и гвоздие подъях за Тя: прочее же приими дух мой, уже бо отхожду от жизни сей».
Господь решил прославить Своего святого перед всеми жителями Гераклии. Утром воины, участвовавшие в казни, увидели святого мученика живым и невредимым: Господь исцелил истерзанное тело святого и свел его с креста, на котором тот был оставлен на всю ночь. Убежденные воочию в беспредельном могуществе христианского Бога, они тут же, недалеко от места несостоявшейся казни, приняли святое крещение. Мученик Феодор удержал жителей и воинов, уверовавших во Христа, от мятежа, говоря им: «Перестаньте, возлюбленные! Господь мой Иисус Христос, вися на кресте, удерживал ангелов, дабы они не сотворили отмщение роду человеческому».
Мученик Христов добровольно отдал себя в руки мучителей. Идя на казнь, святой одним словом открывал двери темниц и освобождал узников. Жители Гераклии, прикасавшиеся к его одежде, исцелялись от болезней и освобождались от бесов. Перед тем, как предать себя в руки палача, мученик Феодор завещал похоронить свое тело в Евхаитах в имении родителей. Своему слуге Уару приказал записать все мучения, которым он был подвергнут, для назидания будущих поколений христиан. Затем мученик Христов долго молился и, наконец, произнеся слово «аминь», преклонил под меч свою честную и святую главу. Казнь совершилась 8 (21) февраля 319 года в субботу, в третий час дня.
Народ оказал великие почести святым останкам мученика. 8 (21) июня того же года они были торжественно перенесены в Евхаиты. Во время перенесения тела святого и уже в самом городе совершались многочисленные чудеса во славу Христа Бога.
Святой великомученик Феодор Стратилат, верный до смерти Господу Иисусу Христу, бесстрашный и жертвенный военачальник, храбрый солдат, издревле почитается как покровитель православного воинства.
В память великомученика Феодора Стратилата строились храмы во всех православных странах. По молитвам к нему от его икон совершались многие чудеса. Так, святой Анастасий Синаит, патриарх Антиохийский (599 г.), и Иоанн Дамаскин (ок. 780 г.) упоминают о чуде, произошедшем в храме Феодора Стратилата недалеко от Дамаска в местечке Карсата в Сирии. Когда эти места были захвачены сарацинами, храм был разорен и в дальнейшем подвергся осквернению. В здании поселились сарацины. Однажды один из них, взяв лук, пустил стрелу в написанное красками на стене изображение святого Феодора. Стрела попала в правое плечо святого, и тотчас по стене потекла струйка живой крови. Нечестивцы удивились этому, но храм не покинули. Всего в церкви проживало около двадцати семейств. По прошествии некоторого времени все они скончались по неизвестной причине. Мор напал на святотатцев, в то время как их соплеменники, жившие вне храма, не пострадали.
Песнопения
Тропарь, глас 4
Воинствосло́вием и́стинным, страстоте́рпче,
Небе́снаго Царя́ воево́да предо́брый был еси́, Фео́доре:
ору́жиями бо ве́ры ополчи́лся еси́ му́дренно
и победи́л еси́ де́монов полки́,
и победоно́сный яви́лся еси́ страда́лец.
Те́мже тя ве́рою
при́сно ублажа́ем.
Кондак, глас 2
Му́жеством души́ в ве́ру оболки́йся
, и глаго́л Бо́жий а́ки копие́ в ру́ку взем, врага́ победи́л еси́,
му́чеников преве́лий Фео́доре,
с ни́ми Христу́ Бо́гу моля́ся не преста́й о всех нас.
Молитва
Молитва
О, святы́й, сла́вный и всехва́льный великому́чениче Фео́доре Стратила́те! Мо́лим тя пред ико́ною твое́ю свято́ю: моли́ с на́ми и о нас, раб Бо́жиих (имена), умоля́емаго от Своего́ благосе́рдия Бо́га, да ми́лостивно услы́шит нас, благосты́ни у Него́ прося́щих, и вся на́ша ко спасе́нию и житию́ ну́жная проше́ния да испо́лнит. Еще́ же мо́лим тя, святы́й победоно́сче Фео́доре Стратила́те, разруши́ си́лы возстаю́щих на ны враго́в, ви́димых и неви́димых. Умоли́ же Го́спода Бо́га, всея́ тва́ри Созда́теля, изба́вити нас от ве́чнаго муче́ния, да всегда́ прославля́ем Отца́ и Сы́на и Свята́го Ду́ха и твое́ испове́дуем предста́тельство, ны́не и при́сно и во ве́ки веко́в. Ами́нь.
Канон
Канон святому великомученику Феодору Стратилату
Минея, 8 Февраля.
Глас 8
Песнь 1
Ирмос: Колесницегони́теля фарао́ня погрузи́,
чудотворя́й иногда́
Моисе́йский же́зл, крестообра́зно порази́в
и раздели́в мо́ре,
Изра́иля же, беглеца́, пешехо́дца спасе́,
песнь Бо́гови воспева́юща.
Припев: Святы́й великому́чениче Фео́доре, моли́ Бо́га о на́с.
Боже́ственными я́ве све́тлостьми удобря́яся,
страда́льческим венце́м священноукраша́емь
и сла́вою облиста́емь Святы́я Тро́ицы,
хва́лящия тя помина́й, вели́кий в му́ченицех Фео́доре.
Припев: Святы́й великому́чениче Фео́доре, моли́ Бо́га о на́с.
Испо́лнь све́та, испо́лнь Боже́ственныя благода́ти,
нам возсия́ свяще́нная па́мять честны́х по́двиг твои́х,
пресве́тлыми све́тлостьми озаря́ющи всех, благоче́стно тя почита́ющих,
му́чениче страстоте́рпче Фео́доре.
Сла́ва Отцу́ и Сы́ну и Свято́му Ду́ху.
И́дольстей одержа́щи бу́ри челове́чество,
свяще́нный му́ченик, окормля́емь Креста́ Божественно́ю благода́тию, небу́рно преплы́в,
и в при́станища дости́же Небе́сная, ра́дуяся.
И ны́не и при́сно и во ве́ки веко́в. Ами́нь.
Богородичен: Две́ре Бо́жия, покая́ния две́ри ми, Де́во, отве́рзи,
помышле́ньми Боже́ственными ду́шу мою́ просвети́
и страсте́й отжени́ тя́жкия о́блаки,
я́ко да почита́ю, ра́дуяся, и до́лжно ублажа́ю Тя.
Песнь 3
Ирмос: Утвержде́й в нача́ле Небеса́ ра́зумом
и зе́млю на вода́х основа́вый,
на ка́мени мя, Христе́, за́поведей Твои́х утверди́,
я́ко несть свят, па́че Тебе́,
Еди́не Человеколю́бче.
Припев: Святы́й великому́чениче Фео́доре, моли́ Бо́га о на́с.
Я́ко лев, дерзну́в, посреди́ суди́ща стал еси́,
возвеща́я спаси́тельное сло́во, досажда́я злочести́вым, пропове́дая и́стину
и облича́я лжу безбо́жия, Фео́доре.
Припев: Святы́й великому́чениче Фео́доре, моли́ Бо́га о на́с.
Мучи́тель, уди́влься твоему́ му́жеству, му́дре,
ско́тскою я́ростию подви́гся, жи́лами волу́ями неща́дно ураня́ет тя, Фео́доре,
ме́рзким истука́нным сокруше́ние соде́лавша.
Сла́ва Отцу́ и Сы́ну и Свято́му Ду́ху.
Му́жеским по́мыслом я́звеныя ка́пли,
я́ко во́лны морски́я, Богому́дре, отри́нул еси́,
Креста́ благода́тию укрепля́емь
и венцено́сец Боже́ственнаго Ду́ха си́лою явля́яся.
И ны́не и при́сно и во ве́ки веко́в. Ами́нь.
Богородичен: Сотвори́ вои́стинну Тебе́ вели́чие и́же от Тебе́ рожде́йся Госпо́дь,
и ро́ди вси Тя, Бо́жию Ма́терь, сла́вят.
Седален, глас 8
Боже́ственное всеору́жие восприи́м и и́дольскую лесть низложи́в,
А́нгелы воздви́гл еси́ восхвали́ти по́двиги твоя́,
Боже́ственною бо любо́вию ум распали́в, на о́гненную смерть до́блественно дерзну́л еси́.
Те́мже тезоимени́тно прося́щим тя дае́ши Боже́ственная дарова́ния, страстоте́рпче Фео́доре.
Сего́ ра́ди вопие́м ти:
моли́ Христа́ Бо́га прегреше́ний оставле́ние дарова́ти
пра́зднующим любо́вию па́мять твою́.
Песнь 4
Ирмос: Ты моя́ кре́пость, Го́споди,
Ты моя́ и си́ла,
Ты мой Бог,
Ты мое́ ра́дование,
не оста́вль не́дра О́тча
и на́шу нищету́ посети́в.
Тем с проро́ком Авваку́мом зову́ Ти:
си́ле Твое́й сла́ва, Человеколю́бче.
Припев: Святы́й великому́чениче Фео́доре, моли́ Бо́га о на́с.
Име́я Христа́ внутрь себе́, блаже́нне, веща́юща,
Ликини́еву горды́ню низложи́л еси́ словесы́ му́дрыми.
Се вои́стинну, му́чениче, обличи́л еси́ премно́гое безу́мие
и де́лы пресла́вными зря́щия удиви́л еси́,
страда́льче доблему́дренне Фео́доре.
Сла́ва Отцу́ и Сы́ну и Свято́му Ду́ху.
Пове́шен быв беззако́нием мучи́теля, и ногтьми́ истерза́емь,
и обагре́н ка́плями, му́чениче, непра́ведно излива́емых крове́й твои́х,
умерщвле́ния дебельства́ и тли совле́кл еси́ ри́зы, преблаже́нне Фео́доре.
И ны́не и при́сно и во ве́ки веко́в. Ами́нь.
Богородичен: Лука́вое грехо́в мои́х рукописа́ние Боже́ственным копие́м, Пречи́стая, расто́ргни,
пробо́дшим Боже́ственная ре́бра вочелове́читися из Тебе́, Де́во, восхоте́вшаго,
и в кни́зе мя написа́ти спаса́емых моли́ся,
без ума́ от Бо́га уда́льшася.
Песнь 5
Ирмос: Вску́ю мя отри́нул еси́
от лица́ Твоего́, Све́те Незаходи́мый,
и покры́ла мя есть чужда́я тьма, окая́ннаго,
но обрати́ мя и к све́ту за́поведей Твои́х
пути́ моя́ напра́ви, молю́ся.
Припев: Святы́й великому́чениче Фео́доре, моли́ Бо́га о на́с.
Просвеща́емь заре́ю, му́чениче, Боже́ственнаго Ду́ха и распаля́емь Христо́вою любо́вию,
опаля́еме пло́ти неради́л еси́, ни ощути́л еси́ боле́зни, ни вмени́л еси́ му́ки,
Небе́сными наде́ждами пита́емь.
Припев: Святы́й великому́чениче Фео́доре, моли́ Бо́га о на́с.
И́го Влады́ки нося́ на вы́и преле́гкое,
о́лова тягото́ю, страстоте́рпче преблаже́нне, отягче́н,
не преклони́лся еси́ отню́д, ни поколеба́лся еси́,
ниже́ победи́лся еси́, во́ине до́блий Фео́доре.
Сла́ва Отцу́ и Сы́ну и Свято́му Ду́ху.
С Небесе́ пригласи́в тя Преблаго́е Сло́во, де́рзостна сотвори́,
Его́же си́лою го́рькия боле́зни претерпе́л еси́ беззако́ннующих, му́чениче Христо́в,
и му́ки и ну́жную, сла́вне, смерть.
И ны́не и при́сно и во ве́ки веко́в. Ами́нь.
Богородичен: Пребыва́ти мя це́ла, непрело́жна стоя́ния лу́чшаго,
но пра́ве ше́ствующа и Богоуго́дная де́юща, Блага́я, умоли́,
Блага́го ро́ждши Сло́ва, нас безслове́сия изба́вльшаго.
Песнь 6
Ирмос: Моли́тву пролию́ ко Го́споду
и Тому́ возвещу́ печа́ли моя́,
я́ко зол душа́ моя́ испо́лнися
и живо́т мой а́ду прибли́жися,
и молю́ся, я́ко Ио́на:
от тли, Бо́же, возведи́ мя.
Припев: Святы́й великому́чениче Фео́доре, моли́ Бо́га о на́с.
Страсть Безстра́стнаго вообража́я, распя́лся еси́, сла́вный му́чениче,
пригвозди́вся на дре́ве, преблаже́нне, и подо́бник Влады́це был еси́,
разреши́вшаго Кресто́м челове́ческия стра́сти во́лею.
Припев: Святы́й великому́чениче Фео́доре, моли́ Бо́га о на́с.
Пове́шен, я́ко а́гнец, на дре́ве, и стрела́ми состре́лян, блаже́нне,
и оче́с зе́ницы избоде́н, и уя́звлен по всему́ телеси́,
уязви́л еси́ враго́в сердца́ копие́м боле́зней твои́х.
Сла́ва Отцу́ и Сы́ну и Свято́му Ду́ху.
Пото́пы безме́рных мук,
ко хра́мине припре́вшеся, му́чениче, твоея́ души́, не поколеба́ша сея́:
на недви́жимем бо ка́мени утверди́ся просия́вшаго от Де́вы
и челове́ческий род просве́щшаго.
И ны́не и при́сно и во ве́ки веко́в. Ами́нь.
Богородичен: Мари́е, всего́ ми́ра Госпоже́,
я́ко Го́спода всех ро́ждши, вра́жия рабо́ты мя изба́ви,
и того́ муче́ния исхи́ти, и спаси́ мя,
на Тя несомне́нно упова́ющаго.
Кондак, глас 2
Му́жеством души́ в ве́ру оболки́йся
и глаго́л Бо́жий, а́ки копие́, в ру́ку взем,
врага́ победи́л еси́, му́чеников преве́лий Фео́доре,
с ни́ми Христу́ Бо́гу моля́ся не преста́й о всех нас.
Икос
Страда́льцев пресве́тлую добро́ту,
прииди́те вси, пе́сненными венцы́, ве́рнии, Фео́дора венча́ем,
дар бо Бо́жий вели́к ми́ру яви́ся сия́ньми чуде́с,
врага́ бо победи́в Велиа́ра страда́нии честны́ми,
одождя́ет вме́сто кро́вных ка́плей исцеле́ний то́ки,
с си́ми у́бо все́ми ра́дуется Христу́ и дае́т мир неоску́ден.
Тем вопие́м Ему́:
моли́ непреста́нно о всех нас.
Песнь 7
Ирмос: Бо́жия снизхожде́ния
огнь устыде́ся в Вавило́не иногда́,
сего́ ра́ди о́троцы в пещи́ ра́дованною ного́ю,
я́ко во цве́тнице, лику́юще, поя́ху:
благослове́н еси́ Бо́же оте́ц на́ших.
Припев: Святы́й великому́чениче Фео́доре, моли́ Бо́га о на́с.
Глаго́лаше, ра́дуяся вели́чия Вседержи́телева,
те́мже уди́вльшеся, зря́щии, пре́лести оста́виша мучи́тельство
и ве́рою вопия́ху:
благослове́н еси́, Бо́же оте́ц на́ших.
Припев: Святы́й великому́чениче Фео́доре, моли́ Бо́га о на́с.
Плени́цами прему́дрых твои́х слове́с, преблаже́нне,
ра́дуяся, улови́л еси́ из глубины́ неразу́мия приступа́ющия
и Боже́ственны му́ченики соде́лал еси́, Фео́доре, пою́щия:
благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
В темни́це к дре́ву тя свя́зана А́нгел свят, прише́д, разреши́,
дерзнове́ние дая́ и укрепля́я тя велегла́сно вопи́ти, Фео́доре:
благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Мене́, жи́вша в ле́ности
и презре́вша святы́я Твоя́ зако́ны и честны́я Твоя́, Христе́, за́поведи,
уще́дри и спаси́ Ро́ждшия Тя ра́ди,
я́ко Благоде́тель Бог и Многоми́лостив.
Песнь 8
Ирмос: Седмери́цею пещь
халде́йский мучи́тель
Богочести́вым неи́стовно разжже́,
си́лою же лу́чшею спасе́ны, сия́ ви́дев,
Творцу́ и Изба́вителю вопия́ше:
о́троцы, благослови́те,
свяще́нницы, воспо́йте,
лю́дие, превозноси́те во вся ве́ки.
Припев: Святы́й великому́чениче Фео́доре, моли́ Бо́га о на́с.
Све́тло подвиза́вся, врага́ победи́л еси́,
и потре́бль во́инства его́ ору́жии ве́ры.
Те́мже побе́дным венце́м увя́злся еси́, поя́ Влады́це:
о́троцы, благослови́те, свяще́ницы, воспо́йте,
лю́дие, возноси́те во вся ве́ки.
Припев: Святы́й великому́чениче Фео́доре, моли́ Бо́га о на́с.
По распя́тии, сла́вне, по стра́сти блаже́нней,
по безме́рных ра́нах, блаже́нне,
Бо́гу вы́ю твою́ приклони́л еси́, му́чениче му́дре,
мече́м честна́я глава́ твоя́ усе́чена бысть,
зовы́й Влады́це:
о́троцы, благослови́те, свяще́ницы, воспо́йте,
лю́дие, превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Свяще́нное, Фео́доре, и многострада́льное те́ло твое́ исто́чник исцеле́ний ве́рным бысть,
из него́же почерпа́ют благоче́стное притека́ющии разреше́ние страсте́й и ду́ш спасе́ние,
вопию́ще Влады́це:
о́троцы, благослови́те, свяще́нницы, воспо́йте,
лю́дие, превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен: Умерщвле́нную оживи́, па́дшую возста́ви,
уя́звленную ду́шу мою́ исцели́,
ум мой умири́,
напа́стей во́лны укроти́, Де́во, и вопию́ща мя спаси́:
о́троцы, благослови́те, свяще́нницы, воспо́йте,
лю́дие, превозноси́те Го́спода во вся ве́ки.
Песнь 9
Ирмос: Ужасе́ся о сем Не́бо,
и земли́ удиви́шася концы́,
я́ко Бог яви́ся челове́ком пло́тски
и чре́во Твое́ бысть простра́ннейшее Небе́с;
тем Тя, Богоро́дицу,
А́нгелов и челове́к чинонача́лия велича́ют.
Припев: Святы́й великому́чениче Фео́доре, моли́ Бо́га о на́с.
Освяти́л еси́, Богому́дре му́чениче, сам себе́
поже́ршемуся А́гнцу и Бо́гу на́шему,
возвы́сився, я́ко всесожже́ние благово́нно, к Нему́,
и свяще́нно возложе́ние, и соверше́нна и чиста́ благоприя́тна же́ртва.
Те́мже тя восхваля́ем и по до́лгу ублажа́ем.
Припев: Святы́й великому́чениче Фео́доре, моли́ Бо́га о на́с.
Я́ко у́тро, я́ко день светоза́рен, яви́лся еси́, Фео́доре, со́лнце,
све́тлыми твоего́ страда́ния луча́ми и чудесы́, всеблаже́нне, подсо́лнечную благоче́стно просвеща́я
и отгоня́я тьму пре́лести и страсте́й на́ших, Фео́доре.
Припев: Святы́й великому́чениче Фео́доре, моли́ Бо́га о на́с.
Совокупи́лся еси́ со А́нгелы пло́тию,
безпло́тныя враги́ побе́ждь,
и со страда́льческими ли́ки весели́шися всегда́,
и с ни́ми Боже́ственную песнь Тро́ице возглаша́еши, Фео́доре треблаже́нне,
свети́льниче це́ркве и страстоте́рпцев удобре́ние.
Сла́ва Отцу́ и Сы́ну и Свято́му Ду́ху.
Земля́ положе́нием твоего́ честна́го, Фео́доре, телесе́ освяща́ется,
Не́бо же ра́дуется, дух твой свяще́нный стяжа́в;
всегда́ челове́цы, па́мять твою́ честну́ю творя́ще,
моле́бно про́сим тя мо́литвенника о нас, преблаже́нне.
И ны́не и при́сно и во ве́ки веко́в. Ами́нь.
Богородичен: Боголюби́вая Де́во,
Блага́го моли́ спасти́ мя от скверн всех,
я́звы се́рдца моего́ омы́вши покая́нием чи́стым и пла́чем сле́зным,
да Тя ублажа́ю и велича́ю, Пренепоро́чная.
Светилен
Полки́ враго́в и де́монов на́глости до конца́ низложи́л еси́
и кончи́ну прия́л еси́, Фео́доре блаже́нне, ве́ры ра́ди Зижди́теля твоего́,
я́ко свиде́тель и́стины, спаса́еши всех от вся́ких скорбе́й и вре́да чужда́го.
Акафист
Акафист великомученику Феодору Стратилату
Конда́к 1
Возбра́нному воево́де и сла́вному во страда́льцех во́ину, свято́му великому́ченику Фео́дору, прииди́те пе́снь хвале́бную вку́пе воспои́м. Ты́ же, великому́чениче, я́ко име́я дерзнове́ние ко Го́споду, от вся́ких на́с бе́д свободи́, да зове́м ти́:
Ра́дуйся, святы́й великому́чениче Фео́доре, Вели́кий Стратила́те.
И́кос 1
А́нгелов Творе́ц и всея́ тва́ри Созда́тель яви́ тя́ Це́ркви Свое́й, я́ко страда́льца до́блественна и во́ина непобеди́ма, да вси́ по достоя́нию страда́ния твоя́ восхва́лят, страстоте́рпче Фео́доре. Сего́ ра́ди и мы́, я́ко му́ченика дне́сь чту́ще, восхваля́ем ти́, вопию́ще:
Ра́дуйся, и́дольскаго служе́ния пре́лесть обличи́вый.
Ра́дуйся, я́рость безу́мнаго царя́ язы́ческаго презре́вый.
Ра́дуйся, сего́ ра́ди муче́ния ве́лия и ра́ны сме́ртныя претерпе́вый.
Ра́дуйся, я́ко Христо́с от Пила́та, от Лики́ния царя́ пло́тию на кресте́ пригвожде́нный.
Ра́дуйся, от А́нгела Госпо́дня па́ки живо́т и кре́пость ди́вно восприя́вый.
Ра́дуйся, с ра́достию о Го́споде главу́ свою́ честну́ю под ме́ч преклони́вый.
Ра́дуйся, святы́й великому́чениче Фео́доре, Вели́кий Стратила́те.
Конда́к 2
Зря́ще страда́льца до́блественна и во́ина непобеди́ма свята́го великому́ченика Фео́дора, страда́ньми венцы́ побе́дныя прия́вша и со А́нгелы сочета́вшася и чуде́с сокро́вище ми́ру дарова́вша, ве́рнии единому́дренне почти́м, воспева́юща Бо́гу: Аллилу́иа.
И́кос 2
Ра́зум боже́ственный стяжа́в, зми́я ве́лия и стра́шна, бли́з Евхаи́тска гра́да вогнезди́вшася, кресто́м и мече́м порази́л еси́, во́ине Христо́в, те́мже и стратила́т, еси́ воево́да, возста́влен бе́ на земли́. Мы́ же я́ко небе́сному воево́де вопие́м ти́:
Ра́дуйся, си́лою Христо́вою от зми́я того́ лю́таго оте́чество свое́ свободи́вый.
Ра́дуйся, мно́гое наро́да мно́жество ко Христу́ обрати́вый.
Ра́дуйся, ору́жием ве́ры де́монов полки́ победи́вый.
Ра́дуйся, я́ко победоно́сный яви́лся еси́ на земли́ страда́лец.
Ра́дуйся, чуде́с мно́жество с ве́рою к тебе́ прибега́ющим подава́яй.
Ра́дуйся, Христу́ Бо́гу моли́тися за ны́ ми́лостиво не оскудева́яй.
Ра́дуйся, святы́й великому́чениче Фео́доре, Вели́кий Стратила́те.
Конда́к 3
Си́лою Бо́жией умерщвле́на зми́я Фео́дором Стратила́том ви́девше, Евхаи́тский гра́д и вси́ лю́дие окре́стныя чудя́шеся зело́ и взыва́ху глаго́люще: «Ве́лий е́сть Бо́г Фео́доров, се́й е́сть Бо́г и́стинный»,– Ему́же мы́ вопие́м: Аллилу́иа.
И́кос 3
Име́я обы́чай благи́й но́щию моли́тися неусы́пно, Фео́доре святы́й, виде́ния боже́ственнаго сподо́бился еси́: покро́ву хра́мины, я́ко отве́рсту яви́вшуся и све́ту небе́сному, я́ко огню́ ве́лию, осия́вшу тя́; та́кже и гла́с слы́шал еси́ свы́ше глаго́лющ: «Дерза́й, Фео́доре с тобо́ю бо е́смь». Си́м позна́л еси́, я́ко вре́мя прии́де страда́ния твоего́ за Христа́, возвесели́ся ду́хом. Те́мже вопие́м ти́:
Ра́дуйся, я́ко сла́ву неизглаго́ланную Христа́ Бо́га узре́л еси́.
Ра́дуйся, я́ко и преми́рных виде́ний зри́тель бы́л еси́.
Ра́дуйся, я́ко и на земли́ небе́сныя собесе́дники име́л еси́.
Ра́дуйся, вели́ких бо Та́ин открове́ний в земно́й жи́зни сподо́бился еси́.
Ра́дуйся, проро́ческое просвеще́ние.
Ра́дуйся, свети́льниче мы́сленный, све́том Христо́вым облиста́емый.
Ра́дуйся, святы́й великому́чениче Фео́доре, Вели́кий Стратила́те.
Конда́к 4
Бу́рю муче́ний бли́зящуся разуме́в, си́це моли́лся еси́ со слеза́ми, блаже́нне Фео́доре, Христу́ Бо́гу: «Го́споди, Бо́же, всеси́льный, бу́ди ми́ ми́лостив и соблюди́ мя́ от пре́лести вра́жия, да не пора́дуются врази́ мои́». Та́коже и мы́ с тобо́ю Бо́гу вопие́м: Аллилу́иа.
И́кос 4
Слы́шав злочести́ваго царя́ прельсти́тельныя глаго́лы, я́ко да же́ртвы и кади́лы и арома́ты принесо́ша ме́рзким бога́м, Фео́доре треблаже́нне, сокруши́л еси́ я́ в но́щь еди́ну и, раздроби́в вся́ и́долы зла́ты и сре́бряны в ча́сти ма́лы, раздели́л еси́ я́ си́рым и убо́гим. Сего́ ра́ди неустраши́мому твоему́ по́двигу вельми́ дивя́щеся, си́це вопие́м:
Ра́дуйся, прему́дростию слове́с твои́х безсту́днейшаго царя́ посрами́вый.
Ра́дуйся, сла́ву Бо́га жи́ва и и́стинна пред язы́ки пропове́давый.
Ра́дуйся, я́ко вои́стину Фео́дор, е́же сказу́ется да́р Бо́жий, яви́лся еси́.
Ра́дуйся, я́ко ны́не со а́нгелы и ли́ки му́чеников блаже́нне ра́дуешися.
Ра́дуйся, я́ко дерзнове́ние име́яй к Бо́гу, от скорбе́й и страсте́й на́с все́х избавля́еши.
Ра́дуйся, святы́й великому́чениче Фео́доре, Вели́кий Стратила́те.
Конда́к 5
Богоме́рзкия и́долы егда́ я́ко зла́то и сребро́ обы́чно рассе́к у́си руко́ю челове́ческою, безу́мнаго царя́ нечести́ваго поруга́л еси́, великому́чениче, глаго́ля ему́: «Ты́ кла́няешися бога́м ме́ртвым, а́з же поклоня́юся Бо́гу Живо́му». Ему́же с тобо́ю и мы́ поклоня́емся, взыва́юще: Аллилу́иа.
И́кос 5
Ви́дев нечести́вый мучи́тель те́ло твое́ честно́е на муче́ние предае́мо, руга́шеся тебе́, страстоте́рпче. Ты́ же, святы́й, вся́ сия́ му́жественно терпя́, ничто́же и́но глаго́лал еси́ то́чию: «Сла́ва Тебе́, Бо́же мо́й!» Терпе́нию твоему́ дивя́щеся, си́це вопие́м ти́:
Ра́дуйся, жи́лами воло́выми и пру́тьми оловя́нными безпоща́дно бие́мый.
Ра́дуйся, мно́гие ра́ны к ра́нам и́мже не́сть числа́, от мучи́теля претерпе́вый.
Ра́дуйся, я́ко венцы́ побе́дныя та́ко от Христа́ прия́вый.
Ра́дуйся, твои́ми ко Христу́ хода́тайствы ве́рныя спаса́яй.
Ра́дуйся, святы́й великому́чениче Фео́доре, Вели́кий Стратила́те.
Конда́к 6
Пропове́дник сла́вы Христо́вой яви́лся, в темни́цу вве́ржен бы́л еси́, страстоте́рпче Фео́доре, неи́стовым мучи́телем ру́це и но́зи име́яй свя́зана и ничесо́же яды́й да́же до дни́й пяти́. А́нгел же свя́т прише́д разреши́ти ты́ свя́зана, да вопие́ши Бо́гу: Аллилу́иа.
И́кос 6
Возсия́ша по́чести твоя́ Фео́доре. Я́коже бо иногда́ Христо́с Госпо́дь на́ш от Пила́та, та́кожде и ты́, блаже́нне, от Лики́ния царя́ на кресте́ про́пят бы́л еси́, ру́це и но́зе име́я пригвожде́нна. Сего́ ра́ди прии́дем вси́ ве́рнии пе́сненными венцы́ Фео́дора Му́ченика пресла́внаго велича́ем глаго́люще:
Ра́дуйся, ко кресту́ пригвожде́нный.
Ра́дуйся, стре́лы о́стрыми и гво́здием прободе́нный.
Ра́дуйся, мече́м усече́нный. Ра́дуйся, вся́кими хитростьми́ боле́зней предупрежде́нный.
Ра́дуйся, я́ко в муче́ниих непрекло́нен и непобеди́м яви́лся еси́.
Ра́дуйся, святы́й великому́чениче Фео́доре, Вели́кий Стратила́те.
Конда́к 7
Хотя́ от земны́х разреши́тися и на дре́во вше́д уя́звленною пло́тию, великому́чениче Фео́доре, си́це моли́лся еси́ ко Го́споду: «Помяни́ мя́, Го́споди, претерпева́юща кре́ст Тебе́ ра́ди». Ему́же и мы́ с тобо́ю вопие́м: Аллилу́иа.
И́кос 7
Но́ва по страда́нии яви́ А́нгел Госпо́день, Фео́дора му́ченика, в пе́рвую бо стра́жу но́щи ви́сящу тому́ на кресте́ сни́де с небесе́ и сня́т со креста́ и сотвори́ всего́ це́ла и здра́ва, я́коже и пре́жде, и лобза́я рече́ ему́: «Ра́дуйся и укрепля́йся, Фео́доре, се́ бо с тобо́ю Госпо́дь». Сего́ ра́ди и мы́ со безпло́тными ку́пно воззове́м тому́ глаго́люще:
Ра́дуйся, целова́ние а́нгельское прие́мый.
Ра́дуйся, спаси́тельную стра́сть Зижди́теля изобрази́вый.
Ра́дуйся, во вся́ких ну́ждах предста́тельством твои́м спаса́яй.
Ра́дуйся, вся́ку душегуби́тельную печа́ль и обстоя́ние отгоня́яй.
Ра́дуйся, чуде́с мно́жество су́щим в ми́ре подава́яй.
Ра́дуйся, ве́рным сердца́ неви́димо подава́яй.
Ра́дуйся, святы́й великому́чениче Фео́доре, Вели́кий Стратила́те.
Конда́к 8
Стра́нное о тебе́ содева́ется, блаже́нне Фео́доре, мучи́тель бо злочести́вый мня́ тя́ ра́спята ме́ртва су́ща, оста́ви те́ло твое́ на кресте́ ви́сяща, ты́ же от А́нгела це́л и здра́в бы́в, на́чал еси́ пе́ти Го́сподеви пе́снь хвале́бную: Аллилу́иа.
И́кос 8
Всего́ тя́ истреби́ти хотя́ще мучи́тель, сего́ ра́ди и со́тник повеле́ поя́ти те́ло твое́ со креста́ и в ковче́г оловя́н вложи́ти и в пучи́ну морску́ю вве́ргнути, да ника́ко христиа́не е́ во́змут и че́стно погребу́т. Со́тницы же зна́мения мно́гая и ве́лия от свята́го узре́вше, ко Христу́ обрати́вшася; сего́ ра́ди и мы́ чту́ще честну́ю му́ченика па́мять си́це вопие́м:
Ра́дуйся, Небе́снаго Царя́ воево́до предо́брый.
Ра́дуйся, ри́торе изря́дный, па́че мудрецо́в ми́ра мудре́йший.
Ра́дуйся, вся́ ми́ра сего́ кра́сная ни во что́ же вмени́вый.
Ра́дуйся, терпе́ния соверше́ннейший о́браз все́м показа́вый.
Ра́дуйся, в Сио́не го́рнем со А́нгелы и святы́ми ку́пно всели́выйся.
Ра́дуйся, хода́тай те́плый за ны́ пред Бо́гом яви́выйся.
Ра́дуйся, святы́й великому́чениче Фео́доре, Вели́кий Стратила́те.
Конда́к 9
Вся́кая похвала́ подоба́ет тебе́ великому́чениче Фео́доре, претерпе́в бо кре́ст и по страда́нии па́ки це́л и здра́в со креста́ соше́д, А́нгелом чуде́сным де́йствием, неве́рные со́тники ца́рския и во́ины мно́ги пре́жде нечести́вые просвети́л еси́ и научи́л еси́ ве́ровати Христу́ Бо́гу и пе́ти Ему́ ку́пно с тобо́ю: Аллилу́иа.
И́кос 9
Вети́я, сказу́яй сла́ву Бо́жию неизче́тными зна́мении твои́ми, яви́лся еси́ ми́ру сла́во му́чеников Фео́доре, от тебе́ бо исцеле́ние неоску́дно почерпа́ем, вси́ к тебе́ с ве́рою прибега́ющии и стра́сти твои́ воспева́ющии си́це:
Ра́дуйся, у́зники мно́ги от у́з разреши́вый.
Ра́дуйся, две́ри темни́чныя сло́вом еди́ным отверза́яй.
Ра́дуйся, неду́жным исцеле́ние подава́яй.
Ра́дуйся, де́моном злы́м одержи́мыя свобожда́яй.
Ра́дуйся, то́чию прикаса́ющиеся ко оде́жде твое́й а́бие исцеля́яй.
Ра́дуйся, вме́сто кро́вных ка́пель исцеле́ний то́ки одождя́яй.
Ра́дуйся, святы́й великому́чениче Фео́доре, Вели́кий Стратила́те.
Конда́к 10
Спаси́тельную ве́ру восприя́вша вси́ лю́дие ве́лия зна́мение твоя́ зря́щии, треблаже́нне Фео́доре, те́мже и́долов ме́рзких отве́ргше, Христу́ прилепи́шася, глаго́люще: «Ве́лий бо е́сть Бо́г Фео́доров, се́й е́сть Бо́г и́стинный»,– Ему́же при́сно вопие́м: Аллилу́иа.
И́кос 10
Сте́ну необори́мую му́жества твоего́ во́ине Христо́в, не одоле́в лю́тый мучи́тель, уби́йством на тя́ ды́шуще и кро́ве твоея́ а́ки пе́с а́лчный жа́ждал, посла́ мече́м уби́ти тя́, ты́ же помоли́вся и зна́мением кре́стным зна́менався, во́лею приклони́л еси́ под ме́ч главу́ твою́. Твое́ усекнове́ние чту́ще си́це вопие́м ти́:
Ра́дуйся, мече́м сме́рть му́ченическую восприя́вый.
Ра́дуйся, во успе́нии свое́м зна́мения мно́ги сотвори́вый.
Ра́дуйся, ве́ру и любо́вь Христо́ву да́же до сме́рти сохрани́вый.
Ра́дуйся, я́ко в вы́шних черто́зех со а́нгелы и святы́ми всели́лся еси́.
Ра́дуйся, я́ко за гре́шныя те́плый ко Христу́ предста́тель яви́лся еси́.
Ра́дуйся, о душа́х на́ших непреста́нный моли́твенниче.
Ра́дуйся, святы́й великому́чениче Фео́доре, Вели́кий Стратила́те.
Конда́к 11
Пе́ние надгро́бное со свеща́ми и кади́лы воспе́ша лю́дие вси́, че́сть тебе́ воздаю́ще, Фео́доре, егда́ глава́ твоя́ честна́я мече́м усе́чена бы́сть, те́мже взя́ше те́ло твое́ свято́е и в ме́сте наро́чите положи́вша е́, последи́ же и в Евхаи́тский гра́д принесо́ша, Христа́ Бо́га сла́вяще и пою́ще Ему́ пе́снь: Аллилу́иа.
И́кос 11
Све́том зна́мения изря́днаго порази́л еси́ нечести́выя сараци́ны на честны́й хра́м тво́й, и́же в Ка́рсате, наше́дших, егда́ стрело́ю устрели́ о́браз тво́й, а́бие истече́ кро́вь в обличе́ние те́х омраче́нных безу́мием. Те́мже зна́мению сему́ чудя́щеся, ве́рно вопие́м ти́, чудотво́рче Фео́доре:
Ра́дуйся, я́ко безу́мие сараци́н посрами́л еси́.
Ра́дуйся, я́ко Це́рковь Бо́жию от поруга́ния огради́л еси́.
Ра́дуйся, я́ко о́браз тво́й све́тлый чудотво́рен яви́лся еси́.
Ра́дуйся, я́ко и́мя твое́ и в неве́рных просла́вил еси́.
Ра́дуйся, па́че ве́рныя к тебе́ прибега́ти в мольба́х научи́л еси́.
Ра́дуйся, святы́й великому́чениче Фео́доре, Вели́кий Стратила́те.
Конда́к 12
Благода́тным зна́мением не вразуми́вшеся неве́рнии сараци́ны хра́м тво́й святы́й оскверни́ша и о́бразу твоему́ честно́му поруга́тися мня́ху, оба́че сме́рть лю́ту по ма́лех дне́х прия́ху, ве́рни же вси́ ико́ну твою́ святу́ю, я́ко чудоде́йственну вельми́ чту́ще взыва́ют Бо́гу: Аллилу́иа.
И́кос 12
Пою́т ди́вныя по́двиги и чудеса́ твоя́ вси́ ве́рни по все́й земли́ христиа́нстей по вся́ дни́ в неисчи́слимых хра́мах и оби́телех во и́мя твое́ созда́нных, собира́ющеся и пе́сненными венцы́ тя́ велича́юще, великому́чениче Фео́доре Стратила́те, те́мже и на́с, па́мять твою́ дне́сь све́тло пра́зднующих, помяни́ и защити́, да любо́вию зове́м ти́ вопию́ще:
Ра́дуйся, я́ко мольбы́ гре́шных прие́млеши.
Ра́дуйся, я́ко ско́рби душе́вныя утоля́еши.
Ра́дуйся, я́ко страсте́й о́гнь укроща́еши.
Ра́дуйся, я́ко от вся́кия скве́рны пло́ти и ду́ха соблюда́еши.
Ра́дуйся, я́ко от искуше́ний лука́ваго избавля́еши.
Ра́дуйся, я́ко моля́щихся у престо́ла Вседержи́теля помина́еши.
Ра́дуйся, Святы́й великому́чениче Фео́доре, Вели́кий Стратила́те.
Конда́к 13
О всехва́льный и всеблаже́нный Стратила́те, великому́чениче святы́й Фео́доре! Приими́ сие́ умиле́нное моле́ние на́ше, и ко Престо́лу Небе́снаго Царя́ Христа́ ско́ро вознеси́, да предста́тельством твои́м от вся́ких зо́л и напа́стей свободи́мся, вопию́ще Бо́гу при́сно: Аллилу́иа.
Этот конда́к читается трижды, затем и́кос 1-й и конда́к 1-й.
И́кос 1
А́нгелов Творе́ц и всея́ тва́ри Созда́тель яви́ тя́ Це́ркви Свое́й, я́ко страда́льца до́блественна и во́ина непобеди́ма, да вси́ по достоя́нию страда́ния твоя́ восхва́лят, страстоте́рпче Фео́доре. Сего́ ра́ди и мы́, я́ко му́ченика дне́сь чту́ще, восхваля́ем ти́, вопию́ще:
Ра́дуйся, и́дольскаго служе́ния пре́лесть обличи́вый.
Ра́дуйся, я́рость безу́мнаго царя́ язы́ческаго презре́вый.
Ра́дуйся, сего́ ра́ди муче́ния ве́лия и ра́ны сме́ртныя претерпе́вый.
Ра́дуйся, я́ко Христо́с от Пила́та, от Лики́ния царя́ пло́тию на кресте́ пригвожде́нный.
Ра́дуйся, от А́нгела Госпо́дня па́ки живо́т и кре́пость ди́вно восприя́вый.
Ра́дуйся, с ра́достию о Го́споде главу́ свою́ честну́ю под ме́ч преклони́вый.
Ра́дуйся, святы́й великому́чениче Фео́доре, Вели́кий Стратила́те.
Конда́к 1
Возбра́нному воево́де и сла́вному во страда́льцех во́ину, свято́му великому́ченику Фео́дору, прииди́те пе́снь хвале́бную вку́пе воспои́м. Ты́ же, великому́чениче, я́ко име́я дерзнове́ние ко Го́споду, от вся́ких на́с бе́д свободи́, да зове́м ти́:
Ра́дуйся, святы́й великому́чениче Фео́доре, Вели́кий Стратила́те.
Моли́тва.
О пресла́вный и прехва́льный великому́чениче святы́й Фео́доре, вели́кий Стратила́те! Не отри́ни гре́шных сия́ ма́лыя моли́твы и приноше́ния, но я́ко име́я дерзнове́ние ко Всеми́лостивому Влады́ке, потщи́ся к на́м недосто́йным ско́рою твое́ю по́мощию и яви́ся хода́тай за ны́ те́плый у Христа́ Бо́га, да не поги́бнем вси́ во греха́х на́ших, но да сотвори́т с на́ми по вели́кой ми́лости Свое́й, да умири́т ми́р и сохрани́т на́с от вся́каго зла́го обстоя́ния, да да́ст на́м ти́хое и безмяте́жное житие́ пожи́ти в чистоте́ и благоче́стии, и по исхо́де ду́ш на́ших неосужде́нно предста́ти суди́лищу Его́ и десна́го стоя́ния сподо́битися, да вы́ну пое́м и сла́вим Его́ Всесвято́е и́мя со Отце́м и Святы́м Ду́хом во ве́ки веко́в. Ами́нь.
