Священномученик Вла́сий, епископ Севастийский

Краткое житие священномученика Власия, епископа Севастийского

С юных лет св. Власий был кроток и благочестив. Граждане севастийские, ценя такие его качества, выбрали его в епископы, каковое звание он носил с великой честью. Но вот настало жестокое гонение Диоклитиана. Памятуя о своих обязанностях, Власий утешал страждущих и гонимых, посещал темницы, но сам он не отдавал себя добровольно мучителям, зная, что жизнь его нужна пасомым.

Когда христиане ушли из города, он также удалился и поселился в одной пещере. Здесь он скрывался и во все гонение Ликиния, проводя дни в молитве и посте; здесь же и был найден языческими воинами, которые привели его к правителю. Последний сперва ласково уговаривал Власия принести жертву идолам, но, видя твердость христианского епископа, велел бить его нещадно палками и затем заключил в темницу. Когда об этом узнала одна благочестивая вдова, то она заколола своего единственного поросенка, сварила его, взяла плодов и овощей и понесла эту пищу святому в темницу. Поблагодарив и благословив ее за ее доброту, св. Власий сказал: «Всякий год совершай так в память мою, и не оскудеет в доме твоем ничто из необходимого».

Между тем мучитель снова позвал Власия на суд. Но ни бесчеловечные мучения, ни просьбы – ничто не могло поколебать св. Власия. Твердость его веры так поразила бывших при этом семерых христианок, что они открыто исповедали себя верующими во Христа и были бесчеловечно умерщвлены.

Святой Власий был после мучений обезглавлен.

Полное житие священномученика Власия, епископа Севастийского

В храме святителя Николая находятся частицы мощей священномученика Власия, епископа Армении IV века. Он родился в Севастии, в юности изучал медицину. Местные жители так любили его за сострадание к больным и бедным, что подали прошение о посвящении его в епископы. После епископского посвящения Власий часто уходил помолиться в пещеру на горе Аргус, и туда к нему даже приходили дикие звери, привлеченные благодатным теплом его чистой души.

Случилось так, что император Ликиний (311-324 г.) послал правителя Каппадокии и Малой Армении Агриколу в Севастию для расправы над христианами. Агрикола схватил множество христиан и держал их в темнице, а его люди в это время отлавливали диких зверей, которые должны были растерзать этих узников на арене. Солдаты Агриколы прочесывали окрестные горы и леса в поисках зверей. Однажды, охотясь на склоне горы Аргус, они наткнулись на пещеру, в которой молился святой Власий, и были поражены, увидев его в окружении львов, медведей, волков и многих других животных. Солдаты с опаской вошли в пещеру, но Святой был погружен в молитву и не заметил их. Они вернулись в город, чтобы сообщить об увиденном правителю. Агрикола велел им идти обратно с подкреплением, чтобы схватить Святого. Когда они вернулись к пещере и сказали Епископу, что пришли взять его под стражу, он ответил: “Пожалуйста, чада мои. Я давно жду вашего прихода. Пойдемте во имя Господа”.

На пути к правителю они повстречали женщину с ребенком: ее единственное дитя подавилось костью и теперь лежало при смерти у ее ног. Женщина узнала Епископа. Она стала умолять его о помощи, и он, возложив на мальчика руки, исцелил его.

Они отправились дальше, и им встретилась еще одна бедная женщина; волк только что унес ее единственное достояние — свинью. Святой успокоил ее и, позвав волка, велел ему принести свинью обратно, и волк повиновался. Когда спустя некоторое время святой Власий оказался на волосок от голодной смерти в темнице, эта женщина зарезала свинью и принесла ему в котле мясо, сваренное с большим количеством фасоли. До наших дней дошла традиция: 11 февраля, в день памяти священномученика Власия православные вкушают свинину с фасолью в воспоминание этого чуда.

Когда Святой пришел в город, правитель приветствовал его словами: “Мне отрадно видеть тебя, о Власий, славный друг бессмертных богов”. “Храни тебя Бог, о правитель,” — ответил Власий, — “Но не называй богами тех жалких духов, которые не могут принести тебе никакой пользы”. Агриколе не удалось лестью вынудить Епископа отречься от Христа, и он приказал подвергнуть его мучениям. Сначала его жестоко били, потом строгали тело овечьим гребнем с острыми зубцами.

Одновременно со святым Власием перед правителем предстали женщины-христианки со своими детьми. Агрикола сказал им, что они могут спасти себя и детей, принеся жертву богам. Женщины сделали вид, что согласны, и пожелали омыть идолов в озере, чтобы жертва их была более чистой. Правитель не стал возражать. Женщины, придя к реке, бросили идолов в воду, и те утонули.

Разгневанный император приказал убить женщин на глазах у их детей, а Епископа утопить там, где лежали на дне идолы. Но святой Власий осенил себя крестом и пошел по воде. Солдаты, которые пытались его схватить, утонули. Он вернулся на берег в сиянии небесного света, а правитель, узнав о чуде, велел обезглавить его, чтобы быть уверенным в его смерти. Это случилось в 316 году.

Имя священномученика Власия встречается во всех древних церковных календарях, а в Европе он считается покровителем чесальщиков овец и людей, страдающих болезнями горла. Частица его мощей есть еще в монастыре Дионисиат на Горе Афон. Святого Власия испокон веков особо почитают в Армении.

Тропарь, глас 4

И нра́вом прича́стник,
и престо́лом наме́стник апо́столом быв,
дея́ние обре́л еси́, Богодухнове́нне,
в виде́ния восхо́д,
сего́ ра́ди, сло́во и́стины исправля́я,
и ве́ры ра́ди пострада́л еси́ да́же до кро́ве,
священному́чениче Вла́сие.
Моли́ Христа́ Бо́га

спасти́ся душа́м на́шим.

Кондак, глас 8

Свяще́ния пома́занием и муче́ния кро́вию украси́лся еси́, сла́вне Вла́сие,
и сия́еши всю́ду, в Вы́шних лику́я
и нас назира́я, в храм твой прише́дшия
и в нем тебе́ непреста́нно зову́щия:

всех нас соблюди́.

Ин кондак, глас 2 Боже́ственное прозябе́ние, цвет неувяда́емый,/ лозы́ Христо́вы розго́ многострада́льная, Богоно́се Вла́сие,/ ве́рою чту́щия па́мять твою́ весе́лия твоего́ испо́лни,// моля́ся непреста́нно о всех нас.

Молитва

О, многострада́льный о́тче, вели́кий уго́дниче Бо́жий, священному́чениче Вла́сие. Услы́ши на́с, гре́шных, к тебе́ прибега́ющих и те́пле тебе́ моля́щихся. Бу́ря мно́гих зо́л, бе́д и скорбе́й обдержи́т на́с, боле́зни душе́вныя и теле́сныя и вся́кия наважде́ния вра́жия обурева́ют на́с. Мы́ же неради́м о спасе́нии на́шем, ниже́ досто́йны есмы́ по грехо́м на́шим у Го́спода по́мощи проси́ти. Но ты́, до́брый па́стырю, ве́лие дерзнове́ние име́яй у Ми́лостиваго Бо́га, я́коже иногда́ ведо́мый на муче́ния твоя́, вдови́цы слезя́щия, прини́кшия к тебе́, не отри́нул еси́, и́ну бо от напа́сти зве́ря свободи́л еси́, ины́я же о́троку исцеле́ние у Го́спода испроси́л еси́, та́кожде и ны́не при́зри на ча́да твоя́, в ча́с се́й к тебе́ прите́кшия, утеше́ния и по́мощи прося́щия. Ты́ у́бо Го́спода умоли́л еси́: а́ще ка́я боле́знь или́ беда́ и́мут кому́ бы́ти и то́й помяне́т и́мя твое́ – помощи́ вся́кому в прославле́ние Его́ Пресвята́го И́мени. Не отри́ни на́с, моля́щихся тебе́, но я́коже обеща́лся еси́, во бла́го сотвори́ вся́кое проше́ние на́ше, по ми́лости Всеблага́го Бо́га, Ему́же че́сть и сла́ва во ве́ки веко́в. Ами́нь.

Канон священномученику Власию Севастийскому

Минея, 11 Февраля.

Глас 4

Песнь 1

Ирмос: Мо́ря чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма
Амали́кову си́лу в пусты́ни победи́л есть.

Припев: Священному́чениче Вла́сие, моли́ Бо́га о на́с.

Похвалу́ согла́сну днесь Христу́ прино́сим,
сла́вную Вла́сия му́драго творя́ще па́мять,
Моисе́йски, празднолю́бцы, пою́ще песнь Бо́гу на́шему,
я́ко просла́вися.

Припев: Священному́чениче Вла́сие, моли́ Бо́га о на́с.

До́льних презира́тель Вла́сий и Христо́в рачи́тель, я́ко святи́тель, и му́ченик, и па́стырь,
е́же де́лом показа́ние,
и, предло́ж Боже́ственную трапе́зу, на снеде́ние созыва́ет нас.

Сла́ва Отцу́ и Сы́ну и Свято́му Ду́ху.

Житие́ доброде́тельми очи́стил еси́ и сосу́д яви́лся еси́, потре́бен
Боже́ственнаго ми́ра на восприя́тие честна́го служе́ния, му́дре,
оде́жду же кровьми́ муче́ния испестри́л еси́.

И ны́не и при́сно и во ве́ки веко́в. Ами́нь.

Богородичен: Воста́ от о́тча паде́ния, Богороди́тельнице Чи́стая,
и от кля́твы изба́вися я́ве прама́терния, Пресвята́я,
Твои́м Рождество́м род весь челове́ческий.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи:
Ты моя́ кре́пость, Го́споди,
и прибе́жище, и утвержде́ние.

Припев: Священному́чениче Вла́сие, моли́ Бо́га о на́с.

Я́ко ве́дом Бо́гу, свяще́нствовати Христу́ пома́зался и научи́лся Ду́хом,
сам ся кро́вию освяти́л еси́.

Припев: Священному́чениче Вла́сие, моли́ Бо́га о на́с.

Уче́ньми вои́стинну сбытие́м му́дрых дел твои́х
Це́ркви был еси́ му́ченик и учи́тель, Вла́сие.

Сла́ва Отцу́ и Сы́ну и Свято́му Ду́ху.

О́браз благоче́стия Це́ркве Христо́вы был еси́,
свяще́нную оде́жду твою́ кровьми́ уясни́л еси́ страда́ний твои́х.

И ны́не и при́сно и во ве́ки веко́в. Ами́нь.

Богородичен: Ро́ждши на земли́ пребога́таго Бо́га, Чи́стая,
челове́ческое паде́ние на Небеса́ возвела́ еси́.

Седален, глас 8

Благоче́стия сый прозябе́ние че́стно,
нече́стия яви́лся еси́ потреби́тель, Вла́сие прехва́льне, си́лою духо́вною:
на суди́щи бо и́дольскую лесть обличи́л еси́
и благодерзнове́нно пе́ти Тро́ицу пропове́дал еси́;
те́мже и беззако́нным преда́вся, страстоте́рпче, зве́ря умори́л еси́, злонача́льнаго зми́я.
Сего́ ра́ди вопие́м ти:
моли́ Христа́ Бо́га, согреше́ний оставле́ние дарова́ти чту́щим лю́бовию святу́ю па́мять твою́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Со́лнца о́блаче разу́мнаго,
Боже́ственнаго Све́та свети́льниче златокова́нный,
нескве́рная, небла́зная, Всенепоро́чная Влады́чице,
омраче́нную ду́шу мою́ ослепле́нием страсте́й безстра́стия заре́ю просвети́, молю́ся,
и оскверне́ное ми се́рдце омы́й пото́ки умиле́ния, покая́ния же слеза́ми,
и от тиме́ния мя очи́сти дел мои́х,
да любо́вию зову́ Ти:
Богоро́дице Присноде́во,
моли́ Христа́ Бо́га прегреше́ний оставле́ние пода́ти ми,
Тебе́ бо име́ю наде́жду, раб Твой.

Песнь 4

Ирмос: Вознесе́на Тя ви́девши Це́рковь на Кресте́,
Со́лнце пра́ведное,
ста в чи́не свое́м,
досто́йно взыва́ющи:
сла́ва си́ле Твое́й, Го́споди.

Припев: Священному́чениче Вла́сие, моли́ Бо́га о на́с.

Утвержда́емь жезло́м и́стинным,
Моисе́йски низложи́л еси́ пре́лести зми́я, Вла́сие, уго́дниче Христо́в,
обличи́в мучи́теля и наста́вль но́выя лю́ди.

Припев: Священному́чениче Вла́сие, моли́ Бо́га о на́с.

Слове́сным тя и безслове́сным благоде́теля,
е́же к Бо́гу присвое́ние показа́, блаже́нне, исправле́ний твои́х,
те́мже у́бо прия́л еси́ исцеле́ний дарова́ния.

Сла́ва Отцу́ и Сы́ну и Свято́му Ду́ху.

Во удо́ле, иде́же положи́ся боле́знь, су́щим о Христе́ твои́м овца́м пра́ведно,
все, о́тче, удави́л еси́ сло́вом благода́ти беззако́ния те́рние.

И ны́не и при́сно и во ве́ки веко́в. Ами́нь.

Богородичен: Я́ко рай, посреде́ Це́ркве насажде́н,
яви́ся ро́ждши Дре́во Жи́зни, Препе́тая,
от Него́же у́бо вкуси́вше, позна́хом Христа́ Бо́га на́шего.

Песнь 5

Ирмос: Ты, Го́споди, мой свет,
в мир прише́л еси́,
свет святы́й, обраща́яй из мра́чна неве́дения
ве́рою воспева́ющия Тя.

Припев: Священному́чениче Вла́сие, моли́ Бо́га о на́с.

На па́жити Боже́ственней просте́р преде́лы ста́да твоего́, святи́телю,
Богому́дренно лесть отгна́л еси́ от всея́ земли́.

Припев: Священному́чениче Вла́сие, моли́ Бо́га о на́с.

Уче́ньми, му́дре святи́телю, ста́до твое́ утверди́л еси́ в ве́ре,
се бо и жены́ лесть попра́ша.

Сла́ва Отцу́ и Сы́ну и Свято́му Ду́ху.

Любо́вию Христо́вою утвержда́емы, жены́ к подо́бию прихо́дят по́двиг твои́х, о́тче,
закала́емы усе́рдно Христо́ви.

И ны́не и при́сно и во ве́ки веко́в. Ами́нь.

Богородичен: Умертви́ся вои́стинну Рождество́м Твои́м, Влады́чице, наи́тие сме́ртное,
све́том бо тьма разоря́ема ви́дится.

Песнь 6

Ирмос: Пожру́ Ти со гла́сом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ребр Твои́х
исте́кшею Кро́вию.

Припев: Священному́чениче Вла́сие, моли́ Бо́га о на́с.

Красото́ю разли́чных ран теле́сных
та́йныя оде́жды твоея́ украси́л еси́ ле́поту
и обою́ду, иера́рше, венча́лся еси́ благода́тию.

Припев: Священному́чениче Вла́сие, моли́ Бо́га о на́с.

Ве́рою Христо́вою я́ко стеко́шася,
жены́ стра́ждущия с тобо́ю, о́тче, усе́рдно умро́ша, Власие.
Любо́вию творя́щих па́мять твою́ сохрани́.

Сла́ва Отцу́ и Сы́ну и Свято́му Ду́ху.

Ре́вностию Христо́вою разже́гшеся му́ченицы,
ласка́тельныя ле́сти пре́лесть отве́ргше,
му́кам томле́ния запали́ша кро́вию.

И ны́не и при́сно и во ве́ки веко́в. Ами́нь.

Богородичен: Кре́пость моя́ вои́стинну Ты и пе́ние еси́, Богороди́тельнице,
на Тя бо наде́жду мою́ возложи́х
и возвы́сих Тобо́ю на враги́ моя́ рог мой.

Кондак, глас 8

Свяще́ния пома́занием и муче́ния кро́вию украси́лся еси́, сла́вне Вла́сие,
и сия́еши всю́ду, в Вы́шних лику́я
и нас назира́я, в храм твой прише́дшия
и в не́м тебе́ непреста́нно зову́щия:
всех нас соблюди́.

Икос

Со тща́нием, бра́тие, собери́теся и храм му́ченика дости́гните,
я́ко да сего́ воспое́м днесь, я́ко да благода́тию его́ наслади́мся,
ду́ши бо спаса́ет и телеса́ от страсте́й многоразли́чных,
я́ко му́ченик, я́ко преподо́бен,
я́ко ве́рен святи́тель и побо́рник,
вопию́щим ему́ от души́ чи́сты:
всех нас соблюди́.

Песнь 7

Ирмос: В пещи́ Авраа́мстии о́троцы перси́дстей,
любо́вию благоче́стия па́че,
не́жели пла́менем, опаля́еми, взыва́ху:
благослове́н еси́ в хра́ме сла́вы Твоея́, Го́споди.

Припев: Священному́чениче Вла́сие, моли́ Бо́га о на́с.

Давидски тебе́ взыва́ем, о о́тче Вла́сие, любо́вию: Го́споду яви́лся еси́ ты подо́бник, и стопы́ твоя́ не позна́шася,
и́бо стези́ твоя́ о Го́споде яви́шася на вода́х.

Припев: Священному́чениче Вла́сие, моли́ Бо́га о на́с.

Спа́совою насла́ждшеся му́ченицы благода́тию,
вои́стинну ра́дость вмени́сте напа́сти муче́ние:
чу́до же, я́ко превы́ше челове́ка, крове́м, прело́жшимся во млеко́, ужа́сно.

Сла́ва Отцу́ и Сы́ну и Свято́му Ду́ху.

Ма́терне у́бо к муче́нию дерзнове́ние зря́ще
ве́рою Христо́вою де́ти и того́ благоле́пия наслажда́ющеся,
ко Влады́це, ра́дующеся, тща́хуся.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся:
Тобо́ю бо даде́ся ра́дость, Богоро́дице, вопию́щим:
благослове́на Ты в жена́х еси́, Всенепоро́чная Влады́чице.

Песнь 8

Ирмос: Ру́це распросте́р, Дании́л
львов зия́ния в ро́ве затче́;
о́гненную же си́лу угаси́ша,
доброде́телию препоя́савшеся,
благоче́стия рачи́тели о́троцы, взыва́юще:
благослови́те, вся дела́ Госпо́дня, Го́спода.

Припев: Священному́чениче Вла́сие, моли́ Бо́га о на́с.

Ру́це распросте́р псало́мски пред Лице́м Бо́жиим, о́тче,
прине́сл еси́, священноде́йствуя, кро́вию твое́ю моли́твы твоя́ Христу́. Те́мже ча́шу, му́дре, спаси́тельную испи́в, вопия́л еси́:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Вдови́це ревну́юще благоче́стно, Боже́ственную па́мять твою́ соверша́ем ве́рно, Богора́дованне Вла́сие,
и сам у́бо обеща́ние, е́же сотвори́л еси́ к ней,
и с не́ю к нам дарова́нии благи́ми нам бу́ди на по́мощь.

И ны́не и при́сно и во ве́ки веко́в. Ами́нь.

Богородичен: Бя́ше естество́ челове́ческое, е́же пре́жде осужде́нное паде́нием преступле́ния,
обре́те же, Богоро́дице, Рождество́м Твои́м благослове́ние вои́стинну
и пое́т ра́достно:
благослови́те, вся дела́ Госпо́дня, Го́спода.

Песнь 9

Ирмос: Ка́мень нерукосе́чный
от несеко́мыя горы́ – Тебе́, Де́во,
краеуго́льный отсече́ся –
Христо́с, совокупи́вый разстоя́щаяся естества́.
Тем, веселя́щеся, Тя, Богоро́дице, велича́ем.

Припев: Священному́чениче Вла́сие, моли́ Бо́га о на́с.

Я́коже в сла́дости ра́йстей
и в ней Ца́рствие, Вла́сие, му́дре святи́телю, насле́дие уготовля́я,
на заколе́ние поте́кл еси́, о Го́споде ра́дуяся.

Припев: Священному́чениче Вла́сие, моли́ Бо́га о на́с.

Горды́ню посе́кл еси́ ты, блаже́нне, духо́вным мече́м
вознося́щихся су́етно на ста́до твое́ безбо́жных,
твои́ми кровьми́ украси́в благоче́стне.

Сла́ва Отцу́ и Сы́ну и Свято́му Ду́ху.

Вла́сие, му́дре святи́телю, со стра́ждущими с тобо́ю жена́ми, вку́пе и с детьми́ Боже́ственными
благослове́ньми хва́лящия тя венча́ти помоли́ся,
я́ко от нача́ла тебе́ сло́во воспе́вших.

И ны́не и при́сно и во ве́ки веко́в. Ами́нь.

Богородичен: В Рождестве́ Де́ва яви́лася еси́, я́ко пре́жде Рождества́, Богоро́дице,
и по Рождестве́ та́кожде уста́вленныя зако́ны естества́ преше́дши, Влады́чице.
Темже Тя вси велича́ем.

Светилен

Святи́тель и му́ченик, преподо́бен, незло́бив я́влься, Вла́сие,
страсте́й Христо́вых ра́ны нося́,
Да́вшаго ти благода́ть исцеля́ти вся неду́ги.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Тя Дании́л преднапису́ет несеко́мую го́ру, из нея́же честны́й Ка́мень отсече́ся,
истнева́я и́дольския хра́мы, Богороди́тельнице Мари́е.

Акафист священномученику Власию Севастийскому

Конда́к 1.

Избра́нный Архиере́ем Вели́ким, па́стырю ове́ц Христо́вых, свети́льниче гра́да Севасти́йскаго, Вла́сие, просвети́ заре́ю Триеди́наго Божества́ омраче́нных грехми́, соблюди́ ду́ши на́ша от мы́сленнаго во́лка, при́сно я́ сохраня́я, и теле́сныя неду́ги исцеля́я, да твои́ми моли́твами изба́виши ны́ от бе́д, благода́рственно зову́щих ти́:

Ра́дуйся, сла́вный священному́чениче Вла́сие, возлю́бленный святи́телю Христо́в.

И́кос 1.

А́нгельския си́лы, ви́девше тя́, о́тче, удиви́шася, я́коже посреде́ те́рния идолослуже́ния кри́н благоче́стия прозябе́ и плоды́ мно́ги принесе́: те́мже и мы́, ви́девше тя́ ны́не сожи́теля А́нгелов, вопие́м сицева́я:

Ра́дуйся душетле́нных грехо́в победи́телю; ра́дуйся, непоколеби́мый сто́лпе благоче́стия.

Ра́дуйся, благоуха́нный кри́не, отгна́вый от себе́ злосмра́дие и́дольскаго служе́ния; ра́дуйся, я́ко изво́лил еси́ всели́тися со зверьми́, во е́же не служи́ти и́долом.

Ра́дуйся, в темни́це су́щих посети́телю; ра́дуйся, я́ко су́щу заключе́ну тебе́ в темни́це, Госпо́дь в нощи́ яви́ся.

Ра́дуйся, на горе́ Аргео́с го́рняя му́дрствовавый; ра́дуйся, из глубины́ пеще́ры моли́твы Бо́гу возсыла́вый.

Ра́дуйся, я́ко от ю́ности возлюби́л еси́ и́го Христо́во; ра́дуйся, А́нгелов весе́лие и сла́во.

Ра́дуйся, спасе́ния и́стинный наста́вниче; ра́дуйся, к тебе́ притека́ющим ско́рый помо́щниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 2.

Ви́девше честно́е житие́ твое́, благода́рнии лю́дие гра́да Севасти́йскаго потща́шася поста́вити тя́ себе́ епи́скопа; позна́вше же тя́ бы́ти и́стиннаго па́стыря ста́да Христо́ва, воспе́ша Бо́гу: Аллилу́иа.

И́кос 2.

Ра́зум неуразуме́нный разуме́ти ища́, святы́й Вла́сие, прии́де но́щию в темни́цу к свято́му Евстра́тию и, па́д ни́ц, поклони́ся ему́, глаго́ля: блаже́н еси́, ча́до Евстра́тие, я́ко Всеси́льный Бо́г толи́ко укрепи́ тя́, помяни́ и мене́, молю́ ти́ ся́. Евстра́тий же отвеща́я, рече́: не твори́ сие́, о́тче духо́вный, са́н бо тво́й от мене́ досто́ин е́сть поклоне́ния. С ни́мже у́бо, взира́я на твое́ смире́ние, уми́льно вопие́м:

Ра́дуйся, и́стинный Христо́в подража́телю; ра́дуйся, смире́ния учи́телю.

Ра́дуйся, свети́льниче всесве́тлый и вселюби́мый; ра́дуйся, хра́ме всечестны́й и Бо́гу освяще́нный.

Ра́дуйся, я́ко презре́вый зла́то, собесе́дник равноа́нгельнаго Евстра́тия бы́л еси́; ра́дуйся, я́ко с ни́мже в темни́це ви́дети све́т неизрече́нный сподо́бился еси́.

Ра́дуйся, про́мыслом в пусты́ню руководи́мый; ра́дуйся, го́рлице пустыннолюби́вая.

Ра́дуйся, Бо́жиих дарова́ний исполне́ние; Ра́дуйся, пречу́дное в челове́цех удивле́ние.

Ра́дуйся, ди́виих звере́й а́гнцы кро́тки соде́лавый; ра́дуйся, те́плый в моли́твах предста́телю.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 3.

Си́ла Вы́шняго осени́ тя́, о́тче, бесе́дующа в темни́це с му́чеником Евстра́тием, и показа́ тя́ свети́льника Це́ркви Христо́вой, возже́ннаго Ду́хом Святы́м. Его́же благода́тию наставля́еми, пое́м Бо́гу: Аллилу́иа.

И́кос 3.

Име́я исполне́ние благода́ти Ду́ха Бо́жия, и по́стнически житие́ свое́ проводя́, зве́ри ди́вии кро́тости научи́л еси́. Ны́не же, ви́дев тя́ победи́вша зве́ри мы́сленныя, с ве́рою вопие́м такова́я:

Ра́дуйся, бесо́в гро́зное устраше́ние; ра́дуйся, скорбя́щих ско́рое утеше́ние.

Ра́дуйся, я́ко зве́ри ди́вии прихожда́ху и от тебе́ благословля́хуся; ра́дуйся, я́ко возложе́нием руку́ твое́ю и зве́ри от боле́зней исцеля́хуся.

Ра́дуйся, безмо́лвия и богомы́слия люби́телю; ра́дуйся, уныва́ющих всежела́нный посети́телю.

Ра́дуйся, боля́щих врачева́ние и неду́гующих здра́вие; ра́дуйся, доброде́телей вели́ких вмести́лище.

Ра́дуйся, воздержа́ния учи́телю; ра́дуйся, богомы́слия люби́телю.

Ра́дуйся, непоро́чный Тро́ицы служи́телю; ра́дуйся, преизря́дный Христо́в уго́дниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 4.

Бу́рю воздвиза́емых на христиа́н гоне́ний зря́, священному́чениче Вла́сие, вме́сто престо́ла святи́тельскаго возше́д на го́ру Аргео́с, всели́ся в пеще́ре. Не вдая́ся на муче́ние во́льное, ожида́ше Бо́жия произволе́ния на сие́, непреста́нно поя́ Бо́гу: Аллилу́иа.

И́кос 4.

Услы́шав от звероло́вцев о твое́м, о́тче, пребыва́нии в пеще́ре, иге́мон Агрикола́й а́бие повеле́ во́ином привести́ тя́ на суди́ще: ты́ же, возра́довыйся, рече́ по́сланным: «До́бре, ча́дца моя́, да и́дем ку́пно, помяну́л бо мя́ Госпо́дь е́сть». Ны́не, восхваля́юще твое́ послуша́ние, вопие́м сицева́я:

Ра́дуйся, я́ко послуша́ние чу́дное показа́л еси́; ра́дуйся, я́ко уче́нием и чудотворе́нием стра́жей твои́х к Бо́гу обрати́л еси́.

Ра́дуйся, пра́вило ве́ры непоколеби́мыя; ра́дуйся, о́бразе кро́тости духо́вныя.

Ра́дуйся, Дании́лу подо́бяся, с Бо́гом в темни́це бесе́довавый; ра́дуйся, веду́щих тя́ на муче́ние благослови́вый.

Ра́дуйся, я́ко любо́вию твое́ю не то́чию челове́цы, но и зве́ри утеша́хуся; ра́дуйся, и́бо моли́твами твои́ми не то́чию челове́цы, но и скоты́ исцеля́хуся.

Ра́дуйся, от печа́ли изба́вителю; ра́дуйся, жела́емых благи́х насади́телю.

Ра́дуйся, я́ко враго́в ча́дцами нарече́; ра́дуйся, я́ко призыва́ющих по́мощь твою́ те́пле заступа́еши.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 5.

Богосия́нную звезду́ узре́вши тя́, жена́ не́кая, прине́сши сы́на своего́ умира́юща, положи́ при ногу́ твое́ю, пла́чущи и вопию́щи: «Спаси́теля на́шего ра́ди Иису́са Христа́, поми́луй сы́на моего́, единоро́ден бо ми́ е́сть». Ты́ же, о́тче, испроси́л еси́ исцеле́ние о́троку у Го́спода Бо́га, глаго́ля: «А́ще ли в челове́цех, в скоте́х ли боле́зни случи́тися бу́дет и помяне́т кто́ и́мя мое́, тому́ Ты́, Го́споди, ско́рый на по́мощь, помоги́ и пода́й исцеле́ние, да во сла́ву и че́сть И́мени свята́го Твоего́ пою́т лю́дие: Аллилу́иа».

И́кос 5.

Ви́дя, о́тче, вдови́цу зело́ пла́чущу о вепреце́, его́же во́лк исхити́, рече́ е́й: «Не скорби́, же́но, ниже́ пла́чи, отда́стся бо тебе́ вепре́ц жи́в и неврежде́н». Такова́го ра́ди милосе́рдия твоего́ вопие́м ти́:

Ра́дуйся, волко́в неви́димых прогони́телю; ра́дуйся, врачу́ безме́здный.

Ра́дуйся, Севасти́и пречу́дная красото́; ра́дуйся, Никопо́ля пресве́тлое украше́ние.

Ра́дуйся, я́ко к Бо́гу всегда́ вопие́ши за ны́; ра́дуйся, я́ко и скоты́ ми́луеши.

Ра́дуйся, сосу́де благода́ти Ду́ха Бо́жия; ра́дуйся, возноша́яй сла́вно и́стину.

Ра́дуйся, испове́дниче Бо́жий избра́нный; ра́дуйся, му́чениче Христо́в просла́вленный.

Ра́дуйся, земны́й а́нгеле; ра́дуйся, небе́сный челове́че.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 6.

Пропове́дником богоно́сным апо́столом Христо́вым поревнова́в, в темни́цу посажде́н бы́сть от Агрикола́я, в не́йже, я́ко в черто́зе, о Христе́ Иису́се ликова́ше, поя́ Бо́гу: Аллилу́иа.

И́кос 6.

Возсия́вшу дню́, се́д иге́мон на суди́щи, поста́ви тя́, архиере́я Бо́жия, пред собо́ю, нача́т ле́стными словесы́ веща́ти, глаго́ля: «Ра́дуйся, Вла́сие, бого́в на́ших и на́м возлю́бленный дру́же». Отвеща́в же, о́тче, рече́: «Ра́дуйся и ты́ иге́моне, оба́че не нарица́й бога́ми бесо́в, я́же огню́ ве́чному с почита́тели и́х пре́даны бу́дут»,– от и́хже наве́тов изба́ви на́с моли́твами твои́ми, вопию́щих си́це:

Ра́дуйся, дру́же Христа́, Бо́га и́стиннаго; ра́дуйся, тве́рдый адама́нте.

Ра́дуйся, гне́ва мучи́телева презри́телю; ра́дуйся, преле́стника ду́ш челове́ческих посрами́телю.

Ра́дуйся, неща́дно за Христа́ па́лицами бие́нный; ра́дуйся, ра́нами твои́ми неви́димаго врага́ уби́вый.

Ра́дуйся, я́звы Го́спода на свое́м телеси́ носи́вый; ра́дуйся, кре́ст сво́й на ра́мена взе́мший.

Ра́дуйся, чрез земну́ю темни́цу в небе́сный черто́г восше́дый; ра́дуйся, ло́жных бого́в отри́нувый.

Ра́дуйся, я́ко в страда́нии Христо́с укрепля́ше тя́; ра́дуйся, я́ко по страда́нии Христо́с просла́ви тя́.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 7.

Хотя́щу безу́мному мучи́телю жела́ние свое́ улучи́ти, е́же от Жива́го Бо́га отврати́ти тя́, да прилепи́шися к безу́мным и́долом, повеле́ па́ки воврещи́ тя́ в темни́цу, в ню́же с ра́достию вше́л еси́, о́тче, хваля́ и испове́дая и́стиннаго Бо́га, поя́ Ему́: Аллилу́иа.

И́кос 7.

Я́рость безчелове́чную показа́ зверообра́зный мучи́тель, егда́, втори́цею се́д на суди́щи, повеле́ тя́, архиере́я Бо́жия, на дре́ве на́га пове́шена строга́ти кре́пко ору́дии желе́зными. Пачеесте́ственное терпе́ние твое́ благогове́йно вспомина́юще, похвала́ми блажи́м тя́ си́це:

Ра́дуйся, пове́шенный на дре́ве Христа́ ра́ди, на Кресте́ распя́таго; ра́дуйся, строга́нный по ребро́м Иису́са ра́ди, копие́м в ре́бра прободе́ннаго.

Ра́дуйся, я́ко свяще́нствовати пома́зался еси́; ра́дуйся, я́ко кро́вию свое́ю освяти́лся еси́.

Ра́дуйся, я́ко о́гнь любве́ к Бо́гу в се́рдцы твое́м возже́гл еси́; ра́дуйся, я́ко со Христо́м, Христа́ ра́ди, на земле́ пострада́л еси́.

Ра́дуйся, подвиго́в и соверше́нства благи́й о́бразе; ра́дуйся, священному́чеников ли́ка вели́кая сла́во.

Ра́дуйся, я́ко свяще́нную оде́жду твою́ кровьми́ страда́ний укра́сил еси́; ра́дуйся, я́ко вся́ку доброде́тель в себе́ изобрази́л еси́.

Ра́дуйся, крепча́йший ка́меннаго столпа́ страстоте́рпче; ра́дуйся, вселюби́мый Подвигополо́жника Христа́ уго́дниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 8.

Стра́нное и стра́шное твое́ страда́ние, о́тче, благочести́выя и богобоя́зненныя жены́ ви́дяща, после́доваху тебе́, ведо́мому па́ки в темни́цу, собира́юща ка́плющую от телесе́ твоего́ кро́вь, е́юже пома́зывахуся и с ве́рою воспева́ху Бо́гу: Аллилу́иа.

И́кос 8.

Ве́сь в вы́шних бы́сть, о́тче, и горе́ очи́ма души́ взира́ше: сла́дце бо Христа́ ра́ди терпе́л еси́ му́ки: те́мже и са́м показа́ся сосу́д, излива́ющий сла́дость чуде́сных исцеле́ний на вопию́щих ти́ си́це:

Ра́дуйся, страда́льческий пу́ть к Небеси́ показа́вый; ра́дуйся, терпе́нием свои́м и же́н ревнова́нию о ве́ре научи́вый.

Ра́дуйся, я́ко кро́ве твоея́ ка́пли посрами́ша и́дольскую го́рдость; ра́дуйся, возлюби́вый Иису́сову сла́дость.

Ра́дуйся, о́тче, о ча́дех до́брых веселя́йся; ра́дуйся, в темни́це о присносу́щнем све́те му́дрствовавый.

Ра́дуйся, пчело́, от смра́днаго и́дольских же́ртв ды́ма отлете́вшая; ра́дуйся, я́ко и са́м твои́ми я́звами подо́бен со́ту бы́сть.

Ра́дуйся, я́ко кро́ве твоея́ ка́пли сладча́йшия ме́да бы́ша Христу́; ра́дуйся, я́ко муче́ние нестерпи́мое в блаже́нство тя́ приведе́.

Ра́дуйся, я́ко все́м ве́рным па́мять твоя́ сладка́; ра́дуйся, я́ко все́й Це́ркви и́мя твое́ че́стно.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 9.

Все́ естество́ а́нгельское ве́лиею возра́довася ра́достию, узре́вше му́жественную кре́пость седми́ же́н, я́же тобо́ю, о́тче, на пу́ть и́стинный наста́влени бы́ша, прего́рдаго кня́зя тьмы́ посрами́вше, ра́достно преклони́ша вы́и своя́ под мечи́ мучи́тельския, хва́ляще Бо́га и пою́ще Ему́: Аллилу́иа.

И́кос 9.

Вети́и многовеща́ннии не возмо́гут восхвали́ти тя́ по достоя́нию, о́тче богому́дре Вла́сие, от утро́бы бо ма́терния по́мысл к Царю́ Вседержи́телю устреми́вый, безбоя́зненно пре́дал еси́ те́ло твое́ Христа́ ра́ди на муче́ние. Сицеву́ю любо́вь твою́ ко Христу́ Иису́су помина́юще, со умиле́нием глаго́лем ти́:

Ра́дуйся, и́стинная лозо́ Христо́ва; ра́дуйся, небреги́й о телеси́ ра́ди души́ спасе́ния.

Ра́дуйся, се́явый слеза́ми, да с ра́достию рукоя́ти своя́ пожне́ши; ра́дуйся, я́ко моли́твою, у́зами и ну́ждною нището́ю пло́ть изнури́вый.

Ра́дуйся, пути́ же́стоки за словеса́ Бо́жия соверши́вый; ра́дуйся, по́двиги твои́ми стра́сти теле́сныя умертви́вый.

Ра́дуйся, идолослужи́телей обличи́телю безстра́шный; ра́дуйся, свети́льниче, де́монский мра́к отрева́яй.

Ра́дуйся, ве́рный ра́бе Христо́в; ра́дуйся, моли́твы благоуха́нное кади́ло.

Ра́дуйся, до́блественнейший страстоте́рпче; ра́дуйся, я́ко похвали́ по́двиги твоя́ Са́м Подвигополо́жник.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 10.

Спасти́ хотя́ ду́шу свою́, вдови́ца, услы́шавши твое́ му́жественное за Христа́ страда́ние, посети́ тя́, о́тче, в темни́це су́ща, прине́сши ча́сть закла́ннаго вепреца́. Ты́ же, возда́в хвалу́ Бо́гови и вкуси́в пи́щи, благослови́л еси́ жену́, запове́дав во вся́ ле́та соверша́ти па́мять твою́, да ничто́же от потре́бных оскуде́ет в дому́ ея́. Блаже́нная же вдови́ца, прие́мши за́поведь от тебе́, оты́де в до́м сво́й, пою́щи Бо́гу: Аллилу́иа.

И́кос 10.

Стены́ ка́менныя тверде́йши ве́ра твоя́ яви́ся, егда́, мучи́телю нечести́вому потопи́ти тя́ восхоте́вшу, ты́, о́тче Вла́сие, осени́в кре́стным зна́мением е́зеро, про́йде на среду́ его́ и седе́ на воде́, я́ко на земли́. Сего́ ра́ди мы́ прино́сим ти́ пе́ния сицева́я:

Ра́дуйся, ве́ры Петро́вы подража́телю; ра́дуйся, стези́ творя́й по вода́м, Ду́хом укрепля́емь.

Ра́дуйся, я́ко горды́ню зми́я духо́вным мече́м посече́; ра́дуйся, я́ко бого́в безду́шных посрами́.

Ра́дуйся, подви́жниче, ору́жием благоволе́ния Бо́жия венча́нный на земли́; ра́дуйся, му́чениче, на бра́нь препоя́санный от Бо́га.

Ра́дуйся, архиере́ем добро́то и сла́ва; ра́дуйся, му́чеником красото́ и ра́дование.

Ра́дуйся, христиа́ном кре́пкое прибе́жище; ра́дуйся, ве́рным тве́рдое заступле́ние.

Ра́дуйся, ве́ру непоколеби́му до сме́рти сохрани́вый; ра́дуйся, все́х моле́ния Вы́шнему дерзнове́нно принося́й.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 11.

Пе́ние похва́льное, а́ще и тьмочи́сленное, не́сть дово́льно по достоя́нию восхвали́ти тя́, всехва́льный священному́чениче Вла́сие! Ча́да твоя́, ви́дяще идолослужи́телей, погря́зших в е́зере, я́ко о́лово в воде́, тебе́ ходя́щу, я́ко по су́ху, благочести́вно возопи́ша Бо́гу: Аллилу́иа.

И́кос 11.

Стена́ тве́рда яви́лся еси́, уго́дниче Бо́жий, пред мучи́телем твои́м Агрикола́ем, ники́и бо му́ки возмого́ша победи́ти тя́: си́ла же Христо́ва укрепля́ше тя́ в страда́ниих твои́х. Сего́ ра́ди похваля́юще терпе́ние твое́, я́ко непобеди́мому страстоте́рпцу зове́м ти́:

Ра́дуйся, кро́вь свою́ за Христа́ проли́вый; ра́дуйся, за страда́ния неувяда́емый вене́ц прие́мый.

Ра́дуйся, пре́жде му́ченичества свя́то пожи́вый; ра́дуйся, в житии́ и по кончи́не чудесы́ просла́вивыйся.

Ра́дуйся, согреша́ющих вразуми́телю; ра́дуйся, святота́тцев наказа́телю.

Ра́дуйся, стопа́м Христа́ Спаси́теля ре́вностный после́дователю; ра́дуйся, Страсте́м Его́ му́жественный подража́телю.

Ра́дуйся, просла́вленный Бо́гом на Небеси́ и на земли́; ра́дуйся, я́ко в ско́рби су́щим ра́дость подае́ши.

Ра́дуйся, в печа́ли защи́тителю; ра́дуйся, в ну́жде бла́г пода́телю.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 12.

Благода́ть от Бо́га дана́ ти́ храни́ти и соблюда́ти от вся́кия боле́зни челове́ки и скоты́ и́х; до́мы же почита́ющих честна́я страда́ния твоя́ вся́ких бла́г исполня́ти. Тоя́ благода́ти не лиши́ и на́с, до́брый святи́телю Вла́сие, да и мы́, здра́вы су́ще те́лом и душе́ю, пое́м немо́лчно Бо́гу: Аллилу́иа.

И́кос 12.

Пою́ще твое́ пусты́нническое житие́, почита́ем страда́ния, хва́лим долготерпе́ние, ублажа́ем святу́ю кончи́ну твою́, и в че́сть и па́мять твои́х, о́тче, победоно́сных по́двигов похва́льная воспису́ем ти́ сицева́я:

Ра́дуйся, архиере́ю, поже́рший Бо́гови себе́ самаго́ на олтари́ му́ченичестем; ра́дуйся, в моли́тве осене́нный свы́ше о́блаком све́тлым.

Ра́дуйся, Непоро́чным возлю́бленный; ра́дуйся, в моли́твах услы́шанный.

Ра́дуйся, Христа́ ра́ди во главу́ усече́нный; ра́дуйся, от свяще́нных лико́в ра́достно во Хра́м Небе́сный введе́нный.

Ра́дуйся, же́ртво, прине́сшаяся Бо́гу в воню́ благоуха́ния; ра́дуйся, я́ко святу́ю твою́ ду́шу Венцеда́вец Христо́с прия́л е́сть в Пренебе́сный Сво́й Же́ртвенник.

Ра́дуйся, теле́сных неду́гов до́брый врачева́телю; ра́дуйся, душе́вных боле́зней благи́й цели́телю.

Ра́дуйся, я́ко тобо́ю вся́ким дово́льством снабде́ни бы́ти наде́емся; ра́дуйся, я́ко тобо́ю от вся́кия боле́зни сохране́ни бы́ти упова́ем.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 13

О преди́вный многострада́льный святи́телю Христо́в Вла́сие! Ны́нешнее моле́ние прие́м, от вся́ких боле́зней душе́вных и теле́сных здра́вы сотвори́ ны́, ве́чнаго муче́ния твои́ми благопря́тными хода́тайствами свободи́, да с тобо́ю на Небесе́х в Ве́чном Ца́рствии сподо́бимся вы́ну воспева́ти Го́споду, ди́вному во святы́х: Аллилу́иа.

[Се́й конда́к глаго́лется три́жды.]

И́кос 1.

А́нгельския си́лы, ви́девше тя́, о́тче, удиви́шася, я́коже посреде́ те́рния идолослуже́ния кри́н благоче́стия прозябе́ и плоды́ мно́ги принесе́: те́мже и мы́, ви́девше тя́ ны́не сожи́теля А́нгелов, вопие́м сицева́я:

Ра́дуйся душетле́нных грехо́в победи́телю; ра́дуйся, непоколеби́мый сто́лпе благоче́стия.

Ра́дуйся, благоуха́нный кри́не, отгна́вый от себе́ злосмра́дие и́дольскаго служе́ния; ра́дуйся, я́ко изво́лил еси́ всели́тися со зверьми́, во е́же не служи́ти и́долом.

Ра́дуйся, в темни́це су́щих посети́телю; ра́дуйся, я́ко су́щу заключе́ну тебе́ в темни́це, Госпо́дь в нощи́ яви́ся.

Ра́дуйся, на горе́ Аргео́с го́рняя му́дрствовавый; ра́дуйся, из глубины́ пеще́ры моли́твы Бо́гу возсыла́вый.

Ра́дуйся, я́ко от ю́ности возлюби́л еси́ и́го Христо́во; ра́дуйся, А́нгелов весе́лие и сла́во.

Ра́дуйся, спасе́ния и́стинный наста́вниче; ра́дуйся, к тебе́ притека́ющим ско́рый помо́щниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 1.

Избра́нный Архиере́ем Вели́ким, па́стырю ове́ц Христо́вых, свети́льниче гра́да Севасти́йскаго, Вла́сие, просвети́ заре́ю Триеди́наго Божества́ омраче́нных грехми́, соблюди́ ду́ши на́ша от мы́сленнаго во́лка, при́сно я́ сохраня́я, и теле́сныя неду́ги исцеля́я, да твои́ми моли́твами изба́виши ны́ от бе́д, благода́рственно зову́щих ти́:

Ра́дуйся, сла́вный священному́чениче Вла́сие, возлю́бленный святи́телю Христо́в.

Моли́тва.

Преблаже́нне и приснопа́мятне священному́чениче Вла́сие, ди́вный страда́льче и предста́телю на́ш те́плый, по отше́ствии твое́м в жи́знь ве́чную призыва́ющим твое́ свято́е и́мя посо́бствовати и во вся́ких проше́ниих услы́шанным бы́ти обеща́вый! Се́ ны́не к тебе́, уго́днику Бо́жию, я́ко ко и́стинному хода́таю спасе́ния, притека́ем и смире́нно мо́лимся: предста́ни на́м в по́мощь, у́зами грехо́в свя́занным, подви́гнися на всемо́щныя твоя́ к Бо́гу моли́твы и помоли́ся о на́с гре́шных: тя́ бо, недосто́йнии, призыва́ти на заступле́ние дерза́ем, и жела́ем от все́х грехо́в на́ших тобо́ю свобожде́ние получи́ти. О свя́тче Бо́жий Вла́сие! В сокруше́нии и смире́нии се́рдца на́шего пред тобо́ю припа́даем и мо́лимся: осия́й на́с, омраче́нных наве́ты вра́жиими, све́том благода́ти свы́ше, да в не́м ходя́ще, не преткне́м о ка́мень но́г на́ших. Тя́, я́ко сосу́д в че́сть избра́нный и испо́лненный благода́ти Бо́жия, мо́лим: сподо́би на́с гре́шных от исполне́ния твоего́ жела́емое прия́ти, и исцели́ на́ша душе́вныя и теле́сныя я́звы, грехо́м же на́шим проще́ние и душе́вному и теле́сному на́шему здра́вию и спасе́нию поле́зное у Го́спода испроси́, да всегда́ прославля́ем Отца́ и Сы́на и Свята́го Ду́ха, и твое́ ми́лостивное предста́тельство о душа́х и телесе́х на́ших, ны́не и при́сно и во ве́ки веко́в. Ами́нь.