Православный Мир
Житие
Преподобномученик Корнилий Псково-Печерский (1501–1570) родился в Пскове в боярской семье. Родители его, Стефан и Мария, воспитывали сына в благочестии и страхе Божием. Уже в раннем возрасте мать заметила у отрока Корнилия особенную склонность к духовной жизни, научила его молитве и привила любовь к странникам. Чтобы дать сыну образование, родители отдали его в Псковский Мирожский монастырь. В монастырских стенах отроков воспитывали в послушании, обучали чтению и письму, искусству книгописания и писанию икон. В монастыре составлялись и переписывались летописи, жития святых, богослужебные книги. В Мирожской обители юный Корнилий подвизается под началом старца, совершая подвиги молитвы и труда, делал свечи. С особенным тщанием приготовлялся он к писанию икон, соблюдая перед этим пост, молился Пресвятой Владычице о благословении его на труд. Во время работы над иконой хранил собственную чистоту, творя в душе непрестанную молитву.
Закончив обучение, святой Корнилий вернулся в родительский дом. Пребывание в святой обители еще более утвердило его призвание к иноческой жизни.
Однажды государев дьяк Мисюрь Мунехин, человек просвещенный и благочестивый, друг семьи святого Корнилия, собрался ехать в затерянную среди лесов маленькую Печерскую обитель и взял с собою юного Корнилия. Красота природы, тихая монастырская служба в пещерной церкви преисполнили сердце юноши духовной радости и благоговением. Никогда и нигде еще он так горячо не молился. Эта поездка оказала большое воздействие на его последующую жизнь.
Вскоре он навсегда ушел из родительского дома и принял постриг в Псково-Печерском монастыре. Там преподобный Корнилий вел строгую жизнь: в убогой келлии спал на досках, все свое время посвящал полезному труду и молитве.
В 1529 году преподобный Корнилий, служивший образцом богоугодной жизни, был избран игуменом. В его настоятельство число братии увеличилось от 15 до 200 человек, и это количество насельников не было превышено ни при одном из последующих настоятелей. Вставая с восходом солнца, преподобный Корнилий сам правил службу, и отдавал все силы трудам, воодушевлял братию к выполнению устава, строгому посту, молитве, напоминая о подвиге первых христиан. По своему смирению преподобный Корнилий почитал себя первым среди равных лишь по избранию.
Деятельность преподобного Корнилия распространялась далеко за пределы обители. Его жизнь была образцом деятельной любви к Богу и человеку. Он распространял православие среди жителей окрестных мест – эстов и сэту, многие из которых крестились в монастыре. Преподобный Корнилий, всегда кроткий и приветливый, молча выслушивал людей, давал наставления, а потом благословлял с молитвой и любовью. При звуке его голоса открывалось сердце, стыд отбегал. После покаяния люди плакали облегчающими душу слезами.
Однажды на Псковщине было моровое поветрие. Люди бежали из селений в леса, подступы к городам закрывались, чтобы уберечь жителей от моровой язвы. Многие умирали не только от заразы, но и от голода. По благословению преподобного Корнилия в то страшное время иноки монастыря выходили к голодным, чтобы раздавать им вареную рожь.
Во время Ливонской войны преподобный Корнилий проповедовал христианство в отвоеванных городах, строил там храмы, помогал пострадавшим, заботился о раненых. В обители погребали убитых и записывали их в синодики для поминовения.
В 1560 году, в праздник Успения Пресвятой Богородицы, преподобный Корнилий послал в благословение русским войскам, осаждавшим город Феллин, просфору и святую воду. В тот же день немцы сдали город.
Преподобный Корнилий очень любил и хорошо знал книги – он создал в монастыре большую по тому времени библиотеку. В середине XVI века Псково-Печерский монастырь перенял от Спасо-Елизаровского монастыря традицию летописания. Кроме того, святой игумен Корнилий завел большой монастырский синодик для поминовения усопших братии и благотворителей обители, начал вести «Кормовую книгу». В этом труде он оставил последующим поколениям историческую характеристику своего времени, составил «Описание монастыря» и «Описание чудес Печерской иконы Божией Матери».
Преподобный Корнилий расширил и украсил свой монастырь, прокопал далее монастырские пещеры, перенес деревянную церковь во имя Сорока мучеников Севастийских за монастырскую ограду, на приезжий монастырский двор, на ее месте в 1541 году поставил церковь в честь Благовещения Пресвятой Богородицы и в 1559 году построил храм Покрова Пресвятой Богородицы. В 1558–1565 годах преподобный Корнилий воздвиг вокруг монастыря надежную каменную стену, а над святыми вратами по своему замыслу построил каменную церковь во имя святителя и чудотворца Николая (1565). Тем самым он поручил этому истинному защитнику чистоты православной веры покровительство святой обители на границе с неправославными народами.
Так обитель, возникшая на границе Русского государства, стала не только светочем православия, но и крепостью против внешних врагов России.
Другим делом преподобного Корнилия было основание в 1538 году во Пскове подворья монастыря с каменной церковью в честь иконы Божией Матери «Одигитрии».
Во время своего управления монастырем преподобный Корнилий учредил при обители иконописную мастерскую. Трудившиеся в ней монахи учились искусству иконописи в Мирожском монастыре и по возвращении в свою обитель писали иконы и помогали преподобному Корнилию украшать храмы и обучать других иноков. В монастыре были также столярная, кузнечная, керамическая и другие хозяйственные мастерские.
О мученической кончине преподобного Корнилия написано в древней рукописи Троице-Сергиевой Лавры. Когда преподобный игумен Корнилий вышел с крестом на монастырские ворота навстречу царю Иоанну Грозному, разгневанный ложным наветом на святого игумена царь своей рукой отсек ему голову, но тотчас раскаялся и, подняв тело его, на руках понес в монастырь. Обагренная кровью преподобного Корнилия дорожка, по которой царь нес его тело к церкви Успения Пресвятой Богородицы, названа «кровавым путем».
Раскаявшись, царь пожертвовал Псково-Печерскому монастырю множество драгоценных вкладов, вписал имя преподобного игумена в свой синодик, но память о содеянном преследовала его всю жизнь.
Тело преподобномученика Корнилия было положено в стене «Богом зданной пещеры», где невредимо пребывало 120 лет. В 1690 году митрополит Псковский и Изборский Маркелл перенес его мощи, прославившиеся исцелениями больных, из пещеры в соборный храм Успения Пресвятой Богородицы и положил в новом гробе в стене.
17 декабря 1872 года мощи преподобного Корнилия были переложены в медно-посеребренную раку, а в 1892 году – в новую раку. Полагают, что служба преподобномученику была составлена ко дню открытия мощей в 1690 году.
Песнопения
Тропарь, глас 6
Пско́во-Пече́рская оби́тель,
и́здавна сла́вная чудесы́ ико́ны Богома́терней,
мно́гия и́ноки Бо́гови воспита́,
ту и преподо́бный Корни́лий,
по́двигом до́брым подвиза́ся,
чу́дную Богома́терь сла́вя,
инове́рныя просвеща́я,
и́ноки и мно́гия лю́ди спаса́я,
оби́тель же свою́ ди́вно украша́я и огражда́я.
Ту и му́ченичества вене́ц по мно́гих ле́тех па́стырства своего́ до́блестне прия́.
Те́мже возра́дуемся, лю́дие, Христа́ Бо́га
и Пречи́стую Его́ Ма́терь возблагодари́м,
я́ко дарова́ нам преподобному́ченика сла́вна
и моли́твенника о душа́х на́ших достоблаже́нна.
Тропарь, глас 8 Я́ко свети́льницы, яви́стеся всесве́тлии/ в верте́пе Цари́цы Богома́тери,/ преподо́бнии отцы́ на́ши Ма́рко, Ио́но и Корни́лие,/ вы́ бо, кре́ст Христо́в на ра́мо взе́мше,/ усе́рдно Тому́ после́довасте/ и, чистото́ю Бо́гови прибли́жившеся,/ отону́дуже си́лами чуде́с обогати́стеся,/ те́м и мы́ любе́зно прибега́ем к ва́м и уми́льно глаго́лем:/ о преподо́бнии, моли́те Христа́ Бо́га/ спасти́ся душа́м на́шим.
Кондак, глас 4
Све́тлый свети́льник Правосла́вия
и сугу́бая Пско́вския земли́ защи́та был еси́,
многобо́жие искореня́я и лю́ди к Бо́гу наставля́я.
Дом Богома́тери тобо́ю укрепи́ся и просла́вися,
доброде́тельми же украшен, вене́ц му́ченика прия́л еси́,
помина́й нас, чад твои́х, и у Го́спода, преподобному́чениче Корни́лие.
Кондак, глас 2 Христо́вою любо́вию уязви́вшеся, преподо́бнии,/ и Того́ кре́ст на ра́мо взе́мше,/ понесли́ есте́ Боже́ственне, вооружи́вшеся на неви́димыя враги́/ и непреста́нныя моли́твы, я́ко копие́, в рука́х иму́ще кре́пко,/ победи́ли есте́ бесо́вския ополче́ния,/ те́м зове́м ва́м:/ ра́дуйтеся, преподо́бнии отцы́ на́ши Ма́рко, Ио́но и Корни́лие,// ве́рных удобре́ние. Ин кондак, глас 2 Измла́да, Корни́лие чу́дный,/ трудо́м и по́двигом себе́ преда́в,/ игу́меном Пско́во-Пече́рстей оби́тели поста́влен был еси́,/ о́бразом ве́ры и по́стнического жития́ всем быв,/ мно́гия лю́ди к Бо́гу приве́л еси́./ За своя́ же вели́кия доброде́тели/ за́вистию от злых гони́м,/ му́ченически ду́шу свою́ Бо́гови пре́дал еси́./ Того́ ра́ди с ве́рою возопии́м:/ преподобному́чениче Корни́лие достосла́вный,// моли́ Христа́ Бо́га спасти́ся душа́м на́шим.
Молитва
Молитва
О, святы́й преподобному́чениче Корни́лие! Смире́нно припа́даем к ра́це моще́й твои́х и уми́льно мо́лим тя: ми́лостиво при́зри на ско́рби на́ша душе́вныя и теле́сныя и изба́ву нам пода́ждь; помози́ нам, свя́тче Бо́жий, от наве́та злых челове́к, от ни́хже и сам ты неви́нно на земли́ пострада́л еси́. Защити́ нас от наси́лия диа́вола, стра́стно вою́ющаго в не́мощных удесе́х на́ших, умоли́ Го́спода Бо́га и Пречи́стую Его́ Ма́терь дарова́ти нам ти́хое и безгре́шное житие́, взаи́мную бра́тскую нелицеме́рную любо́вь и ми́рную христиа́нскую кончи́ну, да чи́стою со́вестию предста́нем нелицеме́рному стра́шному суди́лищу Христо́ву, и в Ца́рствии Его́ просла́вим Животворя́щую Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.
Канон
Канон преподобномученику Корнилию, игумену Псково-Печерскому
Минея, 20 Февраля.
Глас 8
Песнь 1
Ирмос: Во́ду проше́д, я́ко су́шу,
и еги́петскаго зла избежа́в,
изра́ильтянин вопия́ше:
Изба́вителю и Бо́гу на́шему пои́м.
Припев: Преподобному́чениче Корни́лие, моли́ Бо́га о на́с.
Умиле́ния ми во́ду изле́й, Го́споди, в се́рдце,
и ум озари́ досто́йно воспе́ти Твоего́ уго́дника, преподо́бнаго Корни́лия.
Припев: Преподобному́чениче Корни́лие, моли́ Бо́га о на́с.
Мона́хов наста́вник и учи́тель нелицеприя́тен был еси́
и, Бо́гу сих приводя́,
му́ченическим венце́м от земна́го царя́ венча́лся еси́, блаже́нне.
Сла́ва Отцу́ и Сы́ну и Свято́му Ду́ху.
Христо́вым светоли́тием просвеща́ем, преподо́бне о́тче Корни́лие,
моли́твами твои́ми, преблаже́нне, омраче́нную ду́шу мою́ просвети́,
я́ко да воспева́ю тя.
И ны́не и при́сно и во ве́ки веко́в. Ами́нь.
Богородичен: Тишина́ Ты, Влады́чице, и пристани́ще погиба́ющим в мо́ре грехо́в,
те́мже к Тебе́ притека́ющих не отри́ни, Присноде́во,
но спаси́ Твои́м предста́тельством Богома́терним.
Песнь 3
Ирмос: Небе́снаго кру́га Верхотво́рче, Го́споди,
и Це́ркве Зижди́телю,
Ты мене́ утверди́ в любви́ Твое́й,
жела́ний кра́ю, ве́рных утвержде́ние,
Еди́не Человеколю́бче.
Припев: Преподобному́чениче Корни́лие, моли́ Бо́га о на́с.
Просвети́л еси́ лю́ди, и́долом служа́щия, све́том и́стинныя ве́ры,
озари́ и нас, гре́шных, прибега́ющих к Твоему́ заступле́нию,
благода́тию от Всеблага́го Человеколю́бца.
Припев: Преподобному́чениче Корни́лие, моли́ Бо́га о на́с.
Всем бла́га духо́вныя и теле́сныя де́я,
наве́том злых плоть твоя́ умертви́ся
со святы́ми же дух твой всели́ся,
и ны́не с ни́ми моли́ся Христу́ о нас, преподо́бне.
Сла́ва Отцу́ и Сы́ну и Свято́му Ду́ху.
Ны́не в безконе́чную сла́ву преше́д от земли́,
окая́нную ду́шу мою́ страстьми́, преподо́бне,
приле́жным очище́нием твоея́ моли́твы уврачу́й.
И ны́не и при́сно и во ве́ки веко́в. Ами́нь.
Богородичен: То́чию в хра́ме Твое́м, а́ки в корабле́, Тобо́ю окормля́емем, Богоро́дице,
избавля́емся ны́не от враг ви́димых и неви́димых
и укрепля́емся Твое́ю по́мощию, Присноде́во.
Седален, глас 1
А́нгелов ли́ки воспо́лнил еси́, преподо́бне Корни́лие,
о́браз имы́й а́нгельский,
свяще́нством оде́ян и му́ченичеством укра́шен,
цельбу́ душа́м и телесе́м подае́ши
с ве́рою несумне́нною прибега́ющим к тебе́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Возвы́си рог христиа́нский
и низложи́ безбо́жныя шата́ния, Богороди́тельнице,
спаса́ющи сие́ ста́до Твое́,
в не́м же вели́кое Твое́ и́мя многопе́тое велича́ется при́сно и сла́вится.
Песнь 4
Ирмос: Услы́шах, Го́споди,
смотре́ния Твоего́ та́инство,
разуме́х дела́ Твоя́
и просла́вих Твое́ Божество́.
Припев: Преподобному́чениче Корни́лие, моли́ Бо́га о на́с.
Оби́тель бя́ше издре́вле святы́х в Богозда́нней пеще́ре,
Бо́гу Еди́ному ве́домая,
ты же, о́тче Корни́лие, тем подража́я
и ме́сто их по́двигов почита́я,
мно́жество и́ноков к Бо́гу приве́л еси́.
Припев: Преподобному́чениче Корни́лие, моли́ Бо́га о на́с.
Не оста́ви, Корни́лие преподо́бне,
твои́ми по́тами и труда́ми возраще́нныя сея́ оби́тели,
но охраня́й ю,
и́бо и врази́ тя ви́деша охраня́ющим ю и укрепля́ющим.
Сла́ва Отцу́ и Сы́ну и Свято́му Ду́ху.
Многоболе́зненныя стра́сти всегда́ врачу́еши приступа́ющих к тебе́,
благода́ть бо, преподо́бне, прии́м от Го́спода,
содева́ти зна́мения и чудеса́.
И ны́не и при́сно и во ве́ки веко́в. Ами́нь.
Богородичен: Утоли́, Богома́ти, свире́пствующую бу́рю неве́рия и ожесточе́ния,
злы́я стра́сти, поглоти́ти хотя́щия Тя сла́вящих и о́браз Твой почита́ющих,
но заступи́ нас моли́твами преподо́бнаго Твоего́.
Песнь 5
Ирмос: Просвети́ нас повеле́нии Твои́ми, Го́споди,
и мы́шцею Твое́ю высо́кою
Твой мир пода́ждь нам,
Человеколю́бче.
Припев: Преподобному́чениче Корни́лие, моли́ Бо́га о на́с.
Я́ко ка́мень драги́й
огради́л еси́ кре́пко оби́тель от ра́тников злых, преподо́бне,
изыма́я и свобожда́я и́ноков от страсте́й
и доброде́тельми горе́ возводя́.
Припев: Преподобному́чениче Корни́лие, моли́ Бо́га о на́с.
Да не оскуде́ют, о́тче, твои́ми моли́твами и́стиннии подви́жницы благоче́стия во оби́тели твое́й,
но ку́пно со святы́м чудотво́рцем Никола́ем,
ему́же охране́ние ея́ вве́рил еси́,
до трубы́ Арха́нгела соблюди́ ю.
Сла́ва Отцу́ и Сы́ну и Свято́му Ду́ху.
Преподо́бне о́тче,
помози́ оби́тели твое́й,
насе́льником и всем нам вся ко́зни лука́ваго отража́ти,
я́коже ты иногда́ отража́л еси́ ви́димыя враги́ и неви́димыя.
И ны́не и при́сно и во ве́ки веко́в. Ами́нь.
Богородичен: Мглу страсте́й на́ших разреши́, Де́во,
и благода́тною си́лою Сы́на Твоего́ отжени́ враго́в кова́рство
и наве́ты диа́вола от раб Твои́х, Тя сла́вящих.
Песнь 6
Ирмос: Моли́тву пролию́ ко Го́споду
и Тому́ возвещу́ печа́ли моя́,
я́ко зол душа́ моя́ испо́лнися
и живо́т мой а́ду прибли́жися,
и молю́ся, я́ко Ио́на:
от тли, Бо́же, возведи́ мя.
Припев: Преподобному́чениче Корни́лие, моли́ Бо́га о на́с.
Пречи́стыя дом, преподо́бне, огради́л и укра́сил еси́,
те́мже и сам ны́не во оби́тели Ея́
на Небеси́ и на земли́ в хра́ме Ея́ досто́йно обита́еши.
Припев: Преподобному́чениче Корни́лие, моли́ Бо́га о на́с.
Уте́ши и утиши́ нас, си́рых, и в доброде́тели ни́щих, преподобному́чениче,
жите́йскую го́рдость отрева́я
и моли́тве и́стинней науча́я.
Сла́ва Отцу́ и Сы́ну и Свято́му Ду́ху.
Соде́яв, пресла́вне, ду́шу твою́ храм Свято́му Ду́ху,
был еси́ насле́дник Го́рняго Ца́рствия,
с Вы́шними си́лами и со все́ми святы́ми моли́ся ко Го́споду
о спасе́нии душ на́ших.
И ны́не и при́сно и во ве́ки веко́в. Ами́нь.
Богородичен: Сохрани́ дом Твой, Богоро́дице, до сконча́ния ве́ка
и не оста́ви нас, си́рых, без Твоея́ Ма́терния по́мощи
и предста́тельства преподо́бных Твои́х.
Кондак, глас 4
Све́тлый свети́льник Правосла́вия
и сугу́бая Пско́вския земли́ защи́та был еси́,
многобо́жие искореня́я и лю́ди к Бо́гу наставля́я.
Дом Богома́тери тобо́ю укрепи́ся и просла́вися,
доброде́тельми же укра́шен, вене́ц му́ченика прия́л еси́,
помина́й нас, чад твои́х, и у Го́спода, преподобному́чениче Корни́лие.
Икос
Бо́гом возлю́бленный игу́мен изря́дный,
ве́ры Христо́вой апо́стол и му́ченик,
всем милосе́рдый, и ни́щих пита́тель,
от и́долов лю́ди приведы́й к Бо́гу и́стинному,
ве́ре наставля́я и Бо́жия хра́мы устроя́я,
во оби́тели Пречи́стыя мона́хов мно́жества собра́л еси́,
те́мже Богома́терь просла́ви Своя́ о́бразы дела́ми чу́дными,
и́хже свиде́тель нело́жен был еси́;
и ны́не же от ско́рбных обстоя́ний избавля́еши,
да с ве́рою и любо́вию пое́м ти:
ра́дуйся, преподобному́чениче Корни́лие.
Песнь 7
Ирмос: От Иуде́и доше́дше, о́троцы
в Вавило́не иногда́
ве́рою Тро́ическою пла́мень пе́щный попра́ша, пою́ще:
отце́в Бо́же, благослове́н еси́.
Припев: Преподобному́чениче Корни́лие, моли́ Бо́га о на́с.
Ио́ны первонача́льника, гони́телей не́когда избе́гшаго, му́ченичество восприя́л еси́, сла́вне,
те́мже с ним Бо́гу моли́ся, да сохрани́т оби́тель ва́шу невреди́му
и нас покая́нием к вам привлече́т.
Припев: Преподобному́чениче Корни́лие, моли́ Бо́га о на́с.
Марк, пусты́нник та́йный,
а́ки Мелхиседе́к, не́мощию тя вразуми́, Корни́лие, о и́мени свое́м,
его́ же смире́нию поревнова́ти научи́ нас, блаже́нне.
Сла́ва Отцу́ и Сы́ну и Свято́му Ду́ху.
Просвети́в твое́ се́рдце, преподо́бне,
мона́хов был еси́ наста́вник,
наказу́я и уча́ и всех приводя́ к Бо́жией во́ле, поя́:
оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Да заградя́тся, Богоро́дице, Твои́ми моли́твами уста́ лжи́вая и льсти́вая
не ве́дущих над ве́рными покро́ва Твоего́,
и спаси́ всех, Де́во, Тебе́ и́стинно слу́жащих
и Христо́во и́го благо́е до́бре несу́щих.
Песнь 8
Ирмос: Царя́ Небе́снаго,
Его́же пою́т во́и А́нгельстии,
хвали́те и превозноси́те во вся ве́ки.
Припев: Преподобному́чениче Корни́лие, моли́ Бо́га о на́с.
Вразумля́еши живу́щия во огра́де твое́й, преподо́бне,
явля́яся им я́ве и во сне наставля́я,
но и всем, моля́щимся тебе́, чу́дно помога́еши
и от злых бед избавля́еши.
Припев: Преподобному́чениче Корни́лие, моли́ Бо́га о на́с.
Моли́ о нас, преподо́бне,
и не забу́ди к тебе́ притека́ющих, в ско́рбех и печа́лех су́щих,
подая́й утеше́ние от твоея́ ра́ки цельбоно́сныя.
Сла́ва Отцу́ и Сы́ну и Свято́му Ду́ху.
Процве́л еси́ я́ко фи́никс Дави́дски, о́тче,
и оби́тель яви́лся еси́ Ду́ха Пресвята́го,
о нас непреста́нно моли́
почита́ющих ве́рою пречестну́ю па́мять твою́, преподо́бне Корни́лие.
И ны́не и при́сно и во ве́ки веко́в. Ами́нь.
Богородичен: Век скончава́ется, любо́вь оскудева́ет,
побе́ду лука́вый торжеству́ет,
и кто нам помощи́ мо́жет, а́ще не Ты, Де́во, Чу́дная Ма́ти,
огради́ши Кресто́м Сы́на Твоего́.
Песнь 9
Ирмос: Вои́стину Богоро́дицу,
Тя испове́дуем,
спасе́ннии Тобо́ю, Де́во Чи́стая,
с Безпло́тными ли́ки Тя велича́юще.
Припев: Преподобному́чениче Корни́лие, моли́ Бо́га о на́с.
В дому́ Богома́тери, я́коже в Гефсима́нии, почива́еши ны́не, блаже́нне,
иде́же, служа́ умиле́нне,
предстоя́л еси́ Престо́лу Бо́жию смире́нно, в верте́пе освяще́нному.
Припев: Преподобному́чениче Корни́лие, моли́ Бо́га о на́с.
Никто́же неуте́шен отхо́дит от твоея́ ра́ки, преподо́бне,
но исцеле́ние душ и теле́с ве́рующим подае́ши всегда́ изоби́льно.
Сла́ва Отцу́ и Сы́ну и Свято́му Ду́ху.
Зри́ши Бо́жия и А́нгельския све́тлости патриа́рх и му́ченик и апо́стольския красо́ты,
моли́ с ни́ми Человеколю́бца оставле́ние грехо́в и жития́ исправле́ние
дарова́ти нам, преподо́бне, хва́лящим тя.
И ны́не и при́сно и во ве́ки веко́в. Ами́нь.
Богородичен: Тишина́ ве́лия бысть в пеще́ре су́щим,
суе́т ми́ра избе́гшим святы́м.
Ты, о Ма́ти Де́во,
Небе́сную тишину́ ниспосли́ и нам, Чи́стая,
Тебе́ велича́ющим.
Светилен
Свяще́нством досто́йно облече́н,
удобре́н же зело́ преподо́бием,
Богоро́дицы дом укра́сив и просла́вив,
язы́цы ко Христу́ приве́л еси́,
усече́нием же ме́чным седина́ твоя́ обагри́ся кро́вию, Корни́лие,
и ны́не со святы́ми Христу́ предстоя́,
моли́ почита́ющим па́мять твою́
земно́е ше́ствие в ми́ре прейти́ и одесну́ю Судии́ предста́ти.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: По успе́нии Твое́м ми́ра не оста́вила еси́, Богоро́дице,
но и в де́бри земно́й прославля́еши и́мя свято́е Свое́ чудеса́ми
от ико́ны Твоея́ святы́я и гро́ба преподобному́ченика,
с ни́мже моли́ Сы́на и Бо́га Твоего́ о нас, недосто́йных,
Тя при́сно блажа́щих.
Акафист
Акафист преподобномученику Корнилию Псково-Печерскому
Кондак 1
Избранный чудотворче, преславный угодниче Христов, скорый помощниче и теплый молитвенниче о всех, с верою и любовию просящих твоего заступления, восхваляем тя любовию, Корнилие преподобномучениче, ты же яко имеяй дерзновение ко Господу, моли о спасении нас, поющих ти:
Радуйся, Корнилие преподобномучениче, отче наш.
Икос 1
Ангелов подражатель явился еси, преподобномучениче и богоносне отче наш Корнилие, ангельски поживый на земли и нам оставивый образ совершенства духовнаго. Сего ради прослави тя чудесы Христос Бог, Емуже предстоиши ныне во свете невечернем Царствия Небеснаго; от нас же, чтущих тя, слышиши пение таковое:
Радуйся, яко любве ради ко Господу всякое наслаждение земное оставил еси;
Радуйся, яко благая мира сего презрел еси.
Радуйся, яко богатство нетленное обрел еси;
Радуйся, яко иго Христово благое и удобоносимое возлюбил еси.
Радуйся, яко во плоти аки безплотен пожил еси;
Радуйся, яко боголюбезную чистоту непорочно сохранил еси.
Радуйся, яко узкими враты в Царствие Небесное вошел еси;
Радуйся, яко равноангельскую честь достойно приял еси.
Радуйся, яко венец неувядаемый от Господа приял еси;
Радуйся, яко на небеси и на земли прославлен еси.
Радуйся, Корнилие преподобномучениче, отче наш.
Кондак 2
Видя суету жития мирскаго и слыша глас Пастыря Христа: «Иже аще хощет по Мне идти, да отвержется себе и возмет крест свой», и ты, преподобномучениче, мир и вся благая его оставил еси, да Единому Богу поживеши, поя Ему: Аллилуиа.
Икос 2
Разумом свыше просвещенный, наставил еси духовная чада твоя ко благоугождению истинному и любезно приял еси вся возжелавшия подвизатися купно с тобою во спасение, отче Корнилие, спасительнаго пути наставниче предобрый; приими убо и нас под твой отчий покров и молитвами твоими помози нам спасение вечное унаследовати, да тя восхвалим сице:
Радуйся, алчущим и жаждущим правды глаголов живота вечнаго возвестителю;
Радуйся, ищущим Царствия Божия пути спасительнаго указателю.
Радуйся, взыскующих горняго Царствия мудрый водителю;
Радуйся, обуреваемых страстьми добрый кормчий.
Радуйся, во благочестии труждающихся великий помощниче;
Радуйся, немудрых благоискусный учителю.
Радуйся, теплый о всем мире предстателю;
Радуйся, усердный и благоприятный о душах наших ходатаю.
Радуйся, надежный корабль в житейском плавании обретший;
Радуйся, и нам тихую пристань указавый.
Радуйся, Корнилие преподобномучениче, отче наш.
Кондак 3
Силою Господа умудренный ко благоустроению святыя обители оградити ю от нашествия вражия стеною, паче же святыми молитвами твоими препоручивый ю честному покрову Пресвятыя Богородицы, умоли дати и нам покров и защиту, да сподобимся купно с тобою пети Богу: Аллилуиа.
Икос 3
Имуще тя, отче Корнилие, скораго в бедах помощника, благовернии людие, в напастех и скорбех тя на помощь молитвенно призывающе и дары благости Божия молитвами твоими от Щедродавца Бога обильно приемлюще, тебе от любве теплыя хвалебно воспевают:
Радуйся, многажды прошения наша исполнением предваривый;
Радуйся, болящим врачу благоискусный.
Радуйся, скорбящим благоприятное утешение;
Радуйся, унывающим благодатное укрепление.
Радуйся, душетленных страстей прогонителю;
Радуйся, безпомощным скоропредстательный помощниче.
Радуйся, иноков богомудрый руководителю;
Радуйся, радость истинную во Христе нам показавый.
Радуйся, воеводо изрядный духовных воинов;
Радуйся, Корнилие преподобномучениче, отче наш.
Кондак 4
Бурею страстей и треволненьми во многомятежном мире непоколебимый в тихое пристанище спасения душу твою управил еси, вся благая и красная мира презрев, призывая и всех быти причастницы горняго Царствия, идеже ныне пребываеши, поя Богу: Аллилуиа.
Икос 4
Слышавше пастырие Христовы Церкве о твоих подвизех и яко земнаго тя Ангела помышляя, избраша тя во игумена обители, достойную почесть трудом твоим воздавше и тем подвизающе нас благохвалити тя сице:
Радуйся, Агнца и Пастыря верный служителю;
Радуйся, алтаря Господня достойный предстоятелю.
Радуйся, богомудрый иноков начальниче;
Радуйся, истиннаго смирения наставниче.
Радуйся, совершеннаго терпения подвижниче;
Радуйся, даров Святаго Духа честное вместилище.
Радуйся, слезнаго умиления преисполненный;
Радуйся, Пресвятыя Троицы сосуде избранный.
Радуйся, благочестия утверждение;
Радуйся, православия столпе и похвало.
Радуйся, Корнилие преподобномучениче, отче наш.
Кондак 5
Боготечную мысль соломонову имея, образ Успения Пресвятыя Богородицы написа благочестивый Алексий, последи же ради молитв преподобнаго Корнилия неизреченные чудеса икона являти начаше: исцеляше бесных, отверзаше очи слепым многим, о сем радующеся, иноцы пояху Богу: Аллилуиа.
Икос 5
Созда преподобный Корнилий во игуменство свое над Святыми вратами храм Святителю Николаю Чудотворцу, аки защитнику всех обидимых и ревнителю православия, уповая быти ему хранителю обители от врагов православия; темже и ныне с ним предстоя Престолу Господа Славы, помолися, отче Корнилие, Творцу о спасении всех потрудившихся ради святыя обители и о всех славящих тя пеньми сицевыми:
Радуйся, правило веры и благочестия;
Радуйся, образе целомудрия и воздержания.
Радуйся, постническаго лика украшение;
Радуйся, звездо, сияющая в сонме преподобных.
Радуйся, иноков пастырю и учителю;
Радуйся, и в мире живущих заступниче и покровителю.
Радуйся, тесный и прискорбный путь паче пространнаго возлюбивый;
Радуйся, учителю мужественнаго подвижничества.
Радуйся, стено, невидимо ограждающая паче стен каменных;
Радуйся, жертва вечерняя Богу приятная.
Радуйся, Корнилие преподобномучениче, отче наш.
Кондак 6
Проповедуя слово Божие братии твоей, всех поучал еси словом и житием безмолвию, смирению, посту и молитве, в нейже деннонощно пребывая, воспевал еси выну Всесильному Богу: Аллилуиа.
Икос 6
Возсиял еси светильник веры, отче Корнилие, обители твоей такожде и окрестным людем, землю же Ливонскую верою христианскою просветил еси, невидимый храм Духа Божия в себе нося, устроил еси видимый храм Пречистыя Богородицы Одигитрии и новопросвещенней чуди храмы основал еси, такожде и клирики устроил еси, да вси обрящут врачевание недуг своих душевных. Сего ради прославлен еси от Подвигоположника Христа, от нас же приемлеши сия похвальныя песни:
Радуйся, Евангелия Христова благовестителю;
Радуйся, веры православныя проповедниче.
Радуйся, благодатию Божиею насыщенный;
Радуйся, от источника Божественнаго напоенный.
Радуйся, потоком слез спасительных орошенный;
Радуйся, в ризу спасения облеченный.
Радуйся, одеждою нетления одеянный;
Радуйся, брашно неисчерпаемое указавый.
Радуйся, питие приснотекущее Христа проповедавый;
Радуйся, манной слова Божия люди питавый.
Радуйся, Корнилие преподобномучениче, отче наш.
Кондак 7
Агнцу Божию, вземшему грехи мира, подражая, кротость и смирение Его себе усвоил еси, отче Корнилие, и веяния скорби и обиды безропотно претерпел еси, поя Богу: Аллилуиа.
Икос 7
Дивныя и доблестныя подвиги твоя восхваляюще, добропобедне воине Христов Корнилие, ублажаем тя, от тленнаго сего жития земным царем к Небесному Царю в вечное жилище предпосланнаго, славим мученическую кончину твою и молитвенно празднуем святую память твою, тебе усердно воспевающе:
Радуйся, яко невинною кровию твоею чистое житие запечатлел еси;
Радуйся, яко в час смертный к лику Мучеников причислен еси.
Радуйся, яко отверзошася ти врата райская, да внидеши в радость Господа твоего;
Радуйся, яко душу твою Жизнодавец Христос в селения небесныя приял еси.
Радуйся, яко мощи твоя на земли прославишася;
Радуйся, яко со безплотными силами трисвятую песнь Богу немолчно воспеваеши.
Радуйся, яко с Пророки и Апостолы светло торжествуеши;
Радуйся, со святыми Мученики купно увенчанный.
Радуйся, с Преподобными и праведниками прославленный;
Радуйся, Корнилие преподобномучениче, отче наш.
Кондак 8
Странника и пришельца в мире сем себе помышляя и горняго Иерусалима взыскуя, течение временныя жизни во святей обители Божия Матере скончал еси, Ейже и ныне предстоиши о сем моляся, да вси купно с тобою поют Богу: Аллилуиа.
Икос 8
Победив вся враги оружием правды Божия, яко истинный воин Христов увенчен венцем победным в Царстве славы, идеже пребывая с преподобными Марком и Ионою, и ныне ограждаеши от врагов обитель твою, призывая и нас подражати ти в духовней брани, да и мы в радости духовней вопием ти:
Радуйся, смирением святым гордыню в себе победивый;
Радуйся, кротостию совершенною ярости пламень угасивый.
Радуйся, молитвами усердными уныние духа прогнавый;
Радуйся, радования о Господе достигнувый.
Радуйся, воздержанием и целомудрием чистоту души и тела соблюдший;
Радуйся, неленостно всяку добродетель в себе возрастивый.
Радуйся, венец победный от Христа приявый;
Радуйся, от Господа даром чудес обогащенный.
Радуйся, в лик добропобедных Мученик приятый;
Радуйся, аки добрый воин к воином небесным сопричтенный.
Радуйся, Корнилие преподобномучениче, отче наш.
Кондак 9
Всякое наслаждение плотское возненавидев, Корнилие преблаженне, единаго Бога всем сердцем возлюбил еси яко источника всякия благости, темже и Господь тя возлюби и обильно щедроты Своя на тя и обитель твою излия, да вси к мощем твоим прибегающии и скорую помощь от тебе приемлющи благодарственно вопиют: Аллилуиа.
Икос 9
Витии многовещаннии не довлеют глаголати вся подвиги твоя, богомудре отче Корнилие, ибо доброта жития твоего воистину превосходит похвалу человеческую, обаче мы любовию к тебе побуждаеми, дерзаем смиренно хвалити тя пением таковым:
Радуйся, святыя Церкве светильниче немеркнущий;
Радуйся, всемощным заступлением твоим от меча иноплеменных нас избавляющий.
Радуйся, страны нашея благодатное украшение;
Радуйся, града нашего покрове благодатный.
Радуйся, обители твоея утверждение и похвало;
Радуйся, монашествующих пречудная красото.
Радуйся, роду христианскому присное утешение;
Радуйся, любящих и чтущих тя пред Богом ходатаю.
Радуйся, грешником ко спасению пути указателю;
Радуйся, пред Престолом Божиим миру грешному предстателю.
Радуйся, Корнилие преподобномучениче, отче наш.
Кондак 10
Спасти хотя град Псков и люди православныя от нашествия иноплеменных, явился еси старцу Дорофею купно с Антонием Киевским, сопутствующе Пресвятей Богородице, поспешившей на помощь людем Своим; егда же Богоматерь укоряюще люди за скверну жития их, умолял еси со слезами, глаголюще: «О Госпоже Владычице Богородице, согрешиша живуще беззаконно, но не остави их заступлением Твоим, паче же молися Сыну Твоему за люди недостойныя», — и тако отвратил еси праведный гнев, да зовут во умилении Богу: Аллилуиа.
Икос 10
Стену заступления и молитвенника богоприятна имуще тя, отче Корнилие, благодарение Отцу Небесному усердно возсылая за вся благодеяния Его, тобою нам обильно являемыя, тебе же, предстателю нашему, сицевое приносим пение:
Радуйся, предивный угодниче Господень;
Радуйся, неутомимый в подвизех избранниче Христов.
Радуйся, слуго добропослушливый Всевышняго Владыки;
Радуйся, благий и верный рабе Царя царствующих.
Радуйся, обидимых добрый заступниче;
Радуйся, странных благонадежное пристанище.
Радуйся, недугов душевных и телесных благий целителю;
Радуйся, грешников пред Богом ходатаю.
Радуйся, кающихся со Христом примирителю;
Радуйся, небесный наш покровителю.
Радуйся, Корнилие преподобномучениче, отче наш.
Кондак 11
Пение всякое не довлеет ко прославлению величествия твоего, отче преподобне, твоими бо молитвами дивно явися сила Божия: молился бо еси пред пречистым образом Владычицы и тем обитель от разорения сохранил еси. Ныне и мы молим тя, не тщу сотвори надежду нашу и избави нас от враг наших, да во умилении зовем Спасителю Богу: Аллилуиа.
Икос 11
Светильник добрых дел был еси при жизни, отче преподобне, и светильник Божия благодати явился еси по смерти, сияя чудесы и исцеления источая; и по ста двудесяти летех, аки сокровище драгоценное, мощи твоя из недр земных явлены быша, да тебе от Господа прославленному умильно взываем:
Радуйся, нетления цвете прекрасный;
Радуйся, крине рая небеснаго процветший.
Радуйся, светлостию твоею мрак душ наших озаряяй;
Радуйся, от болезней многоразличных благодатно исцеляяй.
Радуйся, ран греховных врачу благоискусный;
Радуйся, сердец скорбящих утешителю.
Радуйся, обители твоея страже неусыпный;
Радуйся, спящих во гресех возбудителю.
Радуйся, бдящих в молитве укрепителю;
Радуйся, Корнилие преподобномучениче, отче наш.
Кондак 12
Благодать от Господа приял еси, преподобномучениче, ко просвещению иноков и мирских людей светом истинныя веры, темже и ученицы твои, в земном житии тобою просвещеннии, ныне с тобою на небеси прославляют Вседержителя Светодавца и нас научают славословию, да и мы Творцу и святых Святейшему Слову поем: Аллилуиа.
Икос 12
Поюще дивныя твоя чудеса, умиленно припадаем пред пречистыми мощами твоими, преподобне отче наш, благодарственно воспоминаем труды твоя и твое заступление, и якоже древле услышал еси мольбы рабов твоих, такожде и ныне услыши скорбныя молитвы чтущих тя и сподоби ныне прияти скорое свобождение от врагов спасения нашего, да невозбранно поем тебе песнь сию:
Радуйся, всесильными молитвами твоими от врагов видимых и невидимых избавляяй;
Радуйся, светом истины сущих во тьме и сени смертней озаряяй.
Радуйся, разслабленных утверждение и сило;
Радуйся, неверных прославляти Бога научаяй.
Радуйся, нераскаянных грешников к покаянию обращаяй;
Радуйся, помощь сирым и вдовицам подаваяй.
Радуйся, скорбных утешаяй;
Радуйся, в посте и молитвах ослабевающих укрепляяй.
Радуйся, Корнилие преподобномучениче, отче наш.
Кондак 13
О преподобномучениче отче Корнилие, тебе молимся и тебе просим, вонми похвальному пению сему, тебе от усердия нашего приносимому, не остави нас святыми твоими молитвами, не престани просити премногих грехов наших прощения, да в смертный час сподобимся прияти кончину жизни мирну и внити в Царствие Небесное, да и мы тамо с тобою прославим безмерное милосердие Божие, воспевающе Владыке живота: Аллилуиа.
[Се́й конда́к глаго́лется три́жды.]
Икос 1
Ангелов подражатель явился еси, преподобномучениче и богоносне отче наш Корнилие, ангельски поживый на земли и нам оставивый образ совершенства духовнаго. Сего ради прослави тя чудесы Христос Бог, Емуже предстоиши ныне во свете невечернем Царствия Небеснаго; от нас же, чтущих тя, слышиши пение таковое:
Радуйся, яко любве ради ко Господу всякое наслаждение земное оставил еси;
Радуйся, яко благая мира сего презрел еси.
Радуйся, яко богатство нетленное обрел еси;
Радуйся, яко иго Христово благое и удобоносимое возлюбил еси.
Радуйся, яко во плоти аки безплотен пожил еси;
Радуйся, яко боголюбезную чистоту непорочно сохранил еси.
Радуйся, яко узкими враты в Царствие Небесное вошел еси;
Радуйся, яко равноангельскую честь достойно приял еси.
Радуйся, яко венец неувядаемый от Господа приял еси;
Радуйся, яко на небеси и на земли прославлен еси.
Радуйся, Корнилие преподобномучениче, отче наш.
Кондак 1
Избранный чудотворче, преславный угодниче Христов, скорый помощниче и теплый молитвенниче о всех, с верою и любовию просящих твоего заступления, восхваляем тя любовию, Корнилие преподобномучениче, ты же яко имеяй дерзновение ко Господу, моли о спасении нас, поющих ти:
Радуйся, Корнилие преподобномучениче, отче наш.
Молитва преподобномученику Корнилию Псково-Печерскому
О святый преподобномучениче Корнилие! Смиренно припадаем к раце мощей твоих и умильно молим тя: милостиво призри на скорби наша душевныя и телесныя и избаву нам подаждь; помози нам, святче Божий, от навета злых человек, от нихже и сам ты невинно на земли пострадал еси. Защити нас от насилия диавола, страстно воюющаго в немощных удесех наших, умоли Господа Бога и Пречистую Его Матерь даровати нам тихое и безгрешное житие, взаимную братскую нелицемерную любовь и мирную христианскую кончину, да чистою совестию предстанем нелицемерному Страшному Судилищу Христову, и в Царствии Его прославим Животворящую Троицу, Отца и Сына и Святаго Духа, во веки веков. Аминь.
