Святитель Григо́рий Палама́, архиепископ Солунский (Фессалоникийский)

Святитель Григорий Палама, архиепископ Солунский, родился в 1296 году в Малой Азии. Во время турецкого нашествия семья бежала в Константинополь и нашла приют при дворе Андроника II Палеолога (1282–1328). Отец святого Григория^[1] стал крупным сановником при императоре, но вскоре умер, и сам Андроник принял участие в воспитании и образовании осиротевшего мальчика. Обладая прекрасными способностями и большим прилежанием, Григорий без труда освоил все предметы, составлявшие полный курс средневекового высшего образования. Император хотел, чтобы юноша посвятил себя государственной деятельности, но Григорий, едва достигнув 20 лет, удалился на Святую Гору Афон в 1316 году (по другим сведениям, в 1318) и поступил послушником в монастырь Ватопед, где под руководством старца, преподобного Никодима Ватопедского (память 11 июля), принял постриг и начал путь подвижничества. Через год ему явился в видении святой евангелист Иоанн Богослов и обещал свое духовное покровительство. Мать Григория вместе с его сестрами также приняла монашество.

После преставления старца Никодима инок Григорий проходил 8 лет свой молитвенный подвиг под руководством старца Никифора Исихаста, а после кончины последнего перешел в Лавру преподобного Афанасия. Здесь он прислуживал за трапезой, а затем стал церковным певцом. Но через три года (1321), стремясь к более высоким ступеням духовного совершенства, он поселился в небольшой отшельнической обители Глоссии. Настоятель этой обители стал учить юношу сосредоточенной духовной молитве – умному деланию, которое постепенно разрабатывалось и усваивалось монахами, начиная с великих пустынников IV века Евагрия Понтийского и преподобного Макария Египетского (память 19 января). После того, как в XI веке в трудах Симеона Нового Богослова (память 12 марта) подробное освещение получили внешние молитвенные приемы умного делания, оно было усвоено Афонскими подвижниками. Опытное применение умного делания, требующее уединения и безмолвия, получило название исихазма (от греч. покой, молчание), а сами практикующие его стали называться исихастами. За время пребывания в Глоссии будущий святитель полностью проникся духом исихазма и принял его для себя как основу жизни. В 1326 году из-за угрозы нападения турок вместе с братией он перебрался в Солунь (Фессалоники), где тогда же был рукоположен в сан священника.

Свои обязанности пресвитера святой Григорий сочетал с жизнью отшельника: пять дней недели проводил в безмолвии и молитве, и только в субботу и воскресенье пастырь выходил к народу – совершал богослужение и произносил проповеди. Его поучения часто вызывали у предстоящих в храме умиление и слезы. Однако полная отрешенность от общественной жизни святителю была несвойственна. Иногда он посещал богословские собрания городской образованной молодежи во главе с будущим патриархом Исидором. Возвращаясь как-то из Константинополя, он обнаружил близ Солуни местечко Верии, удобное для уединенной жизни. Вскоре он собрал здесь небольшую общину монахов-отшельников и руководил ею в течение 5 лет. В 1331 году святитель удалился на Афон и уединился в скиту святого Саввы, близ Лавры преподобного Афанасия. В 1333 году он был назначен игуменом Есфигменского монастыря в северной части Святой Горы. В 1336 году святитель вернулся в скит святого Саввы, где занялся богословскими трудами, которых не оставлял уже до конца жизни.

А между тем в 30-е годы XIV века в жизни Восточной Церкви назревали события, поставившие святителя Григория в ряд наиболее значительных вселенских апологетов православия и принесшие ему известность учителя исихазма.

Около 1330 года в Константинополь из Калабрии приехал ученый монах Варлаам. Автор трактатов по логике и астрономии, умелый и остроумный оратор, он получил кафедру в столичном университете и стал толковать сочинения Дионисия Ареопагита (память 3 октября), апофатическое богословие которого было признано в равной мере и Восточной и Западной Церквами. Вскоре Варлаам поехал на Афон, познакомился там с укладом духовной жизни исихастов и, на основании догмата о непостижимости существа Божия, объявил умное делание еретическим заблуждением. Путешествуя с Афона в Солунь, оттуда в Константинополь и затем снова в Солунь, Варлаам вступал в споры с монахами и пытался доказать тварность Фаворского света; при этом он не стеснялся поднимать на смех рассказы иноков о молитвенных приемах и о духовных озарениях.

Святитель Григорий по просьбе Афонских монахов обратился сначала с устными увещаниями. Но, видя безуспешность подобных попыток, он письменно изложил свои богословские доводы. Так появились "Триады в защиту святых исихастов" (1338). К 1340 году Афонские подвижники с участием святителя составили общий ответ на нападки Варлаама – так называемый "Святогорский томос". На Константинопольском Соборе 1341 года в храме Святой Софии произошел спор святителя Григория Паламы с Варлаамом, сосредоточившийся на природе Фаворского света. 27 мая 1341 года Собор принял положения святителя Григория Паламы о том, что Бог, недоступный в Своей Сущности, являет Себя в энергиях, которые обращены к миру и доступны восприятию, как Фаворский свет, но являются не чувственными и не сотворенными. Учение Варлаама было осуждено как ересь, а сам он, преданный анафеме, удалился в Калабрию.

Но споры между паламитами и варлаамитами были далеко не закончены. К числу вторых принадлежали ученик Варлаама, болгарский монах Акиндин и патриарх Иоанн XIV Калека (1341–1347); к ним склонялся и Андроник III Палеолог (1328–1341). Акиндин выступил с рядом трактатов, в которых объявлял святителя Григория и Афонских монахов виновниками церковных смут. Святитель написал подробное опровержение домыслов Акиндина. Тогда патриарх отлучил святителя от Церкви (1344) и подверг темничному заключению, которое продолжалось три года. В 1347 году, когда Иоанна XIV на патриаршем престоле сменил Исидор (1347–1349), святитель Григорий Палама был освобожден и возведен в сан архиепископа Солунского. В 1351 году Влахернский Собор торжественно засвидетельствовал православность его учения. Но солуняне приняли святителя Григория не сразу: он вынужден был жить в разных местах. В одну из его поездок в Константинополь византийская галера попала в руки турок. Святителя Григория в течение года продавали в различных городах как пленника, но и тогда он неутомимо продолжал проповедь христианской веры.

Лишь за три года до кончины вернулся он в Солунь. Накануне его преставления ему явился в видении святитель Иоанн Златоуст. Со словами "В горняя! В горняя!" святитель Григорий Палама мирно преставился к Богу 14 ноября 1357 года. В 1368 году он был канонизован на Константинопольском Соборе при патриархе Филофее (1354–1355, 1362–1376), который написал житие и службу святителю.

Примечание

^[1] 20 декабря 2009 г. в Верии (Элладская Православная Церковь) были причислены к лику святых все члены семьи св. Григория Паламы: родители – Констанция и Каллонис, две сестры – Епихарис и Феодота и двое братьев – Феодосий и Макарий. Память их совершается в первое воскресенье после 14/27 ноября – дня преставления святителя Григория.

Тропарь, глас 8

Правосла́вия свети́льниче,
Це́ркве утвержде́ние и учи́телю,
мона́хов добро́то, богосло́вов побо́рниче непребори́мый,
Григо́рие чудотво́рче, Фессалони́тская похвало́,
пропове́дниче благода́ти,

моли́ся вы́ну спасти́ся душа́м на́шим.

Тропарь, глас 8 Правосла́вию наста́вниче, святи́телем украше́ние,/ богосло́вцем побо́рниче непобеди́мый, Григо́рие чудотво́рче,/ Солу́ню вели́кая похвало́, пропове́дниче благода́ти,// моли́ Христа́ Бо́га спасти́ся душа́м на́шим.

Кондак, глас 8

Прему́дрости свяще́нный и Боже́ственный орга́н,
Богосло́вия све́тлую согла́сно трубу́,
воспева́ем тя Григо́рие Богоглаго́льниче:
но я́ко ум Уму́ Пе́рвому предстоя́й,
к Нему́ ум наш о́тче наста́ви, да зове́м:

ра́дуйся пропове́дниче благода́ти.

Молитва

О, треблаже́нная и честна́я вои́стину и превожделе́нная главо́, безмо́лвия держа́во, мона́шествующих сла́во, о́бщее богосло́вов и отце́в и учи́телей украше́ние, апо́столов сподви́жниче, испове́дников и му́чеников безкро́вный ревни́телю и венча́телю словесы́ и дея́ньми и благоче́стия побо́рниче и воево́до взбра́нный, боже́ственных догма́тов высо́кий изъясни́телю и учи́телю, пре́лести многоразли́чных ересе́й потреби́телю, всея́ Це́ркве Христо́вы предста́телю, и стра́же, и изба́вителю! Ты́ и преста́влься ко Христу́ назира́еши у́бо и ны́не ста́до твое́ и всю́ Це́рковь свы́ше, боле́зни разли́чныя исцеля́я и словесы́ твои́ми вся́ управля́я, и е́реси изгоня́я, и многообра́зных страсте́й избавля́я. Приими́ же и на́ше сие́ моле́ние и изба́ви на́с от страсте́й и искуше́ний, и треволне́ний, и бе́д, и осла́бу и ми́р и благоде́нствие на́м пода́ждь, о Христе́ Иису́се Го́споде на́шем, Ему́же сла́ва и держа́ва подоба́ет со безнача́льным Его́ Отце́м и Животворя́щим Ду́хом, ны́не и при́сно и во ве́ки веко́в. Ами́нь.

2-я Молитва

О, всехва́льный святи́телю Христо́в и чудотво́рче Григо́рие! Приими́ сие́ ма́лое моле́ние от на́с гре́шных к тебе́ прибега́ющих и те́плым твои́м предста́тельством умоли́ Го́спода Бо́га на́шего Иису́са Христа́, я́ко да, призре́в на ны́ ми́лостивно, да́рует на́м согреше́ний на́ших во́льных и нево́льных проще́ние, и по вели́цей Свое́й ми́лости изба́вит на́с от бе́д, печа́лей, ско́рби и боле́зней душе́вных и теле́сных, обдержа́щих на́с; да пода́ст земли́ плодоно́сие, и вся́, я́же на по́льзу настоя́щаго жития́ на́шего потре́бная; да да́рует на́м сконча́ти житие́ сие́ привре́менное в покая́нии, и да сподо́бит на́с гре́шных и недосто́йных Небе́снаго Ца́рствия Своего́, со все́ми святы́ми сла́вити Его́ безконе́чное милосе́рдие, со Безнача́льным Его́ Отце́м и Святы́м и Животворя́щим Его́ Ду́хом, во ве́ки веко́в. Ами́нь.

3-я Молитва

Все́х правосла́вных наста́вниче и Це́ркви сия́ние, о́тче Григо́рие, вся́каго обстоя́ния на́с изба́ви, боже́ственной ико́не твое́й припа́дающе ве́рою, свобожда́я от навожде́ния на на́с вра́жия, ты́ бо помо́щник на́ш явля́ешися и исполня́ешися и исполня́еши при́сно проше́ния све́тло ублажа́ющих тя́, на вся́ко вре́мя моля́ся Трисия́нной Тро́ице, Е́йже подоба́ет ве́лия сла́ва, че́сть и поклоне́ние Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Канон святителю Григорию Паламе, архиепископу Солунскому

Глас 1

Творе́ние Патриа́рха Филофе́я

Песнь 1

Ирмо́с: Твоя́ победи́тельная десни́ца
Боголе́пно в кре́пости просла́вися,
та бо, Безсме́ртне,
я́ко всемогу́щая, проти́вныя сотре́,
изра́ильтяном путь глубины́ новосоде́лавшая.

Припев: Святи́телю, о́тче Григо́рие, моли́ Бо́га о на́с.

Ты даро́ваний исто́чнику и прему́дрости духо́вней, пресла́вне,
уста́ и мысль приложи́в,
благода́ти яви́лся еси́ пучи́на,
от нея́ же ка́плю, о́тче, и мне пода́ждь, пою́щему тя.

Уста́в и пра́вило па́че естества́
и́ноческому жи́тельству ты был еси́,
уста́ Богосло́вец же, и святи́тель, и учи́тель Боже́ственная,
отню́дуже, соше́дшеся вку́пе, тебе́ пе́ние плету́т.

Ин яви́лся еси́ от чре́ва Иереми́я ве́дом,
Сотво́ршему весь возло́жен, освяще́н, Богоно́се, весь же,
отню́дуже твоя́ уста́ Бо́жия сло́ва восприя́ша.

Престо́лу предстоя́ Боже́ственному со А́нгелы, Богови́дче Григо́рие,
лучу́ восприе́мля ны́не явле́нне непристу́пную,
моли́ся тьмы грехо́вныя нам разреши́тися, мо́лимся.

Богоро́дичен: Свет, возсия́вый, Богороди́тельнице, от Твоея́ утро́бы, ви́дети жела́я, Григо́рий,
Тебе́, Моли́твеницу, и Соде́теля представля́ет
и жела́емыя от Тебе получи́ благода́ти.

Песнь 3

Ирмо́с: Еди́не, Ве́дый челове́ческаго существа́ не́мощь
и ми́лостивно в не вообра́жся,
препоя́ши мя с высоты́ си́лою,
е́же вопи́ти Тебе́, Святы́й,
одушевле́нный хра́ме неизрече́нныя сла́вы Твоея́, Челове́колюбче.

Юро́дство, прему́дре, мирску́ю му́дрость вмени́л еси́,
кре́стное юро́дство возлюби́л еси́ и сего́, на ра́мо прии́м,
показа́л еси́, я́коже Па́вел рече́,
е́же юро́дством мирски́я му́дрости превше́д.

Возлюби́л еси́, о́тче, от души́
нищету́, и смире́ние, и ху́дость, и нестяжа́тельство, челове́к бе́гая,
отню́дуже гони́м еси́ в пусты́ню,
всегда́, в воню́ мир твои́х, Христо́ви зовя́ше:
теку́ вслед Тебе́.

Умертви́л еси́, прему́дре, ве́тхаго тле́ющаго челове́ка
воздержа́нием вся́ким и пла́чем, исто́чники сле́зными дово́льне омыва́яся,
житие́м восприя́л еси́ дре́внюю свою́ добро́ту о Христе́ и в но́ваго оде́явся.

Восхва́лим, мно́жества и́нок с ме́стных же состоя́ния,
со свяще́нники все́ми и пита́тельницы, гла́сы кра́сными и словесы́ Боже́ственными днесь
о́бщаго учи́теля, и́же нас украси́вшаго де́лы же и словесы́, Григо́рия.

Богоро́дичен: Ви́дев, ю́же жела́ше, зарю́ духо́вную, Григо́рие, предста́тельством Богома́тере,
ясне́йши же ны́не Тою́ освеща́ем,
Тоя́ моли́ тьмы страсте́й нас премени́ти Све́том благода́тным.

Седа́лен, глас 8.

Подо́бен: Прему́дрости:

Воздержа́нием, и пла́чем, и моли́твою, и де́йством,
и нището́ю, и о́бщим умове́нием, Григо́рие, сле́зным очи́стил еси́ свое́ се́рдце,
весь восхище́н быв, и Христо́ви совокупи́ся ду́хом,
отню́дуже, я́ко Па́вел, неизрече́нных услы́шав и сосу́д быв избра́нен,
ты поне́сл еси́ Христо́во И́мя,
Несо́здано пропове́дал еси́ высо́це и Про́сто Еди́но Божество́,
е́же моля́ непреста́й спасти́ся ста́ду твоему́.

Сла́ва, и ны́не, Богоро́дичен:

И́же пре́жде от не су́щих приве́д су́щих естества́, Сло́ве Бо́жий,
поче́т о́бразом же и руко́ю челове́ка, истле́вша того́ пре́лестию змии́ною,
назда́в па́ки Кресто́м честны́м Ти,
вся́кое же естество́ освяти́л еси́, Ще́дре,
Святы́м Твои́м Ду́хом и теле́сным восприя́тием,
Ма́тере Твоея́ мольба́ми, Влады́ко Христе́ Бо́же,
согреше́нием оставле́ние да́руй покланя́ющимся ве́рою держа́ве твое́й.

Песнь 4

Ирмо́с: Го́ру Тя, благода́тию Бо́жиею приосене́нную
прозорли́выма Авваку́м усмотри́в очи́ма,
из Тебе́ изы́ти Изра́илеву
провозглаша́ше Свято́му
во спасе́ние на́ше и обновле́ние.

Нощь безлу́чную и тьму, Григо́рие, страсте́й моли́твенною па́лицею ра́нив,
я́коже Моисе́й Еги́пта, восте́кл еси́ па́че естества́ к виде́нию Боже́ственному
и законода́вец нам был еси́.

На высоту́ возше́д Боже́ственную, о́тче Григо́рие, доброде́телей,
я́коже на Фаво́ре Христо́вы дру́зи и ученицы́,
О́ного узре́л еси́, есте́ственную и Боже́ственную сла́ву явля́юща,
и, обожи́вся, друго́е показа́ся со́лнце.

Таи́нник Божества́, Богови́дче Григо́рие, и неизрече́нных прича́стник ты быв,
Богосло́вити Того́ та́йну,
Еди́но Тоя́ возвести́в и Несо́здано си́лою и Естество́м Треми́ Соста́вы.

Богоро́дичен: Сло́во Ро́ждшую, Бо́жие Неизрече́нное, словесы́ воспе́л еси́ свяще́нными
и та́йну све́тло Боже́ственнаго воплоще́ния возвести́л еси́,
Ю́же ны́не мо́ли Це́рковь соблюда́ти необурева́ему.

Песнь 5

Ирмо́с: Просвети́вый сия́нием
прише́ствия Твоего́, Христе́,
и освети́вый Кресто́м Твои́м ми́ра концы́,
сердца́ просвети́ Све́том Твоего́ Богоразу́мия
правосла́вно пою́щих Тя.

Ум Вели́кий, Прему́дрости глубина́ неизрече́нная,
обре́те твой, Богоно́се, ум вселе́ние, себе́ содруже́н,
Уму́ и Прему́дрости орга́н тя Це́ркви дарова́л есть.

Я́ко лучу́ све́тлую, пре́жде на Афо́не, Григо́рие, возсия́,
све́тлому тя гра́ду да́рует,
Све́том духо́вным Того́ Богодви́жим, освяща́я и оте́чески преднаставля́я.

Дар Боже́ственный от Бо́га тя и бога́тство неистощи́мое обре́т,
Фетта́льская держа́вная митропо́лия созыва́ет сосе́ды
к прича́стию твои́х слове́с и чуде́с, блаже́нне.

Жела́ющии по́двига и слове́с благода́тей Григо́риевых,
песнь тому́ ны́не принося́ще, того́ помо́лим
его́же моли́твами Зижди́теля и Влады́ку ми́лостива всем соде́лати.

Богоро́дичен: Просвети́вый земли́ широту́ со́лнца све́тлостию,
Свет су́щим яви́ся во тьме, Де́во, Невече́рний,
Его́же моли́ тьмы лю́тыя и грехо́вныя нас изба́вити, Влады́чице.

Песнь 6

Ирмо́с: Из утро́бы Ио́ну младе́нца изблева́ морски́й зверь,
якова́ прия́т,
в Де́ву же все́льшееся Сло́во
и плоть прие́мшее про́йде, сохра́ншее нетле́нну,
Его́же бо не пострада́ истле́ния,
Ро́ждшую сохрани́ неврежде́нну.

Пра́вило доброде́тели, обоже́ное житие́ твое́ ви́дено бысть ве́рными вои́стину, Григо́рие,
благоче́стия же прави́тель сло́во твое́, и веле́ние,
и́ми же свое́ ро́дное и пусторо́дное разсужда́ется,
Еди́наго Бо́га пропове́дающе всеси́льна, Еди́наго и Несо́здана.

Еди́но благоче́стно пропове́дав Божество́, вели́кий нам яви́ся, Григо́рие,
Соста́вми Треми́ Еди́но Естество́ и си́лу, вся́чески Ту́ю Про́сту и Несо́здану,
всех посрами́л еси́ держа́вне, буесло́вящих со́здано Божество́.

Безу́мнаго мудрова́ние облича́еши Акинди́на, я́ко и пре́жде Варлаа́ма го́рдаго,
е́ллинским бо приобщи́вшимся сла́вам,
сведо́ша Божество́ в тварь,
обесче́стивше, я́коже жи́дове пе́рвие, Сы́на Бо́жия досто́инство.

Уста́вы приводя́ веле́ний, Григо́рие, и словеса́ све́тла,
и́миже отве́рзл еси́ мысль честны́х Богосло́вец Ду́хом,
моли́твами ти неподви́жиму соблюди́ Христо́ву, избавля́ющи, Це́рковь от вся́кия е́реси.

Богоро́дичен: Престо́л Херуви́мских и всех Небе́сных Сил, Влады́чице,
и вся́каго вку́пе Го́рняго чи́на вы́шши Ты показа́ся,
я́ко престо́л неизрече́нен бы́вши Бо́жия Соста́ва,
Его́же, я́ко Сы́на Своего́, ми́лостива ми, ве́рно Тя пою́щу, соде́лай.

Конда́к, глас 8.

Подо́бен: Взбра́нной:

Прему́дрости свяще́нный и Боже́ственный орга́н,
Богосло́вия све́тлую согла́сно трубу́,
воспева́ем тя, Григо́рие Богоглаго́льниче,
но, я́ко ум, Уму́ Пе́рвому предстоя́й,
к Нему ум наш, о́тче, наста́ви, да зове́м:
ра́дуйся, пропове́дниче благода́ти.

И́кос:

А́нгел яви́лся еси́ на земли́, неизрече́нных Боже́ственная тле́нным возвеща́я,
и́бо Безпло́тных гласово́м, челове́ческим же умо́м и те́лом живы́й, удиви́л еси́
и сотвори́л еси́ зва́ти ти, Богоглаго́ливе, сия́:
ра́дуйся, его́же ра́ди Свет пропове́дася;
ра́дуйся, Его́же ра́ди тьма отгна́ся;
ра́дуйся, Несо́зданнаго Божества́ возвести́телю;
ра́дуйся, со́зданнаго естества́ и бу́яго вои́стину обличи́телю;
ра́дуйся, высото́ невосхо́дная, Бо́жие естество́ рек;
ра́дуйся, глубино́ неудо́бь зри́тельная, де́йство рек;
ра́дуйся, я́ко сла́ву Бо́жию до́бре рекл еси́;
ра́дуйся, я́ко мудрова́ния зло́бных отре́к;
ра́дуйся, свети́ло, показа́выи со́лнце; ра́дуйся, сосу́де, Боже́ственнаго пития́ прия́телище;
ра́дуйся, и́мже и́стина сия́ет:
ра́дуйся, и́мже помрачи́ся лжа;
ра́дуйся, пропове́дниче благода́ти.

Песнь 7

Ирмо́с: Тебе́, у́мную, Богоро́дице, пещь
разсмотря́ем, ве́рнии,
я́коже бо о́троки спасе́ три Превозноси́мый,
мир обнови́, во чре́ве Твое́м всеце́л,
хва́льный отце́в Бог и препросла́влен.

Я́коже гро́ма глас твои́х веле́ний и слове́с Боже́ственных мо́лние ужа́сных
зре́ти я́вствене, о́тче, не возмога́ют пре́лестию плене́ннии
и осяза́ют, я́коже пи́шет, я́ко слепы́й, ны́не сте́ны сме́шне безу́мнии.

Нощь не светла́ непокори́вым бысть,
и ны́не Свет Есте́ственный – Ца́рство Сла́вы Бо́жия,
и́же яви́ таи́нником Человеколю́бец на Фаво́рстей, Григо́рие,
е́юже, причасти́вся дово́льне, приобща́ешися угоди́вшим.

И́же нечести́ве в благода́ть, пресла́вне, поху́лившим Бо́жие безмо́лвие и моли́тву,
обоже́нию же неизрече́нному скве́рне насмея́вшихся,
тех посрами́в, отгна́л еси́ Боже́ственнаго двора́,
его́же соблюдае́ши всегда́ твои́ми мольба́ми.

Богоро́дичен: Прииди́ ны́не в на́шу по́мощь, спасе́ние о́бщее,
Григо́риевы моли́твы при́емлющи, Влады́чице,
стра́сти у́бо усыпа́ющи душе́вныя и теле́сныя
и о́бщий мяте́ж и тле́ние вско́ре разреша́ющи.

Песнь 8

Ирмо́с: В пещи́ о́троцы Изра́илевы,
я́коже в горни́ле,
добро́тою благоче́стия чисте́е зла́та блеща́хуся, глаго́люще:
благослови́те, вся дела́ Госпо́дня, Го́спода,
по́йте и превозноси́те во вся ве́ки.

Яви́лся еси́, о́тче, весь све́тел, сла́достен, прав, кро́ток,
ве́рою приходя́щим ти источа́я сла́дкое слове́с, Григо́рие, Боже́ственное пи́во,
всех веселя́ благочести́вых сердца́,
капля́ неду́гующих душе́вными чу́вствы.

Ум и язы́к, вои́стину благоро́ден,
наказа́ние же и словеса́ се́рдце очище́но обре́т,
Бо́жия в тя всели́ся Прему́дрость,
е́йже друг дру́гу сосвяза́вшися, о́тче,
чу́до всем стра́нно показа́ тя ми́рови.

В пещи́ де́ти неврежде́ны евре́йския показа́ держа́ва благоче́стия,
и́мже подо́бяся, прему́дре,
пла́мень удержа́л еси́ злоче́стия посреди́ пе́щи искуше́ний,
и до́блествене поя́ Влады́ку, и опаля́я гоня́щих.

У́мнаго погрузи́л еси́ фарао́на тече́ньми твои́х слез
и все еги́петское потопи́л еси́ во́инство,
возше́л еси́ на го́ру безстра́стия,
побива́я отту́ду Ду́ха си́лою полки́ бори́тель, я́коже Моисе́й вели́кий.

Богоро́дичен: Све́тлый благода́ти, Чи́стая, пропове́дник и Богосло́вец Ду́ха, Богоро́дице,
да́ннаго Тобо́ю ми́рови, ны́не словесы́ торжеству́я пе́ние,
пе́сни же и ли́ки вся Ти собира́ет,
я́ко ве́рный раб, па́мять Твою́ сла́вя.

Песнь 9

Ирмо́с: О́браз чи́стаго Рождества́ Твоего́
огнепали́мая купина́ показа́ неопа́льная,
и ны́не на нас напа́стей свирепе́ющую угаси́ти, мо́лимся, пещь,
да Тя, Богоро́дице,
непреста́нно велича́ем.

Престо́лу предстоя́, Григо́рие, Трисо́лнечнаго и Безнача́льнаго Божества́
и де́йством дово́льне насы́тився благода́тию, ю́же воспе́л еси́,
соде́йственик и друго́в, ны́не воспомяну́вших тя, помина́й.

Обре́л еси́ возда́ние боле́зней твои́х, Ца́рство, о́тче, Бо́жие Безнача́льное,
е́же благоче́стне на земли́ воспропове́дал еси́,
венцы́ триплете́ны восприя́л еси́ испове́дания Боже́ственнаго, свяще́нства же и безмо́лвия.

Яви́лся еси́ и́ночествующим похвала́, Богосло́вец Боже́ствен,
свяще́нства же пра́вило изве́стное,
сего́ ра́ди зде даст ти ся чудесе́м Боже́ственная благода́ть,
словеса́ твоя́ утвержда́я.

Зако́н похва́льных, пресла́вне, и слове́сных по́двиг вои́стину исше́д,
и на земли́ живы́й, и исше́д от те́ла,
но приими́ ма́лое пе́ние изря́днейши
и проше́ния подава́й тебе́ жела́ющих моли́твами свои́ми.

Богоро́дичен: Уста́ стра́шнаго Рождества́ Твоего́ и Богослове́сный язы́к, Влады́чице, бысть,
е́же па́че естества́ от Тебе́ я́вльшагося обоже́ния честны́й Твой раб Григо́рий,
его́ же ны́не мольбы́ прие́млющи, спаси́ всех.

Источник: Минея. Ноябрь. В 14-й день

Акафист святителю Григорию Паламе, архиепископу Солунскому

Творение Герасима монаха Микрагианнанита

Кондак 1, глас 8

Подобен: Взбранной Воеводе:

Фессалони́тскаго па́стыря всеизря́днаго и Це́ркве свети́ло многосве́тлое воспои́м в пе́снех боговеща́нных: Све́та бо незаходи́маго яви́ся селе́ние, и подае́т просвеще́ние и благода́ть незави́стную зову́щим:
Ра́дуйся, о́тче Григо́рие, благода́ти пропове́дниче.

Икос 1

Ангел в ми́ре, я́ко вы́шних зри́тель, показа́лся еси́, Григо́рие всеблаже́нне, и богови́дным твои́м житие́м а́нгельская дарова́ния улучи́л еси́. Те́мже, твое́й све́тлости дивя́щеся, о́тче, вопие́м:
Ра́дуйся, и́мже Свет боже́ственный сия́ет;
ра́дуйся, и́мже тьма отгна́ся.
Ра́дуйся, прему́дрости ве́рте благово́ннейший;
ра́дуйся, наказа́ния лу́чшаго прича́стниче.
Ра́дуйся, высото́ неудобозри́мая высо́ких виде́ний;
ра́дуйся, глубино́ непроходи́мая даро́в духо́вных.
Ра́дуйся, я́ко еси́ церко́вная све́тлость;
ра́дуйся, я́ко показа́лся еси́ правосла́вных кре́пость.
Ра́дуйся, свети́ло ве́ры всесве́тлое;
ра́дуйся, свети́льниче благода́ти незаходи́мый.
Ра́дуйся, его́же ра́ди буесло́вцы умолка́ют;
ра́дуйся, его́же ра́ди богосло́вцы взыгра́ют.
Ра́дуйся, о́тче Григо́рие, благода́ти пропове́дниче.

Кондак 2

Зре́ние души́ твоея́ от ю́ности, о́тче, ко Христу́ Царю́ простира́я, ца́рския презре́л еси́ дворы́ и земну́ю сла́ву оста́вил еси́, по́стническими же труды́ Го́сподеви после́дуя, воспева́л еси́: Аллилу́ия.

Икос 2

Ра́зуму вне́шнему всему́ обучи́лся еси́, всеблаже́нне, я́ко разу́мен и зело́ остроу́мен, отню́дуже Прему́дрости Бо́жия добро́ты рачи́тель яви́лся еси́, Григо́рие, умудря́я боже́ственными словесы́ твои́ми благогове́йне ти вопию́щия:
Ра́дуйся, нра́вов преподо́бных сосу́де;
ра́дуйся, Све́та невеще́ственнаго сокро́вище.
Ра́дуйся, ко́рене благоро́днаго дре́во всепло́дное;
ра́дуйся, благоче́стия кинна́моне благово́нный.
Ра́дуйся, цве́те неувяда́емый земледе́лания та́инственнаго;
ра́дуйся, фи́никс многопло́дный благопло́дия душе́внаго.
Ра́дуйся, я́ко презре́л еси́ лесть мирску́ю;
ра́дуйся, я́ко прия́л еси́ благода́ть богода́нную.
Ра́дуйся, Христо́в служи́телю тепле́йший;
ра́дуйся, тле́нных вся́ческих превы́шший.
Ра́дуйся, душе́вныя си́лы оживи́вый;
ра́дуйся, страсте́й стремле́ния умертви́вый.
Ра́дуйся, о́тче Григо́рие, благода́ти пропове́дниче.

Кондак 3

Си́лою на Афо́не обле́клся еси́ свято́ю, прие́м и́ноческий о́браз, и в не́мощи пло́ти к по́стническим угото́вался еси́ трудо́м, Григо́рие блаже́нне, Укрепля́ющему тя зовы́й: Аллилу́ия.

Икос 3

Просия́л еси́ безмо́лвием и усе́рдным по́двигом вся́ким де́ятельнаго жи́тельства и у́мною моли́твою Спа́су в та́инстве соедини́лся еси́, Све́та боже́ственнаго исполня́ем и просвеща́я тебе́ вопию́щия:
Ра́дуйся, свети́льниче безмо́лвия;
ра́дуйся, о́бразе воздержа́ния.
Ра́дуйся, у́мныя моли́твы де́лателище;
ра́дуйся, де́ятельнаго жи́тельства сокро́вище.
Ра́дуйся, сосу́де многоце́нный дохнове́ния Уте́шителева;
ра́дуйся, уста́ богоно́сная гла́са духо́внаго.
Ра́дуйся, я́ко превозше́л еси́ преде́лы тле́ния;
ра́дуйся, я́ко взира́еши на сла́ву Бо́жию.
Ра́дуйся, зря́й Све́т боже́ственный;
ра́дуйся, Бо́га ви́дяй и от Него ви́димый.
Ра́дуйся, бу́яя упраздня́яй мудрова́ния;
ра́дуйся, лю́тая отгоня́яй нападе́ния.
Ра́дуйся, о́тче Григо́рие, благода́ти пропове́дниче.

Кондак 4

Пожи́в в безмо́лвии, я́коже а́нгел, о́тче, го́рнее светозаре́ние прия́л еси́ и, испо́лнь вои́стину боже́ственнаго Све́та, отше́л еси́ от Афо́на я́коже со́лнце, Григо́рие богому́дре, воспламеня́я пою́щия: Аллилу́ия.

Икос 4

Обличи́л еси́ боже́ственным сло́вом и прему́дрости си́лою и догма́ты святы́ми, богому́дре, злосла́вие Варлаа́мово, удиви́в вся твое́ю благода́тию, учи́тель бо боже́ственный вопию́щим показа́лся еси́:
Ра́дуйся, цевни́це благоче́стия;
ра́дуйся, паде́ние злоче́стия.
Ра́дуйся, Це́ркве вели́кий учи́телю;
ра́дуйся, богоза́рности невеще́ственныя испо́лненный.
Ра́дуйся, вети́е многому́дрый догма́тов пра́вых;
ра́дуйся, мечу́ обоюдоо́стрый на вся вражду́ющия.
Ра́дуйся, у́мных плеве́л искорени́телю;
ра́дуйся, доброде́телей небе́сных насади́телю.
Ра́дуйся, мно́гий в сло́ве благода́ти;
ра́дуйся, кро́ткий во все́х и незло́бивый.
Ра́дуйся, ве́рных сердца́ утвержда́яй;
ра́дуйся, страсте́й вины́ попаля́яй.
Ра́дуйся, о́тче Григо́рие, благода́ти пропове́дниче.

Кондак 5

Богоглаго́ливым язы́ком на собо́ре боже́ственнем, я́ко испо́лнь небе́сныя прему́дрости, изложи́л еси́, о́тче, Правосла́вия вои́стину святы́я догма́ты, я́ко отце́м единоду́шный, Григо́рие, с ни́миже зове́ши: Аллилу́ия.

Икос 5

Святи́тель богому́дрый, я́ко доброде́телей сокро́вище и таи́нник восхожде́ний боже́ственных, и Фессалони́тский па́стырь богови́ден и прему́др был еси́ боже́ственным жре́бием, преподо́бне, слы́ша от нас сицева́я:
Ра́дуйся, уста́ богосло́вов;
ра́дуйся, держа́во правосла́вных.
Ра́дуйся, иере́ев пра́вило точне́йшее;
ра́дуйся, па́стырей о́бразе богонапечатле́нный.
Ра́дуйся, трубо́ боговеща́нная уче́ний свяще́нных;
ра́дуйся, исто́чниче богостру́йный, во́ду но́ву источа́яй.
Ра́дуйся, Солу́ню благосла́вный пастыренача́льниче;
ра́дуйся, Правосла́вия богоглаго́ливый предста́телю.
Ра́дуйся, Све́та боже́ственнаго служи́телю;
ра́дуйся, жи́зни непоро́чныя учи́телю.
Ра́дуйся, душе́вную скве́рну очища́яй;
ра́дуйся, ве́рных ре́вность возбужда́яй.
Ра́дуйся, о́тче Григо́рие, благода́ти пропове́дниче.

Кондак 6

Пропове́дник Све́та боже́ственнаго быв, богоглаго́ливе, я́ко того́ прича́стник в житии́, на той подъе́мшия гла́с слове́с све́тлостию затми́л еси́, и вся воздви́гл еси́, Григо́рие, Бо́гови зва́ти: Аллилу́ия.

Икос 6

Возсия́в на собо́ре, я́ко све́тлый богосло́в и уста́ неизглаго́ланныя Прему́дрости, неприча́ствуемо бы́ти Бо́жие существо́ боговеща́яй пропове́дал еси́, прича́ствуемо же де́йство, тебе́ вопию́щим, о́тче:
Ра́дуйся, ве́лий священнояви́телю;
ра́дуйся, боже́ственный богояви́телю.
Ра́дуйся, вы́шния све́тлости возвести́телю;
ра́дуйся, обоже́ния све́тлый тайнописа́телю.
Ра́дуйся, у́мнаго трезве́ния вождю́ богови́дный;
ра́дуйся, моли́твы вну́тренния наста́вниче непреле́стный.
Ра́дуйся, я́ко испо́лнился еси́ благода́тей небе́сных;
ра́дуйся, я́ко приобщи́лся еси́ осия́ний боже́ственных.
Ра́дуйся, Бо́жию ви́девый све́тлость;
ра́дуйся, страсте́й изгоня́яй те́мность.
Ра́дуйся, догма́тов правосла́вных основа́ние;
ра́дуйся, струй богото́чных исто́чниче.
Ра́дуйся, о́тче Григо́рие, благода́ти пропове́дниче.

Кондак 7

Ве́лий во святи́телех вои́стину показа́лся еси́, Григо́рие му́дре, богояви́телю, я́ко апо́стольским житие́м и ди́вными доброде́тельми украше́н, преподо́бне, и вся воздвиза́еши пе́ти: Аллилу́ия.

Икос 7

Не́ктар невеще́ственный боже́ственный и ма́нну душепита́тельную и мед и́же из ка́мене источа́ющся, я́ко рече́ свяще́нный Дави́д, твои́х слове́с завеща́ния подаю́т, Григо́рие всечу́дне, веселя́ще вопию́щия:
Ра́дуйся, язы́че сладча́йший;
ра́дуйся, зра́че боже́ственнейший.
Ра́дуйся, подо́бниче Спа́сов и подража́телю;
ра́дуйся, ревни́телю отце́м и сообита́телю.
Ра́дуйся, ве́яние небе́сное, ду́ши прохлажда́ющее;
ра́дуйся, росо́ духора́дованная, нас ороша́ющая.
Ра́дуйся, благово́ние свято́е чи́стаго жи́тельства;
ра́дуйся, пи́ще соверше́нная душе́внаго пи́ршества.
Ра́дуйся, ча́ше не́ктара безсме́ртнаго;
ра́дуйся, лю́тых мудрова́ний обличи́телю.
Ра́дуйся, богоно́сцев сия́ние му́дрых;
ра́дуйся, люде́й води́телю правосла́вных.
Ра́дуйся, о́тче Григо́рие, благода́ти пропове́дниче.

Кондак 8

Стра́нная даде́ся благода́ть во излия́нии бога́те устна́ма твои́ма, богояви́телю, отню́дуже, я́ко ве́лия река́, из Еде́ма происходя́щая, Григо́рие, Це́рковь всю напоя́еши, Го́сподеви вопию́щую: Аллилу́ия.

Икос 8

Гора́, о́тче, Афо́нская све́тлыя твоя́ по́двиги с Солу́нем пропове́дует, и вся Це́рковь ве́рных я́ко богоза́рнаго тя честву́ет изъяви́теля Све́та и́же па́че смы́сла, и́мже просвеща́еши вопию́щия:
Ра́дуйся, уста́ богоно́сная;
ра́дуйся, сосу́де мироно́сный.
Ра́дуйся, трисо́лнечнаго осия́ния орга́не;
ра́дуйся, безмо́лвия соверше́ннаго ни́во.
Ра́дуйся, до́ме богосве́тлый боже́ственнаго де́йства;
ра́дуйся, бога́тство некра́домое и́же в Ду́се живота́.
Ра́дуйся, я́ко прия́л еси́ боже́ственная дая́ния;
ра́дуйся, я́ко отврати́л еси́ Варлаа́мова пустосло́вия.
Ра́дуйся, и́мже Афо́н велича́ется;
ра́дуйся, и́мже пре́лесть отгоня́ется.
Ра́дуйся, све́тлая Солу́ню сла́во;
ра́дуйся, тве́рдая Правосла́вия держа́во.
Ра́дуйся, о́тче Григо́рие, благода́ти пропове́дниче.

Кондак 9

Ре́ки от чре́ва твоего́ та́инственным одожде́нием с небесе́, я́ко рече́ Спас, теку́т, о́тче прему́дре, и жа́ждущая сердца́ напоя́ют от живо́тныя струи́, Григо́рие, Бо́гови зва́ти: Аллилу́ия.

Икос 9

Легча́йше, о́тче, подъя́л еси́ искуше́ния разли́чная за до́брое испове́дание, и я́коже зла́то во огни́ искуше́н все́ми, превозсия́л еси́, возводя́ к лу́чшим благогове́йне ти вопию́щия:
Ра́дуйся, ка́меню благому́жества;
ра́дуйся, ка́меню терпе́ния.
Ра́дуйся, искуше́ний наше́ствия не убоя́выйся;
ра́дуйся, страсте́й пещь угаси́вый.
Ра́дуйся, стено́ неколеби́мая Це́ркве Христо́вы;
ра́дуйся, свети́льниче многосве́тлый люде́й богому́дрых.
Ра́дуйся, я́ко ско́рби в ра́дости поне́сл еси́;
ра́дуйся, я́ко Го́сподеви со сла́вою предста́л еси́.
Ра́дуйся, Бо́жия та́инства пропове́давый;
ра́дуйся, ве́рным спаси́тельная предложи́вый.
Ра́дуйся, душ домострои́телю боже́ственный;
ра́дуйся, Христо́в дру́же боже́ственнейший.
Ра́дуйся, о́тче Григо́рие, благода́ти пропове́дниче.

Кондак 10

Уст твои́х словесы́ правосла́вная ве́ра утверди́ся в Ду́се боже́ственнем: дре́вним бо боже́ственным отце́м единонра́вен и единоду́шен быв, гла́сы тех, преподо́бне, возгла́вил еси́, поя́: Аллилу́ия.

Икос 10

Све́та нетва́рнаго наслажда́яся луча́ми, возсия́вшаго на Фаво́ре, сего́ словопису́еши свяще́нне сла́ву, добро́ту, све́тлость и воздвиза́еши, свя́те, ко приобще́нию вопию́щия:
Ра́дуйся, све́та нетва́рнаго таи́нниче;
ра́дуйся, от страсте́й душетле́нных изба́вителю.
Ра́дуйся, бу́дущаго благосла́вия предначина́ние;
ра́дуйся, су́щих в ско́рби ду́ш утеше́ние.
Ра́дуйся, я́ко бу́ию показа́л еси́ му́дрость Варлаа́мову;
ра́дуйся, я́ко возвести́л еси́ Ду́ха благода́ть.
Ра́дуйся, архиере́ев боже́ственное удобре́ние;
ра́дуйся, светоно́сное сокро́вище богосло́вия.
Ра́дуйся, све́та невеще́ственнаго зерца́ло;
ра́дуйся, чужды́х догма́тов се́рпе.
Ра́дуйся, ра́досте правосла́вных и да́ре;
ра́дуйся, вра́жий ро́г низверга́яй.
Ра́дуйся, о́тче Григо́рие, благода́ти пропове́дниче.

Кондак 11

Высо́ким помышле́нием и прему́дростию боже́ственною пропове́дав Бо́жия вели́чия, Ду́ха боже́ственных плодо́в открыва́еши благода́ти, Григо́рие, чи́стым ду́хом, и́хже причаща́ются вопию́щии: Аллилу́ия.

Икос 11

Светоза́рно твое́ житие́ доброде́телей луча́ми, Григо́рие, яви́ся, боговеща́нне, испо́лнь же све́та вои́стину уче́ние твое́, блаже́нне: Бо́гови бо приво́диши вся́ческия уче́нии твои́ми, вопию́щия:
Ра́дуйся, исто́чниче уче́ния;
ра́дуйся, утвержде́ние Правосла́вия.
Ра́дуйся, жи́тельства свята́го о́бразе;
ра́дуйся, Це́ркве боже́ственныя ве́нче.
Ра́дуйся, жития́ чисте́йшаго возвести́телю чу́дный;
ра́дуйся, сло́ва благода́тнаго пропове́дниче свяще́нный.
Ра́дуйся, я́ко душ вся́ку скве́рну очища́еши;
ра́дуйся, я́ко на спасе́ния стезю́ наставля́еши.
Ра́дуйся, свети́льниче невеще́ственных осия́ний;
ра́дуйся, свети́ло вы́шних тайнонауче́ний.
Ра́дуйся, его́же ра́ди Це́рковь лику́ет;
ра́дуйся, его́же ра́ди всяк ве́рный боже́ственно ра́дуется.
Ра́дуйся, о́тче Григо́рие, благода́ти пропове́дниче.

Кондак 12

Ра́дость испроси́ боже́ственную и душ спасе́ние, Григо́рие, му́дрый святи́телю, приходя́щим к тебе́ благогове́йне и све́тлыя твоя́ по́двиги честву́ющим; све́та бо я́ко служи́тель, просвеща́еши вопию́щия: Аллилу́ия.

Икос 12

Пою́ще твоя́ труды́ и боже́ственныя по́двиги, я́же соверши́л еси́ Це́ркве ра́ди, благочести́вых ли́цы вы́ну пою́т тя, Григо́рие, и благода́рными усты́ вопию́т ти непреста́нно:
Ра́дуйся, держа́во Це́ркве;
ра́дуйся, вети́е благоче́стия.
Ра́дуйся, пустосло́ва Акинди́на постыди́вый;
ра́дуйся, си́лу богода́нную яви́вый.
Ра́дуйся, апо́столом купножи́телю, я́ко во всех подража́тель;
ра́дуйся, о́бщниче и прича́стниче зари́ богонача́льныя.
Ра́дуйся, Фессалони́тская све́тлая денни́це;
ра́дуйся, Правосла́вия подви́жниче богоглаго́ливый.
Ра́дуйся, душ на́ших наслажде́ние;
ра́дуйся, вся́каго правосла́внаго утвержде́ние.
Ра́дуйся, хра́ма честна́го твоего́ све́тлосте;
ра́дуйся, люде́й ве́рных твои́х весе́лие.
Ра́дуйся, о́тче Григо́рие, благода́ти пропове́дниче.

Кондак 13

О боже́ственный о́тче, таи́нниче неизглаго́ланных, Григо́рие, отце́в кра́ю, твои́х люде́й приими́ гла́сы и твое́ предста́тельство да́ждь всем: ве́рно бо к тебе́ притека́ем и Тро́ице вопие́м: Аллилу́ия.

Молитва святителю Григорию Паламе, архиепископу Солунскому

О треблаже́нная и честна́я вои́стину и превожделе́нная главо́, безмо́лвия держа́во, мона́шествующих сла́во, о́бщее богосло́вов и отце́в и учи́телей укра́шение, апо́столов сподви́жниче, испове́дников и му́чеников безкро́вный ревни́телю и венча́телю словесы́ и дея́ньми и благоче́стия побо́рниче и воево́до взбра́нный, боже́ственных догма́тов высо́кий изъясни́телю и учи́телю, пре́лести многоразли́чных ересе́й потреби́телю, всея́ Це́ркве Христо́вы предста́телю, и стра́же, и изба́вителю! Ты и преста́влься ко Христу́ назира́еши у́бо и ны́не ста́до твое́ и всю Це́рковь свы́ше, боле́зни разли́чныя исцеля́я и словесы́ твои́ми вся управля́я, и е́реси изгоня́я, и многообра́зных страсте́й избавля́я. Приими́ же и на́ше сие́ моле́ние и изба́ви нас от страсте́й и искуше́ний, и треволне́ний, и бед, и осла́бу и мир и благоде́нствие нам пода́ждь, о Христе́ Иису́се Го́споде на́шем, Ему́же сла́ва и держа́ва подоба́ет со безнача́льным Его́ Отце́м и Животворя́щим Ду́хом, ны́не и при́сно и во ве́ки веко́в. Ами́нь.