Православный Мир
Житие
Преподобноисповедник Прокопий родился в стране Декаполитской (т. е. Десятиградии), на восток от Галилейского озера. Оставив суетный мир, Прокопий принял в одной обители иноческий чин и проводил все время в молитве и посте. Опытный в монашеских подвигах, украшенный чистотою душевною, он был славен и знаменит среди подвижников. Между тем около этого времени появилась иконоборческая ересь. Возбудил ее нечестивый император Лев Исаврянин, который считал иконы идолами, а поклоняющихся им – идолопоклонниками.
Св. Прокопий вместе с другими ревнителями православия восстал против нечестивой ереси иконоборцев; он обличил безумное мудрование еретиков и победил их непобедимыми божественными словесами. Это и навлекло на него гнев и немилость императора. По его повелению, св. Прокопия схватили и подвергли жестоким мучениям: его бесчеловечно били, строгали тело его железными орудиями и затем бросили в смрадную темницу. В этой мрачной темнице преп. Прокопий вместе с святым Василием, его сподвижником по иноческой жизни, мучился до самой смерти императора Льва Исаврянина. Когда же Лев умер, то Прокопий вместе с Василием и другими святыми мучениками, был выпущен из темницы. Конец своей жизни преподобный Прокопий Декаполит провел мирно в иноческих подвигах.
В глубокой старости отошел он в иную жизнь, чтобы видеть Христа уже не на иконах, которые он защищал всю жизнь, а лицом к лицу, и чтобы получить от Него за свои труды и страдания великую награду на небесах.
Песнопения
Тропарь, глас 8
Слез твои́х тече́ньми пусты́ни безпло́дное возде́лал еси́,
и и́же из глубины́ воздыха́ньми во сто трудо́в уплодоноси́л еси́,
и был еси́ свети́льник вселе́нней,
сия́я чудесы́, Проко́пие о́тче наш.
Моли́ Христа́ Бо́га спасти́ся душа́м на́шим.
Кондак, глас 4
Денни́цу днесь Це́рковь иму́щи,
вся́кую злосла́вия мглу разгоня́ет,
почита́ющи тя небеснотаи́нниче, Проко́пие пресла́вне.
Канон
Канон святому преподобному Прокопию Декаполиту
Минея, 27 Февраля.
Глас 6
Песнь 1
Ирмос: Я́ко по су́ху, пешеше́ствовав Изра́иль
по бе́здне стопа́ми,
гони́теля фарао́на
ви́дя потопля́ема,
Бо́гу, побе́дную песнь пои́м, вопия́ше.
Припев: Преподо́бне о́тче Проко́пие, моли́ Бо́га о на́с.
Благоче́стия любо́вию объя́т быв
и Боже́ственным раче́нием треволне́ния мирска́я оттря́сл еси́, преподо́бне,
Бо́гу побе́дную песнь взыва́я,
я́ко просла́вися.
Припев: Преподо́бне о́тче Проко́пие, моли́ Бо́га о на́с.
Светоно́сное твое́ житие́, и све́тлое души́, и спротяже́нное,
благоче́стию срастворе́нно доброде́тели воображе́ние,
в тебе́, преподо́бне, я́ве соде́лаша.
Сла́ва Отцу́ и Сы́ну и Свято́му Ду́ху.
Преесте́ственным уче́нием и светоза́рным Христо́вым освеща́емь,
страстны́я прило́ги воздержа́нием увяди́л еси́,
вопия́ побе́дную песнь Вседержи́телю.
И ны́не и при́сно и во ве́ки веко́в. Ами́нь.
Богородичен: Воплоще́нное Сло́во Боголе́пно заче́нши, Пречи́стая, е́же пре́жде безпло́тное,
нам па́че естества́ родила́ еси́, Чи́стая,
по Рождестве́ Де́ва пребы́вши.
Песнь 3
Ирмос: Несть свят,
я́коже Ты, Го́споди Бо́же мой,
вознесы́й рог ве́рных Твои́х, Бла́же,
и утверди́вый нас на ка́мени
испове́дания Твоего́.
Припев: Преподо́бне о́тче Проко́пие, моли́ Бо́га о на́с.
Твоя́ Богоприя́тная душа́, ве́ры ра́ди ре́вностию распаля́ема, блаже́нне,
беззако́нных го́рькое неи́стовство и я́рость,
Богоно́се, держа́вно разори́ла есть.
Припев: Преподо́бне о́тче Проко́пие, моли́ Бо́га о на́с.
Твои́ми кровьми́ обагри́вся,
му́ченическим страда́нием уподо́бился еси́, треблаже́нне,
ра́ны нечести́вых му́жественною душе́ю претерпе́л еси́ терпели́вно, Проко́пие.
Сла́ва Отцу́ и Сы́ну и Свято́му Ду́ху.
Подъя́л еси́, преподо́бне, сугу́бы по́двиги, му́дре,
е́реси облича́я и львов стремле́ния му́жески претерпе́в Богому́дренно,
прему́дре Проко́пие.
И ны́не и при́сно и во ве́ки веко́в. Ами́нь.
Богородичен: Му́дрость и Сло́во О́тчее,
е́же пре́жде всех век напосле́док време́н неизрече́нно вопло́щься от Неискусому́жныя Ма́тере,
Богоро́дицу Сию́ соде́ла.
Седален, глас 4
Воздержа́ния добро́тами укра́шен,
муче́ния кровьми́ уясни́л еси́ ду́шу
и па́че со́лнца просия́л еси́, чудоно́сне Проко́пие преподо́бне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Те́плое заступле́ние су́щим в беда́х,
и помо́щницу на́шу,
и к Бо́гу премене́ние,
Е́юже тли изба́вихомся,
Богоро́дицу, ве́рнии, ублажа́ем.
Песнь 4
Ирмос: Христо́с моя́ си́ла,
Бог и Госпо́дь,
честна́я Це́рковь
Боголе́пно пое́т, взыва́ющи,
от смы́сла чи́ста о Го́споде пра́зднующи.
Припев: Преподо́бне о́тче Проко́пие, моли́ Бо́га о на́с.
Напая́я, преподо́бне, сле́зными тече́ньми се́рдце твое́, блаже́нне,
доброде́телей се́мя возде́лал еси́ по́мыслом чи́стым, преподо́бне Проко́пие.
Припев: Преподо́бне о́тче Проко́пие, моли́ Бо́га о на́с.
Земно́е мудрова́ние Боже́ственному Ду́ху повину́л еси́, о́тче,
по́стническое житие́ прие́м и сочета́емь лико́м му́ченическим, всеблаже́нне.
Сла́ва Отцу́ и Сы́ну и Свято́му Ду́ху.
Я́ко му́ченик Боже́ствен и и́стиннейш по благоче́стии, ерети́ческое обличи́л еси́ безу́мие,
неи́стовство бо му́жески безбо́жных пренебре́гл еси́.
И ны́не и при́сно и во ве́ки веко́в. Ами́нь.
Богородичен: Зако́нных кроме́ уста́вов, Всенепоро́чная, заче́нши Зижди́теля,
и без тли Сего́ породила́ еси́,
и Богоро́дица и́стинная и госпо́дьственно была́ еси́.
Песнь 5
Ирмос: Бо́жиим све́том Твои́м, Бла́же,
у́тренюющих Ти ду́ши любо́вию озари́, молю́ся,
Тя ве́дети, Сло́ве Бо́жий,
и́стиннаго Бо́га,
от мра́ка грехо́внаго взыва́юща.
Припев: Преподо́бне о́тче Проко́пие, моли́ Бо́га о на́с.
Освяще́нна по́стнически и сконча́вшася кро́вию, о́тче, досто́йно почита́ем:
па́мять бо пра́ведных с похвала́ми при́сно
ве́рно соверша́ется и помина́ется.
Припев: Преподо́бне о́тче Проко́пие, моли́ Бо́га о на́с.
Му́дре все претворя́я и устроя́я к лу́чшему, я́коже хо́щет Госпо́дь,
злоче́ствующих скверноуби́йство твои́м воздержа́нием
и муче́ния сла́вою преложи́.
Сла́ва Отцу́ и Сы́ну и Свято́му Ду́ху.
На ра́мо взем Кре́стное всеору́жие, о́тче, Христу́ после́довал еси́,
вся за́дняя забве́нию творя́, к пре́дним тече́нием простира́яся.
И ны́не и при́сно и во ве́ки веко́в. Ами́нь.
Богородичен: Пое́м, Пречи́стая, из Тебе́ в плоть стра́стну же и ме́ртвенну оде́явшагося Го́спода
и обоже́ну соде́лавшаго
соедине́нием неслия́нным по Ипоста́си.
Песнь 6
Ирмос: Жите́йское мо́ре,
воздвиза́емое зря
напа́стей бу́рею,
к ти́хому приста́нищу Твоему́ прите́к, вопию́ Ти:
возведи́ от тли живо́т мой,
Многоми́лостиве.
Припев: Преподо́бне о́тче Проко́пие, моли́ Бо́га о на́с.
Преходя́, приснопа́мятне, от сла́вы вои́стинну по́стническия,
восте́кл еси́ к му́чеников сла́ве и че́сти,
твое́ю кро́вию в багряни́цу очервле́ну оде́ян.
Припев: Преподо́бне о́тче Проко́пие, моли́ Бо́га о на́с.
Теку́щих непостоя́нное преоби́дев,
душе́ю и по́мыслом Богому́дренным, приснопребыва́ющим, благи́м и конца́ не иму́щим
благоче́стно впери́лся еси́, всеблаже́нне.
Сла́ва Отцу́ и Сы́ну и Свято́му Ду́ху.
Воздержа́нием благомо́щным и кро́тостию Христо́с зря тя обогати́вшася,
человеколю́бне призре́ на тя и сла́вы показа́ прича́стника,
страстоте́рпче пресла́вне.
И ны́не и при́сно и во ве́ки веко́в. Ами́нь.
Богородичен: Всенепоро́чная Влады́чице,
души́ моея́ тя́жкая и лю́тая сокруше́ния рукодея́ньми исцели́ та́йными,
действи́тельныя лечбы́ Сы́на Твоего́ полага́ющи стра́сти.
Кондак, глас 4
Денни́цу днесь Це́рковь иму́щи,
вся́кую злосла́вия мглу разгоня́ет,
почита́ющи Тя, Небеснотаи́нниче, Проко́пие пресла́вне.
Песнь 7
Ирмос: Росода́тельну у́бо пещь
соде́ла А́нгел
преподо́бным отроко́м,
халде́и же опаля́ющее
веле́ние Бо́жие мучи́теля увеща́ вопи́ти:
благослове́н еси́, Бо́же оте́ц на́ших.
Припев: Преподо́бне о́тче Проко́пие, моли́ Бо́га о на́с.
Я́ко пресве́тло житие́ твое́, Богому́дре, бысть по́стничеством,
та́ко яви́ся твое́ я́ве страда́ние тве́рдо,
Христа́ бо просла́вил еси́, вопия́:
благослове́н еси́, Бо́же оте́ц на́ших.
Припев: Преподо́бне о́тче Проко́пие, моли́ Бо́га о на́с.
Целому́дрия чистото́ю, чу́дный о́тче, препоя́сався,
му́жеством же муче́ния вене́ц све́тел прия́л еси́ благода́тию, зовы́й:
благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Не покланя́ющиися о́бразу Твоему́ Пречи́стому, Спа́се, нечести́вии
раба́ Твоего́ я́звят, стру́жуще лю́те, пою́ща и глаго́люща к Тебе́:
благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Веселя́щеся Рождество́м Твои́м, Всенепоро́чная, вси́ Тя ублажа́ем.
Того́ бо ра́ди ны́не плотска́го мы изба́вльшеся тле́ния, вопие́м Ему́:
благослове́н еси́, Бо́же оте́ц на́ших.
Песнь 8
Ирмос: Из пла́мене преподо́бным ро́су источи́л еси́
и пра́веднаго же́ртву водо́ю попали́л еси́,
вся бо твори́ши, Христе́, то́кмо е́же хоте́ти.
Тя превозно́сим во вся ве́ки.
Припев: Преподо́бне о́тче Проко́пие, моли́ Бо́га о на́с.
Разреше́н от тли и пре́жде сме́рти я́влься,
преста́вился еси́ отсю́ду к нетле́нней, преподо́бне, жи́зни,
смерть прие́м ле́ствицею све́тло, Проко́пие, Богому́дре.
Припев: Преподо́бне о́тче Проко́пие, моли́ Бо́га о на́с.
Испо́лнен яви́лся еси́ зари́ благода́тныя
и к незаходи́мому све́ту, о́тче, отше́л еси́,
вся́ко ве́щное отложи́в жела́ние.
Те́мже тя почита́ем, Проко́пие Богому́дре.
Сла́ва Отцу́ и Сы́ну и Свято́му Ду́ху.
Вооруже́н си́лою Боже́ственнаго Ду́ха, лука́вствия ду́хов победи́л еси́ полки́.
Темже Небе́сныя две́ри тебе́ отверзо́шася, блаже́нне,
воспева́ющу Христа́ во ве́ки вся.
И ны́не и при́сно и во ве́ки веко́в. Ами́нь.
Богородичен: Блажа́т вси ро́ди, Влады́чице,
я́коже прорекла́ еси́, Еди́на Богоблаже́нная,
Тя, и́стинную Богоро́дицу Пречи́стую,
Ю́же превозно́сим во вся ве́ки.
Песнь 9
Ирмос: Бо́га
челове́ком невозмо́жно ви́дети,
на Него́же не сме́ют чи́ни А́нгельстии взира́ти.
Тобо́ю же, Всечи́стая, яви́ся челове́ком
Сло́во воплоще́нно,
Его́же велича́юще
с Небе́сными во́и, Тя ублажа́ем.
Припев: Преподо́бне о́тче Проко́пие, моли́ Бо́га о на́с.
Пострада́ти зако́нно, му́чениче, изво́лив,
страсте́й стремле́ния воздержа́нием умертви́л еси́
и плотска́я взыгра́ния, уго́дниче Христо́в:
те́мже безстра́стия ны́не безсме́ртное с безпло́тными во́инствы обре́л еси́ наслажде́ние.
Припев: Преподо́бне о́тче Проко́пие, моли́ Бо́га о на́с.
Судии́ пра́ведному све́тло предстои́ши,
я́ко победи́тель, венцы́ неувяда́емыя прие́м,
приле́жно, Проко́пие, моля́ся о соверша́ющих твою́ свяще́нную па́мять
и Боже́ственный пра́здник преставле́ния твоего́.
Сла́ва Отцу́ и Сы́ну и Свято́му Ду́ху.
Заря́ми тре́ми ны́не озаря́ем,
от еди́наго несказа́нно происходя́щими Божества́,
пребога́тнаго насле́дия сподо́бился еси́ и кра́снаго весе́лия,
ра́дуяся с преми́рными во́инствы, о́тче Проко́пие.
И ны́не и при́сно и во ве́ки веко́в. Ами́нь.
Богородичен: Тле́нен Сло́во Бо́жие нетле́нное зрак прие́м,
челове́ки в нетле́ние облече́,
благоволе́нием О́тчим всели́вся в Тя, Обра́дованную.
Те́мже, Пречи́стая, с Небе́сными во́инствы Тя велича́ем.
