Благоверный князь Дании́л Московский

Св. блгв. кн. Даниил Московский (1261–1303) ‒ младший сын св. Александра Невского, основатель Московского княжества. Прославился благочестием, миротворчеством и мудрым правлением. При нём Москва стала духовным и политическим центром Руси. Основал Данилов монастырь, где принял монашеский постриг перед смертью. Скончался в 1303 году. Мощи обретены нетленными в 1652 году.

Краткое житие благоверного князя Даниила Московского

Родился в 1261 году и был четвертым сыном святого великого князя Александра Невского. В жизни св. благоверный князь Даниил отличался благочестием, кротостью и миролюбием.

Во все дни его жизни никто не нанес ущерба державе его, и сам он не покушался насилием приобретать чужие области, благодаря Бога за данное ему в жребий благословенное наследие – державу преславного града Москвы. Со времен блаженного князя Даниила честь и слава первокняжения и первосвятительства начали приближаться к боголюбивому граду Москве. В 1302 г. Московское княжество увеличилось за счет мирного присоединения Переяславского княжества. Однако св. князь не услаждался властолюбием, но, ограждаясь страхом Божиим, преуспевал в братолюбии.

Богоугодно господствуя в Московских пределах, св. князь Даниил построил за Москвой-рекой монастырь, который стал называться по его имени Даниловский. В этом монастыре сам князь принял иноческое пострижение. Приняв схиму, св. благоверный князь на 42 году жизни мирно отошел ко Господу 4 марта 1303 года. 30 августа 1652 года мощи его были обретены нетленными.

Полное житие благоверного князя Даниила Московского

Святой благоверный князь Даниил Московский родился во Владимире в 1261 году. Он был четвертым сыном святого Александра Ярославича Невского (память 30 августа и 23 ноября) и праведной Вассы. Двух лет от роду он лишился отца. Время преставления его матери в летописях не указано, известно только, что погребена она в церкви в честь Рождества Христова во Владимирском Успенском монастыре (Княгинин монастырь) и у окрестных жителей почиталась праведной.

В 1272 году благоверный князь Даниил получил доставшийся ему по разделу город Москву с прилегающими землями. Благоверный князь построил на берегу Москвы-реки храм (и при нем монастырь) в честь своего тезоименитого покровителя, преподобного Даниила Столпника (память 11 декабря). Московское княжество было в те времена маленьким и незавидным. Возмужавший благоверный князь Даниил укрепил и увеличил его, но не путем неправды и насилия, а милосердием и миролюбием. Неспокойно было на Руси. Междоусобицы между удельными князьями были постоянными. И часто, благодаря благоверному князю Даниилу, его неустанному стремлению к единению и миру на Русской земле, удавалось предотвратить кровопролитие. Когда в 1293 году его брат, великий князь Андрей Александрович, вместе с призванными из Орды татарами во главе с Дюденем («Дюденева рать») опустошил русские города: Муром, Суздаль, Коломну, Дмитров, Можайск, Тверь, благоверный князь решился впустить их в Москву, чтобы спасти народ от гибели. Сил для отпора не было. Вместе со своим народом князь переживал тяготы разорения и разбоя. Отстаивая свои права, святой Даниил был вынужден в 1295 году выступить против своего брата близ места, называемого Юрьево Толчище, но и здесь стремление к миру победило в нем, и кровопролития удалось избежать.

В 1300 году, когда Рязанский князь Константин Романович, призвав на помощь татар, занимался тайными приготовлениями к внезапному нападению на земли Московского княжества, преподобный Даниил пошел с войском к Рязани, разбил неприятеля, взял в плен Константина и истребил множество татар. Это была первая победа над татарами, победа негромкая, но замечательная – как первый порыв к свободе. Разбив Рязанского князя и рассеяв его союзников – татар, благоверный князь Даниил не воспользовался победою, чтобы отобрать чужие земли или взять богатую добычу, как это было принято в те времена, а показал пример истинного нестяжания, любви и братолюбия. Никогда не брался святой князь за оружие, чтобы захватить чужие земли, никогда не отнимал собственности у других князей ни насилием, ни коварством. За это Господь расширил границы его владений. Иоанн Димитриевич, князь Переяславля-Залесского, племянник Даниила, кроткий, благочестивый и благотворитель нищих, уважал и любил своего дядю. В 1302 году, умирая бездетным, он передал свое княжество святому Даниилу. Переяславская земля вместе с Дмитровым была после Ростова первой как по числу жителей, так и по крепости главного города. Переяславль-Залесский был хорошо защищен со всех сторон. Святой князь остался верен Москве и не стал переносить столицу княжества в более сильный и значительный по тому времени Переяславль. Это присоединение выдвинуло Московское княжество в число наиболее значительных. Здесь было положено начало объединению Русской земли в единую мощную державу.

Как дивно на протяжении веков ясно проявлялся Промысл Божий о нашей Русской Земле, о ее судьбе!

С благодарением помня о неотступном Благом Путеводителе как в своей личной жизни, так и в жизни Русского государства, отец святого Даниила – святой благоверный князь Александр Невский выразил то в словах – "Бог не в силе, а в правде".

В 1303 году святой Даниил тяжело заболел. Он принял великую схиму и заповедал похоронить себя в Даниловом монастыре. По глубокому смирению он хотел быть погребенным не в церкви, а на общем монастырском кладбище. Скончался благоверный князь 4 марта.

Не прошло и 30 лет со времени преставления благоверного князя Даниила, как основанная им Даниловская обитель была в 1330 году переведена в Кремль, церковь превращена в приходскую, а кладбище стало мирским. Во времена великого князя Иоанна III (1462–1505) преподобный Даниил напомнил о себе забывчивым потомкам. Юноше из окружения великого князя явился некто неизвестный и сказал: «Не бойся меня – я христианин и господин сего места, имя мое Даниил, князь Московский, по воле Божией я положен здесь. Скажи от меня великому князю Иоанну: сам ты утешаешь себя, а меня забыл, но не забыл меня Бог». С того времени великий князь установил петь соборные панихиды по родственникам – князьям. Во времена царя Иоанна Грозного при гробе преподобного Даниила исцелился умирающий сын коломенского купца. Царь, пораженный чудом, возобновил древний Данилов монастырь и установил ежегодно совершать митрополиту со священным собором крестный ход к месту погребения благоверного князя и служить там панихиды.

В 1652 году благоверный князь Даниил был прославлен обретением святых нетленных мощей, которые 30 августа были перенесены в церковь в честь Святых Отец Седми Вселенских Соборов.

Святые мощи были положены в раке «на прославление Святыя Троицы и на исцеление немощствующих». Митрополит Московский Платон († 1812) в составленном им Житии святого князя пишет: «Сей-то первоначальный основатель положил начало нынешнему величию Москвы, проложив для этого тихими стопами только малую стезю. Ибо как и всякое здание, сооружаемое не с чрезвычайной поспешностью, а только с большим искусством и старанием, получает особую твердость и нерушимо пребывает долгое время; и как дерево, много веков растущее, начав прежде с малого прутика, понемногу утолщается, и ветви его распространяются далеко окрест, так и граду этому надлежало возрасти от малых, но твердых начал, чтобы первый его блеск не омрачил очи завиствующих и чтобы в первое время не потрястись и не пасть ему скорее, чем оно возросло в свою высоту. Так предуготовил сей великий град основатель, дав ему, хотя малое, но не прерывающееся никаким дуновением ветра сияние, и предоставил большую славу его возвышения своему сыну великому князю Иоанну Даниловичу, прозванному Калитой».

Тропарь, глас 4

Княже́ния твоего́ сла́ву отложи́в,
озаря́емый Боже́ственною благода́тию,
Богому́дре кня́же Дании́ле, весь ра́зум в се́рдце от су́етнаго ми́ра сего́
к Зижди́телю неукло́нно возложи́л еси́
и, я́ко звезда́ на восто́це Росси́йскаго госуда́рства просия́л еси́,
целому́дрием же и равноа́нгельным твои́м житие́м
тече́ние до́брое соверша́я,
ве́ру соблю́л еси́ непоро́чну,
тем и по сме́рти просла́ви тя Бог в чудесе́х,
я́ко источа́еши исцеле́ния ве́рно притека́ющим к честне́й ра́це твое́й;
сего́ ра́ди днесь пра́зднуем успе́ние твое́, лю́дие твои́.
Ты же, я́ко и́маши дерзнове́ние ко Христу́,
моли́ спасти́ оте́чество твое́

и ми́рней бы́ти держа́ве на́шей.

Тропарь, глас 4 Яви́ся, я́ко звезда́ пресве́тлая,/ благове́рный и преподо́бный кня́же Дании́ле,/ в богопоруче́ннем твое́м гра́де Москве́ в жи́зни вре́менней/ и просвети́ся воздержа́нием, и всено́щным стоя́нием, и посто́м,/ и моли́твою, и слеза́ми ко Всеми́лостивому Спа́су/ за град свой Москву́ и за вся стра́ны Росси́йския земли́./ И по преставле́нии твое́м честны́я твоя́ мо́щи/ источа́ют исцеле́ния неоску́дно приходя́щим с ве́рою,/ те́мже вопие́м ти:/ моли́ Христа́ Бо́га// спасти́ся душа́м на́шим. Ин тропарь, глас 5 Благодатноро́дный сын Твой,/ Всетвори́телю Го́споди Бо́же наш,/ щедрототво́рством христоподража́тельный оте́ц Дании́л/ в ева́нгельском запове́дании и благоразу́мном свое́м житии́/ чудесодарова́ние и Небе́сная со святы́ми пребыва́ния восприя́т/ от Тебе́, Спаси́теля на́шего Христа́ Иису́са./ Возыме́в бо Твое́ Боже́ственное посо́бие,/ суетномирски́я и плотоо́гненныя стра́сти упраздни́/ и враги́ де́моны, неви́димыя и ви́димыя злотво́рцы/ и разори́тели своего́ великокня́жескаго насле́дия, победи́./ Того́ моли́твами спаси́ вся,// зову́щия Тебе́: Аллилу́ия. Ин тропарь, глас 5 Благосла́вная похвало́ и благосве́тлый ве́нче/ ца́рствующаго гра́да Москвы́,/ всеблаже́нне Дании́ле, о́тче наш./ По́двигом бо до́брым подвиза́вся,/ благоуго́дное тече́ние соверши́л еси́,/ всера́достныя неконча́емыя жи́зни сподо́блься,/ зри́ши Го́спода Бо́га,/ Ему́же моли́ся,/ благочеству́ющим тя и лобыза́ющим богохрани́мыя твоя́ и чудесото́чныя мо́щи// спасе́ние и насле́дие Ца́рства Небе́снаго дарова́ти. Ин тропарь, глас 3 Яви́лся еси́ в стране́ на́шей,/ я́ко звезда́ пресве́тлая,/ благове́рный кня́же Дании́ле,/ луча́ми све́та твоего́ озаря́я град твой и оби́тель твою́,/ лю́дем правосла́вным побо́рник еси́,/ пле́нным свободи́тель и ни́щим защи́титель./ Моли́ Христа́ Бо́га/ держа́ве Роси́йстей дарова́ти мир// и спасти́ ду́ши на́ша.

Кондак, глас 4

Избра́нный Бо́гом от чресл роди́тельских
и воспита́нный от младе́нчества в зако́не Госпо́дни в му́жа соверше́нна
и Про́мыслом Вы́шняго, имени́таго гра́да Москвы́ насле́дие кня́жества прие́м,
ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,
и́хже о́бразом свои́м наставля́я
и поуча́я за́поведем Госпо́дним вы́ну,
путе́м, веду́щим в живо́т ве́чный, при́сно ше́ствуя,
Небе́снаго Ца́рства дости́гл еси́,

иде́же со а́нгельскими водворя́яся ли́ки, пое́ши Бо́гу: Аллилу́ия.

Кондак, глас 8 Красоту́ ми́ра сего́, княже́ние и сла́ву я́ко вре́менная помышля́я,/ и сего́ ра́ди благоче́стно в ми́ре пожи́л еси́, блаже́нне кня́же Дании́ле,/ ми́лостию, и моли́твами, и и́ночеством Бо́гу угоди́в,/ и по преставле́нии свое́м чуде́с дар прии́м от Христа́ Бо́га,/ и свети́льник яви́ся пресве́тлый, просвеща́я свои́ми чудесы́,/ приходя́щим с ве́рою подае́ши ско́рое здра́вие и от бед избавля́еши./ Те́мже Христо́ва Це́рковь пе́сньми сла́вит тя, благочести́вый кня́же Дании́ле,// ца́рствующему твоему́ гра́ду Москве́ вели́кое утвержде́ние. Ин кондак, глас 8 Я́ко Богонасажде́нное и Богоразу́мное дре́во в Росси́и возра́сл еси́/ и многопло́дием Богоподо́бных доброде́телей твои́х утучня́еши сердца́ благочести́вых./ Те́мже в кре́пости по́мощи твоея́, преблаже́нне Дании́ле,/ от вся́ких нас бед свободи́,// да пое́м при́сно: Аллилу́ия. Ин кондак, глас 6 Е́же по о́бразу соблю́д непрело́жно,/ и я́же в ми́ре тле́нная оста́вив,/ со а́нгельскими ли́ки предстои́ши Христу́,/ преподо́бне кня́же Дании́ле,/ ника́коже забыва́я чад твои́х,/ но ми́лостивно посеща́я и глаго́ля им:// аз е́смь с ва́ми и никто́же на вы.

Величание

Ублажа́ем тя,
благове́рный кня́же Дании́ле,
и чтим святу́ю па́мять твою́,
ты бо мо́лиши о нас

Христа́ Бо́га на́шего.

Молитва

Це́ркве Христо́вы похвало́ высо́кая, гра́да Москвы́ стено́ необори́мая, держа́вы Росси́йския Боже́ственное утвержде́ние, преподо́бне кня́же Дании́ле! К ра́це моще́й твои́х притека́юще, усе́рдно мо́лим тя: при́зри на нас, па́мять твою́ воспева́ющих и с ве́рою под кров моли́тв твои́х прибега́ющих. Проле́й те́плое твое́ хода́тайство ко Спа́су всех, я́ко да утверди́т ми́ром страну́ на́шу, гра́ды и ве́си ея́ и оби́тель сию́ до́бре да сохрани́т, благоче́стие и любо́вь в лю́дех твои́х насажда́я, зло́бу же, междоусо́бие и нра́вов развраще́ние искореня́я. Всем же нам вся блага́я ко вре́менному животу́ и ве́чному спасе́нию да́руй моли́твами твои́ми, я́ко да прославля́ем ди́внаго во святы́х Свои́х Христа́, Бо́га на́шего, во ве́ки веко́в. Ами́нь.

2-я Молитва

О, уго́дниче Бо́жий, святы́й благове́рный кня́же Дании́ле, са́да Христо́ва благово́нный цве́те, не́ба церко́внаго кро́ткая звездо́, земли́ на́шея небе́сный у́ме, гра́да Москвы́ и держа́вы на́шея му́дрый зда́телю. Те́плый к Бо́гу моли́твенниче, ско́рый в по́мощи, ми́лостивый в ну́ждах, к тебе́ припа́даем и тебе́ мо́лимся: бу́ди предста́тель наш пред Престо́лом Бо́жия сла́вы неусы́пный. Собери́ нас друг ко дру́гу, да печа́ли бли́жняго своего́ ки́йждо любо́вию нелицеме́рною приобща́ется. Онебеси́ ум наш, да, и́го тя́жкое земны́х попече́ний отве́ргше, бре́мя ле́гкое Христо́ва Ева́нгелия возлю́бим. Откры́й о́чи на́ши, да у́зрим нетле́нную красоту́ Госпо́дню и да не отчужде́ни бу́дем жи́зни Бо́жия. Ти́хость Ду́ха Бо́жия да соблюде́т се́рдце на́ше. Весна́ покая́ния да укра́сит дела́ на́ша. Кня́же ми́лостивый и ще́дрый, сохрани́ страну́ на́шу, град твой и зде моля́щихся тебе́ от вся́кия напа́сти, от враг ви́димых и неви́димых, от губи́тельства и гла́да, от междоусо́бныя ра́спри и внеза́пныя сме́рти. Отве́рзи нам две́ри милосе́рдия Бо́жия и изба́ви нас от вся́каго зла. Под кре́пкий покро́в благосты́ни твоея́ прибега́юще, мо́лим: бу́ди нам ти́хое приста́нище в ско́рбех. Осени́ нас моли́твами твои́ми. Соблюди́ нас от паде́ний грехо́вных и заблужде́ний, да се́рдцем сокруше́нным, ду́хом смире́нным в печа́ли и ра́дости при́сно зове́м: Го́споди, предста́тельством преподо́бнаго Твоего́ поми́луй нас. Ами́нь.

3-я Молитва

О, преподо́бне кня́же Дании́ле, к ико́не твое́й притека́юще, усе́рдно мо́лим тя: при́зри на нас (имена), с ве́рою под кров моли́тв твои́х прибега́ющих. Проле́й те́плое твое хода́тайство ко Спа́су всех, я́ко да утверди́т ми́ром прихо́д сей и храм сей до́бре да сохрани́т, благоче́стие и любо́вь в лю́дех правосла́вных насажда́я, зло́бу же, междоусо́бие и нра́вов развраще́ние искореня́я; всем же нам вся блага́я ко вре́менному животу́ и ве́чному спасе́нию да́руй моли́твами твои́ми, я́ко да прославля́ем ди́внаго во святы́х свои́х Христа́ Бо́га на́шего вку́пе со Отце́м и Святы́м Ду́хом во ве́ки веко́в. Ами́нь.

Канон преподобному благоверному великому князю Даниилу Московскому

Минея, 4 Марта.

Глас 4

Песнь 1

Ирмос: Мо́ря чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма
Амали́кову си́лу в пусты́ни победи́л е́сть.

Припев: Святы́й благове́рный кня́же Дании́ле, моли́ Бо́га о на́с.

Просвети́ ми ум и озари́ моя́ чу́вства,
согреше́ний мрак души́ моея́ отгна́в, Христе́ Бо́же,
да чи́стою со́вестию возмогу́ песнь соста́вити и возвели́чити Твоего́ уго́дника,
блаже́ннаго кня́зя Дании́ла.

Припев: Святы́й благове́рный кня́же Дании́ле, моли́ Бо́га о на́с.

Светолу́чными блиста́нии Ду́ха Свята́го осиява́емый,
яви́лся еси́ пресве́тлый свети́льник Росси́йския земли́, Богому́дре Дании́ле,
тем ны́не светоза́рному Тро́ическому Све́ту предстоя́,
моли́ о насле́дии земли́ твоея́.

Сла́ва Отцу́ и Сы́ну и Свято́му Ду́ху.

Измла́да себе́ сама́го Бо́гу освяти́л еси́
и чрез всю жизнь твою́ был еси́ и́стинный Христо́ва Ева́нгелия подража́тель,
тем и насле́дник Боже́ственнаго Ца́рствия позна́лся еси́, приснопа́мятне кня́же Дании́ле.

И ны́не и при́сно и во ве́ки веко́в. Ами́нь.

Богородичен: Седя́щаго на Херуви́мех Творца́ Ты Еди́на, Богоневе́сто, на объя́тиих носи́ти сподо́билася еси́
и яви́лася еси́ от всех родо́в Бо́га Сло́ва Прия́телище досто́йное.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи:
Ты моя́ кре́пость, Го́споди,
и прибе́жище, и утвержде́ние.

Припев: Святы́й благове́рный кня́же Дании́ле, моли́ Бо́га о на́с.

Зако́ну Спа́сову покаря́яся, всесла́вне Дании́ле,
сладостра́стие плотско́е отри́нул еси́,
доброде́тельною же душе́ю све́тло просвещаяся,
Небе́снаго Ца́рствия дости́гл еси́.

Припев: Святы́й благове́рный кня́же Дании́ле, моли́ Бо́га о на́с.

Вели́кое Це́ркви был еси́ украше́ние,
в не́йже Христу́, Царю́ сла́вы, насле́дник Небе́снаго хра́ма показа́лся еси́, блаже́нне,
иде́же со А́нгелы уже́ пе́ти Творцу́ удосто́ился еси́.

Сла́ва Отцу́ и Сы́ну и Свято́му Ду́ху.

Терпя́, потерпе́л еси́ Го́спода, и услы́ша тя,
и внят гла́су непреста́ннаго моле́ния твоего́,
и воззва́ тя к ве́чному весе́лию, ра́йскаго сотвори́в насле́дника.

И ны́не и при́сно и во ве́ки веко́в. Ами́нь.

Богородичен: Влады́чице Блага́я,
всех Творца́ во утро́бе Твое́й заче́ншая и ро́ждшая ми́ру Спа́са и Го́спода,
Его́же моли́, да изба́вит нас от вся́ких искуше́ний
и в чи́стом житии́ соблюде́т нас.

Седален, глас 4

От ко́рене блага́го прекра́сная ве́твь изра́сл еси́
и, а́ки благоуха́нный крин, доброде́тельми укра́шен был еси́,
призира́я ми́лостию на ни́ща и убо́га
и на вся подвла́стныя тебе́ лю́ди, блаже́нне и приснопа́мятне кня́же Дании́ле,
злове́рныя же и вражде́бныя в любо́вь и смире́ние преклони́в,
в бде́ниих и труде́х богоуго́дно пожи́л еси́
и досто́йную мзду от Го́спода твоего́ прия́л еси́.
Того́ у́бо моли́ дарова́ти душа́м на́шим мир и ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Боже́ственная ски́ния была́ еси́, Еди́на Пречи́стая Де́во Ма́ти,
чистото́ю А́нгелы превозше́дшая и заче́ншая во утро́бе Свое́й Пребезнача́льнаго Сло́ва, Собезнача́льна же Отцу́,
и Сего́ всему́ ми́ру Изба́вителя ро́ждшая,
мене́, па́че всех оскверне́нна плотски́ми прегреше́ньми, очи́сти моли́тв Твои́х Боже́ственными вода́ми,
подаю́щи души́ мое́й мир и ве́лию ми́лость.

Песнь 4

Ирмос: Вознесе́на Тя ви́девши Це́рковь на Кресте́,
Со́лнце Пра́ведное,
ста в чи́не свое́м,
досто́йно взыва́ющи:
сла́ва си́ле Твое́й, Го́споди.

Припев: Святы́й благове́рный кня́же Дании́ле, моли́ Бо́га о на́с.

Я́ко же зла́то огне́м, свяще́ннейше,
воздержа́нием честно́е те́ло твое́ очи́стив, кра́сно показа́л еси́ Творцу́,
сего́ ра́ди тебе́ порфи́ру нетле́нну ве́чнаго блаже́нства дарова́.

Припев: Святы́й благове́рный кня́же Дании́ле, моли́ Бо́га о на́с.

Род, и бога́тство, и держа́ву Христа́ ра́ди оста́вив
и взем крест свой, подвиза́лся еси́ боголе́пно,
тем ны́не с преподо́бных ли́ки ра́дуешися.

Сла́ва Отцу́ и Сы́ну и Свято́му Ду́ху.

Ревнова́в в доброде́телех Богому́дрым отце́м,
Ева́нгельское се́мя Бо́жия словесе́ в се́рдце твое́м насади́л еси́, и плод прине́сл еси́ Влады́це,
тем и мзду от Него́ прия́л еси́ досто́йную.

И ны́не и при́сно и во ве́ки веко́в. Ами́нь.

Богородичен: Родила́ еси́ в ле́то Безле́тнаго, Пречи́стая, бы́вша Богочелове́ка,
Того́ у́бо приле́жно моли́, да свободи́т ве́чнаго муче́ния
и спасе́т по о́бразу Своему́ созда́ннаго челове́ка.

Песнь 5

Ирмос: Ты, Го́споди, мой Свет,
в мир прише́л еси́,
Свет святы́й, обраща́яй из мра́чна неве́дения
ве́рою воспева́ющия Тя.

Припев: Святы́й благове́рный кня́же Дании́ле, моли́ Бо́га о на́с.

Огне́м любве́ Бо́жия непреста́нно распаля́яся,
оста́вив мир, во оби́тели мона́шествовати изво́лил еси́, всече́стне,
тем дарова́ньми Ду́ха Свята́го обогаще́н,
чудоде́йством лю́ди спаса́еши.

Припев: Святы́й благове́рный кня́же Дании́ле, моли́ Бо́га о на́с.

Се храм твой чудесы́ всеблаголе́пно, я́ко звезда́ми све́тлыми, украша́ется,
и, веселя́ся, всегда́ блажи́тся и всечестну́ю твою́ па́мять пра́зднует благоче́стно,
вели́кий чудотво́рче Дании́ле.

Сла́ва Отцу́ и Сы́ну и Свято́му Ду́ху.

Разли́чных напа́стей и бед нахожде́ние твои́ми моли́твами отрази́, Богоблаже́нне кня́же Дании́ле,
и всем, усе́рдно соверша́ющим всепра́зднственную па́мять твою́, грехо́в оставле́ние испроси́.

И ны́не и при́сно и во ве́ки веко́в. Ами́нь.

Богородичен: Тебе́ Еди́ну по Бо́зе и́мамы Предста́тельницу ро́да на́шего,
Тебе́ у́бо про́сим, я́ко и́маши дерзнове́ние к Сы́ну Твоему́ и Бо́гу на́шему,
помоли́ся к Нему́, во е́же спасти́ся нам.

Песнь 6

Ирмос: Пожру́ Ти со гла́сом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ребр Твои́х
исте́кшею Кро́вию.

Припев: Святы́й благове́рный кня́же Дании́ле, моли́ Бо́га о на́с.

Предстоя́ при́сно Престо́лу Тро́ичныя благода́ти,
со все́ми ра́дуяся А́нгелы и ми́ру исцеле́ний бога́тство подава́я,
спаси́ всех нас моли́твами твои́ми.

Припев: Святы́й благове́рный кня́же Дании́ле, моли́ Бо́га о на́с.

Отверзо́шася тебе́ две́ри Еде́мския,
и жи́тели Небе́сныя с вели́ким весе́лием и ра́достию тя прия́ша,
иде́же с ни́ми ра́дуяся, вы́ну всех ми́лостивно посеща́й
и ве́рно чту́щих тя помина́й.

Сла́ва Отцу́ и Сы́ну и Свято́му Ду́ху.

Яви́лся еси́ лю́дем твои́м предста́тель те́плый,
вдов и сиро́т засту́пник,
ни́щих пита́тель, скорбя́щих утеше́ние,
гра́ду и оби́тели твое́й утвержде́ние.

И ны́не и при́сно и во ве́ки веко́в. Ами́нь.

Богородичен: Яви́лася еси́ Изба́вительница ро́да челове́ческаго, Ма́ти Бо́га на́шего,
тем Ти ве́рно припа́даем:
Сы́на Твоего́, я́ко Бла́га, моли́, Всенепоро́чная,
от вся́ких бед и искуше́ний изба́вити ны.

Кондак, глас 4

Избра́нный Бо́гом от чресл роди́тельских
и воспи́танный от младе́нчества в зако́не Госпо́дни в му́жа соверше́нна
и Про́мыслом Вы́шняго, имени́таго гра́да Москвы́ насле́дие кня́жества прие́м,
ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,
и́хже о́бразом свои́м наставля́я
и поуча́я за́поведей Госпо́дним вы́ну,
путе́м, веду́щим в живо́т ве́чный, при́сно ше́ствуя,
Небе́снаго Ца́рства дости́гл еси́,
иде́же со а́нгельскими водворя́яся ли́ки, пое́ши Бо́гу: Аллилу́ия.

Икос

А́нгел во пло́ти на земли́ показа́лся еси́, Богому́дре кня́же Дании́ле,
сла́вя непреста́нно Творца́ не́бу и земли́,
вся́ким бо о́бразом во́лю Его́ чрез всю твою́ жизнь испо́лнити потща́лся еси́,
всем благотворя́, прия́л еси́ от Христа́ дар чудотворе́ния,
те́мже зове́м ти:
ра́дуйся, я́ко от младе́нчества Бо́гом избра́нный;
ра́дуйся, я́ко Те́мже в гражда́нство Небе́сное зва́нный.
Ра́дуйся, я́ко держа́ву вла́сти твоея́ благоче́стием и пра́вдою украси́л еси́;
ра́дуйся, я́ко на враги́ злове́рцы и враждотво́рцы от Бо́га получи́вый побе́ды.
Ра́дуйся, я́ко, оста́вив мир преле́стный, к ти́хому приста́нищу равноа́нгельскаго жития́ прите́кл еси́,
в не́мже показа́л еси́ всем о́браз воздержа́ния;
ра́дуйся, я́ко за толи́кии по́двиги твоя́ сподо́бивыйся от Христа́ благода́ти и чуде́с дарова́ния.
Ра́дуйся, я́ко в Не́бе со все́ми святы́ми Живонача́льную Тро́ицу зри́ши
и Той вы́ну пое́ши: Аллилу́ия.

Песнь 7

Ирмос: В пещи́ авраа́мстии о́троцы перси́дстей,
любо́вию благоче́стия па́че,
не́жели пла́менем, опаля́еми, взыва́ху:
благослове́н еси́ в хра́ме сла́вы Твоея́, Го́споди.

Припев: Святы́й благове́рный кня́же Дании́ле, моли́ Бо́га о на́с.

У́треневав к Бо́гу от младе́нчества, всебога́те,
тьмы́ избе́гл еси́ теле́сных страсте́й,
воздержа́нием и да́ром чуде́с обогати́лся еси́, преподо́бне,
и ны́не с Го́рними водворя́яся ли́ки, пое́ши Творцу́:
благослове́н еси́ в хра́ме сла́вы Твоея́, Го́споди.

Припев: Святы́й благове́рный кня́же Дании́ле, моли́ Бо́га о на́с.

Во всю Росси́ю про́йде сла́ва чуде́с Твои́х, блаже́нне,
и́миже просвети́л еси́ лю́ди твоя́,
и́же, твои́м чудоде́йством от вся́ких бед и напа́стей избавля́еми, пою́т Творцу́:
благослове́н еси́ в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху.

Пе́сньми и пе́ньми духо́вными хва́лим тя, блаже́нне,
и честну́ю твою́ и многоцеле́бную обстоя́ще ра́ку, си́це вопие́м просла́вльшему тя Творцу́:
благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: Де́ва пребыла́ еси́ по рождестве́,
я́коже была́ еси́ пре́жде рождества́,
Бо́га бо Сло́ва родила́ еси́, избавля́ющаго ны хода́тайством Твои́м,
Ему́же, ве́рнии, непреста́нно пое́м:
благослове́н еси́ в хра́ме сла́вы Твоея́, Го́споди.

Песнь 8

Ирмос: Ру́це распросте́р, Дании́л
льво́в зия́ния в ро́ве затче́;
о́гненную же си́лу угаси́ша,
доброде́телию препоя́савшеся,
благоче́стия рачи́тели, о́троцы, взыва́юще:
благослови́те, вся дела́ Госпо́дня, Го́спода.

Припев: Святы́й благове́рный кня́же Дании́ле, моли́ Бо́га о на́с.

Досто́йно дне́сь в преставле́нии твое́м торжеству́ет держа́вный град Москва́,
досто́йно и оби́тель твоя́ честна́я, ю́же созда́л еси́,
в ней же святы́я твоя́ почива́ют мо́щи, ублажа́я тя, Творцу́ взыва́ет:
благослови́те, вся дела́ Госпо́дня, Го́спода.

Припев: Святы́й благове́рный кня́же Дании́ле, моли́ Бо́га о на́с.

Ми́лостивными твои́ми щедро́тами ни́щих и убо́гих напита́л еси́
и сам от Христа́ ве́чную получи́л еси́ ми́лость,
Ему́же вы́ну предстоя́, со А́нгелы пое́ши:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Вели́кое твое́ заступле́ние и предста́тельство воспомина́ем, Богоблаже́нне кня́же Дании́ле,
и сего́ ра́ди собра́вшеся в день па́мяти твоея́,
я́ко о́бщему всех нас засту́пнику, хвалу́ воздае́м ти, воспева́юще:
благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Вседержи́тельною си́лою нося́й вся́ческая
в челове́ческую пло́ть из Тебе́ оде́яся, Де́во Всенепоро́чная, на благодея́ние пою́щим:
благослови́те, вся дела́ Госпо́дня, Го́спода.

Песнь 9

Ирмос: Ка́мень нерукосе́чный
от несеко́мыя горы́, Тебе́, Де́во,
краеуго́льный отсече́ся,
Христо́с, совокупи́вый разстоя́щаяся естества́.
Тем, веселя́щеся, Тя, Богоро́дице, велича́ем.

Припев: Святы́й благове́рный кня́же Дании́ле, моли́ Бо́га о на́с.

Дне́сь сте́кшеся во оби́тель твою́ и в храм Бо́га на́шего, благове́рный кня́же Дании́ле, приле́жно мо́лимтися:
пода́ждь лю́дем ми́рное здра́вие и в ско́рбех ра́достное утеше́ние,
да тя, ско́раго защи́тника на́шего, ве́рою ублажа́ем.

Припев: Святы́й благове́рный кня́же Дании́ле, моли́ Бо́га о на́с.

Основа́теля и первонача́льника, кня́зя гра́да Москвы́, Богоблаже́нне кня́же Дании́ле, показа́ тя Госпо́дь,
к Нему́же непреста́нно моля́ся, град и оби́тель твою́ от вся́ких бед спаса́й и ми́лостивно посеща́й.

Сла́ва Отцу́ и Сы́ну и Свято́му Ду́ху.

Па́мять пра́здника твоего́ хва́ляще,
вси лю́дие твои́ со мно́жеством и́ночествующих по́стник покланя́ются тебе́
и, ви́дяще от Бо́га да́нная ти пресла́вная чудеса́, про́сят от Тебе́ ми́лости,
и́хже моле́ния не пре́зри.

И ны́не и при́сно и во ве́ки веко́в. Ами́нь.

Богородичен: Свет ро́ждшая – Иису́са Го́спода,
просвеща́яй вся́каго челове́ка, Де́во Богома́ти,
тем Тя мо́лим:
от вся́ких бед и напа́стей лю́ди Твоя́ изба́ви,
да Тя, Засту́пницу ро́да на́шего, при́сно велича́ем.

Светилен

Богонача́льныя и Всебоже́ственныя Тро́ицы Све́том озари́вся,
свет, добросия́ющий благода́тию Иису́с Христо́вою,
всей Росси́и яви́лся еси́, благоро́дный кня́же Дании́ле,
озари́тися у́бо и нам Пребоже́ственным све́том Живонача́льную Тро́ицу моли́,
да, с тобо́ю ве́чныя ра́дости наслажда́ющеся, воспое́м Бо́га, просла́вльшаго тя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Всю наде́жду спасе́ния на́шего на Тя возлага́ем, Богома́ти Неискусобра́чная,
и на по́мощь при́сно Тя призыва́ем:
от напа́сти врага́ и печа́ли спаси́ нас,
грехо́вныя плени́цы зол на́ших разреша́я, ве́чнаго огня́ исхити́,
да Тя, Предста́тельницу ро́да на́шего, при́сно велича́ем.

Акафист преподобному благоверному великому князю Даниилу Московскому

Аудио:

42:19

Кондак 1

Избранный чудотворче и предивный угодниче Христов, града Москвы и державы Российския крепкое ограждение, раздоров и нестроений искоренителю, благоверный княже Данииле, похвальная восписуем ти, к раце мощей твоих притекающе. Ты же, яко имеяй дерзновение ко Господу, от всяких нас бед свободи, зовущих:

Радуйся, преподобне княже Данииле, Московский чудотворче.

Икос 1

Ангелов Творец и Господь во дни великих бед и напастей, обышедших страну нашу от нечестиваго царства агарянскаго, восхотев людем страждущим утешение даровати, яви тя, княже Данииле, яко плод красен от чресл великаго князя Александра; людие же, о рождении твоем радости исполнившеся, взываху ти сицевая:

Радуйся, корене благочестиваго прозябение; радуйся, добродетелей отца твоего и матере наследниче.

Радуйся, рождением твоим люди града Владимира возвеселивый; радуйся, грядущую славу Москвы предвозвестивый.

Радуйся, избранниче Божий; радуйся, правило веры благочестивыя.

Радуйся, образе кротости духовныя; радуйся, Бога, яко истиннаго Отца нашего, издетска познавый.

Радуйся, яко Иосиф, от братии твоея досаждения сладце претерпевый; радуйся, последи и братию свою в любовь себе призвавый.

Радуйся, преподобне княже Данииле, Московский чудотворче.

Кондак 2

Видяще ближнии твои, блаженне, день от дне во благочестии тя возрастающа, и не точию млеком матерним, но паче благодатию Божиею питаема, радовахуся и, Господа о сем хваляще, взываху: Аллилуиа.

Икос 2

Разум богопросвещен имея, уразумел еси, всехвальне, по словеси апостольскому, яко нужнейши всего есть благочестие, имже и потщался еси обогатити душу твою, в молитвах и научении словеси Божию всеусердно пребывая. Того ради людие ублажаху тя сице:

Радуйся, молитвенниче теплейший; радуйся, послушниче Евангелия усерднейший.

Радуйся, добродетели высокия в сердце твоем вкоренивый; радуйся, в заповедех Господних вся дни живота твоего ходивый.

Радуйся, образом жития твоего мир посреде братии водворивый; радуйся, Господа твоего паче всех возлюбивый.

Радуйся, положити душу свою за други своя непрестанное желание имевый; радуйся, благодать Господню в сердце свое заключивый.

Радуйся, и тело свое тою просветивый; радуйся, оное и по смерти нетленно сохранивый.

Радуйся, преподобне княже Данииле, Московский чудотворче.

Кондак 3

Сила Вышняго укрепляше тя, блаженне, егда в кротости и в смирении души твоея возрастая, уготовлял еси себе на служение княжеское и о помощи небесней молился еси, взывая Богу: Аллилуиа.

Икос 3

Имея присно в души твоей глагол Господень, пророку реченный: «На кого воззрю, токмо на кроткаго и смиреннаго, и трепещущаго словес Моих», потщался еси, святе, оными добродетельми себя украсити. Того ради ублажаем тя сице:

Радуйся, подвижниче доблий, на высоту добродетелей возшедый; радуйся, нищетою духовною Царствие Небесное стяжавый.

Радуйся, кротости ради землю обетования наследивый; радуйся, правды и истины паче всего искавый.

Радуйся, чистотою сердца твоего Господа созерцавый; радуйся, миротворец нарочит в житии своем явивыйся.

Радуйся, изгнания правды ради смиренно претерпевый; радуйся, мзду вечную добродетельми стяжавый.

Радуйся, чистоты душевныя и телесныя сокровище; радуйся, любве и кротости Христовы вместилище.

Радуйся, преподобне княже Данииле, Московский чудотворче.

Кондак 4

Бурею агарянскаго нашествия людие российстии потрясаеми, на тя, всечестне, яко на избранника Божия, взираху и, под кров твой державный прибегающе, защищение и утешение приимаху, вкупе с тобою взывающе Богу: Аллилуиа.

Икос 4

Видяще, святе, братия твоя отрока тя еще мала суща, наследия отча лишити тя умыслиша и удел малейший, Московский, точию вдати ти изволиша; ты же, кроток сый и незлобив, ничтоже противовещал еси и за обидящих тя Господеви молился еси. Сего ради ублажаем тя сице:

Радуйся, кротости Христовы подражателю; радуйся, предивный нестяжателю.

Радуйся, удел твой малейший возвеличивый; радуйся, всего себе воле Божией предавый.

Радуйся, от Него токмо единаго помощи искавый; радуйся, богатство тленное презревый.

Радуйся, сокровища духовная возлюбивый; радуйся, от юности в благодати у Бога и человек возраставый.

Радуйся, яко и по скончании земнаго жития твоего тую же благодать сугубо восприявый; радуйся, яко и мы благодати Божия по молитвам твоим сподобляемся.

Радуйся, преподобне княже Данииле, Московский чудотворче.

Кондак 5

Боготечней звезде подобяся, на земли течение твое светло совершил еси, благоверный княже Данииле, лучи святости и потоцы милости всем изливая; ихже ради и в сонме святых пребываеши, поя с ними: Аллилуиа.

Икос 5

Слышавше ближнии и дальнии, яко в малем еще граде Москве на высоте стола княжескаго возоблистал еси, преславне княже Данииле, под сень крилу твоею притекаху, похвалы таковыя ти приносяще:

Радуйся, княже благосердый, любовию своею вся покрываяй; радуйся, владыко прелюбимый, бедствующия защищаяй.

Радуйся, мудрость отца твоего, князя Александра, восприявый; радуйся, страны Московския утверждение.

Радуйся, державы Российския украшение; радуйся, Церкве Христовы похвало высокая.

Радуйся, людей российских упование благонадежное; радуйся, тобою бо во едино братство совокупляемся.

Радуйся, яко твоим научением от распрей свобождаемся; радуйся, заповедей Божиих верный исполнителю.

Радуйся, преподобне княже Данииле, Московский чудотворче.

Кондак 6

Проповедник Царствия Божия явился еси, благоверный княже Данииле: над людьми бо своими царствуя, слезу всяку от лица страждущих отымал еси, подвизая звати всех: Аллилуиа.

Икос 6

Возсиял еси, яко пресветлое солнце, на престоле Московстем, благоверный княже Данииле, величием души твоея и добродетельми всю землю Российскую озаряя и подвизая всех ублажати тя сице:

Радуйся, мужу желаний духовных; радуйся, стяжателю даров небесных.

Радуйся, милосердия сокровище неисчерпаемое; радуйся, кротости наставниче.

Радуйся, заповедей евангельских делателю неленостный; радуйся, нищету вольную Христа ради возлюбивый.

Радуйся, сиротам и вдовицам отче благосердый; радуйся, людем твоим помощниче богодарованный.

Радуйся, в чине властителя кротость детскую проявивый; радуйся, душу твою в храм Божий добре претворивый.

Радуйся, преподобне княже Данииле, Московский чудотворче.

Кондак 7

Хотяй Всевидец Господь прославити тя, блаженне, постави тя владыку преславна во смирении людем Своим, иже и взирающе на тя, и добродетелей твоих богатству чудящеся, пояху Ему: Аллилуиа.

Икос 7

Новаго и дивнаго устроителя земли Российския вемы тя, княже Данииле, кротостию бо, смиренномудрием, братолюбием и мудростию небесною княжение Московское возвеличил еси и сильно сотворил еси е. Сего ради приими от нас сицевая:

Радуйся, мудрость Соломонову стяжавый; радуйся, кротость Давидову восприявый и тою враги твоя победивый.

Радуйся, многия други себе стяжавый; радуйся, стольный град твой храмы Божиими украсивый.

Радуйся, величию Москвы тем послуживый; радуйся, воине Христов неодоленный.

Радуйся, от бед и скорбей всем скорое прибежище; радуйся, от всех зол твердое защищение.

Радуйся, унывающим доброе вразумление; радуйся, всем братолюбцем присное ободрение.

Радуйся, преподобне княже Данииле, Московский чудотворче.

Кондак 8

Странника и пришельца себе на земли быти помышляя, час кончины твоея пред очима твоима присно имел еси и сего ради обитель иноком во славу тезоименитаго ти преподобнаго Даниила возградил еси, идеже молитвы твоя Господеви возсылал еси, поя Ему: Аллилуиа.

Икос 8

Всего себе от юности Господу возложив, вся дни живота твоего, благоверный княже. Тому усердно работал еси и, ко блаженному успению достиг, в мире глубоце дух свой Ему предал еси. Людие же княжения твоего, окрест гроба твоего собравшеся, пояху ти сицевая:

Радуйся, княже наш превожделенный, ко Господу отошедый; радуйся, нетленное тело твое нам оставивый.

Радуйся, ароматы добродетелей твоих нам благоухаяй; радуйся, сиянием небеснаго света озаренный.

Радуйся, обилием любве твоея вся удививый; радуйся, и врагом твоим благое упокоение у себе устроявый.

Радуйся, крепость державы твоея тем созидавый; радуйся, наследником твоим присное научение.

Радуйся, гроб твой, аки краеугольный камень, граду Москве положивый; радуйся, яко молитва твоя о людех и по смерти не оскудевает.

Радуйся, преподобне княже Данииле, Московский чудотворче.

Кондак 9

Вси небеснии чини и святых собори радостно тя прияша, богомудре, подвиг земнаго течения своего добре совершивша и к вечному животу пресельшася, идеже с ними поеши: Аллилуиа.

Икос 9

Витий человеческих уста не возмогут изрещи пречуднаго прославления памяти твоея, угодниче Божий, егда бо гроба твоего место забвению предадеся, сам яве предстал еси юноше благочестивому, господина месту тому себе нарицая, и князя Иоанна обличая, и глаголя: «Чесо ради предал мя еси забвению? Аще же и забвен аз тобою, не забы мя Господь». Мы же, явление Твое благоговейно почитающе, сице вопием:

Радуйся, града нашего Москвы Богом данный покровителю; радуйся, обители твоея неусыпный хранителю.

Радуйся, яко и по успении твоем нас не оставляеши; радуйся, яко милосердие Божие о гресех наших умоляеши.

Радуйся, мзду трудов твоих восприявый; радуйся, небесною славою душу твою осиявый.

Радуйся, наследников твоих добрый учителю; радуйся, к добродетели твердый тем наставниче.

Радуйся, всем людем благий пред Богом предстателю; радуйся, молитвы их к престолу Его возносяй.

Радуйся, преподобне княже Данииле, Московский чудотворче.

Кондак 10

Спастися всем хотяй Господь вельможу некоего, гроб твой, святе, поправша, недугом порази, обаче согрешение свое познавша и прощение от тебе приемша помилова, да и мы вси, достойно почитающе тя, благодарно вопием: Аллилуиа.

Икос 10

Стену необоримую и забрало крепкое граду Москве и всей державе Российстей Господь дарова тя, блаженне, верным в скорбех и нуждах пребыстрое заступление, да зовем ти сице:

Радуйся, призывающим тя во благое скорый помощниче; радуйся, чистоты душевныя и телесныя сокровище.

Радуйся, душевных и телесных недугов целителю; радуйся, державы нашея утверждение.

Радуйся, Церкве Российския украшение; радуйся, яко отец чадолюбивый, чада твоя назираяй.

Радуйся, яко воевода непобедимый пределы земли нашея ограждаяй; радуйся, небрегущия о святыне страхом вразумляяй.

Радуйся, яко кающимся скорое прощение испрошаеши; радуйся, яко благим подвигом тех научаеши.

Радуйся, преподобне княже Данииле, Московский чудотворче.

Кондак 11

Пение всеумиленное приими от нас, прехвальне, и молитвы, приносимыя тебе, не презри: к тебе бо в скорбех прибегаем и пред гробом твоим слезы проливаем, зовуще: Аллилуиа.

Икос 11

Светозарна светильника благодати яви тебе всех Творец, силою бо, данною ти свыше, юношу при гробе твоем от одра смерти возставил еси. Сего ради ублажаем тя сице:

Радуйся, милостивый скорбящим помощниче; радуйся, сосуде, Святаго Духа исполненный.

Радуйся, дарами Того обогащенный; радуйся, сими дарами и молящихся тебе обогащаяй.

Радуйся, ко Святей Троице дерзновение велие стяжавый; радуйся, дерзновение сие на помощь людем направляяй.

Радуйся, силу чудес от Бога приявый; радуйся, за грешныя Господа умоляяй.

Радуйся, любве и кротости Христовы вместилище; радуйся, безпомощных скорый помощниче.

Радуйся, преподобне княже Данииле, Московский чудотворче.

Кондак 12

Благодатию, данною ти свыше, недуги исцеляеши, враги и супостаты от нас отгоняеши, жизнь нашу умиряеши и душам нашим полезная подаеши, да благодарственно взываем Богу: Аллилуиа.

Икос 12

Поем честныя подвиги твоя, ублажаем чистое житие твое, восхваляем священную память твою, Данииле благоверне, и, прославляюще Господа всех, вопием ти сице:

Радуйся, яко крест богоугоднаго жития до конца понесл еси; радуйся, яко о скорбех твоих Бога благодарил еси.

Радуйся, всяку добродетель в себе изобразивый; радуйся, иго Христово возлюбивый.

Радуйся, немощи немощных на себе носивый; радуйся, благоволение Божие людем твоим испросивый.

Радуйся, присно на Небеси торжествуяй; радуйся, на земли преславно чудодействуяй.

Радуйся, людем твоим помощниче богодарованный; радуйся, ангелом собеседниче достойный.

Радуйся, преподобне княже Данииле, Московский чудотворче.

Кондак 13

О, преславный угодниче Христов и чудотворче, преподобне княже Данииле, отрадо и утешение всех с верою к тебе прибегающих! Приими от нас, недостойных, сие малое моление, с любовию тебе приносимое, и теплым ходатайством твоим ко Господу огради святую обитель твою, умири жизнь нашу и даруй нам покаяние совершенное, избави нас от бед и вечныя муки, да купно с тобою благодарственно вопием: Аллилуиа.

[Се́й конда́к глаго́лется три́жды.]

Икос 1

Ангелов Творец и Господь во дни великих бед и напастей, обышедших страну нашу от нечестиваго царства агарянскаго, восхотев людем страждущим утешение даровати, яви тя, княже Данииле, яко плод красен от чресл великаго князя Александра; людие же, о рождении твоем радости исполнившеся, взываху ти сицевая:

Радуйся, корене благочестиваго прозябение; радуйся, добродетелей отца твоего и матере наследниче.

Радуйся, рождением твоим люди града Владимира возвеселивый; радуйся, грядущую славу Москвы предвозвестивый.

Радуйся, избранниче Божий; радуйся, правило веры благочестивыя.

Радуйся, образе кротости духовныя; радуйся, Бога, яко истиннаго Отца нашего, издетска познавый.

Радуйся, яко Иосиф, от братии твоея досаждения сладце претерпевый; радуйся, последи и братию свою в любовь себе призвавый.

Радуйся, преподобне княже Данииле, Московский чудотворче.

Кондак 1

Избранный чудотворче и предивный угодниче Христов, града Москвы и державы Российския крепкое ограждение, раздоров и нестроений искоренителю, благоверный княже Данииле, похвальная восписуем ти, к раце мощей твоих притекающе. Ты же, яко имеяй дерзновение ко Господу, от всяких нас бед свободи, зовущих:

Радуйся, преподобне княже Данииле, Московский чудотворче.

Молитва 1-я

Церкве Христовы похвало высокая, града Москвы стено необоримая, державы Российския Божественное утверждение, преподобне Данииле. К раце мощей твоих притекающе, усердно молим тя: призри на нас, память твою воспевающих и с верою под кров молитв твоих прибегающих. Пролей теплое твое ходатайство ко Спасу всех, яко да утвердит миром страну нашу, грады и веси ея и обитель сию добре да сохранит, благочестие и любовь в людех твоих насаждая, злобу же, междоусобие и нравов развращение искореняя; всем же нам вся благая ко временному животу и вечному спасению даруй молитвами твоими, яко да прославляем дивнаго во святых Своих Христа Бога нашего во веки веков. Аминь.

Молитва 2-я

О, угодниче Божий, святый благоверный княже Данииле, сада Христова благовонный цвете, неба церковнаго кроткая звездо, земли нашея небесный уме, града Москвы и державы нашея мудрый здателю. Теплый к Богу молитвенниче, скорый в помощи, милостивый в нуждах, к тебе припадаем и тебе молимся: буди предстатель наш пред Престолом Божией славы неусыпный. Собери нас друг ко другу, да печали ближняго своего кийждо любовию нелицемерною приобщается. Онебеси ум наш, да, иго тяжкое земных попечений отвергше, бремя легкое Христова Евангелия возлюбим. Открый очи наши, да узрим нетленную красоту Господню и да не отчуждени будем жизни Божией. Тихость Духа Божия да соблюдет сердце наше. Весна покаяния да украсит дела наша.

Княже милостивый и щедрый, сохрани страну нашу, град твой и зде молящихся тебе от всякия напасти, от враг видимых и невидимых, от губительства и глада, от междоусобныя распри и внезапныя смерти. Отверзи нам двери милосердия Божия и избави нас от всякаго зла. Под крепкий покров благостыни твоея прибегающе, молим: буди нам тихое пристанище в скорбех. Остени нас молитвами твоими. Соблюди нас от падений греховных и заблуждений, да сердцем сокрушенным, духом смиренным в печали и радости выну зовем: Господи, предстательством преподобнаго Твоего помилуй нас. Аминь.