Преподобномученик Евстра́тий Печерский

Преподобномученик Евстратий Печерский родился в XI веке в Киеве в богатой семье. С возрастом он принял монашеский постриг в Киево-Печерском монастыре, раздав свое имение нищим. Преподобный Евстратий смиренно проходил послушание в обители, строго исполняя молитвенное правило и проводя дни в постничестве и воздержании.

Когда в 1096 году на Киев напали половцы и разорили Печерский монастырь, истребив многих иноков, преподобный Евстратий был взят в плен и вместе с тридцатью монастырскими рабочими и двадцатью киевлянами продан в рабство одному иудею, жившему в городе Корсуни. Богопротивный еврей стал принуждать пленников отречься от Христа, угрожая противящихся уморить голодом в оковах. Но мужественный инок Евстратий молитвенно укреплял и поучал своих братий-христиан духовными наставлениями: "Братие! Кто из вас крестился и уверовал во Христа, пусть тот не изменяет обету, данному при Крещении. Христос возродил нас водою и Духом, искупил нас от клятвы закона Своею Кровию и сделал нас наследниками Своего Царствия. Если живем - будем жить для Господа; если умрем - умрем в Господе и временною смертью обрящем вечную жизнь". Укрепляемые словами преподобного, пленники предпочли лучше умереть от недостатка временной пищи и пития, но не отречься от Христа, Который есть пища и питие вечной жизни. Истощенные голодом и жаждой, все пятьдесят пленников через несколько дней умерли. Только один преподобный Евстратий остался жив, потому что с юных лет привык к посту. Томимый голодом, он уже в течение четырнадцати дней не прикасался к пище и воде. Нечестивый еврей, видя, что из-за черноризца пропали его деньги, заплаченные за пленных, решил отомстить святому иноку.

Приближалось Светлое Христово Воскресение, и еврей-рабовладелец во время празднования иудейской пасхи, собрав своих друзей, распял на кресте преподобного Евстратия. Собравшиеся вокруг распятого святого жестокие мучители поносили страстотерпца и предлагали вкусить их пасхи. На это преподобномученик отвечал: "Великой благодати сподобил меня ныне Господь. Он даровал мне милость пострадать за Имя Его на кресте по образу Его страданий...". Услышав это, разгневанный еврей схватил копье и пронзил им пригвожденного ко кресту преподобномученика Евстратия. Святое тело страдальца, снятое с креста, было ввергнуто в море. Верующие христиане долго искали святые мощи мученика, но не смогли их найти. Промыслом Божиим нетленные мощи были обретены в пещере и источали множество чудес. Впоследствии они были перенесены в Ближние пещеры Киево-Печерского монастыря.

Предсказание святого мученика Евстратия о том, что кровь его будет отомщена, исполнилось тотчас после его смерти. В тот же день пришло повеление греческого императора изгнать из Корсуни всех евреев, лишив их имущества, а старейшин избить за мучение христиан. Еврей, распинавший преподобномученика Евстратия, был повешен на дереве, получив справедливое возмездие за беззаконие.

Тропарь, глас 7

По́стником и му́чеником яви́лся еси́ похвала́, преподо́бне Евстра́тие,
пре́жде бо воздержа́нием пло́ть умертви́в,
после́довал еси́ Христу́, нося́ кре́ст сво́й.
Последи́ же и са́м на кре́ст вознесе́н бы́в
и копие́м в ре́бра прободе́н,
в ру́це Бо́жии ду́шу преда́л еси́.
Колесни́цею о́гненною возноси́м на Небеса́,
сугу́бо венча́лся еси́ от Христа́ Бо́га

и Спа́са ду́ш на́ших.

Кондак, глас 8

Я́ко ревни́тель стра́сти Влады́чней
и по́стников усе́рдный после́дователь сы́й,
пле́нники уче́нием твои́м наста́вль, Христо́ви приве́л еси́, Евстра́тие,
и на́с, плене́нных страстьми́, мольба́ми свои́ми свободи́
и подража́тели честно́му твоему́ житию́ покажи́, зову́щих:

ра́дуйся, испи́вый сла́достне ча́шу Христо́вых страда́ний.

Канон преподобномученику Евстратию Печерскому

Минея, 28 Марта.

Глас 1

Песнь 1

Ирмос: Твоя́ победи́тельная десни́ца
боголе́пно в кре́пости просла́вися:
та бо, Безсме́ртне,
я́ко всемогу́щая проти́вныя сотре́,
изра́ильтяном пу́ть глубины́ новосоде́лавшая.

Припев: Преподобному́чениче о́тче Евстра́тие, моли́ Бо́га о на́с.

Воскресе́ния дне и прича́стник све́та хотя́ бы́ти, преподо́бне,
в день стра́сти Влады́чни возне́слся еси́ на крест,
и сообрази́лся еси́ стра́сти Христо́вей, победи́в мир,
и ны́не, прича́стник сый сла́вы неизрече́нныя,
весели́шися, побе́дную песнь пою́щи.

Припев: Преподобному́чениче о́тче Евстра́тие, моли́ Бо́га о на́с.

Ничто́же в ми́ре сем многомяте́жном возлюби́л еси́, преподо́бне,
я́ко Крест Христо́в, и, того́ име́я в похвалу́, со Апо́столом взыва́л еси́:
мне да не бу́дет хвали́тися, то́кмо о Кресте́ Госпо́днем.
О не́мже весели́шися, песнь побе́дную пою́щи.

Припев: Преподобному́чениче о́тче Евстра́тие, моли́ Бо́га о на́с.

Ко кресту́ пригвожде́н сый от иуде́й, всеблаже́ннейший о́тче,
пригвозди́л еси́ вся теле́сныя стра́сти,
я́ко тебе́ со апо́столом глаго́лати:
мне мир распя́тся, и аз ми́ру.
Те́мже досто́йно ны́не с Воскре́сшим весели́шися, побе́дную пою́щи.

Сла́ва Отцу́ и Сы́ну и Свято́му Ду́ху.

От любостра́стнаго Еги́пта ми́ра сего́ изше́д,
о кресте́ всебу́рное того́ безмяте́жно преше́л еси́ мо́ре, свя́те,
вопреки́ же написа́в пригвожде́нныма дла́ньма,
погрузи́л еси́ мы́сленнаго фарао́на с возду́шными во́и
и ны́не ра́дуешися, побе́дную пою́щи.

И ны́не и при́сно и во ве́ки веко́в. Ами́нь.

Богородичен: Любостра́стнаго ми́ра сего́ изше́д, а́ки от Еги́пта,
возвраща́юся на пе́рвая, да чре́ву угожда́ю, пита́яся ско́тски;
да́ждь ми, Богоневе́стная Де́во, поне́ ма́ло уклони́тися от сих,
да, свобо́дь сый, принесу́ Ти хвале́ние, побе́дную пою́щи.

Песнь 3

Ирмос: Еди́не, ве́дый челове́ческаго существа́ не́мощь
и ми́лостивно в не вообра́жся,
препоя́ши мя с высоты́ си́лою,
е́же вопи́ти Тебе́, Святы́й,
одушевле́нный хра́ме неизрече́нныя сла́вы Твоея́, Человеколю́бче.

Припев: Преподобному́чениче о́тче Евстра́тие, моли́ Бо́га о на́с.

Прииди́те ко Мне, тружда́ющиеся,– Ре́кшему после́довал еси́, о́тче,
и Того́ Кресто́м разгна́л еси́ враги́ мы́сленныя,
и́же, до конца́ побежде́нни, возврати́шася со студо́м.
Моли́ и о нас, да и мы проти́ву тех ополче́ния ста́нем,
на сие́ бо о Христе́ утвержда́емся.

Припев: Преподобному́чениче о́тче Евстра́тие, моли́ Бо́га о на́с.

Крест возложи́в на ра́мо, свя́те,
ве́рою несумне́нною к Еди́ному любо́вию привяза́лся еси́, да Христа́ приобря́щеши,
и Того́ по жела́нию обре́л еси́ те́сною стезе́ю,
ю́же проше́л еси́, не запе́нся,
имы́й крест держа́ву и утвержде́ние.

Припев: Преподобному́чениче о́тче Евстра́тие, моли́ Бо́га о на́с.

Облеки́йся во и́ноческий о́браз, ми́ра обнажи́лся еси́, блаже́нне,
и, ле́гце проше́д пу́ть,
во обетова́нную зе́млю, в Пече́рскую оби́тель,
точа́щую, а́ки мед и млеко́, уче́ния Богоно́сных оте́ц,
от ни́хже напита́вся, был еси́ кре́пок,
тех уче́нием сотвори́, да и мы утвержда́емся.

Сла́ва Отцу́ и Сы́ну и Свято́му Ду́ху.

Глаго́лом моли́твы и посто́м чу́вственнаго врага́ покори́в ду́ху,
смире́нием же и послуша́нием мы́сленнаго амали́ка победи́в,
был еси́, о́тче, уго́ден Влады́це своему́
и от Него́ прия́л крест, ору́жие непобеди́мое,
о не́мже и мы утвержда́емся.

И ны́не и при́сно и во ве́ки веко́в. Ами́нь.

Богородичен: Коле́блемь сый вра́жиими прило́ги вы́ну,
утвержде́ния не имы́й аз, стра́стный,
к Тебе́ прибега́ю, Ма́ти Бо́жия:
Ты бо еси́ ве́рным Необори́мая Стена́, о не́йже утвержда́емся.

Седален, глас 2

Победоно́снаго страда́льца прииди́те, лю́дие, воспое́м па́мять,
пе́сньми и пе́нии день весе́лия его́ провожда́юще,
от плаче́внаго бо удо́лия сего́ к неконча́емей ра́дости пре́йде,
и, предстоя́ Влады́чню Престо́лу, вопие́т к нам:
подража́тели мне быва́йте, я́коже аз Христу́,
И́же пода́ст всем бога́тую Свою́ ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: В ми́ре стра́стное житие́ имы́й,
обурева́юся смертоно́сных ве́тров волна́ми,
Ко́рмчия ро́ждшая, Христа́,
к ти́хому приста́нищу упра́ви живо́т мой, молю́ся,
и пода́ждь ми бога́тую Твою́ ми́лость.

Песнь 4

Ирмос: Го́ру Тя, благода́тию Бо́жиею приосене́нную,
прозорли́выма Авваку́м усмотри́в очи́ма,
из Тебе́ изы́ти Изра́илеву провозглаша́ше Свято́му
во спасе́ние на́ше и обновле́ние.

Припев: Преподобному́чениче о́тче Евстра́тие, моли́ Бо́га о на́с.

Ве́дый, преподо́бне, невоздержа́ния ра́ди пе́рваго во ад все́льшагося челове́ка,
приложи́лся еси́ воздержа́нию и поще́нию зе́льному
и отсю́ду стяжа́л и́мя по́стник,
зане́ сло́вом Бо́жиим па́че, не́жели бра́шном, пита́лся еси́,
пою́щи Христу́, я́ко Всеси́лен.

Припев: Преподобному́чениче о́тче Евстра́тие, моли́ Бо́га о на́с.

Вы́шняго попуще́нием плене́н, свя́те, быв от по́ловцев,
апо́стольски взыва́л еси́:
свобо́дь есть, и́же пленя́ет ум свой в послуша́ние Христо́во.
Тем в ско́рби не изнемога́л еси́,
но па́че, судьба́м Бо́жиим дивя́ся,
славосло́вил еси́ Христа́, я́ко Всеси́лен.

Припев: Преподобному́чениче о́тче Евстра́тие, моли́ Бо́га о на́с.

Пре́даннаго Иису́са всегда́ нося́ на те́ле свое́м о́браз,
про́дан был еси́ в гре́ческую зе́млю, во град Корсу́н,
не́коему богоуби́йце иуде́янину,
и той тебе́ тща́шеся отврати́ти от любве́ Бо́жия,
ея́же ра́ди и на смерть гото́в был еси́, пою́щи:
воскре́се Христо́с, я́ко Всеси́лен.

Сла́ва Отцу́ и Сы́ну и Свято́му Ду́ху.

Затворе́н быв в темни́це с про́чими христиа́ны
и гла́дом му́чим от евре́ина, терпя́, сла́дце рекл еси́:
кто мя разлучи́т от любве́ Христо́вы?
ни глад, ни смерть, ни теснота́ –
вся бо ма́ла су́ть сия́ к хотя́щей сла́ве яви́тися в нас, пою́щих:
воскре́се Христо́с, я́ко Всеси́лен.

И ны́не и при́сно и во ве́ки веко́в. Ами́нь.

Богородичен: Плене́н быв от враго́в мы́сленных
и близ уже́ су́щи а́довы темни́цы, к Тебе́ обра́щся, вопию́:
Ма́ти Бо́жия, внегда́ возврати́ши плен души́ моея́,
тогда́ язы́к мой весе́лия испо́лнится и воспое́т:
воскре́се Сын Твой, я́ко Всеси́лен.

Песнь 5

Ирмос: Просвети́вый сия́нием прише́ствия Твоего́, Христе́,
и освети́вый Кресто́м Твои́м ми́ра концы́,
сердца́ просвети́ све́том Твоего́ Богоразу́мия
правосла́вно пою́щих Тя.

Припев: Преподобному́чениче о́тче Евстра́тие, моли́ Бо́га о на́с.

У́треневал еси́ любо́вию ко Христу́, до́блественне Евстра́тие,
проти́вящеся понужда́ющему евре́ину отступи́ти от Христа́ твоего́,
И́же есть Пра́вды Со́лнце,
всем присносу́щную жизнь возсия́ющее.

Припев: Преподобному́чениче о́тче Евстра́тие, моли́ Бо́га о на́с.

Твои́м, о́тче, уче́нием вси пле́нницы, су́щии в темни́це,
богоуби́йственнаго евре́ина поплева́ша бу́йство
и изво́лиша па́че гла́дом и жа́ждею умре́ти,
не́же отврещи́ся Христа́, всем жизнь подаю́щаго.

Припев: Преподобному́чениче о́тче Евстра́тие, моли́ Бо́га о на́с.

Полк му́ченик пятьдесяточи́сленный, гла́дом и жа́ждею убие́н от жидови́на,
предпосла́л еси́, блаже́нне, Христу́ своему́,
сам последи́ то́жде пострада́ти хотя́ за любо́вь Иису́са,
всем жизнь подава́юща.

Сла́ва Отцу́ и Сы́ну и Свято́му Ду́ху.

Ви́дев окая́нный,
я́ко изме́ршим всем у́зником в темни́це погуби́ зла́то
и наде́жду привлече́ния к злоче́стию своему́,
умы́сли распя́ти тя на кресте́,
на него́же текл еси́ спе́шно, преподо́бне, зовы́й:
Христе́ мой, изведи́ из темни́цы плотски́я ду́шу мою́.

И ны́не и при́сно и во ве́ки веко́в. Ами́нь.

Богородичен: Преблаже́нная Де́во,
уще́дри бла́гостию Твое́ю ду́шу мою́, ги́блющую гла́дом,
и насы́ти ю а́нгельским хле́бом,
напо́й пото́ком сла́дости Небе́сныя,
да отсю́ду мир души́ мое́й обря́щу.

Песнь 6

Ирмос: Обы́де нас после́дняя бе́здна,
не́сть избавля́яй,
вмени́хомся, я́ко о́вцы заколе́ния,
спаси́ лю́ди Твоя́, Бо́же наш,
Ты бо кре́пость немощству́ющих и исправле́ние.

Припев: Преподобному́чениче о́тче Евстра́тие, моли́ Бо́га о на́с.

А́ки во́днаго зве́ря, бы́сть утро́ба беззако́ннаго иуде́янина,
и́же хотя́ше тя поглоти́ти и в число́ привести́ омраче́ннаго евре́йскаго со́нмища,
но ты, о́тче, дерзнове́нно стал еси́ проти́ву того́ зия́ния
и одоле́л еси́ тому́, по́мощию Вы́шняго укрепля́емь.

Припев: Преподобному́чениче о́тче Евстра́тие, моли́ Бо́га о на́с.

Во́ньже де́нь, возшата́вшеся, иуде́е Животода́вца на Кресте́ пове́сиша,
тогда́ и тебе́ окая́нный евре́ин распя́;
да с Ни́мже страда́л еси́, с Тем и просла́вишися, блаже́нне, в немерца́емом све́те
прие́мь возме́здие от Спа́са своего́.

Припев: Преподобному́чениче о́тче Евстра́тие, моли́ Бо́га о на́с.

Руга́нием помина́юще стра́сть Влады́чню скве́рнии богоуби́йцы,
я́коже отцы́ их – Христа́,
та́ко си́и к дре́ву кре́стному, руга́ющеся, пригвозди́ша тя, о́тче:
но бы́сть им дре́во кре́стное – юро́дство,
тебе́ же, спа́сшемуся,– си́ла Бо́жия.

Сла́ва Отцу́ и Сы́ну и Свято́му Ду́ху.

Обличи́л еси́ пра́здники скве́рныя иуде́йския,
на кресте́ ви́ся, свя́те, не боя́ся их кля́твы,
я́ко та потреби́ся пло́тию пригвожде́нна Христа́ Бо́га
и тридне́вным Воскресе́нием мир просве́щшаго.

И ны́не и при́сно и во ве́ки веко́в. Ами́нь.

Богородичен: Я́же пра́дедную кля́тву Потреби́вшая благослове́нным рождество́м Твои́м, Ма́ти Чи́стая,
благослове́ния избра́нных Бо́жиих, молю́, да мя сподо́биши,
Благослове́нная и Просла́вленная.

Кондак, глас 8

Я́ко ревни́тель стра́сти Влады́чней
и по́стников усе́рдный после́дователь сый,
пле́нники уче́нием твои́м наста́вль, Христо́ви приве́л еси́, Евстра́тие,
и нас, плене́нных страстьми́, мольба́ми свои́ми свободи́
и подража́тели честно́му твоему́ житию́ покажи́, зову́щих:
ра́дуйся, испи́вый сла́достне ча́шу Христо́вых страда́ний.

Песнь 7

Ирмос: Тебе́, у́мную, Богоро́дице, пе́щь,
разсмотря́ем, ве́рнии,
я́коже бо о́троки спасе́ три Превозноси́мый,
мир обнови́, во чре́ве Твое́м всеце́л,
хва́льный отце́в Бог и препросла́влен.

Припев: Преподобному́чениче о́тче Евстра́тие, моли́ Бо́га о на́с.

Безу́мное веле́ние иуде́йское,
пригвожде́н сый, о́тче, на кресте́, обличи́л еси́ проро́ческими Писа́ньми
и па́схи зако́нныя не восхоте́л еси́ вкуси́ти,
жела́я прича́стник бы́ти Па́схи, Я́же за ве́сь мир пожре́ся –
Христо́с Бог благослове́нный.

Припев: Преподобному́чениче о́тче Евстра́тие, моли́ Бо́га о на́с.

Разоре́ние кля́твы, я́же от Дре́ва, приводи́л еси́, блаже́нне, от проро́к сказу́я,
и, вход живота́ на Дре́ве кре́стном Живото́м,
ви́сящим пред очи́ма их, пропове́дуя,
посрами́л еси́ иуде́и, неве́дущия пе́ти:
Бо́же, благослове́н еси́.

Припев: Преподобному́чениче о́тче Евстра́тие, моли́ Бо́га о на́с.

Распе́ншим тя иуде́ем проро́чествовал еси́, о́тче преподо́бне:
прии́дет вско́ре отмще́ние на вы за кро́вь мою́
и про́чиих христиа́н, и́хже уби́сте непови́нне,
и пра́здники ва́ша в се́тование обратя́тся,
ненави́дит бо суббо́т ва́ших Госпо́дь, в ни́хже отверго́стеся пе́ти:
Христе́ Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Словеса́ твоя́ бы́ша о́стрыя стре́лы беззако́нным,
и́миже пробода́еми, не стерпе́ша, но копие́м ре́бра твоя́ прободо́ша,
и отше́л еси́ ко Источи́вшему от прободе́ннаго ребра́ жизнь всему́ ми́ру пе́ти:
Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Прободе́нну ми грехолю́бным копие́м лю́таго велиа́ра,
ско́ро приложи́ пла́стырь ми́лости Твоея́, Богоневе́стная Де́во Ма́ти,
я́ко да, исцеле́в, вы́ну Ти пою́, Влады́чице:
Благослове́нна еси́.

Песнь 8

Ирмос: В пещи́ о́троцы Изра́илевы,
я́коже в горни́ле,
добро́тою благоче́стия чисте́е зла́та блеща́хуся, глаго́люще:
благослови́те, вся дела́ Госпо́дня, Го́спода,
по́йте и превозноси́те во вся ве́ки.

Припев: Преподобному́чениче о́тче Евстра́тие, моли́ Бо́га о на́с.

Почти́те, лю́дие, до́браго страда́льца,
и́же, вся у́ды пре́жде собо́ю мы́сленне распя́в,
последи́ чу́вственне от иуде́й распя́т, возопи́л ко Христу́:
се аз я́звы Твоя́ на те́ле мое́м ношу́ и пою́ Тя во вся ве́ки.

Припев: Преподобному́чениче о́тче Евстра́тие, моли́ Бо́га о на́с.

Тебе́, о́тче, на Не́бо о́гненною колесни́цею и ко́ньми восхище́нну,
изыдо́ша в сре́тение му́ченик и пра́ведник ли́ки,
восхвали́ша ру́чныя и но́жныя я́звы твоя́ и бок прободе́нный,
прие́млюще тя в ски́нию святы́х хвали́ти Го́спода во ве́ки.

Припев: Преподобному́чениче о́тче Евстра́тие, моли́ Бо́га о на́с.

Глас принесе́ся к тебе́, свя́те, от велеле́пныя сла́вы:
се до́брый Небе́сный граждани́н, его́же не бе досто́ин ве́сь мир,
восхо́дит от су́етнаго ми́ра к преми́рным селе́ниям
пе́ти Го́спода во вся ве́ки.

Сла́ва Отцу́ и Сы́ну и Свято́му Ду́ху.

Сокро́вище многоце́нное – мо́щи твоя́,– преблаже́нне,
беззако́нный евре́ин хотя́ утаи́ти, вве́рже в мо́ре,
но Бо́жиим смотре́нием обрето́шася зде, в пеще́ре,
и́мже покланя́ющеся, прославля́ем просла́вльшаго тя нетле́нием и чудесы́
Го́спода во вся ве́ки.

И ны́не и при́сно и во ве́ки веко́в. Ами́нь.

Богородичен: Сокро́вище многоце́нное, дража́йшаго Иису́са,
от Ма́терних недр произве́дшая,
искупи́ ду́шу мою́ от плене́ния любостра́стнаго ми́ра,
да пою́ Тя зде и в немерца́ющем Све́те во вся ве́ки.

Песнь 9

Ирмос: О́браз чи́стаго рождества́ Твоего́
огнепали́мая купи́на показа́ неопа́льная;
и ны́не на нас напа́стей свире́пеющую угаси́ти, мо́лимся, пе́щь,
да Тя, Богоро́дице,
непреста́нно велича́ем.

Припев: Преподобному́чениче о́тче Евстра́тие, моли́ Бо́га о на́с.

Свети́ся, свети́ся, Бо́жия Ма́тере Пече́рская оби́тель,
в тебе́ бо цвету́щее дре́во возрасте́, чу́дный Евстра́тий,
благово́нными цве́ты страда́ния укра́шен.
Красоте́ того́ и мы прича́стницы да бу́дем,
покланя́емся моще́м его́ и пе́сньми велича́ем.

Припев: Преподобному́чениче о́тче Евстра́тие, моли́ Бо́га о на́с.

Открыва́яй та́йны Бог
скве́рных уби́йцев яви́ благочести́вому царю́,
я́ко, лицеме́рствующе, иуде́е в та́йне христиа́н убива́ют,
и взы́де непра́вда на главу́ их:
ра́вную бо смерть восприя́ша по твоему́ проро́честву, о́тче блаже́ннейший.

Припев: Преподобному́чениче о́тче Евстра́тие, моли́ Бо́га о на́с.

Кро́вь твоя́, непови́нне излия́нная от иуде́й,
а́ки А́велева, о́тче, вопия́ше к Бо́гу,
И́же пра́ведным судо́м за ню наведе́ отмще́ние,
и, пове́шен быв на дре́ве,
твой мучи́тель получи́ ча́сть со Иу́дою в гее́нне,
твоя́ же ча́сть – Госпо́дь,
Ему́же покланя́ющеся, дне́сь велича́ем.

Сла́ва Отцу́ и Сы́ну и Свято́му Ду́ху.

Кро́вь твоя́, свя́те, и нело́жное проро́чество мно́гия по́слежде приведе́ к ве́ре:
собы́тие бо того́ ви́девше, и́стинно пока́явшеся, ве́роваша во Христа́,
и, кре́щшеся, до́бре пожи́ша, и блаже́нныя сподо́бишася жи́зни,
ея́же и мы да не лиши́мся,
кла́няемся ра́це моще́й твои́х и тя велича́ем.

И ны́не и при́сно и во ве́ки веко́в. Ами́нь.

Богородичен: Жи́знь присносу́щную в не́дрех Свои́х объе́мля,
от вре́менней жи́зни к ве́чной нас упра́ви Твои́м хода́тайством, Непоро́чная Ма́ти,
и да́ждь всем зре́ти невече́рний день Ца́рствия Сы́на Твоего́.

Светилен

Присносу́щную прови́дя жи́знь, блаже́нне, о вре́менней неради́л еси́,
вся, наноси́мая от иуде́й, претерпе́в до́блественне,
и, зако́нныя па́схи не восхоте́в вкуси́ти,
ко кресту́ пригвожде́н был еси́,
и, о́гненною от земли́ восходя́ колесни́цею, свиде́тельствовал еси́:
Христо́с есть Па́сха нетле́ния, ми́ра спасе́ние.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Присносу́щнаго Све́та Предста́тельница су́щи, Богоневе́стная Де́во,
нам, во мра́це живу́щим, предста́ни и упра́ви жизнь на́шу,
да безпреткнове́нно до́йдем, иде́же Христо́с есть Па́сха нетле́ния, ми́ра спасе́ние.