Православный Мир
Житие
Жития
Святитель Марк, епископ Арефусии Сирийской, жил в IV веке. При императоре Константине Великом он ревностно боролся с язычеством, лично разрушив капище и построив на его месте христианский храм. В период богословских споров после Никейского Собора святой Марк примкнул к полуарианам, но впоследствии осознал заблуждение.
Когда к власти пришел император-язычник Юлиан Отступник (361-363 гг.), начались жестокие гонения на христиан. Язычники Арефусии, помнившие разрушение своего святилища, схватили епископа. Несмотря на то, что Марк когда-то спас жизнь Юлиану, император позволил преследовать его.
Святителя подвергли изощренным мучениям: избивали, бросили в сточную канаву, отдали на поругание детям, которые кололи его тело стилями (палочками для письма). Затем его обмазали медом и рассолом и подвесили в корзине на солнцепеке, где он страдал от укусов ос и пчел. Мучители требовали, чтобы он восстановил разрушенный языческий храм, но святой Марк мужественно отказался, говоря, что даже такое малое дело было бы равносильно отречению от веры.
Его стойкость и верность Христу произвели такое впечатление на преследователей, что некоторые из них обратились в христианство. После прекращения гонений святитель Марк был освобожден и мирно скончался около 364 года, удостоившись славы исповедника.
В ту же эпоху гонений при императоре Юлиане Отступнике диакон Кирилл из Илиополя Финикийского, известный тем, что ранее разрушал языческих идолов, был схвачен разъяренными язычниками. Они подвергли его жестокой казни: разрезали ему живот, выбросили внутренности на землю и съели его печень в сыром виде. Согласно церковному преданию, Божественное возмездие постигло мучителей: одни лишились всех зубов, у других языки сгнили, а третьи ослепли.
Канон
Канон преподобному Марку, епископу Арефусийскому, и Кириллу диакону, и иным, при Иулиане мучителе пострадавшим
Минея, 29 Марта.
Глас 8
Песнь 1
Ирмос: Посе́ченый несеко́маго пресече́,
и ви́де со́лнце зе́млю, ю́же не ви́де,
лю́таго врага́ вода́ потопи́,
и непроходи́мое про́йде Изра́иль,
песнь же воспева́шеся:
Го́сподеви пои́м, сла́вно бо просла́вися.
Припев: Святи́и му́ченицы, моли́те Бо́га о на́с.
Со А́нгелы Бо́гу предстоя́ще, Царю́ всех, му́ченицы всеблаже́ннии,
проси́те нам прегреше́ний избавле́ния,
любо́вию блажа́щим вы и во хвале́нии пою́щим:
Го́сподеви воспои́м, сла́вно бо просла́вися.
Припев: Святи́и му́ченицы, моли́те Бо́га о на́с.
Архиере́я Дух Святы́й тя предста́ви, Ма́рко, оби́льны па́ствити лю́ди
во вся́ком преподо́бии догма́тов па́лицею слове́сною.
С ни́миже, блаже́нне, пел еси́:
Го́сподеви воспои́м, сла́вно бо просла́вися.
Сла́ва Отцу́ и Сы́ну и Свято́му Ду́ху.
Струя́ми крове́й пла́мень многобо́жия угаси́вше, му́дрии,
ра́дующеся, пострада́сте, е́ллинския мудрецы́ коне́чно посра́мльше,
и ны́не с му́ченики Христу́ предстоите́, зову́ще:
Го́сподеви воспои́м, сла́вно бо просла́вися.
И ны́не и при́сно и во ве́ки веко́в. Ами́нь.
Богородичен: Из Отрокови́цы нетле́нный Бог воплоща́ется,
Его́же безпло́тных ли́цы, трепе́щуще, сла́вят,
я́ко всех Творца́ и Еди́наго непреме́ннаго,
и челове́цы на земли́ всегда́ пою́т, воспева́юще:
Го́сподеви пое́м, сла́вно бо просла́вися.
Песнь 3
Ирмос: Страх Твой, Го́споди,
всади́ в сердца́ раб Твои́х
и бу́ди нам утвержде́ние,
Тя во и́стине призыва́ющих.
Припев: Святи́и му́ченицы, моли́те Бо́га о на́с.
Не прине́сл еси́ че́сти безслове́сным истука́нным, всеблаже́нне,
но претерпе́л еси́ крепча́йше му́ки многообра́зныя,
Ма́рко доблему́дренне.
Припев: Святи́и му́ченицы, моли́те Бо́га о на́с.
Ума́ до́блестию претерпе́л еси́, пресла́вне Кири́лле,
наруга́ния же и му́ки муже́й пребеззако́ннующих,
му́чениче страстоте́рпче.
Сла́ва Отцу́ и Сы́ну и Свято́му Ду́ху.
Обнажа́емы, му́ченицы многострада́льнии,
и ра́нами сокруша́емы, непрело́жни пребы́сте,
па́че Христо́вы любве́ ничто́же предпочита́юще.
И ны́не и при́сно и во ве́ки веко́в. Ами́нь.
Богородичен: Из Тебе́ возсия́, Всенепоро́чная,
озаря́яй подсо́лнечную пресла́вными осия́нии
Пра́вды Со́лнце, Де́во.
Седален, глас 4
Просве́щшеся благода́тию и́стинною,
земны́я концы́ све́тло наставля́ете благоче́стно, священному́ченицы сла́внии.
Те́мже ве́рою вас ублажа́ем.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Пречи́стеи ру́це Твои́, Де́во Ма́ти, просте́рши,
покры́й упова́ющия на Тя и Сы́ну Твоему́ зову́щия:
всем пода́ждь, Христе́, ми́лости Твоя́.
Песнь 4
Ирмос: Из горы́ приосене́нныя, Сло́ве, проро́к,
еди́ныя Богоро́дицы,
хотя́ща воплоти́тися богови́дно усмотри́
и со стра́хом славосло́вяше си́лу Твою́.
Припев: Святи́и му́ченицы, моли́те Бо́га о на́с.
Исте́кшая на зе́млю кро́вь твоя́, Богому́дре,
сию́ пои́стинне освяти́ досто́йно и ду́ши напои́ благоче́ствующих,
к ре́вности Боже́ственней воздвизающи.
Припев: Святи́и му́ченицы, моли́те Бо́га о на́с.
Заре́ю мы́сленною я́ве просвеща́еми,
нощь злу́ю безбо́жнаго злосла́вия отгна́сте, му́ченицы, пресла́вно,
Ма́рко и Кири́лле всеблаже́ннии.
Припев: Святи́и му́ченицы, моли́те Бо́га о на́с.
Исцели́ на́ша неду́ги, Благоде́телю,
Ма́рка моли́твами и Кири́лла Боже́ственнаго
и ми́лости Твоя́, Благоутро́бне, на вся воспева́ющия Тя низпосли́.
Сла́ва Отцу́ и Сы́ну и Свято́му Ду́ху.
Си́лою Боже́ственною и благода́тию сло́ва, му́ченицы Христо́вы,
хра́мы и́дольския низлага́юще,
Ду́ха Свята́го храм ве́рою показа́стеся.
И ны́не и при́сно и во ве́ки веко́в. Ами́нь.
Богородичен: Яви́лася еси́ Бо́жие простра́нное вмести́лище,
престо́л высо́к и две́рь, Богоро́дице,
е́юже про́йде неизрече́нным рождество́м, от тли ны воззыва́я.
Песнь 5
Ирмос: От но́щи неве́дения
Богове́дением просвети́вый концы́,
просвети́ мя у́тром человеколю́бия Твоего́, Го́споди.
Припев: Святи́и му́ченицы, моли́те Бо́га о на́с.
Мироявле́ннии свети́льницы, священному́ченицы Боже́ственнии бы́вше,
вся просвеща́ете Боже́ственными светлостьми́ Ду́ха.
Припев: Святи́и му́ченицы, моли́те Бо́га о на́с.
Усмотря́я, всеблаже́нне, воздая́ния Боже́ственная,
терпе́л еси́, Ма́рко, нестерпи́мыя ра́ны и боле́зни крепча́йше.
Сла́ва Отцу́ и Сы́ну и Свято́му Ду́ху.
Священноде́тель сый и, безкро́вныя же́ртвы принося́ Христу́,
же́ртву, блаже́нне, благово́нную–
тебе́ сама́го – Го́сподеви прине́сл еси́.
И ны́не и при́сно и во ве́ки веко́в. Ами́нь.
Богородичен: Рождество́м стра́нным Царя́ всех родила́ еси́, Пречи́стая Богоро́дице,
на благодея́ние тва́ри.
Песнь 6
Ирмос: Ио́ну в ки́те, Го́споди,
еди́наго всели́л еси́,
мене́ же, свя́заннаго мре́жами вра́жиими,
я́ко от тли о́наго спаси́.
Припев: Святи́и му́ченицы, моли́те Бо́га о на́с.
Претерпе́в му́ки многоплете́нныя и смерть хода́тайственную, Богому́дре,
в сла́ве присносу́щней лику́еши на Небесе́х,
о нас, Кири́лле, моля́ся.
Припев: Святи́и му́ченицы, моли́те Бо́га о на́с.
Глаго́л Бо́жий жив в се́рдцы твое́м я́ко име́я, Ма́рко сла́вне,
к ве́ре Боже́ственней привле́кл еси́ лю́ди и наро́ды, му́дре,
и благосла́вно тече́ние сконча́л еси́.
Сла́ва Отцу́ и Сы́ну и Свято́му Ду́ху.
Священноде́теле и же́ртвы соверше́ны, Го́сподеви принесо́стеся, му́ками всесоже́гшеся,
и в Вы́шних све́тли Царю́ всех предстоите́.
И ны́не и при́сно и во ве́ки веко́в. Ами́нь.
Богородичен: Разреше́ние нам долго́в испроси́ и жития́ исправле́ние, Де́во,
песносло́вящим вели́чия Твоя́
и благочести́вым ра́зумом Тя сла́вящим.
Песнь 7
Ирмос: От Иуде́и доше́дше, о́троцы
в Вавило́не иногда́
ве́рою тро́йческою пла́мень пе́щный попра́ша, пою́ще:
отце́в Бо́же, благослове́н еси́.
Припев: Святи́и му́ченицы, моли́те Бо́га о на́с.
Просве́щшеся заре́ю Святы́я Тро́ицы, Богоблаже́ннии,
тьму́ пре́лести изгна́сте и сла́ву улучи́сте, песнопою́ще:
оте́ц на́ших Бо́же, благослове́н еси́.
Припев: Святи́и му́ченицы, моли́те Бо́га о на́с.
Ни́жняя оста́вльшии и Вы́шняя насле́довавшии,
Богоно́сный Ма́рко и Кири́лл Боже́ственный
да чту́тся, песнопою́ще:
оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Дрема́ние нераде́ния во вре́мя подвиго́в оттря́сше,
соверши́сте тече́ние и собо́ром страстоте́рпец, песнопою́ще, совокупи́стеся:
оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Из Тебе́ спасе́ние па́че ума́ же и сло́ва, Де́во,
возсия́ во тьме́ седя́щим сме́ртней
и до́ле су́щия Небе́сны соде́ла, вопию́щия:
оте́ц на́ших Бо́же, благослове́н еси́.
Песнь 8
Ирмос: Победи́тели мучи́теля и пла́мене
благода́тию Твое́ю бы́вше,
за́поведем Твои́м зело́ прилежа́ще,
о́троцы вопия́ху:
благослови́те, вся дела́ Госпо́дня, Го́спода.
Припев: Святи́и му́ченицы, моли́те Бо́га о на́с.
Победи́тели мучи́теля, свере́по судя́щаго, показа́вшеся,
нетле́нныя венцы́, му́ченицы, прия́сте, вопию́ще:
благослови́те, вся дела́ Госпо́дня, Го́спода.
Припев: Святи́и му́ченицы, моли́те Бо́га о на́с.
Щито́м любве́, страда́льцы, и ве́ры вооруже́ни,
вра́жия ополче́ния мече́м посеко́сте Боже́ственныя до́блести, вопию́ще:
благослови́те, вся дела́ Госпо́дня, Го́спода.
Припев: Святи́и му́ченицы, моли́те Бо́га о на́с.
На земли́ пострада́вше, в Вы́шних святи́и, пра́вды вене́ц от руки́ Христо́вы прия́сте, вопию́ще:
благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Троичен: Я́ко Еди́ницу Естество́м, я́ко Тро́ицу Тя честву́ю начерта́ньми,
О́тче Вседержи́телю, и Сы́не, и Душе́ Святы́й, взыва́я:
благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: Ста́мну Тя ма́нны жи́зненныя пропове́дуем, Благослове́нная,
трапе́зу, и жезл, и кади́льницу,
златы́й све́щник, го́ру же и две́рь,
купину́ неопали́му, престо́л Вы́шняго и ми́ра спасе́ние.
Песнь 9
Ирмос: Устраши́ся всяк слух
неизрече́нна Бо́жия снизхожде́ния,
я́ко Вы́шний во́лею сни́де да́же и до пло́ти
от Деви́ческаго чре́ва быв Челове́к.
Те́мже Пречи́стую Богоро́дицу, ве́рнии, велича́ем.
Припев: Святи́и му́ченицы, моли́те Бо́га о на́с.
Стопа́м, му́ченицы, Христа́, пострада́вшаго и стра́сти умертви́вшаго, после́довавше,
мно́гих ран искуше́ние прия́сте,
и, обличи́вше враго́в безбо́жных служе́ния, возвели́чистеся,
и А́нгелом я́ве уподо́бистеся.
Припев: Святи́и му́ченицы, моли́те Бо́га о на́с.
Яви́стеся у́глие о́гненно, приобщи́вшеся Бо́гу, всеблаже́ннии,
и попали́сте многобо́жия ве́щь благода́тию,
и к све́ту у́мному, ра́дующеся, преидо́сте, Богоблаже́ннии,
озаря́юще на́ша разуме́ния.
Припев: Святи́и му́ченицы, моли́те Бо́га о на́с.
Поста́вльше на ка́мени мы́сленнем душ ва́ших стопы́, всехва́льнии,
не поколеба́стеся мно́гих мук приложе́ньми.
Те́мже утвержда́йте на́ша при́сно мы́сли, кова́рствы вра́жиими коле́блемыя,
добропобе́днии му́ченицы.
Сла́ва Отцу́ и Сы́ну и Свято́му Ду́ху.
Взя́стеся к пресве́тлому свиде́тельства, страстоте́рпцы, краегра́дию, к высоте́ вели́цей,
и Ца́рство Бо́жие непоколеби́мое сподо́бистеся прия́ти,
Ма́рко свяще́ннейший, Кири́лле сла́вне,
его́же получи́ти всем нам моли́теся.
И ны́не и при́сно и во ве́ки веко́в. Ами́нь.
Богородичен: Сия́нием Твои́м, Отрокови́це, мы́сленным
просвети́ на́ша мы́сли, Богора́дованная, и се́рдца, и мудрова́ния,
я́ко да по стезя́м жи́зни пра́во ше́ствующе, ми́лость улучи́м,
возвеща́юще при́сно хвалы́ Твоя́.
