Священномученик Игна́тий Богоносец, Антиохийский, епископ

Святой Игнатий Богоносец имеет особое значение для нас, потому что он близко общался с апостолами, непосредственно от них слышал христианское учение и был свидетелем распространения и развития первых христианских общин. В своих семи письмах он запечатлел для нас апостольскую эпоху.

Святой Игнатий родился в Сирии в последние годы жизни Спасителя. Его жизнеописание повествует, что он был тем отроком, которого Господь взял на руки и сказал: «Если не обратитесь и не будете как дети, не войдете в Царство Небесное» (Мф.18:3). Богоносцем он назван потому, что, крепко любя Господа, он как бы носил Его в своем сердце. Он был учеником апостола и евангелиста Иоанна Богослова. Из послания святого Игнатия к смирнянам видно, что он был особенно близок к апостолу Петру и сопровождал его в некоторых его апостольских путешествиях. Незадолго до разрушения Иерусалима в 70 году, скончался Евод, один из семидесяти учеников Христовых, и его преемником на Антиохийской кафедре (в столице Сирии) стал Игнатий.

Святой Игнатий управлял Антиохийской церковью в течение 40 лет (67–107 гг..). В особом видении он удостоился увидеть небесное богослужение и услышать Ангельское пение. По образцу Ангельского мира он ввел на богослужениях антифонное пение, в котором два хора чередуются и как бы перекликаются. Это пение из Сирии быстро распространилось в ранней Церкви.

В 107 году во время похода против армян император Траян проходил через Антиохию. Ему доложили, что святитель Игнатий исповедует Христа, учит презирать богатство, хранить девство и не приносить жертву римским богам. Император вызвал святителя и потребовал, чтобы он прекратил свою проповедь о Христе. Старец отказался. Тогда его в оковах послали в Рим, где на потеху народа он был отдан на растерзание зверям в Колизее. По пути в Рим он написал семь посланий, которые сохранились до наших дней. В своих посланиях святой Игнатий просит христиан не пытаться спасти его от смерти: «Умоляю вас, не оказывайте мне неблаговременной любви. Оставьте меня быть пищею зверей, чтобы посредством их достигнуть Бога. Я – пшеница Божия. Пусть измелют меня зубы зверей, да сделаюсь чистым хлебом Христовым». Услышав о мужестве святителя, Траян прекратил гонения на христиан. Мощи его были перенесены в Антиохию, а впоследствии возвращены в Рим и положены в церкви во имя священномученика Климента, папы Римского.

В своем послании к Ефесянам святой Игнатий писал: «Храните веру и любовь и на деле показывайте себя христианами. Вера и любовь суть начало и конец жизни. Вера – начало, а любовь – конец, обе же в соединении суть дело Божие. Все прочее относящееся к добродетели от них происходит. Никто исповедующий веру не грешит, и никто стяжавший любовь не ненавидит».

Тропарь, глас 4

И нра́вом прича́стник,
и престо́лом наме́стник апо́столом быв,
дея́ние обре́л еси́, Богодухнове́нне,
в виде́ния восхо́д,
сего́ ра́ди сло́во и́стины исправля́я,
и ве́ры ра́ди пострада́л еси́ да́же до кро́ве,
священному́чениче Игна́тие,

моли́ Христа́ Бо́га

спасти́ся душа́м на́шим.

Ин тропарь, глас 4 Апо́стольских нра́вов подража́телю/ и престо́ла их сонасле́дниче,/ архиере́ев удобре́ние и му́чеников сла́во, Богодухнове́нне,/ на огнь, и меч, и зве́ри дерзну́л еси́, ве́ры ра́ди/ и, слово и́стины исправля́я,/ до кро́ве пострада́л еси́,/ священному́чениче Игна́тие,/ моли́ Христа́ Бо́га// спасти́ся душа́м на́шим.

Кондак, глас 4

От восто́ка днесь возсия́вый
и тварь всю просвети́вый уче́ньми,

му́ченичеством украси́ся, Богоно́сный и Боже́ственный Игна́тие.

Ин кондак, глас 3

Све́тлых по́двиг твои́х светоно́сный день
предпропове́дует всем в верте́пе Рожде́наго:
Сего́ бо жажда́я от любве́ наслади́тися,
потща́лся еси́ от звере́й снеде́н бы́ти;

сего́ ра́ди и Богоно́сец наре́клся еси, Игна́тие всему́дре.

Молитва

О, вели́кий святи́телю Богоно́сный Игна́тие! К тебе́ припа́даем и мо́лим тя, при́зри на ны гре́шныя, прибега́ющия к твоему́ заступле́нию! Умоли́ Го́спода, да прости́т нам вся согреше́ния на́ша: ты му́ченически ду́шу твою́ за ве́ру положи́л еси́, да́руй и нам му́жество во всем подража́ти тебе́. Ничто́ в жи́зни не возмогло́ отлучи́ти тя от любве́ ко Го́споду, ни ле́стныя обеща́ния, ни преще́ния, ни угро́зы, ниже́ са́мыя му́ки: ты с ра́достию предста́л пред зверьми́ на смерть лю́тую и, я́ко а́нгел, возлете́л еси́ во оби́тели Отца́ на́шего Небе́снаго; и моли́тва твоя́ мно́го мо́жет пред Го́сподем. Бу́ди же, святы́й уго́дниче, предста́телем у Го́спода: за ны, недосто́йнии рабы́ твоя́; помога́й и всем правосла́вным христиа́ном святы́ми твои́ми моли́твами ко всемогу́щему Бо́гу, да изба́вит ны от гла́да, тру́са, гра́да, бездо́ждия и смертоно́сных боле́зней, и да да́рует нам здр́авие и спасе́ние. Бу́ди же нам помо́щник ско́рый во вся́кой ско́рби, наипа́че в час кончи́ны на́шея яви́ся нам све́тлым защи́тником и хода́таем и умоли́ Го́спода сподо́битися всем нам, тебе́ ны́не те́пле моля́щимся, получи́ти по христиа́нской кончи́не Небе́сное Ца́рствие, иде́же вси святи́и вку́пе с тобо́ю ве́чно сла́вят Отца́ и Сы́на и Свята́го Ду́ха. Ами́нь.

2-я Молитва

О, велики́й уго́дниче Христо́в, священному́чениче Игна́тие! При́зри ми́лостивым твои́м о́ком и простри́ ко Го́споду те́плыя твоя́ моли́твы, и испроси́ душа́м на́шим оставле́ние прегреше́ний. Се бо мы, раби́ Бо́жии (имена), се́рдцем сокруше́нным и ду́хом смире́нным тебе́, хода́тая ми́лостива ко Влады́це и моли́твенника за ны, гре́шныя, призыва́ем, тебе́ у́бо про́сим: не пре́зри нас недосто́йных, твоея́ по́мощи тре́бующих, и исхода́тайствуй нам вся ко спасе́нию поле́зная, я́ко да получи́вше благода́ть и ми́лость, просла́вим всех благи́х Исто́чника и Дарода́теля, Бо́га Еди́наго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Канон на перенесение мощей священномученика Игнатия Богоносца

Минея, 29 Января.

Глас 4

Песнь 1

Ирмос: Мо́ря чермну́ю пучи́ну
невла́жными стопа́ми
дре́вний пешеше́ствовав Изра́иль,
крестообра́зныма Моисе́овыма рука́ма
Амали́кову си́лу в пусты́ни победи́л есть.

Припев: Священному́чениче Игна́тие, моли́ Бо́га о на́с.

Напра́вив к доброде́тели житие́ мое́,
све́том озари́ всели́вшияся благода́ти в тебе́, Богоно́се Игна́тие,
и страсте́й смуще́ние твои́ми моли́твами разори́.

Припев: Священному́чениче Игна́тие, моли́ Бо́га о на́с.

Я́коже земля́ ро́днейшая, был еси́,
стори́чествующи плодонося́й се́мя Христу́, Богоно́се Игна́тие,
ду́ши напоя́ющему одожде́нием Ду́ха.

Припев: Священному́чениче Игна́тие, моли́ Бо́га о на́с.

Разуме́в прозна́тельною си́лою твоея́ благоро́дие души́, всех Влады́ка и Бог,
Богоно́се Игна́тие,
сия́ньми благода́ти Богосве́тлыми просвети́.

Сла́ва Отцу́ и Сы́ну и Свято́му Ду́ху.

Луча́ми у́мнаго осия́емь со́лнца, всему́дре,
от восто́ка устреми́лся еси́ све́тло, я́коже чу́вственное со́лнце,
мрак за́падный озаря́я пропове́данием.

И ны́не и при́сно и во ве́ки веко́в. Ами́нь.

Богородичен: Тро́ицы Пребоже́ственныя, Всечи́стая, Еди́наго родила́ еси́,
из Тебе́ пло́тию я́вльшагося по нам
благоволе́нием Роди́теля и соде́йством Ду́ха Всесвята́го,
Богоневе́сто.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи:
Ты моя́ кре́пость, Го́споди,
и прибе́жище, и утвержде́ние.

Припев: Священному́чениче Игна́тие, моли́ Бо́га о на́с.

Исцели́ ум мой, озло́бленный лю́тыми страстьми́ плотски́ми, Игна́тие,
му́чениче Христо́в всеприснопа́мятне.

Припев: Священному́чениче Игна́тие, моли́ Бо́га о на́с.

Единому́дренна тя Христо́с апо́столов до́бре ве́дый,
поста́ви, Боже́ственным све́том сия́юща всем Це́рквам учи́теля.

Сла́ва Отцу́ и Сы́ну и Свято́му Ду́ху.

Умерщвля́ема тебе́ ра́ди Жизнода́вца зря,
поте́кл еси́ Того́ ра́ди смерть любо́вию претерпе́ти, Игна́тие.

И ны́не и при́сно и во ве́ки веко́в. Ами́нь.

Богородичен: Сло́во О́тчее, предочи́стившися, о Чи́стая, Ду́хом,
слове́снаго естества́ на благодея́ние родила́ еси́.

Седален, глас 3

Боже́ственным Ду́хом просвеще́н,
свере́пство мучи́телей дерзнове́нием па́стырским велему́дренно посрами́л еси́
и, преве́зся пре́лести пучи́ну,
ко приста́нищу Боже́ственному дости́гл еси́,
о́тче преподо́бне, Христа́ Бо́га моли́ дарова́ти нам ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Боже́ственнаго естества́ не отлу́чся, плоть быв во чре́ве Твое́м,
но Бог, вочелове́чся, пребы́сть,
и́же по Рождестве́ Ма́терь Тя Де́ву,
я́ко пре́жде Рождества́, сохрани́в Всенепоро́чну, Еди́н Госпо́дь.
Того́ приле́жно моли́ дарова́ти нам ве́лию ми́лость.

Песнь 4

Ирмос: Вознесе́на Тя ви́девши Це́рковь на Кресте́,
Со́лнце пра́ведное,
ста в чи́не свое́м,
досто́йно взыва́ющи:
сла́ва си́ле Твое́й, Го́споди.

Припев: Священному́чениче Игна́тие, моли́ Бо́га о на́с.

Богоно́сец нарица́емь тезоиме́нно, во Христа́ бо оде́яся житие́м,
вся помазу́еши све́тло, му́чеников утвержде́ние,
жела́нием венцы́ восприя́ти.

Припев: Священному́чениче Игна́тие, моли́ Бо́га о на́с.

Вжиля́емь, Игна́тие, си́лою на Кресте́ пригво́ждшагося тебе́ ра́ди, Богоно́се,
зве́ри бо изво́лил еси́ ми́ра отлучи́ти тя к твоему́ жела́емому Рачи́телю.

Припев: Священному́чениче Игна́тие, моли́ Бо́га о на́с.

Возжела́в красоты́ Влады́чни и к Нему́ раче́ние неосла́бно име́я,
Сего́ страда́нием усе́рдно поревнова́л еси́,
му́чениче Богоно́се Игна́тие.

Сла́ва Отцу́ и Сы́ну и Свято́му Ду́ху.

Укра́шен багряни́цею твои́х крове́й, святи́телю,
и ма́стию свяще́нства, таи́нниче, сия́еши, Христу́ зовы́й, ра́дуяся:
сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Из не су́щих вся́ческая Боже́ственною си́лою содева́я,
роди́ся из Тебе́, Богома́ти,
мир просвеща́я све́тлыми луча́ми Божества́ и Богоразу́мия све́тлостию.

Песнь 5

Ирмос: Ты, Го́споди, мой Свет,
в мир прише́л еси́,
Свет Святы́й, обраща́яй из мра́чна неве́дения
ве́рою воспева́ющия Тя.

Припев: Священному́чениче Игна́тие, моли́ Бо́га о на́с.

Ны́не ты, лице́м к лицу́ Христа́ зря, Игна́тие,
зерца́лом вои́стинну разре́шшимся, соедини́лся еси́ твоему́ Рачи́телю.

Припев: Священному́чениче Игна́тие, моли́ Бо́га о на́с.

Привле́кл еси́ просвеще́ние от исто́чника светода́тельнаго, Игна́тие:
пречи́стыми бо тя Христо́с дла́ньми держа́в, освяти́.

Сла́ва Отцу́ и Сы́ну и Свято́му Ду́ху.

Ум Ду́хом Бо́жиим стяжа́в просвеще́н, Игна́тие,
Богопи́санныя посыла́еши, я́ко скрижа́ли, зако́ны благода́ти.

И ны́не и при́сно и во ве́ки веко́в. Ами́нь.

Богородичен: Свы́ше Тебе́ глас ра́достно возопи́ А́нгел, Богоро́дице,
Влады́ки неизрече́нно возвеща́я Тебе́ зача́тие.

Песнь 6

Ирмос: Пожру́ Ти со гла́сом хвале́ния, Го́споди,
Це́рковь вопие́т Ти,
от бесо́вския кро́ве очи́щшися
ра́ди ми́лости от ребр Твои́х исте́кшею кро́вию.

Припев: Священному́чениче Игна́тие, моли́ Бо́га о на́с.

Му́дрости е́ллинския разори́л еси́ догма́ты,
Ипоста́сную име́я Бо́жию му́дрость, священнотаи́нниче,
и с шу́мом пре́лести па́мять погуби́л еси́.

Припев: Священному́чениче Игна́тие, моли́ Бо́га о на́с.

Не преста́й о соверша́ющих па́мять твою́ моля́ся, всеблаже́нне,
напа́стей изба́витися люте́йших и бед,
свяще́нник яви́вся Богоприя́тен.

Сла́ва Отцу́ и Сы́ну и Свято́му Ду́ху.

Му́жеством и му́дростию преизя́ществовав, преподо́бне,
пра́вды же добро́тою, Богоно́се му́чениче, и целому́дрия,
и окруже́нием доброде́телей яви́лся еси́ украша́емь.

И ны́не и при́сно и во ве́ки веко́в. Ами́нь.

Богородичен: Тя еди́ну посреде́ те́рния обре́т,
я́ко пречи́стый крин и удо́льный цвет, о Богома́ти,
Жени́х из утро́бы Твоея́, Сло́во, происхо́дит.

Кондак, глас 4

От восто́ка днесь возсия́вый
и тварь всю просвети́вый уче́ньми,
му́ченичеством украси́ся Богоно́сный и Боже́ственный Игна́тий.

Икос

Иереми́ю Бог из утро́бы освяти́в,
и пре́жде, е́же роди́тися, ве́дый, я́ко Прове́дец,
прия́телище бы́ти того́ Ду́ха Свята́го,
наполня́ет сего́ а́бие от ю́ностна жития́ и проро́ка же сего́ и пропове́дника
всем предвозвеща́ти посыла́ет свято́е на зе́млю Свое́ прише́ствие:
ро́ждся у́бо и Сам Бог от Де́вы, к про́поведи прише́д,
обре́те от младе́нства досто́йна Своея́ благода́ти ученика́,
Богоно́снаго и Боже́ственнаго Игна́тия.

Песнь 7

Ирмос: В пе́щи Авраа́мстии о́троцы перси́дстей,
любо́вию благоче́стия па́че, не́жели пла́менем, опаля́еми, взыва́ху:
благослове́н еси́ в хра́ме сла́вы Твоея́, Го́споди.

Припев: Священному́чениче Игна́тие, моли́ Бо́га о на́с.

Свяще́нства укра́шен ми́ром, преподо́бне, Боже́ственным
и му́ченическою кро́вию удобре́н,
во обои́х просия́л еси́,
благослове́н еси́ в хра́ме, зовы́й, сла́вы Твоея́, Го́споди.

Припев: Священному́чениче Игна́тие, моли́ Бо́га о на́с.

Законоположе́нием просвети́в мир весь,
хле́бом Небе́сным напита́л еси́ ве́рныя,
Влады́це твоему́ зову́щия:
благослове́н еси́ в хра́ме сла́вы Твоея́, Го́споди.

Припев: Священному́чениче Игна́тие, моли́ Бо́га о на́с.

Светолу́чными заря́ми, всеблаже́нне, просвеща́емь,
заре́ю светонача́льнаго ли́тия осия́вся,
Небе́сное прия́л еси́, ра́дуяся, наслажде́ние, Богоно́се,
му́чеников похвало́.

Сла́ва Отцу́ и Сы́ну и Свято́му Ду́ху.

Пшени́ца сый Бо́жия, я́коже рекл еси́, всеприснопа́мятне,
челюстьми́ сомле́н был еси́, му́чениче, звере́й
и Пита́ющему вся́ческая Боже́ственною бла́гостию
чисте́йший хлеб был еси́.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся,
Тобо́ю бо даде́ся ра́дость, Богоро́дице, зову́щим:
благослове́на Ты в жена́х еси́, Всенепоро́чная Влады́чице.

Песнь 8

Ирмос: Ру́це распросте́р, Дании́л
львов зия́ния в ро́ве затче́;
о́гненную же си́лу угаси́ша,
доброде́телию препоя́савшеся,
благоче́стия рачи́тели о́троцы, взыва́юще:
благослови́те, вся дела́ Госпо́дня, Го́спода.

Припев: Священному́чениче Игна́тие, моли́ Бо́га о на́с.

Стоя́ на суди́щи, му́дре,
Тро́ицу несозда́нную богосло́вил еси́ ума́ чистото́ю, свя́те,
мы́сленною же све́тлостию не устраши́вся мучи́тельских престо́лов суровства́,
но вопия́л еси́:
благослови́те, вся дела́ Госпо́дня, Го́спода.

Припев: Священному́чениче Игна́тие, моли́ Бо́га о на́с.

Упра́вив разу́мне твой ум Боже́ственными догма́ты, блаже́нне Игна́тие,
злоде́мона томи́теля, пре́лести предста́теля,
му́дрости то́ки весьма́ потопи́л еси́, вопия́:
благослови́те, вся дела́ Госпо́дня, Го́спода.

Припев: Священному́чениче Игна́тие, моли́ Бо́га о на́с.

Безме́рным сия́я све́том Божества́, му́чениче непобеди́ме,
безбо́жия непостоя́нную прогна́л еси́ тьму,
посла́ния светови́дная посыла́я пою́щим:
благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Неи́стовства и зия́ния звере́й не устраши́лся еси́, Боже́ственный Игна́тие,
Высоча́йшаго бо си́ла, из Де́вы возсия́вши,
всеору́жием Креста́ тя обложи́, пою́ща:
благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Ты Еди́на во всех ро́дех, Де́ва Пречи́стая,
Ма́ти яви́лася еси́ Бо́жия,
Ты Божества́ была́ еси́ жили́ще, Всенепоро́чная,
не опали́вшися огне́м Непристу́пнаго Све́та.
Те́мже вси Тя благослови́м,
Мари́е Богоневе́стная.

Песнь 9

Ирмос: Ка́мень нерукосе́чный
от несеко́мыя горы́, Тебе́, Де́во,
краеуго́льный отсече́ся,
Христо́с, совокупи́вый разстоя́щаяся естества́.
Тем, веселя́щеся, Тя, Богоро́дице, велича́ем.

Припев: Священному́чениче Игна́тие, моли́ Бо́га о на́с.

Раче́ние Боже́ственнейшее, блаже́нне, удержа́в души́ твоея́,
ми́ра веще́ственныя печа́ли огне́м невеще́ственным вся попали́
и жела́ний кра́ю венцено́сца тя предста́ви.

Припев: Священному́чениче Игна́тие, моли́ Бо́га о на́с.

В приста́нище све́тло устреми́лся еси́ тиша́йшее, Богоно́се, бу́ри волне́ний избе́г,
стремле́ния свире́пых и слове́сных звере́й,
и ны́не наслажда́ешися, прии́м ве́чное наслажде́ние.

Припев: Священному́чениче Игна́тие, моли́ Бо́га о на́с.

Испещре́нным украша́емь венце́м, священнотаи́нниче, преизя́ществуеши:
свяще́нства бо в тебе́ в еди́но сни́деся и свиде́тельства сла́ва,
и обои́ми я́ко прича́стник твоему́ Влады́це спросла́вился еси́.

Сла́ва Отцу́ и Сы́ну и Свято́му Ду́ху.

Я́ко священноявле́н сый, дерзнове́ние име́я к твоему́ Влады́це и Бо́гу,
соверша́ющим ве́рою па́мять твою́
от напа́стей, Игна́тие, ны́не изба́витися моли́ся.

И ны́не и при́сно и во ве́ки веко́в. Ами́нь.

Богородичен: Угаси́ страсте́й мои́х пла́мень росолу́чною Твое́ю моли́твою,
я́же во утро́бе прие́мши огнь Боже́ственный неопа́льно, Всечи́стая:
Тя бо наде́жду и́мам спасе́ния моего́, Богоневе́сто.

Светилен

И́мать све́тлый пра́здник твой Христо́ва Це́рковь,
я́ко неотъе́млемое бога́тство, твоя́ прие́мши Боже́ственныя мо́щи,
иде́же и ми́ро источа́ют всем, Игна́тие Богоно́се.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Свет, возсия́вый безле́тне от Отца́ пре́жде век,
в ле́та ны́не напосле́док из Тебе́, Де́во, изы́де на спасе́ние ми́ра,
к Нему́же не преста́й о лю́дех Твои́х моли́ти.

Акафист священномученику Игнатию Богоносцу

Кондак 1

Избранный страстотерпче и избранниче Христов, святителю Игнатие, похвальная приносим ти пения. Ты же, предстояй со ангелы у Престола Всевышняго, не престай молитися о нас, усердно вопиюших ти: Радуйся, Богоносный Игнатие, великий и преславный страстотерпче.

Икос 1

Ангелом уподобился еси, егда Господь, прием тя на Свои пречистыя руце, постави тя посреде ученик Своих, и возложь руку Свою на твою главу, рече им: «Аще не обратитеся и будите яко дети, не внидите в Царствие Божие». Сего ради, преклоньше колена, вопием ти:

Радуйся, Богом носимый.

Радуйся, яко Бога выну в сердце своем имел еси.

Радуйся, рабе благий и верный.

Радуйся, мужу желаний.

Радуйся, яко от юности Христа всем сердцем возлюбил еси.

Радуйся, яко всецело Ему предался еси.

Радуйся, Богоносный Игнатие, великий и преславный страстотерпче.

Кондак 2

Видяще благочестное житие святаго Иоанна Богослова, учителя твоего, желанием возжелал еси вкупе с ним послужити Господу, проповедуя святое Евангелие людем, седящим во тьме и сени смертней, и научая их пети Единому истинному Богу: Аллилуиа.

Икос 2

Разумев духом, яко ангели на небеси славят Бога во Святей Троице, Творца неба и земли, друг ко другу взывающе: Свят, Свят, Свят Господь Саваоф, ты и в земной Церкви уставил еси такожде пети. Сего ради, со умилением взываем ти:

Радуйся, Церкви Божией столпе и утверждение.

Радуйся, светильниче православия.

Радуйся, яко был еси епископом Церкви, идеже первее имя христиан наречеся.

Радуйся, яко от апостолов первоверховных рукоположение прияти сподобился еси.

Радуйся, яко удостоился еси зрети святыя Ангелы, славящия Бога.

Радуйся, яко ныне и сам со Ангелы славиши Господа.

Радуйся, Богоносный Игнатие, великий и преславный страстотерпче.

Кондак 3

Сила Вышняго укрепи тя, святый Игнатие, егда представ Траяну, не убоялся еси прещения царева, но мужественно исповедал еси Христа Бога быти истинна, и нечестие языческое посрамил еси, верныя же научил еси Богу воспевати: Аллилуиа.

Икос 3

Имея благодать от Господа просвещати люди Божия, ты наставлял еси я к разуму Божественному словом, паче же житием, образ быв любовию, духом, верою, чистотою и смирением. Сего ради воспеваем ти:

Радуйся, яко имя Божие пронесл еси пред цари и языки.

Радуйся, яко добре упасл еси паству твою.

Радуйся, смирением стяжавый высокая.

Радуйся, нищетою приобретый богатая.

Радуйся, апостольских преданий хранителю.

Радуйся, Церкви Божией верный страже и мудрый строителю.

Радуйся, Богоносный Игнатие, великий и преславный страстотерпче.

Кондак 4

Бурю злобы имея в сердце своем Траян, призвав тя, с гневом вопроси: «Ты ли еси Богоносец? Почто люди моя развращаеши?» Ты же отвещал еси: «Аз есмь Богоносец, но люди твоя не развращаю, а спасаю». Кто не ублажит сие твое исповедание веры? Мы же, величающе тя, Богу воспеваем: Аллилуиа.

Икос 4

Слышавше людие вернии твое исповедание, славяху Бога, Траян же, скрежеща зубы своими, паки вопроси тя: «Почто зовешися Богоносец?» Ты же рекл еси: «Яко Бога моего в сердце своем ношу». Сего ради воспеваем тя сице:

Радуйся, верный воине Царя Небеснаго.

Радуйся, поборниче веры непобедимый.

Радуйся, пастырю добрый.

Радуйся, молитвенниче о душах наших.

Радуйся, яко Божественным Духом просвещен, свирепство мучителя пастырским дерзновением посрамил еси.

Радуйся, яко наставляя стадо Христово, многих светом Богоразумия просветил еси.

Радуйся, Богоносный Игнатие, великий и преславный страстотерпче.

Кондак 5

Вся красная мира в уметы вменяя, да Христа приобрящеши, «Кто ны разлучит от любве Божия», — вопиял еси, Игнатие, — «Сладка мне скорбь, любезны узы за Желаемаго, гонения ми сладша паче отечества, болезни — паче здравия телеснаго». Мы же, славную память твою чтуще, поем Богу: Аллилуиа.

Икос 5

Видя тя исповедника веры Христовы непобедима, осуди тя безбожный Траян на смерть: ты же, радуяся, возопил еси: «Сладка мне смерть, мне еже жити — Христос, и еже умрети — приобретение есть: к Нему иду, Того люблю, Того получити надеюся». Сего ради ублажаем тя, святый Игнатие, сице:

Радуйся, желание имевый разрешитися и со Христом быти.

Радуйся, жертва Богу чиста.

Радуйся, подражателю Христовых страстей.

Радуйся, яко Христови сораспялся еси.

Радуйся, яко кровь за Христа излиял еси.

Радуйся, яко кровию своею святительскую одежду украсил еси.

Радуйся, Богоносный Игнатие, великий и преславный страстотерпче.

Кондак 6

Проповедник терпения, Богоносный Игнатие, явился еси, егда с радостию услышал еси осуждение свое на растерзание лютыми зверьми. Ублажая твое твердое и неустрашимое исповедание веры, и дивяшеся велией благодати, в тебе пребывающей, поем Богу ангельскую песнь: Аллилуиа.

Икос 6

Возсиял еси яко солнце, угодниче Божий, красотою души твоея, егда воины возлагаху на тя узы, ты же, яко ризу спасения и одежду веселия приял еси сие новое мучение, и на страдание в Рим, аки на брачный пир шествовал еси. Сего ради воспеваем ти:

Радуйся, Церкви Антиохийския славо.

Радуйся, Богомудрых отцев красото и удобрение.

Радуйся, цевнице Духа Святаго.

Радуйся, воине Христов непобедимый.

Радуйся, яко гордость Траянову низложил еси.

Радуйся, яко диавола посрамил еси.

Радуйся, Богоносный Игнатие, великий и преславный страстотерпче.

Кондак 7

Хотя, святителю Христов, изыти от Антиохи, прилежно молил еси Господа не оставити паствы твоея. Людие же плакаху и рыдаху, зряще тя на смерть ведома; ты же, благословляя их, воспевал еси Богу: Аллилуиа.

Икос 7

Дивный во святых Бог утеши тя, святый Игнатие, егда на пути в Рим, ведома тя десятию воинами, срете вы в Смирне святый Поликарп, муж праведный. Ты же, беседуя с ним, радовался еси о Бозе Спасе твоем. Сего ради ублажаем тя:

Радуйся, яко веру во Христа сохранил еси.

Радуйся, яко надежду несумненну имел еси.

Радуйся, яко имя Христово во всей вселенней прославил еси.

Радуйся, яко уготовася тебе венец правды.

Радуйся, верный служителю Господень.

Радуйся, светильниче Божий, горяй и светяй.

Радуйся, Богоносный Игнатие, великий и преславный страстотерпче.

Кондак 8

Странно и чудно бе шествие твое в Рим на место мучения: воини яко преступника ведяху тя, людие же Божии со епископы и пресвитеры яко ангела Божия сретаху тя, и, сладостно послушая словес твоих, воспеваху Богу: Аллилуиа.

Икос 8

Желание имый разрешитися и со Христом быти, ты, шествуя в Рим на страдания, радостно воспевал еси: «Пшеница Божия есмь: да буду зубы зверей сотрен и чист хлеб Богу явлюся». Сего ради дивящеся терпению твоему и славяще Божие о тебе смотрение, воспеваем сице:

Радуйся, образе мужества и терпения.

Радуйся, непоколебимое правило веры и благочестия.

Радуйся, непобедимый исповедниче Христов.

Радуйся, яко не убоялся еси ни огня, ни меча, ниже зубов рыкающих львов.

Радуйся, яко терпением своим ангелов Божиих возвеселил еси.

Радуйся, яко мужеством своим имя христиан прославил еси.

Радуйся, Богоносный Игнатие, великий и преславный страстотерпче.

Кондак 9

Всего себя предав Богу, ты страшился еси, да не терпящии зрети твоих страданий воспретят тебе восприяти их. Сего ради писанием умолял еси: «О, возлюбленнии! Помозите ми сораспястися Христу, пострадати и умрети за Него, да и царствую, и живу с Ним во веки, воспевая Богу: Аллилуиа.»

Икос 9

Вития многовещанныя не могут по достоянию воспети твоя страдания: сего ради и нам удобее любити молчание, но побеждаеми любовию твоею, от избытка сердца вопием ти:

Радуйся, яко многих ко Христу привел еси.

Радуйся, яко писаниями своими путь ко спасению уяснил еси.

Радуйся, яко жаждущия спасения напоил еси благочестия водами.

Радуйся, яко душевными очима ослепленных светом Богоразумия просветил еси.

Радуйся, яко грехом разслабленных воздвигл еси на путь спасения.

Радуйся, яко скорбящия и плачущия утешил еси.

Радуйся, Богоносный Игнатие, великий и преславный страстотерпче.

Кондак 10

Спасти хотя душу свою, ты, святый Игнатие, пламенел еси серафимскою любовию к Богу: «О, братия!», — молил еси христианы, — «желайте мне смерти: она приведет мя ко Христу: звери мне радостни, огнь — роса мне, тщуся умрети, да живу со Христом». Темже вселился еси в небесныя обители, идеже со Ангелы Богу воспеваеши: Аллилуиа.

Икос 10

Царь Небесный, Утешитель Благий, Дух истины постави тя пасти Церковь Христову, право правити слово истины, верныя люди поучати, противящияся обличати. Сего ради зовем ти:

Радуйся, учителю благочестия.

Радуйся, обличителю нечестия.

Радуйся, душу свою положивый за овцы своя.

Радуйся, стяжавый венец мученичества.

Радуйся, непрестанно в жизни моливыйся за христианы.

Радуйся, и по смерти за ны моляйся.

Радуйся, Богоносный Игнатие, великий и преславный страстотерпче.

Кондак 11

Воспевая Господа и непрестанно моляся Ему, ты, святый Игнатие, поучал еси и вверенныя тебе люди творити такожде: «Молитеся непрестанно, кротость ваша да будет известна всем. В братолюбии пребывайте, да не будут в вас распри. Подражайте за ны Распятому, веруйте в Него, Он есть живот вечный: веруяй в Него, аще и умрет — оживет». Мы же, прославляя Бога, даровавшаго нам таковаго наставника, вопием Ему: Аллилуиа.

Икос 11

Яко солнце доблестно обтекл еси землю от восток до запад, и зашед незаходимо от земли ко Христу, просвещая мир своим учением. Сего ради взываем ти:

Радуйся, угодниче Христов.

Радуйся, мучениче и пастырю.

Радуйся, скорый в бедах помощниче.

Радуйся, гонимых за правду защитниче.

Радуйся, немощных врачу.

Радуйся, покров и заступление притекающих к тебе с верою.

Радуйся, Богоносный Игнатие, великий и преславный страстотерпче.

Кондак 12

Благодать велию и богатую милость приял еси от Христа Бога нашего молитися за всех, с верою призывающих тя. Темже молим тя: помози нам предстательством твоим у Господа сохранити в сердце своем веру несумненну, упование непреложно, любовь к Богу и ближнему нелицемерну, подвигом добрым подвизатися, воспевая Спасителю нашему: Аллилуиа.

Икос 12

Поюще подвиги твоя, почитаем страдания твоя, восхваляем мужество твое, ублажаем святую кончину твою, и прилежно молим тя: услыши ны, взывающия ти:

Радуйся, течение жизни славно скончавый.

Радуйся, кровию своею истину Христова учения запечатлевый.

Радуйся, получивый от Христа венец правды, уготованный всем возлюбившим явление Его.

Радуйся, во светлостех святых вселивыйся.

Радуйся, яко со Архангелы ликовствуеши.

Радуйся, яко лицезрением Божиим наслаждаешися.

Радуйся, Богоносный Игнатие, великий и преславный страстотерпче.

Кондак 13

О, многострадальный и предивный мучениче, Богоносный Игнатие! Приими от нас недостойных сие малое хвалебное пение и умоли Бога, да сохранит ны и защитит Своею благодатию от всякаго зла в сей жизни, и во время кончины нашея не оставит нас, и по кончине сподобит Царствие Небесное наследовати и вечно воспевати Ему: Аллилуиа.

[Се́й конда́к глаго́лется три́жды.]

Икос 1

Ангелом уподобился еси, егда Господь, прием тя на Свои пречистыя руце, постави тя посреде ученик Своих, и возложь руку Свою на твою главу, рече им: «Аще не обратитеся и будите яко дети, не внидите в Царствие Божие». Сего ради, преклоньше колена, вопием ти:

Радуйся, Богом носимый.

Радуйся, яко Бога выну в сердце своем имел еси.

Радуйся, рабе благий и верный.

Радуйся, мужу желаний.

Радуйся, яко от юности Христа всем сердцем возлюбил еси.

Радуйся, яко всецело Ему предался еси.

Радуйся, Богоносный Игнатие, великий и преславный страстотерпче.

Кондак 1

Избранный страстотерпче и избранниче Христов, святителю Игнатие, похвальная приносим ти пения. Ты же, предстояй со ангелы у Престола Всевышняго, не престай молитися о нас, усердно вопиюших ти: Радуйся, Богоносный Игнатие, великий и преславный страстотерпче.

Молитва

О, великий святителю, Богоносный Игнатие! К тебе припадаем и молим тя: призри на ны, грешныя, прибегающия к твоему заступлению, и умоли Господа, да простит нам вся согрешения наша. Ты мученически душу твою за веру положил еси, даруй и нам мужество во всем подражати тебе. Ничесо в жизни не возмогло отлучити тя от любви ко Господу: ни лестная обещания, ни прещения, ни угрозы, ниже самыя муки. Ты с радостию предстал еси пред зверьми на смерть лютую, и яко Ангел возлетел еси во обители Отца нашего Небеснаго. Сего ради и молитва твоя много может пред Господем. Буди же, святый угодниче, предстателем за ны пред Спасителем нашим. Помогай всем православным христианом святыми твоими молитвами ко всемогущему Богу, да избавит ны от глада, труса, града, бездождия и смертоносных болезней, и да дарует нам здравие и спасение. Буди же нам помощник скорый во всякой скорби, наипаче же в час кончины нашея явися нам светлым защитником и ходатаем, и умоли Господа сподобитися всем нам, тебе ныне тепле молящимся, получити по христианстей кончине Небесное Царствие, идеже вси святии вкупе с тобою славят Отца и Сына и Святаго Духа. Аминь.